رواية سر خلف النقاب الفصل الثاني 2 بقلم هدوء آل محمد
نحن لا نموت حين نفقد من نحب،
فقط نكمل الحياة بقلب ميت" .
لـ هيلين كلير
_______________________
صرت ادفر بي اريد يفك حلگي بالگوة رفعتها مافكرت بنفسي گد مافكرت بسراج ااذا شافة شبسوي بي نطقت بصعوبة وحيل مهدود
_سراج على الدرج عوفني يرحم اهلك ليشوفك ويذبحك
ماصدگني تراجع وراح لباب لمطبخ شاف سراج نزل الدرج واجى بالتجاه المطبخ يبس الدم بجسمي راح يذبحة والله صخام لصخمني تجاهل شامل واجى يمي
سراج:-شبيج تسنيم بيج شي؟؟ شيريد منج هذا ضوجج مو
شامل:-احترم نفسك اخوك اكبر منك
سراج:-ولي من يمي لو اجرك بعفطة اخليك دربك ماتندلة نوب سكران هو انت صاحي محد متحملك
دفعة وطلعة من المطبخ واجى يمي يبتسم
سراج:- شجاي تسوين
باوعت عليه بنفس ابتسامتة
_جوعانة تاكل وياي؟
هز رأسه حطيت الصينية بالكاع وكعدنا ناكل بهدوء وهو ساكت وترني خايفة لاسمع شي هذا نفس طبع همام تربى على ايدي شافني اباوع عليه بنضرات ماعرفت افسرها
سراج:-مضيعه شي بوجهي
رتبكت وحاولت اغير السالفة
_ها لا شسمه حفطت لو لا
اخذلة شفطة من الجاي وجاوبني
سراج:- عربي فهم مو حفظ
هزيت ايدي باستهزاء
_عاد انت شلونك بالفهم
ضحك ونفض تراكسودة الي تمصخ قطع ناعمة من الخبز
سراج:-لاتجي الخمسين اطمني
_هنيالي والله اهلهل واطش جوكليت بهل تايرات
سراج:- دسكتي سكتي انتِ وجهج مزورك بيج حيل تجادلين
لزمت وجهي ذكرني بالوجع عبالك كنت ناسيته او اتناسه
_الله وكيلك بس لسان كلشي بيه عطلان
ضحك رجع ترس كوب الشاي واخذة وكام گعد بباب المطبخ طلع من جيبة باكيت جكاير شهكت ورحت يمه مصدومة
_سراج تدخن!!
باوعلي وسكت خلاني اتخبل نترت بي بعصبية
_جااوبني سراج
سراج:-لا جاي اشرب بس جاي هسه شفتي بيدي جكارة اريد احارب بيها لو اشربها شهل سؤال الجايف
ضربت على رجلي
_ولساان هم ولك من اييييمت صخام بعدك بگد الحمصاية وتدن
باوعلي وعيونة نملت دموع
سراج:- مو من هواي ماضلي رفيج غيرها من راح همام بديت ادخن
ذبها بالكاع داس عليها وحجه بدون لايباوع بوجهي
سراج:-كملي على السريع وروحي نامي يالله خييتي انا انتضرج على الدرج
عافني وراح گعد على الدرج مقابيل المطبخ كملت على السريع ورحت للغرفة فتحت البردة شفته بعدة گاعد على الدرج وصافن شوكت كبرت سراج ليش دوم احس بعيونك حزن وكلام متگدر تحچي شنو ضامم عني سديت لبردة وتمددت وبالي يجيب ويودي غفيت وماكعدت الا على صوت سراج يدگ بالباب
سراج:-تسنيم كومي خوية صارت الساعة ب10
فزيت اركض عزا ياعشرة وابوي منو سوى اله ريوك فتحت الباب اني وكوشتي وبجامتي الي طالعة من جوى الدشداشة عبالك چنت بمعركة
_ تحجي صدك لو تشاقة
يحجي ولازم ضحكتة من شكلي
سراج:- صدك خوية اني ماخليت احد يگعدج وابوي اني ريگته وغسلت اله بس شبيج عبالك طالعة من حرب هاي عود انت المثقفة هيج شكلج
فركت عيوني ولايمت شعري خليتة ورى اذني اسبط بي
_ النومة مابيها ثقافة ميتين الله وكيلك المهم لتغلس شلون امتحانك شصخمت بي
