رواية اسيرة بين يدي قاتل ابي الفصل الثامن 8 بقلم نور آل زيادة
كنت أضن أن الطيور على أشكالها تقع لكنني أكتشفت ليس دائما الطيور على اشكالها تقع فالحياة اوقعتنا على غير اشكالنا وأجبرتنا على وجوه لاتشبهنا أبدا 
سيلين،،،، بوقتها باوع عليه بنضرات لليوم ماعرفت افسرها راح واحس گلبي انعصر بروحته ودموعي نزلت ماجنت اعرف هل لقاء اخر لقاء يجمعنه ولو اعرف شمسوي من ورايه ماكنت نزلت دمعه عليه
راح ومن لحضتها اختفى ماكو لاأتصال ولامسج روحي تلوب عليه اريد بس اعرف شنو اخباره خفت علي گلبي يكلي صاير شي امي اتصلت على خاله ام بهاء بس ماردت
قبل يوم واحد من العقد ارسلي مسج يبلغني بي
سراج....(تأجل موعد العقد كم يوم وجدي تعبان كم يوم وأرجع)
أطمئنيت نوعا ما رغم أتمنيت اسمع صوته بس ألتمستله العذر لأن اعرف صعب يتصل وأكيد هسه مشغولين
ثاني يوم العصر سمعنا صوت الباب طلعت امي ودخلت وياها عمه ام بهاء بس مووحدها دخلن وياها جدت سراج وعماته ثنينهن مااعرف ليش انقبض گلبي سلمن سلام جاف وكعدن
ام شاكر،،، ضل بالنا عليكم خوما صاير وياكم شي نتصل ولاواحد يرد؟
ام بهاء،،، لاماكو شي بس ملتهين
ام شاكر،،، اي حقكم معذورين الشيخ مريض الله يشافي.. بشرونه شلون صار؟
جدت سراج،،، اسم الله،، الشيخ مابي شي بيش طالبي بالمرض
ام شاكر،،، لا يعني،،، هو سراج كال مريض لهذا سألت
عمة سراج،،، الحمد الله بخير وعافيه ومشغول بتحضيرات العرس
ام شاكر،،، اي حقكم ولو هو العرس راح يصير هنا بس اكيد الكل يجهز
جدت سراج،،، هناك العرس
ام شاكر،،، بس موهذا چان اتفاقنه اتفقنه هنا العرس
جدت سراح،،، وشعلينه بعرسكم اني احجي على عرسنه
ام شاكر،،، ها يعني موعرس سراج؟
جدت سراج،،، لاهو نفسه عرس سراج بس قصدي موعرسه على بتكم قصدي عرسه على بت عمته
سيلين،،، طول الوقت اسمع وجسمي يرجف من التوتر بس اخر كلام كان صدمه لاشنو صدمه كان صاعقه ونزلت على راسي انتفضت من مكاني وكفت وكلت...
_بنت عمته شنو حجيه؟ اخاف تيهتي ترا اني عروسته....
باوعت على خاله ام بهاء وكلت... مو خاله؟
اباوع على ام بهاء ساكته متجاوب
ام شاكر،،، فهمونه شديصير هنا؟
عمة سراج،،، كلامنه واضح سراج خطيب بنتي والباجر عرسهم
ام شاكر،،، شنو هل حجي هاي شوكت وليش أحنا مندري؟
عمة سراج،،، وهسه دريتوا
ام شاكر،،، ام بهاء جاوبيني هل كلام صدگ
ام بهاء ،،، اي
ام شاكر،،، وليش ماكلتولنه؟
عمة سراج،،، ليش لازم ناخذ الأذن منكم يله يتزوج؟ سراج رجال وابن شيوخ ومن حقه يتزوج ثنين وثلاث واربع بنتي الأولى وبتكم الثانيه وهو ابن خير وعنده حال ومال يكدر يفتح اكثر من بيت
ام شاكر،،، بس هذا مو اتفاقنه وأحنا مانرضى بهل شي
جدت سراج،،، انتو الخسرانين بكيفكم بعد احنا كلنه العدنه
سيلين،،، مامستوعبه كل الكلام مااصدگ سراج يسويها مااصدك يغدرني هيج هو يحبني رحت يم خاله ام بهاء كعدت يمها ودموعي تنزل
_خاله فدوه جاوبيني كوليلي كل هذا كذب سراج يحبني وميتزوج غيري اعرفه يحبني بس ألي وميبدلني بأي وحده صح،، موو؟
عمة سراج،،، ليش انتي فد شغله وميتزوج عليج موزين خطبج انتو وين وأحنا وين انتو ناس فگر تتغدون متتعشون احمدي ربج وشكري خطبج انتي وين وبنت اختي بنت خير خيرها وخير اهلها يسد عين الشمس ألف واحد يتمناها حلوه تخبل شافها سراج وعجبته وخطبها صار كم شهر
ام شاكر،،، أحنا ناس فقره بس شبعانين ومامعتازين عليكم وأبنكم لو رجال يجي يواجه مويضم راسه ودازكم تحجون بمكانه أحنه مومضحكه يضحك علينه
سيلين،،، اباوع على المهزله الكدامي ودموعي تنزل تعاركت امي وعمات سراج وعماته يعيرونه بفقرنه ويحقرون بينه باوعت على خاله ام بهاء ساكته
_خاله الله يخليج جاوبيني سراج وينه ليش مااجه؟
ام بهاء،،، ميكدر
سيلين،، ليش هو كلي باجر ارجع واختفى وبعدها كال تأجل العقد وكم يوم وأرجع
ام بهاء،،، مشغول بعرسه
سيلين،،، يعني صدك،، راح يتزوج؟
ام بهاء،،، اي
سيلين،،، ليش هيج سوا بيه هو موكال اني احبج ومااعوفج وماابدلح بنسوان الدنيا كلها
ام بهاء،،، هو ماعايفج عادي فتره وتتزوجون
سيلين،،، شلون نتزوج وهو راح يتزوج غيري؟
ام بهاء،،، انتي لااول وحده ولاآخر وحده تزوج ويا ضره شكو بيها
سيلين،،، بس اني مااقبل لو اني لو هي
عمة سراج،،، انتي عندج عقل لو مطفيه نكلج الباجر عرسه وانتي تريدي يختارج هو اختار بنت عمته تصير مرته الاولى
سيلين،،،هو وينه اني مامصدكه كلامكم سراج ميعوفني مامقتنعه بكل شي خلي يجي احجي ويا وهو يفهمني
جدت سراج،،، ماتصورتج لهل درجه بلا كرامه نكلج الباجر عرسه وحاير بالعرس وتريدي يجي يفهمج لومهتم جان كلج هو خاطب صار اشهر وكل فتره يروح لهناك على خطيبته
