رواية يتيمة المشاعر الفصل العاشر 10 بقلم الكاتبة نور ال زيادة
نورزان: بعد الكلام ألي سمعته، والتشكيك، ضليت
ايام مقهوره ...هاي ثاني مره يتصرف بهل الطريقه ويايا....، وحتى سيف حسب كلامه مامفتهم منه شي وعلى شنو بهل طريقه ديتعامل ويايا
بعد اسبوع كعدت الصبح سبحت وصليت حضرت نفسي ضليت انتضر سيف حتى يجيني سمعت صوت الهورن طلعت بس تفاجأت لمن طلعت!!
بالسياره مو سيف عمو رافي، تراجعت خطوتين
صاحني وصبح عليه
رافي: صباح الخير
نورزان: صباح النور
رافي: يله شتنتضرين تداومين اليوم لو، ألا سيف يله تروحين
نورزان: لعد سيف وينه؟
رافي: ميداوم بي فلاونزه، واني راح اوصلج
نورزان: شكرا، ماكو داعي تعطل نفسك وتتاخر على شغلك، اني منا ائجر تكسي واروح
رافي: نورزان صعدي وعوفي هل السوالف والعناد
لأن لتتوقعين اخليج تروحين وحدج
نورزان: صعدت ويا بس كنت كلش متوتره
اخر لقاء بينا كان مشحون واني هم ضايجه منه
فضليت طول الطريق ساكته ودايره وجهي
واباوع على الطريق مااريد افتح اي موضوع ويا
رافي: ها شكلج بعدج ضايجه مني؟
نورزان: على شنو ليش انته مسويلي شي حتى اضوج؟
رافي: ممم، وصايره خوش تبسمرين وتسمعين كلام
نورزان: مثل ماانته صاير تشكك، وتعصب عليه وتتهمني بشي ماأله وجود
رافي: نورزان لتتوقعين في يوم من الأيام اني اريد الأذيه ألج ترا اني من حرصي وخوفي عليج، هيج حجيت اني من شفته لهذا امير سألت وعرفت عنه فد واحد طايح حظ
نورزان: عمو ترا اني اعرف شنو اخلاقه، ولهذا ولامره عبرته أوانطيته مجال ومع ذلك انته حتى لو شفته واكف ويايا انته تعرفني وتعرف شنو اخلاقي،وردت فعلك ماكانت مقبوله ومبالغ بها كنت تكدر مثل قبل تنصحني وتدليني الطريق الصحيح اذا اخطئت
رافي: صح كلامج، لهذا اني اعتذر منج واسف لأن جرحتج بكلامي وزعلتج مني
نورزان: اني مااريد ازعل منك ولا اريدك تطلب السماح بس ارجوك مره ثانيه لتسوي هيج
اسألني بغير طريقه، ولتشكك بيه،لأن انت اخر شخص بهل الدنيا، اتوقع منك فد يوم تجرحني
رافي: اكيد، وصدكيني، انتي هم اخر وحده بهل
الدنياافكر مجرد تفكير أئذيج او اغثج.انتي متعرفين معزتج عندي وخوفي عليج
نورزان: تراضينا بعد عتاب واني هم صراحه مااكدر ازعل منه اكثر لأن هو اقرب انسان ألي..فسامحته وسدينه السالفه،رجعت ويا طبيعي مثل قبل كأنما شيء لم يكن رحت للدوام وبالرجعه هم اجه عليه رجعني ومريت سلمت على سيف وشفت صحته
وهو عبالك قرد كلشي مابي،
**
سيف
_
ها عيني بش مهندس رافي، صالحتها؟
لو كعدتني بالبيت ومرضتني على الخالي بلاش..
رافي: سد حلكك يالنابغه ألي يشوفك يكول بحياته مامفوت لادوام ولامحاضرات،
سيف: هسه المفيد تصالحت وياها لو لا ؟
جاوبني بغرور ورفع ياخته وكال ...
رافي: اكيد ....ليش كان عندك شك راح تضل زعلانه عليه؟
سيف: اووووه ياكزنوفا، ألي يشوفك هسه ويسمع الثقه مالتك...ميشوفك من صارلك اسبوع تلوب والندم ماكلك وتفكر شلون ترضيها
رافي: انته عاد راح تلزمها ألي زله...، تورطت طلبت منك تساعدني، هو يوم غبت على الدوام شسويتها سالفه
سيف: هو هذا هم حضي مثل السمج مأكول لو اسبح بالشط
رافي: هههههه، قصدك مأكول مذموم يالفاهم
سيف: خليت الفهم والمخططات ألك صاير خطير وتخوف كل يوم جاي اشوف بيك تغيير شكل...