سراج:- تجي الخمسين
هزيت ايدي
_نعمة كريم
يركصلي بحواجبة ويضحك
سراج:-هههه مو بالله عليش الطمع القناعة كنز
سديت الباب بوجهة واسمعة يصيح
سراج:- عاد احترمي شوي ام عطوب المثقفة
ضحكت ورجعت لميت فراشي غرفتي بوحدها كانت غرفة همام بس بعد ماراح صرت انام بيها حتى احس بالامان كملت تعزيل لفراش ولفيت حجابي وطلعت غسلت ورحت للمطبخ
كانت امي تطبخ وتدردم من شافتني شمرت الخاشوگة واجتي
ام شامل:- نايمه للضهاري متگولين هاي نكسر ضهرها
تخطيتها وفتحت الثلاجة طلعت زعتر وخطيت زيت وصبيت الجاي وهو بارد وگعدت بالكاع سحبت نجانة الخبز وطلعتلي گرصة بديت اكل وهي صافنة عليه منضره مني جواب حجيت
_وانت متگولين هاي مكتولة ومسحولة مابيها توگف على رجليها؟ لو انا مو بشر حمار لا احس ولااتوجع ولا انقهر
صدت تخوط بالجدر تتلافى تخلي عينها بعيني
ام شامل:- محد گال الج روحي لعبد تدرين باخوج مايطيق يشوف وجهه
شربت جاي وضحكت بستهزاء
_ليش شامل يطيق منو غير سعيد المدگدگ سبحان الله جدر ولگى غطاة
ام شامل:-لسانج گصري لتغلطين على اخوج لو اطيح حضج
_ الله كريم شسويتي غداء؟
ام شامل:-تشريب دجاج
_ خوش ابوي وين
ام شامل:- بالديوانية على الاخبار وكافي إسئلة غسلي لمواعين وكملي شغل ماطول ماكو دوام ليوم
نهبط گلبي خفت بس لابطلوني والله اديح
_ ليش ماكو دوام؟
خلت ايد على ايد
ام شامل:- سراج اخذ الج اجازة هذا هم صاير يتصرف بكيفه لاصداد ولارداد
_ ههههه يي راح الي كان صگاركم
بهت لون وجها ودوم هيه هيج تخاف من همام لهل درجة وحتى هو ميت صاگركم ابن ضرتج مو ابن عدوتج بس اخخ منج اخ ماتت امة وضل تحت رحمتج
ام شامل:- راح ومات لتضلين كلساع جايبه سيرته
وطلعت من المطبخ وكملت شغل وانا افكر ليش هل كره ولخوف؟؟ همام ليش مات بهل طريقة ؟ فلوس الي جمعتهن وين راحت؟ كملت وانا راسي طبل ورحت طمئنيت على ابوية شوي وجتي رونق وصبيت الغدا وحطيته بالهول يم ابوي على الطبلة واحنا بالگاع ناكل بهدوء فجأة نطق شامل
شامل:- سعيد صاحبي متقدم لتسنيم واني نطيتها
طكها سراج بضحكة استهزاء
سراج:- ههههههاي لاهاي هي چانت عايزها بس سعيد ابو لوصخ
اني شهگت وابوي شمر الخاشوگة وحجة بصياح
ابو شامل:- بعدني مامتت حتى تقرر مصير اختك بكيفك تماديت حيل شامللل
شامل:- حشاك يابه بس
ابو شامل:-اشششش ولا نفس نوب عليه سعيد ابو البطالة
شامل:-اذا هيه سبعه تخلي يتوب
ابو شامل:- جان تبت انت عبالك ماعرف بيك تجي بتوالي اليل تطوطح
شامل:- بس اني نطيت كلمة
سراج:- يي حقك تنطي كلمة لان مداين منه 15 مليون وطاح حضك وانت شكتلة كتله انطيك اختي وانسى الفلوس لا عبالك مادري شجاي تسوي وحگ رب الكعبة ياشامل ان ماجزت من هل دروب انسى انك اخوي الچبير وافصم ضهرك
تغير لون وجه شامل ونا خنجر ونبت بنص كلبي لهل درجة رخيصه يسد دينة بيه لهل درجة وصلت المواصيل ولو هو شترجه من واحد يريد يتعدى على عرضه والي زاد كسرتي كلام امي
ام شامل:- عليششش واگف بطريقها خل تزوجج عمرها 33 منو بعد يگلبهااا وبعدين شبي سعيد شو شاب واخلاق
