رواية بيت البخت الفصل الثالث 3 بقلم اريج البغدادي
لمَحتُكِ أهذهِ عَينُكَ أم وَرق النَخيل
لمَحتُ فَي خَدِكَ وردَتين
لَم أنَسى لم أتَخطى هَاتَان الحَسنين.
ألتفت بتوتر من شفت رجال واكف ومكتف أيده
سيد عباس: ليش تسألين؟
-دُرر بتلعثم: ها؟ لا بس هاي، دا احجي وي زينب
-سيد عباس: هااا زينب بنت عمي، لا ما مزوج واني هم مامزوج على فكرة
ضليت صافنة عليه شو هذا مكلكل ورحت امشي سريع وكفت قريب من امي ووردة ومتوترة على خجلانة وأسمع صوته يتكلم بصوت عالي
-سيد عباس: أه؟ هيج الحچي چا روحي متزوج، وينج تعاي هاي عيونج لو عدسات خرب هُبل
رجع عباس وهو يضحك للموكب
(الموكب)
-سيد ضَهير: لك عببييس وينك مو اصيح
-سيد عباس: خاب ها اجيت اجيت
-وين جنت مو كلتلك تغسل الجداري
-يمعود يعني كل جدر شكبره بس عباس يغلسهم
-اغسل واسكت فشلتنا بسوالفك عبالك زعطوط
-لا ما توقعتها منك ضَهير عود انت الجبير وهيج تكول وسفه والله وكت صاروا يغارون من السيد عباس
ضل عباس يضحك عليهم وينفرزهم
-دُرر
خلصنة سلام وتوادعنا أحنا وجوارينه بيت ابو مهمين ووالدتي تعرفت على أم ضهير
ردنا نطلع وقاطعتنه أم ضَهير
-أم ضَهير: ما شاءالله أم دُرة هذن بناتج؟
-أم دُرر: أي عيني بناتي
-أم ضَهير: يابعد عمري يحفظهن الج الكاظم ماشاءالله الله شحلاتهن
-أم دُرر: الله يسلمج حبيبتي ويحفظلج الويلاد
طلعنا من الموكب وجانت أكو حديدة ببدايه خيمة الموكب الي بصف المكان اليخدمون بي الولد، مشينا اني ووردة دنسولف عثرت وردة بهل حديدة وجرت عباتي ووكعتني وياها كدامهم ووجهنا صار طماطة وتمنيت اسوي نفسي ميته بهل لحظة
سمعت نفس صوت الرجال المكلكل يكول
-سيد عباس: الله الله الزهرة سلامات سلامات
ووردة لزمتها فرط ضحكة وجيب اليسكتها واني ما تفشلت غير من عباس اليركض ورانة وبذات وراي، مشينا ليكدام شويه وسمعت همس وراي يشبه صوت سيد عباس
-سيد عباس: هذا بختي عثرج اي والله حوبتي
اني التفت لكيت سيد عباس يلف بالراية وبوجهة ابتسامة خفيفه ورجع دار وجها على الولد وصار يخزر، عموماً اني عرفته هو بس غلست اخذت وردة رزايل طول المشايه، والي غثني هيه ما همها تضحك ومستمره تكول عادي هاي شبيج واذا
-دُرر: لج بابا مو على الوكعة على شكلي من جريتي العبايه وصار وجهي صفح
-وردة: ههههههههههه بالقرأن الصراحة غير؟
-دُرر: أييي؟
-وردة: يخزي، وحتى هذا ابو غترة الخضرة التباوعيله ضحك عليج ودار وجهة
تفشلت أكثر وكلبي كام يدك سريع وضجت كلش، كلتلها بصوت عالي
-دُرر: لعد ماشفتي وجهج ليكول ضفدع
-أم دُرر: صوتجن نصنة لا اكتمة الجن بطريقتي
سكتنة وضلت حسرة بكلبي يامن نرجع للبيت واجعص وردة على هل فشلة،
(الموكب)
-ضَهير: زينب خويه
-زينب: ها ضَهير
-ضَهير: سؤال
