رواية ارض الخناجر الفصل السابع عشر 17 بقلم الكاتبة ايلول
انا المثلي جسر من الشمس للگاع
ليعيش بوطن روحـــي من الصعب يطلع
وانا الصاحبي افزع گبل لا يطيح
مثل فزعة تراب بطگة المدفع
لـ علي رشم
══━━━━✥◈✥━━━━══
ريـــمه :: فتحت عيني على وسعها رافعه راسي بصدمة، على وجهي خط ضوء جاي من گلوب الحوش الثاني، وهوه الضوه صاير بس على عيونه المفتوحات بقوة خازرني گـــلبي صوت دكته البرا الحوش يسمعه
رجع كرر اسمي بنتر مصدوم
طــروادة :: ريـــمه!!
دار وجهه ليوره ورد عاينلي وانه على كعدتي احس حيلي كله راح نتر بهمس
-شعدج هناه؟
رفعت ايدي على حلكي غاصه بالكلمه اهمس
-اشش فـــدوه بداعت رنـــه صوتك.
سديت حلكي من سمعت صوت سلطان يصيح
سلطان ::خاب شني نمت فضها.
وطرواده يعاينلي بغضب وانه ارجف من الخوف ونظرتي اله تتوسل يسكت، بلعت ريك بخوف حط ايديه على السياج من الجهتين ونزل راسه علي رفعت راسي حيل اعاين لعيونه حجة كلمة كلمة من بين اسنانه
-جايه شتحرگين هالمره.
ميلت راسي شفتي ترجف وعيوني متروسه دمع
-والله ماجاي أحرك شي
-احجي شعدج هناه، هاي رنـــه جانت يمج شعدجن؟
-ماعدنا شي ماعدنا شي كعدنه نسولف.
فتح عينه بصدمة يفكر ونتر بغضب
-جنتن بالگيعان؟
سكتت اعاين لعيونه گـــلبي يدك حييل رجع ليوره مسح وجهه وانه لامه رجليَّه الصدري ارجف نتر
-احجييي.
دنكت عيني اهز راسي لا
-اصيح السلطان؟
رفعت راسي اله عيني بعينه نزلن دموعي ساكته حركت راسي
وهمست بخنك
- لا.
هز راسه اي متحلف رجع ليوره ابتعد عني مسافة صاح بصوت عالي
-سلطااان.
ضليت على كعدتي گـــلبي احس صوت نبضة باذني، رجليَّه يرجفن اعاينله بعتب وقهر محروك گـــلبي، شعل ضوه تليفونه ودار وجهه مني اعاين اجاه سلطان يدخن ويحجي وياه بهدوء
سلطان:: نمت ولك؟ ذبحتني.
وطرواده واكف كدامه تليفونه بأيده دار الضوه علي وگال السلطان
طــروادة :: عاين.
دار سلطان لجهتي وبس لمحني فتح عينه بصدمة نزلن دموعي بلا صوت، روحـــي رايحه فشلتي گدام اخوي اكلت گـــلبي شحجي يا عذر شسولف، طــروادة يعاينلي بشماته احسه حرك روحـــي مو بس گـــلبي
اجاني بساع عبالك ما مصدك عيونه جراني من عباتي كومني وكض ايدي بقوة خازرني ويحجي من بين اسنانه
-شعدددج هنااااه؟
دنكت عيني ساكته اعض بشفتي ودموعي على خدي نتر على طــروادة
سلطان ::طــروادة شننني؟
طــروادة ::اسأل أختك شعدها هناه شجابها نص الليل تريد تبليني ياهي الوداها هالمره؟
جراني سلطان حييل وانه مجلبه بأيده يجر بيه ويصيح على طــروادة
- ثمن حچااايتك.
ايدي حسيتها انكسرت بين اصابعه وهوه متسودن يريد بس نطلع من حوشهم عبرنه من كدام طــروادة الضال واكف بمچانه درت عيني اله مبتسم بشماته، وسلطان يسحل بيه وحتى مايلتفت علي يهمس
-ريـــمه اموتنج ريـــمه.
وانه بس اشهك ودموعي على خدي هستونه نريد نوصل لباب حوشهم واجه طــروادة يركض جراه ووكف كدامه
طــروادة :: اوكف احاجيك.
وسلطان متسودن يريد بس يدفع طــروادة من الباب نتر
-وخررر كهلاان وخررر.
طــروادة :: اووكف اوكف افهمنك.
-شتفهمني وللللك شتفهمنننني اختي بحوشك نص الليل شعدها هاااه شعدها شناويه تحرك هالمررره.
يحجي وي طــروادة ودارلي بغضب هز ايدي حييل
-ووولج ريـــمه.
واحس نهبتت إيدي الثانية نجريت ليوره تيهني ووكفت رنـــه كدامي تنتر على سلطان
رنـــه ::لا تطكهاا.
طــروادة :: ووولج.
سلطان:: شنّي السالفة طــروادة حااجيني.
رنـــه خنست من صاح عليها طــروادة وسلطان دار يحاجيه همست باذن رنـــه
-لا تعترفين.
رجعنه ليوره وهمه ضلوا يم باب الحوش اثنينهم ما يعاينون علينه
طــروادة :: هنه اثنينهن چانن خاتلات هاي طلعت من شافتني كعدت، واختك ضلت خاتله لمن لكيتها وصحتلك، وهسه اربط سالفة بسالفة صــيهد كالك بيت حمود يكولون اكو نسوان اثنين اجن للگيعان.وهذن اثنينهن كاعدات.
اختي وحده جبانه اذا صار الليل ما توصل باب الحوش وحدها واختك الها تاريخ طويل وي الكيعان والحرك تطر الكاع نص الليل ووحدها وهسه يمك السالفة شعدها راحت للگيعان والمن ماخذه وياها رنـــه.
ريـــمه :: داروا علينه اثنينهم رنـــه كبل صاحت
رنـــه ::يا گــيعان جنه كاعدين هناه.
طــروادة :: اششش.
جر رنـــه بعدها عني ووكف سلطان كدامي خازرني
سلطان:: المن رحتي للگيعان ريـــمه ؟ شعدجن؟
ريـــمه :: ما رايحين منه كاعدين هناه نسولف.
نتر بصياح
-جذذذذابه.
رنـــه :: لااا تصيح عليهاا.
طــروادة :: ررررنه.
دنكت رنـــه خايفه من طــروادة وهمه اعصاب ويردونه بس نحجي مسحت عيوني احاجي سلطان.
ريـــمه ::انه ورنه جنه متزاعلين ومن زمان ما مسولفين وامي ما ترضى اجيها تانيت من امي نامت اجيت يمها وضلينه نسولف اخذنه الوكت،يعني لو رايده اسوي شي بگيعانه المن ماخذه رنـــه وياي.
سكت سلطان يفكر وطرواده ضحك مستهزأ عاينله سلطان ومد ايده كض ايدي جراني وراه گاله
-اختي ما تجذب.
طــروادة :: حجايتك ختم هاي هيه مثل ماتكول.
جراني وطلعنه من حوشهم متحلف بيه حجه هيج بس گدام طــروادة لمن وصلنه لبيتنه سد باب الحوش وجراني من ايدي للمخزن دفعني وطب سد الباب كعد كدامي مسحت عيوني وهوه يعاينلي بحيره.
-المن رحتي للگيعان؟ ريـــمه ماكدرناج بعد رررريمه تطلعين بوحدج ووين ؟؟ للگيعان؟ شسوي بيج شسوووي ترديني اطكج؟ وحك عزيزة گـــلبي وروح عمي شامل ادوس على الخوه واكسر رجليج اثنينهن.