سراج:- سدوو السالفة وهل ساقط لو عتب باب لبيت اكسر رجلة وانتِ يمه عيب وخزي عليج تحجين هيج شنو متوذين منها حتى نذبها هل ذبة محد شايل لبيت غيرها هاي جزاء الاحسان سنين وايدها بحلوكنا وجيبي يتسنيم ومحتاجين يتسنيم
ابو شامل:-اعووفك من هذا كله بويه امك تكول سعيد عندة خلااااااق؟؟؟؟؟ منيله اخلاق هل مدگدك مليان وشم انت شايفته ولج تسنيم ارجل منه والله ولك ماستحيت من تفك دينك باختك وعرضك ياسگط بس شترجى منك ترباية خوالك العرگچية
هنا امي تسودنت سب الاسرة الملكية وماندري
ام شامل:-يبووووي تعالو سمعووو شوفو منو يحجي على اهلي ابن ابو اللبلبي
ابو شامل:-لبلبي بشرف ولا ملايين بالحرام وفهمج كفاية
رونق:-اهووووو وتاالي يومية مشكلة من ورا تسنيم زوجوهااا وخلصونا منهااا
سراج:- خو تزوجي انت بدالها اخذي اذا عاجبج
رونق:-ويييع اني اخذ هذا شناقصني
سراج:-لعد نچبي وترسي حلگج حصو لو اترسه بالي برجلي
گام شامل وبدى يصرخ
شامل:- حجيكم لايقدم ولاياخر اني نطيت كلمة واليوم العصرر يجووووون وابن امة الي يفككك حلگة وييييكول لا
هنا بابا وسراج تخبلوا هجم علي سراج ولزگة ببوكس ونام فوكا يضرب بي بابا راد يگوم نسه نفسة على الكرسي سودة عليه ووگع بالكاع ركضت علي
ابو شامل:- بعد ايدي يابوية ادبه لهل سگط من انعل ابوووو الوكت اليي يخلي هتلييي مثلك يتطاول عليه امشششي اطلع برة امشششي ابن الكللللب الله لايررضى عليك طلعة من لبييت سراج طلعة
صار وجه ابوي احمر يگح ويحجي تخبلت صرت ابچي واعيط حاضنته وهو يشاگف يريد بس يوصل يم شامل
_كااافي فدوووة يابااا كافي لايصير بيك شي
ابوشامل:- وخررري خل اربيييي وخررري
شامل:- ربيييي بنتككك اني مررربى ياباااا لاتغللللط لاتخليني افتح دفاااتر قديمة واطلع المضمووم
ام شامل:-يبوووووو تذابحوووو من وراج يالعانس
رونق:- الله ياااااخذج ان شاءالله دومج ممرمرتنا
امي تدفع بشامل تطلعة من المكان ماكو ثواني هي ثواني وتكوم بابا ماهمني كل كلامهم صرت اصرخ والطم يااابا صخااام بوجهي اجى سراج
سراج :- ياياااا شجااك يابا
اضرب بخد ابوي واصرخ على شامل
_كله بسببك الله لايوفقك والله اذا صار بابوي شي اذبحك بيدي والله
بعز الهوسة عاف ابوي واجى سحلني من شعري
شامل:-عليييمن تدعيين بنت اكللببب اليوووم انعل والديييج
سحبني من شعري حسيت شعري كله صار بين ايديه ماهمني هو يضرب واني اصرخ
_شامل فدووه ابوي شااامل
بس هو فاقد ولايسمع يضرب بكل قسووة عبالك مو اخته عبالك عدوه گدامة ماعافني الا صار الدم ينزف من حلگي امي توخر بي ورونق تصيح
رونق:- ولك كااافي امششي شوووف ابوةي شجاااك تخبلت
ام شامل:-الله يااااخذكم ويخلصني منكم ولكك امشييي شوف ابوووك راح يموووت امشيييي
سراج طالع برى يركض يشوف سيارة لان ثنينهم مايعرفون يسوقون طلعو يركضون واني گمت ازحف وصلت للطرمة احس جسمي يصل عليه من الالم حسبي الله عليك ياشامل كان باب الشارع مفتوح شفت مهيمن ابن جيرانا دخل لا موو وقته والله مو وقته هو شافني وتسعت عيونه من الصدمة طلع شامل وسراج شايلين ابوي
