رواية اسيرة بين يدي قاتل ابي الفصل الثالث عشر13 بقلم نور آل زيادة
سيلين،،، توجد اشياء بالحياة منكدر نعوضها ولانرجعها لانكدر نرجع سنين عمرنه آلخسرناها ولانكدر نرجع شخص فارق الحياة ولانكدر نمحي ذكريات سيئه سيئه الى درجة صارت كابوس كل يوم يراودنه ويفزعنه وهل كوابيس عباره عن ذكريات أليمه وحياة مضلمه عشناها سابقا وضلت ملازمه فكرنا وبالتالي عقلنا يترجمها على شكل كوابيس مزعجه نتصور من نصحى نتخلص منها لكن الحقيقه مختلفه لأن حاضرنا هو مخلفات الماضي
بلحضتها أنفعلت،،،أتحمست،،، فرحت،،، نبضاتي تسارعت،،، مشاعري تخربطت،،، لهفه ومشاعر حب أجتاحتني تقودني حتى انسى الماضي واختار سراج،، الشخص ألي اكمل حاضري ومستقبلي ويا ابتسمت فرحانه لاشنو فرحانه طايره من الفرحه قابل ابتسامتي بأبتسامه اوسع بلحضتها لساني قرر ينطق كلمة،،،، موافقه،،،،
لكن اخر لحضه توقفت عقلي نبهني وهنا صار عندي لحضة ادراك
لحضه سيلين انتي شنو دتسوين؟؟
شلون بهل سهوله نسيتي كل شي سوا بيح هو وأهله؟
شلون نسيتي كل شي عشتي وكل اذيه من اهلج ومن ثامر بسببه؟؟
والأهم شلون تريدين ترخصين دم ابوج المات من قهره بسببه؟
معقوله مشاعرج تنسيج كل هل شي؟
وين رايحه بمشاعرج نسيتي باعج علمود بنت عمته وحتى يرضي اهله وجده ومقابل زواجه منها اليوم صار شيخ والآمر الناهي بعائلته
زين منو يكول طلق زوجته صدك؟ يجوز لعبه او طلاق مؤقت بعد مااتزوجه يتحجج بناته ويرجعها ولنفرض صدك طلقها و مارجعها يعني باعها مثل ماباعني قبل علمود مصلحته،،، باعها لأن ماضل ألها لزوم جده ومات وهو صار الكل بالكل يعني خلصت مصلحته وياها هل شخص يحب ويتزوج حسب مصلحته والشي آليريحه
بأختصارالنساء عنده مجرد سلعه يبيع ويشتري بيهن
لحد قبل لحضات كنت مقرره اوافق لكن من طلق زوجته اثبتلي هل شخص مابي أمان اكبر اناني وانتهازي ووصولي نفسه ومابعدها الطوفان
قطع أفكاري صوته...
سراج،،، سيلين وين سرح تفكيرج ليش متجاوبين؟
سيلين،،، ابتسمتله،،، ها لاهيج بس مامستوعبه ولامصدكه الصار
سراج،،، صدكي ياعيونه وروحه لسراج ماكو شي بعد يمنع ارتباطنه
سيلين،،، وأهلك؟
سراج،،، شبيهم اهلي؟
سيلين،،، يدرون بخطوبتك ألي
سراج،،، لا،، بس اكيد راح ابلغهم
سيلين،،، منو يكول يوافقون؟
سراج،،،ميهمني أي شخص قبل لووا ذراعي بمالهم و نفوذهم اما هسه اني الصرت املك كل شي الكدامج كبير عائلته وشيخ عشيرته منو يكول كلام بعد كلامي
سيلين،،، بس قبل ماصار هل شي
سراج،،، قبل راح وصار ماضي وهسه قراراتي مااناقشه ويا اي شخص اني مو صغير عمري راح يصير منتصف الثلاثين كل قرار اتخذه هو قرار عن وعي تام
سيلين،،سراج ترا السالفه موبهل سهوله اسراء زوجتك وام بناتك وأختيار اهلك الأمور متنحل بهل شكل
سراج،،، لااسراء ولاغيرها يهمني
سيلين،،، بهل بساطه؟
سراج،،، أي وأبسط من البساطه تروح وتجي غيرها شنو يعني الحياة متتوقف عليها سعادتي وراحتي أهم
سيلين،،، وبناتك شنو ذنبهن تبقى امهم؟
سراج،،، بناتي يبقن يمي وينسن أمهن
سيلين،،، لاسراج موهيج حرام تبقى امهن
سراج،،، متستاهل تكوم ام بناتي،،، بناتي ألي وماأنطيهن
سيلين،،، كلامه أستفزني وأنانيته حرگت دمي ماتصورت يطلع بهل حقاره يبيع ويشتري على مزاجه بدون ميراعي مشاعر اي شخص ولا يهتم شنو ممكن يصير بي،،، تزوج غيري قبل ومافكر لابمشاعري ولا بردت فعل أهلي ولاشنو ممكن يصير بيَ،،، وهسه رجع عاد نفس الشي ويا مرته وأم بناته صار سنين ماطلگها بس من صار عنده مال وسلطه بعد متفيده وتخلص منها بكل سهوله
كنت مقرره أنهي أنتقامي لكن الضاهر هل شخص يرادله فركت أذن تخلي يعيد تفكيره ويبطل أستحقار الناس والأستهانه بمشاعرهم،، سألته...
