رواية دماء علي اوراق الورود الفصل التاسع عشر 19 بقلم آثر توفيق
الحلقة التاسعة عشر
ان اوان التحرك !
اتصل حاتم بجابر طالبا منه ملاقاته فى الكافيه
حاتم : عملت ايه فى اللى طلبته منك ؟
جابر : والله يا باشا انت ابن حلال وربنا بيسهل كل حاجه ليك واكيد اكيد انت ماشى فى سكه خير
حاتم : انجز يا جابر خلاص الوقت ازف طمننى عملت ايه
جابر : من كام يوم كنت رايح العلمين اسلم عربية زبون اصل الورشه صيتها بقى مسمع و ...
حاتم : ما تخلص يا جابر خلينا فى المهم
جابر : يا باشا خليك حليم وانا فى العلمين قابلت شاب شغال فى الامن فى مارينا وطبعا الساحل فى الشتا بيقى بينش ومافيش لقمة عيش كلمه منى كلمه منه اتعرفنا وطلع من الاقصر وعرضت عليه اشوف له سكن قريب منى فى باكوس واجيبه يشتغل هنا فى المنطقه
حاتم : حلو قوى وحييجى امتى ؟
جابر : يومين تلاته ويكون هنا بس خد التقيله بقى عارف الجدع ده منين فى الاقصر ؟ من البلد اللى اسمها حضن الجبل اللى سالتنى عليها مش باقول انت ابن حلال وربنا بيسهل طريقك ؟
.........................
كان حاتم قد تعود على الذهاب لرؤية آيه مرة كل اسبوعين وقضاء اليوم معها وكان يشعر بالراحة والسعادة كلما ذهب الى زيارتهم وكان دوما يحمل لها العابا وملابس جديدة وكانت امها تتقبل ذلك راضية ولكنها كانت ترفض ان يهديها اى شيء ولم يكن يلح عليها فى ذلك خشية ان تمنعه من رؤية آيه .
وفى نفس الوقت اعتادت ياسمين كلما حضرت الى الاسكندرية لمتابعة اعمال شركتها ان تبيت فى شقة حاتم اذا اضطرت لذلك ولم يكن يمانع بعد ان رآها تلتزم بالتعامل معه فى حدود الصداقة البريئة .
ولكنها اتصلت به يوما تخبره انها فى الاسكندرية وقد تاجل عملها فى نفس الوقت الذى كان مرتبطا فيه بزيارة آيه
ياسمين : اخص عليك يا حاتم حتسيبنى فى الشارع ؟ طيب والله بعد ما جيت لقيت مدير المشتريات اعتذر عنده ظرف ومش عارفه اروح فين بدرى كده
حاتم : طيب انا حاجيلك اقعدى فى سيسيل او تريانون وانا عشر دقايق اكون عندك
حضر اليها سريعا وطلب قهوة وبعدها قال
حاتم : اسمعى انا ما عنديش مشكله من بياتك عندى بس انا عندى مشوار ضرورى لازم اروحه ومش عارف اوديكى فين بدرى كده ؟ اروحك من دلوقت واللا تقعدى فى اى كافيه لحد ما اخلص ؟
ياسمين : طيب انت حتتاخر فى مشوارك ده ؟
حاتم : ايوه ممكن للمغرب كمان اصل فيه جماعه معرفه بازورهم كل فتره وعندهم بنت صغيره باموت فيها وباحب اقعد العب معاها وبانسى نفسى واطول بصراحه قعدتى مع البنت دى بتريح نفسيتى
ياسمين : عندك مشكله لو جيت معاك ؟
حاتم : بصراحه اه اصل الناس دول حساسين وعلى قد حالهم وانا عارفك مجنونه
