رواية ارواح هائمة الفصل الحادي والعشرين 21 بقلم آثر توفيق
الحلقة 21
الامتحانات !
يوم الامتحان الاخير للسنة الثالثة
كعادته يذهب الى هناك ويصعد للطابق العلوى فى مبنى المدرجات ليراها عند خروجها . كانت دائما تخرج سعيدة الثلاثة يخرجن سعداء برغم صعوبة بعض المواد ولكنهن كن مجتهدات حقا لقد اجتهدن كثيرا فاستحققن التوفيق من الله وكم اسعده ذلك هو ايضا اجتهد كثيرا هذا العام بل اجتهد طوال عمره ولكن التوفيق من الله فى النهاية
يرقبها من بعيد ويدعو لها بالنجاح ولا يجد فى نفسه الشجاعة ليحاول ثانية حتى لا يسبب لها الما ايام الامتحانات يكفيه ان يراها سعيدة ولو على البعد
ولكن فى اليوم الاخير لم تكن سعيدة خرجت من اللجنة حزينة باكية وجلست على حافة نافذة المكتبة تنتظر الباقيات وبعد قليل خرجت باسنت وجلست بجوارها تربت على كتفها وتبكى وينتظران داليا وعند خروجها انطلقت الفتيات نحو باب كلية الحقوق باكيات ماذا يحدث ؟
التقين بامال فى الطريق اليوم هو اليوم الاخير لها هى ايضا ولكنها تبدا فى العاشرة فلماذا خرجت باكرا فى الحادية عشر ولماذا تبكى هى الاخرى ؟ اسرع خلفهم محاولا اللحاق بهم ولكنهم ركبوا تاكسى على عجل وانطلقوا والان لا توجد وسيلة لمعرفة السر فى كل هذا الحزن وتلك الدموع
_______________
اعتادت باسنت على المبيت مع نرمين وداليا فى ايام الامتحانات والذهاب معا وكانت كوثر تقوم باكرا وتعد لهن الافطار وتصلى الفجر سريعا وتوقظهن فبصلين الفجر فى جماعة ثم يفطرن ويذهبن للامتحان باكرا حتى يتسنى لهن مراجعة سريعة قبل الدخول وفى الليلة السابقة للامتحان الاخير اتصلت امال وردت داليا عليها
امال :: انتوا حتطلعوا على الترام امتى ؟
داليا :: الساعه سبعه بالدقيقه علشان نلحق نراجع قبل اللجنه
امال :: طيب انا بكره حاقابلكم على الترام واروح معاكم
داليا :: بس انتى بتدخلى عشره حتروحى بدرى ليه ؟
امال :: اخر يوم بقى مش مهم اقعد ساعه لوحدى المهم اروح معاكم فى ساعه واقعد معاكم ساعه قبل ما تدخلوا
داليا :: طيب يا بنتى احنا كده كده حنتقابل بعد الامتحان نروح محطة الرمل مستحيل نمشى ونسيبك
امال :: ايه يا داليا ناقص تقوليلى مش عاوزينك
داليا :: لا طبعا اخص عليكى طب احنا كان نفسنا تبقى معانا تجاره ونبقى مع بعض على طول خلاص يا ستى نتقابل سبعه بس اوعى تتاخرى
ولكن حين استيقظت الفتيات كالعادة فجرا توضان وصلين كالعادة وخرجن الى الصالة فلم يجدن كوثر كعادتها فى انتظارهن فغلبت عليهن الدهشة
نرمين :: ايه معقول تكون ماما راحت عليها نومه ؟
داليا :: او يمكن طولت شويه فى الصلاه
باسنت :: لا دى بتجهز الفطار وبعدين تصلى وكل مره تبقى فى الصاله قبلنا
نرمين :: ندخل نشوفها ؟
باسنت :: يمكن نايمه بلاش نقلقها احنا نجهز لنفسنا الفطار هو احنا صغيرين ؟
نرمين :: فطار ايه انتى راخره احنا عاوزين نتطمن عليها دى مستحيل يجيلها نوم يوم الامتحان بالذات انا حادخل اتطمن عليها
داليا :: بس بس يانرمين لو نايمه ما تصحيهاش
فتح باب الشقة لتدخل ثريا فى نفس اللحظة التى دخلت فيها نرمين غرفة امها فوجدتها نائمة فى الفراش فدنت منها
نرمين :: يا حبيبتى يا ماما اكيد نمتى من التعب
وانحنت لتقبل يدها فوجدتها باردة كالثلج ومن خلفها داليا على الباب تهمس
داليا :: يا نرمين لو نايمه سيبيها ما تصحيهاش
التفتت نرمين وعلى وجهها بدت امارات الرعب وهى تقول
نرمين :: دى ايديها بارده زى التلج . ماما . ماما
لم ترد كوثر او تتحرك فهزتها برفق ثم بقوة ثم رفعت صوتها بالنداء ولكن لا توجد ادنى استجابة ووضعت داليا يدها على فمها ولكن صرختها افلتت رغما عنها فاندفعت ثريا الى الغرفة وقبل ان تسال قالت داليا
داليا :: ماما ما بتردش وايديها بارده زى التلج
اندفعت ثريا الى اختها وجست نبضها ثم اطلقت صرخة شقت سكون الفجر كوثااااااااااار
___________________
حضر الطبيب واجرى الكشف على كوثر وخرج مكفهرا
مراد :: لازم تتنقل المستشفى فورا
ثريا :: هى مالها يا دكتور
مراد :: لازم تعمل اشعه ضرورى ولازم تدخل العنايه المركزه وجودها فى البيت معناه اننا بنضحى بيها
حليم :: احنا مستحيل نضحى بيها يا دكتور انا حاطلب الاسعاف
مراد :: انا حاسبقكم على المستشفى واجهز اوضه واطلب فنى الاشعه ييجى
حليم :: اتفضل يا دكتور وحنكون وراك على طول _ ثم سرا _ يا خفى الالطاف نجنا مما نخاف الطف بيها وبينا يارب .
