رواية سر خلف النقاب كامله وحصريه بقلم هدوء آل محمد
عمت عين المنايا وهجم بيت الم وت
يتخطى الرعيع وياخذ الماجد
عريان السيد خلف
____________________________________
في احد مناطق البسيطة من العراق في ليلة من ليالي تموز الحارة صوت المبردة وهي تشتغل تنخر بل راس وهواها حار الي ينفخ وفوگ كل هذا الضيم امتحانات اخر السنة وتعال اتحمل واصبر واشرح الهل بني ادم الي ماخذ الدراسة استهزاء ولعب حجيت بملل وضجر من بعد ما وصلت مرحلة من التعب والانهيار وهو مو مهتم
_زين سولفلي شنو معجزة الله تعالى بالصحيفة
صفن بوجهي وبعدها عگد حاجبة بأستغراب وتسأول
سراج:- ياصحيفة هاي
عضيت اصبعي حيل وكفخته بالكتاب على كتفه
لزم كتفه متوجع ووجهه معبس حچه
سراج:-شبيچ يرربچ
حطيت الكتاب بالگاع ولزمت راسي بنفاذ صبر
_لخاطر الله لخاطر الاسلام ررركز شووي
نفخ بملل وموعاجبة الوضع
سراج:-سولفي يالله
_هو منو يسولف اني لو انت سألتك وجاوب لو وغلاة الي توسد بين التربان اسطرك سطرة انسيك اسمك يالله فضني جاوب معجزة الصحيفة الي كتبوها لمقاطعة بني هاشم وتعهدوا بيها الا تبيع شياً ألى بني هاشم وعلقت الصحيفة في الكعبة وراها انتفض نفر من قريش وقرروا ان ينقضون تلك الصحيفة
كان يخض ببطل العصير ويباوع الي
سراج:-ييي وشصار
اخذت نفس اصبر بنفسي
_ انت جاوبني شصار ولك عليت گلبي شنو هي المعجزة الي صارت
يشرب بالعصير الي مجمد وصاير كله قطع ثلج
سراج:- مادري ماتذكر
سحبت البطل منه وحجيت بعصبية
_لك سرراج لاتخبلني امتحانك باجر الصبح وانت تصيح ماتذكر
رجع سحب البطل ويقلد عليه
سراج:- يي هسه فهمينا شصار
_الصحفية شصار بيها؟ شنو المعجزة الي صارت الها
سراج:-شسمه هذا
_يي هذا جاوب
سراج:- اكلتها المعزة؟
عضيت اصبعي حيل راح يجلطني هل ولد راح يخبلني دخيلك ربي شهل ابتلاء
سراج:-يمعودة اصبعج لاينكطم بس اهدي
رفعت اصبعي اهدد بي
_سراج للمرة الاخيرة راح اسألك شصار بالصحيفة والله اذا ماجاوبت راح ارگعك بالحايط
هز راسه وكاف وگف تحضر للشردة
سراج:-اكلتها الدودة مو؟؟
_اللهم صلي على محمد كللوش ماعندي چكليت كان طشيت
سديت الكتاب ونطيته اله
_يالله فارگ لو ارگعك بالحايط
ضحك وباس خدي
سراج:-اروح فدوة الج حبيبتي نامي مو تگعدين تبجين اعرفچ بومة
بتسمت على حنيته رغم انه مسربت بس الوحيد الحنين عليه من بين اخواني جاوبته
_ان شاء الله بس ابويه انت جاوب لاتخلي تعبي يروح هدر
اشر الي على عيونه واخذ كتابة وبطل العصير وطلع گمت سديت الباب وقفلتة ورا ورحت للكنتور أخذت الابتوب ورجعت ستندت على الباب شغلتها وخليت السماعات بأذني اگلب بل صور والفيديوهات وبدت دموعي تجري وين رحت همام وين رحت وعفت اخيتك ليش هيج سويت بيه ليش كسرتني ليش مو وعدتني متعوفني مو كنت الم بفلوس العلاج بس حتى ترجع توگف على حيلك هاي تاليها؟!!! انت المؤمن الصايم المصلي هيج تاليتك يمه سودة بوجهي مجاي اگدر اصدگ ساندة الباب بضهري ابجي والطم خايفة وارجف ودموعي على خدي وصلت حد الانهيار يربي ليش بس اني هيج يصير بيه يربي شمسوية جواك ياللهي ليش كل عذاب يومية نفس الهم والغم يومية نفس الوجع من يوم ماراح وانا حالي حال الگلب الكل ستقوى عليه امسح بدموعي وترجع تنزل صوت يدة الباب بدت تتحرك ويحاول يندفع واني مقاومة هاي صار اربع شهور على هل حالة يومية نفس الخوف دخيلك يالله دخيلك يارب افرجها عليه بحق محمد وأل محمد احميني واحفظني بعينك التي لاتنام صار يهمس بصوت ناصي خاف لايسمعة سراج او ابوية
شامل:- فتحي الباب ولچ تسنيم بس اسولف وياج
حجيت واني منهارة من البچي
_ امشيي منا شامل امشي خااف الله يالنذل يالحقيررر امشي لو اصرخ وألم الدنيا عليك امششي
حجة بتوسل
شامل:- ولج تسنيم اسمعي مني ليلة وحدة ليلة وحدة واكشفلچ سر يغير مجرى حياتچ كلها
صار صوت شخص يم الباب عرفت هاي امي تهمس حتى لا يسمع ابوي
ام شامل:- امشييي لك تريد تبلينا بهل ليل امشي سگط ابن السگط والله اذا لگفك سراج يمددك اهنا هذا مسودن مثل اخو
شامل:- بس احجي وياها
ام شامل:- دمششي عاد دمشي ابن السگط
ختفى صوتهم اخخخ يانار گلبي ببيت اهلي ما أمن لعد وين اشوف الراحة وين انام المفروض الاخ يكون مصدر امان الاخته بس انا اخوي غير اخوي عينه نگسه فترة ورجع تحرك مقبض الباب فزيت ونتچيت علي خايفة
ام شامل:- هاي اني فتحي يالچلبة
فتحت لباب وعتتني من شعرري شاغت روحي ودخلتني للغرفة وسدت الباب وتحجي بصوت ناصي وهي تعت بشعري
ام شامل:- شووفي اذا سمعت بيچ جايبة طاااري لابوج لو لسراج انعل اهل اهلج خاف عبالج هسه حميتج لا وروح ابوي ادخلة عليج بيدي
ادري بيها من تهدد تنفذ تعت بيه واني متوجعة ولازمة ايدها حتى تفكني حچيت
_والله ما احجي بس هدي شعري
تباوعلي بتحذير
ام شامل:- نشوف
هدتني وطلعت واني على بجيتي ولابطلت مابزعتي ياتسنيم مابزعتي بچي اشردي واخلصي بس وين اولي لعمامي لو خوالي كلهم واحد اطگع من الثاني سحبت فراشي ولزگته بالباب تلفلفت بالغطى اكمل بچيي واندب حضي الاگشر الي وگعني بهيج اهل،وارجع اسال نفسي نفس الاسئلة ليش امي تفرق بيني وبين رونق؟ ليش شامل هيج يعاملني بس اني؟ ليش حاقدة على سراج؟ ومالگه الجواب الي يريحني ويطلعني من دوامة افكاري غمضت عيني وستسلمت للنوم مافزيت الا على دگات بالباب
ام شامل:- صخاااام تسنيم ولج گوميييي بنت السگط سوي ريوك لابوج واخوتچ
گمت اركض خايفة لا احصل كفخة غسلت ورحت للهول من تعوق لحد الان مادخلته للغرفة خلته بلهول شلون وفاء هذا حگ الجزاء حارب وقاتل ومن صار طريح الفراش مالگى من يشيلة شفته متمدة والغطى علي ويمه ادويته وكرسية المتحرك والسبحة بيدة ابتسمت من اشوفة كل التعب يروح لو ماانت والله ماضل دقيقة بهل مهجوم اخذت نفس وبديت التمثيل وصنع السعادة والرفاهية الكاذبة
ابو شامل:- مطولة بصفنتج بنتي
فزيت
_ها لا شسمه صباح الخير يابه
