رواية اسيرة بين يدي قاتل ابي الفصل العشرين 20 بقلم نور آل زيادة
لاأحد يفهم معنى أن تقابل الصدمات بصمتً تام
أن تبتسم أمام المواقف ألتي تستدرجك للبكاء
لااحد يفهم معنى ان تغلي بداخلك وأنتَ في قمة الثبات
لااحد يفهم مابداخلنا لأن الجميع ينضر لخارجنا فقط 
_________
ساره،،، كعدت على لمسات جريئه على وجهي وجسمي فزيت مرعوبه انصدمت صدمة حياتي من شفت شخص يمي اول مره اشوفه قبل لااستوعب الصدمه وقبل لاأنطق كلمه سمعت هوسه برا انكسر الباب ودخلوا عمامي
ابراهيم،،، بنت الگل لهنا وصل سق*وطج تجيبين كواو* للبيت
مهيمن،،، يابا هاي لازم نغسل عارها من زمان كايللكم هاي وحده ساق***
من دون نقاش اجاني عمي ابراهيم استلمتي ضرب اريد احجي ميخليني دماني من الضرب ولد عمي استلموا هذا الولد الغريب ألي للان ما مستوعبه وجوده ولاشنو جابه يمي طلعوا برا واني ملخوني من كثر الضرب فقدت الوعي
صحيت لكيت نفسي بنفس المكان وامي يمي منتهيه الوجه احمر ودموعها بعيونها من شافتني حضنتني وتشهك بصوت رفعت راسي اباوع بتك عين الثانيه طافيه شفت عمامي واكفين
كل شويه واحد يهد عليه يريد يضربني وامي تمنعه بهل اثناء دخلت عمتي ام سجاد عايطه اجتي بأتجاهي ملختني امي تدافع عني بكل قوتها تحاول تحميني وعمتي ابتعدت و ماخلت غلط ماغلطته اخر شي ختمها عمي ابراهيم
ابراهيم،،، هاي العار متبقى بعد لازم نغسل عارها
ام ساره،،، بنتي موعار مامسويه شي
ابراهيم،،، الشريفه بتچ لزمناها نايمه بفراشها هيَ و رجال يمها وبعدج تكولين شريفه اذا شريفه هيج سوت لو مو شريفه شتسوي؟
ام سجاد،،، من البدايه اعرفها وحده ساق**ه وعار ومسويه نفسها متدينه أكله لأبني عوفها متفيدك لازكلي بيها
ام ساره،،، اجيتوا بستوا الآيادي حتى يوافق ابوها ينطيها هسه صارت بتي متفيد ابنج من خسرنه حالنا ومالنا وصرنه تحت رحمتكم ياطماعين الله لاينطيكم،،، عوفونه بحالنه اخذ بنتي واطلع منا وبعد متشوفون وجهنا طول العمر
ابراهيم،، ، حچي يفيدچ تريدين تولين هاي الباب بت اخويه مردها إلنا وغلطت ولبستنا العار ولازم نغسل عارها
ام ساره،،، بنتي عدها رجال مسؤول عليها اذا غلطت هو يحاسبها الديصير غلط اكيد اكو شي
ام سجاد،،، اموت تعرفين شنو اموت ومااخذ بتچ لأبني بعد هل العار متسمى على اسم ابني وابني هم بعد ميريدها
ساره،،، والله عمه ماسويت شي چنت نايمه كعدت لكيت هذا الشخص يمي مااعرفه ولاشايفته طول عمري وروح ابويه مااعرفه
ام سجاد،،، وشلون دخل بيتكم لاباب مكسوره ولاشباك كلش واضح انتي مدخلته أحنا مو زواج وجاي تضحكين علينه
ساره،،، خابروا على مؤيد خلي يجي هو الوحيد يعرفني منو وراح يصدكني ويرجع حقي
محسن،،، لنتسرع خلي يجي مؤيد يله نتصرف
ابراهيم،،، يامؤيد ياخر** إحنا عمامها هاي عارها علينا احنا لزمناها وشفناها بعيونه
محسن،، حتى لو يجي مؤيد يله نتصرف
ام سجاد،،، لتكولون ولا تحجون شتسون بيها سووا لأن لوتموت بعد ماألنا دخل بيها البينا خطوبه واعتبروها انتهت اگتلوها ادفنوها شتسوون سوا لتدخلونه بيها
ساره،،، لاعمه الله عليج بستر بناتج لتسوين هيج اني بنت اخوج وخطيبة ابنج
بصقت بوجهي وطلعت دخلت شهد من شافت وضعي عاطت اجتي حضنتني وتبچي ابوها جرها
ابراهيم،،، وين جايه يم هل العار رجعي للبيت
شهد،،، لايابا والله ساره موهيج صح اني ماجنت قريبه منها بس متأكده من اخلاق ساره هي شريفه الكل يسويها وساره متسويها
ساره،،، لزمها ابوها ضربها لأن دافعت عني وسحلها طلعها شبعت بچي الوحيده دافعت عني الكل چان يمثل الحب ومن وكعت صاروا ينهشون بيَ والوحيده شهد ماجانت علاقتي بيها زينه دافعت عني وبچت على حالي اسمع صوتها برا تتوسل بعمامي يعوفوني وعمتي ام سجاد تنَحش بيهم تكول أقتلوها قبل ليرجع مؤيد من السفر لتنتضروا يجي
امي من سمعت فرفحت روحها ملخت وجها نسوان اثنين وحدنا لاحول ولاقوه وماألنا معين غير الله حتى زوج اختي بعيد بأربيل ساكنين هو واختي الى ان يسمع ويجي اني اكون شبعت موت
امي من سمعتهم كاعدين يخططون شلون يقتلوني بسرعه سحبت الجهاز اول شي اتصلت بمؤيد مارد ارسلتله رساله وهم ماشافها اخر شي مابقالها حل اتصلت بسيلين سولفتلها الصار خلصت اتصالها وكعدنا ننتضر المجهول
اسمعهم برا شلون كاعدين يخططون بلحضتها عشت رعب مامر عليه كل حياتي كل شويه واحد داخل دافرني وطالع احس صفحتي انتهت من الضرب مااكدر اسوي شي غير بس اناجي ربي هو الوحيد يكدر يساعدني ويطلعني من هل شِده
ضليت ادعي وانتضر شوكت يجي مؤيد ويخلصني هو الوحيد راح يصدكني لأن يعرف اخلاقي بعدني افكر ودخل عمي ابراهيم وأبنه مهيمن امي عرفت هل مره دخولهم ماناوين بي على خير من شافت بيدهم سلاح رفعت الجهاز تتصل فجئه رفع السلاح على راسي جسمي أختض من الخوف
ام ساره،،، يمه بنتي،، شدسوون ولكممممم شدسوووون،،، عوفوهاااااا
ابراهيم،،،اتشاهدي ياساق**
ساره،،، عمي محسن سحب امي طلعها وهي تصرخ بأسمي وتجر بروحها تريد ترجعلي
نزلت دموعي عرفت هاي النهايه تشاهدت وغمضت عيوني مستسلمه لقدري الاسود
سيلين
___
سيلين،، دايخه وتعبانه وعقلي مشوش احس اكو فجوه او فراغ بدماغي حاولت بكل الطرق حتى اتذكر ماكدرت
متأكده صار شي وكلام لمياء ماصدكته نهائيا وواضح وضوح الشمس كلامها فلم طلعته حتى تغطي على اخوها وحتى هو مختفي صار كم يوم بعد ماشفته وهذا دليل هو ورا الشي الصارلي ولهذا ديتهرب
نايمه وحاضنه سيف حبيبي خايف عليه هل الطفل ولاارتاح جابها من صغير وعلاقتي المتوتره ويا ثامر لليوم رغم دائما مااحاول احسسه بس هو صار يفهم،، جابتلنا سميه العشا كمنا كعدنا تعشينا سوا اني وياها وسيف
خلصنا عشا كعدنا شويه وراها راحوا سميه وسيف ينامون شويه ودخل سراج للغرفه حتى ماباوع عليه كأنما شي غير مرئي دخل للحمام سبح وطلع وكف مشط وتعطر اجى يمي على السرير يريد ينام عطت بي
_ويييبن عيني!!
