رواية اسيرة بين يدي قاتل ابي الفصل الثالث والعشرين 23 بقلم نور آل زيادة
تُ أود أخبارك أن الجميع خذلني ألا أنت
لكنك خذلتني قبل أن اخبرك
مازلت أردد
لا بأس
لا بأس وكل البأس في قلبي
__________
ساره،،،، أنداريت ارجع انزل ماحسيت غير شخص ورايه فزيت مرعوبه من شفته كان نصف وجهه اسود ونضرات عيونه مرعبه
بلعت ريقي بصعوبه وصرت ارجع بخطواتي للخلف تقدم وبلمح البصر سفطني على الجدار وقبض بأيده على رقبتي بقوه وسألني بصوت خشن ومرعب
__ منوو انتي ومنو سمحلج تدخلين هل مكان؟؟؟
ساره،،، من اكول الدم نشف بجسمي اعني هل كلمه جمدت بمكاني رجع عاط بيَ
_ شصعدج هنااااا احجي؟؟؟
ساره،،، اريد احجي انعقد لساني وصوتي راح وجسمي كله يرجف ونبضات قلبي تسارعت الى درجه احس گلبي راح يغادر مكانه
خزرني خزره مخيفه عيونه حمره والبؤبؤ فاتح عبالك بي ضوا من خوفي روحي ماعت فقدت ومااعرف شنو صار
كعدت اني بغرفتي فزيت مرعوبه ياربي دخيلك شنو هل كابوس؟!!!!
اتعوذت من الشيطان باوعت من الشباك مبين المغرب سمعت صوت الآذان اكبر غلط الشخص ينام بهيج وقت
تعوذت من الشيطان وطلعت توضيت وصليت اتصلت بأمي واختي حجيت وياهم بعدها اتصلت بسميه ردت اعرف اخبار سيلين لكن مع الاسف حتى سميه متعرف عنها شي
بعدها كعدت اقرا قرآن اني واقرا صارت خنكه عندي نزلت دموعي احس اكو حسره بداخلي سمعت صوت الباب طلعت العامله جايه تبلغي صار العشا ومنتضريني على المائده رفضت لأن احس نفسي شبعانه وصراحه ماعاجبني اكعد وياهم بنفس المكان
طلعت فلم على الموبايل تابعته المشكله رومانسي الى ان خلص خلصت دموعي شلون بيَ تنلام سيلين من تكول گلبج رهيف تذكرت مؤيد وحبنا اااخ يامؤيد شسويت بيَ حبيتك من كل گلبي وكل احلامي وحياتي خططتها وحلمت بيها وياك بعتني بأول شده وكعت بيها كل الناس توقعت يغدروني ويخيبون ضني بس انتَ لا
صليت وبچيت ودعيت لربي يفرجها عليه خلصت صلاه لكن دموعي ماخلصت الى ان غفيت والدموع بعيني
كعدت ثاني يوم جوعانه كلش طلعت لكيت الحجي والحجيه وحدهم كاعدين الكل نايمين صبحت عليهم ردوا عليه بلهفه سألتهم
_تريكتوا لوبعدكم؟
الحجيه،،، لا هسه كعدنا والعاملات نايمات
ساره،،، هسه اسوي ريوگ
الحجي،،، لتعبين نفسج يابا هسه يكعدون ويسوون
ساره،،، لاعادي تعبكم راحه
رحت المطبخ طلعت الأجبان والعسل والگيمر وسويت بيض ومخلمه وسلطه وچاي وحليب خليتهن على ميز المطبخ صحتهم وتريكنا شلت كل شي ورتبت المطبخ استغليت نوم الكل قررت اسوي غدا دولمه المواد كلها موجوده بس سلك ماكو طلعت للحديقه قطفت من اوراق العنب لفيت الدولمه بالضلوع خليتها على النار كعدن العاملات وصيتهن واخذت ملابسي سبحت طلعت لكيتها مستويه طفيتها
صارت ساعه ١٢ الضهر يله كعدوا اشرف بس كال صباح الخير وطلع من البيت والباقين كاعدين يتصفنون اخر شي زوجة اشرف رفعت الموبايل وكالت للكل
ورقاء: شنطلب اليوم اكل شنو مشتهين؟
ام اشرف،،، اي شي المهم يوصل بسرعه جوعانين
ورقاء،،، راح اطلب مندي
الحجيه،،، مامليتن من المندي يوميه شبيجن؟
ام اشرف،،، شتريدون لعد؟
الحجي،،، اني لعبت نفسي من هل الأكل شتجيبون جيبوا
ساره،،، حجي سويت دولمه تاكل؟
ابتسم ابتسامه واسعه
الحجي،،، اذا من ايدج ياريت
ساره،،، سخنتها شويه الى ان وصل المندي وصبينه اكل الكل تقريبا اكل من الدولمه ماعدا ورقاء
الحجي والحجيه كلش عجبتهم الحجي سحب صحن فارغ وخلا بي دولمه وعزلها على جانب الضاهر عجبته ياكل منها بعدين ،، خلصنا اكل اني اول ماخلصت رحت للغرفه
مر يومين نفس الروتين ثالث يوم كعدت الفجر اصلي البيت هدوء مع الأسف اكتشفت اكثر اهل هل بيت ميصلون بس الحجي والحجيه يصلون بهل البيت،،، لهذا الحجي استغرب من سمع بيَ اصلي
خلصت صلاه طلعت اجيب مي ماضل عندي بالغرفه دخلت المطبخ ضلمه خليت مي من البراد سمعت صوت طقطقه برا خفت قررت اروح اكعد احد قبل لااطلع من المطبخ انفتحت باب المطبخ الخارحيه ودخل شخص لابس كلاو على راسه انرعبت وانفزعت اريد اتحرك بعد مااكدر
رفع راسه من شفته حسيت نفسي راح يغمى عليه تماسكت بصعوبه
_ هم انتي؟ شنو السالفه انتي شتسوين هنا؟
ساره،،، هذا حلم لوحقيقه نفس الشخص الشفته بالحلم رجعت شفته،،، ياربي دخيلك صحيني اذا حلم،،، حسيت نفسي راح افقد تقدم اتجاهي
_ راح توكعين شبيج شفتي شبح؟
ساره،،، بسم الله،،، سلام قولا من رباً رحيم،، انتَ حقيقي يعني انسان؟
_ لا جن
ساره،،، اعوذ بالله اعوذ بالله من الخبث والخبائث
_ واضح على ملامحه كلش ضاج فر ايده ومشى من يمي لزكت نفسي بالحايط مر من يمي شفته صعد فوك
ياربي دخيلك اني بحلم لو علم گلبي راح يتوقف من الرعب
ركضت لغرفتي صارت الحجيه بوجهي،، فزيت
الحجيه،،، اسم الله امي لتخافين
ساره،، حجيه شفتي الشفته؟
الحجيه،،، شنو؟
ساره،،، هذا،، هذا الولد صعد فوگ مااعرف انس لو جن،، ماادري،، شفتي مو؟
الحجيه،،، لتخافين هذا بشر عادي حاله حالنا
ساره،،، شيسوي هنا اقصد منو هذا ماشايفته بالبيت وليش هيج شكله؟
الحجيه،،، اشّ،،،، صوتج ليسمعج امشي ويايا للغرفه نحجي
ساره،،، رحت وراها لغرفتها فاتت وغلقت الباب
الحجيه،،، هسه بس اصلي واحجيلچ
ساره،،، هزيت راسي موافقه ريگي نشف من الهبطه والخوف مالحكت حتى اشرب مي خلصت صلاه كعدنا على السرير
الحجيه،،، شبيج ترجفين لتخافين ماكو شي
ساره،، كلش خوفني قبل كم يوم المغرب حلمت بي حلم مرعب واليوم شفته گلبي راد يوكف
الحجيه،،، الشفتي موحلم حقيقه
ساره،،، شنووو؟؟!!!