-زينب: اي كول جواب
-ضَهير: هذن الطاحن جوارينكم مو؟
-زينب: ههه اي جوارينة بس كُلش حبابات والله ابوهن قيصر ابو حيدرة الي سلم على والدك
-ضَهير: ماكتلج سولفيلي قصة حياتهم، بس
-: قاطعهم عباس
-سيد عباس: زين سؤال عليج العباس
-زينب: كولل
-سيد عباس: ها لمن وصلت الي كامت تشمرها الحچايه
-زينب: لاوالله ديلا احجي
-سيد عباس: بس كليلي هاي عيونهن لو عدسات؟
-زينب: لا عيونهن
-سيد ضَهير: وانتَ شعليك؟ بعدين انة شفتك واكف وره هاي شسمها
-زينب: دُرر
-سيد ضَهير: أيي، شعندك خوما حجيت شي مابي خير؟ تره بالعباس اجرم بيك النه سمعتنة عبييس
-سيد عباس: لا يمعود لاوالله شسالفه بربك توصل بيه الهل درجة برأيك؟
-سيد ضَهير: اي عفية عبالي
-: راح السيد ضَهير يكمل خدمة
-سيد عباس: حجيت وياها
-زينب: الله عليك؟ شكلتلها خرب يومك
-سيد عباس: والله كلتلها بس شسمة، بس هاي عيونج لو عدسات
-زينب: يا عبيس صدك انتَ ماتستحي
-سيد عباس: شمسويلها يمعودة بعدين هيه الحجت ويايَ بالبداية
-زينب بتفاجئ: هيه؟ ليش تجذب
-سيد عباس: واخو زينب هيه سألتني هذا غريب الاطوار متزوج كلتلها لا
-زينب: وانتَ عرفته منو؟ حتى اجاوبها
-سيد عباس بأبتسامة: لا
-زينب بملل: عبيس روح منا لا يسمعك اخوك ضَهير ويخنكك بالغترة هسه والله
راح عباس وطلع يتمضحك ولا كأنو مسويله شي، انتهت الخدمة وخلصت الزيارة وكالتلي زينب بخصوص الي صار كُلة
(بيت السيد ابو ضَهير)
-أم ضَهير بحزن: يمة ضَهير أبني شوكت تتزوج بعد؟
-سيد ضَهير: ها يمة رجعنة على هذا الموضوع
-أم ضَهير: مو علمود شيء بس العالم شتكول علينه أبني، يعني أخوتك الاصغر منك سلام وفرهود متزوجين وانت بعدك، يعني شنو تريد عبيس يتزوج قبلك حتى العالم تاكل وجهنا؟
-: بهمس
-سيد ضَهير: لاحول الله ياربي
-: ذب الغترة شال السجادة والكتاب وصعد الغرفتة
-أم ضَهير: هاهيه هذا الفالح بي تقرة بهل كتاب وتصلي وكلشي مشايفه منك، بس صدكني ضَهير اذا متت وماشفت احفادي منك فلا أرضى عليك
-سيد سلام: يمة عوفيه على راحته يجوز يحب يجوز شايف امرأة بس يحس الوقت مو مناسب
-أم ضَهير: أي يمة بعد شوكت يجي الوقت المناسب اذا هسه هوه عمرة 27 ماضل شي ويدخل 28
-سيد سلام: يمة كولي يالله هسه تفتحين وتغمضين تلكين احفادة مايخلوج حتى نوم تنامين
-: دمعت أم ضَهير وكالت بحسرة
-أم ضَهير: يمة والله ضلت أخر امنياتي هيه زواج أخوك ضهير وعباس واشوف احفادي منهم يلعبون ويه بناتكم روان وهُدى
-سيد سلام: ان شاءالله يمة ان شاءالله والله رح احجي وياه واحاول بكد ما بيه واحنا صارلنا هواي مفرحانين
-سيد عباس: ها سمعت مواضيع تخص الزواج ؟ ياريت تزوجوني بعد هم يلا
-سيد سلام: دنجب لك نريد نزوج أخوك نشوف شنو قصتة بلا ليش مايتزوج
