رواية ارواح هائمة الفصل الثاني والعشرين 22 بقلم آثر توفيق
الحلقة 22
ذهب الى ام هالة عارضا عليها المشاركة فاجابت
ام هالة :: انا مش فاهمه حاجه يابنى من اللى انت بتقوله
ثائر :: يعنى لما ابنى البيت واديكى شقق حتاخدى حصه اكبر تمن الشقق دى وانا يا ام هاله اللى حابنى وانا المسئول قدامك عن كل حاجه وانا اللى حابيع الشقق واجيبلك فلوسك لحد عندك
ام هالة :: انت اللى حتبنى البيت ؟
ثائر :: انا وشريف
ام هالة :: طيب اسمع انا ما عنديش دماغ للكلام ده ولا اعرف ايه الاصلح وما عنديش غير البيت ده هو اللى فاضل لعيالى ودول كلهم بنات وما فيهمش راجل نصيبى كده انا حاقول لك كلمه قدر ان البنات دول اخواتك وفكر فى مصلحتهم واللى انت شايفه صح اعمله
قبل ان يرد دق جرس الباب وقامت هالة لتفتح
هالة :: ده الحاج رمضان يا ماما
ام هالة :: ده اللى عاوز البيت اسمع وما تتكلمش غير لما اقول
رمضان :: السلام عليكم
ام هالة :: وعليكم السلام اتفضل ده الاستاذ ثائر ابن اختى
رمضان :: اهلا وسهلا يا استاذ انا جاى يا حاجه علشان نخلص موضوع البيت انتى قلتى بعد امتحانات بنتك تردى
ام هالة :: اصل السعر اللى انت عارضه شويه يا حاج
رمضان :: والله يا حاجه ده اغلى من سعره ما حدش بيبيع ويشترى اليومين دول انا مزود عشرين الف جنيه علشان خاطر العيال الصغيره
ام هالة :: طيب لو البيت ده حتاخده وتدينى شقق يعنى مشاركه حتدينى ايه ؟
رمضان :: مشاركه شكلك سالتى ولفيتى يا حاجه طيب انا لو مشاركه حاديكى دورين وشقه اشطبلك شقه سوبر لوكس تقعدى فيها والباقى عضم
ام هالة :: ده اقل بكتير من اللى اتعرض عليا
رمضان :: اتعرض عليكى ايه يا حاجه ؟ خدى بالك فيه ناس تديكى اكتر وتبنى وتبيع وتخلع وما تشوفيش حاجه ولا تطولى سما ولا ارض
ام هالة :: طيب سيبنا من الموضوع ده اخر سعرك كام بيع وشراء
احضرت هالة القهوة وهو يحدج ثائر بنظرة مستريبة ثم رشف رشفة من القهوة وقال
رمضان :: انا حادفعلك ١٥٠ الف كوم واحد
نظرت الى ثائر لتسمح له بالمساومة بعد ان عرف كل شئ قائلة
ام هالة :: اومال الراجل اللى عندك كان حيدفع كام ؟
ثائر ،:: ٢٥٠ الف وممكن اوصله ٣٠٠
رمضان :: ده كلام مش حينفذه انا حاخليهم ١٧٥ الف
ام هالة :: البيت خلاص اتباع يا حاج معلش مالكش نصيب
قام غاضبا وعند الباب التفت قائلا كعرض اخير
رمضان :: اخر كلام عندى ٢٠٠ الف جنيه
ابتسمت وهى تستعد لغلق الباب
ام هالة :: انست وشرفت يا حاج خلاص مافيش نصيب
وعادت الى ثائر قائلة
ام هالة :: انا حاروح اعمل لك توكيل واللى انت شايفه صح اعمله
ثائر :: انا حاديلك زى ما قلت تلات ادوار متشطبين وتلت مساحة الارضى وانا اتعهد قدامك ببيعهم واجيبلك فلوسك لحد عندك وادى عقود شودس وانا بادور على محل هناك جنب البيت تفتحوه سوبر ماركت وتبقى انتى وهاله فيه والمحل والبضاعه حاخد قصادهم نصيبك فى الارضى هنا والشقتين حاخد بدالهم هنا شقه نص دور
