رواية الوصية الثلاثية الفصل الخامس 5 بقلم سهيلة محمد

حرفيا انا في ايام صعبة جدا تلك الأيام، بس ضغطت على. نفسي وكتبت البارت رغم انعدام الشغف، فانا متأكدة أنه مش حلو بالشكل الكافي فأتمنى اشوف ارائكم علشان لو كدة ممكن اضطر لحذفه واكتبه تاني فبجد ده اكتر بارت محتاجة رأيكم فيه، وتفاعل اخر بارت كان قمر واتمنى الاقيه في البارت ده وحرفيا كومنتاتكم هي الي دايما بتشجعني اكتبلكم بارت جديد....

_______________________________

دخلو إلى تلك الشركة وجاسر ينظر حوله بتعجب وهو يحاول أن يرى الموظفين من الداخل، بينما ياسر كان ينظر حوله بانبهار وهو يقول "يعني المبنى ده كله بتاع ابويا؟ ده اكبر من حارتنا وربنا"

نظرت له أروى وهي تقول "دي حارتك في الشركة دي متجيبش مكتب أقل موظف هنا" هنا وزاد غضب ياسر ليجد نفسه يقترب منها وهو يقول بنبرة جعلتها ترتبك "اقسم بالله لو سمعت نفسك ده تاني مش هقولك هعمل ايه، حارتي دي على الأقل علمتني الأدب"

تركها ورحل وهي تنظر في أثره بصدمة وغضب لتدمع أعينها بغضب وهي توجه حديثها لمنة "شوفتي قالي ايه؟؟ هو ازاي يكلمني كدة، هو قصدي أن انا معنديش ادب يعني؟ Heck him(تبا له)" نظرت لها منة بملل وهي تقول "تستاهلي، متتكلميش معاه تاني بقى علشان هو شكله كدة من النوع العصبي ومش بيحب الحال المايل"

تاففت أروى بغضب وهي تمسح دموعها بينما هو نظر لها وهي تحاول إزاحة دموعها ليبتسم بسخرية وهو يهمس لنفسه ويسير خلف إخوته "بنات متجيش غير بالعين الحمراء"

نظر لهما آسر وهو يقول بحماس "هعرفكم على دراعي اليمين وصديقي الصدوق، دسوقي" نظر له جاسر بتعجب ليبتسم بخفه وهو يقول "اسمه دسوقي؟؟ شغال في الشركة دي كلها واسمه دسوقي"

ضحك ياسر وهو يقول بتعجب "اسم الله يا واد، ما صاحب الشركة دي كلها اسمه رحيم شاندويلي الدَعْلُوب" ضحك آسر وهو يقول "مهو ده يضحك اكتر، وبعدين هو اسمه سمير الدسوقي، بس احنا هنا بنقوله يا دسوقي"

نظرت منة حولها لمنظر الموظفين وهم يضعون كامل تركيزهم على العمل، ثم نظرت للمقعد الذي يوجد أمامهم بالتحديد لتبتسم بحماس وهي تخلع حقيبة ظهرها وتخرج كشكول رسم كبير وقلمها الرصاص، لتنظر للجميع وهي تقول بحماس "اتكلو انتم على الله انا قاعدة هنا"

نظر جاسر لحماسها ليقول بتعجب "بترسم وكأنها هتعمل اختراع هيغير العالم، كمية حماس غريبة" نظرت له منة بتشنج وهي تقول "سيبنالك انت إلاختراعات الي هتغير العالم يا دكتور"

ثم تركته وذهبت ليقول آسر بتذمر "متتريقش عليها، هي اكتر حاجة بتكرهها أن حد يقلل من حاجة بتحبها" أومأ جاسر بعدم اهتمام ثم انتبه الجميع لقول اروى التي كانت يبدو عليها الغضب أو التذمر "انا هروح معاها"

أومأ لها آسر ثم سحب إخوته معه حتى وصل إلى المكتب ليدخل بحماس وهو يقول بصوت عالي "واحشني يا دسوقي"

"بالله عليك سيبني يا آسر دلوقتي، النضارة وقعت مني وشكلها اتكسرت ربنا يستر عليها دي غالية" أنهى دسوقي حديثه وهو يخفض رأسه نحو النظارة ولم يرفع نظره ليراهم حتى، بينما جاسر نظر له بحزن ثم لمس نظارته وهو يقول "حاسس بيك الله يكون في عونك"

"تحس بيا ايه بس يا آسر هو انت بتلبس نضارات" أنهى حديثه وهو يرتدي النظارة مرة أخرى ثم رفع رأسه وهو يبتسم لآسر، ولكن انمحت بسمته وهو ينظر للثلاثة بصدمة ثم تأفف بغضب وهو يخلع النظارة مرة أخرى "يادي النيلة النضارة شكلها باظت وزغللت عيني خليتني شايفك تلاتة يا آسر"

نظر له ياسر بتشنج وهو يقول "يعني النضارة هتخليك شايفنا تلاتة بتحصل مختلفناش، لكن هتشوفنا تلاتة بلبس مختلف؟؟" ارتدى النظارة مرة أخرى وهو يقول بتعجب "انت بتتكلم بصيغة الجمع ليه يا آسر؟؟"

ضحك آسر بشدة وهو يقول "علشان احنا جمع فعلًا يا دسوقي، متقلقش النضارة مش بايظة احنا فعلا تلاتة" ابتسم دسوقي وهو ينظر للثلاثة بهدوء ثم نظر لأسر وهو يبتسم ببلاهه قائلًا "نعم؟؟؟؟"

"نعم الله عليك يا حبيبي" قالها كلا من ياسر وجاسر وهما يبتسمان له ببلاهه أيضًا لينظر لهما دسوقي ثم ينظر لآسر مرة أخرى ليقول "بردو يا آسر نفذت الي في دماغك وعملت لنفسك copy علشان متحضرش الاجتماعات وتنام؟؟ يابني الشركة امانه في رقبتك من بعد ابوك خلي عندك دم انا مش هشيل همك، بس ياريت تقولي الطريقة علشان اخلي copy هنا في الشركة علشان هموت وانام بصراحة"

