رواية اسيرة بين يدي قاتل ابي الفصل الخامس عشر15 بقلم نور آل زيادة
لمياء،، كلنه دخلنه أنذار ومنتضرين يرجع لونسمع خبر عنه عبرت ساعه ١٢ بالليل وسراج مختفي كلنه خايفين يكون صارله شي خصوصا هو مانع الحمايه مالته يروحون ويا
بعد ال ١٢ رجع بهاء اتصل والحمد الله جاوب أتنفسنه وأخيرااا،،، فرحنه كلنه لكن هل فرحه تحولت الى خوف من عاط...
بهاء،،، شبي اخويه؟؟؟؟ شنو تكول انتَ؟؟شنو مابي نِفس؟؟ شنو بيّ ؟؟ خويه جاوبني الله يخليك
لك شنو ماااااات؟؟؟!!!
باهر،،، شبي سراج؟ احجي شنو صاير؟
ام بهاء،،، يمه وليدي راح مني ولكم يمه
حجيه نعيمه،،، ولك يمه احجي مو گلوبنا وگعت شنو صارله؟
لمياء،،، حاوطنا بهاء كلنا منتضرين ينهي اتصاله اول ماغلقه كال
بهاء،،، امشي باهر بسرعه جيب فلوس وتعال ورايه اني رايح قبلك
ام بهاء،،، ولك يمه فهمنه شبي اخوك موگلبي راح يوكف
بهاء،،، مابي شي ان شاء الله،،، لتخافون
لمياء،،، شلون منخاف وسمعناك تكله شنو مابي نفس ومات
بهاء،،، لاكي بسيارته متخربط
لمياء،،، ايّ؟
بهاء،،، هسه راح يطلعون بي للمستشفى فضوني خلي ألَحك عليهم
لمياء،،،مافهمنا غير هل كلام طلع مسرع لبست امي عباتها هي والحجيه نعيمه اني بسرعه لبست عبا اسلاميه من راد يطلع باهر چلبنه بي بالبدايه رفض بس بالأخير أنجبر ياخذنا بسبب ألحاحنا
وصلنا للمستشفى لكينه بهاء واكف ويمه ثنين ولد يحجي وياهم تقدمنه يمهم
بهاء،،، وين لكيتوا؟
_ بالمنصور بشارع الأميرات چان صاف السياره أنتبهناله صار ساعات صاف السياره وماتحرك اني وصديقي كلنه خلي نروح نشوف شنو هل الرجال موكف سيارته هنا كل هل الوگت،،، تقربنه منه شفنا خال راسه على الّستيرن دگيت على الچامه إكثر من مره مارد هنا تأكدنا صايرله شي حاولنا نفتح الباب ماأنفتحت رحنا للسيطره براس الشارع بلغناهم أجوي ويانا وفتحوا باب السياره لكينا فاقد لاحس ولانفس ولازم منطقة گلبه سمعنا صوت جهازه يرن وجاوبناكم وبعدها جبنا للمستشفى هذا كل الصار
بهاء،،،رحم الله والديكم
_ترا سيارته ضلت هناك قفلناها وهذا السويچ
بهاء،،، والله مااعرف شنو أكول فضلتوا علينه رحم الله والديكم وماقصرتوا
_ ماسوينه شي هذا واجب أنساني وهاي غيرة العراقين
بهاء،،،اي والله والنعم بيكم وبأصلكم
باهر،،،مشكورين ورحم الله والديكم
_خويه محتاجين شي بعد؟
بهاء،،، لا يابه ماقصرتوا
حجيه نعيمه،،، يمه الله لايفجعكم بعزيز ويحفضكم لشبابكم
_تسلمين حجيه،،، من رخصتكم ان شاء الله مريضكم يكوم بالسلامه
بهاء ،،، مشكورين،،، الله وياكم،،، باهر وصل الولد لبيوتهم
_ لاخويه جايين بسيارتنه مشكور يله في أمان الله
الكل،،، الله وياكم
ام بهاء،، ماأفتهمنه شيسوي الشيخ بالمنصور
باهر،،، شغل يعني شيسوي هناك قابل
لمياء،،، الكل يباوع عليه يعرفوني اعرف سراج شيسوي بهل بمكان سويت نفسي مامفتهمه نضراتهم،،،، شنو اريد اجاوب مثلا أكلهم اخونا مگابل بيت سيلين الغدرته للمره الثانيه
واكفين وخلال نص ساعه الكل أجا الأقرباء ومعارفنه وعماتي وخالاتي أجوي ورانا
المستشفى انكلبت بس سمعوا بالخبر
ضلينه ننتضر يجينا شخص يفهمنه وضعه تأخروا اخر شي باهر عاط بمصطفى
باهر،،، ولك انت موثور اقصد دكتور متفوت تشوف شصار موراح نموت وأحنا ننتضر
مصطفى،،، مودخلت وكالو ممنوع
باهر،،، هو شنو ممنوع غير يفهمونه شبي
مصطفى،،، خالي بالعنايه
بهاء،،، افتهمنه بالعنايه بس غير نفهم شنو صايرله
لمياء،،، احجي خاله لتخلينا عايشين على أعصابنه على الأقل نفهم شبي
مصطفى،،، مع الأسف الدكتور بالفحص السريري يكول شبه متأكد ضاربته چلطه منتضرين التحاليل والفحوصات حتى ينطونه النتيجه الأكيده
بهاء الدين،،، چلطه شنوووو؟؟ مييييين أجته؟
ام بهاء،،، يمه وليدي مين اجا هل مرض شصار فهموني هو كل شي مابي شلون هيج صار؟
باهر،،،ولك مصطفى تحجي صدك؟
عمتي ،،، هاي حوبت بت اختي من طلكها وطردها مافكر هاي تاليها الرادها عافته وتزوجت
باهر،،،عمه منو كلج هل كلام؟
عمتي ... مصادري الخاصه ومتأكده من هل شي وماكو داعي تطمطمون الموضوع انفضح
لمياء،،، لهنا حدكم وكافي انتو جاين توكفون ويانا لوتتشمتون؟ اذا جايه تتشمتين روحي لبيتج أحسن البينا كافينا
ام بهاء،،، يمه عيب هل كلام عمتج هاي
لمياء،،، عيب مو؟ بس موعيب تتشمت بأبنج وفرحانه وهو جوا منعرف شنو وضعه،،تكول مصادري الخاصه ومتعترف بتها ام المصادر تتجسس علينه اني وسراج وتسمع على كلامنه وتوصل للباقين
باهر،،، قصدج نوال؟
عمتي،،، لتَهمين بتي كافي ليضربج الله انتي هم
لمياء،،، ليش منو غيرها طول الوقت تتسمع علينا واليوم من چنا اني وسراج واكفين برا نحجي من طلع شفتها واكفه بباب المطبخ وتضحك
باهر،،، يصير خير،، يصير خير
بهاء،، يعني صدك هاي سالفه اللبنيه الراد يخطبها تزوجت؟ زين هو مبين رايدها ورايدته شلون هيج صار؟
لمياء،،، يكوم بالسلامه وهو يوضح كل شي لتستعجلون
ام بهاء،،، وشكو تضمين الموضوع كولي الحقيقه هذا اليكسر كلام أُمه وأهله ويدور الغريبه منعرف گرعت راس ابوها مين هيج يصير بي
باهر،،، يمه تحجين صدك؟ هذا ابنج اذا انتي هيج تحجين لاعتب على غيرج
ام بهاء،،، انتَ اسكت