سراج،،، شكو،، اريد انام
سيلين،، وين تنام إحنا مو اتفقنه كل واحد بمكان روح لغير غرفه نام
سراج،،، البيت بيتي وين ميعجبني انام،، وبعدين ماميت عليج وجاي يمج بس مالحكت أئثث كل البيت كل شي صار بسرعه غرف النوم جهزت بس هاي وغرفة سيف وغرفة سميه يعني بأختصار ماكو مكان ثاني انام بي ولتتوقعين انام بالصاله لو صالة الضيوف هل شي كطنه وشيليها من اذنج موتالي عمري انام هل نومه الكسيفه حتى حضرت جنابچ ترضين
سيلين،،، ماصار شي اخذ مخدتك وبطانيه ونام على هذيج القنفه انتَ حاسب حسابك وجايب للغرفه كنبه سرير
سراج،،، اني انام عليها؟
سيلين،،، لعد اني؟
سراج،، كل عقلج انام عليها،، وين تكفيني
سيلين،،، لاتكفي بس صفي النيه
سراج،، وليش مو انتي تنامين عليها
سيلين،،، اني مريضه مااكدر
سراج،،، عياررره،، كل شي مابيج لتعيشين الدور براسي افلامج بعد متمشي عليه
سيلين،،، باوعتله مقهوره من كلامه متصورني اكذب بمرضي واتعاير دار وجهه
سراج،،، استغفر الله،،،ترا اني ماكاتل نفسي على نومة السرير بس القنفه متكفيني
سيلين،،، تكفيك وزياده حجمها كبير
سراج،،، يارب الصبر منك،،، يابنت الناس افهميني تعبان واريد انام مانايم وروحي طالعه وانتي خلگج طويل والضاهر شبعانه نوم وتريدين تسولفين
سيلين،،، اي اذا تعبان روح نام
سراج،،،افهمي يابشررر،،، مااكدر انام عليها متكفيني يعني معناها اخلي رچلي على يدات القنفه
سيلين،،، افتهمت وصلت الفكره كاعد تتباهى عود اني طويل بس ترا انت موطويل
سراج،،،اني موطويل؟!! يابا اني قزم كل طولي ١٩٠ ويني وين الطول بس فضيني اريد انام عوفي استفزازج هسه
سيلين،،،شفته صدك شكله تعبان تركت النقاش قررت اكوم انام على القنفه اخذت مخدتي وكفت دخت ردت اوكع اجاني بسرعه
سراج،،، شبيج؟؟
سيلين،، مابيَ شي دوخه بسيطه يمكن لأن طول الوقت نايمه
سراج،،، رجعي لمكانج اني راح أنام على القنفه
سيلين،،، لاماكو داعي صدك متكفيك
راح طلع شرشف فرشه على القنفه اباوع علي شلون يرتب بي ويهندسه والله معدل ترتيبه ترتيب مهندس المضروب معدل،، اخد المخده خلاها والغطا ساعدني اكوم نمت وهو راح للسرير طفا الأناره
سراج،،، رجائا تعبان واريد انام اذا تشخرين من هسه اكلج شدي الكاتم مااريد ازعاج
سيلين،،، ومنو كلك اشخر؟ اخاف انتَ تشخر وجاي تتغدا بيَ قبل لااتعشى بيك هل الدروب متمشي عليه
سراج،،، اني مااشخر
سيلين،،، اي واضح هو انتو اكثر الرجال تشخرون بسبب التدخين
سراج،،، دنامي،، نامي
سيلين،،، هو منو فتح الموضوع مو انتَ؟
سراج،،، وانتي متصدكين احجي حجايه حتى تستلميني بلسانج هاي عود مريضه لوصاحيه شتسوين
سيلين،،، سكتت ماجاوبته
سراج،،، ها،، اشوفج سكتي؟
سيلين،،، انتَ موتعبان ونعسان؟ نام وخليني انام لأن الصبح اريد نكعد تفهمني شنو صار ويايا
سراج،،، ترا سالفة نسيتي هاي متمشي عليه تذكرين كل شي بس متقصده هيج تسوين
سيلين،، دفعت الغطا وكمت بصعوبه
عطت متألمه من تحركت هو شغل التيبل لامب وكام
سراج،،، شكو شبيج؟ شلون تكومين هيج وانتي عندج جروح؟
سيلين،،، اي جروح؟ وين اكو جروح كل هاي چذب وفلم من افلامي
سراج،،، استغفر الله،،، استغفر الله
سيلين،،، اي استغفر لأن تعرف نفسك غلطان وفوكاها من اسألك تسويني اني الغلطانه واطلع اسوي افلام عليك ومسويه نفسي ناسيه تعال كلي شنو استفاد من اسوي نفسي ناسيه هااا احجي شستفاد،، حتى اغطي عليك وعلى عمايلك مثلا؟
سراج،،، ياعمايل ليش اني شمسوي؟
سيلين،،، تحجي بالأفلام وانتَ واختك طلعتوا فلم الليفه البيها گزازه وجرحتني بس لاعبالك مشت عليه
سراج،،، واني شكو اني كتلج هل سالفه؟
سيلين،،، لا لمياء كالت
سراج،، خلص يعني مواني
سيلين،،، يعني صدك اكو حقيقه ثانيه للصار ويايا
سراج،،، نامي هسه بعدين نحجي بهل موضوع
سيلين،،، واني اريد اعرف هسه
سراج،،، يابنت الناس تعبان صار ايام مانايم ارحمي بحالي بعدين نكعد نحجي ولازم استشير دكتورج هم لأن كال خليها هي تذكر افضل حتى لترجع لنفس الصدمه من جديد
سيلين،،، لتخاف تعلمت على الصدمات احجي خلي اعرف
سراج،،، صدكيني راح تعرفين كل شي بس بالوقت المناسب
سيلين،،، وشوكت هل الوقت المناسب؟
سراج،،، الوقت ألي يحدده الدكتور المعالج،، يله نامي الباچر اخذج للدكتور
سيلين،،، مااريده عندي دكتور وديني علي
سراج،،، دنامي هسه والله كريم
