رواية اسيرة بين يدي قاتل ابي الفصل العاشر10 بقلم نور آل زيادة
سيلين،،، ارتبكت باوعت على سراج . فتح عينه مصدوم وضحى مستمره بالكلام اريدها تسكت بعد متسكت
سيلين،،، ضحاوي حبيبتي اني مشغوله هسه من ارجع للبيت اتصل بيج ونسولف يله....
انسحب من ايدي الجهاز اباوع سراج عاقد حاجبه بغضب وعيونه حمر وكأنما يخرج منها حمم من نار،،
ضحى،، وينج سيلين وين رحتي؟
سيلين،،، اشرلي بأمر انو اجاوبها سكتت
ضحى،،، سيلين وينج بيج شي؟
سيلين،،، احم،،، لا مابيه شي بس حاليا مشغوله بعدين اتصل
ضحى،،، اخذي راحتج حبيبتي بس ردت اطمئن عليج،،،،، سيلين؟
سيلين،،، ها ضحاوي؟
ضحى،،، انسي وعيشي حبيبتي خلص الفات مات كافي تأذين نفسج وتحمليها شي صار غصب عنج ثامر مات خسرتي هواي بس ربحتي سيف لتنسين هل الشي ،،،،،، يله باي
سيلين،،، انتهى الأتصال قدملي سراج الموبايل واشوف آيده ترجف صار هدوء موطبيعي طلع چكاره شغلها وكل ماتخلص وحده يشغل الثانيه أيده ترجف والتوتر واضح علي استمر على هل وضع الى ان صرنه قريبين عن المنطقه الساكنه بيها ،، قطع الصمت من تكلم
سراج،،، منو الجبرج على الزواج؟
سيلين،، انسى السمعته شي مومهم ضحى تكبر المواضيع
جاوبني بعصبيه...
سراج،،، شنو هو المو مهم؟ مو مهم خسرتج؟ لو مو مهم صرتي لغيري؟ لو مو مهم سنين عمرنا الراحت واني متصور غدرتيني وفضلتي غيري وبأرادتج تزوجتي واليوم اكتشف انتي انجبرتي تتزوجين جاوبيني،،، فهميني شنو الصار؟
سيلين،،، انسى كل السمعته
سراج،،، شلون انسى جواب سؤال صار سنين ياكل بعقلي و گلبي
سيلين،،، رجائا سراج هل موضوع أنتهى وراح صار سنين طويله و ماكو داعي نفتح دفاتر قديمه صفحاتها احترگت وماضل منها غير الرماد
سراج،،، ليش متريديني اعرف وليش سكتي اختج؟
سيلين،،، لأن الكلام بي بعد ميفيد كل واحد بينا شاف حياته أنت كونت عائله ومرتاح بحياتك وأني هم نفس الشي و بالنهايه كل شي بالحياة نصيب وأصلا كلامي شنو راح يغير
سراج،،، يغير،،، يغير هواي اشياء بس جاوبيني بصراحه
سيلين،،، وصلنا للبيت رجائا وكف السياره وصيحلي الحارس خلي يساعدني وشكرا ألك
سراج،،، بداعت ابنج ريحي گلبي وجاوبيني
سيلين،،،فتحت الباب وحاولت انزل من شافني دا اواجه صعوبه بحركتي نزل وأجه بأتجاهي يساعدني دخلني اول ماشافني الحارس اجاني يركض علينه خليته يسندني انداريت عليه
_شكرا شيخ ماقصرت وآسفه مااكدر اكلك تفضل ماعندي احد بالبيت
سراج،،، اخذي علاجج واذا احتاجيتي شي اتصلي بيه
سيلين،، تمام،، شكرا
دخلت للبيت اول ماشافتني سميه طلعت مسرعه اخذتني ودخلتني جابتلي علاجي اخذته وتمددت على القنفه غمضت عيني ارتاحيت دقائق وجسمي رخى اصلا ماكان بيه شي مجرد تشنجات يمكن صارت بسبب التوتر والشد العصبي وألا العلاج اصلا تركته صار ايام
رحت للغرفه غلقت الباب وأنفجرت بالضحك اول خطه نجحت صح تغيرت بسبب ضحى خربت كل الخطه والكلام المفروض تكوله بس يمكن الصار أفضل صدك من يكولون صدفه خير من ألف ميعاد
دخلت الحمام اخذت شور واني اغني احس بداخلي انتصار مع انو بعدني ماسويت شي لكن فرحانه وأحس بالأنتصار ردت فعله خلتني متأكده راح يوكع
بعد العشا اجاني اتصال باوعت رقم غريب متصل بيه اكثر من مره مارديت وصل مسج ...
