رواية ارواح هائمة الفصل الثالث والعشرين 23 بقلم آثر توفيق
الحلقة 23
اغلقت نرمين الباب خلف فؤاد واتجهت اليها وقبلت جبهتها ومسحت على شعرها وقالت
نرمين :: نامى شويه يا حبيبتى تحبى اطفى النور
امال :: لا
قالتها بفزع وامسكت بيدها تمنعها كانت تلك اول كلمة تنطقها منذ ماتت امها فى اليوم السابق
نرمين :: طيب حاضر بلاش حاولى تنامى انا حانام جنبك
تمددت بجوارها واسندت راسها على صدرها بحنان تلك كوثر اخرى الحمد لله لست وحيدة ولكنى من كل قلبى اتمنى ان تشفى كوثر يارب
تمددت داليا خلفها وربتت على كتفها جعلوها تشعر ببعض الدفئ والامان ( ربنا ما يحرمنى منكم ولا يحرمنا كلنا من ماما كوثر يارب ) قالتها فى سرها ثم استجمعت قواها قائلة بصوت ضعيف مبحوح
امال :: عاوزه اشوف ماما كوثر
نرمين :: طيب حاضر ارتاحى والصبح نروح لها كلنا اصلها وحشتنا قوى هى وحشتك قوى ؟
هزت راسها بالايجاب فقالت نرمين
نرمين :: انتى كمان وحشتيها قوى
_________________
عند الفجر قامت نرمين وايقظت باسنت التى نامت على احد المقاعد
نرمين :: باسنت قومى نامى جنب امال شويه
وتوضات وخرجت ووقفت لتصلى
باسنت :: استنى اتوضى واصلى معاكى
قامت داليا لتتوضا مع باسنت ثم وقفن للصلاة وهن يرتدين اسدالاتهن
نرمين :: انتى ما نمتيش يا داليا ؟
داليا :: ما قدرتش صعبانه عليا امال قوى مش قادره تعيط كويس انها نامت
نرمين :: تفتكرى نامت ؟
انتهوا من الصلاة ووقفت نرمين تدعو والفتاتين تؤمنان على دعائها دعت كثيرا لكوثر بالشفاء ولايمان بالرحمة ولهن جميعا بالستر وظلت تدعو حتى سمعوا صوت امال الضعيف
امال : ما قدرتش اقوم اصلى معاكم
داليا :: انتى ما نمتيش ؟
امال :: مش قادره تعبانه مخنوقه
اسرعوا اليها وجلسوا بجانبها يسرون عنها
نرمين :: طيب عيطى يا حبيبتى فكى عن نفسك
امال :: مش قادره حاسسه ان الدموع وقفه فى زورى مش قادره اتنفس يارب دمعه واحده تريحنى شويه
__________________
وفى الصباح الباكر اتجهت البنات الى المستشفى واستقبلتهن ثريا الى هرعت الى امال تحتضنها
ثريا :: امال يا حبيبتى تعالى البقاء لله وحده
ثم تركتها وهى تنظر لكوثر والدموع تلتمع فى عينيها ففتحت لها كوثر ذراعيها فاسرعت ترتمى فى احضانها ثم انفجرت فى البكاء
_______________
بقيت امال تتشبث بذراع كوثر طوال اليوم حتى انها غفت وهى جالسة على حافة السرير فايقظتها نرمين
نرمين :: امال قومى نامى على الكنبه
ولكنها هزت راسها وتشبثت بذراع كوثر
كوثر :: سيبيها على راحتها تعالى يا حبيبتى
واراحت راسها على صدرها وتركتها تغفو قليلا وعندما حضر ابوها فى المساء ليصحبها
كوثر :: استاذ فؤاد البقاء لله يا استاذ البركه فيك
فؤاد :: البركه فى دين محمد
كوثر :: ربنا يجعله اخر الاحزان ويجعل مثواها الجنه ويصبركم
فؤاد :: امين يارب العالمين المرحومه اتعذبت كتير ورغم ان ما كانش فيه امل فى حالتها الا اننا كنا راضيين بوجودها وسطنا لكن ده امر الله ونفذ
كوثر :: انا اسفه ما منعنيش غير الشديد القوى زى ما انت عارف
فؤاد :: عارف والله فيكى الخير والشيخ عبد الحليم ما سابنيش دقيقه ولا مدام ثريا ولا مدام شيرين ولا البنات ربنا يبارك فيهم وفيكم
كوثر :: دول بناتك يا استاذ واحنا اهل
فؤاد :: اكيد طبعا المهم حضرتك صحتك ازيها دلوقت ؟
كوثر :: الحمد لله على كل اللى يجيبه ربنا صابره وراضيه
فؤاد :: تقومى بالف سلامه يا ست الكل وترجعى تنورى بيتك طيب بعد اذنك انا حآخد امال ونروح والصبح ان شاء الله تكون عندك
تشبثت امال بذراع كوثر وارتجف جسدها فقالت كوثر
كوثر :: استاذ فؤاد بعد اذنك انا عاوزه امال تبات معايا النهارده مرافقه
نظرت لها امال بلهفة غير مصدقة بينما قالت نرمين بدهشة
نرمين :: يا ماما بس دى امال ...
