رواية ارواح هائمة الفصل الثامن عشر 18 بقلم آثر توفيق
الحلقة 18
ثلاثة ايام قضاها وحيدا فى شقته ليس برفقته سوى العديد من اكواب القهوة وعلب السجائر والافكار راسه اصبحت كساحة للمبارزة تصطرع فيها الافكار حتى تكاد تسمع صهيل خيل وصليل سيوف الرحمة اما من حد لهذا العذاب ؟ لم يذق طعاما منذ ثلاثة ايام ولكنه لا يشعر بالجوع يا الله يا ولى الصابرين
دق جرس الهاتف فرفع السماعة متثاقلا واتاه صوت ابيه
توفيق :: انت فين يابنى بقالك كام يوم ؟
ثائر :: موجود يا بابا قاعد هنا على طول بس مش عاوز ارد على التليفون
توفيق :: ام ايهاب اتصلت بيك بتقول الحاج كامل فى المستشفى
ثائر :: ايه ؟ من امتى الكلام ده ؟
توفيق :: من مده وكمان شريف صاحبك
شريف لقد نسى امره تماما عسى ان يكونوا بخير
ثائر :: طيب يا بابا انا حاتصل بيهم وارجع اكلمك
اتصل بمنزل الحاج كامل فلم يرد احد عاود الاتصال اكثر من مرة بلا فائدة على كل حال هو يعرف انه لا يدخل سوى المستشفى العسكرى لقد صار وجها معروفا هناك سوف يذهب اليه فى الصباح اما الان ...
ثائر :: الو شريف ازيك انتوا كويسين ؟
شريف :: الحمد لله انت اخبارك ايه من ساعة ما رجعنا من المانيا بندور عليك مش عارفين عنك حاجه
المانيا ؟ لقد نسى سفرهم لقد اوصلهم للمطار بنفسه
ثائر :: انا الحمد لله لسه عايش بس الدنيا وحشه قوى معايا
شريف :: انا سالت عليك احمد شريكك عرفت انك سبت المصنع ورحت الجامعه ما لقيتش حد منكم خير فيه ايه ؟
ثائر :: مافيش حاجه يا شريف مافيش حاجه خالص كله راح
شريف :: ما راحش ولا حاجه تعالى اسهر معانا النهارده ونقعد مع بعض
ثائر :: بلاش النهارده معلش اصلى ....
سمع صوت خشخشة فى السماعة ثم صوت امانى
امانى :: انت يا ولا ياللى مالكش اخوات بنات تلمك انا لما اقول النهارده يبقى النهارده الولاد الشاطرين يقولوا لماما ايه
ثائر :: معلش يا امانى بلاش النهارده خليها بكره مش رايق
امانى :: وحياة امى لو ما جيت النهارده اجى اجيبك من شعرك انت حتكبر عليا يا ولا ؟ حاسب انا اتخرجت وانت لسه فاشل . تعالى حادبحلك ارنب النهارده وان ما لقيتش ارنب حادبح شريف ... اااه
ثائر :: ايه فيه ايه
امانى :: ولا صاحبك بيمد ايده عليا انا غلطانه انى اكلت دراع واحد وسبتله التانى . تعالى دلوقت مستنيينك
___________________
اغتسل وابدل ثيابه التى لم يبدلها ثلاثة ايام هل يحلق ذقنه ؟ لا يشعر بالرغبة فى ذلك فليذهب ما دامت امانى مصرة انه يحب هذين الزوجين حقا . شريف انسان خلوق مريح صاحب راى صائب ولا يبخل على الغرباء بالمشورة فما بالك بالاصدقاء ؟ اما امانى فلم يكن فى كل اصدقائه احب اليه منها كانت فتاة ظريفة سليطة اللسان ولكنها طيبة القلب ولا تشتم سوى من تحب كنوع من الدعابة وهى قادرة على اضحاك الاحجار الصماء فهل تقدر على اخراجه من حالته النفسية السيئة ؟ انه يرجو ذلك ويظن انها قادرة
دق الجرس ففتحت هى واراد هو مجاراتها
ثائر :: مساء الخير يا ابلتى
امانى :: ايه ابلتى دى يا ولا داخل على رقاصه يا روح امك ؟
بدانا طول اللسان اشارت له بيدها ليدخل قائلة
