رواية اسيرة بين يدي قاتل ابي الفصل الثاني عشر12 بقلم نور آل زيادة
عندما احببتك احببتك بقلب طفل يخشى ان يفقدك...
وبقلب مسن أكتفى من هذه الحياة بك..
حبك حياة لقلبي وموطن لي وكيف للمرء ان يعيش دون وطن؟ 
__________
سيلين،،،قبل لااكمل كلامي صارت خبصه برا الغرفه فجئه انفتحت الباب بهجوميه طفرت من مكاني مرعوبه وعيوني تشخصت بأتجاه الشخص الفتح الباب دخل مصطفى بسرعه
مصطفى،،،، آسف ازعجتكم ودخلت بهل طريقه بس خوالي رجعوا وأجيت ابلغكم
سراج،،،،، طا** حضك،،، اكو واحد هيج يدخل،،، شبيك؟
مصطفى،،، اعتذر شيخ بس يعني كلت اخاف يشوفوكم
سراج،،، واذا شافونا؟ بايكين،،، ناهبين،،،شبيك؟
سيلين،،، لا،، حقه،، واكفه وجودي هنا،، اني اروح
مصطفى،،، مااقصد والله
سراج،،، وين رايحه؟
سيلين،،، مره ثانيه الحمد الله على سلامتك استاذ تگوم بالسلامه
همس....
سراج،،، لتروحين ابقي هسه اطردهم
سيلين،،، ابتسمتله وهمست....
_ميخالف ،،، لازم اروح مااريد تصيرلك سالفه وانت بهل وضع،،، ديربالك على نفسك والله يخليك من اتصل رد عليه لأن بالي راح يضل يمك
ابتسملي،،، سلمت وطلعت فعلا بس عبرت الممر شفتهم يدخلون
نزلت راسي ومشيت طلعت من المستسفى سمعت صوت مصطفى انداريتله
مصطفى،،، ست سيلين آسف ازعجتج بس عندي كلام وياج
سيلين،،، تفضل اسمعك
مصطفى،،، هو سؤال واحد،،، شنو بينج وبين خالي؟
سيلين،،، رفعتله تك حاجب ماعاجبني سؤاله
مصطفى،،، لتفهميني غلط اني ماجاي احاسبكم اكيد،،، بس اريد اعرف شنو مشاعرج اتجاهه؟
سيلين،،، كل الأحترام والتقدير أله،، استاذ سراج مديري بالعمل
مصطفى،،، فهمت متريدين تجاوبين،،، راح اگلج شي واحد اذا تحبي تقبلي بكل ضروفه ولتعوفي ابد خالي ماناقص كسرت گلب جديده واذا متحبي ابتعدي عنه قبل ليزيد تعلقه بيج
سيلين،،، انت ليش هيج تحجي؟
سراج،،، لأن من الواضح خالي عنده مشاعر أتجاهج
سيلين،،، ومنو كال؟
مصطفى،،، كلشي بي يكول،، نضرته وكلامه وتصرفاته ولهفته ووضعه ألي يتغير ويصير شخص ثاني وياج وهلوسته بأسمج والصار بي هسه اكدلي كل شكوكي
سيلين،،، مصطفى انت تحفض الأسرار؟
مصطفى،،، اكيد وعلى كص رگبتي
سيلين،،، انسى السمعته حتى لتجي دوخة راس لخالك
مصطفى،،، مافهمت شي ولاجاوبتيني؟
سيلين،،، لأن حاليا ماعندي جواب لكلامك
مصطفى،،، وضحيلي؟
سيلين،،، موكل شي لازم نفهمه اكو اشياء مبهمه والأفضل تضل هيج،،،، يله روح وديربالك على خالك ترا تعبان ويكابر
مشيت وعفته لاانطيت حق ولاباطل وهو هذا الصح حتى لومصطفى خوش ولد لكن يبقى من هل العائله و ألى ان تنفضح الأسرار خلي متوهم انو اني غير سيلين ويضل يفكر ياترى سراج يهلوس بأسمي لو بأسم خطيبته القديمه
.
.
