رواية ارض الخناجر الفصل السادس عشر 16 بقلم الكاتبة ايلول
غلطة ودفَعت الثمن
چان الثمن عمري
ألما يدري عنده عذر
بس أَنا چنت أدري ..
══━━━━✥◈✥━━━━══
ندى :: واكفه كدامهم بصدمة فاتحة عيني على وسعها گـــلبي احسه رأح ينفجر ورجلي يرجفن، مصدومة ومن الخوف باقيه واكفه بمكاني رجع صاح
شعلان:: ياهي انتِ بويه.
نتر اليمه بغضب
وليد:: ووولج ماتحجين.
فزيت من صياحة وركضت بخووف كل حيلي اركض دخلت للمشتمل سديت الباب ارجف كلي وصوت دگة گـــلبي احسه بأذني، كعدت على حيلي وره الباب وايدي فوگ راسي ميته من الخوف اسمع صياحهم ودكتهم على الباب وروحي احسها تطلع
مــاسه :: واكفه بالمطبخ وسمعت صياح ابوي وجدي فتحت الشباج بساع واشوفنهم يدكون على باب مشتمل وهـــب شهكت بصدمة وانه اسمع جدي يصيح
شعلان:: بووويه بويه اندهرنه ولك اطلع وهـــب ولك تجيب **** ولك هاي تاليها تجيب ***للقريه.
وانه من الخوف احس بادن رجليَّه اجت امي وراي تسأل
-ها يمه شني؟
توخر بيه من الشباج تريد تعاين وانه مچلبه كل حيلي اعاين وميته من الخوف تسودنوا يردون يكسرون الباب والمح طــروادة اجه يركض تفكته بأيده دوم، دفع ابوي ووكف بالباب وجدي تخبل هوه يصيح اطكك وطرواده يصيح ارميك وامي ضلّت تلطم صارت هوسه وكلها التمت الا ولدنا ما ادري وينهم.
درت ارجف امي تجر بعبايتها تريد تطلع عليهم وانه اجر بيها اريد اركض الصيهد وامي متسودنه عبالها وهـــب بالمشتمل ماتدري شنو الفلم ماتت من الخوف جريتها منها وطلعت اركض المشتمل صــيهد، فتحت الباب حيل ادور طبيت للغرفة مالته نايم
اجيت يمه خايفه ادري بيه اكثر شي يكرهه واحد يكعده من نومته دغيته بجتفه همست صوتي يرجف
-صــيهد.
تحرك ومافز هزيته من جتفه حيل ارجف
-صــيهد
فز كعد على حيله عيونه حمر ووجهه مايكصه السيف عاين الوجهي شلون خايفه وكف بسرعة يحجي
صــيهد:: شني ؟ هاا احجي شبيج؟
-جدي وابوي يم مشتمل وهـــب اظن شافوا ندى وصارت هوسه ووهب ماهوه.
فتح عينه بصدمة وبسرعة جر دشداشته لبسها وطلع يركض وانه وراه متت من القهر من شفتها كلها ملتمه ووهب جاي وابوي كاضه من ياخته يطكه بغضب على وجهه وهوه يصيح عليهم
وهـــب :: مرتي.
وامي تصرخ متسودنه شلون يطكون وهـــب ابوي اخذ العوجيه من جدي يطكه حيل وطرواده يدفع ابوي ويرد يدفع عمي شاكر وجدي من الباب، بجيت بخوف وركضت للمطبخ يم جــويريه وبدور.
لمن وصلهم صــيهد جر العوجيه من ابوي شمرها وابوي ما واكف بعينه شي شال ايده يطكهم صياح وهوسه وناس تغلط على ناس لمن طاح ابوي بالگاع لا يحرك ايد ولا رجل، جريت ايدي من ايد جــويريه اريد اركض متسودنه وهيه تكض بيه
اخذ من عمــري عمــري هاليوم صدى صياحهم براسي طب صــيهد للمطبخ يركض اخذ ماي يرش على وجهه ابوي لمن كعد ضل بالگاع كاعد ماد رجليَّه مكسور وجدي يحجي فوك رآسه
كوموه صــيهد وسلطان جابوه للبيت طبوا للهول وأحنه بالمطبخ اجت امي وجها اصفر وصوتها رايح كعدت يمنه تلطم على رجليها
-يمه راح ابني يمممه صخام بوجهي ولك يمه شسويت بينه وهـــب يمه.
مسحت وجهي ارجف وجويريه ركضت جابتلها ماي
جــويريه :: خاله فـــدوه على كيفج وي روحج لا يصير بيج شي .
امي بالمطبخ وهمه بالهول صاح صــيهد
صــيهد:: مرته مررته على سنة الله ورسوله بيش طالبينه بعد؟
شعلان:: ولك تنجب وتسد حلگك لا افصم ظهرررك ولكم مستهترين ما واحد وكف بوجهكم منين مرته منيين جابهاااا.
طب وهـــب خايف على ابوي والدم تارس وجهه صاح عليه ابوي بتعب .
وليد :: منين جبت البت ولك وهـــب تريد تسودني وهبب.
وهـــب :: عليمن اسودنك؟ مرتي يابه مرتي لا زاني ولا بايك مرتي.
شعلان:: منين مرتك هاه منييين ياهم اهلها ياهو اليرضى يطي بته بسكته انتَ عليمن تضحك ولك؟
وهـــب :: ماعدها اهل، من الميتم.
حجاها وتسودنوا كلها تصيح كاله ابوي
وليد:: هسه تردها منين ماجبتها امشييي.
وهـــب :: لو تذبحوني، مرتي لا اعوفنها ولا اطلكها.
كاموله أبوي وجدي يردون يطكونه وسلطان وسليم وصيهد واكفين بوجهم وهوه صاير نار يرجف كله ويصيح
-ما اعوفنها.
شعلان:: بالحسين اطلعك من العشيرررة وكتلت الچلب تنكتل تعاندني ولك وهـــب تعاندني.
وهـــب :: طلعنننني طلعنيي ما اعوفنها لو الليله انكتل، ما اعووووفنها.
كعد ابوي بالگاع ايده على گلبه يصيح
وليد :: يريد يموتني وهـــب يريد يجلطني.
صــيهد :: سووا التردونه مرة وهـــب ما تطلع من القرية.
