رواية اللعنة التي لم ترتكب الفصل التاسع 9 بقلم نور آل عبدالله

رواية اللعنة التي لم ترتكب الفصل التاسع 9 بقلم نور آل عبدالله

ها قد ابتدأت النهاية تظهر،واللعنه تتباين... فهل أنتم مستعدّون لما سوف يُكشف فِي هذا البارت.؟ "

.

.

احذروا.... فـاللعنه لا تُكشف دون ثمن "التصويت+مُتابعه الحساب+التعليق بين الفقرات

.

.....................*

زينب...

-حچه هذا الحچي وطلع من يمي بقيت اطحن بروحي شلون ياربي شلون ما مفكرة حتى فكرة اصير الغيرة

اول ما اتعرفت علي حسيت انه اله وبس،فوگ شوگي اله هسه يردون يخلوني على ذمة غيره وعلي لو عرف يتخبل

حسين غيرته بـ خبال مو مال يعرف انه اتزوج غيرة يموت،هاي إذا ما حاول يكتلني لو يكتل الي خاطبني حاولت افكر

بـ غير شي بس شلون.؟استغفرت ربي وطلعت يم اهلي اول ماگعدت بلش ابوي يحجي وياي

:-بويه زينب الي سويتي غلط واحنه لگينا الي نگدر نطمطم على هاي سالفتج ويا،ابن خالتج صالح خطبج

رجف جسمي وأنه اتذكر موقفي ويا بدون تفكير گلتله:-ما اقبل بويه

سجاد:-ديلا هسه مو زين لگينا واحد يطمطم عارج

: مستحيل ارضى لاتجبروني لا وعلي اسويلكم سالفه

حسن:-تردين تنزلين راسنا اكثر من هيج

واگفه ومصيري گدامي دا يتحدد يحجون ويتناقشون واني صافه عليهم محد أخذ رئي اردفت بـ حزم مثل ماعلمني والدي الحظوري هيبه

:- والله تحلمون اوافق

سجاد:- وتردين ابن الشيخ.؟

شهگت ويا ما طاحت دمعتي رجع هوَ كمل كلامه:- تحلمين والله اخر عمرنا بتنا تتمعشگ وتاخذ الي عاشگته والسلف شنهو الي يگولونه

ارتعش صوتي وانه ارد علي:-بس انه شعليه بيهم هاي مشاعري وحبي اله

سجاد:- احلمي تاخذيلج نجمه من السماء وما تاخذينه

:- نهى كلامه ودخل الحجرته اتنهدت بـ حيرة وين اوصل انه وهذا العشگ الجاب آخرتي دخلت للغرفه اجت يمي

زهره گعدت يمي وأنه ابجي واحجيلها باوعتلي هيَ وگالت

:-ارفضي بلكي يقتنع إذا حاولتي تبينين رفضج مو بسبب حبه

هزيت راسي بـ تردد:- احاول

:- صدگ طلعت هيَ وانه شويه وطلعت وراها شفته مترأس الديوان الطويل الي موجود بـ المضيف الداخلي

وأيده على راسه مبين يفكر بـ موضوعي گعدت ويا طولت نظر علي واردفت

عدل گعدته اول مشافني وانه گلت:- اگلك ترىٰ انه ما موافقه والله مو لان احبن ابن الشيخ بس اريد افهمنك سبب رفضي

عباس:-اي ابهريني

دنگت راسي افرك بـ ايدي:-انتَ تعرف صالح شمسويلي

عباس:- بلا عيارة زينب تعرفين الولد تاب

-عفته وطلعت لأن تعبت وانه بس احچي محد يسمعني،فجأة اجت بالي زهرة شلون دخلت اجت.؟انتبهت على صوت زهراء تحجي وياي

:-ها زهراء شكو

زهراء:-يمعوده صار ساعه احجي وياج وأنتِ بالج ما ادري وين

:-اعذريني والله شويه بالي مشوش

:-حقج خيه والعباس لو بـ ايدي شي اسوي الج،مكسور گلبي عليج

:-يمعوده عليمن ينكسر گلبج أنه وراضيه بـ الي يصير،صحيح شلون اجت زهرة لأن اعرف امي ماتخليها تدخل