ضل يومين بالمستشفى خلالها كنت على تواصل ويا اطمئن على صحته وهو رغم وضعه الصحي لكن احسه طاير بأهتمامي
طلع من المستشفى وعرفوا اهله واقربائه وطول النهار عدهم ضيوف وهوسه وعزايم صرنا اكثر شي نتواصل بالليل وهل شي زاد استغرابي وتسائلاتي وين زوجته عنه وهو يتصل او حتى من يراسلني؟
كان دائما يبينلي هو بخير وصحته تحسنت بس واضح من صوته شكد تعبان ومتألم اصابته ماكانت سهله
ورا يومين من خروجه من المستشفى بالليل دخلت بسريري حتى انام جهازي رن استغربت اتصاله بهيج وقت متأخر جاوبت بسرعه اجاني صوته لكن كان مبين كلش تعبان
-اسف على اتصالي بهيج وقت اتمنى مااكون كعدتج من نومج؟
سيلين،،، لابعدني مانايمه للان،،، سراج بيك شي؟
سراج،،، مابيه شي بس أحتاجيت اسمع صوتج حتى اكدر انام
سيلين،،، عمري انتَ موجوده شوكت متريدني اصلا على بالي و افكر بيك
سراج،،، تفكريين بيَ؟
سيليت،،، اي،، بالي يمك وضعك ماعاجبني وفوكاها ضغط الخطار والهوسات والعزايم احسك مامرتاح
سراج،،،، ااااااخ،،، هو ليش ماكو شخص بهل دنيا يحس بيَ ولايفهمني غيرج؟
سيلين،،، يمكن لأن ماكو شخص يحبك بكدي
سراج،،، اويلي يابا ناويه هل اللبنيه على موتي
سيلين،،، سلامتك ياروحي بيَ ولابيك
سراج،،، اسم الله بيش طالبه روحج اني وكلشي بيه يروحلج فدى
سيلين،،، ماكتلي شنو بيك موعوايدك تتصل بهيج وقت؟
سراج،،، مااكدر انام كلش تعبان
سيلين،،، وين مصطفى عنك ليش مينطيك مسكن
سراج،،، موجود خطيه هل مسكين أبتلى بيَ هسه نايم وبعدين اني صحتي احسن
سيلين،،، لعد شنو متعبك؟
سراج،،، انتي سيلين انتي سبب تعبي
سيلين. آني!! ليش؟
سراج،،، غفيت دقائق حلمت بيج حلم كعدت مفزوع وگلبي يوجعني
سيلين،،، سلامت گلبك لتفكر وتخلي أبالك،، مجرد كوابيس بسبب المرض والتعب واكيد حرارتك مرتفعه اتمنى اني هسه يمك وأعتني بيك بس ما باليد حيله
سراج،،، ااااخ،،، حلم والله حلم،، شوكت يجي هل يوم وننجمع؟ موگلبي خلص من التعب والصبر والأنتضار ولوعة آلفراك
سيلين،،، الله كريم ارتاح انتَ هسه،، اهم شي عندي تكوم بالسلامه مو مرضك اخذ حيلي احس وجعك بيه موبيك تدري من اختفيت احس ضاق النفس بيه ونار مشتعله بصدري ماكنت اعرف هل نار موجوده بصدرك على شكل رصاصه
ياترى شنو هل الآحساس تخاطر لو شنو بالضبط؟ ليش گلبي يحس بيك مثل مايحس بسيف؟
احبك مثل المحبين،،، وأحس بيك مثل احساس ام بضناها من يصير بي شي،،،،،،،، سراج؟
سراج، مممم
سيلين،،، وينك نمت؟
سراج،،، لا أكيد بس مستمتع وطاير بكلامج وأحساسج مااريد تسكتين ابد،،، اتمنى طول العمر اضل أسمعج وأنتي تعبريلي،،،تدرين كلامج بالنسبه ألي احلى من احلى شعر؟
وين چانت هاي شخصيتج ضامتها عني؟
سيلين،،، أني نفسي ماأعرف
سراج،،،، أتذكر چنتي طول الوقت هادئه وساكته وخجوله ومع هذا چنت ميت بيج،،،، شلون بيَ هسه أحس حبي صار اضعاف،، كل كلمه تنطقيها دوا لروحي تاخذيني بكلامج لغير عالم عالم اتمنى مااطلع منه نبقى بس اني وأنتي بي وننسى الدنيا
سيلين،،،سراجي ونعوف اولادنا؟؟
اني ماافكر مثلك اتمنى ننجمع سوا اني وياك وأبنا وبناتنا سوا ونربيهم صح ونعتني بيهم ونجيبلهم بعد اخوان وخوات وتكبر عائلتنا وتصير ابو الآمين واني ام الآمين ونشيب سوا ويضل حبنا لأخر يوم بعمرنا
سراج،،، شنو جاي تسوين بيَ سيلين؟ والله اني مو حمل هل المشاعر وهل الآحاسيس الجاي احسها وياج،،، صاير ماحب ولاأتخيل اعيش شي بالدنيا ألا وياج
سيلين،،، انت الشيخ سراج ابو الآمين كدها ونص انت ألي تحل المشاكل بعشيرتك وباقي العشائر ومن كبار المحامين الكل يحجي بقوتك وهيبتك معقوله متكون كدها؟
سراج،،، ويا كل الناس اني شخص ووياج شخص ثاني،،، انتي قوتي وأنتي ضعفي كلامج وأفعالج تكدر تسعدني وبنفس الوقت تكدر تدخل الحزن والتعب بداخلي كل كلمه تنطقيها تحرك كل شي بيَ حتى احلامج مميزه مثلج شكد تعبان هسه بس بهذا كلامج احس نفسي هسه اريد اكوم على حيلي واركض اريد بأسرع وقت ننجمع ونحقق هل الحلم طول عمري ضايع ومشتت ولامره حسيت نفسي كونت عائله يمكن لأن عمري كله ماحلمت أكون عائلتي غير وياج وتمنيت اطفالي منج
سيلين،،، بناتك هنَ بناتي مادامهن قطعه منك يعني مني،،، حبيتهن وتعلقت بيهن من اول لحضه
سراج،،، اي انتبهت لهل شي
سيلين،،، واني هم انتبهت وشفتك شلون تعلقت بسيوفي تعرف ليش،، لأن قطعه مني شفته ابني وبس لهذا أحنا من نتزوج من اول يوم راح نكون كونه عائله بيها اطفالنا سيلين وبيلين وسيف وان شاء الله يجيهم اخوان
سراج،،، سيلين بعد مااتحمل كافي خلي نتزوج
سيلين،،، ههههههه شكله كلامي حمسك
سراج،،، احجي صدك مااتشاقى
سيلين،،، الله كريم هسه صير زين وبعدين نتناقش بهل موضوع
سراج،،، سيلين....