مــاسه :: يصيحون وناس تجر طول وناس عرض وهـــب يحلف كل امام مايعوفها وهمه يحلفون يطردونه ويتبرون منه عفتهم ما مهتمه بالي يم ندى طلعت بسرعة لابسه عباية امي التوصل لركبي .
طلعت من المطبخ امشي وأتلفت خايفه واحد يشوفني شهكت مخروعة من لكيت مــيثم وطرواده كاعدين بصف المشتمل داروا وجهم اثنينهم من شافوني بلعت ريك بخوف دكيت باب المشتمل ارجف
-ندى، ندى افتحيلي الباب.
احجي وأتلفت عليهم منطيني ظهرهم رجعت دكيت الباب بخوف
-ندددى.
سمعت القفل تحرك فتحتلي الباب طبيت بسرعة وسديت وراي بلا ما اقفلة اعاينلها ترجف كلها عيونها حمر والدموع مغرگه خدها ضمت روحها بحضني تشهك.
لميتها اللي حيل
-ااشش ندى لا تخافين لا تخافين وهـــب مايعوفج.
-ضررربوه ضربوا وهـــب .
صيحت تبجي بقهر وانه شابكتها الصدري بحيره اخذتها للغرفة كعدت كدامها امسح بدموعها واكض بايدها بلكن تخفّ رجفتها
-هسه تنحل والله دام صــيهد يدري بالسالفة أنه متطمنه لا تخافين.
احجي وهي ولا يمي فاقدة انفتح باب المشتمل وصوت وهـــب يصيح بخوف
-ندى!
رفعت راسها بشهكه وكامت تركض كمت وراها طلعت من الغرفة راحتله ركض تبجي هي تريد تشبگه وهوه كضاها من زندها نتر بغضب
-ليييش طلعتيييي؟
جلبت بأيده موجوعه وتبجي جراها الصدره شابكها بقوة درت وجهي منهم خايفة عليهم وهوه يگلها
-شوصيتج انا ندى شوصيتج؟
وهيه بس تبجي درت عيني الهم وخرها من حضنه لم وجها بين اديه يمسح عيونها متحسر گالها
-لا تخافين، وعدتج انا واوفيلج بوعدي لو على كص رگبتي.
وهيه ما مركزه بحجيه كد ما مركزه بجروح وجهه وتحجي بلا وعي
ندى::كله ددم وجهك كله دم.
تحجي وياه وترجف جراها من أيدها للغرفة عافها وراح غسل وجهه رجع فات من يمي مد ايده على خدي متحسر وطب للغرفة كعد كدامها تعاين لجروح وجهه الدمع مغرك خدها كض ايدها بايده متحسر گالها
وهـــب :: اي واحد يسألج تكليله انا من الميتم وصدفه وهـــب شافني خطبني وتزوجنه غير هالحجي ماتحجين مفهوم؟
هزت راسها اي باسها بين عيونها وگام من صاحوا عليه الولد وصل يمي گال
-ضلي يمها لا تعوفينها وحدها مــاسه.
هزيت راسي اي هوه طلع وانه رجعت كعدت يمها مخليه راسها على جتفي تبجي بلا صوت اظن ساعة مرت وسمعت صوت صــيهد يصيح
-مااسه.
كمت بسرعة طلعت من الغرفة واكف بباب المشتمل، وجهه متروس غضب گال
-جيبي البنيه وتعاي.
-ندى؟
رجع عاينلي خازرني بغضب ركضت للغرفة
-ندى كومي.
وكفت هيه خايفه ماتدري شكو خليت عبايتها على راسها وجريتها من أيدها، طلعنه يمه مشه واحنه وراه، ندى كاضه بأيدي حييل،طبينه من باب المطبخ كال
-تانن هناه.
عافنه ومشه للهول درت لجويريه وبدور التبجي احاجيها
-ها شصار،وهـــب وينه؟
بــدور::طردوه للمعامل بعد مايخلونه يجي هناه.
حجتها وعاينت الندى بغضب،جــويريه مدت ايدها على جتف ندى تمسح عليه تطمنها من شافتها ترجف كاضه بيه وهيه بس دموعها ينزلن.
رد طلع صــيهد كال
-تعالن.
جريت ندى ومشيت وراه للدوانيه وكفّ كدامنه واهلي كاعدين قصص وروايات عراقية كرار صلاح بالدوانيه گاله جدي
شعلان:: وخررر خلني احاجيها.
صــيهد:: حاجيها وهيه وراي، لو يطلع مرتضى من الديوان وتحاجيها
مرتضى:: شو ماتعارف تحجي انا شنييي ابصبص على النسوان وتحاجيني هيييج.
صــيهد:: اششش اشش سد حلكك.
غلط عليهم جدي أثنينهم، وندى كاضه بيه كل حيلها ماتدري انه من وحدي خايفة بس اتشجع من اشوفن صــيهد وأكف كدامنه صاح جدي عليها
شعلااان:: ولج انتِ منين هاااه؟
صــيهد :: كلنالك من الميتم.
وليد :: سد حلكك سد حلكك خلها تحاجينه هيه، احجي بويه منين انتِ منين لفيتي عليَّ بلوه من يا عمام من يا عشيرة سولفيلنه.
وندى مثل السعفة تهتزّ بأيدي همست بصوت يرررجف
ندى :: من الميتم.
بس حجتها نتر جدي بصياح
شعلان:: نغلة يعني نغللله ولك وليد ابنك جايبله نغله.
صاح صــيهد بصوت هز گـــلبي
صــيهد:: احجيييي وياها عدل مرة وهـــب مو نغله فهمت مو نغلللله.
هوه يصيح وهمه يصيحون كاضه بعباتي حيل وندى كاضه بايدي خايفة ودموعها على خدها صاح ابوي
وليد :: تردين منين ما جابج بويه باجر عگبه يطلعلج اهل واعمام ويكتلون ابني.
صــيهد:: يشهد الحسين ما تطلع مناااااه وهـــب گالي مرتي برگبتك سلف اكتل وما اخليها تطلع مناه شني بكيفكممم.
مــاسه :: رجعت ليوره فازه من صياحة وندى بأيدي غلطوا عليه وابوي گام وكف طول بطول وياه طكاه راشدي وصيهد تسودن كوه كاض روحه صاح جدي
-نغله ما تضل ببيتي.
