رواية الامارة الفصل السادس 6 بقلم زهراء السلامي
من قوة الصوت احسه دگ براسي غمضة عين فتحة عين شفت الأمير ضمني بجسمه بدون لا يطخني ونزل لمستواية يهمس بتأثر كلمة..
-انا اسف
باوعتله مستغربة ما فهمت سبب اعتذاره بهاللحظة بس بعد مرور خمس ثواني من نطقه هالكلمة عرفت بالضبططط ليش گالها وما شفت روحي الا واگعة بحضنه وروحي شاطت من الوجع..
-تَـمني: رجلييييي ااااااااه رجلييييي
داس الامير على رجلي بكل حيله وهو لابس حذاء من هذا البسطال الچبير ويضغط على اصابع رجلي بقوة، روحي راحت وهو لازمني من خصري ويردد كلمة..
-اسف والله اسف
كلما يحچي ازيييد بالعياط وعلى اثر صوتنا وصوت الصاحت وگعدتنا بالگاع واني بحضنه ركضوا اهل البيت وكل النسوان البايتات هنا يشوفونا..
-رسمية: يمممة صخام الصخمنيي شصاير هناا
-الامير علي: رجليهاا يممة تعاال حسن ساعدنيي
ركض ابا الحسن يجر الامير من الگاع وهو بعده مكمش بيه والمرة العاطت وفضحتنا فراقد تباوع من بعيد وتدردم..
-عيبببب شني هاي يكضكض بيها وواگعة بحضننه شنييي شو صايرين سفردحييي
-رسمية: ستري علينا خية صوووتچ دخيلچ
-بالعبااس فلا تستحوون ويننه الشيخ اريدن اشووف الشيخ
-علي السور: شسالفة خالة البت مبين طاحت!
-فراقد: احاااا وما طاحت الا بحضنه مووو
شالني الامير علي يمشيني للصالة مغلس على الكل واني روحي ترفرف من الوجع وحبيبة وابرار يمشن ويايه، ماعرف شنو صار وراهة اصلاً بالي مو ويه احد شلون وشوكت طلعن النسوان من الصالة وبقوا بس اهل البيت مادري..
-علي الحق: خلنا ناخذها للمستشفى امير مو مال تظل هيج
-الامير علي: اي ناخذها، حبيبة روحي جيبيلها عبا وشال بعد گلبي
ركضت حبيبة فوگ تجيبلي واني كل عيطة ارگعها تزرف الراس مدا اتحمل الالم لا يطاق، لبسوني شلون مچان حتى ماكدر اگلهم اني مو محجبة ماعندي طاقة لبست وسكتت وسندني ابرار وحبيبة يطلعوني..
صعدوني بسيارة الامير واجه ابا الحسن ويانه وحبيبة ورسمية ام الولد وطلعنا للمستشفى، الطريق كله اعض بيدي اكتم صرختي ودموعي تصب وخالة رسمية تصبر بيه..
-يا بنيتي غير تنتبهين عمت عيني عليج شلون بيج
-ابا الحسن علي: شلون صار هيج امير؟ انتَ مو چنت تنتظرني بالمطبخ وحدك شجاب تَـمني وياك؟
-الامير علي: خوية انا واگف انتظرك واجت تَـمني تريد تاخذ دبة الطرشي من الميز جاي تمشي وعثرت بالحصيرة وصار كل ثگلها على اصابعها شفت اصابعها يتعوجن للجهة الثانية وما حسيتها غير محمد يا علي عثرت وراد ينضرب وجهها بكينول الباب وانا كضيتها
-رسمية: الله ستر عليج بنيتي چان راح وجهچ بيدة الباب الحمدلله من بس رجلچ تعورت
اباوعله يهز براسه ويمسح وجهه من العرگ ويباوعلي من المراية متوتر، شگد كرهته تمنيت اجيبه براشدي اطشر سنونه واطلع ضيمي كله بي..
وصلنا للمستشفى ودخلنا للدكتور بس شاف رجلي سأل شبيها امير گله عثرت بالحصيرة واصابع رجلي انعوجن بالجهة الثانية، هز راسه الدكتور وحولني على الاشعة..
روحي مثل الطير المذبوح ترفرف وجع واذية سويت اشعة وگالو عندي اصبعين برجلي مكسورات وصاير عندي تمزق بباقي القدم، ابچي بعياط واخزر بـ الامير الي صار وجهه احمر انطعن تقدم من الدكتور وسأل متأثر..
-الدكتور: نعم وهالشي طبيعي كل ثگل جسمها صار عليهن الله ستر رجليها ما انكسرت
-حبيبة: الله ستر الحمدلله يارب
ضربتني ممرضة ابرة بالمغذي مخدر وطلعت كل الموجودين ويايه بالغرفة وبده الدكتور يشتغلي، ثبت اصبع رجلي المكسور بألاصبع الي بصفه ولفهن سوه صرت اشيل روحي وارگعها من الالم ما فادني المخدر بشي راح اموت من الوجع..
تعبت من الالم وسنحت حسيت بالمخدر بده مفعوله وشوية ارتاحيت، ما حسيت كلش من جبرلي الاصبع الثاني ومادري شسوه برجلي بس حسيت بي يلفها كلها.. كتبلي علاج وتمنالي السلامة وطلع..
بقيت نايمة بالفراش لا ايد ولا رجل مادري منين دتجيني هالسوالف وليش ديصير ويايه هيجي، يااابة الحقد الحاقدته على الامير ما حقدته على بشر هسة لو اشوفه گدامي اكله بسنوني املخه تملخخ..
دخلوا كلهم للغرفة يتطمنون عليَّ ابا الحسن علي گال الدكتور كتبلي خروجية واگدر اطلع، گوموني يسندوني وجابلي ابا الحسن عكازة امشي عليها، تبهذلت بالعباية والشال نص شعري طالع وترعبلت كلش..
جابولي العلاج ورجعنا لسيارة الامير الوقت كلش تأخر واني تعبانة ومتوجعة حطيت راسي على چتف حبيبة وغمضت عيوني واسمعهم يحچون بين بعض..