سيلين،،، سراج حبيبي عوف هل كلام وأنتبه لصحتك هسه اهم شي عندي،،، وكعد مصطفى خلي ينطيك مسكن شويه نام وارتاح السهر موزين عليك وخصوصا اني متأكده حتى اكل مااكلت
سراج،،، شمدريج؟
سيلين،،، يعني صدك مو؟
سراج،،، لا اتشاقى طبعا اكلت
سيلين،،، اي صحيح مبين كلش واضح،،، تعلمني بيك،، اعرفك من تتمرض متحب تاكل نهائيا
سراح،،، للأن تتذكرين؟
سيلين،،، ولايوم نسيت تفاصيلك
سراج،،، لا ويلوموني شلون حبيتج لهل درجه وليش مانسيتج هو المثلج هم تنسي
سيلين،،، اكيد،، لااا،، ههههه
سراج،،، ها اشتغل الغرور
سيلين،،، اذا ماانغر على حبيبي عليمن انغر وبعدين شلون ماانغر واني حبيبة الشيخ سراج
سراج،،، لسانج العسل هذا مو وكعني وكعني ونهاني على الآخر صرت اسير مشاعري ألج
سيلين،،، هو هذ المطلوب
سراج،،، شنووو؟
سيلين،،، قصدي معناها لساني ديوصلك مشاعري ودتفهمني زين وهو هذا المطلوب
زين حبيبي اخذ راحتك نام وارتاح وقبلها اخذ علاجك لتخلي بالي يمك اذا عندي خاطر يمك اهتم لنفسك
سرام،،، تمام
سيلين،،، ودعته ونهيت الأتصال لطمت حلگي على هل جفصه همزين تداركتها ان شاء الله ميكون انتبه ولو هو ذكي يلكفها بسرعه بس الواضح هايم بيه وضايع ومااضن يركز،،،، ضليت افكر بخطواتي القادمه الى ان نمت
يومين سراج مامداوم بالمكتب والكل يتسائل على عدم تواجده
خلال هل يومين تواصلت ويا حتى اطمئن علي وكالعاده احسسه بأهتمامي بي وأسولفله تفاصيل يومي خليته يحس هو جزء من يومي وحياتي اما اني صرت محور ليومه تملكته بالكامل
ورا هل اليومين داوم بالمكتب الكل انتبه لوضعه وشكله التعبان وافتهموا كان مريض تحمدوله بالسلامه من غير ميتطرقون لسبب مرضه
انتبهت عينه عليه شفت بيها لهفه مع انو اكثر الوقت أحنا نتواصل
مر وقت وتحججت حتى اروح لمكتبه صارت ميساء بوجهي
ميساء،،، وين شعندج تحومين عليه؟
سيلين،،، اني موانتي حبيبتي،،،أني مااخذ شي مو ألي ولا اغوي رجال گلبه ويا غيري لو اموت،،، لهذا أنتبهي لكلامج قبل لاأوصله للشيخ وهو يتصرف وياج
شاطت من الغضب عفتها ومشيت طرقت الباب سمحلي بالدخول رفع راسه اول ماشافني ابتسم وكام من مكانه
غلقت الباب ومشيتله بسرعه وحضنته هو مااتوقع هل شي حسيته جمد وجسمه رجف ابتعدت بسرعه
_اسفه،،، اسفه،،، نسيت نفسي يمكن
سراج،،، احممم،،، يعني
سيلين،،، يمكن من كثر مامشتاقتلك ماعرفت اتحكم بمشاعري
ابتسم الى درجه حسيت قلوب تطلع من عيونه
_شلون صرت حبيبي ان شاء الله احسن؟
سراج،،، الحمد الله زين وهسه صرت أحسن
سيلين،،، ماصارلك كم يوم حتى جرحك بعده ماطاب شلون داومت؟
سراج،، مااكدر اعوف شغلي اكثر تعرفين الوضع هنا وصراحه مشتاقلج ميت على شوفتج
سيلين،،، عمري أنت َموبكدي،،،بس ياعيني موزين عليك،،على العموم ارتاح وأي شي تحتاجه اني اساعدك بي لتعب نفسك اخاف يصير بيك شي بعده جرحك
سراج،،، يروحلج فدوه سراج على هل الأهتمام
اني شلون كدرت كل هل السنين اعيش بدونج؟
سيلين،،، ومنو كلك چنا عايشين؟
سراج،،، اي والله صدقتي ماچنا عايشين چنه مجرد أجساد عايشه نمَشي وقت والعمر يمشي بينا وهي عيشه والسلام
سيلين،،، حياتي ليش هيج وجهك اصفر وتعبان وذبلان مامتعوده اشوفك هيج؟
سراج،،، مابيَ شي هيج مجرد أجهاد وتعب بسيط
سيلين،،، اكلت شي؟
سراح،،، يعني،، اكلت خفايف
سيلين،، بس انت محتاج غذاء صحي ومشبع حتى صحتك ترجعلك
سراج،، مااخفي عليج أحنا أكلنا كله دسم وثكيل كله منسف وهبيط ومرگ ومقالي كلها دسمه وثكيله عليه،، من آكل وتنزل اللگمه أحسها توكف بصدري
سيلين،،، سوده عليه وليش ميسوولك سوائل اكيد ماراح تضل جوعان؟
سراج،، سوائلنا سوب لحم لو شوربة عدس وكلها ثكيله ومتنبلع ويايا
سيلين،،، ياريت أنتَ يمي وأعتني بيك وأحطك بعيوني،، هي هاي مداراتهم للمريض؟ لتزعل
سراج،،، لا ترا داروني اكيد بس كتلج اكلنا ميرهم لوضعي
سيلين،،، ولو،، المفروض اكلك خاص على العموم عوف شغلك وأرتاح لأن احسك بصعوبه واكف
مسكته من ايده وسحبته للقنفه ألي بالمكتب درت ضهرها للخلف تحولت سرير
_نام شويه هنا..