صــيهد :: هسه اخذها البيت عمي شامل طــروادة زلمة كلف يفتح بيته لخطاره وخل كل الوادم تدري بالسالفة مرة وهـــب الطردها شعلاااان، رحب بيها طــروادة ابن شامل.
وجدي تسودن يصيح ويغلط دفعني صــيهد ونتر
-اخذيها وروحي الغرفة وهـــب.
جريت ندى وركضت الغرفة وهـــب كعدت خايفه تبجي لامه رجليها الصدره ملتفه بعبايتها، طبت امي للغرفة تبجي مقهوره تريد تحاجيها كضيتها من ايدها
-يمه فـــدوه.
دفعتني تبجي وتحجي وي ندى
-منين انتِ يمه منين هاه؟ شجابج على وهـــب راح يروح وليدي مني ولج منين اجيتيه منين.
وهيه بس تبجي وترجف صاح صــيهد بغضب
صــيهد:: يممممه، عوفوها بالحسين اليحجي وياها حجاية وحده هسه افجر البيت بيكم.
امي خلت شيلتها على حلكها تبجي اجه يمها باسها براسها يحجي وياها وبالدوانيه صوت صياحهم يرعد كالها
صــيهد :: انتِ بس لا تبجين يمه بس لا تبجين وكلشي تردينه يصير يابعد عيوني.
وهيه طكت ايد بايد تكله
-واخيك الطردوه اخيك راح ينهد حيله بالمعامل خافنه ينكتل ولك صــيهد خافنه يردلي بتابوت.
حط ايده على شاربه يحاجيها
صــيهد:: شاربي مو عليَّ اذا مارديته يمج بس اطيني مجال ولا تحاجين البنيه يمه انتِ ام گلب الحنين وهيه يتيمه.
هزت راسها أي تبجي عاينلي كال
-ديربالج عليها لا تطلعين وتخلينها بوحدها.
حجاها وطلع وبيتنا متكهرب، وهـــب ابوي گايله اغضب عليك واتبرى منك لو ماسمعت حجاية جدك، حجاية جدي يعاقبه ويوديه للمعامل ومايرد لمن يسألون ويشوفون ندى منين من يا عمام وعشيرة ما صدكوا الولد من كالولهم من الميتم.
بــدور تعاين الندى بحقد لان شافت شسووا بوهب علمودها وجويريه مكسور خاطرها عليها عبالك حاسه بيها، ابوي وجدي وعمي شاكر ضلوا يتعاركون من العصر حد الليل لمن اجت جده جانت يم گرايبها وضغطها صاعد يله شويه هودوا وسكتوا.
طلعت للمطبخ امي تسوي عشا هيه والبنات عيونها مورمه من البجي وكفت يمها
-يمه والله البنيه حبابه والعباس.
تشتغل سكته وانه افتر وراها واحجي لمن دارتلي جرتني من اذاني
-اثاريج من زمان تدرين وما كايلتلي.
-لا وين اني ادري ولا جنت ادري، اااخ يمه اذاني نملصت.
هدت اذاني وطكتني على جتفي وصاحت على بــدور
-وين النعااال جيبيه الي.
وبدور الجلبه هم حاقده عليَّ لان ما مسولفتلها ركضت جابت النعال الامي بس حطته بيها طكتها هيه اول وحده تغلط عليها
ام صــيهد :: انتِ هم غبره ومابيج خيرررر.
بــدور :: انه شعليه شني لا تطكيني.
-يااا تصيحين علي. تتعاي.
جرت بدور وكتلتها بالنعال وانه وراها اصيح عليها
-اي حيل حيل جا كادره بس عليَّ.
عافت بــدور ودارتلي جرّتني تكتلني
-لا يمه مو بالنعااال مو بالنعالل بايدج يممممه.
وهي تطك محروك كلبها وتصيح
-جلبات شلعتن گـــلبي موتني مووتني.
اضــحك مغطيه وجهي وبدور تبجي تدخلت جوري عود تفرغني، صاحت بــدور عليها
بــدور :: كادره بس علينه ما تطكيين جــويريه.
وامي معصبه شالت نعالها تريد تطك جــويريه وانتبهت الروحها صاحت
-ياهي مالتها جــويريه شني انتِ بندارتهاااا بزينيتها.
بــدور :: اي سويها زليخة علينه طكيها طكيها لو تخافين من جده.
شمرت النعال عليها امي تصيح
-انعل ابوج لا ابو جده وياج.
وكعدت تعبانه محروك كلبها انه مدري ليش من تكتلني اضل بس اضــحك وبدور كبل تبجي ، مشيت يمها
-يمه الحنينه.
-كومي منيي كوومي.
جريت ايدها ابوسها
-كلشي ولا تضوجين شتردين اكضلج بــدور تكتلينها عدل؟ حتى تروح الضوجه.
احجي وهيه خازرتني وبدور تصيح
-شوفيها يمه شوفيها تكرهني.
سكتت آمي ضايجة كمت من يمها نكمل العشا وامي عزلت صينية صغيرة على صفحة لمن كملنه ودينالهن عشاهم كالت
-تعاي ودي عشا المرة اخوج.
اخذت الصينية وجوري وياي دكينه باب الغرفة عليها وفتحناه لكيناها واكف بالزاويه يم الجربايه بخوف ابتسمتلها وطبينه يمها خليت الصينية بالگاع همست صوتها رايح
-مــاسه وهـــب وينه؟
سكتت بحيره مسحت دموعها وكعدت كدامي كوه تحجي
ندى :: بس حاجيني وهـــب وين راح مــاسه.
-فترة ويرجع ابوي طرده لان محروك گلبه منه چم يوم ويتصالحون مالج شغل انتِ.
لمت رجليها الصدرها سانده ظهرها على الجربايه خلت راسها على رجليها تبجي بلا صوت كعدت كدامها جــويريه تحاجيها بهدوء
جــويريه:: باوعي والله من تبجين ما يتغير شي بسّ تتأذين وتتعبين اكلي شويه حتى تغسلين وتصلين وادعي الله يهديهم ويلم شملكم انتِ ووهب من جديد.
وهيه ساكته تهز راسها لا ومارده عيونها بالبجي، درنه على فتحة الباب طبت امي وندى بسرعة مسحت دموعها ووكفت مرتبكه، سدت الباب واجت يمنه كالتلها
-اكعدي يمه اكعدي.