(اني سراج حبيت اطمئن عليج ان شاء الله صرتي احسن)
جاوبته....( الحمد الله زينه وشكرا على السؤال
تصبح على خير)
ارسلت الرساله وغلقت الجهاز اعرف هسه ديلوب ويريد يعرف لهذا عفته يستوي على نار هادئه
بيومها نمت مرتاحه
ثاني يوم اتصلت على فؤاد وخبرته ماأكدر اداوم ضل يسأل (ليش) اكتفيت بكلمة (تعبانه)
رجعت غلقت الموبايل ضليت يومين مااداوم ثالث يوم الضهر رحت للمكتب دخلت سلمت اجاني رائد
رائد،، شلونج ست سيلين وين هل غيبه صار يومين ضل بالنه يمج سلامتج ان شاء الله ما بيج شي؟
سيلين،،الله يسلمك،، تسلم،، مابيه شي بس تعبانه حبيت ارتاحلي يومين
رائد،،،اي الحمد الله اذا بخير
سيلين،،، تشكرته وتوجهة للمكتب ونفس الاستقبال والكلام سمعته من اسماء هل شخصين اكثر اثنين صارو قريبين مني اهتمامهم وحنيتهم تعجبني مرت ١٠ دقائق وأجت وحده من السكرتاريه بلغتني...
-- استاذ سراج طالبج بالمكتب
رحت لغرفة مكتبه طرقت الباب أذنلي بالدخول فتحت الباب اول ماشافني طفى الچگاره بالمنفضه بسرعه وكام وبلهفه اتقدم باتجاهي غلقت الباب
_السلام عليكم
سراج،، وعليكم السلام ،،، تفضلي ست سيلين
سيلين،،، استاذ كالو طالبني خير اكو شي؟ اذا علمود الدوام يعني اسفه ماكدرت اداوم تعبانه كلش وانت تعرف يعني الوضع الصار ويايا
سراج،،، اتفضلي استريحي،،، ماطلبتج حتى أسألج ليش ماداومتي لأن اكيد اعرف السبب لكن حبيت اطمئن عليج،،، شلون صرتي هسه؟
سيلين،،، لا الحمد الله تحسنت
سراج،،، اني اشوف لو تشوفيلج دكتور اختصاص بهل مجال افضل من هذا ابو القوام الممشوق لأن من الواضح ميفهم ولهذا للان ماتحسنتي
سيلين،،، كتمت ضحكتي بصعوبه وجاوبته بهدوء
_هل حاله متصير عندي بس من ابذل مجهود يفوق طاقتي ومرات الصغط النفسي هم يسبب هل اعراض عندي وبالنسبه للدكتور وصفولي واحد راح اراجع عنده
سراح،،، بيومها كلتي ماسويت اي مجهود من الواضح نفسيتج جانت تعبانه وهيج صار
سيلين،،، لا،،، هيج عارض صحي صار وانتهى
سراج، همم،،، بس حسب ماسمعت وفهمت من كلام اختج انتي كل سنه بمثل هل يوم نفسيتج تتعب وتتأذين يجوز لهذا السبب تدهورت صحتج؟
سيلين،،، كمت من مكاني...
_اسمحلي استاذ عندي شغل وشكرا على سؤالك وأهتمامك من رخصتك
سىراج،،، اوكفي سيلين
سيلين،،، نعم استاذ محتاج شي؟
سراج،،، ليش تتهربين؟
سيلين،،، وليش اتهرب؟
سراج،،، مااعرف،،، هو منتضر انتي تجاوبيني على هل سؤال
سيلين،،، لا مااتهرب قابل شعندي
سراج،،،جاوبيني بصراحه ولتلفين ولاتدوين
سيلين،، غير افهم على شنو؟
سراج،،، صدك أنتي انجبرتي تتزوجين هذا ألي اسمه...
سيلين،،، ثامر،،، اسمه ثامر ابو سيف
سراج،،، استغفر الله
سيلين،،، شنو تستفاد اذا عرفت وشنو راح يتغير؟ مثلا نكدر نرجع الزمن عشر سنوات للخلف موضوعنا انتهى وكل واحد اخذ نصيبه وكلامنا ووكفتنا هاي غلط ألي بينا مجرد عمل انت عندك زوجه وعائله وأني كذلك
سراج،،، ابو سيف توفى وكلامج ويايا موخيانه أله
سيلين،،، لكن انت دتخون زوجتك من واكف تحجي ويا خطيبتك السابقه
فرك وجهه بعصبيه وجاوب...
سراج،،، سيلين لتستفزيني جاوبيني وريحي گلبي صار يومين حتى نوم مانايم ولامرتاح عقلي من التفكير راح ينفجر ولتكولين ميهمني وماضي لايهمني ،،،، من اضل عشر سنوات متوهم انتي غدرتيني و تركتيني وتزوجتي غيري وعشتي حياتج ويطلع هل شي ما أله وجود لاهنا يهمني ونص
سيلين،،، نزلت دموعي كعدت منهاره على الكرسي
ليش مصر تفتح جروح أحتاجيت عمر حتى اغلقها سنين واني متت بيها ألف موته،،، ليش مصر ترجعني لليوم ألي اهلي كسروني بي ودمروني وجبروني اتزوج شخص مااريده واكبر مني
كعد امامي....
