رواية اسيرة بين يدي قاتل ابي الفصل الحادي والعشرين 21 بقلم نور آل زيادة
لسنا مجبرين على تبرير المواقف لمن
فالعين تكذب نفسها إن أحبت والأذن تصدق الغير إن كرهت أما معادن البشر فتكشف في هذهِ
المواقف 
البارت اليوم كلش حلو وممتع حبايبي لتنسون التصويت والتعليق بين الفقرات لتقصرون أتمنالكم قرائه ممتعه
__________
سيلين،،، صوت الرصاص زرف أذني ماصرت اسمع غير العياط من الصدمه انهاريت اصرخ
_ساااااااره!!!!!
ماااااتتتت،، قتلوهاااا،، راحت ساره،، ماتت
اجاني سراج مسكني و عاط بيَ
سراج،،، راح تموتين ولج كاااافي،،، سميه اخذي سيف جواااا
سيلين،،، من صدمتي ماحسيت على نفسي
سراج،،، سيليني باعي عليه،، باعي بوجهي،، اهدي ماكو شي
سيلين،،، ماتت ماتت
سراج،،، ماصار شي بس اهدي،،، تسمعيني؟
سيلين،،، مسك وجهي بين ايده باوعت علي ونزلت دموعي بغزاره
_سررراج
سراج،،، عيونه لسراج بس اهدي ليصير بيج شي تنفسي سيلين
سيلين،،، موتوها لساره سمعت صوت الرصاص وعياط ام ساره كالت موتو بنتي
سراج،،، لااله الاالله،،، كومي موراح تموتين،،، وابنچ روحه فرفحت عليچ
سيلين،،، سراج الله يخليك بداعت بناتك وديني اذا عندي خاطر يمك لوشويه وديني
سراج،،، كومي اوديج بس شدي حيلج راح يصيرلچ شي،، انتي راح تموتين موهيَ بس كومي
سيلين،،، مااكدر رچلي بعد متشيلني والله مااكدر
شالني وخلاني بالسياره صعد يباوع عليه بقلق دخل ثواني جايب شال من سميه خلا على راسي مااعترضت نهائيا
شغل السياره طلعنا اشر على الحمايه اجوي ويانا سيارتين توجهنه لبيت ساره من خوفي حتى مااكدر اتنفس اختنكت وساكته حتى ليوقف السياره
وصلنه بيتهم بسرعه،، شفت سياراة يم باب بيتهم وهوسه والباب الخارجيه مفتوح حسيت گلبي راح يوكف انتبهلي سراج
سراج،،، ان شاء الله ماكو شي بس اهدئي راح تموتين شوفي وجهج شلون صار
سيلين،،، مابيَ شي بس ساعدني اريد انزل
إجا ونزلني بابهم مفتوحه دخلنا صار سجاد امامي
سجاد،،، سيلييين!!! شتسوين هنا؟؟
سراج،،، ام سيف اسمها ام سيف
سجاد،،، اعتذر،، ام سيف مثل اختي من باب الأخوه احجي وياها دون رسميات
سيلين،،، فدوه سجاد الله يخليك كلي ساره عايشه موو؟؟ ماسوولها شي؟
ابراهيم،،، ماگتلتها بس راح اسويها
ام مؤيد،،، انتي شعندج جايَ هنا؟ وحده غريبه شدخلج بينا؟ يله برا من شفناچ ماشفنه الخير فلا ينلام بيچ مؤيد خاف تغيريها وغيرتيها صارت نفسچ لاتربيه ولااخلاق
سراج بغضب ،،، انتي شلون هيج تحجين وياها ؟؟
سيلين،، عوفها شيخ لتعب نفسك وياها
ام مؤيد،،، لا بلله احجوا اني اريدكم تحجون
سيلين،،، من سمعت ساره عايشه رَدت بيَ الروح بلحضتها قررت اموت ومااخليهم يسوولها شي كلام الحيه ام مؤيد استفزني خزرها سراج بس ميكدر يحجي لأن مره
جاوبتها... ماراح اخلي عقلي وياچ مو لأن مااكدرلچ بس احتراما لأبنچ الواكف
ام مؤيد،،، لا ليش تسكتين احجي خلي نسمعچ طلعي ألي بداخلج
سيلين،،، موبحالج هسه اني،، واعرف غايتچ تريدين تسوين مشكله حتى انجبر اطلع منا ويخلالج الجو حتى تنحشين بيهم تريدين يقتلوها شكد هازتج لعد ساره وخايفه من وجودها بحياتج؟ ومااستبعد انتي ورا هل التهمه تريدين يكتلوها حتى تخلصين منها لأن بعد متفيدچ خلصت المصلحه
وجها صار اصفر وصارت تمتمت بالكلام
ام مؤيد،،، انتي،، انتي شلون هيج تحجين ويايا؟ وشلون تكولين اني تهمتها؟ هاي بنت اخويه
سيلين،،،انتي لوتعترفين بأخوج وبنت اخوج موكاعده تحركيهم حتى يقتلوها ولا شديتي وياها ولعبتي بيها طوبه من يوم وفاة ابوها لو خلصت المصلحه وماضل اكو بعدفلوس؟
ابراهيم،،، هييي،، وين كاعده بيت الخلفوج وتجاوزين؟
سجاد،،، سيلين رجائا اني افهم حبچ وخوفچ على ساره و احترمج واعزج بس ماارضى تحجين ويا امي هيج
سراج،،، استغفر الله،، اللهم طولچ ياروح ،، اليوم شلون سالفه؟
سيلين،،،يعني عادي امك تحجي على اخلاقي واخلاق ساره بس من اني احجي ضجت؟ ترا لليوم ساكته عليها لخاطرك
سراج،،، وتالي شلون يعني اليوم
سيلين،،، حسيت سراج راح ينفجر خصوصا من يدور حوار بيني وبين سجاد غيرت الموضوع بسرعه وسألت
_وين ساره وخاله؟
سجاد،، جوا بالبيت فوتيلهن
ام مؤيد،،، وين تفوت لا والله ولاتفوت
سيلين،،، وخري من طريقي ماجايه لبيتج،، سجاد سكت امك مااريد اتجاوز عليها ولوتستاهل بس لخاطرك راح اسكت
اباوع سراج صار بارود خزرني خزره خنست من وراها
سجاد،،، تسلمين
ام مؤيد،،، على شنو تشكرها ياحضي؟ تعاي هذا منو جايبه ويا؟ لوصارت علني السالفه
سراج،،، اخي اني رجال شيخ عشيره واخلاقي ورجولتي متسمحلي اتجاوز على مره ياريت تكول للحجيه تثمن كلامها صار ساعه ساكت ترا مااسمح لأي مخلوق بشري يتجاوز على زوجتي الشيخه ام سيف
سجاد،،، امسحها بوجهي مره چبيره
سيلين،،، عفتهم يتناقشون ودخلت لبيت ساره لكيت خاله حاضنه ساره ويبچن ويمهن شهد بت عمهم هي هم تبچي وياهن من شافني شهكن
رحت حضنتهن
ام ساره،،، يمه سيلين اجيتي بوكتج راح يكتلوها
ساره،،، والله مضلومه ماسويت شي
سيلين،،، اشّ،،،لتحجين،،، كلش زين اعرفج انتي شنو،، لتحلفين،، ولتبررين ليش وين اكو مثل اخلاقچ انتي،،، لوتدرين شصار بيَ من سمعت صوت الرصاص
ام ساره،،، رادوا يگتلوها خلوا السلاح براسها بس سجاد الله ينطي إجا،، من شافهم رفع السلاح ضرب طلقه بالهوى وهددهم يله عافوها،، بس لهسه متحلفيلها كل شويه اكول راح يفوتون علينا ويموتون بنتي،، ولج يمه شسوي بنتي يتيمه ماألها احد لاعدها اب يحميها ولااخو يسندها
سيلين،،، الله موجود خاله،، واني وين رحت؟ خاله اني هم بنتچ وداعت ابني احارب واوكف بوجه الكل واحميها لواعرف اموت
ام ساره،،اعرف بس انتي تكدريلهم لهذا اتصلت بيج
سيلين،،، مااطلع سيلين اذا ما احميها واطلع حقها
رفعت جهازي اتصلت على دوريه مال شرطه شويه ووصلوا صارت هوسه برا طلعت
ابراهيم،،، سيدي بلاغ كاذب ماعدنا شي منو بلغكم؟
سيلين،،، اني،،،، الكل ألتفت بأتجاعي وسراج خزرني سجاد باوعلي بنضرات عتب
_ اني المحاميه سيلين ماجد أني ألي اتصلت بيكم اريد اقدم شكوى
الضابط،،،شنو شكوتج؟
سجاد،،، اني الضابط سجاد حسين وهنا بيت خوالي لو اكو شي اني اول واحد امنعه اني واحد من القانون المسأله عائليه والست فهمت غلط
سيلين،،، مافهمت غلط،، هنا ناوين يرتكبون جريمة قتل بحق بنيه يتيمه اتهموها باطل وناوين يقتلوها
سراج،،، سيليييبن!!