كوثر :: مالها امال مش بنتى زيكم وليا حق عليها ؟
نرمين :: ايوه طبعا يا ماما بنتك انا قصدى انها تعبانه مش حتقدر تراعيكى
كوثر :: حتبقى كويسه وتاخد بالها منى قلت ايه يا استاذ فؤاد
فؤاد :: حضرتك اللى قلتى يا ست الكل دى بنتك وما حدش يقدر يقول لك لا
كوثر :: كتر خيرك يا استاذ فؤاد ايه يا امال حتعرفى تاخدى بالك منى الليله واللا انا اللى حاخد بالى من بنوتتى حبيبتى
اجالت عينيها فى وجه كوثر ثم امسكت بيدها تغمرها بالقبلات وهى تبكى قائلة
امال :: مش عارفه اقول ايه متشكره متشكره قوى
احتضنتها كوثر واراحت راسها على صدرها وقالت للباقين
كوثر :: طيب ياللا بقى علشان مواعيد الزياره انتوا طولتوا قوى
فؤاد :: طيب استاذن انا وسلمولى على الشيخ عبد الحليم
ثريا :: استاذ فؤاد معلش حنتقل عليك تاخدنا فى سكتك اصل الشيخ قال عنده ميعاد مهم بعد العشا ومش حييجى ياخدنا
فؤاد :: قوى قوى اتفضلوا تحت امركم
_________________
عاد الشيخ حليم بعد العشاء مباشرة الى منزله ينتظر ضيفا وبعد دخوله مباشرة دق الجرس ففتح ليجد امامه الشخص الذى اعتقله منذ عدة اشهر دون سبب ثم تركه دون اجراء
حليم :: اتفضل يا حضرة الظابط
ايمن :: سلام عليكم يا شيخ عبد الحليم
حليم :: وعليكم السلام اتفضل نقعد هنا
واشار الى احد مقاعد الصالون ثم ساله
حليم :: تحب تشرب ايه ؟
ايمن :: مالوش لزوم التعب يا شيخ عبد الحليم
حليم :: انت جاى فى بيت كرم بس انا لوحدى خليها حاجه ساقعه
ودخل ليجلب المياة الغازية وعاد وقال ايمن
ايمن :: اقعد يا شيخ عبد الحليم انا عاوزك فى موضوع مهم ومستعجل
حليم :: خير يا حضرة الظابط فيه تنظيم تانى عاوز تضمنى ليه ؟
ايمن :: ابدا انا جاى فى موضوع بعيد عن الشغل موضوع عائلى بس كويس انك فتحت السيره عاوز اسالك على حاجه
حليم :: اسال
ايمن :: انت ايه علاقتك بثائر تعرفه منين ؟
حليم :: ثائر مين انا ما اعرفش حد بالاسم ده بس بيتهيالى البنات معاهم زميل فى الكليه اسمه ثائر
ايمن :: هو ده
حليم :: لا انا ما اعرفهوش ولا عمرى قابلته
ايمن :: بس البنات يعرفوه
حليم :: قابلوه مره او مرتين ومافيش اكتر من زمالة الجامعه
ايمن :: انت متاكد ؟
حليم :: بناتى عمرهم ما يخبوا عنى حاجه هو ده الموضوع اللى عاوزنى فيه ؟
ايمن :: لا انا جاى لموضوع تانى خالص انا عاوز اخطب الانسه نرمين
حليم :: انت تعرفها ؟
ايمن :: شفتها مره او مرتين ولقيت انها بنت جميله وتليق بيا وقررت انى اتجوزها
نظر حليم اليه وفكر فى اسلوبه المتكبر كما لو انه قرر فيجب ان ينصاع الجميع
حليم :: قررت ؟ وعلى كده جاى تدينا خبر ؟
اكمل ايمن دون ان يلتفت لما قاله الشيخ
ايمن :: على العموم انا عندى شقتى جاهزه من كل حاجه من الابره للصاروخ وطبعا شغلى ومركزى مش محتاج اتكلم عنهم وكمان عندى عربيتى اخر موديل وعندى .....