نظر له ياسر بتركيز وهو يسأله "انت تعرف شيماء المهزقه بنت عبير؟؟" نظر له دسوقي ببلاهه وفي ثواني كان يصرخ برعب "لا يا آسر فهمني الحوار علشان مرعب اوي بصراحة"

نظر الجميع نحو آسر الصامت ليجدوه فرد جسده على الأريكة وهو يغمض عينه ويخلع معطف بدلته مستعدًا للنوم ليقول جاسر بملل "لا بقى كدة كتير، انت بتفطر منوم يا آسر؟؟"

"مهبط يا اخويا والله مش قادر هموت وانام، تخيل نمت امبارح اتناشر ساعة بس؟؟" قالها آسر وهو يعدل من وضع الوسادة ليقول دسوقي برعب "فهمني يا آسر بقولك"

________________________________

كان ياسر يسير بملل هو وجاسر في الشركة ليقول جاسر "هنعمل ايه؟؟" نظر له ياسر وهو يرفع كتفيه بعدم معرفة قائلًا "سبب آسر يفهم صاحبه بهدوء وتعالى نتمشى الشركة كبيرة وبصراحة حابب اتفرج عليها كلها"

نظر جاسر لهاتفه الذي يعلن عن اتصال أحدهم ليقول "طب انا هروح ارد على المكالمة دي وجايلك، متقعدش تتنطط بقى وتقرفنا" نظر له ياسر بتشنج وهو يقول "بقولك ياض مش هتبقى انت والي ما تتسمى دي عليا، هي بنت وهنزعق بس، لكن انت وربنا اخليك خارج من هنا متجبس"

"انت عبيط ولا ايه؟ انت ازاي تكلمني كدة انت فاكرني مؤدب بقى وهسكتلك، ميغركش اني دكتور ده انا كنت قاعد مع في منطقة كلها قطاعة طرق في المانيا" صرخ به جاسر ليمسكه ياسر من تلباب قميصه بغضب وهو يقول "ياض هزعلك"

"اوعى ايدك يا حيوان، ولا تقدر تيجي جنبي اصلا" قالها جاسر وهو يبعده عنه بغضب وكاد ياسر أن يتحدث بغضب ولكن لفت نظره شئ ما ليقول بوعيد "ماشي أنا هسيبك دلوقتي بس علشان الناس، استناني في البيت يا دكتور بالواسطه انت"

نظر جاسر في أثره بقرف وهو يقول "همجي"

__________________________________

كانت تجلس ترسم ما يحدث أمامها وهي تبتسم ثم قالت بتذمر "نسيت الالوان" تاففت ثم نظرت للرسمة لتجد أنها رسمت مظهر الموظفين وهم يعملون، بكل حرفية ولكن قاطعها ظل أحدهم أتى على الورق لترفع نظرها قليلًا ثم تاففت بغضب عندما استمعت لصوته يقول "وحشتيني"

"وحشتك عقربة يا شيخ، انت ناططلنا في كل حته زي الفرقعلوز كدة ليه؟؟" قالتها منة بغضب وهي تقف أمامه لتراه يقترب منها وهو يبتسم قائلًا "قلبي جابني انهاردة بالذات اني اجي الشركة اقابل آسر علشان اطمن على فلوس عمي، ومكنتش اعرف ان قلبي دليلي زي ما بيقولوا واني هلاقيكي هنا"

تاففت منة بغضب وكادت أن تتركه وتذهب ليمسكها نبيل سريعًا وهو يجذبها نحوه ويبتسم ببرود قائلًا "مش هتبطلي تسيبيني وتمشي بقى؟؟ قولتلك مليون مرة الحركة دي مش بحبها"

"وفي المليون مرة الي بسيبك وبمشي فيهم ده مبيلفتش نظرك لحاجة يا نبيل؟؟؟" قالتها منة بسخرية ليقول نبيل وهو يبتسم باستفزاز ويقترب منها "بيلفت نظري لان قربي بيوترك علشان كدة بتبعدي"

ابتعدت عنه منة بغضب وهي تصرخ به "ما تحترم نفسك بقى وابعد عني يا اخي، في ايه انت معندكش دم، اربع سنين بقولك مش طيقاك مش بطيق اشوفك وانت بردو ملاحقني في كل حتة"

نظر لها نبيل بغضب وهو يقول "ومش هسيبك يا منة، انتي حقي ومش هسكت غير لما اخده" هنا وتجمع جميع الموظفين على صراخ منة وهي تقول "حقك؟ انا بالنسبالك زي الفلوس يا نبيل حاجة انت شايفها ملكك وخلاص وهي مش من حقك اصلا، وانا يا اخي مش عيزاك"

كاد نبيل أن يقترب منها مرة أخرى بغضب ولكن وجد فجأة من يقف في وجه منة وهو يخفي جسدها خلف ظهره ويمسك بيده قبل أن يقترب منها ويقول بغضب "نعم يا حبيبي عايز ايه؟؟" نظر له نبيل بغضب وهو يقول "ملكش دعوة انت يا آسر، بنات عمي انا حر معاهم لتكون فاكر نفسك اخوهم بجد ولا حاجة"

نظر له جاسر بتعجب ليبتسم عندما علم أنه ابن عم منة وأنه يظنه آسر، ابتسم ببرود وهو يقول "وهي من الرجولة انك تقف مع بنت غصب عنها لمجرد أنها بنت عمك؟؟"

نظرت منة من خلف ظهر جاسر لنبيل وهي تصرخ "سيبه ووريني هيعمل ايه ابن نبوية" نظر لها جاسر بغضب وهو يقول "اسكتي انتي دلوقتي، اتكل على الله يا حبيبي من هنا ومتقربش منها تاني ما دام ده اسلوبك"

"والله وطلعلك صوت يا آسر بعد اربع سنين!!، مش هعيدها تاني بنت عمي وانا حر معاها أن شالله اكسر دماغها ملكش فيه" قالها نبيل وهو يحاول سحب منة من خلف جاسر ليتافف جاسر بغضب وفي ثواني كان يلكمه بعنف وهو يقول "ابعد عنها بدل ما تخليني اطلع عليك شخصية مش بحب اطلعها"

