رواية اسيرة بين يدي قاتل ابي الفصل الثاني والعشرين 22 بقلم نور آل زيادة
وكيف لي أن أخبرك عن تعب قلبي بعد خصامك
لن أقول أشتقت لكَ لكنني سأكتفي بقول
ينقصني أنتَ لأكون أنا 
__________
سيلين،،،سمعت صوت ينادي بأسمي ألتفتت بأتجاه الصوت شفت سراج عيونه حمره دم وواضح من شكله واصل قمة الغضب بلعت ريكي متوتره وخايفه إجا بأتجاهنا بسرعه وصاير بارود من العصبيه باوع على سردار
سراج،،، انتَ شتسوي هنااا؟؟؟
سردار،، وانتَ منو وليش تدخل؟
سراج،،، روح منا ولتجي بعد احسن إلك
سردار،،، انت شدَخلك؟
سراج،،، شدخلني مووو؟؟
سيلين،،، كال هل كلمه وضرب سردار بوكس على وجهه على اثره راد يوكع
شهكت خايفه من الحمايه مال سردار رفعوا السلاح على سراج انرعبت جسمي صار كله يرجف بنفس اللحضه الحمايه مال سراج هم رفعوا السلاح عليهم صارت مواجهه بين الطرفين واحد موجه سلاحه على الثاني صار واحد يهدد بالثاني
سراج،،،شعندك هناااا؟ شتريد منها؟ روح منا لااخليها تصير دم
سردار،،،لتهدد الضاهر انتَ متعرفني اني منو اني النائب العام سردار كريم
سراج،،، اعرفك كلش زين بس انتَ ألي الضاهر متعرفني
سردار،،، وميهمني اعرفك خطيبتي وجاي عليها انتَ لتدخل
سراج،،، بابا خطيبتك شنوو،، هاي مرتي تعرف شنو مرتي اريد اشوفك بعد تحوم يمها حتى اشوفك اني منو
سردار،،، مرتك شنو؟!! روح ألعب غيرها سيلين خطيبتي وتحبني واحبها وراح نتزوج
سيلين،،، ياحب هذا يا....
مالحكت اكمل كلامي لأن سراج رجع هجم علي يريد يضربه بس حراسه منعوا وهجموا على سراج عاط بيهم اسماعيل
اسماعيل،،، كااافي اخذوا مناااا وروحوااا
سردار،،، مااروح منا قبل لااحجي وياسيلين
سراج،،، انتَ عندك عقل اگلك مرتي تگلي احجي وياها عقلك وين؟ ولو شترجى من واحد مثلك عار بلا غيره وناقص
سردار،،، لك هاي عليممممن؟!!!!
سيلين،،، سردار هجم على سراج ضربه صار واحد يضرب الثاني تمالخوا والحمايه يحاولون يفاككوهم
اريد اوكف بعد مااكدر وهمه مستمرين واحد يضرب الثاني اخر شي آجتي ضربه على خشم سراج طلع دم لو شطت عطت بيهم بصوت عالي
سيلين،،،، كاااااافي،،، كافي لخاطر الله انتو على شنو جاي تتعاركون كافي
كلامي ماوقفهم وأنما زادوا واحد يضرب الثاني ومااكتفوا اخر شي سردار سحب سلاح وجهه على سراج نشف الدم بجسمي حسيت راح يغمى عليه عطت بي
سيلين،،، نززززل سلاحك شدتسووووي انتَ
سردار،،، صدك تزوجتي هذا؟
سيلين،،، اي
باوعلي متفاجىء
سردار،،، تحجين صدك؟؟!! شلون؟ وشوكت؟
معقوله بهل سرعه؟ زين واني وحبنا شلون تبيعيني بهل سرعه؟ شلون تريدين ترجعيلي وانتي على ذمت رجل ثاني؟
سيلين،،، انتَ شتحچي؟ ياحب هذا؟ ومنو گلك اريد ارجعلك؟
سردار،،، شنو هيَ لعبه يوم اريدك ويوم لا،، يوم احبك وخلي نرجع ومن أجي اليوم تحجين غير كلام وتطلعين متزوجه واحد ثاني
سيلين،،، كلامك ما إله وجود روح سردار وأنساني موضوعنا انتهى
سردار،،، لا ماانتهى لازم اعرف شنو ديصير اني مومضحكه،،، سيلين انتي ملزمه توضحيلي كل شي
سيلين،،، تقرب يمي ويريد يمسك أيدي دفعه سراج بسرعه
سراج،،، وخررر منهاااا لتوصل يمهااا هذا تحذيري الأخير
سردار،،، شتسوي مثلا؟ عندي فضول اعرف شنو راح تسوي
سراج،،، لا أله الا الله،،، انتَ الضاهر متجي بالعيني وأغاتي
سيلين،،، دفعه ورجعوا يتضاربون اعصابي انتهت وجسمي من الرچفه احس بعد ماأكدر اسيطر علي حسيت راح أفقد وگعت واسماعيل لحك عليه قبل لااوصل للأرض مسكني على عيطت أسماعيل سردار وسراج ثنينهم توقفوا وركضوا بأتجاهي
سراج،،، سيلين شبيچ؟؟
سردار،،، كله منك شوف وجها شلون صار أصفر
سراج،،، انتَ لتدخل وللمره الأخيره اگلك روح منا وعوفني اني أحير بمرتي
سيلين،، اباوع الناس ألتمت على الهوسه وسميه لازمه سيف واكفين من بعيد يباوعون علينا شربوني مي وسراج غسل وجهي اريد اسيطر على رچفة جسمي مااكدر
سردار واكف ومصر ميروح نضراته عليه سألني مهتم وخايف عليه وهل شي خلا سراج يتخبل
سراج،،،شيل عينك منها لاأفگسها ألك وروح منا
سردار،،، مااروح منا قبل ماافهم كل شي
سراج،،،ولي منا وديربالك اشوف خلقتك بعد هنا لاوحق من انزل القران يصير موتك على أيدي
سيلين،،، جرني بقوه وكومني حاضني يمشيني بصوت مرهق كتله...