ام هالة :: انت كده مش ظالم نفسك ؟
ثائر :: ابدا والله اصل هناك شعبى عن هنا شويه يعنى تعتبر كده متعادله ولو هى زياده شويه عليا مش مشكله هاله واخواتها دول اخواتى وانتى قلتى انهم فى رقبتى خدى العقود يا ام هالة واتوكلى على الله
________________
ذهب بعدها لتوديع شريف وامانى المسافرين للساحل
امانى :: برضه مصمم ما تجيش معانا ؟
ثائر :: معلش يا امونه علشان عندى شغل لازم اوضبه على ما شريف ييجى
امانى :: طيب بكره الجمعه مافيش حاجه تتعمل
قال شريف بعصبية
شريف :: سيبيه على راحته يا امانى احنا اربع ايام ونرجع بس لما نرجع لازم اقعد معاك الاول
ثائر :: طيب تروحوا وترجعوا بالسلامه انا حاستناك
انطلقت السيارة تاركة اياه فى حيرة من امره بعد ان لاحظ ان شريف متغير من ناحيته وبعد ان ابتعدوا سالت امانى التى لاحظت الشئ ذاته
امانى :: فيه ايه يا شريف انت متغير وعصبى ومش عوايدك
شريف :: قلقان يا امانى وخايف
امانى :: قلقان من ثائر ؟
شريف :: ده مش ثائر اللى نعرفه ده واحد تانى ما بيعترفش بقانون ولا نظام وممكن كمان يمشى شمال وينصب
امانى :: مستحيل يبقى انت ما تعرفش ثائر كويس ثائر مستحيل ينصب هو ممكن اللى حصل معاه يخليه عاوز يكبر باى طريقة انما برضه بالحلال
شريف :: هو التزوير والرشوه والبطاقه المضروبه حلال ؟
امانى :: تزوير ايه ورشوة ايه مش فاهمه
شريف :: ولا انا فاهم وعلشان كده قلقان ثائر صاحبى وانا قلقان عليه اكتر ما انا قلقان منه وبرضه خايف ياخدنى فى سكته
امانى :: اسمع يا شريف احنا لسه على البر احنا نقضى اليومين بتوعنا ولما نرجع سيبنى انا اتكلم معاه
___________________
التقى ثائر وناصر فى اليوم التالى بمهندس الحى
عباس :: انت اول شغلانه ليك يا استاذ رمزى ؟
ثائر :: اه وعاوزين نفسك معانا عاوزين نطلع رخصة مبانى فى اسرع وقت
كان رمزى هو الاسم المدون فى البطاقة التى حصل عليها من شارع النصر ونظر له المهندس متهكما
عباس :: اسرع وقت اسرع وقت ايه يا باشا ؟ هو بيت واللا ارض فضاء ؟
ثائر :: لا بيت دور ارضى ونصه منور يعنى ارض
عباس :: رخصة الهدم حتاخد من سنتين وطالع انت وظروفك ورخصة المبانى سنه ونص وطالع
ثائر :: يعنى سنتين وزياده وبعدها سنه ونص وزياده دخلنا على اربع سنين
عباس :: علشان تبدا شغل مش علشان تكون خلصت
ثائر :: مافيش طريقه نقرب بيها المسافات ؟
عباس :: هد وابنى وما تشغلش بالك بس هات كحول من الصعيد او من الفلاحين واكتب العقود باسمه وانا حاجيب المخالفات باسمه وبعد ما تخلص وتسكن ويبقى امر واقع المخالفات تروح المحكمه تاخد حكم سجن وغرامه تعمل معارضه يتشال السجن ويكتفوا بالغرامه تستانف تتخفض الغرامه ولو لسه عاليه تتخفض فى النقض كله بيعمل كده
ثائر :: بس انا مش عاوز اجيب كحول مش حاضمنه
عباس :: يبقى ساعتها كل حاجه حتيجى باسمك وده خطر هو انت اسمك رمزى فعلا ؟
ثائر :: تحبه ثلاثى ؟ رمزى نجم زهران