:-يمعوده محد بـ البيت وعباس من شافني وحدي راح گعد بالمضيف

:-ايي چنت يمه،زين اگلج اريد اشوفها مرة ثانيه هاي المرة ما سولفت وياها

:-احاول

-بقينا نسولف شويه ودخلت للغرفه،فكرت اصير الصالح تعبتني ما اگدر شلون اصير على ذمة واحد چان يتحرش بـجسمي

وانه طفله،واحد تدني روحه على جاهله شلون اگدر اسلمه روحي.؟ شلون اگدر اثق بي.؟وعباس وسجاد اثنينهم يعرفون هالموضوع

وجاب يحاولون يبينون هو تاب بس ابو طبع ما يغير طبعه،غير هيج حبي لحسين الي محد يگدر يفهمه ما ادري اذا همه فاهمين

وجاي يبينون الي مافاهمينه،يمكن هواي تفاصيل ما ادري بيها بس الي ادري بي ومتأكدة منه انه احب حسين وهو يحبني

استغفرت ربي وحاولت انسى الموضوع بس ما گدرت لأن اعرف بـ ابوي ما دام عاف هذا الموضوع بـ رأسه بعد مستحيل

يسمع الي ويرفضه،مر اليوم طبيعي ورى ما اجت امي ثاني يوم گعدت على هوسه قويه گمت ورى ماغسلت

طلعت واشوف اخواتي وجهالهن يبوو على الهوسة سلمت عليهن وبلشت احظر الريوگ ويا نسوان اخواني كملنا

وبلشنا نصب خلصنا الريوگ ابوي واخواني طلعوا رقيه راحت البيت اهلها،ولحگتها رحمه بقت بس زهراء

يعني الحمدلله گعدتنا خلت من الحيايه گعدنا أنه واخواتي وزهراء نسولف گالت سمر اختي

:-بنات خلي نطلع للبستان

سحر:-ايي بنات خلي نغير جو

زينب ضحكت بـ گلبي من يمته هيج طلعات انه انحرم منها،حجيت وأنه احاول أضم ضوجتي:-ايي اطلعن غيرن جو

سمر:-ليش يمه ما راح ترحين ويانه

زينب:-مايقبلون اطلع

سحر:-ليش.؟

-هي گالت ليش وانه دموعي صاروا يطيحون وحده ورا الثانيه اريد احجي ما اگدر بس الشهگه تطلع مني حضنني كل وحده من جهه

وسئلن زهراء،بلشت زهراء تسولفلهن باستني سمر وگالت

:-وليش ضايجه إذا على موضوع صالح انه احاچي ابوي،وإذا على موضوع حسين محلوله ان شاء الله بس گولي يا الله

زينب:-تعبت سمر وعلي تعبت راح يصير سنه الولد يخطب بيه ما رضوا ومن عرفوا احچي ويا گلبوا عليه

هسه لا ابوي ولا امي ولا حتى الولد يحاچوني،ونسوان اخوانج امهات الشرف يباوعلي بطرف عينهن ويبسمرن

ترى هم تعبت وياريت لو همه ما غلطانين واحدهم ماضيه عندي،لو نسوان اخوانج چانوا يلبدون وياهم جوى الزرع

وهسه يحجلي بالشرف وما راضيات عليه وانه بس احچي ويا

حضنتني سحر اكثر وباست راسي وهيَ تحجي:-لاتضوجين مثل ما گالتلج سمر والله احنه نحچي ويا وبلكت يلين

زينب:- ما احس يلين سحر وعلي شاد وياي كلش من شوكت ابوي حتى صباح الخير مايردها عليه.؟

سمر:- والله نحاچي ويرجع مثل قبل ويا،لاتنسين أنتِ شيخته مدللته معقوله ينطي گلبه يزعل عليج هواي لو يجبرج على شي

أنتِ ما راضيه عليه وهو لو اله نيه يزوجج چان اول ما بلغتي اول واحد يجيج زوجج اله

زينب:-بس سمر لا تنسين ابوي حتى لو زين ويانه بس اذا غلطنا ما يرحمنا وعلي

سحر:- اي صحيح وهسه راح يستعمل وياج أسلوبه البارد،بس زينب هم لا تنسين الي سويتي مو هين