_زين حبيبي مو من الطبيعي اهلك يجون هُمَ يخطبوني
سراج،،، يجرالج واكبر مشيه همّ،،، انتي بس أئمري
سيلين،،، تمام اني موافقه
سراج،،، شنو كلتي؟
سيلين، موافقه اتزوجك وأكمل حياتي وياك
سراح،،،صدگ والله؟؟؟!! واخييييييرااا،،، والله كلت راح اموت وميصير هل شي
سيلين،،،، ههههه،،، شبيك سراج صوتك فضحتنه
سراج،،، خلي يسمع الكل حبيبتي رجعتلي شريد بعد من الدنيا
سيلين،،، بس بشرط
سراج،،، ائمري أمر مو تشرطين
سيلين،،، مايأمر عليك ضالم،،،، اول شي اريد ننهي عقد العمل آلبينا حتى اتفرغ لخطوبتنه ولعرسنه وبعدين اكيد ألك
توسعت ابتسامته
سراح،،، تعوفين شغلج علمودي؟
سيلين،،، اكييييد،،،، اريد اعوضك عن كل لحضه عشنا بيها بعيدين عن بعض
سراج،،، يجرالج،، اليوم اعتبري نفسج مستقيله والعقد انفسخ وثانيا شنو تريدين؟
سيلين،،، تأجل كلامك ويا اهلك بس اسبوع الى ان اجهز نفسي ووضعي وأبلغك اريد كل شي يصير على أصوله
سراج،،،،، وهاي هم سهله ماابلغهم ألاأنتي تريدين
عندج بعد شي تضيفي
سيلين،،، مااريد اي شي
سراج،،، ماعندج اي طلبات اخرى خاصه بيج
سيلين،،، مامحتاجه اي شي اصلا شنو اريد بعد وانتَ صرت بحياتي هذا اهم شي
سراج،،، وهسه؟
سيلين،،، شنو؟
سراج،،، خلص صارت صدك؟
سيلين،،، اكيد
سراح،،، بالنسبه للخاتم...
سيلين،،، قبل لتكمل أجل موضوع الخاتم اريدك تلبسه ألي بالخطوبه
سراج،،، يجرالج مثل متحبين،،، محتاجه شي بعد؟
سيلين،،، سلامتك
سراج،،، الله يسلمج،،، زين هسه صار وقت اروح عندي شغل تراكم عليه صار يومين ايدي وعقلي مياخذ على اي شغل كل تفكيري بيج
سيلين،،، من هل دقيقه هواي راح تضل تفكر بيَ أطمئن
سراج،،، ومنو كال راح ابطل افكر بيج؟
سيلين،،،، ههههه،،، لا راح تزيد اكثر
سراج،،،ههه،، كلامج مامرتاحله على شنو ناويتلي؟
سيلين،،،حبيبي كل خير صدكني
سراج،،، زين اني اترخص ولو ميهلي اعوفج بس مجبور ورجائا افتحي الجهاز خلي احجي وياج
سيلين،،، مو المفروض نبتعد شويه حتى نشتاق منا لعرسنه
سراح،،، ميحتاج اصلا كل ثانيه اشتاقلج
سيلين،،، شلون بيك،،، شلون لو سيلين موبحياتك شتسوي؟
سراج،، اموت
سيلين،،، لتبالغ حبيبي ماكو واحد يموت ورا واحد والدلاله افترقنا قبل وعشنا حياتنا وكملنه
سراج،،، انفصال الروح عن الجسد وأنتهاء الحياة هذا يصير مره لكن اكو الأصعب وهل شي يصير لمن يكون الأنسان عايش ويموت باليوم الف مره هذا عذاب مابعده عذاب يكون الموت رحمه للشخص يخلصه من عذابه
سيلين اذا ألي خاطر يمج بعد لتذكرين اي فراق وداعتج گلبي بعد ميتحمل
سيلين،،، تمام،، من عيوني
ودعني ومشا حسيت نفسي اريد اودعه اخر مره ليش مااعرف؟؟ ناديته
_سررراااج
ألتفتلي رحتله بخطوات سريعه مامهتمه لأي شي حضنته
سراج،،، شبيج حبيبتي؟
سيلين،،، ابتعدت عنه،،، مابيَ شي بس راح أشتاقلك
سراج،،، مابقى شي وننجمع سوا ان شاء الله ونعوض كل لحضة شوق،،، يله في امان الله
سيلين،،، الله وياك،،، ودعته وراح وبداخلي حاسه و متأكده هذا الوداع الأخير
..............................
لمياء،،،اليوم صبحنه على مشكله بين اسراء وسراج متعودين على هل شي لأن يوميه هل حال اسراء رغم كلنا متأكدين تحب سراج لكنها انسانه مهمله ورعنه وتصرفاتهه مزعجه ومع الأسف سراج صار سنين وللان لاكدر يتقبلها ولايتقبل تصرفاتها ومتحملها لخاطر بناته
صار ايام لاحضت صار يتحجج عليها وكأنما يريد حجه واليوم بتصرفها قدمتله حجته بأيده من حرگت أيد سيلين بالخاشوكه والحجه متسمع كلامي الطفله شاطت من الألم وهل شي صار وهي متصوره سراج طالع لعمله لكن على حضها طلع موجود هو صارله يومين مو على بعضه لاأكل ولاشغل وضعه كلش مخربط عكس هذيج الفتره
كان بغرفته الضاهر سمع صوت سيلين وأجه ومن شاف أيد بنته أشتاط غضب عرف أسراء ورا هل شي ومن سمع مبررها السخيف أتجاه هل تصرف من دون نقاش ضربها كف وكعها تصورنا لهنا وخلص انتهى الموضوع لكن صدمنه كلنا من نطق
سراج،،، لهنا وحدج ويايا تحملتج هواي خلص صبري انتي باقيه علمود بناتي المفروض لكن انتي بدال متهتمين بيهن تأذيهن دمرتيني ودمرتيهن من هل دقيقه ماألج بقاء بهل بيت ولي لبيت اهلج،،، انتي طالللك
اسراء،،، شنووووووو؟؟!!!!