كعدت ندى اسمع صوت دكات گلبها، كعدت امي كدامها متحسره
-عليمن تبجين يمه؟
وندى مدنكه شفايفها يرجفن ودموعها يتسابقن على خدها رجعت امي تسألها.
ام صــيهد ::احلفج بالله ورسوله بس كليلي صدك يتيمه ما الج مصيبة تكسر رگبة وليدي، انه ام وبگلبي ظيييم حاجيني يمه وطمني گـــلبي الموجر.
رفعت راسها ندى تمسح دموعها وتحجي بخنگ
ندى:: والله العظيم والله ما تجيله من عندي أي مصيبة وهـــب يعرف كلشي ويعرف ما ورأي احد خاله والقران.
هزت راسها امي راضيه ومدت ايدها تمسح عيون ندى
إم صــيهد:: امسحي عويناتج والكاتبه الله يصير.
مسحت عيونها وجرت الصينية يمها تسويلها لفات وندى ما ترضى تاكل كالتلها امي
ام صــيهد:: جا مو خوش چنه انتِ تردين ايدي؟
مسحت عيونها تشهك وتهز راسها لا، جبرتها امي اكلت شويه وحاولت تضحك وياها كالتلها
ام صــيهد :: وهـــب كضاها عليَّ يمه انا ما اتزوج يمه ما اريدن تالي طلع مختارله بطه وضامها ابني اللوتي.
ابتسمت ندى بتردد رجعت امي كالتلها
-كومي وي اخياتج خاف تردين للحمام تغسلين شي.
اخذت الصينية امي وطلعت، اخذنه ندى للحمام غسلت ورجّعت للغرفة مابطلت بجي ماضلينه يمها من حسيناها تريد تضل وحدها طلعنه، بالليل الوادم نايمه وامي وابوي يتعاركون هيه ماراضيه يحاسب وهـــب هيج وهوه يصيح خله يتأدب وضلوا بالساعتين صياح وغلط.
"""""""
رنـــه :: من ساعة السمعت وهـــب متزوج وضامها بالمشتمل انه افتر وره طــروادة، واكف يبدل يريد يروح للگاع وكفتله بالباب عاينلي وهز راسه يسأل
-هاااه؟
-احسك انتَ هم متزوج وضامها.
لف الجفيه على راسه وعبر من يمي يريد يشرب چاي گبل لا يروح رحت ورّاه للمطبخ
-طــروادة اذا متزوج طلعها.
-يا بووويه يا ساعة السوده عمي انتِ شتردين؟
-اريد اعارف ياهي المتزوجها ووين ضامها.
-رنـــه اذا كمت إلا اموتج وين ضامهاااا وين.
-يجوز بالگيعان.
حط ايده على راسه مسطور من وراي يشرب چاي ساكت كعدت كباله بس بعيد خاف يطگني حطيت ايدي على خدي احجي
-اذا هوه وهـــب الفقير عود خوش ولد طلع متزوج وضامها، تريدني اصدك ااااانتَ ما ضاملك وحده.
عاف استكان الچاي فاتح عينها على وسعها
-جا انا شبيه ووولج؟
-احسك تحب النسوان.
وكف مصدوم وانه وكفت متحضره للشرده عاف استكان الچاي على السنك واجاني
-انا احب النسوان رنـــه؟ انا؟ ليش اشايفتني يوم معاين على مره يوم محاجيلي مره ولج شو مدري شلونه حجيج؟
رجعت ليوره اركصله بحواجبي
-اي يجوز تطلع من جوه ليجوه، ومتزوجلك وحده وضامها يممممه صخام يجوز اطلع صايره عمه وانه ما ادررري يممممه.
عبالي احجي والحك اشرد كضاني بساع جر اذاني حييل
طــروادة :: انتِ ليش صايرة خايسه وسوالفج خايسه؟
كضيته من طرف جفيته
-هدني وانه اهدك.
جر اذاني حيل صيحت موجوعه كال
-ووولج رنـــه ترى اناا طــروادة مو عبود شويه بعد وتكومين تكتليني بعصا.
-هد أذني ترى تلتهب وماتطيب الا بتراجي ذهب.
ضحك ماكدر يضل معصب عاف اذني مبتعد ويحذر
-عيب بطلي سوالفج صايره لاطشة طكه ونص.
ضحكت خليتله ماي بالترمز وطلعت وياه للحوش شاف حيواناتي تارسات الحوش عاينلي بزعل
-خربن الخضره رنـــه.
-فـــدوه الهن شبيك هسه انتَ باعتبار خال حيواناتي لان هنه مثل اطفالي شبيك تضوج منهن.
عاينلي بحيره لا بيه يطكني لا بيه يغلس هز راسه ساكت اخذ الترمز من ايدي وطلع مشيت يم حسين وزهره كعدت بنص الخضره وهنه داير ما دايري اللعب وياهن متونسه.
لمن سمعت صوت واحد صاح
-وين رايح بريا.
كمت بسرعة كضيتلي حجارة جبيرة بعدني حاقده عليه مشيت بصف السياج صعدت على گن الدجاج شفته يحجي وي ســليم
النوب سليم راح لبيتهم وبريا مشه مدنك حضرت الحجارة عدل هستوه يعبر من يم بيتنا شمرتها عليه ماطكته ضليت مطلعه راسي وفاتحه عيني حيل عود خازرته عاينلي ساكت ميل راسه بحيره حجه بصوت ناصي كوه سمعته
-انتِ شتردين؟
-اذبحك مثل ما ذبحت الطلي مالتي.
-تسوين فضل عليَّ.
سكتت اعاينله وهوه عبالك فاصل ما ادري شبيه ادور كلمة تستفزه وما اجه ببالي غير ابن الروسيه بلعت ريك ساكته من تذكرت شلون خله الخنجر على رگبتي خفّت احجيها، التفت لبعيد بسرعة وأشر بأيده انزلي، بس سمعت صوت جدّي نزلت بساع.
مشيت يم باب الحوش اعاين من فتحات السياج وصلوا يمه وكفوا كدامه جدي وعمي شاكر يحاسبونه وآنه مركزه بحجيهم زين كاله جدي
شعلان:: جنت تدري بوهب ماخذله مره؟
بريا :: لا ولو ادري ما احجي.
شاكر :: ها بويه مو اكلك مابيهم خييير.