الحجيه،،، الصار قبل يومين كله حقيقه ومن خوفج اغمى عليج نزلج هو ومن شفنا اخذناج للغرفه نومناج
ساره،،، عزززه!!! منو هذا؟ وليش هسه يله شفته؟ صار اكثر من اسبوعين هنا هاي اول مره اعرف بوجوده معقوله البارحه يله إجا للبيت لوشنو السالفه؟
الحجيه،،، على كيفح وحده وحده افهمج الشفتي هذا براق يصير حفيد الحجي ابن ابنه وهو اصلا موجود وعايش بهل بيت بس مينزل ابد والطابق الثاني من البيت كله أله
ساره،،، ليش مينزل؟
الحجيه،،، ميريد احد يشوفه واصلا هو هم ميريد يشوف احد
ساره،،، ليش؟
الحجيه،،، شلون ليش انتي شفتي ردت فعلج من شفتي اكثر الناس الشافوا هيج خافوا منه
ساره،،، اني لو احد مبلغني بوجوده وسامعه عنه ماچان هيج خفت،،، خوفي من وجوده اكثر من ماخفت من شكله
الحجيه،،، بالنهايه خفتي وانرعبتي وهل شي سببله احباط جديد وأنضاف شخص جديد للاشخاص الرفضوا شكله
ساره،،، لا لا موقصدي والله
الحجيه،،، عالعموم هل كلام بعد ميفيد هو من شاف تصرفج هو هم هسه اخذ منج موقف وضاج فالأفضل تبتعدين عنه وابد لتوصلين يمه لأن راح تكون ردات فعله مامحسوبه
ساره،،، ليش ترا ماسويت شي؟
الحجيه،،، المشكله موبيچ بي هوَ هوَ من يوم الحادث صار هجومي وعنده اوقات يفقد بيها عقله لهذا كلنا نتلافى ونبتعد عنه
ساره،،، اكدر اعرف ليش هيج صار ويا؟
الحجيه،،، صار ويا حادث وتشوه بسببه ومات ابو ويا چان بالسياره ومن يومها هذا وضعه خصوصا من بعد ما الناس صارت تبتعد عنه من تشوفه والمشكله الأكبر لمن خطيبته البينهم حب سنين باعته بلحضه من بعد الحادث كلش اذى هل شي
ساره،،، ياا خطيه
الحجيه،،، مثل ماكتلج امي تلافي وابتعدي عنه واذا صار وشفتي فجئه تحكمي بتصرفاتج لتحسسي خايفه منه ترا هو بالنهايه بشر وهل شي يأذي
ساره،،، والله موقصدي لوادري بي ولاهيج اتصرف
الحجيه،،، بعد صار الصار
ساره،،، زين اذا هو طول الوقت فوك شلون ياكل ويشرب شلون عايش؟
الحجيه،،، بس العامله تصعدله الاكل وبالليل من ينام الكل هو يطلع ويرجع الفجر مثل ماصار اليوم
لتخافين منه اذا متوصلين يمه ميأذيج يله امي روحي نامي
ساره،، قبل لااطلع من الغرفه رجعت الحجيه اكدت عليه
الحجيه،،، مثل ماوصيتج
ساره،،، تمام،،، رجعت لغرفتي ضليت افكر بهل شخص خفت منه وبنفس الوقت انقهرت علي عايش وحده عبالك انسان منبوذ
حاولت انام بس ماكدرت صار عندي خوفه رجعة غفيت الصبح
ثاني يوم كعدت متأخره لكيت الحجي والحجيه كاعدين بالحديقه والبنات وام اشرف ديتريكون رغم الساعه ١٢ ونص صبحت وطلعت يم الحجي والحجيه ابتسموا من شافوني كلت بما انوا راح وقت الريوك خلي اسوي غدا ونتغدا سوا سألتهم شتحبون اسويلكم
الحجيه،،، يمه لتعبين نفسج اي شي ناكل
ساره،،، بس اني عاجبني اطبخلكم
الحجي،،، دعوفيها الله هاديها علينه مو معدتنه خربت من اكل المطاعم يابا بكيفج شنو تكدرين علي سوي المهم اكل بيت حتى لو بتيته وطماطه
ساره،،، هههه،،، عاد مولهل درجه،،، اليوم عاجبني اسوي تشريب لحم وتمن باگلا تحبون هيج أكله؟
الحجي،،، اطيب اكله،، ياريت،، صار سنين ماماكليها
ساره،،، زين لعد خلي اكوم اطبخ
الحجي،،، رحم الله والديج يابا ولو راح نتعبج
ساره،،، تعبكم راحه اصلا افرح من اسويلكم وافرح اكثر من اشوفكم تحبون اكلي
الحجي،،، نفسج طيبه بالأكل كل ماأكل اتذكر المرحومه ام براق نفس اكلها بالضبط حتى براق من اكل من الدولمه كلش حبها وتذكر امه
الحجيه،،، اي سوده عليه كلش تأثر من شافني سألني منو طابخ الدولمه يكول نفس طعم دولمة امي
ساره،،، استغربت من كلامهم بس بعدين تذكرت من الحجي عزل ماعون من الدولمه هسه عرفت عزله علموده شكد خفت من هذا الشخص بس هسه عطفت علي
سويت الغدا وتغدينه وعزلتله وحد الحجي طلب من العامله تصعده أله
مرت ايام مستمره اتواصل وياامي واختي وسميه وكلنا بالنا يم سيلين منعرف شنو اخبارها سميه تكول كل مااتصل اويجينا الشيخ يكول زينه،، سيف طول الوقت يسأل عن امه والشيخ يكعد يحجي ويا ويسكته
منعرف شنو نهايه هل الوضع شكد حذرتها لسيلين تبتعد عن سراج بس مافاد وهاي النهايه ولو حقها العاشته منه موسهل بس مع ذلك قانوني بالحياة اكره الانتقام ودائما انتضر العداله الألاهيه وعدالة الله هو ياخذ حقوقنه من البشر
اليوم قبل لاانام طلعت للحمام سبحت وخليت المنشفه على راسي اول ماطلعت من الحمام صار اشرف كدامي باوعلي من فوق لتحت نضراته اربكتني عينه وسخه
خزرته وركضت للغرفه وقفلت الباب نشفت شعري ونمت ثاني يوم الضهر بعد الغدا اخذتلي قيلوله غفيت وصحيت على لمسات على جسمي فزيت مرعوبه من شفته ردت اصرخ خلا ايده على حلگي وكتم صوتي وذب ثكله عليه سيطر على حركتي وتمكن مني وماكدرت اسوي شي غير بس دموعي تنزل على لحضة الضعف العشتها
_____
سيلين،،، اليوم كعدت مزاجي برتقالي واريد حجه حتى اسوي مشكله وناويه نيه گشره على سراج اريده بس يجي حتى استلمه
