رواية الامارة الفصل الخامس 5 بقلم زهراء السلامي
-حبيبة: يعني هذا صار بيتچ تَـمني وراسچ براس ابوي بالمُلك!
حسيته راشدي واجه على وجهي مو خبر، صفنت صفنة ما انساها بعمري لدرجة صداع ضربني اذى عيني اليمنه فوراً لزمتها واللتفتت على الحايط..
-حبيبة: تَـمني!! شبيچ شصارلچ تَـمنييي
انسطرت ماعرف شبيه عبالك عرگ ضرب عيني، حسيت بـ حبيبة تطلع من الغرفة واجت عبق تگعد بصفي توخر ايدي عن عيوني وتگول بقلق..
-اكيد حبيبة راحت تصيح لواحد من الولد تَـمني ماگدر ابقى وياچ اني طالعة امانة انتبهي على نفسج
وخرت ايدي من عيني ولزمت ايدها بقوة احرك راسي لا..
-لا لا تجيب احد صرت زينة
-ولج راح يجوون هديني حبابة
-اي عفية گليلهم ماكو داعي
-لا لا عزززه
ركضت طايرة تضم روحها وره الباب بالزاوية وغمضت عيونها حيل ويه فتحة باب المخزن شفتهم حبيبة واخوها..
-علي الحق: يا ستار شبيچ بوية انتِ زينة؟ اخذچ للمستشفى؟
-تَـمني: لا صرت زينة شكراً الك
ظل يباوعلي ويدور عيونه بيني وبين المخزن مستغرب، طلع واشر لـ حبيبة تجي وياه براسه، تذكرت من سوالي نفس الحركة بعرس علي البدر وشمس الظاهر هالرجال يمشي بالأشاير..
سدوا الباب وطلعت عبق من وراها ذبت نفس ووگعت على المندر بصفي..
-ردت ام وت
-شبيچ عبق شسالفتج ويه هذا الرجال؟
-يا رجال؟
سدوا الباب وطلعت عبق من وراها ذبت نفس ووگعت على المندر بصفي..
-ابو عيون حلوة
ضحكت وگرصتها من زندها اتشاقة وياهة واطلعها من جو الخوف، ضحكت بصوت وبسرعة صمت ضحكتها بأيدها وفتحت عيونها بخزر..
-عبق: بس لا سمعوني
-لا هسة عبالهم اني مخبلة واضحك ويه روحي
-ها همزين
-ووولج
ضحكت مرة ثانية واشرت للباب وگالت..
-عبالج اكو شي بيني وبين اخو حبيبة؟
-اي گلت يمكن مو على وفاق انتو
-لا يمعودة اصلاً لا اعرفهم ولا يعرفوني
-لعد شبيچ ختلتي منه؟
-هاا.. مو هاي.. مو استحيت
هزيت راسي ساكتة رغم حسيتها تچذب بس ما ضغطت عليها، گمت اتچي نفسي على الحايط جسمي مفصخ هلكانة..
-عبق اريد اغسل
-تعالي اكلي هسة لا يبرد الاكل
-مو خشمي وحلگي كله دم لعبت نفسي
-ها باعي اكو حمام صاير بنهاية الممر بالزاوية قريب درج السطح هذا مالتي محد يطبله غيري
طلعت من المخزن وعلى وصفها اندليت الحمام، صفنت عليه مو بس متفاجأة لا مصدومة هذا مو حمام هذا خرابة!! ماكو دوش والمقعد مكسور والمغسلة مشكله حيلة واكو شامبو وغسول وصابونة كلهن على النص واصلات محطوطات بالگاع بصف طشت احمر..
تغاضيت عن الشفته وغسلت ورتبت روحي على المراية المكسورة هنا مشطت شعري بأصابيعي مكفوشة وقراصتي واگعة مادري وين، كملت ترتيب نفسي ورجعت للمخزن شفتها گاعدة وصافنة وحدها..
گعدت بصفها ودام صمتنا دقايق وقاطعته عبق من همست بخفوت..
-تَـمني ممكن سؤال
-اي تفضلي
-ليش اجيتي هنا؟
سكتت اباوع بعيونها الواضحة، ابتسمت بلطف وكملت بهدوء..
-اقصد شنو توقعتي تحصلين من فضحتي الامير؟
-ممتوقعة احصل شي
-لعد ليش اجيتي وتعنيتي؟ چان عشتي بفلوسچ بعيد مرتاحة وراسچ بارد احسن من هالسجن
-عبق ما ناوية ابقى هنا اني حتى ماعرف نص البيت هذا بأسمي اني اجيت مو بس حتى افضح الامير اجيت اشوف شيخ علي الي الكل يحچي بأفضاله ومخافته من الله
-تعاتبي؟
-ما اعاتبه بس ابينله الظلم الشفته من اهله، احچيله اني دخلت هنا لبيته دخيلة وره شهر من زواجي من نعمة، وره ما نعمة داس ببطني وطلع روحي اجيت ابچي لهنا تعنيت وگلت راح يوگف ويايه ووگفت بباب بيته وطردتني مرة چبيرة وگالت بالضبط "شيخ علي ما يلفي البرابـ**"
-المرة هي عمة غزوة؟
-لا اعرفها غزوة هاي اكبر المرة حواجبها حمر وعدها رصعة بحنچها
-اااااخ فراقد هاي!!!!
-منو فراقد؟
-بنت خالهةعمو علي ولج هاي بلاااء والله بلاااء
-اي ولج هي الطردتني منا
-خرب عقلها نص عقل هي مخرفة بس فد حية تلعب الروح والكل يخاف منها حتى عمو الشيخ علي ما يرضى احد يخبث وياهة
-بعد مادري شلون راح تصفى
-شلون اجيتي هنا؟ شلون اندليتي؟
-ولچ تهت والله العظيم البارحة طلعت من بيت خالتي تايهة ماعرف وين انطي وجهي، رجعت لبيت نعمة الفجرية علمود اخذ جنطة الفلوس والسندات فتحت ورقة ورقة اريد افهم شي ما گدرت حتى عناوين ما اندل وين بس شقة ببغداد ولگيت مفتاح رحت وچان الگه بيها مستأجرين
-تاليي وين رحتي؟
-ظليت افتر وفلوس ماعندي نعمة كاتبلي ورقة وبيها ختم وتوقيع كأنما واحد متداين منه فلوس هوايه وكاتب اسم وعنوان الشخص، اخذت موبايلي اتصلت بالرقم وطلعلي واحد بس گتله اني زوجة نعمة صار يغلط ويفشر عليَّ وطبگ التلفون بوجهي
-طاح حظه
-وبعد خفت ارجع لبيتي لا يجون المسلحين مرة ثانية واني وحدي
-منو ذولة؟؟
-بعدين اسولفلج عنهم هسة اكملچ الصار، وره ما تهت وللستة الصبح اني افتر بالشوارع ويه البزازين والجريدية هلكت تعب رحت لمطعم يبيع باگله بالدهن وباچه گعدت بي واشكال اللوان مروا عليَّ متت من الخوف وابو المطعم ظل يباوعلي ماتحملت النظرات وطلعت اكمل فره..
-واجيتي هنا وراهة؟
-لا رحت لصديق نعمة رحمان هذا واحد ذرة رحمة مابي بس ماعندي غيره رحتله للبيت طلعتلي بت ليل اني شفتها وگمت اتراعش طلعت اركض مثل المخبلة
-عزه عزززه
-تالي متت تعب وخوف وجوع نويت اجي هنا واللتقي بالشيخ علي عسى ولعل يحن گلبه عليَّ ويساعدني
-وفضحتي الامير
-لا چنت ناوية ما احچي ماردت افضح روحي وخاف يطردني گلت اوصل عنده وافهمه بيني وبينه بهدوء، اجرت سيارة نفرات والحظ بنص الطريق وگفت بينا السيارة واني ماعندي كروة شلون ادفع للرجال
وقررتي تفضحتين الامير??
-لا ولج شعليه هو بالسيارة بس حرت وتهت شلون اروح لغير سيارة وهذا خاف يطلب كروة شلون بيه بس الله ستر عليَّ وگال ما اخذ منكم شي لان ما مشينا هواي
-وما فضحتي الامير
-اي ما فضحت وظليت انتظر علما لگيت سيارة ثانية صعدت وانطلقت لهنا وهم هنا ظليت شگددد افتر وادور على بيتكم اروح من مكان لمكان والزلم حايرين اني ما حافظة اسم شيخ علي الكامل و..
-شلون ما حافظته وهو اخو نعمة؟؟
-يااا لج نعمة مغير اسم ابوه وجده مو نفس اخوانه
-شنوووو ليش عود؟؟
-مادري كلما چنت اسئله ليش
يگول بكيفي ويكتلني
-وما سألتي بعد؟
-ولج يتكلني شسأل بعد عرفت اكو ان وعفته ما مهتمة
-ها كملي شصار وراهة؟
-لليل ظليت افتر ومن واحد لواحد لحدما جزعت وهلكت ربچ اكلت بالسيارة اكو مرة الله يوفقها انطتني من اكلها وسندت طولي
-يا بعد گلبي هاچ لفة اكلي
اخذت اللفة من ايدها اكلها واكمل..