سيلين،،، سكتت لأن اعرف كلامه صح لأن هاي مو اول مره امر بصدمه والافضل اني اتذكر
طفا الضوء صار هدوء بس صوت انفاسنا ينسمع بالمكان واضح جدا مانام ضل بس يتقلب بفراشه واني هم ماكدرت انام ضليت افكر اريد بس اتذكر الصار ويايا دماغي مفرمت
ضلينا على هل حال الى ان سمعت آذان الفجر كام من فراشه راح للحمام يتوضا قررت اني هم اكوم اصلي جسمي كله يوجعني وتعبان ضليت اقنع بنفسي يله كومي يله وهسه وبعد شويه تالي رحت بسابع نومه
فزيت الصبح بعد ماشفت كابوس مرعب ،، باوعت بالمكان وباوعت على السرير سراج موبفراشه ماموجود طلعت من الغرفه لكيت سميه تحضر الريوك وسيف يمها كاعد صبحت عليهم وكعدنا نتريك بعد الريوك دخل سراج
سراج،،، صباح الخير
الكل،، صباح النور
سراج،،، احسبي حسابج العصر عندج مراجعه يم الدكتوره تفتح الخياط ومناك نروح لدكتورج
سيلين،،، تمام
كال هل كلام ورجع طلع للعصر رجع حضرت نفسي لبست سوت چويتي وشوز رياضي ابيض وشلت شعري ذيل حصلت دخل للغرفه باوع عليه من فوق لتحت
سراج،،، هيج راح تروحين؟
سيلين،،، اي
سراج،، خلي شي على راسج
سيلين،،، تعرفني ما ألبس حجاب ليش تدورلك سالفه شنو تريد مشكله؟
سراج،،، اسمعي الكلام ونفذي من دون نقاش تركتي الحجاب قبل شي يخصج بس مازالج هسه على ذمتي مااقبل مرتي تطلع هيج
سيلين،،، اني مومرتك لتنسى نفسك
سراج،،، سيلين اتچفي الشر وجري عدل ونفذي
سيلين،،، واذا مانفذت شتسوي؟
سراج،،، لتستفزيني احسن ألج وخلي يومج يعدي
سيلين،،، عسا لاعده وروحه هم مااروح
سراج،،، عوفي عنادج وتمردج وامشي نفتح الخياط اليوم الموعد
سيلين،،، واني ماكلت لاانتَ تريدلك مشكله
سراج،،، رايحين مستشفى مترهم بهذا شعرج
سيلين،،، ليش تحسسني اول مره بحياتي راح ادخل مستشفى ترا عادي واني مو اول ولا اخر وحده مو محجبه
سراج،،، افهممممممي عااااد،،، مترررررهم
سيلين،،،لتصيح،،،وفهمني ليش مترهم،، اقنعني
سراج،،، لااقنعج ولاتقنعيني كلامي يتنفذ وخلص
سيلين،،، سراج انتَ تزوجتني اني هذا وضعي المفروض عندك اعتراض اتجاه هل موضوع تناقشني بي قبل العقد موهسه جاي تفرضه عليه واذا عاجبتك محجبه المفروض متوصل يمي ولاتزوجني لان ماافيدك انتو الرجال كلكم نفس الطبيعه تعوفون البيها المواصفات ألي بالكم وتروحون على وحده مامتوفره بيها هل مواصفات وتريدوها تتغير على مزاجكم من البدايه اخذلك محجبه وفضها واذا ماعاجبتك شكو جاي عليه
سراج،،، خلصتي محاضرتج،،، يله اخذي من سميه حجاب خلي على شعرج وامشي
سيلين،،، مااروح لوتموت
سراج،،، طبج مر،،،،
سيلين،،، اي
سراج،،، شنو اي،، طبج مرض
سيلين،،، طلع وركع الباب ورا،،، بطران صايرلي سي السيد وجاي يريد يتحكم بيَ بعدنا بسم الله
ل اليل بعد ماشفته نمت وهو ماكو نص الليل فزيت شفته نايم بفراشه
ثاني يم دزلي لمياء تحجي ويايا
لمياء،،، حضري نفسج يوديج للدكتوره ميصير يضل الخياط اكثر
سيلين،،، ومنو كلج عاجبني ابقي غير اخوج سواله لغوه وعافني
لمياء،،، عوفي التمرد والمشاكل اسمعي كلامه
سيلين،،، اذا دازج تقنعيني ألبس حجاب كوليله حتى لوناويه ألبسه بطلت موضوع الحجاب ينسى
لمياء،،، ادري هو عناد؟
سيلين،،، اي عناد وليتصور يفرض عليه شي من ألبسه بقناعتي مااريد يتدخل
لمياء،،، بس هو زوجج وواجب تطيعي
سيلين،،، في حال صدك متزوجين،، ترا فتره وكلمن يشوف دربه لايدخل بيَ ولاأدخل بي
لمياء،،، شنو هل كلام؟ شنو مامتزوجين وشنو فتره وتطلكون انتي شنو تحجين؟
سيلين،،، هذا العندي كوليله ما ألبس ولااروح
لمياء،،، سيلين اتذكر قبل بعدج طفله وبكامل قناعتح لبستي الحجاب شجاج هسه عفتي؟
سيلين،،، ماجاوبت،،،، ضلت تحجي وتحاول تقنعني مااهتميتلها طلعت ضايجه ورا ساعه اجتي لمياء ووياها ممرضه شالتلي الخياط وعقمت الجروح وانطتني مرهم يخفي الأثر وراحت
بالليل رجع فات للغرفه يباوع عليه ويخزر ولاعبرته على شنو ضايج لاكلامي مشا ولاكلامه
دخل سبح وطلع مشط و مدد بفراشه
سراج،،، عندج موعد ويا المعالج النفسي وضروري تروحين
سيلين،،، مااروح
سراج،،، عوفي العناد
سيلين،،، موعناد بس مااريد اروح مابيَ شي
سراج،،، والصار وياج
سيلين،،، طبيعي بسبب الضغط لتنسى قبل العرس شسويت بيَ
سراج،،، هذا اخر كلام؟
سيلين،،، أي
سراج،،، الله كريم،، يصير خير