بجيت مخنوكه وهوه روحه محتركه وكف كدامي جراني من عباتي بغضب بعمره ما طاكني ولاول مره حسيته يتمنى يذبحني عاينت لعيونه مختنكه
-اذا اسولفلك تحلف بروح عمي شامل ماتحاجي ابوي؟
نزل ايده من عدي عاكد حاجبه هز راسه يسأل
-ابوي وداج؟
-لاا، بس احلف وسولفلك
-ما احاجيه وروح عمي بس سووولفي.
بلعت ريك مرتبكه
-البارحة سمعت جدي ومرتضى وابوي اتفقوا يسممون هاسكي كالوا المرتضى يحط سم بسمج ويذبه على السده يم المكاين حتى من يروح طــروادة للگيعان وهاسكي وياه يأكلهن ويموت.
كعد على حيله مصدوم مسحت وجهي اكمله
-اخذت رنـــه ورحت لكيناهم حاطين سمج ميت على السده كلش يم مكاين الماي ذبيناهن وردينه بساع.
طك على رجليَّه بحرگه
سلطان:: بالحسين عمي وحك الرضا أبو محمد هذا ابوج اذا ماخلانه نتكاتل وي ولد اعمامنه انا كلشي ما آفتهم ، شسوووي هسه لو ما اخافن الله الا احطلي چيله بنص كصته واكتل روحـــي وراه افتك وافك الوادم.
حجيت اتوسل مخنوكه
-سلطان فـــدوه اروحنلك لا تحجي هيج ابونه هذا هوه لان جدي يدفع بيه.
رفع راسه خازرني
-وانتِ شني ما وراج احد وتلعبين بكيفج زلمه انتِ شني؟ مره تحركين كيعانه مره تولين للكيعان بليل مستهتره انتِ ؟
دنكت عيني افرك بأيدي
-خفت احجيلكم وتتعاركون وي ابوي.
-اسبج هسه واسب ابوج، مووتيني حركتي گـــلبي تمنيتج زلمه كدامي مو مره حتى ما اخلي بيج عظم صاحي، ووولج بس كليلي شلون تفكرين انتِ ما تكولين وراي قنادر زززلم يتسود وجههم بسوالفي.
-والله ما أعيدها.
كام يفتر بحركه يردد
-هااي العايزه تعيدينها الا بالحسين ظهرج افصمه، مرررره صرتي وانا ما ماد ايدي عليج لا من تالي تجبريني ارد اربيج من جددديد، امشييي ولي من يمي.
عاينتله ساكته رجع نتر علي طلعت من يمه ميته من القهر غسلت وجهي وصعدت للغرفة يم هاجر خاف جان عايز گـــلبي انترس حقد على طــروادة جان يكدر يسكت ويخلي سلطان يروح بس راد يحرك گـــلبي .
"""""
رنـــه :: بس طلعوا سلطان وريمه دارلي طــروادة هستوه يحاجيني وصاح عليه صــيهد هوه طلعله وانه ركضت للفراش جريت زهره ذبيتها بفراشي ونمت بالنص بينها وبين حسين واشوخر ميته من الخوف نص ساعة وسمعته طب للبيت عليت صوت الشخير دفع باب الغرفة وآنه مغمضه كل حيلي شعل الضوه ونتر
-رنـــه!
شخرت بصوت عالي صاح
-كوومي احاااجيج.
وانه اشخر طب للغرفة هزاني من ايدي ولا تحركت نتر
-ووولج ادري بيج جذابه كومي راااح اكتلج.
حجاها وجر ايدي يريد يسحلني شالها ليفوك وتيها طاحت بالكاع حيل وانه سويت روحـــي باعتبار ميته مو نايمه كال متحلف
-والله الااطيح حظج استهترتي فد نوب.
حجاها وكام طلع زفرت نفس براحة ايدي على گـــلبي حي على الصلاة باجر يكتلني طــروادة يضمها ما ينسى ، باجر اسوي روحي مريضة حتى يضوج علي ويعوفني.
سمعته فتح باب الهول يطلع كمت وراه على اطراف اصابعي امشي من شباج الهول شفته واكف وي سلطان بالحوش مشيت ركض للمطبخ الاضوية كلها مطفينها بس اضوية الحوش ضاله
وكفت يم شباج المطبخ اسمعلهم خايفه على ريـــمه سلطان كاله.
سلطان:: تحجي شتريد لو اولي ؟
وكفت بالطرف اعاينلهم بتك عين طــروادة مدنك ساكت ومن حاجاه سلطان رفع راسه كاله
طــروادة ::انا اعتذر،غلطت وحجيت بتسرع مساع.
-ما صار شي جانن كاعدات يسولفن وفهمناهن غلط، لو ما اختك عايفتها وشاردة جا فهمناهن من الاول.
هز راسه طــروادة ساكت، اخذوا هاسكي وراحوا للگيعان، رجعت للفراش اركض لفيت راسي ونمت للصبح فزيت اريد اطلع واسمع طكطكه بالمطبخ كمت فتحت باب الغرفة على كيف اعاينله
واكف يم الطباخ البخار يطلع من قوري الچاي وطاوة الطماطمه اتشتش وكف طك بيضتين بكاسه خلطهم سوه وضل متاني الطماطه تحترك لان يحبها هيج.
جريت الشال مالي من المخده خليته على راسي وطلعت ركض للحوش ما ادري شافني لو لاه غسلت ورجعت هم ركض طبيت للهول صليت وكعدت على السجادة ادعي يطلع ناسي سالفة البارحة ومايحاجيني، مسحت اديه بوجهي ولميت السجادة بس درت وجهي لكيته واكفلي يم باب المطبخ شهكت مصدومة بيه وكبل كتله
رنـــه :: صباح الخير، انه اليوم مو زينه.
وهوه يعاينيلي بطرف عينه خليت السجادة يم التلفزون واجيت يمه شلت ايده خليتها على كصتي
-مصخنه انه كلش.
حرك ايده على كصتي وانه اعاينليه وفاتحه عيني نص فتحة عود من الصخونه ذبلانات كال
-كلشي مابيج.
-لا لا مصخنه بس ماتبين حتى البارحه عبالي اموتن.
-لا انتِ ما تموتين گبل ما تموتيني لا تخافين.
حجاها وطب للمطبخ مشيت وراه طلع خبز وكلاصين جاي حطاهم بالصينية وخله البيض والطماطه شال الصينية ومشه للهول صاح
-جيبي قوري الچاي والشكر.
اخذتهن ورحت وراه كعدت مقابيله يم الصينية اصب چاي وهوه كام شغل التلفزون وكض الريمونت يدور بالقنوات
-راح يبرد چايك يله.
-اوكفي اظن كضه، لااا حرامات.
عاينت للتلفزون دعاء الصباح مالحك عليه يحب يسمعه من يكعد وي الريوك نصه التلفزون وشغله بتليفونه وردد وياه اول ما اشتغل
-أَللَّهُمَّ يا مَنْ دَلَعَ لِسانَ الصَّباحِ بِنُطْقِ تَبَلُّجِهِ ، وَسَرَّحَ قِطَعَ اللَّيْلِ الْمُظْلِمِ بِغَياهِبِ تَلَجْلُجِهِ ، وَأَتْقَنَ صُنْعَ الْفَلَكِ الدَّوَّارِ فِي مَقادِيرِ تَبَرُّجِهِ ، وَشَعْشَعَ ضِياءَ الشَّمْسِ بِنُورِ تَأَجُّجِهِ ، يا مَنْ دَلَّ عَلَى ذاتِهِ بِذاتِهِ .
