رواية ارواح هائمة الفصل الرابع والعشرين 24 بقلم آثر توفيق
الحلقة 24
فتح جندى الحراسة الباب وسمح للشيخ حليم بالدخول ليسمع صوتا جهوريا من الداخل يقول
صلاح :: الشيخ عبد الحليم العطار منورنا هنا ؟ ايه النور ده كله ؟
حليم :: ازيك يا صلاح باشا بقيت لواء واللا لسه ؟
صلاح :: يا راجل انا لواء بقالى كام سنه انا الشهر الجاى حابقى فريق
تعانق الرجلان بحرارة ثم انصرف المرافق وقال صلاح لجندى الحراسة
صلاح :: قهوة عمك الشيخ حليم مظبوط زيى يا سعيد وما تنساش الغدا علشان يدعيلك ده راجل دعوته مستجابه
انصرف الجندى فاشار صلاح الى انتريه فى ركن المكتب
صلاح :: تعالى يا حليم نقعد هنا انت مش غريب
جلسا وبعد قليل حضرت القهوة وبعد انصراف الجندى ساله
صلاح :: خير يا حليم ايه المشكله ؟
حليم :: ظابط فى امن الدوله عامللى مشاكل كتير من غير سبب او لاسباب مش قادر اعرفها
صلاح :: عمل ايه معاك ؟
حليم :: قبض عليا بتهمة الاشتراك فى تنظيم سرى وقعدت كام يوم من غير تحقيق ولا تفتيش وبعدها خرجنى من غير اى اجراء
لمعت عينا صلاح بغضب لم يظهر على ملامحه التى اعتادت على اخفاء ما بداخله وهو يسال بهدوء
صلاح :: الكلام ده امتى ؟
حليم :: من حوالى تمن شهور
انتفض صلاح غاضبا وهو لم يكن من السهل ابدا ان يغضب
صلاح :: تمن شهور ؟ تمن شهور من غير ما اخد خبر يا حليم ؟ طيب انا جيت زرت مدام كوثر فى المستشفى مرتين ما قلتش ليه ؟
حليم :: كنت فاكر انه بلاغ كيدى واتاكدوا من صحته زى ما قال لحد ما جه امبارح طلب ايد نرمين وبيهددنى ان لسه فيه تحريات
صلاح :: بيهددك انت يا حليم ؟ انا امحيه من على وش الارض اسمه ايه الظابط ده ورتبته ايه ؟
حليم :: اسمه ايمن رشدى ورتبته مش عارف انا ما بافهمش فى الرتب بتاعتكم دى خالص بس اسمع انا مش عاوز اذيه كفايه انه يبعد عننا
صلاح :: لسه طيب زى ما انت ياعم الشيخ حاضر انت الكلمه اللى تقولها امر
ورفع سماعة الهاتف وطلب رقما خارجيا
صلاح :: صباح الخير يا محمود باشا اخبار معاليك ايه ؟ ... وحياتك كنت باسال على قضيه بتحققوا فيها بخصوص تنظيم سرى مع واحد اسمه الشيخ عبد الحليم العطار ..... امام مسجد ايوه ايه معلوماتك عنها ؟ .... فى انتظار تليفونك
وضع السماعة قائلا لحليم
صلاح :: ساعة زمن حاعرف ايه حكاية القضيه والتنظيم وعمل ايه تانى ؟
حليم :: بس هو جه طلب ايد نرمين وانا حسيت انه انسان معدوم الضمير وما عندوش دين ولا اخلاق رفضت بيقول القضيه لسه مفتوحه
صلاح :: خلاص لو مفتوحه انا حاقفلها لكن بعد اذنك لازم قرصة ودن علشان يعرف ان حليم وعيلته خط احمر مجرد قرصة ودن خفيفه . الاول نتغدى
كان جندى الحراسة يدخل بالطعام ووضعه امامهم وانصرف وبعد الغذاء دخل لرفع الاطباق فسال صلاح
صلاح :: تشرب شاى يا حليم بعد الغدا ؟
حليم :: ماشى
صلاح :: عمك الشيخ حليم بيحب الشاى بالقرنفل يا سعيد
الجندى :: تحت امرك يافندم
انصرف ليعود بالشاى بعد قليل وبعد خروجه دق الهاتف فرفع السماعة
محمد :: صلاح باشا احنا ما عندناش اى قضيه مشابهه للى معاليك قلته
صلاح :: ازاى الراجل قعد عندكم كام يوم وخرج من حوالى تمن شهور
محمود :: مين الظابط اللى كان ماسك القضيه وحقق معاه ؟