امانى :: ادخل اتلقح فى اى حته على ما اعمل لك قهوه تطفحها
دخل ليجد شريف امامه فتعانقا وجلسا فى غرفة المعيشة
شريف :: مالك فيه ايه مختفى عننا والمشكله مش لاقيين حد منكم
ثائر :: مشاكل كتير قوى يا شريف حصلت للكل وكلها بسببى لدرجة انى خلاص خسرت كل اصحابى وخسرت كل حاجه
شريف :: مش كل اصحابك احنا لسه موجودين
ثائر :: ربنا يخليكوا ليا يا شريف ويبعد عنكم الشر الحمد لله انكم بخير
عادت امانى تحمل القهوة وهى تقول
امانى :: باقول ايه مش البهوات برضه حيشربوا زفت سجاير وانا واحده حامل والمفروض تخلوا عندكوا دم ؟ تعالوا ورايا على البلكونه
كانت الشرفة فسيحة ومضاءة جيدا وبها بعض قصارى الورد شريف مهندس ديكور فنان ابدع فى جعلها مكانا مريحا
امانى :: احكيلنا بقى ايه اللى حصل لك احنا سمعنا كلام كتير وقلقانين عليك
ثائر :: والارنب ايه شغل النصب ده ؟
امانى :: ارنب فى عينك اتكلم يا واد سبت المصنع ليه ؟
حكى ثائر كل شئ من البداية اخبرهم عن المقال ومقابلة ايمن حكى عن مشاكل المصنع التى يعرفونها وعن اقامة رحاب وفسخ خطبة مها وعم نرمين واخيرا حكى عن هالة وكان وقتها منكس الراس تسيل دموعه دون ان يشعر واستمعوا له دون مقاطعة حتى ما يعرفونه عن يقين تركوه يحكى كل شئ حتى يفرغ ما بداخله تركوه يتكلم يبكى وحده ويجفف دموعه وحده وفى النهاية
امانى :: تلات ايام قاعد لوحدك لا بتكلم حد ولا بترد على تليفون ليه ؟ خلاص سلمت انهزمت رفعت الرايه البيضه ؟
ثائر :: بايدى ايه اعمله ؟
امانى :: بايدك كتير قوى بايدك تبدا من جديد وترجع تانى تقف على رجليك انت فاكر لما اجرت الصنع الاولانى ؟ وقتها ما كانش معاك فلوس وانا طبعا وقفت جنبك علشان انا بمليون راجل فاكر ؟
ثائر :: طول عمرك بمليون راجل
امانى :: مش ده المهم انت ايامها كان عندك اراده وطموح ايه اللى حصل
ثائر :: انكسرت
امانى :: ما تبقاش ثائر اللى اعرفه ثائر عمره ما كان عيل خرع يقع من اول قفا ايه يابنى انت قفاك ورم ابدا لازم تثبت للكل ولنفسك قبل اى حد انك راجل وترجع تقف على رجليك
ثائر :: واللى اتبهدلوا بسببى من غير ذنب ؟
امانى :: ده مكتوب وربنا يصبرهم واحنا لازم نفضل مؤمنين بالله ولازم نقف جنب اصحابنا انا حاروح لهاله بكره وانت لازم من بكره ترجع الكليه ولازم تنجح السنه دى او على الاقل يا سيدى اعمل اللى عليك
شريف :: يا ثائر انت اعز صاحب ليا وانا يعز عليا اشوفك مكسور ارجع كليتك ولما تخلص نشوف حكاية الشغل مع بعض
ثائر :: خلاص اوعدكم من بكره اروح الكليه واحضر واذاكر
شريف :: اهو كده ثائر صاحبنا اللى احنا نعرفه واحنا معاك وحنساعدك بكل اللى نقدر عليه
امانى :: انا على فكره ممكن اذاكر لك يا فاشل يمكن ربنا ينفخ فى صورتك
ثائر :: انتى كفايه عليكى تحاولى تزورى هاله وتخرجيها من الحاله اللى هى فيها ولو تقدرى انا نفسى اتطمن على الشيخ العطار
امانى :: مين الشيخ العطار ده ؟
ثائر :: ده ابو نرمين قصدى ابو داليا وعم نرمين
امانى :: من عينيا حاضر دلوقت حتتعشى واللا تحب تنام خفيف شكلك كده عندك اكل فى البيت