نظر له نبيل بصدمة وفي ثواني كان يرد له اللكمة بمهارة ليبتسم جاسر وهو يمسك بذراعه ويقوم بلويها للخلف ليحاول نبيل ضربه مرة أخرى لتنظر لهما منة برعب وهي تبكي وفي ثواني كانت تمسك بكوب عصير وكادت أن تلقي ما بداخله على نبيل ولكن القته بالخطأ على جاسر الذي شهق بصدمة وهو ينظر لقميصه الابيض ثم يضغط بأسنانه على شفتيه السفليه بوعيد وهو ينظر لها لتقول هي بتوتر "والله كنت عايزة ارميها في وش نبيل وجات فيك بالغلط"

وقف نبيل وهو ينظر لجاسر بغضب ويصرخ "ماشي يا آسر انا ساكتلك بس مش هفضل ساكتلك كتير، ورحمة ابويا لاوريك" تركه نبيل ورحل ليضع جاسر يده على فكه بألم ثم نظر لقميصه الابيض الذي تلوث بالعصير ليتافف بغضب وهو يقول "مين الحيوان ده؟؟؟"

نظرت له منة بأسف وهي تعطيه محرمة يمسح بها قميصه وتقول "ده نبيل ابن عمي، من زمان وهو بيلاحقني وبيقول أنه بيحبني، وهو في مشاكل كبيرة مع آسر بسبب فلوس عمو رحيم الي هو شايفها فلوس ابويا وهو أحق بيها علشان هو ابن اخوه"

نظر لها جاسر بتعجب وهو يمسح قميصه قائلًا "آسر بيتخانق معاه علشان فلوس مش علشان بيضايقك؟؟" نظرت له منة بتوتر وهي تقول "جاسر، آسر ميعرفش حاجة عن الي نبيل بيعمله معايا، لانه لو عرف هيحصل مشاكل كبيرة اوي بينهم وانا خايفة على اخويا، علشان خاطري متقولوش الي حصل"

نظر لها جاسر بعدم تصديق وهو يصرخ بها "انتي مجنونة ازاي متقولوش حاجة زي دي؟؟ يعني في واحد قاعد يضايقك ومتقوليش للراجل الي المفروض في ضهرك" بكت منة وهي تترجاه "علشان خاطري يا جاسر انا قعدت اربع سنين ساكته علشان عارفة المصايب الي هتحصل بينهم، متجيش انت وتبوظ ده كله تاني"

"والله؟؟ ولو ضايقك تاني مين هيقفلك؟" قالها جاسر بغضب لتبتسم منة ببلاهه وهي تقول "اقفله انت، هو شكله اصلا خاف منك، ده غير أنه فاكرك آسر فلم الدور علشان يعرف ياخد الفلوس"

"وانا هفضل معاكي على طول يعني علشان اقفله؟؟" قالها جاسر بغضب لتقول منة بتافف "بص الفترة الي انت معايا فيها ابقى اقفله انت يا عم، غير كدة ملكش دعوة وسيبني انا هتصرف انا مش عيلة يعني"

اقترب منها جاسر وهو يقول بسخرية "لا عيلة، لما يبقى عندك اتنين وعشرين سنة وبتاخدي حقك من واحد زي ده بلسانك بس تبقي عيلة، لسانك ده مش هينقذك العمر كله" نظرت له منة بتذمر وهي ترفع اصبعها السبابة في وجه "انا مش عيلة يا جاسر"

ابتسم جاسر بسخرية وهو يقول قبل أن يتركها ويذهب "بالنسبالي عيلة يا منة" نظر منة في أثره بتشنج وهي تقول "ماله ده؟؟"

__________________________________

وقبل هذا بدقائق كان ياسر ينظر لأروى التي تجلس في الحديقة التابعة للشركة وهي تبكي لينظر لها بصدمة من بكائها، كل هذا بسبب حديثه معها؟؟

بينما هي كانت تبكي وهي تشرد بذاكرتها وتعود لأيام طفولتها عندما كانت في الروضة، تجلس وهي تكتب في كشكولها وتحاول الامساك بقلمها بالشكل الصحيح وأثناء حركتها ألقت حقيبة وزجاجة زميلتها بالخطأ لتنظر لها بفزع وهي تقول "Sorry I didn't notice"

لتنظر لها زميلتها بسخط وهي تقول "sorry؟ وقعتي زمزميتي والشنطة بتاعتي جيه عليها تراب، يعني سودة وكمان مش بتشوفي؟" لتنظر لها أروى بألم وهي تقول بطفولة وبراءة "قولتلك اسفه، وبعدين بتتكلمي معايا بالطريقة دي ليه والله هقول للميس"

لتضحك زميلتها بسخرية وهي تقول بنبرة لا تليق بطفلة "قوللها لو جدعة، وانا هقولها انك كسرتي زمزميتي وكنتي هتقطعي شنطتي علشان انتي غيرانه مني علشان انا بيضة واحلى منك"

"انتي مش مؤدبة وبيئة" صرخت بها أروى وهي تبكي لتقول زميلتها بسخرية "على الأقل البيئة دي تعرف الأدب عنك ومش بتغير زيك"

هنا عادت من ذاكرتها وهي تتنهد بألم، جملته عندما قال (على الأقل حارتي دي علمتني الأدب)، ذكرتها بعدة مواقف تنمر وسخرية، مواقف رغم انها طفولية حدثت من طفلة ذات السبع سنوات يمكن أن نراها فقط لا تتمتع بالادب بالقدر الكافي

ولكن تلك الطفولة ما زالت معلقة داخل رأسها، ما زالت تألمها، تتذكرها وتبكي تتذكر سخرية جميع الأطفال منها عندما كانت في الروضة، تتذكر سخرية أصدقائها منها بحجة أنهن يمزحن معها، وهي تبتسم أنها لا تهتم وتعلم أنهن يمزحن معها، ولكن في داخلها كان هناك فتاة تصرخ وهي تقول كفاكم مزاحًا عليّ

مسحت دموعها بألم وتوتر عندما استمعت لصوته وهو يقترب منها ليجلس بجانبها وهو صامت تمامًا لتنظر له بغضب ثم تنظر نحو السماء وهي صامته أيضًا