-سيد عباس: اني اكلك، والله يريد مرة خاليه من الملامح والتصرفات وهو يخليهن الها على مزاجة شلون ميريد
-: ضحكوا بصوت عالي ويه ما نزل سيد ضَهير
باوعلهم بنظرة أستغراب حادة وطلع
-سيد سلام: وعلي بيك بخت ما سمعك عبيس جان حطك هنا وداسك وحگ علي
-سيد عباس: شهل رعب متكلي، أوفف شلون ويه ضفيرة أحنا
-سيد سلام: ضفيرة منو؟
-سيد عباس: أخوك ضَهير يعني منو مثلاً
-سيد سلام: هلو هلوو وتصيح الفرهود نمرود وهسه الضهير ضفيره وعلي يجنزوك اذا سمعوا
-سيد عباس: وشنو خايف مثلاً
-سيد سلام: ضَهيررر وينك ضَهير عيني تعال اسمعلنا عبيس شيكول
-سيد عباس: لا مشي عليك الزهرة لاتكله
-سيد سلام: ها چا وين الحجي المشمر
-سيد عباس: غلطة ومنك سماح
-سيد سلام: دكوم يلا من وجهي اريد احجي وي امي كوم
-سيد عباس: رايح رايح
-: يقرأ سيد ضَهير بكتابه المفضل بمضيفهم ومتألق ومرتاح على أخر تكة
وبمقاطعه عبيس
-سيد عباس: هلا بأخوي وحبيب ألبي
-: رفع راسه سيد ضَهير ورجع يقرأ
وبصوت ناصي
-سيد ضَهير: هلا
-سيد عباس: ها شو الهلا مشمورة
-: و بوجه زعلان لان يعرف غلاتة عند أخوه الي مربيه
(ملاحظة |سيد ضَهير هو المربي سيد عباس فـ عبيس متعلق بي وبنفس الوقت يخاف من عنده)
-سيد ضَهير: كول عبيس من النهاية شتريد
-سيد عباس: والله ماريد شي أريد اكعد يم اخويه بيها شي؟
-: طبك الكتاب سيد ضَهير ورجع باوع الأخو
-سيد ضَهير بهدوء: سولف عباس
-سيد عباس: ضَهير عادي أسالك وماتضوج
-سيد ضَهير: أني ضجت منك بيوم؟ لا يلا احجي
-سيد عباس: فدوة أروحلك، اكول ضهير ليش ماتزوج؟
-سيد ضَهير: ماعرف ما لكيت المرة التعجبني وخصوصاً بهذا وكت
-سيد عباس بتعجب: يعني شتريد بالضبط بالمرة ضهير فهمني والله امي اتذكر جابتلك احلى نسوان وانت رفضت
-سيد ضَهير: ماعجبني ياخي يوكفن عضمة بالبلعوم
-سيد عباس: اكول، أنت شنو رأيك ببنات جوارين بيت عمنة مهيمن؟
-سيد ضَهير: ياهنَ؟
-سيد عباس: شبيك بيت قصير ابو حيدرة
-سيد ضَهير: هاا أي عرفتهم، صغار
-: ضحك عباس
-سيد عباس: هيه منيه؟ تره هنَ ثنين وحدة كبيرة والثانيه صغيرة
-سيد ضَهير: شمدريني يشابهن هنَ تيهت عبالي ثنينهن صغار
-سيد عباس بابتسامة: لا تييهت ولا شي كول عيني على الصغيرة
-سيد ضَهير: عباس باوع لتحجيلي حجي مابي خير وتجيبه وتخلي بحلكي بسرعة أطفر من كدامي
-: لاحظ سيد عباس وجه سيد ضَهير أحمر ويبدو أنهُ توتر
-سيد عباس: كايمين يابه كايمين ههههايييي
-سيد ضَهير: عبيس اذا طلعت حجايه منك اكص السانك
-سيد عباس: لاا يابه سرك أبير
-: بعد يومين، ديحضرون الغدة وكال سلام بصوت ناصي يم ضَهير
-سيد سلام: يابه لو چان على الصغيرة سهلة
-: سيد ضَهير كبل التفت على عباس وسلام يضحك ويباوع لـ ضَهير وعباس
-سيد عباس: ها شكو
