رواية اسيرة بين يدي قاتل ابي الفصل الرابع 4 بقلم نور آل زيادة
لاتوجد ضروف تجعل الشخص لايوفي بوعده ألا اذا كان الوعد من البداية كاذبا...
__________
سيلين،،،، مرت الايام واني مرتاحه بحياتي الجديده وبعملي وسعيده بوجود ابني ومهتمه بي واني احاول اعوضه عن ابو لأن سيف للان ماكدر يتخطى وفاة ثامر وحقه لأن ثامر كلش كان مدلله ومهتم بي
ام ساره من سمعت بسيوفي نفسيته تعبانه عزمتنه نطلع سوا نسوي سفره حتى تتغير نفسيته
طلعنه للجزيره السياحيه وكانت هاي اول مره ندخلهه سيف من شاف الألعاب انطلق تونس خليته على راحته الى ان تعب وفرغ طاقته السلبيه بعدها فرشنه فراش وكعدنه تغدينه خاله ام ساره سوت دولمه وكبه وبورك واني وسميه سوينه برياني باللحم وكيك وگليجه واخذنه عصائر ومقبلات تغدينه وكانت الأجواء حلوه لكن هل مره انتبهة ساره ضايجه ومن سألتهه عن السبب...
ساره،،، مخنوكه من كعدت البيت مليت
سيلين،،، زين احسن ماكاعده شنو رأيج تشتغلين او حتى كملي دراستج
ساره،،، وين استغل واني خريجة سادس وبعدين مؤيد ميقبل لااشتغل ولا اكمل دراسه
سيلين،،، اكول مااحجي وادخل بس البيه ميخليني ادري هو حكم فرعون مبقيج وقف صار ثمان سنوات لا جاي عاقد ولا متزوجج ولاعايفج تشوفين حياتج ولا مخليج تدرسين ولاتشتغلين ادري والحل؟
ساره،،، هو بطلني واني خفت من المشاكل وسكتت
سيلين،، يعني هذا مو وضع خواته يفرفرن بالكليات وامه ميلزمها بيت وكادر بس عليج وانتي خاضعه احنا بزمن الضعيف ميعيش شوفيني شصار بحالي بسبب ضعفي وطيبتي الكل استغلني والكل اذاني وشوفيني اليوم بعد ماتغيرت ماكدرولي
ساره،، اني مو انتي ومااكدر اوكف بوجه مؤيد لأن اخسره وأني احبه مااكدر بدونه لهذا كلامج ميغير شي
ام ساره،،، حجيت وكلت وفهمت يمه موهيج تضلين خاضعه مافاد
ساره،،، عوفوني بحالي اني قابله
سيلين،،، مااعوفج لأن بوقتها انتي هم ماعفتيني اذا انتي ناسيه اني ماانسى لأي مرحله وصلت حتى فقدت ايماني وتركت صلاتي ونزعت حجابي وألف مره فكرت بالأنتحار وكم مره حاولت انزل الطفل ألي بطني فقدت عقلي بس انتي ماعفتيني ضليتي ويايا لأن تعرفيني تصرفاتي موبعقلي ومو صحيحه ضليتي ويايا الى ان رجعت لصلاتي ورجعت اصوم واقرا قران وندمت على كل يوم عصيت بي ربي وبعدها نزلت السكينه لروحي ورجعت اعيش وانتي هم هسه مو بوعيج الحب عامي عيونج
ام ساره،،، صح ودائما اكلله هل كلام هواي مطيه مجال لمؤيد والله شنو احبه
ساره،،،، سيلين لتقارنين علاقتي اني ومؤيد بالشي المريتي بي اني ومؤيد واحد يحب الثاني وانتي حياتج مختلفه وموضوع ساعدتج حتى ترجعين للصلاة ولكل شي صح فهل شي ماألي فضل بي وأنما داخلج النضيف رجعج لطاعة الله
سميه،،،، بقى بس الله يهديها وترجع تتحجب
ام ساره،،، يمه هي صارت عدها ردت فعل نفسيه ألي صار وياها مو هين بس هي داخلها نضيف لهذا ربج ماعافها و الهدايه من رب العالمين وكل يوم ادعيلها تتحجب
سيلين،، نزلت راسي خجلانه فعلا اصوم واصلي وماالبس حجاب رغم اني كنت محجبه سابقا
ساره،،، عوفوها يجي يوم وترجع تلبس الحجاب اكيد راح تحبه وترجعله
سيلين،،، ومنو كلج اني مااحب ألبس حجاب اصلا اني بالبدايه لبسته بكامل قناعتي وكنت كلش فرحانه بي بس بعدين...
ساره،،، صرتي متتقبلي
سيلين،، السالفه موسالفة تقبل حاولت اكثر من مره وحتى اشتريت حجابات بس كل مااخلي على راسي واباوع على نفسي بالمرايه اشوف سيلين القديمه
ساره،، ليش شبيها سيلين القديمه وين كان اكو بطيبة گلبها وبحنيتها ومنو بأخلاقها وببرائتها
سيلين،،، وهي هنا المشكله
ساره،،، وين المشكله انتي مو داىما تكولين اتمنى ارجع لبرائتي ألي سرقوها مني
سيلين،،، الأمنيه تسمت امنيه لأن نعرف انو هي ماراح تتحقق،،، الأمنيه هي الشي المستحيل سيلين البريئه راحت وماتت اتمنى ترجع برائتي بس بعد مترجع والافضل انو مترجع لأن ألي يفتح عيونه ميكدر بعد يتحمل الضلام واني طيبتي وبرائتي هي ألي خلت الناس تستغلني
ساره،،، لهذا لبستي قناع القسوه والقوه تركتي الحجاب وصرتي تهتمين بلبسج زياده عن اللزوم حتة ألي يشوفج يعرف انتي موسهله وميكدر يستغلج؟
ام ساره،، وشدخل الحجاب بالموضوع؟
سيلين،،، السبب مو بالحجاب السبب بيه اني كل مره اخلي بيها الحجاب على راسي واشوف شكلي اشوف هذيج سيلين القديمه ألي الكل استغله
اشوف سيلين الطيبه واختنك وحالتي تتأزم،، اعرف هذا مومبرر بس صدقا موبيدي صدكوني اتمنى ارجع ألبسه واوكف على مرايتي من غير ماأتأذى
خاله انتي ام ادعيلي اكدر اتخطى كل شي مريت بي وارجع طبيعيه والله يهديني للحجاب لأن اني ماعندي ام تدعيلي بس تدعي عليه
ام ساره،،، لاحول الله لتضوجين بنتي اني هم امج حالج حال بناتي مثل ماادعيلهن ادعيلج الله شاهد،،، الله يبرد گلبج يمه ويهديج للطريق الصحيح ويسعدج ويحفضلج ابنج
سيلين،،، كنت افرح من اطلع ويا هل عائله اللطيفه وبنفس الوقت تصير بداخلي غصه من اشوف ام ساره شلون تخاف على بناتها وشلون تحبهن واني امي تستغلني وتاجر بيه حتى تحصل فلوس
بيومها ايقنت انو المراه مهما تملك من جمال ومال وشهاده هل شي ميكفي لا لأسعادها ولا يكبر بختها الاهل هم السند الحقيقي
ألي تملك عائله تسندها راح تكدر توگف بوجه الكل ومع الأسف هل شي ماموجود عندي
غيرنه جو وتونسنه وسيف فرح بهل سفره
ثاني يوم اجتني اكثر من قضيه فرحت لهل شي كنت بالبدايه استلم قضايه بسيطه احاول اخذ ومره مسكت قضيه طلاق وحضانه ونجحت بيها لكن ألي صار اجه زوج موكلتي تهجم على مكتبي وصار يغلط ويهدد والأغرب كلي بصريح العباره...