ورغم الدعابة كان العشاء شهيا توسطه ارنب سمين كما وعدت وانصرف ثائر وهو ينوى البدء من جديد لقد كانت الليلة بلسما شافيا اعادت اليه ثقته فى نفسه من جديد
__________________
ذهب الى المستشفى العسكرى لزيارة الحاج كامل
ثائر :: الف سلامه عليك يا حاج
كامل :: لسه فاكر ؟ اومال كنت بتقول ابنك الرابع موجود
ثائر :: اسف يا حاج ظروف غصب عنى انا كنت فى متاهه صعبه ما كنتش عارف راسى من رجلى انت ايه اللى حصلك
كامل :: بعد ما كنا على القهوة مع عبد الحميد رجعت زعلان البيت ونمت وانا زعلان تعبت جاتلى ذبحه والحاجه دورت عليك مافيش فايده نقلتنى على المستشفى ومن ساعتها وانا هنا
ثائر :: تخرج بالسلامه ان شاء الله
كامل :: انت ايه اللى حصل معاك ؟
ثائر :: حاجات كتير قوى يا حاج كل حاجه راحت خليك انت فى صحتك
كامل :: معلش لما اخرج ان شاء الله كله يتصلح
_________________
ذهب الى الجامعة ولكنه لم يچد احدا يعرفه بحث كثيرا عن نرمين ولكنها لم تكن موجودة واخيرا لمح باسنت وكانت وحدها اتجه نحوها
ثائر :: صباح الخير يا انسه باسنت
نظرت اليه بازدراء وتجاهلته ومضت باتجاه مبنى المدرجات لو جاءت نرمين سوف يكون لا نفس رد الفعل وربما اقسى
رباه تلك افدح خسائرى
#ارواح_هائمة
التقى امال فى اليوم التالى
ثائر :: صباح الخير يا امال عامله ايه ؟
امال :: صباح الخير اى خدمه ؟
ثائر :: امال انتى زعلانه منى ؟
تاملته جيدا لقد تغير كثيرا ذقنه اصبحت كثيفة وبشرته شاحبة وتحت عينيه سواد ينم على انه لا ينام تقريبا ويبدو من هزاله انه لا يقرب الطعام شعرت بالشفقة نحوه ولكنها تذكرت اهانته لها برغم انه يعرفها جيدا
ثائر :: شكلك انت كمان زعلان من نفسك عموما انا مش زعلانه منك انا ما اعرفكش كنت اعرف واحد شبهك زمان كان زى اخويا واكتر بس يا خساره مات
ثائر :: انا اسف يا امال عمرى ما قصدت ازعلك
امال :: طيب عاوز ايه دلوقت ؟ انا خلاص بطلت مياصه ومش عاوزه اقف اتكلم مع حد غريب
كانت حادة ولكنه يستحق فليتحمل اذن المهم اولا
ثائر :: كنت عاوز اتطمن على الشيخ عبد الحليم
امال :: يااه ده بقاله اسبوع فى البيت اصلا هو الموضوع كله كان غلط فى غلط وبلاغ كيدى انما عمو حليم راجل طيب ومالوش فى السكه دى خالص ده راجل بتاع دين مش تنظيم سرى وسياسه
ثائر :: طيب الحمد لله انا واثق ان الشيخ العطار راجل فوق الشبهات وان الموضوع كله كان متلفق
امال :: متلفق ازاى هم كانوا ملفقين القضيه واللا غلطه ؟
ثائر :: قصدى غلطه الموضوع كان غلطه ومش مقصوده
صمت وبدا عليه التردد حتى همت بالانصراف فقال محاولا اخفاء لهفته
ثائر :: هى ... هى ايه اخبار ..... نرمين .؟
امال :: وانت مالك ومال نرمين هى مش بارده ودمها تقيل وعايشه فى الدور ؟ خلاص بقى ما تسالش عليها
ثائر :: امال انا .....
امال :: مع السلامه انا عندى محاضرات وياريت لما تشوفنى تانى ما تسلمش عليا علشان ...
اشاحت بوجهها لتمسح دمعة حزن سقطت رغما عنها واضافت
امال :: علشان مش عاوزه حد يتكلم عليا
_________________
اصبح فجاة منبوذا من الجميع القنفذ الذى يدمى الجميع باشواكه .