سكت هوه ياكل والدعاء ضل مشتغل صوته ترّس بيتنا مديت ايدي اكل وياه اول لگمه اكلتها وگال.
-ااي رنـــه ما سولفتي شعدج وي ريـــمه؟
عاينتله اكح
-يا ريـــمه بت عمي شاكر؟
رفع حاجبه يعاينلي درت عيني جريت كلاص الچاي اشرب واحضرلي چذبه كون تقنعه گبل
-احم، مو انه وياها جنه متعاركات محد تحاجي الثانية والنوب تصالحنه نريد نسولف نريد نحجي امها ماتخليها تجي يمي امس ودتلي رسالة بايد عبود اسأل عبود اذا تريد، كاتبتلي اليوم اجيج من امي تنام، ضليت متانيتها لمن اجت ضلينه كاعدين بالحديقة يم حيواناتي اراويهن آلها ونسولف ومن انتَ اجيت خفت تحجي علي كتلها راح اروحن انامن حتى طــروادة هم يطب ينام وانتِ روحـــي لهلج.
اشرح بكل تركيز ومسويه روحـــي ضايجة ومقهوره مدنكه واحجي بخنك
- يعني احنه محد تشوف الثانية عبالك محبوسات هم خطيه احنه انتم يوميه واحد يشوف الثاني واحنه البنات لا اهلهن يرضون يجن يمي ولا انتَ ترضى اروحن يمهن والله يعني انه كلش مختنكه.
جنت اريد امثل انُ ضايجة بس من حجيت ضجت صدك وعيوني انترسن دموع وبس رمشت طاحن دمعتين على خدي رفعت ايدي امسحهن وما اعاين الطرواده تحسر گال
-رنـــه متأكده ما رايحات للگيعان؟
عاينتله عاكده حاجبي
-يا گيعان؟ ترى انه من تعبر التسعه بالليل بعد حتى اخافن اطلع لباب الحوش شلون اروحن للگيعان وشسوي اروحن شني ؟
سكت صافن شويه وهز راسه خوش دنك ياكل ويگول
-نقهرت البارحة ما ادري شمالني جا سويت مشكله بين سلطان وريمه انا صدك حاقد عليها وحالف أحرك گلبها بس مو هيج ما احبن اتهمها بشي ما مسويته.
دنكت ساكته اكل سريع لان ما الحك عليه بلگمتين يخلص الريوك شال كلاص الچاي يشرب درنه اثنينه على فتحة الباب طلع عبود كوه فاتح عيونه تمغط وهوه يگول
عبود::صباح الخير.
طــروادة :: صباح النور، فاتك الريوك.
عبود:: صايرين تتريكون وحدكم.
رنـــه :: ضحكنه اثنينا طلع يغسل وطلعت زهره من الغرفة بساع اجت خلت راسها على رجلي وطرواده يحجي وياها
-زهوره شو ماكلتي صباح الخير.
وهيه اول ماتكعد مطنكره جنها انه ماحاجته مدلغمه طلع حسين يركض درنه اثنينا عود مانشوفه هدومه بأيده طب للحمام يسبح.
طــروادة جر زهره يشاقيها
-كومي غسلي وجهج وين معجون الاسنان مالتج؟
- كطه.
-جا موكتلج ضميه هذا حسين الخايس كضاه.
سكتت مطنكره راحت تغسل وجها كمت اخذت الصينية ورحت للمطبخ وأعاين عليهم زهره غسلت ورجعت ركضت الطرواده جان كاض التليفون ومن أجته عافه شبكها يبوسها ويشاقيها حيل يحبها يكلها
-شتردين ريوك.
-بيط عنون.
-رررنه سويلها بيض عيون يله
عبود:: انا هم اريدن بيط عنون.
رنـــه ::ضحكت كلساع امد راسي اعاين عليهم وارد للطباخ طــروادة يكتل بعبود لان يعيب على زهره وزهره تكله
زهره:: كطه اطعد عليه اتويه حطان
وطرواده كض عبود خانكه وگالها
-يله اصعدي على ظهره سويه حصان.
وزهره صعدت على ظهر عبود وكضته من اذانته ميتين ضحك عليها جراها طــروادة ضامها وره ظهره وعبود يريد يعضها طلع حسين من الحمام مايدري شني السالفة شمر روحه عليهم صوت ضحكهم ترس البيت.
سويتلهم ريوك كعدوا ياكلون وطرواده كام بدل حتى يروح للگيعان جبت جفيته من الحبل جانت مشروره اطيتها اله واحجي وياه
-شلونه الزرع شتشوفه زين؟
-نعمه، عدي بس وصلة ما طلع بيها يجوز هاليومين اشلعلها من الثخين واشتلها.
-الله كريم.
طلع هوه وهاسكي، عبود وراه بشويه اجه عليه سجاد طلعله اعاينلهم من الحوش همه البارحة ل١٢ سوه وهسه من تلاگوا واحد حضن الثاني جن سنين متفارگين، هزيت ايدي ورديت للبيت انضف وأسوي غده واحجي وي زهره من تحجي شي غلط اضلن الح عليها لمن تحجيه عدل، ريـــمه نبهتني وصدك جاب نتيجة
ل١١ الظهر طلعت للحوش حسين وزهره يلعبون بالحديقة كل واحد كاضله ارنب والصخله تفتر وراي اطيت اكل للطيور والدجاجات ورحت يم التنور لبست جفوف عفره مال الشغل وكسرت سعف خليته ببطن التنور شعلته صاح حسين
حسين:: جا طــروادة مو گالج لا تخبزين اذا انا مو هناه خاف تحتركين
- هسه گبل لا يهفت التنور يجي متعلمه عليه.
بس حجيتها درت وجهي على فتحة باب الحوش مد راسه علينه ضحك صاح
طــروادة :: عرفتج والله اجيت ركض سبقت هاسكي.
ضحكت راح يغسل ويتعارك وي هاسكي يرش عليه ماي وهذا يلعب وياه مشيت للمطبخ جبت العجين واجيت يمه بس يوكف يمي لان يخاف عليَّ، نزعت الجفوف وغسلت اديه زين صاح
طــروادة :: هوه انا ليش احبن خبزتج لان الف مره تغسلين ايدج
ضحكت واجيت يمه خبزت وهوه يحجي وياي على الزرع خلصت الخبز واخذته للمطبخ عفته حطيت السمجه بالمشوايه انطيتها الطرواده خلاها على التنور يشوي ويدخن يسولف ويانه ويضحك.
لمن طب عبود يصيح يدور علي بس شافني اجاني جنه ثور وكدام طــروادة جراني من اذاني دفعته اصيح اغلط عليه وطرواده عاف المشوايه واجاه متسودن جراه يصيح عليه
طــروادة :: شلون تطكها وانا واكف وولك؟
وعبود متسودن ويغلط
عبود:: مستهتررره بالحسين حظها اطيحه
رجف گـــلبي بخوف طــروادة يريد يكتله نتر روحه يصيح
عبود:: امس متعاركه وي بريا.
بلعت ريّك بخوف وطرواده يعاينلي بصدمة، عبود يريد بس يفلت من ايده ويجي يطكني كاله
عبود:: والله محد حجه حتى اجذبهم انااا سمعت بريا يشكي الميثم، ووولج شني من بشر انتِ بريا مريض تردين تسودنينه فد نوووب؟
دنكت ساكته ميته من الخوف صاح طــروادة
طــروادة :: شمسويه رنـــه.