-رسمية: شلون نقنع فراقد طيحتها بحضنك لانها موجوعة مو لشي ثاني
-ابا الحسن علي: لا يمة شنو ما تسمع صياحها بعلي انا فوگ وروحي انخمشت ويه صوتها الموجوع
-حبيبة: يمة ماتوقع تحچي شي وحتى لو گالت من يرجع ابوي من النجف هو يحلها
-الامير علي: وشكو ننتظر ابوي؟ وهذا صياحها وفضيحتها بنص الليل انا أحاسبها عليها
-رسمية: لا يمة بداعتي عليك لا تسوي مشاكل وين فراقد
-الامير علي: چا فضحتنا هيج الي يسمعها شيگول شنيي شافتنا واحد فوگ الثاني
-ابا الحسن علي: لا واحد بحضن الثاني
ضحك من گالها وامير سمطه راشدي وهذا مستمر يضحك ممهتم وامهم تضرب على رجليها وتگول..
-يا فضحيتنا شيقنع النساوين بعد
-الامـير علي: يمة گتلج انا اتصرف يا حبيبتي لا تشيلين هم
-شيخ علي: الحمدلله على السلامة بوية شني شجاچ بنيتي منين جاي تجيچ هالسوالف
-فراقد: شفتها واگفة ويه وليدك وطايحة بحضنه
-شيخ علي: صدگ؟؟
-الامـير علي: اي صدگ چا البت چان راح وجهها بكينول الباب ولوما كاضها چان انكسر فچها بي
-شيخ علي: يا علي دخيلك الحمدلله من غده الشر
-فراقد: ما مقتنعة انا
-الامير علي: لازم ننتظرج تقتنعين يعني؟
-شيخ علي: امير!!
-فراقد: انا شفتها كاضة ايده ليييش؟؟؟
-ابا الحسن علي: چا طاحت بيمن تكض بـ.... هسة شلون تحچينه
-فراقد: گتلي وجهها راد ينضرب بالباب مووو
-الامـير علي: شو ما عاجبچ؟
-فراقد: عاجبني يمة عاجبني
عافتنا وراحت تمشي بطولها الفارع وظهرها مستقيم عدل حتى ما محنية، اللتفت الامير على ابوه من گال مزعوج..
-عيب نترتكم على خالتكم يا ولد!
-الامـير علي: بوية ما شفتها شلون عاطت بنص الحديقة من شافتنا ليگول شافتنا نـ.... استغفررر الله
-شيخ علي: ميخالف بوية فراقد ظنانة سوء معروفة
-ابا الحسن علي: وشلون راح نطمطم السالفة بوية باچر تتأول السالفة وتصير على كل لسان
-شيخ علي: بس يشوفون العكاز بيد تَـمني ووضعها راح يسكتون من وحدهم
-سلوى: فضحتينا يا حبيبتي تَـمني شجاچ يا امي
-الامـير علي: فضحتنا لانها طاحت؟!
-شيخ علي: سلوى شو صايرة ما تعرفين تسولفين
-سلوى: هااا لا انا بس بالي ظل عليها لا يحچون الوادم وهي بعدها بالعدة
-رسمية: صدگ انتِ لازم تكونين بالعدة يمة شلون تفترين گدام الولد وتطلعين بدون حجاب ما يصلح حبيبتي حرام
-سلوى: وهسة دريتي حبيبة اخذيها للغرفة الجوه بعد امچ
هزت راسها حبيبة ومشتني للغرفة الجوه عرفتها هاي غرفة رسمية ام الولد استحيت ابقى وياها وخاف الشيخ يفوتلها ما قبلت وگلتلها تصعدني فوگ..
-شيخ علي: حتى ما تتبهذلين بوية خلينا نفرغلچ الهول ترتاحين بي اكثر
-سلوى: لاا على شنو
-رسمية: لا صح كلام شيخي عاشت ايدك
-شيخ علي: چا باچر رتبوا الها يا ولد
-ابا الحسن علي: صار
اخذتني حبيبة للهول بي تخم قنفات بسيط من جهة وگعدة عربية بالجهة الثانية، ودتني للگعدة العربية حتى ارتاح وامد رجلي وراحت تجيبلي فراش ومخدة، شوية ورجعت تفرشلي وتسولف ويايه..
-يله انا انام يمچ هنا عادي
-يمعودة صعدي لغرفتج لا تتبهذلين
-لا عادي بس ابدل واجيب فراش وارجع مو تناامين انتظريني
ابتسمت اهز راسي الها، نزعت الشال والعباية والقميص الطويل بقيت بالتشيرت الخفيف والبنطرون وتمددت بمكاني بدون لا اتغطى موت حر والوطني طافية بس مروحة معلوگة..
اندگت الباب عليَّ غطيت روحي بسرعة وظليت ساكتة، اندگت الباب مرة ثانية ماعرف منو وترددت اگول تفضل من اندگت للمرة الثالثة تشنجت كلني وحچيت بهدوء..
-تفضل
انفتحت الباب وذبيت نفس من شفته ابو البورگ امير!! خزرته وانطيته ظهري ادير وجهي حسيت بي دخل للهول وطبگ الباب وراه، طفرت من الفراش وتذكرت رجلي التوجعني شاغت روحي ونترت بهمس..
-اااخخ كلله من ورااك
-انا شكو
-لعد منو داس على رجلي نعمممة؟؟
-صوتچ لا تفضحينا
-فوگاهةة
-صوتچ تَـمني!!
سكتت من شفته بده يعصب اااخ لو بيدي اتخبل عليه هسة واسويله فضيحة الها اول مالها تالي بس شو مابيه حيل هسة عود باچر..
-انا صح دست على رجلچ متعمد بس سويتها لسبب
-كمل
-شافتنا فراقد واگفين حد بعض ومن صاحت بالحديقة چانت متعمدة تريد تورطنا بسالفة ما نطلع منها بسهولة وانا احتاجيتچ تمثلين موجوعة وچن طحتي وانا كضيتچ حتى نضيع سالفة وگفتنا بنص الليل وحدنا
-اگلك
-گولي
-خو اذا تريدني اعيط گول شبيك تدوس على رجلين العالم
-وشلحگ اشرحلچ وانتِ فاهية تعلين گلبي
-تره عادي چان گرصتني او شي عادي
-اگرصچ؟؟
-اي عادي
-بابا اگرصچ شنو شو ماتعرفين تسولفين انتِ
-واذا
-خالوو شسوي اگرصچ اريدن الضربة تبين يعني تصيحين هيچ من كل گلبچ ويشوفوچ داگة ولاطمة
-عادي تره راح ادگ واللطم من وره الگرصة هم
ديجاوبني وانفتحت الباب وطلت منها حبيبة، فكت حلگها تباوعلنا والامير فوراً كسرها من گال..