سراج،،، ليش وافقتي ليش استسلمتي ليش ماقاومتي وانتضرتيني اجي اخلصج منهم
سيلين،،، تأخرت سراج انت هواي تأخرت
سراج،،، صدكيني غصبن عني مو برضايه أنجبرت اني اجيتلج بس وضعي خاني وخلاني أبتعد عنج ماتوقعت هل شي راح يصير خسرتج ورحتي من ايدي بلمح البصر حلمنا اني وياج بكل شي وخططنا لكل شي ألا الفراق ماحلمنا بي
سيلين،،، مع الأسف الحلم ألبدايته حب تصير نهايته فراق ومن غير حتى وداع،،، ضليت ايام واني انتضرك تجي تخلصني من الضلم العشته اذوني ودمروني كل شي سووا بيه جبروني ألبس البدله البيضه بس مو ألك لغيرك،،، عشت ايام بس الله يعلم بيها متت ألف موته يله كدرت اتخطى وأعيش وهسه جاي بعد كل هل سنين تسألني ليش!!! نسيتني وتزوجت وصار عندك اطفال وعشت حياتك ليش تسأل وتفتح جروحي؟
سراج،،، صدكيني ماچان حالي افضل من حالج،، انتي أنجبرتي واني هم الضروف جبرتني اتزوج غيرج
سيلين،،، خللللللص!!! على شنو جاي تكلي ليش ماتحملتي وصبرتي،،، اذا انت رجل أنجبرت تتزوج وحده متريدها شلون اني بنيه بريئه وضعيفه لاحول ولاقوه شلون اكدر اقاوم ومع هذا هواي قاومت لكن فشلت هل موضوع هنا وينسد والماضي ضل بالماضي وانت هسه رجل متزوج وعندك اطفال من الأفضل ألي وألك اترك الشغل حتى لتصيرلك مشاكل كافي واحد بينه تدمرت حياته على الأقل انت عيش مرتاح
سراج،،، ومنو كلج اني مرتاح؟؟ ولا يوم ارتاحيت من يوم خسرتج
سيلين،،، هل كلام ماضل أله لزوم ولافائده
باوعت بعيونه ونزلت دموعي..
_أحنا انتهينا ماكو شي بعد اسمه سراج وسيلين صح بسيطه كانت احلامنا لكن بخيله دنيتنه استكثرت علينه السعاده....
روح لزوجتك وأطفالك عيش حياتك وانسى الماضي واكيد راح يجي اليوم ألي رب العالمين يعوضني واني هم اعيش بسعاده
سراج،،، ويا منو تريدين تعيشين هل سعاده؟
سيلين،،، اكيد فد يوم يجي الشخص ألي يعوضني كل العشته،،، سراج من الأفصل ألنا ثنينا نبتعد اقبل بأستقالتي
مد ايده مسح دمعتي وجاوبني...
سراج،،، ليش خايفه مني وتريدين تهربين؟ شنو تخافين تبقين وترجعين تتأثرين بيه؟
سيلين،،،أستفزني كلامه مال هسه ضربه على راسه أصحي على زمانه هل نرجسي،،، أتماسكت وجاوبته...
_ اني ماخايفه من نفسي خايفه منك
سراج،،، هسه صار سراج مصدر خوف ألج؟
سيلين،،، ولامره شفتك مصدر خوف بالنسبه ألي من اول مره شفتك شفت بيك الأمان ورغم كل الصار ورغم السنين المرت للان اشوف بيك الأمان
سراج،،، لعد من شنو خايفه؟
سيلين،،، خايفه أتأثر بتأثرك بيه،،، خايفه أتأثر بلهفة عينك من تشوفني واهتمامك،،، رغم تحاول تبين قاسي بس حنيتك واضحه رغم تحاول تخفيها بقساوة كلامك وخايفه ارجع اشوف سراج القديم مصدر اماني وبطلي الطعنوا بطنه وهو يحميني،،، اخاف ارجع سيلين القديمه ألي تتأثر بيك وتشتاقلك وتنتضر دقيقه دقيقه حتى تشوفك،، اخاف ارجع اعيش كل
هل الأحساس واعرف النتيجه صفر لااني ألك ولاانت ألي
سراج،،، سيلين لتصدک........
فؤاد،،، عفوا دكيت الباب اكثر من مره يله دخلت عبالي ماسمعتني اوبيك شي
سراج بهمس،،، تعال فوت،،،،،هو هذا هم حضي من شفتك وشفتني تجي بالوقت الغلط
سيلين،،، سمعته من همس ابتسمت بهدوء
فؤاد،،، اذا مشغول اجي غير وقت
سيلين،،، اني رايحه وشكرا شيخ على سؤالك وممنونه منك لأن قدرت وضعي الصحي
سراج،،، احم،، اي،،، اكيد اخذي راحتج وسلامتج مره ثانيه
سيلين،،، الله يسلمك،،، من رخصتكم
طلعت واني اشعر بالأنتصار ماصدكت بهل سرعه راح يتأثر ويرجع يحن توقعت راح يتعبني لحد مااوكعه لاويكولون يموت على مرته،،، هههه واضح كلش،،، اصلا مبين زواجه منها مصلحه
خلص الدوام رجعت للبيت مر روتين عادي بين ابني وسميه واتصلت بساره
ثاني يوم داومت بالمكتب لأن ماعندي شغل بالمحكمه عندي ثلاث قضايا وموعدهن تأجل داومت مثل كل يوم دخلت للمكتب بالممر شفت شخص واكف ويا سراج ويسولفون ومندمجين رفع راسه بأتجاهي وابتسم كلت.. السلام عليكم ردو ثنينهم
مصطفى،،، دقيقه اني اعرفج انتي مو نفسج ألي طلعناج من شيسمونه....
