رواية يتيمة المشاعر الفصل التاسع 9 بقلم الكاتبة نور ال زيادة
نورزان: بعد الخطوبه وألي صار بديت اتلافى اي مواجهه ويا عمو رافي
بعد ١٠ايام على هل السالفه، بالكليه كاعده اني وسيف من بعيد لمحت رافي جاي بأتجاهنا استغربت بس بعدين اتذكرت هو قبل فتره كال اريد اجيكم، اباوع علي كاشخ كشخه، طالع فد شي،،لفت انضار الموجودين
رافي: السلام عليكم، شلونكم، تستقبلوني، او اعود ادراجي
سيف: هههه مادامها صارت فصحى اكيد نستقبلك
هلا بيك
نورزان: اكتفيت بالسلام، وماجاملته بعدني
ضايجه منه، بس محاولت ابين هل شي
ضلينا كاعدين نص ساعه، وراها كله سيف امشي
نفتر بالجامعه ونشرب شي، وناكل، وافق على كلامه اني اعتذرت منهم
نورزان :اعذروني مااكدر اجي وياكم عندي محاضره، راح اروح وانتو اخذوا راحتكم
رافي: على راحتج، اساسا انتي حتى ما جاي تشاركينا كلامنا،
نورزان: اعذرني تعبانه وعندي محاضره، من رخصتكم
عفتهم ورحت للمحاضره، لأن طبعي من اضوج من شخص مااكدر اجامله او حتى اتكلم ويا، لهذا قررت ابتعد
*****
سيف
__
رافي شبيك ليش ضجت ؟
رافي: مابيه بس شفت نورزان شلون تصرفت ويايا
وحتى حسيتها ضايجه مني ومن جيتي وكعدتي يمكم على اعصابها
سيف: شنو السالفه كول ياالله اللبنيه ماحجت اي شي ولاسوت اي تصرف يدل على هذا كلامك..
رافي: اني اعرفها اكثر من نفسي، وعدم كلامها واهتمامها، بوجودي هذا يدل انو بيها شي
سيف: يووو يارافي،،، انته صاير تتحسس من نورزان ،،،،وعلى فكره انت ألي متغير مو هيه..
رافي: بطل سوالفك عود يعني تريد تديرها عليه السالفه،،، خلي ارجع احسن ألي علساس جيت اشوفكم ضوجتوني وعكرتو مزاجي
سيف: على كيفك عيني ترا من جيت لسه واني مكابلك وافر فر بيك واجاملك...تالي طلعت غاثك ومضوجك عيني مهندسنا لو انت مزاجك مربوط بنورزان،؟
رافي: شنو قصدك؟
سيف: مااقصد شي يابه راح اسكت احسن لأن
راح تندار عليه السالفه
******
نورزان: خلصت محاضره وطلعت داامشي وصار امير بوجهي
امير: هلو نورزان شلونج؟
نورزان:تنرفزت من شفته جاوبته بضجر
_هلو، خير امير رايد شي؟
امير: اريدج
نورزان: شتريد مني تفضل كول ألي عندك دااروح
امير: رايدج كلج
نورزان:عصبت من كلامه ورده السخيف كتله ...
_امير جوز عني وهذا اسلوبك مااحبه، شوكت تفهم ياابن الناس اني مومثل ألي تعرفهن افهم عاد
امير: اي ادري مو مثل غيرج، وهذا العاجبني بيج
نورزان: رجائا امير وكفتك ومضايقتك، ألي طول الوقت موحلوه لابحقك ولابحقي....فرجائا ابتعد عني الكليه مليانه بنات، مو بس اني وانته ماشاء الله اساسا مامقصر، كل يوميه وحده بعد ليش جاي عليه
امير: ها تغارين عليه؟ اذا تحبين اطيرهن كلهن
واضل بس ألج، انتي بس كولي واني حاضر
نورزان: انت تحجي صدك يعني، اغار عليك ليش انته منو واغار عليك ؟ افتهم،، دااوصلك فكره يعني عندك غيري ابتعد عندي وخلص، اي جزء من كلامي مافهمته...