سيلين،، انتو تكذبون جيبولي سراج اريد افهم منه
جدت سراج،،، شنو هل العرامه والصلافه ماألومج بت بغداد بعد ستصيرين وحده سا**طه وملعبه ضحكتي علي وجبتي للدرب وخطبج تربية ملاهي
ام شاكر،،، كومن طلعن برا بيتي وماألكم مره يمنا أحنا ألي منتشرف بناس زباله مثلكم ولااتشرف انطي بنتي لرجال عار على الزلم يضحك على بنات الناس ويغدر بيهن
عمة سراج ،،، يله ماكتلتوا نفسكم ياخذ منكم انتي لوغيرج دللتي بناتج حتى ياخذ وحده منهن هسه صرتوا شرفاء
ام شاكر،،، اشرف منكم عالأقل منغدر ولا نچذب ونضحك عالناس وبناتي ألف واحد يتمناهن
سيلين،،، صرت ابجي بصوت عالي من قهري امي عاطت بيه
ام شاكر،،، لتبجين ماكو واحد يستاهل طز بي والله لااخلي يتحسر عليج ومن باجر ازوجج تاج راسه وراس الخلفوا،، ازوجج رجال من صدك موزعطوط يمشي ورا كلام النسوان
سيلين،،،تقدمت امي شالت ايدي وسحبت الحلقه وشمرتها عليهم ركضت للغرفه لمت غراضهم والذهب وحتى الموبايل ألي جابليا سراج وجابته شمرته عليهم
ام شاكر،،، هاي غراضكم لاخلفت عليكم وانتي ام بهاء مع الأسف سميتج اخت وصديقه تالي بس صار بأضافركم طحين استنكفتوا منه بس تدور الدنيا متضل على حالها وراح يجي اليوم ألي تتوسلون حتى نرضى عليكم بس لوتموتون ماانطيكم بنتي
ام بهاء... لتكبرون السالفه هو ماعايفها ويريدها أحنا أجينه نبلغكم حتى لتكولون أستغفلونه
ام شاكر... قصده يضحك علينه وبعد ما يتزوجهاويكسرها يصير خيير ويحجيلها بزواجه من بت عمته وأكيد توافق لأن أكيد متكدر تطلك
جدت سراج... حتى لتكولون غشيتونه هاي أجينه بلغناكم وأنتو بكيفكم بعد
ام شاكر... هم خلف الله عليكم طلعتوا احسن منه يله عيني بيتنا ميشرفكم طلعوا وكولوله لأبنكم انت الخسران
اليوم اكبر صدمه وخيبة امل عشتها بحياتي انكسرت وكلمة انكسار متوصف الحطام ألي صار بداخلي انغدرت ومن اقرب شخص لگلبي سمع ابويه واخويه بالصار وراحولهم بس مالكوهم بالبيت ههه،، الضاهر رايحين يحضرون لعرسه
ابويه تخربط وضغطه ارتفع اخذه شاكر وامي للمستشفى واني أنهاريت حتى خواتي من انخطبت للان معتزلات عني هسه وبعد الصار انقهرن على حالي وصارن يواسن بيه،،، بس شيواسن واني نار تسعر بگلبي وروحي
اتمنيت بس اشوفه حتى أساله ليش هيج سوا بيه او يمكن كنت مامصدكه كل الصار وعندي امل يطلع كذب بس السوا بعدين اثبت اني شكد غبيه وصدكت بواحد مثله دمر حياتي على الأخر ونهاها
ايام ومانشفت دمعة عيني واهلي هم حالهم مو افضل من حالي والكسره ألي حسيت بيها من سراج عاشها شاكر هم لأن سراج صديقه المقرب لشاكر ومع كل هذا ماكرهته وأحس اكو مبرر ماادري گلبي الغبي ديبررله؟
صرت انعزل وأنطوي على نفسي وأضل أسأل نفسي شنو صار؟
قبل ايام كان يمي ووعدني ألف وعد وكلي أنعيش ونموت سوا ليش هيج سوا؟ ليش خلاني أحبه وأتعلق بي من كل گلبي حبيته أكثر من الدنيا كلها وبين يوم وليله عافني وغدرني،،،اصعب احساس أن ألي روحك بي يبيع ويغدرك باعني وغدرني وخلا أحلامي تنهد على راسي وتتحول الى كابوس
مرت ايام وأحنا منعرف عنهم شي اختفوا كلهم وجهاز سراج للان مغلق وابو سراج وامه من نتصل ميردون والباقين ماعدنا ارقامهم
عشت ايام سوده بس ماحسبت حساب يسوون الأسوء
صار اسبوعين على هل موضوع العصر كاعدين بالغرفه وخواتي يمي يسولفن واني سارحه بعالم ثاني لأن من الصدمه احس دماغي ضرب صار بي خلل فجئه صرت أحس مشاعري وجسمي جمد وقبل لااستوعب صدمتي الأولى اجتني الضربه الثانيه من دخل شاكر للبيت مثل الاعصار اجاني ومن غير نقاش لزمني ضربني ضرب مال موت ملخ شعري واني مااعرف ليش اصلا
خواتي حاولن يخلصني منه بس ماكدرن امي مختفيه مااعرف وين على أثر صوتنه أجه والدي من شافنه عاط بصوت...
ابو شاكر،،،انت تخبلت شبيك شجاك شسوت ليش هيج تضربها؟
شاكر،،، بنتك طلعت وحده ساق**ه وفضحتنه بالمنطقه سيرتها على كل لسان
ابو شاكر،،، شنو هل الكلام خواتك اشرف من الشرف واني متأكد منهن
شاكر،،،،ابن الگ**ب سراج هو وأهله لأن فسخنه الخطوبه طاشين كلام بالمنطقه يحجي بشرفها واخلاقها ويكول الحمد الله كشفتها وكشفت اهلها طلعوا ناس ساق*طه لهذا فسخت الخطوبه ومااتشرف بنسبهم
ابو شاكر،،، ياكل نع*ل اشرف منه ومن اهله وماألك حق تضرب اختك موذنبها الصار
شاكر،،، لاذنبها لأن لوسامع الكلام ألي مطلعه جان فهمتي هي السبب
سيلين بدموع،،،، والله العضيم،،. والله مامسويه شي كله كذب،، شاكر اني اختك والمفروض تعرفني وتعرف اخلاقي
شاكر،،، بطلت اعرف احد كلكم ماعرفكم ألي اعتبرته صديق واخ غدر بيه وبأختي واختي ألي طول عمري اشوفها اكثر شخص بريء طلعت.........