سيلين،،، شويه وحسيت بي نام رفعت راسي شفته نايم چفي مبين تعبان ضليت اباوع علي للأن مامستوعبه وجودي ويا سراج بغرفه وحده
سراج حلم عمري والشخص الوحيد النبضله گلبي سبحان ألي غير هل حب وصار بمكانه كره وحقد ورغم هذا للان اسرح بي وبشكله وتفاصيله ابد ولامره بحياتي عشت هل شعور ويا اي رجل رغم كل شي صار مااحس بالنفور اتجاهه للان اكو اعجاب بداخلي إله كل شي بي يعجبني وهل الاعجاب زاد ماقل
سبحان الله الرجل الثلاثيني يصير بي جاذبيه وكاريزما قويه لو هل جاذبيه بسراج شخصيا؟
غمضت عيني وغفيت لاارادي أثناء مااني اباوع علي
ثاني يوم العصر إجا للبيت دخل للغرفه من دون سلام كال
سراج،،، حضري نفسج الدكتور بصالة الخطار ينتضر
سيلين،،، يادكتور؟
سراج،،، المعالج النفسي
سيلين،،، مااريد اشوفه
سراح،،، لتطلعيني من طوري اسمعي كلام واطلعي لاأرتكب بيچ جريمة ترا روحي طالعه لتخلين صوتي يرتفع منا سميه وابنچ والدكتور هم،، شويه احترمي
سيلين،،، موسالفة عناد بس اني كتلك اريد اروح لدكتوري
سراج،،، انتي رافضه تروحين ودكتورج ميرضى يطلع للبيت شايف روحه من نفس فصيلتج مابقالي حل غير اجيب هل الدكتور لأن هو الوحيد قبل يطلع للبيت
سيلين،،،سكتت لان مابيَ حيل اروح للعياده تعبانه كمت غيرت ملابسي ورحت للصاله من دخلت باوع عليه سراج وخزرني،،، هذا شبي بس يخزر؟
سلمت وكعدت،، اباوع الدكتور رجل كبير بالعمر على شنو سراج ضايج ويخزر بيَ واضح لأن مالبست حجاب
الدكتور،،، شلون صحتج؟
سيلين،،، الحمد الله زينه
الدكتور،،، اريد اسألج بعض الأساله بالنسبه لحالتج حتى اكدر اساعدج
سيلين،،، شبيها حالتي؟ مابيَ شي
الدكتور،،، اكيد،، ان شاء الله ،، بس حتى نضمن الصدمه متتكرر عندج المفروض نعالج المسببات لهذا اريد اعرف شنو صار ووصلج لهل حاله
سيلين،،، مااتذكر شي بس قبلها عشت ضغط نفسي
الدكتور... من اي نوع؟
سيلين،،، ضغط مثل اي ضغط ممكن يتعرضله اي شخص
الدكتور،،.. الضاهر ماحابه تحجين؟
سيلين،،، لأن ميفيد الكلام شي صار وانتهى
الدكتور،،، سمعت من الأستاذ سراج انتي متذكرين الصار ناسيه الموقف؟
سيلين،،، اي صح
الدكتور... يعني نكدر نكول صاير عندج فقدان ذاكره جزئي انفصالي بسبب الصدمه
سراج،،، دكتور شنو معنا؟
الدكتور... معنا اكو جزء من ذاكرتها انفصل وبالتحديد هل الجزء هو سبب الصدمه
سراج،،، ممكن يرجع؟
الدكتور،،، يرجع في حالة تعرضت لصدمه جديده الله لايقدر،، هنا يرجع بس راح تسوء حالتها لان الدماغ ماراح يتقبل وراح تصير عندها ردت فعل قويه لايحمد عقباها
سراج،،، الله ليكولها
الدكتور،،، هاي اول مره بعد الصدمه تفقدين الذاكره؟
سيلين،،، لا
الدكتور،،، ومن صارت اول مره شوكت رجعتي تذكرتي الحدث الصار؟
سيلين،،، رجعت تذكرت من عشت شي ....
الدكتور،،، شنو؟
سيلين،،، دكتور ممكن مااحجي مااريد اتذكر اي شي صار بالماضي
الدكتور،،،تمام،،،زين شنو جاي تحسين هل الأيام بعد ماصحيتي من الصدمه
سيلين،،هواي اشياء
الدكتور،،، مثل شنو؟
سيلين،،،من انام اشوف كوابيس وطول الوقت ذاكرتي تسترجع تفاصيل قديمه
الدكتور،،، قصدج ذاكرتج تسترجع احداث مؤلمه صارت بالماضي كأنما هل شي ديرجع يصير مره جديده؟
سيلين،،،اي صح
الدكتور،،، هذا يسموا تذكر خاطف بسبب الصدمه،، بعد شنو تحسين؟
سيلين،،،احس نفسي طول الوقت متوتره الى درجه اصنع المشاكل وهل شي موبيدي شي يصير غصب عني
باوع عليه سراج بتركيز
الدكتور،،، كل هل اشياء طبيعيه فتره وتروح
سراج،،،زين ليش هيج جاي يصير وياها؟
الدكتور،،،.هذا يسموا اضطراب مابعد الصدمه ويسمى علميا (ptsd) لتخافون هذا كله شي طبيعي فتره ويروح ان شاء الله
سراج،،، زين اذا تعالجت ممكن هل شي يرجع؟ قصدي الصدمه ممكن تتكرر؟
الدكتور،،، اي معرضه يتكرر الشي الصار وياها بالمستقبل خصوصا حسب ماسمعت هاي مو اول مره تصير عدها هل حاله واحتمال تصير اشياء اكبر واقوى وهل شي يدمر صحتها النفسيه والعقليه
سيلين،،، لتخاف دكتور صار الأقوى وعقلي ضل بمكانه،،، تعلمت
الدكتور،،، شنو صار مثلا؟
سيلين،،، مااحب اذكر اشياء صارت وراحت
الدكتور،،، وشلون راح اكدر اعالجج اذا مااسمع منج اعتبريها فضفضه
سيلين،،، اعتذر منك بس مااحب افضفض لأي شخص
خزرني سراج ماعاجبه اجاباتي مكابلنه وكاعد ويريد الدكتور افصفضله
الدكتور،،، استاذ سراج ممكن تعوفنا وحدنا شويه
سراج،، بس...