_بسببج ابني بالمستشفى وضعه موزين اذا صار علي شي اهجم المكتب على راسج وراس الخلفوج
سيلين،،، واني شعليه بأبنك قضية طلاك وحضانه لزمتها شعليه بموضوع ابنك؟ وبعدين شبي شنو صاير ويا؟
_ بسببج اخذت الحضانه وابني يمها اندعم وهسه بالمستشفى لومامدخله ولو اني ماخذ الحضانه ماصار كل شي
سيلين،،، انت تحجي صدگ؟! قدر وصار اني شكو
_انتي ساس البلا اي شي يصير بأبني اگاومج عشائريا واخذ حقه من عيونج
سيلين،، روح حاسب ألي دعم ابنك اني شعليه شنو هل تخلف
_هسه اشوفج التخلف على اصوله من اخذ حقي منج مربع
سيلين،،، عافني وطلع واني مصدومه هذا صدك يحجي لو يشاقه؟ اني شعليه ربحت قضيه والطفل صار بحضانه امه اني شعليه وهو اندعم
ثاني يوم اجه تهجم على مكتبي لأن ابنه توفى طردوا الحمايه لوتخبل كان ويا رجال هواي اخر شي كالها بصريح العباره
--تدزين من عشيرتج واحد ياخذ عطوه وألا اسبيج سبي واخلي بحر من الدم
سيلين،،، ماأكتفى صار يهدد ويغلط خله الناس ألي بالبنايه والشارع صافنين على غلطه وتهديده شفت الموضوع بده يكبر اتصلت بفؤاد ومن سمع بلش ملامه بيه على اني موكتلج هيج راح يصير
بالبدايه ضجت من عتابه بس سكتت لأن هو قرر يحل هل موضوع وفعلا حله وللان مااعرف شلون
بعدها شفته وتشكرت منه على وكفته ويايا
فؤاد،،،لتشكريني هذا واجب انتي وابنج وصية ثامر واكيد اوكف وياكم من اكدر اساعد وارجع واكول يحتاجلج ضهر يسندج عشائريا وقانونيا انسي زمن المثاليات الحياة تغيرت والناس تغيرت
سيلين،،، شلون شسوي ابطل واكعد بالبيت ليش لعد اخذت الشهاده ؟
فؤاد،،، ماكتلج كعدي بالبيت كتلج مارسي مهنتج بس خليلج ضهر
سيلين،، ومين اجيبلي ألي يسندني لاعندي اهل بيهم حظ يوكفولي ولا عندي تواصل ويا عشيرتي ولا عشيرت ثامر ماعندي غير الله
فؤاد،،، ونعم بالله شوفي ام سيف اني صار كم سنه اشتغل بمكتب محاماة ويا محامي معروف وشيخ عشيره اهله وكرايبه بالدوله وهو شخص كلش محترم وصراحه يحترمني ويقدرني وحتى خال ألي مكانه خاصه بمكتبه ويسلمني اهم القضايا ويعتمد عليه بكل امور الشغل وامور المكتب والموضفين بغيابه لأن هو اشغاله هواي
بالبدايه چنت بس اني ويا وشخصين اخرين بالمكتب وبعدين توسع المكتب وصار كأنما مؤسسه قانونيه بيها موضفين وكادر من افضل المحاميين بالبلد وحتى عدنا معقبين معاملات وكل هذا بأدارة واشراف الشيخ وحمايته
اي شخص من كادر المؤسسه من نلزم اي قضيه منخاف ولانهتم لأن نعرف منو ورانا ولزمنه اكبر قضايا ونجحنه بيها بمساعدته لأن هو ماخذ عدت شهادات بالقانون ومن ضمنه ماجستير قانون دولي
وعلى فكره هو نفسه ألي حل مشكلتج ويا هذوله الناس طلبت منه يتدخل لخاطري وهو ماقصر بس الأكيد موكل مره راح اتجرء اطلب منه لأن بالنهايه هو رجل عنده هواي مشاغل ولهذا اني اقترح تجين وتنضمين لكادرنا فيكون هل شي افضل ألج وبهيج حاله راح يحميج لأن من ضمن الكادر
سيلين،،، مااعرف مااحس نفسي مقتنعه
فؤاد،،، صدكيني اذا تضلين وحدج راح تضلين تواجهين صعوبات لأن انتي وحيده وبهيج حاله راح تضطرين تمسكين قضايا بسيطه حتى لتصيرلج مشاكل وتضلين بمكانج تراوحين وتبقين كمحاميه بسيطه وافقي وخليني اطمئن عليج من اشوفج ويايا بنفس المكان
سيلين،،، تمام موافقه بس عفيه اني مااحب احد يتحكم بيه
فؤاد،،، لتخافين راح تكونين من ضمن كادري وتحت اشرافي معليج بأحد اني اوجهج واساعدج ام سيف احنا عشرت سنين و انتي مرت الغالي وبمعزت خواتي الله شاهد اعتمدي عليه ولتخافين واذا ماعجبج الشغل عوفي
سيلين،،، توكلت على الله وغلقت المكتب ألي بنيت امالي علي وقررت ابلش شغل ويا فؤاد استغنيت عن الحمايه لأن شفت ماألهم لزوم
اليوم اول يوم دوام كعدت نشيطه وحضرت نفسي وكشخت اليوم اول يوم دوام ويا ناس اول مره راح اتعرف عليهم والأنطباع الأول مهم
بالخارج استقبلني فؤاد بوجه البشوش
دخلت للمكان وفعلا مثل ماكال فؤاد مؤسسه
اول مادخلت صار على اليمين ريسبشن سكرتاريه بي ثنين يستقبلون الاشخاص وعلى اليسار استراحه بس كلش مرتبه شكلها كأنما صالة ضيوف وبالوسط ممر طويل على الجانبين غرف صغيره جدارها وابوابها من الزجاج الشفاف وداخل كل غرفه مكتب لأحد المحاميين وبنهاية الممر غرفتين لكن بناء وحتى ابوابها من الخشب تحجب مابداخلها وحسب مافهمني فؤاد وحده منهن مكتب فؤاد والثانيه غرفة الشيخ
عرفني على الكادر وكان احد المحامين ألي عرفني عليهم هو رائد نفس الشخص ألي ساعدنا هو وجماعته وطلعنا من البتاوين
هو بسرعه عرفني وسلم عليه سلام حار وطلب مني اي شي احتاج اطلب منه اني هل شخص من اول مره شفته ارتاحيتله
بعدها اخذني على مكتب بي بنيه عرفني عليها اسمه اسماء كانت الغرفه بيها مكتبين
فؤاد،،، هذا المكتب راح يكون ألج حاليا لأن ماعدنا مكاتب فارغه تحملي فتره قصيره وراح يكون ألج غرفة تخصج لأن الشيخ مقرر يوسع المكان ان شاء الله من يرجع من السفر
بلشت دوام ومسكت اكثر من قضيه وبديت اشتغل عليهن وخلال اسبوع كدرت اتأقلم على المكان وكل الموجودين وحبيت وجودي بينهم وفؤاد ابد ماعافني وصراحه حسيت بالأمان والراحه لكن مااستمر هل شعور غير اسبوع واحد
بعد اسبوع من دوامي رحت الصبح للمحكمه دااشتغل بأحد القضايا ورجعت للمكتب دخلت لغرفتي ألي بيها مكتبي ومكتب زميلتي اسماء لكن ماكانت وحدهه يمها بنيه ثانيه ومبتسمات ويسولفن ومخبوصات ماعرفت ليس لكن بعدين فهمت من اجت بنيه ثالثه مستعجله وكالت
_اجه الشيخ اجه
سيلين،،، ياشيخ مافهمت؟
اسماء،، شبيج ماعرفتي صاحب المكان الشيخ ابو الأمين
سيلين،،، لا مااتعرفت علي للان
سمره،،، اي موهو چان مسافر ورجع
اسماء،، اكيد بما انو انتي جديده اليوم راح تتعرفين علي هو شخص يجنن حلو وشخصيه وهيبه