سميه وسيف جيبهم ويانا
سراج،،،اسماعيل انتو ابقوا هنا عينكم عليهم ليطلعون لأي مكان وأي شي يصير بلغوني
سردار،،، وين ماخذها ورايح؟
سيلين،،،ماسمعله ولا أهتمله دفعني بالسياره وسد الباب بقوه صعد يرجف من الغضب ساق السيارة بكل سرعته كل شويه اكول راح نسوي حادث ورغم هذا ساكته ماعندي حيل لأي شي احس دماغي راح ينفجر من الصداع والرچفه بجسمي ملازمتني مترضى تروح،، ضرب على الستيرن فززني من عاط
سراج،،، تطلعين وتكسرين كلمتي تكوليلي اروح اشوف صديقتي وكلت خلي امشيها يمكن صدك هواي ضغطت عليها رغم متستاهلين تالي طلعتي رايحه تشوفين العار مالتج عندج موعد ويا
سيلين،،،جاوبته بصعوبه... شنو العار مالتي؟ وشنو عندي موعد؟ انتَ تعرف شنو تحجي؟ هو هذا أسلوب كلام؟
سراج،،، لتخافين راح اخلي كلامي وياج بعد وزن وقافيه بس انتضريلي،،، اني تضحكين عليه ورايحه تشوفين حبيب الگلب
سيلين،،، سراج انتبه لكلامك لأن ألي بالك كله ماأله وجود
سراج،،، يصير خير،، يصير،، الله كريم
سيلين،،،سكتنا الى ان وصلنا للبيت دخل السياره للكراح نزل وجرني بعصبيه
سيلين،،، اااخ،، شبيك؟ ايدي راح تنخلع
ولاسمعلي دخلني وشمرني على الارض خليت أيدي على عيوني الصداع نزل على عيني وهو يفتر يمي روحه مفرفحه
سراج،،، شسويلج بس فهمينيييييي؟ هسه شنو اسويلج؟ اموتج واخلص منج لوشسوي ولج انتي شنو من بشر لاتنصدين ولاتنردين صلفه وعرمه كلها افتهمناها بس ماتصورت توصل بيچ انتي وعلى ذمتي تروحين تلتقين بهذا العار
سيلين،،، والله مارحت اشوفه صدفه من رحت لبيتي إجا
سراج،،، وشمدري انتي جايه للبيت يعلم الغيب شنو هل الصدفه؟
سيلين،،، صدكني صدفه
سراج،،، مطييييي،،،، كدامج مطي،،، فهميني ولچ شنو شايفتني مضحكه وتضحكين عليه بيت تاركته صار أكثر من ثلاث اسابيع وهسه تروحيله وفجئه وصدفه يجي يشوفج هاي وين لكيتيها؟
جااااااوبي؟
سيلين،،، مااعرف صدكني ماادري بي راح يجي
سراج،،، طلعتي تحبي ويحبح ومتوقع منج للان تنتضري هسه يله عرفت ليش سويتي كل شي حتى لنتزوج طلعتي عايشه على اطلاله ومتأمله يرجعلج ندمان،،، تحبي؟ كولي تحبي مو؟
سيلين،،، مااحبه ولااريده،، كافي
سراج،،، كافي مو؟ تريدين تخلصين مني وتروحيله تريدين تنزلين راسي سويتيها ليش ماسويتيها كم مره عدتيها
سيلين،،، كافي لخاطر الله راسي راح ينفجر من صياحك،،، كتلك ماادري بي راح يجي ولااريده ولااحبه كافي تضغط عليه
إجا جرني بقوه من مقدمة قميصي
سراج،،، شنو حجيتوا؟
سيلين،،، ماحجينا شي
سراج،،، لتجذبييييييييين
سيلين،،، ماكال شي بس إجا يعتذر
سراج،،، يعتذر وترجعيله مو؟
سيلين،،، شرجعله كل عقلك حتى لو مامتزوجتك ماارجعله
سراج،،، ليش لعد متريديني لأن تحبي مو بس كبريائج يمنعج ترجعيله لأن عافج
سيلين،،،دفعته بقوه
كااااااافي افهم يابشر كتلك مااحبه ولااريده
سراج،،، لعد ألمن تحبين؟
سيلين،،، مااحب احد كلكم مااريدكم ولااحبكم عوفوني بحالي ساعة السوده الشفتكم بيها الله ياخذني واخلص منكم كلكم كافييي دمرتونييي
سراج،،، ليشششش كوليلي ليششش شسويتلج حتى هيج تسوين؟ ليش كارهتني؟
سيلين،،، انتَ اخر واحد تحجي كل شي صار بيَ بسببك انتَ واهلك واهلي تغشم روحك موو وبعدين انتَ موكلت فتره ونتطلك شكو ضايج
سراج،،، انتي شنوو يعني على ذمتي ورايحه تلتقين بحبيب الگلب والله واعلم لومااجي چان شنو صار يمكن تنهزمين ويا لو تخونيني عادي والله شنو زواجنه شكلي موو؟
سيلين،،،لهنااااا وكااااافي ألزم حدك شلووووون هيج تحجيييي شنووو شايفنييييي ساق*طه لو طالعه عن الطريق شلون تكول تخونيني ويا شنو شايفنه أني ويا بوضع مخل وهيح تحجي رجال غلط وعرف غلطه وآجا يعتذر ويحاول يصلح الصار وميدري بيَ أتزوجت لويدري اكيد ميجي هذا كل مافي الموضوع
سراج،،، ها احترگ دمچ على هذاك العار الماعنده غيره العافچ وحدچ بالمراكز وطلگج