طلب الاسعاف واعطاهم العنوان ثم التفت الى البنات
حليم :: ياللا يا بنات روحوا شوفوا امتحانكم
نرمين :: مستحيل مش ممكن اسيب ماما واروح الامتحان
حليم :: وتفتكرى ماما حتبقى مبسوطه لما تسيبى الامتحان وتقعدى جنبها ؟
داليا :: يا بابا ازاى حنقدر نحل ولا يكون عندنا مخ نركز
ثريا :: يا بنات معقول ؟ دى اخر ماده انتوا لو ما ركزتوش فكروا ان ماما كوثر حتفرح بنجاحكم انتوا مش عاوزين تفرحوها ؟
باسنت :: بس دى ماما كوثر هى اى حد ؟
انفعل حليم وصاح بغضب
حليم :: جرى ايه هو مافيش سماع للكلام ؟ قلت روحوا يعنى تروحوا امتحانكم الكلمه اللى اقولها ما اسمعش بعدها غير حاضر وبس فاهمين ؟
بهتت الفتيات وتطلعن بعضهن لبعض وقلن فى صوت واحد
البنات :: حاضر يا بابا
ثريا :: ايوه كده بناتى الشاطرين اللى بيسمعوا كلام بابا اللى عارف مصلحتهم وبعدين يا حبايبى احنا لسه حنلبسها ونوديها المستشفى وتعمل الاشعه وبعدين نرجعها اوضتها تكونوا جيتوا وبعدين انتوا عارفين ان كوثر كل شويه فى المستشفى دى بتروح تغير جو هناك وترجع ياللا بقى فين بوسة ماما ؟
التففن حولها يقبلنها فقال حليم بابتسامة تملا وجهه
حليم :: وبابا مالوش بوسه ؟
باسنت :: احلى بوسه طبعا لاحلى بابا فى الدنيا والتففن حوله يقبلنه ويقبلن يديه فدعا لهن
حليم :: ربنا يوفقكم وينجحكم ويصلح شانكم دنيا واخره انتوا كل سنه بتجيبوا تقديرات وماما كوثر بتفرح بيكم وتعمل حفله كبيره علشانكم يرضيكم السنه دى تزعلوها على اخر ماده ؟
نرمين :: لا طبعا يا بابا مش ممكن نزعلها ابدا ولا نزعل حضرتك
حليم :: طيب ياللا على الامتحان انتوا اتاخرتوا على امال وزمانها قلقانه وخلوا نعمه تطلع تساعد ماما وقولوا لحسين يستنى الاسعاف فى الشارع
_________________
ظلت امال تروح وتجئ على محطة الترام وهى تنظر لساعتها بقلق وتحدث نفسها
امال :: ايه اللى اخرهم كل ده سبعه وربع دلوقت عمرهم ما عملوها معقول يكونوا نزلوا بدرى وسابونى بس انا برضه نزلت بدرى وهم وعدونى يستنونى وعمرهم ما خلفوا وعدهم معايا تكون راحت عليهم نومه ؟ اه لو كان الكشك فتح كنت كلمتهم فى التليفون خايفه اروح اتكلم من المكتبه ييجوا يفتكرونى مشيت طب اعمل ايه اركب انا ؟ سبعه ونص الا خمسه اركب الترام ده ؟ لالا حاستنى اللى بعده ممكن يكونوا نزلوا متاخرين وركبوا تاكسى ونسيونى ؟ لالا مش ممكن ينسونى ابدا وبعدين سبعه ونص انتوا فين تكون ساعتى مقدمه ؟ لالا ساعة البوسطه برضه سيعه ونص انتوا فين الترام جاى انتوا فين انتوا فين ؟ اهم
رفعت صوتها تحثهم على الاسراع
امال :: يا بنات مدوا شويه الترام جاى
ولكنهن لم يسرعن بل سرن كما هن
امال :: مدوا شويه يا بنتى انتى وهى فيه ايه الترام حيمشى
توقف الترام خلفها والتفتت تستمهل السائق ولكنه مضى فنظرت اليه متحسرة واستدارت بغضب تؤنبهن
امال :: عاجبكوا كده اهى الترام ......