سمر،،، ستوب يمعوده لتنزلين على الترابي ليسمعج عيب فشله الرجال متزوح وميعبر احد وجدي بعمله ليروح يسمعج ونكلج باي
سيلين،،، ارتب بالأوراق واسمع كلامهن وخبصتهن عبالك رئيس الوزراء جاي مومحامي خبصونه بي بس والله خلن عندي فضول اشوفه
أنبت نفسي... ووو شبيج سيلين شتشوفين بي رجال كبير واكيد كرشه متر كدامه،،، ونص سنونه واكعه وعنده اربع نسوان ودرزنين جهال بس هذني الضاهر من جماعة الواتباد يتسرسحن على شي اسمه شيخ وضابط ارتب بالأضبارات وابتسم على تفكيري رفعت راسي من سمعتهن كالن
اسماء،،، فدوه اليوم جاي بالزي العربي مو بالرسمي شطالع بي
سيلين،، وجهت نضري اتجاه المكان ألي يباوعن علي شفت رجل مو شايب مثل ماتصورت شاب يطلع تقريبا عمره منتصف الثلاثين طويل وجسمه مرتب لابس زي عربي بس كان صراحه جدا انيق وشكله يلمع وفعلا يجذب خصوصا هو بشرته نوعا ما بيضه ولحيته متوسطه الأرتفاع وعيونه من بعيد مبينه حاده وشكله سبحان الله مآلَوٌفُ
لحضه،،، لحضه!!!!!! مو مآلوف هذا اعرفه
معقوله؟؟!! هو لو اني متوهمه؟ لايمكن متوهمه شيجيبه هنا؟ واصلا موكلش يشبه لا والله هواي يشبه بس هذا اضخم واكبر شبيج سيلين قابل يبقى على هذاك العمر؟
لَوٌبًسِ يَتٌقُربً آکْثًر وٌيَباوع بًأتجاهي کْآنِ تٌأکْدت بًسِ لَآ مًا أضنِ هّوٌ
ضلَيَتٌ اقنع نفسي مو هو الى ان سمعت شخص قطع الشك باليقين
_اهلا استاذ سراج
انصدمت وشكهكت!!!!! سرااااج!!؟
_دائما الانسان من يعيش شي ويمر ويصير بالماضي يكولون انسوا لأن الماضي يبقى ماضي وميصير حاضر كل هذا مجرد اقاويل لأن حاضر الانسان صنعه الماضي واني ماضيي ميرضى يعوفني بحالي مصر يلاحقني حتى لو اهرب منه لامفر
سيلين،،، احس اطرافي جمدت وحلكي يبس حسيت راح يصير بيه نوبه قلبيه بسبب ضربات قلبي ألي صرت اسمعها موبس احس بيها
شرجعه لحياتي؟ سنين تناسيت وجوده حاولت امحي من ذاكرتي وأمحي كابوس اسمه سراج ليش قدري ارجع اشوفه وجروحي ترجع تنفتح؟ ليش هي جروحي شفت اصلا منه ومن ألي صار بسببه؟
اسمع البنات يحجن ويايا ويسألني على وضعي ألي تخربط بس مااكدر ارد احس قناع القوه ألي صار سنين لابسته انهار بلحضه
لميت غراضي واخذت جنطتي وطلعت اريد اهرب من هل المكان مااريد اشوفه ولا اتواجه ويا اني وامشي وقفني صوت فؤاد
فؤاد،،، ام سيف وين رايحه؟
سيلين،، توقفت لحضه ورجعت امشي متجاهله سؤاله لكن صاح بصوت اقوى
فؤاد،،،، وين رايحه يمعوده اوكفي مو جاي احجي وياج
سيلين،،، توقفت بس ماعندي الجرئه اندار احس حتى النفس بدا يضيق،،،، فؤاد صار على قرب مني
فؤاد،،، تعالي اعرفج على استاذ سراج الدين صاحب المكتب
سيلين،،، اسمع صوته لسراج يحجي ويا شخص ويضحك
سراج،، ها فؤاد؟
قررت اتجاهل كلام فؤاد واكمل طريقي طالعه من المكتب بس اولا خجلت من فؤاد وثانيا اني ليش اهرب ومرتبكه وخايفه من المواجهه وحاسبه حسابه وخالتله كل هل الاهتمام؟ المفروض هو ألي يحس حساب ألي ويخاف من مواجهتي
قررت اندار وشيصير خلي يصير استجمعت كل قوتي ولبست قناع القوه والتحدي وانداريت اتقدم بخطوات بطيئه هو كان يسولف ويا الشخص ألي بجانبه ومبتسم ويفر بالسبحه على ايده باوع عليه بنضره خاطفه وابتسم رجّعٌ نِضرهّ للشخص و بًحًرکْهّ سِريَعٌهّ رجع باوع بعيوني ثواني واختفت ابتسامته ضل مركز بمعاني وجهي وبعدها فتح عيونه بصدمه!! وٌمًنِ تٌکْلَمً فُؤآدٍ وذكر اسمي وكعت من ايده السبحه
فؤاد،،، شيخ اقدملك المحاميه الجديده ألي انضمت لكادرنه ،،، ست سيلين
سيلين،،، كنت انضر أله بكل جبروت وقوه وهو كانت معاني وجهه عباره عن نضرات صدمه يباوع على عيوني وعلى وجهي وكأنما يحاول يستوعب ألي كدامه فعلا سيلين ألي يعرفها قُطِعت آلَلَحًضهّ مًنِ كتله...
سيلين،، اهلا استاذ
مارد بس صافن بوجهي ونضراته تتنقل بين عيوني
صار الجو متوتر من عدم رد السلام
اكتفيت بكلمة من رخصتكم مشيت خطوتين تاركه المكان وقفني فؤاد وهمس
فؤاد،،، وين رايحه، شنو السالفه شبيج؟
جاوبته بنفس نبرت صوته الهامسه
سيلين،،، مابيه شي ورايحه للبيت
فؤاد،، والشغل؟
سيلين،،، تركته او بمعنى اصح اني مستقيله
فتح عينه مصدم
فؤاد،،، تركتي شنو؟ انتي تحجين صدك؟ شنو هو لعب؟
سيلين،،، ماعاجبني هل مكان ولااريد ابقى بي
فؤاد،،، صار اسبوع وانتي عاجبج شنو ألي صار هسه،،، ام سيف هذا مولعب هذا عمل وانتي هسه جاي تشتغلين على اكثر من قضيه شلون تعوفيهن تريدين تتركين خلصي القضايه ألي لزمتيهن واتركي،،، ميصير
سيلين، مااكدر صراحه اتقبل هل مكان ولاوجودي بي
فؤاد،،، لخاطري سيلين لتفشليني ويا الشيخ اني ألي جبتج هنا وكفلتج لتخليني بموقف محرج خلصي شغلج وعوفي الشغل
سيلين،،، نضرات الترجي بعيون فؤاد حسستني بمدى تهوري وعدم مراعاته وهو ألي كفلني حسيت فعلا راح اخلي بموقف محرج قطع نضراتنه وكلامنه
سراج،،، اكو مشكله فؤاد؟
فؤاد،، لا ابو الأمين ماكو شي
مختار،،، شنو السالفه ام سيف ماصارلج اسبوع ويانه شبساع مليتي منه شنو تريدين تتركين؟ ههه حقج تنهزمين عدنا لود مال شغل انفذي بريشاتج
سيلين،، انداريت عليهم وجاوبت بتحدي
عفوا استاذ مو سيلين ألي تهرب وتعوف احد بنص الطريق
(كلت هل كلام وباوعت على سراج بتحدي وكملت كلامي.).
_بس اخلص الشغل ألي لازمته بعدها استقيل
مختار،،، ليش شنو ألي ماعجبج بمكتبنا؟
سيلين،،، ماكو سبب محدد بس عندي ألتزامات اخرى
سراج،،، ست سيلين يجوز من النوع ألي تحب تشتغل وتترك على مزاجها متكدر تتحمل ضغوطات ويجوز تبحث عن الأسهل
سيلين،،، باوع عليه ورفع تك حاجب اثناء نطقه لهل كلام عرفت كلش زين فهم شنو معنى كلامي وهسه يحاول يرجعليا جاوبته بنفس اسلوبه ..