مرت دقيقة كان ياسر ينظر لها بندم ولا يعلم ما الذي يجب قوله، حتى تنهد وهو يتحمحم لتنتبه له ولكنها لم تنظر له حتى، ليسعل بصوت عالي حتى تنتبه له ولكن أيضًا لا تنظر له

"جرا ايه يا بت هو انا مش قاعد اكح واقول احم احم" صرخ بها ياسر بتذمر لتنظر له بصدمة ليتافف هو بغضب وهو يقول "أخيرًا بصيتي يا شيخة؟"

"نعم عايز ايه؟" قالتها أروى بغضب ليقول ياسر بندم "هو انا ضايقتك اوي؟؟" لتنظر له أروى بتشنج وهي تقول "انت لسه هتسأل؟؟"

ابتسم ياسر وهو يقول "ما انتي يا أروى مستفزة ولسانك طويل" نظرت له بصدمة لينظر لها بتوتر وهو يقول" قصدي يعني أنك قليلة الزوق وباردة"

نظرت له بصدمة مرة أخرى ليتافف بغضب وهو يقول "انا آسف، مكانش قصدي ازعلك بس انتي مستفزة" نظرت له أروى بغرور وهي تقول "تزعلني؟ هو حد يقدر يزعلني مين قالك اني كلامك فارقلي أو زعلني اصلا؟"

نظر لها ياسر بتافف من حديثها ولكنه همس لها وهو يخفض جسده قليلًا حتى يصل لطولها "الدموع الي في عينك" نظرت له أروى بتوتر وهي تقول "لا انا في حاجة دخلت عيني مش اكتر"

"كدابة" قالها ياسر وهو يضحك لتنظر له بغضب وهي تقول "انت مستفز" ضحك ياسر وهو يقول "زعلانة من رد فعلي الي ناتج عن أفعالك؟؟"

"انت عايز ايه دلوقتي؟؟" قالتها اروى بغضب لينظر لها بملل وهو يقول "نبطل مناقرة في بعض علشان انا مليش خلق، ونفتح صفحة جديدة وياستي اعتبريني اخوكي زي آسر"

وضعت أروى يدها على فمها تحاول اخفاء بسمتها ليبتسم ياسر وهو يمد يده لها علامة المصاحفة ويقول بمرح "نتعرف وكأننا اول مرة نشوف بعض ايه رأيك؟ انا المعلم ياسر الخواجة اهلًا"

ابتسمت أروى وهي تمد يدها تصافحه وهي تقول "Hi" نظر لها ياسر بمشاغبة وهو يضع يده على قلبه ويغني "الاسمراني مر ياما، وجالي هاي، من كلمة اه ياما ما بدري شو حصل جواي"

غمز لها في اخر كلماته وهو يمازحها فقط كي تنسى اي مشاجرة حدثت بينهما، ولكنها نظرت لغمزته وكلمات أغنيته بخجل لتبتسم وهي تضع يدها على فمها ثم تركته وذهبت لينظر في أثرها بتعجب ثم ضحك وهو يقول بصوت عالي قليلًا "مكسوفة؟؟ حلو ده"

رآها تعود له مرة أخرى وهي تقول بغضب "انت مستفز وبارد" نظر لها ياسر بصدمة وهو يقول "وانتي عيلة مش بيطمر فيكي حاجة وانا غلطان اني جيت اطيب خاطرك بكلمتين"

تاففت وهي تتركه وتذهب ليعدل هو من وضع معطفه وهو يدخل للشركة مرة أخرى بتذمر من تلك الفتاة الغريبة ولكنه صدم في أحدهم ليقول باعتذار "معلش مخدتش بالي"

"لحقت تغير هدومك؟؟ على العموم يا آسر حق ايدك الي اتمدت عليا دي، خدته بهدوء بس مش اوي..." قاطعه ياسر وهو يتركه ويذهب ويقول بتعجب"ماله ده هو واقع على دماغه وهو صغير ولا ايه؟؟"

ولكنه توقف عندما وجد نبيل يمسكه من يده وهو يقول بغضب "ايدك دي هقطعهالك قريب واوعدك بدة" نظر ياسر ليده بصدمة ولحديثه بصدمة أكبر ليمسكه من تلباب قميصه وهو يخرج من جيبه سلاحه الابيض ويفتحه وهو يصرخ بغضب "تقطع ايد مين ياض انت عبيط ولا ايه؟؟ انتي بتكلم ياسر الخواجة كدة؟ ده انت امك داعية عليك قبل ما تنزل من بيتكم"

نظر له نبيل بغضب وهو يقول "انا مش فاهم مالك عندك انفصام في الشخصية انهاردة كدة ليه، اقسم بالله لاوديك في داهية يا آسر" امسكه ياسر مرة أخرى وهو يلقيه على الأرض ويجلس فوقه وهو يضع سلاحه على وجه نبيل ويقول بخبث "ايه رأيك نروح معًا نحو الداهية، أو اوديك انت الاول تشوفلي ايه الاخبار هناك"

صرخ نبيل وهو يحاول أبعاده عنه ويسبه بينما ياسر كان يصرخ أن يبعد الجميع عنه ويتوعد لذلك الشاب الذي لا يعرفه حتى ليجد فجأة جاسر يمسك به وهو يقول "انت بتعمل ايه يخربيت قوم"

"سيبني عليه يا جاسر ده بيقوله هيقطعلي ايدي؟ ده انا هقطعه وابيعه قطع غيار في اقربها خُرده" صرخ بها ياسر ليسحبه جاسر بقوه ثم ينظر لنبيل وهو يقول بغضب "أنت في ايه ياض مالك بتجر في شكلنا من الصبح ليه ما تتهد وتقعد في حتة"

كان نبيل ينظر لهما بصدمة وهو يحاول استوعاب ما يحدث ويفتح فمه كالابله، ثم قام بفرك عينيه بيده وهو يظن أن اصابه حَول مثلا او ما شبه