ياسمين : حاتم انا مجنونه صحيح بس مستحيل اجرح شعور حد انا تقريبا كده فهمت الموضوع ياريت تاخدنى معاك وصدقنى مش حاضايقهم
حاتم : طيب حاتصل استاذن منهم الاول
اتصل حاتم بام آيه يستاذنها فى اصطحاب صديقة معه ورحبت ظنا منها انها فتاته التى حدثها عنها وحين وصلا فتحت لها الباب مبتهجة وادرك حاتم ما دار بخلدها فاسرع بتعريفهم قائلا
حاتم : احب اعرفك يا ام آيه بالانسه ياسمين صديقه عزيزه من القاهره ودى يا ياسمين الست ام آيه
عبست ام آيه بعد ان استبشرت بالقادمة ثم استعادت ابتسامتها سريعا وقالت مرحبة
ام آيه : اهلا اهلا منوره اسكندريه اتفضلى بيتك ومطرحك
ياسمين : اسكندريه منوره باهلها يا ام آيه الصراحه حاتم حكالى عن آيه وقلت لازم اجى اشوفها
حاتم : ياسمين لسه واصله من القاهره النهارده وما قدرتش ااجل ميعادكم لان ده اهم ميعاد بالنسبالى
ام آيه : يا استاذ حاتم حضرتك تشرف فى اى وقت وضيوفك على راسنا من فوق بعد اذنكم اعمل القهوه
ذهبت لتعد القهوة ثم ذهبت لايقاظ آيه الى اقبلت على حاتم ضاحكة والقت نفسها فى حضنه فاخرج لها قطعة كبيرة من الشيكولاتة ثم اخرج لها فستانا انيقا وقال يداعبها
حاتم : ايه رايك بقى فى الفستان الجميل ده ؟
آيه : الله ده حلو قوى ميرسى يا عمو حاتم
وقبلته فى وجنته فقالت امها
ام آيه : دايما تاعب نفسك يا استاذ حاتم
حاتم : تاعب نفسى على ايه يعنى ؟ انا لما باشوف آيه فرحانه قلبى بيرقص من الفرحه بس انا كان نفسى اجيبلك حاجه بسيطه وخفت تكسفينى زى كل مره
ام آيه : كتر خيرك كفايه اللى بتعمله مع آيه انا مش محتاجه حاجه
ياسمين : طيب ما تلبسى آيه الفستان الجديد علشان نشوفه عليها
ام آيه : من عينيا دقيقه واحده
اصطحبت ابنتها الى غرفة نومها وابدلت لها ثوبها بالثوب الجديد وخرجت بها وهى مزهوة جميلة كالفراشة الرقيقة وتاملتها ياسمين بفرحة قائلة
ياسمين : الله الله الله الهم صلى على النبى الفستان حينطق عليكى تعالى تعالى
فتحت لها ذراعيها فاقبلت عليها آيه ببساطة قائلة
آيه : حلو يا تانت ؟
ياسمين : حلو ؟ انتى اللى حلوه ومحليه الفستان بسم الله ما شاء الله عليكى قمر وكلمة تانت طالعه من بقك زى السكر ما تجيبى بوسه
وقبلتها من شفتيها ووضعتها على ركبتها قائلة
ياسمين : بسم الله ما شاء الله بنتك جميله وتدخل القلب من اول نظره
ام آيه : متشكره يا مدام ياسمين قصدى يا انسه ياسمين
ياسمين : لا باقول ايه لا مدام ولا انسه قولى ياسمين وخلاص ايه رايك يا حاتم لو ييجوا معانا نتغدى مع بعض ؟
ام ايه : لا انتوا النهارده حتتغدوا معانا انا ست بيت شاطره يا ياسمين
حاتم : لا يا ام آيه احنا نروح ابو قير نتغدى وآيه تلعب براحتها على البحر ويبقى يوم من نفسها تتفسح
.....................