بسببه بدا يصير عندي أكتئاب بسبب سجنه ألي وبسبب الوحده مااعرف شنو غايته وفوكاها حارمني من ابني صار اكثر من ١٢يوم وحدي بالبيت يطلع من الصبح يرجع نص الليل يروح لغرفة سيف ويعوفني وحدي
احس راح يصير بيَ توحد صرت اسولف ويا نفسي من الوحده طلعت من الغرفه وكالعاده مالكيته بالبيت ضليت النهار كله ألوب لايعجبني اشتغل ولااسوي اكل كارها حتى نفسي لحد ساعه ٤ العصر واني كاعده اخر شي قررت اسوي اي شي أكله طلعت معلاگ قطعته وشويته كعدت اكل خليت بالصمونه صارت الصمونه بيها دم من المعلاگ رغم ستوته زين
لعبت نفسي من منضر الدم بالصمونه شلت الاكل كله على بعضه وشمرته بسلة الزبل نضفت المطبخ وغسلت غير يروح منضر الدم ميرضى يروح وكل مااتذكر معدتي تقلب ضليت ألوب ساعه ٥ سمعت صوت الباب دخل سراج وقفل الباب استغربت شعجب إجا للبيت اليوم بهيج وقت؟؟
دخل عيونه حمر وشكله موطبيعي والغضب واضح على ملامحه باوع عليه وضل مركز قطعت نضراته الغاضبه وسألته
_شكو شبيك؟ ليش هيج تباوع؟ وشعجب اجيت هيج وقت موعوايدك؟
تقدم بخطوات وعيونه يطافر منها الشر
سراج،،،كل السويتي بيَ واكول حقها موقليل الشافته بحياتها واكيد حقدت خلي تطفي نار حقدها وعذابها بيَ اني اتحمل بس المهم هيَ ترتاح وترجع تصير زينه
سيلين،،، شنو مناسبه هل كلام؟
عاط بيَ بصوت هز البيت
سراج،،، اسكتييييييي،،، اسكتييي ولاكلمه كلمه وحده منچ مااريد بعد اسمع
ولچ سنين سنين واني متحمل اعرف صرتي لغيري وصلولي وافقتي تزوجين واحد علمود لأن غني وكل الأدله هيج تكول بس گلبي رفض رفض يصدك،، عشت كل هل سنين على ذكرياتنا ومانسيتج،،، يكولون الرجال ينسى ويعيش وميبقى على وحده لعد اني ليش ماكدرت انساچ؟ ليش ماكدرت اطلعج من داخلي؟ لو هذا حضي
١٠ سنين واني شايل حبچ بگلبي حرمت على نفسي كل النسوان ماتقبلت ولاوحده رغم اعرف انتي صرتي بذمة رجال ثاني وعشتي حياتج بس گلبي ماانطاني اخون حبنا حتى بالحلال
كوليلييييي،،، احجي،،، كولي يارجال بهل زمن يسويها؟ منو هيج يسوي اتحداچ تجيبيلي واحد بهل وقت هيج يسوي
سيلين،،، ليش رجعت فتحت هل موضوع وانتَ تعرف اني چنت مجبوره
سراج،،، اول مره انزفيتي لغيري متت الف موته ورجعتي عدتيها كل شي سويتي حتى تحطميني وابشرچ نجحتي
نكول اول مره انجبرتي ثاني مره شنو مبررج؟ اني اگلج،، ماكو غير مبرر واحد هو انتي الغدر بدمچ بس ماتصورت تطلعين خاينه هم
سيلين،،، خاينه شنو؟ شلون هيج تحجي عليه ؟
صار يحجي بتعب...
سراج،،، مواني هيج احجي هاي الحقيقه الحقيقه المره،، ياريت ميت ولاعارفها كل شي سويتي واكول لابد يجي يوم وتحن وگلبها يرجع ينبضلي ونرجع مثل قبل طلعت غشيم اعترف اني اصير غشيم وحتى غبي وياچ
لعبت الكل على اصابيعي وتالي انتي تجين تلعبين عليه ومو مره وحده،، ليش هو گلبي الغبي يتعض منچ لو يتوب لا والله ابد ولا يتوب
سيلين،،، شنو هيَ الحقيقه؟ احجي خلي افهم؟
اجا يعت بملابسي ويهز بيَ
سراج،،، تحبي موو؟ طلعتي تحبي،، يعني من كتبتيلي بالمسج اتزوجت الشخص الأحبه وألي يحبني هاي حقيقه مومجرد كلام تريدين تغثيني بي طلعتي صدك تحبي
سيلين،،، كتلك مااحبه لتضل تعيد وتزيد
سراج،،، تحبي،، تحبي،، ماكو داعي تنكرين لا ومقرره تعوفيني وترجعيله تدرين رغم كل تصرفاتج چنت اشوف لمعه حب بعيونچ بس ماچنت اعرف هل لمعه بالأساس هاي انعكاس عيوني الهايمه بيچ،، طلعت متوهم اصلا كل حياتي وياچ عشتها وهم
سيلين،،، لتسوي نفسك مضلوم ترا كل الصار انتَ سببه
سراج،،، شكد صلفه كل السويتي والناويه تسوي وبعدج واكفه ثابته ميهزج شي لا ومقتنعه انتي الصح
سيلين،،، لأن فعلا اني الصح
سراج،،، صح الى درجه تريدين تنهزمين ويا وتعوفيني تريدين تخونيني وتسويني مضحكه كدام الناس تريدين تهينيني وتصغريني حتى كدام نفسي هاي التصرفات برأيج صح،، ومال مره محترمه وشريفه؟
سيلين،،، دفعته عني
_انتَ شتحجي؟؟ كل عقلك؟ شنو انهزم ويا؟ اصحى على نفسك ترا سردار تركته حتى قبل لاادخل السجن لأن مااريده ومره ثانيه لتحجي هيج ويايا لأن اني شريفه وغصبن على الكل
ابتعدت مرعوبه وكفت على جانب من صار
يصرخ ويكسر شكو شي امامه كسر تحفيات الصاله وكسر الغراض على الطبله الوسطيه اخر شي شال طبله صغيره گزاز شمرها انكسرت
سراج بصوت مرتفع ،،، چذابه انتي اكبر چذابه انتي لعنه دخلت حياتي دمرتيني شتريديييبن مني بعد؟ شتريديييين؟ تريدين تموتينيييي؟ موتينيييي وخلصيني
صار يفتر ويلوب
سراج،،، يارب شوكت اصحى من هل الكابوس تعبت وأسمك الجليل العضيم تعبت
سيلين،،،شفته منهار تكلمت بتردد
سراج شبيك؟
باوع عليه بعتب
سراج،، شكوووو رجعتي لحياتي؟ اني متت ألف مره يله كدرت اتخطى واعيش،، ليشششش رجعتي اذا تريدي وتحبي،، ليش رجعتييي؟ چان ضليتي بعيده،، ليش رجعتي علقتيني بيچ؟ شفتيني مامتت اول مره رجعتي تموتيني؟
سبلين،،، خفت علي كلش وضعه صار غريب حاولت اهدئه
_صدكني مااريده والله العضيم مااحبه ولااريده