وجدي جر وهـــب من ايده بغضب ويحجي بصياح وياه
شعلان:: عاين ولك من باجر تنهي على رنـــه، سمعتني تنهي عليها تروح لطــروادة تكله رنه منهي عليها ما تاخذ غيري وانه اخذها الك واريدن تعارضني وتكول لا حتى اخليك غاد بالعامل ماتشوف ضوه بعد.
فاتحه عينيّ بصدمة ونار مشتعله بگلبي من الغضب بريا نتر ايده من جدي يحجي بهدوء گاله
-ليمت تريدني اروح؟
ضحك جدي طكه على جتفه بفخر گاله
-من يرد من گيعانه الليله.
بريا:: لا ليمت تريدني اروحن للمعامل.
وجدي شال ايده بغضب طك بريا وهوه يضحك ويگله
بريا:: هههههه مسودن انتَ لاحك رنـــه الجاهل بنهوه حتى تكسر رگبة طــروادة بيها ههههههههه.
يضحك عليهم والتموا عليه هوه وعمي شاكر يطكونه متسودنين درت وجهي بقهر لا عبود هناه لا طــروادة، فززني صوت هاسكي طــروادة رابطه حتى مايروح الصاحبته ركضت باستعجال فتحت السلسله منه وجريته الباب الحوش
-اشوووه اشوووه اركض هاسكي.
وهوه ماصدك وصل باب الحوش راح عليهم يركض، سديت باب الحوش وركضت اعاين من الفتحات بس شافوه اجاهم ركضوا شاردين وبريا ركض صعد على النخله، اعاين الهاسكي من شاف بريا صعد على النخله عافه وركض على جدي وعمي شاكر وهمه كلمن ركضله بصفحة جلب هاسكي بعباية جدي وهوه يطكه بالعوجيه ويصيح
شعلان:: اكلني بووويه اكلني.
وبريا مجلب بالنخله ويضحك عليهم اجاه عمي شاكر بايده عمود جبير طك هاسكي شهكت بخوف وحرگه وهاسكي جر عباية جدي اخذها بحلكه وركض على الشاع وجدي يصيح
شعلان:: اركض ولك شاكر اركض اخذ عباتي.
وشاكر يقنع بيه ختولي ويحرض بيه على طــروادة خاف هوه عايز صعدوا بالسيارة وراحوا وبريا ضال صاعد على النخله ركضت الگن الدجاج صعدت عليه ومديت راسي نزل من النخله صحت عليه
-حمييتك اشكرني.
عاينلي وشال ايده غماني دار وجهه يمشي نزعت نعالي بسرعة صحت عليه
-عاين.
دار علي يعاينلي طكيت نعال بنعال وغميته بنعالي خزرني بغضب نتر
بريا :: الا انهي عليج الوصخه.
-فنك وعلي انه الانهي عليك وعلى امك ابن.
سكتت ماكملتها وهوه عاينلي بغضب صاح
-تكفي شري.
-لا تعبر من يم بيتنه بعد اهد عليك هاسكي.
قصص وروايات عراقية كرار صلاح هز راسه بغضب وأشر على رگبته "اذبحج"
سكتت خايفة نزلت من گن الدجاج ومشيت كعدت يم حسين وزهره بخوف، كلساع اتخيل من خله الخنجر على رگبتي وانوجع.
""""""
وهـــب :: اشتغل وبالي يمها خاف تبجي خاف مقهوره لا عدي تلفون واخابر واشوفنها لا اكدر أردّ للقرية صاح عليه المسؤول.
-من تتعشى وتكضي رد وي الشفت الليلي.
-خير ليش.
-جدك هيج يريد تعترض؟
ضحكت ومشيت اغسل صاح واحد من الولد
-انتم ليش من تجون ويانه ماتلبسون بدلات وجفوف مثلنه عاين شصار باديك تشگگن شني تستنكفون تلبسون مثلنه؟
غسلت ايدي اضــحك عاينلته
-اي مو احنا احفاد الشييييخ شعلان شني نلبس بدلات عمال مو عيب.
صاح واحد بصفة
-جا المن تجون للمعامل يا أحفاد الشيخ
-نتونس نغير جو مو شني احنا من يوم النولدنه بحلكنه خواشيك ذهب وما ننام الا على ريش النعام، ومن كبرنه كبر دلال جدي النه ويانه، مرات هيج نجي هناه نغير جو نعيش الحياة.
ضلوا يحجّون بينهم عفتهم ومشيت اتعشى اجاني واحد يعارفني من القرية گال
-ولد عمك يم الشارع يردونك.
عفت البأيدي وكمت طلعت للشارع اعاين ماكو محد موجود اتلفتت ادور ظلمة كلشي ما اشوفن لا سيارة لا بنادم بالشارع.
درت وجهي بفزة على حركة وراي طلعوا من وره شجرة بريا وسليم.
-خرررب جد جدكم.
ســليم :: خايس تتلفت جا كلبك ماحسك احنه يمك.
ضحكت سلمت على ســليم وعاينت البريا مو ذاك بريا الفره ابو ضحكة الحلوه، سلمت عليه وكعدنه يم الشجرة
ســليم :: هذا تلفونك وداه صــيهد.
-ومرتي وين؟
ســليم :: بييت اهلك خايس شلون ولك شلوون متزوج وضام علينه.
بريا:: انا شكيت بيك من ضليت ما تخلينه نطب للمشتمل بس يعني ماشكيت عدك مره شكيت بيك تشرب.
ضحكت احك بشعري
-لا شسالفة.
ســليم:: المشكلة احنا ما متيهينك وين ماتروح احنا سوه ليمت عرفتها ليمت تزوجتها شلون طببتها للقرية بعدني انا مصدوم.
وهـــب ::اخذت جكاره منهم ادخن البعيد مايشوف منه شي بس جمرات الجكاير البأدينه درت على ســليم
-كله من وراكم.
بريا:: شعلينه؟
-لا وعلي عليكم انتم السبب.
-جارحينك؟ شمسوين ولك؟
ضحكت ساكت سولفوا وياي شويه وراحوا التلفون طافي شحن بس ردت اكضي شغلي واروحن اشحنه.
مــاسه :: مرنّ يومين كل ساعة بيهن مرت بعركه وصياح ابد ما ارتاحينه كل ساعة مشكلة، ثالث يوم بيبي طبت الندى للغرفة صاحت عليها
-يله كوومي كومي وي البنات انتِ مو عروس وكارصه بالغرفة.