لمياء،،، صدمه،،، صدمه للكل ضلت تتوسل بي ماعبرها شال بنته وقبل ليطلع كال
سراح،،، أرجع ما ألكاج بالبيت لا وحق من انزل القرٱن هل مره موتج على أيدي
حجيه حكيمه،،،، انتَ تخبلت؟؟ شلون تطلك بنت عمتك؟ هسه ترجعها اذا دروا اهلها ميسكتون
سراج،،، ألي ماعاجبه يجي يواجهني واشوفهم منو سراج
حجيه حكيمه،،، طغيت ياسراج هواي طغيت
سراج،،، ماعاجبج انتي هم روحي وياها
ام سراج،،، سراج شجاك شنو هل الكلام شلون تحجي هيج ويا جديتك؟
سراج،،، قصدج جدت احفادها من بناتها،،، أحنا متعترف بينا وبعدين هذا اني وهذا كلامي وهذا سراج الجديد وشتسوون سووا طفح الكيل بالكل بعد مااتحمل اي شخص الكل واكف ويا الغلط
لمياء،،، اخذ سيلين الفرفحت من وجعها وطلع وتركنا مصدومين ورا،،، جديتي واسراء ينوحن ويلطمن ويدعن
اسراء،،، مااسكت والله مااسكت غصبن عنه يرجعني هسه اخابر اخوتي وامي يجون يشوفوله حل لو اعرف تصير مذابح هم مااسكت
لمياء،،، ليش تكبرين المشكله اكثر خلي يهدء وكلنا نحجي ويا
اسراء،،، انتو منو،، منو انتو وانتي بالتحديد شعليج تدخلين واصلا اعرفج كيفتي طلكني حتى اصير نفسج عاله لافايده ولانفع
لمياء،،، طبج ألف مرض صدك طلع مينلام بيج
ساعه ورجع سراج شايل سيلين بعد روحي شصاير بيها وجها صاير دم من البجي عيونها رايحه دمرتها اسراء الله لاينطيها شدت ويا هل الطفله ولا عبالك امها اول مادخل شاف اسراء بعدها موجوده تنوح شاط غضب تقدم انطاني سيلين اخذتها وهو من دون نقاش صاح على باهر
باهر،،، خير شبيك تصيح من الصبح؟؟ صباح الخير ولو مبين هل البيت الخير ميمر حتى من بابه
سراج،،، عوف هل لغوه واتصل ببيت عمتي خبرهم خلي يجون ياخذون بتهم كللهم نصا ... سراج طلكها تعالوا اخذوها ماكو داعي لبقائها بالبيت بعد وأذا متجون يحرگها مثل ماحرگت بنتي
باهر،،،مااكدر والله اخجل
سراج،،، تخجل شنو؟
باهر،،، اي اخجل يعرفوني عفطي ولساني متبري مني شلون احجي وياهم بهل اللطافه و الثقافه
سراج،،، تحجي صدك؟
باهر،،، انت موتكول انقل كلامي نصا وانت كلامك مال مثقفين ميلوكلي اخجل حتى من اخلاقي احس جاي اخون نفسي
سراح،،،، باااااااااهررر!!!! لتخبلني انت هم ترا روحي بخشمي
باهر،،، نعتذر عيني جناب الشيخ،،، زين يعني انت صدك طلكتها لوتشاقه؟
سراج،،، وهذا الموضوع بي شقى
باهر،،،، كللللللللووووووش،،،،، واخييييييرااااا راح نخلص وأخيرا بعد ميتلوث سمعي بخراخيش الذهب ألي لابسته واخيرا راح ارجع للبيت ألكي أكل آكله مو الچدوره فارغه لأن اسراء تحرگ الأخضر واليابس،، صح مرتي راح تزعل على بنت خالتها بس مومهم طبها مرض،،، يله خلي اروح ابشر نوال وأغثها شويه و اتصل على عمتي العزيزه أبلغها
لمياء،،، اريد ألزم نفسي حتى مااضحك ماكدرت هذا باهر وهاي سوالفه كلشي عنده استهزاء ولسانه متبري منه،،، سراج فر ايده
سراج،،، متصيرلك چاره لا والله،،، يله انتي كومي لمي غراضج وخلي أبالج لوتنطبك السما على الأرض ماألج رجوع لهل بيت وبناتج انسيهن
حجيه حكيمه،،، حرام عليك شلون تحرم أم من بناتها هذا عود انت شيخ،،، الله يرحمك حجي علوان تعال شوف حفيدك شسوا بينه ضالم لايحلل ولايحرم
سراج،،، انتي وجدي آخر الناس تحجون عن الضلم والحلال والحرام خليني ساكت مااريد احجي على رجال ميت وأنبش بالماضي
ام سراج،،، يمه شجاك؟
سراج،،، يمه انتي ضلي شجاك وشجاك بس عليه وينج واسراء يوميه حارگه سيلين وتأذيها ليش ساكته ومتحجين؟
ام سراج،،، امها وتربيها شريد اسوي اني
سراج،،، يعني طبيعي الأم تجرم بجهالها؟ شنو هل تفكير هاي موتربيه هذا اجرام
باهر،،، خابرت على عمتي وبشرتها بطلاك بتها اشو هاي عاطت وعيطتها ولطمها زرف اذني حسب معرفتك هذا تصرف طبيعي لو فول اوڤر؟؟ اكلك صدك عود ليش دائما تسلموني المهمات الطايح حضها بهل بيت؟
سراج،،، يمكن لأن ترهم عليك
باهر،،، شنو قصدك اني طايح حظ؟
سراج،،، انت ادرى
باهر،،، لاشيخ ميصير هيج هذا ضلم وأضطهاد وعنف نفسي جاي اتعرضله بهل بيت بعد مااتحمل
سراج،،، اي وشراح تسوي؟
باهر،، شسوي قابل نطلع من هل البيت
لمياء،،، كل عقلك؟
باهر،، لا من نصه،،، قررت على هل الأهانه ادز مرتي لأهلها متبقى بعد،، زوجها أنهان لهذا لازم تروح لأهلها
سراج،،، وين الربط؟
باهر،،، شبيك خويه هاي فرصه ثنينه نخلص ونجدد شتكول موخوش فكره؟،،،، وغمز
حجيه حكيمه،،،، لابارك الله بيكم ولابترباتكم ياماتستحون،،، بنات عماتكم ألف واحد يتمناهن وانتو تطلكوهن وتضلموهن ادبسزيه،،، سربليه،، يا متستحون