كان ثائر ينوى استخدام البطاقة فى اعماله بعد ان استيقن ان صاحبها قد مات
ناصر :: الاستاذ رمزى معرفه قديمه وانا شغال معاه يا باشمهندس
عباس :: طيب حاقول حاجه طالما معرفه انا حاخد الفين جنيه اول ما تشتغل وكل اسبوع خمسميت جنيه وحاصبر عليك اربع شهور بعدها بيوم حاعمل مخالفات لو خلصت خلال اربع شهور حتروح تعمل شهاده من مهندس استشارى ان العقار ده مبنى بقاله اكتر من تلات سنين
فكر محمد عباس قليلا ثم ساله
عباس :: هو انت ناوى تطلع كام دور ؟
ثائر :: من تمانيه لعشره غير الارضى
عباس :: لو عدتك حاضره يبقى حتلحق لو مستنى بيع وحرق بقى يبقى موت يا حمار . بس اهم حاجه لازم تظبط القسم علشان ما اجيش ادارى عليك من ناحيه القسم يلدعك من الناحيه التانيه حيلدعنى معاك
ثائر :: القسم اعتبره فى جيبى ما تشغلش بالك بيه
عباس :: خلاص تمام نقول على البركه
ثائر :: على البركه اتفقنا بس اسمع انا ما باحبش قلة الاصل
ضحك محمد عباس كثيرا ثم قال
عباس :: قلة الاصل على الكف يا ابن عمى
ثائر :: يعنى ما فيش فايده طيب انا حابلغك قبل ما اهد ازاى
عباس :: انا يوميا بابقى هنا بعد تمانيه اصلى ما باديش تليفونى لحد
________________
افاقت كوثر بعد يومين وبقيت ليومين اخرين فى العناية المركزة قبل ان تخرج الى غرفة اقامة ورغم فرحة البنات بخروجها من العناية واستقرار حالتها الا ان الخوف سيطر عليهم نتيجة لشعورهم بتطور حالتها وشعورهم ان القادم لن يكون سهلا وكان فى العادة تقضى فى المستشفى فى كل مرة اسبوعا او عشرة ايام. ولكن هذه المرة طالت اقامتها كثيرا وكانت حالتها تتحسن للدرجة التى تجعل الطبيب يفكر فى السماح لها بالخروج ثم تعود لتنتكس فيامر بدخولها غرفة العناية المركزة وفى كل مرة كانت المخاوف تزداد من حدوث الاسوا
#ارواح_هائمة
كان فى استقبالهم حين عادوا من الساحل
ثائر :: حمد الله على السلامه نورتوا اسكندريه
امانى :: طبعا قاعدين فى الضلمه من غيرى
ثائر :: طبعا هاتولى بقى اموله علشان وحشتنى
وتلقف الطفلة يحتضنها بحنان وصعدوا جميعا لاعلى
شريف :: حبيبتى والنبى قهوه بسرعه علشان دماغى حتضرب
اخذت الطفلة من ثائر لتضعها فى فراشها وتذهب لاعداد القهوة بينما خرجا هما الى البلكون
شريف :: انت عملت ايه بخصوص الشغل
ثائر :: كل خير اتفقت مع مهندس الحى ياخد الفين جنيه اول ما نهد وكل اسبوع خمسميه
شريف :: يعنى مش حنطلع رخص ؟
ثائر :: رخص ايه يا شريف عاوز تطلع رخص ؟ موت يا حمار حلنى بقى وتطلع بخمس ادوار ونخالف يبقى من الاول
شريف :: كده مخاطره جامده ومخالفه ده شغل ضد القانون
ثائر :: قانون قانون ايه ؟
شريف :: القانون اللى انت كنت بتنادى بيه
ثائر :: واللا القانون التانى اللى شوه هاله وحبس الشيخ العطار ؟ اسمع يا شريف انا كنت باطالب بقانون عادل لكن العدل فى الزمن ده مالوش وجود وانا مش حاغير الكون هى ماشيه كده وانا حامشى معاها
شريف :: يبقى انا مش معاك انا من سكه وانت ....
