رواية اسيرة بين يدي قاتل ابي الفصل الثالث 3 بقلم نور آل زيادة
الأيام كفيله بأن توضح لك مشاعر الأشخاص تجاهك...
ستعلم بأن ليس كل قريب يحبك
وليس كل كلمه جميله تكون صادقه ومن القلب
وليس كل أبتسامه تدل على النقاء
_________
سيلين،،، مر اليوم عادي لكن سيف مانشفت دمعته مع انو ثامر دائما يسافر وحده هاي مو اول مره
من وصل لألمانيا اتصل بينه يبلغنه بوصوله
ثاني يوم عنده موعد مع الدكتور ألي المفروض متابع حالته بعدها من راحله حددله عمليه بعد اسبوع وبشره انو وضعه راح يتحسن وخلا يتفائل
ثاني يوم من سفر ثامر اتصلت ساره تبجي ومثل كل مره وكالعاده ماعدها سالفه غير مؤيد ديخوني كل مره نفس الكلام والنتيجه صفر
ثالث يوم العصر اتصلت
ساره،،،، تعالي بسيارتج اريدج بشغله
سيلين،،، حضرت نفسي واخذت سيارتي وطلعت رحتلهه لكيتها منتضرتني يم الباب ولابسه كمامه
ساره،، انزلي سيلين بسرعه اني اسوق يله بسرعه
سيلين،،، نزلت وهي ألي قادت السياره رحنا لمكان عمل مؤيد ضلينا ننتضر وكل شي ماكو اخر شي ملينه وقررنه نرجع وقبل لنحرك توقفنا من شفنا مؤيد طلع صعد بسيارته طلعنا ورا نمشي مشه مسافه بعيده بحيث عبرنه الكرخ ودخلنه للرصافه اخر شي دخل بمنطقه بيوتها غريبه وحتى ناسها مااعرف شلونهم تيهنه الطريق ومؤيد اختفى عن انضارنا
كللتها.... ساره امشي نرجع اختفى وصراحه هل مكان ماعجبني والدنيا صارت مغرب بعد شويه تصير ضلام
ساره،،، ماارجع اذا ماألگفه اليوم لو اني لو هو
سيلين،،، يمعوده هل منطقه تخوف
ساره،، ومن شوكت انتي تخافين وينج وين الخوف؟
سيلين،،، وأنتي من شوكت صرتي سباعيه هيج وانتي اكبر جبانه؟ وبعدين مو بس شغله خوف بس الله ماكال نذب روحنه بالتهلكه،،انتي ماانتبهتي للناس شلون تباوع؟
ساره،،، لتخافين ماكو شي
سيلين،،، ضلينه نمشي بالسياره وكل شويه اكلها خلي نرجع بس هي ضلت مصره واني احجي وياها صاروا امام سيارتنا شخصين وقفونا وسألونه
_منو رايدين؟ شعدكم هنا؟
ساره،،، زوجي دخل لهذاك الشارع واني ورا
_ هههه،،، انتي من جماعة زوجي وزوجك مثقفه وبالبتاوين حلو،،، سمعت شمشون خوش صيده اليوم شلون حتيت وشلون سياره نزلن خلي نلعب شويه
ساره،،، ياخطيه هذوله مثل الاطفال يدورون لعب؟ اعذرونا مشغولين هسه غير مره نلعب وياكم
سيلين،،فاهيه وفطيره ومتصيرلج جاره واني ثوله اجيت وياج ولج سدي الجامه وأمشي بسرعه طلعي مين مااجينه،،،،، بسرررررعه
ساره،،، شكو شبيج؟
سيلين،،،، وشبت بيج عساها ماطفت،، يالغبيه ماسمعتي شكالو امشي بسرعه
ساره،،، ومؤيد ماراح اكشف خيانته
سيلين،، انعل ابو مؤيد ولج ياخيانه ماسمعتيهم احنه بالبتاوين لتخافين ماجاي هنا حتى يخونج زايده جاي يكبسل لو يشتغل بالممنوع
ساره،، يله المهم ميخوني ولو هو مومال هل سوالف
سيلين،،، ولج راح نروح بالرچلين وين جبتينا يالثوله خلصت مناطق بغداد ماجبتينه غير هنا
بعدني ماخلصت كلامي اجوي بعد شخصين ورا السياره والمشكله سدوا الطريق كدامنا والورانا ببلوك و حاوطوا السياره بعد حتى منكدر نحركها
واحد منهم صاح بصوت...