وندى ميته من الخوف كامت وياي بالمطبخ حتى ماتكدر تكض شي كد ما إيدها ترجف.
وصيهد يوميه متعارك وي ابوي وجدي يوميه تگب بينهم، بالليل جاي امسح بالمطبخ واجاني نتر
-تعاااي.
مشيت يمه للباب عاين للبيت والايدي اصبعي لافته مشكوك گال
-شبيها ايدج؟
رفعت ايدي اعاينلها
-نكص بالسجينة اليوم.
-جا ليش تغسلين مواعين وإصبعج متعور وين هذيج ام اخنيس بــدور.
-غسلت مواعين الغدا والله وتعبت
-هااه
سكتّ شويه كال بهدوء
-جا بت عمه نضال ما تساعدج؟
-ياهي جــويريه؟
-اممم
-تساعدني خطيه بس اليوم صفاحها يوجعنها حتى من تتحرك تنوجع خطيه انه كتلهن اصعدن.
سكت تليفونه بأيده شويه وكال
-عاينلي راح اعلمنج شغلة اذا غلطتي وعلي اطكج.
بلعت ريك بخوف ومديت راسي اعاين وياه بالتليفون فتحه كال
-هذا الخايس اخوج يريد صوره المرته، تصورينها سكته تكليلها وتصورينها ما ادري بعد دبريها.
وره ما تصورينها تطبين هناه على اسم وهـــب النوب تدوسين هناه تختارين صورها ترسلينهن الوهب النوب تطلعين وتمسحين المحادثة كلها وترحين للصور تمسحين صورها من تلفوني فهمتي.
رفعت عيني اله خليت إيدي بحلكي
-عيدلي بعد مره.
دار بغضب ورد يعيدلي من جديد
-فهمتي؟
-اي بس شتكول انجرب بالاول خاف اغلط.
-يله كضي بله صوريني ووديني الوهب مثل ما علمتج.
هزيت راسي اي طب للمطبخ وكف وانه لان هوه العلمني وترني صورته ورحت الاسم وهب وديتله الصوره ورجعت للصور مسحت الصوره ومسحت المحادثة دك صوت رسالة اجاني بساع اخذه من عدي وانه حاطه راسي وياه اعاين ، كاتبله
*عاب هالوجهة كتلك اريدن مرتي مو جهرتك.
ضحكت بصوت دار علي صــيهد خازرني ابتعدت ساكته ومن شفته رجع يكتب هم مديت راسي كتبله
*گول اروحن فـــدوه الخشمك يا صــيهد ترى ابطل اعوفنك واروحن انام.
-خطيه ليش هيج تسوي بيه؟
عاينلي رافع حاجبه
-لو هوه هيج مسوي بيه تكليله خطيه صــيهد؟
هزيت راسي اي
-ااي واتعارك وياه واسوي بيه فلك ما ارضى.
ضحك طكاني على خدي ورجع يعاين بتليفونه وهـــب كاتبله
*فـــدوه الخشمك وحلكك وطولك يا چبيرنه وهيبتنه يروحلك فـــدوه شعلان وابو شعلان وولد اعمامك من الچبير للصغير اولهم طــروادة .
* لا ما ارضى طــروادة يروحلي فـــدوه كول بدون طــروادة.
* ذليتني ساعة السوده.
ضحك صــيهد خله التليفون بأيدي ورفع ايده لاخر مره يحذر
-اقري الاسم زين كبل لا تودين الصور اذا الكاج موديتهن مناه مناه اموتج.
هزيت راسي اي ومشيت الغرفة وهـــب دكيت الباب على ندى وفتحته لكيتها كاعده على السجادة تصلي كعدت يم الميز التليفون بأيدي متوتره خاف اصورها بدون ما تدري وعيب وخاف اذا اكللها ما ترضى وخطيه وهـــب، رفّعت أديها تدعي مغمضة عينها صورتها بساع ونزلت التليفون من دارت علي ابتسمتلها، لمت السجادة تحجي وياي بصوت مبحوح.
-عبالي نمتي.
-لا ما انام گبل ما اجي احاجيج واشوفنج خاف محتاجه شي.
ابتسمت ساكته شويه وحجت بحسرة
-مــاسه تعرفين شي على وهـــب؟
هزيت راسي لا كعدت على فراشها بالگاع ماترضى تنام على الجرباية كتلها
-ندى اعرف هوه زين ويريد يشوفج.
فتحت عينها بفرح.
-اجه؟
-لا يريد يشوفج بصورة
هزيتلها التليفون.
-كال صوروها الي.
سكتت متوتره ومدنكه عينها تعصّر باصابعها عدلت حجابها وهزت راسها موافقه صورتها مرتين ووديتهن الوهب مشيت مسحتهن من الصور دك التليفون بايدي فززني من شفته وهـــب قفلت الباب بساع فتحت الخط وانطيته الها بس سمعت صوته بجت وانه كاعده كدامها صوت تلفون صــيهد عالي اسمع سوالف وهـــب
وهـــب :: عمــري بطه ليش البجي ندى مو احاجيج؟
-وينك وهـــب وينك؟
تحجي وتشهك كالها
-لا تخافين اهلي يمج محد يكدر يحاجيج.
-بس تعال فـــدوه بس تعال ما أكدر.
-هوه بأيدي وما اجي؟ اصبريلي بس چم يوم خوش؟
يحجي وياها وهيه كاضه التليفون وبس تبجي كالها
-ندى
-هاه.
-احبنج.
غمضت عيونها تشهك حركت شفايفها بلا صوت وكد ما مركزه بيهم عرفتها كالت اني هم، شويه وگالها
-لا تبجين ينفت گـــلبي.
مسحت دموعها ساكته وتحاول تسيطر على شهگتها كالتله
-وهـــب عفيه لا تتأخر
-مشتاگتلي؟
نزلن دموعها تهز راسها اي كتلها
-احجي وياه لا تأشرين مايشوفج هوه.
همست بصوت مخنوگ
-اي
-يابعد روحـــي، هاي مــاسه يمج
-اي
اخذت التلفون منّها وكفت احجي وياه
-ميوس ديربالج عليها بعد اخوج.
-اي والله.
-ترى هاي فطيرة وماعدها غير الدموع لا تخلين واحد يقهرها.