ولكنهما ما زالا اثنين ليقول بصدمة "أيوة يعني مين آسر؟؟" فجأة استمع لصوت مرح يأتي من الخلف وهو يقول "مين بينادي على آسر يا ولاد؟ هو انت يا وجه البرص، اتاري التكيف باظ من ساعة ما دخلت الشركة كتمت على أنفاسنا"

"يا راجل؟؟" قالها نبيل بصدمة وهو ينظر لثلاثتهم ليقول بغضب "مين فيكم الي ضربني دلوقتي؟؟"

ابتسم جاسر وهو يقول "انا الي علمت عليك" ليبتسم ياسر وهو يغلق سلاحه ويضعه في جيبه قائلًا "وانا الي كنت هعلم عليك" ليبتسم آسر وهو يقول "وانا كدة كدة معلم عليك من زمان"

"انتم كدة ازاي؟" سأله نبيل بصدمة ليقف آسر في المنتصف وهو يضم إخوته ويرفع حاجبيه عدة مرات بمرح وهو يقول "فاضيينلك يا نبيل، احب اعرفك بجاسر وياسر اخواتي التوأم"

كان يفتح فمه بصدمة ليجد فجأة منة وهي تهز كتفيها بمرح وهي تقول "بقو تلاتة يا نبيل، وريني هتاخد فلوس عمو رحيم ازاي" بينما أروى وقفت بجانب شقيقتها وهي تنظر لنبيل بشفقة مصتنعة وهي تقول "I pity you, you are now in front of three whom you could not stand" (أشفق عليك، انت الآن أمام ثلاثة لن تستطع الوقوف أمامهم بمفردك)

نظر لهم نبيل بتشنج وهو يقول "وانا اقدر اقف قدام جيش كامل يا أروى" ثم ابتسم بسخرية وهو يرتكهم ويذهب ليقول ياسر بغضب "مين العبيط ده؟؟"

"ده واحد عامل زي القرد الي خرج بعد سنين سجن فلما يصدق يتنطط في اي حتة ويقرفنا ما علينا، حاسس اني ناسي حاجة" قالها آسر بحيرة ليفتح عينه بصدمة ثم يركض وهو يصرخ ويسحب إخوته معه "دسوقي واجتماع بنداري"

_______________________________

كانت فيفي تجلس أمام الرجل الذي قال بتعجب "يا مدام العربية غالية مش فاهم ازاي عايزة تبيعهالي بسهولة كدة" نظرت له فيفي بتشنج وهي تقول بغضب "وانت مالك، عربيتي المرسيدس وعايزة أبيعها مزاجي انت هتتحكم في فلوسي؟؟"

"العفو يا هانم، طب عايزة ايه بدالها، محتاجة عربية موديل أعلى؟ عندي تشكيلة عربيات جديدة" قالها الرجل بحماس ولكنه صدم عندما قالت فيفي وهي تبتسم "محتاجة عربية حمراء موديل مئة تمانية وعشرين"

"نعم؟؟" قالها الرجل بصدمة لتقول فيفي "دلوقتي رحيم ابني جابلي مرسيدس بمليون جنيه، عيزاك تبعهالي وتجيبلي واحده مئة تمانية وعشرين في حدود أربعين ألف جنيه كدة ولا حاجة نقضي بيها الغرض وتديني الفرق"

"عايزة تبدلي العربية المرسيدس، بمئة تمانية وعشرين؟؟" قالها الرجل بعدم تصديق لتصرخ فيفي بغضب "وانت ايش حشرك مناخيرك مش حاططها في وشك ليه؟؟ مهو كلهم حتة حديدة باربع عجلات بتوصلني لاي حتة، يبقى نتقي الله ونجيب الي على قد الايد وبلاش فشخرة كدابة"

"كل العز ده؟!، والمية تمانية وعشرين هي الي على الايد، ده انتي بالفلوس دي كلها تجيبي لامبورجيني" قالها الرجل بعدم تصديق من تفكير تلك العجوز، بينما فيفي شهقت بصدمة وهي تقف وتخمس في وجهه وهي تقول بغضب وترفع عكازها في وجهه "انت جاي تشتري عربية ولا جاي تُقُر علينا؟ وبعدين دي مش فلوسنا دي فلوس ناس"

قاطع شجارهما دخول يسرا وهي تقول "مين الي بيخبط على الباب يا ماما؟؟" نظرت لها فيفي بعدم معرفة وهي تقول "بتساليني انا؟ فين تحية تفتح الباب؟"

ركضت تحية نحو الباب وهي تفتحه لتذهب خلفها يسرا لترى من، لتجد امرأة في نفس عمرها تقريبًا ولكنها ترتدي عباءه واسعة مليئة بالتطريز وتضع وشاح على منتصف رأسها وتلبس الكثير من الاساور الذهبية في يدها وتبتسم وهي تقول "هو مش ده بيت المعلم ياسر الخواجة بردو؟؟"

اقتربت منها يسرا وهي تقول بلطف "ايوة هو، مين حضرتك؟؟" ابتسمت تلك السيدة بلطف وهي تقول وتطرق بيدها على صدرها في حركة شعبية "انا المعلمة نعمة، ام ياسر، وانتي مين يا حبيبتي؟؟"

ابتسمت يسرا وهي تدعيها للدخول وتقول "انا يسرا مامة آسر" ابتسمت نعمة وهي تدخل ولكنهم سمعوا صوت يقول بحنق "وانا منبوذ هنا من غير ام صح؟"

نظرت يسرا نحو هذا الصوت لتجده جاسر لتبتسم بحنان وهي تقول "عيب يا جاسر لما تقول كدة وانا موجودة، انا مامتك يا حبيبي وانت زيك زي آسر عندي وحتى ياسر"

"لا انا كدة ابدأ اغير على ياسر ابني" قالتها نعمة بمزاح لتضحك يسرا بينما جاسر ابتسم بامتنان لتلك السيدة الحنونة وما كاد يدخل حتى وجد من يتشبث به بطريقة غريبة ويصدر صوت اغرب "سي ياسر، جرالك ايه ركبت نضارة ليه سلامة نظرك يا سي ياسر"

"شيماء، وحشتيني يا شيماء" صدر هذا الصوت من الخلف لتنظر شيماء للخلف بتعجب ثم نظر لجاسر وهي تقول بقرف "يبقى انت مش سي ياسر"

