رواية اسيرة بين يدي قاتل ابي الفصل الرابع عشر14 بقلم نور آل زيادة
لمياء،،، كعدت من النوم لكيت الكل كاعد قبلي وكاعدين يتريگون الوحيد سراج ماكو سألت
_وين سراج
نوال،،، قبل شويه طلع الشيخ اليوم كاشخ كشخة عريس عبالك ماصدك خلص من اسراء،،،مبين عنده وحده منتضره على السرا
باهر،،،، اصبحنا وأصبح الملك لله،،، شعليج انتي لخاطر محمد؟
لمياء،،، عوفها خلي تطلع ألي بداخلها
نوال،،، قابل مچذبه؟
لمياء،،، لا وين انتي واسراء تچذبن؟ ولا حتى نفس الفصيله؟ بس انصحج نصيحه انتبهي ليصير مصيرج هم نفس مصيرها،، وعود خلي تفيدج اسراء الجاي تدافعين عنها
نوال،،، لااسم الله
باهر،،، الله يسمع كولو آامين
نوال،،، شبيك باهر ترا اني مرتك ام جهالك ليش هيج كارهني؟
باهر،،، من السعاده العايشها وياج كرهت الزواج وكرهت حتى نفسي
نوال،،، اخاف انتَ هم نفس اخوك عندك وحده؟
باهر،،، تدرين خوش فكره
اكلج يمه اني قبل فتره شفت وحده عجبتني تطك بالكاع تخبل شنو رآيج تروحين تخطبيها ألي
ام سراج،،، يمه شنو هل كلام ليش تغث مرتك بهل سوالف،،، عوف شقاك الماسخ
باهر،،، ومنو كلج جاي اغثها لو اتشاقى كلامي صدك اكو وحده عجبتني ودخلت مزاجي حلوه وراقيه ومثقفه
نوال،،،، يبوووو،،، باهر تريد تخوني؟
باهر،،، صحي النوم اكلها راح اخطب تكلي تخوني انتي شاربه نفط لو شنو السالفه
حجيه حكيمه،،،، حرام عليك شمسويتلك لوانتَ هم نفس اخوك ماتخافون الله
باهر،،، شنسوي حجيه تعلمنا من كبارنا شفناهم لايحللون ولايحرمون وبكيفهم يبيعون بالبشر ويشترون
حجيه حكيمه،،، ياماتستحي هاي علينه؟
باهر،،، لا على الجوارين
ام سراج،،، عوف هل الحجي وكوم شوفلك شغله أحسن ماكاعد يمنه
باهر،،،، يمه اني مجاز لو حتى بأجازتي تريدين تطرديني من البيت؟ ليش احس نفسي كاعد على گلبج؟
لمياء،،، اكيد موقصدها بس هذا كلامك مو وقته
باهر،،، هو باهر كل مافتح حلكه وكلتو مو وكته شوكت يجي وكته لخاطر الله موملت روحي من هل بيت وهل عيشه من وراكم راح اطلب لجوء لأسرائيل بلكي يطلعون ارحم منكم
لمياء،،، لتزعل حبيبي باهر ترا نشاقى وياك
باهر،،، اي عفيه همزين طلع شقى تعرفيني مشاعري جياشه ومااتحمل بسرعه آتأثر وانغث،، دروحو مصدكين كلامكم يحرك مشاعري
لمياء،،،كملنا ريوك وكل واحد توجه على شغله ويا الغدا دخل سراج للبيت سلم لكن موسلام عادي نبرت صوته كلها فرح والأبتسامه مزينه وجهّه ولمعه بعيونه تنطق سعاده،،، تفائلت خير اشرتله ابتسملي ابتسامه واسعه
سراج،،، صار الغدا ترا ميت جوع؟
لمياء،،، صاير شويه وأصب
حجيه حكيمه،،، شعجب،،، شعتب؟ صارلك ايام متحط الزاد بفمك اليوم مرتاح وتدور اكل؟
سراج،،، لازم هل شي يزعلج حجيه؟
الحجيه،،، لا ليش ازعل بالعكس اكيف
سراج،،، اي متأكد من هل شي اعرفج شكد تحبينه وتريدين سعادتنه،،،، اني رايح اغير ملابسي وانتو صبوا الغدا
لمياء،،، رحت على العامله طلبت تحضر كل شي وصعدت اشوف سراج طرقت باب غرفته ودخلت شافني وابتسم،،،،،، ها بشر؟