_ويجوز ابحث عن ألي يناسبني ويكون الافضل
هل كلمه ماكانت مجرد كلمه كانت بالصميم خلت وجهه يتحول حسيته راح ينفجر واني بكل برود
من رخصتكم وتشرفت بمعرفتك استاااذ سراج وابتسمت تك خد باستهزاء ومشيت
رجعت لمكتبي واني كل جزء بيه يرجف حتى البنات ضلن يتسائلن شنو الصار وشنو بيه
اكتفيت بكلمة... صار عندي هبوط
من سمع رائد راح خطيه جابلي بسرعه عصير بارد اشرب وأحس نار بداخلي ماكو شي يطفيها صرت احسب الدقائق والثواني بس حتى ارجع للبيت احس المكان بكبره صار يخنكني مع انو قبل ساعات كنت مرتاحه وقررت ابقى بهل عمل واستمر بس هسه تغير كل شي ماابقى بمكان بي سراج لو اموت
رجعت للبيت واني طِوٌلَ آلَطِريَقُ ماراحت الرجفه من جسمي احس اعصابي تلفت وبديت ارجع مثل قبل
اول مادخلت البيت سألت على سيف كان بًغُرفُتٌهّ دخلت للحمام وصرت تحت الدوش بملابسي اريد بس تطفى ناري واني اعرف ماكو شي يطفيها كان داخلي بركان خامد صارله سنين واليوم رجعت الحمم تثور وتلتهب
نزلت دموعي ويا المي واحس رجّلَيَ بعد متحملني طلعت بدلت ملابسي وتوجهت لسريري احس طاقتي خلصت اريد بس اهدء مااكدر اضطريت اطلع الدوا ألي صار كم سنه تاركته اليوم رجعت اخذه حتى اهدء مددت بفراشي واني اردد..
ليش رجعت؟ ليشششش؟ موكافي دمرت حياتي شتريد مني بعد؟ اني هسه يله بديت اعيش هسه يله ضحكتلي الحياة،، اكرهك وكلمة كره متوصف الشعور ألي بداخلي ألك حقد الدنيا كله شايلته بگلبي ألك ماكرهت ولاحقدت على بشر بكد كرهي وحقدي عليك
بدى العلاج ياخذ مفعوله هدئت ونمت ماحسيت غير الغرفه ضلمه شغلت تيبل لامب ألي يم السرير اخذت جهازي باوعت على الساعه ب١٢ بالليَلَ
گمت من مكاني شعري لأن سبحت ومامشطت تشابك،، مشطته ولميته وطلعت من الغرفه رحت لغرفة سيف لكيته نايم اليوم ماشفته ولاادري عنه اي شي اعرف سميه متقصر ويا بس اكيد لازم اني ألي اتابعه،، كلش ضجت من نفسي بسبب شخص ميسوى اليوم هملت ابني
طلعت من الغرفه نزلت للطابق الارضي رحت للمطبخ احس كلش جوعانه وهاي اكثر صفه اكرها بيه من اضوج اجوع اعرف الناس من تضوج متاكل نهائيا اني عكسهم لهذا صار عندي هوس بالرياضه حتى وزني ليزيد وصرت دائما اراقب وزني من اضوج اخربط بالأكل ويزيد وزني بعدها أضل ايام انزل وزني لأن عندي هوس الرشاقه والوزن المثالي
طلعت شكو اكل بالثلاجه وكعدت اكل اطلع النار ألي بداخلي بالأكل هواي خربطت وخصوصا اني من الصبح للان على العصير ألي جابليا رائد ضليت اكل الى ان نفسي صارت تلعب ماتحملت ركضت للحمام استفرغت كل ألي اكلته وصارت دموعي تنزل ليش مااعرف بس احس بنفسي مقهوره واكو حصره بداخلي
غسلت ولملمت المطبخ ورحت لغرفتي احاول انام لكن ماكدرت للفجر صليت وكنت متوقعه ارتاح بعد الصلاه بس لكيت نفسي اني وعلى سجادتي دموعي تنهمر ومثل كل مره اردد حسبي الله ونعم الوكيل
ضليت الى ان غفيت بمكاني كعدت على صوت المنبه غسلت وبلشت اجهز نفسي رفعت شعري للاعلى ذِيَلَ حًصّآنِ ونزلت خصل من الامام وخليت ميكاب بسيط ماحب الأوفر بس اضطريت اليوم ارسم عيوني لأن منتفخه من البجي خلصت وتوجهت لَلدريسنك روم طلعت قاط اسود رسمي وجوا قميص مخطط اسود وابيض اني صح وره العده نزعت الاسود بس ضليت ألبس ألوان غامقه نيلي واسود مطعم بلون هادء خلصت وطلعت سمعت صوت سيوفي بالمطبخ فتت صبحت ردتلي سميه بابتسامه وسيف اجا حضني
سيف،، مامي واخيرا كعدتي
سيلين،، سوري حبيبي البارحه ماشفتك
سيف،، هواي ضليتي نايمه كعدتج ومارضيتي ضليت كل شويه اكعدج تكوليلي عوفني اكرهك ليش رجعت،، قهرتيني ماما اني شنو سويت؟
سيلين،،، سمعت كلامه وعرفت اني مخبصه بالكلام وماادري بنفسي حضنته اعتذر منه وهو حبيبي متفهم
سميه،، ام سيف كعدي تريكي
سيلين،،، لا عفيه مااريد بالليل خبصت بالأكل للان معدتي توجعني بس اريد كابتشينو اذا تكدرين
سميه،، اي اكيد وراح اخليلج يمه سويت بسكويت بالشوفان صحي اكلي ميضرج لتضلين بلا اكل
سيلين،، تمام،، شكرا
تريكنا وضلينا نسولف على قبل يوم لأن متعودين اني وسيف نشارك يومنا مع بعض شنو ألي مر ويا بالدوام خلصنه و سيف اخذه السائق للدوام
آلَيَوٌمً مًآعٌنِدٍيَ شُغُلَ بًآلَمًحًکْمًهّ لَلَضهّر توجهت للمكتب بعد ماقويت نفسي ولبست قناع القوه لأن ولا ممكن اخلي سراج يشوفني ضعيفه
صبحت على الكل وبلشت اشتغل على احد القضايا سمعت صوت سراج بالممر هو ويمشي سلم وتوجه لغرفة مكتبه انتبهتله اليوم لابس رسمي موزي عربي الزي العربي يكبره بالعمر لكن شكله يبين فخم وهيبه اكثر
اسماء،،، شعجب الاستاذ اليوم هم داوم؟
سيلين،، وشنو يعني غير هو مكان عمله؟
اسماء،،، لا مو هو موكل يوم يداوم بالاسبوع مرتين او ثلاث يجي للمكتب لأن هو مشغول طول الوقت بالمضيف وبعائلته
سيلين،،، ممم
مااعرف ليش من سمعت كلامها ضجت لهل درجه يهتم لعائلته ومخصصلهم كل وقته تقريبا،، ياترى كم طفل عنده اني سمعتلهم ينادوا ابو الأمين وهذا احد الاشياء ألي استفزتني مسمي اسم ابنه الأمين
قطع سلسلت افكاري صوت السكرتيره
_ست سيلين استاذ فؤاد طالبج بمكتبه
اخذت الملف ألي اعرف طلبني علموده لأن اشتغلنا بي سوا وتوجهت لمكتبه طرقت الباب وبعد مااذنلي دخلت
_آلَسِلَآمً عٌلَيَکْمً
فؤاد،،، وٌعٌلَيَکْمً آلَسِلَآمً
سيلين،،، كالو طالبني؟
فؤاد،، اي صح رتبتي وضعج الباجر تترافعين بقضية اريج محمد
سيلين،، اي خلصت وٌمًرتٌبًهّ کْلَ آمًوٌريَ
انتبهت لفؤاد وجها ثكيل عليه
سيلين،،، استاذ فؤاد خيرك احسك ضايج؟
فؤاد،، لاماكو شي
سيلين،، احسك شايل بخاطرك مني
فؤ اد،،، صراحه ضايج من تصرفج البارحه انحرجت وضليت ابرر لأستاذ سراج،،، اني اعرفج صار سنين بس حسيتج البارحه ردت فعلج غريبه وهجوميه يعني اوكي تريدين تتركين الشغل حقج ماكو احد يجبرج بس مو بهل طريقه وبعدين اكو بنود انتي وافقتي عليها من قررتي تشتغلين ولازم تلتزمين بيها
سيلين،،، حقك عليه يمكن تصرفت بطريقه غلط بس.....