سيلين،،،ههههه،،، ليش خجلان كول طلعناج من البتاوين
مصطفى،،، سبحان الله الدنيا صغيره ماتصورت هنا ألكاج
سيلين،،، ليش استغربت اني محاميه وهنا اشتغل
مصطفى،،، حلووووو
سراج،،، يله يبا توكل عدنا شغل مافاضيلك روح
مصطفى،،، هاي طرده شيخ لو اني غلطان؟
سيلين،،، من رخصتكم ومسروره رجعت شفتك وشكرا مره ثانيه على موقفكم ويانا بوقتها
مصطفى،،، لا يابا ماكو داعي للشكر تأمرين امر هذا واجبنا وخصوصا طلعنه عرف
سراج،،، وتالي اليوم منشتغل
مصطفى،،، حاضر شيخ راح اروح بس قبلها
مادام صارت هل الصدفه الحلوه حاب اعزمج الباجر على عزيمة تخرجي وأكون مسور اذا حضرتي
سيلين،،، اباوع على سراج بانت علي ملامح العصبيه باوع لمصطفى بغضب وخزره جاوبته...
-- الف مبروك تخرجت من ياكليه؟
مصطفى،،،كلية الطب
سيلين،،، ماشاء الله
سراج،،، يله روح تأخرت
سيلين،،، انتبهت سراج بس يريد يصرفه من المكان استغربت شنو السالفه انتبهت الولد ارتبك سلم وراح من شفت الوضع متوتر ترخصت ورحت لمكتبي بلشت عمل خلص الدوام ورجعت للبيت ثاني يوم الصبح اتصل بيه فؤاد
فؤاد،، ها سيلين اليوم تجن لولا؟
سيلين،،،اي ليش لا عادي اداوم شنو اليختلف
فؤاد،،، موقصدي على الدوام قصدي على العزيمه
سيلين،،، ياعزيمه؟
فؤاد،،، شنو ماعزموج؟
سيلين،،، منو؟
فؤاد،،، مصطفى عزم المكتب كله على الغدا ببيت الشيخ
سيلين،،، لحضه شيسوي ببيت الشيخ؟
فؤاد،،، شبيج مصطفى غير يصير ابن اخته للشيخ سراج
سيلين،،، صدكككك؟!!!! ماادري هسه سمعت
فؤاد،،، يعني ماعزمج،،، متجين؟
سيلين،،، هو الولد عزمني بس ماكنت اعرف مصطفى يصير ابن اخت الشيخ
فؤاد،،، وهسه عرفتي تجين لولا؟
سيلين،،، مااضن
فؤاد،،، على راحتج
سيلين،،، نهينا المكالمه وأستغربت من السمعته طلع مصطفى أبن اخته الكبيره لسراج وهنا فهمت ليش سراج توتر ماراد مصطفى يتعرف عليه وضاج من مصطفى عزمني ههه يخاف لايوصل الخبر لأهله ومرته عباله ميته على عزيمتهم وشوفتهم،،،،،، لحضه،،، لحضه،،، فعلا اني ليش مااروح شنو اليمنع اروح وأجلطهم كلهم
الفكره عجبتني وقررت اروح
راسلت فؤاد يرسلي الموقع تحممت ونشفت شعري سويته ستريت وهو صاير مومثل قبل طولان من العنايه قبل كان اقصى حد يوصل تحت اكتافي ولونه اشقر طبيعي ماكنت اصبغه مبقيته على لونه الأصلي هسه يوصل لنهاية ضهري وصابغته لون اشقر زيتوني وبي خصل بلاتيني بيج كلش حلو وبارز بياضي ولون عيوني ولايك ويا معالم وجهي طلعت فستان مشتريته من أنقره ساده لون مشمشي عدل بينصل وبي چاكه من الخلف وسحاب ذهبي فخم بالصدر لحد الخصر ويزينه حزام بيج وبي قوبجه ذهبيه كبيره علامة شانيل،، فستان يجمع بين البساطه وفخامة بنفس الوقت،،، طلعت شوز بيج كعب وحقيبه بيج ماركة شانيل صارن متناسقات ويا ملابسي لبستهن وزينت بعقد ذهب حصيره عريض على الرقبه وويا تراجي وسوار وخاتم شانيل خليت ميكب فخم اني بالعاده دائما اخلي ميكب بسيط حتى لتتغير معاني وجهي لكن اليوم فضلت اخلي فخم طلع كلش حلو لكن غيرلي معاني وجهي،، وهو المطلوب،،، مااريد اي شي بيه يشبه سيلين القديمه وفعلا ألي أشوفها بالمرايه هسه سيلين مختلفه تماما عن هذيج سيلين ماكو شي منها غير بس لون العيون والأسم
احتاريت بالهديه شنو اشتريله وبما انو الوقت ضيق اخذت وحده من ساعات ثامر جديده مامستخدمها اشتراها من سويسرا ماركه جدا فخمه وسعرها غالي والأصليه مالتها سعرها خيالي غلفتها
أخذت سيارة ثامر التاهو وطلعت،،،بحثت عن الموقع الأرسله فؤاد طلعلي مكان اطراف بغداد دخلت بساتين وصلت للموقع وتأكدت من شفت سيارات ماليه المكان وشباب هواي واكفين ومن ضمنهم سراج لبست مناضري الشمسيه من وصلت الكل وجه انضاره بأتجاهي شفت الصدمه بعيون سراج( وهو المطلوب) صفيت السيارة ونزلت تقدم فؤاد اتجاهي هو ومصطفى استقبلوني