راح اله يركض
مهيمن:- خير خير شبي الحجي
سراج:- متخربط فدوة سيارتك بره خل ننقله للمستشفى
برتباك
مهيمن:- اي اي يالله
رمقني بنضرة وطلع ورة شامل وسراج وامي هم راحت وياهم رونق سدت الباب وجتي عبالي راحي تعيني وتگومني تالي غمتني وراحت للغرفة كسرة ورى كسرة حاولت اعين نفسي اريد اگوم مابيه حيل رفعت راسي للسماء ياااارب دخيلك ابوي رايدته منك لاتشوفني بي مكروه مالي غيره بهل دنيا زحفت ورجعت للغرفة بقيت ابچي اخخ منچ يادنيا مدري شقد مر وقت ندگ الباب اريد اگوم ادحگ على جسمي يرجف والله احس كل شبر بجسمي يصل عليه قهر ووجع وخوفي على ابوي كلها لتمن عليه شوي ودخلت حنين شهگت من شافتني
حنين:- عزاااااا منو مسوي بيج هيج
حجيت من بين دموعي والرجفة واضحة عليه
_بس عينيني اريد اگوم اغسل
حنين:- اي اي يالله
اجتي سندتني منين ماتلزمني اون كسر بأيدك ياشامل غسلت وكملت نتبهت على ورونق شايلة ماعونها وتاكل بباب المطبخ ولا مهتمة حنين تدردم وتتحسب عبرنا من يمها گوة ارجف وجع وخوف رغم الدنيا حارة حنين شافت رونق هيج وين تگدر تسكت من حرگت گلبها حچت
حنين:- ناس ترجف ورونق تعلف
شهد:- ييي غير صاحبتج سوت علينا الاكل سم وزقنبوت تتعزز على العريس عشتو هي منو مگلبها العانس
حنين:- ايي اخذي انتِ هي متريدة
تأشر على نفسها بغرور
رونق:- هي هاي العايزة انيييي رونق اخذذ سعيد
حنين:- ييي مو تگولين على تنسيم تتعزز صيري احسن منها وخذي
رونق بعد ماتدري شتجاوب شمرت الماعون على السنگ وطلعت لغرفتها تدبچ تدبچ بالكاع
حنين:- ديري بااالج يمعودة لاينكسرر الكاشي هو ملزك گوة
دغيتها اريدها تسكت ونزلت دموعي
_اسكتي يمعودة مابيه حيل اريد بس اسمع خبر عن ابوي گلبي نار
حنين:- امشي بالغرفة هسه اخابر على مهيمن هو اخذهم
_سكتي حنين رجلج شافني واني مكتولة بلاحجاب شكد عيب
ابتسمت بقهر وخلت ايدها على خدي
حنين:- لاتضوجين مهيمن حيل يحبج ويعتبرج اخته لتفكرين بشي
هزيت راسي وهي اتصلت وماكو
_هااا
حنين:- ماكو ميجاوب
_خاف صار بيهم شي
حنين:- لا اسم الله ان شاء الله ماكو شي
بقيت گاعدة والووب حسبه توديني وحسبة تجيبني ياربي دخيلك الطف بحالي محد مصبرني على الظيم الي اني بي غيره يمر الوقت ببطئ حنين رجعت لان جهالها وحدهم ويه جديتهم وانا بقيت وحدي الوب اتصل بسراج ماكو للمغرب وسمعت صرخت رونق طلعت الركض حسيت الحيل كله صار بيه اريد بس اوصل الغرفة ماوصلت الا خلصانة روحي فتحت الباب شفتها گاعدة بالگاع ودموعها تجري وتضرب على خدها تقربت يمها احاول اكذب حالي لا ان شاء الله ماكو شي لا لا مستحيل گوة طلعت مني كلمة
_ ش شكو شبيج شبيج تبجين شصاير رونق
رفعت نضرها الي ودموعها تجري مصدومة وتهز براسها
شهد:- ما ماات راح تنسيم راح بدون لايرضى عليه
رتخى جسمي وگعدت مقابيلها احاول اكذب الخبر صرت اهز بيها واحجي
_من منو ش شبيج رونق منو مات
صرخت بوجعي وتلطم
