رواية رسالة من زوجي الميت الفصل الثالث 3 السيد عبدالكريم
الفصل الثالث. رواية رسالة من زوجي الميت
لمّا الممرضة وصفت الشخص اللى هرب من المستشفي كانتْ بتوصف جوزي ، سرحتُ فى خواطري وفضلت أفكر ، ـ جوزي أثناء الحريق تم نقله هنا باسم واحد تاني عن طريق الخطأ ، ـ واحنا استلمنا جثة نادر تاني غير نادر جوزي ودفناها بالخطأ ، ـ جوزي فقد الذاكرة ومكنش فاكر لا اسمه ولا عنوانه ولا أهله ، وهرب لمّا صحته تحسنت .
دا أقرب سيناريو منطقي للى حصل ، والمفروض دلوقتي ألاقي جوزي ، أخدت تقرير من إدارة المستشفي يفيد إنْ ( نادر التاجي ) جوزي كان محجوز هنا في المستشفي لمدة 6 أيام قبل هروبه ، وقبل ما أمشي شفت ست متقدمة في السن بتعيط ومتعصبة وعمّاله تشتم وتصرخ في وش كل الممرضات ، الست قالتْ إنْ ابنها محجوز هنا من 6 أيام وإدارة المستشفي لم تخبرها ، بدأ يسود الهرج والمرج والممرضات اتجمعوا وبقية موظفين الأمن حضروا وحاولوا يهدوا الست اللى عمالة تصرخ وتزعق ، كنت معاهم بحاول أهدّى في الست ، وعرفت منها أنها أم نادر الناجي اللى استلمنا جثته ، لمّا الممرضة قالتلها :
ـ يا هانم اللي بستألي عنّه مش ابنك .
قالتْ السيدة في هستريا :
ـ ابني نادر الناجي ...وأنا هرفع عليكم قضية .
مكنتش عارفة أقول إيه ، لو قلتلها إنْ نادر الناجي ميت من أسبوع الست ممكن تروح فيها ؛ علشان كده انسحبتُ وأخدت زاوية وبدأتُ أتابع اللى هيحصل ، السيدة كانت لسه بتزعق والممرضات بيحاولوا يهدّوا فيها مع موظفين الأمن لحد ما مجموعة من الأطباء حضروا وأمروا موظف الأمن بإخبار مدير المستشفي ، وبعد دقائق شفت موظف الأمن بيأمرنا جميعا بالتوجه لمكتب مدير المستشفي ، ساعتها تليفوني رن وقرأتُ اسم
( هاني بيه ) اللى قال :
ـ عاجبك يا مدام نادية الشوشرة دي .
فضلنا قاعدين في مكتب مدير المستشفي نص ساعة لحد ما وصل هاني بيه اللى نظر لي نظرة عتاب ، وبدأتْ السيدة تحكي اللى حصل معاها :
ـ أنا بقالي 6 أيام بدور على ابني مش لقياه ، اسمه مش موجود في قائمة المتوفين ولا قائمة المصابين ، لحد ما بدأتُ أدوّر عليه بنفسي فى المستشفيات وعرفت امبارح إنّه محجوز وفاقد الذاكرة ، كانوا رافضين أشوفه لأنّي معنديش دليل إنه ابني ، ولمّا قدرت أدخل المستشفي عرفت إنّه هرب ، يعني دا إهمال وتقصير .
هاني بيه قال :
ـ نفس الكلام بتقول مدام نادية ، بتقول إن اللى كان محجوز هنا يبقي جوزها وإنها شاكة في الجثة اللى استلموها إنّها مش جثة جوزها .
مدير المستشفي قال :
ـ ياحضرات اللى تم دفنه اسمه نادر الناجي و...
وقبل ما يكمّل كلامه قاطعته صرخة من السيدة :
ـ ابني ممتش يا دكتور ..ابني هو هرب من المستشفي ، واللى مات هو نادر التاجي مش الناجي ...أنا قرأت قوائم الأسماء ومتأكدة من كلامي .
مدير المستشفي قال :
ـ حاليا اللى قام برصد للجثت والمصابين وكتب الكشوف بيتحقق معاه بسبب إنّه بسبب الضغط اللى كان عليه كتب نادر التاجي في قائمة المتوفين رغم إنّه مصاب .
السيدة قالتْ :
ـ المصاب هو نادر الناجي مش التاجي .
مدير المستشفي قال :
ـ طيب كده الموضوع عند هاني بيه .
بعد يومين كان الموضوع وصل للنيابة اللى أمرتْ بفحص سرير الشخص الهارب علشان تعمل تحليل dna بس للأسف ملقيتش أي حاجة ، ساعتها النيابة أخدت أقوالي أقوال إيهاب أخويا وأقوال السيدة كوثر وأقوال الممرضات وأخيرا وكيل النيابة أمر باستخراج الجثة .