امانى :: شريف شريف اهدى
دخلت بالقهوة لتجدهما منفعلان فسارعت لتهدئة زوجها
امانى :: حبيبى علشان خاطرى سيبنى انا اتكلم معاه اقعد واهدى
جلس شريف واشعل سيجارة فالتفتت لثائر
امانى :: مزعل عمك شريف ليه يا واد ؟
ثائر :: انا مش مزعله هو اللى لسه عايش فى وهم بيقوللى قانون
امانى :: ولا انت حتعلى صوتك عليا انا كمان ؟ اديك على بوزك اقعد واهدى خد ولع سيجاره واشرب قدامى عادى
جلس واشعل سيجارة فقالت
امانى :: صلوا على النبى كده يا جماعه واشربوا القهوه
الاثنان :: الهم صلى على سيدنا محمد
امانى :: اسمع يا ثائر انت عندك شك ان شريف صاحبك واخوك وبيحبك وبيخاف عليك ؟
ثائر :: لا طبعا وانا كمان باحبه وباخاف عليه ومش حاعمل حاجه ابدا تضره او تضرك واكيد مش حاضر نفسى
امانى :: وانا والله باعزك من زمان وانت عارف والله يابنى دى معزتك عندى زى لولو بالظبط .
ثائر :: مين لولو ده اول مره اسمع عنه
امانى :: ده كلب كنت مربياه زمان ما علينا
ثائر :: كلب يا بنت ال ....
امانى :: مش قصدى اقول انك كلب يعنى قصدى ...
شريف :: امانى اظن احنا بنتكلم جد مش وقت هزار
امانى :: طيب انا اسفه معلش خلينا جد ياثائر كلنا ملاحظين انك اتغيرت للنقيض تماما واحنا خايفين عليك اللى بتعمله ده ممكن يضرك
ثائر :: لو حصل حاجه انا المسئول لوحدى انا اللى حاشيل ومش حاعرضكم للخطر
امانى :: شريف مش خايف على نفسه شريف خايف عليك
ثائر :: اتطمنى انا حاسب كل حاجه كويس واللى اتفقت عليه اسكندريه كلها شغاله بيه وفى النهايه سكة القانون معانا معروفه ومافيش خوف ولا قلق
امانى :: طيب ايه المانع لو طلعتوا رخصه ؟
ثائر :: يا امانى احنا علشان نطلع رخصة هدم حنقعد اكتر من سنتين وبعدها رخصة مبانى اكتر من سنه ونص يعنى اربع سنين تضيع علشان نطلع رخص ونبدا شغل
شريف :: الكلام ده مش قانونى القانون بيقول ...