-وصلت لواحد اندل وعرف شيخ علي ولج عينييي شسوه بيه هذا غير خرطني العافية
-وهنا گلتي الا افضح الامير
-اييي لان گال الامير عنده سوابق ولاعب بالبنات طوبة كل يوم وحدة رايحة لشيخ علي تشكي منه لازم احد يحطله حد لان ابوه ديطمطم سالفته ويه النسوان وعمامه ميعرفون ومتخذي قدوة
-وچان انتي فجرتيها وفضحتي الامير!
-اجيت وشفت الكل موجود وملتمين ويشربون چاي ويسولفون عايشين حياتهم انكسر خاطري على وضعي وما گدرت اسكت وحجيت كدام الكل
-اوووووف تَـمني عمت عين الچان السبب
-عبق ماعرف شسوي تايهة وشيخ علي صدمني
-ليش صدمچ؟
-ما سألني عن شي ولا عرف القصة كاملة بسرعة گام يحجي على ابنه وهذا الحقير حتى ما دافع على نفسه مبين متعود على رزايل ابوه
-ههههههههه ولج انتِ مصدگة الرجال الحچى على الامير علي؟
-اي غير
-صراحة ما مقتنعة اني لان هوايه اكو ناس تضوج من شيخ علي وولده وميتمنولهم الخير لانه رجال يخاف الله ومنصف
-مبين عليه حباب حرامات الامير ابنه
-بعد ماعرف اني اشوف تعامل الولد ويه حبيبة يجنن شايليها برموش عيونهم استبعد واحد بيهم مؤذي لدرجة يسوي مصيبة ويه بنية
-زين برأئيج شيخ علي راح يسألني عن الموضوع؟
-اكيدد شيخ علي اني الاضمنه الچ رجال ذهب والله ذهب مصفى وميسوي أي شي ولا يتخذ أي خطوة قبل لا يسمع من جميع الاطراف ويحل الموضوع برضا الكل
-تمام عبق اني هسة اريد اخذ اغراضي واطلع منا ماريد ابقى تساعديني؟
-شلون؟
-بس جيبيلي الجنطة مالتي وهذا هو ماريد شي ثاني
-اگلچ تذكرت
-ها كولي
-الكروة منو دفعها من اجيتي؟
-اوووووف عبق
-والله ظلت براسي
-رجال دفعها الي
-جديتي منه ولج
-لا ولج گلتله انباگيت وحايرة شلون ادفع للسايق وهو بسرعة طلع من جيبه ودفعلي ما شاء الله فد عنده غيرة فديته
-هههههه ولج هستوه رجلچ مات
-الرجال بگد ابوية يطلع عابت
-ها، المهم تَـمني اني ماكدر انزل فدوة والله اتمنى اساعدج والله العظيم بس ماكدر روحي لـ حبيبة هي تساعدج متأكدة
-وين اللگاهة؟
-اكيد بالمطبخ جوه هذا وكتها عتوي المطابخ
-تمام والشيخ هم هنا؟
-لا عمو طلع ويه اخوانه وما رجع بعد
عفتها وگمت باوعت لملابسي مبهذلة ومتمزقة تفشل، لميت الصاية اللفها عليَّ زين ونزلت اتسحب من الدرج البيت اظلم وضوه خفيف جاي من المطبخ..
امشي على اطراف اصابعي بخفة لا يحس احد وطگيتها ركضة للمطبخ، اول ما طبيت خرعني منظر رجال ما لابس تشيرت وبس بالبنطرون يفتر..
-عززاااا
وگفت بنص المطبخ وعطتها، اللتفت عليَّ بسرعة جاحظ عيونه وبيده خيارة دياكل بس شافني ذب نفس وهمس..
-لا تصيحين
درت وجهي عنه فوراً وحچيت بسرعة مرتبكة بسبب منظره..
-اسفة.. ما اقصد ادخل عليك هنا اسفة
-وين داخلة لغرفتي چا غير المطبخ هذا
-اي هو.. احم وين حبيبة؟
-بجيبي
-دا احچي صدگ
باوعت لوجهه ضايجة بدون لا انزل عيوني على جسمه، بس تشتت انظاري ونزلتهن ويه ايده الي فتحت جيب بنطرونه وگال ..
-اي بجيبي هاي هااا اهااا هلو حبيبة خوية انتِ هنا ليش يا بعد چبدي خاتلة شني تخافين من غزوة لو ياهو؟
-حرام عليك تعيب عليَّ
-اوي
ضحك وراح للسنك يغسل، اللفتلي مرة ثانية وگال بأبتسامة..
-اشاقيچ لا تزعلين بس ماعرف وين حبيبة والله
هزيت راسي ونزلت عيوني عنه، هستوني دا اللتفت اطلع من المطبخ وفززني صوت علي الحق ورايه هم بدون قميص ويفتر بالبجامة!!
-ها علي التقي شو گاعد
-علي التقي: اكل خيار تريد؟
-علي الحق: اي جيب
تقدم ياخذ الخيارة من تقي ممهتم لوجودي تورت كلش وزارتني الفهاوة صرت اراوح بمكاني وامشي بالعكس اريد بس افلت لحدما خرطني صوت واحد ثالث ورايه وهم بس بالبجامة!!
-علي الكرار: يا خاينين متجمعين هنا وعايفيني وحدي
عضيت على شفتي مفتشلة وباوعت للباب ساند روحه عليها ومنتچي ومن الخزي الاني بي ماعرف شلون راح تطلع من حلگي جملة "سويلي مجال اطلع"، ارتبكت كلش والاخوة يسولفون ولا يمهم، رفعنا عيوننا كلنا ويه فتح باب المطبخ اليطلع للحديقة وچان اشوف اتعس منظر وهو دخول الامير علي!!
دخل وبيده جنطة محفور عليها "الامـير علي" وملابسه عبارة عن بورگ ابيض وصاير حتى بلحيته عبالك چان يشتغل عمالة، طب عاگد حاجبه ويوزع نظراته بيناتنا تمنيت روحي مطمورة فوگ ومنچبة بمكاني ولا نازلة..
-الامير علي: شصاير؟؟
-علي التقي: اجيت بوكتك ضلعي جاي ناكل خيار
خزرهم بحدة وهمه ظلوا واحد يباوع للثاني، ضرب علي الحق تقي بعكسه وگال..
-اظن چفصنا بس وين الچفصة وشلون مادري
-علي التقي: چفصنا من وره خيارة؟ خايبين لو مطلع رگية عاد تسوه
-الامير علي: ليش سهرانين؟ وانتِ ليش هنا؟؟؟
-تَـمني: اني هنا
-الامير علي: ادري بيج هنا ليش؟؟
-تَـمني: لا هنا
غمضت عيوني من التمسلت شبييه كلما اشوف هالرجال اظل امسلت، ضحكوا الولد حسيت وجهي صار هطوله وين اضم روحي بعد..
-الامير علي: صعدي نامي الوقت تأخر
-تَـمني: اريد.. اروح هناك
-علي الكرار: چا مو هسة چنتي هنا
-تَـمني: لا هاي.. باي خلص رايحة باي
هرولت اطلع من المطبخ بس ماگدر كرار منتچي عليه، رفعت عيني اله اباوعله شو هذا اخذله صفنة بوجهي وانوب يسويلي بيده حركة "شتريدين"..
-الامير علي شو تتبوسم وخرر عن طريقهاا
-علي الكرار: هاا هااا شبيك عبالي تريد تسولف وياي
-الامير علي: وهررش
ركضت اصعد فوگ وحسيت بالامير يمشي ورايه ومن الغبارة والثوالة والفهاوة دست على ذيال الصاية وتكربحت اوگع من سابع درجة ليجوه وگببل على وجهي انسفطت ويه الگاع..
-الامير علي: عليييي
حاول يلزمني بس ما لحگ وانچبحت على وجهي ومن الفشلة ماگدر ارفع راسي واكوم بعد اريد اموت هنا بهذا مكاني..
البيبان گامت تتفتح وطلعوا الكل من غرفهم واني بعدني ممطولة بالگاع وهذا فوگ راسي يريدني اگوم حسيت خلص اني انتهت مسيرتي المهنية والعاطفية والروحية والجسدية ونويت اسوي روحي ماعت روحي وغبت عن الوعي..
-ابرار: ياااا شبيها شصار
-علي الدر: امير شصار ليش البت طايحة؟
-الامير علي: مادري اظن ماعت روحها لان ما تجاوب
-سلوى: يا عيني خطية
-علي الكرار: خلوني اشيلها وخر امير
-الامير علي: ماكو داعي هسة نصحيها
كل هالمحادثات واني ممطولة لا تحركت ولا حتى تنفست دعيت مية مرة ينغمي عليَّ من صدگ واخلص من الفشالة بس ما صارلي شي..