قطعت عبارتها بعد ان فجعت بمراى الدموع فى كل العيون لا تجف
امال :: مالكم فيه ايه بتعيطوا ليه انطقوا حصل ايه حصل حاجه فيه ايه ؟
باسنت :: ماما كوثر تعبت ونقلوها المستشفى
هبط قلبها فى قدميها انها تحب كوثر كما تحب امها تماما ولا تتحمل ان تشعر كوثر بمجرد صداع او الم فى اسنانها
امال :: تعبت ازاى مالها حصل ايه ؟ اتكلموا
نرمين :: قمنا الصبح لقيناها ما بتردش وايديها زى التلج جسمها كله كان زى التلج والدكتور قال لازم تروح المستشفى
امال :: هو قال مالها عندها ايه ؟
داليا :: قال لازم تعمل اشعه وتدخل العنايه المركزة
بكت نرمين التى كانت على علم بمرض امها ولم تستطع الصمت
نرمين :: اصل ماما عندها ....... عندها سرطان
ران الصمت على الجميع وسقطت الاوراق من يد امال فلم تشعر بها وجاء الترام وهن واقفات لم تتحركن حتى قالت باسنت
باسنت :: الترام جه وبابا حليم قال لازم نروح الامتحان
نظرت امال اليها ثم الى الباقيات وانحنت تلملم اوراقها المبعثرة وقامت وهى تمسح دموعها فى كم قميصها
امال :: بابا حليم عنده حق لازم نروح الامتحان
وبلا كلمة اخرى ركبن جميعا فى العربة الاولى اربع فتيات يرتجفن كاوراق الشجر تحت الرياح العاصفة اربع قلوب منفطرة وثمانى اعين تسيل منها الدموع انهارا
ساد الحزن فى الترام وقتا حتى قطعت داليا حبل الصمت
داليا :: انا مش عارفه ازاى حاعرف اركز فى الامتحان كده
امال :: انا ناسيه كل حاجه مش فاكره اسم الماده اصلا يارب
نرمين :: لازم نركز ولازم نحل علشان ماما
داليا :: ازاى
نرمين :: ما اعرفش
باسنت :: يا بنات كلنا متوضيين الحمد لله اول ما ندخل اللجنه كل واحده تقرا الفاتحه واكيد ربنا حيفتح علينا ويسهل لنا
نرمين :: يارب احنا فى عرضك يارب اشفيها بحق جاه النبى وسهل لنا علشان نفرحها
داليا :: بس اوعوا واحده تفكر تغش كلمه واحده ماما كوثر بتزعل قوى
امال :: اكيد ماما كوثر بتدعيلنا وبتبقى حاسسه بينا ولو غشينا حتعرف حتحس
باسنت :: احنا ما ينفعش نخرج قبل نص الوقت يعنى الساعه عشره ونص
امال :: انا ممكن اخرج بعد ساعه يعنى الساعه حداشر لازم تستنونى
داليا :: طيب انتى ممكن تحصلينا
امال :: لو حتمشوا من غيرى يبقى مش حادخل
نرمين :: لا خلاص حنستناكى يا بنات اللى يعدى نص الوقت وما حلتش كويس قدامها للساعه حداشر بالكتير بس مش بعد كده
#ارواح_هائمة
دخلت البنات اللجان وامال تستحلفهم
امال :: احلفوا انكم مش حتمشوا وتسيبونى
نرمين :: والله ما حنسيبك حنستناكى بس لحد حداشر وبعد كده انتى حرة
جلست وحيدة تبكى فى صمت وخيل اليها ان كوثر تقف امامها غاضبة او تتصنع الغضب كما فعلت يوم مرض نرمين ( ما تقوليش يا تانت ) ثم تزيل قناع الغضب لتكشف عن وجهها الصبوح وتقول بحنان ( قولى ماما كوثر ) وراتها بعين خيالها تربت على راسها وشعرت بيدها تمسح على شعرها وتقول ( مالك بتعيطى ليه خايفه عليا ؟ ما تخافيش ادخلى لجنتك وحلى كويس وانا حابقى كويسه ) مسحت دموعها وقالت :: حاضر يا ماما كوثر حادخل واحل علشان خاطرك
دخلت نرمين لجنة الامتحان وقرات الفاتحة وبعض قصار السور ثم نظرت الى ورقة الاسئلة الامتحان كان سهلا هذا السؤال اعرف اجابته ولكنى لا اذكرها وهذا ايضا وهذا لا اذكر اى شئ دفنت وجهها بين كفيها وبكت فاقترب منها المراقب
المراقب :: مالك يا بنتى مش مذاكره كويس ؟