استغفر الله
دخلت امي للغرفه وسألت سولفولها الكلام
ابو شاكر،، كمل سولف شنو الكلام ألي مطلعه علينا ؟
شاكر،،، سد السالفه يابا اني احلها روح انت للمسجد بعدين نسولف
سيلين،،، طلع والدي بعد ماحذر شاكر يمد أيده عليه
ام شاكر،،، امشي نحجي برا
سيلين،،،، خزرني وأخذ امي وطلع من الغرفه واني انهاريت جسمي كله يوجعني وگلبي احس راح يتوقف
توقعت هي هاي النهايه بس طلعت بداية عذابي رجعت امي دخلت للغرفه جايبتلي صونده كطعتني بيها وللان مااعرف ليش وحتى تكمل ورا كم يوم اجتني الصدمه الثالثه ألي قضت عليه قضت على شي اسمه سيلين دخلت امي للغرفه
ام شاكر،،، باعي لج جايج عريس وأحنا موافقين وانتي غصب عنج توافقين وألا أخلي اخوج يگتلج ويغسل عارج اسبوع الجاي عرسح
سيلين،،، ليش اني شمسويه؟ احسن متحجون عليه المفروض توكفون ويايا بهاي الشده اني ألي أنغدرت وتأذيت،،، روحوا حاسبوا سراج وأهله ليش جايين عليه؟
ام شاكر،،، بلا لغوه زايده ومااريد نقاش
سيلين،،، خلال اسبوع شفت ضيم الدنيا ضرب وأهانه وذل ألف مره انهاريت خصوصا من عرفت منو العريس رجال قريب لعمر ابويه
قبل العرس بيوم المغرب صارت هوسه برا بالشارع ماطولت شويه وأنتهت عرفت كالعاده شاكر تعارك ويا شخص سمعه كلام عليه
دخل للبيت يهدد بيه وحط السلاح براسي
شاكر،،، الباچر عرسج تولين منا لبيت رچلج صوتج مااسمعه تطيعين رچلج وتنفذين كل كلامه وتنجبين وتكعدين لا والخلقج متكلفيني غير طلقه براسج اغسل عارج
سيلين،،، هزيت راسي بقبول حتى يعوفني من خوفي بيومها صار عندي تبول لاأرادي تدررت على نفسي من الصدمه والخوف،،، حسيت راح اتخبل منهم بوقتهه كرهت كل شي بهل حياة،، اخذتني اختي للحمام غسلتلي وجسمي كله يرجف مثل السعفه
بالليل رجع والدي للبيت كاعده بغرفتي منطويه على نفسي دخل والدي عليه
ابوشاكر،،، شلونج بابا؟
سيلين،،، فرحت من سمعت كلمته جاوبته مهضومه ودمعتي بعيني
_موزينه بابا موزينه،، الله يخليك لتسوون بيه هيج لتزوجوني لهذا ثامر مااكدر اتقبله شوفه اكبرمني بهواي اني ماغلطت ماسويت شي حتى تعاقبوني بهل طريقه
ابو شاكر،،، بنتي هل زواج افضل شي ألج راح يسد حلوك الناس ولد الحرام خلو سيرتج بلسان الكل طعنوج بشرفج وكالو عنج كلام ثكيل الى درجه ماكو احد بعد يتقدملج لاأنتي ولالخواتج
سيلين،،، بابا اخاف انت صدكتهم مثل شاكر وامي؟
ابو شاكر،،، لا يابه شلون اصدكهم اعرف بنتي شنو
سيلين،،، بابا اذا مصدكني لتزوجني مااريد اتزوج هل شخص الله يخليك ابوس ايدك لتجبروني راح تموتوني بهل شي
ابو شاكر،،، مابيدي شي عليج بنيتي،، هذا قدرج والسبب الحقيقي مني أني ألي امنت بشخص مثل سراج وأنطيته بنتي لوباقين على زواجه وفسخ الخطوبه زين بس من طعنج بشرفج هنا دمرنه كلنه وأحنا ناس مانملك غير شرفنه،،، حقهه امج من تلومني هسه لهذا ساكت على ألي جاي تسوي الضاهر هي اعرف بمصلحتج مني،،، الضاهر هاي حوبة الكسرتهم بس مع الأسف طلعت بيج،،، ارتاحي بابا الباچر عرسج أرضي بنصيبج والله يوفقج ويسعدج
سيلين،،، كام من يمي حتى يطلع صحت ورا
_بابا لتعوفني وحيده اني محتاجتكم توكفون ويايا مو تعوفوني بهل شده وحدي لتكسروني فوك كسرتي
ابو شاكر،،، مابيدي شي بنتي اني ضهري انكسر بيج مرتين وماضل عندي حيل اسندج بس الله موجود
سيلين،،، فهمت معناها حتى انت تخليت عني مثل ماسوا الكل سامحني بابا بس اني من اطلع من هل بيت بهل طريقه بعد ماارجع اعتبروني متت انسوني بعد،،، مارد عليه وطلع من الغرفه كان حاني ضهره
بعد مرور وقت قصير وانخبص البيت طلعت ارگض من غرفتي لكيت شاكر شايل ابويه ويركض بي وامي تلبس بالعبايه طلعوا ومارجعوا غير ثاني يوم الصبح وبس امي رجعت اخذتني هي وخالتي بسرعه،، بسرعه أسألها وين بابا مترد ردت اعرف شصار بس ماحصلت منها جواب شافي وكل مااحجي تهددني بشاكر يقتلني
كل شي صار بسرعه واني دموعي ماوگفت رتبوني وحضروني واجه وقت الزفه زفوني بفستان عرسي الأبيض او كفني الابيض
طلعوني من البيت ودموعي ماوكفت اتمنيت تصير معجزه تغير الصار أتمنيت ألي دااعيشه يطلع كابوس واصحى بس لا هذا واقعي المر يكولون الناس المصايب تجي على ثلاث مراحل والثالثه تنهي كل شي ألا اني مصايبي وصدماتي ماخلصت بزواجي من ثامر نفس يوم عرسي مات والدي
ومن يومها عشت جسد بلا روح خسرت نفسي وصحتي والأهم خسرت أبويه ألي مات بحسرته عليه وكل هذا صار بسبب سراج
علمني شلون أحبه وعلموده صرت أعيش لكن ماعلمني شلون أنسى و من بعده اعيش،، دمر حياتي وبسببه ضليت طول عمري عايشه على ذكرياتي والسنين مانستني كل الصار ضليت طول عمري تايهه وضايعه
العوده للحاضر
..........................