سلمت على الكل دخلني مصطفى كان المكان عباره عن بستان وبي بيت كبير وعلى الجانب مضيف أحنا ونمشي وقفنه صوت سراج
سراج،،، مصطفى اخذ جماعتي للحديقه الجانبيه هناك راح تصير كعدتهم
مصطفى،،، شيخ ليش مو أتفقنا النسوان داخل يم نسوانه والزلم بالمضيف ويا گرايبنا
سراج،،، لا،، لا،،، كادر مكتبي كلهم اخذهم بالحديقه وحد عن الكل
سيلين،،، ابتسمت مستهزئه.... خاف لا أصلا أنرعب ميريدني أنجمع ويا أهله بمكان واحد ويجوز ميريد ألتقي بزوجته يخاف على مشاعرها او منها شخصيا
اجتمع كادر المكتب كله بحديقه جانبيه بيها سقيفه صراحه وللامانه المكان حلو والأجواء هم حلوه ضل سراج يمنا وأنتبهت اخوانه وهواي رجال وياهم راحوا للمضيف
اسماء،،، شعجب الشيخ ماخلانه ندخل للبيت ونتعرف على نسوانهم؟
فاطمه،،، مااعرف
سيلين،،، ابتسمت واني اسمعهن واني الوحيده الأعرف السبب أحنا موهواي بنات اني واسماء وفاطمه وسحر وام محمد واقبال
اجتي ميساء سلمت لابسه قفطان بسيط تحاول تفهمنا اني من اهل البيت
قدمولنه چاي نص ساعه كاعدين وأجن نسوان كبار بالعمر يسلمن انتبهت من ضمنهن عمات سراج وأمه رغم كبرانات ومتغيرات لكن عرفتهن بسرعه لكن متأكده ماراح يعرفني وخصوصا أني لابسه مناضر شمسيه
وصلن يمنا وسلمن أنتبهت سراج توتر وأجه بأتجاهنا
ام سراج،،، حبايب كومن يمنه داخل البيت
سراج بتوتر،،، لا حجيه خليهم هنا احسن جوا هوسة كرايبنا
عمة سراج،،، واذا يمه ليش شبيهم كرابتنه نتعرف عليهن ويتعرفن على ربعنه
سراج بحده،،، كلت كلامي وانتهى
سيلين،،،وجه كلامه بنتر وعصبيه بحيث أنخلسن كلهن،،، اتعجبت شنو سر خوفهن منه؟
اباوع الكل يحترمه وحتى اخوته صح من قبل كنت اشوف الكل يحترمه لكن هسه اشوفهم يهابوا ويحترمو اكثر
السنين غيرت كل شي مثل ماأني تغيرت سراج هم مو نفسه سراج القديم،،، تغير هواي حاليا أله وجوده ومكانته وقوته وشخصيته القويه والقاسيه
راحن امه وعماته واني حسيت على نفسي تصرفت غلط بجيتي صح اجيت عناد لكن الوضع صار محرج للكل وكفت وقررت ارجع للبيت
-- عفوا شيخ وين مصطفى
سراج،،، شتريدين منه؟
--اريد انطي هديته لأن صار لازم اروح
سراج،،، ليش مكلفه نفسج وبعدين وين تروحين بعد ماتغديتي هسه صار الغدا
سيلين،،، شكرا شيخ بس اني أجيت أئدي الواجب واروح وبقائي اكثر ممكن يسبب احراج
سراج،،، أجيتي ودخلتي بيتي متطلعين من دون متاخذين واجب الضيافه،،، استريحي واخذي راحتج البيت بيتج
سيلين،،، بس...
سراج،،، من دون بس متروحين هسه
سيلين،،، كعدت وفعلا اقل من نص ساعه وبدوا يقدمون الأكل وكالعاده اكل العزايم ثگيل واني ميصرفلي هل الأكل جاملت بلكمتين وسحبت نفسي بعدها رجعوا قدموا الچاي والحلويات وبعدها الفواكهه
اني والبنات كاعدات على جهه نسولف وشفت الولد جماعة المكتب توجهوا بأتجاه البستان تقدم مصطفى وطلب منه احنا هم نتجول بالبستان ونشوفه استغليت الفرصه وقدمتله الهديه
مصطفى،،، ليش هيج مكلفه نفسج؟
سيلين،،، هديه بسيطه ان شاء الله تعجبك
رائد،،، ها يالمبخت أجتك هديه
مصطفى،،، انت ورايا ورايا نافسني على كل شي
رائد،،، الله عليك افتحها صار عندي فضول
مصطفى،،، بعدين
سيلين،،، حسيته أنحرج مني كتله... شوفلهيا ليموت من فضوله
فتحها ومن شافها وشاف ماركتها باوعلي مصدوم...
مصطفى،،، ست سيلين شنو هاي ليش مكلفه نفسج هيج والله جيتج كفايه
سيلين،،، لامكلفه ولاشي ألف عافيه،،، تتهنى بيها
رائد،،، بعد شتريد ابو صطيف جايبتلك ساعه ماركه
جاوب باحراج...