كان يوما ممتعا قضوه على البحر ولم يكن الجو شديد البرودة برغم حلول الشتاء وفى النهاية تبادلت ياسمين وام آيه ارقام الهواتف وواعدتها ياسمين بزيارتها فى اليوم التالى
وفى اليوم التالى ذهبت اليها بعد ان انتهت من اعمالها تحمل حقيبة متوسطة الحجم
ياسمين : انا النهارده عازمه نفسى على الغدا عندك حتغدينى ايه ؟
ام آيه : شوفى اللى نفسك فيه انا ست بيت شاطره واللا بتحبى الاكل الجاهز ؟
ياسمين : لالا جاهز ايه انا عاوزه اكل من عمايل ايدك بس بشرط تعلمينى بس الاول كنت عاوزه اقول على حاجه انتى ممكن تكسفى حاتم لو جابلك هديه بس بيتهيالى احنا ستات زى بعض وقريبين لبعض فى السن وبقينا اصحاب يعنى بيتهيالى مش حتكسفينى
ام آيه : ماعاش اللى يكسفك
ياسمين : طيب انا جبتلك شوية حاجات على ذوقى يارب تعجبك وكلها تنفع للمحجبات
فتحت الحقيبة واخرجت لها بعض الملابس الانيقة اشترتها لها خصيصا فدمعت عينا ام آيه وشكرتها فاحتضنتها ياسمين قائلة
ياسمين : ليه بقى الدموع دى ؟ انتى زعلتى منى ؟
ام آيه : ابدا هديتك مقبوله انا بس صعبت عليا نفسى
ياسمين : ليه يا حبيبتى ؟ والله انا جبتلك الحاجات دى علشان حبيتك من اول ما شفتك وحبيت بنتك قوى وصدقينى لو عندى اخت مش حاحبها زى ما باحبك طيب انتى عارفه من امبارح وانا نويت اتجوز ونفسى اجيب بنوته شبه آيه وحاسميها آيه كمان
.......................
استيقظت داليا صباحا وهى تشعر بالارهاق وعدم الرغبة فى الخروج او الطعام او اى شيء فتحت التليفزيون واخذت تقلب القنوات دون اهتمام ثم قامت لتعد لنفسها كوبا من القهوة ووضعته امامها واخذت تفكر فى حالها وحياتها التى اصبحت خاوية تماما الا من منيع الذى اصبح يزورها يوميا تقريبا .
تذكرت حياتها فى مصر وصديقات الجامعة وحاتم وقارنت بين حياتها هناك وحياتها هنا وحيدة فى غربة فرضت عليها و .....
شعرت بالغثيان والرغبة فى القيء فاسرعت الى الحمام وتقيات ثم عادت لجلستها على الاريكة تفكر فى منيع الذى يغدق عليها بهدايا لا تفتحها واموال لا تنفقها ولا تحتاجها وهى مضطرة لاعطائه ما يريد خشية ان يهجرها وتعود لوحدتها القاسية من جديد .
لم يكن منيع راغبا فى المتعة فقط بل كان يكن لها حبا صادقا يظهر فى عيونه وكان اذا تعللت بالارهاق او عدم الرغبة لا يلح عليها بل كان كثيرا ما يجالسها ويحادثها احاديثا شيقة ويحكى لها عن اسقاره وزيجاته وقصة هروبه من الجنوب وهو صغير بسبب عدم رغبته فى التعليم وفى النهاية يكتفى منها بقبلة ربما على خدها او يدها وابتسامة فى الوداع ولكنه .....
احست بالرغبة فى القيء مرة اخرى فاسرعت الى الحمام وخرجت لتعد لنفسها بعض الليمون الدافيء محدثة نفسها انها ربما اصيبت ببرد فى المعدة وعادت لتضعه امامها بعد ان رشفت رشفة صغيرة وتركته بجوار كوب القهوة التى لم تمسها
اتصل منيع يستاذن فى الصعود اليها فقد كان يعاملها كملكة ولا يصعد اليها ابدا دون استئذان ولكنها اعتذرت قائلة
داليا : بلاش النهارده يا منيع انا تعبانه شويه
منيع : سلامتك الف سلامه يا ست الستات تحبى اجيب دكتور واجى ؟
داليا : لا مافيش داعى دول شوية برد وانا حارتاح وبكره حابقى كويسه
منيع : طيب ممكن اجى اتطمن عليكى ولو من على الباب وامشى على طول ؟
داليا : البيت بيتك تشرف فى اى وقت بس لو تسيبنى لبكره يبقى احسن
اتصل يطمئن عليها كل ساعة تقريبا انها ممتنة له فلولاه لربما ماتت وتعفنت جثتها دون ان يدرى بها احد على الاقل هناك من يشعرها بانها انسانة وان احدا يهتم بها حقا وان احدا يحبها حقا .