مسحت دموعي وغلقت دفتر ذكرياتي بس مع الأسف ماأنغلقت جروحي ألي رجعت نْلُچمتٌ نسيت حبه لسراج وتحول كل الحب ألي كان بداخلي الى كره وحقد
هو سبب دمار حياتي حتى اهلي ألي سووا بيه بالأساس كرد فعل على اهانة الناس ألهم بسبب الكلام ألي شوهوا سمعتي بي اعرف مومبرر لأن اهلي المفروض كانوا يعرفوني ويعرفون تربيتي بس ماوكفوا ويايا ولهذا هم هم ماراح اسامحهم بس الأذيه الحقيقيه اجتني من سراج كل العشته كان ماصار لو ماغادرني وكلها ممكن انساها وأسامح عليها ألا كسرت ابويه ألي مات بسببه ماأسامح عليها
مسحت دموعي بقوه ورددت.... آۆعدِك يَآسرآجٍ رآحٍ آدِفَعك ثْمنْ كلُ قطُرةّ دِم نزلُتٌ منْيَ ۆگلُ دِمعہ نْڒٍلُتٌ منْ عيَنْيَ وكل ليلة نمت وآلهم بصدري وكل لحضة خوف وكل اهانه وذل ۆكلُ آلُم عشُتٌہ بْحٍيَآتٌيَ وكل يوم نمت على سجادتي وأني ادعي ربي ياخذني حتى اخلص من هل عذاب لأن مااريد أعصي ربي وأنتحر مآرآحٍ آهدى ۆلُا أرتٌآحٍ آذآ مآعيَشُتك نْفَس شُعۆريَ آلُعشُتٌه آذآ مادِمرنتك ميَكۆنْ آسميَ سيَلُيَنْ والأيام بينا
صار دفترين عندي جمعتهن واحد قصتي وياسراج والثاني قصتي وياثامر خليته بنفس البوكس وجبت واحد جديد قررت اكتب بي حياتي الجايه ألي قررت اني اكتب مصيري بيها واني اكون الضالمه مو المضلومه راح ارجع حقي من كل شخص دمرني وحطم حياتي ومهما كان الثمن لو هل شي يكلفني حياتي هم مااتنازل راح اسوي كل شي حتى انتقم
غلقت البوكس ورجعت ضميته بس مع الأسف النار ألي اشتعلت بداخلي ماكو شي يطفيها
انتبهت للوقت عبر الضهر وصار وقت الدوام كنسلت كل شي وقررت ماادوام ساعات واني اقرا بمذكراتي نسيت نفسي ونسيت الوقت لبست ملابس رياضيه وأخذت غراضي وتوجهت للچم
ضليت امارس رياضه ضليت ساعات واني مستمره ماكو شي ديطفي ناري ولايخلصني من الشعور ألي بداخلي امارس الرياضه واركض على المشايه وشريط حياتي يمشي كدامي
كذا مره اجت الكابتن تنبهني انو لازم اتوقف لأن هواي لعبت بس ماسمعتلها أستمريت الى ان هلكت هلاك وكأنما داأنتقم من نفسي بهل شي اعاقب نفسي على غبائي شلون صدكته قبل وشلون اليوم تأثرت بكلامه
اخر شي توقفت من الكابتن نبهتني انو صار ضروري اتوقف لأن هواي طولت طلعت جسمي متكسر اسحل بروحي سحل مشيت للبيت طاقتي صفر دخلت البيت هدوء اخذت شوور سريع وطلعت بالبرنص يدوب مشطت شعري وأحس كل شي بيه تشنج وگلبي بي وجع ماكدرت ابدل ملابسي شمرت روحي على السرير من غير لاتبديل ملابسي ولاحتى اكلت ولارحت لغرفة ابني حتى اشوفه نمت من التعب بس لا مونمت حسيت اغمى عليه
.
.
ساره
**
اليوم عيد ميلاد مؤيد اشتريتله كيكه وهديه وقررت اروح لبيت عمتي اعايده امي رفضت لأن تعرف مؤيد ميحب الأحتفال بأعياد الميلاد لكن اني اصريت اخذتني ورحنه دخلنه لبيتهم عمتي من شافتنه عوجت حلكه سلمت علينه لكن واضح وضوح الشمس مومرحب بينه
دخلت للصاله شفت مؤيد كاعد يتابع فلم من شافني ابتسم تقدم سلم عليه بلهفه وسلم على امي،،، عايدته بعيد ميلاده ضاج بس مافشلني ورد
طلعت الكيكه من شافها عتب عليه لأن جبتها هو كل سنه هيج يتصرف وبعدين يغير رأيه وهل مره هم سوا نفس الشي
جابت بنت عمتي سكين ومواعين ومن دون شمعه ولاأي احتفال مؤيد قطع الكيك شال اول قطعه ابتسمت من تقرب مني توقعت راح يوكلني بأيده لكن وكف على طوله وراح لعمتي وكلها ابتسمت لتصرفه رغم حسيت بالفشله بس قدرت تبقى بالنهايه الأم أولى وأفرض من الكل
رجع قطع قطعه ثانيه وتوقعت هل مره ألي لامحال لكن راح على خواته وكلهن
امي تباوع عليه أتابع ردات فعلي همست ألها ماما
ألي مابي خير لأهله مابي خير لغيرهم
كلمه كلتها لأمي اواسي بيها نفسي لأن توقعت راح يجيني الدور لكن الصار رجع كعد وقطعوا الكيك والكل اكل ومؤيد حتى شكر ماشكرني على الهديه و لا لأن ذكرت عيده
خلص اكل وكال...