-هزيت راسي تعبت وانه ابرر موقفي ومحد مفتهمني

تعبت وهواي،شويه وگامن طلعن قنعن امي ماتحجي ونرجع قبل

لا يجون الولد وابوي صدگ اخذت الراديو وياها الكاسيتات وزهراء راحت الغرفتها جابت كاسيت گالت

:-لاعن على ذوقي بالبداية

:-تمام

بلشت الأغنية

:-لا هلي ولا صحبتي،ضليت أنا بـ غربتي

لا هلي ولا ديرتي،ضليت أنا بـ غربتي

حگي من اصب دمعتي،اصرخ واصيح الويل

حگي من اصب دمعتي،اصرخ واصيح الويل

-چانت اغنية حسين نعمه بس هو يحجي وانه دموعي ماوكفوا بعدين رادن يغيرن چان تختار سمر واحد من

الكاسيتات مالتي بدون ما انتبهه الها لأن گالت

:-هاي اغنيتي أحبها

-بلشت الاغنية وانصدمت من طلعت الاغنيه

:-ضلمتو بـ الوصف لمن وصفتوا

حبيبي شكد حلو بس ما نصفتوا

ضلمتو بـ الوصف لمن وصفتوا

حبيبي شكد حلو بس ما نصفتوا

احسه بـ روحي وبـ گلبي ولعيون

احلى من الحلو لو ما تصدكون

احسه بـ روحي وبـ گلبي ولعيون

احلى من الحلو لو ما تصدكون

هاكم هاي عيني وبيها شوفوا

دخذو هاي عيني وبيها شوفوا

-دموعي صارت تطيح اسرع وشهگاتي تعلى تريد تفهم شبيه ماكو بس أنه ذكرته كلشي يمي يذكرني بي مسحت دموعي وحچيت بين شهگاتي

:- ها هاي الاغ الاغنيه هوَ هداها الي

-گعدت سمر تحضن بيه وتبوسني لمن هديت باوعت جرف النهر گدامي

اخر مرة شفته هنا بعدين رجعنا على القصائد طلعن احنه غير حسين ماعدنا وسيله زين هديت عليها،لان احس صوت

القارئ راحه نفسيه شويه وراحت زهراء تشوفهم گالت راح يرجعون لأن صار ساعتين من طلعوا رجعنا للبيت بلشنا نحظر الغدة

للعصر البيت هدوء شويه والبنات اخذن ابوي للديوان الداخلي يحجن ويا گبت بينهم العيطه وهنه طلعت ملامح اليأس واضحه عليهن

عرفت ما قابل ولا راح يقبل ابوي وأعرفه ما دام خطأت بعد مستحيل يسامحني،وما دام گال كلمه بعد ما يتراجع بيها

اتشجعت وسئلتهن بـ صوت يرجف

:-بشرن.؟

نزلت سمر رأسها وگالت:-ما قبل يگول هيَ خطأت وتتحمل نتيجة خطأها

سحر:- بس وداعتج ما سكتنا گلتله بويه شنهو ذنبها اذا انتم ما قبلتوا بي من رادها حلاله،وخايبه وعلي حتى على صالح

سولفتله وگلتله اتحرش بيها من چانت صغيرة يگول أي هسه كبر وعقل،وصراحتاً زينب اشوف ماكو گدامنا

حل غير انُ توافقين صحيح صعبه عليج چا قابل هينه تگدرين تعرسين من الچان يتحرش بيج بس شتسوين قابل

حكم القوي على الضعيف هاي انه گبلج شگد بجيت ونحت بس لا جابلي نتيجه ولا شي وهسه انه گدامج ولدي بطولي

زينب:-سحر وعلي صعبه ما اتقبل اصير الغيرة أنتِ ماچنتي عاشگه وعلي زينب من اسمع اسمه روحي ترفرف ما اتخيل

اصير الغيرة لو هو يصير الغيري جدي اعناد بـ ابوي راح خطبله وبـ كل عين صلفه اجه عزمنا وأنه حتى ما أبين شسويت.؟

رحت وعلمود أوصله شگد آذاني رگصتله هچع وحتى بطني جرحتها شوفي هاي،لان اعرف اخته راح توصله