سيلين،،، أنتَ كلتها واحد ناقص على شنو احترمه ويحترگ دمي علي وبعدين انتَ علساس احسن منه انتَ لو غيرك لفقتلي تهمه وخليتني بالتوقيف كسفت أحوالي حتى تنتقم وماكفاك ساومتني حتى اتزوجگ يعني أنتَ متفرق عنه شي ثنينكم ماعدكم غيره
بعد هل الكلام إجاني كف قوي على خدي وجهي صار نار ضليت أباوعله مصدومه و حاطه ايدي على خذي نزلت دموعي من شاف دموعي شفت الندم بعيونه تقدم عليه عطت بي
_وخررررر،، وخررر عني ديربالك توصل يمي كرهتك والله كرهتك كل مااصفي النيه وياك ترجعنا للصفر والله لواعرف اموت نفسي بعد ماابقى وياك
ابتعد وضرب ايده بقوه بالحايط سمعت صوت عضامه عطت مفزوعه
_هاااااي شسويييييت!!!!! تخبلتتتتت؟
ركضتله اشوف ايده ماخلاني وجها صار احمر دم كعد على القنفه جسمه يرجف من العصبيه
انطيني ايدك خلي اشوفها
سراج،،،، وخررري عنييي،،، لتسوين نفسج مهتمه
سيلين،،، ركضت للثلاجه طلعت ثلج لفيته واجيت حتى احطه على ايده مبين كلش واضح متألم ويكابر سحبت أيده اريد اخليله عاط
سراج،،، وخرررري ماااااريد
سيلين،،، خلي اخليلها ثلج
سراج،،، مااريد مااريد
سيلين،،، ايدك يمكن انكسر العضم بدت تورم
اخذه مني خلا على أيده وباوعلي بعتب
سراج،،، تشبهيني بهذا الناقص بعز الشده عافچ وماوكف وياچ وفوكاها ماانتضر طلگچ وأني رغم كل السويتي بيَ من بلغني فؤاد بعز تعبي ومرضي وبعز ضوجتي منچ ركضتلچ كل شي سويت حتى أطلعچ ملايين دفعت حتى قضيتچ لتصعد محكمه ماخليت شخص ماوسطته حتى يساعدچ الشهود دفعتلهم وخليتهم يعدلون شهادتهم وكفت حياتي لاشفت نوم ولاراحه ولارجعت لبيتي گلبي مينطيني أعوفج وحدچ وغيرتي تمنعني أخليچ بمكان مليان زلم رغم الكل مشتري بس اخاف عليچ لگمه ماأكدر آكل تالي تشبهيني بي
سيلين،،،كل السويته لأن انتَ السبب بي انتَ ورطتني بهل شي
سراج،،،شنووو شايفتنيييي حيوان بلا شرف لو شنو بالضبط حچيتيها بالمركز وسكتتلچ كلت اعصابها تعبانه ماچنت متوقع كلامچ قاصدته شلون تفكرين اني ممكن اسوي هيچ بيچ شلووون؟
سيلين،،، شنو يعني؟!! يعني موانتَ سجنتني موانتَ ورا الموضوع؟
سراج،،، طبعا مواني شلون هيج اسوي
سيلين،،، شلون يعني؟ احجي الله عليك بداعت بناتك هاي الحقيقه لولا؟
سراج،،، طبعا الحقيقه شنو خايف منچ مثلا لو اني مسويها،،، اصلا شلون هيج اسوي
سيلين،،، شنو ديصير ياربي،،، زين فهمني لعد منو سوا بيَ هيچ؟
سراج،،، اخت ثامر ورا الموضوع هيَ ورچلها سووا هيچ حتى ياخذون حضانة سيف ويستولون على ماله
سيلين،،، تحجي صدك؟ انتَ متأكد؟
سراج،،، طبعا متأكد ليش مستغربه لوغريبه عليها ومتكدر تسويها بس سراج عادي تتوقعين يسويها
سيلين،،، اني ماكلت هل شي ولا انتَ بوقتها وضحتلي هل شي سكتت وسكوتك فهمني انتَ سويتها حتى تنتقم مني وأكدتلي تفكيري صح من ساومتني على الزواج شلون بعد تريدني مااشك بيك وأتهمك
سراج،،، شكيتي بيَ وأتهمتيني لأن بداخلچ تتمنين اني اطلع ورا هل الموضوع حتى تبررين لنفسچ الأذيه الأذيتيها ألي صدكيني بوقتها حتى لو مصره على الرفض من الزواج مني هم چان طلعتچ چنت مستعد اي شي اسوي حتى أطلعچ أمابالنسبه لزواجي منچ چنت أكدر اتزوجج بأي طريقه أخرى مع الأسف كل يوم تثبتيلي انتي اكبر غلطه بحياتي
سيلين،،، مامجبور عليه طلعتني من شدتي وخلف الله عليك وأشكرگ وشكو شي صرفته أرجعه ألك وكلمن يشوف طريقه غلطت وياك وانتَ رجعت أعتبارك وانتهى الموضوع
مسك أيده ووكف حجا متألم
سراج،،، انتهى بالنسبه ألچ اما بالنسبه ألي هسه يله بدى
سحب جنطتي بصعوبه فتحها وجها احمر من الألم طلع الموبايل اخذه وطلع واني بعدني بصدمة كلامه كل هل وقت متصوره سراج ورا سجني طلعت غفران ،،، شكد غثني بكلامه و انصدمت وأذاني الكف وجرحني بس تأذيت اضعاف على اذيته ضرب أيده الضربني بيها عاقب نفسه بنفسه كعدت منهاره دموعي نزلت على نفسي وعلي ليش هيح يصير ويانا؟ سردار شجابه؟ ليش كل الأمور ضدنا،،، هذا حضي لوحضه؟