عبود :: انا اكلك شمسويه، بس يتعدى بريا مناه تمدّ راسها من الحوش وتغلط عليه تصيح ابن الروسيه ما تنهي علي انا الانهي عليك وبس تمر مناه اهد عليّك هاسكي شنني انتِ مسترجله علينه؟ شو نحطج على رجليج تطيحين على راسج.
اعاينلهم بخوف حسين وزهره واكفين كدامي عود يحموني جراني طــروادة متسودن كض اذني خازرني وجهه احمر من الحر النوب احترك گلبه ضل يفور
طــروادة :: صدك هالحجي ولج؟
جلبت بأيده ابجي
-بعد ما أعيدها.
وبس حجيتها كضاني من زندي حييل يصيح
-شتعيدين ووولج شتعيدين رنـــه.
عبود:: ارتاحي بريا يگل الميثم اريدن اطلع من القرية حتى لو انكتل.
هداني طــروادة ميت من القهر
-ماعرفت اربيج انا ريت ابوي عدل ويحير بيج وبمصايبج يوميه مفشلتني وي واحد يوميه سالفة رنـــه ما تكعد تموووت اذا كعدت بدون ما تسويلها سالفه تموووت.
كل ما كولن ما اطكها صارت مره وزحمه امد ايدي عليها تجين تدوسين ببطني ما ترتاحين الا تموتيني.
حجاها ومشه للبيت وعبود راح وراه مسحت عيوني محروك گـــلبي من عبود ضليت كاعده يم التنور ابجي وحسين وزهره يمسحون بعيوني، كمت غسلت اخذت السمجه وطبيت للمطبخ اعاينلهم طــروادة صله بالهول وعبود بالدوانيه،
خلص صلاة وطب الغرفته ضليت بالمطبخ بسّ ابجي خل كل الدنيا تزاعلني الا طــروادة اختنك من يضل ما يحاجيني
صبيت غدا لحسين وزهره اخذوه وراحوا يم عبود صاحوا الطرواده كالهم ما اريدن، مسحت عيوني ورحتله للغرفة فتحت الباب رفع راسه عاينلي ودنك يعاين بتليفونه
-طــروادة.
مارد عليَّ حجيت مختنكه بدموعي
-والله هوه بالاول صاح علي انهي عليج الوصخه كتله انه الانهي عليك، وهديت هاسكي لان جدي وعمي شاكر طكوه حميته منهم.
هز راسه اي مايعاينلي
-يوميه سالفة، ولج انا ادافعلج ما مخلي واحد يحجي عليج حچايه وانتِ تخزززيني كدامهم الطكيتج ماجبت نتيجة بس الوجع الگلبي النصحتج ماجبت نتيجة بس متعب إلساني شسوي بيج؟ تردين تجلطيني رنـــه الحد ما تسويلي سالفة واكتلي واحد من الولد هذا التردينه؟
شهكت ابجي
-والله بعد ما اعيدها هسه اروحن اعتذر من بريا واكله اسفة بس حاجيني ولا تزعلي عليَّ.
مدنك ما يعانيلي وانه روحـــي تحترك
-طــروادة انه لان صغيره اغلط هواي هسه اكبر وبعد والله أعقل
ضحك مستهزئ
-عفره من امي ماتت عمرها ١٧ سنة ربتج انتِ وعبود وربت حسين وزهره وهمه عمرهم أشهر والبيت وابوي شكد طبعة صعب ما يوم زلت وصيح عليها، والولد لو ذكروا اسمها أرفع راسي متباهي بيها ماعليها زززله غلط هلكده ماعليها من چبيرهم لصغيرهم يحترمها.
انتِ ليش هيج طبعج رنـــه تعبتيني وروح أبوي تعبتيني گـــلبي يوجعني من سوالفج.
طبيت للغرفة امسح بعيوني جريت ايده ابوسها
-والله بعد ما احرك گلبك هسه اروحن اعتذر من بريا.
عاينلي بحيره
-وين ترحين؟
-اعتذر من بريا وبعد لو مدري شيصير ما أغلط عليه بس لا تزعلي عليَّ.
-رنـــه مو حلو البنيه تغلط لا تخلي احترام الروحها ولا الگدامها يحترمها، كون الحچاية گبل لا تكولينها تفكّرين بيها، ليش اخلي اليسوه والمايسوه يكض علي زلات ويحجي على تربيتي وأخلاقي.
مسحت عيوني مخنوگه
-والله همه يحركون گـــلبي لو ما همه محاجيني انه ما أغلط عليهم.
-اليحرك گلبج وانتِ ما مسويتله شي تكليلي وانا احرك أهله ادافعلج على حگ ، بس اذا انتِ غلطانه انا شلون احجي ؟
-بعد ما اغلط وألله واحجيلك إذا غلطوا عليَّ فـــدوه طــروادة حبوبي لا تزعل.
كاضه ايده باثنين اديه بس اريد يبطل زعل گال
-عاينيلي كل ما تغلطين اخليج تعتذرين منهم وارزلج كدامهم، واذا تعدلتي وضليتي ماتغلطين واجه واحد منهم غلط عليج لو ضوجج غصباً على شاربه اخليه يعتذر منج، خوش؟
هزيت راسي خوش كام من يمي طلع ضل زعلان ولا رضى.
""""""
مــاسه:: على غفله سمعت جدي وابوي ما ناوين يخلون ندى هناه، يدورون على الميتم الجابها منه وهـــب حتى يردونها واتفقوا يزوجون وهـــب ورنه فتحت عينيّ بصدمة ابوي كاله.
وليد :: مالك غرض بصيهد بويه انا أكسر ظهره.
شعلان:: شاف روحه عليَّ صــيهد اشتراله خمسين دونم ما تشيله كاع بعد انا كوون ادري جا كتلته بساعتها.
شاكر:: احنا الشيب تارس روسنه وكيعانه بأسمك يجي هذا الخايس من تالي يشتري ويسجل بأسمه.
شعلان:: وهـــب لو ما طلك هالبت هاي النغله وردها منين ماجابها لا افجع گلبه واطرده هوّه وياها.
وليد :: لا بويه يطلكها يطلكها وين تطرده.
مــاسه :: مشيت شارده للمطبخ من طلعت جده من غرفتها طبت يمهم گـــلبي يدك حييل مشيت المشتمل صــيهد مالكيته رجعت للبيت بكت تليفون امي رمشتله خايفه لمن دك التليفون بايدي فتحت خط يحجي على كيف
-ها يمه.
-احم الو.
-مااسه؟
زفرت نفّس بخوف كاضه التليفون حيل
-صــيهد جدي وابوي يخططون حتى يطردون ندى تعال .
-تعاي للمشتمل هسه اجي.
سد الخط عفت التليفون وركضت للمشتمل اتانيه شويه واجه عاكد حاجبه سولفتله السمعته هز راسه متحلف وخابر وهـــب ضليت واكفه اسمعله حجه وياه وكاله
-الحل نروح نعزم شيخ رياض وربعه يابه عرس وهـــب ومعزومين ونعزم الوادم والسلف، وعاتبني اذا جدي كدر يفك حلكه من يدري الوادم كلها راح تجي.
واسمع وهـــب يكله
-صــيهد انتَ تغشم روحك؟ البت ما تريدني همها تروّح الاختها خله يطردني اخذها واشوفلي مجان اضلن بيه لمن اكمل اوراقها وتسافر.
- ابني تنكتل يذبك من القندره العشيرة غير ثاني يوم يكتلونك مسودن انا اخليه يطردك، تعال للبيت الليله من كلها تنخمد حتى تحاجي البنيه وتتفق وياها هالاسبوع عرسك، امشي وراي ومالك شغل.
