رواية اسيرة بين يدي قاتل ابي الفصل التاسع 9 بقلم نور آل زيادة
في هذه الحياة ستتعلم كل شيء وحدك ألا القسوه سيقوم شخص أخر بتعليمها لك 
سيلين،،، مغمضه عيني مااريد أشوفه ماتصورت هل تصرف راح يخليني أسمع أعترافات وكلام صار سنين ماسامعته
سراج،،، اااخ،،، شسويتي بنفسج وبيه گلبي محمل منج بس ماگدر ينساج،،، للان يفز متلهف عليج شيصير لو متحمله وصابره عليه ومنتضرتني وانتي تعرفين ماكو غيرج ياخذ مكانج بگلبي،،،، كل شي صار غصب عني انجبرت وأنفرض عليه وتوقعت مهما يصير تبقين ويايا لأن توقعتج تحبيني ماتصورت تعوفيني لأي سبب كان،،،، ليش رجعتي لحياتي بعد ماتناسيت حبج وحاولت اعيش وليش للأن يفز گلبي خوف عليج؟
سيلين،،اسمعه ومسويه نفسي نايمه كلت ويا نفسي...
، تريدني اصبر على حضرت چنابك الگسيف ابو النسوان وانت متخيل نفسك السلطان سليمان ويوميه ويا وحده واني اصبر واتحمل وانتضرك تخلص زواجك من بنت عمتك ويجيني الدور وتتفضل عليه وتزوجني واني اوافق واتزوجك مثل الحبابه وشتريد انفذ،،، واتحمل اهانتك وغدرك واهانة اهلك والله شنو تحبني ولازم اوافق حتى اثبت حبي،،،،، طز** بيك وبيه لأن صدكتك فد يوم وصدكت حبك
بقيت أمثل النوم لأن مابي حيل اتناقش ويا واصلا ماألي نيه اسمع مبرراته التافهه،،، ابتعد صوته اسمعه يحجي ويا المرافقين مالته اوحمايته مااعرف شنو وضيفتهم طول الوقت ويا متخيل روحه رئيس وزراء وويا الحمايه
مر وقت قليل ورجع دخل للغرفه فتحت عيني او سويت نفسي هسه گعدت من النوم
سراج،،، ها بشري شلون صرتي؟
سيلين،،، زينه،،، وين فؤاد؟
سراج،،، هسه يجي راح للبيت يغير ملابسه ويرجع اذا تحتاجين شي اني موجود
سيلين،،، ليش رجعت؟
سراج،،، شنو... ليش رجعت؟
سيلين،،، قصدي المفروض انت هسه أ بيتك وبوسط عائلتك مويمي
سراج،،، مااجيت علمودج علمود فؤاد ماردت اعوفه وحده اخاف يحتاج شي
سيلين،،،، مممم،،،، كتلي علمود فؤاد؟ زين فؤاد راح لبيته اني اكول انت هم روح لبيتك
سراج،، واعوفج وحدج؟!
سيلين،،، انت من الأساس ماجاي علمودي فعادي واذا عفتني وحدي
حك لحيته بأحراج...
سراج بهمس،،، نسيت انتي موسيلين القديمه وكل شي يمشي عليج
سيلين،،، سمعته رغم همس ويا نفسه بس سويت نفسي ماسمعت
سراج،،، ليش مااكلتي؟
سيلين،،، ماعجبني الأكل
سراج،،، ليش؟ وصيتلج كل الاكلات ألي تحبيها
سيلين،،، ومنو گلك هو هذا الأكل الأحبه؟
سراج،،، حسب مااتذكر هو هذا اكلج المفضل
سيلين،،، كان اكلي المفضل قبل،، بس بطلت احبه بالنهايه ماكو واحد يضل على حاله ولااكو احد يبقى يحب نفس الأشياء طول العمر
أندار يمسح وجهه ويستغفر عرفت وصلتله رسالتي
سراج،،، ماصار شي نطلبلج غير اكل على ذوقج خلي نشوف شنو الأكل الصرتي تحببببييي
سيلين،،، شدد على كلمته الأخيره جاوبته...
لتعب نفسك شيخ ماكو داعي لأن ذوقي صعب وبطلت اقنع بسهوله جنت قبل اقبل بأي شي هسه لا
سراج،،، اي شي؟؟؟!!!
سيلين،،، اي مع الأسف كان ذوق ماعندي وهسه يله صرت اعرف اختار
رفعلي تك حاجب وعلامات الغضب واضحه على وجهه
سراج،،، اااااي،،، خير ان شاء الله،،، اعوفج ترتاحين ولو واضح من كلامج صرتي كلش زينه بس هذا الدكتورالضاهر مبقيج يخاف على قوامج الممشوق ليتخربط
سيلين،،، قصدك صحتي لتتخربط
سراج،، والله اشك مبقيج علمود صحتج
سيلين،،، موكل الناس عدها اغراض شخصيه ويا المقابل ياشيخ سراج
سراج،،،، مممم،،، ماشاء الله تغير عضيم وصايره تلگفيها وهي طايره،، الله يرحم
سيلين،،، شسوي كنت عميه وفتحت من اكتشفت لا القانون ولا الحياة تحمي المغفلين والسذج
سراج،،، من شوكت صارت البرائه سذاجه؟
سيلين،،، من الناس يستغلونا بسبب برائتنا هنا تكون مو برائه وأنما سذاجه وغباء
سراج،،، عمر البريء ماكان ساذج او غبي وألي يملك البرائه والگلب النقي يعرف هل شي لهذا يضل متمسك ببرائته بس ألي يمثل البرائه بمرور الأيام راح يكره الدور ويمل لهذا يقرر يعوفه ويحول الى دور يناسب حقيقته
سيلين،،، وانت شنو حقيقتك؟
سراج،،، شنو قصدج؟
سيلين،،، قصدي.....