-لا انه وياها لا تخاف.
-يله ودي تلفون صــيهد لا يعضج.
سديته منه وطلعت الصيهد لكيته متانيتي بالمطبخ بغضب هستوه يريد يحجي كتله
-خابرها جان يحجي وياها.
سكت هادئ إخذ التليفون من ايدي گال
-مسحتي مثل ما كتلج؟
-اي.
دار التليفون علي محادثة وهـــب بدون ما يفتحها كال
-جا هاي شني
-ياا نسيتها.
هز راسه ساكت مسحها واطاني التليفون گال
-طبي للصور تأكدي ماسحتهن كلهن؟
كعد يم الباب وانه واكفه كدامه التلفون بأيدي طبيت للصور اول صورة جانت للزرع جاي اكله لا ماسحتهن كلهنّ ومدري منين اجتني الجرأة حركت الصور أعاين بيهم ثاني صورة هم للزرع الثالثة شفتها وفتحت عيني بصدمة گال
-ها ناسيه وحده؟
عاينتله مرتبكه هزيت راسي اي گال
-عرفتج امسحيها يله.
حركت اصابعي على شاشة التلفون بدون ما اسوي شي واعاين بالصورة الكدامي صورة بنيه مبينه من النت ما طالع وجها بس شوية من خدها واذنها وشعرها الحد كتفها ومرسوم يم رگبتها وشم نجمة نفس وشم جــويريه.
طلعت من الصور اريد اطيه اله وهوه وكف بساع شلون المتذكر جراه من ايدي مرتبك سأل
-مسحتيها.
هزيت راسي اي ضل يعاينلي
-شبيج.
دنكت ساكته كح خله التليفون بجيب الدشداشة متوتر رجع گال
-شبيج شني؟
-مابيه شي راح اروحن اشوف جــويريه .
عاين بعيني هز راسه اي عفته ومشيت حاجيت ندى وصعدت فوك يم البنات وسالفة الصورة تدك براسي ليش حافظ صورة نفس وشم جــويريه شبي اخوي.
"""""
ريـــمه:: امي ما تحجي وياي من يوم الرحت الرنه، وانه مغلسه مهتمه بالولد وبهاجر علاقتي باخوي ســليم رجعت مثل گبل وسلطان هم نوبات من يجي ما يصعد الغرفته يجي يمنه انه وسليم وهاجر نسوي اكل بالليل لو نتابع فلم .
الاء مرّة سلطان من گبل لا تحبل هيه مسويه روحها مريضة النوب من كالولها حامل كامت كلاص الماي ماتشيله تكول
-الفرخ يطيح.
ومرة مرتضى تتعاند وياها صاير بيتنا احزاب وخطط وحده تخطط ضد الثانية ويوميه العركه گابه بينهن، امي اخذتلها فترة وصاحبت الاء وچن گـــلبي علمني عرفت صحبتها بس حتى تسوي مشاكل العفراء بس كامت من يم الاء طبيت وراها للغرفة
-يمه
ماعاينتلي ضلت دايره وجها من عدي
-يمه احاجيج عليمن مصاحبه الاء حتى من تروح الاهلها تتعارك وي عفره وتسويلها مشاكل؟ هاه يمه احاجيج؟
دارت علي بغضب تنتر
-شلج شغل ياهي مالتج انتِ
-والحسين اذا سويتي شي العفراء اكول الجده انتِ الطردتي بت اختها من عرس سلطان.
فتحت عينها بغضب واجت بسرعة كاضتني من زندي حييل تنتر
-ولج تهدديني ريـــمه تهدديني.
جريت ايدي منها مبتعده امسح على مجان كرصتها صاحت
- اذا بتي تهددني شلون عفيره ما تهدد شلون.
-بشنو مهددتج عفراء؟
دارت عينها علي بغضب ساكته عكدت حاجبي
-بشنو تهددج عفراء، يمه شمسويه؟
طكت ايد بايد وعانيتلي رافعه حاجبها حجت كلمة هزت گـــلبي . من گالت
-تهددني بافعالج وسوالفج
-شني؟ شتحجين يمه يا افعال يا سوالف؟
دفعتني طلعتني من الغرفة وانه گـــلبي يدك حيل افكر عــفراء شنو عدها على امي وتهددها بيه شنو اقعالي شنو سوالفي شتحجي امي، ضليت طول اليوم افكر ولا صفه بالي حد الغروب جدي وابوي ومرتضى بالدوانية سويتلهم چاي اخذته الهم بعدني ما واصله ووكفت اسمع بصدمة من ابوي كال الجدي
شاكر :: نحطله السم بسمچات صغار ونذبهن يم المواطير اليم الكيعان حتى من يجي ياكل، طرواده عباله صياد ذاب السمج.
مرتضى:: من يرد من الكيعان انه اروحن ليغاد احط السم وهوه الصبح ياخذ هاسكي ويروح يعني هالليله اخر ليله الچلبه.
شعلان:: مريتض كونك سبع وتموته الا اخليك تمشيهم على ايدك.
ريـــمه :: وأكفه بصدمة ادري ابوي يكره طــروادة بس يموت هاسكي وهمه يدرون بيه يتخبل عليه ما ظنيت الهالدرجة، مشيت بسرعة من نزّلت الاء طبيت للدوانيه اطيتهم الچاي كال جدي.
شعلان:: عفيه عفيه، ريـــمه المعدله.
عاينلي ابوي يضحك وانه اعاينله بزعل گاله
-اجوني عليها وادم بويه.
-لا هاي الصيهد محدّ ياخذها.
فتحت عينيّ بصدمة خازره ابوي طلعت من الدوانية ارجف صار بوجهي سلطان توه طاب للبيت نترت
-بالحسين اعدم روحـــي وما اخذ صــيهد.
-شبيج لج؟
مشيت للسنك اغسل وجهي محتركه حرك درت عليه
-لو يعدموووني لو يعلكون مشنقتي بمضيفهم ما اخذ صــيهد.
سلطان:: سدي حلكج مالج شغل بيهم.
مسحت وجهي بغضب اغلط على صــيهد نتر سلطان
-سددي حلكج هسه صــيهد كاتل روحه عليج زلمه عاشگ وحاير بزمانه بحالج هوه وضليتي تنكثين؟
-ما تشوفهم كاعدين بالدوانيه يخططون بكيفهم.