سيلين،،، سحبني على جانب تكلم وهو كاز على اسنانه من الغضب
سراج،،، وتالي وياج؟؟ انتي ماكو شي يوكفج؟ شلون تبلغين عليهم؟
سيلين،،، شنو تريدني اسوي؟ شنو انتضر يقتلوها واني ساكته
سراج،،، انتي بهذا تصرفج راح تخليهم يگتلوها،، بابا السالفه سالفة شرف موكل شي ينحل بالعنتكه والراس اليابس مالتج،، خليني اني احل الموضوع ترا بهذا تصرفج راح تفضحيها للبنيه وتصير سالفتها بالمراكز
سيلين،،، نزلت دموعي بيأس،،، شسوي لعد فهمني؟ شلون تريدني اسكت؟ شلون اسمح يقتلون اختي،، تعرف شنو اختي،، ساره اعز من خواتي والله وداعت سيف بنيه شريفه وبريئه اكو لعبه بالموضوع،، فدوه سراج اذا ألي خاطر يمك ولو شويه ساعدها،، الله يخليك
لانت ملامحه رفع ايده مسح دموعي وجر الشال قدمه غطا شعري الضاهر نزل ومامنتبهه
سراج،،، وعيونچ ودمعاتها الغاليه،، احلها،، كل شي اسوي ومااخليهم يگتلوها اخذيها كلمه مني بس ماريد تبچين وتحركين بدمج ليصيرلج شي،، هو أنتي مريضه،، دخلي جوا يم النسوان لتضلين هنا بنص الزلم ترا سمطتي ابو ابويه
سيلين،،، ابتسمتله،،، من عيوني
سراج،،، احم،، الضاهر اليوم الله هاديج،، يله يبا فوتي جوا
سيلين،،، دخلت واسمع سجاد وسراج يوضحون للشرطه سوء الفهم الصار راحوا وسراج وسجاد بلشوا يهدئون بعمامها وولدهم وام سجاد تحرض بيهم اخر شي اتفقوا يوقفون كل شي الى ان يجي مؤيد لأن هو جاي بالطريق سمعت ساره بجية مؤيد
ساره،،، الحمد الله واخيرا قنعوا اكيد بس مؤيد راح يصدكني ويحلها
سيلين،،، مااريد اسببلج احباط بس ماعندي ثقه بمؤيد
ساره،،، لا سيلين لتحجين هيج مهما يسوي مؤيد بس يحبني وواثق بيَ واكيد راح يصدكني ويسكت الكل
سيلين،،، ان شاء الله اطلع غلط
دخلت ام سجاد ترجف من العصبيه
ام مؤيد،،، اخاف عبالجن تطلعوها من السالفه ومتأملات من يجي مؤيد يحلها فأنتن غلطانات وانتي ام الزلم لاتربيه ولااخلاق جايه ونافشه ريشج علينه اطلعي برا هل بيت وبعد لتدخلين نگتلها نحرگها ماألج لازم
سيلين،،، اليوم جايه واريد اشوفكم منو هيَ ألي بلاتربيه ولا أخلاق،،، اليوم اهجم البيت على راسچ وراسهم واشوفچ شلون تحجين عليه وعلى ساره،،، احسن ماتحجين علينه روحي لمي بناتج الدايحات بالكليات ماخلن بنفس واحد شي ألي بيته من گزاز ليضرب الناس حجار لتخليني اخليجن براسي اطلع كل خياساتچن وافضحجن اخلي سمعتچن وصلت مسح للرايح والجاي،،، اتچفي شري احسلچ وسالفة اطلع منا وأعوفهن جوا ايدچ انتي وغيرج هاي گطنه وشيليها من أذنچ كاعده على گلبكم واريد اشوف واحد يوصل يمها لويسويلها شي
ام مؤيد،،،ساقط** ماعليچ عتب
سيلين،،،وداعت ابني راح ادفعچ ثمن هل الكلمه بس موهسه من افرغلچ خلي تفظ هل سالفه وأفرغ ألج واريد اطلع منو ورا هل السالفه ومنو لعب هل لعبه بساره اذا ماسويتكم طشار فلا اطلع بنت ابويه
وجها صار ينطي ألوان طلعت بسرعه ألتفتت شفت خاله وساره مبتسمات
سيلين،،،ولج على شنو تضحكين انتي وهاي عيونچ العوره صايره عبالك الاعور الدجال
ساره،،، لچ،، لتقلدين عليه ترا أكوملچ
سيلين،،، هههه،،، اذا بيچ خير كومي هو انتي هسه دفعه مابيچ
ساره،،، يولي صايره تخوفين طلعتي عمتي تركض صايره عصابچيه وتهددين
سيلين،،، احم،، احم،، حبيبتي اني الشيخه ام سيف زوجة الشيخ سراج الدين شلون ماا هدد
ساره،،، اي الله يرحم،،، عاد هو مقتنع بهل كلام؟
سيلين،،، اصلا هذا كلامه هسه گاله برا وسكتها لعمتج
ام ساره،،، الله يحفضه ويسعدكم
سيلين،،، خاله ترا دااتشاقى
ام ساره،،، لا يمه ليش تشاقين ترا هاي الحقيقه انتي مرته يعني الشيخه ومرت الشيخ
سيلين،،، كلامها اربكني غيرت الموضوع وسألت
_اكلكم هو هذا الولد وين راح؟
شهد،،، حابسي بالمخزن البرا
سيلين،،، باوعت عليها عبالك هسه يله انتبهت لوجودها
_ أكلج انتي شجابج هنا؟ شعجب؟ مين اجاچ هل الحب لساره
ساره،،، لاخطيه شهد من اول دقيقه وكفت ويايا كلهم ماصدكوني بس هيَ
سيلين،،، سبحان الله،، مصدكتها لو متأكده من برائتها؟
شهد،،، شنو الفرق
سيلين،،، لااكو هواي فرق
شهد،،، ليش مستغربه مني ليش ماسامعه محبه من بعد عداوه
سيلين،،، ماكو محبه تصير بين يوم وليله وتمحي عداوة سنين ألا اذا محبه وراها شي
شهد،،، شنو قصدج؟
سيلين،،، سلامتج حبيبتي
ضليت اباوعلها صفح ماعاجبني وجودها ودماغي فاصل عليها نضراتي خلتها ترتبك وهل شي زاد الشك بداخلي،،، رن جهازي المتصل سراج رحت للمطبخ و جاوبته
سراج،،، شلونج؟
سيلين،،، زينه
سراج،،، لتخافين تقريبا كدرت اوصل وياهم لحل وقفتهم الى ان يجي خطيبها
سيلين،،، اي سمعت بس مامرتاحه للموضوع اذا اكو نذل فهو خطيبها،، سراج شوفلك خطه بديله ترا اتوقع ماكو واحد يأذيها غير خطيبها
سراج،،، ألي يحب ميأذي ولاينطي گلبه على الأذيه
سيلين،،، احم كلت ويانفسي.. وصل بسمارك
جاوبته،،، ميخالف كل شي يصير شوفلك حل ثاني
سراج،،، لتخافين عندي هواي حلول ولكل الأمور بس ألچ مالكيت حل
سييلين،،، ليش عيني؟ شمسويه؟
سراج،،، لا يابه،، قابل شمسويه،، ملاك انتي
سيلين،،، اي اكول
سراج،،، اااااخ من بلوة حياتي ،،، روحي،،،روحي خلي ارجع يمهم
سيلين،،، ضلينه ساعات على اعصابنا كاعدين منتضرين الفرج واخيرا وصل وشرف الاستاذ مؤيد، ساره من سمعت صوته نهضت من مكانها فرحانه سمعنه صوته ارتفع