انهد حيله من العصبيه والصراخ والتكسير كعد وسند ضهره على الجدار ايده تنزف مااعرف من شنو والثانيه بيها تچبيره ماتحملت اشوفه بهل منضر ولا بهل الضعف والأنهيار يتنفس سريع وكأنما طالع من معركه خلا ايده على جهة گلبه ويتنفس بسرعه وجها احمر ويتعرق كمبصت يمه
_بس فهمني شبيك؟ ومنو كلك اريد اعوفك وانهزم ويا سردار؟
سراج،،،، لتجيبيييين اسمه لهل العااااار
سيلين،،، زين هاي هيَ خلي يولي بس ارتاح واتنفس
ركضت جبتله مي ماقبل يشرب
سراج،،، ليش تحرگين بگلبي؟ شتريدين مني؟ انتقام وانتقمتي وحملتيني وحدي كل الذنب موكافي بسببچ راح اموت هو هذا ألي تريدي؟
سيلين،،، اسم الله لتحجي هيج والله ولامره ردت يصيرلك شي بس ردتك تحس بالحسيته
سراج،،، شتريديني احس بشنو؟ شنو يصير بيَ بعد اكثر؟ ليش عبالچ بس انتي تأذيتي،، بس انتي انجبرتي على اشياء متريديها
تعرفين شصار بيَ من شفت زفّة عرسچ طلعت كدام عيني جنت جاي لبيتكم اني واخوتي اريد احجي وياكم واصلح الوضع وكفت واني اشوف زفه تطلع من الفرع ابتسمت وكلت يوم الألي اني وسيلين تالي عيوني تلمح حبيبة عمري كاعده ببدلة العرس وتطلع هيَ العروس وهاي زفتها بس لغيري
سيلين،،،، شهكت،،، شنوو هاي شوكت؟
سراج،،، بيوم عرسچ من ثامر،،، تدرين من شفتچ جمدت بمكاني مامستوعب اغالط نفسي اكول متوهم،، اكول هاي غيرها،، ضليت اقنع نفسي الى ان شفت امچ فرحانه وتصفك وتهلهل باوعت عليه بنضرات شماته واشرت على الزفه تفهمني وتأكدلي هاي زفتچ
تدرين شصار بيَ حسيت شي ذبح گلبي،، رچلي گصرت اريد اركض ورا الزفه واوكفهم اكلهم هاي عروستي هاي حبيبتي رجعوها لتاخذوها مني رچلي بعد متشيلني صرت ازحف واخوتي يسحبون بيَ بيومها شفت الموت بعيني
سيلين،،، دموعي صارت تنزل بغزاره واني اتذكر هل اليوم المشؤوم طلع سراج هم عاش نفس العشته
سراج،،،بعد هل اليوم عشت ايام واشهر واني والميت سوا ماكو واحد عرف علتي والحقيقه انتي علتي ولليوم ماطبت من هل عله وما أكتفيتي كملتيها عليه ورجعتي عيشتيني نفس الشعور وحتى اقوى
مافكرتي ولاكلتي هل الرجال اذا شاف فديو عرسي شيصير بي،، ماكلتي يمكن يوكف گلبه من الصدمه ماهزج ضميرچ؟ خليتيني مثل المخبل ادور عليج ماخليت واحد ماسألته كابلت باب بيتچ متأمل اشوفچ ويطلع الشفته چذب،، كسرتي گلبي خليتي حطام،، دتشوفين هاي التحفيات ألي تكسرت گلبي هيج صاير مثلها
سيلين،،، دموعي تنزل قهر وألم على حالي وحاله
جاوبته...
_صدكني ماچنت ناويه اعوفك ولاانهزم وياهذا سردار ولااريده ولااحبه ولاحتى تزوجت ثامر برضايه كل شي بحياتي صار غصب عني صدكني ماخنتك ولا ألي نيه ابد،،، صح حاقده عليك بس مااريد ائذيك ولا اكرهك
دفعني وكام وكف..
سراج،،، مااصدكج انتي اكبر چذابه ممثله محترفه لعبتي عليه ومااكتفيتي بعدج مستمره
سيلين،،، وداعت ابني دااحجي الصدك
سراج،،،چذابه،، چذابه،، مخططه تنهزمين وتسويني مضحكه،، انتي وهذاك العار هو اعترف اعترف بنفسه كال انتي تريدين ترجعيله
سيلين،،، لتصدكه لهل الحقير هو الچذاب
سراج،،، سألت وتأكدت وبعد السمعته كرهتچ عقلي رافضچ وكارهچ وناويلچ نيه گشره راح ادمرج راح اخليج تتمنين الموت ومتلكي راح اندمج على اليوم القررتي تلعبين بي ويايا انتي وهذاك العار،، مو الشيخ سراج ينخان ويصير مضحكه كدام الناس
سيلين،،، تقربت منه احاول افهمه موهاي الحقيقه دفعني بعصبيه وكعت على الارض حسيت شي نبت بساقي عافني وطلع وقفل الباب
صحت ورا لا توقف ولاعبرني متت من الوجع روحي شاغت وفرفحت اباوع كزازه كبيره داخله بساقي اريد اطلعها مااكدر اريد اتحرك هم مااكدر دموعي تنزل والدم يسيل من رجلي ضغطت على نفسي وحاولت اطلعها كل مااحاول الألم يزيد واوقف من الألم
صرت اضرب على الارض روحي فرفحت الألم يزيد ميقل سميت بسم الله وغمضت عيني وسحبتها صرخت صرخه من اعماق روحي حسيت گلبي راد يتوقف
روحي ماعت وراح يغمى عليه خليت راسي على الأرض اريد افتح عيوني مااكدر حسيت قوتي انسحبت مني واعيه بس خارت قوايه
اغمض بعيني وافتحها رفعت راسي بصعوبه شفت رچلي تنزف قوي جرح عميق الگزازه كبيره وداخله بعمق اريد اكوم اجيب معقم وشي اشدها بي حتى اوقف النزيف مااكدر ماعندي قوه حيلي باد
رجعت خليت راسي على الارض مر وقت وجسمي صار يرجف بردت كلش مااكدر اسوي اي شي غير بس دموعي تنزل احس حتى گلبي صار يوجعني
قويت نفسي وسحبت وحده من وسادات التخم فتحت سحابها وطلعت الوساده اخذت قماش وجها ضغطت بيها على الجرح متت من الوجع بس استمريت ضاغطه حتى يتوقف النزف
اباوع الارض بيها هواي دم ضليت ضاغطه الى ان خف النزف زحفت جريت وساده ثانيه وهم طلعت غلافها شلت هذاك وخليت الثاني ولفيته لف على ساقي تعبت وحسيت راح يغمى عليه جريت وساده ونمت عليها
غفيت او اغمى عليه مااعرف فزيت البيت تقريبا اضلم باوعت على الساعه شفتها ب١٢ بالليل يعني من ساعه ٥:٣٠ لحد هاي الساعه اني هذا وضعي تفائلت وكلت اكيد راح يجي سراج هذا موعد جيته للبيت
