رواية ارواح هائمة الفصل العشرين 20 بقلم آثر توفيق
الحلقة 20
صباح الخير البوست ده قصير معلش لكن ده بوست البونبونايه انتوا عارفين لما تبقى الاحداث درامية وماساوية زيادة عن اللزوم باصالحكم ببوست فيه فرحه ونوعا ما كوميديا زى البونبونايه اللى تحلى بقك بعد فنجان قهوه مر وبعد شويه اعوضكم ببوست طويل نبدا البوست
البوست ده ممكن نسميه لم الشمل واستعادة التوازن
_______________
حدث تاريخى هاااام امانى حتولد اخيرا
اتصل به شريف هاتفيا يستنجد به
شريف :: ثائر الحقنى امانى حتولد تعالى بسرعة
ثائر :: على اساس انى دكتور امراض نسا واللا دايه ؟
شريف :: على اساس انك صاحبنا وانت اللى زقيتنى
امانى :: شرييييييف بتقول ايييييه
شريف :: باقول هو اللى زفنى يا حبيبتى الزفه فاكره ؟
امانى :: انت بتكلم مين اصلا
شريف :: ده ثائر يا حبيبتى
امانى :: لسه حتقعدوا تحكوا ؟ قولله ييجى بسرعه المتنيل على عينه ده
ثائر :: شريف شريف قول لها النمره غلط ما لقيتنيش
امانى :: سامعاااااااك
ثائر :: ايه يا شريف ايه اللى خلاك تدخل التليفون اوضة النوم ؟
شريف :: والله التليفون فى الصاله
امانى :: شريييييف قول للحيوانه اللى جوه دى لو ما بطلتش رفس حادخل ابهدلها وامسح بيها الارض
شريف :: والنبى ما تسيبنى لوحدى
وبالفعل كان عندهم باسرع ما يمكن
ثائر :: اخيرا يا امانى يا ساتر كفاره انتى بقالك سنه ونص
ردت بضعف وتهذيب اقلقه
امانى :: ثائر تعالى اقول لك حاجه
اقترب منها بوجل وحذر زائد
امانى :: انا غلطت فى حقك كتير وحاسسه انى ... بس الحمد لله على كده المهم انا عاوزاك تسامحنى وتبقى تدعيلى وتقرا الفاتحه على قبرى
مدت يدها تمسك بيده برفق اقلقه حقا ونظر لشريف مستفهما ولكنه ايضا كان يشعر بالدهشة وقربت يده منها قبل ان ...
ثائر :: ااااااه يا بنت العضاضه
نقلوها الى المستشفى سريعا وجلسوا فى الاستراحة
ثائر :: انت كلمت امها وابوها ؟
شريف :: امها وابوها ؟ اه يا سيدى كلمتهم ردت عليا حماتى تقوللى شريف مين خطيب امانى الطم يعنى ؟ وحمايا طول النهار فى البلكونه بيلعب طاوله اموت واعرف بيلاعب مين
ثائر :: كلمهم اديهم خبر مش علشان ييجوا وبعدين احمد ربنا انها افتكرت امانى
شريف :: كلمتهم وحييجوا بس لازم حد معايا انا كلمت اختى فى القاهره بس مش لاقيه حجز غير بكره مافيش غيرك معلش تاعبينك معانا
ثائر :: يا سيدى تعبكم راحة امانى دى ياما تعبت معايا وياما وقفت جنبى طول عمرها بمليون راجل
استعاد ذكرياته معها فاغرق فى الضحك فجاة وهو يحكى
Flash back
حين استاجر المصنع الاول رفض اباه مساعدته فحدث عنده عجز مالى اضطره للاستدانة من اصدقائه ومنهم امانى وكانوا صيفا حدثها بالهاتف فقالت .