ذهب للجامعة فى اليوم التالى والذى يليه ولكن بلا جدوى لا احد هناك حاول الاتصال بامانى ولكن هاتفها لا يرد شعر بالوحدة واستبد به الياس يريد ان يعرف اخبار الجميع يريد ان يطمئن وايضا يريد بعض الرفقة بدا ينسى الكثير من الاحداث حتى انه عاد مرة ليلا ليدخل الى العمارة المجاوة هل اصابه الجنون ؟ ان لم يكن كذلك فهو فى الطريق حتما نحو الجنون
استيقظ باكرا ولكنه لم يشعر بالرغبة فى الذهاب للجامعة شرب كوب قهوة كبير ثم حاول الاتصال بامانى ولكن ايضا لا يوجد رد هل يتصل بمها ؟ كلا سيسبب لها مشكلة كبرى ربما قتلها اباها هذه المرة حاول الاتصال بامانى ثانية وثالثة وفى النهاية استجمع شجاعته واتصل بمها ورد عليه اباها
ثائر :: محمود موجود لو سمحت ؟
سعيد :: مين معايا انت ثائر ؟
كيف عرف ؟ اضطرب تبلبل فكر فى وضع السماعة ولكنه رد
ثائر :: ايوه انا كنت عاوز محمود
سعيد :: اهلا يابنى بقالنا مده ماحدش سمع صوتك
ماذا يقول كيف عرف صوتى ؟ وتابع عم سعيد
سعيد :: محمود فى المستشفى هو ومها ومحمد
ثائر :: مستشفى ليه خير ؟
سعيد :: ام محمد حتعمل عملية القلب انت نسيت ؟ انت اللى نقلتها المستشفى
لقد نسى هذا الامر فعلا لقد كان معهم منذ البداية
ثائر :: انا رايح لهم على المستشفى دلوقت
سعيد :: النهارده الجمعه يابنى الزيارات بعد الصلاه
حسنا فعل انه لم يذهب للجامعة لقد نسى كل شئ حتى الوقت والتاريخ من الجيد انه لا زال يذكر اسمه
___________________
وصل فى مواعيد الزيارة وذهب الى حجرة الام ليجد الجميع هناك ورحاب ايضا ؟ هل تعرف مها ؟ نعم بالتاكيد
ثائر :: حمد الله على سلامة حضرتك يا تانت ان شاء الله تقومى بالسلامه
ام مها :: الله يسلمك يابنى تاعب نفسك ليه
مها :: تاعب نفسه غصب عنه مش بمزاجه ده هو اللى نقلك معايا المستشفى اصل ده ابنى وانا معوداه اقول الكلمه مره واحده انا لسه حاملص ودانه واعرف منه كان غطسان فين
ضحكوا جميعا وابتسم هو لم يعد قادرا على الضحك حتى ابتسامته مجاملة لا اكثر
ثائر :: ازيك يا رحاب
رحاب :: الحمد لله ازيك بتحضر المحاضرات ؟
لم يرد ما فائدة حضور المحاضرات دون تسجيلها او سماع كلمة واحدة فيها كانه لم يحضر مجرد وقت ضائع يقضيه داخل المدرج
ثائر :: عن اذنكم حاقف بره مع محمد شويه
خرج مع محمد يبحثان عن البوفيه لشرب القهوة
محمد :: دى مها حتاكل زمارة رقبتك كنت غطسان فين ؟
ثائر :: معلش شوية مشاكل ايه الاخبار
محمد :: الحمد لله العمليه صعبه لكن لازم تتعمل وان شاء الله تتم على خير
ثائر :: ان شاء الله وحتتعمل امتى
محمد :: بعد بكره خلاص كل حاجه اتظبطت
عادوا الى حجرة الام ولكنه لم يدخل وطلب ارسال رحاب
ثائر :: اخبارك ايه يا رحاب ؟
رحاب :: الحمد لله بخير
لا يبدو انها بخير تبدو خائفة او قلقة لم يعد هناك فارق كبير
ثائر :: طيب انتى ما بتروحيش ليه تحضرى
رحاب :: مش قادره اسيب مها وحدها مها وقفت جنبى كتير فى مشكلتى .. وانت طبعا على فكره انا حاولت اروح لهاله وطردتنى قصدى رفضت تقابلنى
( هالة .. قتيلتى ! لازلت ارى دماؤها على كفى الامر الوحيد الذى لا يفارق ذاكرتى ولا استطيع نسيانه )
ثائر :: مسكينه ذنبها فى رقبتى
ظهر التردد ممزوجا بالخوف على وجه رحاب وفى النهاية استجمعت شجاعتها قائلة
رحاب :: ثائر انا خايفه انا اسفه عارفه انك طول عمرك صديق شهم بس بجد خايفه