مؤيد،،، عندي شغل اني طالع
_ سلم وطلع واني ضليت اتگرضم عمتي تباوع عليه بشماته
امي من شافت هل تصرفات اترخصت ورجعنه لبيتنه دخلت من القهر اريد انفجر امي باوعتلي بنضرة قهر وماكالت غير كلمه
ام ساره،،، مع الأسف هذا راح يصير رچلج وهو حتى الأصول ميعرف بيها
ساره،،، بس هو يحبني
ام ساره،، الحب افعال موكلام
ساره،،، طبيعي يحب اهله اكثر ويقدرهم
ام ساره،،، طبيعي يقدر اهله وطبيعي يقدرج التقدير يمشي على الكل موعلى ناس وناس اتمنى فد يوم تصحين وأتمنى هل شي ميجي متأخر
ساره،،، عفت امي ودخلت للغرفه مهضومه امي تحجي عليه وسيلين تلوم بيه وماكو شخص يفهمني اني فتحت عيني على مؤيد هو اول حب بحياتي صح هو جدي بتصرفاته بس متأكده يحبني واني كلش احبه ردت اتصل بسيلين افضفضله وتذكرت اكيد راح تلومني وتحجي على مؤيد لهذا لغيت الفكره
كعدت افكر ويانفسي وأحاول اقنع نفسي تصرف مؤيد طبيعي و هو شخص جدي بحياته وبعيد عن سوالف الرومانسيه والمجاملات
ثاني يوم اتصلت على سيلين والحمد لله ماكدرت اضم بگلبي وكتيت الأول والتالي ومن سمعت رزلتني رزاله ناشفه ورطت روحي وحجيت اخر شي بعد الرزاله
سيلين،،، اني ادري بيج ثوله وميفيد كل الكلام الحجيته بس على الأقل احفضي كرامتج وأخذي منه موقف حسسي انتي ماعجبج تصرفه لتخلي يستصغرج هو وأهله
ساره،، كلامه ضل بعقلي وقررت لأول مره اطبقه ضليت يومين مااتصل بمؤيد ثالث يوم هو اتصل مارديت ل ليل سمعنه صوت الباب فتحت امي الباب سمعت صوت مؤيد طلعت سلمت بس وجهي ثكيل
مؤيد،،، ليش اخابرج متردين؟
ساره،،، ماسمعت جهازي وضعه صامت
مؤيد،،، شبيج هيج تحجين ويايا من ورا خشمج؟
ساره،، لاهيج سلامتك ليش انته مسوي شي؟
مؤيد،،، اني مامسوي شي بس شكلج احد لاعب بعقلج وجايه تعيشين الدور براسي
ام ساره،،، شنو قصدك منو يلعب بعقلها؟
مؤيد،، قصدي صديقتها الساق**طه ام التاهوات والدياحه
ام ساره،،، امي عيب شلون تحجي هل كلام على بنيه بضهرها؟ ترا سيلين بنيه شريفه ومحترمه
مؤيد،، والمحترمه والشريفه تمشي بلا حجاب؟
ام ساره،،، الحجاب فرض على كل امرأه بالغه بس مو هو ألي يحدد شرف المرأه
مؤيد،،، اني بنضري ألي متلبس حجاب ساق **طه وكافره
ام ساره،،، سيلين بنيه تصوم وتصلي وبنيه شريفه ونضيفه وكافله عوائل محتاجه وأيتام وانسانه احسن من هواي ناس يعني حاشا لله اكيد ماراح يعوف كل هاي حسناتها ويعتبرها كافره بس لأن ما لابسه حجاب بالنهايه رب العالمين يحاسبنه على اعمالنه كل عمل على حده الحسنات حسنات والسيئات سيئات ولاتزر وازرة وزر اخرى
مؤيد،،، اني ميهمني هاي اعمالها ولاتصرفاتها الناس اهم شي الشكل الخارجي
ام ساره،،، الحمد الله بيد الله حساب البشر موبيد عباده وألا تصير هيته،،، ابني ليش كل وحده لابسه حجاب انسانه نضيفه حشا الزينات ليش ماكو بنات من برا حجاب وستر ومن الداخل استغفر الله واكو بنات داخلهن وخارجهن واحد،،، احسن ماتقذف محصنه ادعيله بالهدايه،،، موانت متدين وتعرف كلامك عنها بهل طريقه يعتبر قذف محصنه غافله وهذا عقابه شديد عند ربك
مؤيد،، الضاهر غاسله عقولكم كلكم،،، باعي ساره من هسه أكلج لو اني لو هل ساق**طه
ساره،،، شنو هل كلام وشدخل سيلين بموضوعنه اني ضايجه من تصرفك ويايا بعيد ميلادك شعليه سيلين
مؤيد،،، لأن اعرف هي ألي تنحش بيج وتضل تتنافح كدامج بفلوسه وأنتي تتأثرين بالنهايه انتو النساء ناقصات عقل
ام ساره،،، رحم الله والديك واذا هيج صار الكلام احب اكلك اني ألي ماعجبني تصرفك بيوم عيد ميلادك ماأحترمتنه لاانت ولااهلك
مؤيد،،،ماعجبكم تصرفي لأن رجال اخاف الله وماألي بالسوالف الفارغه وطيحان الحظ الف مره كايل لبنتج مااحتفل بأعياد الميلاد وهي تصر تجيب الكيك وتجي
ساره،،، بس انت وافقت وفرحت وأخذت الهديه وقطعت الكيك ليش حسستني اني نكره ومااعنيلك شي وليش عفتنه وطلعت وليش كلكم كالبين وجوهكم علينه؟
مؤيد،،، اخاف ضجتي لأن وكلت اهلي؟
ساره،،، بالعكس فرحت لأن تبر اهلك بس اني وين موقعي بحياتك على الأقل خليني حتى لوبعد اهلك خليلي وجود حسسني بقيمتي وحبك ألي
مؤيد،،، انتي تعرفيني احبج بس صار فتره تتحججين عليه واني اعرف هل شي مومنج من هذيج الساق**طه لهذا راح أگلج من هل دقيقه تختارين لواني لوهي،،، واذا اختاريتيني للموت تنسين هاي المتسمى تمحيها من حياتج،، راح اعوفج هسه والقرار بيدج وكلامي مابي نقاش
ساره،،، كال هل كلام وعافنه وطلع نزلت دموعي مهضومه من تصرفه امي باوعتلي وهزت راسه ماعاجبه الصار،، دخلت للغرفه ابچي على حضي هي بقت بس سيلين ويريد يحرمني منها حرمني من الدراسه والشغل والطلعه حرمني من الدنيا كلهه حتى النفس يحاسبني علي بقت بس سيلين ويريدني اعوفها واني كل شي ولاسيلين
ضليت يومين نايمه بالفراش مريضه من قهري ومؤيد ولا سأل عليه حتى عمامي سمعو بمرضي مااجوي شافوني وامي اتصلت بمؤيد بلغته بوضعي كان جوابه