لمياء،، ناس جايه شمتانه وناس مهتمه وكل واحد يحجي شكل وأحنا واكفين ننتضر و فجئه صارت رگضه وهوسه طلعت الممرضه تركض رجعت هي والدكتور المتابع حالة سراج انفزعنه الكل ضل يتسائل شكو وعرفنه وياريت ماعرفنه
سراج توقف قلبه ،،، انهارينه كلنه امي وكعت
واني صافنه بالوجوه مامستوعبه يعني شنو وكف گلبه يعني شنو مات؟؟ لا مستحيل ليش هو شبي اخويه مابي شي صحته زينه ليش وصل لهل حال
اباوع بالوجوه مامستوعبه،، اشخاص أنهارت ويانا واشخاص صاروا يتصلون يبلغون بوفات الشيخ واشخاص فرحانين واني للان مامستوعبه الصار ومامصدكه احس نفسي بكابوس ومنتضره احد يصحيني منه والحمد الله من طلع كابوس،،، طلع الدكتور
_ لتخافون ياجماعه الحمد الله سيطرنا على الوضع ورجعله النبض وعدت ان شاء الله
لمياء،،، يعني شنو دكتور اخويه عايش مامات؟؟
بهاء وباهر،،،، بشرنا اخونه عايش؟
الدكتور،،، عايش،، عايش،، لتخافون توقف النبض وهسه رجع
لمياء،،، اتنهدنه فرحانين ودموعنه بعيونه من صعوبة الموقف المرينه بي
مصطفى،،، دكتور شنو وضعه هسه؟
الدكتور،،، بعده مامستقر
مصطفى،،، چلطه مو؟ اذا قويه يحتاج تدخل جراحي؟
الدكتور،،، كل شي بي يدل انو متعرض لنوبه قلبيه لكن الفحوصات تثبت عكس هل شي
مصطفى،،، مستحيل كل شي بي يثبت ضاربته چلطه وخصوصا الصار ويا قبل شويه
الدكتور،،، عنده اعراض چلطه بس ماكو شي يثبت هل شي نتأكد اكثر ونبلغكم الحمد الله على سلامته
ام بهاء ،،، يعني هسه شفتهمنه شنو بي غير نعرف؟
مصطفى،،، حجيه الضاهر ضاربته چلطه ومعديه رايحه
باهر،،، ومن اكول ثور مااريد احد يعتب عليه يعني ديكول الدكتور موچلطه
مصطفى،،، بس اعراضه مال چلطه
باهر،،، چلبت،،، ماكو شي غير الچلطه؟ يجوز بي شي ثاني لتنسون قبل سنوات صار ويا نفس الشي صح اخف بس المهم طلع موچلطه
مصطفى،،، هل مره تختلف،،، خالي احنا دكاتره وادرى بهل شي
باهر،،، اي بالخير صار دكتور ويتباهى ويهمبل براسنه،،، دولي لك انتَ هم مصدك روحك،،، هو انتَ لافهم ولاعلم
مصطفى،،، خالي وتمون شنسوي نسكت ونتحمل
باهر،،، لازم ماعاجبك؟
لمياء،،، ضلو يتداهرون واني كعدت جسمي يرجف من الموقف المرينه بي
ااااخ لويدرون منو سبب الصار ويا سراج الله لاينطيج ياسيلين ولايوفقج على السويتي بأخويه مرتين ياضالمة النفس،،، مرتين تغدري وتأذي بس هل مره أذيته اكبر سراج صار مهووس بشي اسمه سيلين وماراح يتحمل خسارتها،،، وياخوفي من الجاي،،، ادعي من الله تعدي على خير
مر وقت والكل مستنفر وللان مافهمنا شبي اخر شي الولد قرروا ينقلوا لمستشفى اهلي لإن هنا كل شي ماكو اخر شي نصحنه شخص كال انقلوا لأبن البيطار هناك افضل آله نقلناه بأسعاف كان وقت صعب وساعات انتضار اصعب والنتيجه وحالته مجهوله للان اخر شي كالو اكو دكتور معروف هو راح يشرف على حالته
صار الليل هواي اشخاص راحوا من المعارف والاقرباء بقوا الأهل المقربين وأحنا
بعدها طلبوا المستشفى من الكل يروحون بقينا اني وباهر وبهاء الليل كله كاعدين ننتضر وندعيله
ثاني يوم وسراج على وضعه دخلنه شفنا الوجه اصفر وتعبان ملامح وجهه متغيره من المرض مااعرف من هول الصدمه ألي انصدمها هيج صاير شكله،،،، حتى شكله عبالك كبر بالعمر معقوله الصدمه والحزن يوصل الأنسان لهل مرحله؟
كذا مره حذرته ليتعلق لهل درجه چنت خايفه علي من مشاعره قبل لااخاف من سيلين
تعلقه الزايد هو الوصله لهل حاله مااستوعب يرجع يخسرها مره ثانيه هي اول مره ماأتخطاها بسهوله رغم يبين للكل نسى بس اني اعرفه بداخله غير شي ومتأكده ضلت سيلين بداخله حسره كل هل سنين وهسه هل مره كانت القاضيه
طلعنه من عنده واني مااكدر اسيطر على دموعي مااتحمل اشوف اخوتي يصير بيهم اي شي احبهم وأخاف عليهم هو باقر سافر ايفاد وفراقه مأذيني رغم اعرف هو بخير ومرتاح بس بالي يمه موعاد يصير بيهم شي وخصوصا سراج بطفولتنه كان اقرب واحد ألي
بهاء،،، لمياء هسه ماكو احد اريد تفهمينه شنو الصار
باهر،،، اي صح
لمياء،،، مااكدر يجوز سراج ميريد يحجي بهل موضوع وميريد احد يعرف
بهاء،،، هو شنو ميريدنه نعرف؟ أحنا اخوته شنو قابل غربه؟
لمياء،، يبقى كل شخص وأله خصوصيته
باهر،،، لمن خصوصيته توصله للموت هاي موخصوصيه هاي طيحان حظ
بهاء،،، وتالي ويا لسانك
باهر،،، انعل ابو لساني،، هي غير تحجي وتفضنا
لمياء،،، الراد يتزوجها تزوجت غيره،، بكل اختصار
باهر،،، منو هاي غير نعرف؟
بهاء،،، منو هاي ألي وصلت سراج لهل حاله اني اعرف سراح كلش زين ماحب غير وحده واذا تكولين رجع حب مره ثانيه والثانيه تزوجت غيره فراح اكلج مالحك يتعلق بيها بهل سرعه خصوصا واني ملاحظ للان عايش على اطلال سيلين
باهر،،، شچلبتو بهل سيلين،،، بابا منو يضل كل هل سنين عايش ويحب ويفكر بوحده تزوجت غيره علمود الفلوس؟؟ اكيد نساها وحب غيرها ومع الآسف الضاهر هاي انكس من هذيج
بهاء،،، مااعرف بس اني متأكد سراج مانسى سيلين وألي بي هسه موسبب هاي اللبنيه لآن تزوجت غيره اكيد اكو سبب ثاني
لمياء،،، مع الأسف بهاء كلامك صح سراج مانسى سيلين والمشكله هسه صار يحبها اكثر واضعاف حبه قبل
باهر،،، وشذكره بيها مو علساس يتزوج غيرها؟
لمياء،،، بأختصار شديد لأن هيَ نفسها ألي علساس يتزوجها هسه
بهاء و باهر،،،، شنووووو؟؟؟؟!!!