قنع وهـــب وسد الخط، قرروا بدون مايكول الجدي وابوي صــيهد راح يعزم شيوخ، جدي بس يتباها كدامهم ويريد يراويهم هوه شيخ وماكو منه، واكو شيخ مقرب من صــيهد اسمه شيخ رياض خابره صــيهد كاله" من احدد اليوم تخابر جدي تكله عرس وهـــب علي" وهوه راح ينتفض ويكلك لا حفيدي عرسه مني، كله خوش"
يحجي وياه ويضحك وانه واكفه متانيه لمن سدّ التليفون عاينلي اطكطك باصابعي كتله
-ليش اذا جدي طرد وهـــب ينكتل؟
-مو عشيرتنه مطلوبه ثار وكل مده واحد ينكتل من العشيرة تذكرين العام من كتلوا ابن بيت محسن؟
-اي.
-اي اذا جدي ذاب واحد من العشيرة كلها راح تدري وينكتل بساع والعشيرة مالها غرض لان مذبوب منها
-ما فهمت.
-اكلج شعليج بهالي السوالف؟
وكف عاكد حاجبه هو انه هم مصدومه شلون طول خلك وحجه وياي گا
-ضلي كاعده اليوم لمن يجي وهـــب
هزيت راسي خوش ورجعت للبيت حاجيت ندى اللي جده معاديتها حتى من يجونه وادم واريد اسوي چاي جده تضل تصيح عليها كومي انتِ سوي انتِ الچنه والبنيه تشتغل بلا صوت، طول اليوم خايفه ما مأمنه ولا بواحد من عدنه وبس تسأل على وهـــب، جــويريه شويه صارت تاخذ وتطي وياها، وبدور من بعيد تعاينلها وتحجي على جده شلون تغلط عليها.
""""
ندى :: اني بلا مايكلولي وهـــب راح يجي ليلي ما أنامه وهسه كالت مــاسه لا تنامين راح يجي أحس رجليَّه يردن يركضله كاعده على نار.
لمن الكل نام واجت مــاسه كوه فاتحه عينها من النعاس لبست عبايتي ولزمت ايدها نمشي ونتلفت خاف أحد يشوفنه طلعنه لباب المطبخ جان واكف صــيهد لابس دشداشة سوده ويفر بالسبحة منطينه ظهره كالتله مــاسه
-صــيهد اروحن انامن انه؟
-روحـــي .
حجاها وجرت ايدها من عدي راحت تركض كال بدون مايباوعلي
-تعاي خويه.
مشيت وراه رجلي ترجف وصلنه للمشتمل الجنت كاعده بيه صار على صفحة مبتعد داير وجهه گال
-وهـــب جوه طبي.
حجاها ومشه فتحت الباب دخلت سديته وراي اباوع وينه وهـــب، فتح باب الغرفة وطلع هستوه سابح ميلت راسي بس شفته بجيت مختنكه فتحلي ايده ورحتله اركض حضنته كل حيلي وهو حاضني يضحك
وهـــب :: اششش يابعد روحـــي بطه.
رفع وجهي من صدره يمسح دموعي ابتعدت عنه لزمني من ايدي وسحبني للغرفة گـــلبي يدك حييل وودي ما ابتعد عن حضنه كعدنه وايدي بايده يباوع لعيوني
-شلونج.
مسحت عيوني مختنگه هزيت راسي لا
-ابد مو زينه اموت الف مره باليوم من اتخيلك تتعذب والسبب اني.
ضحك واني مدنكه عيني اباوع الايده والجروح التارساتها شلتها الخدي ابجي بشهكه جر راسي الصدره
-ندى كافي لا تفتين گـــلبي بدموعج.
-اني اسفه والله اسفه ريتني ميته ولا طالعه والله ماجان قصدي وهـــب اسفه.
فقدت ابجي بصوت كلشي كاتمته وهو حار بيه يريد بس اسكت.
مسح عيوني يتلمس خدي بظهر ايده
-جيتج تركضين الحضني اخذت كل تعبي.
نزلت عيني ارجف وهوه ايده ما وخرها من خدي بلعت ريك من مد ايده يجر الحجاب من راسي وخره واني حتى ما رفعت عيني مد ايده على راسي وخر القراصة وحرك خصل شعري ذب نفس بحسره
-عاينيلي، انا اموتن بنظرات عيــونج
ويسلب حيلي شعرج لو نزل على متونج
رفعت عيني العينه ميلت راسي اتوسل
-وهـــب.
خله ايده على شفتي يسكتني
-اششش لا تكليلي حرام.
هزيت راسي لا دموعي ماوكفن
-اذيتك هالمره وبعد هم راح تتأذى بسببي عوفني وارتاح.
-قصدج لمن تسافرين أتأذى؟
هزيت راسي اي، وهوه مدنك يعاين لعيوني مبتسم
-ما اعوفنج، اخليج ترحين الاختج تشبعين منها مده واجي وراج ترجعيلي ندى ما اطلكج انا.
زفرت نفس بحسره ورفعت ايدي مسحت عيوني اعاين لوجهه
-وهـــب اني وياك مستحيل ننجمع، فـــدوه لا تتعلق بيه لا تحبني اني والله العظيم ما استاهل تحبني وتتعذب علمودي.
باوعلي بحيره
- تكرهيني؟
دنكت اهز راسي لا ودموعي يتسابقن
-جا ليش؟
-صعبه والله صعبه، مستحيل تفهمني.
-تردين ترحين يم اختج وماتردين للعراق.
وانه مدنكه هزيت راسي اي تحسر بحيرة
-الله كريم الوقتها يجوز تحبيني بعدين وتضلين بالعراق علمودي.
باوعتله روحـــي رايحه مخنوكه وهوه ابتسم مبين عليه شكد مقهور مد ايده على خدي
-عقدنا صحيح احنا.
دنكت اهز راسي اي، حسيت اصابعه بفروة راسي ومشت على طول خصلات شعري غمّضت عيوني ذبلانه وكلبي يدك بقوة .
رفعت عيني اله مرتبكه من حسيت نفسه بوجهي ارجف لزمت ايده روحـــي رايحه خايفه
-وهـــب
-بس ابوسنج لا تصديني.
بلعت ريك اعاين لعيونه صوت دكات گـــلبي احس ترّس الغرفة مد ايده على راسي من وره يلزمني وبايده الثانيه لزم فكي يرفع وجهي اله واني احس كل ذرة بجسمي ترجف، غمضت عيوني من حسيت بدفو شفته على شفتي يبوسني بلهفة ابتعد سند كصته على كصتي ذبلانه حيل ومغمضة عيني همس صوته رايح
- انا بس اعاينلج اضيع وهسه بين اديه لو تشوفين شصاير بگلبي.
فتحت عيني كوه على روحـــي جريت ايدي من عنده بتعب اريد ابتعد لزمها بقوة
-لاا.
سحبني من ايدي الحضنه تمدّد مخليني على صدره واني گـــلبي يريد ينفجر احس بروحي عركت بس فاتحه عيني ولامه روحـــي ايدي على شفتي وهوه لامني الصدره ساكت ايده تمسح على جتفي بهدوء، فترة وهمست
-وهـــب.
-ها.
سكتت فترة ورجعت كتله
-كلشي جاي يصير غلط
-اممم ميخالف منو اليتعذب انا لو انتِ.
-انتَ.
-هاي هيه جا مالج شغل عوفيني.