الدكتور،،، لتخاف هاي بنيتي
سيلين،،، طلع بس على اعصابه،، واضح ماعاجبه يتركنه وحدنا
الدكتور،،، وهسه تكدرين تحجين،،، حسيتج مامرتاحه بوجوده
سيلين،،، ماكان مشكلتي وجود سراج لكن فعلا ماعندي شي احجي
___
لمياء،،، طلع سراج من صالة الضيوف عصبي وميتحاجا
_شكو؟
سراج،،، هاي راح تموتني
لمياء،،، شنو سوت؟
سراج،،، دكتور ما اروح حجاب مااتحجب صخام ماصخم،، جبنالها الممرضه يمها تعالجها وماعاجبها جبنالها الدكتور يمها متحجي
لمياء،، وهسه شنو صار؟
سراج،،، ميعجبها تحجي كدامي طلعني الدكتور
لمياء،،، طلعك؟
سراج،،، حتى ترتاح الخاتون بقت بس هيَ ويا
لنياء،،، شبيك؟ ليش هل عصبيه؟ رجال چبير ودكتور محترم
سراج،،، هو تالي راح اشدهن وألمعهن حتى ترتاح الخاتون
لمياء،،، يمعود شبيك ليش تبالغ؟
سراج،، تسكتين لااطلع ضيم گلبي بيچ
ماابالغ موو؟؟
رجال تفهمين شنو رجال كاعد هو ومرتي وحدهم حتى لو چبير بالعمر
لمياء،،، فتره وتطلكون شيهمك منها
كلت هل كلام فز مرعوب
سراج،،، شنووو؟؟!! منو كال هل كلام؟ ليش فتره ونتطلك؟
لمياء،، مااعرف هذا كلام سيلين قابل بكيفها تسولف
سراج،،، هي وصلت حدها وياها تريد اموتها بس متعرف شلون
لمياء،،، يعني مو ناوي تعاقبها وتطلكها؟
خزرني خزره لو النضرات تقتل چان متت
لمياء،،، لتباوع هيج،، ترا ماحجيت شي مني،،، زين امشي روح يمهم اذا هيج مغثوث
سراج،،، اي اروح ليش مااروح
لمياء،، تحجي صدك ترا عيب،،، زين امشي ندخل لغرفة الطعام نكدر نشوفهم ونسمعهم وبنفس الوقت ميحسون بوجودنا
قبل لااكمل كلامي مشا قبلي متوجه لغرفة الطعام عبالك ماصدك
وكفنا على جها نسمعهم
الدكتور،،، شوكت اخر مره صارت عندج هل حاله؟
سيلين،،، قبل كم سنه
الدكتور،،،، بوقتها شنو صار وتسبب بصدمه؟
سيلين،،، مااحب اتذكر
الدكتور،،،، سيلين ساعديني حتى اكدر اساعدج
سيلين،،، ماكو شي يكدر يساعدني حالة تصير ويايا في كل مره اتعرض لضغط نفسي
الدكتور،،،. غير اعرف شنو نوع هل ضغط؟
سيلين،، من الأخير دكتور،،، اني انسانه مااتحمل الضلم ولااتحمل شي ينفرض عليه،، هل شغلتين من تصير ويايا احس راح اموت،،، دماغي يرفض كل شي ميستوعب هل شغلتين ومع الاسف عشتهن ثنينهن
كل مره احس بالضلم اتأذى اموت ألف موته والمشكله هل شعور يصير ويايا حتى من اشوف شخص مضلوم أتاثر وكأنما مضلوميته توصلي والمشكله الأكبر مااتحمل اي شي ينفرض عليه اموت والله ما ابالغ من اكلك الموت اهون عليه من هل شعور
الدكتور،،، معناها انتي كلش حساسه
سيلين،،، يجوز
الدكتور،،، وبداخلج انسانه متمرده
سيلين،،، صح،، متمرده
الدكتور،،،، باعي بابا إحنا عايشين حياة ومعرضين لكل شي،،، اني هسه دكتور وصلت لهل عمر ورجل ومع ذلك هواي اشياء انفرضت عليه بحياتي هل ياترى من المفروض كل مره يصير ويايا شي ماقانع بي انهار وأتاذى؟؟ طبعا لا وخصوصا اني عندي عائلة ومسؤوليات واشخاص محتاجيني لازم اكون قوي نفسيا وجسديا حتى اعيش،،، حسب ماسمعت انتي عندج ولد؟
سيلين،،، اي صح
الدكتور،،، وهل ولد محتاجج تكونين قويه حتى توكفين ويا وتربي اذا صارلج شي شنو يصير بي وشنو ذنبه؟
سيلين،،، دائما افكر بي ولأن افكر بي عشت هواي اشياء بحياتي ومريت بهواي صدمات وتخطيتهن لخاطره
الدكتور،،، انتي شنو فرحانه يوميه تصير وياج صدمات نفسيه؟ تعرفين ممكن هل صدمات شتسببلج؟
سيلين،،، اعرف اكتئاب اوثنائي القطب او انفصام او حتى جنون وصار شي منهن وكدرت اتخطى
الدكتور،،، شنو صار وياج واقوى صدمه تعرضتي ألها
سيلين،،، هوايا
الدكتور،،،، زين اول وأهم صدماتج؟
سيلين،،، هي اكثر من صدمه صارت بوقت واحد واقواها من اهلي جبروني اتزوج شخص مااريده واكبر مني ب٢٥ سنه تحت التهديد والضرب وصلت مرحلة تقريبا راح افقد عقلي وبنفس يوم زواجي والدي توفى وبعد الزواج اكتشفت اهلي باعوني واخذوا المقابل فلوس
عشت صدمات متتاليه ادت الى أكتئاب شديد استمر سنين وصلني مرحلة افكر بالموت وحتى فكرت أقتل الطفل الحامل بي تغيرت حياتي حتى الحجاب تركته وفقدت ايماني
الدكتور،،،، لاحول الله،،،زين وشلون تخلصتي منها؟
سيلين،،،عالجتني دكتوره وبعدين حولت على دكتور
الدكتور،،، جيد،،، وبعد مارجعت هل حاله؟
سبلين،،، لارجعت قبل كم سنه وهاي كانت اقوى مره وصلت لل...
الدكتور،،، لشنو،،، احجي؟
سيلين،،،، مااحب اتذكر اي شي بخصوص هل
موضوع بس اكدر اكلك صار عندي نوع من الانفصام وفقدت عقلي لفتره قصيره
الدكتور،،، اريد اعرف شنو صار ووصلج لهيج مرحله صعبه؟
سيلين،،، رجائا دكتور مااريد احجي بهل موضوع يأذيني
الدكتور،،،، لازم تفضفضين
سيلين،،، اني اكتب مذكرتاني وافضفض بيها
الدكتور،،، طريقه ناجحه ١٠٠/١٠٠،،،،،، زين هسه بالوقت الحالي اكدر اعرف شنو ألي انفرض عليج ووصلج ترجعلج الصدمه بعد مرور سنين على اختفائها؟
سيلين،،، مااتذكر واذا تكلي هاي اول مره اكلك لا اكو صدمات تصير انسى كل شي بعدها واكو لا
الدكتور،،، لعد ابشرچ دماغچ تعبان ولازم تاخذين موقف اتجاه نفسج قبل ميكون اتجاه الناس لازم تقوين نفسج وتتخلصين من الهشاشه النفسيه وتبعدين نفسج عن الضغوطات ودائما صغري الأمور لتنطيها اكبر من حجمها الحياة مو ورديه لازم نواجه الضغوطات والصعاب بقوه وأنتي واضح شخصيتج قويه مو وحده ضعيفه بس مشكلتج عندج هشاشه نفسيه،، عودي نفسج تتقبلين الأمور بالنهايه حياتنا كل شي بيها قدر والاقدار من الله لازم نتقبلها
سيلين،،، صدكني ولايوم اعترضت على امر الله واعتراضي على امر البشر وضغطهم عليه
الدكتور،،،، الزواج نصيب والاطفال نصيب والاقدار نصيب وكلها مقدره من الخالق
سيلين،،، كل كلامك صح بس ولا شي بحياتي أختاريته برضايه كل شي انفرض عليه والى ان اقنع عقلي هذا قدر ولازم اتقبل الشي اكون تدمرت نفسيا وتأذيت وأنهاريت
الدكتور،،، تقربي الى الله
سيلين،،،اني اصلي واصوم وأقرأ قرآن بس دكتور خلي نكون واقعين اني وانتَ نعرف الاشخاص المصابين بنوبات الهلع والقلق مابعد الصدمات حتى لمن يكونون متدينين وقريبين من الله ميكدرون يسيطرون على تصرفاتهم بس اكيد التقرب من الله يساعدهم يتخطون اسرع
الدكتور،،، صح،،، القلق والهلع مرض يصيب الجهاز العصبي بعد صدمه نفسيه،،، وفعلا يمنع الأدراك والتقبل الكوني،،،، ست سيلين انتي انسانه واعيه ومثقفه وحرام شبابچ يروح بين هل الأمراض لازم تتخطين وتعالجين نفسچ
سيلين،،، ان شاء الله
الدكتور،،،، جلستنا لليوم تخلص راح اسچلچ علاج تاخذي وراح افهمج بعض الأمور والأرشادات تتبعيها
سيلين،،، عندي علاج ومرتاحه علي
د.. جربي علاجي واذا مافادج رجعي على هذاك
سيلين،،، تمام
.............................