قاطع كلامي صوت الباب
فؤاد،،، ادخل
سراج،،، آلَسِلَآمً عٌلَيَکْمً
فؤاد،،وٌعٌلَيَکْمً آلَسِلَآمً اتفضل استاذ،، محتاج شي؟
سراج،،، الضاهر مشغولَ اجيك بغير وقت
فؤاد،، لا تفضل عادي
سراج،،، خلصت موضوع الوكاله
فؤاد،،، اي واستلمتهه بس يحتاج استنسخ هسه دقيقه استنسخ واجيبلكياها لمكتبك
سراج،،، انتضرك هنا
فؤاد،، على راحتك
سيلين،،، راح فؤاد وتقدم سراج جلس على الكرسي ألي امامي كل كلامهم وسلامهم اني مارفعت راسي خاله عيني بالأوراق واقرا وارتبهن ومسويه نفسي مامهتمه لوجوده
سراج،،، الضاهر قطعت عملكم
سيلين،، مومهم
سراج،، جيد
سيلين،، ضل ساكت بس احس نضراته متوجه ناحيتي قطع الصمت ألي مر ثواني
سراج،،، ليش تريدين تتركين عملج معقوله لأن دريتي اني المدير؟
سيلين،، جاوبته ببرود واني منزله راسي...
_ ماعجبني الشغل وأضن من حقي اختار المكان ألى ارتاح بي بعملي ولتتخيل نفسك محور الكون
سراج،،، بس اني سمعت صارلج اسبوع تشتغلين هنا وچنتي مرتاحه ليش من شفتيني قررتي تتركين معقوله وجودي اثر بيج؟
سيلين،،، رفعت وجهي اخيرا
_ههّه ليش انت منو واتأثر بوجودك اوعدمه بس شكلك انت المتأثر
سراج، ليش أتأثر؟
سيلين، خلص بعد شكو دتسأل،،، وبعدين ذهابي من هل مكان بصالحك تروح تسمع مدامتك بوجودي هنا وتاخذ موقف منك
سراج،،، ههّه مدادتي،؟ وتسمع؟؟
سيلين،،، استغربت من اجابته ألي كانت بيها نبرت استهزاء
_ من رخصتك ،،، عفته ومشيت اطلع من المكتب لكن وقفني كلامه
سراج،،، ليش تتهربين مني؟
سيلين،،، وليش اتهرب منك؟ وبعدين كلت سابقا موسيلين ألي تهرب واذا انت حاس بهل شي فهل شي راجع ألك
سراج،،، انتي مشكلتج متريدين تبقين بنفس المكان ألي اني بي واضح هل شي
سيلين،،، ماشاء الله صفه جديده انضافت لصفاتك العضيمه صاير نرجسي بأمتياز،، اصحى شنو خايفه منك مثلا ولا اكلك فعلا ماحابه ابقى بنفس المكان وياك ولا حتى يشرفني
مشيت ووقفتني قبضت ايده على ساعدي نترت ايده...
_هاي شدسوي احترم نفسك شلون تٌلَزٍمً ايدي
شنو هل جرئه؟
سراج،،، موبكد جرئتج انتي شلون تحجين ويايا بهل طريقه لتجاوزين حدودج وتنسين نفسج
سيلين،،، حدودي اعرفها كلش زين بس انت الضاهر ماعندك حدود
سراج،،، ليش ضايجه اذا لزمت ايدج شنو يعني انتي اصلا صايره متحرره ماشاء ﷲ تاركه الحجاب ولبس مولبسج وصاير لسانج فد مره
سيلين،، وانت منو وتقيمني القاضي وراضي انت شكو
باوع عليه بغضب عبالك هل كلمه استفزته
سراج،،،هو لوبي حظ وٌعٌنِدٍهّ غُيَرهّ ميخليج تذبين الحجاب
سيلين،،،لا لهنا وحدك ديربالك تجيب طاريه على لسانك ابو ابني خط احمر مااسمح لأي شخص يتكلم عنه
صار وجها احمر جاوب بغضب...
سراج،،، لهل درجه مهم عندج؟ لهل درجه حبيتي وتدافعين عنه بهل الطريقه؟ ياترى حبيتي لو حبيتي فلوسه؟ آلَيَ عفتيني علمودها وٌخِلَتٌجّ تٌنِسين البينا
سيلين،،، انت اخر واحد تحجي على الطمع واللفلوس،، وبعدين شنو ألي كان بينا مًمًکْنِ تٌذِکْرنِيَ؟ آخِآفُ قصدك الوهم الي كان يجمعنا وطلع سراب
سراج،،، انتي....
فؤاد،، اسف اتاخرت
سيلين،،، مسح وجه وراح كعد
سيلين، بعدين ارجع عندي شغل ثاني
عفتهم ورجعت لمكتلي واني افور اغلي غليان كل عقله وفوكاها يحاسبني روح حاسب روحك
ورا ساعه اجت السكرتيىه وكالتلي استاذ سراج طالبج،،، غلست ماردت اروح
اسماء،، سيلين الاستاذ طالبج لازم تروحين هذا المدير ولازم تروحين
سيلين،،، دست على نفسي وغضبي منه ورحت
طرقت الباب سمعت صوته يأذني بالدخول دٍخِلَتٌ شُفُتٌهّ گآعٌدٍ مترأس مكتبه وٌماسك چكاره بيده آسِتٌغربت لَآنِ آعٌرفُهّ هّوٌ يَکْرهّ آلَجّکْآيَر وٌآبًدٍ بحياته مًآدٍخِنِ
_تفضل استاذ سراج كالو طالبني
كام من مكآنِهّ واندر وكف امامي
سراج،،، اني اعتذر على كلامي عن زوجج ماجنت اعرف زوجج توفى هسه يله سمعت من فؤاد
سيلين،،، مقبول اعتذارك.،، من رخصتك
سراج،،، لتربطين مسائلنا الشخصيه وألي صار بالماضي بالعمل انتي بلشتي شغل ويانا وبعد ألي سمعته من فؤاد وٌآلَمًشُکْلَهّ آلَصّآرتٌ مًؤخِرآ من الافضل انو تستمرين ويانا
سيلين،،، مااعرف شنو ألي سمعته بس احب اوضحلك شي اني صح ابو سيف توفى بس آنِيَ مااحتاج لأي مخلوق بشري فماكو داعي تعطف عليه لأن اني موبحاجه احد
سراج،،، انت ليش هيج صايره هجوميه وعدائيه بتصرفاتج وكلامج؟ وليش تفسرين كلامي على مزاجج؟ عن اي عطف تحجين انتي متغيره ألى درجه صرت مااميز اذا انتي سيلين ألي عرفتها لولا كل شي بيج مختلف ماضل شي من سيلين القديمه غير بس عيونج وحتى نضرتها متغيره
سيلين،،، ههه،، برافو واخيرا فهمت ألي گدامك موهذيج سيلين ألي عرفتها
سراج،،، چنتي مختلفه،، هادئه،، بسيطه،، وخجوله متعرفين حتى تٌجّآوٌبًيَنِ بًسِبًبً آرتٌبًآکْجّ حتى ألي يتغير ميتغير لهل درجه انتي صايره وحده ثانيه اويمكن هذي حقيقتج واني ماعرفتج زين
سيلين،،، اذا قصدك على هذيج سيلين الساذجه البريئه الطيبه ألي الكل استغلها فأحب اكلك الكدامك وحده ثانيه اما هذيج سيليَنِ ماتت وأندفنت وخلو فوكاها تراب يا جناب الشيخ سراج الدين
عفته وطلعت رجعت لمكتبي والغريب هم رجعت الرجفه بجسمي والمشكله مااكدر ارجع على علاجي لأن يأذيني واني ماصدكت خلصت منه
ضلينا نشتغل وصار وقت الغدا اني جايبه بوكس صغير بي فواكه اكلت منه ورجعت لعملي واسماء طلعت حتى تاكل ورجعت احنا ونشتغل لمحت وحده دخلت تمشي بالممر طويله
اسماء،،، اليوم ست ميساء داومت
سيلين،،، منو هاي ماسايفته هنا؟
اسماء،،، محاميه واختصاصها جنايات وتصير گرايب الشيخ و چانت مجازه
سيلين،،، مممم،،، من هذا تمشي بثقه
اسماء،،، الكل هنا يحسبلها الف حساب
سيلين،، لأن قريبة الشيخ؟
اسماء،،، الحجي بينا هي موبس قريبته احسه مگرشه علي ومتحب احد بينا يوصل اويحجي ويا تحسين عبالك ملكهه
سيلين،،،شنو مافهمت هو مومتزوج؟
اسماء،،، صح سامعين بي متزوج وعنده اطفال بس ولامره شايفين عائلته بس نسمع وبعدين هو شيخ وتعرفين اكثر الشيوخ ميبقون على زوجه وحده وٌيَمًکْنِ لَهّذِآ مًتٌوٌقُعٌهّ يَتزوجه عٌلى مًرتٌهّ