ساره،،، اكيد راح يطيح حضهم على السووا بيَ
سيلين،،، صار صياح وصوت عركه انتهت بدخول مؤيد للبيت ابتسمتله ساره دخل بسرعه ومن غير مقدمات ضربها كف قوي من قوته وكعت على الارض ضلت تباوعله مصدومه
مؤيد،،، ساقطه،،، كح،، هاي تاليتج كتلتي روحج على الرجال تتوسلين اتزوجج من تأخرت شفتي غيري
ام ساره،،، ايا طايح الحظ،، ياعار الزلم،، كل شي توقعت منك بس ماتوقعت انتَ هم تتهمها بشرفها وتصدك الكلام الي أنكال عليها
مؤيد،،، ياكلام هذا؟ شوف عين شايفيها بحضن رجال غيري،، شنو شايفتني بلا غيره ارضى بوحده عار وساق** طلع كلام امي وخواتي كله صح بس ماصدكتهن
ساره،،، والله وروح بابا مااعرفه ولا أعرف شنو جابه هنا،، صدكني مؤيد،، اني ساره تعرف اخلاقي تعرفني موهيج،، لتصدكهم
سيلين،،، اكو لعبه بالموضوع افهم الموضوع ووراها احكم
مؤيد،،، انتي لتدخلين وطلعي برا انتي اخر وحده تدخلين بهل موضوع ماكو غيرج خلاها تطلع من الطريق خليتيها تصير ساق** مثلج
سيلين،،، موكل الناس خواتك
مؤيد،،، شنو قصدج ولچ؟
سيلين،، واضح قصدي بدال ماجاي تبيع شرف ورجوله على هل يتيمه روح شوف عرضك الكل يعرفهن علم الكليه واحسن ماجاي تحاسب ساره وتعرفها شريفه روح طلع حقها ودور على الشخص اللعب اللعبه وخلاها بهل موقف ودخل عليها واحد متعرفه،،، مره بحياتك اوكف وياها واسندها وحسسها اكو رجال بضهرها
مؤيد،،، اطلللللعييي براااا
سيلين،،، كلت اتچفا الشر عفتهم ورحت للمطبخ اسمع صوته ضليت اباوع عليه ماخلا فشار ولامسبه ماسبها اخر شي جر سكين من جيبه وعاط
مؤيد،،، اليوم اذبحچ واغسل عارج ياساق**
سيلين،،، صار صياح اشوفه هجم عليها يريد يذبحها دون ماافكر ولااتردد سحبت سلاحي وخليته براسه جمد الجبان بمكانه
_وعزة وجلال الله حركه وحده تسويها لوتأذيها اگتلك خلاص اني مخبله ومشهودلي بهل شي زايدها ادخلي كم شهر بالمصحه وانتَ تصير فطيسه وعندي رجال يطلعني من حلك السبع حركه وحده حركه منك اشوفك النسوان شتسوي واشوفك شلون تستقوي على مره لان ماعدها احد
من صوتنا الكل دخل
سراج،،، شدسوين سيلييبن؟؟!!!
سجاد،،، سيلين اهدي لتتهورين
سيلين،،، مااريد احد يوصل يمي وداعة ابني بس يذبحها اكتله خلاص مخبله وماعليه عتب
سراج،،، سيلين موهيج تنحل الأمور
سيلين،،،، شلون لعددددد تنحللللل؟؟؟ كلكم ساااكتين وتتفرجووون وهل العاااار يريد يقتلها،،، ها اشوفك خنست؟ يله اذا رجال اذبحها حتى اهشم دماغك بطلقه فوكاها
سراج،،، يبااا اهدي وانتَ سجاد اسحب اخوك خلي نطلع برا نتفاهم
سيلين،، الجبان من شافني ناويتها صدك صار يرجف يبيع رجوله براس النسوان سحبه سجاد واني سراج سحبني واخذ مني السلاح
سراج،،، وصلت للسلاح،، مين جبتي؟ يصير خير ياسيلين نرجع قابل منرجع
ابراهيم،،، شنو هاي ماكو رجال يلمها جايه بنص بيتنا تتهنتر علينا وترفع سلاح شنو هل رعونيه
سيلين،،، اني الشيخه زوجة الشيخ سراج الدين ومااخاف من اكبر واحد،، بضهري رجال كول وفعل موذكور تستقوي على النسوان
وتبيع مراجلها
شفت ابتسامة سراج
محسن،،، عمي اشوفك راضي على تصرفاتها؟
سراج،،، يبا اني مرتي لبوه وتحامي احبابها وبالحق
ابراهيم،،، وين الحق وهيَ جايه بنص بيتنه ترفع علينه سلاح وتهدد ؟
سيلين،،، وأنفذ،،، ماعندي شي اخسره اليوصل يم ساره وخاله بعدها امه ماجابته،، احسن ماجايين عليها روحوا على هذا الولد زوعوا العافيه خلي يعترف شدخله هنا
ابراهيم،،، ليش ننتضرج تحجين؟ طلعت الساق** مصاحبته ويتراسلون وماكايلتله تعال اريد اشوفك
سيلين،،، وشنو الدليل على كلامه؟
محسن،،، بينهم محادثات
سيلين،،، ومنو يكول رقمها؟
سجاد،،، مع الأسف رقمها دكينه علي وطلع جهازها
سيلين،،، على ياتطبيق لو شبكه؟
سجاد،،، تلكرام
سيلين،،، سجاد اعرفك اذكى من هيج وعملك يخليك تعرف هل السوالف ،، انتَ واني نعرف ابسط منها ماكو اي شخص يكدر يفتح تلكرام بجهازين ويلفق هل تهمه وصرت متأكده هل اللعبه من اهل بيتكم واحد لو وحده منكم لاعب هل اللعبه ويريد يورطها
ابراهيم،،، لوصدك كلامج شدخله للبيت؟
سيلين،،، اذا الباب مامكسور معناها المفتاح بي نسخه ثانيه وعن طريقها فتحوا الباب ودخلوا عليها
محسن،،، سألنا يكول من راسلتها كالتلي المفتاح تلكا جوا دواسة الباب ماخذه وفاتح الباب وداخل
سيلين،،، اي واحد يكدر يستنسخ مفتاحهم ويخلي بهل مكان ويورطها المفروض انتو تعرفوها وتعرفون اخلاقها،،، ولو بعد مااعتب على اي احد بيكم اذا خطيبها من كلمتين صدك
سراج،،، ياجماعه،،،، الله بالخير،،، هذا موحل خلينا نكعد ونتفاهم نحل هل موضوع اتصلوا بأهل الولد خلي يجون ونكعد نحلها
مؤيد،،، ماكو حل غير اغسل عارها
ام ساره،،، ولك ماغيرك العار هنا،،، اعرفك من البدايه مو آدمي لاانتَ ولاامك بس الله يرحمه ورطنا بيكم،،، بس حسبي الله ونعم الوكيل بيكم الله ياخذ حقنه منكم ومن كل شخص سوا هيج بنتي
سيلين،،، اخذهم سراج وطلعوا برا اجوي اهل الولد وصارت هوسه جديده والكل كاعد على اعصابه ساره من صدمتها بالصار وبمؤيد بس صافنه ودموعها تنزل اجانه سجاد
سجاد،،، ساره لبسي شي على ملابسج راح يجي الشيخ يعقدلكم
ساره،،،اني ومؤيد راح نتزوج؟
سجاد،،، لا راح تعقدون انتي وهذا العار
ام ساره،،، لطمت على صدرها،،، شنوووو؟؟!!!