كعدت جسمي كله يرجف من الموقف الصار وافكر بكلامه و بسيف وسميه مرت الساعات وماإجا اي احد كمت غيرت ملابسي دماغي ميرضى يتوقف من التفكير والصداع زاد ماقل أخذت مسكن وماهدء نمت شويه كعدت شويه احسن
باوعت على الساعه صار الليل وسراج مارجع خفت مااتحمل اضل وحدي واخاف بالليل ساعه ١٢ بالليل سمعت صوت المفتاح بالباب وكفت دخل سراج باوع عليه وشاح نضره قفل الباب دخل اباوع كف أيده مچبس يعني فعلا أنكسرت أيده من ضربها اني من سمعت صوت عرفت أنكسر العضم من دون سلام ولاكلام توجه للغرفه كتله
_شلون صرت؟
ماجاوبني ولاأهتملي مشيت ورا
_وين سيف وسميه ليش ماجبتهم؟
ماجاوبني عفته الضاهر ماعاجبه يجاوب رجعت كعدت ساعه وما سمعت إله صوت ولاطلع أتجرئت ادخل للغرفه لكن ماشفته رحت للحمام هم ماكو طلعت ادور علي لكيته بغرفة سيف نايم على سرير سيف سألته
_ليش ماجبتهم وين بقوا؟
ماجاوبني واحس يتلافى يباوعلي كررت السؤال جاوبني ببرود
سراج،،، اطلعي مااريد اشوفج
سيلين،،، ومنو كلك رايده اشوفك اريد اعرف وينهم وليش ماجبتهم هنا؟
سراج،،، أتجفي شري وطلعي ترا واصل مرحله يمكن اموتج ومينشفي غليلي منج
سيلين،،، جاوبني واروح
سراج،،، بالبيت وين يعني بقوا بالبيت وبقيت يمهم ثتين من حراسي وكل شي جابوا أ لهم وزينين مابيهم شي يله ارتاحيتي اطلعي
سيلين،،، ليش بقيتهم؟
سراج ،،، اطلعيييييي من يميييي
سيلين،،، شلون صارت ايدك؟ وخشمك خوما تأذى ؟ أجيبلك مسكن؟ محتاج شي؟
باوع عليَ بنضره غريبه ونزل عينه طلع چكاره وشغلها
سراج،،، روحي نامي مااريد شي
سيلين،،، ردت احجي ويا وأكعد أفهمه كل الصار لأن هو هم حقه صعبه علي كرجل يشوفني واكفه ويا خطيبي السابق ولو هو هم غلط وأتهمني وشك بيَ بس خلي افهمه أفضل ماتكبر بينا الفجوه قبل لااتكلم هو نطق بعچرفه
سراج،،، أطلعي منا وسدي الباب
سيلين،،، طريقته بالكلام أستفزتني وكبريائي منعني أبقى ويا بنفس المكان غلقت الباب وطلعت رحت للغرفه ضليت ألوب أحس نار صارت بداخلي وشي خنگني ومعدتي صارت تغلي وتوجعني من الجوع لاغدا ولاعشا رحت فتحت الثلاجه وضليت صافنه بيها تعاجزت اسوي اي شي طلعت تفاحه وبرتقاله أكلتهن ورحت للغرفه طلعت المرطب اسوي عنايتي فتحت
العلبه مالي واهس ومزاجي زفت غلقتها وشمرتها على الميز ما ألي مزاج لأي شي
مددت بفراشي وضليت افكر صارت ساعه ٣ ليلا واني كاعده اتقلب بفراشي بعدعناء غفيت فزيت باوعت على الساعه ساعه ٣:٣٠ يعني نمت نصف ساعه كمت من مكاني رحت لغرفة سيف فتحت الباب بهدوء دخلت لكيته نايم ووجها احمر ومتعرق لمست بشرته لكيت حرارته كلش مرتفعه رحت بسرعه جبتله إناء مي وخاولي صغير وجبتله علاج خليت الخاولي على جبينه فز
سراج،،، شعندج هنا شدسوين؟
سيلين،،، حرارتك مرتفعه دااسويلك كمادات وجبتلك علاج
سراج،،، مابيَ شي ماكو داعي
سيلين،،، عوف العناد
سراج،،، هاي منو تحجي بالعناد ملكة العناد والتمرد عوفيني ولتسوين نفسج مهتمه
سيلين،،، زين على الاقل اخذ خافض الحراره ومسكن ليصيرلك شي
ضل يباوع عليه راد يحجي وسكت اخذ مني العلاج بلعه وشرب مي وألتاف على الجه الثانيه انطاني ضهره ونام رفعت الغطا غطيته حسيت برجفة جسمه من صعدت الغطا على اكتافه
ردت اغلق الباب سمعته تنهد بحسره غلقت الباب راجعه لغرفتي المهم اخذ العلاج على الأقل أطمئن شويه،، صار آذان الفجر صليت ونمت
كعدت الصبح رحت للغرفه مالكيته دورت بباقي البيت ماكو طالع
غسلت و سويت ريوك وأكلت،،، ضليت وحدي باقي النهار كله ما إجا ملت روحي يعني شنو عود ديعاقبني بهل طريقه لو شنو بالضبط ضليت النهار كله بين أقلب بقنوات التلفزيون تابعت افلام ومسلسلات حتى امشي الوقت وبين صليت سبحت صار الليل وما إجا ولاتفقدني نهائيّ حسيت بالجوع طلعت لحم مثروم سويت بيض ولحم وچاي واكلت