صلاح :: اسمه ايمن رشدى يا ريت ما تقولش مافيش حد بالاسم ده
محمود :: ايمن رشدى ؟ لا موجود طيب بعد اذنك عشر دقايق وارجعلك
وضع صلاح السماعة ونظر لحليم مندهشا
صلاح :: غريبه مافيش اى بيانات ايه الظابط ده كان عامل الموضوع مع نفسه ؟ بيشغل الجهاز لحسابه واللا ايه ؟
حليم :: هو قاللى اخلى نرمين تسال على واحده زميلتها اسمها هاله عبد الحافظ او عبد الظاهر مش فاكر قوى وكمان واحد اسمه ثائر بس مش عارف ثائر ايه هو طالب معاهم فى الجامعه برضه هو سالنى عليه بس مش عارف ايه علاقتى بيه
دق صلاح الجرس فدخل جندى الحراسة فقال
صلاح :: هاتلى كل ملفات مكتب رشدى وبسرعه
انصرف الجندى ودق جرس الهاتف مرة اخرى
محمود :: صلاح باشا مافيش اى حاجه من اللى حضرتك بلغتنى بيه طول السنتين اللى فاتوا ومعلوماتنا عن الشيخ عبد الحليم العطار انه رجل دين وسطى معتدل ومالوش اى علاقه بالسياسه
صلاح :: واضف لمعلوماتك انه قريبى ويعتبر بالنسبه لى خط احمر لكن مع احترامى لمعلوماتك انا معلوماتى مؤكده
محمود :: محتمل فيه لبس يافندم لكن ....
صلاح :: لكن انا حاعرف بطريقتى متشكر يا محمود بيه
انهى المكالمة ودخل جندى الحراسة بالملفات ووضعها على الطاولة امامه فتصفحها صلاح واحدا واحدا ثم توقف عند احدها وطلب رقما
صلاح :: اللواء صلاح النمر يابنى ادينى الرائد عادل عز الدين
استمع لحظة ثم قال
صلاح :: المقدم عادل عز الدين ؟ معاك اللواء صلاح النمر
سمع صلاح صوت جلبة وحركة كرسى دلته ان عادل قام واقفا وهو يقول
عادل :: تمام يافندم رائد عادل عز الدين يا فندم تحت امرك
صلاح :: اسمك فى حركة الترقيات الجايه يا سيادة المقدم وشايف فى ملفك انك من الكفاءات النادره وطالب تتنقل قسم العمليات الخارجيه
عادل :: تمام يافندم ده املى
صلاح :: طيب اثبت كفاءتك عملى وانا اوافق على الطلب
عادل :: اوامرك يا فندم
صلاح :: عاوز معلومات عن ظابط امن دوله اسمه ايمن رشدى ده اولا ثانيا الظابط ده حقق فى قضيه مالهاش اثر فى الجهاز مع الشيخ عبد الحليم العطار وانت يمكن تعرف علاقتى بابن عمه الشهيد محمود العطار الله يرحمه عاوز اعرف اللى حصل كامل وفيه حاجه كمان عاوز معلومات عن بنت فى كلية التجاره اسمها هاله عبد الحافظ او عبد الظاهر وواحد اسمه ثائر بس حاجيبلك اسمه كامل بالليل
عادل :: حضرتك قصدك ثائر توفيق النشار يافندم ؟
صلاح :: ما اعرفش الاسم كامل لكن هو طالب فى كلية التجاره هو كمان انت تعرفه ؟
عادل :: حضرتك عاوز المعلومات دى امتى ؟
صلاح :: ما بتردش على سؤالى ليه انت تعرف ثائر ده ؟
عادل :: اعتقد انى اعرفه لكن ما عنديش معلومات كامله لمعاليك حضرتك عاوز المعلومات دى امتى ؟
صلاح :: خد وقتك انا نازل اسكندريه قريب زياره عائليه وعاوز المعلومات كامله وبصفه شخصيه وتفضل بينى وبينك ما حدش يعرف اى حاجه وكمان عاوز مراقبه دقيقه لايمن علشان عاوزك تجيبه عندى بس من غير اثر ولا يعرف هو فين
عادل :: اوامرك نافذه يا صلاح باشا
__________________
يوم الخميس ذهبت الفتيات لزيارة كوثر كالعادة وتحلقن حولها كالفراشات حول الضوء وكانت حالتها قد تحسنت كثيرا وخف الثقل فى لسانها لحد كبير وكن يتسابقن للمبيت معها