مصطفى،،،يعني والله ماجان أله داعي
سيلين،،،عوفك من هل السوالف المهم عجبتك
مصطفى،،،اكيددددد!!! كلش حلوه شكرا ألج
اسماء بهمس،،، شنو سالفة الهديه شنو هيج غاليه؟
سيلين،،، يعني،،، موكلش
سحر،،، يا موكلش هاي ماركه والأصليه مالتها سعرها خيالي بس هاي هم غاليه رغم تقليد
سيلين،،،، عوفونه من الهديه وخلي نروح وياهم
مشينه وياهم كان البستان جميل وواضح جدا معتنين بي وبالزرع
أحنا ونمشي سمعنه صوت ميساء
مصطفى،،، يبو هم ولفت راسها ادري قابل مشايفه البستان اشو يوميه يمنا ماشفت بحياتي بشر بلا احساس بكدها
سيلين،،، امشي قريب منه وسمعته يدردم ويا نفسه بصوت منخفض
ميساء،،، بنات شنو رأيكم أ بيتنا وبالبستان
سحر،،، والله اول مره ادري انتي ساكنه بيت الشيخ؟
مصطفى،،، لا موهنا عايشه
سحر،،، مممم،،، مو اكول استغربت من كالت بيتنا تصورت قصدها هنا عايشه
اسماءبهمس ،،، بووووم في منتصف الجبهه
سيلين،،، ابتسمت على سوالفهن شكد يضوجن منها وفعلا للأمانه هي متنحب غثيثه
ميساء،،، شنو ألي يضحك سيلين ضحكينا وياج؟
سيلين،،، اتذكرت شي حلو وأبتسمت
ميساء،،، اني اكول عوفي ذكرياتج ومتعي نضرج بالمكان هاي فرصه،،، يمكن بحياتج ماداخله لهيج مكان ولا راح تشوفين
فاطمه،،، فعلا مكان حلو
اقبال،،، اي ماشاء الله
سيلين،،، حلو بس بي نواقص ويحتاج عنايه اكثر
ميساء،،، ههههههه،،،عمي املكي متر بمثل هيج مكان وعود تعالي تفلسفي وأنطي رأيج
سيلين،،، نزعت المناضر وباوعتلها بتحدي...
_متدرين يمكن املك احسن من هل مكان؟
ميساء،،، هههههههه ههههاااي،،، ضحكتيني،،، اني متأكده بيت ملك ماعدهم اهلج يسكنون بي ومتأكده راتبج خالته تتكشخين بي مدري تطلبيهن لملابسج حتى تثيرين الأنتباه بلكي تلكيلج صيده مرتبه وثكيله تنامين براسه ويصرف عليج
مصطفى،،،شنو هل الكلام؟
ميساء،،قابل مچذبه الكل يعرف على شنو راسمه شوفها اليوم كاشخه ولابسه ملابس عبالك مال ممثلين اتراك ماأعرف مين جايبتهن و ذهب واني متأكده برازيلي عود تكول شوفوني
سيلين،،،ههه،،، كنت اسمع يكولون الشخص يرى الناس بعين طبعه بس اليوم تأكدت من هل الشي
ميساء،،،شنو قصدج؟
سيلين،،،قصدي مو انتي ألي تقيمين سيلين
وصلنه يم الولد واكفين يسولفون ويأشرون على الحقول
فؤاد،،، سيلين،،، شوفي ترتيب الحقول احسن من ترتيبنه يراد نرتب الحقول مالتج مثل هل ترتيب
سراج،،، ليش عندج حقول؟
سيلين،،، اي بس موبهل ترتيب
اسماء،،، شنو يعني؟ مافهمت،،، يعني أبيتكم مسوين بي حقول لوشنو؟
فؤاد،،، لا عدها بستان وبي حقول
ميساء،،، يعني عود صدك اهلج طلع عدهم بستان؟ اخاف حديقه ونفختوا بروحها وسويتوها بستان ههههه
سراج،،، ميساء، ياريت لوتنتبهين لكلامج
فؤاد،،، ست ميساء ليش هل الأستهزاء؟
ميساء،، منو كال جاي استهزء احجي الواقع شكو هل المبالغه
فؤاد،،، ومنو كلج جاي نبالغ؟ لعلمج البستان مومال اهل سيلين وأنما ملك سيلين شخصيا وعدها هواي املاك غيره
سيلين،،، ميساء من فشلتها صار وجها احمر
مصطفى،، شكد تبلغ مساحته للبستان؟
فؤاد،،،،........ دونم
مصطفى،،، ماشاء الله يعني اكبر من هذا
اسماء،،، على هل السالفه مادام تملكين بستان يعني مومثل ماكالت الست ميساء عليج يعني لبسج بهيج حاله ماطالبته ولاذهبج برازيلي وأكيد اهلج عدهم بيت ملك
سراج،،، شنو هل الكلام؟
سحر،،، هذا كلام الست ميساء على سيلين وحتى كالت تتكشخين حتى تثيرين الأنتباه وتشوفيلج صيده ثكيله تنامين براسه ويصرف عليج،،، طلعت سيلين طاكه ومو بحاجه احد
ميساء،،، هسه عرفت ليش تتلوكن ألها،،، لأن طلعتن تعرفن عدها فلوس
سراج،،، ميساااااااء،،، ثمني كلامج!!!