تاني يوم كنت أنا وإيهاب والسيدة كوثر قدّام المشرحة في انتظار تقرير الطبيب الشرعي ، فضلنا منتظرين 5 ساعات لحد ما أخيرا تم استدعائنا لمكتب مدير المستشفي اللى كان فيه هاني بيه والطبيب الشرعي ووكيل النيابة ، ساعتها كنت ببص على فم وكيل النيابة بترقب وبتركيز وهو بيقول الجملة المنتظرة :
ـ تبين أنّها جثة نادر الناجي 27 سنة أعزب ، الموت اختناق بسبب حريق من الدرجة الأولي .
وهنا السيدة كوثر فقدتْ الوعي .
بعد ساعة كنت أنا وهاني بيه بنوصل السيدة كوثر بعد ما فاقتْ إلى بيتها ، وأصريت إنّي أقعد معاها شوية ، الموضوع كان صعب عليها أوي ، وعرفت إنْ المرحوم هو ابنها الوحيد وكان عايش معاها في نفس الشقة ، فضلت أواسي فيها وقلتلها أنّى هكون معاها وإنّي زي بنتها وإنْ هاني ابن حلال ومش هيتأخر عنها في اى حاجة لو احتاجت اى مساعدة ، السيدة مكنتش عارفة ترد غير بدموعها ، وفضلت قاعدة معاها طول النهار لحد ما لقيتها تماسكت شوية وتركتها بعد ما وعدتها بزيارتها بشكل متكرر .
روحت شقتي وأنا بفكر في كل اللى حصل وبفكر في مهمة ازاى ألاقي جوزي ، طبعا خلال اليوم التالي عملت محضر فقدان زوجي ، والمستشفي عملت محضر هروب ، والنيابة بدأت تحقق مع موظفين رصد وكتابة أسماء المتوفين والمصابين ، أمّا تحقيقات الحريق شغالة من أول يوم ؛ لانها بتشك في شبهة تخطيط للحريق ، وبالليل وأنا سهرانة سمعت صوت إشعار من فيس بوك ، كان إشعار بوصول رسالة ، لقيت مكتوب :
ـ صدقتي بقا إنّي عايش ..قلتلك عايش وهظهر فى الوقت المناسب .
وهنا افتكرت كلام هاني بيه لمّا قال دا أكيد واحد معاه تليفون جوزك وبيتسلي وعايز منك كام جنيه ، وافتكرت لما هاني بيه قال اني لازم اجاريه فى الكلام لحد ما اعرف طريقة تسليم الفلوس علشان الشرطة تقدر تعرفه ، ومهم إنّكم تعرفوا إنْ الراجل المجهول ده بيكلمني على الماسنجر كتابة فقط لأن شركة الاتصالات قالت ان خط فودافوان اللى كان بستخدمه جوزي موقوف حاليا ، المهم كتبت :
ـ عايز كام ؟
أجاب عن طريق الكتابة :
ـ 20 ألف جنيه .
فكرت شوية قبل ما أكتب :
ـ مش كتير .
قال عن طريق الكتابة :
ـ مش كتير على جوزك .
جوزي إيه يابن الكلب ، قلتها في سري بس كتبت له :
ـ طيب هات رقمك أو حسابك البنكي وهبعتلك الفلوس :
ـ وهنا كتب :
ـ ههههههههههه اه مغفل أنا علشان اكتبلك رقمي ...الفلوس يا حبيبتي هتبعتيها بطريقة الجو .
كتبت مستفسرة :
ـ الجو ؟!!!
كتب موضحا :
ـ خلال 48 ساعة تكوني جبتي نجار يعملك 4 قوائم من الخشب فوق سطح العمارة ، ويوم الخميس الساعة 1 الظهر كوني جمب القوائم الخشبية ، هتلاقى 10 حمامات ( جمع حمامة ) جاية من الجو ، تربطي في رجل كل حمامة كيس فيه ألفين جنيه من فئة الـ 200 جنيه علشان ميبقاش تقيل على الحمام ...ودا طبعا بعد ما تُطعمي الحمام وتشربيه لأنه روح وربنا أمرنا بالرحمة ...ولا إيه .
لما كلمت هاني بيه قلتله :
ـ هو أنا ليه مجبرة ابعتله فلوس ، دا نصاب ، ومفيش خطر منه ، جوزي كده كده فاقد الذاكرة وهرب ، يعني جوزي مفيش اى خطر عليه من الراجل ده .
قال هاني بيه :
ـ الراجل اللى بيهددك ده هو مفتاح القضية كلها ، هو اللى هيوصلني لحل لغز الحريق ، أنا فعلا قلتلك إنّه مجرد واحد بيتسلى ، لكن الموضوع طلع أكبر من كده .
سألته :
ـ ازاي ؟
أجاب :
ـ الشركة اللى تحرقت يملكها حسان بيه اللى مات في الحريق ، والمنافس الوحيد له هو غسان بيه ، وغسان بيه كان في الصعيد ساعة حدوث الحريق ، وكمان احنا منقدرش نستدعي غسان بيه الا لو معانا دليل لأنه راجل مش سهل وبيعرف يطلع من اى قضية بسهولة .
خلال الأيام التالية نفذت كل ما طلبه منّي ، ووضعت الفلوس في أرجل الطيور لكن قمت بإضافة كاميرا صغيرة في حجم حبة الفول السوداني في رقبة واحدة من الطيور ودي كانتْ خطة هاني بيه .