فؤاد،،، السلام عليكم
سراج،،، وعليكم السلام
فؤاد،،، ماتأخرت موو؟
سراج،،، لا
سيلين،،، أي تأخرت
فؤاد،،،، بسرعه سبحت وبدلت وصليت واجيتكم
محتاجه شي كوليلي؟
سيلين،، لا بس صيحلي الدكتور
فؤاد،،، هسه اصيحه وأجي
سراج،،، بصوت حنون.... سيلين شنو رجعلج التشنج؟
سيلين،،، مابيه شي
الدكتور،،، ها انسه سيلين كالو طالبتني؟
سراج،،، سيده،،، متزوجه هي
الدكتور،،،ها اعتذر تصورتها انسه مامبين عليها متزوجه
سراج،،، شلون يعني مامبين عليها؟
الدكتور،،، عادي يعني بعدها شابه و شكله وترتيبها وأهتمامها بنفسها وقوامها الممشوق خلاني اتصور بعدها انسه
سراج،بهمس ،، اهم شي قوامها الممشوق حضرتك دكتور لو حكم بلجنة مسابقة ملكات الجمال
سيلين،،، كان قريب مني سمعته وبصعوبه تماسكت حتى لااضحك
الدكتور،،، تفضلي ست سيلين شنو ردتي مني؟
سيلين،،، دكتور اني احس وضعي تحسن واريد تسجلي خروج هسه
الدكتور،،، ليش؟
سيلين،،، صراحه مامرتاحه واريد ارجع لبيتي هناك ارتاح افضل
الدكتور،،، مااكدر اطلعج على الأقل الليله لازم تبقين تحت المتابعه ترا ألي صار وياج موسهل وهواي اشخص فارقوا الحياة لهل سبب واذا مصره تطلعين ف على مسؤوليتج
سيلين،،، اي على مسؤوليتي اطلع
سراج بغضب،،، انتي تحجين صدگ؟ شنو مارايده روحج تريدين تموتين؟
فؤاد،، سيلين ترا هي مومال عناد وضعج ميسمح
سيلين،،، مابيه شي مااريد ابقى
سراج،،، استغفر الله،،، يابنت الناس افهمي ابنج محتاجج وماعنده غيرج اذا صار عليج شي شيسوي؟ ووين يروح؟ صيري زينه وطلعي
الدكتور،، ها سيلين غيرتي قرارج؟
سيلين،،، لا اريد اطلع
سراج،،، استغفر الله،،،، الصبر يارب،،،، اني طالع برا
سيلين،، عافنه وطلع وهو ينافخ من العصبيه الدكتور ماراضي على قراري بس اني كنت مصره سجلي خروج راح فؤاد كمل الأجرائات حاولت اوكف بس جسمي ميعيني جابولي كرسي متحرك(عربانه)
سراج،،، ها يبا خلصتوا؟
فؤاد،،، اي
سراج،،، انتضرو شويه ونطلع هسه اجي
سيلين،،،،طلع ربع ساعه ورجع جايب ويا بشت اسود
سراج،،، هذا ألبسي على ملابسج اعرف ماراح يعجبج بس على الأقل افضل من ألي لابستهن
سيلين،،، استغربت من تصرفه لكن باوعت على نفسي فعلا مترهم اطلع بهاي ملابسي،،،، لبسته وطلعوني صعدت ويافؤاد بسيارته وتوجهنا للبيت ومن وصلنا تفاجئت من شفت سيارة سراج صفت ورا سيارتنا نزلني فؤاد دخلني للبيت اطمئن عليه ووصى سميه وعلمها على أدويتي وراح
بيومها خطيه سميه للصبح مانامت تخاف عليه بعدها ساعه سته الصبح اتصل فؤاد يسأل عليه اطمئن وراح وكل شويه يتصل يطمئن
بديت اتحسن يومين ماداومت،،، ساره مابلغته بالصار ويايا حتى لينشغل بالها وأستغربت أختفائها هل ايام
قررت أني اتصل أسأل من جاوبت أجاني صوت خاله ام ساره سمعت بساره مريضه نسيت نفسي ومرضي بدلت وأخذت سيارتي ورحت عليهم
من شفتها محتاجه دكتور أصريت أخذها رغم رفضهم هي وخاله وأنهضمت ومتت الف موته من عرفت متكدر خاله تاخذها للدكتور بسبب مامستلمه الراتب والحقير مؤيد مسويله زعله حتى ليجي يوديها ويصرف كم فلس هل بخيل هذا
أخذتها ومن رجعنه شفت عمها الكبير محسن دخلتهم للبيت وطلعت مسرعه أجيب مستلزمات للبيت لأن واضج حتى مسواك للبيت ماعدهم طلعت للشارع شفت حجي محسن ينتضر تكسي أصريت علي أوصله لنيه بداخلي،،، بالطريق فتحت ويا الموضوع
_ عمو اني كلش اعزك
محسن،، والله ياعمي احنا هم نعزج ونعتبرج بنيتنا
سيلين،،، تسلم عمو،،، أكلك عمو وضعك ماعاجبني شنو انت مريض؟
محسن،،، لايابا زين اني الحمد الله بس شويه تعبان لوماتعبان اني اودي ساره للطبيب بس تعبان
سيلين،، عمو انت معذور والعتب موعليك على مؤيد المفروض خطيبته يحير بيها موكاعد ويتزعل
عالعموم الكلام ميفيد عوفنه منه عمو اني اكول روح للدكتور واذا ماكو احد يوديك اني اوديك اني هم بنتك
محسن،،، تسلمين يابا متقصرين
سيلين،،، اني ماجاي اجاملك احجي الصدك وهاي فلوس خليها جوه ايدك اخاف تحتاج شي اني هم بنيتك
(طلعت ثلاث ورقات خليتهن بيده عيونه لمعت اعرفه طماع وكل هل كلام ويا ألي بي غايه)
محسن،،، هاي شنو يابا شنو هل الفلوس؟
سيلين،،، ألك روح للدكتور اعرفك تخجل مني اوديك هاي فلوس انت روح واي شي تحتاج اني بنيتك ميردك غير لسانك
محسن،،، الله يرضى عليج تسلمين الله يزيدج
سيلين،،، عمو كتلك اني اعزك معزه خاصه
محسن،،، وأحنه هم والله كلش نعزج
سيلين،،، بس هذا الكلام مينطبق على الكل ترضاها عمي مؤيد يخير ساره بينه وبيني،، ليش اني شمسويه؟ ساره اختي وانتو اعتبركم اهلي وبالأخص انته اشوف بيك بابا الله يرحمه
محسن،،، عوفي خلي يولي هو بكيفه
سيلين،،، انت شخص زين وشخصيتك قويه فارضها على الكل حتى دائما اكول لساره من يصير وياج شي لتروحين على اي شخص بس لعمج محسن لأن هو يحلها كلمته مسموعه ورجال حقاني ميرضى بالغلط
محسن،،، الله يخليج
سيلين،،، عمو انت شخصيتك قويه وتكدر تفرضها على اكبر واحد هذا مؤيد يرادله جرت اذن احجي ويا انت عمها وبمقام ابوها فهمه هي موماعدها سند خلي يبطل يضغط عليه ويجي يصالحه شفته خطيه شصاير بيها من ورا واني اذا ضايج مني مستعده اسحب نفسي وبعد مااجيكم ولو يعز عليه فراقكم انتو اعتبركم اهلي وانت بالأخص وارجع اكلك شتريد اني حاضره انته بمقام ابويه
محسن،،، لا يابا شنو تعوفينه اكسر راسه شنو ميخليج تجينه هل العار اني احجي ويا،،، شنو هي تايهه؟ لو ساره ماعدها احد وكاعد يتأمر عليها اني احجي ويا لتخافين
سيلين،،، هو هذا المرجي منك عمو انت وين اكو منك اني اكدر اطلب من عمو ابراهيم هل طلب بس ماامون عليه اشوفك انت تختلف
محسن،،، لاياابراهيم عوفي هذا خشمه يابس شتريدين تعالي عليه وماقصر وهل موضوع حله يمي
سيلين،،، عمو ماوصيك هل الكلام والصار كله هنا يضل بينه
محسن،،، اكيد هو اني هم ردت اكلج هيج
سيلين،،، مع الأسف وصلنه لمرحلة ارشي عمها لساره حتى يساعدها،،، كم فلس ومديح زائف خلا محسن يتدخل ولوماهل شي لوتموت ساره واختها وامها كدامهم ميدخلون مع انو ابو ساره كانت حالته زينه ويساعدهم كلهم من خسر ومات تبهذلو عائلته وصارت جوا ايد هيج بشر وهذا حال اكثر الأيتام اهلهم وأقربائهم يوكفون وياهم فتره وراها كل شخص يحير بنفسه وبعائلته ويعوفوهم للزمن وللناس تنهش بيهم
اخذت غراض لبيت ساره وشفت الخجل بعيونهن وحتى لااحرجهن عفتهم ورجعت لبيتي
ثاني يوم اتصلت بيه ساره كان وضعها احسن وفرحانه ومتفاجئه لأن عمها محسن رايح على مؤيد مرزله و جابه وصالحها وأنغلق هل الموضوع
ثالث يوم من شفت نفسي تحسنت قررت اداوم رحت للمكتب اول مادخلت الكل تحمدلي بالسلامه والكل كان مهتم لصحتي ماعدا ميساء السحاره
بلشت شغلي المتراكم عليه وكل شويه اسماء تسألني....