بهاء،،، شودا عليها هي مو متزوجه؟
باهر،،، غير تفهمنه عاد لتقطرين الكلام فضينا
لمياء،،، سيلين ترملت وبعد وفاة زوجها بالصدفه رجعت ألتقت بسراج وصار فتره علاقتهم قوت وقرروا يتزوجون مثل ماالكل يعرف والبارحه غدرته للمره الثانيه وتزوجت غيره وهو ماتحمل الصار
بهاء ،،، والله گلبي حس الموضوع بي سيلين اعرف بس هيَ تخربط حاله وهي نفسها تكدر تسعده صار فتره أشوفه فرحان ومرتاح نفسيا هسه عرفت ليش
باهر،،، لا يابت الكل**ب على هل دگه الناقصه ااااخ لو اشوفها ألا امسح بيها الگاع ذهابا وأيابا امرغلها تمرغل،،، يصير خير دخلي يكوم بالسلامه اريد اعرفها واندل مكانها ألا اخليها تعظ أصابعها ندم على سوايتها أندمها وافضحها وانعل ابوها لابو اليطلعلها
بهاء،،، باهر مو هيج الكلام اسكت ولتسويلنا سالفه ولتنسى مكانة سراج ماكو داعي للفضايح لتخلينه نصير علچ بحلك اليسوى والمايسوى من ورا وحده مثل هاي
لمياء،،، كلام بهاء صح الناس اذا عرفت نصير مضحكه والشماته تصير بفلس الكل راح يكول الشيخ سراج ضحكت علي بنيه مرتين وغدرته،،، احسن مندور سيلين وسوالف سيلين هسه الأهم نكدر نطلع سراج من ألي بي
باهر،،، شكو قابل،، هسه يصحى ومن باچر ينسى وأزوجه اغاتها
لمياء،،، ياريت بس الموضوع موبهل سهوله ترا انتو متدرون شي ترا سراج واصل لمرحله صعبه بحبه لسيلين صار مهوووس بيها
بهاء،،، واضح هل الشي والدليل هاي حالته
باهر،،، والحل؟
لمياء،، الحل سووا نفسكم متعرفون وسَكتوا الكل لأن سراج كل شي ولا سمعته ومكانته يخسرها هي فتره وتعدي وأكيد أحنا راح نساعده حتى يتخطى ولو خايفه
بهاء،،، من شنو خايفه قبل صار نفس الشي وعدت وهل مره هم راح يتخطى
لمياء،،، صدكني هل مره تختلف والمشكله سراج هم صار شخص يختلف عن قبل خايفه هل مره يسويله سالفه
باهر،،، طبها مرض شيسوي خلي يسوي
لمياء،،، واذا تحول الى سراج قبل كم سنه
بهاء،،، الله ليكولها،،، بوقتها أنجبر يوسخ ايده بس هل مره....
لمياء،،، هل مره الموضوع اصعب واعمق اذا قبل علمود كرامته والغدروا وأذوا لوث ايده هل مره الموضوع يخص گلبه ألي انكسر كسره ماراح تتصلح هل مره راح ينتقم لگلبه وروحه وحياته ولكبريائه وكل شي ،، راح ينتقم لسراج وكل ذره تحطمت من سراج بسبب هل حب
سكت الكل وملامح الخوف انرسمت على الوجوه كلنا أنخاف من غضب سراج لأن سراج يسكت ويكتم ويتحمل لكن اذا غضب ينفجر ويتحول الى شخص سيء مخيف ماكو شخص يتوقع ردات فعله ولا يتوقع خططه الشيطانيه اي مع الأسف هاي الحقيقه الأحجي عنه حاليا هو سراج الرجل الهادء الرزن المثقف والنبيل والمحترم الشخصيته تجبر الكل يحترمه هل شخص نفسه الحياة طلعت من داخله شيطان يحرق الأخضر واليابس وهل شي يصير من يحقد
ضلينه ننتضر الى ان إجه الدكتور النصحونه بي عاينه وسواله فحوصات كامله
بهاء،،، ها دكتور بشر؟
الدكتور،،، كل اعراضه اعراض چلطه لكن هيَ مو چلطه
باهر،،، لعد شنو بي؟
الدكتور،،، قبل لااجاوبكم اريد أسال هو قبل ليصير هل شي بي تعرض لصدمه او انقهر او فقد شخص عزيزه عليه؟
باهر،،، اي حبيبته ضربته بوري وتزوجت
بهاء،،، باااااااااااهرررر!!!
باهر،،، شبيكم قابل چذب خلي نصير صريحين ويا الدكتور حتى هو هم يجاوبنه بصراحه
الدكتور،،، هههه،،، انتَ كلش صريح بس صدك هل كلام؟
بهاء،،، هو يعني موهيج الموضوع بس تقريبا
باهر،، عوفك منه دكتور اني مااجمل الكلام احجي مثل ماهوَ لاتقريبا ولا شي هو هذا الموضوع الحقيقي
الدكتور،،، تمام،،، النتيجه الضاهر المريض متعمق بمشاعره
باهر،،، كلللللللش،،، ولو هيَ متستاهل
بهاء،،، وتالي وياك
الدكتور،،، مع الآسف المريض متعرض لصدمه نفسيه والضاهر ماتقبل فكرة الفقد وگلبه ماتحمل هل شي ولهذا انكسر
باهر،،، دكتور رحمه لوالديك شفتهمنه من كلامك اخويه و صل للموت حتى گلبه وكف وتكلي صدمه نفسيه وگلبه انكسر
الدكتور،،، هاي الحقيقه اخوكم مصاب بمتلازمة القلب المنكسر
باهر،،، عود هاي صدك؟؟!!