نرمين :: مذاكره كويس وعارفه كل الاجابات بس مش فاكره حاجه
المراقب :: طيب هدى نفسك وحاولى تركزى
نرمين :: مش قادره اركز اصل ماما دخلت المستشفى النهارده
المراقب :: لا حول ولا قوة الا بالله طيب خلى اللى جنبك تفكرك باول السؤال
نرمين :: مستحيل انا ما اقدرش اغش ابدا ده حرام وماما بتزعل
ربت على راسها قائلا
المراقب :: طيب هدى نفسك واقرى الفاتحه وربنا ان شاء الله حيفتح عليكى
سار نحو باب اللجنة وخرج لدقيقة ثم عاد وتلت هى الفاتحة من جديد وبعد دقائق حضر احد الفراشين يحمل كوبا من عصير الليمون فحمله المراقب وسار نحوها بابتسامة مطمئنة ووضعه امامها قائلا
المراقب :: اشربى الليمون وهدى نفسك وربنا حيسهلها
نظرت له بامتنان وشربت بعضا من الليمون وقرات سورتين من قصار السور وشعرت كما لو ان الاجابات تتدفق الى راسها واضحة جلية فامسكت بالقلم واخذت تكتب وتكتب وهى تشعر كما لو ان الكلمات تظهر على الورق من نفسها .
خرجت من اللجنة لتجلس صامتة تبكى فى انتظار الباقيات وبعد قليل خرجت باسنت وجلست بجوارها وربتت عليها
باسنت :: ما تخافيش ماما حتبقى بخير
نرمين :: يارب
خرجت داليا بعد ذلك متلهفة
داليا :: ياللا بسرعه ناخد امال ونمشى
فى الطريق التقوا بامال وكان ثائر يهرع نحوهم
امال :: مش ده ثائر ماله بقى عامل كده ؟
داليا :: واحنا مالنا وماله هو حر فى نفسه
امال :: صعبان عليا رغم كل اللى حصل اشوفه كده ده بقى عامل زى الهيكل العظمى دقنه طويله وهدومه مبهدله ايه اللى حصل ؟
داليا :: هو عنده حاجه فى تالته ؟ كل امتحان اشوفه هنا
نرمين :: كفايه بقى السيره دى ياللا بسرعه . تاكسى
توقف التاكسى فركب الجميع وانطلق مسرعا قبل ان يلحق بهم
_________________
مراد :: انا مش حاخبى عليك يا شيخ عبد الحليم الحاله ما بتستجيبش للعلاج ولازم نفكر فى الجراحه
كان فى مكتب الطبيب يستعلم عن الحالة ففكر قليلا
حليم :: طيب والجراحه دى نسبة نجاحها ايه ؟
مراد :: ضعيفه مع الاسف انما مع تكرار الغيبوبه وعدم الاستجابه للعلاج بالكيماوى حنبقى مضطرين اننا نفكر فيها
حليم :: مافيش طريقة علاج تانيه ؟
مراد :: مع الاسف ابحاث السرطان لسه فى بداياتها ونسب الشفاء ضعيفه الورم كل يوم بيزيد وبيضغط على المخ ودلوقت بيسبب غيبوبه والغيبوبه لو طولت ممكن لا قدر الله تسبب شلل جزئى او ضمور فى بعض الاعضاء او لا قدر الله الوفاه وعلشان اكون صريح معاك للاخر كل العمليات اللى تمت قبل كده اما بتفشل او بتنجح فى استئصال جزء من الورم علشان تخفف الضغط على المخ وبتبقى جذور الورم زى ما هى لانها بتبقى ضاربه فى تلافيف المخ
حليم :: لا حول ولا قوة الا بالله الهم اشفى مرضانا واشفى كل مريض يارب
مراد :: انا معتمد انك راجل مثقف وواسع الاطلاع واتمنى يكون كلامى مفهوم
حليم :: طبعا يا دكتور كلامك واضح بس معنى كده ان الجراحه يادوب مسكن انما مش علاج
مراد :: فعلا ومش الجراحه وبس انما كل طرق علاج السرطان مسكنات مش اكتر الجراحه نسبة نجاحها ٣٠٪ ومع ذلك وصلنا لانها اصبحت ضروره ملحه
حليم :: طيب يا دكتور مش عدم ثقه فيك طبعا انما لو سفرناها تتعالج بره
مراد :: انا باتكلم عن بره يا شيخ عبد الحليم احنا فى مصر لسه ما عندناش امكانيات ولا مهاره بشريه نعمل الجراحه دى ولو اخدنا القرار لازم تسافر بره