بعدها سويتلي تنضيفه سريعه للبيت صارت ساعه ١٢:٣٠ باليل دخل للبيت وبدون سلام دخل للغرفه فريت ايدي من تصرفاته عرفت صار يمارس ويايا الصمت العقابي قررت اني هم مااعبره الضاهر هذا من شافني خفت علي وأهتميتله عاش الدور براسي وصار هو المضلوم
بعد ماتأكدت طلع من الغرفه وراح لغرفة سيف رحت للغرفه سويت عنايتي الليلية وغيرت ملابسي ونمت بفراشي هسه غير اكول معليه بي ومااهتم بس كذب داخلي يغلي كارهه تصرفاته وبالتحديد شنو معناها مبعد ابني وسميه عني شنو معناها كل مره يريد يعاقبني بيها يبعدهم عني ويلتزم الصمت هذا مو وضع
ضليت اكل بروحي من الغضب ماتحملت قررت اروحله اتعارك ويا وشيصير خلي يصير
رحتله للغرفه فتحت الباب ودخلت لكيته كاعد على السرير ومنزل رجله ويدخن من فتحت الباب رفع راسه ونزله مامهتم
_شنو غايتك من هل تصرفات؟ ليش لهسه ماجبتهم هنا وشنو عايفني النهار كله وحدي ساجني على شنو؟
سراج،،، طلعي منا
سيلين،،، جيبهم الباچر لو توديني يمهم
عاط بيَ
سراج،،،، رووووحه لهذاااااك البيت بعد تنسيهاااا افتهمتيييي لو لاااااا اني مو مكرررررن
سيلين،،،وشنو الداعي لهل كلام هذاك البيت بيتي وطبيعي اروحله
سراج،،، ماكو روحه بعد وماكو طلعه منا
سيلين،،، ترا وصلت حدها منك اكول اسكت مومال مشاكل بس الضاهر سكوتي يفرعنك اكثر شاك بيَ وماعاجبك الوضع طلكني وخلصني واخلص
كام وتقدم اتجاهي بغضب
سراج،،، سالفة الطلاك انسيها طلاك ماطلك
سيلين،،، اكو بينا اتفاق
سراج،،، الاتفاق هم انسي اني موزوج تريدين تطلكين حتى تروحيله
سيلين،،،صدكني عجزت افهمك انتَ شتريد بالضبط لا ساكت ومصدكني ومخليني اتقبل عيشتي وياك ولا مطلكني وعايفني
سراج،،، هذا الموجود عندي
سيلين،،، واني هل شي ميعجبني
سراج،،، عسا لاعجبج شتسوين سوي
سيلين،،، ماابقى هنا والله ماابقى شنو هل العيشه هذا سجن أنفرادي،،، فهمني وين تريد توصل؟
سراج،،، للحقيقه،،، مابقى شي واوصل للحقيقه ووراها يصير خير
سيلين،،، رجع ابني وسميه هنا
سراج،،، لتأمريني
سيلين،،، هذا مو امر هذا حقي من الطبيعي يكون ابني يمي لو هذا هم بيها شي لو إنه وشك؟
سراج،،، اجيبه بس موهسه انتضري
سيلين،،، شكد انتضر؟
سراج،،، لتلحين كتلج انتضري
سيلين،،، عفته وطلعت قبل لااسد الباب باوعت علي وسألته
متعشي تريد اسويلك عشا؟
سراج،،، مااريد
سيلين،،، خفتا وراحه سديت الباب بقوه واسمعه يدردم عليه
هو صوجك لوصوجي اني فوك كل السوا شكو مهتمه اكل ولا ما أكل شكو مدوخه نفسج بي ليش هو مهتم ألج والله بعد فلا احجي ويا
لفيت راسي ونمت ثاني يوم كعدت وهم لكيته طالع وكرر السوا وهل شي استمر ١٠ايام يجي للبيت ساعه ١٢ باليل وينام ويطلع من الصبح من اخر مره تناقشنا ماصار بعد بينا اي حوار هو بجها واني بجها
خلال هل الايام اعصابي تعبت ونفسيتي صارت تحت الصفر بديت ادخل بأكتئاب وكرهت حتى الأكل طول الوقت افكر بأبني وحتى من انام احلم بي اتضاهر امام سراج بالقوه لكن داخلي منهار ومهشم كل يوم قبل لاانام تصير عندي خنگه وحسره ماارتاح الاأبجي تعبت كلش تعبت عشت ضغط قوي ومااعرف شوكت راح ينتهي چنت كارها ورافضه كل أفعاله ويايا توقعت راح يجي يوم ويتندم وينتهي هل الخلاف ويرجع كل شي بمكانه ماكنت اتصور راح يصير الأسوء بأضعاف
______
ساره،،،، صارلي اسبوعين بيت وياناس مااعرفهم ولايربطني بيهم صله طول الوقت معزوله بغرفه كانت بالأساس مغزن للاغراض القديمه ضليت اسبوع مخنوكه من المكان غرفه صغيره ومليانه اغراض وفراش انام على دوشك على الارض ومامرتاحه نهائيا
اخجل اطلع طلعتي على كد الحمام يصيحولي على الاكل اخجل اطلع اول كم يوم ضليت اكل من الأكل الأشترته سيلين الي ومن خلص اضطريت اطلع اكل وياهم من نكعد على المائده الكل يباوع عليه وزوجة اشرف طول الوقت تخزر بيَ وتسمعني كلام وحتى امه نفس الشي