نرمين :: ايه يا ست ماما استغنيتى عنى خلاص ؟ امال بقالها تلات ايام معاكى
امال :: ايه البرود ده وانتى مالك ؟ مش ماما هى اللى بتختارنى علشان بتحبنى انا اكتر منكم
وطوقت خصر كوثر بذراعيها فضربتها بخفة على وجهها قائلة
كوثر :: يا بت يا عفريته انتى بتغيظيهم ؟ لعلمك انا باحبكم كلكم زى بعض مافيش واحده اكتر من التانيه انتوا الاربعه غلاوه واحده
قالت باسنت بمرح مفتعل تحاول به اخفاء ضيقها
باسنت :: علشان كده كلهم باتوا معاكى الا انا الوحيده اللى منسيه
كوثر :: يا حبيبتى عمرك ما تكونى منسيه ابدا وعلشان تصدقى انتى اللى حتباتى معايا النهارده
قامت باسنت ترقص فى وسط الغرفة وتخرج لسانها للباقيات حين دخل الطبيب قائلا
مراد :: حظك وحش يا بسبوسه مش ماما كوثر بتقول لك يا بسبوسه ؟ مش حينفع تباتى معاها النهارده هنا
شعرت بالصدمة فتوقفت عن الرقص وضربت الارض بقدمها
باسنت :: ليه يا دكتور ؟
مراد :: علشان النهارده حتبات فى بيتها
تعالت صيحات الفرح والتهليل بينما قالت باسنت بتحدى
باسنت :: طيب ايه رايك حابات معاها برضه الليله دى وفى اوضتها كمان
كوثر :: يا بنات كفايه صوت عالى احنا فى مستشفى
مراد :: خليهم على راحتهم المستشفى دى بتاعتكم ياست الكل
كوثر :: حقيقى يا دكتور حتكتبلى على خروج النهارده ؟
مراد :: انا كتبت خروج فعلا ولو انى مش عاوزك تخرجى اصلك بتيجى تنورى المستشفى انما اعمل ايه الاخبار بتقول ان فيه مظاهرات فى خالد ابن الدليد وسيدى بشر كلها بتطالب برجوعك لبيتك
ثريا :: الناس عامله مظاهرات علشان كوثر ترجع بيتها ؟
مراد :: طبعا قاعدين فى الضلمه من يوم ما دخلت المستشفى
ضحكوا فاستاذن فى الانصراف تاركا اياهم يجهزون حقيبتها وخرج حليم لتسوية حساب المستشفى ثم مر عليه يساله
حليم :: اخبارها ايه دلوقت يا دكتور ؟
مراد :: الحمد لله احسن بكتير كان المفروض تقعد فى المستشفى لحد ما نشوف حنعمل ايه فى العمليه لكن حالتها النفسيه حتسوء اكتر لذلك ارجو انكم تتعاملوا معاها بحرص
حليم :: طيب هى التكلفه تقريبا قد ايه ؟
مراد :: حوالى ربع مليون دولار العمليه والعلاج قبل وبعد
حليم :: يعنى بتذاكر السفر والمصاريف والاقامه حنعدى مليون جنيه بكتير
مراد :: المدام حتقعد هناك حوالى شهرين منهم عشرين يوم تجهيز قبل العمليه واربعين يوم متابعه بعد العمليه لكن بالنسبه للاقامه محلوله اصلى كنت بادرس هناك وقابلت مراتى هناك واتجوزتها اصل مراتى المانيه وهى عندها شقه هناك حتقعدوا فيها حتوفروا مبلغ كبير وقريبه من المستشفى
حليم :: انت مش قلت انك حتسافر معاها وتكون موجود فى العمليه ؟
مراد :: اكيد لكن انا ممكن اقعد فى استراحة المستشفى عادى مش مشكله
تنهد الشيخ حليم قائلا
حليم :: لا حول ولا قوة الا بالله ربنا يجعل لنا بعد الضيق فرجا وبعد العسر يسرا ان شاء الله
#ارواح_هائمة
عادت كوثر الى بيتها بعد ثلاثة شهور كاملة وكانت فرحة جيرانها واهلها كبيرة التفوا حولها يهنئونها على السلامة بينما نعمة فى الشارع تطلق الزغاريد وقد اعطى الشيح حليم المفتاح لحسين ليصعد بحقيبتها فيما انزل فؤاد حمولته من البنات وانصرف بهدوء كعادته على وعد بالعودة قريبا .