رونق:- ابوية ابوية راح تنسيم راح بدون لا اراضي راح زعلان مني يسامحني مو هو يحبني موو تسنيم حبابة مو
تهز بيه تريد اجاوب واني مثل الي نضربت براسها فقدت اهز براسي انفي كلامها ماصدكت لا مستحيل يعوفني هو يگول الي ماخليج شلون يروح لا لا چذب اكو شي غلط عفتها وطلعت مادري شنو اسوي كلبي معصور وعقلي رافض يصدگ سحبت عباتي والنقاب دوم اخليها ورى الباب ولبستها بدون تركيز رحبت السيارة و طلعت امشي مادري وين اريد اروح احس عقلي وگف مابي غير كلام شهد شنو مات يعني بعد ماسمع صوته من يصيح نسومة بعد ماشوف ضحكتة مواساته الي كلها راحت امشي سريع بالشارع والدموع متجمدة بعيني حسيت هورن وراي صار لارديت ولادرت بال امشي وتايها
سلام :- لج تسنيم اوكفي تسنيم
بغلطة مني انداريت حتى اشوف نسيت اني جاي اسوق وراها سمعت شي نضرب بالسيارة وصرخة رجال مصدوم
مشعان:- بويه غدير صارر بيج شي
بخوف وصدمة
غدير:-لابابا بس ايدي نشكت شوي
من سمعت صوت معناها مابيها شي فتحت عيني ونزلت ارجف كانت بنت يطلع عمرها 14 سنة شكلها ابد مو مريح لبسها حصر على جسمها رغم صغر سنها بس شعرها والمكياج ووياها ابوها مدري شيصيرلها كرشه متر وسكسوكتة اثخن من جذيلة شعري واسمر وعيونه كبار شكله يخوف مادري ليش نطبع ببالي حجيت برجفة
_عمو عمو مو قصدي والله
خزرني بعيونة الي عبالك طشت
مشعان:-بويه ياهو الي حط بيدج سيارة انعل ابيه
شهگت ابچي وأخيراً نزلن دموعي ماعرف صدمة لو خوف من هل رجال شنو بس صرت اشهگ من كل گلبي ماكنت ادري ان هل بكاء هو اشارة من ربي على الي راح يصير الي بالايام الجاية صرت ارجف خوف منه ونقبض گلبي
_ عمو ابوية گالو ابوية مات ورايحة اله مانتبهت والله
شكلة نكسر خاطرة عليه باوع لعيوني بنضرات شفقة وعصبية واخذ بنته وراح ركب سيارتة العالية رجعت لسيارتي ردت اركب حسيت بعته قوية من ايدي
سلام:-لچ بنت الكلللب صار ساعة اصيح نوب ردتي تدعمين بنت مشعان الوحيدة چان نثبرنا ودحنا
صرت ابچي واناشغ
_ عمو ابويه الله يخليك بس اروح اشوفة
فتح الباب وشمرني عمي سلام الي بس بالاسم عم اكبر حقير دمر شامل هو وابنه خلو سكير يصيح ويحجي واني ماجاي اسمع مادري شصار لطمت
_اريد ابوي
سلام:- انعل ابوچ لابو الجابج نگبر ابوچ فطس من وراج انتِ واخوانج الادبسسزية شعنددددج طالعة بنت الكلب
صفگني راشدي نرگع راسي بباب الجامة لا گال خطية هاي مشاعر بنت فاقدة اب ولا هتم كل همه شعندي طالعة وحدي رجع راد يسب صرخت بي بدون وعي
_شششششششششش كافيييي لاتسب لاتسسسب
صرت اصرخ والطم منهارة
رجعني للبيت نزلني غصب وانا مفرفحة واگمز اتوسل بي بس لاحياة لمن تنادي
_اروح الك فدوة عمو بس اشوفة
سلام:-طبي جوة لچ دماغ سز هسه يجيبو عود شوفي وين الله وندفنكم ثنينكم ونخلص
دخلت للبيت أجر اذيال دخلت البيت مليان نسوان خوالي وعماتي ونسوان اعمامي والبنات هوسة شوكت اجوي مادري كلهم موجودين بس احس روحي وحيدة في زحام الناس ادور بالوجوه عن من يحتضني بهاي الساعات كرهت حياتي كرهت الماضي والمستقبل حسيت بضياع والدنيا ظلام والكل لابس اسود اجت حنين من بينهم لمتني بحضنها تبچي تواسيني ماكو كلام يواسي البنت بلا ابوها وردة ذبلانة طير بدون جناح الكل يبجي حتى الي يكرهوه شهل تمثيل شهل نفاق عفتهم ودخلت لغرفته تمددت بفراشة انوح وابچي متجاهلة وجود حنين