الضحكة شگت حلگي شگد احب هل كلمة بست راسه وايدة وساعدته خليته على الكرسي سحبت الخاولي خليته على كتافي سحبت الكرسي المتحرك واخذته للمغسلة غسلت اله وهو يردد
ابو شامل:- عسى ايدج ماتجوس النار يابعد ابوج
بست راسه ونشفت اله واخذته للهول وطلعت بالطرمة احب الصباح شروق الشمس الي تأذن ببداية يوم جديد وحياة جديدة للبعض سعيدة وللبعض الاخر حزينة مو منصفة ابد هاي الدنيا صحيت من شرودي على كفخة من امي
ام شامل:- بنت الجلب لتضلين تتصفنين امشي سوي ريوك وفضيها
لزمت رگبتي متوجعة ورحت للمطبخ مهضومة ودمعتي بخدي خليت الجاي على النار وطلعت بيض واجبان والابوي حليب شفت الجاي بدى يفور طگيت البيضات وحضرت الصينية واخذتها للهول
ابو شامل:- هلا بوردة ابوها
_قصدك الي نايمة على گلب ابوها
ابو شامل:- لا يابنتي شهل حچي
_يابه تضحك على نفسك لو عليه دا تشوف وجهي والبي الي يشوفه يشرد
ابو شامل:- ليش بس تباوعين على الجانب السلبي ليش ماتباوعين على شعرج الاسود بسواد الليل لو عيونچ الي يباوعلها ينسطر مثل لون العسل صافياات ووجهج الابيض عبالك ماعون گيمر عرب ليش هل حچي
خليت ايدي على خدي وهو يوصف جمالي الي ماشفته بس هو شايفه من اباوع بالمراية تلعب روحي من شكلي جريت حسرة
_ دتعال اكل يايابه وعوف لغزل
ابوشامل:- اخووج الطرن هم اجى سكران لبارحة
_هااا
عقد حاجبة
ابو شامل:- جاوبيني بنتي ادري بيچ ماتجذبين
دنكت اصب بالجاية نطيتة اله وهو ينتظر اجاوبة
_ ليش هو شوكت بطل مادام مرافق هل اصدقاء الطايحين الحظ مراح يبطل
ابو شامل:- نذل ويضل طوول عمرة نذل كم مرة حذرتة منهم بس مايتوب وامج تضمضم اله
_الله يهدي على الصح شبيدينا غير الدعاء
هز راسة بأسف
ابو شامل:- ونعم بالله راح همام الي كنت اتباها بي كسرني بموتة وياريت موتة عادي لا اخخخ يگلبي اخ
حاولت اغير الموضوع
_اكلك عود انت ليش هيج حلو
باوع عليه وهز ايدة
ابو شامل:- والله اريد اصدگچ بس ماكدر منيلي حلا شو چني اليدعشري الي يطلع بباب الحارة
خليت اللقمة بحلگة اضحك
_ يااا شحلاتك والله بس يراد الك حلاقة هسه اكمل واحلق الك تطلع صدك عريس
ضحك وهو يشرب جاي
ابوشامل:- يي يضل بس المرة منين اندبرها
طلع سراج هو وقميصة الابيض وبنطرونه الاسود وشعرة الي يهفي ورا شواربة توي خاطات وفرحان بيهن تگول شكر وملتم النمل علي ضحكت والله لو يدري اصنف الا يطيح حضي باوعلي وبتسم
سراج:-لهل درجة جميييل وتباعيلي
_ يي يعمري تخبل احجي بيني وبين نفسي شگد حلوات شواربة يوگف عليهن النسر
دنگ يلبس بالحذاء ويحجي
سراج:-احاول اصدگج
كمل ونفض ايدة اخذ كتبه وگال
سراج:-ادعول يجيني ابن حلال ويغششني بشرفكم
ابوشامل:- والله شما اشوف مابراسك كل خير اذا الصف تضل بي سنتين
ضحك يحك بحواجبة
سراج:-يابه هسه انت وياي عليه دعيلي بشرفك
رفع ايدة بابا يضحك
ابو شامل:-يارب نجحة لهل مسودن وعقله
سراج:-يالله انا اروح مع السلامه
وطلع يركض
تذكرت وصحت