-علي التقي: وينها حبيبة تجي تساعدها؟؟
-علي الحق: اخذتها لبيت عمك قبل شوي بت عمك ليلة متخربطة
صارت دبچة على الدرج قوية مال واحد دينزل من فوگ عرفته رجال من صوته وثگله..
-ابا الحسن علي: شبيها ليلة؟؟؟؟
-علي الحق: شمدريني خابرتها رفل تگول متخربطة وحبيبة رادتني اخذها
-ابا الحسن: اروحلهم؟؟ يمكن محتاجين احد ولك غير تحچي خرب عمك.. (كمل ينزل الدرج وفجأة صاح) هاي منو الطايحة؟ شبيها هاي شني واگعة لو مايعة روحها؟
غمضت عيوني بسرعة من حسيت بأيد شالتني وگلبتني على ظهري، من عطرها عرفتها بنية وما غلطت لان طلعت ابرار..
-ابرار: شو حسيتها رمشت؟
-الامير علي: لا ما رمشت
-والله رمشت انتبهتلها
-ما رمشت خالو انا منتبه وياهة انتِ بس ساعديها تصحى
گامت تصفگ بيه على خدودي تزورگت والحظ لزمتني الگحة اريد اگح وحصرتها راح اختنگ واموت..
-ابرار: متگعد يمكن لازم ناخذها للمستشفى
-علي الحق: هي تخربطت فوگ هم
-سلوى: كلشي مابيها وخرو انا اصحيها
بس سمعت صوتها فتحت عيوني وطلعت الگحة وياهة غصيت وابرار تضرب على ظهري حيييل انخسفت خسف..
-علي الدر:خسفتي ظهرها ابرار على كيفج
-ابرار: شلون صرتي حبيبتي؟
هزيت راسي عود صرت زينة وعكست عيني على الامير واگف ومچتف ايده بس صارت عيني بعينه ذبل جفون عيونه بحركة فسرتها "سوالفج مو عليَّ" رجعت اگح واضرب على صدري اضيع من نظراته الفضحتني..
-الامير علي: الحمدلله على السلامة فهاوي
همس كلمة "فهاوي" بصوت ناصي كلش رفعت عيوني اله مبوزة وجاوبته من وره خشمي..
-الله يسلمك
-رسمية: شجاچ يا يمة ناخذچ للمستشفى نتطمن عليج؟
-لا خالة زينة اني
گومتني ابرار تسندني وصعدتني فوگ لغرفة غير المخزن، غرفة اقل ما يقال عنها جميلة وحس الانوثة طاغي بيها الحايط ورق جدران وردي فاتح والسگف كله ديكور وزخرفة متعوب عليه..
-ابرار: نامي بغرفة حبيبة علما ترجع ولا تطلعين بعد البيت كله زلم
-تمام
گعدت على سرير حبيبة ولا ارادي صرت اقارن بين غرفتها ومخزن عبق، تمددت على الفراش ابو نفرين والفرشة لونها وردي طوخ واكو دبدوب على شكل برتقالة على الچرباية حاطته.. لزمته وضحكت شكله يضحك عبارة عن برتقالة مدورة ومنفوشة..
ذبيته من ايدي مخترعة ويه صوت طرق الباب عرفتها عبق، من مكاني صحت..
-تعالي حبي
انفتحت الباب وشهگت من مد راسه اخو حبيبة مغمض عيونه، طفرت اگعد عدل واغطي روحي بالفرشة، بقى مغمض عيونه ويحچي ويايه..
-ابا الحسن علي: اسف خيتي يمكن زعجتچ بس شنو رأيچ تگومين وياي ونروح للمستشفى؟
-لا اني زينة شكراً
-بس نتطمن
-لا شكراً
-خايبة لا تشلين گلبي گومي نروح للدكتور وضعچ ما يبشر بخير
ما ناقشت زايد وگمت وهو باقي مغمض عيونه ما فتحهن ابتسمت على تصرفه وطلعت وياه بره الغرفة ياله فتح عيونه..
-لبسي شي من حبيبة اذا تردين؟
باوعت على ملابسي مو مال اطلع بيهن عبالك وحدة متسولة، ترددت اللبس شي منها اخاف متقبل ونفيت براسي..
-لا ميحتاج
-براحتج بعد
نزلت وياه وهو ركب سيارته، گعدت بالكراسي الوره وظليت اباوع لردة فعله توقعته راح يرزلني ويگلي مو السايق مالتج اني بس كلشي ما گال وانطلق بالسيارة بسرعة..
-ابا الحسن علي: رايحين لبيت عمي ناصر نجيب حبيبة مناك عندج مانع؟
-لا براحتك
هز راسه ولاف السيارة بُعد شارعين بيت عمهم ناصر بس رمش على حبيبة طلعتله تركض وبيدها الموبايل، عرفتها ما انتبهتلي كاعدة لان بسرعة طبت تگعد بكرسي الصدر وگالت وهي فحطانة..
-شوف حسن اذا سألتني على ليلة تره ليلة تكرهك!
-رحم الله والديها
-اي والله عوفها خوية عوفهاا اشوفلك غيرها عود
-خاب دولي بحالج بحالها انا
-اي لان اجوها خطابة اليوم
-شنووووووو
ضرب على الستيرن ومن قوة الضربة اني وحبيبة ثنينه شهگنة، اندارت عليَّ فازة مخترعة ورأساً فتحت عيونها تصيح..
-تَـمنييي انتِ هناا
-تَـمني: اي راح ياخذني هذا المستشفى
-ابا الحسن علي: هذا؟؟؟ هي هاي العايزة بعد
-شنووووووو
-تَـمني: مو نسيت اسمك
-حبيبة: سمي المضروب بوري
ضحكت تخبث ويه اخوها الضايج وتگرص بزنده وهو ولا مهتم عاگد حاجبه ويحرگ بروحه، الشبه بينه وبين الامير علي عجيبب الشي المختلف بيناتهم هو بالعيون هذا عيونه عسلية وعيون امير سود..
-ابا الحسن: حبيبة بطلي رعونية واحچي صدگ جاييها خطابة؟؟؟
-اي وشتسويلهم يعني
-احررگهم وعلي اهججهمم
-حسننن ما يصير بكل مرة تهجج كل اليخطب ليلة حرام عليك
-انا الهمم انطيني صبر
-والله جذب محد خاطبها اتشاقه وياك
ما تحملت ما اضحك من لزمها كفشها من حجابها وانطاهة راشدي خفيف على خدها ضحكت حبيبة بصوت عالي وربعت رجليها على الكرسي..
-حبيبة: تَـمني لو اسولفلج چم خاطب هجج والعباس تفطسين
-تَـمني: شلون يهجحهم؟
-يطيح حظهم مرة حرگ الصالة مال بيت عمي شمر بطل بانزين وبي وصلة وخلاها تگب بيهم
-يااااا
-والله ومحد عرف هو السبب ومرة لزم الرجال الخطبها وهدده اذا ما بطل يذب حه گدام امه وهذاك من الخوف بطل خطية ومرة من خطبوها ورادت تكمل وتصير شوفة شرعية جاب صخلات صاحبه يسرح بيهن گدامهم بنص ديوان عمي خله الناس تتطافر
-هههههههههههههه مستحيييل
-ولج هاي ولاشي بالنسبة للباقيات كل هذا وليلة ما تحبه وما تريده
-ابا الحسن: سكتي حبيبة حسابج بعدين
-هيهي ما تسويلي شي
ابتسملها وكمل يسوق بس مبين ضايج وطافرة روحه ضحكت من كل گلبي وهي تكمل بخبالات اخوها لحدما وصلنا للمستشفى، نزلت هي ويايه للدكتور وشافني عرف مكتولة سأل من منو گتله..
-زوجي كتلني وفطس
ضحك الدكتور على المصطلح الاستخدمته ورأساً ضم الضحكة مالته، هز راسه وكمل باقي الفحوصات.. گتله راسي يوجعني وكتبلي مفراس اسوي بس گال على الاغلب مابي شي وهاي الدوخة التجيني بسبب قلة تغذية..
كتبلي علاج لأيدي المفصوخة وخشمي الينزف وطلعنا حبيبة ساندتني ووصلتني لسيارة اخوها گعدنا ثنينه وره، همست حبيبة بيني وبينها حسيتها متريد اخوها يسمع..
-سودة عليَّ حبيبتي انا هم عفتج وانخبصت بـ بنت عمي والله ردت ارجعلچ بس علي الحق گلي رفل خابرته تريدني، من رحت لگيت ليلة هم مكتولة من ابوها گلت كدام حق مريضة ومتخربطة حتى ما يوصلها لأبوي ويتعارك ويه عمي
-حسبي الله ونعم الوكيل بيهم ذولة الحيوانات
-تخيلي كتلها نص الليل لان ضحكت بصوت عالي ويه اختها بالغرفة
انمردت عليهن ذني هم مثل حظي عايشات بالضيم، وصلنا للبيت وتفاجأت من شفت الامير واگف بالباب بس شافنا طب جوه..