-العلاج تاخذي ثلاث مرات باليوم مو بس مرتين
-حبيبة: الامير شنو جاي تسوي هنا؟
-اعلم فهاوي على العلاج علت گلبي
طلع من الهول يدردم عليَّ واسمعه يرزلني حتى من طلع..
-الامير علي: افتح عقلها واطبب الحچي بي وتگلي گرصة من گرصچ البريعصي الشفناه بالمطبخ يالفاهية
بوزت مزعوجة وحبيبة تضحك وهي تفرش فراشها بصفي، شالت علاگة العلاجات تحطها يم راسي وگالت..
-تاكلين شي حبي جوعانة؟
-لا شبعت بشوفة اخوچ
-ههههههه شبيكم ويه بعض تَـمني بعدكم ما تصافيتوا من اخر شي صار؟
-لا معليه بي اني بس هو يضوجني
تمددت اعدل نومتي وتكشفت وحبيبة هم نامت بالجهة الي بصفي نمنا راس بچعب..
-حبيبة
-امم
-اني بالعدة هسة؟
-اي غير
-يعني لازم اتحجب؟
-مادري بس انا سامعة ما يصير الزلم يشوفوچ ولا يسمعون صوتچ واظن تلبسين اسود هم اربع اشهر
-والله حرامات العدة بعمچ
-بعد حكم الله هذا تَـمني
-اي ادري ماعندي اعتراض استغفر الله
سكتت افكر معقولة ابقى اربعة اشهر محبوسة علمود واحد خرگة نفس نعمة؟ ياريت لو چان زوج طبيعي ميعرف شي بالزواج غير الكتل والاكل...
ظليت اللوب من وجع رجلي وخشمي هم يوجعني ضربة الحقير غسان لسه بگلبي جسمي مكسر منه ومدا اصحى تعبت ومليت..
-شبيچ تَـمني تتگلبين؟
-موجوعة حبيبة
-يا رويحتي شنو بيدي عليج
-صيحي عبق ليش وحدها
-ما ترضى تنزل اعرفها
-سولفي ويايه حبيبة بلكي اللتهي
-اي اي.. اممم ما تشتاقين لعمي
-ليش هو چان زين وياكم؟
-لا ما اعرفه انا اصلاً بس اسمع بأخوتي يسولفون بي
-عوفچ من عمچ هسة اجاني سؤال براسي اخوج الامير يشتغل عامل بناء؟
نهضت نفسها تباوعلي وضحكت، دورت عيونها بالسگف مال الهول ورفعت انظاري اسوي مثلها، هسة انتبهت على السگف كله شغل وديكور نازك مشتغلي بدقة عالية يجنن..
-شايفة هذا الديكور بالسگف
-اي؟
-هو شغل الامير
-وااو يعني يشتغل بالديكور؟
-اي هو خلفة ديكور وشغله خيير من الله يطلبوا محافظات شگدما شغله مرتب ونظيف
-شنو يعني خلفة؟
-يعني اسطة بي او استاذ بي
-شگد حلوو زين سگف غرفتج هم هو مسوي كلش عجبني
-اي بيتنا كله هو مسوي ومو بس ديكور يشتغل الامير نحات ورسام هم
-الله
-شنو شي بالفن هو يحبه بس ما يحچي بالموضوع هواي وما يحب يراوي لوحاته لأي شخص عنده مرسم فوگ ينحت ويرسم بي
-صار عندي فضول اشوفه
-يقفله والله لو ادري بي مفتوح اخذج اله
هزت راسها ورجعت لمكانها واني هم حاولت انام رغم الالم اخيراً غفيت، گعدت ثاني يوم بالـ 11 الظهر حبيبة ما موجودة طلعت للصالة شفت كومة نسوان هنا وعمة غزوة من ضمنهن ما جمعنا حديث وره الصار ابد وحتى هسة ما حچت ويايه..
الكل سألني شصار برجلي واچذب نفس چذبة الامير ومشت عليهم تقريباً بس بقيت اسمع حچي من كم وحدة وتذب سم عليَّ، شفت عبق تفتر جوه وتنظف سألتها عن حبيبة گالت بالجامعة..
-وانتِ ماعندج دوام؟
-عبق: اني مدرسة واليوم غبت
-يا صف انتِ؟
-خامس اعدادي
-لعد ليش غبتي
-سلوى خلتني اغيب حتى انظف واطبخ
-اوگفي عبق اجي وياچ
طلعت وياهة للحديقة صاير التنور بالحديقة الثانية مابيها شي غير صبة والتنور، الدنيا تفوور هنا شمس تصگع وبوخة وهاي خطية لفت الربطة لثام على وجهها وبدت تخبز..
-عبق: رجعي تَـمني خاف تتأذين من الشمس
-وانتِ؟
-شبيه اني
-متتأذين من الشمس؟
مجاوبتني بقت تخبز ساكتة، تنهدت مكسور خاطري اباوعلها شلون بنية ترد الروح جميلة ولطيفة ونادرة ليش هيجي الدنيا وياهة؟
-تَـمني: عبق ايددج احتركت
-عوفي الخبز هسة اصيح لابرار
-لا تَـمني لاا
لزمت ايدي تمنعني ودموعها سباق تنزل على خدودها، وخرت اللثام وطلع وجهها الابيض المكتسي بحمرة الشمس..
-تَـمني فدوة لا تهتميلي ولا تبقين وياي تره تعاديچ سلوى اكثر وتراويچ الويل
-ختوللي فنها! ثانياً انتِ ليش قابلة على نفسج هالعيشة؟ روحي لشيخ علي احچيله!
-لا لا ممنوع لااا
-لييش ترضين بهذا السجن والعذاب؟؟
-سجن سلوى ولا سجن الشماعية
-شنو
هدت ايدي ورفعت الربطة على وجهها ورجعت تخبز، ظلت ترن براسي جملتها وما فهمتها لحيت عليها اسأل بس من شفتها متقبل تجاوب عفتها ورجعت جوه انتظر الفاتحة تبدي..
"حبيبة"
طلعت من الجامعة وحاطة تلفوني بيدي كل شوية اتصل بأمي لا تضغط على عبق وتخلي ابرار تساعدها لحدما بزعت مني وحضرتني خرب شلون وياهة شلون اقنعها تعوف البت بحالها..