كان منيع يحبها حقا .
فى اليوم التالى استمر شعورها بالارهاق فذهبت الى المستشفى وقام الطبيب بالكشف عليها
الطبيب : حضرتك متجوزه طبعا
داليا : اه
الطبيب : اومال جوز حضرتك ماجاش معاكى ليه ؟
داليا : جوزى فى الشغل هو فيه ايه يا دكتور ؟ قلقتنى
الطبيب : لا ما تقلقيش ولا حاجه مبروك يا ستى حتجيبى ولى العهد قريب
دفنت وجهها بيديها ونظرت للطبيب بفزع قائلة
داليا : يا نهار اسود معناه ايه الكلام ده يا دكتور ؟
الطبيب : فيه ايه يا مدام ؟ انتى مش متجوزه ؟ انتى حامل
شعرت بالصدمة تزلزل كيانها كيف لم تتخذ احتياطاتها لمثل ذلك ؟ هذه مصيبة كبرى فوق كل ما عانته اما يكفيها ما عانت من مصائب ؟ ماذا تفعل الان والطبيب ينظر اليها بشك قائلا
الطبيب : فيه حاجه يا مدام ؟ شكلك مش فرحانه
بماذا تجيب ؟ تشعر ان راسها يغلى ولكنها فى النهاية قالت بعد تردد
داليا : اصل اصل يا دكتور انا وجوزى كنا متفقين مافيش خلفه الا لما نرجع مصر
الطبيب : كلام ايه ده ؟ دى حاجه بتاعة ربنا مش بايد حد يمنعها عموما انا حاكتبلك شوية فيتامينات وضرورى ...
ولكنها قاطعته وهى تختطف تذكرة الكشف وتهرع للخارج قائلة
داليا : شكرا يا دكتور شكرا
#دماء_على_اوراق_الورود
#الجزء_الاول
عادت الى منزلها وهى عاجزة عن ايجاد حل لمصيبتها واتصلت بمنيع فحضر اليها على الفور وبادرته قائلة
داليا : مصيبه يا منيع مصيبه ... انا حامل
شعر بالصدمة وقال بذهول
منيع : حامل ازاى ؟ منى ؟
داليا : اومال من مين ؟
منيع : مش قصدى بس قصدى يمكن يكون من على
ضحكت بسخرية وقالت
داليا : على ازاى بالمراسله ؟ اسمع يا منيع انا حاقول لك على سر على ده مافيش خالص
منيع : يا نهار اسود ازاى ؟
داليا : زى ما باقول كده على ده زيه زيى بالظبط مافيش يعنى مافيش خالص
منيع : يعنى معناها ان انا ابو الجنين ؟ طيب ازاى وانتى ما كنتيش بنت ؟
تلعثمت فى البداية ولم تدر بماذا تجيب ثم تمالكت نفسها قائلة
داليا : اصل ... اصل على كان فى الاول كويس وبعدين عمل حادثه واحنا راجعين من شهر العسل واثرت عليه بس هو خبا عليا لحد ما سافرنا وجينا هنا وبعدها سرق جواز سفرى ومانعنى انزل مصر ومقعدنى معاه بالعافيه
هز راسه باستغراب وقال بهدوء
منيع : اسمعى لما ييجى على نكلمه يطلقك وانا مستعد اتجوزك ونصلح الغلطه دى انا لو خلفت منك حيكون اغلى اولادى
داليا : مش وقت الكلام ده يا منيع احنا فى مصيبه ولازم نشوف حل انا مش ممكن اقول لعلى انى حامل ساعتها حيذلنى
منيع : انا اقتله لو يمس شعره منك