-بس اني ما اقبل وهـــب ما اقبل تعاملني مثل زوجتك.
-هسه انا شمسوي؟ بس منومج بحضني لا تخافين.
سكتت اعض بشفتي الحد ما هدأت فترة رجعت كتله
-بعد ما تروح؟
-اروحن كبل لا يصير النهار.
رفعت راسي من صدره اعاين الوجهه ايدي ساندتها على صدره خصله من شعري نزلت على وجهي رفع ايده وخرها الورا اذني
-ليش تروح؟
-معاقب.
-بس كافي يعني اصلاً باوع اديك شلون متكصصات وملتهبات المفروض بعد ما تروح.
نزل ايده الحنجي حرك إصبعه عليه
-اصلاً جدي مخطط يطردني من العشيره حتى اليطلبونه ثار يكتلوني.
فتحت عيني بصدمة وهو مبتسم بهدوء گال
-اكو حل بس ما اظن يرضيج.
-شنو؟
سحب راسي رجعني الصدره حضني باثنين اديه
-عرس يخلي أهلي وجدي مجبورين يسكتون.
-عرس شنو غير عقدنا؟
-ندى امني بيه أمشي وراي وخليني افتك وافكج من هالسالفه، عاينــي راح نسوي عرس مثل آي اثنين بس يشهد عليَّ ربي ما اتدنالج ولا اجبرج على شي واضل على وعدي اسفرج الاختج لو اخر يوم بعمري.
بلعت ريك ساكته مرتبكه رفعت راسي من صدره
- زين ليش ما هسه اني اروح أشوفلي مكان ثاني ابقى بيه وانتَ كلهم شردت حتى ترجع للقريه ومحد يحاجيك.
-وهيج ترضينها انتِ ياهو اليگوم يكول علي مرته عافته وشردت غير عرضي انتِ شلون ارضى بهالحجي
كون صدك تسوينها ادورج لو مو تسافرين اموتنج.
-اني بس احجيلك انطيك حلول يعني.
-ما اريدن حلولج اسكتي شلون حلول هنه واحد يكل للثاني انا اخيس منك.
رفعت راسي اباوعله بزعل ضحك ورجعني الصدره ييحجي
-ندى خليج وراي انا احلها وانتِ بس لا تعترضين خوش؟
-مو حل هذا وهـــب ومن اريد اسافر شلون شتكللهم؟
-اكول ما تفاهمنا وتطلكنه والوكتها نلكه الف حل هسه خلينه بهالسالفة، اتفقنا؟
تحسرت ساكته هزيت راسي اي وضليت مخليه راسي على صدره ساكتين لمن غفيت براحه مأمنه وفزينا اثنينا على صوت التليفون فتح خط كوه يحجي
-ها صــيهد؟ يله خوش تعال اخذ مرتي للبيت.
كعدت عدل لميت شعري ولبست شالي وهوه كوه فاتح عينه بعده قصص وروايات عراقية كرار صلاح نعسان باوعلي يثاوب گال
- صــيهد راح يرجعج للبيت.
-وانتَ؟
-راح ارجع للمعامل.
باوعت الايده بحسره
- انتَ شنو تشتغل بالمعامل ليش هيج ايدك تتشكك.
-كلشي، ابسط شي ننقل مواد نذبها بأفران المعامل حتى تنصهر وبعد هواي سوالف تولي احنا لان مانلبس العده مال الشغل يصير بينه هيج وتتشكك ادينه
-ليش ما تلبسهن؟
-جدي مايرضى متفق وي المدير اليوديه اله للمعامل اي واحد من عدنه لازم يتعبه ويشغله بدون مايلبس جفوف ولا بدله.
سكتت مقهوره اندك باب المشتمل وكفت وهوه لزم عبايتي ووكف خلاها على راسي وسحبني من ايدي طلعنه فتح باب المشتمل صــيهد واكفله بالباب كاله
صــيهد:: افتر مناه، ســليم واكفلك بالسيارة يم بيت عمي خليل.
هز راسه وهـــب خوش عصر ايدي قوي وعافها مشه من وره السياج واني عيني وراه الحد ما صــيهد كال
-تعاي خويه.
مشيت وراه بعدها الدنيا هستوه يبين بيها خيّط الفجر، فتح باب المطبخ وبقى وأكف بمكانه تحمحم ابتعد على صفحة لمحت جوري واكفه وتلبس بالشال، دخلت باوعتلي باستغراب دنكت وفتت من يمها للغرفة.
جــويريه :: لفيت شالي على شعري عدل مرتبكه وعقلي مفتر ندى وين جانت منين جابها، عيني على الطباخ الاعشاب تفور، فزيت من نومي على وجع كلياتي ام صــيهد جابتلي فوار ومافادني انطتني اعشاب كالت فوريهن ومن كعدت موجوعه نزلت افورهن واشربهن دام محدّ كاعد ما ادري منين اجاني وكابلني شويه وكال
-شعدج كاعده؟
بلعت ريك ساكته ما اريد اتواجهه وياه ولا بكلمه دخل وسدّ ألباب وكف يم الكاونتر من مارديت عليه دفع سلة الكلاصات ينتر
-من احاجيج ردي.
فزيت على صوته درت عيني اباوعله همست
-اسوي اعشاب
ضيك عيونه وهز راسه يسأل
-شبيج؟
درت وجهي منه
-كلياتي يأذوني.
سكت فترة ورجع كال
-مو امي جابتلج علاج ليش ما شربتيه؟
-شربت بس هم مافادوني.
-كلي الجدتج اريدن اروح للدكتور، حتى امي تاخذج.
زفرت نفس بحسره عيني على الجدر
-كتلها وكالت يطبج مرض.
-لا ما يطبج مرض مو بكيفهاا.
حجاها واجاني بساع رجعت ليوره خايفه جراني من ايدي واني فاتحه عيني بخوف يدفع بيه للگاع ما فاهمه شي بس اجر بأيدي من عده واتلفت بخوف لا بيه اصيح ولا بيه افهمه اسحل بايدي منه واحجي اجه ببالي يريد يفحصني جريت ايدي حييل احجي بساع
-ما يطيبني وجعن
-مايوجعنج طابن؟
-اااي هدني.
جريت ايدي حييل عيني على الباب ميته من الخوف دفعني للگاع حيل فتح عينه خازرني
-للللج، تمددي.
هزيت راسي لا ارجف شال ايده يحجي
-اجيبج براشدي اسوي عدج إغماء حقيقي، تمددي وعوجي رجليج.
-عوووفني شتريد.
-نخمدي سوي روحج طايحه.
حجاها وخله اديه على اكتافي اثنينهم دفعني حيل للگاع وثنه ركبته مددني واني بس اريد اكوم
-ارگدي يشهد الحسين راح اطكج.
مجلبه بايده كل حيلي فاتحه عيني بخوف حط ايده فوك عيوني دفعتها بسرعة نتر
-غمضيهن لا اعميهن سوي روحج طايحه مال ثول.
بلعت ريك اباوع لوجهه شال ايده يريد يضربني
-غمضيي.
غمضت عيني گـــلبي يدك حيل
-سوي رجليج عوج واديج شمريهن مناه ومناه هيج مبينه جذابه.
طبكت رجليَّه مدري شجابرني انفذ وشمرت اديه من الجهتين مغمضة عيوني حيل
-رخي عيــونج شويه لا تعصرينهن حيل.
رخيتهن ساكته.
-جيبي ايدج هاي شويه حيل باعدتها.
سحب ايدي من الردن فتّحت عيوني وكف يباوعلي هز راسه راسه راضي كال
-المشكلة بحجابج بس عادي ماتبين ضلي هيج هسه اجيج.