_ انزلن بسرعه لاانزلكم بطريقتنه
سيلين،،، دب الرعب بگلوبنا ونشف الدم بجسمنا
ساره،،، سيلين نضراتهم وكلامهم عبالك ميبشرن بخير؟
سيلين،،، صحي النوم ساعه اگلج امشي وانتي تسولفين زين هسه من غلقوا علينا الطريق
كلت هل الكلام وساره بلشت نوح وبچي
مشكلة ساره فطيره وعلى نيته وجبانه كل مااشوفها انطيها محاضرات حتى تتغير بس لاحياة لمن تنادي وليش ألومها اني كنت اكثر منها وبرائتي وطيبتي هي ألي وصلتني لهنا
عاط واحد منهم بينه....
_ يله فضنه وانزلن لاانع،،،ل والديجن
ساره،،، عزززه شراح نسوي؟
سيلين،،، ننزل نلعب وياهم
ساره، واذا طلع لعبهم تافه وتأخرنا ومالحكنه بمؤيد شنسوي؟
سيلين،، تسكتين لااشمرج عليهم واروح
بهل اثناء رن جهازي كان المتصل فؤاد اجيت والله جابك رديت بسرعه..
_الله جابك فؤاد
فؤاد،،، خير ام سيف شبي صوتج؟
سيلين،،، أني وصديقتي بالغلط دخلنه بمنطقه اسمها البتاوين
فؤاد،،، صخااام!!! شوداج هناك بهيج ساعه؟
سيلين،،، حضنا اللمصخم اني سامعه بيها بس مااندلها واليوم الحمد لله حصلي الشرف اكون حاليا بداخلها،،، بس مااضن الناس ألي هنا تشرفوا بوجودنه اكو شباب محاوطين السياره ويريدونه ننزل وتهديدهم واضح
ساره،، عزززززه؟!!! يعني طلع هذا كلامهم تهديد؟
سيلين،،، باوعتلها صفح وكملت كلامي..
_شوفلي حل شسوي حتى اطلع منا؟
فؤاد،،،هسه راح اجي عليكم لتخافون
سيلين،،، فؤاد ترا همه محاوطينه هسه وألى ان تجي انصير بخبر كان
فؤاد،، زين حدديلي موقعكم وراح اتصل بمعارف عندي قريبين عنكم ضلي على تواصل ويايا،، ولو حتى لو اجوي مااعرف شلون راح يطلعوكم؟ بس حددي موقعكم حتى يندلوكم حتى اذا ماكدروا على الاقل يجيبون دوريه مال شرطه
سيلين،، عرفت احنا ورطنه روحنه بورطه معدله ومااعرف اذا راح نطلع منها ساره بس تلطم وهمه يهددون اخر شي واحد منهم ضرب السياره بالتوثيه كسر الجامه وساره من خوفها عاطت
عاط واحد بيهم...
_ولك يامطي شسويت السياره سعرها انكسر شراح نستفاد عوفهم هنه ينزلن قابل يضلن للصبح
_دقايق اذا مانزلن انزلهن بطريقتي اسحلهن سحل
سيلين،،، عرفت الوضع صار خارج السيطره لازم اجازف
ساره من اكول ثلاثه بلمح البصر اريدج ترجعين ليورا نزعت حذائي وحضرت نفسي
ساره،،، ليش؟
سيلين،،،، بلااااا ليششششش نفذي وبس ،،،، يله ١-٢-٣
رجعت ليورا واني بسرعه كعدت بمكانها وشخطت السياره
صعدت على الرصيف لأن الشارع غلقوا باللبلوك ركضوا ورانا وضربوا السياره فلشوها من الخلف مشيت بكل سرعتي واني اعرف ماخلصنه لأن بس دخلنه فرع ثاني طلعولنا غيرهم فريت السياره على غير فرع ،، رن جهازي
_ساره فتحي سبيكر وجاوبي بسرعه
فؤاد،، ها ام سيف
سيلين،،، وينكم فؤاد حركت السياره بس ضيعت الطريق مااعرف مين اطلع والجو بدى يصير ضلام
فؤاد،،،، طلعي خريطة المنطقه علة جي بي اس
سيلين،،، مااعرف فؤاد احس هل منطقه لاألها راس ولارچل اخاف يطلعولنه غيرهم
فؤاد،، هسه خابرت الولد جاييكم سيارتهم جكساره بيضه بيها اربع شباب لتخافون ترا هل منطقه موكلها مثل هذوله اكو بعض ناس زينه ساكنين بيها بس هل نماذج هي ألي شوهت سمعتها وانتو اكبر غلط تدخلون لهل منطقه بهيج وقت وانتن بنات وحدكم ،، عالعموم لتخافون شويه ويصيرون يمكم
سيلين،، اوكي،،،،، ثواني ورجع اتصل
فؤاد،، شوفيلج مكان هادىء اوكفوا بي حتى يجون لأن انتو ماثابتين بمكان وماجاي يكدرون يوصلولكم توقفوا وابقوا راقبوا اخاف احد يوصل يمكم قبلهم
سيلين،،، وقفت بشارع هادء نوعا ما ضلينه نراقب ساره من الخلف واني من الامام الى ان لمحة جكساره بيضه تتوجه ناحيتنه وبنفس اللحضه اتصل فؤاد
فؤاد،،، وصلوا هذوله كدامكم لتخافون
سيلين نزل ثنين شباب مرتبين من غير شك هم ألي كال عنهم فؤاد مبين من هيئتهم مومن هل المكان
فتحت الجامه صار بوجهي شاب قريب لعمري تقريبا
_ السلام عليكم الحمد الله على سلامتكم
سيلين،،، الله يسلمك
_ استاذ فؤاد بلغنه بلي صار وياكم وان شاء الله محلوله اني اسمي رائد تكدرون تعتمدون علينا بس لازم تنزلون وتجون لسيارتنا
ساره،، وسيارتنه نعوفها هنا شنو؟
ابتسم بخفه وجاوب...