داليا : يا منيع هو احنا نعالج مصيبه بمصيبه اكبر ؟ لازم نشوف حل
منيع : حاضر انتى بس هدى نفسك وحنشوف حل انا مستعد اعمل اى حاجه علشانك بس فكرى وقوليلى اعمل ايه
داليا : كل اللى طالباه منك انك ما تتخلاش عنى انا لازم انزل الجنين
منيع : ايه ؟ لالالا ده حرام
داليا : ومش حرام اللى عملناه ؟ الجنين ده لازم ينزل وانت لازم تساعدنى
منيع : اسمعى يا داليا انا باحبك صحيح ومش حاتخلى عنك لكن انا مش عاوز فضايح اللى تطلبيه لحد مليون ريال انا تحت امرك
داليا : مليون ايه اللى بتتكلم عليه هو انا جايباك عاوزه فلوس ؟ لا اصحى وفوق انت كل الهدايا اللى جبتها ما تلزمنيش وما فتحتهاش فيه حاجات لسه بغلافها لو عاوزهم خدهم ولو عاوز الفلوس اللى اديتهالى خدها وخد فوقها كل ده على الجزمه عندى انا كنت عاوزه راجل يقف جنبى بس مع الاسف ما لقيتش من فضلك يا منيع امشى وسيبنى دلوقت
منيع : يا داليا انا ....
ولكنها قاطعته بحدة قائلة
داليا : امشى يا منيع دلوقت انا مش طايقه نفسى ... ياللا انا حاتصرف لوحدى متشكره
.....................
احست بالعجز وقلة الحيلة وشعرت انها عادت للوحدة من جديد . وحيدة تماما فى عالم موحش مقبض كل من فيه يناصبها العداء .
شعرت بالرغبة فى الخروج ولم تكن قد ابدلت ثيابها بعد فانتعلت حذاءها وخرجت لا تلوى على شيء ولا تدرى اين تذهب وظلت تهيم على وجهها فى الشوارع حتى قادتها قدماها امام مول العالمية توقفت امامه وهى تتذكر يوم طردت منه سابقا بلا ذنب اصابها شعورها الشديد بالياس بالعناد ورفعت راسها عاليا ودخلت وهى تنظر لافراد الامن منتظرة من منهم سيتبعها واخذت تتجول بين المحلات حتى صعدت الى الكافيه ودخلت مرفوعة الراس تنظر للجميع بحدة واختارت مائدة تتوسط المكان بدلا من المائدة المنعزلة التى اعتادت الجلوس عليها وجلست بكبرياء واضعة ساقا على ساق وهى تحدث نفسها
( نعم اخطات ولكن من كان منكم بلا جريرة فليرمنى بحجر )
حضر الجرسون مسرعا وقال بتلعثم
الجرسون : مدام من فضلك احنا مش ....
داليا : اسمع مش عاوزه كلام كتير عاوزه قهوه زياده بن محوج وقزازة ميه وكبايه نضيفه وبسرعه مفهوم
كانت رغم صوتها المنخفض تتحدث بثقة وحدة وحزم فقال الجرسون بتردد
الجرسون : انا .... انا حاروح اجيب المدير لحضرتك
حضر المدير سريعا وهو يتعثر فى خطواته وهى تجيل بصرها فى النساء المترقبات وقد بدا التوتر يظهر عليهن امام نظراتها المتعالية
المدير : مدام من فضلك انا قلت لحضرتك قبل كده ....