سراج،،،كل خير،،،، سدي الباب وتعالي
لمياء،،، شفتها؟
سراح،،، رحت لبيتها وحجيت وياها وكلتلها حسيتها فرحت بس مابينت اخر شي عرضت عليها الزواج
لمياء،،، ايّ؟
سراج،،، وافقت،،، تصوري بهل سهوله وافقت للان مصدوم توقعت راح تعذبني وتشلع گلبي بس لا وافقت
لمياء،،، حبيبي الله يسعدك ويتمملكم على خير آلف مبروك،،، اتفقت وياها على كل شي؟ شوكت نروح نخطب؟
سراج،،، اتفقنه على كل شي وماعدها غير شروط بسيطه بس طلبت مني اسبوع ترتب وضعها بي وخلال هل اسبوع متريد احد يعرف بموضوعنا
لمياء،،، ليش؟
سراح،،، ماادري النسوان شلون تفكر بس تريد تجهز نفسها وترتب امور حياتها
لمياء،،، وشعلي هل شي؟ وأذا كلت ألنا؟ بالنهايه أحنا هم لازم نرتب وضعنا
سراج،،، اني هم مثلج استغربت بس بعدين من تذكرت الماضي فكرت احتمال تخاف احد يخربها لهذا متريد احد يعرف
لمياء،،، اول وتالي الكل يعرف شلون نروح نخطبها غير ناخذ مشيه؟
سراح،،، قبل لنروح بيوم نبلغ الكل حتى ليصير شي
لمياء،،، على راحتكم وما ألومكم حقكم ،،،،
يله انزل اتغدا
سراج،،، اي والله صدك اليوم نفسي مفتوحه على الآكل
لمياء،، ان شاء الله دوم هل الراحه،،، ابتسملي
نزلنا سوا صبيت غدا كعدنا نتغدا دخل باهر سلم وكعد ويانا
باهر،،، ها شيخ اليوم وجهك منور ان شاء الله دوم
سراج،،،تسلم
باهر،،، خويه وراك سالفه مامرتاحلك؟
سراح،،، كل خير ان شاء الله،،، ياجماعه مادام الكل موجود حاب احجي وياكم بموضوع
بهاء،،، خير خويه؟
سراج،،، اني قررت اخطب
حجيه حكيمه،،، شنوووو؟!! سويتها يا سراج كسرت بخت بت عمتك وتريد تجيب عليها شريچه؟
سراج،،، اولا ماكسرت بخت احد تعرفين وضعي اني وبنت عمتي صار سنين وثانيا منو كال راح اجيب ضره ألها هي حاليا موزوجتي واني رجعت اعزب والراح اتزوجها راح تكون الوحيده على ذمتي
ام بهاء،،، منو هاي وليش هسه يله؟
سراج،،، منو،،، تعرفوها عن قريب وليش لأن هسه يله لكيت ألي تناسبني
حجيه حكيمه،،، وشبيها بت عمتك ماتناسبك؟ تراها نسب وحال ومال واحوال وجمال وعداله ونداره مثل فلگة الگمر
باهر،،،حجيه قصدج مدوره مثل القمر من السمن من الاكل والنوم هاي الصفه الوحيده الممكن تشبهين القمر بيها
وبعدين هاي يانداره تحجين بيها لخاطر الحمزه
وهي لافايده ولانفع وفوكاها اكبر منَ،،، ألي يشوفها عبالك امه
حجيه حكيمه،،، شنو هل الكلام واذا اكبر منَ بخمس سنين شنو يعني رسول الآمه تزوج خديجه وهي اكبر منَ قابل هو احسن من الرسول؟
بهاء،،، حجيه شنو هل تشبيه شجاب اسراء على السيده خديجه هاي المرآه الصالحه القدوه للنساء وكفت ويا الرسول بكل شي بحياته كانت الأم لأولاده والزوجه الصالحه آله وصدقت نبوته ووكفت ويا بشدائده وبذلت حالها ومالها في سبيل الأسلام،،، تقارنين هيج انسانه بأسراء هذا كفر بحقها،،، اسراء دخلت حياة سراج بطريقه غلط وياريت لو مشت صح حتى يتقبلها زادت الغلط بأغلاط أكبر،،،، ماكو اي شخص أله يحق يعتب على سراج بموضوع زواجه
باهر،،، اخونا الچبير العلم كلامك عالراس