-السايق: ها عمي اليوم للمستوصف ترحين؟
-اي عمو ما اتأخر ساعة وارجعلي
-صار بعيوني
ابتسمت وفتحت تلفوني اگلب بمواقع التواصل، شفت الهوا صح حار بس عالي، عجبني اصور فيديو فاتحة الشباچ ومطلعة ايدي منه صممت عليه اغنية ونشرته ستوري، ما طول ثلاث دقايق وراسلني علي الحق..
"ايدچ راح تنگص من ترجعين للبيت"
2
"حبيبة: معقد"
"اموت على المعقد انا"
"ما احبك اكرهك"
"حذفي الستوري واراضيج بچيس حلويات"
"ما احذف"
"حذفي لخاطر اخوچ الحات"
ضحكت وبعدني ما جاوبته واجتني رسالة من علي التقي..
"شنو هالستوري حبيبة؟"
"شبيهااا"
"اغنية رومانسية وكذاا"
"هسة وحد عن البنات اني واذا نشرت اغنية رومانسية"
"بله منو هذا العاشگته"
دزلي وياهة سمايل يغمز متت ضحك ادري بي يتشاقه لو يعرف صدگ غير يشگني..
"تقي هذا حق يريدني احذف الستوري حاچي انتَ"
"دخيولي ابو النسوان لا تحذفي تخبلين حبيبتي"
ابتسمت فرحانة واجتني رسالتين طبگ من علي الدر وعلي البدر..
"هاي شنو الفيديو؟؟"
فطست ثنينهم كاتبين نفس الشي وبنفس الوقت صدگ التوأم يضحكون، جاوبتهم..
"هسة صورته ونشرته"
"علي البدر، علي الدر: حلو"
عااااا هاي كم مرة تصير يكتبون نفس الشي او يحچون نفس الشي بنفس الوقت ومن اگللهم انتو استنساخ من بعض ما يصدگوني اليوم الا اراويهم محادثتهم حتى اثبتلهم..
ذبيت التلفون وتنهدت من اجاني اشعار بصمة لـ علي السور والنور گاعدين سوه ويسولفون وانوب البصمة شطولها ليگول اتصال..
-علي السور: هاا الزرگة تنشر بأيدها حذفيها حذفيها تخزي تره
ويجاوبه علي النور..
-بالعباس چذاب تخبل بس حذفيها نخاف لا يغتصبون ايدج تعرفين ولد الحرام هواي
-علي النور: ليش ما تعرف شجاي يسوون يا خوية وين عايش انتَ
-عود صدگ؟
-وداعة ام ستوري يغتصبون الايد وبعد ماكو واحد يتزوج البت تره تبورين على گلبنا حبيبة من هسة اگلچ ماكو واحد يخطبچ
ويتدخل علي الكرار على الخط..
-اويلييي هاي اختي صاكة حذفي ولج حذفي لا يشوفوها بيت مسعود ويجون يخطبوج
-علي السور: مو حلوة ما عجبتني ثانياً هاي شني الساعة اللابستها مال بيبيتي
-علي النور: ولك هاي موديلها
-علي الكرار: وانتَ شمفهمك بالموديلات
-علي الكرار: ياا جحش مصاحب وما عرفتني على اختهاا
-علي النور: ماعدها خوات مااعدها وحيدة اهلها
-علي السور: تحچي صدگ؟ بس لا تحبها ولك
-علي النور: احبها وراح اخطبها عناد بيكم
ضحك علي السور وانا ميتة ميتة ضحك صاحبة علي النور اليصرف عليها دم گلبه هو نفسه علي السور ويمثل عليه وكلما نور يريد يتصل بيها يگله اخواني يمي واخاف يسمعون وباقي يقط بي وما ملحگ..
خلصت البصمة والسايق اشوفه يضحك وياي شگد عيب نسيت روحي وما نصيتها، دا اضم تلفوني بالجنطة واجتني رسالة الامير علي تهلهل خررب مگابلين ستورياتي وگاعدين امداني، حذفت الستوري بسرعة قبل لا اشوف الرسالة شبعت رزايل اليوم..
"الفيديو حلو بس مو مال نشر حبي اخاف على ايدج الحلوة لا تنحسد"
ادري بي يضحك عليَّ حتى بس احذفه دزيتله ضحكة وقلب، شافهن ودزلي سمايل شدة فلوس (
) ابتسمت على سوالفه وكتبت..
) ابتسمت على سوالفه وكتبت.."ذني الي؟"
"حطيتلچ فلوس بغرفتج على ميزچ انا طالع للحلة"
"شغل؟"
"اي"
-السايق: وصلنا عمي
دزيت للامير تروح وترجع بالسلامة ونزلت من السيارة للمستوصف، وگفلي السايق على جهة واني دخلت وبوجهي للحمامات رتبت روحي الحر لعب بيه لعب، عدلت الشال وحطيت مرطب لايدي وشفايفي وطلعت..
امشي وكعب حذائي ينعوج من التوتر، گلبي ينبض بخبال وايدي ترعش وابتسامتي ماگدر اتحكم بيها واخفيها.. وصلت لباب غرفة الدكتور شفت نسوان ثنين واگفات ينتظرن يدخلن بس اعرف هاي استراحته اكيد جاي ياكل هسة..
بلعت ريگي وحمحمت بصوتي ودگيت الباب عليه وفتحتها، رمشت بعيوني كم مرة من شفته واگف يصلي وسفرطاس الاكل على ميزه بعده ما ماكل..
طبيت وگعدت على الكرسي انتظره يكمل، كتيت عرگ لميت ايدي حيل وحاطتها بحضني استحي تبين رجفتها، ارفع عيوني عليه وانزلها خجلانة ومرتبكة، باوعتله تحرك يسجد وفاحت ريحة عطره يمة غير راحت روحي، بقيت اتأمله لحدما كمل صلاته واللتفت يباوعلي.
-عليكم السلام عنون
ابتسمت ونزلت عيوني خرب روحج حبيبة احجي جاوبي كولي شي خايبة شجاااچ..
-اجيتي بوكتج حتى نتغدا سوه، صليتي؟
-لا ما اصلي انا
رفع عيونه عليَّ جاحظهن وانا اخذتلي صفنة المطاية انوب الحچاية لزگت بلساني ما تطلع بعد احس راح ابچي..