سراج،،، مترهم،،، مااكدر
سيلين،،، لاترهم ماأخلي احد يزعجك
اليوم هو لابس زي عربي عكس كل يوم لأن الضاهر اريحله اخذت العبا نام وغطيته ولفلفته ابتسملي
سراج،،، أحس نفسي طفل وأمي تغطيني؟
سيلين،،، تقربت منه حسيت دقات قلبه وصلت لمسامعي،،، همست
_انت حبيبي وروحي وصديقي وأبني وكل حياتي
ابتعدت اباوع علي نضراته هايم بيه وضايع منتهي عفته بتوهانه،،، طفيت الضوء وطلعت بلغت السكرتيره تمنع دخول اي شخص بأمر منه
رجعت لمكتبي اليوم وحدي بالمكتب اسماء مجازه صار يومين
اتصلت على سميه وبلغتها تحضرلي شوربة دجاج تركيه وطلبت منها تهرسها جيد وترسلها بيد السائق
ساعه وطلعت للباب استلمتها اخذتها وتوجهت لمكتب سراج وطبعا السكرتيره ضاله بس تصفن عليه ومافاهمه شي
طرقت الباب ودخلت لكيته نايم ويادخولي فتح عيونه
_ كوم حبيبي أكل شي أسند نفسك بي،، لتضل بلا أكل
سراج،، صدكيني موجوعان ولا أكدر أكل
سيلين،،، اعرف لهذا جبتلك شوربه صحيه ومتأذيك خفيفه
كعد واضح علي جوعان بس ميكدر ياكل أي أكل يعني فعلا أهله شلون يفكرون،، شخص مريض شلون ميسووله اكل خاص كاتلهم النفخ اهم شي اللحوم والدهن والبزڠ
طلعت الشوربه وقدمتها أله بلش ياكل والضاهر عجبته وكدر يبلعها من غير متأذي صدره
اكل شويه واكتفى اخذت منه الملعقه وغرفت من الشوربه وقربتها ضل يباوعلي مستغرب
_اكل لخاطري بعد
سراج،،، صدكيني شبعت
سيلين،،، مو شبعت وأنما تعبت
سراج،،، شمدريج؟
سيلين،،، كتلك احس بيك
سرح بوجهي وآللمعه البعيونه هيَ التنطق مشاعره بدال لسانه
أكل من ايدي وكلته مره ثانيه مامانع ضليت أوكله اشوفه طاير من السعاده
فعلا الرجل عبالك طفل كبير صدق من قال هل شي رغم قوته وهيبته وشخصيته بس بداخله طفل يحب الحنان والأهتمام خصوصا فاقد الأهتمام بصغره
وكلته وطلعتله كلينكس مائي مسح بي
اشوف حتى وجهه ورد،،، الضاهر وجه اصفر لأن ميكدر ياكل
بقى من الشوربه غلقت الحافضه ووضعتها بثلاجة المكتب
__ارتاح هسه اجيبلك چاي اشرب وأخذ علاجك
سراج،،، سيلين شدتسوين ترا أحنا بالمكتب
سيلين،،، لو بالشارع هم ميهمني،،، عندي اهم شي هسه صحتك كتلك وضعك ماعاجبني وحتى دوامك اليوم غلط بس شسوي بعنادك
طلعت جبتله چاي ورجعت شربه طلبت منه ينام طلعت عفته يرتاح ورجعت كررت نفس الكلام للسكرتيره
توجهت لمكتبي وشفت ميساء تخزر بيه ولااهتميتلها سويت كم شغله عندي. مرت كم ساعه وانتهى الدوام واكثرهم طلعوا صار المغرب وسراج ماأله حس
رحت لكيت السكرتيره تلطم لأن تأخرت طلبت منها تروح،،، مارضت وخافت،،، بس اكدتلها اني اتصرف
راحت واني دخلت للمكتب لكيته نايم نوم عميق ضليت اباوع علي وسرحت بشكله ليش مااعرف انتبهت ووعيت على نفسي وقررت اكعده،،، فز
_ اسم الله شبيك هاي اني
سراج،،، شتسوين يمي شلون اجيتي للبيت؟
سيلين،،، هههه،،، اصحى حبيبي،،، يابيت؟ احنا بالمكتب
سراح،،، اي صدك نسيت شلون اخذتني نومه نسيت نفسي،،، بس تدرين هواي ارتاحيت عبالك صار سنه منايم لأن بيتنه هوسه وخطار وناس طابه وناس طالعه حتى بالليل هوستهم متخلص
سيلين،،، نوم العوافي اهم شي ارتاحيت
سراج،،، احس حتى طاقتي تغيرت
سيلين،،، اكيد لأن اكلت ونمت زين،،، مناعتك قوت،،، بعد هل نومه اكيد كاعد جوعان موو؟
ابتسملي خجلان...
سيلين،،، ياروحي وعمري حبيببي جوعان؟
سراج،،، سيلين لتعامليني مثل ابنج
سيلين،،، أنتَ مو أبني،، انتَ قطعه من روحي
ابتسم ابتسامه واسعه...