ثائر :: يا شريف انا عارف اللى بيقوله القانون كويس بس صدقنى ماحدش بيعمل بيه بتروح الحى يضيقوا عليك لحد ما تزهق وتقول حقى برقبتى وانت راجل مهندس اسال اكيد حتلاقى حد من زمايلك شغال فى الحى
امانى :: طيب لو مشيتوا بدماغك حتعملوا ايه ؟
ثائر :: اولا احنا معانا سيوله كويسه نشتغل ونخلص من غير ما نضطر نبيع بس ضرورى ننجز فى اربع شهور لو خلصنا فى اربع شهور مش حتيجى مخالفات نعمل شهاده عند مهندس استشارى ان البيت قديم ونتصالح وندخل ميه وكهربا
امانى :: ولو طولتوا عن اربع شهور او المهندس عمل مخالفات
ثائر :: ساعتها المخالفات حتيجى بالاسم اللى فى البطاقه وتاخد حكم اول درجه سجن وغرامه نعمل معارضه يتشال السجن وتفضل الغرامه نعمل استئناف تتخفض الغرامه ندفع ونعمل مصالحه وندخل برضه ميه وكهربا
امانى :: ولو ثبتوا حكم السجن والراجل صاحب البطاقه ده اتحبس
ثائر :: اولا صاحب البطاقه مات فى حادثه من سنتين وثانيا انا اعرف محامى فرود وتخصصه القضايا دى وحيخلص باقل غرامات ندفع ونقنن اصل فيه قانون وفيه تقنين
امانى :: يعنى ايه مش فاهمه
ثائر :: افهمك الحكومه عاوزه الناس تلف وتدور ما تمشيش عدل يتعمل قانون يمنع حاجه وتفتح سكه من ورا علشان اللى عاوز يعمل الحاجه دى يعملها ويدفع علشان الحاجه الممنوعه دى تاخد سماح يبقى حاجه مش قانونيه احطها فى اطار قانونى ده بقى اللى اسمه التقنين
التقط ثائر انفاسه ثم نظر لشريف قائلا
ثائر :: يا شريف انت صاحبى وانا مش ممكن اخسر صداقتك ابدا احنا لسه على البر لو مش مرتاح سيبك من الشغل وانا حاخلص بيت ام هاله وبعدين اخد بيتك مشاركه واديك نصيبك شقق
نهض شريف وقال بحنق وانفعال
شريف :: يابنى انا خايف عليك انت مش عارف معزتك عندى قد ايه يابنى انا عمر ما كان ليا اخوات صبيان كل اخواتى بنات ومن ساعة ما عرفتك وانا باعتبرك اخويا مش صاحبى خايف من التغيرات اللى حصلت معاك وخلتك عاوز تمشى شمال
ثائر :: كلها شمال يا صاحبى وانا حامشى مع التيار مشيت ضد التيار كتير وتعبت وما قدرتش اكمل ولا احمى اللى حواليا خلاص خلينى مع التيار كفايه قلبى اللى انكسر ومش حيرجع يدق تانى كفايه كل اللى حصل
نهض ونظر الى السماء وزفر بحرارة وقال
ثائر :: انا ماشى وفكر براحتك وانا تحت امرك
شريف :: طالما انت مصمم انا عمرى ما اتخلى عنك انا معاك واللى يحصل يحصل
#ارواح_هائمة
بعد مضى اكثر من شهرين على دخول كوثر المستشفى وتارجح حالتها بين التحسن والسوء انتكست انتكاسة قوية وسارعوا بادخالها غرفة العمليات وقضى الطبيب مع مجموعة اخرى وقتا طويلا للسيطرة على الحالة وكانت البنات الاربع واقفات خلف الزجاج تسيل دموعهم فى صمت ولا يتحركن وقد بذلوا جهدا كبيرا معهن لاقناعهن بالانصراف دون جدوى حتى حليم فشل فى اقناعهن بالانصراف ليلا وفى النهاية امر الطبيب بفتح غرفة اعاشة كوثر لهن ولكنهن بقيت واقفات خلف الزجاج طوال الليل لا يطرف لاحداهن جفنا ولا تجف لهن دمعة ولا تسمع منهم سوى كلمة واحدة ( يارب )