سيلين،، كلامها اثار فضولي وماتحملت من غير ماأسألها
_يعني هو هم يريدها بينهم شي؟
اسماء،، مااعرف بس مااضن لان هي لازكتله ومن تشوفه تصير تتموع وهو حتى ميباوع بوجها من يحجي وياها بعد مااعرف،،،، اروح اجيب چاي تريدين؟
سيلين،،، لا شكرا
مممم،،، استاذ سراج الدين المحترم طلعت موخالي وراك بلاوي همزين ماتورطت بيك ويدور احترام ابو الأحترامات ويدور وين ماكو وحده حلوه البنيه شكلها تقريبا تشبه الممثله ساره البحراني بس سمارها قوي ويطلع عمرها تقريبا منتصف الثلاثينات قُريَبًهّ لَعٌمًر سِرآجّ
رجعت اسماء وحولولي شخص عنده استفسار على قضية حضانه وضلينا نتناقش بس ماعجبه كلامي من سمع القصيه لصالح طليقته خله وطلع دخلت هاي المحاميه ألي اسمها ميساء شمرت ملف على مكتب اسماء بطريقه غير محترمه
ميساء،، كومي بسرعه استنسخيلي هذني وجيبيهن لغرفتي بسرعه موتنامين
سيلين،،، عقدت حاجبي واني اشاهد قلة احترامها بالنهايه اسماء هم محاميه مبتدئه بس مومن حقها تعاملها بهل اسلوب
_اكلج اسماءشنو السالفه ليش هيج تصرفت؟
اسماء،، عادي هي دائما هيج وأحنا مجبورين نسكت اخاف ننطرد
سيلين،،، وليش تنطردين حالج حالها بهل مكان
اسماء،، اني مبتدئه وهي محاميه ناجحه وگرايب المدير اي تصرف اكيد اني ألي انطرد قابل راح يطرد كرايبه واني محتاجه لهل شغل ورايه عائله
خلي اروح بسرعه لتسويلي سالفه
سيلين،،، كلش انغثيت من الصار وكلش كرهت هاي ألي اسمها ميساء السحاره اي والله جاي الاسم عليها فيت ام البلاچم النفخ نافختهن 10хl اووڤر بشكل
آوٌفُ،،، شبيج سيلين من شوكت تنغثين من هيج نماذج وتخليهن ببالج ياترى انغثيت من تصرفاتها لو لأن كرايب سراج لو لأن....
لا لا طبعا شنو واذا بينهم شي اصحي سيلين طبهم مرض ثنينهم اصحي،،،، صرت مثل المجنونه اسأل واجاوب نفسي
خلصت شغلي ورجعت هلكانه وفوكاها طلع سيف عنده املاء صرت ألطم كعدت درسته وتعشينا كعدنا اني وابني نسولف استمعله شنو صار خلال يومه وانبهه اذا بدر منه تصرف غلط واثني علي اذا تصرفه صح
ثاني يوم كان عندي شغل بالمحكمه ترافعت عن موكلتي واخر لحضه تحولت القضيه ضدنا وانتهت انو القاضي حكم بتأجيلهه،،، انجلطت اني اريد اخلص مووقت تأجيل طلعت من المحكمه روحي بخشمي رجعت للبيت تغديت وسبحت وبدلت ورحت للمكتب احس كل ماافوت المكان گلبي ينقبض كارهه شوفتي ل سراح بس مجبوره اتحمل
سلمت على الجميع وتوجهت لمكتبي سلمت على اسماء وكعدت شويه ودخل شخص كبير ويا بنيه صغيره
_السلام عليكم
سيلين،،، وعليكم السلام تفضل
_كلولي روح على ست سيلين
سيلين،،، اي اني تفضل بشنو اكدر اساعدك
_والله يابنيتي اني جاي اريد ارفع قضيه على رچل بنتي اريد اطلگها منه
سيلين،،، اكدر اعرف شنو السبب وشكد صارلها بنتك متزوجه؟
_ اني صار ١٠ايام متزوجه
سيلين،، شنوووو ١٠ ايام وتريدين تطلكين؟؟؟ ماما انتي بعدج صغيره شنو هاي؟
_ استاذه اني اتزوجت زواج تقليدي اجوي خطبوني وشفته مناسب ووافقت آلَعٌيَبً آلَوٌحًيَدٍ جّآنِ مًتٌزٍوٌجّ وٌمًطِلَکْهّه سِآلَنِآ عٌلَيَ وطِلَعٌ زٍيَنِ وصار النصيب حتى خطوبتنه جانت تقليديه موعلاقه قويه بينه الكل كالي ورا الزواج علاقتكم تقوى بس ألي صار تزوجنا وتم زواجنا من اول يوم
بس معاملته ألي كأنما جاريه من اول يوم يتأمر وينتر مشيت عادي كلت يجوز اكو شي مضوجه رغم بتصرفاته كسر فرحتي وراها صار النهار كله عايفني ويجي نص الليل. يلف راسه ينام يكعد الصبح ينتر كومي سويلي ريوك ونص الليل يدفرني كومي سويلي عشا وهذا كله اتحمل حجيت ويا عمتي تكلي تحملي كل الرياجيل هيج اني ماشفت هل شي بحياتي لاابويه سوا ويا امي هّيَجّ وٌلَآ حتى اختي متزوجه زوجها يحترمها سكتت وتحملت معاملته وقلة احترامه بس بيوم السبعه صارت تحضيرات وتعب تعرفين سوالف السبعه وهوستها
سيلين،،، اي،،،، كلتلها اي واني اصلا ماسويت سبعه ولااعرفها شنو
_من تعب حفلة السبعه نمت ماتحملت التعب اجاني نص الليل كعدني كومي سويلي عشا اني بحلات نومتي ماكدرت حتى اجاوبه من التعب ماحسيت غير بهجوم عليه يضرب ضرب مال موت احاول احمي نفسي وافهم ليش هيج يسوي بس سألته ليش هيج صار يسب ويغلط ويضرب هذا كله واهله ماتدخلوا ولاأهتموا وجهي مثل ماانتي دتشوفي زورگ من الضرب قررت اتصل على اهلي لأن الموضوع زاد عن حده لكن تراجعت كلت لازم اتحمل مترهم ورا اسبوع ارجع لأهلي زعلانه دست على نفسي الى ان سمعته البارحه يكول لأمه اني رجّعٌتٌ مًرتٌيَ لَأنِ آحًبًهّآ وهاي ألي ورطتيني بيها انتي حيري بيها لأن مااريدها اني
دخلت عليهم كتله شلون تٌرجّعٌ مًرتٌکْ آنِتٌ مًوٌ وٌعٌدٍتٌ آهّلَيَ مًتٌرجّعٌهّآ آهّلَيَ وٌآفُقُوٌآ لَآنِ وٌحًدٍيَ مًآکْوٌ وٌيَآيَآ ضرهّ وٌبًعٌدٍيَنِ ماصارلنه، ايام متزوجين شسويتلك وهيج تعاملني؟
يكلي هذا الموجود عندي بكيفي انتي امي جابتج حًتٌى آنِسِى طِلَيَقُتٌيَ بًيَجّ بًسِ مًآنِسِيتها آني احًبً مًرتٌيَ وٌرجّعٌتٌهّآ وٌهّذِآ آلَمًوٌجّوٌدٍ
عاتبت عمتي تكلي اتحملي واذا تزوج،، كلتلها صار اسبوع يعنفني وانتي ساكته ليش ورطتوني اذا هو مارايدني تكلي شسويلج
سيلين،،، صارت تبجي المسكينه
لا اله الاالله شنو هل بشر ادري تريد وحده ثانيه ليش تكسر بنت الناس؟
كمل ابوها....... والله يابنتي مااعرف شنو اكول يكولولها لوتتحملين لو اذا تريدين طلاك تتنازلين عن كل حقوقج كوليلي حق،، باطل ألي صار ويا بنتي شنو ذنبها بعمر الورد عروس بعدها الحنه بيدها يَضربًهّآ غُشُوٌنِه وٌضحًکْوٌآ عٌلَيَنِهّ وٌلَآزٍمً نِسِکْتٌ لَآنِ يَعٌرفُوٌنِ بًيَنِآ نِآسِ عٌلَى کْدٍ حًآلَنِآ
سيلين،،، عمي شتأمرني اني حاضره
ارفعي قضيه مابقيها يمه بنتي موزايده عليه ولا متعاجز من لگمتها ابيع حتى ملابسي واصرف عليها منريد منه شي بس اريد راحة بنتي حتى لو كل الناس توكف ضدنا وتحجي علينا مااخليه يمه ولايوم احنا صح على كد حالنه بس مومعناها يذلونه ويدمرون حياتها لأن هم عدهم
سيلين،،، كلامه خله غصه ببلعومي هذا الاب الحقيقي هذوله الأهل ألي الواحد يتباهى بيهم مو اهلي،،،.جاوبته..