سيلين،،، تحجي صدك؟ شنو تعقد على هذا؟ انتو واعين؟
سجاد،،، ماكو غير حل كل الأدله ضدها لويگتلوها لو تتزوجه
سيلين،،، ساره وام ساره انهاروا طلعت شايطه قبل لاادخل للديوانيه لمحني سراج اجاني بسرعه سحبتي قبل لاادخل
سراج،،، ويييين رايحه؟؟ تخبلتي؟؟ تريدين تدخلين بنص الزلم
سيلين،،، مااريد ادخل اجيت عليك وهذوله لوزلم وبيهم حظ ميسوون هيج بيتيمه
سراج،،، اهدي واسمعيتي وافهميني
سيلين،،، مااريد اهدا
سراج،،، باعي عليه سيلين الموضوع اكبر من ماتتصورين كل الأدله ضدها ماكو حل لويگتلوها لو تتزوج
سيلين،، وبالحالتين جنيتوا عليها وحكمتوا عليها بالأعدام
سراج،،، تتزوج احسن ماتموت
سيلين،،، الموت ارحم من الزواج من شخص متريده ولاتتقبله شلون تتوقعها راح تتقبل شخص مثل هذا فهمني شلون
صل صافن بوجهي مسح وجها بقهر
سراج،،، شوفي راح تعقد هسه بس مومعناها انتهى الموضوع
سيلين،،، شلون يعني؟
سراج،،، من تعقد تطلع من ذمت اهلها ويشيلون ايدهم منها وهنا اني وانتي نتدخل
سيلين،،، شنسوي؟
سراج،،، نتفق ويا الولد واهله الي مبينين ناس ذهب نتفق وياهم ميوصل يمها ويضلون سنه وينفصلون بعدها نسحبها هيَ وامها وندخلهم بحمايتنه وتخلص من الكل صدكيني هذا الحل الوحيد وألا يقتلوها وتخسريها طول العمر ويجوز منا للسنه تنكشف الحقيقه اكيد انتي واني ماراح نعوفها وراح نكشف الحقيقه
سيلين،،، مسحت دموعي وابتسمت،،،، ابوس عقلك شكد ذكي
سراج،،، شكلتي؟! عيديها الله عليج
سيلين،،، كلت انتَ ذكي
سراج،،، اممم،، تموتين ولا تمدحيني شعجب؟
سيلين،،، يووو،،، شبيك؟
سراج،،، هههه،، مابيَ شي،، روحي حضري صديقتج وفهميها كل شي
سيلين،،، رحت لكيت ساره وخاله موتات نفسهن من البچي وحتى تكمل واخيرا وصلت اختها نسرين،،، كعدت وياهن تلطم على الواهس ردت احجي وتراجعت من شفت شهد كاعده ماارتاحلها واكص ايدي اذا ماطلعت إلها ايد بالسالفه
_شهد حبيبتي جيبيلنه من مكياجچ خلي نرتب وجها عيب هيچ تطلع كدام الشيخ اليعقدلها
شهد،،، ساره عدها مكياج
سيلين،،، من وين عدها هيَ وين تخلي مكياج انتي مرتبه واكيد عندج خوش مكياج
شهد،،، اي هسه
سيلين،،، طلعت بسرعه لزمت خاله وساره فهمتهن كل شي ساره ملخت نفسها رافضه بس خاله نوعا مااقتنعت واصلا فعلا ماكو حل
اجتي شهد رتبت وجها لساره ودموعها مابطلن والله على عيني وگلبي وضعها كل شي بيها يذكرني بالصار بيَ قبل من جبروني اهلي مع الاسف صديقة عمري وكعت بنفس الشي بس الفرق اني مالكيت احد يساعدني لهذا اموت ومااعوف ساره وحدها خلصنا وعقدولهم عمامها كالوا اخذها وياك متبقى بعد بالبيت
خاله ام ساره تخربطت وساره انتهت انهارت نسرين لمت ملابسها وغراضها لساره وهي هم دموعها بعينها
طلعناها شفنا مؤيد واكف برا وياهم باوعت علي ودموعها تنزل راحتله
ساره،،، تصورت الكل يبيعني ويغدرني والكل ميصدكني ألا انتَ لأن الوحيد تعرفني هو هذا حبك حب ٨ سنوات بعته بلحضه وصدكت مع الاسف عليك كل الضرب والخوف العشته بكفه وخيبة املي بيك بكفه ثانيه
سيلين،،، لتبچين حبيبتي يمكن الصار بصالحج رب العالمين سوا هل شي حتى يكشفلج حقيقة ومعادن البشر
مؤيد،،، روحي ويا البعتيني علموده وعلمود فلوسه خلي يفيدج
سيلين،،، ساره انهارت اكثر صارت تشهك بصوت عالي شطت عليها
_ وحگ دموعها راح تندم وتعض اصابعك بس يكون فات الاوان وتذكر هاي كلمتي خليها براسك طول العمر،،، دمعة يتيمه راح تحرگم كلكم وحقها يرجع وميضيع والأيام بينا
لزمتها من ايدها ترجف حضنت امها واختها
ابتعدت عنهم حتى ياخذن راحتهن دموعي تنزل على وداعهن والضلم العاشوا،،،سراج من شافني إجا يمي
سراج،،، ليش هل دموع؟ فضت السالفه كافي موعيونج راحت
سيلين،،، موبيدي مااتحمل كل هل الضلم
رجال كبير بالعمر يباوع بتركيز عليه تقدم اتجاهي
_ انتي شتصيرين من اللبنيه؟
سيلين،،، صديقتها واختها،،، ليش عمو؟
_ اشوفچ محروك گلبج عليها اريد اكلج وهاي كدام الشيخ اني جده للولد لتخافون عليها من هل دقيقه بنيتنه ساره صارت بأمانتي وحمايتي وبعيوني اخليها
سيلين،،، شكرا عمو بس اني خايفه من هذا ابنكم لتزعل بس ألي يدوس حرمة بيوت الناس ويحاول يلوث شرفهم مابي امان اني اختي شريفه وواثقه بيها مليار بالميه بس ماواثقه بأبنكم
_ لتخافين يابا كتلج الموضوع صار يمي اتفقت ويا الشيخ ابو الأمين على كل شي
سيلين،،، ان شاء الله اباوع على الرجال وجها نوراني ومبين من شكله انسان زين وواضح وضوح الشمس ابن عز وناس راقيه شويه أطمئنيت
باوع على ساره وكال
_يله يابا امشي بنيتي ويانا
ام ساره،،، امانة الله ورسوله بنتي بأمانتكم ديربالكم عليها يتيمه ومكسورة خاطر
_ بعيونه لتخافين عليها من هل دقيقه هيَ وحده من احفادي هيَ بعمرهم
سراج،،، حجي إحنا نطلع وياكم
_ هلا بيكم يابا نتشرف
سيلين،،، طلعنا صعدت ويا سراج بالسياره وساره ويانا لان تخاف
مشوا وإحنا وراهم الدنيا ليل وبدا الوقت يتأخر طول الطريق ساره مانشفت دمعتها دخلنا لأحد مناطق بغداد الراقيه او بمعنى اصح ارقى منطقه ببغداد شفت محلات طلبت من سراج يوقف السياره ردت انزل بس سراج رفض هو نزل عني وصيته على غراض حلويات ومعجنات وفطائر وعصائر ومي دخل هو وأسماعيل جابهن وإجا
مشينه وصلنا لفرع وكفوا سياراتهم امام بيت ضخم كلش صفينه السياره بعدهم ونزلنا استقبلنا الحجي يهلي ويرحب بينا دخلنه استقبلتنه امراه كبيره بالعمر تشبه الحجي
_ هلا يمه اتفضلوا
دخلتنه للصاله وسراج اخذوا للثانيه
سيلين،،، كعدنا مستغربين شويه ودخلت مره متوسطة بالعمر ووياها شابه
بدون سلام كعدن عرفت من نضراتهن هذني من فصيلة المچلچلات،، المره الوسط باوعت على ساره وتكلمت
_ انتي اللبنيه ام البلوه؟
سيلين،،،ابنكم ابو البلوه اختي معليها
_ اي هنه يسونها ويذبنها براس الرجال
سيلين،،، والرجال لو رجال ميدوس حرمت بيوت الناس ويدخل على بناتهن،، بتنا نايمه فجئه لكته داخل البيت وكبت العيطه
تكلمت الشابه بأنفعال
_ رچلي ميسويها هاي هيَ لاعبه علي
سيلين،،، هااا انتي مرته؟ شوفي ياحلوه لانغلطكم ولاتغلطونا الفاس ووكع بالراس احسن منضل نتناكر ونغلط ببعضنا خلي نتفق بحل وسط يرضي كل الاطراف
_ ياحل؟
سيلين،،، اول شي خلي نتفق على شغله وهاي مابيها نقاش ابنكم ساق*ط ومرته مامكفيته لهذا يدور علاقات ويابنات العالم
_مااسمحلج تحجين على ابني
سيلين،،، مومهم تسمحيلي المهم نتفق،، اختي يمكم تعتبروها ضيفه منا الى ان تنكشف حقيقة الصار واذا ما أنكشفت سنه ويطلكها
_ خاله اني ماارضى ماابقى بالبيت وابنج تزوج عليه
سيلين،،، لو بيج خير ميدور عليج
_شنووو؟!!