حاجتني والعبرة ببلعومها
حنين:-تسنيم گلبي لتسوين هيج ابچي اصرخي لاتكتمين موزين عليج
مارديت دفنت راسي بالمخدة اشم بيها والدموع تجري ضليت على هل حال اسمع صوتهم برى بس مالي حيل اجامل اسمع سماعة الجامع ورها صاح
بسم الله الرحمن الرحيم
(كُلُّ مَنْ عَلَيْهَا فَانٍ وَيَبْقَى وَجْهُ رَبِّكَ ذُو الْجَلالِ وَالإكْرَامِ)
انتقل الى رحمة الله تعالى المرحوم (جمعة والد الشاب المرحوم همام) وستكون الصلاة عليه في الساعة ال9:00مساءً وانا لله وانا اليه راجعون
عج البيت بالصراخ وروحي تصرخ صرت الطم مابلساني غير لكلمة
_ولكم وين رحتو وعفتووني ولكم كسرتو ضهرري دخيللك يالله دخيلك ياااربي الصبر منك ياصحب الصبر
قيدت حركتي حنين وهي حالها مو احسن من حالي ثنينا يتامه ونحتاج من يواسينا
حنين:- ولج لتسوين بنفسج هيج حرام عليج
روحي مفرفحة مثل الطير المذبوح على النص اضرب على رجلي واتحرك بعشوائية اريد شي يطفي ناري الي شتعلت
_ليش مو حرام الي جاي يصير بيه لج ماصار اربع شهور من دفنت واحد من جناحاتي واليوم ادفن الثاني لج حنين نكسر ضهرري خيه وتكصكصن جنحاني لج السواد لسه ماذبيته من همام دخيلك ربي اللهي مااسألك رد القضاء لكن اسالك تلطف بحالي وتبرد گلبي
حنين:- شبيدي عليج خيه امر الله هذا گومي يبعد حيلي گومي بدلي وغسلي واكعدي بفاتحة ابوج ترا الناس ماترحم
سحبت ايدي منها
_مالي حيل والله
حنين:-ميخالف خيه گومي وانا وياج
بعد ملحه منها گمت مستندة عليها طلعت من الغرفة رحت لغرفتي لبست ثوب اسود غير الي كنت لابسته ولفيت شالي وشديت النقاب وطلعت هستوني كعدت حجت مرت عمي
_عيني تسنيم وين گعدتي گومي بالمطبخ سوي عشاء هسه العالم تبدي تجينا
ردت احچي بس حنين حجت
حنين:- خاله متشوفيها بيا حال؟ الناس جايين يعزون لو ياكلون؟
ردت عليها عمتي
_وشدعوة عليج عيني شحجت المرة شو صايرتلها محامي دفاع غير عزاء ابوها وتخدم بي
حنين:- قبل لايصير ابوها هو اخوج گومي انتِ بدالها
عوجت حلگها وصدت بصفحة وانا حيلي رايح لاالي خلك احجي ولابيه حيل اجادل بس دموعي تجري على الي راحو وخلوني راحم وتركوا بداخلي فراغ البيت بدونهم مثل الارض الي صارلها سنين ماشافت مي فقدان الاب وفقدان الاخ مثل فقدان جزء من الجسد ووجع الفقد مثل السكين البارد الي يخترق الروح والذكريات اكثر شي يوجع بكل زاوية اكو ذكرى لاأكدر انساهم ولاأكدر أرجع الماضي كان موتهم دلالة على ان الشمس راح تغيب من حياة تسنيم ويحل محلها الظلام بدون ضوء القمر ولانجوم فقط ظلام صار صوت برى اجوي الجهال يركضون ويصيحون أجوي گمت اركض وگفت مسافة عن الباب نزلوا التابوت من السيارة وانا صرت اصرخ ولطم
_يايابه يابوووي المن عفتني يابه المن خليتني مو كنت تگول ماعوفج ليش يابا ليشش