حليم :: طيب فيه مكان معين بره حتسافر له ؟
مراد :: المانيا البروفيسور هال استاذى اللى انا اتعلمت على ايده والحقيقه انا متابع معاه الحاله من اربع سنين وبانفذ تعليماته يعنى تقدر تقول ان هو الطبيب المعالج وعارف كل حاجه عن الحاله وهو اللى قرر اللجوء للجراحه انما لو اخدتم القرار حاسافر معاها وابقى المساعد بتاعه لو كان لينا عمر
حليم :: انت الشافى المعافى يارب طيب يا دكتور انا مش حاقدر اخد قرار مهما كان لازم ارجعلها لما تفوق وارجع لبنتها
مراد :: مش بنتها لسه صغيره انها تشيل الحمل التقيل ده ؟
ابتسم حليم بثقة قائلا
حليم :: نرمين دى كانت اصغر من كده خمس سنين لما صممت انك تقول لها على حقيقة مرض امها دى بنت محمود العطار بس قوللى يا دكتور هى العمليه حتتكلف كام تقريبا ؟
مراد :: كتير يا شيخ حليم كتير جدا انا حاتصل بالبروفيسور هال واحاول احصر كل تفاصيل التكلفه ويكون فى معلومك ان قدامنا حوالى سنه
حليم :: يا ميسر كل امر عسير يارب شكرا يا دكتور ودلوقت نقدر ندخل لكوثر ؟
مراد :: لا مع الاسف انا اديت تعليمات تدخل العنايه وتقدروا تشوفوها من ورا القزاز انما دخول النهارده وبكره لا مش ممكن
حليم :: ليا رجاء اخير يا دكتور سيبنى انا اقول لهم انا مش حاقول حاجه قبل ما اعرف التكلفه قد ايه وحادبرها ازاى وطالما قدامنا سنه يبقى نصبر شويه
________________
وصلت البنات الى المستشفى وعند الباب الزجاجى وقفت نرمين ومسحت دموعها قائلة
نرمين :: يا بنات بشويش احنا داخلين مستشفى وفيها مرضى عاوزين يرتاحوا امسحى دموعك انتى وهى ومش عاوزه واحده تنزل دمعه قدامها مفهوم
امال :: انتى قلبك جامد قوى يا نرمين دى امك ازاى تقدرى
قبلت داليا خدها قائلة
داليا :: اكيد تقدر دى بنت ابوها خلاص يا بنات اسمعوا الكلام ماما كوثر بتزعل لما تشوف حد فينا بيعيط ما بتحبش الدموع ابدا
باسنت :: انا مش حاقدر مش حاقدر
وانخرطت فى البكاء بحرارة فاحتضنتها نرمين برفق قائلة
نرمين :: يا حبيبتى يا بسبوسه انتى مش عارفه ماما كوثر بتحبك قد ايه ؟
باسنت :: انتوا اللى مش عارفين انا باحبها قد ايه ولو شفتها كده حاموت
نرمين :: بعد الشر عليكى طيب مش احنا بقى نفرحها علشان تخف وترجع البيت واللا ننكد عليها علشان تفضل عيانه ؟ ياللا يا حبيبتى امسحى دموعك وورينى عينيكى الحلوه دى الله ايه القمر ده فاكره يا بت لما كنتى زى البقره زمان ؟
ضحكت باسنت وهى تحاول ايقاف دموعها قائلة
باسنت :: اهى ماما كوثر اللى خليتنى اخس وقالتلى لو خسيتى حتبقى شبهى
داليا :: وادى انتى ياختى بقيتى شبهها اكتر منى علشان تعرفى ان كلامها كله صح
امال :: يا بنات ياللا ندخل انا ماسكه نفسى بالعافيه
اسرعوا الى الداخل محاذرين احداث اى ضوضاء ولقيهم الطبيب فى طريقهم
مراد :: ايه يا بنات على فين ؟
نرمين :: عاوزين نتطمن على ماما هى فى اوضه كام يا دكتور ؟
مراد :: ماما فى العنايه يا نرمين وممنوع حد يدخل عليها انتوا تقدروا تشوفوها من ورا القزاز بس مفهوم ؟
داليا :: طيب نكلمها بالسماعه حتى زى المره اللى فاتت
مراد :: ماما فى غيبوبه يعنى نايمه مش حتتكلم واول ما تفوق حانقلها اوضتها
امال :: وهى حتفوق امتى يا دكتور ؟
مراد :: كلها ساعات مش حتطول الموضوع مش خطير هى زى كل مره بس يعنى زياده شويه ياللا بقى ومن غير صوت