داليا : اسمع علشان ما اطولش لسانى انا مش حامشى يا تروح تجيب طلباتى يا تجيب الامن اتحرك من قدامى
المدير : انا كده مضطر فعلا اطلب الامن يا مدام ارجوكى قدرى الموقف
ارتفع صوتها بحدة واسمع جميع الجالسات
داليا : ما تخلينيش اعلى صوتى اكتر من كده انا ممكن اطول لسانى وايدى كمان قلت يا تجيب طلباتى يا تجيب الامن الشرطه ان شالله الجيش ما يهمنيش اتفضل باحترامك بدل ما تتفضل من غيره
اسرع المدير بابلاغ امن المول وبعد دقائق وقف امام مائدتها رجل لم يتجاوز الاربعين وسيم الطلعة يرتدى زيا رسميا ويعلق شارة الامن على جيب بذلته الايسر قائلا باحترام وابتسامة مطمئنة
جاسم : صباح الخير يا مدام
داليا : اهلا صباح الخير
جاسم : تسمحيلى اقعد مع حضرتك شويه ؟
اشارت الى المقعد المقابل لها قائلة
داليا : اتفضل
جلس امامها وعرفها بنفسه
جاسم : مع حضرتك جاسم بكر الدوسرى مدير امن المول ممكن اتشرف بحضرتك ؟
داليا : داليا محسن ممتاز شركس من مصر
اخرجت من حقيبة يدها بطاقة الاقامة السارية وناولتها له فنظر اليها واعادها اليها قائلا
جاسم : فيه اى مشكله مع حضرتك يا مدام داليا ؟
داليا : اه طبعا انا عندى مشكله . انا جيت من حوالى نص ساعه وطلبت قهوه ولحد دلوقت ما حدش اهتم بطلباتى رغم انى كنت دايما بادفع بقشيش وعاوزيننى امشى مش فاهمه ليه رغم انى عمرى ما عملت مشكله وانا مش حامشى على الاقل لحد ما اعرف سبب مقنع انهم يطردونى بالمنظر المهين ده .
جاسم : معاذ الله ماحدش يقدر يهينك يا مدام ثانيه واحده
واشار الى المدير فحضر مسرعا
جاسم : ايه المشكله مع المدام يا استاذ ؟
المدير : انا سبق ووضحت لحضرتك المشكله يا افندى جاسم
جاسم : قول المشكله مره تانيه مش عاوز تتكلم قدام المدام ؟ من حقها تعرف
المدير : المشكله ان المدام يعنى ..... بتكلم نفسها وده بيخوف باقى الزباين
جاسم : حصل منها اى مشكله مع حد من الزباين او معاكم ؟
المدير : لا لكن انا باحاول امنع المشكله قبل ما تحصل ... اااه فيه مره حاولت تمسك بنت صغيره وامها لحقتها
جاسم : يعنى كانت حتعمل ايه مع البنت ؟
المدير : مش عارف هى ما لحقتش تعمل حاجه
جاسم : طيب قدامك دقيقتين تكون قهوة المدام قدامها
انصرف المدير فنظر جاسم الى داليا متسائلا
جاسم : حضرتك عاوزه تقولى حاجه ؟ تشرحى اى حاجه او تكذبيه فى اللى قاله ؟ قولى كل اللى فى نفسك انا هنا علشان اسمعك وعلشان اجيب حقك قبل اى حد تانى
داليا : انا مش حاكذبه . يا استاذ جاسم انا ست وحيده بقالى هنا اكتر من سنتين ونص ما باعرفش حد وما باتكلمش مع حد حتى جوزى بيسافر لشغله بالشهر ما باشوفهوش حاولت اتعرف على اى واحده هنا كلهم رفضوا ليه ؟ مش عارفه انا عمرى ما عملت مشكله مع اى حد اساله اساله وحلفه عمرى مثلا مثلا يعنى كسرت كبايه على الارض ؟ ابدا ما حصلش اساله وحلفه عمرى مثلا مسكت طبق حدفته فى المرايه او رف الكبايات او طولت لسانى على حد ؟ ابدا ما حصلش ولا عمر حصلت منى مشكله واحده مع اى حد
سالت دموعها على خديها واجالت نظرها فى المكان ثم اشارت الى احدى النساء وقالت بصوت مسموع للجميع