-اقصد ما اصلي هنا الا بالبيت متعودة
-ها براحتج بعد، يله تعاي مدي ايدج
-لا بالعافية ما اشتهي
-يلا يا حبيبة لا تشلعين گلبي
-بس اضوگ
مديت ايدي للخاشوگة اخذتها واكلت من اكله جايب تمن ومرگة تبسي، عجبتني كلش واكلت بعد خاشوگة ولا اگلكم ولا تگلولي خمس خواشيگ اكلت..
-ههههههه منتصر والله طيبة شبيك
-خايبة شحچيت انا بالعافية اكلي بخيري اكلي
ضحكت وذبيت الخاشوگة، اخذ نفس خاشوگتي وصار ياكل منها ابتسمت خجلانة واخذت كلينس امسح حلگي..
-حبيبة: احس بالفخر من اطب للمستوصف واگلهم دكتور منتصر ابن عمي
-خاف المتسوصف متسجل بأسمي وانا مادري
-بس انتَ الدكتور المسؤول
-عادي اكو اعلى مني، هاج اكلي من هاي سكينة اليوم حطتها بجنطتي وگالت بابا الا تاخذها وياك اليوم
طلع كيكة بيت صغيرة لافتها بكلينس ضحكنا ثنينا من شفناها معضوضة..
-منتصر: اكيد رقية عاضتها
-ههههه بناتك بيت بلا
اخذت الكيكة من ايده اكلتها وهو كمل يتغدا، اباوعله وروحي ترف سعادة، هو التوصطلي اشتغل بالمستوصف وره ما يخلص دوامي بس اتدرب ويه المحللين الهنا ازيد خبرة هو ما يدري انا اجي علموده ولخاطر اشوفه وبس..
-يله روحي لقسمچ لا تبطين
-اي صار
-ياهو يرجعج؟
-السـ... محد انا ارجع وحدي
-ولج ام راس مو گلت ممنوع ترجعين وحدج انا!!
-مو السايق راح
-انا ارجعج لا تأجرين تكسي مالنا خلگ اخوانچ
ابتسمت وعفته اطلع، ماعرف ليش چذبت واكره نفسي من اچذب بس حتى اشوفه بس شسوي بگلبي الاغبر، وصلت لقسمي وبوزت مطنگرة ماريد اشوفه تضوجني شوفته..
-السلام لالله
-حبيبة: السلام عليكم
-غفار: زين من تذكرتي تسلمين على ابن عمج
-حبيبة: رجاء شلونچ
-رجاء: هلا عمري صارلج هواي ما تجين خير ان شاء الله
-غفار: مو كتلج عمنا فطس
-رجاء: ها اي تذكرت الله يرحمه
گعدت على الكرسي وحطيت الجنطة بحضني واجه غفار گعد بصفي ونزع الگلوفز (كفوف بلاستك) والكمامة..
-غفار: بعدج زعلانة مني
-ما زعلانة
-چا ليش من اتصل ما تجاوبين
-لان ماريد اجاوب اخواني ما يرضون
-بس يرضون تجاوبين منتصر مو؟؟
-شتريد غفار؟
-رهف اختي تگول مزاعلتها انتِ وصارلها يومين تبچي عليج
-اي مزاعلتها
-ليش؟
-هي تعرف شسوت
-ضوجتچ بشي؟
-اي
-زين گلتيلي حتى اطيح حظها
-لااا شبيك انتَ ما سوت شي
-لا تچذبين انا الها هالخايسة الا اگص لسانها بس خل ارجع
گام من مكانه عصبي يريد يروح وجريته من معصم ايده ارجعه ووخرت ايدي بسرعة منه مزعوجة..
-لا تكتل خواتك حرام عليك!!
-لو تكضيني هيچ كل يوم ما اكتلهن بعد
عبست بوجهه وگمت لـ رجاء راسي مسطور يوجعني وهذا ضوجني گام يوجعني بالزايد..
-رجاء: شبيچ حبي مبين تعبانة
-غفار: شنو شبيها؟
-رجاء: مادري مبين تعبانة
-حبيبة: مابيه شي بس راسي يوجعني
-رجاء: جايبه براسيتول هاج
انطتني حبة بلعتها واجه غفار يوگف بصفي، توترت من قربنا وابتعدت اوگف من جهة رجاء لبست اللاب كوت وگمت اساعدها بالشغل ماعدهم هواي شغل وقت طلعتهم هاي، شوية واجه منتصر دخل للمختبر سلم وگال..
-يلا حبيبة
-غفار: شني وين ماخذها؟؟
-منتصر: لبيتها يله بوية
اخذت جنطتي ونزعت اللاب كوت اروح وياه وفزيت من لزمني غفار من ايدي يجرني عليه ويگول بتحدي..
-انا اخذها
-منتصر: ايدك عنها لا اكسرها!!
-غفار: وانتَ شكوو بنت عمي وبكيفي
-منتصر: غفاار لا تخلي صوتي يعلى هدد حبيبة
شهگت من سحبني منتصر من سير الجنطة وخلاني وره ظهره، اباوع لـ غفار وجهه ينطي اللوان والعصبية فول، تقدم تكامش ويه منتصر من ياخته ويصرخ..
-غفار: نذذذذل طول عمرررك تلعب بأعصابييي منتصررر سويتها قبل وترجع تعيدهااا بعنادي موو
-منتصر: هدنني لا انعل والديككك غفااار لا تمتحن صبررري
-حبيبة: فدوة دخيلكم كافي انفضحناا
اجو موظفين بالمستوصف يركضون يشوفون شكو من شافوه دكتور منتصر محد تدخل وتراجعوا، دفع منتصر غفار عنه وذب نفس يفرك وجهه وهذاك بعده يتنافض، عدل ياخة قميصه وهدأ صوته يگول..
-منتصر: يله عيوني جاهزة؟
-اي اي
طلعت وياه وسمعت صوت غفار يصيح على رجاء ويشيل بروحه ويرگعها، لبت من الخوف وانوب شفت السايق مالتي بعيد واگف شجاني وما گتله يروح الزلمة كاعد منتظرني شگد عيب، ركبت سيارة منتصر گعدت بالصدر وبسرعة دزيت رسالة للسايق يروح..