سيلين،،، هاي حقيقه الرجال يخون لسببين لوالزوجه مابيها حظ لو هو ساق**ط وميملي عيونه بس التراب وبكلا الحالتين محتاح مره حوگ تضبه
_انتي شلون هيح تحجين على چنتي وابني؟
سيلين،،، مووقت هل النقاشات العقيمه راح اطلعلكم بالنضيف
خاله ابنج اليوم رادوا يقتلوا بسبب استهتاره تعرفين بهل شي لولا؟
_يمه وليدي،،، تحجين صدك؟
سيلين،، اذا تريدين تحمي حتى ليتكرر الصار اليوم واحتمال المره الجايه ينقتل،، ساعديني،، وانتي زوجته احسن ماكاعده تلطمين وتنوحين وتدورين طلاك كفي رجلچ وشبعي وضبي انتي حلوه مارسي سحرج علي لتخلي يشوف غيرج طول الوقت
خلي عينج علي وراقبي،،، اختي راح تضل فتره بهل بيت يمكم لتخلوا يوصل يمها اذا تريدين تحافضين على زواجج ويبقى ألج لتخلي يوصل يمها زواجهم لازم يضل شكلي ومؤقت
_ والناس شتكول عليه صديقاتي واهلي من يسمعون اشرف تزوج عليه؟
سيلين،،، سبحان الله طلع اسمه اشرف وهو بعيد كل البعد عن الشرف
_هاي علمن؟
سيلين،،، لا هيج على خالتي احجي،، باعي حبيبتي هذا الكلام يبقى بينا كولوا للناس ساره ضيفه عدكم وحده من اقربائكم او اصدقائكم اومعارفكم بيتها محافضات وجايه يمكم ضيفه لان تدرس بأحدى جامعات بغداد
_خوش فكره عجبتني اهم شي ميعرفون تزوج عليه
سيلين،،، وحتى ليصير هل زواج صدك والناس تعرف وتصيرين مضحكه فرغولها غرفه خاصه بيها وأبعدوا عنها اشرف الموشريف فتره ويطلكون وكلمن يكعد بمكانه وخالتي وخالتج وتفرقوا الخالتين
_ واذا اختج غوته وخلته يروحلها؟
سيلين،،، هاي من سابع المستحيلات،، اختي مخطوبه بس تنكشف الحقيقه ترجع لخطيبها هيَ تحبه ويحبها كلتلكم كل الصار لعبه ومن تنكشف كل شي يرجع لمكانه خلونه حبايب ونحل السالفه بدون مشاكل وهيَ فتره وكل شي ينتهي
شتكولون موافقين؟
_اني بالنسبه ألي موافقه اهم شي محد يعرف
_اذا ابني ميصيرله شي موافقه
سيلين،،، وانتي حجيه شنو رأيج؟
_يمه اني الموضوع ميخصني مرته وامه ادرى بس اشوف كلامج منطقي
سيلين،،، تمام توكلنا على الله اني عليه حجيت ومن بعد هل الاتفاق اذا صار شي ماعجبني على كولت سراجي وحق من انزل القران تشوفون وجه مني ميعجبكم اني موقليله محاميه وزوجي شيخ ومحامي معروف وبضهري زلم تسد عين الشمس قسما بالله اي شي يصير بأختي اجي اهد هذا البيت على راسكم
_اشو أنتي تهددينا؟
سيلين،،، مااهدد وأنما احذر،،، وهسه قبل لااروح اريد اشوف غرفة اختي عدكم غرفه لومن باچر اطلع عمال ابنيلها وحده
_الحجيه،،، يمه شنو السالفه بيتنا خير من الله
سيلين،،، اخذونا على غرفه صغيره بيها فراش وغراض زايده من شفت المكان عرفت هاي بداية الحقاره ردت اكفخهن على راسهن بس تراجعت
سحبت مفتاح الباب وأنطيته بيد ساره
_ يله حبيبتي فوتي وقفلي الباب عليچ وهذا اكل اكلي لتضلين بلا اكل لازم تقوين نفسج وأي شي يصير خابريني طايره اجيچ
ساره،،، فدوه سيلين لتعوفيني اخاف
سيلين،،، لتخافين عمري انتي،، الباچر من الصبح ان شاء الله يمج مااعوفج ابد
طمنتها وأطمئنيت عليها وطلعنا گلبي بقا يمها بس مابيدي شي
رجعنه الطريق كله ساكتين اني وسراج دخلت للبيت لكيت سيف نايم شفته ورحت للغرفه سبحت وغيرت ملابسي ونمت بفراشي
دخل سراج للغرفه هم مبين سابح بالحمام الخارج الغرفه دخل بفراشه طفا الضوء صار هدوء ضليت افكر بساره ماكدرت انام ضليت بس اتقلب بفراشي
سراج،،،نامي لتخافين عليها
سيلين،،، موبيدي اعرفها خوافه الله واعلم شنو هسه حالها
سراج،،، اتصلي بيها وأطمئني
سيلين،،، اخاف نايمه واصحيها واخليها صدك تخاف وتقلق
سراج،،، ااااخ منج،،، انتي شلون بيج هجمتي على الناس عبالك ماكله گلب اسد لاتخافين ولاتنلزمين ولايوكف بعينج احد وتالي وياج تعبتيني
سيلين،،، سلامتك ابو الأمين سلامة گلبك من التعب
سراج،،، هو انتي شخليتي بگلبي وتتمنيله السلامه
سيلين،،، لارد
سراج،،، مينلچ هل سلاح؟
سيلين،،، مالتي اشتريته قبل سنين وبي رخصه
سراج،،، الحمد الله ضمنت طريقة موتي لعد
سيلين،،، ترا اني مومجرمه
سراج،،، بشرفي انتي الاجرام بعينه
سيلين،،، حبيبي هل دنيا حتى نعيش بيها يرادلها گلب اسد موگلب عصفور
سراج،،،حِكمّ،،، كلامج حِكم ّ
سيلين،،، تستهزء حضرتك
سراج،،، لا ليش استهزء قابل شكلتي
سيلين،،، سراج
سراج،،، ها
سيلين،،، شكرا
سراج،،، على شنو؟
سيلين،،، على وكفتك اليوم
سراج،،، عادي ماسويت شي
سيلين،،، بالنسبه إلي سويت اهم شي
سراج،، السويته اسوي ويا اي شخص يحتاجني بالنهايه هاي وضيفتي سواء كمحامي او كشيخ عشيره
سيلين،،،كلت ويا نفسي هوصوجك لوصوجي شكرتك
سراج،،، ليش سكتي؟
سيلين،،، لأن ماكو داعي لكلامي نام الضاهر انتَ نعست اعرفك من قبل تحب تنام من وگت
سراج،،، من زمان بطلت انام من وگت تعلمت على السهر
سيلين،،، اخاف جوعان
سراج،،، صراحه ماأكلت
سيلين،،، ولااني جابولي اكل بس ماكدرت اكل
اذا اسوي اكل تاكل ويايا
سراج،،، اي ليش لا
سيلين،، كمت من فراشي ورحت للمطبخ فتحت الثلاجه وأخذتلي صفنه داخلها اني لوعليه توست جبن كلش كافي بس اعرف هل الأكل ميصرف لسراج متعلم على الأكل الدسم لكيت لحم مثروم ثرمت ويا بصل وطماطه وكرفس وخليث بهارات كباب وملح وطحين وعجنته سويت عروگ قليته وسويت چاي وزلاطه وطرشي خلصت وخليته على الميز قبل مااروح اصيحه هو دخل المطبخ جر الكرسي وكعد
جبت ماعون واخذت كبابايات ثنين لفيتهن بكلينكس المطبخ ضغطت عليهن و مسحت كل الدهن منهن رفعت راسي شفته يباوع عليه
سراج،،، هاي شتسوين طلعتي مصارينهن
سيلين،،، بهل طريقه اتخلص من الدهن
سراج،،، هو شبقى بيهن
سيلين،،، مومهم الشكل اهم شي الأخلاق
رفعلي حاجبه
سراج،،، شنو؟
سيلين،،،، اقصد اهم شي مابيهن دهن مااكدر اكل دهن
سراج،،، نسيت تخافين على قوامج الممشوق
سيلين،،، انتَ عاد كلمه عجبتك وچلبت بيها
سراج،،، قابل چذب يعني عصرتي الكباب شوهتي خلقته حتى ليضل بي دهن علمود ليزيد وزنج صح لوغلطان
سيلين،،، لاحشاك من الغلط
سراج،،، بعد شكو
سيلين،،، عوفك مني وأكل
سراج،،، والله مامرتاح،،، اخاف خالتلي بي سم
سيلين،،، هاي صدك تحجي؟!!