حجيه حكيمه،،،خوب انت صاف ويا اخوك حتى بلكت يزوجك
سراج،،، يأشر ومن عين باچر اخطبله
نوال،،، ليش شيخ شسويتلك اني وتريد تزوج رچلي عليه،،، شمسويه؟
سراج،،، لاسلامتج،،، بس متفرقين عن اسراء شي
انعدلي واريد اشوف منو يخلي يتزوج عليج
باهر،،، هاشيخ بعتني؟ شبسرعه؟ وبعدين اني حاط عيني على وحده واريد اخطبها
سراج،،، نعرفها؟
باهر،،، عز المعرفه
ام بهاء،،، هسه انت وكت هل كلام عوف سوالفك الماسخه وخلي نفتهم الشيخ منو يريد يخطب وليش إحنا هسه يله عرفنه؟
سراج،،، امي من يصير الوقت المناسب حتى نتقدملها اكيد انتي اول وحده راح تعرفين منو هيَ
ام بهاء،،، شنو سر؟
سراح،،، لا موسر بس عندي اسبابي الخاصه وياريت تحترمون قراري
حجيه حكيمه،،، هو انتَ ياهو يكدر يناقشك؟ مو اكلك طغيت وتچبرت
باهر،،، حجيه ليش ضايجه؟ خلي نفرح صار هواي ماصاير عدنا عرس وداعتج نعلگها علگ هذا عرس الشيخ سراج
ام بهاء،،، عاد انتَ وين اكو بخبالك ورعونيتك
سراج،،، أُمي شنو هل كلام؟
ام سراج،،، قابل چذب من نزل صار ايام حلكه ماسده بس يلغي بسوالف ماسخه حتى ضغطي رفعه
لمياء،،، الكل سكت سراج بين علي الغضب وباهر صافن بوجه امي اخر شي ترك الأكل وكام
باهر،،، اعتذر يمهّ اذا وجودي مضوچچ ولو هل شي موجديد،،، ولاتزعلين ولاتشيلين بخاطرج من الباچر اگطع اجازتي وأرجع ألتحق حتى تخلصين مني ومن لغوتي الماسخه ولو ترهم بعد ماارجع صدكيني ماارجع بس ماكو مكان ثاني اروحله هنا عائلتي
لمياء،،، كل مره باهر ياخذ كلمات امي الجارحه بالشقى وميبين انزعاجه لكن هل مره حسيته فشل لأن كدام الچناين عافنا و طلع
سراج،،، مره ثانيه من تضوجين من اي تصرف لتطلعين ضوجتج بباهر
ام سراج،،، ماضايجه من شي بس خباله ولغوته مضوجتني ميعرف يسد حلكه فالح بس بالمشاكل
سراج،،، هو هذا باهر من صغير حرك ووكح وميسكت عن حقه شنو الجديد ليش دائما تغثي؟
ام؛ سراج،،، شنو ياشيخ تحاسب امك؟
سراج،،، اكيد لا،،، بس انتي امي ومن واجبي أنبهج والسويتي موصح حتى لو انتي امي مااسكت على الغلط،،،،
الحمد الله،،، بالعافيه عليكم وعاشت الآيادي
لمياء،،، عاف الأكل رغم چان جوعان طلع برا ورا باهر اني هم عفت الأكل ولحكتهم لكيته يسولف ويا
سراج،،، يمعود ليش متعرف سوالف امي لتضوج
باهر،،، مو اول مره تعاملني هيج اعرف نفسي مو الأبن المثالي مثلكم انتَ وبهاء وباقر بس شسوي هذا اني موبيدي الله خلقني هيج
سراج،،، ماكو شخص مثالي بهل حياة كلنا بينا عيوب،،، عوف الزعل وامشي اغديك بأحسن مطعم
باهر،،، انعل ابو الزعل منو كلك زعلان الزعل يوكل يشرب يله امشي
لمياء،،،، هههههههه احلى شي بيك بسرعه تبيع القضيه
باهر،،، ها انتي هم انطردتي؟
لمياء،،، انسدت نفسي من شفتكم كمتوا
سراج،،، لبسي شي فوك ملابسج وامشي ويانا نتغدا
لمياء،،، بالعافيه روحوا انتو وغيروا جو
اصروا عليه ورفضت ردتهم يبقون وحدهم صار فتره طويله ماطالعين سوا وحدهم