واخيرا صعدت لاعلى تحيط بها البنات وفتحت باب شقتها ( ااااااه كأنى كنت فى غربه طويله يا سلااام عطر الليمون اللى باحبه يا سلام يا نرمين عمرك ما تنسى اللى بتحبه ماما)
باسنت :: انا اللى رشيت المعطر اصل بابا حليم قال من تلات ايام انك راجعة خلاص
( مش نرمين وبس اللى ما بتنساش كل بناتى فاكرين اللى باحبه )
داليا :: عملتلك بقى ملوخيه بالارانب حتاكلى صوابعك وراها بس كلى صوابعى انا حرام صوابعك الجميله دى
ثريا :: يا جماعه سيبوها تقعد ترتاح بقى ايه ده
جلست على اريكتها المفضلة واسرعت نعمه تجلب شبشبها وتجلس على الارض لتخلع حذاءها
كوثر :: بتعملى ايه يا نعمه
نعمة :: باعمل ايه يعنى علشان تاخدى راحتك
حسين :: ادخل الشنطه فين يا ست الكل
كوثر :: دخلها الاوضه دى شكرا يا حسين تسلم ايدك كتر الف خيرك يا نعمه قومى
نعمه :: باقول يا ست الكل عندى طلب والنبى ما تكسفينى
كوثر :: قولى يا مغلبانى موال كل مره
نعمة :: باقول العيال كبروا ورحمه اتجوزت وسافرت مع جوزها السعوديه ومحمود اتخرج وبقى ظابط وبييجى كل شهر مره وما فاضلش غير كوثر الصغيره بقت فى الجامعه وتقدر تخدم نفسها
كوثر :: استنى يا حسين ما تنزلش عاوزاك قولى على طول يا نعمه عاوزه ايه
نعمه :: باقول يعنى نفسى تخلينى معاكى هنا اشوف طلباتك واخدمك
كوثر :: مش باقول موال كل مره ؟ انتى عارفه انى ما باحبش حد يخدمنى وعمرى ما جبت شغاله ولما باحتاج حد يساعدنى فى دخلة عيد واللا حاجه باناديكى وبعدين انتى افتكرتى كل دول ونسيتى جوزك ؟
نعمه :: لا حسين خلاص بقى عجز وما عادش منه رجا
كوثر :: يا بت بطلى قلة ادب
ضربتها بخفة على وجهها وضحكوا جميعا حتى حسين
كوثر :: لا انا عندى حاجه احسن من كده انت كلمت حسين يا شيخ حليم ؟
حليم :: انا سايبك انتى لما تطلعى بالسلامه تكلميهم
كوثر :: شوف يا حسين انتوا بقالكوا معانا عشرين سنه يعنى لو فكرت ترجع البلد يبقى ليك عندنا مكافاه كبيره تقدر تشترى بيها حتة ارض تامن بيها مستقبل عيالك وتسيب لهم حاجه للزمن
تململت نعمة وزاغ بصرها وابتلع حسين ريقه بصعوبه وقال
حسين :: احنا حصل منا حاجه زعلتك يا ست كوثر ؟
كوثر :: لا طبعا انا باتكلم على مصلحتكم ومستقبل عيالكم
نعمه :: وانتى قصرتى مع عيالنا واللا الارض حتعمل لهم اكتر منك ؟ ده الجهاز اللى جبتيه لرحمه احسن من جهاز بنت العمده
كوثر :: يا نعمه رحمه دى بنتى وانا اللى مربياها هى واخواتها
نعمة :: يا ست كوثر انا مش عاوزه اخدمك بفلوس والله ما عاوزه فلوس ولو على الشهريه بتاعة حسين نقصوها واللا مش عاوزينها خالص احنا ما بنصرفش منها جنيه لا فى اكل ولا لبس ولا تعليم عيال كله من خيركم
كوثر :: يا بنتى كله من خير ربنا وفضله وعرق جوزك
حليم :: يا نعمه يا بنتى احنا بنفكر فى صالحكم اقله يبقى اسمكم اصحاب ارض
نعمة :: يا عم الشيخ مش عاوزين انا يوم ما ابعد عن ست كوثر اموت بحسرتى
حسين :: يا عم الشيخ انت شايف انى مقصر فى حاجه واللا رجلى مانعانى من خدمتكم ؟
حليم :: ابدا والله يا حسين يابنى الحكايه كلها ...