لمياء،،، طلع سراج فاير من الكلام السمعه
سراج،،، ولد الكل** طلعوا صدك جابريها تتزوج مدمريها
لمياء،، ليش موكالتلك؟
سراج،،، عبالي هل شي هم كذبه من كذباتها بعد مالعبت عليه ماتصورت يطلع صدك
لمياء،،،البنيه تعبانه بسببهم دمروها الله لاينطيهم
سراج،،، دمروا حياتنا وكلها سوت هل شي علمود الفلوس وتلوميني ليش تغيرت على الناس
لمياء،،،وهسه تأكدت هي ما ألها ذنب وتزوجت مجبوره وتصرفاتها وياك لأن حقدت بسبب العاشته ولان عدها امراض نفسيه مولأن كارهتك؟
باوع عليه يحاول يستوعب كلامي تصورت هل كلام راح يهدئه حتى يعوف سيلين بحالها بس صار العكس صار يغلي من الغضب ضل يفتر بالمكان ماخلا غلط ماغلطه على اهل سيلين يفور يغلي غليان من العصبيه اخر شي ختمها
سراج،،، وين صاروا موكال خلصت الجلسه شعنده بعده كاعد ابن الأوادم بداها بابا وباباتي ونهاها ست سيلين وانتي قويه وشخصيه وشابه اذا افوت ادوس بمصارينه احد يكلي ليش
لمياء،، ترا ماحجا شي،،، شبيك هدي وبعدين
سمعت الدكتور لازم تبطل تضغط عليها لتروح تخسر عقلها
سراج،،،شسويلها
لمياء،،، اي واضح
سراج،،،شكلتي؟
لمياء،،، سلامتك،،، طلعت سيلين من الصاله
سيلين،،، الدكتور يريد يروح
اباوع علي خزرني ودخل للصاله
_هذا شبي اخوج شاخط لوشارب نفط؟
لمياء،،، هذا الحجي على سراج؟
سيلين،،، لا على الدكتور طلع شارب نفط
لمياء،،، يا هاي شوكت؟
سيلين،،، الضاهر انتي واخوج نفس الشي
لمياء،،، هاي الحجي قصدج علينه موو؟
سميه،،، ها،، راح الدكتور؟
سيلين،،، اي،،، رايحه اشوف سيف
لمياء،،، هاي حجت عليه وعلى اخويه لواني غلطانه؟
سميه،،، هههه
لمياء،،، ولكم ياناس ياعالم عود هاي صدك سيلين نفسها چنا نحجي عليها ومتفهم قصدنا من برائتها هسه صارت هي تضحك علينا والله زمن
سميه،،، بعدچ ماشفتي شي منها،،، تودي اكبر واحد للشط وترجعه عطشان
لمياء،،، الله يساعد اخويه واضح مشواره طويل هو بدون شي منشفه ريگه
سميه،،، هههه،،، ليش اخوج مقصر هاي موجابها هنا وتزوجها غصب
لمياء،،، غير لعبت علي شيسويلها
سميه،،، عوفيهم همه يحلوها بينهم افضل،،، تعالي للمطبخ نسوي چاي وكيك
لمياء،،، اي والله صدك هذوله الزوج سوالفهم متخلص
_____
لمياء،،،، كعدت شويه ويا سميه وسولفنه هل البنيه تنحب بسرعه حاولت استدرج منها كلام عن سيلين بس هي جدا متحفضه ومتحب تحجي شي عن الخصوصيات ودعتها حتى ارجع للبيت طلعت شفت سراج برا واكف يدخن رحتله
_ ها بعدك واكف هنا تصورت رحت للمضيف؟
سراج،،،هسه راح اروح
لمياء،،، شبيك؟
سراج،،، مابيَ شي
لمياء،،، لعد ليش هيج محتار احسك؟
باوع عليه و جر حسره وتكلم
سراج،،، هيج ماكو شي
لمياء،،، الدكتور كال شي على سيلين وهيج غير حالك؟
سراج،،، هذا الدكتور دوخني وفره لراسي
لمياء،،، ليش شنو كال؟
سراج،،، يكول لازم متتعرض لأي ضغط ويكول هاي تصرفاتها ووضعها بسبب اشياء عاشتها قبل اثرت عليها ولليوم بعدها ماتخطتها
لمياء،،، اي واضح هل شي خصوصا بعد الكلام السمعنا اليوم
سراج،،، من رحتله للعياده حجيتله عن تفاصيل حياتي ويا سيلين وعن اخر شي سوته ويايا تدرين شكال
لمياء،،، شكال؟
سراج،،، يكول العاشته قبل خلاها تصير هجوميه وعدائيه اتجاه الكل وخلاها تحمل الكل ذنب الصار وياها ولهذا السوته وياك لان ماعدها ثقه بيك ولابأي شخص تعرفه بالماضي ولهذا أذتك مثل ماهي تأذت قبل
لمياء،،، يعني السوته وياك خارج ارادتها؟
سراج،،،تقريبا
لمياء،،،المسكينه هاي شصاير بيها الله لاينطي الچان السبب
سراج،،،السبب اهلها واهلي ثنينهم السبب بكل شي صار بينا
لمياء،،،ثنينكم ضحية الأهل من الجانبين دمروكم وصنعوا منكم اشخاص مختلفين ومع الاسف سيلين التعرفها ماضل إلها وجود ولاانتَ بقيت نفسك ،، يااخي اني اكول عوفها البنيه بحالها وبعد لتأذيها البيها كافيها تروح تفقد عقلها وهل اليتيم ابنها يضيع،،،، اذا ألي خاطر يمك انسى السوته وبعد لتأذيها
سراج،،، خلي اروح بعدين نحجي بهل موضوع
لمياء،،، مسكت ايده اوقفه
_سراج بس اسمعني،، لحضه
سراج،،، عندي شغل
لمياء،،، انتَ تريد تتهرب
جاوبني بعصبيه...
سراج،،، من شنو اتهرب؟؟ لتطلعيني من طوري
لمياء،،، عوفها للبنيه ترا السوته وياك لأن موبعقلها
سراج،،، ترا هيَ مومخبله عقلها يوزن بلد
لمياء،،، بس مريضه،، مريضه نفسيا وتصرفاتها مو بكامل قواها العقليه
سراج،،، كل شي مابيها تتعالج
لمياء،،، افهم يااخي ماكو شي يرجع مثل الاول اني اكول عوف حسابك وعقابك ألها واطلق سراحها وطلكها خليها تروح لحال سبيلها
نتر ايدي بقوه وعاط بيَ...
سراج،،، انتي شنو جاي تحجين شنو اطلكها؟؟!!!!