دخلنا سوه ثلاثتنا وسندتني حبيبة تصعدني الدرج وسمعت همسات بين حسن وامير يحچون ضحكت حبيبة من سألتها شبيچ گالت بالغرفة اسولفلج، دخلنا جوه گعدت هي على چربايتها وذبت شالها تتنهد..
-يله گولي
-ولج الامير هو الگايل لأبا الحسن ياخذج للمستشفى
-لا بله! تره هو الحبسني بالمخزن وقفل الباب عليَّ واني مريضة شحالني
-والله هو حاچاني وگلي قفل الباب لان غسان وخواته يحومن حواليچ وعرف لو ترك الباب مفتوح ما تگعدين راحة وتطلعين وهم تنكتلين
-ويعوفني كل هالوقت وحدي؟؟
-تَـمني انا اسفة الغلط مني هو گلي اصعدلچ بساع واگعد يمچ بس والله امي كضتني ما خلتني اجيچ الا من نامت تسحبت انا وعبق وصعدنالچ
-ليش اخذتوني لذاك المخزن وگالو هاي غرفتج؟
-هاي سوالف بت عمي رفل اخذتج لغرفة عبق حتى امي ما تهتملچ وتضوجچ من تعرفچ بغرفتي فطنة بت الاوادم
-حبيبة حبابة رجعولي اغراضي وخلي علي ابا الحسن يرجعني لبغداد
-اولاً اسمه ابا الحسن علي گلبتي اسمه خايبة، ثانياً بعييني اگله باچر هسة ارتاحي ونامي هنا
سويت مثل متگول ونمت على الفراش، ظليت اتگلب ميجيني نوم تقريباً مرت نص ساعة وحسيت بين النايمة والگاعدة على تلفون حبيبة يرج مسويته صامت، صاحت بأسمي كم مرة تتأكد اذا گاعدة لو لا بس چنت تعبانة ومابيه اجاوبها..
-حبيبة: الو.. صاير شي؟... چا اكو واحد يتصل بهالوقت؟! غفار چم مرة گتلك لا تتصل بيه بعد تره اخواني ما يخلولك عظمة صاحية والله!.. واذا ابن عمي شني تتصل على كل بنات عمك بالاربعة الفجر؟؟
اختفى صوتها عرفتها طبگت الخط بوجه، رجع رج تلفونها مرة ثانية وثالثة ورابعة وانوب گامت تجيها رسائل هوايه ياله رجعت جاوبته تهمس..
-انتَ مخخبل شلون تجي لبيتنا؟؟ ولك روح لبيتك والعباس يطلعلك علي الدر ينعنع ضلوعك..
هم طبگت التلفون بوجهه وظلت تتگلب بالفراش، دقايق مرت وحسيت بيها گامت من الفراش تنافخ وتدردم بالهمسة، سمعت صوت طبگ الباب عرفتها طلعت من الغرفة ويجوز راحتله..
غفيت وما حسبت الا والشمس طابة بعيوني، فركت عيني مزعوجة وباوعت على الساعة شفتها بالـ 1:00 الظهر!!
گمت من الفراش بحركة سريعة وتذكرتني مكتولة وجسمي يصل عليَّ، انتبهت لصينية اكل ريوگات محطوطة على ميز حبيبة، ثلاث انواع جبن وزيتون وبيض وگيمر ومطارة چاي صغيرة بصفهن..
تقدمت اتلمس ماعون البيض باارد ثلج يمكن صارله هواي هنا لو يمكن من وره السبلت برد، ما اهتميت ورحت للحمام الي بغرفتها هم يخبل عدها ثلاث رفرف متروسات مواد عناية وشامبوات وغسولات ومرطبات وشموع ابتسمت اتأمل ترتيبها وريحة حمامها تجنن عبالك معمل حلويات مو حمام..
غسلت وجهي باوعت للبانيو مالتها والله يسوي واهس واحد يسبح بس لو عندي ملابس حرامات، كملت وطلعت ابتسمت من شفت حبيبة هنا واگفة گبال الميز مالتها تمشط ومركزة بروحها..
-ها خية گعدتي ظهر الخير
-ما حسيت على روحي من نمت
-اي حگچ تعبانة، اگلچ هذا ريوگچ برد اكيد وهاي جبتلج خبز حار من جوه ضامته جوه دشداشتي
طلعته من دشداشتها السودة ضحكت واخذته منها وجبرتني اگعد اكل وهي ظلت تفتر بالغرفة، بدلت ملابسها ورتبت نفسها علما كملت اكل واندارت عليَّ تگول بخجل..
-ابا الحسن ما يگدر ياخذچ اليوم لان الگعدة مال اهل الي دعم عمي نعمة اليوم وكل أخوتي رايحين ويه ابوي عدى الامير
-ها شعجب ما راح وياهم؟
سكتت مجاوبتني ونزلنا سوه، باوعتلي سلوى من فوگ ليجوه وكشت وجهها عود لعبانة نفسها.. ما اهتميت لحركتها وتقدمت اوگف مقابيلها بالضبط..
-سلوى: ها شلونها نومة المخزن ويه البريعصية حلوة مو؟
باوعت لـ حبيبة تأشرلي حتى ماحچي لامها وين نمت، غلست وكتفت ايدي لصدري..
-وين اغراضي؟
-قصدچ جرودچ؟ هاي الجنطة اخذيها
-وجنطة السندات؟
-هاا البگتيهن من نعمة؟
-بگتهن ما بگتهن شي يخصني انطيني الجنطة خليني اطلع منا
-مادري وينها
-عجييب بيت شيوخ وبي ناس حرامية؟
-وليي لج بت الفگررر ياهو الچانت تنام بالشوارع گبل لا يخطبها نعممة
-انام بالشوارع وتزوجني نعمة وسجل كل املاكه بأسمي موتي قهر ديلاا
-يا بت الچلبببب
مدت ايدها تريد تضربني واني هم تحضرت ادافع عن نفسي وقاطعنا صوت مرة خشنن كلش عبالك رجال يحچي حواجبها حمر ووجها كله تجاعيد بس رصعة حنچها واضحة..
-فراقد: شني هالهيمعة شنهوو بيت طراويرر
ما فهمت كلمة وحدة گالتها بس واضح همه افتهموا لان سلوى وحبيبة ثنينهن ابتعدن يوگفن على جهة وطلعت مرة چبيرة من الغرفة مبتسمة..
-رسمية: هلا بأم فراقد شلونچ خية
-فراقد: هلا عوينتي هلا بأم السباع
بوست المرة وباوعت لسلوى من فوگ ليجوه رافعة حاجبها الاحمر، باوعتلها صفح وراحت تگعد جوه القنفة ومدت رجليها واشرت بيدها للكل يگعد وياهة بالگاع..
-فراقد: بت المجادي سويلنا چراوي
امتعض وجه سلوى مزعووجة كلش وراحت للمطبخ وهم ماعرفت شنو هاي چراوي لحدما رجعت سلوى وبيدها گلاص عصير لونه برتقالي..
-حبيبة: شلونچ خالة
-فراقد: يا بعد خالتج بزر الگعدة شحلاتها صايرة شني ما ناويات تنطوها لـ لوليدي فرقد
-رسمية: نتشرف والله بس وين ابوها يرضى وفرقد متزوج وعنده خمس فروخ شيسوي بمرية ثانية
-چا شكو الزلمة محلله اربعة انتِ مو الشيخ تزوج عليج
سكتت رسمية شوية وباوعت لـ سلوى الگاعدة وتحمس بروحها، ابتسمت رسمية وگالت بأسلوب لطيف..
-سلوى دخيلة الشيخ علي وچان لازم يتزوجها ويسندها
-فراقد: جابلنا بت مجادية حسباله تتعلم وتصير شيخة وععع
-سلوى: جبتله بت
-فراقد: رسمية جابتله تسععع ولد كل واحد يمشي على زنده التييس اللهم صل على محمد وال محمد
-تَـمني بهمس: واااو حبيبة اخوانج تسعة؟
-حبيبة: يالفاهية ما يگولون واو يگولون ما شاء الله و اي اخواني تسعة
-الامير الچبير؟
-لا الامير علي الرابع
-لعد منو الچبير؟
-عايني الكبار علي الدر وعلي البدر همه توأم وثنينهم متزوجين، وراهم يجي علي التقي، وراه الامير علي وابا الحسن علي هم توأم، وراهم علي الحق وعلي الكرار وعلي السور وعلي النور بس همه كلهم بينهم فرق سنة او اقل السنة عدى علي السور والنور
-ما شاء الله
-فراقد: هاي ياهو
اشرت عليَّ تسأل يمكن ناسيتني من اجيت ذيچ المرة، قبل لا اللحگ اجاوب دخلو الشيخ وولده كلهم عدى الامير علي، سلموا على فراقد واحد واحد وتوزعوا على التخامة ومنهم ما كفالهم مكان وجابو كراسي..