الدكتور،،، اي هاي حقيقه تعرض لضغط مشاعر قويه على قلبه ماتحمل قلبه فكرت خسارة شخص عزيز عليه وگلبه انكسر بالمعنى العامي،، واعراض هل مرض مثل اعراض الچلطه بالضبط
بهاء،،، الحمد الله هاي ولا الچلطه سهله سالفته ان شاء الله
باهر،،، خبلنه صار يومين عبالنه بي شي طلع گلبه منكسر،، هسه صمغ اميري ونلزگه
الدكتور،،،مع الأسف السالفه موبهل سهوله الچلطه نعالجها اوحتى نسوي تدخل جراحي لكن هل موضوع اصعب لأن مرتبط بنفسية المريض وتقبله للشفاء بأختصار لازم هو يقرر يتخطى الصار ويا والصدمه ألي تعرضلها حتى تتحسن صحته واذا ماصار هل شي وضل رافض انو يتخطى راح يتأذى هواي
بهاء،،،هل المرض الى اي مدى ممكن يضره؟
الدكتور،،، في حالات نادره وعدم استجابة المريض تؤدي الى الوفاة
لمياء،،، شهكت مفزوعه.... معقوله؟
الدكتور،،، اي معقوله ونص اني ألي عليه راح اسوي وانتو ألي عليكم تساعدون اخوكم بكل الطرق حتى يتخطى الصار ويا وهو ماشاء الله مبين علي شخص قوي وبنية جسده قويه بس الضاهر الصدمه كانت قويه علي
لمياء،، اي دكتور كلش انصدم وخصوصا هو كلش متعلق،، بس عفيه هل شي خلو بينا مااريد يوصله هل كلام لأن سراج ميحب احد يعرف اسراره هو شخص كتوم
الدكتور،،، تفكيرج صح الأهم لتبينوله ولاتفتحون هل الموضوع حاولو تنسوا حتى يخف الضغط النفسي الصاير على گلبه
باهر،،، يعني وگلبه المنگسر شلون راح تلزگو؟
الدكتور،،، اكيد ماراح نلزگه هو بمرور الوقت يتشافى
بهاء،،، عوفه دكتور هذا أسألته متخلص هسه بشرنا حالته شلونها ماتحسنت؟
الدكتور،،، تتحسن ان شاء الله بالعلاج والراحه النفسيه والجسديه يتحسن لكن هل شي ميمنع انو ترجع تتكرر ويا هل حاله هي من أسمها متلازمه يعني تضل مُلازمه للشخص المصاب بيها وأحتمال رجوعها أله كلش وارد وخطر تكرارها
لمياء،، صح دكتور هيَ قبل ١٠ سنوات صارت ويا نفس الحاله بس أخف ومشا الموضوع وماعرفنه شنو مرضه الحقيقي
الدكتور،،، يعني هاي مو اول مره وهل شي خطر؟
بهاء،،، بهيج حاله شنسوي؟
الدكتور،،، المفروض دائما يهتم لنفسيته ويبتعد عن الضغط النفسي الحزن الشديد والصدمات
باهر،،، دكتور يرحم والديك أحنا بالعراق عايشين ونتغذى على الضغوطات النفسيه،، الطفل يطلع من بطن امه عاگد حاجبه وحزين وفوكاها اخويه شيخ عشيرتنه ومحامي وكل شي بحياتنه بي ضغط نفسي
الدكتور،،، مااعرف شنو اكلك المفروض تشوفون شنو أكثر شي يوصله لهل مرحله من الضغط وتبعدوا عنه
باهر،،، هي وحده ماكو غيرها دمرته وألا اخويه قوي وميهزه شي اشكال مر على راسه وواجه كل شي بقوه ماكو احد كدر علي ولاهزه بس هل*** اخ من لساني
الدكتور،،، اذا تعرفون اسباب الضغط أبعدوا عنها،،، سلامته ومعافى ان شاء الله
لمياء،،، راح الدكتور وأحنا ضلينا واحد صافن بوجه الثاني مستغربين كلام الدكتور قطعت الصمت من كلت...
_ اگلكم اني اول مره اسمع بهل مرض
بهاء،،، ليش ماسامعين من واحد ينقهر على شخص يكول كسر گلبي او فطر گلبي الضاهر هل كلام حقيقه مو خرافه ولامجرد كلام،، الحزن الزايد طلع صدك يفطر الگلب،،، هسه عرفنه ليش اكو هواي اشخاص يموتون فجئه من الحزن والأطباء يشخصون نوبه قلبيه إذاً هو هذا السبب الحقيقي بس موكل الأطباء تعرف تشخص صح
لمياء،،، الحزن گتال صاحبه دائما اسمعهه
باهر،،، هاي تاليتك شيخ گلبك ينفطر من ورا مره انتَ زلم مشوربه الناس تحسبلها ألف حساب حدتهم حود بفرت أيدك وزوعتهم العافيه تاليها مره توگعك هل وگعه؟ خرب حضك
بهاء،،، اي ماوصيك احجي هل كلام كدامه حتى يموت رسمي هو ميحجيلنه اي شي لأن كبريائه يمنعه حتى حزنه ميعبر عنه يكتمه بداخله،،، طول عمره يحب يبين للناس بس قوته ميريد احد يشوفه ضعيف ولا يعرف نقطة ضعفه
باهر،،، أطمئن الكره الأرضيه كلها عرفت هاي بت*** أستغفر الله الأسمها سيلين كلها عرفت هيَ نقطة ضعفه
لمياء،،، بعد ساعات صحى والغريب كأنما ماصار شي وضعه جدا طبيعي لكن رجع بالليل انتكس وهنا عرف الدكتور انو هو ديمثل القوه
باهر رجع للبيت مدخل الكل انذار وأولهم نوال لاعب بيها طوبه مخليها تكول للكل اني كذابه بأختصار انغلق موضوع سبب مرض سراج ضاهريا لأن الكل يعرف الحقيقه لكن انجبروا يسكتون
ثاني يوم قرر سراج يطلع من المستشفى رغم الدكتور رفض لكن هو اصر وضحله الدكتور حالته ولازم يسيطر على عواطفه حتى لترجع تتكرر هل حاله وفهمه مدى خطورة الصار ويا
رجعنا البيت والكل موجود وذبحوا الذبايح على سلامته ضل طول الوقت يمثل القوه واني اعرفه من نضرت عينه بداخله غير شي اعرف من الداخل متحطم
صعبه الأنسان ينغدر من الشخص الحبه ويعشقه ومومره مرتين بللّه بالأولى بيها مجال ونكول حقها لأن احنا هم السبب بس المره الثانيه ماكو مبرر للسوته
اول شي سوا من دخل البيت طلب يشوف بناته حضنهن كأنما كان مسافر ورجع والغريب سيلين حضنته تبچي وتكله...