دخلت للبيت والتوتر واضح على الكل قرار سراج المفاجىء دوخ الكل هل شي طبيعي بالنسبه لنوال ولجديتي لكن امي ليش توترت مو المفرزض تفرح لسراج؟ أُمنا تحبنا بدون شك لكن تصرفاتها وتفكيرها يخلينه نشك بمشاعرها أحيانا
ثاني يوم شفت سراج رجع اتوتر ومن سألته
سراج،،، من البارحه اتصل بيها مغلق جهازها واني كلتلها فتحي
لمياء،، يجوز نست
سراج،،، مااضن تنسى هيج شي
لمياء،،،لتخلي أبالك هل موضوع
سراج،،، هي كالت حتى نشتاق خلي نبتعد شويه معقوله لهذا بقت جهازها مغلق؟
لمياء،،، ايي بعد شكو،،، طلعت كايلتلك،،، ليش كل شي يخص سيلين تشيل همه؟
سراج،،،سيلين لوعة گلبي حلمي الخسرته وللان احساس الخوف بعده بداخلي
لمياء،،، الشيخ سراج يخاف!! من شوكت؟ وكفت عشيره كامله على تك رچل والناس تحسبلك ألف حساب دخلت الموت برچلك وماخفت خسرنه كل شي ورجعته من عيون الأخذوا وماهزك شي لزمت قضايا ضد روس كبار وهددوك وماهزوا شعره منك،،، شنو تغير؟
سراج،،، كل شخص بهل دنيا الله يرسله شخص يختبره بي ويحسسه بالضعف مهما بلغت قوته حتى يفهمه شكد انت قوي قوتك لاشىء امام الله يفهمنه انت تبقى بشر وضعيف امام شخص عزيز عليك،،، اعترف وهاي حقيقه،، سيلين صارت اكبر نقاط ضعفي وفراقها اكبر مخاوفي صارت غلاتها بغلات بناتي وأعز وانتِ تعرفين بناتي أغلى من روحي
لمياء،،، ارجع واكول هل تعلق غلط ميجوز خصوصا لرجل مثلك كبير عشيرته والناس تعتمد علي وينضرولك نضره خاصه
سراج،،، حاليا ميهمني اي شي ولااي شخص اريد بس ينتهي هل موضوع واغمض عيني افتحها ألكي سيلين صارت زوجتي وبيتي
لمياء،،، ان شاء الله بس انتَ خفف هل توتر ترا الكل صار ينتبهلك ومستغربين لأن هاي موتصرفاتك
ثالث يوم راحلها ورجع كال مالكاها طالعه وبس الحارس موجود المهم اطمئن مابيها شي وجهازها مغلق لأن تريد شويه تبتعد هل شي ريحني هو ارتاح شويه بس القلق والتوتر مافارقه
مر اربع ايام رحت اشتريت ملابس ألي ولأطفالي ولبنات سراج بدينا بالبيت تجهيزات الخطوبه سراج من يشوفنه شلون مخبوصين ونجهز يبتسم فرحان لكن حتى بأبتسامته غصه،،، من اشوف هذا وضعه اضل ادعي هل الآمر يعدي على خير
اليوم سابع يوم من بعد اخر لقاء بين سراج وسيلين وهي للان جهازها مغلق قرر يروح يشوفها كان جدا ملهوف راح ورجع شايط ووجها اصفر
دخل البيت من دون سلام صعد لغرفته الكل استغرب وضعه رحت ورا افهم...... سألته....شصار؟
سراج،،، ماصار،،، ماصار اي شي ولا جاي افهم أي شي
لمياء،،، يعني شنو؟
سراج،،، رحت مالكيت احد بالبيت حتى الحارس ماكو دكيت الباب ماكو احد سألت الجيران ميعرفون وأصلا هيج مناطق الناس واحد ميعرف الثاني
لمياء،،، وين راحت وليش هل غموض؟
سرتج،،، راح اتخبل دماغي راح ينفجر صار اسبوع مامرتاح
لمياء،،، يجوز يم اهلها؟
سراج،،، يااهل؟ هي اصلا متحجي وياهم
لمياء،،، وهسه شلون راح نعرف وينها وشصاير،،، زين خابر على المحامي فؤاد انت موتكول يعرفها وعلاقتهم قويه اكيد يكدر يوصللها
سراج،،، اكيد اتصلت بس مارد لأن فؤاد صار ايام ماخذ اجازه وسافر للعمره