حنين ومرت خالي مچلبين بيه وانا اريدهم بس يفكوني فوگ خنگه الدنيا هاي لازميني ويصرخون على صراخي دخلو التابوت مهيمن وسراج وشامل وعمي سلام والكل يردد
لا اله الا الله محمد رسول الله
لا اله الا الله محمد رسول الله
هم يرددون وانا صريخي يهد جبال فرفحت بين ايديهم اريد بس يهدوني ماسمعوا مني الى أن سراج صاح بيهم من بين دموعه
سراج:-عوفوها ماتشوفها مفرفحة روحها
هدوني وانا طرت مثل لسجين الي اطلقوا صراحة رحت اركض واتعثر شمرت نفسي فوك التابوت احس عيوني تذب رمل مو دموع توجعني وكلشي بي يوجعني شهكت بغصة وشفايفي ترجف والكلمة تطلع مني بشهك ولك يابه منو إلي بعدك منو اليحتويني ويمسح على راسي منو يگولي جعل ايديچ ماتجوس النار ياربا رحت والنار حرگتني بفراگكم طلعت صرخه روح مني سلبت كل حيل عندي اصرخ والطم على وجهي حيل ولك يابه يا ضياعي من بعدك ياغربتي التمو علية وخروني كوة منه اجه سراج يمي وحجه بنبرة صوت مرتجفة
سراج:-كافي هيج اتأذين نفسج وتأذي گومي خل نشيلة
راد يرفعني رجعت شمرت نفسي واتوسل بي
_الله يخليك بس خليني اشبع منه
جبرني وشالني بالگوة واني على نفس البجي احس بلعومي مجرح وحبال تلتف عليه وتخنكني فرفحت روحي من اجت رونق تهمس يم التابوت وتبجي
رونق:-سامحني يابه سامحني اذيتك باخر فترة والله موقصدي ارضى عني يابه
رفعها شامل شالو التابوت وتعالت اصوات التكبير والصراخ
_ مودع بالله ياماي عيوني
سلم على الغالي
وسولفلة على حالي
مودعين بالله ياضوء عيوني
بدئت السيارة تمشي تفلفصت من بين ايديهم وطلعت اركض اجاني سراج يحاول يدخلني
سراج:-لج بابا فوتي منا العالم لخاطر الله
صرت اتوسل بي
_امانة الله سراج امانة اخذني وياك
من بعد عدة محاولات صرخ بالنسوان
سراج:-جبولي عبي ثنين يالله رونق امشي
حضنا كل وحدة من جهه شوي واجت مرت خالي شايلة عبي شمرها على كتافنا وركبنا بسيارة مهيمن راد يسد الباب بس شفت حنين اجتي تركض وركبت ويانا همست من بين دموعها
حنين:- ماگدر اعوفج وحدج
سندت راسي على كتفها ولزمت ايد رونق اما امي ماعرف عنها شي ولا شفتها وطول الطريق بس نشغاتنا تنسمع الدنيا ظلمة ساد الهدوء بسيارة صوت القرأن يجبرني على البچي والم الذكريات الي هاجمني وهد حيلي وصلنا للمقبرة ماخلونا ننزل بس الكبر كان قريب ينشاف من السيارة رفعت عيني على الكبر الي بصفة صورة همام هو وضحكتة وغمازتة ابچي على منو واخلي منو كسرتوني كسرة عمري رجعت عيني على گبر ابوي كانو سراج وشامل شالو ونزلوا بگبرة واحس روحي راحت على يا جتف انسند وابجي وعلى يا بشر اذب حملي حيلي باد وروحي احس تنساب مني شعور لا يوصف ولا تكدر الكلمات توصف هول الموقف ويه كل حفنة تراب تنشمر على قبرة احس بقساوة الحياة وياي واحس بل هضم والغربة فجأة شفت شي جبير نشمر على السيارة وصارت طبة حسيت بجسمي تشنج وفقدت السيطرة واسمع صراخ حنين ورونق وراها مادري شصار بيه.....
_________________________________
تتوقعون شصار؟ 
الى اللقاء في البارت القادم