انتضرت وانتضرت وماإجا،،، ألم وخوف واحباط وجوع وعطش كل هاي احس بيها
باوعت على رجلي النزف توقف حاولت اشيل قماش غلاف الوساده من رچلي رجعت تنزف رجعتها بسرعه اريد اكوم للان مااكدر احس رچلي انشلت
زحفت بصعوبه وصلت للبراد الموجود بالصاله شربت مي رجعت زحفت لنفس المكان خليت راسي على الوساده دوار فضيع براسي
ضليت ادعي ربي يساعدني تعبت هواي تعبت وخفت كلش اخاف من الليل خصوصا من اكون بمكان وحدي انرعب من هل شي
وهاي عقده صارت بيَ من اني كنت صغيره وللان اخاف
صرت ارجف برد وخوف زحفت للقنفه رفعت نفسي وبصعوبه كدرت انام عليها على الاقل احسن من الارض وبرودت المرمر
رجلي المصابه فقدت قدرت الحركه بيها غمضت عيني احاول انام حتى لااضل احس بالألم والخوف فزيت الفجر على صوت الآذان ووجع برچلي ينخر نخر دموعي نزلت صرت اناجي ربي تعبت كلش تعبت اتمنيت الموت حتى اخلص بس واكف بعيني ابني خايفه يضيع ورايا
ندمت اول مره اعترف ندمت بكد شعر راسي لأن قررت انتقم من سراج اصلا وين كان عقلي من اتخذت هل القرار شحصلت هسه اني من كل السويته احس ماجنت بعقلي وهسه صحيت وعرفت غلطي بس عرفته متأخر
رجعت غفيت كل شويه افز وارجع اغمض صار الصبح كعدت تعبانه الى درجه كل جسمي يوجعني ورچلي مااكدر احركها وعندي صداع قوي جوعانه البارحه النهار كله مااكلت حاولت اكوم ماكدرت ألم فضيع جبرت روحي وكفت ووكعت من الألم ورجلي المصابه متشيلني صرت اكمز على تك رجل واستند بالحائط والاثاث وصلت للمطبخ فتحت الشباك وصرت اصيح بصوت عالي على الحارس بلكي يجي ويوصل الصار بيَ لسراج
صرخت وصوتي راح وما كو اي شخص إجا ايست رحت للثلاجه اشوف شي اكله مااكدر اوكف من الألم ولااكدر اسويلي اكل لكيت جبن انكور طلعته وطلعت صمون اخذتهن دورت على معقم وشاش ماكو مالكيت اخذت خاولي صغير نضيف من مالات المطبخ ورجعت الصاله
اريد اكعد وامد رچلي موتتني من الألم شلت الوصله الخالتها على الجرح وانصدمت بمنضر الجرح ملتهب وشكله مخيف خليت علي الخاولي
فتحت العلبه مال انكور حتى اكل لكيت صاير بيها عفن اني اشتميت ريحتها معدتي قلبت صرت استفرغ سائل روحي طلعت اريد اكوم اغسل بعد مااكدر جسمي صار يرجف مثل السعفه اريد اروح للغرفه اجيب بطانيه مااكدر
انهاريت ابچي بصوت استهضمت واستصعبت حالتي وهانت عليه نفسي صح مو اول مره اعيش هل الاشياء بس هل مره استصعبتها اكثر
اخذت جزء من الصمونه اكلتها بصعوبة نفسي رفضت الأكل بس لازم اكل شي ضغطي راح يصفر مددت جسمي والألم يزيد ميقل بدت حرارتي ترتفع وجسمي يرجف مثل السعفه
غمضت عيني وفقدت صحيت الدنيا ليل يعني نمت النهار كله او يمكن فقدت
كعدت على ألم برچلي اقوى من كل مره صرت اعصر برچلي وروحي تلوب اعض بأيدي من شدت الألم جسمي يرجف وحرارتي كلش مرتفعه وريگي ناشف عطشانه كلش وهل مره نهائيا مااكدر اتحرك حركه بسيطه اعيط من الوجع
دموعي خلصت وألمي ماخلص ماخليت ايه ولادعاء مارددتهم ساعات واني ألوب اباوع رچلي بدت تزرق وشكلها ميبشر بخير الجرح عميق وحجمه كبير
دخت صار عندي غثيان ودوار قوي رجعت خليت راسي على المخده وغفيت ويمكن هذا النوم رحمه من رب العالمين يصبرني بي
رجعت فزيت البيت اضلم ضلام دامس صوت هوى برا قوي انرعبت وجسمي يختض صاير نار من الحراره
صرت اسمع اصوات بالطابق الثاني حسيت گلبي راح يطلع من مكانه من الخفقان والخوف صرت اشوف خيال على الدرج جمدت بمكاني حصرت نفسي بزاوية القنفه نسيت حتى ألم رجلي
فجئه سمعت صوت باب انركع بقوه بالطابق الثاني عطت وخليت ايدي على فمي وجسمي يرجف بصوره مخيفه
فجئه شفت شي مر من يمي شمرت نفسي من القنفه للارض زحفت وروحي طلعت وصلت لباب المدخل مال البيت صرت اضرب على الباب واصرخ رجعت سمعت صوت الباب الفوك انركعت بقوه وخيال صار امامي انهاريت واصرخ مفزوعه اتهسترت مااشوف غير الضلام بالمكان وخيال كل شويه اشوفه بجها
من شدت هول الموقف والرعب الحسيت بي صرت اصرخ و اضرب على راسي ليش مااعرف انفتحت الباب واني بعز انهياري شفت خيال دخل للبيت عطت مفزوعه وغطيت عيوني حسيت هاي نهايتي ونشل جسمي من حاوطني جسد
سراج،،، سيلين،،، سيلين تسمعيني هاي اني لتخافين
سيلين،،، فتحت عيني شفت سراج مشغل مصباح الموبايل من شفته رجعت انهاريت اشهك من كل گلبي حضني بقوه واني حضنته اقوى
سراج،،، لتخافين اجيت هاي المحوله انفجرت بسبب الهوى القوي لتخافين هسا تجي
سيلين،،، زدت بالبچي احس روحي راح تطلع وبديت افقد عقلي باوعت علي وحجيت متوسله
_لتعوفني طلعني منا راح اموت والله العظيم راح اموت اصوات بالطابق الفوك وخيال،، خايفه
سراج،،، اسم الله،،، لتخافين ماكو شي هذا بسبب العاصفه والضلام خلا عينج تغوش
سيلين،،، سراج راح اموت والله احس نفسي راح اموت اشتريني سراج اشتريني
حضني بقوه...