اسماء،،، سيلين اجيبلج شي لتضلين بدون اكل لتتخربطين اليوم هم؟
سيلين،،، لاحياتي تسلمين مااحتاج شي وشكرا لأهتمامج
رائد،،، ها بنات شلونجن؟
اسماء،، زينين
سيلين،،، الحمد الله
رائد،، شلون صرتي ست سيلين ان شاء الله صحتج اليوم احسن؟
سيلين،،، الحمد الله زينه عارض صحي بسيط صار وانتهى
رائد،،، محتاجه شي؟
سيلين،،، سلامتك،، وتسلم على السؤال
راح ورا شويه رجع وبيده عصير ولفة كباب
رائد،،،،، اكلي زين لتضلين بدون اكل وتتمرضين
سيلين،،، شكرا،، ليش تعبت نفسك صدگني اكلت وشبعانه
رائد،،، اذا ترديني ومتاكلين ازعل منج
سيلين،، انحرجت ابتسمتله ممتنه منه اخذ العصير فتح العلبه وقدمهه ألي
بهل اثناء دخل للمكتب سراج باوع عليه وعلى رائد ألي كان واكف قريب مني ويقدملي العصير
سراج،،، السلام عليكم
الكل،،، وعليكم السلام
سراج،، احم،،، اشوفج اليوم مداومه ست سيلين من الواضح تحسنتي؟
سيلين،،، اي الحمد الله
سراج،،، جيد،،، اذا هيج كلمن يتوجه لعمله
( باوع على رائد وكال هل كلام وطلع)
رائد،،، زين اني اروح لشغلي اذا تحتاجين شي اني حاضر
سيلين،،، شكرا ألك
رائد،، هذا اقل واجب،،، من رخصتكم
اسماء،،، شبي الشيخ ليش ضايج ؟ اول مره يتصرف هيج ويا الموضفين و أول مره يدخل بينه وبشغلنه خطيه رائد حسيته ضاج من نتر بوجهه
سيلين،،، سكتت،،، لأن اني ماعندي جواب لتصرفه غير انو سراج مشكلته ويايا
فؤاد،،، ياهلا بست سيلين اشرقت وأنورت،، المكتب منور برجعتج
سيلين،،،شكرا،، هذا نورك
فؤاد،، شلون صرتي؟
سيلين،،، لازينه كل شي تمام
فؤاد،،، ديري بالج على صحتج وعوفي الرجيم والرياضه لخاطر الله
سيلين،،، احاول بس مااوعدك اعوف الرجيم كل شي ولا يزيد وزني
فؤاد،،، ههههه على كولت الشيخ اهم شي القوام الممشوق
سيلين، هههه،،،، يعني سمعته؟
فؤاد،،، اكيد سمعته وحتى الدكتور سمعه بس غلس لأن يعرف نفسه زاحف
سيلين،،، ههه،،، لاترا ماسوا ولاحجه شي،،، الشيخ مااعرف ليش تحسس منه؟
فؤاد،،، غير من الزحف رگبه راحت يامسوا شي عوفج من كلامه وتصرفاته زين ونضراته والله لوماوضعج ومجبورين نتحمل چان استلمنا اكس مربع
سيلين،،، يمعود مو لهل درجه
فؤاد،،، اني رايح لشغلي وانتي اذا حسيتي وضعج موتمام بلغيني
سيلين،،، تمام
رجعت اكمل وحاولت مااضغط على نفسي لأن جسمي تعبان وأحس بالأرهاق
ثاني يوم كان عندي جلسه بالمحكمه بقضية حوراء
قبل فتره من قدمنه الطلب حولوهم الى أستشاري الأسره والعلاقات الزوجيه حتى يحلون مشاكلهم ويحاولون الصلح انتهت برفض الصلح من قبل الطرفين
اليوم الجلسه الثانيه ترافعت وقدمت كل شي وطلبت التفريق للضرر
زوج حوراء رفض الأتهامات الموجهه أله وكال بصريح العباره
_ اني مطلق زوجتي ومارجعتهه وضربت حوراء لأن لكيتها تخابر على ولد
سيلين،،، بجهازهه لكيتها تخابر؟
وكان جوابه (اي)
اني حسبت حساب هذا تصرفه ولهذا أكدت على على موضوع ألجهاز ومن شفت اصراره استخدمت كلامه ضده لأن الموضوع صار موضوع شرف مومجرد طلاق وحقوق ولعبت على نغمة الشرف ألي هو ديحاول يلعب بيها وحتى اقنع القاضي فهمته هل موضوع ممكن يتجه لطريق اخر وهو غسل عار لهذا طلبت من القاضي انو ناخذ جهازها ونحوله لمختص ونشوف شركة الأتصالات حتى نطلع كل اتصالاتها ورسائلها
زوج حوراء،،، بهل وگت منكدر نثبت لأن هي تتصل على تطبيق مو شبكه وتكدر تلغي التطبيق ويروح كل شي ويا
سيلين،،، كلامك صح يعني بهيح حاله ماكو دليل خيانه مجرد أفتراضات قد تكون انت الصادق بيها اويمكن هي وبهيج حاله ماعندك دليل عليها والمحكمه متاخذ المواضيع بالأفتراضات وأنما بالوقائع الثابته والشهود،،، شهودك وين؟
زوج حوراء،،، ماعندي شهود
سيلين،،، يعني ماكو دليل ولا اكو اتهام اصلا،،، عندك دليل أثبته ماعندك لتتهم بنيه بشرفها حتى تبرر افعالك وأذيتك ألها
تأجلت الدعوه واني توجهت للمكتب
ثاني يوم واني كاعده بمكتبي دخل شخص
__السلام عليكم
سيلين،،، وعليكم السلام،،، رفعت راسي شفته زوج حوراء عرفت جيته وراها شي لكن قابلته طبيعي
--اني اليوم جايج بموضوع
سيلين،، اي تفضل اسمعك
__ بخصوص موضوع حوراء ترا حوراء وحده خاينه وچذابه لتصدكيها وبعدين ترا همه فكر ماراح تحصلين منهم شي
سيلين،،، لحضه استاذ،،، اسماء ممكن تتركينه وحدنا
اسماء،، اي اكيد
سيلين،،، اي استاذ اسمعك
_اي فمثل ماكتلج همه فكر
سيلين،، استاذ بلا امر عليك ممكن تغلق الباب حتى ناخذ راحتنا بالكلام
كام يغلق الباب واني بلمح البصر مسكت جهازي وشغلت تسجيل،،،، رجع كعد
_اي استاذ اسمعك عيد كلامك لأن ماكدرت افهم بسبب الأصوات قبلها ذكرني بأسمك نسيته
مروان،،، اسمي مروان
سيلين،،، اهلا استاذ مروان بشنو اكدر اخدمك
مروان،،، حوراء وابوها چذابين سووا كل هل شي حتى يحصلون فلوس مني لأن ناس فكر وشافوني خوش صيده
سيلين،،، اذا انت كاشفهم شكو مبقيهه على ذمتك طلكها واخلص؟
مروان،، اطلكها عادي ومتهمني بس اني شنو أفتهمت منها حتى ادفع الحاضر والغايب على جلدي
سيلين،،، انت تكول هي وحده خائنه واكيد هسه طلعت من نفسك فبعد شنو تريد تفتهم منها عشرتكم انتهت طلكها وانطيها حقوقهه واخلص
مروان،،، لهذا اني جايج اليوم،،، حوراء مااشوفهه تستاهل تاخذ مني ولاربع
سيلين،،، بس انت ضلمتها وضحكت عليها حتى مرتك تغار وترجعلك
مروان،،، طبهم مرض ،،، يستاهلون همه ناس طماعين وماصدكوا أخطب منهم
سيلين،،، هذا مومبرر حتى تحطم حياة انسانه بأول عمرها،، من الأخير استاذ مروان بشنو اكدر افيدك اطلعلي بالمفيد؟
مروان،،، مبين عليج محاميه شاطره وتعرفين مصلحتج ولهذا اريدج تساعديني وتوكفين ويايا ضدهم وشتريدين اني حاضر
سيلين،،، شكو مدوخ نفسك وحده خانتك أثبت خيانتها وطلكها شكو مدوخ نفسك
مروان،،، صراحه ماعندي أثبات
سيلين،،، لأن الخيانه مألها وجود أساسا
مروان،،،خيانه موخيانه من الأخير اريد اطلكها ومااريد أدفعلها شي و ترا منهم متحصلين شي فگوره اما اني راح تستفادين مني
سيلين،،، كلامك صح فعلا احس نفسي تورطت من استلمت هل قضيه همه ماعدهم وواضح هل شي
مروان،،، اي صح،، انتي كملي وياهم وسوي نفسج تساعديهم بس بالحقيقه انتي ويايا وخسريهم القضيه وأخذي اتعاب القضيه مني
سيلين،،،بس ترا الأتعاب راح تصير الضعف بهيج حاله