ياريت تفتهم وتبتعد احسن مااروح للعميد لو اوصل لأهلي وتكبر السالفه لأن صدك مليت من مضايقاتك
بعدني مامكمله كلامي خله تك ايد على كتفي
وحجه بهيام وبصوت ناصي وهادىء
امير: انتي ألي ما جاي تفهميني... اني كلش معجب بيج...ترا بنات الكليه هنا هنه يركضن ورايا ويطلبن يصادقني،....اما انتي فأول وحده نزلت نفسي، ألها وانتي ماقصرتي ذليتيني....
اني مااريد اتسلى وياج اني فعلا عندي مشاعر اتجاهج
نورزان:جاوبته بهدوء عكس ألي بداخلي
_شوف امير اني لااريد اذلك ولاعندي شي وياك...
ومعاملتي الك بهل الطريقه سببها مضايقاتك...
، بس اريد تعرف اني لااريد اكون علاقه وياك ولاويا غيرك، ...فياريت تقدر هل شي وتبتعد عن طريقي انته انسان والدك معروف والكليه كلها تعرفك ومومال مشاكل، خلينا نكون متحضرين اني مافيدك وانته متفيدني، وخلص وان شاء الله تلكي ألي تريدها، بس بعيد عني ورجائا بعد لتعترض طريقي مااريد احد يطلع علينه حجايه
امير: تمام هذا اخر كلام عندج
نورزان: اي وياريت تاخذه بعين الاعتبار
امير: يصير خير نورزان، يصير خير
نورزان: عافني وراح عود هو ضاج بالخير وماعجبه الكلام،،، كملت، محاضراتي وطلعت، لكيت سيف كالعاده منتضرني حتى نرجع سوا، ضلينا نسولف بالطريق سألت سيف....
اكلك سيف اكو ملزمه مسويها ألنا استاذ علي بس اني ماكنت مدوامه بوقتها، ممكن اخذها منك استنسخها؟
سيف: اي اكيد، بس هي بالبيت من نرجع تعالي ويايا لبيتنا هم نتغدا وهم ادورها ألج
نورزان: لا تسلم مالي خلك والله اريد ارجع انام
انت شوفلياها وحضرها والعصر اجي اخذها
واروح استنسخ
سيف: على راحتج
نورزان: وصلني وراح واني مباشر بوجهي للحمام سبحت وصليت ونمت، من التعب...
كعدت، وبدلت، استأذنت من امي ورحت على سيف سلمت على الكل بعدها سألت سيف
_سيوفي فدوه الملزمه مستعجله قبل لتغورب الدنيا
راح سيف جابها ترخصت وسلمت وطلعت اني وسيف للكراج،...من طلعت صار عمو رافي بوجهي بس حسيته موطبيعي وشكله كلش ضايج
سلمت عليه، ردلي بس نضراته ألي كلها غضب
رافي: نورزان قبل لتروحين اريد احجي وياج
نورزان: اي عمو عادي بس اروح استنسخ واجي قبل ليصير المغرب
رافي: شنو تستنسخين؟
نورزان: هاي الملزمه بسرعه هسه اجي
رافي: ويين رايحه وحدج كل عقلج،؟ بابا شوكت تفتهمين انتي كبرتي، وهذا وجهج يجيج ابو التايه وفوكاها الوضع موزين ادري اهلج ميخافون عليج شنو السالفه؟
نورزان:كل كلامه ويايا كان بغضب بس ماعله صوته
_لا عمو اني مينخاف عليه، واهلي متأكدين من هل الشي
رافي: اي مو هيه، بهل البساطه، عود انتي بروسلي
ومينخاف عليج،،،عوفج من هل السالفه اذا ماكو احد يوديج، اني او سيف موجودين تجين علينه...