بناتهم طول الوقت لوطالعات لوبغرفهن الوحيد الحجي والحجيه عمتهم يعاملوني زين ويحترموني الي مصبرني هو اتصالي بأمي واختي وبسيلين وسميه ورا اسبوع اجتي سيلين وجايبه اثاث وعمال طلعوا الغراض الي بالغرفه رتبوها ورتبوا الاثاث وجايبتلي ثلاجه وقلايه هوائيه وچدر كهربائيّ وغلايه واكل وحلويات ومعلبات وعصائر وخبز ومعجنات جاهزه واجبان و فواكه و حتى مي و أضرف چاي ومواعين سفري وأقداح ومستلزمات خاصه وشخصيه كل شي جايبه مجهزتلي مستلزمات بيت هههه سيلين ناويه من هسه أعزل
خلصوا ترتيب اباوع الغرفه صارت مرتبه وتشرح طلعت وأستلمتني ام اشرف ترزل بيَ ومن إجا اشرف وسمع ماخلا حجي وغلط ماغلطه بالبدايه خفت بس بعدين كلت شكو خايفه بقيت بغرفتي وطلعت من الفطائر سخنتها بالقلايه وطلعت عصير وأكلت
تذكرت من آجت سيلين والحجي سألها على الغراض ورفض تصرفها كالتله صارلها عدكم اسبوع منيميها بمخزن مليان غراض معفنه كان المفروض تخلوها بغرفه مال بشر اذا انتو ماعدكم ترتبولها مكان مناسب يليق بيها فعدها اهل واخت يقومون بالواجب بلحضتها شكد حسيت بالفخر لأن عندي صديقه مثل سيلين أحس بالقوه من توكف ويايا وأحس عندي سند بالحياة من بعد رب العالمين
بوقتها كلامها سكته لان يعرف كلامها حقيقي هو للامانه ماراضي على وضعي واسمعه كذا مره يعارك بيهم بس ماكو احد يسويلي حل ارتاحيت من رتبتلي سيلين الغرفه ضحكت من جابتلي الاغراض واستهزئت بس بعدين من صرت اجوع واطلع و اسخن بالقلايه واسوي چاي وحليب بالغلايه وحتى سويت اندومي بالجدر الكهربائي هنا عرفت قيمة السوته وعرفت ليش جابتهن حاسبه حساب كل شي بحيث مااضطريت اطلع واشوف خلقهم ولااسمع كلامهم الي يسم البدن
ورا هل يوم سيلين اختفت اتصل ومترد اتصلت بسميه وفاجئتني بكلامها اخذها الشيخ للبيت وحدهم وترك سميه وسيف يمها حجتلي عن المشكله الصارت بسبب سردار ومن اخذها وحدهم عرفنه سوا نفس السوا من انهزمت تصرف بنفس الطريقه وعزلها عنهم
امي مريضه وكل تواصلي وياها عن طريق الموبايل من تحسنت اجتي هي واختي شافوني واطمئنوا عليه وراحوا من اجوي سألت على مؤيد امي عاطت بيَ وسكتتني متريدني اذكر حتى اسمه لليوم تصرفه وكلامه يدور بعقلي اكذب اذا اكول نسيته لكن بنفس الوقت گلبي مجروح منه جرح مااضن راح يجي يوم يطيب ورا اسبوعين طلعت الفجر اتوضى حتى اصلي شفت الحجي صبح عليه
_شلونج يابا؟
ساره،،، الحمدالله
_ليش منشوفج وعازله نفسچ طلعي خلي نشوفج
ساره،،، وجودي غلط ومضايق الكل الافضل ابقى بغرفتي
_لتحجين هيج يابا بالعكس اني افرح من تطلعين وتكعدين يمنا معليج بأم اشرف وزوجة اشرف بعدهم ميعرفوج وماخذين موقف طلعي وكعدي خلي الكل يتعلم ويتقبل وجودج بهل بيت انتي موضيفه انتي صرتي وحده من اهل هل بيت
ساره،،، خجلت منه كتله،،، ان شاء الله
_انتبهتلج يوميه تكعدين بهل وقت
ساره،،، اتوضى لصلاة الفجر
_ماشاء الله احسنتي الله يرضى عليچ
ساره،،، حسيته استغرب شنو الغريب بكلامي مافهمت
رجعت للغرفه وثاني يوم وقت الغذا ارسل العامله عليه يطلب مني اشاركهم الغذا رفضت دقائق ورجعت الباب انطرقت وسمعت صوت الحجي خجلت،،، فتحتها
الحجي،،، بنيتي ليش متجين تتغدين ويايا
ساره،،، مااشتهي
الحجي،،، ميصير هيج ابويه تعالي اكلي ويانا بعد انتي صرتي من اهل هل بيت ولازم تتعودين السالفه موسالفة يوم ويومين وتمشيهن بالغرفه اطلعي حتى تتأقلمين،، يله امشي ويايا ولترديني
ساره،،، خجلت منه خصوصا هو إجا بنفسه رتبت شالي وطلعت لكيت الكل ملتم ماعدا اشرف سلمت وصاحلي الحجي اكعد على الكرسي الي بجانبه كعدت وبديت اكل ماباوعت على اي شخص مااريد اشوف نضرات الاستحقار منهم واضح من نضراتهم الكل محملني مسؤوليه الصار وابنهم هو الضحيه الملاك المامسوي شي
اكلت بسرعه وقررت ارجع للغرفه لأن اختنكت اول ماوكفت كالت الحجيه