داليا : الست دى مثلا رحت مره علشان اقول لها عاوزه اتعرف عليكى قالتلى مش عاوزه اتعرف الكل بيقول عليكى مجنونه وبتكلمى نفسك ولمت حاجتها ومشيت وسابتنى زى ما اكون جربانه او عندى مرض
مسحت دموعها وقالت بسخرية
داليا : باكلم نفسى ؟ هو انا كنت لقيت حد اكلمه ؟
عادت تنظر حولها فلمحت احدى النساء تجلس خلفها فاشارت اليها قائلة
داليا : والست دى مره كان معاها بنوته صغيره جميله قوى بتلعب مع كل الناس وانا قمت علشان ابوسها واسالها عن اسمها ما عملتش اكتر من كده لقيتها بتقوللى ابعدى عن ولادى انا باحذرك . انا مستحيل اضر طفل صغير ابدا ولا حتى حد كبير انا مستحيل اسبب اذى لاى حد ولا عمرى اذيت حد لكن وحيده لما بالاقى نفسى لوحدى كده باتخيل والدى الله يرحمه قاعد معايا واتكلم معاه اتخيل زميلتى فى الكليه مثلا جارى او جارتى فى مصر اى حد اتكلم معاه فى خيالى طالما مش لاقيه فى الواقع حد راضى يكلمنى نص كلمه . الناس مش قابلانى مش عارفه ليه ؟ طيب مش مهم سيبونى فى حالى بقى هو انا لما باكلم نفسى ده فيه ضرر لحد ؟ حضرتك راجل شكلك محترم ومتفهم قوللى ايه الغلط اللى عندى ولو عندى غلط لو انا خطر على حد حامشى فورا ومش حارحع هنا تانى ولا ادخل اى مول غيره حتى
استمع جاسم بهدوء شديد واجاب
جاسم : الغلط عندنا احنا يا مدام داليا انا اسف بالنيابه عن الجميع ومستعد لاى ترضيه تطلبيها انا عن نفسى فى فتره اعطيت تعليمات ان لازم فرد امن يتابعك لما تدخلى المول ولحد ما تخرجى وحاعاقب نفسى بالجزاء على القرار ده لانى غلطان وباعترف قدامك انى غلطان وباقولها قدام الكل
داليا : انا متشكره جدا يا استاذ جاسم مافيش داعى للجزاء كفايه الوقت اللى قعدته معايا حضرتك عارف ؟ لو مره فى الشهر الاقى حد يقعد يتكلم معايا كده ؟ اى حد ماكنتش احتاج ادور على حد اكلمه فى خيالى
جاسم : انا تحت امر حضرتك فى اى وقت ومكتبى معروف ودلوقت اسمحيلى لانى ممنوع ادخل هنا الا لظروف العمل واسمحيلى القهوه على حسابى
داليا : معلش اسمحلى انا متعوده لما اطلب حاجه ادفع حقها
جاسم : خلاص براحتك تسمحيلى اعزمك على ليمون فريش بعد القهوه ؟
داليا : خلاص مافيش مانع
قام جاسم وابلغ الجرسون بالليمون واستدعى مدير المحل وعند حضوره قال بصوت مسموع للجميع
جاسم : الكافيه ده مكان مفتوح لخدمة اى عميله ليها حق طالما ما حصلش منها مشكله تتسبب فى منعها والمدام ليها حق عندنا وعلى فكره من حقها تشتكيك لكن انا طمعان فى كرم اخلاقها انها تسامحك المره دى لكن لو اتكرر منك اى تقصير فى حقها بعد كده حاخليها تشتكيك واشهد معاها وتكون النتيجه انك تخسر شغلك
المدير : انا اسف يا افندى جاسم للمدام وباعتذر قدام الجميع وتشرفنا فى اى وقت مش حتلاقى مننا غير كل الاحترام
انصرف جاسم بعدها وامسكت داليا فنجان القهوة تديره بين يديها وتحركه يمينا ويسارا وهى شاردة حتى افاقت من شرودها على يدين ناعمتين تحيطان براسها وقبلة تنطبع على راسها مع صوت انثوى رقيق يقول
انا اسفه
......................
مساء الخير
اتعمدت اقفل البوست على الموقف ده علشان اشوف توقعاتكم وحيحصل ايه مع داليا ومين هى الست اللى باست راسها وحتعمل معاها ايه ؟