سيلينه،،، بابا خفت تموت وتعوفني وماما تموتي من انتَ تموت
هل كلام هز سراج حضنها خايف عليها وحسيت صحى من الجاي يمر بي حضنها وأحسه ميريد يفارقها
مرت الأيام،، ضاهريا سراج زين وضعه لكن للان شكله تعبان ويكابر وهل شي واضح لأن فجئه يلزم مكان گلبه متألم وهل شي هواي تكرر بس ميبين لأحد هل شي،،، بالليل اشوفه برا كاعد وحده ويدخن بشراهه و يسرح ويفكر
افرح من اشوفه تحسن لكن بنفس الوقت خايفه لأن اعرف هذا الهدوء بعده عاصفه راح تحرگ الأخضر واليابس وفعلا هذا الصار
______
سيلين،،، طلع سراج من البيت دخلت لغرفتي وأني احس نفسي تايهه وضايعه مااعرف شنو اتصرف ولااعرف شنو اريد
الغضب عاميني وشعور الرغبه بالأنتقام مسيطره عليه كل ماأقرر وأكول خلص وانتهى هل موضوع انجبر ارجع أله
صار الوقت تنتهي قصتنه بطريقه اني احددها طريقه تشفي غليلي وحقدي وعذاب سنيني راح اعيشه نفس العيشنيا،، راح اخلي يعيش شعوري ألي عشته قبل
قبل كم يوم زاروني للبيت داليا وأُمها وسردار طلبنوني للزواج بشكل رسمي رفضت لأن لاغيه موضوع الزواج لكن اصروا انطي لنفسي وقت افكر بي خجلت اردهم وكلت اسبوع وارجعلهم الرفض
بعد الصار اليوم تغير تفكيري اني أول وتالي لابد يجي يوم أرتبط بشخص وماراح ألكي احسن من سردار خصوصا هو شخص مرتب ومثقف ومن عائله معروفه و قوي وعنده نفوذ واكيد هل شي راح يوكف سراج عند حده هو وأي شخص يتجرء يوصل يمي
حسمت قراري وأتصلت بداليا بلغتها بموافقتي فرحت وفهمتني هذا أحسن قرار وفعلا سردار عريس مينرفض وفرصه ماأضن تتكرر
بقى بس موضوع اهلي لازم ابلغهم وأقنعهم بأي طريقه
غيرت ملابسي ورحتلهم محمله بالهدايا بالبدايه امي ضاجت من شافتني بس من بلشت ادخل أكياس الهدايا لمعت عينها،، طلعت مبلغ مرتب وخليته بأيدها وكلتلها دبرت فلوس ودفعت دين ثامر لهذا ماكو داعي بعد ابيع البيت الكاعدين أنتوا بي طارت من الفرح
بلغتها اكو شخص متقدملي وهل شخص غني وعنده نفوذ وقادر يغير حياتي وحياتهم ويايا
هيَ اهم شي عدها الفلوس كدرت اقنعها ووافقت واعتمدت عليها تقنع شاكر بهل موضوع وفعلا نفس اليوم بالليل اتصلت بيَ تبلغني قنعته ووافق
اتواصلت ويا سردار وأتفقنه على كل شي وأولهم ابني،،، كل شي مشى بسهوله وحددنه يوم المشيه قررت اسوي الخطوبه ببيت المزرعه حتى سراج ميعرف ولا يخربها
رحت لمركز تجميل سويت اللازم لكل عروس واختاريت بدله بسيطه باللون الأبيض لأن هو بس عقد وأختاريت وحده ثانيه باللون الفيروزي
اتفقت ويا كادر لتنضيم المناسباب نضمولي وزينو المكان كل شي صار حلو سبحان الله ماشفت اسهل من هل الخطوبه يمكن فعلا هل مره هذا الأختيار الصح كل شي صار من دون لا عُقد ولاصعوبه
بدت مراسم الحفله حضرها اشخاص قليلين من عدنا وأعداد اكبر من اهل سردار بدت الحفله طلبت من سميه تصورني كنت متحمسه لكل خطوه دااخطيها لكن من صارت صدك وبلش العقد گلبي أنقبض خفت وترددت الى درجة الشيخ كرر سؤاله ألي اكثر من ثلاث مرات ومامنتبهه
جسمي صار يرجف تقدمت داليا تهدئني هي وضحى وساره وامي،،، بهل لحضه ماأجى أبالي غير سراج ليش مااعرف
رجع الشيخ كرر كلامه هنا قويت نفسي وأنطيت الموافقه صارت الهلاهل والمباركات من بعد موافقة سردار وهنا صرت زوجة سردار الشخص ألي قبل فتره قصيره تعرفت علي وكل شي مااعرف عنه غير بس اشياء عامه
ماكنت اعرف اذا هل الخطوه الخطيتها صح او غلط بس اعرف ماضل عندي شي اخسره اذا طلع زين فيكون اخيرا لكيت الشخص المناسب ألي واذا وضعه ماعجبني انفصل عنه سيلين تغيرت وقراراتها وحياتها صارت بأيدها وهي تحدد مسارها
دخل بعدها سردار لبسني الذهب والحلقه كان واضح علي جدا فرحان لكن ليش اني ماموجود بداخلي هل الشعور مااعرف؟
كنت كل شي اسوي تمثيل حتى اجاري الوضع اخذتني سميه وضحى حتى اغير البدله استغليتها فرصه صار وقت أرجع حقي وأعيشه لسراج شعوري الحسيت بي قبل
قررت أرسل فديو مراسم العقد لسراج صار تردد بداخلي وخوف غريب تجاهلت هل المشاعر وقويت نفسي وأرسلته دقائق وأتصل كرر إتصاله كذا مره مارديت عليه
صرت اتخيل شنو حاله هسه اكيد مامصدك الشافه
عفت الجهاز يرن بأتصالاته وأني غيرت ملابسي ورتبت المكياج وقبل لا أطلع من الغرفه ارسلت مسج أله
( باركلي اليوم زواجي من الأنسان الصح ألي احبه ويحبني صدك مو امثل علي ويمثل عليه الشخص اليستحقني وأستحقه وأنت استحقاقك بنت عمتك وزايد عليك ،،،،صعب احساس الغدر موو؟؟؟)
ارسلتها ومن تأكدت وصلت وشافها غلقت الجهاز وطلعت اكمل باقي الحفله
استمرت الحفله ساعات بعد ماانتهت كل واحد رجع لبيته واني بقيت بالمزرعه لأن اكيد سراج راح يروح لبيتي مااريد اتواجهه ويا لهنا وكلمن يشوف طريقه
كررت هل كلام ويا نفسي أقنع نفسي بي حتى اهدء لأن الحقيقه مختلفه اني لامرتاحه ولاسعيده وبالعكس متوتره وشعور الخوف مسيطر عليه وگلبي مقبوض والأغرب افكر بسراج شنو ردت فعله اكيد ضاج او أتأثر اويمكن،،، تأذى،، لا،، لا أكيد ماتأذى قابل شكو؟؟
بديت أوعى على حجم خطأي،،، أني ليش ماحسبت حساب يمكن الموضوع يطلع من مجرد يصير عنده غضب او احباط او احساس بالهزيمه والغدر ليش مافكرت ممكن هاي المشاعر كلها يحس بيها و على أثرها يصير بي شي
الأنتقام عماني والحقد سيطر عليه ونساني أنسانيتي ونساني بنات سراج شيصير بيهن لو هو صارله شي
ضليت بس افكر وأقنع نفسي وأكول سراج قوي وأكيد ميصير شي مجرد ينقهر كم يوم وبعدها ينسى
صرت ألوب ليش مااعرف شنو أسوي وألمن أسال ماادري وليش هيج خايفه علي هم ماادري