لمياء،،، هذا الصح إلك وألها هي كارهتك وماخذه منك موقف وهل شي يأذيك ويأذيها وانتَ بسبب تصرفاتها اخذت انتَ هم منها موقف وماراح تنسى السوته وياك وراح تأذيها وتضلون واحد يأذي الثاني،،، عوفها وعيش حياتك وخليها تعيش حياتها
سراج،،، اسكتيييي،،، اسكتي لتحجين هيج شنو اعوفها؟!!!
لمياء،،، صدكني هل شي أفضل ألكم ثنينكم الماضي صار بالماضي وحبكم وانتو بقيتوا هناك وماكو شي بعد يرجع راح تضلون بس تعانون وماكو شي يرجع مثل الاول،، طلكها وعيش حياتك واتزوج
سراج،،،تسكتين لولاااااا
لمياء،،، انتَ مو تزوجتها وجبتها هنا حتى تحاسبها على السوته وياك؟ وهاي حاسبتها وتأذت عوفها كافي البنيه مريضه
سراج،،، وتالي وياج،،، كتلج ماعوفها ماعوفهاااا
لمياء،،، معناها ماجايبها تحاسبها،، تزوجتها لأن تحبها وتريدها،،، اعترف بهل شي وكافي تكابر
سراج،،، اسكتي وبعد لتدخلين
لمياء،،،ادخل ونص،،، من اشوف اخويا جاي يدمر نفسه بنفسه ادخل،،، مشاعرك دمرتك وللان مصر تكمل بعلاقه ماإلها مستقبل انتو انتهيتوا من زمان كافي تضحك على نفسك،،، سيلين متريدك كلش واضح هل شي ومحملتك ذنب الصار وياها وراح تضل تتأذى منها وانتَ حتى اترد اعتبارك تأذيها وترجع تتأذى عليها اضعاف هو هذا بنضرك وضع لوعيشه؟؟ عوفها،،، طلكها وانساها وعيش حياتك
سراج،،، افهمييييي عااااااد،،، مااااكدر ،، مااكدر حاولت مااكدر اني ماصدكت تصير ألي شلون تكولين عوفهااا وطلكها
لمياء،،، صدكني هذا افضل حل وبمرور الوقت تنساها وتلكي الانسانه ألي تناسبك وألي تحبها وتحبك لتعيش بوهم وتنتضر شي ماراح يصير لتوقف حياتك عوف العواطف وفكر بكلامي شويه فكر بعقلك وراح تقتنع هذا الصح
سراج،،، ومنو گلج مافكرت؟؟ كل يوم افكر عقلي ألف مره فكر بهذا كلامج ومقتنع بي
ضل يضرب على گلبه ويردد
سراج،،،اااخ بس هذا شيقنعه،،،، شيقنعه لگلبي انكسر بسببها وبعده متمسك بحبها والله عقلي يكلي عوفها بعد مترهمون سوا بس گلبي ماراضي ينسى
لمياء،،، انتَ محامي ناجح واسمك معروف وشيخ عشيره الكل يحترمه ويهابه بعشيرتنه وباقي العشائر وانسان الله مفضل عليك وحالتك زينه وألف وحده تتمناك عوفها وتزوج عيش حياتك وجيب اطفال صدكني راح تنساها
سراج،،، ليش موتزوجت وصار عندي بنات ليش مانسيت؟
لمياء،،، ليش اسراء هم تنحسب على النسوان اخذلك بنيه زينه تنسيك
عاط بيَ....
سراج،،، سديييي هل موضوع،،، طلاك مااطلكها افتهمتيييي،،،، لو مهما يصير مااطلكها ولااعوفها راح اعالجها وكل شي اسوي حتى انسيها الماضي مااعوفها
لمياء،،، واذا ماصارت زينه تضلون هيج؟
سراج،،، تصير زينه،، ادري راح تصير زينه راح نرجع مثل قبل،، مااعوفها لسيلين لو اعرف اموت
لمياء،،، زين اذا هيج تحبها ليش اذيتها بيوم عرسكم وصلتها للموت؟
سراج،،، انتي مافاهمه شي فلتحجين بكيفج وهل موضوع بعد سدي ولتحجين بي لأي مخلوق بشري وابد ابد نهائيا بعد لتكولين عوفها وطلكها
يله امشي نروح للبيت
لمياء،،، وصلني للبيت وهو راح للمضيف
تأكدت بلحضتها الكلام ويا ميفيد عصب وصار كل جسمه يرجف من كتله طلكها صرت متأكده يموت ولايعوفها لسيلين حجيت هل الكلام حتى يعوفها للبنيه بحالها البيها كافيها متدمره مااريده يزيدها عليها ولاااريد هو هم يضل يتأذى منها ومن تصرفاتها ورفضها إله،، والله خايفه فد يوم يوكف گلبه وينام و بعد ميكعد من القهر ومن هل الحب الأعمى ألي واضح وضوح الشمس مابي اي مستقبل وخايفه لافد يوم يفقد عليها من العصبيه والبنيه تموت جوا ايده لو تتخبل من الضغط
اااخ ياربي شلون مصيبه هاي الله لاينطي الچان السبب
_______
سيلين،،، ضليت يم سيف الى ان صار العشا سراج من طلع ويا الدكتور اختفى ولمياء شويه وراحت ارسلي الدوا بيد الحارس قررت مااستخدمه لأن مرتاحه على هذاك الدوا القديم تعشينا ونمت وسراج مارجع للبيت كعدت لكيت فراشه مرتب معناها مابات يمنا
يومين وسراج مابين بس دز مسواگ بيد الحارس
مر ١١ يوم على زواجي من سراج اليوم دخل سلم وفات للحمام سبح وطلع باوع على الميز
سراج،،، هذا شنو؟ مو الدوا السجله الدكتور ألج؟
سيلين،،، اي
سراج،،، ليش على حطته وماشاربه منه؟
سيلين،،، مااريده مرتاحه على هذاك دوايا افضل
سراج،،، جربي شنو تخسرين لو هو لازم عناد وتمرد
سيلين،،، لاعناد ولاتمرد بس هذاك الدوا افضلي
سراج،،، وشمدريج؟ جربتي؟ جربي وأحكمي اذا مافادج ارجعي على ذاك وبعدين لوهذاك الدوا زين ماچان حالتج هاي تكررت
سيلين،،، ضليت اباوع علي شلون شكله تعبان يشرحلي وعيونه تعبانه وكأنما شخص صار ايام مانايم
سراج،،، تسمعيني لو لا؟
سيلين،،،من شفت تعبه واسلوبه الحلو بالكلام ماعارضت،،، كتله
_اي تمام راح اجربه
حسيته استغرب لأن وافقت بسرعه
راح على فراشه مدد ردت أسأله اذا متعشي او لا بس خفت يفهم سؤالي اهتمام لهذا سكتت دخلت للحمام سبحت من طلعت شفت سراج نايم الدوا الجديد على الميز اخذته ومشطت شعري بدا يشتغل مفعوله،، دخت فد مره حسيت هل علاج أذاني كلش،، كمت من مكاني بصعوبه مااسيطر حسيت راح افقد وعيي كأنما عقلي صار خارج جسمي،، صحت،،
سراج،،، كعد فاز
سراج،،، شبيج شتريدين؟
سيلين،،، مااعرف شبيه دايخه راح اوكع
كام بسرعه إجا عليه مسكني من ايدي وكعدني على السرير حالي تبهذل يحجي ويايا ماافهمه صاحيه بس دماغي عبالك فقد تركيزه وفعلا فقدت تركيزي يحجي ويايا مااعرف شنو يكول ولاشنو كاعد اجاوبه
نمت على صدره دايخه ضل يفرك براسي نمت او اغمى عليه مااعرف شنو صار بعدها بس احس دماغي فصل عن الواقع
كعدت الصبح تعبانه فتحت عيونه بصعوبه باوعت
شفت نفسي نايمه بحضن سراج طفرت من مكاني اباوع علي نايم بعمق ضربت راسي بأيدي تذكرت الصار بالليل وشلون كعدته ونمت على صدره وهسه لكيت نفسي حاضنته ونايمه
ياالله !!!! شمسويه اني؟!! شلون فشله،، ياگاع انشگي وبلعيني،،، هسه شيكول عليه عباله تحججت دايخه وسويت هل تصرفات حتى اتقرب منه باوعت ملابسي كل شي طبيعي شعري مخربط و بعد بي رطوبه للأن لأن سبحت وحتى مامشطته نايمه بكفشتي يافشلتي
كمت بسرعه للحمام اريد اهدء واوقف افكاري مااكدر بس افكر شنو ابررله تصرفي ولا جواب لكيت طلعت لكيته كاعد على السرير من شافني ابتسم وكال..