لمياء،،، شنو هل حظ... زين والحل؟
سراج،،، مااعرف،،، مااعرف دخت،،،، خليت واحد يم بيتها يوصلي اخبارها
لمياء،،، الغايب عذره ويا،،، اصبر والله كريم
سراج،،، شصبر بعد اكثر من هل الصبر هسه موضوع الخطوبه مومهم حاليا ألي يهمني اطمئن عليها اخاف صايرلها شي
لمياء،،، ماكو شخص تعرفه مقرب منها؟
سراج،،، مااعرف خلي افكر بلكي اوصل لحل
لمياء،،، زين انزل تغدا وارتاح وفكر على راحتك انتَ اليوم حتى ريوك ماتريكت
سراج،، ياآكل؟ هو اني روحي ماطايقها مااريد اي شي واذا احد سأل عليه كوليله تعبان ويريد ينام مااريد احد يزعجني
لمياء،،، متروح للمكتب اليوم؟
سراج،،، لا
لمياء،، تركته ونزلت والكل ضل يتسائل والغريب انتبهت للحجيه تبتسم ابتسامه شماته وهل شي خوفني هاي مو مره عاديه شيطان بهيئة بشر خفت يكون ألها ايد بالديصير
للعصر اجوي اشخاص على سراج راح يمهم يستقبلهم بالمضيف بقوا للعشا تعشوا ولليل يله راحو ماشفت سراج بعدها
ثاني يوم كعدتنا امي مخبوصه راح يجي اليوم بيت جدي اهل امي جديتي نعيمه وخالاتي ونسوان خوالي وبناتهم صارت ركضه من الصبح الكل مشغول يحضر لجيتهم لأن همَّ مودائما يجون
باهر فرحان يموت عليهم اصلا نص حياته قضاها يمهم حتى دراسه راح يمهم هناك درس وداوم كليه
صارت ساعه 11 صباحا وصلوا طلعنا كلنا استقبلناهم فرحانين كعدنا بالصالة الداخليه للبيت نزل سراج سلم لكن انتبهت وجهه تعبان واضح جدا مانايم نهائيا حتى حجيه نعيمه انتبهتله
حجيه نعيمه،،، يمه خيرك شبي وجهك تعبان؟
سراج،،، سلامتج حجيه مابيَ شي
زوجة خالي،،،، سمعنا بيك راح تخطب؟ بالخير عليك
سراج،،، اشكرج
خالتي،،، والله مااعرف شكول كوم بنات عدنا شعندك تركض على الغريبات؟
حجيه حكيمه،،، ليش بت عمته غريبه قابل؟ عافها ويدور غريبه الله واعلم مين جايبها،،، عاف بنت الأصل والفصل ويدور الغريبات
باهر،،، حجيه كاتلتج الغريبه راح تموتين من وراها
خالتي،،، حقها من قلة البنات
سراج،،، من رخصتكم البيت بيتكم عندي شغل
لمياء،،، طلع من دون نقاش استغربت سراج طبعه ميسكت واذا سكت خزره ونضره منه تسكت الكل اما اليوم كان ساكت وهادء عكس كل مره ماابدى اي رد فعل شويه ودخلت اسراء وعمتي من غير سلام عمتي سألت
عمتي،،، وين الشيخ
ام بهاء،،، اكعدي خيه ليش واكفه هسه يجي
عمتي،،، ماألي كعده ماجايه أكعد
لمياء،،،من شكلهن عرفت واصلهن خبر خطوبة الشيخ
اسراء بدموع،،، عمه،، صدك سراج قرر يخطب؟
ام بهاء،،، بعده ماخطب
عمتي،،،هاي تاليتها يطلك ام بناته ويروح يجيب غيرها
لمياء،،،كل شي نصيب
اسراء،،،انتي سكتي اكبر حاقده متأكده انتي نحشتي عليه وطلكني لأن اخويه طلكج
مها زوجة بهاء،،،قصدج خلعته،،،لتنسين
اسراء،،،انتي لتدخلين موصايره خييره
مها،،، اني خييره وغصبن عنج لليوم ماطلعت صوت اهل هل بيت
لمياء،،،عوفيها مهاوي خطيه لازم نتحملها اعصابهه تعبانه موهينه عليها سراج طلكها وقرر يتزوج بهل سرعه
عمتي،،، أكلب الدنيا على راسه مااسمح يتزوج على بنتي