مروان،،، فداج الفلوس على الأقل انتي تستاهلين
سيلين،،، بلشت اسولف ويا واسحب الكلام منه اخذ راحته صار حتى يتحرش بيه بكلامه وكل كلامه تسجل اتفقنه وراح حفضت التسجيل بالأضافه الى تسجيل الكامرا مال المكتب
كلفت وحده اعرفه راحت على زوجة زوج حوراء ولعبت بعقلها وفهمتها حتى تخلصين من ضرتج ويبقى زوجج بس ألج أنطينه صوره من عقد زواجج بالبدايه رفضت لكن بعدين كدرنه نقنعها
المرأه عدها يموت زوجها ولاتصير عدها ضره وهل شي أستغلينا لصالح القضيه
ورا ايام كان موعد الجلسه من دخل كان مبتسم وفرحان وكل شويه يغمزلي لكن صدمته من بديت اترافع وقدمت كل الأدله ألي تثبت حوراء ماعدها اتصال بأي شخص ولاعدها علاقه وقدمت التسجيل وتصوير المكتب قدمت عقد زواجه من زوجته الأولى
القضيه كلها صارت ضده حكموا بطلاقها وبقى موضوع تعنيفهه المفروض يتحاكم علي لكن ابو حوراء تنازل ماراد الموضوع يكبر اكثر
وبهيج حاله تكون حوراء تطلكت وأخذت كامل حقوقها بالقانون
اني بالعاده مااستخدم هيج طريقه ولااكبر الموضوع الى درجه اسجله واصوره وأفضحه بس قضية حوراء استفزتني وذكرتني بنفسي وردت ارجع حقها وأنتقملهه من هل شخص وانتقم لكل أمرآه مرت بهل ضلم واني منهم
رجعت للمكتب فرحانه لأن گدرت احقق العداله بهل الموضوع وان شاء الله راح يجي اليوم ألي ارجع حقي اني هم من كل شخص ضلمني بحياتي
ماطولت فرحتي غير كم ساعه من دخل زوج حوراء مثل الثور الهائج على مكتبي وهو يغلط ويسب ويهدد بيه
دخلو حماية المكان طلعوا طلعت من مكتبي والكل طلع على اثر الضجه الصارت
سراج،،، شكو،،، هاي شصاير هنا؟
الحمايه،،، شيخ هذا واحد اتهجم على مكتب الست واشر على سيلين
سيلين،،، باوع بأتجاهي سراج وفتح عينه ورد بعصبيه...
سراج،،، انت منو وشلون تتهجم على مكتبي وعلى الموضفين أليشتغلون عندي شنو انت مارايد روحك؟
زوج حوراء،،، لتدخل موضوعي مووياك،،، انتي خلي بالج راح ادمرج وأهينج مثل ماهنتيني وشكو فلس راح ادفعه اطلعه من عيونج
سيلين،،،، ههه،،، شدعوه هل بخل هنه كم فلس شبيك راح تبچي؟ هنه ٢٥او٣٠ مليون راح تدفع قابل شصار؟ واذا مرتك طلكتك واذا فضحتك انت واهلك بين الناس وطلعت حقيقتكم؟ عادي عزيزي تقبلهه برحابة صدر
زوج حوراء،،، كله بسببج انتي ضحكتي عليه بسببج خسرت القضيه
سيلين،،، هاي العداله ألي الله امر بيه و شخص مثلك انت واهلك ميعترف بيها ضحكتوا على بنيه بعمر الورد ودمرتو حياتها وماكفاكم من رادت الطلاك طعنتوهه بشرفها،،، مثل ماضحكتوا عالناس انتوا هم انضحك عليكم عادي صير ريلاكس وتقبلها برحابة صدر
سراج،، بسرعه طلعوا،،، وأنت احسن ألك بعد لتجي هنا ولتفكر حتى مجرد تفكير توصل يم شخص يخص الشيخ سراج الدين
سيلين،،، بلش يغلط غلط ماصاير الأمن سحبوا يطلعوا لكن غافلهم بلحضه وتقدم بأتجاهي وضربني على وجهي ضربه بحيث اختل توازني مالحكت استوعب الضربه ولاأسوي شي بس شفت سراج شمره على الأرض ببوكس ونام علي وأنهال بالضرب كسره تكسر يريدون يسحبوا منه مينسحب
اخذتني اسماء هي ورائد للغرفه جابولي مي شربوني ماتصورت الموضوع لهل درجه راح يكبر ارتاحيت شويه والهوسه أختفت
اسماء،،، سيلين استاذ سراج كال من ترتاح خلي تجي للمكتب
رائد،،، اكيد حتى يعرف كل الموضوع وعلى اساسهه يحاسبه
سيلين،، انتهى الموضوع بعد شكو موطلعوا من المكان؟
رائد،،، وشنو ألي يضمن ميرجع يتعدى عليج بالشارع اويسببلج مشكله هذا واحد مبين راعي مشاكل وأرعن وبس الشيخ يكدر يوكفه اصلا هو بلغ علي ماراح يعوفه
سياين،،، ااااف،،،،، موخوش سالفه هاي
رحت لمكتب سراح طرقت الباب اجاني صوته يأذنلي بالدخول دخلت لكيته كاعد ويفرگ بأيده الواضح انو تأذى من ضربه لهذاك
سراج،، تعالي ست سيلين
سيلين،، اني اسفه على ألصار بسببي بس مو....
سراج،،، ماكو داعي للاسف هاي مو اول مره يصير هل شي عدنه.،،، اريدج تفهميني شنو الصار بالضبط
سيلين،،، سولفتله كل الصار،،،،،،،، زين استاذ شنو راح يصير؟
سراج،،، اكيد راح ياخذ جزائه هو وكل شخص يتطاول على مكاني وعلى كل شخص بهل مكان راح احاسبه وأتوبه وانتي اليوم واحد من الحمايه يوصلج متروحين وحدج وهل شي راح يستمر كم يوم الى ان احل الموضوع،،، بس اريد اعرف ليش كبرتي الموضوع وفضحتي وانتي جنتي تكدرين تحليها بطرق اخرى وبعيد عن المشاكل والعداوات؟
سيلين،،، أنجبرت لأن هل شخص تحرش بيه وردت افضحه
سراج،،، شنووو؟!!!! تحرش بيج؟ اليوم انع*ل والدي
سيلين،،، لتخاف شيخ اخذ جزاءه عوفه
باوعت على ايده تنزف من الأعلى
_من الواضح ايدك متأذيه
سراج،،، عادي مومشكله
سيلين،،، الأفضل انو تعقمها
فتح الجراره وطلع علبه بيها اسعافات الأوليه وبلش يعقم بس ميسيطر تجرئت وتقدمت اخذت من ايده القطن والمعقم باوعلي بأستغراب بس سكت،،، بلشت اعقم ايده وهو مانطق ولاكلمه طلعت لاسق جروح خليتها على الجروح انتهيت ورجعت كل الاغراص بالعلبه
سراج،،، شكرا،،، تعبتج
سيلين،،، اني ألي حابه اشكرك على موقفك اليوم ويايا
سراج،، ماسويت شي والصار اسوي ويا اي شخص يكون بحاجتي وبموقفج
سيلين،، ابتسمتله وكتله... حتى لو هم شكرا
بهتت ملامحه من كلامي وابتسامتي ألى درجه نسى يرد
_ اذا متحتاج بعد شي اني راح اروح من رخصتك
سراج،،، دقيقه،،،
سيلين،،، ألتفتت اباوعله
سراج،،، أذاچ؟؟
سيلين،،، لاموكلش
سراج،، بس وجهج صاير احمر
سيلين،،، عادي مومهم تروح
طلعت من مكتبه صارت ميساء بوجهي كأنما تنتضرني
ميساء،،، ها ام المشاكل
سيلين،،، عفته ومارديت
ميساء،،، اكيد متردين لازم استاذ سراج خوش رزاله مرزلج بحيث بالعه لسانج متأكده بعد الصار راح يطردج
سيلين،،، هههه،،، ضلي حلمي
عفته ورجعت لغرفتي خلص الدوام ورجعت لبيتي وصلني شخص كلفه سراج يحميني استمر الحال كم يوم الى ان سراج حل الموضوع ورجعت لحياتي الطبيعيه او هذا ألي تصورته
بعد ايام من الصار واني بمكتبي أجاني اتصال من السائق ألي يوصل ابني مااعرف ليش گلبي انخمط
جاوبت واني بداخلي خوف وخوفي كان بمحله من سمعت الكلام طلعت مفزوعه ركضت لغرفه فؤاد فتحت الباب بدون اذن وكلت بصوت مفزوع
_ ألحكلي فؤاد سيف مختفي
فؤاد،، شنو مختفي؟
سيلين،،، جاوبته ونزلت دموعي... ابني انخطف!!!!!