_عمي الله ينطيك الصحه والعافيه ويعوض بنتك ويا الشخص ألي يستاهلها ولو كان المفروض تتأكدون منه يله تنطوا
_سألنا علي سوا ألنه نبي وهو مابين بالخطوبه بعدين طلعت حقيقته
سيلين،،، والله ياعمي الخطوبه عباره عن تمثيليه واحد يمثل على الثاني وكلمن يطلع احسن شي بي ورا الزواج بالعشره ينكشف كل شي المفروض الواحد مينغر بالبدايات
_اي صح
سيلين،،، قضيتك يمي وشيباتك،،، ودموعج اسحله ألكم سحل واطلع حقوقج من عيونه واخلي عبره لكل شخص يفكر يلعب بحياة بنات الناس
آنِتٌيَ شُنِوٌ آسِمًجّ؟
__حًوٌرآء
وهسه يَآحًوٌرآء اول شي تسوي على هاي الكدمات تروحون تسولي تقرير طبي يثبت تعنيفج واطيحلكم حظه واخليهم يتوسلون بيكم حتى ترضون عليهم وينفذولكم كل شي وهم الممنونين
_ بنتي بالنسبه للأتعاب اني...
سيلين،، عمي عوف سالفة الأتعاب هسه
_لابنيتي اريد اعرف راسي من رچلي هسه حتى احسب حسابي
سيلين،،، اريدك تروحون تسوون ألي كلته ولتفكر بالأتعاب ولتشيل هم عود اذا ربحت القضيه وأخذت حقوقها اخذ منكم تمام متفقين
_الله يرضى عليج بنتي ويوفقج
سيلين،،، راحوا وأني داخلي يغلي اشبع قهر على هيج حالات شنو ذنبه يضحك عليهه ويكسرها والمجتمع يحاربه وتنحسب عليه زواجه
اسماء،، اكلج سيلين ميصير هذا تصرفج كان المفروض تتفقين على الأتعاب مقدما
سيلين،،، ميهمني هل شي
اسماء،،، هذا رزقج وعلى هل عمل عيشتنه واكيد انتي موحره لأن مومكتبج الخاص وألهم نسبه من الشغل
سيلين،، ابتسمت، لتشيلين همي حبيبتي
عندي اوراق محتاجه استنساخ رحت استنسخ خلصتهن وتوجهت للمكتب وقفتني ميساء السحاره،،، مًدٍتٌ آيَدٍهّآ بًيَهّآ آوٌرآقُ
ميساء،،، هاي الاوراق يرادلهن استنساخ يله بسرعه؟
سيلين،،، باوعتله هاي من كل عقلها تتأمر عليه عبالها اسماء وغير اسماء متدري اسحلها هي وألي متگوايه بي جاوبتها ببرود
_اي هذيج الأله روحي استنسخي اني خلصت
ميساء، انتي هبله لوتستهبلين اني ماجاي اخذ اذنج جاي ائمرج يله استنسخيهن وجيبيهن لمكتبي
سيلين،،، ليش انتي منو وتأمريني؟
عفتها راجعه لمكتبي عاطت بصوت...
ميساء،،، هييي،،، اشو انتي مومحترمه شلون تعوفيني وتمشين واني احجي وياج
سيلين،، وكفت وكتفيت ايدي وابتسمت باستفزاز واستهزاء ،،، سويت هل تصرف لوتخبلت
صوتها ارتفع اكثر وعلى اثره طلعوا سراج ومختار وفؤاد من مكاتبهم يباوعون تقدم سراج عاقد حاجبه
سراج،،، هاي شكو شنو الصاير هنا؟
ميساء،،، هاي الجديده ألي مااعرف شنو اسمها تجاوزت عليه شيخ هيج نماذج شنو جايبيهن هنا علم،،، فهم،،، شلون عينتوها وهي حتى متحترم تجاوزت عليه لأن كلتلها استنسخيلي وياج
سراج،،، وهذا مبرر حتى يرتفع صوتج ست ميساء؟
ميساء،،، تجاوزت عليه
سراج،،، شلون،،، وٌشُکْآلَتٌ؟
سيلين،،، صارت تمتمت واني على وكفتي مبتسمه
اي ست ميساء جاوبي للشيخ بشنو تجاوزت عليح
ميساء، ساكته
سيلين،،، انتي فكري وجاوبي واني رايحه عندي شغل من تنتهي هل المهزله وينعرف منو الصح ومنو الغلط عود صيحولي
حجيتها وباوعت على سراج نضره ورفعت نضري على الكامره المسلطه على المكان ألي بالأساس متصله بشاشات بمكتب سراج انتبهتلهن من رحت لمكتبه
_من رخصتكم
اكتفيت بهل كلمتين ومشيت خطوتين صاحت عليه
ميساء،،، هييي،، انتي،،، اشو متحترمين شلون تعوفينه وتمشين هسه متحترمينه على الاقل احترمي الشيخ
سيلين،،، لا هنا وفاضت بيه مااكدر اتحمل اكثر انداريتله ومشيت بخطوات باتجاهه وباوعت بقوه وتحدي
_باوعي بوجهي زين وانتبهي ألي كدامج مو وحده من ألي يوميه تجاوزين وتتأمرين عليهن وبسكتلج لأن يخافن يفصلوهن من عملهن وهن محتاجات للوضيفه اني ماعندي شي اخسره وماعندي لحيه مسرحه من تحجين ويايا احترمي ألي كدامج لااشوفج قدر نفسج والله ليشوف احد وجهي الثاني،، سكتتلج بمزاجي وانتي صار ساعه تتجاوزين وهسه جاي تتلوكين ومسويه نفسج مهتمه لأحترام الشيخ ألي بالأساس لو خاله أله احترام متعاملين الموضفينِ مًآلَتٌهّ بأستحقار كله لأن انتي كرايبه،، احنا هنا موضفين موعبيد عندج وعند غيرج تمام ست مًيسِآء
باوعت على سراج...