حليم :: انا اسف لكن البنات لسه فى الجامعه ومش مستعدين للجواز دلوقت
ايمن :: احنا ممكن نعمل خطوبه دلوقت و .....
حليم :: انا اسف يا حضرة الظابط انا ما عنديش بنات للجواز
ايمن :: انت بترفضنى يا شيخ عبد الحليم حتى من غير ما تسال عنى ؟
حليم :: عارفك كويس عن تجربه شخصيه وعلشان كده ما عنديش بنات للجواز
ايمن :: طيب مش المفروض تسالها عن رايها ؟ مش ده الشرع ؟
حليم :: مش محتاج اسالها علشان اعرف رايها وانا ادرى بمصلحة بناتى
ايمن :: طيب اظن من حقى اعرف سبب الرفض
حليم :: لا مش من حقك انا رفضت وباحتفظ بالاسباب لنفسى لا من حقك تجبرنى ولا من حقك تسالنى عن السبب
شعر ايمن بالغضب فقال بنبرة ملؤها التهديد
ايمن :: انت ممكن تسال بنتك عن واحده زميلتهم اسمها هاله عبد الظاهر
حليم :: مالها دى
ايمن :: اسالها عليها يمكن تكون تعرفها وكمان افتكر ان قضية التنظيم السرى لسه مفتوحه ولسه التحريات شغاله
حليم :: كده اظن انت عرفت سبب الرفض لوحدك
وقام لينهى اللقاء واضاف
حليم :: يا حضرة الظابط انا شنطتى جاهزه فى اى وقت لكن ما عنديش بنات للجواز بالشكل ده ولو على جثتى
تردد ايمن وقال محاولا اصلاح موقفه
ايمن :: يا شيخ عبد الحليم انا ...
حليم :: انست وشرفت يا حضرة الظابط
انصرف ايمن غاضبا وحين كان يهم بركوب سيارته وصلت سيارة فؤاد الذى قال مفكرا
فؤاد :: ده ايه اللى جابه هنا ده ؟
ثريا :: مين ده يا استاذ فؤاد حضرتك تعرفه ؟
فؤاد :: الظابط اللى كان بيحقق فى قضية الشيخ حليم
نرمين :: لكن الشخص ده انا شفته قبل كده بس مش فاكره فين شفته فين شفته فين ؟ حافتكر
#ارواح_هائمة
وضع حليم سماعة الهاتف على عجل عند دخولهم والتفت مرحبا ولكنه شعر بدهشة حين راهم ثلاثتهم
حليم :: خير ايه اللى حصل جايين كلكوا ليه ؟ كوثر بخير ؟
ثريا :: بخير الحمد لله يا حليم ما تقلقش امال بايته معاها الليلة دى
تنهد الصعداء فهو يعرف انهم يمنعون المرافق عند عودتها للغيبوبة وهى قد افاقت من يومين فقط ولا زال لسانها ثقيلا بعض الشئ
حليم :: يعنى هى الحمد لله كويسه مافيش حاجه
ثريا :: هى كويسه بس امال اللى مش كويسه خالص زى ما شفتها وفى الاخر كوثر قالت خلوها بايته معايا واستاذ فؤاد ما رضيش يزعلها
حليم :: هو فؤاد راح المستشفى ؟ علشان كده ما جاش الجامع فى العشا كتر خيره صاحب واجب عمره ما قصر
ثريا :: هو راجل محترم وخدوم جه يعمل الواجب وياخد امال ولما كوثر قالتله خليها معايا ما اتكلمش
حليم :: طيب يا حبيبتى انا عارف انك راجعه من المستشفى تعبانه بس نفسى فى فنجان قهوه من ايدك الحلوة
قالها باسما ورفع يدها الى شفتيه يقبلها فقالت بزهو وفرحة
ثريا :: يا حبيبى اوامرك انا لو باموت حازحف للمطبخ واعمل اللى انت عاوزه
واسرعت الى المطبخ بينما جلس حليم على الاريكة واشار للفتاتين ليجلسا على جانبيه واحتضنهما بقوة ثم قال