رائد،،، لااكيد راح يصعدون بيه ثنين من عدنا هنا وانتن ويانا بهذيج السياره
ساره،،، وليش احنا منبقى بهاي وانتو تعالو ويانا؟
سيلين،،، نزلي ساره بسرعه مووقت استجوابج خلي نطلع من هل مكان وعود سولفي براحتج
نزلنه وهمه اخذوا مكانه واحنا رحنه على هذيج السياره نزل واحد سلم علينه وصعدنه ليورا
سلمنه ألي يقود السياره مارد بس ألي فتحلنه الباب وصعدنه رد علينه السلام تحركنه بسرعه سمعت صوت الشخص ألي فتحلنه الباب
مصطفى،،، ابو طبره ليش طلعت منا هذا مو الطريق ألي دخلنه منه للمنطقه؟
ابو طبره،،، هذا احسن هنا اكو سيطرات وجيش ائمن بس هذاك الطريق مابي مگطوع وبهل وقت تشتغل السلابه والعصابات ومابينه حيل نصير اكل للواويه
مصطفى،،، لاشدعوه شكو شصاير؟
ابو طبره،،،، شمدريني شصاير جواب سؤالك موعندي اني رجال شكبري شكدي موكف الاوادم على تك رجل ماعندي جرئه ادخل وحدي هنا بهل ساعه والأنسات ماشاء الله عليهن مااعرف مين اجتهن هل جرئه ودخلن وحدهن ولو يجوز متعودات يجن هنا بس هل مره ماحالفهن الحظ
سيلين،، تنرفزت من اسلوبه وكلامه لأن واضح شنو قصده جاوبته...
_ألي يندل هل مكان ويعرف مداخله ومخارجه هو ألي معناها يجي دائما لهل منطقه ولافي عليها وأحنا لونندل ماكان دخلناها من الأصل ولااضطرينه نطلب المساعده من احد
باوعلي بالمرايه الاماميه ورفع حاجبه المطبور بغضب كلت ويا نفسي ،،، وجه المجرم وكاعد يبيع مبادىء وقيم براسنه اكص ايدي اذا ماطلع واحد من عصابات هل المنطقه
طلعنه من المنطقه وخلصنه الحمد لله حب الولد ألي اسمه مصطفى يلطف الجو بعد التوتر
مصطفى،، الحمد الله على سلامة الجميع تنذكر ومتنعاد ان شاء الله
ساره،،، ههه الله يسلمك اي الحمد لله الله يبعدنه وياخذك يا مؤيد على هل الورطه ألي ورطتنياها
ابو طبره،،، ومن احجي تصير كلها شريفه براسي مو كلتلكم اكو اننننه بالموضوع طلع بيها مؤيد ويجوز غير مؤيد والله واعلم
ساره،،، لا ترا مؤيد خطيبي
سيلين بغضب،،، وكفففف السياره بسرعه انته موصوجك صوج ألي دزك علينه
ابو طبره،،، هاي فوكاها شنو من عرامه وصلافه صدك صوج فؤاد ألي يتعامل ويا هيج نماذج الله اعلم شنو شغلتجن
سيلين،،، ماراح انزل لمستواك واجاوب واحد مثلك كلامي ويا فؤاد،، وكف هنا بسرعه
مصطفى،، كولوا ياالله ياجماعه وصلو على النبي
سيلين،،، كتلك اوكف بسرعه
وكف السياره ونزلت بعصبيه وضربت الباب
سمعت صوته
ابو طبره،،، لاشكر على واجب هاي فوكاها
مصطفى،، ابو طبره،،، يمعود شجاك كول باالله هسه سويت زين ليش تخربه
سيلين،، اخر شي سمعته حوارهم هذا
نزلو الشباب من السياره تشكرتهم والولد ألي اسمه رائد اصر يوصلنه لبيتنه وكان جدا محترم عكس هذاك لكن رفضت اخذنه سيارتي وماحجيت ولاكلمه ويا ساره وصلتهه لبيتهم واني رجعت لبيتي
مرت ايام وخلالها كل يوم ساره تعتذرلي عن ألي صار بسببها واني من شفت وضع السياره كرهته وقررت ابيعهه لأن طلعت من نفسي
ورا كم يوم اتصل ثامر وبعد السلام والسؤال فاجئني بكلامه..