وفى الليلة الثانية بدان يتساقطن من التعب واصر حليم على ذهابهن للحصول على قسط من الراحة فعدن الى بيوتهن وفى الصباح الباكر عادت نرمين وداليا وبعدهن بقليل عادت باسنت اما امال فلم تعد لا يومها ولا فى الايام التالية
قضت كوثر فى غيبوبتها هذه المرة عشرة ايام كاملة وحين افاقت لاحظوا ان الغيبوبة اورثتها ثقلا فى لسانها مما اصاب الجميع بالرعب وشعروا بان القادم اسوا ولكن الطبيب طمانهم بان هذا العرض سيزول مع الوقت وكل هذا ولم تظهر امال
كوثر :: هى امال فين يا بنات ؟
نرمين :: مش عارفين يا ماما من يوم ما بابا حليم خلانا نروح وهى ما رجعتش
كوثر :: اخص عليكم مش تتطمنوا على اختكم ؟
داليا :: هى مش عاوزه تتطمن عليكى خلاص خليها براحتها
كوثر :: ايه اللى بتقوليه ده ؟ امال دى بنتى زيكم ومستحيل ما تجيش تشوفنى الا لو فيه حاجه قويه تمنعها روحوا اتصلوا بيها وطمنونى
باسنت :: يا حبيبتى انا حاعدى عليها لما اروح واطمنك عليها
كوثر :: لا دلوقت قلبى مش متطمن
امسكت راسها بقوة واغمضت عينيها وتابعت بضعف
كوثر :: قلبى واكلنى عليها بيقول فيه حاجه جامده منعتها عنى
نرمين :: طيب اهدى انا حانزل حالا السويتش واتصل بيها
كوثر :: دلوقت على طول
نرمين :: حاضر والله حالا دقيقتين اكون رجعت
ونزلت للطابق الارضى وقبل ان تصل لغرفة السويتش راتها تدخل من الباب الزجاجى ولكنها لم تكن وحدها كان معها ابوها واخويها وكانت تبكى بل تنتحب وبجوارهم تروللى يدفعه عمال التمريض وحين اقتربت نرمين وجدت على التروللى امراة وقد اوصلت المحاليل بجسدها ودققت النظر لتجدها ام امال
نرمين :: امال فيه ايه ؟
امال :: ماما يا نرمين ماما خلاص
اسرعت نرمين معهم حتى صعدوا بها لغرفة فى نفس الطابق وكانت تتنفس بصعوبة بمساعدة جهاز تنفس صناعى وقد علقت لها المحاليل فى الغرفة واسرع ابناءها لجلب الطبيب بينما ذهب الاب لانهاء الاجراءات وبقيت معها امال ونرمين نظرت المراة نحوهما ورفعت قناع التنفس لتقول بجهد
ايمان :: ازيك يا نرمين يا بنتى
نرمين :: الحمد لله يا تانت شدى حيلك علشان تقومى لنا بالسلامه
ايمان :: خلاص يا بنتى ياللا حسن الختام انا خلاص حارتاح
بكت امال بينما اتجهت نرمين نحو المراة تنوى احتضانها
نرمين :: ما تقوليش كده يا تانت ربنا يطول فى عمرك
ولكن امال امسكت بذراعها وهتفت بجزع
امال :: نرمين نرمين بلاش
نظرت نرمين بدهشة ففسرت رد فعلها قائلة بهمس
امال :: اصل ماما ما بتستحملش اى لمسه خلاص جسمها بقى عامل زى القزاز
نظرت نرمين للمراة النائمة فى فراشها بذهول بينما اضافت امال بهمس
امال :: بقالى تلات سنين محرومه من حضنها
كانما احست الام بما يجول بخاطر ابنتها او ان سمعها صار مرهفا فسمعت هذا الهمس الذى يكاد لا يسمع فقالت بضعف
ايمان :: بس قلبى بيحضنك على طول يا حبيبتى