حليم :: جايلك عريس النهارده يا نونو خلاص بناتى حبايبى بقوا عرايس وبكره الخطاب يبقوا طوابير
نرمين :: عريس ليا انا مين ده يا بابا ؟
حليم :: ظابط شرطه فى امن الدوله اسمه ايمن رشدى بيقول انه يعرفك
احست داليا برجفة تسرى فى اوصالها وبهتت نرمين وسالت
نرمين :: هو الشخص اللى كان نازل من هنا واحنا جايين ؟ انا من ساعتها باحاول افتكر شفته فين قبل كده وعمو فؤاد بيقول انه .ً...
حليم :: الظابط اللى قبض عليا فعلا هو وبيهددنى ان لسه فيه تحريات
اقبلت ثريا ووضعت القهوة امامه وهى تسال بدهشة
ثريا :: مين اللى بيهددك ده وبيهددك بايه
حليم :: الظابط اللى قبض عليا بتاع امن الدوله عاوز يخطب نرمين
ارتمت ثريا على الاريكة بجوار نرمين واحتضنتها بقوة وهتفت
ثريا :: بالعافيه ؟ ده على جثتى
نرمين :: يا بابا الحديث بيقول ( من ترضون دينه فزوجوه ) حضرتك شايف ان ده عنده دين ؟ ده راجل بيستغل سلطته فى ظلم الناس وعاوز يخطبنى عافيه
حليم :: يعنى انتى رافضاه ؟
نرمين :: الراى الاول والاخير ليك طبعا يا بابا بس انا ....
حليم :: الاستاذ كمال القاضى الله يرحمه جدكم وحمايا كان دايما يقول ( انا مستحيل اغصب على بناتى فى حاجه ابدا انا مربيهم ان يكون عندهم شخصيه ولا اقبل ابدا ان اى حد يفرض عليهم حاجه هم رافضينها ) وبيتهيالى انا برضه ربيتكم على كده
نرمين :: يعنى حضرتك حتبلغه انك رافضه ؟
حليم :: حابلغه ؟ انا يا بنتى رفضته وقلتله فعلا انا ما عنديش بنات للجواز بس ده لانى واثق من رايك
نرمين :: طيب لو حاول يستغل سلطته ؟
داليا :: ما تخافيش يا نرمين لو هو معاه سلطه احنا معانا ربنا
حليم :: الله ينور عليكى يا داليا شوفوا يا بنات ان ما كانش اللى يتقدم لواحده فيكم راجل عنده دين واخلاق ويشيل الواحده منكم فى عينيه ويعتبر انها نعمه ربنا انعم بيها عليه ويراعى ربنا فيها ويصونها يبقى مستحيل يطول ضفرها ولو على رقبتى مهما كانت سلطته وربنا يقدرنى على كده
قبلت الفتاتين يديه وقالت نرمين ممتنة
نرمين :: ربنا يخليك لينا يا بابا وما يحرمناش منك ابدا بس برضه انا حاموت وافتكر شفت البنى ادم ده فين قبل كده
حليم :: سيبكم منه بقى انا حاعرف ازاى ابعده عننا المهم الدكتور قاللى انه حيخرج كوثر من المستشفى بس هى لسه تعبانه انما علشان حالتها النفسيه ما تتعبش من طول القعده فى المستشفى يعنى اتعاملوا معاها على انها لسه فى المستشفى مش عاوزين اجهاد ولا تتعبوها انتوا عارفين اكتر حاجه بتتعبها ايه ؟
داليا :: لما تقول على حاجه وحد يقاوحها اتطمن يا بابا حتقول اى حاجه مش حتسمع مننا غير حاضر وبس المهم ترجع تنور البيت
حليم :: طيب ياللا قوموا ارتاحوا انتوا جايين تعبانين
قامت الفتيات وقامت ثريا لتعد الفراش لزوجها فاستوقف نرمين قائلا