باهر،،، أللللف واحد يتمنوهن؟!!! لك شنو السالفه شماخذين انجلينا جولي و هاندا التركيه؟ هنه خلك ريا وسكينه من باب الشرجي
سراج،،، كافي لغوه عوفها لتضل تتناقش وياها اني رايح للمضيف خلص وتعال ورايا
باهر،،، ضرب تحيه وكال... حاضر سيدي
سراج،،، استغفر الله وتالي وياك؟
باهر،،، اووووي شكد نفسيه
لمياء،،، شويه وأجوي عمتي وولدها عمتي تلعلع بصوتها هرجت الدنيا وسراج بكل هدوء كلها
سراج،،، اذا خلصتي دراما اخذي بنتج وروحي قبل لااتحول وتعرفين وجهي الثاني ميحتاج اذكرج
لمياء،،، تحذير مجرد تحذير خلاها تسكت وفعلا اخذت اسراء وطلعوا يتحسبون توقعت من يخلص من اسراء راح يرتاح لكن ماصار هل شي وضعه غريب ومتوتر طول الوقت حتى وأحنا نتغدا كل ثانيه رافع الموبايل يشوفه وينزله بخيبة امل
واضح جدا منتضر شي وهل شي قالقه ومسوي عنده احباط الى درجه كاعد ويانا وماأكل وباله اصلا مويمنه وكأنما بغير عالم
بالليل دخل باهر
باهر،، اكلج لمياء شبي سراج؟
لمياء،،، شبي؟
باهر،،، اني جاي أسأل شبي وضعه صار يومين ماعاجبني احواله متخربطه حتى اصدقائه اجوي انتبهوله نحجي ويا باله مويمنا وكل شويه مااعرف على منو يتصل بس الضاهر مغلق لأن ميردون وهو يتوتر
لمياء،، علمي علمك مااعرف شي
باهر،،، صار فتره هو زين انتبهت حتى نفسيته زينه وعيونه تلمع والموبايل طول الوقت بيده يبسبس شكيت اخونا العزيز واگع بالحب
لمياء،،، اني هم هيج حسيت واتمنيت يطلع صدك
باهر،،، معقوله حبيبته ضاربته جلاق؟
لمياء،،، لسانك وتالي وياك
باهر،،، لعد شتفسرين وضعه صار يومين حتى من تصاوب هم وضعه احسن جان فرحان عبالك معلكين بصدره نوط الشجاعه موبصدره طلقه؟
لمياء،،، كلشي مااعرف تعرف علاقتي ويا صايره رسميه
باهر... هو من زمان صار رسمي ويا الكل الله لاينطي الجان السبب
لمياء،،، حرام لتدعي عليها
باهر،،، ادعي عليها ونص بسببها اخونا تغير صار واحد ثاني
لمياء،،، منعرف ضروفهه ولتنسى هي هم حقها أحنا هم السبب
باهر،،، ضلت حسره بگلبي اشوفه فرحان عشر سنين وهو هذا حاله حتى من يبتسم مجامله
لمياء،،، صح بس اني انتبهت صار كم شهر وضعه تغير ووجهه صار بشوش وشكله مرتاح نفسيا ولمعه بعيونه نفس هل لمعه شفتها بعينه من حب سيلين
باهر،،، لتذكرين اسمها اكرهه
لمياء،،، بنيه لاشايفهه ولاتعرفهه على شنو تكرهه؟
باهر،،، مومهم اعرفها المهم اعرف شسوت بسراج هذا سبب كلش كافي حتى اكرهه،،، عالعموم الفات مات والضاهر سراج نساها وديعيش ازمة حب جديد
لمياء،،، لو افترضنا حب وحده ثانيه ليش سميتها ازمه
باهر،،، مبين كتلج ضاربته جلاق يتصل ومترد كلش واضح هل شي
لمياء،،، ان شاء الله خير خليها على الله وان شاء الله يجبر خاطره بالانسانه ألي تعوضه وتسعده
باهر،،، ولج واني ليش متدعيلي هيج؟
لمياء،،، كلكم ادعيلكم بس انت مينخاف عليك ولتنسى تزوجت نوال بقناعتك صح متحبها بس اشوفك مقتنع
باهر،،، ساعة السوده اسكتي لتذكريني خلي اروح اشوفها وينها
لمياء،،، ها اشتاقيتلها
باهر،،، اي والله اشتاقيت اتعارك وياها من الصبح لسه عاقدين هدنه ماتمالخنه ابد وبديت احس بالملل تعرفين مااكدر اعيش بدون العراك والنكد والمشاكل
لمياء،،، الله يهديك
باهر،، شنو مخبل والله يهديني ترا اعقل مني ماكو
لمياء،،، لتزعل بس انت تدور المشاكل لتسوي نفسك مضلوم
باهر،، والله ياالله شترجى منج هي امي ضالمتني ضلت عليج
لمياء،،، عافني وراح يم مرته اسمعه يتجاذل وياها
واني رحت بلشت اسوي العشا صح سراج جاب للبيت مره هي وبتها يساعدونا بس الطبخ مياكلون الولد ألا طبخنا لو اني لو امي
تعشينا وشربنا چاي ورا وقت كل واحد راح لغرفته ينام
الفجر كعدت حتى اتوضى واقرا قرٱن لحد مايأذن سمعت طقطقه برا باوعت من شباك المطبخ شفت سراج كاعد بالحديقه وحده سارح وچكارته بأيده واضح عليه كلش مهموم أتجرأت اطلع اشوف شنو بي رغم اعرف ماراح يجاوبني ولايعبررني بس قررت احاول،، طلعت من حس عليه ألتفت شافني
سراج،،، ليش كاعده؟
لمياء،، انتضر الصلاه،،، وانت؟
سراج،،، نفس الشي
لمياء،، شبيك سراج ليش صار يومين مهموم وتعبان؟
سراج،،، مابيَ شي
لمياء،،، هذيج الفتره وضعك أحسن ليش هسه رجعت؟
سراج،،، الدنيا متريد تصالحني كل مااكول
فرجت وراح اعيش ترجع تهدمني وتكسرني
لمياء،،، ماعاش اليهدمك ويكسرك انسى الماضي وعيش