هزيت راسي اي ورجعت غمضت عيني وهوه طلع ما ادري وين راح واني باقيه ممدده بالمطبخ شويه واسمع صوت مــاسه وهوه يحجي وياها كالها
- انا راح اطبن للدوانيه وانتِ طبي للمطبخ صرخي خوش؟
-خوش، يعني هسه جــويريه مابيها شي بس هيج مغمضه؟
-ااي اي انا كتلها تمددي واذا وحده منجن غلطت الا اموتجن.
دك گـــلبي بخوف مغمضه وارجف شويه واندفع باب المطبخ وصرخت مــاسه
مــاسه :: يمااااي يممممه لحكي يمممه جويرية ماتت.
واحس بيها جرتني الحضنها واني لزمتني الضحكه ضحكت بحضنها وكرصتني كرصه خلتني واني مغمضه ابجي
تصرخ فوك راسي واجن امها وجده يركضن ام صــيهد كبل رشت ماي على وجهي وكالت الجده
-من امس كتلج عمه البت مريضه مارضيتي اخذها للدكتور، ييمه جــويريه يمه.
وجده تصيح
-يمه ماتت البت ماتت.
غركني بالماي واني حتى حلكي سادته وماسه عبالك اني ميته كد ماصرخت التموا جدي وعمي خفت صدك ومن بين الهوسه سمعت صوت صــيهد يصيح عليهم
-عبااايه عبااايه بساع.
ضليت ارجف من الخوف وام صــيهد تصيح
-ولكم يمه رررجفت يمه راح تموووت.
واحس واحد لفني بعبايه وشالني من بينهم حسيت صدك اغمى عليه من كدّ ماخفت وصوت ام صــيهد خطيه ميته من الخوف خلوني بحضنها تمسح بوجهي خاايفه وتدعي لمن حركت السيارة واني بعدني مغمضه وهيه تكله
- امشي ولك صــيهد يمه لا البت تموت.
صــيهد:: اكعدي كافي شني اخذج الواهس.
ضل گـــلبي يدك حييل وامه تحجي وياه كالها
-طكيها راشدي حيل هسه تصحه
- خايب يمه ضلت تررجف راح تموت بايدي.
-هيوووو شني اكعدي يشهد الحسين اذا نزلتلج فكي عينيج الجذابه ممثله ماكو هيج، صدكتي روحج.
فتحت عين وحده اباوع لوجهه ام صــيهد وهيه عاكده حاجبها مافاهمه شي كعدت من حضنها آمسح بوجهي تباوعلي بحيره كالها
-جذابه هاي يمه كلشي مابيها اصحى مني.
باوعتله بالمرايه الكدام بس عيونه وحواجبه اشوفهن درت عيني الام صــيهد اريد اعتذر منها ومدت ايدها على اذاني جرتها حيل من وره الحجاب جلبت بأيدها موجوعه صاحت بحرگه
-ووولج اخذتي روحـــي
-اااخ خاله والله هوه گالي سوي هيج.
ضحك بصوت يسوق ويحجي
-حييل حييل انزعي نعالج لا تستحين.
عافتني ومدت أيدها على زنده ضربته حيل تغلط عليه كالها
- بدون افكاري ماتعيشون.
-امدداك يا يمه وامده افكارك جا هيج هيه خايب اخذت روحـــي.
صــيهد:: اذا مرة مشعول ماترضى تأخذينها للطبيب شنسوي؟
سكتت شويه النوب دارت عليَّ تسال
-كون اوجعتج؟
هزيت راسي لا كالت
-صفاحج بعدهن يوجعنج.
-اي بس يمكن لان خفت خف الوجع.
-لا لا بعده بعده اسكتي.
وصلنه للمستشفى ودخلنه للطوارىء وهوه كل ما واحد يخابره يكلهم بعدها مغمي عليها ويباوعلي مضيك عينه واكف كدامي مثل الحارس يتحرك مناه ومناه دخلت وياي ام صــيهد يم الدكتوره كملنه فحص وتحاليل صارت ب٨:٣٠ واحنا ماطالعين من المستشفى،
من رجعوا خابروه كالهم صحت، الدكتورة كالت عدج التهابات ورمل طلع صــيهد جاب العلاج ومشينه وراه من يمشي عبالك ماعاجبته بس روحه واذا فات واحد من يمنه اليكول راح يعضنه
يجي بساع يوكف بصفنه هستونه نريد نوصل للسيارة عاين الامه وفتح عينه
-شعررج يمه شننيي.
وهيه ماتدري منين شعرها طالع خرذلها تجر بالعبايه عبالها شيلتها وهوه يصح
-خرررب خررب .
واجاها بسرعة مد ايده لشيلتها ضم شعرها من يم زلوفها يحجي
-دومهن طالعات متعجبه بس هيه شعرها احمر.
-ياا خايب شمالك صــيهد جا مطلعتن انه غير اجيت متخرذله.
-يله عمي يله
يحجي وهيه تباوعله خازرته صعدنا بالسيارة من شافها زعلت منه ضل يحجي وياها ويشاقيها شويه وكالها
-هنه كنيكيرات وانتِ يوميه محنيتهن والنوب يعوفن الشيله ويطلعن شعدددهن؟
-حزينات يطلعن يلطمن على ابوك، ياخايس يا ابن الخايس.
صــيهد::افاا انا خايس؟ ام كنيكيرات.
ضحكت ام صــيهد طكته وهوه تليفونه ماسكت كل شوي عمي وليد يخابره وجدي اخر مره خابره سلطان عرفته من كاله
-هله سلطان،، اي بالمستشفى.
وسلطان مدري شكاله رد عليه صــيهد
-شلك غرض؟ مرض المرضك ولي يله.
سدّ التليفون شمره يمه كالتله امه
-شبيك يمه وي اخيوتك.
-شلهم غرض شبيها؟
حجاها وباوعلي بالمرايه خازرني دنكت عيني ملتفه بالعبايه كالته امه
-على جــويريه؟ جا غير بنيت عمتهم وينشدون عليها.
-نشدت عليهم جهنم.
-جبح السانك .
ضحك وياها وجر باكيت الجكاير يدخن لمن وصّلنا للقرية كالتلي ام صــيهد
-مو تنزلين تركضين، انه اكضج امشيج وانتِ امشي على كيفج سوي روحج مابيج حيل
هزيت راسي اي گالها صــيهد
صــيهد:: عليمن توصينها هسه هيه تسوي روحها مواته فد نوب.
سكتت منه دخل السيارة للحوش وافترت ام صــيهد جلبت بايدها وتحجي وياي همس
-كضي صفاحج لا تمشين حيل.
جلبت بأيدها وامشي خطوه خطوه وايدي على كلياتي طلعت جده عوجيتها بأيدها تحجي
-يمه يمه جــويريه يمه.
ام صــيهد:: عمه خليني اوصلها للفراش لا تطيح علينه.
وتمشي بيه للبيت النوب اني كمت صدك ما أكدر امشي دخلنا من المطبخ ندى وبدور وماسه واكفات يباوعلي بخوف الا ماسه تغمزلي سكته صاحت عليها امها
-صعديها للغرفه.
وجده تكلها
-خليها يمي
-لا عمه لا خليها تصعد يم البنات هسه انه اسولفلج هسه.
ولزمني مــاسه وبدور كل وحده من جهه صعدني الدرج هستونه نوصل للغرفه مــاسه كالت
-شني صدك ما تكدرين تمشين.