_سراااج
رجع الي
سراج:-هااا
_الصحيفة شصار بيها
سراج:-اكلتها الدودة
طلع يركض يضحك خاف لااسأله نوب اخخ شالع گلبي معدل ويخبل بس بالدراسة ماله واهس عاد السادس ابتدائي مرتين مرة ماداوم ومرتين رسب يعني جماعته رابع اعدادي رجعت اكمل ريوك ويه ابوي دخلت رونق هي وكشختها وخشمها الي رافعته على الكل لاتحترم اب ولاتحترم اخت اباوع عليها شنو الفرق بيني وبينج اهلنا نفسهم كاشخة وعطرها يهفي امي تاخذ من فلوس شغلي وتحط بحلگها وانا حسرة عليه اشتري عباية جديدة تقوم القيامة على ان تسنيم تتخشخ تريد رجل
رونق:- شبيج صافنة بوجهي صبيلي جاي اووي شلون شكول من هل صبح
ابو شامل:- يالله صباح خير
تفر بيدها وتحجي
رونق:- هو الي يشوف هيج وجه بنتك وين يشوف خير
ابو شامل:- ياقليلة الادب صح نطيناج اكل بس مانطيناج ترباية
شمر عليها خاشوگة الجاي وهي گامت
رونق:- طبعاً تدافعلهااا عبالك بس هيه بنتك واحنا جايبنا من الشارع الله يخلصني منكم على اهون سبب
_خفت لهل حلگ يي والله
رونق:- انجبي هم الها عين تحجي ام المصايب العانس
كلمتها خنجر ونبت بگلبي رغم هواي تذبلي كلام بس هل مرة وجعتني اكثر العانس تجمعن الدموع بعيني
_خلف الله عليج ياخيتي
اخذت كتبها وطلعت واني دنگت الم بالمواعين احارب الدمعة حتى ماتنزل بس خانتني مثل ما الدنيا خانتني حسيت بأيد صارت على كتفي
ابو شامل:- تسنيم بنيتي لاتهتمين هاي غيرانة منج لان انتِ
_لتكمل يابه لتكمل مواساتك الي نار تزيد جروحي
ابو شامل:- شبيدي عليج يابنيتي
مسحت دموعي لان ماحب اشوفه مقهور ومكسور خاطرة عليه
بست ايدة اتصنع الابتسامة
_لتهتم يابه تعودت خل اروح اكمل شغلي واجي احلق الك و هم يالله الحگ وراي دوام
شلت الصينية وطلعت للمطبخ اغسل بالمواعين ودموعي تهل مثل لمطر كلمتها وعتني على عمري العانس صح صرت عانس عمري 33 ولحد الان ماندك بابي ولاخطاب اجاني طز بيهم قابل ميته على الرجال بس نفسي اجرب شعور البنت من تنخطب اخخخ كلشي ماحصلت من دنياي بس الهم عليمن اجيت للدنيا مادري كملت غسل مواعين وطلعت بتيته وطماطة وبصل گشرتهن وسويتهن تبسي بقى بس التمن عود اغسلة رجعت الابوي طلعت لكرسي بالطرمة وگومتة وخليتة على كرسي عادي صح ينهد حيلي لان ثگيل بس روحي فداه رجعت للبيت جبت ماكينة الحلاقة وگعتدت احلق اله واشاقي بي وهو كلساع وبايس ايدي ويدعيلي بدعوات ترد الروح كملت اله واخذتة للحمام خيلتة على الكرسي وهو يسبح من يكمل يصيح الي انطي الملابس من وراء الباب ومن يكمل ارجعة لفراشة لان شلل بس برجلي ايدي الحمدلله زينات شفت اكو ملابس هواي وصخات دخلت لغرفة امي متمددة ونايمة ومخلية الشغل براسي لا وليقهر تگلي لافايدة ولاعايدة من اهمداني ي والله كملت جمع الملابس ورحت جبت موبايلي الي مابي روح مثلي الجامة گوة تنشاف مكسورة مثل گلبي شغلت قران بصوت سعد الغامدي وخليت الطشت بالطرمة وجبت تخته وبديت اغسل واردد ويا طلع شامل يهز بيدة