سراج،،، تناسيت الماضي وقررت اعيش علمود بناتي دفنت مشاعري بداخل گلبي بس رجعت ورجعت هل المشاعر وصارت بعد اقوى واعمق وهسه تكلي خلي ننفصل لأن انت متزوج
لمياء،،، منووووو؟ رجعت سيلين؟
سراج،،، نصي صوتج مااريد احد يعرف،،، اي سيلين رجعت
لمياء،،، شلون وشوكت،؟
سراج،،، صار كم شهر
لمياء،،، لاممعقوله،،، شلون وليش مامصدكه
سراج،،، اذا انتي انصدمتي هيح اني شلون
لمياء،،، وزوجهه هي مو تزوجت؟
لمياء،،، مات، وعدها ولد صارت محاميه ورجعت الصدفه جمعتنا من جديد
لمياء،،، شلون هيج صار معقوله؟
سراج،،، اني هم للان مامصدك
لمياء،،، وين شفتها؟
سراج،،،، تشتغل يمنا بالمكتب من جنت مسافر فؤاد اتصل بيه وكلي يريد يشغل وحده من معارفه محاميه مبتدئه بس شاطره تعرفين اني منطي مطلق الحريه لفؤاد حتى يتصرف بالمكتب ورا مارجعت من السفر ورحت للمكتب واكفين نسولف وقفني صوت فؤاد يصيح على المحاميه الجديده حتى يعرفني عليها استغربت واني انتبهتلهه وكلش واضح تريد تتهرب وتطلع من المكان الى درجة فؤاد ضل يصيح بأسمها وماوقفت ألا راحلها حجا وياها وهنا اندارت وياسبحان الله شنو من بنيه طول وجسم واناقه والشعر يخبل والهيئه تسحر اتعوذت من الشيطان كلت شبيك سراج اول،، تالي انت هيج تباوع على اي وحده
تعرفين مومن طبعي باوعت عليها ماعرفتها من اول نضره رغم جذبتني لكن من صارت عيني بعينها هنا ماابالغ اذا اكول توقف بي الوقت صدقا حتى عيني جمدت مامصدك معقوله هي وتأكدت شكوكي من تقربت وسلمت من سمعت صوتها عرفت هل صوت مو غريب عليه هل صوت صار سنين اتمنى اسمعه
عرفني عليها فؤاد ومن سمعت اسمها هنا ماضل عندي اي شك مااكلج شصار بيَ احس حتى النفس ماعرفت شلون اتنفس مامصدك عيوني واني اشوفها بعد كل هل سنين انهارت قواي الصدمه احتلتني الى درجة حتى من سلمت ماكدرت اردلها السلام أنعقد لساني
لمياء،،، معقوله رجوعها وشغلها يمك صدفه مااصدك؟
سراج،،،، لا اكيد صدفه لأن حتى هي واضح جدا انصدمت لكن تداركت الوضع اسرع مني واصلا واضح من شافتني وفهمت اني مدير المكتب رادت تطلع وأكدلي هل شي من نفس اللحضه كالت راح اترك العمل وهنا وعيت واستفزيتها بالكلام توقعت راح تنحرج
لمياء،،، اي خصوصا هي كلش خجوله؟
سراج،،، هههه،، اني هم هيج تصورت عبالي نفسها سيلين القديمه لكن صدمتني من باوعت عليه بنضرات قوه وتحدي وجاوبتني جواب استفزني تصوري سيلين الخجوله ألي من خجلها كلمتين متعرف تجمع وجها يحمر وأيدها تصير ترجف وجوابها السكوت،،، هسه اكبر واحد تسكته بنضره لو كلمه
لمياء،،، معقوله هيج تغيرت؟
سراج،،، بأختصار كل شي بيها مختلف شخصيتها وحده ثانيه انسانه قويه وكلامها جرىء ونضراتها كلها تحدي وشموخ وشخصيتها مميزه تجذب اكبر واحد
لمياء،،، شلون صارت هيج،،، معقوله دراسة القانون هيج تخلي الشخص؟
سراج،،، مااضن يجوز أله دور لكن مااضن هو السبب بهاي شخصيتها تصوري ميساء شكد لسان ووكحه ومكاره واكبر واحد ميكدرلها مره صار بينهن مشكله سيلين بكل هدوء وثكل وكفتها عد حدها ومن رادت ميساء تحقرها سيلين بنضره منها وكفتها عد حدها وخرستها وبذكائها كشفت كذبت ميساء وجبرتها تعتذر بأختصار شخصيتها صايره تجذب
لمياء،،، هم بعدها حلوه؟
سراج،،، حلوه وصايره احلى كبرانه ومتغيره للاجمل خصوصا هي قبل جانت دائما على طبيعتها ومتخلي مكياج هسه هواي معتنيه بنفسها من لبس راقي ومكياج اناقتها وستايلاتها كأنما عارضه خصوصا هي طويله وجسمها رشيق
لمياء،،، كلش مركز.،،، هههه
سراج،،، لمياء هاي سيلين مو اي وحده كل تفصيله بيها تجذبني وانتبهلها غصب عني
لمياء،،، تكول جسمها رشيق هي جانت شوي مليانه يعني ضعفت؟
سراج،،، صايره مليكانه بأختصار
لمياء،،، زين انت كتلي لقائكم الأول استفزيتها وهي رجعتلك شلون بعدين رجعتوا
سراج،،،ضلينه فتره علاقتنه متوتره لان هي من اول لحضه چانت هجوميه ويايا وكأنما عدوها وهل شي خلاني اخذ منها موقف فوك السوته هي الضايجه مني ضلينه طول الوقت نقاشات حاده بينا وكل مااتذكر زواجها ازيد الى درجة مره ذكرته لزوجها وحرگت گلبي من دافعت عنه بأستقتال تمنيت،،، ااخ،،، لوتعرفين الشيطان شلون صار يلعب بعقلي تمنيت اخنكها واطلع روحها فعلا بيومها كرهتها بس ماطول هل شعور لأن نفس اليوم عرفت من فؤاد زوجها متوفي هنا عرفت ليش دافعت عنه ومارضت اتكلم عن شخص ميت
لمياء،،، شنو شعورك من سمعت سيلين رجعت حره؟