حسين :: انتوا مش عاوزيننا ؟
كوثر :: لا يا حسين ما تفهمش غلط والله احنا بنفكر فى مصلحة عيالكم انما احنا عمرنا ما نستغنى عنكم انتوا اهلنا
نعمة :: طيب يا ستى عاوزه تبعدينى عنك ليه ؟
حليم :: خلاص يا نعمه خلاص بقى يا كوثر يعنى ربنا ينعم علينا بحب الناس واحنا نرفض حقيقى ( اذا احب الله عبدا حبب فيه خلقه )
كوثر :: طيب بس تبطلى كلمة ستى دى انا مش ستك
نعمة :: ستى وتاج راسى طبعا وانا اقول لك يا ستى احس ان راسى فى السما
كوثر :: برضه يا وليه ؟ طيب بلاش قعدتك كده على الارض مش حلوه
نعمة :: لا كله الا كده طب احكم بيننا انت يا عم الشيخ هو انت مش بتقول دايما الجنه تحت اقدام الامهات ؟
حليم :: لا مش انا يا بنتى ده سيدنا محمد عليه الصلاة والسلام
نعمة :: طيب عمرك شفت ولا سمعت عن ام فى الدنيا احن من ست كوثر ؟
__________________
كان الغذاء شهيا اجادت داليا طهو الطعام كعادتها وقالت كوثر
كوثر :: عمرى ما اكلت ملوخيه احسن من اللى بتعملها دوللى
ثريا :: لا واكلها خفيف مش تقيل ما يتعبش المعده
شيرين :: ست بيت شاطره يا بخته اللى حياخدك
كوثر :: بناتى كلهم شاطرين فى كل حاجه يا هناه يا سعده اللى ربنا راضى عنه ويكتبله واحده منهم
حليم :: ربنا يبارك فيهم ويرضى عنهم انا حاقوم على مكتبى عاوز اقرا شويه
نرمين :: من غير ما تاكل رز بلبن ؟ انا عاملاه بالزبيب وجوز الهند وحاططه عليه قرفه زى ما ماما بتحبه
حليم :: لازم اكل طبعا هاتيلى من فضلك طبق على المكتب يا ثريا
امال :: يعنى كل واحده فيهم عملتلك حاجه بتحبيها الا انا
كوثر :: انتى عملتى اكتر حاجه باحبها
امال :: عملت ايه ؟
داعبت شعرها قائلة
كوثر :: بقالك تلات ايام نايمه فى حضنى
اسرعت امال تقبل يدها قائلة بسعادة غامرة
امال :: دى احلى حاجه حصلتلى فى عمرى كله
شيرين :: باقول يا كوثر كنت عاوزه استاذنك تخلى باسنت عندك اسبوعين حاسافر مؤتمر فى فرنسا
ولكن باسنت قالت بحدة
باسنت :: مؤتمر تانى يا ماما هو احنا مش حنخلص ؟ خلاص خلينى هنا على طول واللا ليه شوفيلى ملجا وخلاص
شيرين :: غصب عنى يا بسبوسه اصل ده شغل ومؤتمر مهم
باسنت :: وانا مش مهمه مافيش مره تقولى مش حاسافر وافضل مع بنتى ؟ على طول مؤتمر هنا وندوه هنا وفين بنتك من كل ده ؟
شيرين :: يا باسنت انا ...