شامل:- الديانة تنگط لميهن بالطشت خل نبيعها ونستفاد
_دمك خفيف حيل ابو البطالة
شامل:- وحك هل قرآن الي تسمعي هسه اذا ما صميتي حلگج اجي اعبي قنادر
سكتت راح للحمامات يغسل اني عدلت شالي الي ماانزعة حتى بالبيت من عيونه النگسة رجع طلع والخاولي على كتافة
شامل:- گومي سويلي سم
_ان شاءالله بس اكمل
شامل:- لاگومي هسه جوعان
استغفرت ربي وكسرت الشر گمت جبت اله ريوك وحطيته شلت الملابس وشريتهن بنفس الطرمة مشدشدين حبال علگت عليهن الملابس صارت عبالك نشرات هههه ندگ الباب ردت اروح افتحة
شامل:- ويييين اني رايح
هزيت ايدي عشتو حاميها حراميها من همدا حضي يي والله من شفت دخلت حنين رحت الها اركض واني اتبسم
شامل:- شلون ثنين وحدة عرجة والثانية وجها يطرد النعمة
عافنه ودخل وحنين تجمعن الدموع بعيونها
_اسفة حنين بس انتِ تعرفي شنو من مله
حنين:- ولايهمج گلبي امشي خل ندخل
دخلنا جوة بغرفتي نسولف وراها فتحت علاگه
حنين:- شوفي شجبت الج
طلعت منها عباية جديدة ونقاب
_عفيه عليج والله
حنين:- يي والله گوة لگيت نفس الي تريدي
_المهم لگيتي گلبي شكد حسابها
حنين:-نچبي مابيناتنا
شمرتها بحضنها
_هاچ لعد ماريدها
حنين:-اهوو يالله ب50
_خوش
گمت طلعت الها من الي مجمعتها من مصروفي نطيتها الها وگعدت اصفن بدنياي
اجت يمي لزمت ايدي
حنين:- شبيج تسنيم
شهگت ونلت دموعي
_ رونق تگلي العانس
من صدك ضحكت كل عقلي صرت اضحك وابچي مثل المسودنه
_هههههه منين جبيتي هل سالفة
حنين:- من شيب ابوي دضحكي ياخيه شو الدنيا خلصانة وعلى طاري العنوسة جبتلج عريس
عقد حاجبي واني بعدني مچلبة بيه الضحكة
_عزاا عريس ايش ولچ
حنين:- شوفي صديق زوجي خوش ولد ارمل عمرة 45 وعندة 3 جهال ها تريدي؟؟
_خايبه گومي أريده شنو نستلة هي واريدها طايحة الحظ
حنين:- يا شحجيت ولج
_حجاياتج عوجات مثلج
حنين:- هسه تريدي لو لا
حنين:- وجعة جدي ي والله لعد تضلين مدمغة وجاك الواوي جاك الذيب
_ماريد ياخيه خليني هيج اشيل حالي من الفضى للضيق شبيه مسودنة
حنين:- يافضى التحجين عنه خيه بس بكيفج لعد اني اگوم
_يا وين رايحة
حنين:- هسه يجي الرجال يريد غدة عود هم مريلي حتى نروح سوى للروضة ان شاء الله بس جيت جبت الج الغراض
_ان شاء الله ماگصرتي خيه ارجع واگول الحياة بدون صديقات مثل الطرمة بلاية شحاطات
حنين:- ايا شحاطة امداج يي والله
ضحكنا ثنيناتنا وصلتها للباب
حنين:- يالله مع السلامة
_ها بشرر
يحجي باريحية ومسيطر گلت هاي هيه ميه
سراج:- لا الحمدلله اسألة سهله وجاوبت بعون الله 54 واذا حيل گصبوني بالدرجات 50 انجح افررحي بالدكتوور سراج
شلحت نعالي وطرت ورا وهو راح يركض للغرفة وقفل لباب
رجعت للغرفة فحطانة من التعب شفت العباية والنقاب جديدات يخبلن شفت الساعة ب11 غسلت لتمن ونگعتة وطفيت على التبسي ورحت دگيت لباب على امي حتى تگعدت فتحتلي لباب
ام شامل:- ها شتردين
_ ضل بس التمن عود طبگي راح ابدل واروح للدوام