ثم ركضت نحو الآخر وهي تقول "وحشتك صحيح ياسي ياسر؟؟" ابتسم آسر وهو يقترب منها بمكر قائلًا "ما تقولي كدة سي آسر هتبقى احلى"

ابتسمت شيماء بتعجب وهي تقول "مالك ياسي ياسر بتضحكلي كدة عادي؟ انت تعبان ولا حاجة؟" نظر لها آسر بصدمة وهو يقول "يا حبيبة قلبي هو كان معذبك اوي كدة؟ تعالي لحضن اخو سي ياسر اديكي الحنان الي هو حارمك منه من زمان"

"ماله سي ياسر يا معلمة؟؟" قالتها شيماء بصدمة ليقول آسر بغيرة مصتنعة "مش نفكنا من سي ياسر بقى ونجرب سي آسر؟؟ احن بكتير على فكرة"

قاطع شيماء التي كادت أن تتحدث صراخ ياسر وهو يمسك أروى من تلباب قميصها ويلقيها نحو يسرا "البت دي متربتش يا مرات ابويا" نظرت له أروى بصدمة وغضب وهي تصرخ "انت ازاي تمسكني كدة؟ وبعدين هو انا الي بوظت الاجتماع بأسلوب البلطجة البيئة الي اتعاملت بيه ده؟؟"

ثم نظرت لوالدتها وهي تقول بغضب "تخيلي يا مامي رايح لصاحب الشركة الي عاملين معاه صفقة بيفاصل معاه في حق البضاعة؟ ده فاكر نفسه في الموسكي يا ماما، بيقوله خليها مليون ونمشي الدنيا وليك الحلاوة؟؟؟"

نظرت يسرا لياسر بصدمة لتكمل أروى بغضب وهي تصرخ "بتكرمش للمساعد بتاعه خمسين جنيه في ايده؟؟ ينهار ابيض، بترشي مساعد بيقبض عشر آلاف جنيه في الشهر بخمسين جنيه في ايده؟؟؟"

نظر لها ياسر بغضب وهو يقول "وانتي مالك هي فلوس ابويا ولا فلوس ابوكي انتي؟؟" ضمت أروى يديها أمام صدرها وهي تقول بغرور "انا ليا في الفلوس زي ما انت ليك فيها على فكرة"

"بردو ملكيش دعوة اقول الي أقوله وانتي تتخرسي خالص متتكلميش" صرخ بها ياسر لتقول أروى بغضب "اتخرس ايه انت هتمشي كلامك عليا كمان؟ بقولك ايه يا اما ترتقي وتنسى اسلوب الهمجية ده، يا اما متحضرش اي اجتماعات بعد كدة واقعد في البيت احسن"

وفي ثواني كان ياسر يخلع حذاءه وهو يلقيه نحوها ويصرخ بها "تصدقي انك بت متربتيش، بتكلمي راجل واكبر منك بخمس سنين بالطريقة دي، والله لاعلمك الادب ما دام يسرا مش عارفة تعلمهولك"

ركضت أروى بخوف لتختبأ خلف ظهر نعمة وهي تصرخ بغضب "مش لما تتربى انت الاول يا حبيبي ابقى ربيني You come to teach me literature and you don't know it." (تأتي لتعلمني الادب وانت لا تعلمه).

"اتكلملنا عربي ياختي بالله عليكي، واه يا اروى انا هعوض التربية الي ناقصه فيا فيكي انتي" صرخ بها ياسر وهو يحاول الاقتراب منها لضربها ثم صرخ بغضب "ما تلم حريمك يا آسر"

بينما آسر كان ينظر لشيماء وهو يبتسم ببلاهه قائلًا "انا بحاول أضم انثى جديدة لحريمي" بينما شيماء نظرت نحو ياسر بلهفه وهي تقول "سي ياسر"

توقف ياسر فجأة وهو يسمع لهذا الصوت لينظر حوله بفزع وهو يقول "شيماء؟؟ يالهوي على القرف الي انا فيه" اقتربت منه شيماء وهي تقول "واحشني يا سي ياسر، اتحايلت المعلمة نعمة علشان تجيبني اشوفك"

تجاهلها ياسر وهو يركض نحو والدته باشتياق ليضمها بشدة وهو يدور بها ويضحك بسعادة وهو يقول "كنت لسة جايلك يا نعمة كنتي خليها تيجي مني انا الاول" قبلت نعمة رأسه بحنان وهي تقول "تيجي مني ولا منك مش هتفرق المهم اني شوفتك يا حبيبي"

"وحشتيني يا نعمة" قالها ياسر بسعادة وهو يقبل رأسها ولكنه توقف بغضب عندما استمع لهذا الصوت الذي يثير غيظه "وانا موحشتكش يا سي ياسر؟؟"

"لا" قالها ياسر وهو يبتسم ببرود ليستمع لصراخ آسر وهو يقول "يبني حد يرمي النعمة على الأرض كدة يا مفتري؟؟" نظر جاسر لشقيقه بصدمة ليهمس له "دي نعمة؟؟ دي نقمة ياعم اتقي الله"

نظرت منة لشيماء لتقول ببلاهه "انتي لبسك حلو اوي بتجبيه منين؟؟" نظرت لها شيماء بغرور مصتنع وهي تقول "كل عباياتي السمرة بفصلهم عند حميدو الترزي الي على ناصية شارعنا"

نظرت لها منة قليلًا وفي ثواني كانت تنظر لوالدتها وهي تقول "انتي مش قولتي يا ماما هتتغدا محشي انهاردة؟؟" اومأت اها يسرا باستغراب لتجد منة تركض نحو المطبخ ودقيقة وعادت وهي تحمل ثمرة الكرنب وتضعها في يد شيماء

ثم أمسكت قلمها واحضرت لوحتها وهي تقول بحماس "عيزاكي بقى تحطيلي الكرنبه فوق دماغك وتمسكي طرف العباية بايدك التانية واثبتي"

نظرت لها شيماء ببلاهه لتنتبه لقول آسر وهو يقول "وياه بقى يا شيمو لو كلتي لبانه سمارة مع العباية السمرة هتبقى حاجة اخر حلاوة بالقشطة"