بيومها الليل كله مانمت گلبي يوجعني ومخنوگه ضميري أنبني بس بعد فوات الأوان دعيت ربي يمر هل موضوع بدون ضرر لسراج شكد تأذيت بسببه بس مااريده يتأذى كل السويته ردت بس يحس بشعور الخذلان العيَشه ألي وبس ماردت شي ثاني
صار الصبح وأني ألوب ومااعرف على منو اتصل وأسأل علي،، أنتضرت للعصر وأتصلت على اسماء بلكي تعرف عنه شي لان هسه هو أكيد بالمكتب اعرف اليوم عنده اجتماع علمود قضيه مستلمها مهمه اتصلت بيها وبعد السلام سألتها
_ شكو،، ماكو الزملاء ألي بالمكتب شلونهم؟
اسماء،،،احنا زينين بس لوتدرين شنو الصار بأستاذ سراج
سيلين،،، وكفت مفزوعه وجسمي كله رجف اريد أسأل مااكدر
اسماء،،، انتي ويايا؟
سيلين،،، شصار؟
اسماء،،، سمعنا صاير بي نوبه قلبيه ووضعه كلش حرج وبالعنايه من البارحه بالليل واصل مرحلة متوقف گلبه ومسويله صدمات
سيلين،،، صدمه،،، صدمه،، بل كارثه،، ماكدرت استوعب السمعته جاوبتها بصوت مهزوز
_لا،،، لا،،، اكيد هل خبر كذب ليش يصير بي هيج بعده شاب وصحته زينه وماعنده امراض؟
اسماء،،، ياريت هل شي بس مع الأسف هاي الحقيقه لآن أكثر ألي بالمكتب راحوا يشوفوا بس ماكدروا لآن بعده للأن بالعنايه وماتحسن
سيلين،،، تحجي اسماء واني بعد مااكدر اسمع اي شي دماغي فصل
أني شنو سويت؟ شلون مافكرت ممكن يصير هيج بي؟ شلون خليت حقدي يوصلني أئذي الأنسان الوحيد الي حبيته بحياتي وأذا مات شسوي؟ لاأسم الله أن شاء الله ميصيرله شي
أسماء،،،سيلين تسمعيني؟
سيلين،،شلونه هسه؟ شيكولون؟ ماتحسن؟
أسماء،،، قبل شويه سألنه عنه يكولون بعده على حاله وأهله وگرايبه كلها مستنفره بالمستشفى وخايفين علي
سيلين،،، عفيه أسماء اي شي يصير بلغيني
أسماء،،، ان شاء الله هو كلنا بالنه يمه حتى اليوم شغل ماأشتغلنه
سيلين،،،نهيت الإتصال نار صارت بداخلي ضليت ألوم بنفسي بس شيفيد اللوم بعد معقوله لهل درجه حبني واني استهانيت بمشاعره؟ والله كلي كال بالإخير راح يصير موتي على أيدج بس ماصدكته وأستهانيت بي وبكلامه،،، ياربي دخيل أسمك لتفجعني وتفجع بناته بي
جسمي كله صار يرجف خايفه علي و كل شويه أقرر اروحله للمستشفى وأبطل بأي وجه اشوفه وأني وصلته لهنا
ضليت النهار كله ألوب ما أكدر لاآكل ولااشرب ولارديت على اتصالات سردار
رجعت إتصلت بأسماء كالت.. وضعه وگلبه تعبان زاد قلقي أنهاريت وشطت وتعبت وأعصابي تلفت كل شويه اقرر اروحله أوصل للباب وأرجع أعرف اذا شافني يتأذى أكثر
توضيت وفرشت سجادتي أدعيله ياربي شنو هل التناقض ألي بداخلي كل شي سويت حتى أئذي وهسه راح اموت عليه من الخوف بچيت الى درجة حسيت گلبي راح يتوقف وصار عندي صداع قوي الى درجة اريد اضرب راسي بأي شي حتى يهدء ضليت ألوب من الوجع الى ان غفيت على سجادتي
بعد وقت صحيت لكيت نفسي بالمستشفى سردار موجود وامي وشاكر اريد انطق كلمه ماكدرت منتهيه الى درجة حتى صوتي راح القلق كان واضح على ملامح سردار وحتى اهلي رجعت غمضت عيني اتلافى نضراتهم المليانه علامات استفهام اكيد مستغربين حالتي
شويه ودخل الدكتور طلع ضغطي كلش مرتفع وطلب مني الدكتور أراجع علمود هل موضوع لأن شاك صار عندي ضغط مزمن ماأهتميت لكلامه لأن اعرف الصار بيَ من سمعت بالصار بسراج
بعد ماإطمئنوا عليه خرجوني أحس كل شي طفى بعيني الحياة كلها بعد متعنيلي شي
أذيتَه وتأذيت علي،،،أدري هسه بالشي السويته شنو حصلت؟
أول ما رجعت للبيت اتصلت على اسماء وماكان عدها أخبار جديده عنه
الصداع ضل ملازمني وكان شعور بداخلي كأنما خسرت روحي اي هاي الحقيقه ألي صار لازم أعترف بيها لنفسي،، سراج مهم عندي ولايوم نسيت حبه مثلت حتى على نفسي انو اني نسيته لكن الحقيقه مختلفه
ضل شريط حياتي يفتر براسي كل لحضه عشتها ويا وكل نضره وكلمة حب سمعتها منه ليش هل شي صار ويانا ليش اذاني وليش وصلته للموت ماكان اكو جواب لأي شي لأن اساسا انتهى كل شي بس شي واحد أتمنى حاليا يكوم بسلامه ويصير زين
سمعت صحته شويه تحسنت طرت من الفرح قدمت صدقات لوجه الله تعالى على سلامته اهم شي صار زين ورجع لبناته بخير كل شي ماأريد بعد
أرتاحيت بعد ماأطمئنيت علي بس أني هسه يله بينت عليه ولإن ضليت بلا أكل وكل ماانام احلم بي يعاتبني على السويته بي وافز مفزوعه
هل شي تعبني ومرضني أسبوعين وإني طريحة الفراش وضغطي مرتفع
ورا اسبوعين شويه أتحسنت ومن شفت نفسي بالمرايه انصدمت هذي موسيلين وحده ثانيه شكلي كلش تعبان ووزني نازل جسمي صاير هزيل
أتصل سردار يريد يجي يشوفني مو وقته نهائيا رتبت نفسي من وصل أستقبلته سلمت علي وصدمني من تقرب باس خدي و حضني
سردار،،، حبيبتي الحمد الله من شفتج بخير
سيلين،،، ارتبكت مااستوعبت احضن شخص ثاني غير سراج مع انو هل شخص حلالي وعادي هل شي لكن بالحقيقه من اول يوم عرفت سراج مااتقبلت اي رجل غيره ابتعدت بسرعه استغرب ردت فعلي
سردار،،، بيج شي؟
سيلين،،، هاا،، لا،، بس يعني
سردار،،، ههه،،، بعدج تخجلين مني؟ حقج راح اسامحج هل مره لكن لازم تتعودين عليه لأن قررت بس تتحسنين نحدد موعد عرسنه
سيلين،،، فزيت من كلامه،،، عرسنه،،، اي عرس؟؟
سردار،،، عرسنه أني وإنتي
سيلين،،، الصار ويا سراج وعاني وغير كل أفكاري أحس جنت بغير عالم وصحيت على نفسي وهسه يله أنتبهت لتسرعي وقراراتي الغلط وألي أتخذتها بلحضة تهور وتسرع وماكانت مدروسه
سردار موالشخص المناسب ألي والحقيقه صرت متإكده ماأكدر إتقبل أي رجل بحياتي من بعد سراج صح أنتهينا أني ويا بس سيلين تبقى أسيرة مشاعرها لسراج طول العمر
قررت انهي كل شي ويا سردار بهل لحضه وكل واحد يروح بطريقه
_سردار اني مااكدر....