حليم :: استنى يا نرمين انا عاوزك لوحدك
انصرفت داليا وبقيت نرمين فبادرها قائلا
حليم :: هى ايه حكاية ثائر ده يا نرمين ؟
اندهشت نرمين واضطربت قليلا قبل ان تقول
نرمين :: لا حكايه ولا حاجه ده كان مره دافع عننا لما الولد اللى اسمه محيى اتهجم علينا وشكرناه وبعدها مره او مرتين سالته على حاجه فى الاداره وبعدها مافيش اى علاقه بيننا وبينه
حليم :: ده كل الموضوع ؟
نظر لها متفرسا فقالت وهى تدير عينيها بعيدا عنه
نرمين :: ايوه يا بابا ده كل الموضوع ومافيش غير كده
حليم :: طيب انتى تعرفى بنت اسمها هاله عبد الظاهر ؟
فكرت قليلا وقالت
نرمين :: ما بيتهياليش لا ما اعرفش
حليم :: طيب يا حبيبتى انا مسافر بكره القاهره مشوار ضرورى ولما ارجع ان شاء الله حتلاقى اللى اسمه ايمن ده بعد عننا نهائى
_________________
بقيت امال متشبثة فى ثياب كوثر حتى عند المرور الاخير للطبيب رفضت تركها
مراد :: ازيك يا امال البقيه فى حياتك يا بنتى ممكن تنزلى من السرير دقيقه واحده علشان اكشف على ماما كوثر ؟
التصقت بها اكثر وتعلقت بذراعها ولم ترد فاضاف
مراد :: انتى مش عاوزه تتطمنى على ماما كوثر ؟ دقيقه واحده
نزلت متثاقلة ووقفت خلفه وهو يقيس النبض والضغط والحرارة وينظر الى قزحية العين واللسان ويراجع قراءة الجهاز الواصل بها عبر اقطاب كهربية ثم اخيرا
مراد :: ادينى خلصت يا ستى وخلاص كلها يومين وماما كوثر ترجع تنور بيتها
امال :: حتخف وتعيش يا دكتور واللا .....
دمعت عيناها ولم تستطع اكمال عبارتها فقال الطبيب
مراد :: ان شاء الله حتخف وتعيش الاعمار بيد الله والمرحومه امك عمرها لحد كده الله يرحمها اتعذبت كتير والدكتور ادهم اللى كان بيتابعها ما قصرش معاها لكن ده قضاء الله ولا راد لقضائه
كوثر :: ونعم بالله تعالى يا امال متشكره يا دكتور
انصرف الطبيب وعادت امال ترتمى فى حضن كوثر وهى تكفكف دموعها
كوثر :: كنت عارفه ان مافيش حاجه تمنعك عنى غير الشديد القوى ربنا يرحمها امك كانت بتتعذب كل يوم وارتاحت والحمد لله ما قصرتش معاكم وسابتكم وانتوا كبار
امال :: بقالى تلات سنين محرومه من حضنها ما كانتش بتتحمل وفى الاواخر بقى جسمها كله عامل زى القزاز ما بتتحملش لمسه لحد اول يوم امتحان قمت صليت الفجر ودخلت عليها لقيتها صاحيه فى سريرها قلتلها ادعيلى وجيت ابوس ايدها قالت ااااه حسيت ان قلبى بيتقطع عليها
سالت دموع امال وهى تتذكر وتابعت
امال :: خرجت من عندها بسرعه قبل ما اعيط قدامها وقعدت فى الصاله اتفلقت من العياط خلاص ما بقيتش قادره المسها خلاص بقى فيه ستاره بيننا وبينها شايفينها من ورا قزاز ؟ ليه تتحمل كل العذاب ده ؟ دعيت ربنا انه يرحمها ويريحها اول مره ادعى كده تفتكرى انا السبب انها ماتت ؟