فؤاد،،، منو خطفه؟!!!
سيلين،،، ماادري،، ماادري اذا مخطوف ولا لا بس سيف مختفي اتصل بيه السائق يكول دورته بكل مكان مالكيته والمدرسه كلها فرغت وللبيت مارايح والمديره متعرف عنه شي وبالكاميرا طالع من المدرسه وبعد ميدرون اي شي خايفه ومرعوبه اخاف صار بي شي
سراج،،، كولي ياالله هسه نلكي وين قابل يروح
سيلين،،، هو هذا السؤال وين يروح وأحنا منعرف احد ولاعدنا تواصل ويااحد
سراج،،، اخاف واحد من اهلج اخذه
فؤاد،،، متحجي ويااهلها كلهم ولاعدها تواصل وياهم
سيلين،،، باوعلي سراج مستغرب
فؤاد،،، امشي نروح للمدرسه ونشوف شنو الصار
سيلين،،، طلعنا مسرعين وسراج اجه ويانا هو والمرافقين ألي ويا،، اتصلت على سميه والحارس متأمله رجع للبيت بس مارجع رحنا للمدرسه لكينا السائق هناك منتضرنا دخلنا للمدرسه سألنا الحرس وشفنا الكاميرات فعلا طلع من المدرسه وبعدها اختفى
كعدت على الارض منهاره ابني مختفي صار ساعتين مااعرف وينه ،،، وين راح ياربي؟
سراج،،، كومي سيلين ان شاء الله نلكي
سيلين،،، وين ألكي بعد ابني مختفي راح هو هم عافني وراح مابقالي غيره وين راح ليش هيج ديصير ويايا؟
فؤاد،،، امشوا أنبلغ ماكو غير حل هاي سألنا هنا حتى اهل المنطقه ماكو احد منهم شافه
سيلين،،، رفعت جهازي وأتصلت على سجاد ابن عمتها لساره واخو مؤيد الكبير بلغته بكل الصار ماطول نص ساعه وصار يمنه استلم الموضوع وضل يدور بكل مكان اخر شي أيسنه
طلب مني ارجع للبيت وهو يستمر بالبحث رفضت لكن فؤاد وسراج اخذوني رجعت للبيت اخاف ادخل مااكدر اتخيل ادخل البيت و مابي ابني انهاريت اشهك اعصابي تلفت وجسمي صار يرجف حتى تنفسي ضاق بقيت بالكراج مااكدر ادخل البيت ولااريد افوت من دون ابني طلعت سميه دموعهه بعينهه حضنتني نبچي سوا
فؤاد،،، يرجع بس كولي ياالله لتسوين هيج بنفسج
سراج،،،انتي لوبس تتنازلين وتتصلين بأهلج اوحتى بأهل ابو سيف وتسألين يجوز اخذوا حتى يشوفوا لأن مشتاقيله
سيلين،،، ماعندي اهل يسألون عليه وعلى ابني ولايهتمولنه ولايشتاقولنه واهل ثامر نفس الشي
اني خايفه من هذا زوج حوراء ليكون ديحاول ينتقم مني بأبني
سراج،،، حسبت هيج حساب وخليت الولد يبحثون بالموضوع وتأكدنا مو هو ورا هل الموضوع
سيلين،،، ياربي وين راح ياآلهي
سميه،،، اشربي مي راح تتخربطين
فؤاد،، اهدئي مو هيج تنحل الأمور
سيلين بدموع ،،، مااريد شي مااريد اهدء ولاارتاح ابني اذا مارجع اموت والله اموت جيبولي ابني والله مااريد شي
سراح،،، لااله الا الله
سميه،،،، سيييييييف!!!!!!
سيلين،، اندارينه كلنه بأتجاه الباب دخل سيف يركض حضني بعدته اباوع علي واتفحصه اخاف بي شي او سووله شي
_بيك شي امي حبيبي سوولك شي وين رحت؟ جاوبني
غفران،،، مابي شي قابل شنسويله عمته اشتاقتله وأخذته تشوفه
سيلين،،، وكفت منتفضه انتي منو سمحلج تاخذي ولتسوين نفسج مهتمتله ومشتاقتله
غفران،،، حقي الطبيعي اشوف ابن اخويه وشوكت ميعجبني
فؤاد،، من حقج تشوفي بوجود امه لكن مومن حقج تاخذي ومن غير أستأذان
غفران،،، موانت وغيرك تحدد شنو ألي لازم اسوي ابن اخويه وشوكت ميعجبني اجي واشوفه واخذه وحتى اذا اريد اخذه يعيش ويايه
سيلين،،، هجمت عليهه ووقفني فؤاد
_باعي لچ سوالفج ومكرج انت وهذا رچلج ميمشي عليه سويتوها قبل ونجحتوا بس هسه لا قسما بٱيات الله انهيج وأحسب الله ماخلقج لتلعبين ويايا واني وانتي نعرف شنو غايتج لا ميته على ابن اخوج ولاحتى معترفه بي اصلا،،، غايتج اني والفلوس لااكثر ولااقل
غفران،،، شو سويتيها قصه،، شفنا وجبنا ألج شكو بعد
سيلين،،، هل مره صارت مره ثانيه لتحلمين تشوفين حتى شكله
نائل،،، لاماألج حق ترا هو ابن اخوها
سيلين،،، اسكت لك دلدول مرتك اخذها وولوا طلعوا من بيتي
غفران،،، بيت اخويه وابن اخويه
سيلين،،، هههه،،، اخوج مات والبيت هسه بيتي وكل شي يملكه اخوج صار ألي وحتى اذا متت هم ابني متكدرين تاخذي لاهو ولاماله لأن اني مسويه وصيه يعني بكل الطرق متحصلون شي فلتحلمون احلام ورديه واطلعي من دور العمه المهتمه والمحبه لأبن اخوها ويله ولي من بييييييتي لأن لعبتج مكشوفه
غفران،،، ماراح اسكت راح ارجع كل شي من عيونج واشمرج بالشارع
سيلين،،، احلام العصر ضلي حلمي انتي وهذا الذكر الوياج
نائل،،، احترمي نفس
سيلين،،، اوي مامي سوري راح احترم نفسي مره ثانيه حتى لينجرح كبريائك،،، ولي لك هم حاسب نفسك على الزلم أنت
هجم عليه صار سراج وفؤاد امامه دفعوا بقوه وكع على الارض
غفران،،، حق*يره،، چل*به،،، جايبتلج ثنين حتى تشبعين لازم بعد واحد ميكفيج ولايسد النقص والحرمان ألي عشتي ويا ثامر
سيلين،،، موكلها ساق**طه مثلج انتي والعار مالج اخذي وولي وخلقتكم الزفره مااريد اشوفها بعد وألا اشوفكم نجوم الضهر وقد اعذر من انذر وديربالج افتح الدفاتر القديمه اخيسكم بالحبوس واخليكم مضحكه لأمت محمد،،،، طلعوا وهي تسب وتغلط
انداريت على ابني
_ماما حبيبي وين اخذوك سوولك شي احجي؟
سيف،، اخذوني للملاعيب ووكلوني وأشترولي ألعاب عمه غفران كالت هي تحبني بس انتي متقبلين تشوفني
سيلين بعصبيه،،، انت شلون تروح وياها كم مره علمتك متروح وياأي شخص اذا مواني وياك أو اسمحلك؟
سيف،، هي عمتي وتحبني ليش انتي متحبيها؟
سيلين بعصبيه،،، متحبك،،، هاي وحده كذابه وطماعه متحبك تضحك عليك تريد تأذيك وتأذيني بيك
فؤاد،،، اهدي سيلين
سيلين،،، شهده،،، شلون اهدى واني اليوم ابني ردت اخسره وفوكاها لاعبه بعقله
سراج،،، تعال بابا تعال يمي
سيلين،،، اباوع عليهم سراج مد ايده يسلم وسيف هم مدله ايده وسلم
سراج،،،ماشاء الله انت شلون شاب حلو ومرتب انت خوش رجال حتى سلامك قوي