سراج،،، اذا اكلج انقهرت من سمعت زوجها ميت اكون اكبر چذاب بالعالم،، ماتصورت فد يوم افرح لموت شخص فرحت الى درجة رحت اعتذرت منها ومن هل يوم بدت صفحه جديده لان من عاملتها باللين هي شويه لانت بس بعدين بمرور الوقت فجئه تغيرت رجعت معاملتها ويايا مثل سيلين قبل سنين
لمياء،،، لتزعل مني بس شلون بهل سهوله سامحتها وشلون رجعت أمنت بيها يجوز رجعتلك من شافت وضعك تغير
سراج،،، ليش هي بحالي وارثه من زوجها املاك وعايشه بقصر وسياره اخر موديل وملابس كله ارقى الماركات شتسوي بفلوسي
لمياء،،، ولو هذا ميمنع المفروض تحسب حساب لتصرفاتها ومتأمن بيها خصوصا انت كلت هي بالبدايه عاملتك موزين وفجئه تغيرت بعدين يجوز وراها سالفه
سراج،،،مااخفي عنج اني من اول لحضه شكيت وراها شي وحتى وجودها موصدفه وماامنت بيها نهائيا وللان مرات احس بيها تمثل
لمياء،،، مااعرف يجوز غلطان
سراج،،، الكدامج المحامي الماخسر ولا قضيه واعرف البشر من نضره اني موغشيم
لمياء،،، سراج تحجي صدك وشجابرك على علاقه ماضيها اسود وحاضرها شكوك
سراج،،، موبيدي احبها ومااريد اخسرها
لمياء،،،زين والسوته قبل شلون سامحتها علي بهل سهوله؟
سراج،،، لتنسين احنا هم الغلط من عدنا
لمياء،،، بس هذا مومبرر تروح بسرعه تتزوج واحد علمود فلوسه
سراج،،، منو كلج ابرللها او حتى سامحتها رغم رفضت تستقيل وجبرتها تبقى بالمكتب بس مارجعت فكرت بيها مثل قبل ماكان ألي نيه نرجع لأن گلبي كان مليان ومحمل منها بس هل شي تغير من مره عدنا اجتماع وأجا اتصال على فؤاد مارد بالبدايه لكن اصريت علي يرد بوقتها ماشفت دربي من سمعت يكول سيلين ماتت اريد اوكف على رجلي بعد مااكدر انهاريت،،، عافنه فؤاد وطلع يركض هنا عرفت حب سيلين للان متملكني
لمياء،،، خفت عليها؟
سراج،،، قصدج حسيت راح اموت عليها مالكيت نفسي غير عايف الأجتماع وطاير ورا فؤاد وصل لبيتها واني وصلت ورا طلع يركض شايلها جثه غير حتى النفس صرت مااعرف اتنفس بيومها الله حماها چان ماتت
لمياء،،، ليش شبيها؟
سراج،،، الخاتون صايره مهووسه بالجمال والرشاقه والرياضه ضاله تسوي رياضه ساعات الى ان عضلة القلب تشنجت ورادت تموت حتى جسمها يبس هنا خوفي وانهياري عليها اثبتلي اني مانسيتها بل تناسيتها
لمياء،،، ويجوز مشاعر أنسانيه
سراج،،،،أني هم من شفتها تحسنت هيج فكرت او قنعت نفسي لأن تفكيري تبخر وماضل عقل براسي من الدكتور الكلب ابن الكلب،،
اااخ من لساني للان گلبي يفور منه أحنا بيا حال وهو حاير بقوامها الممشوق ردت ألزمه اطلع روحه بأيدي
لمياء،،،،هههههه،، غرت عليها؟
سراج،،، كدامي يتغزل بيها ويسألها على وزنها وطولها وكل كلمه وكال قوامج ممشوق
لمياء،،، هههههه
سراج،،، اي ضحكي حقج من وراها صرت مضحكه
لمياء،،، لا حشاك بس مستغربه من حالك الشيخ سراج يغار
سراج،،، موغيره بس للان احسها عرضي
لمياء،،، اي صح لا وين غرت انت شايف نفسك من تحجي محروگ گلبك من الدكتور
سراج،،، عوفينا من هذا السا**قط
لمياء،،، يعني هل موقف خلاك تسامحها؟
سراج،، طبعا لا هل موقف خلاني أتاكد للان بداخلي مشاعر ألها بس هذا موسبب كافي يخليني اسامحها لكن بيومها سمعت كلامها ويا فؤاد عن سوء علاقتها ويا زوجها وهل شي زرع شكوك بداخلي بموضوع زواجها
ورا هل الحدث بأيام رجعت للدوام صح تحسنت لكن التشنج بجسمها اقل جهد يرجعلها
وبيوم وهل يوم عمري مانسيته ذكرى يوم زواجها ألي كل مااتذكره احقد عليها وفعلا بيومها رجعت حقدت عليها وقررت ادوس على مشاعري بهل يوم داومت ردت استفزها واغثها واطلع قهري بيها لكن توقفت من شفت وضعها
لمياء،،، ليش شبيها؟
سراج،،، كانت كلش تعبانه ووجها اصفر وواضح وضوح الشمس مانايمه وعيونها مورمه مبين باچيه هواي بأختصار شكلها منهار گلبي رجع خاني من شفتها بهل حال وكملت من اتخربطت ورجع جسمها تشنج كلش خفت عليها
قررت اوصلها لبيتها بالسياره اجاها اتصال من اختها ماردت ضلت اختلها تلح بالاتصال اخر شي كلتلها ردي هنا عرفت ايدها متشنجه متكدر ترفع الجهاز انجبرت تفتح سبيكر وتجاوبها وياصدمتي من سمعت كلامها طلعت عشر سنين ضالمها وعايش بوهم غدرها وضلمها ألي وطلعت هي المضلومه
لمياء،،، شلوون؟
سراح،،، سمعت اختها تواسيها لأن بهل يوم تدمرت حياتها وانجبرت تتزوج شخص متريده هي بسرعه ارتبكت ورادت تنهي الاتصال بس اني ماخليتها ردت اعرف كل شي ماانطتني مجال وكالت انسى السمعته
بيومها ضليت ألوب واني اريد اعرف الحقيقه كامله وهي مترضى تجاوبني اخر شي استسلمت وهنا عرفت شصاير وياها طلعوا اهلها معذبيها مدمريها جبروها تتزوج شخص اكبر منها بهواي ضاربيها وحابسيها وكل شي مسوين