سراج،،، اكيد
سيلين،،، كال كلامه واخذ كم قطعه خلاها بالصمون وياكل
ترا مامجبور تاكل اذا شاك بيَ
سراج،،، جوعان هسه لو سم من ايدچ هم آكله
سيلين،،، باوعتله صفح ماعاجبني كلامه ابتسم وهو ياكل
اخذت ربع صمونه قسمتها نصين واكلت وهو خايف من أكلي وماشاءالله اكل تقريبا اكثر من نص الماعون كام وكف عالسنك يغسل
سراج،،، عاشت ايدج ولو الأكل ملحه قليل
سيلين،،، ملحه زين بس انتَ الضاهر متعلم على الأكل المالح
سراج،،، هو الأكل بدون ملح ينأكل؟
سيلين،،، لو اخليلك طن ملح ميغزر بيك وبعدين شتسوي بالملح موزين عليك كبرت بالعمر ليروح يصير بيك ضغط
اندارلي مصدوم
سراج،،، ترا بعدني شباب
سيلين،،، وينك وين الشباب كلها كم سنه يصير عمرك اربعين
سراج،،، بعدني هسه دخلت بنص الثلاثين
سيلين،،، بس مبين عليك اربعيني،،، خزرني وراح للغرفه
هههههه اكل وشبع وقلد على اكلي وعباله اسكتله غثيته مثل ماغثني كلمة اربعيني راح تضل تدگ براسه ويفكر بيها سويته كبر وهو شكله عبالك ٣٠ سنه بعده بعز شبابه واصلا حتى الرجل الاربعيتي يعتبر بعد شاب بس مااعرف ليش الناس يستفزهم هل الرقم
خليت المواعين بالجلايه وغسلت أيدي طفيت الأناره مال بيت ورحت للغرفه لكيته كاعد يدخن ههههه مثل ماتوقعت انغث من الكلمه
خليت مرطب على ايدي ووجهي ورحت لفراشي
_ترا التدخين مضر بالصحه
سراج،،، شسوي بالصحه صرت شايب كلها كم سنه وأودع
سيلين،،، حجاها بقهر لاارادي طلعت مني
_ لا اسم الله عمرك طويل ان شاء الله،،، باوعلي مصدوم
سراج،،، اقسم بالله عجزت افهمج
سيلين،،، طفا الچكاره ونام وغطا حتى راسه
هذا صدك ضاج وتحسس من كلامي معقوله كلامي لهل درجه يأثر بي لو موضوع العمر يغثه اني اعرف سراج عنده ثقه بنفسه ومتأكده يعرف نفسه بعده شاب
ضليت افكر بي وبساره الى ان صار الفجر كمت توضيت وصليت اعرف ساره هسه كاعده على الصلاة اتصلت بيها أطمئنيت عليها يله كدرت انام
ثاني يوم الصبح كعدت مالكيت سراج بمكانه طلعت لكيت سميه وسيف يتريكون
_وين سراج
سيف،،، عمو طلع
سميه،،، ماقبل يتريك طلع وحسيته ضايج
سيلين،،، هو طبعه يكعد من النوم وجهه يلطم
سميه،،، هههه ولاتكعدين راحه اعرفج مبين غاثته
سيلين،،، مضلومه،، ماسويتله شي
سميه،،، اعرفچ وعاجنتج وخابزتج على ايدي هذاك الله يرحمه خبلتي وان شاء الله جاي السرا على الشيخ
سيلين،،، شنو هل سمعه
سميه،،، هاي حقيقه ام سيوفي لتزعلين تمردج كارثي واذا خليتي واحد براسچ تفجري
سيلين،،، لاليش ازعل
سميه،، اصبلج چاي لوحليب
سيلين،،، مااريد شبعانه بساعه متأخره أكلنا وللان شبعانه
سميه،،، شلونها ساره؟
سيلين،،، الفجر خابرتها تكول زينه ماكو شي بس واضح من صوتها خايفه تعرفيها جبانه
سيف،،، سرو زينه مو؟
سيلين،،، اي حبيبي زينه وسلمت عليك
كاعدين ورن جهاز سميه جاوبت ومن خلصت المكالمه كالت
سميه،،، سيوفي عمو الشيخ يكول حضر نفسك يريد ياخذك يمه
سيلين،،، شكو ياخذه؟
سيف،،، اني كلت لعمو ضايج
سميه،،، مابيها شي خلي يطلع ويتعلم
سيلين،،، اخاف علي
سميه،،، لتخافين علي ترا هوَ كلش يحبه من علساس تسافرون ورجعكم جاب سيف يمي واكثر الوقت بقى يمنا ضل كاعد يم سيف حتى ليخاف وحار شنو جابله وكعد ويا لعبوا شطرنج وطاولي ودومنه علمه عليهن ماخلا يحس بالوقت
سيلين،،، ممم،،، ويكلي عندي خطار وعافني وحدي
سميه،،، هههه إحنا الخطار
سيف،،، اني احبه لعمو سراج احسن من سمك السردين
سيلين،،، وللللللك،،،، شلون هيج تحجي؟ صاير متنمر
سيف،،، عادي عمو سراج هيج يسمي
سيلين،،، الله اليستر منك ومن عمك سراج
بدل وراح حتى على الغدا مااجوي اتصلت بساره اطمئنيت عليها الحمد الله مابيها شي اتعشينا وخلصنا يله دخلوا للبيت سيف فرحان وشايل بأيده اكياس غراض
سيف،،، امي شوفي شنو اشترينا
سيلين،،، امي؟؟؟ اول مره سيف يكلي امي تذكرت هاي كلمة سراج لأمه يصيحلها امي ابني هواي بدى يتاثر بسراج قطع افكاري صوته
سراج،،، السلام عليكم
سيلين وسميه،،، وعليكم السلام
سلم وراح للغرفه
سميه،، وليدي تريد عشا جوعان
سيف،،، لا سوسو اكلت ويا عمو سراج وسيلين وبيلين طلعنا عمو للمول اشترينا ملابس وألعاب ولعبنا بالألعاب وبالمطعم اكلنا بركر وفنكر ورجعنا
سيلين،،، عمك سراج ياكل بركر من شوكت؟
سيف،،، عمو ما اكل بس إحنا
سيلين،،، شوكت رحتوا؟
سيف،،، ورا الغدا طلعنا،،، ماما تدرين عمو سراج عنده بنيه نفس اسمج
سيلين،،، اي اعرف
سيف،،، حتى تشبهج
سيلين،،، تقريبا
سيف،،، اني وعمو اتفقنه نحميهن لأن هنه عرضنه
سيلين،،، اني وسميه وحده باوعت عالثانيه
سيلين،،، عرضكم شنو؟
سيف،،، خواتي معناها عرضي لازم اخاف عليهن واحميهن من الكل
سيلين،،، استلمي لاربحنا ابني صار منهم روحة الثانيه ابني يلبس زي عربي ويلزم راس المضيف ويوجب الناس
سراج،،، وشكو بيها هذا وليدي السبع اسلمه الديوان وكعده بصدره
سيلين،،، يعني اني هسه شنو اريد احجي فشلني وفوكاها صارت فراشات ترفرف بداخلي من كلامه وليدي كلمه كفيله تفهمني شنو معزة سيف عنده ينلام من سيف يحبه اتذكر سردار ماكان يطيقه لسيف ولامره حتى سلام سلم علي
ضليت اباوع علي هسه المفروض احبه لو اكرهه والله هل الرجال ضيعني وتهت بمشاعري ويا لاكادره اكرهه ولاترهم احبه قطع نضراتي السراج ألي كعد وشغل التلفزيون يقلب بي
سيف،،، امي هذا ألج وهذا لسوسو
سميه،،، شنو هذا؟
سيف،،، هديه صغيره
سميه،،، يمه بعد عمري اروح فدوه لوليدي الكبر وصار يطلع ويجيبلي هدايا ويا
سيلين،،، شكرا حبيبي،،، بس شنو المناسبه؟
سيف،،، ماكو مناسبه عمو يكول لازم الرجال من يطلع ويشتري شي يذكر اهل بيته
سيلين،،،اكذب اذا اكول مافرحانه صرت احس ابني صدك بدى يصير رجل اباوع على سراج مركز بالاخبار والموضوع مويمه
فتحت سميه الكيس طلعت حقيبه نسائيه لون بيجي كلش حلوه حضنت سيف فرحانه لتصرفه
سيف،،، ماما اريد اطلب منج طلب وتواعديني تسوي
سيلين،،، عيوني ألك شتريد اسوي
سيف،،، اريد تواعديني تلبسين الشي الجبته الج
سيلين،،، وعد والله ألبسه
سيف،،، دائما مومره وحده
سيلين،،، دائما
سيف،،، يله شوفيها
سيلين،،، فتحت الكيس لكيت بي شال وردي ضليت صافنه على الشال احاول استوعب بللله هسه لو اكوم ألف الشال على رقبته واخنكه لسراج اكو احد يكلي ليش
صار ساعه امدح بي وهو طلع مسوي كل هل سالفه حتى يوصل للشي ألي يريده اعرف كلش زين هو الجايب الشال ومسوي كل هل اللعبه والحلفان حتى يحرجني وانجبر لأن حلفت لأبني ألبسه اباوع علي مسوي نفسه ولامهتم وادري كلش زين باله يمنا منتضر ردت فعلي
جاوبت.... شكرا حبيبي هديتك كلش حلوه مابقى شي للشتا ودائما بلاعيمي تلتهب يفيدني هل شال ألفه على رقبتي ادفيها من اطلع
سراج ألتفت بسرعه بأتجاهي باوعلي بذهول ابتسمتله خزرني وطلع چكاره شغلها وصار يدخن
هههههه علمن جاي بابا اني سيلين اوديك للشط وارجعك عطشان ألعب ويا غيري عود عباله انحرج من يجيب الشال ويدزه بيد ابني حتى ألبسه اني اصلا ناويه ارجع للحجاب وبأقرب وقت بس بقناعتي مو هو يفرضه عليه اتخبل من سالفة شي ينفرض عليه بس هو موراضي يقنع بهل شي
همست سميه...