_شيخ سراج اني ماراح ألف ولاادور واكذبها وتكذبني انت تكدر تعرف الحقيقه وميحتاج اكلك شلون،، قبل شويه عديت الموضوع وسكتت بس هسه لا اريد حقي ومنك انت لأن هي نافخه نفسها على الكل لأن گرايبك آنِتٌ وبما انو تخصك يعني صورتها صورتك بهل مكان
ميساء،،، انت شنو من صلافه شايله شلون تحجين ويانا بهل طريقه شلون تحجين ويا الشيخ هيج دوواين متروسه زلم توكف احترام أله وانتي كاعده تهددي
سيلين،،، من رخصتكم
عفتها تبر بر وحدها ورحت للمكتب
اسماء،،، خرب عرضج سيلين ولج هاي شنو شسويتي؟ بشرفي سحلتي كرامتها ذهابا وايابا سويتيها مضحكه فوختي گلوبنا كلنا بيها
بس خايفه يفصلوج بعد الصار
س،، لتخافين ماانتضرهم يفصلوني
اسماء،،، شلون يعني،، شراح تسوين؟
سيلين،،، ألي لازم يصير
كعدت كتبت استقالتي لأن صدقا بعد مااتحمل ماكافي علي سراج انوب گرايبه
اقل من نصف ساعه وطلبني لمكتبه اخذت الاستقاله ورحت
طرقت الباب ودخلت لكيت سراح كاعد مترأس مكتبه ومرجع ضهره على كرسيه وشابك اصابع ايده ونضراته بارده لكن وجهه غاضب واحمر واستاذ مختار على جها من شافني ابتسم مجامله وميساء واگفه وجها يلطم لوتشد حيلها شويه تنفجر
_تفضل استلذ گالو طالبني
سراج،،، تفضلي استريحي
سيلين،،، رحًتٌ کْعٌدٍتٌ
مختار،،، ست سيلين احنا دزينه عليج حتى نصحح سوء الفهم ألي صار بينكم انت والست ميساء بالنهايه انتو زملاء وعادي تصير مواقف محرجه واختلاف وجهات نضر
سيلين،،، بس ألي صار مو سوء فهم ولا اختلاف وجهات نضر وأنما قلة احترام للاشخاص ألي يشتغلون عدكم وأضن سمعتو وشفتوا ألي صار ليش للان مصرين توكفون ويا الباطل؟
باوعت على سراج بدى الغضب كلش واضح علي كملت كلامي..
_استاذ اضن احنه هنا بمؤسسه تتضمن عدت اشخاص وضيفتهم تقريبا متشابه بغض النضر عن الأعمار وسنوات الخبره بس كلنا ناس دارسين وجاين هنا نساعد الناس في تحقيق العدل واخِذ حقوقهم وركزلي على كلمة العدل وخليلي جواها اكثر من خط،، زين شلون نحقق هل العدل واحنا هّنِآ بًآلَآسِآسِ مًآمًطِبًقي وٌلَآمًعترفين بي
مختار،،، ست سيلين لتكبرين الموضوع
سيلين،،، وهذا ألي اقصده لو صاير العكس واني ألي متجاوزه هم كان جوابكم لتكبرين الموضوعٌ؟
وين العداله ألي المفروض نطبقها هنا قبل لنطبقها على ألي بخارج هل مكان وين العدل من شخص يستصغر الموضفين بس لأن گرايب المدير،، يجوز هل شي طبيعي بهواي اماكن بس ماتصورت اشوفه بهل مكان يااستاذ سراج لأن انت موبس محامي انت شيخ وكبير عشيرتك والمفروض تأمر بالمعروف وتنهى عن المنكر صح لواني غلطانه؟
(باوعلي مصدوم بجرئت كلامي لكن مانطق)
_ولأن مالكيت العدل ولا الأحترام بهل مكان فبعد اني ألي ميشرفني ابقى بي وهاي استقالتي
قدمت الأستقاله اله قطب حاجبه وهو يباوع على الورقه
_بالنسبه لعملي ياريت لوترشح شخص يستلمه عني
كام سراج من مكانه وصار امامي
سراج،،، كلتي كل ألي عندج وقررتي تستقالين وهل شي خاص بيج بس ماراح تطلعين من هل مكان وانتي ماخذه نضره غلط علينه وعلى مؤسستي على گولتج
احترامج محفوظ ومن الجميع وبالنسبه للعدل صارت مشكله وست ميساء غلطت بحقج ومن العدل وهذا اقل شي انو تعتذر على تحاوزهه
ميساء،،، شنووووو،،، ليش اعتذر اني مامسويه شي غلط
سراج،،، تعتذرين منها ومن كل شخص قللتي من شأنه وتجاوزتي علي انت صح گرايبي بس مااسمح لأي شخص يتطاول على اي موضف عندي وحتى اني مااسمح لنفسي اغلط بحق احد والدليل قبل يومين ثكلت بالكلام ويا ست سيلين واعتذرت
موغلط الأعتذار ميقلل من شأنه ولاقدرنا الغلطان يعتذر وهذا الطببعي صح كلامي ست سيلين؟
سيلين،، صح،، واني بوقتها قبلت اعتذارك
سراج،،، سِتٌ ميساء اعتذري
ميساء،،، اني،،، اني يعني،،، عذريني جنت معصبه وصارت بوجهج
سيلين،،، مقبول اعتذارج بس ياريت بعد ميتكرر هل شي
فتحت عينها بصدمه ووجها راد ينفحر...
سيلين،،، طبعا مااقصد عليه لأن اني خلص استقاليت بس قصدي على بقية الموضفين اسماء وفاطمه وسحر وغيرهم لأن الموقف ألي صار ويايا اليوم كل يوم يصير وٌيَآهّمً مًنِ قُبًلَ حًضرتٌجّ وساكتين حتى ليخسرون عملهم
باوعلها سراج بغضب وهي ارتبكت ووجها صار ينطي الوان
سراج،،، سيلين اضن رجعلج تقديرج واحترامج وحققنا العدل بس بقت شغله وهاي محسوبه عليج
ألتفت عليهم وكال
سراج،،، تكدرون تاخذون راحتكم وتروحون لعملكم
طلعوا ثنينهم...
سراج،،، حققنالج العدل ورجعنا تقديرج بس صار دورج تعتذرين انتي
سيلين،، تكتفت،ـ،، وليش بلله
سراج،،، مو من حقج تكولين ميشرفني ابقى بهل مكان
سيلين،،، طبيعي احجي هيج واني اشوفكم تريدون تلمون الموضوع ولاكأنما سوت اي شي ولاتجاوزت
سراج،،، بس رجعلج حقج
سيلين،،، كلامي كان قبل لتحل الموضوع ومن الواضح جدا ماكنتو ناوين تنصفوني
سراج،،، انتي سبقتي الاحداث وفهمتينا غلط
سيلين،،، رفعت تك حاجب وجاوبت بتحدي
ألي يلتزم السكوت بالوقت ألي المفروض ينطق ماكو داعي يلوم الناس اذا فكرته اخرس اوفهمته غلط لهذا السبب مومني اني آلَغُلَطِ آنِيَ تٌکْلَمًتٌ بًعٌدٍ مًآشُفُتٌکْمً سِآکْتٌيَنِ وماعليه عتب ولاواجبي الاعتذار
(سرح بوجهي وضلت نضراته تتنقل بين عيوني تكلم بطريقه حالمه)
سراج،،، شوكت كبرتي وهيج تغيرتي وصرتي بهل قوه صرتي تاخذين حقج بأيدج وتواجهين اكبر واحد وين هذيج المراهقه ألي بعيونها برائة الكون كله وينها وهي يوكعوها بالطيين والمطر يزخ عليه وماعدها طريقة دفاع عن نفسها غير دموعها
ونضرات عينه البريئه
البرائه ألي لليوم اشوفها بعينج رغم نضراتج الحاده شُنِوٌ آلَيَ صّآر وٌقُضى عٌلَى آجّمًلَ قُصّةّ حًبً؟؟؟
.
.
.
فعلا شنو الي صار بين سراج وسيلين؟؟؟