ذهبت الفتيات وتخلفت نرمين عنهم قليلا
نرمين :: هى حالتها ايه يا دكتور ؟
مراد :: حالتها كويسه يا نرمين زى ما قلت زى كل مره
نظرت للطبيب متفرسة فبدا عليه الارتباك قليلا فسالته
نرمين :: انت مش عاوز تقوللى على حالتها ليه يا دكتور ؟
حليم :: اصل الدكتور بيتابع حالتها مع دكتور كبير قوى فى المانيا وبيبعتله كل التطورات اول باول ويستنى رده
نرمين :: بابا حليم انت هنا ؟
حليم :: اومال يعنى حاكون فين لازم ابقى هنا طبعا
مراد :: وزى ما قال الشيخ عبد الحليم انا باتابع الحاله مع استاذى البروفيسور هال وبعتت صور الاشعه والتحاليل على الفاكس ومستنى رده واول ما يرد عليا حاطمنكم انما مبدئيا الحاله زى ما هى اتطمنوا
حليم :: ياللا يا نرمين روحى شوفى ماما وانا حانزل اصلى الضهر واجى علشان نروح
#ارواح_هائمة
الامتحانات اليوم الاخير لامتحانات السنة الرابعة
خرج ثائر من اللجنة متجها الى بوفيه القهوة ينتظر خروج باقى الاصدقاء فسمع صوتا يقول
امانى :: دى مواعيد زباله كل مره كده تسيبنى للشباب الصايع يعاكسنى ؟
تلفت حوله فلم يجد احدا فقال
ثائر :: انا باحلم واللا ايه سامع صوت .... كروان بيغنى
ضحكوا وخرجوا جميعا من خلف باب المدرج المفتوح
شريف :: احنا طلبنالك قهوه ما تطلبش
امانى :: مش عوايدك تقعد بعد نص الوقت
ثائر :: ما بصيتش فى الساعه اصلا انتوا ايه اللى جابكم
امانى :: كل ما تشوفنى تقول ايه اللى جابك انا حره هى كانت كلية ابوك
ثائر :: انا اسف انا قصدى علشان امل بس انما انا الفهالك واجيبها لحد البيت هاتى امولتى
واخذ الرضيعة من يدها يلاعبها وسال الباقيات
ثائر :: عملتوا ايه يا بنات
مها :: الحمد لله كان سهل جدا النهارده
ثائر :: وانتى يا رحاب خلاص حتسافرى ؟
رحاب :: لا انا قاعده لحد النتيجة هدى اخر سنه ماما جايه فى الليل وعاوزاك تيجى معى المطار
ثائر :: من عينيا حاضر وانتى يا هاله اخبارك ايه ؟
هالة :: الحمد لله شفنا واحد يشترى البيت بس قال انا فلوسى كوم واحد واستلم فاضى حندور على شقه مفروشه نقعد فيها كام شهر على ما نشترى شقه وننقل حاجتنا الراجل ما عندوش مانع يخلى العفش متخزن عنده شهر واللا شهرين
ثائر :: طيب ليه تعالوا شودس فاضل عندى شقتين ممكن تفتحوهم على بعض ولو عاوزين واحده بس براحتكم
هالة :: طيب ممكن نتفرج عليها بكره ؟
ثائر :: انتوا ممكن تنقلوا فيها بكره ولو مش عاجباكم خليكوا فيها لحد ما الاقى حاجه تعجبكم
امانى :: ولا ولا باقول ايه انا مسافره الساحل يوم الخميس وعاوزاك تيجى تنزل لى الشنط
ثائر :: انا خدامتك ام احمد
شريف :: اعمل حسابك تحضر شنطتك وتيجى تقعد معانا يومين تفك نفسك وبكره انا معاك نفرج هاله على شقق شودس ونطلع على باكوس نشوف بيت والدتى
امانى :: ودلوقت انا عازماكم على الغدا احتفالا بنهاية الامتحانات
__________________
فى الصباح التالى توجه ثائر وشريف لام هالة فادخلتهم هالة لمقابلتها
ام هالة :: اتفضلوا اهلا وسهلا ادخل يابنى انا عاوزاك
ثائر :: تحت امرك يا تانت ده شريف صاحبى وجوز امانى
ام هالة :: اهلا وسهلا اتفضلوا البيت بيتكم
جلسوا بينما ذهبت هالة تعد القهوة
ام هالة :: هالة بتقول انك بتفهم فى اسعار الاراضى والبيوت والشقق
ثائر :: يعنى عندى فكره كويسه
ام هالة :: طيب عاوزاك تتفرج على البيت وتقدره وتقوللى يساوى كام ؟