-سلوى: بعد بيتي شلونك اصبن الغده؟
-شيخ علي: لا بوية تغدينا عدهم
-فراقد: وين صارت الگعدة هنا؟
-شيخ علي: اي بيت مسعود لو تعرفيهم
-عمت عينه هالشاروط اعرفه اي اعرفه، وشصفيتوا تاليها؟
-الحادث غير متعمد واخوتي رادوا فصل وما رضوا وحليناها بيناتنا
-والله الحشيمة بس الك اخوتك كلهم عارات
-اليوم ننصب چادر الفاتحة يا ولد كلكم توگفون طول ماريد حجج ماصخة
-علي الكرار: بوية انا عندي خفارة اليوم بالمستشفى احتاج انام
-شيخ علي: تحمل بس هالچم يوم، علي البدر شوكت يرجع؟
-علي الدر: انا ما گتله على م وت عمي ماريد انغص عليه سفرته
-زين تسوي
گام وگام الكل وياه، نزع عباته والشماغ مالته واشر لـ حبيبة تروحله، ابتسمت وراحت توگف مقابيله ضبط حط العباية على چتفها ولبسها الشماغ والعگال،
باس خدها وراسها وگال بحب..
-شيخة الشيخات
-تروحلك فدوة بوية
-ياااا اهل البيييت يا الله.. يا الله تسترن يا نساووين
صوت قوي شتت تركيز الكل اشر ابو علي للبنات كلمن تروح لمكان الا اني ظليت واگفة ماعرف وين اروح، وگفت بزاوية الصالة اباوعلهم ثواني ودخل الامير علي وصديقه ابو كربله بصفه يسحلون بولد شاب..
-شيخ علي: هاي شصاير هناا؟ الامير؟؟
شمر الولد على ركباته گدام ابوه وهو وگف گدامنا كلنا، اشر على الولد بأصبعه وگال بثقة وعيونه جاحظهن من العصبية..
-هذا صلاح ابن عمي الشايل همي.. مو الامير علي الينلعب عليه ويسكت ولا انا الاظل ابرر لروحي وماعندي دليل ولا محتاج اروح دكتور وابهذل البت وياي ومادري شنهي، وانتَ تعرفني بوية مو بس حچي لسان اجيب دليل قاطع جدام عينك واذب حنه من الوريد للوريد!!
-صلاح: بسترر اختك اعفي عني بشرف امك اميرر والعباس ظحكوا عليَّ انضحك عليَّ والله
رفسه ابو كربله على ظهره خلاه يوگع ويه الگاع ويصيح بعلو صوته..
-صلاح: غشووني غشوووووني
-شيخ علي: احچي ياهو غشك؟؟
-عمي نعمة غشني هو السبب بكلشي الله لا يرحمك يا نعمة ولا يغفرلك
-الامير علي: احچي الصار من البداية
-صلاح: بس ما تذب حوني
-الامير علي: وووولك احجييييي
ينفض نفض من العصبية وبيده سچ ينة چبيرة تشبه الخ نجر، توترت والرجفة لزمتني من رفع راسه صلاح واشر عليَّ خله الكل يلتفت يباوعلي..
-الصوچ كله بيها هي
-الشيخ علي: شلوون
-السبب منها چان لازم تعوف نعمة وما تثق بي
-الامير علي: هسة غير يحچي ويخلصنااا
-صلاح: عمي نعمة خابرني وگال جيبلي الامير لبغداد اريده يشتغل بيت صاحبي ما چنت اعرف هالبيت هو بيت خالة مرته ولا الامير يعرف قنعت امير گوة ورحت وياه گتله اصيرلك ونس بالطريق..
وصلنا بغداد وامير وابو كربله سوه وانا رحت لعمي نعمة اشوفنه منا حچاية منا سالفة عرف شيخ علي يريد ينصب الامير شيخ من بعد عينه تخبل نعمة وعيونه نطت صار يحچي على الامير ويگول هو مو كفو وما مؤهل لهاي المسؤولية ولازم الامارة تصير بيد واحد من عدنا لو انا لو منتصر لو غسان وباقي ولد عمي..
ماعرف شلون غراني بهالمنصب ووهمني لو استلمت المشيخة يغرگني فلوس واملاك بس بشرط.. سألته شنهي الشرط گال اريدك تحبل مرتي
-شيخ علي: ايا نااقص الغيررة
لطمت على وجهي وگعدت بالگاع احسني هالگدوتني صرت متت بمكاني ويه ما كمل..
-گلي مرتي تريد خلفة وانا ماريد انتَ حل السالفة وقنعلي الامير هم اريد الخلفة من واحد منكم تجي
-ابو كربله: وابو گرون ليش ما راد يخلف منه؟ لو خاف يطلع ابنه مگرن نفسه؟؟
-صلاح: ما گال وانا شكيت بي ما يگدر بس راواني تقاريره هو صاحي ومابي شي وعلاقته بمريته زينة بس مايريد يخلف ابن من صلبه يخاف عليه
-علي السور: التمسلت لو كان انساناً اكيد راح يختار يكون نعمة
-صلاح: بعد انا ما طوخت وياه ورضيت گلي راح اكتب بيت بغداد بأسمك كيفت وگلت سهلة اجيب الامير لبيت نعمة واللگالي فد طريقة اقنعه بيها بس المشكلة اعرف امير مو دربه هالسوالف وما راح يرضى هاي اذا ما ك تلني بمچاني فـ نويت اخدره..
صفگه راشدي الامير ونزل عليه كتل وين اليوجعك، هجموا كل اخوته وياه يض ربون بي طيحوا حظ حظه زوعوا حليب امه وما وگفو الا من صاح بيهم ابوهم لانه الرجال شبه مات بيدهم..
-ابو كربله: لا نموته هسة يا ولد خلي يكمل
حط امير السچ ينة على رگبته ونتر..
-كمل
-صلاح: بشرف امك لا تذب حني... اااااخ ااااخ لااا تذب حني دخييلك
انتبهت الدم الينزل من رگبة صلاح امير دينبت السچ ينة بيها، اعترض ابوه ما قابل وجبروا صلاح يكمل..
-صلاح: خدرت الامير من طلعنا من بيت نعمة وره ما تعشينا، رجعنا نص الليل ويگلي دايخ وراسي مسطور بس اريد ارجع للبيت وانام ما رضى نعمة يسافر كل هالطريق وقنعناه يبات بس هو مو بوعيه.. عفته بالاستقبال وصعدت ويه نعمة لمرته هم شفتها مسلمتها طبيت عليها و....
ملخت روحي باللطم وعلى بكائي وصياحي نزلت حبيبة تركض وهم تبچي حضنتني واللتفت علينا علي الحق ميت قهر وعيونه صايرات حمر..
-صلاح: بس ما تممت كلشي ما لحگت انض ربت على راسي بشي ومن اللتفتت شفتها عمتي غزوة
فتحت عيوني وكل الموجودين
هم نفسي، حرت ماعرفت الحقيقة ماعرف منو ويايه ومنو عليَّ!
-صلاح: طحت بالگاع مفشوخ راسي ونعمة صاح بيه حتى اگعد الامير يجيها نزلت اسحل بروحي گوة رحتله لگيته نايم شگد حاولت اگعده ما گام.. توازني اختل من الض ربة وطحت مرة ثانية بالگاع فاقد وما حسيت الا من شفت روحي بسيارة وجسمي يون عليَّ مكت ول ومزورگيني..
-شيخ علي: ليش هيچ صار؟؟ مو نعمة رادك تعت دي على مريته لو صحى على صخام وجهه وما رضى؟؟؟
-صلاح: عمي ماادري بالعباس مادري زلم شالوني وشمروني بالچول وظليت ملطلط منا ومنا ماعرف وين اروحن فلوسي ماكو وتلفوني وكلشي مأخوذ مني
-شيخ علي: الامير ما سوالها شي مووو؟؟؟
-صلاح: لا لا ما سوه چان نايم
ذب نفس ابو علي ووگع على القنفة ركضوله ولده يسندوه ويطلعوه من البيت للمستشفى ووياهم رسمية بينما ابو كربله والامير اخذوا صلاح بره ماعرف وين يودوه، تعبت من البچي واللطم مسحت عيوني وعدلت گعدتي وصفنت بالفضاء اصفي عقلي..
-حبيبة: تَـمني؟
-فراقد: عوفيها حبوبة
-حبيبة: خالة خاف يصيرلها شي باعيها جمدت
-فراقد: گومي جيبيلها ماي گومي
گامت بسرعة تجيبلي مي ما طقت ابقى هنا اكثر گمت اريد اصعد فوگ ولزمت ايدي فراقد تضغط عليها..
-فراقد: انا بدالچ افضحهم
باوعتلها ما مفتهمة ضحكت واردفت..
-اي شمالچ افضحهم واخلي سيرتهم على كل لسان چا شنهي تسكتين عن حگچ؟
-انتِ تحبين اهل الشيخ علي ليش تطلبين مني افضحهم؟
-ما تفضحين علي تفضحين اخوته!