ميساء،،،شيخ موقصدي شي جاي أشاقه
سحر،،، ست ميساء انتي غلطانه ترا احنا كل شي منعرف على سيلين وتوقعنه وضعها حالها حالنه لأن بسيطه ولامره نفخت نفسها علينه ولا تباهت،،، صح واضح من لبسها كله ماركات بس توقعناها مثلنه تصرف راتبها على الكشخه
سيلين،،، سكتت لأن لكيت الكل محامي دفاع ألي ابتسمت واني اشوف شلون مستقتلين يدافعون عني وميساء من الفشله والقهر وجها صار ينطي ألوان خصوصا من سراج خزها خزه تشل
خطيه المسكينه شبعت صدمات وقررت اعاقبها على طريقتي وأنطيها الضربه القاضيه لهل يوم
شيح لوسمحت ممكن اخذ استشارتك بأمور تخص البستان حابه اغير شغلات ببستاني بستانك عجبني اريد اشوف شنو نوعية المحاصيل المزروعه
سراج،،، اي البستان كدامج استكشفي على راحتج المكان مكانج
سيلين،،،ههه،،، ممكن تكون انت رفيقي برحلة الأستكشاف وتجاوب أسألتي
سراج بأبتسامه.... اي ليش لا اني وبستاني تحت امرج
سيلين،،، تسلم شيخ ميأمر عليك ضالم
سراج،،، اخذوا راحتكم اعتبروا مكانكم
سيلين،،، البنات ابتسمن وميساء باقيلها شعره وتنجلط
تمشيت اني ويا مبتعدين عنهم وهو يمشي ويشرحلي وفعلا كنت محتاجه استشيره ببعض الأمور لأن الفلاحين المستلمين البستان الخاص بينا صح معتنين بي وشكل البستان يجنن واحلى من هذا لكن مينتج محاصيل وفيره مثل بستان سراج
سراج،،، شوفي أحنا اكثر الفواكه نركبها حتى تنتج نوع مميز وطعم مميز شوفي هسه هذا السندي طعمه كلش طيب وغريب وكأنما جامع نكهات كل الحمضيات بفاكهه وحده
سيلين،، قطف سنديه ومسحها وقسمها وانطاني تذوقتها
_مممم،،، فعلا طعمها كلش طيب
تقدمنا بأتجاه اشجار المشمش قطف ومسحها بغترته وقسمها وطلع النوى وقدمها ألي هل موقف رجعني ١٠ سنين احس كل حصوني انهارت واني احس نفسي هذيج سيلين العمرها ١٧ سنه وامامها حبيب عمرها وخطيبها سراج لمن كان يختارلها الفاكهه النضيفه ويتأكد ماكو بداخلها حشرات وبالتحديد المشمش لأن اكثر فاكهه احبها واخاف آكلها من الحشرات
اباوع علي ضلينا واحد سارح بوجه الثاني نضرت عينه ولمعتها اكدتلي هو هم الذكريات هاجمته
مديت ايدي ألي بدت تصير بيها رجفه اخذتها وأكلتها هو من شافني أكلتها تشجع و ضل يقطف ويقدملي واني آكل وهو هم ياكل
نسينه نفسنا وكأنما الزمن توقف بينا ضلينا ناكل ونسولف ونضحك قطع لحضاتنا وصول الباقين يمنا
مصطفى،،، ها شيخ ماصدكت تشوف المشمش؟
اقبال،،، لازم المشمش فاكهته المفضله للشيخ؟
مصطفى،،، فاكهته المفضله؟؟ كولي عاشق المشمش،، زرع نص البستان مشمش ويمشي ويوصي على الأشجار عبالك جهاله وكل مره يختفي نلكا يمهن
سيلين،،، اسمعهم ومستغربه هل كلام اصلا سراج ميحب المشمش ولاكان ياكله
يسولفون ويتناقسون وهو ولامهتم يقطف وينضفه بغترته ويطلع النوى ومستمر يقدملي،، اخر شي انتبهت الأنضار صارت علينه وشفت نضرات الأستغراب بعيونهم وفعلا حقهم،،، شخص بمكانة سراج واكف يمسحلي المشمشه بغترته و ينضفها ألي ويقدمها أكيد هل تصرف يثير أستغرابهم
سيلين،،، شكرا كافي هواي اكلت اخاف آكل أكثر وتتأذى معدتي
سراج،،، ماعليج شي اكلي انتي معدتج متعلمه على المشمش ميضرج
سيلين،،، من آكله يوميه ميضرني بس صار فتره
ما ماكلته فأخاف هسه لأن رجعت آكله أتأذى
جاوبني وهو ملتفت بأتجاه الشجره يقطف مشمش..
سراج،،، ميضر اذا كم يوم عفتي ورجعتي أكلتي
سيلين،،، لامو كم يوم صار هواي صار ١٠ سنين
توقف عن الحركه وأندار باوع عليه بذهول
اسماء،،، ١٠ سنين صار ماماكلته؟!!!!
سيلين،،، اخر مره اكلته قبل ١٠ سنوات
مصطفى،،، شعجب،،، ليش؟
سيلين،،، اباوع على سراج ضل يباوعلي بصدمه جاوبت...