قاطعني....
سردار،،، اسف اعرف مووقت هل كلام بعدج تعبانه ولو للان مااعرف شنو الصاير وياج وليش هيج حالتج لكن حاليا خلينا نأجل كل شي المهم صحتج
سيلين،،، ماعرفت شلون افتح الموضوع صرت اخاف من ردات فعل المقابل اخاف رفضي يأذي اعرف هل شي مبالغه بس بوقتها فعلا صرت جبانه وعندي خوف ورهبه من كل شي عقلي موبمكانه تايهه احس بالضياع وكأنما بدوامه اوحلم عشت اشياء مااكدر اوصفها لكن بنفس الوقت مااريد اخلي يتأمل شي ماراح يصير لهذا جاوبته..
_سردار انتَ شخص زين وحلم هواي بنات واني كلش اعزك واحترمك
سردار،،، اعرف نفسي حلم البنات ههههه
سيلين،،، ويا نفسي استغفر الله..... شوف سردار من الآخر أحنا استعجلنه بموضوع الخطوبه اني احس نفسي للان مامتهيئه لموضوع الزواج
سردار،،، عادي نأجله كتلج تتحسنين يله نتزوج
سيلين،،، مو الموعد ألي مااريده الزواج كله اريد ألغي مااريد اتزوج لامنك ولامن غيرك
سردار،،، شنوووو؟؟ انتي شتحجين هي لعبه يوم موافقه ويوم لا؟
سيلين،،، اعرف هل شي غلط وحقك بس موبيدي اني تعبانه ومامتقبله ولامتهيئه اتزوج
سردار،،، حبي ادري بيج تعبانه ومريضه هسه واعصابج تعبانه خلي نأجل هل موضوع بعدين
سيلين،،، بس اني اريد ينتهي هسه
سردار،،، ترا هي مولعبه كتلج اعصابج تعبانه خلي نأجل الموضوع بعدين من تهدئين اعرف من تهدئين راح تندمين على هذا كلامج صدكيني اني فرصه مااتعوض اعيشج سعاده بحياتج ماشفتيها
سيلين،،، سردار اني اريد...
سردار،،، لتكملين كتلج موضوع الأنفصال شي ماراح يصير ارتاحي ونحجي بهل الموضوع يله اني عندي شغل اذا احتاجيتي شي خابريني،،،يله سلام
سيلين،،، ماانطاني حتى مجال افهمه اني اريد انهي الخطوبه
بعدني واكفه دخل سيف جاي من الدوام من شافني ابتسم وركض عليه ملهوف حضني بادلته الحضن صار فتره بسبب مرضي مبتعده حتى عن ابني
كل هل فتره توقعت سراج من طلع من المستشفى يجيني ويعاتبتي ويسألني
يصرخ ويهدد اي شي يسوي لكن ماصار هل شي
بعد ماتركت العمل بالمكتب ضليت طول الوقت بالبيت وحتى أوقف التفكير أقضي وقتي بالنوم
ثاني يوم صار الضهر وأني نايمه صحيت على صوت سميه تتكلم ويايا والخوف واضح بصوتها حاولت اصحصح حتى افهم منها
سميه،،، سيف للان ماأجا وصار ساعه انتهى دوامه المفروض
سيلين،،، طفرت من فراشي مفزوعه وجسمي كله يرجف
_وين راح ليش مااجا؟ زين اتصلتي على ابو الخط؟
سميه،،، اتصلت ميرد
سيلين،،، اكيد صاير شي وألا ليش ميرد
اخذت جهازي واتصلت على ابو الخط عدت مرات يله جاوب وكان واضح انو مرتبك سألته عن سيف وجوابه اكد مخاوفنه
_مااعرف شنو اكلج ام سيف بس سيف ماكو مفقود اجيت اخذه من المدرسه ضليت انتضر ماطلع دخلت للمدرسه سألت وتأكدنا من الكامرات طالع من المدرسه وبعدها اختفى وين منعرف وهسه الكل هنا جاي ندور علي
سيلين،،، انتَ شتحجييييييي؟؟!! شنوووو بهل بساطه تكلي ابني مفقود ويييييين راح،،، وشلون صار هل شي وليش مااتصلت عليه؟؟؟
_ اهدي ام سيف ان شاء الله ماكو شي موهذيج المره كلتوا هم أختفى و طلعت عمته ماخذته يجوز هل مره هم
سيلين،،، انتَ تحجي صدك؟؟ شنو عمته؟ وشنو هل برود؟
سديت التلفون بوجهه وغيرت ملابسي بسرعه ورحت للمدرسه استقبلني ابو الخط بالباب متوتر ردت ادخل للمدرسه منعني وكلي كلهم طلعوا
مر وقت وأبني ماكو وهنا تأكدت فعلا ابني مفقود ما استوعب اختفائه ولا حتى كدرت افكر قررت اروح على اخت ثامر اكيد يمها صعدت السياره ورغم جسمي التعبان والمنهار لكن خوفي على ابني اكبر من كل شي بعدني ماحركت وأجاني اتصال من رقم غريب بسرعه رديت سمعت صوت شخص غريب
_ انتي ام سيف؟
_ اي اني،،، تفضل
_ سيف يمنا
_ شنووو،، صدك،،، وينه أنطينيا،،، ولا اكلك انتو وين حتى اجي
_ هذا احجي ويا
_ مامي
_ ها حبيبي،، شبيك؟ انت زين؟
_ زين
_ وين انتَ؟
_ تعالي اخذيني
_وينك؟ اختفى صوته وسمعت صوت الشخص كتله،،،شبي ابني الله يخليك احجي شبي؟
_ مابي شي لتخافين،، ابو الخط متأخر علي وهو راجع مشي ومتيه الطريق شافه صديقه واني ابو صديقه وهسه هو يمنا
__ الله عليك ابني مابي شي؟
_ اختي والله مابي شي لتخافين بس هو خاف خطيه تعالي وتأكدي بنفسج واخذي اني لو اندل بيتكم جان اني جبته بس هو ميندل
_ اشكرك اخويه رحم الله والديك انطيني عنوانك حتى اجي
اخذت عنوانه ونهيت المكالمه وقفني صوت ابو الخط يسألني..