-منتصر: عاين الاستهار عاين
-هاا
-اول ما ركبت السيارة بدت تراسل الشيخة
-هههههه بطل عني منتصر عوفني
-نعوفچ چا ليش
-شنو قصدك
-شنو
-شنو يعني تعوفني؟
-وين عايفچ ام الگمل گعدي وسكتي
-منتصر ليش فقدت اعصابك جوه؟
-چا اخلي يكضچ بكيفه؟؟ اگص ايده لو عادها!!
-ها
-هاي اول مرة يسويها؟؟
-اي والله
-انتِ لا تقبلين عليه اذا تجاوز وصيحيلي بساع
-حاضر
سكتنا وهو فتح قصيدة، ابتسمت ويه صوته يدندن وياهة بس راسي الوجع ما ينحمل بعد طفيت المسجل وگلت..
-راسي يوجعني كلش نگدر نشتري بطل ماي منا
-اي دقيقة
سفط گدام اسواق يجيبلي ماي بس الوجع يزيد واحسني خنطلت مو شلون ما چان، رجعلي ببطل الماي شربته ومددت راسي على الكشن اريحه..
-اخذت براسيتول من رجاء وما صرت زينة
-بعد هاي هوسة الفواتح لو ما جاية اليوم للمستوصف
-لا مابيه شي لا
-باجر لا تجين ارتاحي
-اجي
-لا تجين ولج ما محتاجيچ
-والعباس الا اجي
-خرب عقلچ شكو تبچين
-مادري لا تحاچيني بعد
-بدت تمسلت الفرخة
مسحت دموعي الما سيطرت عليهن شبيه ابجي مثل الزعاطيط وما سيطرت على روحي امداني هسة شيگول عليَّ، وصلنا للبيت وقبل لا انزل گلت ارگع سالفتي گدامه شوي..
-تره قبل شوي تذكرت عمو نعمة وبچيت
-ليش انتِ شايفة عمچ نعمة حتى تبجين عليه
-لا
-چا نزلي وانچبي
-عابتلك
-ام راس
ضحك من گالها وانا نزلت ورگعت باب سيارته حيل، فتح الجامة وطلع راسه منها وبعده يضحك..
-عود حسبالج راح اضوج؟ تروحلج فدوة السيارة
كشرت بوجهه فرحانة ورجعني للواقع من ضرب راسي فوگ الشال بأصبعه ورجع يگول..
-تبجي على نعمة ام راس
شخط سيارته وطلع غميت روحي مية غمة وطبيت للبيت وشفت الدنيا مگلوبة هنا بملابسي وگفت اغسل مواعين واسوي چاي وخطية عبق مكروبة كراب وگفت وياهة نكمل الشغل وابرار بس شافتني اجت تركض وتگول..
-يا عيني هسة رجعتي من الدوام روحي بدلي وصلي وتعالي انا اخذ شغلج
-بس مو تنطي لـ عبق ابرار فدوة
-لا لا انا اسوي
قبل لا اروح لزمت عبق وهمست..
-عبق: دوليي ام راس
-كاافي تصيحولي ام رااس هذا وانا راسي بگد البتيتة ما ينشاف
ضحكت وطبت للمنور وانا صعدت ابدل واصلي لبست صاية مرتبة وحطيت بس شال على راسي بدون لا اللفه ونزلت شفت تَـمني كاعدة والنسوان خابصاتها ينوحن يمها وهي تعصر بعيونها تريد بس دمعة تنزل..
خلصت الفاتحة لليل هلكنا تعب وثاني يوم انا ما داومت لان ناس هواي وعبق تعبت خليتها تروح للمدرسة وانا بدالها بس غير امي طلعتها من خشمي وطيحت حظي..
-وووين راحت للمدرسة هالنذذلة؟؟؟ والعبااس بس خلترجع اليوم اذا ما اطلعلها جلد جديددد ما يطلع اسمي سلووى
-يمة حرام عليج البت عدها امتحان
-بالعباااس حتى المدرسة احرمها منها هالزبالة انا الهااا
-اگول لابوي والله
صفگتني راشدي ودفعتني على الحايط، حطيت ايدي على خدي مهضومة منها وهي ما سكتت ترزل وتهدد بيه..
-تگولين لابوج؟؟ يطردها ويطردني ترضين امج تتهجول وتظلين بدون ام حبيبة!!!
-يمة على كيفج ويه عبق لا تضغطين عليها خطية صغيرة هاي
-عرررج يصيبها ان شاء الله بت اللفوه هاي
طلعت من غرفتي حادة سنونها على عبق خفت تسويلها شي، نزلت بساع ارتب واجتني رهف اخت غفار تعتذر مني تراضينا ووگفنا نغسل مواعين سوه..
-تَـمني: اساعدج حبيبة؟
-لا حبي وين گوة تمشين انتِ كعدي خل اصبلچ چاي
گعدت على الكرسي صبيتلها چاي وانطيتها اشوفها معوشة وضايجة خطية مسكينة اشافت من حياتها..
-يا اهل البيت.. اكو احد هنا
گلبي رجف ويه صوته، حطيت على شعري الشال ومديت راسي شفته منتصر واگف وبيده كراتين ماي..
-زين بس وگعت ايدي سويلي درب احط الماي جوه
-تعال تفضل
كلت للبنات يلبسن طلعت رهف وبس تَـمني بقت لان بصعوبة تگوم حطت شي على راسها وهو دخل يكتر الكراتين على جهة، كمل ورفع راسه الي مبتسم ينفض ايده بدشداشته..
-وين بنياتي
-جوه يم امي تلاعبهن
-عينج عليهن حبيبة فدوة لوجهج
-بعيني احطهن
تشكر مني وطلع، اللتفتت لـ تَـمني شفتها تباوعلي ومبتسمة، غلست وكملت اغسل المواعين بس ظليت كلما اللتفت اللگاهة الكشرة شاگة وجهها..
-حبيبة: ها شبيچ
-اممممم
-شكو شبيچ ولج
-منو هذا الاجه
-ها هذا.. ابن عمي منتصر
-اهااا
-احم
-مرته وين
-ليش تسألين؟
-فضول
-ارمل منتصر
-ياا خطية وصارت عنده بنية؟
-عنده توأم بنات
فلتت اعوفها اسئلتها حرجتني وخفت اچفص گدامها، گامت هي ترجع للنسوان وانا بقيت انتظر وقت حلة عبق وگفتلها بباب البيت علما طبت وجهها صاير احمر من الشمس..