سراج،،،ابيع روحي واشتريج
سيلين،،، ليش عفتني وحدي؟
سراج،،، لارد
سيلين،،،خايفه
سراج،،، كومي خلي نطلع برا هنا كلش ضلمه
سيلين،،، شهكت كتله.... مااكدر
سراج،،، كومي ياعيني اني اعرفج اقوى وميهزج مجرد ضلام
سيلين،،، مااكدر رچلي
ابتعد وخلا ضوء المصباح عليه
سراج،،، شبيها رجلج؟
شهك وعاط من شافها
سراج،،، هاي شنوووو؟؟!! شبيها رچلچ؟؟
سيلين،،، رچلي مااحس بيها من دفعتني وكعت على الكزاز وهيج صار بيَ مااكدر اتحرك تعبت هواي تعبت وانتَ مااجيت هل مره هم عفتني وانتضرتك تساعدني ومااجيت
حضني بقوه
سراج،،، الله ياخذني،،،هاي اني شسويت بيج روحي انتي روحي والله مو قصدي ولاانتبهت من وكعتچ ،،، وصدكيني موبيدي ماكدرت اجي
سيلين،،، اشهك واحجي منهاره،،،،، تعبت هواي تعبت خفت وبردت وجعت توجعت شكد صحت اسمك وماسمعتني ولاأجيتني
جسمه صار يهتز حسيت بحرارة دموعه برقبتي حضني اقوى احسه يريد يدخلني بداخله واني من خوفي وبعد العشته حضنته اقوى احتمي منه ومن العشته بسببه بيَ
كام يريد يروح تمسكت بي
_الله يخليك لتعوفني وحدي خايفه والله خايفه
حضني بقوه يطمني
سراج،،، لتخافين مااعوفج ابد
سيلين،،، شالني مشى خطوتين وتوقف
سراج،،، هاااي شنووو؟ شنو كل هل دم بالگاع هاي شكد نازفه؟؟!!!
اخذني للغرفه خلاني على السرير طلعلي بشت وبي كب لبسني وصعد الكب على راسي ولبسني حذاء
سراج،،، جسمج صاير نار من الحراره اااخ مني اخ الله ياخذني كله بسببي هاي شصاير بيچ
سيلين،،، خفت احجي اي كلمه ليرجع يعوفني واضل وحدي خفت ألومه واكله انتَ السبب واصلا ماعندي حيل ولاقوه حتى احجي جسمي انتهى وكلش تعبت حسيت راح يغمى عليه
سراج،،، سيلين شبيج؟
سيلين،، مااكدر بعد احجي روحي ماعت اسمع صوته وهو ينادي بأسمي بخوف بس مااكدر ارد
شالني ومشى بسرعه ضل يصيح بصوت عالي
سراج،،، اسمااااااعيييل
_ هااا شيخ أئمرني
سراج،،، افتحلي باب السياره،،،و بسرعه للمستشفى
سيلين،،، صعدني بالسياره راد يعوفني تمسكت بملابسه صعد يمي وحضني
سراج،،، بسرعه لأقرب مستسفى
_حاضر شيخ
سيلين،،، غمضت عيني الدنيا تدور بيَ حسيت بي يغطيني فتحت عيني شفته يغطيني بمالته البشت
سراج،،، تسمعيني؟ اتحملي هسه نوصل للمستشفى
سيلين،،، راح اموت احس نفسي راح اموت
جاوبني بصوت يرجف وشدد حضني
سراج،،، اسم الله من عمري على عمرح،،، اسماعيل استعجل
_هسه شويه ونوصل
سيلين،،، وصلنا للمستشفى شالني ودخلني إجا دكتور يشوفني سراج رفض راد دكتوره
اجتي الدكتور شافت رچلي وضلت تسأل بس مااكدر اجاوب سراج فهمها
الدكتوره،،، الجرح كلش ملتهب ويحتاج خياط وحرارتها مرتفعه وين چنتو عنها ليش انتضرتوا توصل لهل حاله؟ يعني الجرح مزرق شتنتضرون؟
سيلين،،، سكت ماجاوبها يعرف نفسه غلطان
الدكتوره،،، نزفت هوايه؟
سراج،،، اي هواي نازفه
الدكتوره.،،، جسمها تعبان راح نخليلها مغذي وخافض حراره ومضاد حيوي ونبدي نخيط الجرح
سراج،،، دكتوره بس رجائا خليلها مخدر ترا كلش تعبانه ومتتحمل ضغط وألم فوك ألمها
الدكتوره،،، تمام
سيلين،،، خلولي مغذي وبنچت رچلي وبدت الدكتوره تشتغل روحي طلعت ولاكأنما خاله بنج
سراج،،، دكتوره شنو السالفه ليش مااشتغل البنج؟
الدكتوره،،، الجرح كلش ملتهب للان جاي انضفه مابديت حتى الخياط هذا الجرح موجديد شكد صارلها هيج؟
سراج،،، احم
سيلين،،، جاوبة بصعوبه.... من قبل يومين
الدكتوره.،،، شنو هل الأهمال هسه زين من هيج وصلتي،، ليش هيج سويتي بنفسح؟
سراج،،، دكتوره السبب مني ماجنت بالبيت وهيَ ضاله تنتضر الى ان رجعت وجبتها
الدكتوره،،، شلون متحمله؟اووف،،، هسه لازملها ابره مال گزاز لتروح تصير عدها عدوى بكتيريه
سراج،،، سجليها هسه اجيبها
سيلين،،، راد يطلع تمسكت بملابسه
لتروح عفيه لتعوفني وحدي
سراج،،، وعيونج بعد ماعوفج هسه انطي الراچيته لأسماعيل واجي ما اتأخر
سيلين،،، طلع بسرعه ورجع الدكتوره تشتغل وروحي احسها تريد تطلع حضنت ايد سراج كعد يمي على السرير ولف ايده حواليه ويهمس بأذني كلام يطمني بي
ماتحملت كل هل التعب والألم ومنا اني مريت بنوبة هلع اخر شي استسلم جسمي وفقدت الوعي اخر شي سمعته صوت سراج وهو ينادي بأسمي
______
لمياء،،، دخل مصطفى للمطبخ واني اشتغل
مصطفى،،، خاله وين دوا خالي سراج؟
لمياء،،، يادوا؟
مصطفى،،، مال گلبه
لمياء،،، ماادري شمدريني بي،،، وبعدين هو زين شيسوي بي؟
مصطفى،،، هو مابي شي بس خايف من عصبيته
لمياء،،، ليش صاير عصبي؟
مصطفى،،، مااعرف أجوي زلم ثنين رادوا يحجون ويا من شافهم صرفنا من المضيف وضل وحده يحجي وياهم طلعوا ودخلنه شفنا صاير نار من العصبيه فاط بالكل حتى إحنا استلمنه