سراج،،، خجلتيني بكلامج حتى بعد مااكدر احجي
سيلين،،، طلعت الشوربه وطلعت خارج المكتب عدنا مايكرو ويڤ للموضفين سخنتها وأخذته أله اوكلك لو تاكل؟
سراج،،، لاحبيبي اكدر اكل
اكلها بشهيه خلصها كلها
سراج،،، عاشت ايدج
سيلين،،، بالعافيه هاي طبخ سميه بس اني تعلمتها من صديقتي وسميه تعلمتها مني
سراح،،، تشكريلي منها صراحه كلش طيبه وخفيفه ابد ماأذتني
سيلين،،، آلف عافيه
سراج،،، اليوم غديتيني وعشيتيني
سيلين،،، لو يمي اشيلك بعيوني
سراح،،، اروحلج فدى انتي وعيونج ليش انتي مقصره
سيلين،،،طلع چكاره يريد يدخن سحبتها منه
_كافي ماكو بعد تدخين مو زين عليك
سراج،،، تعودت مااكدر بعد
سيلين،،، قبل اكثر شي تكرهه الچكاير حتى تلعب نفسك منها وهسه متنزل من ايدك،، ليش هيج؟
سراج،،، للان مااحبها بس اضطريت عليها
سيلين،،، شنو يجبرك؟
سراج،،، قبل عشر سنوات بعد الصار بينا بديت أدخن ومن يومها صارت متفارق ايدي
سيلين،،، هسه اني يمك بعد وصحتك تعبانه موزين عليك،،، لخاطري عوفها وأعتني بصحتك
سراج،،، ان شاء الله
سيلين،،، ألي بالمكتب تقريبا كلهم طلعوا
سراج،،، نسيت نفسي قضيتها نوم هسه شيكولون عليه؟
سيلين،،، ماكو اي شخص يدري غيري لتهتم دبرت الأمور
طلعنا سوا اني رجعت للبيت وهو راح لبيته بالليل بعد ماخلصت روتيني وياابني وسويت عنايه لنفسي كالمعتاد قبل لاانام اتصلت اطمئنيت علي وبعدها نمت
ثاني يوم كعدت الصبح سويت شوربه صحيه وعصير طبيعي وسويتله حلو خفيف وعدت نفس الشي السويته قبل يوم اهتميت بي،، احسه طاير على هل الأهتمام
ثلاث ايام ويا الأهتمام صحته تحسنت تقريبا رغم هذا ضليت اسبوع اسويله اكل وعصائر صحيه الى ان استرد صحته بالكامل
عاملته مثل الطفل وهو تعلق بيه كأنما طفل تعلق بأمه وهذا تعلق من نوع ثالث تعلق بيه كحبيبه وبعدين كصديقه تشاركه كل تفاصيل حياته ويومه ووقته وهسه تعلق جديد يعني بأختصار صرت اهم شي بحياته خصوصا اني اهتميت بأدق تفاصيل حياته حتى بناته اهتم من بعيد بيهن اشتريلهن هدايا وألعاب وملابس هو يرفض بس اني احاول افهمه هنَ بناتي وهل شي فعلا موتمثيل اني فعلا حبيت بناته وهو بالمقابل حتى يرجعلي الأهتمام يهتم بأبني ويشتريله هدايا
بعد مرور اسبوعين على اصابة سراج رجع لعمله وحياته الطبيعيه ابتعدت شويه عنه حتى ليمل مني لكن هو كان أله رآي اخر
صارت عيونه تدورني بكل مره يمر من امام مكتبي اخر شي ماتحمل اتصل بيه
سراج،،، شبيج سيلين ليش صار يومين مبتعده؟
سيلين،،، موجوده بس شويه مشغوله
سراج،،، وآني؟؟
سيلين،،،أنت شبيك؟
سراج،،، وين اني من مشاغلج وأهتماماتج؟
سيلين،،، اول وأهم اهتماماتي
سراج،،، مشتاقلج وأحسج أبتعدتي عني
سيلين،،، همست،،، وين رحت اني وياك هسه بنفس المكان
سراج،،، بنفس المكان وبعيده عني وكل شي بيه يدورج
سيلين،،، دخل رائد للمكتب جايبلي چاي
رائد،،، سيلي هاي چاي ذكرتج ويايا
سيلين،،، شكرا رائد صدك جبته بوقته
رائد،،، آلف عافيه
سيلين،،، طلع رائد وأجاني صوت سراج ومبين واصل مرحله من العصبيه
سراج،،، وهذا شكو يجيبلج چاي ويذكرج ويا؟ شنو هل آللواكه،، وفوكاها يسميج سيلي،، شنو هل الميانه؟
سيلين،،، هو چاي ترا عادي شدعوه؟
سراج،،،ادري هو محامي لو ويتر يجيبلج لحد يمج الچاي شنو معناتها
سيلين،،، ترا عادي واذا يعني
سراج،،، اي عادي،، كلش عادي،، شكو بيها
سيلين،،، من رخصتك خلي اشرب چايي قبل ليبرد وعندي شغل اخلصه بعدين نتخابر يله،، باي
قبل ليحجي اي شي نهيت الأتصال ارتشفت من الشاي وأني مبتسمه على كلامه وغضبه،، الرجل الهادء الراكز بدى يتحول وهاي علامه ممتازه
ورا ساعتين مر رائد امام مكتبنا صحتله
رائد،،، محتاجه شي؟
سيلين،،، اي عفيه أنقذني متت جوع ومااعرف مين اطلب تكدر تساعدني بهل موضوع
رائد،، بعيوني اني بنفسي اجيبلج
سيلين،،، لا شكرا،، ماكو داعي اني اوصي بس عندك رقم مطعم زين؟
رائد،،، تاكلين شاورما؟
سيلين،،، اي احبها
رائد،،، يمي لعد ،،،، شويه وتاكلين اطيب شاورما
سيلين،،، ابتسمتله ممتنه منه
اقل من نص ساعه دخل للمكتب مبتسم