سراج،، صباح الخير
ندبت حضي واضح راح ينغر عليه ويتشمت بيَ جاوبته..
سيلين،،، صباح الخير
وكفت امشط شعري إجا وكف ورايه سويت نفسي مامهتمه لوجوده لزم خصري فزيت وابتعدت
سراج،،، شلون صرتي؟
سيلين،،، زينه،،، ليش شنو بيَ؟
سراج،،، مابيج شي،، بس قصدي راحت الدوخه؟
سيلين،،، اي
سراج،،، ليش تحجين ويايا بهل طريقه؟
سيلين،،، ياطريقه!
سراج،،، من ورا خشمچ
سيلين،،، هذا اسلوبي من قبل شنو تغير؟
سراج،،، سيلين ياسيلين،، لتخبليني
سيلين،، ألتفتت علي وجاوبته...
_ ليش شمسويتلك؟
سراج،،، شبيج كل ساعه بحال؟ تنامين شكل وتكعدين وحده ثانيه؟
سيلين،،، من تزوجنا للان هذا وضعي وياك
سراج،،، والبارحه؟
سيلين،،، شكو؟ شصار البارحه؟ ذكرني اني من اخذت الدوا مال هذا الدكتور التحفه تخربطت حتى مااتذكر شي،، بس لامنطيني مخدرات
فتح عينه بصدمه...
سراج،،، مخدرات،،، شنو؟
سيلين،،، شمدريني اخذته وفقدت كل شي مااتذكر
سراج،،، شنو كل شي متذكرين؟ صدك؟ لوتشاقين؟
سيلين،،، وهل موضوع بي شقا
بلع ريقه وجاوب بتردد...؟
سراج،،، يعني متذكرين اي شي
سيلين،،، شبيك سراج؟ كل شويه عايد نفس الكلمه،،، كتلك مااتذكر وهل دكتور موزين راح ارجع اخذ هذاك دوايه واشوفلي غير دكتور افضل او ارجع على دكتوري
ضل يباوع عليه مستغرب كلامي نضرات الحيره بعيونه،،، عافني ودخل الحمام
يووه،،، الحمد الله لكيتلي هل الحجه وتملصت من الموضوع لومفهمته اتذكر يسويني منصبه ولو حقيقتاً ما اتذكر كل شي بس بعض الأشياء
طلعت لكيت سميه وسيف نايمين جهزت الريوك طلع من الغرفه مبدل من دون ميباوع بوجهي كال
سراج،،، رايح اني عندي شغل
سيلين،،، متتريك سويت ريوك؟
سراج،،، مااريد
سيلين،،، هذا شبي گالب خلقته؟ طلع،، كعدت تريكت،،، مر اليوم عادي وماشفته نهائيا
من بعد هل موقف سراج أختفى ميجي للبيت حتى وقت النوم ميجي ،،، الحمدلله هل شي بصالحي بلكي ينسى جفصاتي
يومين ماشفته نهائيا ثالث يوم العصر كاعده بالغرفه اجتني سميه دخلت للغرفه مفزوعه كمت بسرعه
_شبيج سميه؟ سيف بي شي؟!
سميه،،، لا هاي ام ساره تريد تحجي وياج صايره مصيبه
سيلين،،، ياستار،،، اخذت الموبايل منها ومن سمعت شنو صاير بساره شطت ماعرفت شلون أبدل ملابسي طلعت سلاحي خليته بالحقيبه واخذت سويچ السياره وطلعت،،، صحت على الحارس يفتح الباب
الحارس،،، اعذريني شيخه اوامر الشيخ ممنوع تطلعين
سيلين،،، افتح الباب لاافلشها على راسك وراس شيخك،،، نفذ بسرعه احسن ألك ترا شياطين الدنيا تربعت براسي لتخليني ادوسك واطلع
شفته رفع الموبايل يتصل صعدت بالسياره شغلتها ضليت ادگ هورن وميقبل يفتح الباب دقائق وشفت سراج دخل من الباب واضح واصل مرحله من العصبيه
سراج،،، وينننن تريدين؟؟؟ انتي وتالي وياج؟ تريدين اموتچ لو شنو؟ فوتي وأتچفي شري
سيلين،،، نزلت من السياره باوعت علي ونزلت دموعي من شافني لانت ملامحه
سراج،،، شكو شبيج؟
سيلين،،، ساره،،، ساره واكعه بمصيبه وعمامها راح يقتلوها
سراج،، تحجين صدك؟
سيلين،،، والله صدك،،، عفيه خليني اروحلها
سراج،،، وين تروحين؟ وشتسوين؟
سيلين،،، اساعدها اخلصها منهم
سراج،،، هو لعب جهال،، بابا اصحي هذوله عائلة بيت بيناتهم شنو تدخلين؟
سيلين،،، اذا ماادخل يقتلوها هذوله لاذمه ولاضمير
سراج،،، ميسووها بس يهددون
سيلين،،، لايسوها صدكني انتَ متعرفهم
رن جهازي من شفت المتصل جاوبت بسرعه اجاني صوت ام ساره تصرخ
ام ساره،،، لحكيييي على اخيتج راح يگتلوها ولجججج سيليييين راح يموتوننن سارررره
سيلين،،، شهكت مفزوعه على كلامها!!!!
قبل لاانطق كلمه سمعت صوت اطلاق نار وصرخت ام ساره زرفت أذني
ام ساره،،، ولكم بنتيييي ياضلام بنتي ليشششش موتوها؟؟!!!
سيلين،،، صرخت من اعماق روحي
ساااااااااره!!!!!!