امانى :: عاوز مية جنيه ليه حتروح تسكر ؟
ثائر :: اسكر ايه انا بادوخ من الميه الساقعه لالا انا حاأجر مصنع بلاستيك انا واحمد صاحبى خلاص بقى الجامعه مش فى دماغى وعاوز اشوف مستقبل حقيقى يلحقنى من الفراغ علشان اثبت للكل وانا قبل الكل انى راجل واقدر اعتمد على نفسى واقف على رجلى
امانى :: طيب فوت بكره وتعالالى بعد بكره
وذهب اليها فادخلته الى الصالون وجلست قائلة
امانى :: انا عملت اللى ربنا قدرنى عليه يارب تفلح بدل ما انت فاشل انا دبرتلك خمسميت جنيه علشان تعرف انى بمية راجل لالا مية ايه شويه قوى لا انا ضفرى يعدى الميه انا اعمل مليون راجل وشوية فكه بس اسمع انت حتروح تاجر مصنع عارف تروح تمشى مع نسوان اجيب امك متعلق من رجليك انت فاهم ؟ اوعى تكون فاكر انى بنوته لطيفه كده وزى القمر انا لطيفه وزى القمر غصب عنك بس اعرف اخد حقى . انا بس مش عاوزاك تفكرنى باتنطط عليك ابدا والله انا حافرح بنجاحك اى ام تفرح بنجاح عيالها بس على الله تفلح المره دى يا فاشل
مدت يدها بالنقود فمد يده اليها فسحبتها قائلة
امانى :: انت مش حتمضيلى على حاجه ؟
قال بتسليم وهو يظنها جادة
ثائر :: شوفى عاوزه امضيلك على ايه
امانى :: انت ما جبتش حاجه معاك تمضى عليها لا شيك ولا وصل امانه ؟ ايه يا روح امك ادخل اجيب تيشيرت وتمضيلى مارادونا ؟ روح روح انا اعرف اخد حقى كويس
اخذ النقود وهم بالخروج فلقيه اباها ضاحكا
ابو امانى :: مش لاقى غير دى تستلف منها ؟ نصيحه ما تروحش الجامعه غير لما تسدها وما تديهاش عنوان المصنع
Back
ضحك شريف حتى دمعت عيناه وقال
شريف :: حتى ابوها ؟ طيب وسديتها؟
ثائر :: وحياتك سديت كله وهى حلفت تكون اخر واحده ولما افوق خالص ولعلمك ما اديتهاش عنوان المصنع لكن بعد اسبوع لقيتها داخله عليا
Flash back
امانى :: سلام عليكم لالا شاطر اجرت مصنع اهه وشغال
ثائر :: سلام قولا من رب رحيم
امانى :: ايه شفت عفريت اجيبلك طاسة الخضه ؟ الحق عليا انى جبتلك محاضرات الاسبوع كله اتفضل على الله يطمر
نظر الى المحاضرات واليها بدهشة قبل ان يقول
ثائر :: تصدقى انتى فعلا ضفرك بمليون راجل ؟
نظرت الى الماكينة والى البالون وتساءلت
امانى :: هو انت بتفضل قاعد كده على طول ؟
ثائر :: ١٢ ساعه واحمد ١٢ ساعه ونبدل اقوم اقف على المقص وهو ييجى هنا
امانى :: وبتنام امتى ؟
ثائر :: المقص اسرع من الفيلم بانام ساعتين واحمد ساعتين مش مهم بس بصراحه مبسوطين قوى
امانى :: اومال حتذاكر ازاى ؟ طب اسمع بجملة افضالى عليك قوم اشتغل وانت واقف وهات الكرسى ده
قام مدهوشا وسحبت الكرسى لتجلس عليه قائلة
امانى :: انا حاقعد اقرا المحاضرات وانت معايا بودنك
دخل احمد ليسحب موبينة بلاستيك للتقطيع فعرفهما قائلا
ثائر :: ده احمد شريكى يا امانى . احمد دى امانى احسن واحده فى اصحابى دى اللى اديتنى الخمسميت جنيه
احمد :: اهلا اهلا اهلا انتى نورتى المصنع
امانى :: ايه نورتى دى وحاف كده اجرى هاتلى حاجه ساقعه الاول وبعدين قوللى نورتى وضلمتى
بهت احمد لاسلوبها ولكن ثائر اسرع قائلا
ثائر :: احمد معلش روح هات الحاجه الساقعه اصل دى امانى
احمد :: ايه امانى يعنى مجنونه ؟
ثائر :: هششش يخرب بيتك حتودى نفسك فى داهيه مجنونه ايه ? امانى معاها شهادة معاملة اطفال
امانى :: اه وادينى جايه اتعامل مع اطفال بشهادتى اجرى ياض جيب الحاجه الساقعه بسرعه
نظر لها بغيظ ولكنه جلب المياة الغازية فجلست تشربها باستمتاع قائلة
امانى :: الحاجه الساقعه لما تيجى غصب ولوى دراع بتبقى لذيذه
اخذت تقرا المحاضرة وعندما انتهت قالت
امانى :: اسمعنى بقى كويس عاوزه اقول لك كلمتين تحطهم حلقه فى ودنك
ومدت يدها تمسك اذنه واضافت