-ها شلونچ بالامتحان اليوم؟
-كلش زينة
-عفية عليج، باعي طبي ونزعي جنطتج وابدي شغلج وانتِ بالصدرية لا تبدلين وخلي امي تشوفج من تشتغلين ماشي؟؟
هزت راسها اي بدون لا تناقش تعرف النگرة وين، ذبت جنطتها وگفت تشتغل وهم ما سلمت من امي وكتلتها گدام النسوان..
احترگت حرگ وتَـمني تدخلت وصارت بنصهن وهم اكلت نصيبها من العركة، دفعت تَـمني امي على الكاونتر وصاحت..
-حيوااانة اخر مرة تمدين ايدج عليناا
-سلوى: عاينوو عاينووو الارملة بت الشواررع اللافة على ولد شيخ علي شتگووول
-تَـمني: يا حقيرة اني لافة على ولد شيخ علي؟؟؟
-چا اناا البارحة شافوني واگعة بحضن الامير
-وحدة من النسوان: بعيوني شفته من شالها وخذاها للصالة
عاطت بيها تَـمني وانا واگفة واللطم على وجهي اخاف تطلع امي رسمية وتجي تشوف هالمصيبة وتطرد امي من البيت، باوعت بوجوه النسوان الي بالمطبخ كلهن عرف من جماعة امي صديقاتها وگرابتها اكيد ما ينطن بيها..
بنص العيطة والهوسة من النسوان اجت امي رسمية تمشي گوة من شافت تَـمني تصيح وامي ساكتة صاحت..
-رسمية: تَـمني شبيچ يمة ماكو حشيمة للميت
اللتفت عليها تَـمني عيونها مفتوحة على وسعها، اشرت على امي وقبل لا تحجي امي صاحت وهي تملش بشعرها..
-يبوووو يبووو خزتنا يبوووو ولجن للمرة المية اگول تَـمني شريفة وما عليها بالامير اظل ابررلها انا وين ماروح يبوووو
-تَـمني: ولج انتِ الحچيتييي وطعنتي بيناا
-سلوى: انا؟؟ حرام ولا حجيت انا دافعتلج من هاي البايرة حچت عليج وطلعت من المطبخ شني صرتي تتبلين على اليدافعلج هم!
-رسمية: كافي بس عيب من الناس عيبب
سكتت تَـمني تطحر من القهر وامي تمسح بعيونها الي رأساً ذبت دموع، انزعج وانقهر من تصرفاتها وكلش استحي بس شبيدي تبقى امي وبرها واجب..
خبصة وهوسة المطبخ والنسوان قسم منهن يبسبسن على تَـمني ويقذفون بيها بس ما يسترجن يحچن على الامير علي وذبوا الصوج كله بيها عود هي لافت عليه وخذته وهي بالعدة، بينما انا واگفة احجي ويه النسوان وافهمهن على وگعتها ورجلها طبن من المطبخ نسوان ثنين عرفتهن تالة وخالة تَـمني..
-تَـمني: خالة تاالة اجيتو
-خالة: تَـمني لمي ملابسج خلينا نطلع حبيبتي
-تَـمني: يعني متحضرون الفاتحة؟
-تَـمني: شنو شبيكم
عاطن النسوان وصار مراكض يطلعن من المطبخ من وگف زلمة بالباب يرعد لفيت الشال عدل ووگفت على صفحة من طب يجر بخالة تَـمني وبيها..
-بسام: امشن گدامي يله
-رسمية: انتَ ياهوو وشلون تدوس عتبة الشيخ من دون اذن
-بسام: اجيت اخذ مرتي وبناتيي
سحسلهن ياخذهن وتَـمني تتعارك وياه واسمع لخالتها تحجي وياهة حتى تطلع قبل لا يفضحهن بسام..
-تَـمني: جنطتيي اغراضي جوه
-بسام: جيبولها اغراااااضها
ركضت عبق تحيب جنطتها واخذوها وطلعوا منا، ظليت اعاين عليها وهمه يجروها والعكازة واگعة من ايدها گوة تمشي ودموعها عشرة عشرة ما تحملت اشوفه وهو يمد ايده عليها بعينيي شفته يحط ايده على رجليها ويلمسها يتحارش وهي تصيح وتضرب بي..
تخبلت وركضت على تلفوني اتصل على اخوتي ولزمتني امي..
-شتسوين وولج
-يوم شوفي شلون اخذها منا مثل الحيوان حراممم عليهم
-عوفيها اهلها ذولة شعلينا بيها گلعة خلصنا منها ام لسان الفاهية
اخذت تلفوني وعافتني بقت روحي تلوب گلبي يوجعني عليها والمصيبة ما اخذت رقم موبايلها ولا اعرف حساباتها حتى اتواصل وياهة بعد وهيچ غاب اثر تَـمني لحدما بيوم اجاني اتصالها وخرطتني العافية...
**
"عبق"
خلصت ايام الفاتحة هلكتني تعب بس اشتغل بسكوت اخاف من سلوى لا تسويلي سالفة، انكتلت مرتين واحترگت بالتنور چم مرة بس ما حچيت لـ حبيبة ادري بيها تنقهر وتظل تاكل بروحها..
حطيت راسي على مخدتي بالمخزن وافكر بـ تَـمني مر اسبوع وما تواصلت ويانه بعد اعرف حبيبة ماعدها رقمها ولا هي عدها رقمنا بس انقهرت من عرفت ما راح نشوفها بعد، صارت گعدة لان بسام رجل خالتها داس عتبة باب الشيخ بدون اذن وتورج على نسوانه، بسام جاب اهله وناسه واجه يعتذر گدام الكل..
سألهم عمو علي على تَـمني گال البنية بتنا وهي بالعدة مالكم علاقة بيها بعد، زعلت كلش صح ما صار هواي من تعرفنا عليها بس تعلقت بيها وحبيتها حسيتها مكسورة نفسي ومعاناتنا مشتركة..
غفت عيني من التعب وفزيت على گلاص مي انرشگ بوجهي شهگت مخترعة وشفتها سلوى واگفة ومتخصرة..