مؤيد،،، ماعندي وقت مشغول وديها للمستوصف الحكومي يشوفون شنو بيها
ساره،،، انهضمت وساءت حالتي اكثر ضليت بفراشي منتهيه وامي مقهوره وخايفه عليه اخر شي سيلين طلعت متصله عليه وامي بلغته بوضعي أجت تشوفني
سيلين،،، بدون كاف ولا لام كومي اخذج للدكتور
ساره،،، مااريد امي راح تاخذني للمستوصف الصبح
سيلين،،، شيسوولج بالمستوصف؟ كومي للدكتور ومن دون نقاش
ام ساره،،، لايمه الباجر اخذها
سيلين،،، وشنو الفرق ليش مواليوم؟
ام ساره،،، مويعني،،، شسمه،،، هو احسن
سيلين،، خاله مستلمه الراتب؟
ام ساره،،، هااا،، هو يعني شويه هل شهر تأخر عادي من استلم اوديها
سيلين،،، خاله صدك زعلت منكم لعد تكولين بنتي وبنتي هيج تسوين ويايا،،، كومي ساره واذا مارحتي اطلع من هل باب وبعد متشوفوني ابد
ساره،،، كومتني وبصعوبه بدلت وأخذتني للدكتور طلع عندي ألتهاب مجاري بوليه كلش حاد ولهل سبب حرارتي طول الوقت مرتفعه اخذنه العلاج ورجعنه للبيت دخلنه للكراج طلع عمي محسن سلم
محسن،،، خيركم عمي شبيج ؟
ام ساره،، ليش مو تدرون ساره صار يومين مريضه اخذناها للدكتور وهاي جيتنه
محسن،،، لااني ماادري هسه سمعت،،، سلامتج عمي متشوفين شر
ساره،،، الله يسلمك
محسن،،، وين مؤيد مااجه هو اخذهه للدكتور؟
ساره،،، كال هل كلام ومشه يطلع،،، يسوي نفسه ميعرف شي وهو يعرف بكل شي
دخلوني للبيت سيلين ترخصت وطلعت بسرعه مااعرف وين راحت نص ساعه ورجعت محمله مسواك وغراض ولحوم امي خجلت من هل شي بس هي هاي سيلين وسوالفهه خلت جوا مخدتي فلوس وطلعت
ورا ماراحت طلعتهن وأنصدمت خاله مبلغ ٥ اوراق خجلت من مواقفه ويانا وكفاتها اهلنه مامسويهه ومؤيد يحجي عليه وهو صار ٨ سنوات للأن ماصارف عليه ربع دينار رغم مرينه بهواي أزمات ويدري بيها،،، اني اعرف وضعه المادي صعب لهذا مقدره وساكته بس هو ميسكت
ثاني يوم تحسنت للمغرب اجانه مؤيد هو وعمي محسن سلموا وكعدوا وسألوا عن صحتي عمي كلش مهتم بس مؤيد ضايج وعبالك مغصوب على الجيه او يمكن بعده زعلان مني
واني مااكدر على زعله بس طلع عمي حاجيته ورضيته والغريب مافتح موضوع سيلين أبد وهل شي فرحني
.
.
سيلين
***
صحيت على صوت سميه تكعدني بس مااكدر لاأجاوبها ولااكدر اتحرك جسمي متشنج و احس نفسي مشتعله نار من الحراره اخر شي گلبي صار بي ألم وتشنج قوي حسيته توقف رجعت غبت عن الوعي صحيت لكيت نفسي بالمشفى سمعت صوت فؤاد
فؤاد،،، الحمد الله على سلامتج شلون صرتي؟ خوفتينه عليج يمعوده
سيلين،،، الله يسلمك،،، شنو صار؟
فؤاد،،، كاعدين بالمكتب قبل ليخلص الدوام سوينه اجتماع أجاني اتصال من رقمج تجاهلت صراحه بالبدايه بس لحيتي خفت صاير شي خصوصا من انتبهت انتي اليوم مامداومه جاوبت طلعت سميه خطيه اجاني صوتها مفزوعه تكلي ام سيف يمكن ماتت مترد ومابيها نفس تعال ألحكني
ماعرفت شصار بيه انخبصت عفت الأجتماع وطلعت اركض والكل يصيح ورايه من الصدمه حتى نسيت غراضي وسويج السياره رجعت اخذتهن بسرعه وأجيت لبيتكم لكيتج منتهيه شلتج وطلعت تلكاني الشيخ جاي ورايه خطيه هو هم انرعب من شاف وضعج جبناج للمستشفى الله سترج وحماج طلعت عضلة القلب صاير بيها تشنج تلاحكولج چان رحتي بيها
سيلين،،، ليش كلت للشيخ؟ ماكان المفروض يدري وشعرفه هو وين بيتي؟
فؤاد،،، ماكتله كتلج كل شي صار كدامه بالأجتماع خطيه الرجال من سمع بيج تخبل طلعت اني وهو لحكني بسيارته وجبناج للمستشفى وللان برا واكف ينتضر تصحين
سيلين،، كلش انزعجت بس يله اهتمامه اشاره جيده حتى اكدر انفذ الخطه
_اكلك فؤاد وين سيف وسميه؟
فؤاد،،، بقوا بالبيت قبل شويه حجيت وياهم لتخافين
سيلين،،، زين هو بعده الشيخ موجود موو؟
فؤاد،، اي اضن
سيلين،،، زين روح تشكرلي منه
طلع فؤاد واني باوعت على نفسي تذكرت نمت بالبرنص بس هسه لابسه تراك الضاهر سميه ملبستني ملابسي هل سميه مااعرف شلون اجازيها
شويه وسمعت صوت
سراج،،، احم ياالله،،،،، شلونج ست سيلين؟ الحمد الله على سلامتج
سيلين،،، الله يسلمك
سراج،،، شلون صرتي مبين من شكلج هسه احسن
سيلين،، الحمد الله بخير وعگه بسيطه وعدت ماكو داعي ينشغل بالك
سراج،،، جيد،،، اذا هيج اني اترخص عندي شغل بس أجيت لأن تبقين محسوبه عليه لأن تشتغلين بمكتبي
اباوع علي نضراته كلها قلق ولهفه والله راح يخبلني هل رجال عيونه تحجي شي وكلامه وتصرفاته تثبت شي ثاني،،، قطعت النضرات
_شكرا شيخ كال فؤاد انت ساعدته وجبتوني للمشفى شكرا على موقفك
سراج،،، لاشكر على واجب انت موضفه عندي ومن واجبي اوكف وياج
سيلين كلت ويانفسي،،،، مممم،،، فهمت قصده عود حالج حال غيرج متفرقين شي
حاولت اجلس نفسي بس احس القفص الصدري مشدود ونيت بألم وطلع صوتي من الوجع
سراج بلهفه ،،، شبيج سيلين شنو يوجعج؟ اصيح الدكتور؟
سيلين همست ويا نفسي ،،، لاواضح مامهتم وحالي حال غيري،، باوعت علي،،، جاوبته...