باسنت :: انتى ايه ؟ انا تعبت مش كده فكرى فيا شويه
بكت شيرين وقامت لتنصرف فقالت كوثر بغضب
كوثر :: باسنت ازاى تكلمى ماما بالطريقه دى ؟
باسنت :: تعبت انا تعبت
ودفنت وجهها بكفيها وانخرطت فى البكاء فاقبلت شيرين نحوها واخذت تمسح على شعرها وقبلت جبهتها قائلة
شيرين :: بس يا حبيبتى ما تعيطيش انا باعمل كل ده علشانك انا والله غصب عنى شوفى علشان احاول افهمك حناخد وقت طويل جدا انا حاسافر ولما ارجع افهمك كل حاجه بس علشان خاطرى بلاش اخر حاجه اشوفها دموعك
نظرت فى ساعتها ثم لكوثر التى اومات لها بالموافقة فقالت
شيرين :: على فكره مندوب دار النشر حيجيب لكم نسخ من الكتاب الجديد اقروه ولما ارجع قولولى رايكم
القت نظرة اخيرة على باسنت واستدارت فهتفت بها
باسنت :: ماما
ثم اندفعت نحوها تحتضنها قائلة
باسنت :: انا اسفه انا مش عارفه قلت كده ازاى انا مش عاوزاكى تزعلى منى
شيرين : انا عمرى ما زعلت منك يا حبيبتى انا كل اللى باعمله علشانك وعلشان اخواتك بس انتى اكتر واحده فيهم معلش لما ارجع اقول لك كل حاجه
باسنت :: يعنى انتى مش زعلانه منى ؟
شيرين :: معقول ازعل من روحى ؟ مستحيل طبعا ده انتى الهوا اللى باتنفسه انتى بنتى والحاجه الوحيده اللى انا عايشه علشانها
ثم نظرت لساعتها واضافت
شيرين :: انا لازم امشى علشان عربيه الجورنال حتيجى تاخدنى للقاهره علشان حاسافر من مطار القاهره
باسنت :: طيب اجى معاكى المطار
شيرين :: لا خليكى مع ماما كوثر ولما ارجع ابقى استنينى فى المطار انا حاكلمكم علشان ابلغكم بميعاد الطياره
انصرفت شيرين وعادت باسنت الى الباقين ولكنها لمحت نظرة تانيب فى عين كوثر فقالت معتذرة
باسنت :: انا اسفه انا عارفه انك زعلانه منى بس غصب عنى مش عارفه عملت كده ازاى
كوثر :: احنا كلامنا مش دلوقت كلامنا لما نبقى لوحدنا فين يا نرمين الرز بلبن ؟
احضروا اطباق الارز واسرعت ثريا تحمل طبقا لزوجها وجلست الفتيات مع كوثر ياكلون
كوثر :: يخرب بيت حلاوتك يا نرمين احلى رز بلبن فى الدنيا تسلم ايدك
نرمين :: تلميذتك يا جميل استاهل مكافاة بقى ؟
كوثر :: قولى ياحبيبتى
نرمين :: خلينى انا ابات معاكى النهارده
داليا :: ياسلام انا برضه عملتلها ملوخيه عجب بالذمه يا ماما مش عجبتك الملوخيه ؟ خلينى ابات معاكى علشان بكره اعمل لك صينية رقاق
امال :: ايه هو ده حرام عليكوا انا كلها يومين وارجع بيتنا تانى
كوثر :: مش عاوزه خناق اللى حتبات معايا الليله دى تبقى .... بسبوسه
صاحت باسنت من الفرح وهتفت
باسنت :: يحيا العدل يحيا العدل
ثم القت بنفسها فى حضن كوثر وهى تخرج لسانها وكوثر تقول
كوثر :: اصلى نفسى فى حاجه حلوه
قالت نرمين بغيظ وهى تضرب كتف باسنت بقبضتها
نرمين :: قصدك تقولى نفسك حلوه
__________________
فى اليوم التالى بعد صلاة الجمعة حضر مندوب من المؤسسة الصحفية التى تنشر اعمال شيرين حاملا عددا من النسخ من كتابها الاخير .