واجه وگالي بـ الحرف الواحد "وصلت رسالتج" بس سحر والله ما اگدر انسى

-گاعده يمهن واحاول اوصللهن فكرتي وان انه مو غلطانه بس همه ما جاي يفهموني،اخر شي تعبن گعدن يحاولن يهدأني

لحد المغرب گمت اصلي وهنه وياي بقن يومين وراحن وهنه يحاولن وياي علمود ما ابقى ضايجه بس وين

وانه كلشي اسوي بس حتى اشتم اخباره،قررت ورى ما راحن أبين مو مهتمه بلكت الله يهديهم ويبطلون يردون يعرسولي

ثاني يوم گعدت ما الي خلگ حتى ريوگ ما اتريگت طلعوا مثل كل يوم نسوان اخواني رجعوا،قريب الغده واجت خالتي

استغربت هاي شتسوي هنا.؟اتفاجأت من دخل وياها ابنها وبناتها اثنين صالح سلم وراح للمضيف والبنات اجن يمي بالمطبخ

چان تحجي كوثر

:-الله ايام گليلة وتصيرين بيتنا وچنتنا

سناء:-وتصير مرة صالح،عيني بعد ما تتحاجه

زينب:-ليش يمه ماخذه ياهو حتى ما اتحاجه

ضحكت كوثر وگالت:-غير اخوي ولج شلون ياهو

سناء:-نوب متحمسه نصير ثلاثه،الله زينب گلي الابوج خلي يستعجل ويگرب موعد الملچه

زينب:-باوعن بنات ترى بعد وكت وهسه غير محرم ايام مباركه مايصير بيها افراح

سناء:-حتى لو بس عقد وبعدين عود هو عرس وهو حفلة

زينب:-الله كريم بنات لا تستعجلون شعدنا قابل

كوثر:-هم صدگ اي

-بقن يمي يسولفن وجعن راسي وهنه يسولفن على اخوهن سونه نبي،زين لو ما خياساته يمي طول ما هنه يسولفن

انه ابتسم مجامله،صبينا الغده الزلم وحدهم واحنه وحدنا بـ البداية گالت امي خلي يدخل أنتِ وراح تصيرين مرته

بس عباس ماقبل گال نسوانه گاعده شلون يگعدن چدام زلمه غريب،ضحكت بـ گلبي هو منيله الرجوله حتى يصير زلمه.؟

لليل على العشى هم ما اكلت توني گايمه اريد انگل الاماعين ويا البنات واحس الدنيا افترت بيه وطحت بعد ماحسيت بـشي

فتحت عيوني أنه بـ المضمد يمي حسن،سجاد،صالح غمضت عيوني استغفرت ربي هذا شيسوي جاي صارت عيوني على حسن سئلته

:-شبيه.؟

صالح:-مابيج شي بس ضغطج هابط ليش ما ماكله من الصبح لهسه مو زين عليج بلا لو صايرلج شي

زينب:-ما سئلتك چنت موجهه السؤال لحسن

حسن:-عيب زينب شنهو هذا الحچي

-اخذت نفس طويل واتنهدته حسرة عليه احچي شي ترى گالوا عيب،يعني هو ليش يدخل روحه شويه خلص المغذي

وطلعوني للبيت تلگتني امي ترزل بيه بدل لتخاف هزيت راسي ودخلت للغرفه رغم وصاني حسن اكل بس ما أشتهي

نمت لحد ثاني يوم گعدت لگيتهم رايحين خفتاً وراحه،مرت الايام وهمه محد يحجي وياي لحدما بـ يوم قبل الأربعين بـ يوم اجاني سجاد گال

:-حظري روحج ورى الاربعين بـ يوم عقدج

زينب:-فدوه لا وعلي ما اگدر اصير على ذمة غيره والعباس اموت

-بعدني ما مكمله حچي وما اشوف بس الدفرات عليه ويصيح

:-الگح*** گدامي وتگلييي احبه لا اخلاق ولا مستحى

-اخر شي رفسني بـ طني احس روحي طلعت توني اريد احجي وبقيت ازوع دم طاحت دموعي وأنه اشوف ضعفي

اول تالي انه هيج اباوع دموع تختلط ويا الدم الي جاي اكحه،كسر بـ رجله وايده گد ما تعبت من الكتل صرت ادعي علي