-اخوته؟
-اي انا لو ببكانچ اگلب ليلهم نهار ونهارهم ليل انامن على خوانيگهم واتفرعن عليهم اطلب يزوجني علي لواحد من ولده واسند روحي بيهم واصير شيخة البيت
اسمعلها وفاكة حلگي وحتى حبيبة اجت وسمعت وبقت صافنة تباوعلها مصدومة، هدت ايدي فراقد وضربت راسها بأصبعها تگول..
-فكري بمصلحتچ يا هايسه
حچتها وگامت تطلع من البيت تقدمت حبيبة عليَّ وانطتني المي ساكتة، ما حچيت وياهة على نصيحة فراقد وسألتها غير شي..
-حبيبة اريد اشوف ابوچ من يرجعوه من المستشفى عادي؟
-اي ميخالف بس هسة انتِ هم ارتاحي بغرفتي
رحت وياهة لغرفتها واعترضت طريقنا سلوى، وگفت گبالي متخصرة وتضحك متشمتة..
-طلعوا لاعبين بيچ وشبعانين علما گالو بس
-حبيبة: يمة شبيييچ
-سلوى: انچبي انتِ لا تدخلين
-تَـمني: وخري عن وجهي
-هههههه وين رايحة للمخزن مالتج؟
-لا رايحة لغرفتي
-يا غرفة عيوني؟؟
-كل غرفة بهالبيت تعتبر غرفتي وهسة توخرين لو اخذ غرفتج واخليچ تفرين بأذاناتچ
-يااااا عشتوووو ليش يمة غرف البيت غرفچ بت الفگر مصدگة رووحچ
-اووي دايخة وخري اريد انام
-عوووععع بت الفگر الفاهية ولي نامي هنا بالصالة مالچ صعدة فوگ
-نص هاالبيت الي عيوني خاف نسيتي؟ فـ توخرين لا انتِ انيمچ بالصالة
-چلبببة
كفشتني من شعري واني منا طاگة روحي ومقهورة جريت ايدها عني وحبيبة بنصنا تفاكك، دفعتها حتى متتعور وجريت معصم ايد سلوى وعضيته حيييل..
-اااااااخ بت الچلب ااااخ ايدي راحت ولكم اكلتنيي هالچلبة اكلتنييي
هديت ايدها تلوب ووجهها صاير احمر، مسحت حلگي وگلت لعبانة نفسي..
-ديلا ولي منا
-بعلي انا اعلمچ يا تَـمني هاي صارن ثنين حسبالچ نسيبت التفلة مال الباارحة وهسة زدتيها بعضة
-بلكت تفلتي تطلع بركة وتعقلچ شوية
-زمااالة بت الخايسة الجايفةة مثل امج ال**** وابوج ال*****
مطرتني اشكاال وانواع فشاير مثل الدلالة وحبيبة تلطم على وجهها وتسد حلگ امها، صفگت سلوى حبيبة راشدي على خدها ودفعتها وكملت تدعي عليَّ وتسب..
-سلوى: لافطات الجفوون والعيوون تموتن على الصرمعة وكلان التبن بنات الليل الساقاطات لفيتتتن على الزلام كليتوهم وگرطتووهم كوشتنن على فلوسهم وچتلتوهم بمچانهممم
-دروحي عدي وصفي هناك لا اصيح واحد من الولد يذب حچ ويه صلاح على فد قبلة يا زباالة
اللتفتت اصعد وانتبهت لاربعة من الولد واگفين بالباب هستوهم ديطبون وسمعوني والحظ الفگر الامير وابا الحسن من ضمنهم،
شگد ضجت وانزعجت ما سمعوها من عدتلي وصفتلي بس من عطت سمعوا، صعدت بسرعة فوگ وقررت ادخل للمخزن يم عبق..
-عبق: ميخالف
باوعتلها عاگدة حاجبي واتنفس سريع، گامت توگف بصفي وابتسمت تمسح على ظهري..
-چنت اتسمع عليكم من الدرج تَـمني والحق كله وياچ معليج بعمتي سلوى تره محد يگدر للسانها
-ختوولي هالنعالة والله مسويلها قيمة بهالبيت!!
9
-ههههه صلي على محمد وتعالي ارتاحي هنا
-ماريد ارتاح محتاجة اسبح احسني خست
-منيلچ خايسة تخبل ريحتچ
-ظلي جامليني انتِ ظلي
ضحكت وباست خدي ابتسمت من حركتها شگد لطيفة غيرت مزاجي، گامت جابتلي دشداشة منها وشال وياهة..
-تَـمني:شكراً بس عبق..
-ها گولي
-ما احتاج هذا الشال وماعندچ تراكات؟ لان ما لابسة دشداشة من قبل خاف تطلع رجليه وعيب ولد هنا
-لا والله عندي فيزونات ممنوع اللبس تراك هنا اني
-بس حبيبة شفتها لابسة تراك البارحة؟
-حبيبة غير عني ودييربالچ تاخذين من ملابسها والله سلوى تشگهن عليچ
-هسة مشي وضعچ بهاي وهاچ فيزون جواهة بينما ترجعلچ جنطتج
-اوكي
اخذت ملابسها وطلعت من المخزن، فتت للحمام لگيت الباب مقفول، دگيتها خفيف ووگفت انتظر بالباب، مر وقت هوايه ومحد طلع منه هم رجعت دگيت الباب ونزيت على صوت شي انرگع بالممر..
-تمام
ركضت مفزوعة خفت هاي عبق وصارلها شي بس اخترعت من شفتهم اخوان حبيبة متكامشين ويتعاركون..
-علي الحق: والعباااس ابو فاضل اسحلكممم اسحلكم اليوووم
-علي التقي: ولك عوووفهم
-علي السور: لا اله الا الله لا اله الا الله
-علي النور: محمد رسول الله علي ولي الله الاربطعش معصوم حجج الله حي على الصلاة حي على الصلاة...
-علي الحق: ختمووا القران بعد ختموووا اليوم انعل خير خيركممم
يصيح ويتعارك يريد يلوح ذولة الثنين وعلي التقي لازمه مچتف ايده، متت خوف من الصياح وخفت انشاف دحست روحي كلش انحشگت وره الحايط من صعد علي الدر..
-علي الدر: زوج المشاكل شمسوين هالمرة
-علي الحق: هددددني تقي اشگهم واريح گلبي هدددني
-علي السور: وروح ام ستوري ما مسوين شي بس.. بس.. ولك كمل نور بعلي ما تطلع من حلگي
-علي النور: الآمر مالته اتصل وهو مسجله "ل حسين" احنه عبالنه صاحبه حسين وجاوبنا التلفون و.. و.. سور كمل مااگدر بعددد
-علي الحق: انااا اكمل هالزوج النعععل اول ما فاتحين الموبايل صايحين هاااا ابن الزفرة حسينن شتريدددد
-علي الدر: يااااا علييييي
-علي الحق: ولكمممم هدووونييي فوگاهة ويه لواء حسين اليشوف دم سنونه ولا يشوفنييي
-علي الدر: تعالوووو ولكم
نزع علي الدر نعاله وض رب كل واحد على رجله مرتين وصاح بيهم..
-بالعباااس مرة الجاية اجيبلكم الامير للصبح يجلدكم بحزامه يلااا ولووو هناك زوج المطاااية
شردوا ينزلون واني اباوعلهم وارجف وعلي الحق يرجف رجف عصبية..
-علي الدر: اتصل بي وفهمه واذا تريد انا احاچي
-علي الحق: اي بشرفك حاچي انتَ وگله ذولة عدنا زوج مطيرچية بالبيت شاخطين يمشون ويجاوبون تلفوناتنا
-علي الدر: شوكت يكبرون ذولة شوكتت
-علي التقي: شباب همه متعودين يتشاقون ويه صديقك حسين شقه ثگيل كلما يتصل يشمون گفه ايدهم هذا غير حسين
-علي الدر: بس مو هيچ تقي مو هيچ هاي تصرفات مزعطة واحدهم شكبره يصير بعد
-علي التقي: همه مشكلتهم كلها ما يستحون عود عبالك راح يتوبون ويتأدبون؟ لا والله ولا يهتمون
-علي الدر: عوفك منهم خابرت كرار؟ عرفت ليش ابوي ما رضى احنه ناخذه المستشفى؟
-علي التقي: شباب همه متعودين يتشاقون ويه صديقك حسين شقه ثگيل كلما يتصل يشمون گفه ايدهم هذا غير حسين
عفتهم يسولفون ورجعت لباب الحمام فتحتها وللغرابة الشديدة انفتحت وطلع ماكو احد بي!
دخلت اسبح متوترة ليش الباب چان مقفول وهسة مفتوح وتوترت اكثر بسبب الشهرية اجتني بس يوم واحد وانقطعت، كملت ولفيت روحي بالمنشفة وطلعت اركض اخاف احد يشوفني ودخلت للمخزن بسرعة..