ام شامل:-خوش اگلج ليوم تستلمين راتب مو؟
هزيت الها راسي
ام شامل:-خوش اختج محتاجة ملابس جديدات
_ ييي انا اكرف ورونق تلبس وتكشخ لاحمدا ولاشكوراً
كفختني على راسي
ام شامل:-دماغ سز قابل منطيتها للغريب اختج هاي
_يي خوش
عفها ودخلت للغرفة قفلت لباب للأمان ولبست العباية وفوگاها النقاب وفتحت الباب وطلعت تلگتني كانت بباب المطبخ گبل اجت وعينها على ملابسي
ام شامل:-مشترية عباة جديدةّ
_يي عندج مانع
حجت بتمسكن ومتدري شتسوي ساعة تبتسم ساعة تخزر
ام شامل:-لا بس خلي الفلس نحتاجة اختج مدرسة وابوج علاجات لاتفسفسينها هنا وهنا
ضحكت بداخلي على كلامها الي يسمعها يصدگ بس شسوي تضل امي قابل اغلط عليها حرام عاد ماحصلت الدنيا احصل الاخرة گتلها
_ عود على الجايات
عفتها وركبت سيارة همام الله يرحمه هي صح اوبل وتعبانة كلش مگلوبة ومطعجة بس شايلتني عن الگاع طلعتها ورجعت سديت الباب ورحت لبيت حنين دگيت الها هورن طلع الي زوجها
ببتسامة
مهيمن:- هلا والله خوية
مهيمن:-جاي تبدل ثواني وتجي
دخل وشوي وطلعت هي وجبتها اناقتها الي تجنن ركبت يمي تدردم
حنين:-كل هل كشخة ونركب اوبل خرب حضنا ي والله
باوعت الها صفح
_الاوبل الي مو عاجبتج مخلصتنا من التكاسي ومذلتها عبالك نجدي منهم
حنين:-بهاي حقچ والله
وصلنا للروضة الاهلية هم دوامهم شفتين صباحي ومسائي قبل موت همام كنت ماخذة شفتين علمود الم فلوس علاجة بس هسه بطلت المن اتعب اذا الغالي وراح كملت دوام وهوسة الاطفال الي تسطر الراس وستلمت الراتب 200 الف وطلعنا وصلت حنين للبيت ورحت للصيدلية شافني عبد
واجا يركض
عبد:- هلا والله هلا بالگاطعة
_هلا خوية شلونك شخبارك
عبد:- شلون حالي الحمدلله على كل حال
نزلت دمعتي اخ ياهمام اخ ياكسرة ضهري
حجة بحسرة وقهر
عبد:- كلشي كنت متوقع منه الا ان ينتحر لچ همام مايفووت فرض ومگضيها ويستغفر ينتحر والله مامصدگ
زفر نفس وفرك وجهه
عبد:- الله يرحمه ويغفر اله شجابج محتاجة شي
حجيت واني العبرة خانگتني
_ لا والله بس حبيت امر اسلم لان اشوف بيك همام
بتسم ومسح عيونة الي غورگن بالدموع
عبد:-امانة الله شتحتاجين اني بضهرج اخوج انا
_والنعم منك ماتقصر يالله اترخص تاخرت على البيت
النداريت حتى ارجع واسمع صياح شامل واجى يركض
شامل:- شعندچ واكفه ويه هذاااا هااا سگططط
لزمه عبد من ياخته
عبد:- احترم نفسك لك لا اسگطك
هو حجة هيج وشامل هفه ببوكس وتلازموا واحد يضرب بالثاني واني واگفة اصيح بشامل الي مثل الثور الهايچ فاككتهم العالم واجى جرني من ايدي ركبني وركب يسوق ويغلط ويفشر
شامل:-يميي تستشرف ويم العالم بايعتها
حجة هيج لو تخبلت صرت اصيح وابچي
_مو كلها مثل نضرتك يانگسسس
ماحسيت الا على كفخة رگعت راسي بالجامة صارت الضربة على خشمي الي صار ينزف
شامل:-اني الج ادبسزز اليوم محد يخلصج من ايدي
وصل ونزل فتح الباب ونزلني شحط واني اصرخ بي تولاني دگ رفسات وكتل اريد بس يعوفني