كان الكتاب يحمل صورة غلاف تمثل زهرة لها اربع ورقات تحمل كل ورقة منهن رسما يمثل وجه احدى الفتيات الاربع وبالداخل كتب هذا الاهداء
( الى صديقتى وابنتى واختى واحيانا امى . الى توام روحى وملهمتى الى التى من اجلها احيا وعلى حبها اموت الى الوردة التى تجعل حياتى واحة غناء وبدونها احيا كالصحراء الجرداء الى الشمس التى تدفئ حياتى والقمر الذى يضئ بسناه كل الليالى اليها اكتب ومنها استلهم افكارى منها ومن اخواتها ورفيقاتها استلهمت هذا الكتاب فلمن اهديه ان لم يكن لها ؟ الى ابنتى باسنت بوسى بسبوسه التى هى عندى احلى من البسبوسه )
وكان الكتاب معنونا باسم ( بنات )
#ارواح_هائمة
فى يوم الجمعة بعد الغذاء ارتدى حليم ثيابه وابلغهم انه سيتغيب طوال اليوم
حليم :: اصل عندى كام مشوار لازم اعملهم
ثريا :: امرك غريب اليومين دول يا حليم
حليم :: معلش معلش بعدين
كوثر :: طيب يا حليم انا عاوزاك من يوم ما دخلت المستشفى ما قعدتش معاك لازم نقعد مع بعض
حليم :: حاضر حنقعد مع بعض بس بعدين مش دلوقت
وبعد انصرافه قالت كوثر وهى تشعر بعدم الراحة
كوثر :: جوزك امره غريب الايام دى فعلا يا ثريا
ثريا :: والله ما انا عارفه كل ما اساله مالك يقول معلش بعدين
كوثر :: طيب معلش ما علينا . ايه يا بنات شفتوا كتاب شيرين واللا لسه ؟
نرمين :: احنا لسه بنقول يا هادى يادوب قرينا العناوين والمقدمه شفتى صورنا على الغلاف ؟
داليا :: حتشوفها ازاى وهى ما فتحتش الكتاب اصلا
امال :: صحيح يا ماما نسختك لسه بالسلوفان مش عاوزه تعرفى الكتاب بيتكلم عن ايه ؟
كوثر :: انا عارفه كل اللى فيه كلمه كلمه كنت باراجعه مع شيرين اول باول كل ما تخلص فصل تقوللى عليه ونراجعه مع بعض وصوركم اللى على الغلاف مختارينها مع بعض
نرمين :: طيب والاهداء برضه كتبتوه مع بعض ؟
كوثر :: لا الاهداء بقى كتبته لوحدها قبل اى حاجه ومن قلبها
سمعت باسنت ذلك فبكت ودفنت وجهها بين كفيها
داليا :: مالك يا بسبوسه فيه ايه انتى المفروض تفرحى
ولكنها استمرت فى البكاء ولم ترد فنادتها كوثر
كوثر :: تعالى يا بسبوسه
اقبلت عليها وهى مطرقة فامسكت بيدها ووضعتها على ركبتها وضمتها الى صدرها قائلة
كوثر :: ايه يا حبيبتى مالك فيه ايه ؟
باسنت :: مافيش يا ماما
كوثر :: حتخبى على ماما ؟ انا حاسسه بيكى حسيتى من الاهداء انك ظلمتيها وعرفتى قد ايه هى بتحبك مش كده ؟
باسنت :: انا زعلتها وهى مسافره انا عارفه انها بتحبنى بس كنت حاسسه انها بتفضل شغلها عليا
كوثر :: عمرها ما فضلت شغلها عليكى ولا على اخواتك دى كانت بتشتغل علشانك انا ما رضيتش اعكنن عليكى امبارح واكلمك واحنا لوحدنا لو عاوزه نتكلم لوحدنا مافيش مانع بس دول اخواتك والمفروض زى ما تفتخرى بامك هم كمان يفتخروا بيها
باسنت :: اتكلمى يا ماما انا عمرى ما اتكسف من اخواتى ابدا
كوثر :: انتى عارفه ماما كانت بتدفع قد ايه مصاريف مدرستك ومدارس اخواتك اظن كلكم متعلمين فى مدارس خاصه وعارفه ماما بتعمل ايه علشان تجهز لجوازك وتجيب حاجتك مبالغ كبيره قوى والمرتب ما بيكفيش حتى مصاريف الاول اما كنتوا صغيرين كانت عايشه على المرتب وبتكمل من المكافاه اللى اخدتها لما باباكى استشهد ولما خلصت كان قدامها حل من اتنين يا اما تعيشوا على قد المرتب وتفضل تراعيكم وتقوم بواجبها كام وساعتها ظروفكم كانت حتبقى صعبه قوى يا اما تبذل مجهود اكبر فى شغلها والكتب اللى بتكتبها والمؤتمرات اللى بتروحها وتاخد بدلات حضور ومكافات علشان توفر مصاريفكم وانتوا بقى ونصيبكم تطلعوا مؤدبين ومتربيين من نفسكم او تنحرفوا فى الوقت ده كنا بقينا اصحاب قوى وكنتى انتى والبنات اصحاب قوى وهى شايفه انك زيك زيهم فى اخلاقك ودينك وحرصك على دراستك ولجات لى وطلبت منى اساعدها انى اكون شريكه لها فى تربيتك وسط بناتى والحقيقه فرحت لانى حبيتك قوى من يوم المدرسه فاكره ؟