نظرت لهم شيماء بتذمر وهي تلقي ثمرة الكرنب ثم تذهب نحو ياسر لتقول بغضب "سي ياسر هترجع معايا يا اخويا؟؟" اقترب منها ياسر وهو يقول بترجي "ما تثبتي على كلمة اخويا دي يا شيماء الله يباركلك"

نظرت له شيماء بغضب وهي تقول "لا امك امي ولا ابوك ابويا، يبقى نجوز لبعض ياسي ياسر" صدرت ضحكات أروى في المكان وهي تقول بسخرية "لايق عليك فعلًا تبقى سي ياسر وهي مرات المعلم، جو عبد الغفور البورعي ده لايق عليكم جدا"

نظر لها ياسر بقرف وهو يقول "اخرجي انتي منها الله يباركلك، انتي من Egypt واحنا من مصر يبقى ملكيش دعوة بينا" نظرت له أروى بتشنج وهي تقول بسخرية وتقلد شيماء "وانا مالي بيك اصلا يا سي ياسر، انا لو عليا بقيت هموت وارجع امريكا اكتر علشان ارتاح منك"

"لا يابت وانا الي هموت نفسي لو مرجعتيش، انا لو عليا انزل حالًا احجزلك اول طيارة ونخلص" صرخ بها ياسر ليجد فجأة شيماء تدفعه وهي تقف أمامه وتقول "استنى انت كدة ياسي ياسر، مالك يا أبلة ومال سي ياسر ده احنا في حتتنا بنخاف نرمي عليه السلام بطريقة متعجبهوش ولا تدخل هواه، وانتي واقفه تكلميه بكل بجاحة كدة ده المعلم ياسر الخواجة"

نظرت لها أروى بملل وهي تقول "And what's wrong with you, strange thing, when I talk to him, you don't talk". (وانتي مالك يا بتاعة انتي، لما اتكلم معاه ملكيش دعوة انتي)

نظرت لها شيماء ببلاهه ثم نظرت نحو جاسر وهي تقول "شكلك انت إلي متعلم الي فيهم باين الدح من النضارة، هي البت دي بتقول ايه؟؟" نظر لها جاسر ببرود وهو يقول "بتقولك منورة"

"قالت الكلمتين دول في كل الجملة دي؟؟ حلو العلام بردو مش كدة يا سي ياسر؟؟" نظر لهم ياسر بتافف وهو يصرخ ويسحب نعمة خلفه "انا كل الي انا طالبه أن أروى وشيماء يبعدو عني مش اكتر والله"

أوقفه جاسر وهو يقول بتعجب "استنى بس كدة، هي فيفي فين" نظرت يسرا حولها لتقول بتعجب "انا كنت سيباها مع راجل في الصالون جوا و..."

قاطع يسرا ركض رجل إلى بهو المنزل وهو يحاول عدل وضع قميصه التي تدهور تمامًا وهو يصرخ "يا ولية يا بخيلة، ده انتي هتدفني في مدافن الصدقة علشان هتخافي تدفعي فلوش للحانوتي" كانت فيفي تحاول الركض خلفه وهي تمسك بعكازها وفي يدها الأخرى تمسك بقطعة من قميصه وهي تصرخ "بقى عايزني انا فيفي هانم اشتري عربية مئة تمانية وعشرين..."

قاطعها صفير آسر وهو يقول "فيفي شكلها بتبذر ولا ايه؟؟؟" ولكنه صمت بصدمة عندما اكمل فيفي حديثها "بتمانين الف جنيه يا حرامية يا ولاد ال..... هي خمسين ألف جنيه مفيش غيرهم، وفيهم متين جنيه مقطوعة كمان ايه رأيك بقى؟؟"

نظر لها الرجل بغضب وهو يقول "ياستي مش عايز منك حاجة خالص شوفيلك معرض تاني، كتكم الهم ولية جلدة" نظرت فيفي في أثره بغضب ثم نظرت لاحفادها لتشهق بفزع وهي تركض خلفهم بعكازها ليركض الثلاثة برعب ولا يدرون ما الذي حدث بينما هي تصرخ بغضب "داخلين بالجزم يا جزم، السجاد ده عارف بكام؟؟ ده غير الراجل الي هييجي يغسله هياخد شئ وشويات، ولو قاومت الغضروف وغسلته انا هياخد كيس رابسو مش اقل من خمستاشر جنيه، ما نحافظ من الاول ولا انتم غاويين تبذير"

خلع آسر حذاءه بسرعة بينما ياسر ركض نحو الباب ليخلع حذاءه لينظر جاسر للاثنين ثم ينظر لفيفي التي تقترب منه ليصرخ برعب "اعمل ايه؟؟"

"اقلع الجزمة بسرعة انت لسة هستفسر" صرخ به آسر ليخلع جاسر حذاءه بسرعة وهو يركض مع اخوته

قاطع صراخ الجميع دخول بنداري وهو يقول بغضب "عدى يومين يا ولاد رحيم ولسة مبداتوش تدورو على فريدة؟؟" وقف الثلاثة بتذمر لتقول نعمة بتعجب وهي تنظر نحو ياسر "مين فريدة دي يا واد؟؟"

كاد أن يجيبها ولكن قاطعه بنداري الذي ابتسم ببلاهه وهو يقترب من نعمة ويقول "آنسة نعمة؟ وانا اقول البيت منور كدة ليه؟؟" قاطعه صراخ فيفي وهي تقول بغضب "اكيد مش منور بيها، ده منور بسبب الست لمبات بتوع النجفة الي قولت مليون مرة الكهرباء واللُمض دي غالية، تحية تعالي ولعي تلاتة بس قولت كدة مليون مرة"

تجاهلها بنداري وهو يقترب من نعمة ويقول وهو يبتسم ببلاهه "آخر مرة كنت عندكم يا آنسة نعمة نسيت ساعة كدة لونها اسود" ابتسمت نعمة بخجل وهي تفتح حقيبتها وتخرج الساعة وهي تقول "ايوة ما انا جيت انهاردة علشان ادهالك يا استاذ بنداري"