سيف،، صدك عمو يعني اني رجال قوي؟
سراج،،، اكييييد،، انت رجال وسبع تكدر تحمي نفسك وتحمي امك
سيف،،، بس اني بعدني صغير شلون احمي امي؟
سراج،،، الرجل موبالعمر،،، بالقوه والعقل وانت صح بعدك صغير بس مبين سبع وقوي وامك صح كبيره بس موبقوتك لهذا هي محتاجه تحميها وتوكف وياها لأن ماعدها غيرك يحميها
سيف،،، شلون احميها؟
سراج،،، اول شي متسمح لأي شخص يحجي عليها بالموزين،، اي شخص مهما كان،،، تكلهم امي مااسمحلكم تحجون عليها،،، انت سندها من بعد ابوك انت هسه وضيفتك تدافع عنها وتحميها لأن امك اكثر وحده بهل دنيا تحبك وتتمنالك الخير
لتصدك بكلام اي شخص يكلك امك متحبك لأن يكذبون
سيف،،، بس عمه غفران هم تحبني؟
سراج،،، هي عمتك صح والمفروض تحبك بس ماكو اي شخص بهل دنيا يحبك ويخاف عليك بكد امك واذا امك منعتك من عمتك لأن هي اكثر وحده تعرف مصلحتك
سيف،،، بس اني اضوج واريد اعرف هواي ناس اضوج بس بالبيت
سراج،،، حقك ولهذا امك المفروض تطلعك وتعرفك على الناس لأن انت كبرت وصرت رجال صح ام سيف؟
سيلين،،، اي صح،،، راح اطلعه وأونسه ووين ميعجبه نروح
سيف،،، حتى لبيت عمامي وبيت عمه غفران هم؟
سيلين،،، استغفر الله يارب،،، افهمني امي حبيبي عمه غفران متحبني وتريد تأذيني بيك
سيف،،، بس تحبني ألي
سراج،،، زين احنا موكلنا انت رجال والمفروض تحمي امك من الاشخاص ألي ميحبوها ويأذوها
سيف،، اي
سراج،،، وعمتك متحب امك وتريد تأذيها ووضيفتك انت كرجال البيت تحميها لأمك حتى من عمتك صح لولا؟
سيف،،، اي صح تذكرت هي مره هي وبابا وعمو نائل رادوا يموتوها وامي طلع منها دم بس ماماتت بس اني جنت صغير ماكدرت ادافع عنها
سيلين،،، ارتبكت من كلامه وخفت لايحجي الصار كله وتوترت خصوصا من سراج باوع عليه بنضرات مافهمتها
سراج،،، بس هسه انت كبرت واكيد تكدر تدافع عنها وتمنع اي شخص يأذيها موصح
سيف،،، اي راح احميها واصير مثل البطل الخارق وماأخلي اي احد يسويلها شي
سراج،،،وتسمع كلامهه لأن اليوم تأذت من انت رحت بدون متكول ألها وتمرضت وبچت عليك ترضى امك تتمرض ويصير بيها شي؟
سيف،،، لا،،،لا اني كلش اخاف من اشوفها مريضه اخاف تموت نفس بابا بعد مااروح لأي مكان حتى ويا عمه غفران واصير احمي امي من كل الاشرار
سراج،،، هههههه،،، عفيه بوليدي السبع
سيف،،، عمو انت هم سبع،،، شفتك دفعت عمو نائل وكعته بالكاع وحميت ماما انت وعمو فؤاد انت شنو اسمك؟
سراج،،، اسمي سراج الدين
سيف،،، ههههه،،، انت نفس اسمي اني همات اسمي سيف الدين
سراج،،، ها حلووو طلع اسمك قريب لأسمي
سيف،،، اي اسمك منشك من اسمي
سراج،،، هههه،، قصدك مشتق
سيف،،، اي هو هذا مشتق من اسمي
سراج،،،، اي سبحان الله شنو هل الصدفه الحلوه
اسمك على نفس وزن وقافية اسمي
سيلين،،، باوع عليه ورفع حاجبه بمكر،،،، مال هسه افگس عيونه جاوبته...
_سيف ابو سيف سما هل الأسم باوعلي صفح ماعاجبه جوابي
سراج،،، يله يبا احنا بعد نترخص واي شي تحتاجي أحنا حاضرين
سيلين،،، شكرا ماقصرتوا
سيف،،، عمو ابقوا يمنا وتعشوا ويانا ماما تسوي اكل كلش طيب
سراج،،، تسلم يا معدل مو اكلك انت رجال
فؤاد،،، ولك سيف ألف مره جاييكم ولامره عزمتني على عشا
سيف،،، اي انت همات ابقى ويانا تعشا
فؤاد،،، بعد وگت ألاحجيت دروح زعلت منك
سيلين،،، هههه
سراج،،، لاتضغط علي
سيف،،، عمو اني احبك لتضوج
فؤاد،،، لاضجت وزعلت
سيلين،،، يمعود هسه يصدك ويضل زعلان لأن زعلك عوفه واني اسويلكم اطيب عشا
فؤاد،،، هههه،،، لااشاقه هي مال عشا من الهبطه يمكن صار بيه سكر
سيلين،،، لااسم الله
سراج،،، يله يباا امشي وخليهم يرتاحون
سيلين،،، سلمو وراحو ومن يومها بديت نضام توعيه جديد لأبني اتبعت اسلوب سراج بالكلام لأن شفته نافع اكثر من كلامي وخصصت شخص يكون سائق خاص بس لسيف لضمان حمايته اكثر
مرت ايام مابيها شي مجرد روتين عادي وخلال هل ايام اختفى سراج مااعرف السبب واليوم صار اكثر من اسبوع ماأجه للمكتب خلصت عملي ورجعت للبيت لكيت امي موجوده سلمت عادي
ام شاكر،،، شلونج يمه؟
سيلين،،، زينه
ام شاكر،،، اشو لاتسألين لاتكولين امي واهلي؟
سيلين،،، ليش اسال اعرف زينين
ام شاكر،،، اختج طلكها رجلها وشمرها علينه هي وجهالهه
سيلين،،، ليش؟
ام شاكر،،، لأن بطلتي من شغله
سيلين،،، واني شكو كلتلكم المطعم بعته والمالك الجديد هو ألي طردهم ولو بس محترمين نفسهم وكاعدين وساكتين مثل الاوادم من دون مشاكل ماكان طردهم
ام شاكر،،، صارت بعد واختج حال الضيم حالها والبيت صغير ميكفينه وصايره هوسه
سيلين،،، من الأخير شنو المطلوب؟
ام شاكر،،، هاي شبيج هسه شكلت اني
سيلين،،، لأن اعرف شنو معنى كلامج اطلعيلي بالنضيف شتريدين مني؟
ام شاكر،،، لو تسوين راتب لأختج مصرف ألها ولجهالها لو تشغلين رجلهه وتحجين ويا يرجعها
سيلين،،، مامجبوره
ام شاكر،،، لامجبوره انتي سبب كل الصار وياها
سيلين،،، موذنبي زوجها طماع واخذها علمود مصلحه ومن خلصت مصلحته طلكهه
ام شاكر،، غير ثامر جابه ألنا
سيلين،،، هسه صار موزين ثامر من زوج بناتج ويصرف عليهن وعلى رياجيلهن زين وهسه صار موزين
ام شاكر،،، أنجبرنا نزوجهن لهذوله لأن من ورا سالفتج الناس اكلت وجوهنا ومحد اجاهن
سيلين،،، هههههه،،، صدك والله؟ خطيه الخطابه كانوا واكفيين سرا عليهن واني بسببي وكفت قسمتهن اذا نسيتي اذكرج ماكو ولا شخص ولاواحد تقدملهن وحتى انتي سويتي كل شي حتى سراج او و حتى واحد من اخوته ياخذهن وماصارت ومن ايستوا من الكل وافقتوا على ايمن وباسل وانتو تعرفون مابيهم حظ وحتى ثامر تكفل بكل مصاريف زواجهم بس المهم يجون يخطبون كافي كل شي تذبوا براسي مو أحنا دافنيهه سوا