رائد،،، وهاي اطيب شاورما لسيلينه
سيلين،،، شكرا،،، عاشت ايدك تعبتك
رائد،،، تعبح راحه
سيلين،،،اول ماخلص جملته أجانه صوت سراج بغصب
سراج،،،،رائدشتسوي هنا وعايف شغلك؟
راىد،،، احم،،، هيج،،، شيخ بس أجيت يم سيلين
سراج،،، سيلين!!! بدون ألقاب،،، جيد
سيلين،،، استاذ ضغطي هبط شويه ورائد جابلي اكل
سراج،،، مممم،، وان شاء الله تحسنتي من جابلللللج الآكل؟
سيلين،،، شدد على كلماته حسيته راح ينفجر
سيلين،،، بعدني ماآكلت للأن
سراج،،، خلصي آكلج وتعالي للمكتب عدنا شغل وأنت رائد لتضل تفرفر انت هنا محامي اهتم بعملك انت مو عامل توصيل،، تمام حبيبي
سيلين،،، ارتبك رائد ترخص وطلع
اما سراج بركان يغلي خزرني خزره معدله وتوجه لمكتبه
ابتسمت على وضعه بس المسكين رائد وكع بيها يله ميخالف بكل حرب لازم اكو ضحايا ابرياء
كعدت آكل على اقل من مهلي يمكن نص ساعه وماخلصت عرفت ماراح يتحمل وفعلا اتصل عليه
سراج،،، وين صرتي؟
سيلين،،، كتلي خلصي أكلج وتعالي
سراج،،،٣٢ دقيقه ماكفت تخلصين أكلج؟ لو صينية قوزي هم خلصت
سيلين،،، صدكني الصاج الجابليا رائد اطيب من أي قوزي
سراج،،،، سيييييلين!!!!! لتخبليني
سيلين،،، شبيك ياعيني،، هسه اجيت مالحكت حتى اتهنى بأكلي
نهيت الاتصال،،، هههه حتى الوقت حاسبه بالدقائق الضاهر وصل للحد الأقصى من غضبه
رحتله للمكتب لكيته بارود شايل چكارته ويفتر بالمكتب
سراج،،، واخيرااااا خلص الأكل؟؟؟
سيلين،،، شبيك سراج صاير شي؟
سراج،،، لا حبيبتي سلامتج قابل شنو صاير ولا شي
سيلين،،، اي مو دا اكول مامسويه شي،،، الضاهر اليوم صاير عندك ضغط عمل لهذا صاير عصبي
سراج،،، انتي تريدين تخبليني مووو؟؟!! احجيها حتى افهم؟
سيلين،،، غير اعرف شبيك؟
سراج،،،لتغشمين نفسج تعرفين كلش زين شنو قصدي
ممكن تفهميني شعنده هذا رائد يحوم يمج وكل شويه جايبلج شي؟ شيريد بالضبط؟
سيلين،،،على شنو تلمح؟
سراج،، ماألمح سؤالي واضح شيريد منج؟
سيلين،،، يعني اذا جابلي چاي أو وصالي أكل لأن جعت وضغطي هبط معناها اكو شي؟؟سراج انتبه لكلامك المليان تشكيك،، الكدامك سيلين وتعرف منو سيلين
سراج،،، شلون تفكرين اني اشكك بيج،، ثقتي بيج مابيها نقاش،، لكن ماعاجبني اهتمام رائد بيج وأضن هل شي من حقي
سيلين،،، بصفتك منوو؟
باوعلي جاحظ عيونه مصدوم...
سراج،،، بصفتي منوو؟؟
سيلين،،، هاي حقيقه انتَ من هيج تصرفت ويا رائد بس اثرت الأنتباه،، الكل يعرف انت شخص متزوج وأهتمامك بيَ غلط،،، صح لو لا؟
سراج،،، لتخبليني شنو هل كلام الجديد؟
صارلج كم يوم مبتعده عني وتتهربين حتى اتصالاتج بارده واليوم تطلبين من رائد يوصيلج أكل وكأنما شخص مقرب منج وهسه تكوليلي شنو صفتي وين تريدين توصلين؟
سيلين،،، مااريد اوصل لأي شي وأنما اريد أنهي كل شي
عفته بصدمته ومشيت اطلع من المكتب ماحسيت غير انسحبت ايدي وبحركه سريعه سفطني صار ضهري على الجدار عيونه حمر دم ووجه احمر يريد ينفجر من الغضب كزز على اسنانه
سراج،، هي لعبه؟؟ انتي تلعبين عليه لو شنو بالضبط؟ فهميييييني؟
سيلين،،، لترفع صوتك رجائا لتنسى احنا وين
سراج،،، طززززز،،، بالكل هسه تفهميني انتي شتريدين؟ شنو يوم أريدك وأحبك وتجيني هسه مااريدك واريد أنهي كل شي،،،، انتي ناويه تموتيني والله،،، والله صرت متأكد اني موتي على ايدج
سيلين،،، مامجبور تتحملني اذا هيج مآذيتك
سراج،،، لتلعبين بأعصابي وبمشاعري أنهي هل مهزله وكولي هذا شقه
سيلين،،، مع الأسف مو شقه
ابتعدصاير نار نار يفور يفتر بالمكان مثل المجنون
سراج،،، فهميني ليش؟ شسويتلج اني؟ ليش تعذبيني بهل طريقه وتعرفين اني مااكدر بدونج
سيلين،،، اني هم مااكدر بس هذا الصح
(نزلت دموعي من شاف وضعي تقرب مني متردد احسه يريد يحضني ويتراجع)
سراج،،، كوليلي شبيج شنو غيرج؟ كوليلي زعلانه او اعصابج تعبانه ومحتاجه ترتاحين؟ كولي اي شي،، بس لتكولين نبتعد مااكدر على بعدج صدكيني،، اموت والخلقج اموت وراج هل مره لو رحتي من ايدي
سيلين،،، تعبانه كلش تعبانه من وضعنا
مسح دموعي وكال...