نظر لها ياسر بتشنج وهو يقول "يعني مش علشاني ياما؟؟؟" نفت نعمة وهي تبتسم وتقول "اكيد الساعة اهم اصل شكلها غالي" ابتسم بنداري وهو يقول "هي غالية فعلا، وصعب الوصول ليها"

"كويس انك عارف يا استاذ بنداري، حافظ عليها بقى بعد كدة" قالتها نعمة وهي تبتسم بخجل لينظر لهما آسر وهو يقول بتأثر "عصافير كناريا يا اخواتي؟؟"

"عصافير ايه دول نعامتين تايهين في الغابة" قالها جاسر باشمئزاز ليقول ياسر بغضب "ده بيعلق امي عيني عينك؟؟"

انتبه بنداري للحديث ليتحمحم باحراج وهو يقول "احنا هنروح نتغدا دلوقتي، وبعدين هتطلعو معايا على الملجأ علشان نشوف فريدة"

ذهبت ياسر خلفه وهو يقول بتعجب "هنعمل ايه في الملجأ؟ دي عندها تمانية وعشرين سنة اكيد خرجت" نظر له جاسر بتفكير وهو يقول "احنا ممكن نروح نسأل يمكن مخرجتش وحد اتبناها، ساعتها نعرف مين الي اتبناها وندور"

نظر له آسر بانبهار وهو يقول "دماغ شغالة مش بتنام" نظر لهم بنداري بتافف وهو يذهب نحو طاولة الطعام ويقول بهدوء "فريدة لازم تلاقوها علشان في حاجات كتير اوي هتقف بسبب الوصية الي رحيم معملش فيها حساب شغله زي ما عمل حساب انكم تلاقو اختكم"

_____________________________

وفي العصر كان الثلاثة يقفون أمام هذا الملجأ ليدخل بنداري ثم يدخلون هم خلفه، نظرت مديرة الملجأ لهم بتعجب وهي تقول "اؤمر يا فندم اساعدك ازاي؟؟"

ابتسم آسر وهو يقول "احنا كنا جايين نسأل على حد كان هنا في الملجأ" اكمل جاسر وهو يقول "يعني عايزين نعرف هي حد اتبناها ولا خرجت من هنا؟؟"

نظرت لهم المديرة بفضول وهي تقول "طب هي كام سنة؟؟" ابتسم ياسر ببلاهه وهو يقول "تمانية وعشرين سنة"

نظرت له المديرة بصدمة وهي تقول "عايزني اعرف بنت كانت هنا من تمانية وعشرين سنة؟؟ حضرتك انا ماسكة الملجأ ده بقالي تلت سنين اساسًا"

نظر لها آسر بخوف وهو يقول "يعني ايه مش هينفع نعرف عنها أي معلومات؟؟" نظرت لهم المديرة قليلًا حتى قالت بتذكر "دادة غادة شغالة هنا بقالها تلاتين سنة، متهيالي ممكن يكون عندها معلومات؟ الدفاتر القديمة كمان كلها معاها اهم حاجة معاكم صورتها؟؟"

ابتسم بنداري ببلاهه وهو يقول "معايا صورتها وهي عندها شهر ونص" نظرت له المديرة بتعجب ثم قالت "اتفضلو معايا اوديكم ليها"

وبعد دقائق كانو يجلسون في هذه الحديقة الصغيرة وسط الأطفال اللذين يقفزون ويمرحون في المكان بكل طفولة وبراءة، ودقائق وكانت تأتي امرأة عجوز لتبتسم ببشاشه وهي تقول "نعم قالولي انكم عايزني؟"

اقترب منها آسر بلهفه وهو يقول "قالولنا أن الدفاتر القديمة معاكي، واحنا كنا عايزين نسأل على طفلة جات هنا من تمانية وعشرين سنة" نظرت له غادة بتعجب وهي تقول "هي فترة طويلة اوي، بس اديني اسمها وانا ادورلك"

ابتسم جاسر بحماس وهو يقول "اسمها فريدة رحيم شاندويلي الدَعْلُوب" ضحكت غادة وهي تحاول تذكر متى استمعت لهذا الاسم لتقول "انا فاكرة اني سمعت الاسم ده زمان اوي بس كانوا طفلين متهيالي مش طفلة واحدة"

ابتسم ياسر وهو يقول "أيوة يا حاجة ما انا الطفل الي كنت معاها" نظرت له غادة وهي تحاول التذكر لتقول "ثواني هقوم ادورلكم عن بياناتها واجي"

ذهبت غادة لينظر آسر لاخوته بلهفه وهو يقول "تفتكروا هنلاقيها بسرعة؟؟" ابتسم ياسر وهو يقول "ليه لا؟ ويكون ربنا مسهلهالنا علشان احنا ولاد حلال وغلابة"

ضحك جاسر وهو يقول "حاسس أننا هنتمرمط معرفش ليه" نظر لهم بنداري ليقول بغضب "تفائلوا خيرًا تجدوه متبقوش فقر"

مرت دقائق عديدة حتى عادت غادة مرة أخرى وهي تمسك بيدها ورق وتقول بابتسامة عريضة "لقيتهالكم، هي اسمها فريدة رحيم شاندويلي الدَعْلُوب جات هنا وهي عندها شهر ونص، واتبنيتها ست اسمها زينات الاسيوطي وكانت فريدة عندها ساعتها ست سنين، خدتها بنفس الاسم مع تغيير اسم الوالد لاسم زوج مدام زينات"

ثم ابتسمت لهم وهي تقول "تحبو تاخدو العنوان؟؟" نظر الثلاثة لبعضهم وهم يبتسمون بحماس ويقولون في نفس الوقت "ده هو ده المطلوب"

_____________________________

أربعة تجمعوا في رحم واحد، ليتجمع ثلاثة ويتبقى ربع آخر، ليبدأو البحث معًا عنها وهنا تبتدي المغامرة

وفي النهاية دعوني أخبركم

"أن المغامرة لم تنتهي بعد...

السادس من هنا

مدونة مكتبة حـــواء

رواية الوصية الثلاثية الفصل الخامس 5 بقلم سهيلة محمد