باسنت :: فاكره بس اشمعنى من يوم المدرسه ؟
كوثر :: علشان عجبتينى لما اعترفتى بكل حاجه بشجاعه قدام ابله الناظره وكمان اعتذرتى من غير ما حد يطلب منك نرمين يومها اعتذرت لما الناظره طلبت منها لكن انتى من نفسك قلت البنت دى بيضه وجميله ونضيفه من جوه حبيتك بس مهما حبيتك ما اقدرش اقول انى حبيتك اكتر من شيرين اللى ضحت براحتها وقعدتها فى وسطكم وبقت بتسافر يمين وشمال وتطلع اى مؤتمر علشان توفر بدلات المؤتمرات دى علشانكم ومهما كان كتبها مش كتير لانها حريصه ما تكتبش اى كلام ودايما تقول الاهم ان الكتاب يتباع ان ولادى يقروه ويعجبهم ويبقوا فخورين بيا ونفسى يعرفوا انى عملت كل جهدى علشانهم
باسنت :: انا لما ترجع حابوس الارض تحت رجليها علشان تسامحنى
كوثر :: ومين قال انها زعلانه منك بالعكسهى عارفه انك عملتى كده علشان بتحبيها وعاوزه منها اهتمام اكبر
باسنت :: برضه انا غلطانه فى حقها
كوثر :: يبقى لما ترجع صلحى غلطك وقوليلها انك حاسسه بتعبها ومقدره تضحيتها علشانك اظن انتى عارفه لما بابا استشهد كان عندها سبعه وعشرين سنه يعنى فى عز شبابها وكان ممكن تتجوز وتلاقى الف واحد يتمناها وبرضه ياخدها بعيالها وماما جميله ومين ما يرضاش بواحده جميله وصغيره وصحفيه معروفه ؟ اكيد كتير وجالها كتير ومنهم ميسورين عرضوا يربوكم احسن تربيه انما هى رفضت كل ده وقالت ايه يضمننى بعد الجواز ما يتغيروش ويبهدلوا عيالى انا ضفر اصغر واحده فيهم بالدنيا عندى انا ممكن اربيهم من شغلى وتعبى لو انتى ساعدتينى طيب كنت اقول ايه غير انى سعيده لما اخد بسبوسه فى حضنى وفى وسط بناتى وتبقى واحده منهم ؟
باسنت :: يا حبيبتى يا ماما قد ايه انا ظلمتها
ثم قبلت يد كوثر والقت راسها على صدرها قائلة
باسنت :: انا باحبك قوى يا ماما كوثر وكل يوم يعدى عليا احبك اكتر
ازاحت كوثر راسها عن صدرها ومسحت دموعها بيدها وقبلتها قائلة
كوثر :: طيب ياللا بقى قومى اغسلى وشك وادخلى اوضتك مع اخواتك ياللا يا بنات ادخلوا وضبوا نفسكم علشان بكره اول يوم فى الدراسه عاوزاكم تروحوا الجامعه بكره على سنجة عشره
ثريا :: ياللا يا بنات شدوا حيلكم السنه دى رابعه خلونا نخلص
بدا نذير معركة حريمى فى الجو حيث اخذت نرمين تنظر للاخريات بتربص بينما تململت داليا بقلق واخيرا نطقت امال
امال :: طيب مين فينا اللى حتبات معاكى النهارده ؟
كوثر :: ولا واحده فيكم ياللا انتوا الاربعه على اوضتكم
داليا :: ما ينفعش لازم واحده تبات معاكى علشان يعنى قصدى .....
نرمين :: انتىزى الفل وكل حاجه بس برضه لازم واحده من بناتك
واشارت لنفسها على امل ان تزكيها واضافت وهى تنظر لها
نرمين :: فاهمانى ؟ واحده من بناتك تبات معاكى علشان ما تباتيش لوحدك
كوثر :: مافيش ولا واحده منكم انتوا الاربعه حتبات معايا انا واحده من بناتى اللى حتبات معايا هو انا ما عنديش غيركم ؟
داليا :: دى مين دى ؟
كوثر :: احلى واحده فى بناتى واغلى واحده فى بناتى هى اللى حتبات معايا النهارده
انتفضت الاربعة واقفات وبدت الغيرة واضحة على وجوههن بينما قالت نرمين بنفاذ صبر
نرمين :: لا بقى دى مين دى وريهالنا كده ازاى بقى احلى منى قصدى مننا
ابتسمت كوثر وهى تتلاعب بهم ثم مدت يدها تجذب اليها ثريا وتحتضنها قائلة وهى تضحك
كوثر :: بنتى الكبيره يا بهايم احلى واغلى بناتى
ثريا :: اخيرا والنبى افتكرتك نسيتينى