الحجيه،،، لتروحين للغرفه نريد نشوفج ونحجي وياج مامليتي حابسه نفسچ
ام اشرف،،، خلوها على راحتها
الحجيه،،، اني اريدها اريد احجي وياها
ساره،،، ترددت وضليت حايره شنو اسوي الحجيه كامت واشرتلي اروح وراها كعدت بالصاله الداخليه كعدت يمها جابوا الچاي وأنضم ويانا بالكعده الحجي صاروا يسألوني ويفتحون مواضيع عن اهلي وعن حياتي واضح اسألتهم موفضول وانما يريدون يفتحون حوار بينا حتى يروح الخجل والتوتر وأتعلم عليهم جابت العامله بسكويت وياالچاي
الحجيه،،، حجي لتاكل منه. ليرتفع سكرك وتتخربط
الحجي،،، مشتهي اكل حلا
الحجيه،،، وورا ماتاكل يرتفع وتتخربط
الحجي،،، شسوي،، شيصير خلي يصير
الحجيه،،، وتالي وياك شوكت تبطل الحلويات؟
الحجي،،، من اموت
ساره،،، جاوبنه ثنينه،، اسم الله
اذا تحب الحلويات لهل درجه اكل حلويات خاصه لمرضى السكر احسن ألك
الحجيه،،، ميحب هاي الحلويات يكول طعمهن بي مروره
ساره،،، طعمهن يعتمد على نوع المحلى يجوز انتو تجيبون جاهزات سووهن بالبيت افضل واستخدموا محلى طبيعي وجودته عاليه واتركوا المحلى الصناعي
الحجيه،،،، هو كل اكلنا تقريبا جاهز منطبخ بالبيت نوب تريدين نسوي حلويات بالبيت،،،آحنا ماعدنا احد يسوي هنا عاملتين واجنبيات ميعرفن شي عن الطبخ العراقي وام اشرف والبنات وچنتها ميسون شي
ساره.،،، صارلي اسبوعين يمهم وهسه يله عرفت وانتبهت لهل شي فعلا اكلهم جاهز ومبين اكل مطاعم واكيد اكل المطاعم ميصير مثل الاكل المطبوخ بالبيت
كعدت يمهم شويه ورجعت الغرفه للعشا هم رجعوا صاحوني لكيت الحجي والحجيه وحدهم كاعدين على السفره والكل طالعين يغيرون جو تعشينا والحجي راد كيك
الحجيه،،، الضهر بسكت وهسه كيك انتَ ناوي تموت يااخي موزين عليك
الحجي،،، عاجبني كيك
ساره،،، انقهرت علي النفس تريد وهو يحب الحلويات و ممنوع منها كلتلهم.
اني راح اسويلكم كيك عوف الكيك الجاهز يضرك بس احتاج. كم. غرض حتى اسوي حجيتها بتردد وتصورت راح يرفض لكن كال
الحجي،،، ياريت والله وأي شي تحتاجي كولي اوصي السايق يجيبه
ساره،،، كتبت قائمه جابوها وبديت اسوي سويتله كيك بطحين جوز الهند وكيك بطحين اللوز وسويت كليچه بطحين اللوز واستخدمت محلا ستيفيا خليتهن بالفرن وسويت چاي مهيل ومن استون طلعت الروائح الطيبه مال الهيل والفانيلا قبل لااطلعهن اجوني للمطيخ
الحجي،،، شنو هل الريحه الطيبه؟
الحجيه،،، الله،،،، رجعتينا سنين ورا من جانت ام براق الله يرحمها تطبخ وتسوي الحلويات ومثل هل ريحه تفع بالبيت
الحجي،،، الله يرحمها هوَ من راحت هل بيت انهد وماشفنى يوم راحا ولااكلنا لگمه بيها حظ
ساره،،، يسولفون واني ارتب الحلويات بصحن كعدوا على الميز صبيتلهم الچاي اكل الحجي من الكليچه
الحجي،،، عاشت ايدج كلش طيبه
الحجيه،،، لتاكل هواي لتتأذى
ساره،،، خلي ياكل هذني الحلويات سويهتن خاصات لمرضى السكر وحساسية الغلوتين متضره
الحجي،، صدك والله،،، عاشت ايدچ صدك طيبات وتختلف عن الي نجيبهن جاهزات طعمهم مثل كليچة البيت العاديه أشكرج يابه ورحم الله والديج
ساره،،، ماكو داعي للشكر هي مجرد حلويات بسيطه ماسويت شي
الحجيه،،، انتي تشوفيها بسيطه إحنا رغم حالنا ومالنا بس ماعدنا احد يسويلنا هل شي
ساره،،، شعجب ماجبتوا عامله عراقيه للطبخ؟
الحجيه،،، جبنه ويومين وطردتها ام اشرف متشغل عراقيات ولاتحب شغلهن وأحنا ما ألنا خلك للمشاكل لهذا نسكت وضالين على الجاهز لاهنا طابخات ولاجايبات احد يطبخلنا
ساره،،، اي شي تريدون اني موجوده بس كولوا
الحجي،،، مانريد نتعبج يابا انتي امانتنه مو جايه حتى تطبخيلنه
ساره،،، لا والله عادي لاتعب ولاشي بالعكس اطلع من انعزالي
الحجي،،، والله يابنيتي ياريت بس بنفس الوقت مااريد يستغلوج ويخلوج تشتغلين ترا هذني ميصدكن يلكن واحد يستغلنه واحنا ماجايبيج هنا حتى يستغلوج