لمياء،،، ياستار هاي شصاير؟ زين منو هذوله؟
مصطفى،،، مااعرفهم اول مره اشوفهم
لمياء،،، زين روح اسأله وين دوا
مصطفى،،، شسأل منه هسه يبتلي بيَ غير انتي ماشايفته شلون معصب
لمياء،،، زين اسويله ليمون او دارسين؟
مصطفى،،، بكيفج اي شي سوي بس خلي يهدى
لمياء،،، سويت ليمون اخذه وراح
وحتى تكمل بيومها اجتي اسراء تريد تشوف البنات وصله الخبر مامانع ولاوصل للبيت اسراء وعمتي يحوصن يريدن يشوفنه بس هو ما إجا
اخر شي ماتحملن حجن الجايات علموده وكالعاده نفس الاسطوانه يريدون سراج يرجع اسراء ويتوسلن لخاطر البنات من شافنه ماإجا بيومها باتن يمنا على امل يجي ويحجون ويا يومين انتضرن من ايسن راحن
خلال هل ايام اسمع من الولد سراج عصبي وميتفاهم شنو السالفه ماعرفت يمكن بسبب جيت اسراء ولو هو ماشافها بعدين شكيت الموضوع بي سيلين بس استبعدت من اتذكرت كلام مصطفى هو عصب من اجوي علي هذوله الرجال
قررت اروح اشوف سيلين من رحت الحارس كلي موهنا استغربت اكثر كلت من اشوف سراج اسأله وين راحوا
لكن ماصادفت وشفته بعد هوَ من يوم زواجه صار نادرا يدخل البيت بسبب امي وجديتي وعماتي كل ميشوفنه يغثنه ويضلن يسألن على سيلين
سمعنه صارت طلابه وأنقتل بيها شخص من غير عشيره بس ألنه معرفه بيهم فطلبوا من سراج يحضر بالفصل اتفقوا ينجمعون منا ويروحون ورا كم ساعه رجع بهاء هو وباهر ومصطفى بهاء يغلي من العصبيه دخل يغلط ويتجاوز وهاي موعوايد بهاء،،، سألته امي
ام بهاء،،، شبيك يمه ليش هيج عصبي؟
بهاء،،، من ورا ابنچ
ام بهاء،،، ياهو منهم؟
بهاء،،، الشيخ
لمياء،،، شبي سراج؟
بهاء،،، صاير فد مره نسى حتى الأصول
ام بهاء،،، يمه شنو هل كلام؟
بهاء،،، متواعد ويا الناس عدهم فصل ومتأملين منه يحلها تالي نص الكعده وصاني اكمل بمكانه وطلع خلا الكل يحجي وشيخ عزام اخذ على خاطره منه،،، هو هذا تصرف؟
لمياء،،، مامعقوله اكيد اكو سبب هاي موسوالفه لوشيصير ميتصرف هل تصرف
مصطفى،،، إجا اتصال طلع جاوب ورجع معصب وراها ضل يلوب ماادري شبي شويه وكام ترخص وطلع
لمياء،،، اكيد صاير شي
باهر،،، لا صاير شي ولا هم يحزنون،، سراج تغير من يوم زواجه
بهاء،،، صح اول مره أئيد كلامك من زواجه للان صار مهمل لعمله وحتى للمضيف نسا واجباته وصار لا ابالي
حجيه حكيمه،،، هو من تزوج لليوم حتى للبيت ميفوت على كد السلام وينهزم عبالك يخاف ناكله طول الوكت يم ست الحسن
لمياء،،، وليش متكولون من المشاكل والقال والقلت والكلام ألي يسم البدن صار ميعجبه يدخل للبيت
ام بهاء،،، انتي سكتي موصايره محامي دفاع أله ولمرته
لمياء،،، هو انتو بهل بيت ميعجبكم كلام الحق
ام بهاء،،،يجوز كلامج صح بهل بموضوع زين وشغله والمضيف ليش صاير يتهاون بيهن؟
لمياء،،،اكيد اكو سبب
باهر،،، ماكو غير سبب واحد من يوم ماتزوج هاي المتسمى رجع باعنه لعبت بي طوبه وهو مكابلها وكاعد
لمياء،،، انتَ شمدريك وكاعد تحجي چنت ملتحق هذيج الفتره انتو متدرون ترا مرته مريضه ضلت ايام عايشه على المغذيات وصلت للموت وماكو احد يعرف علتها انتو تعرفون شكد يحبها ويخاف عليها اكيد يكابلها،،، انتو هم عذروا ترا من خوفه عليها حتى نوم مينام فأكيد ميكدر يشتغل
بهاء،،، ليش هو حجا وماعذرنا طول عمره ميحجي ولايشاركنه شي يعني بيته كدامنه ومندري شكو ولا ندري شصاير عنده
باهر،،، شبيها مريضه وليش تكولين وصلت للموت؟
لمياء،،، مااعرف اللبنيه تخربطت وداها للمستشفى ومن يومها هيَ مريضه
باهر،،، معقوله اليوم صاير بيها شي لهذا طلع؟
لمياء،،، مااعرف
حجيه حكيمه،،، وشدعوا هيج خايف عليها اشو اسراء ماچان يدري عنها اي شي لوتموت ميحرك ساكن حتى بيوم ولادتها چان مسافر لو هذا بخت الكح***
بهاء،،، حجيه شنو هل كلام شلون تطعنين بشرف البنيه و لتنسين هاي مرت الشيخ
لمياء،،، بعدنا نحجي ودخل سراج وضعه مخربط وعيونه حمر سألنا شبي ماجاوب بس اكتفى بجملة
سراج،،، مصطفى تعال ورايا للمضيف بسرعه
لمياء،،،راح مصطفى ورا واحنا ضلينه واحد يباوع على الثاني واضح وضوح الشمس صاير شي الولد من شافوا وضعه راحوا وراهم اختفى الكل ل الليل يله دخل بهاء وباهر ومصطفى
ام بهاء،،، هاي يمه وين رحتوا؟
بهاء،،، طلعنا عدنا شغل
ام بهاء،،، شبي الشيخ ماعرفتوا؟
بهاء،، مابي شي
لمياء،،، كال هل كلام وكلمن توجه لغرفته بس اني متأكده صاير شي اشرت لمصطفى لحگني للغرفه
_هسه تحجيلي شصاير شبي سراج؟ ولتكلي مابي شي ترا ابتلي بيك
مصطفى،،، شنو السالفه انتي تهددين وخالي يهدد
لمياء،،، احجي مصطفى ترا گلبي راح يوكف متأكده صاير شي ليش صاحك وشيريد منك ووين رحتوا واختفيتوا؟
مصطفى،،، صاحني اشوف ايده