لمياء،،، لاعفيه لتكولها معقوله اهلها يطلع منهم هل شي ابوها وينه موجان يموت عليها
سراج،،، الكل وكف ضدها والكل اذاها وجبروها تتزوج غيري
لمياء،،، شلون سكتت وشلون وافقت لوبمكانها اموت ومااوافق
سراج،،، تعرفيها كانت كلش بريئه وفقيره ماكدرتلهم
لمياء،،، ويمكن لهل سبب هسه تغيرت شخصيتها
سراج،،، اي متأكد هذا هم سبب والدليل للان حاقده على اهلها ومتحجي وياهم ومقاطعتهم
لمياء،،، معقوله بعد كل هل سنين؟
سراج،،، شوفي هو اكو حلقه مفقوده بموضوعها للان ماافصحتلي عنها لكن متأكد عايشه شي كبير الى درجه حتى اهلها ماسامحتهم والمشكله هل الحلقه المفقوده هي ألي مشككتني بيها
لمياء،،، تصدك اني ولامره اقتنعت انو سيلين ممكن تبيعك وتتزوج علمود الفلوس ﺟنت دائما احسها مجبوره لكن ارجع اغالط نفسي واكول اهلها يحبوها ولاممكن يجبروها ماتصورت يطلع منهم هل شي
سراج،،، من سمعت أتمنيت اروحلهم واخلي كل واحد براسه طلقه واطفي نار گلبي المحترك بسببهم وسبب جدي
لمياء،،، الله ياخذ حقكم منهم ويعوضكم
سراج،،، ان شاء الله
لمياء،،، وهسه رجعت علاقتكم
سراج،،، تصوري فجئه من بعد هل الموضوع كل شي تغير
لمياء،،، شوقتني ارجع اشوفها مشتاقتلها وصار عندي فضول اشوفها من كثر ماتغزلت بيها
سراج،،، هي أجتي هنا بيوم العزيمه بس الضاهر ماشفتيها
لمياء،،، ياااا هاي شوكت اني شفت البنات بس ماشفتها
سراج،،، كتلج متغيره ومع الاسف وهل شي قاهرني هي تاركه الحجاب
لمياء،،، لااا ليش؟ جانت كلش ملتزمه بحجابها ولبسها
سراج،،، مااعرف لمحتلها كذا مره عن الموضوع لكن مااهتمت وفوكاها مطوله شعرها وصابغته لون أفتح وأضافتا أناقتها كل هذا مخليها تصير فتنه واني احترك من وراها
لمياء،،، اوكف لحضه،، بالعزيمه وحده جذبني جمالها كانت لابسه مشمشي وفاتحه شعرها طويل معقوله هيَ؟
سراج بابتسامه،،، اي هيَ
لمياء،،، ياربي معقوله شفتها وماعرفتها ولو هي كانت لابسه مناضر شمسيه خافيه عيونها اوه سراج حقك صار ساعه تتغزل بيها اني مره وجذبتني انت شلون؟ بس تدري بيومها من شافت اسراء مااحترمتها ولاعبرتها وتعالت وتصرفت بغرور
سراج،، كتلج شخصيتها متغيره بس ترا مومغروره يجوز سوت هيج من سمعت اسراء زوجتي
لمياء،،، اي يجوز غارت منها ولو ماكو مقارنه مااعرف على شنو غارت منها بس يمكن غارت عليك انتَ،،،، اي شبيك تباوعلي هيج وتبتسم هاي معناها بعدها تحبك
سراج،،، ياحب اني وياها عبرنه مرحله الحب العادي
لمياء،،، لازم وضعكم هواي متطور؟
سراج،، من أجتي بالعزيمه بيومها عرفت فراقنا اذاها هي هم موبس اني
لمياء،،، شلون عرفت؟
سراج،،، بالبستان من شافت اشجار المشمش عيونها لمعت اعرفها تحبه صرت اقطفلها وانضفه وانطيها
لمياء،،،، هههههه للان مابطلت هل عاده تخاف من الحشرات
سراح،،، من اكلت من ايدي كلش فرحت لكن راحت فرحتي من عرفت صارلها عشر سنوات
ماماكله مشمش تصوري حرمت اكله على نفسها لأن خسرتني وخسرت ابوها بنفس الوقت
لمياء،،، ياربي شنو هل القهر
سراج،،، لعد اني شكول من سمعت كلامها نار شبت بيَ
لمياء،،، تدري عندك بنات؟
سراج،،، اي وشافتهن لوتشوفين من سمعت بأسم بيلين هههه،،، شاطت خزرتني خزره نضرتها تكلي هذا اسم بنتنا اني وياك شلون تاخذه
لمياء،،، حقها والله
سراج،،، من شافت سيلين وسمعت باسمها فجئه تغيرت ملامح الغضب هنا انصدمت تباوع عليه مامصدكه سميت بنتي على اسمها لوتشوقين شلون حضنتها عبالك بتها منضرهم دمرني تمنيت لوكانت صدك امها بس هيَ بعدها ضلت تلوم بيَ
لمياء،،، ليش؟
سراج،،، تكول غلط سميتها على اسمي اكيد امها اخذت موقف لأن تعرفني
لمياء،،، حقها والله كلامها صح وهاي شفت بعينك شسوت اسراء بهل طفله دمرتها وكله سبب الاسم
سراج،،، كافي تلومون بيَ اعرف غلطت وندمت بس بوقتها مافكرت هيج ولاحسبت حساب المستقبل ردت بس شي يذكرني بيها وبس شمدريني اسراء هيج راح تسوي ليش اكو وحده تعاقب بتها لحمها ودمها بس علمود اسم وين مشاعر الأ؟ مومه
لمياء،،،هذا في حال لوكانت اسراء بشر ومحسوبه عالبشريه وتترجى منها الأمومه مواسراء لاذمه ولاضمير همزين خلصت منها
سراج،،، أتأخرت هواي بس تعرفين كل الصار
لمياء،،، حقك وماكو احد يلومك مثل ماهسه من حقك تتزوج الأنسانه التحبها والخسرتها قبل بسبب اسراء وجدي
سراج،،، هي وينها صار يومين مختفيه لاحس ولاخبر شلعت گلبي وراحت
لمياء،،، تدري بيك طلكت مرتك