_احس كلبي يوجعني ومتشنج
سراج،،، سلامتج
فؤاد،، راح اصيح الدكتور لتتحركين
سيلين،،، اجه الدكتور وفحصني وطلب من الممرضه تخليلي ويا السيروم علاج ومسكن وفعلا ماطول دقائق وبدا التشنج يروح وترخى عضلات جسمي
الدكتور،،، هاي الحاله دائما تتكررعندج لو اول مره؟
سيلين،،، اول مره
الدكتور،، زين شنو الصار مسويه شي او باذله جهد كبير؟
سيلين،،، لا ماسويت شي ألي اسوي كل يوم سويته رحت لعملي ورجعت للبيت ارتاحيت واليوم رحت للچم مثل كل يوم مارست الرياضه ورجعت شويه تعبانه نمت كعدت هذا وضعي
الدكتور،،، كلتي يوميه تمارسين الرياضه؟
سيلين،،، تقريبا يوميه ومرات خمس ايام بالأسبوع
الدكتور،، كم ساعه تمارسين التمارين؟
سيلين،،، ساعه الى ساعتين
الدكتور،،، وشنو الصار هل مره اقصد شنو سويتي تمارين مختلفه؟ لو شلتي اثقال؟
سيلين،،، كل شي سويت ضليت ساعات امارس الرياضه
الدكتور،،، ساعااات؟؟ يعني شنو ساعات؟ ساعتين لوشكد ومستمره لو ارتاحيتي وكملتي؟
سيلين،،، مااذكر اربع اوخمس ساعات بس يمكن اكثر او اقل موكلش اتذكر ضليت مستمره من دون توقف لأن نسيت نفسي
الدكتور،،، تحجين صدك؟!! هذا انتحار شلون هيج تسوين تدرين الله حماج وماتوقف گلبج بسبب فرط الجهد وضخ الدم على القلب منو سمحلج بهل شي وشلون تجازفين هيج مجازفه مامبين على وضعج وحده معلوماتها محدوده ولا متعرف كان المفروض تعرفين هل شي راح يصير وأصلا كابتن القاعه وينه عنج شلون سمحلج
سيلين،،، ماادري نسيت نفسي وماانتبهت للوقت ألا من الكابتن وقفتني صراحه هواي نبهتني بس اني استمريت
الدكتور،،،، زين لعد ابشرج ماكو بعد رياضه
سيلين،،، لاعفيه دكتور كل شي ولا الرياضه
فؤاد،،، غير تنجلط اذا متسوي رياضه وهي عدها هوس بالرياضه والأكل الصحي
الدكتور،،، ماشاء الله مبين عليها جسمها مثالي ماكو داعي لهل الهوس
سراج،،، احم،،. احم،،، دكتور هسه المهم النتيجه مووقت هل كلام
الدكتور،،، النتيجه ماكو بعد رياضه وچيم،، ألي صار اليوم مؤشر انو عضلاتج بدت تنضر وأهمها عضلت القلب تدرين كان فارقتي الحياة لولا
سيلين،،، مااكدر دكتور كل شي ولا يتخربط قوام جسمي
سراج بعصببه ،،، ديكلج موزين اي جزء مافهمتي من الموضوع؟ ياست سيلين عوفي قوامج الممشوق بحاله وشوفي صحتج
الدكتور،،،، لاحقها ترا ماكو افضل من أنو الانسان يهتم بجسمه ورشاقته انتي حاليا شكد وزنج وطولج؟
سيلين،،، وزني حاليا ٥٨ كيلو وطولي ١٦٨ سم
الدكتور،،، بيرفگت،،، وزنج جدا مناسب بالنسبه لطولج والأهم مرتب وقوامج ممشوق
سراج،،، استغفر الله،، الصبر يارب،،، المهم دكتور الخلاصه شنو؟ عوفك من قوامها الممشوق
سيلين،،، حسيت سراج راح ينجلط من كلام الدكتور وأسـآلته
الدكتور،،، تعتني بصحتها وتبتعد عن اي مجهود قوي وماكو بعد چيم بعد اسبوعين من الأن مسموحلها بس رياضة المشي لمده نصف ساعه الى ساعه مو اكثر واي تشنج يصير بعضلاتها تراجع مباشرتا بنفس اللحضه حتة لينعاد الصار اليوم وراح اكتبلها علاج تستمر علي هل فتره والراحه ثم الراحه
فؤاد،،، شوكت نكدر نطلعها؟
الدكتور،،، اليوم تبقى بالمستشفى للباچر نتأكد من وضعها يله تطلع،،، عليها العافيه
سيلين،، طلع الدكتور وأشوف سراج وجهه راح ينفجر ادري انت شعليك منو كلك تولف صماخك من جها مامهتم ويبــيع ثـكل بــرآسـي ومن جه يتدخل بكل شي،،، اتمنى اكوم اطلع روحه بيدي قطع تفكيري
سراج،،، اني رايح فؤاد وانت ابقى هنا واي شي يصير لوتحتاجون شي خابرني
سيلين،،، حتى سلام ماسلم كال هل كلام وطلع معصب،،، نرفزني شنو هل تصرفات شكو اجه وهو ماعاجبه شي وفوكاها يتأمر،،، اصلا لو ماداري وجاي احسن هسه يسوي نفسه صاحب فضل عليه سألت فؤاد
_ تدري فؤاد لو ماكايله أفضل
فؤاد،،، ماكتله هو اجه وصراحه احسن اجه هو سوا كل شي وساعدني خلف الله علي اني وحدي ماكدرت اسوي شي ردت اتصل بأهلج وبطلت اعرف ماراح توافقين،،، ام سيف اني اكول رجعي تواصلي ويااهلج انتي بنيه شابه وارمله وعندج طفل ميصير تضلين وحدج محتاجه سند بحياتج
سيلين،،، انت موغريب فؤاد عشرت سنين سوا وتعرف علاقتي من سنين متوتره ويااهلي وانت بنفسك شهدت على اخر مشكله بينا صارت علمود الفلوس
فؤاد،،، قبلَ كآڼ ثامر موجود وتحت حمايته وهو شايل المسؤوليه وما جنتي محتاجه لأهلج بس هسه اختلف الوضع
سيلين،،، مااختلف انت غلطان لأن بحياتي ماخليت ثامر يشيل مسؤوليتي وكل شي سوا ألي بحياتي كان بمقابل
فؤاد،،، اعرف علاقتج ويا ثامر جانت مو مستقره وحتى اعرف حاولتي تطلكين منه اكثر من مره بس مع هذا لتنكرين ثامر حبج وحاول كل شي يقدملج حتى ترضين عنه وفرلج كل شي وقدملج حياة مرفهه ووفرلج حتى الحمايه حتى ماكو شخص يأذيج
سيلين بعصبيه،،، حاله وماله وكل شي قدمه ماكان يعنيلي شي عمري كله مااهتميت للماديات والأملاك والفلوس ألي بقاهن ألي مترجع يوم من شبابي ألي ضاع واني تحت رحمته سنين عايشه بسجن بعدين طلعني وسفرني وماانكر هل شي بس كان هذا مقابل سكوتي عن اشياء متنحجي وبعدين عن اي حمايه تحجي اخاف قصدك هذا السايق ألي خلا جاسوس عليه حتى يوصله اخباري ويامن احجي و ويامن اطلع لأن بالأساس ماعنده ثقه بيه
فؤاد،، هو موشغلة ثقه يعرفج شنو ومتأكد من اخلاقج بس كان يخاف عليج ولأن يعرفج متريدي ويعرف بأول فرصه راح تعوفي وتطلكين منه
سيلين،،، فؤاد اعرف شنو راح احجي ميفيد لأن ثامر صديقك واكيد توكف ويا وحتى كل اسراره عندك وان........