التقطت انفاسها وقالت بجهد
ايمان :: كان كل منايا اشوفك فى بيتك وافرح بيكى وانتى بالفستان الابيض لكن الحمد لله انى عشت لحد ما اتطمنت عليكى
سكتت قليلا واضافت
ايمان :: يا نرمين خلى بالك من امال وقولى لماما امال امانه فى رقبتك
ثم اغمضت عينيها وسكنت للابد
___________________
ذهب المحامى فؤاد مسعود بعد انهاء الاجراءات الى غرفة كوثر فوقف حليم لاستقباله
حليم :: استاذ فؤاد فيك اخير اتفضل
فؤاد :: معلش يا شيخ حليم انا جيت اتطمن بسرعه هى اخبار مدام كوثر ايه دلوقت
حليم :: كويسه الحمد لله لسه خارجه من العنايه ما كملتش ساعه كانت فى غيبوبه طول الايام اللى فاتت
فؤاد :: عرفت من امال وكنت حاجى ازورها لولا ام احمد تعبت وانشغلنا معاها
حليم :: مالها المدام الف سلامه عليها
فؤاد :: الحمد لله على كل شئ تعبت والتعب زاد عليها نقلناها هنا بعد ما نزلت الحسابات قلت اعدى عليكم على فكره نرمين معاهم اوضتها جنبكم فى اخر الممر ده
حليم :: طيب اتفضل مش حتسلم على ام نرمين ؟
دخل فؤاد ليسلم على عجل
فؤاد :: الف سلامه عليكى يا مدام كوثر معلش بسرعه بس حامر عليكى وقت تانى
كوثر :: الله يسلمك يا استاذ فؤاد مالها ايمان بعد الشر ؟
فؤاد :: الحمد لله على كل اللى يجيبه ربنا
داليا :: هى تانت ايمان تعبانه ؟ طيب انا حاروح اشوفها هى اوضتها فين يا عمو فؤاد ؟
وصف لها الغرفة فذهبت على الفور قائلة لباسنت
داليا :: خليكى لما ارجع تبقى تروحى
وصلت للغرفة فسمعت المراة تقول بضعف
ايمان :: يا نرمين خلى بالك من امال وقولى لماما امال امانه فى رقبتك
ثم سكتت المراة وخبا ضوء الحياة فى عينيها وساد الصمت فتقدمت امال مترددة الى فراشها وقالت بوجل
امال :: ماما ماما ردى عليا
ولكنها لم ترد فتقدمت الفتاتان ووقفت داليا على الباب لا تستطيع الحركة ودنت امال اكثر وتحسست ذراع امها برفق
امال :: ردى عليا يا ماما ارجوكى ردى عليا
اقتربت نرمين وحاولت جس نبض المراة فوجدتها فارقت الحياة فتلت عليها الشهادتين واسبلت عينيها وهى تبكى قبل ان تلتفت لامال التى تنظر فى ذهول وتستمع لصوت نرمين
نرمين :: شدى حيلك يا امال تانت فى ذمة الله
ارتمت فى حضن امها وهى تبكى دون ان تنطق بكلمة واحدة بينما نرمين تربت على ظهرها وداليا على الباب تبكى فى صمت حتى سمعت صوت حشرجة خلفها التفتت لتجد محمود الاخ الاصغر لامال وقد سقط على الارض يبكى بصوت متحشرج بينما وقف احمد الاكبر بجوار الطبيب الذى ذهب لاحضاره ولكنه وصل متاخرا
_________________
رفضت كوثر تماما بقاء اى من البنات معها قائلة بتصميم
كوثر :: انا كويسه النهارده ومش عاوزه حد معايا روحوا افضلوا جنب اختكم
داليا :: حنسيبك لوحدك ازاى ؟
كوثر :: وتسيبوها هى لوحدها ازاى تسيبوا بنتى لوحدها تبقوا مش بناتى اللى ربيتهم ازاى يهون عليكم اختكم تحتاج لكم وتتخلوا عنها ؟
ياسنت :: عمرنا ما حنتخلى عنها بس انتى