_ ها يابه لكيتي؟
_ اي لأن انتَ متأخر علي رايح ويا صديقه لبيتهم
_ اعتذر صدكيني موبيدي سيارتي عطلت وتأخرت المهم هو زين ولكيتي؟
_اي بس اتمنى هل شي ميتكرر لأن اذا تكرر مضطره استغني عن خدماتك
_ لا ابد صدكيني اخر مره،،، زين هسه راح تروحيله؟
_اي
_ وحدج لو احد وياج؟
_ليش هل سؤال؟
_لا قصدي اذا تريدين اجي وياج
_ لاشكرا اني اروح وحدي
عفته وتوجهت للعنوان
وصلت طرقت الباب طلعت بنيه بس شكلها ابد مو راحه سلمت عليها
- هلا حبي
_ آسفه على الازعاج،،، اني ام سيف ممكن تصيحيليا
_ تفضلي جوا
_ لاشكرا مستعجله صيحيليا حتى نروح
_ ميكدر يطلع الطفل من الخوف سواها على نفسه وكاعد من الخجل بس يبچي
_ دماغي التعبان وخوفي على ابني خلاني اتصرف بغباء دخلت بسرعه لكيت بنات اشكالهن مخربطه موراحه نهائيا واضح وضوح الشمس بنات ليل شكلهن خوفني لكن تضاهرت بالقوه وسألت
_ وين ابني؟
جاوبتني وحده
_ بالغرفه هنا فوتي شوفي
_ صيحيليا كوليله امك اجت
_ شبيج حبي فوتي انتي شوفي للولد دنكلج الطفل موسخ نفسه ويخجل اخذي للحمام غسليله وأنطيج هدوم من ابني بدليله خطيه شصاير بي كتله أغسلك ماقبل يستحي مني
_ كلامها طمني دخلت وياريت ماسويتها اول مافتت انغلقت الباب ضربت على الباب مفزوعه حتى يفتحوها بس ماكو رد وانفزعت اكثر من سمعت صوت بالغرفه انداريت شفت واحد يلعب النفس مليان وشوم وشكله يخوف
_ شلونج ياحلوه خوش طيره جايبيلي اليوم
_ شنووو؟ ا انتَ فاهم غلط اني جايه هنا اخذ ابني
_ ههه هها ههها هههاي ضحكتيني اصيرلج بيبي تعالي لوليلي ولا تضوجين
_ انقرفت منه ومن كلامه ضربت على الباب بس ماكو احد يرد سحبني بقوه دفعته رغم ضعف قوتي لكن مااستسلمت نهائيا ضليت ادافع عن نفسي ثواني وحسيت اجا الفرج من سمعت صوت سيارات دوريات الشرطه ابتسمت متفائله ضربني
_ بنت الكلب هاي شديصير هنا،، مسويلي كمين اليوم أنع*ل والديكم
سيلين،،، ضرب الباب حتى يفتحوها ومافتحوها اباوعله مبتسمه راح اخلص والأكيد هل شخص راح يتورط هو وكل شخص بهل بيت وبعدها اخذ ابني واطلع
هاي كانت امالي لكن الحقيقه مختلفه وكل امالي راحت من انفتحت الباب ودخلو الشرطه بلشت احجيلهم سكتوني ماأنطوني مجال وجرجروني حالي حال الباقين وكأنما مجرمه حاولت افهمهم ماكو واحد بيهم يسمعني
طلعونه خارج البيت وصعدونا بالسيارات انهاريت هاي شديصير
عطت بيهم اني المحاميه سيلين ماجد شلون هيج تتعاملون ويايا استهزئوا بيه واخذوني للمركز دخلوني للتوقيف واني بحالة صدمه مامستوعبه كل الصار
اباوع شنو هل المكان والاغرب الموجودين بي بنات يلعبن النفس سيماهم في وجوههم واضح هنَ شنو يباوعن عليه من فوق لتحت ضليت اصيح طلعوني الكل عاط بيَ حتى اسكت
مر وقت واخذوني للأستجواب وانصدمت من عرفت اني كنت ببيت دعاره
انهاريت من جهه ابني مااعرف مصيره ومن جهه السالفه ألي اجتني
شرحت كل شي صار والضابط اتفهم وضعي خصوصا من عرف اني محاميه وزوجة مدعي عام واصلا كلي شكلج ميوحي انتي من هل نوع
طلبت منه اتصل على شخص يجيني وافق هنا قررت اتصل بسردار رد عليه ملهوف لكن من شرحتله الصار ويايا صوته تغير
نهينا الاتصال ورجعت الموبايل للضابط رجعوني للتوقيف انتضرت وقت الى ان طلعوني من دخلت الغرفه شفت شخص اول مره اشوفه عرف عن نفسه انو هو محامي ارسل من قبل سردار
شرحتله كل الصار وصدمني من طلب مني مااذكر اني خطيبة سردار لأن هل شي يضر مكانته والصدمه الثانيه الموضوع مومجرد بيت دعاره ولكن اكو مخدرات هم بالموضوع
الموضوع كبر طلبت من المحامي يتصل بأهلي يبلغهم وطلبت يعرف اخبار ابني
عشت ليله بهل مكان كانت اسوء ايام حياتي ثاني يوم طلعوني رجعت قابلت نفس المحامي وهنا عرفت ابني موجود بالبيت ومابي شي وهل شي يأكد كلامي كذب واني مادخلت هل مكان علمود ابني كل الأدله والشبهات ضدي المحامي كلي بصريح العباره
_وضعج صعب لأن الكل شهد انتي تشتغلين وياهم
صدمه بعد صدمه حياتي انقلبت بين يوم وليله
المحامي واضح من نضراته مامصدكني ولاعاجبه يستلم قضيتي وحتى الضابط بالبدايه تعاطف ويايا وصدكني هسه واضح من نضراته وتصرفاته غير نضرته عني
هنا احس الدنيا كلها غلقت ابوابها بوجهي وضاقت بيَ الارض
استسلمت ل لحضه لكن اتماسكت من تذكرت فؤاد ماألي غير فؤاد توسلت بالضابط رفض بالبدايه ضليت احلفه ووافق
اتصلت على فؤاد مارد كررت هل شي اكثر من مره ونفس الشي ماكو رد ايست من الحياة طلعت من مكتب الضابط مخذوله الضاهر السويته بسراج رجع ألي هاي حوبته
مر وقت واني بنص ناس ماابالغ اذا اكول مقززين شكلهن يخوف ومقزز كاعده ودموعي بعيني وكل شويه وحده تسألني ومااجاوب يفرن ايدهن ويروحن
اخر شي اجوي كالو الضابط طالبج اباوع على الموقوفات يغمزلي عرفت تفكيرهن الوسخ طلعوني وودوني لمكتب الضابط دخلت للمكتب بمجرد انو رفعت راسي شهكت مصدومه!!!!