ام شاكر،،، عيب عليج هيج تحجين على خواتج موكلها مبخته مثلج بالزواج
سيلين،،،، من الأخير ماعندي شي اقدمه
ام شاكر،،، زين على الأقل جيبيها يمج هي وجهالهه بيتنا ميكفي وانتي بيتج ماشاء الله قصر يسرح بي الخيل
سيلين،،،ارتاحي حتى هل بيت راح ابيعه واحتمال حتى بيتي ألي انتو عايشين بي هم لأن وضعي المادي موزين من هسه اكللكم دوروا على بيت بس نصيحه شوفولكم بيت اكبر حتى يكفي الكل لأن احتمال حتى اني اجي يمكم فحسبوا حسابي
ام شاكر،،، شنوووووو؟!! تجين يمنا شنو عيني؟ شنو مفتحته دار ايتام حيري بنفسج انتي وأبنج كافي عليه هذيج ألي تطلكت احير بيها
سيلين،،، ترا اني هم بنتج وسنين عايشين ومرتاحين على حسابي
ام شاكر،،، قصدج على حساب ثامر
سيلين،،، ليش ثامر موزوجي وانتو بعتوني أله والمقابل قدمه ألكم سنين يصرف عليكم
ام شاكر،،، الحجي ميفيد اني اجيت عبالي تشوفيلنه حل طلعتي تريدين تبيعين كل شي وتجين يمنه مقدما اكلج ماعدنا مكان حيري بروحج مامجبورين بيج
سيلين،،، وين اروح اني ارمله وعندي يتيم وبسبب ديون ثامر خسرت كل شي
ام شاكر،،، مينخاف عليج انتي حلوه استغلي جمالج وعيشي
سيلين،،، شلون استغله؟
ام شاكر،،، شوفيلج واحد مريش حتى لوشايب وتزوحي وعيشي
سيلين،،، لو اموت بعد مااتزوج
ام شاكر،،، طبج مرض حيري بروحج
سيلين،،، عافتني وراحت ورغم كل ألي سووا بيه للان انصدم بتصرفاتهم ويايا موبيدي بالنهايه اني بشر موحجر وصعبه كلش صعب ألي عشته وللان اعيشه
حقد الكون كله انجمع بداخلي راح اشوف الكل منو سيلين راح انتقم منكم كلكم وأرجع حقي منكم كلكم واحد،، واحد،، كل ألي سووا بيه واكول اهلي كعدتهم بيت بلاش ومسويه راتب لأمي وضحى وشغلت اخويه وازواج خواتي وكل هذا نكروا ورادوا يبوكوني وياخذون كل شي وهسه من دروا خسرت كل شي ميريدوني ولا يريدون يساعدوني
وداعت كل دمعه نزلت من عيني وكل ضيم عشته راح أرجعه
ثاني يوم من الصبح عرضت البيت ألي كاعدين بي اهلي للبيع ومن سمعوا اجوني للبيت كنت بالدوام وصيت الحارس كاللهم تركت البيت راح تبيعه اتصلوا عليه مارديت نهائيا اعرف ألي دااسوي غلط ويبقون اهلي لكن ألي سوا بيه خلا گلبي حجر من ناحيتهم
اليوم كعدت من النوم احس اكو ثقل بداخل گلبي كعدت نفسيتي تعبانه وجسمي رجع تشنج باوعت بالجهاز شفت الساعه وانتبهت للتاريخ اليوم يومي المشئوم اليوم يوم عرسي من ثامر قبل ١٠ سنوات بالتحديد من الان
مثل هل اليوم انفرضت عليه حياة ماتقبلتهه لليوم الكل لعب بيه والكل فاز واني الخسرانه الوحيده وقررت من اليوم ابدي لعبة جديده واني أنضمها وأخلي خططها واني افوز بيها
اتصلت بضحى وأتفقت وياها وبعدها اخذت شور سريع وطلعت للدريسنك روم اختاريتلي ملابس قررت اليوم اترك السواد وألبس ألوان طلعتلي قميص وردي فاتح كله ساده لكن من الامام من جهه واحده بي رسمه باللون الابيض والنيلي وطلعت ويا بنطلون نيلي وحذاء وحقيبه وردي سرحت شعري ورفعته ذيل حصان ونزلت خصل رفيعه من الأمام خليت ميكاب سمبل للعيون برزت عيوني بوضوح وخليت روج وردي وتعطرت خلصت وطلعت للمحكمه خلصت عندي عمل بسيط وتوجهت للمكتب من دخلت انتبهت الكل يباوعلي حقهم فعلا السواد يغيم على الوجه والالوان تنطي حيويه واشراقه وخصوصا اني اليوم طوخت الميكاب مومثل كل يوم من شافتني اسماء شهكت
اسماء،،،، ماشاء الله اللهم صلي على محمد هاي شطالعه اليوم
سيلين،،، عادي مثل كل يوم شنو الفرق
اسماء،،، ياشنو الفرق هواي أكو فرق اصلا الألوان الغامقه ضالمتج والمكياج اليوم يخبل طالعه تخبلين
سيلين،،، تسلمين هذا من ذوقج
اسماء،،، هههه اليوم اذا تشوفج ميساء ألاتنجلط
سيلين،،، شدعوه
اسماء،،، حقج غير ماشايفه نضراتها ألج هي من غير شي ترجف منج واليوم طالعه تخبلين ألاتتخبل
سيلين،،، ترا هي صح سمره طوخ بس حلوه مابيها شي
أسماء،،، المشكله موبالشكل المشكله بلبسها وتصرفاتها
سيلين،،، عوفينه منها أحسن متستاهل ننطيها حسنات
أسماء،،، اي والله صح
.
.
بلشت شغل وحولولي اكثر من شخص وقضيه لكن صرفتهم بطريقه محترمه ومن دون مااثير الشكوك مااريد استلم اي قضيه جديده اريد اخلص العندي حتى اخلص من هل المكان لكن قبلها انفذ خطتي
مر وقت ودخل سراج لمحته من بعيد يمشي بالممر من شفته بسرعه طلعت من الغرفه سويت نفسي متوجهه للحمامات دخلت ثواني وطلعت امشي صار بوجهي سلم سلام عابر رديت السلام وهو رفع راسه صارت انضاره عليه توقف ضل صافن عليه مارمش وبعدها تدارك الوضع وكمل طريقه لمكتبه
هههه سبحان الله اكبر رجل يتأثر بالجمال اكو ينجرفون نحو مشاعرهم ونزواتهم واكو يتدارك الوضع ويسيطر على مشاعره وشيطانه
رجعت لمكتبي كعدت اسوي نفسي اشتغل لكن اني كل تفكيري مشغول شلون انفذ مخططاتي بيومها من التفكير حتى نسيت اكل ونسيت كل شي الشي الوحيد ألي اتذكره بهل يوم تحطمت حياتي ولازم احطم الشخص ألي تسبب بحطامي مر الوقت وتقريبا وصلنا لنهاية الدوام وبدوا اكثرهم يغادرون المكتب
اسماء،،، اني خلصت شغلي وراح اروح يله انتي ماخلصتي؟
سيلين،،، هسه شويه واطلع روحي حبيبتي الله وياج
راحت اسماء واني اتصلت بضحى خلصت واخذت حقيبتي ورحت لمكتب سراج طرقت الباب أجاني صوته يأذنلي بالدخول دخلت لكيته كالعاده كدامه اوراق يشتغل بيهن ومنفضه مليانه كطوف وبيده چكاره رفع راسه باوع عليه وبسرعه نزل عيونه على الأوراق
سراج،، تفضلي ست سيلين محتاجه شي؟
سيلين،،، استاذ بالنسبه لأتعاب قضية حوراء والدها رفض أحنا نتكفل بالأتعاب وسددها كلها
سراح،،، على راحته أحنا العلينا سوينا
سيلين،،، اي صح،،،ردت اماطل بالكلام ويا ألى ان تتصل ضحى وأنفذ الخطه بس تأخرت،،،سألته....