_ولك عووفني نذل وخرر ياحقيررر الله لايوفقك وخرر اخ يمه هماام وينك
كانت اخر كلمة نطقتها وبعدها مادري شلون وشصار غمضت عيني وستسلمت بلكي الله الموت اجاني بس للأسف فتحت عيني لگيت نفسي بالمستشفى وحنين وسراج يمي
تبجي وتحجي
حنين:-الحمدلله على السلامة
_الله يسلمج. بس شصار
مسحت دموعها وعدلت گعدتها
حنين:-ولج سمعت صراخ واجيتكم اركض اني ومهيمن لگينة شامل الكلب يضرب بيج وانت فاقدة وابوچ سودة بوجهي واگع من الكرسي ويصرخ ومحد مهتم اله اجى مهيمن لزم شامل ووخرة عنچ وانتِ منتهيه الدم ينزف من خشمج وحلگج جبناچ للمستشفى لحد قبل ساعة اجى سراج رفعت نضري اله كان حلگة بي دم ويمه زراگ
_سراج
تقرب الي يمسح بعيونه ودنگ على راسي يبوس بي نزلت دموعي من حنيته
سراج:-يبعد حيله السراج والله اخذت حگچ ضربته وكسرت بطالتة الي ضاممهن بالسطح
رفعت ايدي الي بيها الكانولا وخليتها على مكان الرح عفس وجهه متألم
_لاسراج لا ليش هيج سويت هسه يشد وياك
سراج:-خل يطيير عوفينا منه انت شلونج هسه
_الحمدلله ابوي منو يمه
سراج:- من رجعت للبيت شفته بفراشة گبل عاط بيه الحك اختك بالمستشفى
_اريد اطلع عفيه هسه باله يمي
هزت راسه وطلع شوي واجى
سراج:-هسه يجي الدكتور يشوفج بعدين نطلع
اجى الدكتور وتطمن علي وكتبلي خروج ورجعت للبيت ويه مهيمن وحنين وسراج حاضنيني كل وحد من جهه امسح دموعي وترجع تنزل وحنين تبچي على بچيي وصلنا للبيت نزلوني ورجعو لبيتهم ودخلت مابيهم واحد تلگلاني عبالك بيه جرب دخلت گبل للهول لمكان ابوية هو شافني هو دموعة گامت تجري
ابو شامل:- سامحيني يابه ماگدرت احميچ الله ياخذني
گرفصت وخليت راسي بحضنة وابچي وهو يمسح على راسي بهدوء ضليت على هل حالة الى ان دخلت رونق وبدت ترش بسمها
رونق:- هااا يالعايبة ام الزلم
بعدها ماكملت وهجم عليها سراج
سراج:-لج دماااغ سززز السانچ گضي لو اگصه والقران
كمت اركض رغم الم جسمي افكها من عندة
_سراج عوفها ايدك
دفعها برى الهول
سراج:-امشي ولي وجري عدل لو اجنزج
حجى ابوي باسف
ابو شامل:- دخيلك ربي على هل خلفة والله مامسوي شي جواك شو امي وابوي وبريت بيهم
وطلعت وهي تدردم ماتتوب فد يوم يخلص عليها سراج سندت نفسي و گمت رغم الدوخة بس رحت لغرفتي بدلت وصارت عيني على المراية خشمي ازرگ مورم وشفايفي مشككة وميبس الدم بيها ههه عايزني اني تمددت بمكاني ونمت فزيت على وجع خشمي والجوع كاتلني حسبي الله ونعم الوكيل بيك ياشامل عساك لاتهنيت گمت طلعت اريد اروح للمطبخ نتبهت على الدرج سراج يقرأ بس مامبين نهاية الدرج ويمه ضوى جداحة يضوي بي مانتبهلي كملت طريقي وفتحت الثلاجة ميتة جوع طلعت خيار وجبن خليت الجاي على النار وگفت اگطع بالخيار گلت اسوي اله لفه وياي حسيت بايد تخلت على خصري شهگت وبسرعة لتافيت تخلت ايدة القذرة على حلگي وقيد حركتي صرت ادفر بي مابالي شي غير سرااج راح نتفضح راح يذبحة والله