سراج،،، شنو يرضيج اسوي بس لتكولين اعوفج
سيلين،،، اعرف تحبني واني هم احبك وطول هل فتره نسيت نفسي وياك عشت حلم بس صار الوقت نصحى انت متزوج وعندك عائله
عقد حاجبه مستغرب كلامي
سراج،،، شنو آلتغير؟ شنو اول مره تعرفين اني متزوج؟
سيلين،،، نسيت نفسي وياك ومشاعري سحبتني متناسيه زوجتك نسيت مبادئي،،، اني موهيج سراج،،، اني موخرابة بيوت،،، مااعمر بيتي على بيت ثاني،،، مااكدر اتقبل هل الحياة ولااتقبل شخص يشاركني بيك انت اليوم مجرد زميل جابلي أكل وهو والله دائما يكول ألي ولأسماء انتو مثل خواتي ويعزنه شخص محترم مابدر منه اي تصرف غلط ومع ذلك شطت مااتقبلت قربه ووجوده يمي شلون تريدني اتقبل آمراه ثانيه تشاركني بيك؟ والمصيبه تكون زوجتك وام بناتك،،،، صعبه والله صعبه،،، مااكدر،،،
سراج،،، شنو أستجد؟
سيلين،،،،، قبل يومين من اتصلت سمعت صوتها وهي تحجي وياك نار شبت بيه ماكدرت لا آكل ولاانام روحي رادت تطلع ولهذا من الأفضل خلي نسيطر على مشاعرنه ونبتعد قبل لتزيد ومنكدر بعد انسيطر على هل مشاعر
سراج،،، انتي كل عقلج بعد اكدر اسيطر على مشاعري؟؟؟ اني واصل وياج مرحله صرت اتنفسج،،، انتهيت ماضل شي اسمه سراج صار كل شي وكل ذره بيه تنطق سيلين،،، اموت ومااعوفج
وبعدين عن اي زواج تحجين ترا اني واسراء منتهين من زمان باقيه بيتي بصفتها ام بناتي وبس لاازيد ولااقل
سيلين،،، ههه،، قصدك اتقبل اكون زوجه ثانيه مو؟ انت تحجي صدك؟؟ اريد اسألك سؤال،،، شنو شعورك اذا هسه رحت تزوجت واحد ثاني؟
سراج،،،، شتحجيييييين انتييييي؟!!!!!! عقلج وين شلون تحجين هل كلام؟ شنو تزوجين واحد ثانييييي؟؟ ليش مصره تغثيني؟؟؟ كافي،، اصحي وأنتبهي تعيدين هل كلام مره ثانيه،،، ديييييربالج لأن بوقتها معناها قضيتي عليه
سيلين،،، كافي صوتك فضحتنا،،، شبيك اليوم؟ الأفضل انو ننهي هل النقاش العقيم ومن هل دقيقه انتهى كل شي
سراج،،،، قصدج؟
سيلين،،، خلص سراج انساني والأفضل هم اترك الشغل
قبل ليستوعب كلامي تركت المكان رحت لمكتبي أخذت حقيبتي وطلعت مسرعه من المكان كله متوجهه للبيت
اني اعرف ميكدر يترك زوجته هو ألي تركني قبل عرسنا بأسبوع وتزوجها راح يعوفها هسه علمودي؟ اكيد لا
اني تعبت هل موضوع استنزف طاقتي لهذا قررت لهنا و اوقف كل شي و أنهي انتقامي وأبتعد وأهتم بحياتي وأبني وعقابه يضل بحسرتي،،، تعلق بيَ وماكدر يملكني نفس السوا بيه قبل بالضبط
غلقت موبايلي احاول اتناسى كل شي بالليل صار عندي ارق ماكدرت انام متعوده اضل اتكلم ويا كل يوم الى ان انام
عجزت افهم نفسي ومشاعري،، ضليت اجلد نفسي وألومها على هل المشاعر وحتى اتخلص من احساسي تركت سريري متوجهه للدريسنك روم طلعت البوكس ألي بي مذكراتي قريت حتى اذكر نفسي شنو سوا بيَ سراج،،، ليش مااعرف او يمكن اعرف،،، حتى اجبر مشاعري متنجرف أتجاهه
اخذت مذكرتي الجديده كتبت بيها كل الصار واني اكتب لكيت نفسي اكتب حتى شعوري الحالي ومشاعري أتجاهه والتناقض ألي بداخلي وكتبت شنو سويت حتى اتخلص من هل شعور
مر الوقت الى ان سمعت آذان الفجر خجلت من ربي أغلاطي كثرت لكن مع الأسف هذا حالي صار سنوات فجئه تغيرت تركت الحجاب وصرت يوم اصلي ويوم لا اعرف كل هل شي غلط واعرف حتى السويته ويا سراج غلط واعرف حتى حضني أله اكبر غلط لكن مع الاسف بهل فتره ماكنت اكدر اتحكم لابمشاعري ولابتصرفاتي عقلي موبراسي ماكو شي مسيطر عليه غير رغبة الأنتقام ويمكن صار الوقت افتح صفحه جديده بكل شي بحياتي اريد ارجع اصلي وحتى اريد ارجع للحجاب اريد اعوض واكفر عن كل خطا سويته
ثاني يوم اتصل فؤاد على سميه يسأل عني ومتأكده هل شي بطلب من سراج،، سميه كالتله..