وهسه انطي الملزمه لسيف يروح يستنسخ ويجي
نورزان: لاعمو ماكو داعي مااريد اتعب احد المكتبه هنا خطوتين
رافي: نورزان بلا عناد، واسمعي كلام
نورزان: سكتت، بعد احسن، بس بنفس الوقت المتمرده ألي بداخلي ضايجه مااحب احد يتحكم بيه، بس يله اعرفه لمصلحتي
رافي: امشي للحديقه عندي كلام وياج
نورزان: مشيت ويا كعدنا على الكراسي
اول ماكعدنه باوع بوجهي وتكلم بعصبيه
رافي: نورزان اريدج تجاوبيني بدون لف ودوران
شعندج ويا هذا الطالب ألي اسمه امير ؟
نورزان: تفاجأت واستغربت شعرفه بي وبأسمه وشنو يقصد بكلامه ضليت افكر.
رديت عليه...
_شنو قصدك من سؤالك؟
رافي: تعرفين شنو قصدي، شنو علاقتج بي؟
نورزان: ماعندي اي علاقه بي
رافي: وألي ماعدها علاقه بشخص توكف بنص الكليه تسولف ويا،؟ لا وفوكاها خال ايده على كتفج؟ يعني هل شي طبيعي بنضرج
،(رفع تك حاجب، كأنو نضرة اتهام)
نورزان: استغربت طريقة كلامه اكثر من السؤال نفسه
جاوبته...
اولا اسلوب الاتهام مااحبه وثانيا ماعندي شي ويا
نهائيا،،، هو ديحاول يتقربلي، واني صديته...
واصلا سيف يدري بالسالفه كلها تريد اسأله
رافي: بس ألي شفته وكلامكم ميدل انتي صادته؟
نورزان: قبل ليكمل كلامه رديت بعصبيه...
_عمو شنو قصدك يعني، دااكذب عليك وعندي علاقه ويا،؟ اصلا هو اعترفلي بمشاعره واني رفضته وسديت الموضوع، وماكو داعي على هاي نبرت الاتهام ألي عندك،
اني كلت هل كلام لوتحول لبركان وصار يصيح عليه
رافي:يعني هذا ابن ال گل***ب حاط عينه عليج
وواكف بنص الكليه ويعترفلج بحبه وانت تشوفيها عادي، ومكيفه،،، انت صايره فد مره ومتحترمين...لا وفوكاها تعلين صوتج عليه
نورزان: ترا مو قصدي اعلي صوتي عليك
بس انت ماشفت طريقة كلامك ويايا، واتهامك
صاير متتناقش،، اني بأختصار شديد جدا ...
ماعندي شي ويا نهائيا وفهمته هل الشي وهو ابتعد
فماكو داعي تكبر الموضوع، اني هل شخص اساسا مااطيقه
رافي: يعني ماكو شي ويا اكو ويا غيره لو شنو مافهمت؟
نورزان: صفنت بوجهه، لأن فعلا ضاع الكلام ومصدومه بي، وبكلامه، ....اني حاليا دااكتشف شخص مااعرفه بحياتي، لهذا عفته وكمت قررت ارجع للبيت لأن اذا ابقى بعد ثواني معناها بعد ماباوع بوجهه طول عمري بعدمشيت خطوتين وألتفتت
_ اني رايحه، عمو وشكرا لشكك بيه وبتربيتك...
عفته ومشيت واني نار بيه، ضل يصيح بأسمي ورايه بس ماعبرت مشيت ورجعت للبيت
ورا شويه اجه سيف جايب الملزمه، وسألني شبيه لأن اعصابي صايره نار بلغته ب كل ألي صار وهو تفاجىء
سيف: واني اشوفه من فتت للبيت شفته صاير بارود باعي نورزان هو صح كلامه جارح وصراحه مامتوقعه منه هو بالتحديد، ....