كوثر :: قلتلكم انا كويسه
نرمين :: طيب واحده منا حتفضل معاكى واتنين يروحوا
كوثر :: انا مش محتاجه حد النهارده لكن هى محتاجكم كلكم جنبها روحوا وما ترجعوش غير وهى معاكم
ثريا :: روحوا يا بنات وانا بعد العزا حارجع ابات مع ماما
وحين هموا بالانصراف هتفت كوثر
كوثر :: يا بنات قولولها ماما كوثر روحها وقلبها معاكى
ولكن امال لم ترد الا بهمهمة غير مفهومة
نرمين :: ماما كوثر بتقول لك ان روحها وقلبها معاكى
تنهدت وهمهمت ولم تتكلم فلما انتهى العزاء وانصرف الجميع الا من الفتيات الاربع قالت نرمين
نرمين :: امال عيطى يا حبيبتى ما تكتميش دموعك فكى عن نفسك
ولكنها لم تبكى ولم ترد لم تستطع البكاء كانت تشعر بغصة قوية تمنعها من التنفس وكانت تبحث عن الدموع فلا تجد دمعة واحده تريحها
باسنت :: طيب ادخلى نامى شويه يا حبيبتى انتى بقالك يومين من غير نوم
قامت ببطء وتحركت الى غرفتها ثم استدارت اليهم وقبضت على ايديهم وحاولت ان تقول شيئا فلم تستطع
نرمين :: احنا مش حنسيبك حنبات معاكى تعالى ارتاحى شويه
( كيف ارتاح وقد ذهبت امى ثلاثة اعوام كاملة وانا محرومة ان احتضنها او اضع راسى على صدرها لانها تتالم لو لمسها احد اعوام طويلة وانا اقوم على خدمتها كل ليلة ولم انقطع عن الدعاء لها بالشفاء كل ليلة ولكن هل كنت بارة بها هل كانت تعلم كم احبها ؟ هل علمت كم اتوق ان اضمها واضع راسى على صدرها ؟ الم ادعو الله مؤخرا ان يرحمها من هذا العذاب ويريحها ؟ هل كنت ادعوا الله لها ليرحمها ام ليرحمنى من طول خدمتها ؟ يارب ارحمنى انا لم اضج بخدمتها ولكنى كنت اشفق عليها من كل هذا العذاب فهل ماتت امى استجابة لدعائى ؟ الان بعد ان ذهبت اتمنى لو تعود الى الحياة لدقيقة واحدة بل لثانية واحدة لاضع راسى على صدرها واقول لها كلمة واحدة احبك . ولكن الموتى لا يعودون ابدا للحياة )
نرمين :: افردى جسمك على السرير يا حبيبتى
رفعت احداهن قدميها على الفراش وخلعت لها حذاءها ولكن عينيها كانت غائمتان فلم تعرف من منهن فعلت ذلك وفرشت احداهن فوقها غطاء خفيفا ولم تعرف ايضا من هى ثم سمعت طرقا على الباب وصوت نرمين يقول
نرمين :: اتفضل يا عمو فؤاد
فؤاد :: ازيها يا نرمين يا بنتى دلوقت
نرمين :: زى ما هى يا عمو لا بتعيط ولا قادره تنام انا خايفه عليها قوى
فؤاد :: طيب علشان خاطرى خليكوا جنبها انا قلت لبابا حليم ومدام شيرين انكم حتباتوا معاها
نرمين :: احنا مستحيل نقدر نسيبها ما يجيلناش قلب نسيبها دى اختنا دى ماما كوثر رفضت تخلى حد معاها علشان نبقى كلنا مع امال
فؤاد :: ربنا يخليكم لبعض يا حبيبتى ويقوم لكم مدام كوثر بالسلامه انا حابات فى المكتب مع الولاد ورقم التليفون فى الاجنده اللى جنب التليفون فى الصاله
امال ( سرا ):: يارب ماما كوثر تقوم بالسلامه يارب اشفيها يارب امى ماتت وما بقاش فاضل غير حضنها لو اتحرمت منها لو حصل لها حاجه حابقى لوحدى خالص وحاموت