-سيد ضَهير: عبااس؟ مو علساس سري ببير؟
-: شهك باللگمة وجاوب
-سيد عباس: يابير شكو؟
-سيد ضَهير: طلع البير يسرب وأول ما يم سلام
-سيد عباس: ها، خاب سلام انت صوجك لاوالله صوجي خل اكوم احسن
-سيد ضَهير: اكعد اكل وممنوع ثاني مرة هيج تتصرف تكوم من كدامي بهل طريقه وأحترم النعمة
-سيد عباس: صار
-: خلصوا اكل وسيد سلام وفرهود يسولفون بصوت ناصي ويضحكون
الحد ما خلصوا
-: راحت أيام وأجت أيام
(بيت أبو دُرر)
وصار العصر ورتبت دُرر نفسها هيَ وأختها وردة وتأنقوا بأحلى التفاصيل وبأثناء حديثهن وضحكتهن وسالفتهن أندك الباب
-وردة: أجيت أجيت
-حيدرة بنتر: دكعدي هو شنو ال أجيت أجيت
-: فتح حيدرة الباب وماعرف منو المرة
نطق حيدرة: تفضلي خالة
-أمك بالبيت
-اي موجوده
صاح حيدرة: يوم تعالي هاي مرة تريدج
-: تقربت دُرر زين وميلت راسها على فتحت الباب ألا واشوف أم سيد ضَهير
راحت أم دُرر ترحب بيهم ودخلتهم للبيت
وصاحت يا بنات حضروا جاي
نطقت دُرر بتعجب: يا عزة وردة هاي أم ضَهير
-وردة: شعدها جاية
-دُرر: كومي دنحضر جاي وياج طلعي الكليچة
اخذت الصينية ودكيت الباب طلعت أمي
وكالت: تعالو سلموا عليهم عيب
تكلمت أم دُرر: نورتونا والله
-أم ضَهير: بنورج حبيبتي شلونكم بعد البنات شلونهم
دخلوا البنات يسلمون على النسوان وبيدهم الصينيه
-: لاحظت دُرر أم ضَهير وياها بنات شابات ومرة كبيرة السن
سلموا وطلعوا البنات
-أم ضَهير: أي ياحبيبَة أريد ادخلج بالموضوع
-أم دُرر: خير أن شاءالله عيني ام ضهير كولي
-أم ضَهير: أحنا نريد نطلب أيد وحدة من البنات الأبني ضَهير
-أم دُرر بتفاجئ: نتشرف حبيبتي بس ياهوَ منهم ماعرفنا
-أم ضَهير: اوكفي خلي اطلعلج صورتة،
شافته ام دُرر تعجبت
-أم دُرر: اي عيني عرفتة هذا الله يخليه ويحرسه الج، أني اشوف أبو حيدرة
وأن شاءلله نردلج الخبر عيوني
بعد ساعة راحوا النسوان
دخلت أمي علينا
-وردة: شعدهم جايين يوم
-أم دُرر: خطابة
-وردة بتفاجئ: وأنيييي اكوووولل شعدها جاية
-دُرر بملل: أي رفضتي مو
-أم دُرر: لا يجي ابوج ونشوف شنو يكول
-وردة: أي وياهو ابنها
-أم دُرر: ضَهير هذا ابو غترة الخضرة بالموكب
-:راحت أم دُرر
-دُرر بتعجب: أكلج شو أمج عصبية
-وردة: هاي شبيج شنو جديدة هسه تكول ما اجبرجن وبراحتجن وبعدين تاكل راسنه لمدة اسبوع على زواج
-دُرر: اي والله يلا تهوون
-: بعد يومين لاحظنا أني وردة
أمي تودع مرة بالأتصال
سألتها
-دُرر: يوم منو هاي؟
-أم دُرر: ولكم والله قسمة تفوتجن شلون حبابه وحاطة چناينها بعيونها اكيد تدللجن مثلهن
-دُرر: أي يمة هي منو؟