ثائر :: خايفه من ايه ؟
رحاب :: خايفه يصير لى اللى صار لهاله لو استمرت صداقتنا انا اسفه
#ارواح_هائمة
تمت العملية بنجاح وخرج الطبيب معلنا
الطبيب :: مبدئيا العمليه نجحت لكن بعد 48 ساعه نقدر نقول مبروك طبعا انتوا عارفين ان تركيب صمامات محتاج ادويه مساعده علشان الجسم يتقبله والمجهود ممنوع تماما والزيارات ممنوعة النهارده وبكره بعد كده تشوفوها وتسلموا عليها بدون مجهود ولا كلام كتير
انصرف الطبيب والتفت ثائر لاصدقائه مودعا
ثائر :: ان شاء الله تخرج لكم بالسلامه ابقوا طمنونى بعد اذنكم
مها :: ثائر اخص عليك حتمشى وتسيبنا ؟ انت مش اخونا ودى امك برضه
ثائر :: طبعا بس انا بقيت شخص غير مرغوب فيه من كل الناس
محمد :: كل الناس الا احنا احنا حنفضل اصحابك واخواتك مهما حصل
ثائر :: متشكر يا محمد كلامكم ده رفع معنوياتى
مها :: تعالى ننزل نشرب قهوه تحت
نزل معها الى البوفيه لشرب القهوة
مها :: هاله اللى صعبانه عليا قوى ما بتخرجش من اوضتها ورافضه تكلم حد رحتلها انا ورحاب وامها اتحايلت عليها كتير تخرج لنا رفضت وقالت مش عاوزه تكلم حد ولا تشوف حد مسكينه
ثائر :: كلكم مساكين انا السبب فى كل اللى انتوا شفتوه ومهما نسينا او حاولنا ننسى حيفضل الخوف حاجز بيننا مش حنقدر نخطيه
مها :: ما تظلمش هاله الكلام اللى قالته كان لحظة جرح انت عارف انه كبير ولا تظلم نفسك انت الوحيد فى البلد اللى وقف فى وش الطغيان وقال كلمة حق
ثائر :: انا خلاص ندمت انى قلت كلمة حق خلاص بقيت قنفد بيجرح الكل بشوكه والكل بقى خايف منى بقيت منبوذ وحيد . هاله عندها حق
مها :: انا لو مكان هاله كنت رفضت انك تسلم علشان خاطرى دى حرب وكل حرب ليها ضحايا وشهداء وانا لو شهيده فى الحرب دى بالنسبه لى شرف
ثائر :: دى حرب غير متكافئه هبل خبط راس فى الحيط انا تعبت ارجوكى سيبينى امشى الحاج كامل طالع النهارده ولازم اخده من المستشفى
مها :: طيب اتصل بيا على الاقل علشان تتطمن على ماما احنا بنروح بالليل اصل مافيش مرافقه بعد الجراحه لحد ما تخرج من العنايه
استاذن لينصرف وقبل ان يصل الى الباب الزجاجى سمع صوتا يناديه
رحاب :: ثائر
وقف موليا ظهره اياها ويده على مقبض الباب لثوانى قبل ان يستدير ببطء
رحاب :: انا اسفه
ثائر :: انا اللى اسف
رحاب :: لا انا اسفه انى فكرت اقطع الصداقه بيننا مستحيل اخسر صداقة واحد زيك على حاجات مش ذنبك فيها انا حامشى من مصر واحنا اصدقاء وعمرى ما اتخلى عن صداقتك ابدا حتى لو صار معى اكثر من اللى صار لهاله
____________________
خرج الحاج كامل من المستشفى وعاد به الى البيت
ثائر :: الف حمد الله على سلامتك يا حاج منور بيتك
كامل :: الله يسلمك يابنى اقعد
جلس على حافة الفراش وتفرسه الحاج كامل بشدة قائلا
كامل :: مالك سايب دقنك كده ومهمل فى نفسك مش عوايدك انت خلاص حتبقى جماعات ؟
ثائر :: اهو ده المستحيل بعينه الا الناس دول عمر ما ايدى تتحط فى ايديهم ابدا الحكايه كلها ان الايام دى ماليش نفس لحاجه واظن باين يا حاج انها مش دقن بتاعة جماعات دى دقن واحد قرفان من الدنيا مالوش نفس يحلق ولا يغير هدومه اللى بقالها عليا كام يوم
قلب ياقة قميصه المتسخة ليثبت للحاج كامل قوله
كامل :: ايه يئست سلمت طلعت فى الاخر عيل خرع وجبان؟ يا خسارة الرجاله