سراج،،، لا
لمياء،،، زين تندل بيتها
سراج،،، اي
لمياء،،، شنو تنتضر الباجر روحلها وفهمها انتَ طلكت مرتك واطلبها للزواج
سراج،،، اخاف هل شي يزيد الوضع سوء وتضل تلوم بيَ وبنفسها وأكيد راح تكول مااريدك تهدم بيتك
لمياء،،، فهمها وضعك ويازوجتك وتقدملها صدكني اذا بعدها تحبك راح تتفهم وتوافق
سراج،،، معقوله يصير هل شي والله صار حلم
لمياء،،، توكل على الله وهسه تشوف توافق وترجعون
سراج،،، الله يسمع منج ان شاء الله
لمياء،،،، ههههه
سراج،،، شبيج؟
لمياء،،، اني شبيه شوف نفسك شلون تغير وجهك ونضرت عينك شنو هل الحب القادر يغير حالك بلحضه يكئبك وبلحضه يرسم السعاده على وجهك
سراج،،، تعلقت بيها هواي هذيج الفتره كلش صارت قريبه مني اهتمامها وكلامها كل شي بيها خلاني مااتصور حياتي من دونها
لمياء،،، انت من قبل تحبها شنو الجديد؟
سراج،،، اني الشخص الحب نفس المرآه مرتين
لمياء،، شنو الفرق بالنهايه حبيتها نفسها؟
سراج،،، اكو فرق
لمياء،،، شلون؟
سراج،،، قبل چنت شاب ببداية شبابي كان مفهومي عن الحب مختلف من شفتها انعجبت بيها وشفتها حلوه وبنيه نضيفه ومؤدبه حبيت اخلاقها شفت بيها المرآه المناسبه حتى ارتبط بيها وحبيتها اما هسه اختلف الوضع اليوم اني رجل ثلاثيني صرت اكثر وعي ونضوج افكاري اختلفت صارت مو اي امرآه تستهويني ولا الجمال من اول اولوياتي صرت ابحث عن الشخصيه والكارزما عن الأخلاق والنضوج الفكري ابحث عن المحبه والتفاهم والأنسجام والأهتمام وهذا ميمنع اكيد الجمال يكون موجود
لمياء،،، يعني شنو قبل أنعجبت بيها وهسه يله حبيتها؟
سراج،،،لا،،حبيتها بالمرتين،، حبيت سيلين القديمه بأفكار وعقلية سراج القديم وهسه حبيت سيلين الجديده بأفكار وعقلية سراج الجديده حبيتها رغم تغيرها الجذري تصوري اكره المرآه ألي تكون جريئه بكلامها لكن حبيت هل صفه بسيلين حتى جرئتها حلوه مابيها تجاوز لخطوط الحياء عند المرآه بأختصار أنعجبت بيها وحبيتها قبل وهسه احبها واعشقها اتنفسها وميت عليها
لمياء،،،، وليش هسه حبيتها لهل درجه وبهل قوه شنو السبب بالنتيجه هي نفسها سيلين؟
سراح،،، قبل حبيتها لأن عجبني جمالها واخلاقها وبرائتها كانت مثاليه بالنسبه ألي اما هسه رغم المميزات الجديده البيها وتجذب اي رجل لكن سيلين الجديده مكتسبه هواي صفات سيئه خلال هل سنين ورغم هذا حبيتها وليش؟ اني نفسي مااعرف ليش حبيتها حبيتها وبس بدون اسباب كل شي بيها احبه بحسناتها وسيئاتها بكل شي بيها اعشقها أعشق كل تفاصيلها الى درجة صرت ماأتخيل حياتي من دونها...
شبيج هيج تباوعين عليه؟
لمياء،،، سراج انت تخوف
سراج،،، اخوف،،، شنو؟
لمياء،،، مشاعرك تخوف،،، مرعبه،،، هاي مومشاعر هاي دمار ألك،، انت قبل تحبها نصف هل الحب صار سنين متدمر عليها ومانسيتها شلون هسه وانت هاي مشاعرك انت مهوس بيها هاي حقيقه كلش واضحه عليك مومجرد كلمه اذا ماصار نصيب شيصير بيك؟
سراج،،، شنو هل كلام الله ليكولها ماكو هيج شي ميصير،،، اصلا مااسمح بهل شي،،، خسرتها مره اموت ومااسمح هل شي يتكرر
لمياء،،، هاي دنيا منعرف شنو مضموم ألنا
سراج،،،، لميااااااء،،، لتخبليني شنووو هذاااا كلامج ليش تفاولين علينه بهل كلام،،، كتلج متعوفني هي ألي متصير لغيري اكيد نتزوج هل مره اكيد ماراح ينعاد الصار بينا قبل مامعقوله وبعدين قبل أحنا السبب بسببنا اهلها فسخوا الخطوبه وزوجوها لواحد ثاني اما هسه ماكو سبب يمنع زواجنا وراح كل شي اسوي حتى نتزوج لتصدكين هل مره اسمح لأي شي ولا لأي شخص يخليني اخسرها كل شي مستعد اسوي حتى تصير ألي كل شي
لمياء،،،، اسفه،،،اهدء،،، شبيك،،، موقصدي والله هيج مجرد افترضت افتراض
سراج،،، مره ثانيه لتفرضين شي ميصير سيلين ألي
لمياء،،، اي تمام هاي هيَ الباجر روح احجي وياها حتى نروح نخطبها وتتزوجون بأسرع وقت بس لتصير عصبي
سراح،،، اني موعصبي،،، يله آذن روحي صلي واني هم راح اروح اصلي وياريت هل الكلام يبقا بينا
لمياء،،، اكيد،،، بدون متوصي
عفته ودخلت اتوضى شكد فرحت من رجع فتح گلبه ألي وسولفنه لكن فرحي تحول الى خوف،،، خفت من وضع سراج خفت منه وعلي ولاكأنما اخويه سراج الأعرفه وضعه موتمام فعلا مشاعره خوفتني صار مهووس بشي اسمه سيلين ورافض قطعا فكرت انو متصير أله ادعي من الله توافق ويرجعون ويتزوجون وألا هل مره سراج ينتهي
بيومها كانت بداخلي مجرد مخاوف لكن ماتصورت هل مخاوف تصير حقيقه وتقضي على سراج وتدمره وتنهي