ثائر :: حاضر ياللا يا شريف نبص عليه من فوق
صعدوا الى سطح المنزل لمعاينته ونزلوا فوجدوا هالة قد اعدت القهوة
ثائر :: هو البيت مساحته تقريبا ٢٠٠ متر لكن مش مستغل نصه منور ومافيش غير الشقه دى ومحل صغير شكله مقفول وكله فاضى يعنى مافيش مشاكل سكان لاى مشترى هو كده يساوى من ٢٥٠ الف ل ٣٠٠ الف
هالة :: يااه على كده الراجل ده كان بيضحك علينا تصور كان عاوز يدفع ١٠٠ الف وبالعافيه وصلهم ١٢٠ الف
شريف :: ازاى الكلام ده ده حرامى ومستغل
ام هالة :: اصله شايف قدامه واحده ست بطولها ما تعرفش حاجه ومالهاش راجل يقف جنبها اصل انا يابنى ليبيه مش من هنا اهلى فى ليبيا وماليش حد هنا
ثائر :: ليكى يا تانت اعتبرينى ابنك وتحت امرك
ام هالة :: ده اللى خلانى اكلمك انت انسان محترم وامين وانا عاوزه افوضك فى حكاية بيع البيت عاوزين نعزل من هنا باى شكل
ثائر :: تعالوا انقلوا فى شودس وبعد كده ربنا يسهل
ام هالة :: طيب اسمع يابنى انا لازم اشوفها الاول ولو عجبتنى نشوف حنعمل ايه لسه عاوزه الم حاجتى
ثائر :: خلاص نشرب القهوه ونقوم على هناك
___________________
كانت الشقة فسيحة تهويتها جيدة وديكورها جيد
ام هالة :: بكام يابنى الشقه دى ؟
ثائر :: لو عجبتك ما تشغليش بالك
ام هالة :: كفايه انها من وشك بعدين جنبها سوق ومواصلاتها سهله بس لازم اعرف بكام انت عارف البيت بكام ولازم يفضل معانا قرشين احنا عايشين على المعاش وكنا بنفتح المحل بتاع المرحوم يساعد شويه
ثائر :: انتوا عندكوا محل ؟
ام هالة :: المحل اللى فى البيت كان المرحوم عامله بقاله صغيره كده يفتح جنب الشغل وكنت انا افتحه من عشره الصبح لحد قبل ما ييجى بساعه علشان اعمل الغدا ولما مات بقيت بافتح من الصبح لحد بالليل تسعه عشره بظروفها وكان بيجيب قرش كويس علشان الناس كانت بتحبنا بعد حكاية هاله خفت افتحه اقرا فى عيون الناس كلام يزعلنى
ثائر :: انتى عرفتى ان هاله مظلومه ممكن تنسى الحكايه دى
ام هالة :: الناس لا بتنسى ولا بترحم
ثائر :: ماحدش له عندكوا حاجه اسمعى سيبيها على الله وعلى ابنك هى فين هاله تعالى نشوفها فى الشقه التانيه
وفى الشقة الثانية كانت هالة واخواتها يشاهدن الترام عند مروره بانبهار
هالة :: البلكونه هنا تحفه العيال حتتجنن بس اوضها اضيق
ثائر :: اه هنا اصله وسع البلكونه والريسبشن على حساب الاوض بس انا ممكن افتح لكم الشقتين على بعض
ام هالة :: لالا حيبقى كتير جدا حنقدر على كل ده ازاى
ثائر :: مش كتير ولا حاجه انا بافكر فى حاجه معينه بس محتاج اناقشها مع شريف الاول انتوا لو عاجباكم يبقى على البركه لما يرجعوا من الساحل تكونوا جهزتوا نفسكم يعنى قدامكم اسبوع وفكرى براحتك
_________________
وفى باكوس وبعد معاينة منزل شريف
ثائر :: البيت حلو يا شريف بسم الله ما شاء الله ناصيه ومساحه ومنطقه حيه احنا هنا نعتبر جليم مش باكوس والشقق ليها سعر والمحلات كمان ليها سعر وده اظن معدى ٥٠٠ متر
شريف :: ٥٢٥ متر بالتمام والكمال ومربع ٢١×٢٥
ثائر :: طيب ليه ما اتجوزتش فيه ده يعتبر فيلا بجنينه
شريف :: اصل البيت بتاع والدتى كانت عاملاه زى فيلا المبانى مساحتها مش كبيره اغلب الارض جنينه وكان زى مصيف والدتى تيجى من القاهره تقعد شهر اختى تيجى تقعد شهر اختى اللى فى المانيا تقضى اجازتها فيه واللى فى امريكا كمان وبعدين هو انا مقعد امانى فى الشارع ؟ احنا ساكنين فى لوران يا حاج