سراج،،، ومنو انتي حتى تسمحين او لا؟
لمياء،، دخل سراج وعمتي واسراء خنسن تقربت اسراء تتمسكن ودموعها تنزل
اسراء،،، سراج صدك راح تزوج عليه؟
سراج،،، الوصلج الكلام أكدلج هل الخبر بعد شكو جاي تسألين؟ وبأي صفه؟ البينا انتهى
عمتي،،، لا ماانتهى اسراء ام بناتك والبينكم مينتهي اتجفى الشر وعوف هل السالفه مال زواج ورجع اسراء
سراج بغضب.... شنو جاي اتهدديني؟ الشيخ سراج يهدد وميتهدد لتنسين نفسج
عمتي،،، اخوتها يريدون اشاره حتى يدخلون بس اسراء مانعتهم تكول سالفه بيني وبين ابو بناتي مااريد احد يدخل لو يدخلون تعرف شنو يصير
سراج،،، هو اني اريدهم يدخلون حتى اعرفكم شنو يصير باليندك بالشيخ سراج والكل جربني قبل واذا عاجبكم اعيدها صدكوني ماقصر اخليكم طشار،، لتهددين احسن ألج ولولدج لأن رايد حجه عليكم
لمياء،،،ماعاش ألي يهددك عوفك من امي تحجي هيج من ضيم گلبها عليه،، سراج سامحني أعرف غلطت بس أبقى أُم بناتك لتبيع عشرتنا رجعني وشتريد أسوي كل شي أسوي بس رجعني
سراج،،، أنتي كلتيها صفتج الوحيده بحياتي أُم بناتي ومع ذلك ماأستغليتي هل صفه وراعيتي الله ببناتج
اسراء،،، اعرف غلطت سامحني اخر مره راح تشوف اسراء جديده
سراج،،، فات الآوان،،، أنتهينا،، خلصت كل الفرص
عمتي،،،ماصار شي تريد تتزوج أتزوج ورجع بنتي شكو بيها الشرع حلل اربعه
سراج،،، هذا الفلم سمعته قبل عشر سنوات ونهايته لعبتوا لعبتكم وخربتوا خطوبتي حتى تصفى بس بنتج
عمتي،،، هل مره يختلف الوضع
سراج،،، لاميختلف هل مره آني الأختلف ماكو شخص بعد يكدر يجبرني أسوي شي ماريده
حجيه حكيمه،،، هي هاي الرجوله؟ موكف عمتك وأم بناتك يتوسلن بيك ويرضن بيك وأنتَ تهين بيهن؟
باهر بغضب،،، الشيخ رجال وغصب عن اليرضى والمايرضى!!!!
سراج،،، عوفها باهر أني أعرف وين تريد توصل
عمتي،،، قابل چذب،،، الزلمه الزين مايرد مره،،، ولو شترجى من واحد هاجر مرته صار سنين زين منها ومتحمله وساكته على واحد مابي خير ينطي حقوق الزوجيه
باهر،،،، عمممممممه!!!!
لمياء،،، شنو هل كلام موعيب؟
باهر،،، الكل يعرف منو الشيخ سراج وأفعاله تثبت رجولته
سراج،،، أذا خلصتن كلامجن إطلعن من بيتي
عمتي،، ها أشوفك تتهزم؟ عبن تعرف كلامي صدك
سراج،،، ماأجاوب لأن أعرف وين تريدين توصلين إطمئني فلمجن صار مكشوف مامجبور اثبت رجولتي ألجن بالطريقه ألي أبالجن
عمتي،،، لعد شلون الرجال يثبت رجولته؟ أذا مرتك ماتلمسها؟ أخذ مرتك للغرفه وأثبتلنا
سراج،،،شوفوا اريد أسكت بس تجبروني،،، أذا الرجوله بهل موضوع أطمئني راح اتزوج واسوي هل شي ويا مره حقيقه،، أنثى،، أما بنتج ماشوف بيها أنوثه ،،، أخذي بنتج وطلعي لأن للأن رجولتي مانعتني ماأخليهم يطلعوجن سحل ،،إماهذا كلامجن فلتتوقعون راح اسكت عنه بس هسه موبحالجن من افرغلجن يصير خير ،،،، باهر أني طالع أنتَ تصرف
لمياء،،، عاف المكان وطلع كلش واضح بصعوبه لزم أعصابه عن أهانتهن إله كدام بيت جدي،،، باهر إستلمهن...