سحبت ايدي منها مشيت عدل وبدور فاتحه عينها وحلكها ما فاهمه جرتها مــاسه تسولفلها وتضحك، وخرت الردن من ايدي ارواي مــاسه كرصتها صايره زركه
-شوفي كرصتج مــاسه.
-غير فضحتينا ولج شلون تضحكين وهمه واكفين فوك راسي ردت اخنگج حتى صدك يغمى عليج
ضحكنه شويه واجت ندى بايدها كلاص عصير تحمدتلي السلامه جريناها كعدناها يمنا سولفنالها نضحك وهيه هم سولفتلنه من جانت يم وهـــب بسّ ما تحجي اي شي بوضوح.
تمددت ارجع انام وهنه نزلن شويه وكعدتني مــاسه كالت
-ابوج اجه.
فتحت عيني بفرح كمت بسرعة ابدل باستعجال وكلي فرح نزلت جوه جده كاعده واجه عمي وليد رحت وياه ابوي كاعد ويحجي وي جدي مشيت الضحكة تارسه وجهي سلمت عليها حضني يبوس بوجهي وجراني اكعد يمه يسأل
-شلونج بويه.
-الحمدلله، انتَ شلونك اخواني شلونهم؟
هز راسه زينين عمي وليد صاح الجدي طلعوا درت على ابوي بفرح منتظرة يكلي اجيت حتى اخذج جر علاكه من يمه متروسه كتب كال
-بس سمعت بيج نجحتي جبتلج كتب السادس وياهن ملازم.
اخذتهن من ايده اباوع لوجهه
-يعني ماجاي تاخذني.
-اخذج اخذج بس اصبريلي هالشهر.
أبتسمت
-ميخالف عادي شهر شهرين المهم تاخذني.
ضحك يهز راسه اي
-جا شلون اعوفنج هناه العمر كله؟ هالشهر يكضي واخذج.
هزيت راسي آي فرحانه اسولف وياه شويه وراح اخذت الكتب وصعدت فوك طايره من الفرح لاول مره افرح هلكد وبهالطريقة.
"""""
رنـــه :: جدي ابد ماناوي يخلي طــروادة يرتاح، العصر اجه طــروادة يرجف من العصبية وعبود وراه اعاينلهم مافاهمه شي يسب ويغلط ويدعي على شعلان مشيت وره عبود اسأله
-شصار؟
عبود:: گيعان ابوي باسم جدي، اخذ منهن عشر دوانم مزروعات طــروادة راح ينجلط من القهر.
-جا بكيفه ياخذهن غير طــروادة الزارعهن.
- كدام الوادم كالهم هذن العشر دوانم من كاعي أتبرع بيهن البيت حمد ومن هاليوم صارن الحمد يعتبرها كاعه مناه لمن يحصد، اذا طرواده حجه كدام الوادم وفشله يروح للقانون وياخذ الگيعان كلها.
حطيت ايدي على گـــلبي مقهوره عليه عبود خابره عفره حتى تجي لان بس هيه تعرف شلون تواسيه مشيت للغرفه اسمعه يخابر ويتعارك
-بالحسين اكتله ولك صاير چريم براسي انا ازرع واتعب يجي على الحاضر المشعول يكلي انا تبرعت بيهن.
صيح وغلط مادري ويامن يحجي شويه وصارت هوسه يم باب حوشنه طلع طــروادة ركضت اعاينلهم جدي يغلط عليه لان طــروادة خابر واحد يشكيله جدي وناس تصيح على ناس هوسه انكسر گـــلبي من شفت شلون طــروادة مفرفحه روحه بينهم على حگ وهمه كلهم باطل.
لمن اجه صــيهد گال الجدي
-اخذت عشر دوانم منه؟
شعلان:: ووولكم گيعاني بكيفي اخذ الاريده.
طــروادة :: ووولك ابوي دافعلك حگهن ربع ربع الله اكبر شني من بشر انتَ.
صــيهد :: اسكت هاي هيه ال٥٠ دونم البأسممي من هاليوم الطرواده محد يحجي حرررف لا بأسمك ولا بأسم اي واحد ولا بتعبك ولا بفلوسك انا المشتريهن بكد ذراعي.
اعاينلهم تسودنوا والحقير مرتضى دوم يسوي روحه بس هوه وبس كدام جدي هد على صــيهد وطرواده. وهمه جنهم مسودنين بس يردون يكضونه والولد يجرون بيهن لحوشنه، ركضت طبيت اعاين من شباج الهول جابوهم تدفع طببوهم للحوش والغلط والصياح واصل للشارع.
اخذولهم شويه وطشوا كعدوا طــروادة وصيهد بالحوش ايد طــروادة متعوره واجه عبود اخذله اللفاف والمعقم لفاها اله صــيهد، يسولفون بحرگه حيل مغثوث طــروادة ميت قهر، عبود عافهم وطلع، وصيهد كمل ايد طــروادة گاله.
صــيهد:: شما يقهرك اقهره.
طــروادة :: ما اريدهن صــيهد كيعانك هاي.
صــيهد:: اي اخذهن هالسنه شيريد يصير.
-لا خويه هاي وكفتك وحجايتك تسوه الدنيا عدي، ما اريدن انا بس انغثيت لان يابشر گــيعان ابوي وتعبي على الحاضر يجي يوزع بيها.
صــيهد:: هاي بعد ربي يختبر صبرنا بمشعول، وتنجب وتاخذهن انا شسوي بيهن انتَ زلمه وراك دين لا تنسى.
ضحك طــروادة طك صــيهد على جتفه كاله
-انتَ زلمه وراك نجمة سلف تبنيلها بيت تحضرلها مهر
ضحك صــيهد مدنك گاله
-ساعة السوده يوم الكتلك.
-جا اذا اكلك اعارفها ياهي نجمة السلف شتسوي؟
رفع راسه صــيهد مصدوم وطرواده يضحك
صــيهد:: محد يعارفها لا تجذب.
-خاب انا من عيونك اعارفك تريد تضمها علي.
-ماتعارفها كهلان سد حلكك
-وروح ابوي اعارفها تريد اكلك اسمها.
نتر صــيهد
-لاااا سد حلكك
وطرواده يضحك عليه وكف صــيهد رفع راسه عاين الخنجرنه هز راسه گال الطرواده.
-لو گراب هالخنجر ضال جا هسه انتَ حالك حالنه من أحفاد شعلان
وكف طــروادة متحسر وخرت من شباج الهول وركضت لشباج المطبخ اعاينلهم كاله
طــروادة :: ابوي جان يعارف وينه بس ما رضى يگول اذكر مره سألته عليه گالي ماضيعته جدك الراده يضيع، وگال يجوز الله يحبنه وبعدنه عن الباطل.
صــيهد:: شتكول ابوكن خنجر ابوي حتى مشعول يطردنه هم.
طــروادة :: ههههه حتى ابوك ينجلط اسكت عمي اسكت.
ضحكوا وطلعوا اثنينهم وهاسكي يمشي وراهم ركضت انظف علمود من تجي عفره تلكى كلشي كامل ماتعيب عليَّ.
"""""""
جــويريه :: من ثاني يوم بديت احسب عبالي صدك ابوي راح يطول شهر يله يجي ياخذني بس اللي خلاني اركص من الفرح ثاني يوم اجه وصاحني جدي كال وهوه راضي
-اجه ابوج حتى ياخذج، يله.
نزلت اركض والعبايه على راسي مشيت وي جدي ولو بأيدي اركص من الفرح امشي مبتسمه فتح باب الديوان وفتحت عيوني بصدمة من شفت....