، وبديت اتسائل شنو سبب تصرفاتك الجديده
رافي: ماكو شي لتسويها سالفه شنو جديد عليك انته تعرف معزت نورزان عندي وماردت تضل زعلانه لااكثر ولا اقل
سيف: خلص افتهمنا ماكو داعي تعصب ويله اطلع من غرفتي اني مريض واريد انام
رافي: متلاحظ عشت الدور زايد
سيف: اي مو على مزاجك تمرضني، وتصحيني لتخليني هسه اروح لنورزان واطلع خططك
شال المخده ورگعها براسي
رافي: راح اطلع، راح اطلع والله كريم، يله نام يالمريض
*****
نورزان: مرت ايام ومشت طبيعي، وبعد فتره قصيره قرروا عرس احمد، وبلشت التحضيرات،
قرروا يسون الحنه بالحديقه لأن حديقتهم كلش كبيره وحلوه، ينجمع بيها الزلم والنسوان بالصاله داخل البيت هم صالتهم مال الضيوف كبيره ومفتوحه على صالة البيت الداخليه شالو القاطع الخشب ألي بينهن و صار عبالك قاعه
رحنا قبل بكم يوم اشترينا ملابس للحنه فساتين قصيره مخصره ومن جوا كلوش، اني وريام نفس فكرة الفستان اني لونه ابيض وبي شغل ذهبي وريام لونه بنفسجي رتبنا روحنا بالبيت وبصعوبه قنعنا امي حتى نخلي مكياج،
شلت شعري نص ونزلت خصلات من الجانبين وبقيته مفتوح على طوله صار حلو خليت مكياج وركزت على رسم العين،وريام فتحت شعرها ولفته صار الطارف مبروم العصر رحنا وامي هم ويانا لبيت عمو نبيل والدي هو وزيد كالوا من نرجع نبدل ونجي لكينا اقربائهم كلهم موجودين، وحتى خالاتي وخالي وبناتهم و ولدهم وجدي وبيبي هم جايين صارت لمه حلوه
بلشت الحفله وشغلو الدي جي، واني وريام وبراء وبنات خالتي استلمناها سوا نركص، تونسنه
وراها تعشينا وب الليل قرروا يروحون يحنون اللبنيه واحناهم وياهم اكيد
طلعنا كلمن بسياره وطبعا اني والبنات خلينه بشت على ملابسنا لأن قصيره احنا رحنا بسيارتنا ويا والدي وكلمن صعد بسيارته وتوجهنا، لبيت العروس دخلنا لبيت العروس كانت طالعه كلش حلوه والاحلى فرحتها هي واحمد
حنو العروس كعدنا شويه قدموا كيك وعصائر وراها طلعنا رجعنا لبيت عمو نبيل نكمل الحفله
والدي وزيد رجعوا لبيتنا اصلا همه لو ما العيب وعلاقتهم القويه ويا عمو نبيل فلايجون عازلين روحهم واكثر وقتهم بالعمل ومبتعدين عن المجاملات
كملنا الحفله والولد علكوها حتى صاروا اصدقاءهم يغنون، ويركصون چوبي
وراها بدو الغربه ينسحبون وضلو بس الاهل
وكملوها اغاني ورگص واحنا كلنا طلعنا نشوفهم
صراحه دائما الولد بالمناسبات وخصوصا الحنه تصير حفلتهم احلى
واني واكفه اجوي خالي او ولد خالاتي يسلمون علينا سلمنا ووكفنا على جه فجئه حسيت شخص يمي ألتفتت شفت احمد ابن خالتي واكف يمي باوع عليه وأبتسم
احمد: شلونج نورزان؟
نورزان: الحمد الله بخير
احمد: شلونه دوامج؟ اكيد دراستج كل مرحله تصير اصعب اذا محتاجه شي او عندج ماده صعبه اني ادرسج تعرفيني خريج علوم بايو
نورزان:شكرا بس البايو اول سنه عندي واني هسه ثاني واني زينه بدراستي ألي يدرس ينجح
بدون مقدمات وبصوره مفاجئه كلي ...
احمد: نورزان ليش رفضتيني؟
نورزان: متصورت راح يفتح هل الموضوع وخصوصا بهل مكان قبل لاارد سمعت صوت غاضب ...
رافي: ليش شوكت خطبتها ؟؟؟؟