سميه،،، ناويه تجلطي لواني غلطانه
سيلين،،، وانتي الصادكه ناويه اموته بس انتضري
طويت الشال ولبسته على شعري على شكل بوند
ها سيوفي شنو رأيك حلو عليه؟
سيف،،، كلش حلو
سيلين،،، لعيونك دائما راح اضل ألبسه واعدتك وماارجع عن وعدي
شفته يدردم ويانفسه رحتله
ابو سيلين عيوني شكرا
سراج،،، على شنو ترا الشال ابنج اشترا مو اني
سيلين،،، ومنو كلك جايه اشكرك على الشال انتَ شعليك سيف جابه ألي اعرف كلش زين سيوفي جابه يريدني اتحجب بس شكرتك لأن طلعت سيف غيرتله جو لأن ضايج
باوع عليه نضراته توحي يريد يموتني
سراج،،، لاشكر على واجب
سيلين،،، اسويلك عشا؟،،،، كام وكف شمر الريموند بعصبيه على الطبله
سراج،،، تعشيت وشبعت والأكل وصل لخشمي
سيلين،،، ألف عافيه هني مري
باوع عليه ولو النضرات تقتل يعني هسه المفروض هسه محضرين تابوتي عافنه وراح للغرفه
همست سميه
سميه،،، هههه،،، بشرفي انتي مصيبه والمسكين ابتلى بيج
سيلين بهمس،،، يتحمل ماكو احد جبره يتزوجني بالأجبار
سميه بهمس،،، لويدري بيج هيج جان عافج تسافرين وشمر وراج طابوگ موحصو حتى لترجعين
سيلين،،، ههههه
سيف،،، على شنو تضحكون؟
سيلين،،، حبيبي فرحانين بيك وبهداياك
سيف،،، لعد بعد كل مره اجيبلكم
سيلين،،، بس المره الجايه كول لعمك ماما بطلت تحب اللون الوردي جيبولي شال غير لون
سيف،،، بس هو كال اخذلها وردي لأن تحبه
سميه بهمس ،،، هههههه،،، لاابد مو هو مشتري
سيلين بهمس ،،، هههه،،، ولاهو مختاره
سميه بهمس ،،، يمعوده روحيله شوفي الرجال أخاف انجلط من وراج
سيلين،،، رحت للغرفه لكيته بالحمام طلع ينشف بشعره وكف يمشط باوعتله وأبتسمت ابتسامتي استفزته شمر المشط على الميز وتكلم بعصبيه
سراج،،، اي اني،، أني كتله اشتريلها شال لأن بعد متطلعين هيج وهذا اخر كلام عندي لوتنفذي لو بعد متطلعين
سيلين،،، اهدى يمعود لتنجلط موزين عليك العمر أله حوبته
سراج،،، سيلين أنعدلي لااعدلج بأسلوبي
سيلين،،، عيوني انتَ علمودك احجي غير خايفه عليك ليصيرلك شي ياعيني
سراج،،، وخري من وجهي لاارتكب بيج جريمه
سيلين،،، ياحلو لتعصب العصبيه تسوي تجاعيد وانتَ ماناقص
باوع عليع مصدوم
اندار على المرايه يباوع على شكله حسيت هواي هل موضوع أثر علي ماردت ازيدها
اتشاقى وياك اصلا ألي يشوفك يقيمك ٣٠ سنه عمرك وبعدك وسيم مثل اول مره شفتك بيها
شكد حاول يخفي ابتسامته ماكدر كلش واضح بعيونه فرحته بكلامي
سراج،،،، احممم،،، كلامج ميهمني واثق بنفسي اعرف نفسي بعدني شاب
سيلين،،، شوف الغرور هو صوجك لوصوجي جاوبته
ومنو كلك الرجل بعمر الثلاثين شاب اني ماكلت بعدك شاب انتَ كبرت وهاي حقيقه منكدر نغيرها اني اتشاقيت وياك بموضوع التجاعيد بس
سراج،،، ٣٠ سنه كبرت؟؟؟ اذا اصير ٤٠ شصير بنضرج؟
سيلين،،، بالأربعين ابدي احضرلك البخور والمي ورد
سراج،،، بشرفي انتي مصيبه بلوه وأجت على راسي
سيلين،،، شمسوي بدنيتك والله بلاك بيَ اعترف لابد مسوي شي وهيج صار بيك
سراج،،، ولچ راح اموتج واخلص منج
سيلين،،،، تقدمت صرت كلش قريبه منه باوعت بوجههه
وينطيك گلبك تموت زمردتك الثمينه؟
لانت ملامحه وسرح بعيوني تاه وضاع وتبخر كل شي،،، ابتسمتله وعى على نفسه ابتعد راح على فراشه نام وغطى حتى راسه
گلبي صار ينبض قوي من نحجي سوا نتجاذل ونعبر عن غضبنا وكرهنا لبعضنه ومن نسكت گلوبنا تصرخ بالحب والله گلبي مينطيني اغثه بس ليش هيج اسوي مااعرف والمشكله راح ينام وهو اخر وجبه اكلها الغدا طلعت لكيتهم رايحين لغرفهم طلعت لحم قطع حمسته سويته قليه موصليه سويت ويا چاي وسلطه وخبز وأخذته للغرفه لكيته كاعد يدخن خليت الصينيه امامه على السرير
سراج،،، شنو هذا
سيلين،، عشا
سراج،،، مااريد شبعان
سيلين،،، اعرفك مااكلت وللان على الغدا
سراج،،، مااريد
سيلين،،، على راحتك اني جوعانه ماماكله وماألي نفس اكل عبالي ناكل سوا واحد يفتح نفس الثاني ملازم راح ارجعه اني هم مسدوده نفسي
سراج،،، من دخلنه مو چنتو تتعشون؟
سيلين،،، شفتني آكل؟
سراج،،، لا
سيلين،،، سميه چانت تتعشا
سراج،،، اكلي معليج بيَ لتنامين جوعانه
سيلين،،، ما ألي نفس اذا تاكل اكل متريد خلي ارجعه للمطبخ
سراج،،، يله آكل امري ل الله حرامات النعمه تنذب
سيلين،،، ابتسمت واخيرا تنازل كعد ياكل وكلش واضح حبها للأكله اكلت ويا شويه حتى لاابين كذابه طلع كلش جوعان اكل ومن شبع سأل
سراج،،،، شنو اسم هل اكله؟
سيلين،،، قليه موصليه،،، طيبه؟
سراج،،، يعني
سيلين،،، كلت ويا نفسي واضح،،،، الضاهر امي اجتي نسفت الماعون من هذا الحجمه الكبير
شلت الصينيه وديتها خليت المواعين بالچلايه غسلت ورجعت لكيته بعده كاعد
وكفت على المرايه اسوي العنايه الليليه
_سراج
سراج،،، ممم
سيلين،،، اريد الباجر اروح لساره
سراج،،، ليش؟
سيلين،،، اشوفها واخذلها كم غرض
سراج،،، احجي وياها بالموبايل واذا تريدين تدزيلها شي واحد من الولد يوديلها ماكو داعي تروحين ناس غربه ميجوز يوميه رايحه
سيلين،،، اريد أطمئن عليها
سراج،،، ألمن اخترعوا الموبايل
سيلين،،، اعرفها متحجي اريد اشوفها بنفسي حتى أطمئن
سيلين،،، طلعه ماكو كعدي وسكتي
سيلين،،، من تزوجنه للان ماطالعه غير البارحه
سراج،،، هذا الموجود عندي
سيلين،،، شنو هو سجن؟