-شو نايمة ست الحسن والجمال؟؟؟
-عبق: محتاجة شي خالة؟
-خلخاالة تخلخل عظامج كومي نظفي غرف الولد گوومي
-بس همه بيها شلون انظف
-طلعوا شوية ويرجعون عود عوفي غرف تقي و حق اخر شي ثنينهم مو هنا طالعين واجب لبغداد
-تمام
-اريدها تلگ للگ واذا شفت ذررة تراب اخليچ تلطعين الگاع بلسانج تمسحيها فهمتي لو لااا
-فهمت
-سم الحسن ان شاء الله
-خالة ليش ضايجة
-لان حبيبة راحت لبيت عمهااا وما خذوني وياهمم
عرفت هاي عصبيتها وراهة حبيبة، گمت من مكاني باوعت للساعة بالعشرة بالليل، لفيت الربطة على راسي وشديتها من وره رگبتي مبينة بس شعري مضموم ونزعت الجبة ظليت بالدشداشة، باوعتلي سلوى من فوگ ليجوه وضربت رجليه بأيدها..
-ليش ربع ردن الدشداشة شنيي ماعندج دشداشة ردن؟؟
-لا خالة جاي اغسلهن
-وجعع الخايسة يله ولي نظفي
وگفت على راسي لحدما لبست الستريج ونزلت اول غرفة انظفها مال علي الدر وابرار عجببة هالبنية وعجيب وصخها مادري شلون متحملها علي الدر متنظف وتتعاحز من كلشي فد تدق..
شفت الفراش مخربط حتى من تنام متسفط لحافها، سفطته وعدلت الغرفة نظفتها ووگفت اشعل المبخرة الالكترونية واحط بخور وانفتحت الباب عليَّ..
جفلنا ثنينا هو واگف بالباب واني لازمة المبخرة بيد والبخور بالايد الثانية ونباوع لبعض، ابتسم من شافني وگال..
-علي الدر: جاي تنظفين؟
-ها.. لا
-چا شتسوين بغرفتنا
-بس اشعل بخور ابرار نظفت وگلتلي اشعل بغرفتها علما ترتاح
-ها يعني هذا تنظيف ابرار
دور عيونه بالغرفة مبتسم تك خد اعرفه كاشفني بس خالتي سلوى متقبل الا اكول ابرار منظفة مو اني وغرف الولد هم كل الفضل يروح لابرار ولسلوى علساس هنه يهتمن بكلشي..
-عاشت ايدج عبق ومن رخصتج اريد اسبح
-اي صار
عفت البخور وطلعت من الغرفة قبل لا اطبگ الباب سمعته يگول..
-جبتلج علاگة حلويات علگتها باليدة مال باب غرفتج
ابتسمت ممتنة وهو هم ابتسم وفات للحمام بس حظي المصخم خله ابرار تشوفنا وما حسيت بيها الا وعتتني من ياخة الدشداشة شگتها وخلت صدري يطلع..
-ابرار: چلببببة تتبوسمين ويه رجلي وتضحكين وياه على شنوو
تنتر بهمس حتى ما يسمعها علي الدر وجرتني من غرفتها تطلعني، صفگتني راشدي قوي على خدي احس اصابعها طبعن بي متت وجع وحرگة ورفعت ايدي ورجعته الها، تخبلت وصفگتني راشدي ثاني وخرمشتني من زندي شاطت روحي..
دفعتها ادافع عن نفسي وشافتنا سلوى، صاحت بيه بس شفتها تقدمت عليَّ عرفت راح انكتل اليوم وشردت لغرفة الامير علي فوگ وطبگت الباب عليَّ..
تنفست اذب نفس تعبانة ولزمت غرفته انظفها، لزمت عطر عطر امسح بي غرفته تتعبني لانها عبارة عن مرايات كل مكان حتى تاج چربايته كله مرايات صغار..
ساعة مضت واني هنا هلكت وطلعت لغرفة علي الكرار هذا عاد نظيف كلش اصلاً ميحتاج احد ينظفله غرفته مرتب كلش ويهتم بالتفاصيل ما اتعب بغرفته واشربتها تشربت واطلع..
طبيت لغرفة ابا الحسن علي هم نظفتها وانتبهت للميز مالته عليه اوراق هواي وصور، تقربت اشوف وابتسمت من شفتها صور لـ ليلة بنت عمه بمختلف الوضعيات.. وهي تشتغل وهي تحوش وهي تحجي وهي تاكل واشكال صور بآخر سفرة من راحو كلهم لايران بس طبعاً كل صورها بالحجاب..
عفتهن بمكانهن ونزلت لغرفة علي السور ونور وهم رتبتها هلكت، سمعت صوتهم رجعوا وطفرت بسرعة اصعد لغرفتي بالمخزن وطبگت الباب ورايه شلون بيه بقن غرف علي الحق و علي التقي ما نظفتهن شيخلصني من لسان سلوى اليوم..
بقيت گاعدة هنا انتظر، انحمست من الحر نزعت الستريج وظليت اتسمع علما خنست اصواتهم شفت الساعة عبرت الـ 2:00 بالليل طلعت اتسحب على اطراف اصابعي ودخلت لغرفة علي التقي نظفتها بس مسدسه وطلقاته ما اتدنه يمهن اعرفه ميقبل..
فتحت جرارته شفت كومة جكاير ورتبته الذهب القديمة هم مشمورة بي، لزمتها بيدي اتلمسها تخبل شيصير لو اني ضابط واللزم سلوى الا ازوعها حليب امها واذبها بالسجن وارتاح منها..
رجعت شغلاته وتأكدت كلشي بمكانه وطلعت لغرفة علي الحق بصف غرفته ضبط، ذولة الثنائي ميفترقون عن بعض ابد طبيت لغرفة حق واشوف الدنيا مگلوبة بيها يبووو على عمري شيخلصها هاي..
صابني اليأس واني اشوف گطوف جگاير وباكيتات معسل والنرگيله مشمورات كل مكان هاي من غير ملابسه مشمره وبناطيره واحذيته بالگاع..
ظليت ارتب بيها علما انهد حيلي، لزمت الگاع اجلفها وامسح ايدي وگعت ذبيت الوصلة وگعدت على فراشه ارتاح شوية واجر نفس، سندت راسي على تاج الچرباية مالته وغمضت عيوني اريحهن وما حسيت بعد..
عصرت عيوني من حسيت بخدي يوجعني لزمت المكان اتلمسه حار يچوي وبي وجع عبالك گارصني زنبور، فتحت عيوني على كيف تعبانة وفكيتها على وسعها واگع گلبي من شفت ثنين زلم واگفين كدامي، واحد بعده بالزي العسكري والثاني نازع قميصه وباقي بس ببنطرونه العسكري..
يتبع