_ اليوم اجتني وحده استشارتني بقضية حضانة اطفالها لكن وضعها المادي جدا تعبان اهلها ساكنين ببيت تجاوز وانت كتلي بهيج نوع من الأشخاص أساليني
سراج،،، وابو الاطفال شنو وضعه؟
سيلين،،، حسب مافهمت وضعه نوعا ماجيد وعنده بيت وعمل
سراج،،، شنو سبب الأنفصال هو شخص موزين لوخيانه لوشنو بالضبط؟
سيلين،،، لا هو شخص زين وملتزم لكن ألي فهمته مشاكل بين العائلتين هم اقرباء وبينهم خلاف
سراج،،، وتريد تاخذ الاطفال عناد بالأب بالرغم هي ماعدها تعيشهم ولاعدها حتى سكن مناسب لنفرض احنه تكفلنه بالقضيه واتعابها ونجحنا نضم حضانتهم للام زين شنو يضمن راح يعيشون عيشه صح وياامهم حتى لو تاخذ نفقه من الوالد،،،، زين هي ربت بيت لو تشتغل؟
سيلين،،، لا ربت بيت
سراج،،، اني ماعندي اي مشكله بموضوع اتعاب القضيه اني اتكفلها لكن اريد بالبدايه تعرفين كل المعلومات عنها وعن حياتها حتى نضمن انو اذا اخذت الاطفال راح يعيشون يمها بصوره افضل من عيشتهم ويا والدهم مااريد الاطفال ينضلمون بسبب مشاكل وعناد بين الطرفين معروف انو الاطفال من الافضل يتربون عند الام لكن اكو مواضيع بالحياة ميصير نتخذها بدافع العاطفه انتي واني نعرف مودائما الأم تكون ام حقيقيه
سيلين،،، صح،،، واني هم صراحه ماعجبني وضعها وفعلا حسيت الموضوع بي عناد لأن نهائيا ماركزت ولا بينت اي اهميه لاطفالهه كل مضمون كلامهه كان تكول اريد احرك گلبه وگلب اهله واخذهم واحرمهم طول العمر يشوفوهم بعد بالرغم هو زوجها وحسب كلامها شخص زين
سراح،،، خلص الموضوع عندج بقى
سيلين،،، خلص نقاشنه وضحى ماأتصلت يعني بأختصار فشلت الخطه قررت اغادر مكتبه
_ زين استاذ اسفه اخذت من وقتك من رخصتك
كمت وكفت جسمي تشنج واليوم مااخذت علاجي
سراج،،، سيلين بيج شي؟
سيلين،،، هااا،،، لا،، بس شويه احس صار عندي تشنج بالعضلات مال جسمي
طفر من مكانه وتقدم بسرعه وصار امامي
سراج،،، يعني شنو مثل الصار قبل فتره؟
سيلين،،، اي،،، يمكن
سراج،،، ليش هم سويتي مجهود لوسويتي رياضه؟
سيلين،،، مسكت اتجاه قلبي وجاوبته بألم
_لاااا...
سراج،،، استغفر الله زين وين علاجج اخذتي؟
سيلين،، لا اليوم نسيته
سراج،،، شلون تنسي شنو انتي تريدين تموتين وينه جايبته وياج؟
سيلين،،، لا بالبيت هو اني اخذه بعد الأكل ولأن مااكلت نسيت الدوا
سراج،،، ماتريكتي ونسيتي زين من تغديتي ماتذكرتي عندج علاج؟
سيلين،،، ولاتغديت
سراج،،،،،، لخاطر محمد بس فهميني اكو واحد من الصبح للان بدون اكل؟ خلي اخذج للمستشفى لتسوء حالتج اكثر
سيلين،،، اروح للبيت بس اخذ الدوا اتحسن
سراج،،، تكدرين تمشين لو شلون
سيلين،،، نزلت دموعي
سراج،،، استغفر الله يارب
سيلين،،، اثنى نفسه وكمبص امامي
سراح،،،اهدي اذا متكدرين تتحركين اني اشيلج وأرجعج للبيت واذا تريدين ادز واحد من الولد للبيت يجيب علاجج
سيلين،،، اكدر امشي بس اذا تكدر اتصل بفؤاد خلي يجيني اخاف عندك شغل مهم او تتأخر على عائلتك مااريد اسببلك اي احراج
سراج،،، سيلين رجائا انسي كل خلافاتنا هسه صحتج اهم كومي اني اخذج للبيت جيبي ايدج
سيلين،،، كمت اتگئت علي وسندت نفسي مشاني لخارج البنايه عنده ثنين مرافقين من شافونه اجوي باتجاهنه اشرلهم يبتعدون
فتحلي باب السياره الأمامي جنب السائق وساعدني اصعد،، غلق الباب وتحول من الجه الثانيه صعد مشت السياره ثواني وأجاني اتصال سمعته ومارديت لأن مووقتها وخطتي فشلت
ورا دقيقه رجع تكرر الاتصال وهم مارديت
سراج،، ترا جهازج جاي يرن؟
سيلين،، اي مومهم بعدين ارد
انتهت المكالمه ورا دقائق رجع رن من جديد
سراج،،، اخاف اتصال مهم شوفي منو؟
سيلين،،، طلعت الجهاز من الحقيبه
اختي ضحى كلت هل كلام ورجعته للحقيبه ورا دقائق رجعت اتصلت اجت خطه بديله براسي كلت...
_شنو السالفه اليوم شبيها شعجب هيج لحت؟
سراج،،، جاوبيها اخاف شي ضروري
سيلين،،، مو يعني مو،،، صراحه مااكدر ارد
سراج،،، ليش؟؟ ولااكلج على راحتج شي خاص بيج
سيلين،،، موشغلة خصوصيه بس مااكدر ارفع الجهاز واخلي على اذني
سراج،،، هاا،،، اسف مافكرت هيج نسيت جسمج متشنج اذا تحبين اوكف السياره وأنزل وانتي فتحي سبيكر وجاوبيها
سيلين،،، لا ماكو داعي شكرا ألك رجعت اتصلت جاوبت وفتحت سبيكر
_هلو ضحاوي ها حبيبتي؟
ضحى،،، هلو سيلين شبيج متردين وكعتي گلبي عليج،، شبيج صاير وياج شي؟
سيلين،،، لا حبيبتي مابيه شي انتي شبيج؟
ضحى،،، مابيه شي اتصلت اسأل عليج ومن مارديتي خفت عليج عبالي صايرلج شي
سيلين،،، وليش شبيه يعني قابل ليش هل خوف؟
ضحى،،، شلون شبيج اعرفج كل سنه مثل هيج يوم تنهارين وتتعبين خفت ليصير بيج مثل كل سنه اعرف هل يوم صعب عليج لأن تأذيتي هواي و أنجبرتي تتزوجين شخص متريدي وحياتج تدمرت
سيلين،،،خربت الخطه وأم الخطه ارتبكت باوعت على سراج . فتح عينه مصدوم وضحى مستمره بالكلام اريدها تسكت بعد متسكت
سيلين،،، ضحاوي حبيبتي اني مشغوله هسه من ارجع للبيت اتصل بيج ونسولف يله....
انسحب من ايدي الجهاز اباوع سراج عاقد حاجبه بغضب وعيونه حمر وكأنما يخرج منها حمم من نار