سراج،،،احم،،،احم،،اسف يمكن قاطعتكم بس نسيت موبايلي هنا ورجعت اخذه
فؤاد،،،اي تفضل شيخ ماكو داعي للاسف
سيلين،،،تقدم نحو الطاوله الموجوده بالغرفه صارت عينه بعيني باوعلي بنضره غريبه ماعرفت افسرها بس كان شكله وهدوءه عكس من طلع من الغرفه،،، اخذ جهازه
سراج،،،وصيت الشباب راح يجيبون اكل حاولي تاكلين حتى تصيرين زينه وترجعلج طاقتج اني رايح عندي شغل مهم لكن راح اخلي واحد من الشباب برا اخاف تحتاجون شي،،، يله في امان الله
فؤاد،،،الله وياك وشكرا
سراج بأبتسامه،،، اقل واجب هذا
سيلين،،، طلع مبتسم صلاوات هم زين من شفت ابتسامته دخيل اسمك ياالله شنو هل الأنفصام كل ساعه شكل ولون،،، لحضه،،،لحضه،،معقول سمع كلامنه؟
فؤاد،،،شبيج تسولفين ويا نفسج؟
سيلين،،،لاهيج بس اكلك فؤاد اخاف الشيخ سمع كلامنه؟
فؤاد،،،لا مااضن ماعنده هيج سوالف ولايهمه اصلا وبعدين صوتنه منخفض مااضن سمع
سيلين،،، ان شاء الله ماسمع لأن صراحه مااحب اي شخص يعرف شي عن حياتي الخاصه ترا انت وصديقتي الوحيدين متطلعين على حياتي ومتأكده منكم ثنينكم متطلعون شي
فؤاد،،، اني من ناحيتي اطمئني اسرارج ب بير حتى مره الشيخ من عرف بيج تخصيني سألني عنج وماجاوبته اي شي
سيلين،،، بس هو يعرف زوجي متوفي؟
فؤاد،،، هو ميعرف ثامر شخصيا ولايعرف شي عن حياته بس سامع عندي صديق اسمه ثامر واني لازم كل اموره القانونيه وسمع بوفاته بس ميعرف انتي زوجته قبل ايام من شافج وسأل عنج كتله انتي تصيرين زوجة ثامر
سيلين،،،، ممم،، وهنا فهم اني زوجي مات
فؤاد،،، ليش اكو اشكال؟
سيلين،،، لاعادي هو مو سر ألاهي هاي حقيقه بس اترجاك. رجاء اخوي مااريد اي شخص يعرف عن حياتي شي
فؤاد،،، من غير متكولين هذا حقج الطبيعي ماكو واحد يحب تكون حياته متاحه للجميع
سيلين،،، فؤاد خوما تحسست من كلامي؟
فؤاد،،، لا والله ابد ترا انتي اختي واعزج مثل معزت ثامر وحجيت هل كلام وياج لأن اعزج وثامر وصاني بيج انتي وسيف واكيد ماراح اعوفج مهما صار بس مع ذلك ارجع واكول انتي ميصير تضلين وحدج ألي صار وياج اليوم ممكن يتكرر وماكو شخص ينتبهلج اليوم العامله شافتج وخبرتني بس مره ثانيه الله ليكولها احتمال متكون موجوده بالنهايه هي شخص غريب عنج
سيلين،،، سميه اخت موعامله صارلها سنين ويايا يتيمه ماعدها غير اخ يعاملها اسوء معامله مسويها خدامه لمرته وجهاله ويضربها وحرمها حتى من الدراسه و الزواج حتى تضل تخدمه وكبرت وماتزوجت والمقابل بس لگمته تاكلها اخر شي حتى يرضي مرته ضربها وصلها للموت وطلعت تركض بالشارع وصارت امامي وبالغلط ضربتها بسيارتي اخذتها وعالجتها ومن عرفت قصتها ساعدتها وجبتها للبيت وثامر بوقتهه رفض رفض قاطع بس وكفت بوجهه وأنجبر يوافق وهي حتى لتحس مثقله عليه صارت تساعدني بكل امور البيت رفضت بس هي اصرت ولهذا حتى مااضيع تعبها سويتلها راتب ووفرتلهه كل شي تحتاجه وصرنا مثل الخوات بالبيت حتى هي ساعدتني بتربية ابني واني خالتها على راحتها لهذا لتخاف اني مووحدي بالبيت مثل ماانت متصور والحارس هم موجود
فؤاد،،، زين ليش اقاليتي الحمايه ألي وضفناهم بعد وفاة ثامر؟
سيلين،،، مااحتاجهم وماالهم داعي
فؤاد،، انتي ادرى
سيلين،،، ورا ربع ساعه اجىه واحد من المرافقين ألي ويا سراج وجايب الاكل موصيلي على كل الأكلات الأحبها قبل،،، استغربت هل شي
معقوله متذكر هل تفاصيل البسيطه بعد كل هل سنين لوهي مجرد صدفه؟
اكلت بس شي قليل لأن فعلا كلش تعبانه وحيل ماعندي حتى للاكل ضليت على اتصال ويا سميه كل شويه اتصل من جهاز فؤاد وأحجي وياسيف لأن اعرفه يخاف وهل خوفه صارت ملازمته من يوم ثامر صوبني للان
طول الوقت فؤاد ماتركني بالليل رجعوا جابولنا اكل وعصائر وكل شي لازم بأمر من سراج رفضت اكل احس حتى معدتي بيها تشنج غفيت واني ونايمه سمعت صوت سراج معقوله أجا بهل وقت؟
تصورت نفسي متوهمه بس تأكدت من صار صوته قريب بقيت مغمضه عيني مااريد أشوفه ماتصورت هل تصرف راح يخليني أسمع أعترافات وكلام صار سنين ماسامعته؟!!