-أم دُرر: أم ضَهير يعني منو، منتضرة من عدنه جواب، يمة فكري زين بلا ذيج أختج خبله أنتِ حبيبتي واعية اكثر منها فكري بيها والله متتندمين خوش ناس وابوج البارحة كال أحسن ناس بيت السيد أبو ضَهير، ونعرف ومو بعيدين اصدقاء أبوج أبو ضَهير وأبو مهيمن جارنة فشكلتي؟ يايمة
-دُرر بملل: خليني افكر منا لـ ليل
-: قاطعهن أبو دُرر
-أبو دُرر: لاتفكرن ولا شيء بابا عيب أصلاً أرفضهم فكري انت واختج زين ووحدة منكم تقبل
-وردة: شنو شكو؟
-أبو دُرر: على ضَهير غير وحدة منكم توافق ماكدر أرفض أصدقائي وعيب
-دُرر: بابا واذا اصدقائك يعني شنو نوافق أجباري
-أبو دُرر: ما اجبركم جاي أكول منا لليل أريد خبر
-: طلع وبدون ما يسمع باقي كلامنا
صعدنا اني وردة ضلينه لمدة ساعتين نتناقش واعترفتلي وردة بشيء صدمتني وضلت تبجي ومتريد توافق حضتني بتوسل
-دُرر: يلا كافي بس، بس تدرين بالقران عرفت من البدايه رح تتلبس السالفه براسي
-وردة: حبابه درة عليج الله
-دُرر: توسلي بعد شويه
-وردة: ههههه انج#بي
نزلت أريد أكل لكمة سمعت أمي تحجي وراي
-أم دُرر: هاي أم ضَهير جانت على التلفون
-دُرر: أعرف
-أم دُرر: كلتلها أحنا نحدد الموعد عيني
-دُرر: حددوه بيوم قيام الساعة
-أم دُرر: هههه انج#بي شوكت تريدين الخطوبة؟
-: اخذتلي صفنة أستوعب بيها انو دتحجي على خطوبتي وخلص رح اتزوج
-دُرر: خليني أفكر يوم
-أم دُرر: براحتج
-: قاطعهم حيدرة بعد ما سمع بالخبر
-حيدرة: هاي الرادها وهاي التمناها وبنت الشيخ الأبن السادة جبناها
-دُرر: هاي شنو جعصت بالهوسه
-حيدرة: هههههههههه جعصتها مثل وضعيتج هسه
-دُرر بضحك: شنو قصدك لك
-حيدرة بأبتسامة: خرب ترةةة بوكس وعلي وهيج اطشر وجهج
-دُرر: دروح طشر وجه حبيبتك الأ توصلك لجهنم
-حيدرة: هاي شنو ياحبيبه أشاعات عمي ممرتبط
-دُرر: اي من هاني رمزي الجذاب، البارحة نسيت تلفونك مشتغل وشفت المحادثات
-حيدرة بتفاجئ: عليج العباس؟
-دُرر بأستفزاز: أي والله
خلص النهار وحسيت هاي الأيام تعيسه
صعدت دأنام لاحظت وردة فرحانة وعيونها بالتلفون حسيتها داباوع على صورة أو غير شي غلست رحت نمت وبهل ليله تحلمت
-: شنوهاي منو أنت ومنو هذا الضخم الوراك
مو داحجي وياك ليش ملثم وجهك
تقرب من ناحيتي أخذ ايدي ولبسني محبس غريب وكبير ويمشي
تقرب الضخم من وجهي ونطق برعب
: وافقيي
-: فزيت برعب على خوف وعيوني تتحرك بسرعة شربت مي باوعت وردة ماكو بمكانها والشمس طالعة
نزلت الأمي صاحت يلا حيدرة جيبلي العصاير
انتبهتلي أمي
-أم دُرر: حضري نفسج اليوم جايين
صعدت حضرت نفسي
-: بعد ساعات
سمعت هوسة بيتنا صارت وصوت سلام حار بينهم
صاحتني أمي بعد نص ساعة
-أم دُرر: يلا حبيبتي طلعي قدمي العصير بهدوء سلمي عليهم
توترت وبطني صارت تلويني من سمعت الكلام
طلعت أقدم العصير رفعت عيني عليه
يبست بمكاني وأذا بي أتفاجئ من المنظر
نفسه هو بحد ذاته كاعد وراه.......