من كل گلبي اول ما طلع اجتني زهراء تركض گلتلها وأنه اتوسللها

:-ابوس ايدج دبريلي زهرة اريدها عليج بـ روح ابنج الما شبعتي منه

:-وعلي باچر أنه اروح اصيحها الج بس فدوه عينيني خلي اساعدج

-شالتني للحمام اغسل وجهي مشخط وراسي يوجعني لأن جر شعري غسلت وطلعت الليل كله اون وزهراء يمي

اهلي محد سئل عليه لأن هاي الايام الي مرت مرتين كاتلني بيها سجاد ومحد حتى سئله ليش،تعبوني هواي وبنفس الوكت

ما جاي يفهموني،ثاني يوم الصبح امي طلعت وزهراء اخذتها حجه راحت صاحتلي زهرة اجت هيَ وزهرة دخلتها بـ ساع الغرفتي

حضنتني وهيَ تگول:-سودة عليه،يمه كسر بـ ايدهم،هاي شصاير بيج ولج

طاحت دمعتي وجعت جروح خدودي بس اتحملت وحجيت:-لج زهرة هاي مو شي يم اول يوم لزموني بي

لو قبل فترة وعلي سجاد راح يموتني زهرة باچر عقدي

لطمت على وجهه:-گالت صخام ياروحي،وعلي حسين راح يتخبل گعد الصبح اليوم جدي يگله باچر حنتك

حتى احترام المحرم ماخلوا ذوله شبيهم

انهاريت أكثر صرت ابجي وازلغ بـ خدودي:-شسوي زهرة شسوي وعلي خايفه،ما راح يرحمني ونوب صالح

حضنتني أكثر وگالت:-اششش يرويحتي اششش لا تبجين فدوة اروحلج

رفعت راسي من حضنها وگلتلها:-اريد اشوفه

باوعتلي بـ حيرة وگالتلي:-تم بيش الساعه.؟

:-اهلي يدخلون الغرفهم بـ8 گليله بـ9 حتى اتأكد نايمين

:-تمام

-هيَ طلعت ودخلت عليه زهراء وصيتها تجيبلي دفتري وگعدت اكتب گلتلها

:-الصبح تگعدين تلگينا جوى الطبگ الي برى أخذي ويا ذني كم صورة سلميهن الزهرة "أمانة زهراء"

:-شنو بالج زينب.؟

-گعدت اسولفلها ويا كل كلمه تطيح دمعه مني بس مجبورة شسوي.! گالت وهيَ ترجف

:-زينب أنه بس سمعت بـ السالفه خفت أنتِ شلون

:-من يومي احب اخاطر،وهـالمرةعلمود مصلحتي

-هيَ طلعت وانه بلشت اكتب كلشي افكر بي وكلشي اريده خليت اليوم يمر طبيعي لليل لل9 اتأكدت منهم نايمين

طلعت امشي على روس اصابيعي وصلت يم الجرف شفته واگف لا ارادياً طلعت مني شهگه وهو اجاني يركض حضني

صرت ارجف بـ حضنه ودموعي وحده ورا الثانيه تنزل وشهگاتي صوتهن يعلى شي ورى شي اخر شي باوعلي رفع راسي اله

ومسح دموعي وهو يحجي

:-سوده عليه يروح حسين،سوده بوجهي،هاي شصاير بيج كسر بـ إيدين ال*** كلهم،سوده عليه أبويه موجوعه

من وراي مو.؟زينبي أبويه أنتِ بس لا كرهتيني ولو اعرفج گلبج طيب ما تكرهين واحد

حضنته اكثر وحجيت:-كتلوني حسين،ندموني على الساعه الحبيتك بيها،بس وعلي بعدني احبك بس كسروني،اهلي هواي كسروني

حسين يگلولي باچر تعقدين،وعلى ياهو.؟على صالح الي خرب شخصيتي

:-اشش ياروحه وعمره وحگ ابو الأيتام الغيري ماتصيرين ومثل ما اكتلج لو الي لو الربج

رفعت راسي وحچيت:-حسين خلي نشر...يتبع"

.

.

..........................*

.

كانت ايام كـ أنها سَيف من حِدتُها

لِـ نور الـ عَـبدالله

العاشر من هنا

تعديل المقال