ساره،،، زين خلي نتفق على شغله نكول اني مااكل هل الاكل الي يجيبوا فعلساس اطبخ ألي بس اني بالحقيقة اطبخ ألي وألكم وهمه خليهم على الاكل الجاهز الضاهر يحبوا
الحجيه،،، والله لايحبوا ولاشي عجوزيات وبطرانات لاازيد ولااقل
الحجي،،، عوفينه منهن فكرتج خوش فكره
ساره،،، زين لعد اي اكله تشتهوها كولولي اطبخها
الحجي،،، بس سوي على كدنا واذا كلولج طبخي للبيت كله رفضي
ساره،، واذا ضاجوا
الحجيه،،، معليج بيهم
ساره،،، اكلوا الحلويات وكلش عجبتهم والحجي كل شويه يكلي رحم الله والديك كلش فرحان خلصت ورجعت لغرفتي
ثاني يوم من شاف نفسه مااتأذى من الحلويات رجع طلب مني اسويله منهن واني اكيد وافقت لان كلش احب الطبخ واجمل هوايه بالنسبه الي وصراحه حبستي بالغرفه تعبتني
من دخلت المطبخ اشتغل حسيت ام اشرف ومرت اشرف ضاجوا بس ماحجوا لأن كلش واضح الحجي اله سيطره بالبيت
العصر واكفه اشتغل سويت كبة سمعت صوت ضوضاء بالطابق الثاني استغربت باوعت على العامله كان وضعها طبيعي ولاكأنما سمعت شي كلت يجوز متوهمه ورا شويه رجعت سمعت صوت شي انكسر وهم العامله مغلسه ماتحملت سألتها بس متجاوب يمكن مافهمت لغتي رجعت اكمل شغلي جابوا عشا جاهز مشاوي
خلصت الكبه والشوربه اجتمع الكل على المائده ومن اكلوا الكبه الحجي والحجيه كلش عجبتهم
الحجي،،، تسلم ايدچ يابا كلش طيبه
الحجيه،، اي والله عاشت ايدج
ام اشرف،،، ترا عاديه ماكو داعي للمبالغه ألي نجيبها من الكراده هواي اطيب
الحجي،،، بس هاي تختلف اكل البيت بي نكهه خاصه
ساره،،، حسيتها ضاجت بس سكتت تذكرت السمعته وسألت
العصر من چنت اطبخ سمعت صوت بالطابق الثاني ورجع تكرر الصوت مره ثانيه ورا لحضات وصوت شي انكسر
ام اشرف،،، معليج بهل الأمور انتي هنا خطار فتره وتروحين واي شي تسمعي وتشوفي لتدخلين وخصوصا الطابق الثاني نهائيا لتفكرين تصعدين
ساره،،، استغربت اسلوبها الهجومي اتجاهي تصورت الحجي والحجيه راح يدافعون عني لان ماسويت شي يستحق هل الأسلوب لكن صدموني بعدم تدخلهم انهضمت من كلامها واسلوبها ترخصت منهم ورجعت للغرفه وقررت بعد مااكعد اكل وياهم
ورا يومين نمت الضهر وكعدت مايقارب المغرب عطشانه ثلاجتي فرغت من المي اضطريت اطلع طلعت البيت فارغ ماكو احد استغربت وين راحوا رحت لغرفة الحجيه لكيتها نايمه اطمئنيت مو وحدي بالبيت توجهة للمطبخ شربت مي وعجبني اكل شي طلعت جبن سويت لفه وسخنت الچاي فتحت الباب كلت اطلع بالحديقه شويه اغير نفسيتي اختنكت اول مافتحتها زركت من جوا رچلي بزون دخلت للبيت تورطت لومافاتحه الباب افضل دورت عليها حتى اطلعها لأن بس تشوفها ام اشرف تكلب الدنيا
ضليت ادور عليها بالبيت واخيرا شفتها وهيَ تصعد الدرج يوووو هسه هاي شلون ورطه قررت اتركها شتسوي قابل بس بعدين قررت اصعد اجيبها مااعرف هل تصرف غباء لو فضول لو شنو بالضبط بس اعرف احس نفسي شي يسيرني
وقت المغرب صعدت للطابق الثاني وهاي اول مره اسويها من يوم دخولي لهل البيت
ترددت بالبدايه بس صعدت خلصت الدرج
ومشيت خطوات مستغربه شكل المكان لأن يختلف عن الطابق الأرضي مكان عبالك مال اشباح وشكله مهجور عبالك صار سنين
سمعت صوت ورايه ألتفتت ماشفت احد رجعت كملت طريقي همست...
ااااش،،، سنفوره،، وينج اطلعي
ياربي وين اختفت حسيت بتيار هوا مر من يمي باوعت على نفس الجهه ماشفت شي هل شي سبب رعب بداخلي تسارعت دقات گلبي الى درجة راح يطلع من مكانه
قررت انزل هل مكان خوفني هسه عرفت ليش حذروني ماأصعد للطابق الثاني
أنداريت ارجع انزل ماحسيت غير شخص ورايه فزيت مرعوبه من شفته كان نص وجهه اسود ونضرات عيونه مرعبه
بلعت ريقي بصعوبه وصرت ارجع خطواتي للخلف تقدم وبلمح البصر سفطني على الجدار وقبض بأيده على رقبتي بقوه وسألني بصوت خشن ومرعب
__ منوو انتي ومنو سمحلج تدخلين هل مكان؟؟؟