بس لتضوجين ترا هو يعزج ويريد مصلحتج ومن خوفه عليج هيج حجه واني هم راح احجي ويا وافهمه وافهم منه سبب هذا تصرفه بس انتي لتنقهرين، وتشيلين بگلبج
*****
سيف
___
اني ونورزان صح من كنا صغار منتوالم بس من كبرنه صرنا اخوان واصدقاء وكملت من دخلنه نفس الجامعه، علاقتنا صارت اقوى واعرف عنها كل شي ومتأكد من اخلاقها وتصرفاتها
بس مهما تكون معرفتي وعلاقتي بيها تبقى هي ورافي علاقتهم اقوى، ...لهذا من كلتلي على كلام رافي كلششش تفاجأت!! مو عوايده يتصرف بهل الطريقه ولاعنده اسلوب التشكيك بالكلام ...
وحتى من يشوف خطا ينصح الشخص المقابل، بكل هدوء، واحترام هو شخص طبعه متفاهم ويعرف يتحكم بأعصابه اني ادري بمعزت نورزان عنده بس موهيج يتعامل وياها ...لهذا قررت احجي ويا واشوف شنو سالفته...
دخلت للبيت ولكيته على كعدته كاعد بالحديقه
ويهز برجله بتوتر، ووجهه ميتفسر محتقن وميكصه السيف رحت علي
_ها رافي شبيك؟
رافي: مابيه كله الخير
سيف: لعد شبيك ويا نورزان؟
رافي: لحكت تكلك وتشكيلك؟؟
سيف: شجاك يمعود، انت شلون تحجي وياها بهل الطريقه، اول،، تالي،، انته يطلع منك هل شي
نسيت هاي نونو تربيتك
شفت بعيونه نضرت حزن وندم ردلي ...
رافي: لخاطر الله سد السالفه وعوفني بحالي
سيف: شكلك حجيت وتندمت، بس اكلك ترا الموضوع ميستوجب وهذا امير هو دائما لازكلها وهي تصده
رافي: اي كرت عينك وانته ساكت عنه...
وفوكاها شفته خال ايده على كتفها وديعترف بمشاعره ابن القن****ه
سيف:هوب،،هوب،،هاي شبيك انت متغير حتى لسانك صاير فالت
رافي: تريد تقنعني هذا كلامك صدك لوانته متفق وياها تكول مابينهم شي؟
سيف: اي مابينهم شي ولاتقنعني ولااقنعك المفروض تكون عندك ثقه بكلامي وبكلامها احنا ثنينه تربيتك وبعدين حتى لو بينهم شي اني وانته شعلينه،،، عدها اهل وهمه يحاسبوها
وهي مو صغيره وتعرف مصلحتها
اني كلت هل كلام حسيته راح يموتني رد عليه بعصبيه ...
رافي: انت تريد تخبلني؟صدك يعني بينهم شي احجيييي ؟
سيف: عفت الكلام كله واهلها وجلبت اكو بينهم شي شجاك رافي؟، ترا اي واحد يعرفك يفهم انت جاي تتصرف بشكل مو طبيعي، وعصبيتك ما ألها مبرر فمن الاخير فهمني شبيك وشتريد؟
رافي: جوز عني وكوم وسد السالفه
سيف: راح اكوم وانته راجع تصرفاتك، لأن راح تخسر نورزان
عفته وردت اروح سمعت صوته وتوقفت من كال ...
رافي: سيف اخر مره راح اسألك عنده شي وياها هذا امير لو لا؟
سيف: الضاهر انت قافل بس راح اكلك صدكني ومتأكد مليون بالميه ماكو شي
رافي: زين وغيره ؟
سيف: ليش تحسسني نورزان وحده فالته ومن واحد لواحد ترا رافي هوايه تجاوزت على نورزان
وشككت بأخلاقها،، انته كلش زين تعرف شنو اخلاقها....وحتى اريحك، نورزان وحده مغروره وشايفه حالهاوضاربه شباب الكليه عرض الحائط
كلت هل الكلام وعفته ومشيت، فعلا حقها نورزان، تستغرب وتضوج من تصرفاته اذا اني اخو مستغرب منه ومصدوم بي ...
وضل بالي يودي ويجيب معقوله ألي جاي افكر بي صح،،،،،،،، ياخوفي؟!!