كوثر :: انتى بتقولى ايه دى اعمار ربنا كاتبها من قبل ما نتولد ومحدد لكل واحد عمره ( واذا جاء اجلهم لا يستقدمون ساعة ولا يستاخرون )
امال :: خايفه اكون مره نزلت امتحان واللا محاضره وسبتها وهى محتاجالى جنبها رغم ان عمرى ما نزلت الا والممرضه موجوده بس برضه خايفه تكون مره نادت عليا وانا نايمه ما سمعتهاش خايفه اكون قصرت فى حقها وخايفه اكون ما عرفتش اقول لها قد ايه انا باحبها هى صحيح ماما قبل ما تموت دعتلى وقالتلى انها راضيه عنى بس تفتكرى انا اديتها حقها واللا قصرت ؟ انا قعدت خمس سنين اخدمها واحميها واغير لها وفى الاخر ما بقيتش بتروح الحمام كنت انا باغير لها القسطره وانضف لها تفتكرى لو يوم كسلت ربنا يحاسبنى وابقى قصرت وما اديتهاش حقها ؟
كوثر :: يا حبيبتى انتى اديتى امك حقها كامل مكمل واى ام فى الدنيا يا بختها لو عندها بنت زيك
ضمتها كوثر بقوة وقبلت خدها قائلة
كوثر :: باحبك قوى يا كتكوتة ماما يا حته من قلب ماما
امال :: والنبى يا ماما كوثر شدى حيلك وقومى اوعى تسيبينى احسن من غيرك انتى كمان حتبقى الدنيا كلها ضلمه
كوثر :: ان شاء الله ربنا حيطول فى عمرى واعيش لحد ما البسك فستان فرحك والطرحه البيضه بايدى تعالى بقى ننام شويه علشان انتى. بقالك كام يوم من غير نوم تقومى تنامى على الكنبه واللا تنامى جنبى ؟
امال :: خلينى جنبك والنبى حانام على جنبى ومش حاخد حته كبيره
نامت امال بجوارها وهى تبتسم اخيرا وتحدث نفسها سرا
( غدا ساقول لنرمين اننى انا نمت فى حضن ماما كوثر وانتى لا )
________________
وصل قطار الاسكندرية الى محطة رمسيس بعد الثانية عشرة بقليل ونزل منه الشيخ عبد الحليم فتوجه نحوه رجل طويل القامة عريض الكتفين يرتدى بذلة سوداء ويضع على عينيه نظارة سوداء كبيرة الحجم قائلا
الرجل :: الشيخ عبد الحليم العطار ؟
حليم :: اى خدمه ؟
الرجل :: اتفضل معايا
سار معه الشيخ حليم صامتا حتى خرجا من باب المحطة فقال مستاذنا
حليم :: بعد اذنك ممكن اصلى الضهر ؟
الرجل :: اتفضل يا مولانا براحتك انا مستنى هنا
صلى الشيخ حليم الظهر فى المصلى الصغير فى المحطة وعندما انتهى خرج مع الرجل الى اخر موقف السيارات ليجدا سيارة سوداء مسدلة الستائر نزل سائقها الذى يرتدى ثيابا مشابهة لثياب مرافقه ليفتح الباب ويركب حليم ومرافقه فى الخلف وسارت السيارة حتى وصلت الى مبنى محاط بالاشجار عليه حراسة كثيفة بعضها مستتر فقال الرجل
حليم :: بطاقتك يا شيخ عبد الحليم
اخرج حليم بطاقته وناولها للرجل فى صمت وعند البوابة ابرز الرجل بطاقة خاصة لامن البوابة الذى نظر الى الشيخ حليم متسائلا فناوله مرافقه بطاقة حليم قائلا
الرجل :: ضيف
دخلت السيارة لتتوقف امام مبنى بالداخل ونزل حليم ومرافقه ليقوده الى مكتب يقف عليه جندى حراسه ففتح الباب وسمح للشيح حليم بالدخول ليسمع صوتا جهوريا يقول