لمياء،،، شبيها ايده؟
مصطفى،،، مااعرف شلون ضاربها مدري متعارك مااعرف شصاير المهم من شفتها عرفت مكسوره اجوي خوالي ومن سمعوا جبرنا واخذنا للمستشفى سووله اشعه طلع عنده كسر چبسوها أله
لمياء،،، ياستار،، شلون انكسرت؟
مصطفى،،، منعرف شكد حاولنه ويا ماحجا خوالي من شافوا ضايج وعصبي حتى مالحوا ويا ولا حجوا بموضوع الفصل اخذنا ورحنا للمطعم كالو نغير نفسيته تالي مااكل بس نزل نرگيله وچاي
لمياء،،، جنت متأكده صاير شي والأكيد سيلين ورا هل شي
ثاني يوم من إجا للبيت الكل عرف ايده مكسوره رغم من الخارج مبين وضعه طبيعي بس اخويه واعرفه اكو شي ورا هل الهدوء والغموض سألته على سيلين كال
سراج،،، ماموجوده بالبيت يم بيت خالتها لان خالتها مريضه
لمياء،،، جوابه كان طبيعي ولاواحد علق بس اني ماشفته طبيعي لأن متأكده سراج ميعوفها يوم تبات يم خالتها مو عاد يخليها كل هل المده
مرت ايام واسراء كذا مره تجي تشوف بناتها والغريب تقربت من سيلينه تقرب موطبيعي وصارت تهتم بيها مااعرف يمكن من ابتعدت حست بغلطها اتجاه بتها او يمكن اكو غايه بداخلها
شكد حاولت تحجي وياسراج لكن سراج من يعرف بوجودها ميدخل البيت نهائيا
اليوم باهر رجع ألتحق ساعه ٥ ونص كاعدين ودخل مصطفى يركض للبيت
مصطفى،،، وين خالي بهاء؟
لمياء،،، بغرفته
مصطفى،،، صيحي بسرعه،،، بسرعه
لمياء،،، شبيك،،، شصاير؟
مصطفى،،، خالي خالي سراج
لمياء،،، شبي؟؟
مصطفى،،، خابرني اسماعيل يكول الشيخ تخربط واخذوا للمستشفى
لمياء،،، تحجي صدك؟؟!! شبي؟ فهمني شنو صاير ويا؟
مصطفى،،، يمكن مثل هذيج المره گلبه
لمياء،،، ياربي دخيل اسمك
صعدت بسرعه لغرفة بهاء چان نايم كعدته من سمع نزل بسرعه وراحوا الكل سمع بالصار
اجتي ام مصطفى وابو مصطفى اني وامي رحنا وياهم للمستشفى لكينا الولد واكفين بالأنتضار رحنالهم بسرعه
ام بهاء،،، شبي ابني؟ شبي فهموني؟ الصبح شفته مابي شي شنو صارله؟
بهاء،،، الضاهر نفس هذيج المره اتصلت على دكتوره وهسه راح يجي
لمياء،،، ماسألتوا اسماعيل عنه؟
مصطفى،،، سألنا يكول هو من چان بالمكتب طلع وضعه موطبيعي رجعنا للبيت دخل لبيته ماطول هواي طلع وضعه اسوء ولازم صدره كايله رجعني للمكتب عندي شغل نص الطريق ومتخربط وجايبي للمستشفى
لمياء،،،الكل ضل يتسائل ياترى شنو صاير
إجا الدكتور وچيك وضعه ومثل ماتوقع مصطفى گلبه تعبان ورجعت عنده المتلازمه
خلوا بالعنايه لأن وضعه تعبان وهسه ماضل شك عندي اكو شي بينه وبين سيلين هل حاله متلازمه ألا من الموضوع بي سيلين
لثاني يوم ووضعه ماتحسن يفتح عينه ويرجع ينام اويفقد مااعرف
ثاني يوم لنص الليل صحا ومن عرف صارله ٣٥ ساعه بالعنايه تخبل مااعرف شصار بي ملص الأجهزه وكام حاولنا نمنعه وتدخل الدكتور والممرضين لكن هوَ اصر يطلع من المستشفى رغم تأخر الوقت شكد حجينا ويا مااقتنع اخر شي تدخل الدكتور وطلب منه يبقى للصبح يسوله فحوصات يله يطلع بس ماسمع من احد
رجعنا للبيت الكل سمع وكعدوا ينتصرونا بس هو عاف الكل واصر يروح وحده لبيته
______
سيلين،،، فتحت عيني لكيت نفسي بغرفه بالمستشفى تقدم عليه سراج بلهفه
سراج،،، سيلين واخيرا صحيتي
سيلين،،، سراج
سراج،،، عيونه وروحه لسراج،،، هنا اني يمج،،، كولي محتاجه شي؟ اكو شي يوجعج؟
سيلين،،، تعبانه احس نفسي كلش تعبانه وراسي يوجعني
سراج،،،هواي نازفه دم والجرح ملتهب لهذا هيج تعبانه
سيلين،،، جوعانه،،،، كلت هل كلمه ونزلت دموعي
سراج،،، انعل ابو الجوع ألي ينزل دموعج هسه اجيبلچ اي شي تريدي بس كولي شنو عاجبچ هسه اجيبه بس لتنزل دموعچ
سيلين،،، صارلي يومين بدون اكل ماغصيت بأكلك من تاكل ماكلت شلون عفتهتا وحدها؟
سراج،،، وداعتج وداعت عيونج مادخلت لگمه بحلگي صار يومين
سيلين،،، لتچذب عليه
سراج،،، اقسم بالله ماجاي اچذب
سيلين،،، ليش هيج سويت بيَ؟ شلون تعوفني وحدي؟
سراج،،، احجيلج كل شي بس بالأول خلي ناكل ترا اني هم تعبان وبصعوبه واكف
سيلين،،، جيبلي....
سمعنا صوت الباب دخلت الدكتوره
الدكتوره،،، شلونج سيلين؟
سيلين،،، زينه
الدكتوره،،، شلون صرتي هسه؟
سيلين،،، الحمدالله ،، احسن
الدكتوره،،، اي واضح من شكلچ،،، اكلتي لوبعدج؟
سراج،،، هسه راح اجيبلها تاكل
الدكتوره،،، اكلي زين واهتمي بصحتچ منا وجاي
سيلين،،، صار ايام نفسي متتقبل الأكل
الدكتوره،،، ماما طبيعي هل شي بس مع ذلك اضغطي على نفسج اذا مولخاطرج لخاطر الطفل
سيلين،،، شنووو؟؟!!
سراج،،، دكتوره ياطفل؟؟!!
الدكتوره،،، التحاليل تكول سيلين حامل
سيلين،،، شنووووو؟؟؟!!!!
سراج فتح عيونه مصدوم واني صدمتي اكبر
يتبع....
الرابع والعشرين من هنا