_صراحه اني نحسه بالأكل خصوصا بالفاكهه وعندي وهواس اتجاه الحشرات ألي بداخل الفاكهه و متعلمه ألا شخص ينضفها ألي ويتأكد من داخلها يله آكلها
اقبال،،، اي وشنو يعني اي احد ينضفه وأكلي
سيلين،،، شخصين بحياتي كانو يسوولي هل شي والدي وشخص ثاني وهل الشخصين خسرتهم بيوم واحد قبل ١٠ سنوات ومن يومها ماأكلت مشمش
مصطفى،،،، هههههه،،، سبحان الله عكس خالي الشيخ جان مياكل المشمش ولا يطيقه وصار فاكهته المفضله كل مايضوج يكول جيبولي مشمش
اباوع على سراج وجها تغير يباوعلي نضرات ماعرفت افسرتها ضل يمسح وجهه بتوتر
سراج،،، من رخصتكم اشوف باقي خطاري ،،، انتو اخذوا راحتكم ومصطفى يمكم والبستان وألي بي كله كدامكم
سيلين،،، كال هل كلام وباوع عليه كانت عيونه حمر ،،، سراج طبعه من يغضب عيونه تصير حمر عافنه وراح استمرينه نتجول وصلنا لحضيرت الخيول
فاطمه،،، يمه اني اخاف من الخيل مرت عمي رفسها حصان وماتت
سيلين،،، بالعكس الخيل يخبل تقدمت اتجاه واحد من الخيول لون ابيض جذبني
مصطفى،،، ديربالج ترا هاي مهره عنيده ومتمرده لتأذيج
سحر،،، يممه
سيلين،،، تقدمت يمها صارت تتحرك خليت ايدي عليها وامسح على شعرها الى ان هدئت
مصطفى،،، غريب هل المهره بالتحديد متمرده وماكو شخص يوصل يمها
ميساء،،، هاي المهره المميزه عند الشيخ موصح؟
مصطفى،،، اي صح ومتتقبل غير الشيخ،،، غريب شلون هدئت هسه
فؤاد،،، سيلين ألها معرفه بالخيل لأن مزرعتها بيها خيل واحدى هواياتها ركوب الخيل
رائد،،، حلوو،، يعني ست سيلين فارسه
سيلين،،، باوعت عليه ميساء بغيص وكالت
ميساء،،، تدرون هاي المهره شنو اسمها؟
اسمها زمرده وهي كلش عزيزه على الشيخ لأن اسمها على اسم اعز انسانه على گلبه لهذا كلش يحبها
سحر،.،،، منو هيه هاي زمرده؟
ميساء،،، تصير خطيب......
مصطفى،،، ميساء متلاحضين نفسج جاي تسولفين بخصوصيات خالي وماضيه وتعرفين هل ماضي خط احمر بالنسبه أله و ممنوع نحجي بي بين بعضنا موعاد نحجي امام الجميع
ميساء،،، قابل شكلت؟ وبعدين اشو انت كاعدلي رگبه ونص على كلامي؟
مصطفى،،، لأن اعرف حساسيه هل الموضوع بالنسبه للشيخ
سيلين،،، سمعت كلامهم وذكرياتي رجعتني لهل الأسم( زمرده) لقب اطلقه عليه بسبب لون عيني الزمردي،،، شنو ديصير؟ موضوع المشمش وهسه المهره زمرده؟
دماغي تشوش سرحت بأفكاري واني امسح على ضهر الحصان نسيت نفسي واني افكر واحاول ألكي جواب لأسألتي صحاني من افكاري صوت
ابو طبره،،، ديربالج لترفسج ترى هل مهره متمرده حتى على صاحبها
سيلين،،، انداريت وشفت اخر شخص اتوقع اشوفه بهل مكان وأنتبهت الكل عايفني ورايح واني وحدي باقيه ومامنتبهه جاوبته
_شتسوي هنا؟
ابو طبره،،، حالي حالج
سيلين،،، اني محاميه بمكتب الشيخ ومعزومه وانت؟
ابو طبره،،، مممم،،، طلعتي محاميه،،، حلوووو
سيلين،،،، ليش شنو كنت مفكرني؟
حك طرف حاجبه المطبور...
ابو طبره،،، لا هيج بس يعني
سيلين،،، مومهم شنو اخذت فكره عني لأن اني واثقه من نفسي
ابو طبره،،، اسف
سيلين،،، شنو؟
ابو طبره،،، لتصعبيها ترا مامتعلم اعتذر من شخص
سيلين،،، اليغلط يعتذر هذا الطبيعي
أبو طبره،،، غلطت بحقج ولهذا أعتذر منج
سيلين،،، انت حكمت عليه وعلى صديقتي بس لأن شفتنه بمكان وبوقت مومناسب بس ماتسائلت يمكن عدنه سبب قوي ويمكن منعرف هل المكان حكمت من دون متفهم ولاتعرف اي شي عنا
احجي وهو صافن بوجهي ومره يحك بحاجبه بتوتر نزل راسه ورفعه وبلحضه ركض بأتجاهي وشالني ويركض
أنرعبت من الموقف صرت اضرب على ضهره حتى ينزلني وهو مامهتم صرت اصرخ وجسمي يرجف من هول الموقف