باهر،،،كومن بنات دَورن ويايا خلي نلمها
لمياء،،، شنو ندَور؟
باهر،،، ندور كرامتهن طشرها الشيخ خلي نلمها
حجيه حكيمه،،، لاأنتَ ولا أخوك عدكم غيره،، واكفين تهينون بعرضكم جدام اليسوى والمايسوى
باهر،،، اليسوى إحنا والمايسوى منو ياترى؟
عمتي،،، اصبرلي انتَ وأخوك هذا الكلام كله يوصل للولد وهمه يجون
باهر،،، يله ياريت ننتضرهم،،، هسه انتي وبنتج لموا الباقي من كرامتكم وروحوا المكان صار يخنك
عمتي،،، يصير خير،، يصير خير،،، اني أعلمكم،، امشي يله
اسراء،،، مااروح اريد ابقى يم بناتي ماعوفهن
لمياء،، صار ساعه من دخلتي حتى ماسألتي عنهن هسه صارن عزيزات؟
اسراء،،، اكص ايدي اذا موانتِ ورا الموضوع ضليتي تنحشين بي الى ان طلكني وراح تزوجي
لمياء،،، شتكولين كولي ميهمني
باهر،،، يله حبايب إطلعوا مااريد أشغل لساني لي هسه محترمكم مااريد ألعلع وغردلكم
عمتي،،، ولي لَك
باهر،،، بشرفي تجبرون الواحد يهينكم اني موسراج وإعامل بإحترام هسه أطلعجن بالنع**ل
أخليجن مضحكه لآمة محمد
ام بهاء،،، باااااهر،،، شنو هل كلام؟ عيب عمتك وبت عمتك وأم جهالنه
عمتي،،، عوفي،،، عوفي،، اني اعرف شلون اندمه هو وسراج على هل كلام،،، امشي
اسراء،،، مااروح،، مااعوفه مااسمحله يتزوج عليه
لمياء،،، سحبتها عمتي وهي تكول مااطلع أخذتها وطلعن
نسوان خوالي وبناتهن وخالاتي وبناتهن لكن محتوى يسولفن بي فتحن تحقيق وضلن يسألن عن السمعنه
صبينه غدا وتغدينا وسراج ماكو دخل بعد الغدا كعد ويانا سألته،،، اصبلك غدا؟
سراج،،، لامااريد هسه،،، بعدين
لمياء،،، جبتله چاي شرب والچكاره مانزلت من ايده ورجله يهز بيها بتوتر حتى من يتكلم ويا الكل اجوبته مختصره
الكل يباوع علي وهو مانطق ولاكلمه خالاتي ونسوان خوالي يسمعنه كلام ويحجن على أسراء مسويات نفسهن خيرات هنَ وبناتهن
اني اعرف جيتهن مو لله من سمعن طلك مرته ورجع اعزب خالاتي ونسوان خوالي جابن بناتهن وأجني كاشخات بلكي يختار منهن
امي عاجبها الوضع كل شويه تتغزل بوحده من بناتهم وتحاول لفت انتباه سراج باهر ماعجبه الوضع لأن فاهمهن خله وطلع بهاء ماموجود
صارت ساعه ٣ العصر وصل اشعار على جهازه فز ومن شاف المتصل ابتسم ابتسامه واسعه عرفت رساله منها لأن بهذا وضعه هي الوحيده ألي قادره ترجع ابتسامته
فرحت لفرحه لكن هل شي ماطول ثواني لان تغير شكله وجبينه بدأ يتعرق فتح اول ازرار من دشداشته
ام بهاء ،،، ها شيخ منو خابر؟
لمياء،،، مارد عليها عينه مركز بس بالموبايل وهل شي خلانا كلنا نركز ويا،،، عاف الكل وطلع من المكان طلعت ورا اريد افهم شنو صاير لكيته يمسح على صدره وكل جسمه يرجف وخصوصا ايده سألته....
_شبيك؟ منو راسلك؟،،، جاوبني بصوت مهزوز...
سراج،،، شوفي لمياء. شوفيلي هذا الفديو اخاف أني متوهم لو صرت اعمى وماأشوف
لمياء،،، اخذت الجهاز منه وأشوف شي ماكنت اتصوره حسيت گلبي راح يوكف من الصدمه
رفعت راسي اباوع علي منتهي،، منتهي فد مره ويهز براسه مامصدك وأصلا اني هم مامصدكه شنو ألي ديصير؟
معقوله هذا الفديو حقيقه لو كذب اذا حقيقه معناها كارثه وحلت علينه
رجع سألني...
سراج،،، هذا كذب موو؟ ألي جاي اشوفه موحقيقي تتشاقه ويايه تريد تختبر حبي ألها مووو ؟؟
جاوبينييييي،،،،جاوبيني وريحيني وكوليلي انتَ صرت اعمى ومتشوف زين،،،، ريحي گلبي لأن راح يوكف
لمياء،،، حتى صوته صار يرجف صار يروح ويجي مثل الشخص المجنون انهار،،،اتهستر،،صار يردد..