سراج،،، ومنو كلج متزوجج اونسج وادلعج
سيلين،،، ماطالبه منك اني اروح
سراج،،، ماعندي مره تطلع
سيلين،،،يعني سجن
سراج،،، فسري على مزاجج
سيلين،،، ترا اني مومرتك صدك حتى تتحكم بيَ البينه اتفاق فتره وننفصل فلتعيش الدور براسي
سراج،،، كلت العندي نفذي وسكتي
سيلين،،، لف راسه ونام واني شطت من كلامه شنو قصده يضحك عليه لوشنو نمت وأني مغثوثه
رجعت ثاني يوم هم طلبت منه وهم رفض حاولت بكل الطرق حتى طلبت هو يجي ويايا وهم رفض أسبوع اني اتوسل بي يوديني اعرف ساره بيها شي ومامرتاحه بالي يمها وأمها مريضه متخربطه وأختها يمها زوجها عافها وراح للشمال اليوم كعدت وقررت اقنعه بأي طريقه رجعت فتحت ويا الموضوع عصب وصار يهدد وكلي
سراج،،،طلعه من البيت ابد بعد ماكو
سيلين،،،يعني سجن
سراج،،،من تزوجنا كتلج أنتي صرتي اسيره عندي حياتج السابقه أنسيها طلعه وطبه وعلى مزاجج ماكو الضاهر هذاك جان منطيج عين اني متمشي يمي هل سوالف طلعه ماكو وانتهى الكلام
ثاني يوم الصبح طلع سراج اليوم عنده فصل متفقين ينجمعون يمه ويطلعون قبل الضهر اتصلت ساره وانقهرت من سمعت بيها تنام على الارض بهل الغرفه العباره عن مخزن وفوكاها ضاله جوعانه تستحي تاكل وياهم غيرت ملابسي وكلت لسميه وسيف يجون ويايا حتى يشوفون ساره
اخذت السياره وطلعنا الحارس رفض يفتح الباب زمخت بي ورزلته واني فتحتها بنفسي وكف صفح ورفع موبايله يخابر اعرفه يخابر على سراج يوصله
توجهت لبيت ساره رن جهازي شفته سراج مارديت ولاعبرته مرتين وثالث مره اتصل بسميه ردت وانطته ألي اجاني صوته العالي
سراج،،، تفرين السياره وترجعين بسرعه لا ودين محمد اجي اخلي طريقة موتج تسجل بالتاريخ
سيلين،،، متسوى وصلت تقريبا من ارجع عود موتني ومنا الى ان ارجع ابحث بالتاريخ عن موته تليق بيَ اريد طريقه مامطروقه سابقا شي خاص بيَ مااريد التاريخ يكرر نفسه ويايا
سراج،،، سيلين ارجعي وتچفي الشر
سيلين،،،صار اسبوع اتوسل بيك توديني وانتَ رافض معيشني سجن الله ميرضاها
سراج،،، ارجعي احسن ألج وألا تندمين
سيلين،،، لتهدد وتكبرها براسي وتجبرني بعد ماارجع وأخليك تحلم تشوفني لو تلمح خيالي بعد
سراج،،، سيلييييين،،، ديرباااللللج،،، ديربالج تسوين هل شي،،، وينج جاوبي،،، تسمعيني؟!!
سيلين،،، اسمعك
سراج،،، ارجعي للبيت ونتفاهم
سيلين،،، لارد
سراج،،، وين صرتي سيلين ارجعي بسرعه
سيلين،،، واذا مارجعت شيصير؟
سراج،،، ديربالج،،، ديربالج تسويها وروح ابويه اذبحج وين تروحين ألكاج وارجعج وموتج ميكفيني
سيلين،،، شسويتها سالفه صار اسبوع من كتلك اروح لساره اشوفها،،، ساره اختي ومحتاجتني لوما محتاجتني مااروح
سراج،،، يعني ترجعين للبيت؟؟
سيلين،،، اي ارجع طبعا بس انتَ كلامك وتصرفاتك وضغطك هو اليجبرني اهج،،، كافي ملت روحي
سراج،،، زين روحي لصديقتج شوفيها وارجعي موتتأخرين
سيلين،، تمام
سراج،،، سيلين
سيلين،،، اسمعك
سراج،،، ترجعين اكيد مو؟
سيلين،،، اي
سراج،،، وعد
سيلين،، وعد ان شاء الله شويه ونرجع
نهينا الاتصال
سميه،،، شبي ليش هيح عصبي وصوته عالي؟
سيلين،،، سمعتي كلامه؟
سميه،،، تقريبا
سيلين،،، بعدين نحجي بالموضوع
سيف،،، متريدون تحجون كدامي
سيلين،،، لاحبيبي بس مو وقتها خلي نروح لساره هسه من نرجع نكعد نسولف
توقفت امام معرض مال اثاث أشتريت غرفه نوم مال شخص لساره وبصف المعرض معرض كهربائيات اخذتلها ثلاجه صغيره وغلايه ولكيت جدر كهربائي وطلعت اشتريت كم غرض حلويات ومعجنات جاهزه وأجبان وخبز ومعلبات رجعت لكيت محملين الاثاث والكهربائيات بسياره
مشوا ورانا متوجهين للبيت التسكن بي ساره أستقبلنه الحجي ابتسم من شافني دخلنا للبيت لكينه الحجية استقبلتنه فرحانه طلعت ام اشرف الموشريف سلمت من ورا خشمها على صوتنا طلعت ساره حضنتني ودموعها بعينها وراها حضنت سميه وسيف طلبت منهم يسون طريق أستغربوا من دخلوا العمال الأثاث طلعوا غراض الغرفه القديمات ونصبوا الاثاث الجديد ورتبوا كل شي خلصوا وأنطيتهم اتعابهم وراحوا
الحجي والحجيه ضاجوا من السويته بس مااهتميت لأن لوصدك المفروض ميكعدوها بهيج غرفه كعدنه شويه وطلعنه توجهة لبيتي القديم حتى اجيب كم غرض زواجي صار بسرعه مالحكت حتى اخذ شي
دخلت سميه شافت البيت تراب ضاجت بلشت تسويله تنضيفه سريعه واني استغليت الوضع جمعت الاغراض الأحتاجها طلعتهن للسياره اخذهن مني الحارس وخلاهن بالصندوق
أني و واكفه صفت سياره امام البيت أنصدمت من نزل منها سردار أتقدم پأتجاهي سلم
سردار،،، شلونج سيلين؟
سيلين،،، زينه،،، خير شجابك؟
سردار،،، اجيت اشوفج
سيلين،،، شنو المناسبه؟
سردار،،، اعرف غلطت بحقج وماوكفت وياج بس صدكيني غصبن عني وضعي وعملي حساس ماكدرت
سيلين،،، اختصر والمطلوب؟
سردار،،، سيلين اني احبح وطول الوقت افكر بيج ماكدرت انساج وهاي يوميه اجي هنا على امل اشوفج والحارس يكول موهنا سامحيني سيلين خلي نرجع واعوضج عن كل شي
سيلين،،، صدك والله،،، موبعد وكت،،، سردار روح منا اني وياك انتهينا اصلا غلطت من وافقت عليك
سردار،،، لتحجين هيج غلطت بس احبح والله العظيم احبج
_سيليييييييين!!!!!!
سيلين،،، ألتفتت اتجاه الصوت نشف الدم بجسمي وريگي يبس من شفت شكله ونضراته