-علي التقي: همه مشكلتهم كلها ما يستحون عود عبالك راح يتوبون ويتأدبون؟ لا والله ولا يهتمون
-عبق: مصيبة
-تسلمين، اگلج اريد ابدل واريد اصلي عندج سجادة؟
-اي
انطتني ظهرها حتى ابدل وهي راحت طلعتلي مصلاية حطتها بالگاع وچادر وحطت تربة وسبحة، كملت تبديل وابتسمتلها ممتنة وبدون كلام شلت التربة حطيتها على جهة وبديت اصلي..
-عبق: يااا ليش ولج
گوة لزمت ضحكتي ظلت تباوعلي وفاتحة عيونها وبيدها التربة لحدما طخت عدها وگالت بعدما اجتها لحظة ادراك..
-هاااا انتِ سنية
كملت صلاتي وگعدت اسبح وهي مگابلتني وگاعدة تتفرج عليَّ، حاطة ايدها على خدها ومبتسمة شوية وگالت سرحانة..
-شنو شعورچ وانتِ سنية؟
-شعوري كشعور أي سني عراقي شريف
-ههههههه اسئلتي غبية مو؟
-لا تخبل مثلچ
-ظلي جامليني انتِ ظلي
ضحكنا سوه وگمت اصلي العصر، سلمت وگعدت بالچادر..
-شلونها بغداد تَـمني؟
-مزدحمة بس هواها يرد الروح بغدادي
-اتمنى اعيش ببغداد
-ان شاء الله يجيچ فارس الاحلام بغدادي
-هههههه وين يشوفني البغدادي واني عايشة بهالسجن
-بس كلامچ بغدادي متحچين مثلهم شلون هيج؟
-لان ابوية بغدادي وامي منا من تزوجها استقر هنا بس اخذت لهجته لحد عمري 14 سنة ومات الله يرحمه
-الله يرحمه، وامچ وين؟
-ببغداد
-شتسوي هناك؟
نزلت راسها خانگتها العبرة توقعت امها متزوجة وعايفتها وما ردت اقهرها بسرعة غيرت الموضوع..
-برأيج اكدر احجي ويه الشيخ هسة؟
-اي اتوقع رجعوا من المستشفى گومي
نزعت الچادر واخذت مشط منها بس مشطت شعري وعفته مفتوح استحيت اخذ منها قراصة بعد اخاف ثگلت عليها، نزلت جوه وصدفة لگيت الشيخ گاعد بالصالة اول ما شافني اشرلي اروحله..
-السلام عليكم
-عليكم السلام، تعالي بوية حياچ
گعدت على القنفة المقابيله ودام صمت قليل بيناتنا، حمحمت واني اول من نطق..
-عمو اني البارحة انلعب بأغراضي واكو احد اخذ جنطتي وما رجعها
-افااا
-اي والله وماعرف وينها لا جنطة الملابس ولا جنطة فلوسي
-ما يصير خاطرچ الا طيب بوية هسة ندورهن.. سلوى.. سلاوي وينچ
اجت طايرة سلوى تركض وتلف بشعرها، وگفت يمه بدون لا تگعد وگالت..
-امر شيخي
-ام حبيبة دوريلنا جنطة البت بلا امر عليج
-هااا
-ها بوية شمالج
-لا لا شيخي هسة رايحة اشوفها وين
-تَـمني: عمو الجنطة الثانية اهم شي كل سندات نعمة بيهن ونص سند هالبيت
راحت سلوى مادري وين وهو بقى ساكت ويهز براسه، شوية وگال..
-اليوم فاتحة نعمة وگلت ابلغچ
-اي الله يرحمه
-يجون اهلچ؟
-لا لان اني ما راح احضر الفاتحة
-هااا؟
-ماريد احضر فاتحته عمو وراح ارجع لبيت خالتي
-حتى بعدما عرفتي وليدي بريء؟
-عمو اني ما اجيت هنا بس علمود الامير اجيت اشكيلك من ظلم نعمة ولعب عمة غزوة وصلاح بيه وكلهم ذولة تابعين الك
-وكلهم تعاقبوا عدى غزوة لان صلاح يگول مالها ايد وهي رادت تساعدچ
-ما اصدگ
-حلف اختي مالها ذنب ورادت تساعدچ ونعمة حاربها، يگول غزوة تحبچ هواي وما ترضى على اذيتج
سكتت صافنة بكلامه اتذكر من قفلت عليَّ الباب وگالت تروح تحجي ويه نعمة وخدرتني بالاكل ماعرف ليش مدا اكدر اصدگها بس غلست ونويت اعوفها هالفترة..
-والبيت هذا بيتج الچ حصة تگدرين تبقين عدنا شكثر ما تردين
رجعت سلوى وتصنمت فاتحة حلگها مصدومة من سمعته يعرض عليَّ ابقى هنا، ابتسمت على منظرها وابتسمت للشيخ وگمت اخذ جنطتي الي بيدها، فتحتها گدامهم اتأكد من محتواياتها وشفت السندات وكلشي بمكانه بالجنطة الصغيرة ارتاحيت وماعرف شبيه وليش گلت..
-راح ابقى بس ايام الفاتحة عيب من الناس ماريد احد يحجي عليَّ
-زين تسوين بعد ابوچ
گام ودخل غرفته بقت بس سلوى بالصالة تباوعلي حاقدة، كشتني بيدها وگالت من طرف خشمها..
-گومي ولي ماريد اشوف چهرتچ الزفرة
-لا بله؟
-اييي يله طلعي برا لا تحضرين الفاتحة
حطيت رجل على رجل وريحت نفسي على القنفة..
-حبي والله اني گاعدة بييتي عود شوكت ما صار بيتچ هذا طرديني منه
-بت فگر انتِ وحديثة نعمة!!
-راضية
اندارت تباوع منو دخل شفته علي التقي طب مبتسم ويباوعلنا، سند نفسه على الحايط وكتف ايده لصدره، انتبهتله لابس زي عسكري وعنده رتبة على اكتافه، توترت من ظل واگف يتفرج علينا عبالك گدامه فلم..
-سلوى: تقي تعال شووف هاي مصدگة روحها تگول البيت بيتهااا
-علي التقي: وين الغلط بچلامها؟
-سلوى: يعني انتَ راضي بهاي بت المجادي تصير ام البيت؟؟؟
-علي التقي: خالة جوعان
-سلوى: تقييي
-تصبيلي غده لو ام البيت تصبلي؟
ما تحملت اخفي ابتسامتي اكثر وحتى ضحكت، شافتني سلوى لو تخبلت گامت تلطم وعلي التقي باقي على وگفته..
-ام البيت ما توكلينا وراي دوام
-تَـمني: اني؟
-لا انييي
قلد طريقتي بالكلام ومط بحچايته، فكت حلگها سلوى وضربت رجلها بالگاع مزعوجة..
-بعد بعددد جدامي تسوفلوو
-علي التقي: شوف السفالة وين وصلت بينا اطلب من مرت عمي تصبلي غده شگد عيب
گمت گدام سلوى ورحت للمطبخ استحيت ارده وگلت بس اصبله غدة واصعد، فتحت الجدورة مسوين شيخ محشي الريحة تدگ بالراس.. بينما اني اصب بالاكل دخل تقي للمطبخ يفر بسويچ سيارته وگعد على كرسي ميز الطعام..
-بدت الفاتحة مو؟
-هاا؟
-فاتحة عمي شبيچ
-شمدريني
-چا صوت عمتي غزوة لهنا واصلني شني ما تسمعين انتِ
-عبالي تبچي وحدها هيچ
حطيت الماعون گدامه وانطيته خبز هم حاطي على المجمدة،
گعد ياكل وتذكرت ابو علي طلب من ولده كلهم يحضرون الفاتحة لعد شعجب هذا طالع للدوام بس ما اهتميت وطلعت للصالة..
ركزت بالصوت ماكو مله وفعلاً بس صوت غزوة طالع، رحت لجنطتي طلعت تلفوني طافي مابي شحن، شحنته بسرعة ودگيت على خالتي وما جاوبت، لحيت بالاتصال ياله جاوبتني واجاني صوتها الملهوف..
-هااا تَـمني بشري خالة شصار وياچ
-خالة محد بيهم متقربلي اجه صلاح واعترف بلسانه
-اييي الحمدلله والشكر زين ما رحتي طبيبة تفصحج يمة؟
-لا
-يا يمة مو گتلج ترحين لا تصدگين بأحد وتثقين بي
-مو خالة اخاف
-روحي فحصي بعد امچ لا تظلين هيج
-اي من ارجع لبغداد اني باجر اجيكم
-لا لاا وين جايه تَـمني هذا بسام متخبل علينا اني هسة بايگة التلفون واحاچيچ بالختلة
-لا
-لييش؟؟
-مادري عقله ضرب حتى تالة منعها تروح للمدرس الخصوصي ويريد يبطلها من المدرسة
-خالة وانتِ راح تقبلين؟؟
-لا طبعاً بس خلي يهدي هالكم يوم انتِ لا ترجعين ظلي هناك هو بيت حماچ بعد شكو
-والجامعة؟
-اخذلچ اجازة اني
-ممرتاحة هنا ابد البيت كله شباب ويمشون مصاليخ خالة والله استحي
-دشوفيلچ واحد صاك وچلبي بي شبيچ
-يااااا خالة
-هههههههه اتشاقة وياچ عمري انتِ انتبهي على نفسج لازم اروح هذا بسام رجع لا يشوفني ويسويلنا سالفة
ودعتها وسديت التلفون، طلعت قميص اسود طويل شوية من جنطتي ولبسته فوگ اللابسته وفتحت باب الاستقبال ومديت راسي شفت كم مرة موجودات وغزوة مملخة روحها وظالة بس بالدشداشة الداخلية..