سراج،،، تتشاقه،، اعرفها،،، اكيد هذا شقا بس هذا الشقه ماسخ وسخيف،،،
هسه لوبس تجاوب على اتصالاتي خلي احجي وياها أكلها كافي لتصيرين سخيفه
لمياء: فززني من عاط
سراج،،، ليش ساكته لمياااااااء جاوبيني؟؟؟
لمياء،،، اني نفسي مافاهمه شي ولا ادري هل شي صدك لو كذب
صار يروح ويرجع بمكانه ويردد...
سراج،،،، ياااااارب صحيني من هل كابووووس تعبت مااكدر بعد ارحم بحالي يا ألاهي
لمياء،،،حسيته كلش فقد السيطره وبدى ينهار رسمي حاولت اهدئه كتله
_اهدى اكيد جاي تختبرك كلامك صح هذا شقى
سراج،،،، موووو!! اي اكيد،،،اكيد هذا شقه لأن مامعقول تسويها ويايا مرتين قبل انجبرت هسه ماكو احد يكدر يجبرها اي متسويها اكيد،،، لأن تعرف هل مره معناها.....
لمياء،، سكت من وصل اشعار جديد رفعت الجهاز لكيت واصل منها مسج جديد قطع الشك باليقين
اخذ الجهاز مني بسرعه وقرأ الرساله وياريت ماقراها ولا صار ألي صار
جحظ عينه الى درجه حسيت راح تطلع من مكانها جمد بمكانه لاحس ولانفس ومن أكول بلا نفس اعني هل كلمه،،، أنرعبت من شفت شكله
_ سراج اسمعني عوفها طبها مرض هي الخسرانه
اواسي واعرف كلامي لايحل ولايربط اذا اني انصدمت هو شصار بي
خفت من وضعه صرت أهز بي باوعلي بنضره غريبه خاليه من الحياة بعدها عافني ومشى يطلع من البيت بس مومشي عادي كانت خطوات شخص مهزوم ومكسور حتى ضهره انحنى كأنما شخص كبير بالسن وفعلا هل صدمه خلت اخويه يكبر عمر فوق عمره
صحته ماردلي طلع من البيت ضليت ألوب أنداريت شفت نوال واكفه بباب المطبخ تبتسم خزرتها دخلت بسرعه
دخلت بعدهت وكعدت يمهم بس بالي كله يم سراج ماتحملت بعد أتصلت بي ميرد صرت كل شويه أتصل وماكو رد خوفي زاد من مر الوقت وهو ماكو كل ماارفع راسي اشوف نوال تبتسم وهسه صارت جده حكيمه هي وياها يبتسمن بشماته الضاهر نوال وصلتلها السمعته وشافته
صار الليل وسراج ماكو دخلو الولد قبل العشا كعدوا وأنتبهوا لغيابه سألوا علي جاوبت نوال
نوال،،، الشيخ طلع،،، ههههه، اليوم أنضرب بوري
باهر،،، ولج نوال تعدلين حلكج الأعوج لاأجي اعدله بالقن**ره،، شنو أنضرب بوري؟
حجيه حكيمه،،، كلامها صدك خطوبته أنلغت هاي جزات ألي يأذينا اللٓهم لاشماته هاي حوبت اسراء
بهاء،،،احد يفهمنا شنو صاير؟
لمياء،،،ماصاير شي يجي وهو يفهمكم
باهر،،،هو وينه اتصلت بي ميرد؟
لمياء،،كلنه أنشغل بالنا ضلينه نتصل وماكو طلع بهاء ودخل مفزوع
بهاء،،،طالع من العصر والحمايه ماماخذهم ويا وميرد على اتصالاتنه وين صاااار راح اتخبل،،،شلون يطلع وحده ؟؟؟
ام بهاء،،، يمه وليدي وين راح اخاف صار بي شي؟
لمياء،، كلنه دخلنه أنذار عبرت ساعه ١٢ بالليل وسراج مختفي كلنه خايفين أيكون صارله شي خصوصا هو مانع الحمايه مالته يروحون ويا
بعد ال ١٢ رجع بهاء اتصل والحمد الله جاوب أتنفسنه وأخيرااا،،، فرحنه كلنه لكن هل فرحه تحولت من عاط...
بهاء،،، شبي اخويه؟؟؟؟ شنو تكول انتَ؟؟شنو مابي نفس؟؟ شنو بي ؟؟ خويه جاوبني الله يخليك
لك شنو ماااااات؟؟؟!!!