ثائر :: على رايك بس ده محتاج سيوله كبيره صحيح المنطقه بياعه وتجيب سعر انما لو قدرنا نوفر سيوله نطلع اربع او خمس ادوار حنبيع مرتاحين ولو ما بعناش غير لما نخلص ونشطب حنبيع غناوه زى ما احنا عاوزين
شريف :: هى السيوله مش ازمه بس الاول نصيب اخواتى البنات ما تنساش انى اخوهم الكبير هم صحيح عاملين توكيلات باسمى لكن ده حقهم وانا عاوز احسب نصيبهم شقق يبقى افضل بالنسبه لهم
ثائر :: على راحتك بس ايه رايك ناجل البيت ده شويه ونبدا ببيت ام هالة مساحته اقل وعاوز سيوله اقل ومنطقه حلوه ده ميامى بينه وبين البحر خطوه
شريف :: هى كلمتك فى الموضوع ده ؟
ثائر :: لا انا باتناقش معاك ولو كده افاتحها
_________________
ذهبا لشرب القهوة على قهوة زيجوتو فى باكوس وفيما هم يشربون القهوة دخل شخص واقبل مسلما
ناصر :: السلام عليكم
ثائر :: وعليكم السلام ازيك يا ناصر اقعد
وطلب له قهوة قبل ان يقول
ثائر :: باقول يا ناصر احنا عاوزينك تشتغل معانا هو عبد الحميد بيديك كام فى الشهر
ناصر :: عبد الحميد بيحاسبنى بالاسبوع باخد ١٥٠ كل خميس
ثائر :: انا حادفعلك ٢٥٠ جنيه واخر الشغلانه ليك مبلغ مجمد بظروفها
ناصر :: خلاص انا معاك من دلوقت لو عاوز
ثائر :: طيب قوللى ايه اخبار الحى والرخص ؟
ناصر :: مافيش حد بيطلع رخص عاوز تشتغل عليك وعلى مهندس الحى اللى ماسك المربع ظبطه وظابط القسم اللى ماسك التنفيذ
ثائر :: طيب عندنا شغلانه فى سيدى بشر جمال عبد الناصر عند المطافى
ناصر :: اللى ماسك المربع ده محمد عباس وده طماع وكمان مالوش امان لو اتنقل من المربع حيعمل مخالفات اسمع انا عندى حل كويس فيه واحد معرفتى فى شارع النصر ممكن نجيب منه بطاقه ونحط عليها صورة وتبقى كل المخالفات بالاسم اللى فى البطاقه
شريف :: انت بتقول ايه ده كلام مش قانونى
ثائر :: شريف استنى شويه قوللى يا ناصر هو صاحب البطاقه دى فين ؟
ناصر :: ده مات فى حادثه من سنتين يعنى مش حيضره اى حاجه
ثائر :: طيب بكره نروح شارع النصر وبعدها نبقى نقابل محمد عباس بس من اولها يعرف ان اسمى هو الاسم اللى فى البطاقه اما بالنسبه للقسم سيبه عليا ظابط المباحث كان بيلعب معانا كوره ايام ما كان ماسك نقطة محمد فريد
استاذن ناصر بعدها فى الانصراف فالتفت اليه شريف
شريف :: فهمنى بقى اللى انا سمعته ده حقيقى واللا هزار ؟
ثائر :: يا شريف يا حبيبى هى ماشيه كده بنراضى الحى والقسم ونبنى ونجيب كحول نجيب باسمه المخالفات وبعدها نجيب محامى يخلصها انا بدل كده حاجيب بطاقه اجيب عليها المخالفات وبرضه حاخلصها بس اضمن من الكحول
شريف :: بس ده تزوير ده مش قانونى وانا مش ممكن اقبل
ثائر :: شريف اهدى اولا احنا لا بنسرق ولا بنعمل حاجه حرام انا مستحيل اقبل الحرام على نفسى لكن القانون على الجزمه
شريف :: انت اللى كنت بتطالب بسيادة القانون وبتنادى بدولة القانون ؟
ثائر :: اه انا بس بطلت اطالب وانادى دلوقت شغل وبزنس وبس
شريف :: انت اتغيرت مش ثائر اللى انا اعرفه
ثائر :: انا ثائر اللى هم عملوه لكن حيبقى اكبر واخطر مما يتخيلوا
شريف :: مش عارف اقول ايه انا بصراحه قلقان وخايف
ثائر :: ما تخافش حط ايدك فى ايدى واى حاجه تحصل انا المسئول لوحدى