جروني النسوان وياهن وما حسيت بعد الا والدنيا انگلبت هنا اجن سبع ملايات وبدت الفاتحة واللطم المشهد مرعب صوت البچي والصياح يكزبر الجلد ما حسيت الا وعيوني تصب من كلام المله شگد مؤثر ويكسر الگلب..
اجن حبيبة وعبق وبنات شابات هوايه عرفتهن بنات عم حبيبة وتذكرت ثنين منهن هنه خوات ليلة و رفل هم وگفن مواجهة ويه النسوان يلطمن ويعزن..
للتسعة بالليل ياله فضت الفاتحة وبقو جماعتهم من غير محافظات كل شوية وحدة تعزيني تحضني وتبچي واني ابقى صافنة هسة غير تنزل الدمعة خرب روحها ماكو عيوني الصلفة تضحك..
صبوا العشا والكل تساعد وره العشا وگفن البنات يغسلن مواعين وقسم سون الچايات ومشى الوقت هيچ.. فرشوا للنسوان الباقيات بالديوان ونامن اخيراً ارتاحيت وگعدت شوية اجر نفس..
صعدت انام ويه عبق، حبيبة توسلت اجي يمها ما قبلت مالي خلگ سلوى روحي طاگة منها، للوحدة بالليل اني اتگلب بالي كله ويه خالتي وتالة ما اجاني نوم..
-عبق: ولج نامي كافي تتحركين
-عبق گلبي يلعب خايفة على خالتي وبنتها
-ان شاء الله ماكو شي حبي نامي وارتاحي باجر وراج يوم طوووويل
-هم اكو فاتحة؟
-اي باجر تصير ثگيلة الفاتحة لان كل الماكدرت تجي يوم الاول تجي بيوم الثاني
هزيت راسي ورجعت احاول انام بس عجزت وبطني توجعني عبالك جوعانة مع العلم تعشيت..
-تَـمني: اگلج
-امممم
-جوعانة اني ننزل ناكل شي؟
طفرت من مكانها فرحانة وطار من عيونها النوم، هزت راسها اي كم مرة وهمست بخبث..
-اي اي نزلي جيبيلنا اكل اني هم جوعانة
-تعالي ويايه
-لا ولج ماكدر
-حبابة اخاف وحدي
-واذا الولد چانو گاعدين؟؟
-راح اتخبل واذا شافوچ شبييج
-امشي ننزل بس اذا لكيت واحد من الولد تره اني افلت معليه بيج
-امشي امداج
نزلنا سوه مكمشات بأيدين بعض البيت اظلم وماكو احد، بوجهنا دخلنا المطبخ هم اظلم وطابله ضوه من الحديقة..
-تَـمني: فتحي ضوا المطبخ خلينا نشوف
-لا خاف يگعدون
تأفأفت وفتحت الثلاجة اشوف بيها كومة اكل من العشا زايد، طلعت تمن ورحت احمي بالمايكرو ووگفنا ننتظره..
-عبق: اكو صوت
-لا وين اكو
-والله اجه صوت من الحديقة
-لا تخوفيني عبقق
-لا اگلج يجوز بزونة يله طلعيلنا طرشي من الثلاجة
رحت للثلاجة اطلع طرشي مديت راسي ادور وينه حرت بينه وبين المدبس..
-ناكل مدبس لو طرشي حامض شتگولين؟
مجاوبتني فـ قررت اطلع الطرشي الحامض، اخذت العلبة وانداريت للميز احطها وفزيت فززة تسوه عمري من لاحظت ظل واحد واگف بباب المطبخ ساند جسمه على الباب ويباوعلي..
-الامير علي: تحاچين روحچ هواي
ذبيت نفس مرتاحة من توضحلي شكله، ملابسه السود متروسات جص ابيض وحتى ايده والبورگ واصل لعكوسه، حطيت الطرشي على الميز وگلت بلا مبالاة..
-احچي ويه صديقي الخيالي
-ها ما شاء الله جبتي حتى اصدقائج الخياليين لبيتنا
-لعد تريدني اجي وحدي؟
رغم الضوا خافت هنا بس لمحت طيف ابتسامة خفيفة انرسم على شفته، بسرعة درت وجهي عنه وكملت اطلع من الطرشي..
-شفت صاحبچ الخيالي خطف گبل شوي منا
عرفته يقصد عبق واكيد هي الشردت منا ويجوز شافها، اتذكر من چانت خايفة واحد من الولد يشوفها وحرت شنو اجاوبه..
-تَـمني: اي انرعب منك
-دخيل علي
-اگلك انتَ تشتغل عماله بهالليل؟
-عندچ مانع
-لا، انتَ هنا واگف منتظر مني شي؟
-لا
-لعد ليش واگف هنا؟
-منتظر ابا الحسن
-لعد وينه؟
-منتظره يجي!
حچاهة بأستهزاء عضيت لساني على هالفهاوة والاستثوال شبييه يربي..
-احم ممكن سؤال؟
-جواب
-ليش ما دافعت عن نفسك البارحة گدام ابوك وليش گلت كلامي صحيح
-چا ترديني اچذبچ وازيد ضيمچ؟
-شنو؟
-انا اعرف ابوي راح يصدگني مجرد احچيله السالفة من الاول للاخر راح يصدگني بس انتِ الي تطيحين بيها
-شلون يعني
-نرضيچ ويروح حگچ الاصلي، لا ترجعلچ كرامتچ ولا راح ترتاحين الكل راح يچذبچ ويگول اكيد تكونين مندسة من طرف عداواتنا واجيتي بس حتى تشوهين صورتي
-يعني انتَ دافعت عني
-لا
-لعد؟
-دافعت عن الحگ
-مزعلان لان اتهمتك وخجلتك گدام الكل؟
-وليش ازعل
-مو.. يعني انتَ شيخ
-انا مو شيخ
-بس ابوك گال راح تتنصب شيخ
-وعلى الاغلب انتِ خلصتيني منها
-يعني استغليتني
-بما يرضي الله
ابتسم وبرزت اسنانه من گالها، ضيقت عيوني عليه مستفهمة
غلس على نظراتي وگال وهو يعدل وگفته..
-شنو رأيج اعقد وياچ اتفاق
-لو تموت
-ليش؟
-عود شنو انتَ عبالك اني جاية هنا حتى اتزوجك؟؟ تحلم تحلمممم
-ها
-بعد عيني يريدون يزوجوني لواحد منكم گوة امدااني اني نعمة لعب نفسي انوب اخذ واحد من ولد اخوه
-لا حرامات
-اي ما اقبل ولا تحاول اوكي؟؟
-اوكي
تنرفزت من هم قلد صوتي ضحك وسحب دخان من الڤيب البيده ونفخه بأتجاهي بحركة مستفزة، سديت علبة الطرشي وشلتها ارجعها بالثلاجة بهالاثناء باوعتله شديسوي وشفت عينه تثبتت على الحايط الي بصفي، انداريت اشوف شنو وچان اللگاه ابو بريص شكبررره بصفي من الخرعة انبلع لساني و ما طلع صوتي شمرت دبة الطرشي على الميز وطفرت اركض بأتجاهه واأشر..
-ما راح ياكلچ يمعودة هذا صديق البيت
-كت له كتت له
-لا خطية
-اكتللله حباب يماا كزبرررت
-والله حلو هسة اجيبه الچ
راح من كل عقله يريد يشيله وكردة فعل سريعة مني جريت ايده امنعه انتفض بسرعة يجر ايده مني صفنت مستوعبة تصرفي بس ما لحگت اعلق او اعتذر بسبب صوت الشهگة الاجت من الحديقة وصوت عاالي فزز كل الي بالبيت يصيح متعمد..
-هااااااي شنييي هاااااااي الحراااام صار عينك عينننك ببيت الشيخ عليييي يا عيبة العيبة!
من قوة الصوت احسه دگ براسي غمضة عين فتحة عين شفت الأمير ضمني بجسمه بدون لا يطخني ونزل لمستواية يهمس بتأثر كلمة..
-انا اسف
باوعتله مستغربة ما فهمت سبب اعتذاره بهاللحظة بس بعد مرور خمس ثواني من نطقه هالكلمة عرفت بالضبططط ليش گالها وما شفت روحي الا واگعة بحضنه!!...
يتبع