امانى :: بص انا مش باذلك ولا حاجه خالص انما انا سلفتك علشان تفتح المصنع اهه والله ما قصرت وادينى كمان باجيبلك المحاضرات واذاكرلك لو جيت اخر السنه لقيت المصنع ده ما اشتغلش وانت فاشل زى ما انت والنعمه ادعك بوزك فى الاسفلت
Back
ضحك شريف كثيرا وقال
شريف :: لسانها مالوش حل
ثائر :: هى كلها مالهاش حل اجدع انسانه قابلتها فى حياتى انا قعدت سنتين انجح بفضل مذاكرتها ليا والمصنع كمان كان ناجح
تنهد ووضع راسه بين كفيه فربت شريف على كتفه قائلا
شريف :: معلش كل حاجه تتصلح ان شاء الله
وخرج الطبيب معلنا انه سيجرى جراحة قيصرية فورا
الطبيب :: الجنين وضعه مقلوب ولازم اولدها قيصرى دلوقت
شريف :: فيه خطوره عليها يا دكتور
الطبيب :: لا ان شاء الله مافيش خطوره بس ما ينفعش استنى الطلق
انصرف الطبيب ليامر بتجهيز غرفة العمليات وبعد دقائق حضرت مها ورحاب مسرعتان
مها :: ايه الاخبار امانى عامله ايه
شريف :: حتدخل اوضة العمليات الدكتور حيولدها قيصرى ربنا يستر
رحاب :: طيب مالك خايف ليه عندنا فى الاردن كله بيولد قيصرى الستات بيتدلعوا بيقولوا مش عاوزين طلق ووجع
شريف :: ربنا يجيب العواقب سليمه ويقومها بالسلامه يارب
مها :: يخرب بيتك يا واد يا شريف انت واقع فيها لشوشتك
ثائر :: باقول ايه سيبوه فى حاله وادعولها تقوم بالسلامه
وخرجت امانى بعد الولادة سالمة والمولودة ايضا كانت بصحة جيدة الحمد لله .
سجد شريف لله شكرا ثم قام ليجلس بجوار زوجته وهى تقوم بارضاع الوليدة ثم سمحوا للباقين بالدخول
ثائر :: بسم الله ما شاء الله قمر الحمد لله ما طلعتش شبه ناس
امانى :: قصدك ايه يا ولا ؟
ثائر :: قصدى مش شبه شريف شبهك انتى يا امونه مش شبه شريف خالص
امانى :: باحسب اصلك بقالك مده ما اتضربتش
ثائر :: قومى بس انتى شدى حيلك وانا رقبتى علشانك مبروك يا شريف
شريف :: لسه فاكر شريف ؟
مها :: جرى ايه يا شريف مش يبارك لامانى الاول من خاف سلم يا اخى
رحاب :: ما قلتوش ناويين تسموا البنوته القمر دى ايه ؟
وقبل ان يرد احدهما سمعوا طرقا على الباب المفتوح نظروا ليجدوا هالة تقف على الباب باستحياء
امانى :: هاله فيكى الخير والله تعالى يا حبيبتى
هالة :: انا جايه اباركلك رغم انى عارفه ان كلكم زعلانين منى
امانى :: ماحدش يا حبيبتى زعلان منك احنا كلنا خايفين عليكى وعاوزينك تخرجى وتروحى كليتك وتخلصى
هالة :: انا اصلى بعد اللى حصل كنت قليلة الادب قوى معاكم
مها :: ما تقوليش كده يا هاله انتى اللى شفتيه كان صعب واحنا عارفين انك معذوره فى اللى عملتيه وماحدش زعلان بالعكس كلنا فرحانين علشان شفناكى فى وسطنا النهارده
رحاب :: ايوه كده ورجعت الورده الجميله لصحبتها
ثائر :: طيب عن اذنكم حاطلع اشرب سيجاره بره
كان قد التقاها فى الجامعة فى يوم حزين من اسوا ايامه يوم اعلنت نرمين انها قد نسيته تماما يوم مزقت اوراقه وداستها باقدامها وداست معها قلبه حضرت هالة لتلقى كلمة مواساة وحيدة ونظرة شفقة دامعة وتمضى قبل حتى ان يرد وشعر ان هذا الشبح الهزيل الواقف بينهم والذى يبدو بقايا هالة التى يعرفونها وانه هو السبب فى كل ما حدث لها
هالة :: ثائر انا عاوزه اقول لك انى ما قصدتش كلمه واحده من اللى قلته فى البيت ولا يمكن اسامح نفسى على اللى عملته
اجاب وهو ينظر للارض خزيا من نفسه
ثائر :: اللى قلتيه وعملتيه من حقك انا المسئول عن كل اللى حصل لك انا السبب
هالة :: لا مش انت السبب بالعكس اللى حصل لى دليل على ان كلامك كله صح وانا بعد تجربتى مؤمنه بكل كلمه قلتها
امانى :: سيبونا من اللى فات وخلونا فى اللى جاى نسمى البنت ايه ؟ ايه رايك يا هاله ؟
هالة :: ياريت تسموها امل علشان تكون املنا فى بكره يكون احسن من النهارده