-انا شكايلج گبل؟ كتلج لو تتكتل زلم ويتيتم الف طفل ما ازوجج الواحد غصب، نامي رغد ولا تهمين.
حجاها ولم شفته الداخله حلكه متحسر يردد بهدوء
-رغد رغدي.
-جنت تحبها؟
عاينلي ساكت متحسر مسح وجهه هز راسه اي
-ليش ما اخذتها.
-ما رضوا عادوني ابوي وأبوها وجدي.
-غصبوك انتَ شلون راح تخليهم ما يغصبوني؟
ضحك باستهزاء وكف كدامي خله ايده على جتفي متحسر گال
-انغصبت اعوفنها حتى انتِ ما تنغصبين على واحد ماتردينه.
حجاها ومشه طلع من المطبخ، دخت كدّ مافكرت تجاهلت كلشي وصار همي هاسكي اخاف منه بس ما بودي يموت ادري بيهم بيت عمي شامل كلهم يحبونه ورنه تموت عليه.
لمن اجوا سجاد وعبود طبوا للدوانيه وانه اسويلهم عشا بس اجه سجاد ياخذ الصينية كتله
-اريد أودي رسالة الرنه.
-جا ماترحين تحاجينها؟
-امي ما ترضى، من رحت غصباً عليها خلت ابوي يزعل عليَّ.
سكت محتار هز راسه خوش ركضت كتبتلها
*رنـــه شي مهم لازم اشوفنج من ينامون اهلي اجيج يم باب الحوش اوكفيلي واربطي هاسكي.
حطيت الرسالة بأيد سجاد گـــلبي يطحن تعشوا وراحوا وانه متانيه اهلي ليمت ينامون الولد بعدهم مارادين للبيت صارت ب١٢:١٠ طلعت خايفة واركض لكيت رنـــه فاتحة باب الحوش متانيتني راساً سألتها
-طــروادة هناه؟
-اي نام لان يرد للگيعان بالاربعه.
-خوش، احجيلج واحلفي بروح عمي شامل ماتكولين الطروده.
-وروح ابوي ما اكولن احجي خوفتيني.
-جدي شعلان يريد يسمم هاسكي.
فتحت عينها بصدمة ودارت تريد تطب للبيت جلبت بايدها
-انتِ حلفتي ماتحجين
-تردين اخليهم يسممووونه؟
-لا لا اسمعيني، مرتضى راح هسه للگيعان يذب سمج مسمم يم المكاين حتى الصبح من طــروادة ياخذ هاسكي ويروح للگيعان هاسكي ياكل السمج ويتسمم،لازم نوخر السمج.
سكتت تعاينلي مافاهمه.
-رنـــه عاينــي، بس يرد مرتضى للبيت اجيج ونروح للگيعان انه وياج نذب السمج المسمم ومحد يدري بينه خوش.
-طــروادة يموتني اذا اطلع هيج بدون ما اكله.
-رنـــه ما اريد تصير مشكله اذا طــروادة دره راح يتعارك وي اهلي وانه ما ارضى يغلط لو يطك ابوي، اذا ما ترحين وياي ضلي اروحن وحدي.
سكتت محتاره كالت
-اروحن وياج.
رديت للبيت اركض ضليت كاعده على الدرج متانيه وكل ساعة راد واحد من الولد للبيت لمن رد مرتضى ختلت وشفته صعد الغرفته لبست عيايتي وطلعت بسرعة البيت عمي شامل لكيت رنـــه واكفتلي بالحوش كضينه وحده بايد الثانية ومشينه من البستان خايفات ونتعثر الدنيا حاره واحنا نرجف من الخوف
رنـــه :: هسه يطلعلنه خنزير ياكلنه.
ريـــمه :: الذيب ياكل مو الخنزير اسكتي لا تخوفيني.
رنـــه :: يمه ريـــمه خاف يلكانه حرامي ويكتلنه.
-ولج اسكتي اسكتي لا تخوفيني اقري آية الكرسي.
ضلت تقرأ اية الكرسي توصل للنص تقرأ الحد ماتكملها تقرأ التوحيد وانه اجر بيها واركض لمن وصلنه للبساتين شعلت الايت البأيدي ، ضويت على رنـــه
لكينه سمج مشمور يم المكاين لميناهن بسرعة شمرناهن بالشط ورنه تغلط على اهلي
-رنـــه فـــدوه اسكتي.
-جا يردون يسممون هاسكي.
-تعااي يله خل نمشي.
جريتها ورجعنه نركض منين ما اجينه وصلنه للقرية وافترينه من البستان شفنه سيارة صــيهد توه رد للقرية جرتني رنـــه من ايدي وافترينه من وره السياج وصلنه السياج حوشهم وشهكت رنه بخوف من شافت طــروادة كاعد جرت ايدها من ايدي ذبت العبايه والشال كالت
-راح اسوي روحـــي طالعه من المرافق، وانتِ بس نطب روحـــي هاسكي مربوط مالج شغل بيه، اكعدي هناه هسه حتى مايشوفج.
هزيت راسي اي كعدت على حيلي ارجف خايفه وهيه طلعت يمه فز، اسمع بس صوتهم كالها
-وين جنتي؟
- انه؟ شسمه هناه جنت يم الصخلة.
-امشي امشي نامي لا اطيح حظج.
مخليه راسي على ايدي واسمعلهم رنـــه كالتله تصبح على خير وطبت للبيت سمعت باب الهول من انسد وضليت كاعده لان اسمع خطوات شخّص بالحوش شويه واختفن شهكت ايدي على حلكي من سمعت صوت سلطان يحجي وي طــروادة احس رجليّ انتهن وكلبي صوت دكته مسموع.
سلطان يكله
-صــيهد يگول المكاين كاطعات ماي وبيت حمود شايفين نسوان جايات يم كيعانه گبل شوية شاعلات لايت ماكو يكولون دقايق مطفيات اللايت ورايحات.
طــروادة:: هاي ام عبيه والگرطة يا نسوان اليرحن للگيعان بهالليل.
-اندري خافن حراميه ولابسين عبي.
طرواده ::والله ما ادري، اكعد هناه هسه اجيك.
اسمعهم يحجون وروحي راحت مغمضة عيني حيل وايدي على حلكي شهكت وفتحت عيني على وسعها من انهمس يمي صوت بصدمة
-ريـــمه.
