رواية خيانة عهد الفصل العاشر 10 بقلم جمانة السعيدي
رحنا صلينا الضهر بمكه ورجعنا للغدا الصراحه اكلهم مو مثل اكلنا طيب اني ما عجبني
اجينا ناخذ غده
...يا شني هاي بانيه صفره طابخيها بهارات وبدون لحم
...اسكتي يفاتن لا يسمعونج
...ولله ولا اسكت ما انطونياها واني اطبخها الهم شبيهم ماعدهم معجون
ما عدهم طماطه هسه اللحم مو بلزوم
ام غزوان كامت تضحك وتكلي ولج اسكتي
التفتت شفت بصفي استاذ حسن
يبوووي سمعني مدري ليش بس الاشياء الي تفشل يسلط عليه بيها
باوعت على صفح شفته يباوع عليه
كال للطباخ الواكف
صدك ماعدكم معجون طماطه تخلون للبانيه وطكها بضحكه
يمه اول مره بهاي الرحله اشوفه يضحك
ماكدرت الزم نفسي كمت اضحك
بعدين رحنا كعدنا اني وام غزوان بعيد عنه وتغدينا
بليل كالو راح ناخذكم المول حلو ورخيص صعدنا بلكيات ورحنا
اني وام غزوان نفتر حتى نشتري
اني اشتريت الاختي وجهالها ملابس
وهديه المرت اخوي
وصلت يم الجنط
لكيت جنطه سفر زغيره كلش عجبتني وياها جنطه ازغيره يدويه
بيها الوان اتلاثه كريمي وجوزي جلد النمر وحده وردي واسود وحده اخضر واسود اني عجبتني الكريمي
التفتت اخذ راى ام غزوان منو الاحلى
مالكيتها يمي مدري وين صارت
التفتت للجهه الثانيه ويه التفاتي شفت حسن التفت على جهتي بدون مايقصد
ما ادري بساعته شلون هيج اتصرفت
اشرتله على الجنطه الكريمي والاخضر منو الاحلى
اشرلي على الكريمي وسوالي اوكي
جمانه السعيدي
اشتريته ومليته ملابس وهدايه والزغيره شلتها بايدي
مشيت اشويه لكيت ام غزوان وشافت الجنطه كالت
....الله شنو هاي الجنطه الحلوه عاش الذوق واهله
...شكرا حبيبتي من ذوقج اتفضلي كدامج
...لاتعالي دليني منيين اشتريتيه اريد وحده مثلها
دليته ورحت على صفحه ثانيه اتفرج
سمعت واحد كال من رخصتج
التفتت هااا استاذ حسن تفضل
...محتاج منج خدمه
...تفضل
..اريد اشتري عبايه للحجيه وما اعرف القماش الزين ممكن تساعديني
...اي اكيد اساعدك وين قسم العبي
...منا تعاي وياي
طبعا المول يغص ويبلع ناس مو بس احنا وكلها تشتري
وصلنا وبقيت ادور بلعبي الحد مالكيت عبايه سوادها مو طبيعي تخبل
جمانه السعيدي
سئل على سعرها طلع شويه غالي بس هو صمم يشتريه
يكول تستاهل الوالده اخذله احسن عبايه
طبعا هو كلش هادء ومو من نوع كثير الكلام وشويه منعزل
ما اشوفه يختلط هواي بالمجموعات
رجعنا للفندق بليل واني فرحانه بلاشياء الي اشتريته
ثاني يوم اخذونا السوك دشاديش رجاليه
كلت الام غزوان عفيه اريد دشاديش الاخواني
كالت خل نشوف الرجاجيل الويانه منيين يشترون نشتري مثلهم
اجينا لكيناهم واكفين يم محل يشترون وضلينا انباوع عليهم شيشترون يا نوعيه وشكد السعر
التفت علينا الحمله كال شني واكفات هنا
فاتن انريد نشتري دشاديس رجاليه
...اشترن من هاي النوعيه كلهم اشترو منها سحب الدشداشه من ايد استاذ حسن ونطانياها انشوفه
حسن...تردن دشاديش هاي خوش نوعيه وسعرها معقول
فاتن ني اريد اتلاثه .اثنيين قياس وسط وحده جبيره الرجل اختي
دفعت فلوسهن ومشينا ولمن وصلت للفندق مالكيتهن ويه غراضي
رحت للحمله اسئله كال نسيتيهن وجابهن استاذ حسن
الحمد لله عبالي ضاعن مني
...لاتخافين هسه ينزل للغده ويجيبهن ويا
..وفعلا جابهن ونطانياهن
...شكرا استاذ تعبتك
...لاماكو كل تعب
ثاني يوم اخذونا الاهل الذهب كلنا رحنا نسوان وزلم حتى الي مايريد يشتري يتفرج
اني عجبتني الكعبه زغيره ذهب واشتريتها
سمعت واحد وراي من رخصتك من رخصتك صار بصفي
...شنو رائيج منو احلى هذا الخاتم لو هذا
...الزوجتك هذا مال عمر نسوان كبار
...الله يرحمها لا الامي
...اسفه مو قصدي
...لا ماصار شي هسه منو احلى
...هذا احلى بس كون تعرف قياسها
...اي اعرف على هذااصبعي
...بلعافيه
...الله يعافيج شكرا لان ساعدتيني
...تدلل
جمانه السعيدي
خلصت رحلتنا الجميله وجمعنه اغراضنه نرجع الارض الوطن
١٢ يوم رحله ممتعه صحيح تعب بس متعته اكثر
رجعت الاهلي وطلبت اجازه اسبوع ارتاح بيها من السفر
شكد حلوه هاي السفره
اسبوع واني بعدني عايشه باجوائه
ورجعت اداوم واني نفسيتي احسن بهواي من قبل
فات شهر من داومت واجه امر ينقلون المدير وراح يجينا مدير غيره
لكن كلها تحجي بعصبيت وتزمت المدير الجديد يمشي الشغل مثل الساعه مايقبل باي غلط
كلنا ضجنا لان متعلمين على هذا المدير لان كلش متساهل ويانه
الراح يجي شنعرف منه ياربي سترك