سميه،،سيلين مو بالبيت من ترجع أبلغها بأتصالك
مَر يومين اني بالبيت حاولت اشغل نفسي بأي شي واخاف اتصل على ساره لأن اذا سمعت بالشي السويته بسراج تلعب بيَ طوبه ساره كلش متدينه ومترضى بهل الأمور لهذا من البدايه ماكلتلها على شنو ناويه
المشكله كل شي سويت حتى أعَلقه لسراج لكن احس اني هم صابني شي من هل التعلق،،،
وتسائلت زين اذا اني هذا وضعي هو شنو حاله؟
كنت اتصور من اسوي هل شي ويا سراج أرتاح لكن ماأرتاحيت ولاحسيت بشي مجرد الكوابيس ابتعدت عني
ثالث يوم الصبح حسيت على سميه تكعدني
سميه،،، سيلين اكعدي بسرعه
سيلين،،، شكو؟ شبيج؟ شصاير؟ اكو واحد يكعدوا من النوم بهل طريقه
سميه،،، الشيخ سراج
سيلين،،، نهضت مفزوعه،،،، شبيييي؟
سميه،،، هنا
سيلين،،، وين هنا؟
سميه،،، موجود بالبيت كاعد بالحديقه سأل عنج يريد يشوفج
سيلين،،، تحجين صدك؟
سميه،،، لعد اتشاقى ؟
سيلين،،، طفرت من سريري مثل المجنونه ماعرفت شلون اغسل وجهي وأفرج اسناني رتبت وجهي بشي بسيط لميت شعري غيرت ملابسي وطلعت احس گلبي راح يغادر مكانه من شدت النبض
اول ماطلعت رفع راسه شافني عيونه كانت مليانه لهفه وحب نهض من الكرسي مبتسم
سيلين،،، صباح الخير
سراج،،، ياصباح النور،،، شلونج؟
سيلين،،، الحمد الله،،، وانتَ شلونك؟
سرلح،،، مو زين... صار يومين روحي وگلبي يلوبون عليح،،، شلون أنطاج گلبج تعوفيني يومين وتبتعدين؟
سيلين،،، هذا الصح والأنسب والأريح ألنا ثنينا
سراج،،، لو الراحه بالبعد ما تدمرنا صار سنين وأحنا بعاد
سيلين،،، الأفضل نقتنع لاأني ألك ولا أنتَ ألي،،، هاي الحقيقه ألي لازم نتقبلها
سراج،،،، لآخر نَفس بيَ ولآخر لحضه اضل اريدج وحياتي متكمل ولاارتاح ألا وأنتي بيها
سيلين،،، فات الآوان،، الحياة رسمتلنا طرق معاكسه كل مره نحاول نجتمع طرقنه تبعدنا
سراج،،، وداعت حبي ألج،،، وعيونج الأعشقهن مااخلي اي شي يبعدني عنج بس الموت هو الشي الوحيد ألي ممكن يبعدني،،، اني متمسك بيج ومستعد اتنازل عن كل شي بحياتي علمودج لو اعرف هل شي حتى يكلفني حياتي
سيلين اني طلكت اسراء
سيلين،،،، شنوووووو؟؟؟!!!
سراج،،، مثل ماسمعتي،،، كتلج مااسمح لأي شي يبعدني عنج
سيلين،،، بس اني ماكتلك طلكها هاي زوجتك وأم بناتك
سراج،،، أحنا اصلا زواجنا منتهي وجودها بحياتي من البدايه غلط واذا وجودها يبعدني عنج فمن الأفضل تطلع من حياتي
سيلين،،، انت تحجي صدك؟
سراج،،، اكيييييييد
ليش سكتي؟
سيلين،،، شنو احجي؟
سراج،،، فعلا المفروض اليوم اني ألي احجي
سيلين،،، طلع بوكس صغير فتحه بي خاتم
سراج،،، حبيبة عمري وعزيزة گلبي ورفيقة دربي روحي والنفس الأتنفسه ماضيي وحاضري ومستقبلي،،، تقبلين تكملين باقي حياتج ويايه على سنة الله ورسوله ونكمل حياتنه من وين ماتوقفنه بالماضي ونرسم حاضر جديد كله حب وسعاده ويا أولادنه وأوعدج ان شاء الله اعوضج عن كل ألم عشتي بحياتج،،،
سيلينتي،،، تقبلين تتزوحيني؟
سيلين،،، صدمه بعد صدمه مالحكت استوعب الأولى حتى تجيني الثانيه شنو راح اسوي اللعبه صارت صدك شنو راح اجاوبه؟
ضليت اباوع بعيونه المليانه لهفه وحب،، مليانه مشاعر،،، اي شخص بهل دنيا من يشوف عيونه يلتمس مدى صدق مشاعره،،، حسيت گلبي طاير كل شي بيَ تخربط كل شي بيَ يصرخ،،، هذا حبيبج الأول اليوم رجعلج ويريد تجتمعون من جديد يريد يعوضج أتمسكي بي لتعوفي هاي فرصتج تحمست وجاوبته بسرعه اني.....