ثائر :: الرجاله ماتوا فى الحرب يا حاج انا كنت اخرهم ودى كانت اخر حرب بس اللى شفته فيها كان غريب الضرب كان حواليا وما يصيبنيش
كامل :: احكيلى اللى حصل
ثائر :: بعدين يا حاج انت لسه خارج من المستشفى ارتاح شويه وحاحكيلك
كامل :: يابنى ابوك الحاج كامل جبل انا باروح المستشفى اغير جو واشوف وشوش حلوه ما شفتش الممرضات هناك عاملين ازاى ؟
الحاجه :: سامعاك يا كامل
كامل :: كلهم وحشين عاملين زى القرود اعوذ بالله من غضب الله اومال انا خرجت وانا لسه تعبان ليه
ضحكوا معا ودخلت الحاجة لتضع لهما القهوة وهى تضحك
الحاجة :: طيب خد اشرب القهوه خلينى اورث واشوف نفسى حد يبقى قايم من جلطه ويشرب قهوه ؟
لم يحاول ثائر منعه فقد كان يعرف عناده الشديد وعشقه للقهوة فقد كانا يتشابهان فى هذا الامر تماما لا شئ يمنعهما من القهوة والسجائر ابدا حتى الموت كان ثائر يقول لاصحابه مازحا ( لما اموت تحطوا فى تربتى باكو بن وعلبة سوبر )
كامل :: اتكلم يابنى انا سامعك ما تخافش عليا
حكى ثائر كل ما مر به وبمن حوله حتى فرغ
ثائر :: يعنى حتى عبد الحميد طلع معاهم
كامل :: لا يا اهبل عبد الحميد ده حتة نصاب بيبنى مخالف وعمره ما ييجى على سكة الحكومه ابدا هم بس خفوه فتره انما مستحيل يسندوه على طول طالما انا فى الصوره ولو ما كنتش فى المستشفى وعرفت بموضوع البنت دى كانت باتت فى بيتها من اول يوم لكن المكتوب بقى قوم هات التليفون
خرج ليجلب الهاتف من الصالة ودخل به ليوصله بقابس بجوار الفراش ووضعه على كومود بجوار الحاج الذى رفع السماعة وطلب رقما حرص على الا يراه ثائر
كامل :: ايوه يا عادل ازيك العميد كامل جاد معاك
عادل :: كامل باشا ازى صحة معاليك حضرتك خرجت من المستشفى ؟
كامل :: لسه واصل من ربع ساعه وعاوز منك خدمه ضروريه
عادل :: خدمة ايه يا باشا ؟ حضرتك ما تطلبش خدمات حضرتك تدى اوامر ونافذه معاليك
كامل :: الله يخليك يا عادل اسمعنى فيه مقاول فى خط الرمل اسمه عبد الحميد السويفى الراجل ده انا عاوزه تجيبه من تحت الارض وتظبطه بس تظبيط مخصوص
عادل :: تظبيط من اى درجه يا باشا ؟
كامل :: تظبيط من الدرجه الاولى اعلى درجه عندك عاوزه يجيلى زاحف على ركبه ويقول حقى برقبتى
عادل :: اوامر معاليك نافذه يا باشا ادينى اسبوع بالكتير اجيبه واطبخه واجيبه لحد معاليك بالهنا والشفا
كامل :: عندك انت فى المكتب مش فى القسم
عادل :: عندى انا يا باشا ومن غير ورقه سعادتك انا تلميذ معاليك
وضع الحاج كامل السماعة والتفت لثائر قائلا
كامل :: ده تلميذى وانت طبعا عارف انا كنت شغال ايه
ابتسم ثائر ولم يعقب فهو يفهم ان الحاج كامل كان فى احد اجهزة الدولة السرية شديدة الخطورة واضاف كامل
كامل :: لو عبد الحميد محبوس عادل يقدر يطلعه من السجن من غير ورق وانا عاوز قبل ما اموت اعرفك بعادل وتبقوا اصحاب واعمل حسابك يابنى لايمها وقوى علاقاتك باللى فوق واعمل معاهم مصالح وبزنس علشان لما تيجى تتكلم تانى مصالحك معاهم تحميك
ثائر :: اخاف مصالحى معاهم تخلينى طرطور
كامل :: الحبل لازم يبقى فى ايدك انت اللى تشد وانت اللى ترخى اوعى تخليه فى رقبتك يابنى احنا بقينا فى زمن البهلوانات والاراجوز وانت اللى تختار يا تبقى الاراجوز يا تبقى اللى بيرقص الاراجوز