ثامر،،، سيلين ديري بالج على نفسج وعلى ابنا ولتأمنين بأي شخص بهل دنيا حتى بأهلج ضلي قويه مثل مااعرفج واي شي تحتاجي فؤاد موجود بس هو استشيري وراح يوضحلج كل شي واهلي ديربالج منهم ترا حاقدين بس اني حسبت حساب لهل شي
سيلين،،، فؤاد ليش هيج تحجي؟
فؤاد،،،، بدايتنه يمكن ماچانت صح على الأقل ننتهي بنهايه تليق بينه،،، لأخر يوم بعمري راح تضلين بگلبي واتمنى انتي متذكريني غير بالخير راح ادخل لصالة العمليات ومااعرف مصيري ولامستقبلي بس أكيد امنت مستقبلكم
سيلين،،، ماعرفت شلون اجاوبه ولافهمت ليش گال هيج كلامه كله كان وداع ماكنت اعرف هذي راح تكون اخر مره اسمع بيها صوت ثامر ورا كم ساعه اتصل ابن عمه الثامر وصديقه وألي سافر ويا بلغني بانوا ثامر فارق الحياة اثناء العمليه
من صدمتي مااعرف شنو ارد ولاشنو اتصرف كنت مستبعده هل خبر احس الحياة توقفت بيه ماعرفت اعبر عن اي مشاعر ماعرفت افرح لأن خلصت من سجاني لو احزن لأن خسرت زوجي وابو ابني وألي كنت تحت ضله وحمايته كل هل سنين
ضل عقلي ميجمع وسبحان الله الانسان من يموت كأنما تموت ويا كل سيئاته نصير منذكرله غير بس الحسنات منذكر غير بس ايامنا الزينه ويا
لااراديا صارت دموعي تتسابق وتنزل بغزاره طول عمري وحياتي ماتخيلت راح يجي اليوم ألي ابچي بي على ثامر واتأثر علي
فجئه صرت اشعر بالضياع والوحده وقت قصير والكل سمع وأجه لبيتنه ومن ضمنهم اهلي واهل ثامر كنت تايهه مااعرف شنو اسوي سووا الأجرائات ونقلوا جثمانه للعراق وتمت مراسيم الدفن وصارت الفاتحه ببيتنا
طول ايام الفاتحه احس نفسي تايهه وضايعه اصفن باللوجوه وبس دموعي تنزل وليش مااعرف معقوله طلع ثامر لهل درجه غالي عليه؟ لو لأن تحررت منه؟ لو خوفي من المستقبل المجهول؟ مااعرف بس اعرف شي واحد كنت اشعر بالضياع
ساره وأمها ماعافوني طول الوقت،،، خلصت الفاتحه واهلي الحنينين المحبين ماعافوني
صرت احس نفسي اميره من الدلال والعطف كنت ساكته ومنتضره ضليت اشاهد التمثيليه للنهايه
مرت الايام وطلعت الأربعين والغريب اهل ثامر ألي صار سنين ماشايفتهم طول هل فتره خواته واخوانه ماعافونه طول هل فتره
مرت الأشهر وخلصت العده وصار الوقت اوگف على رچلي واشوف مصالحي اول شي سويته اتصلت بفؤاد وطلع كان منتضر اتصالي
بيومها عرفت شنو معنى كلام ثامر كانت وصية ثامر تنص على انو جميع املاكه تنتقل ألي ولأبني فقط
من سمعوا اهل ثامر اجوي هدوا عليه وصارت مشكله وهددوني ياخذون مني ابني طبعا موحبا بي بس اكيد لأن سيف عنده املاك،،، لكن صدمهم فؤاد بأنو وصية ثامر اني اكون الوصيه على ابني وعلى ماله يعني ميكدرون ياخذوا وان اخذوا ميكدرون يتحكمون بورثه لأن اني المسؤوله الاولى والاخيره وتحت اي ضروف كانت
وهنا ثامر قطع كل طريق ألهم ممكن يستغلوني بي على اثر ألي صار وبسبب المشاكل والتهديدات الصارت تجيني جابلي فؤاد اشخاص من شركه لحمايتنه كان ثامر مرتب كل وضعنه قبل ليروح
كنت اسمع دائما انو اكو نهايات اخلاق واحترام واليوم فهمت هل شي كانت بدايتي ويا ثامر بدايه سيئه ومؤذيه جدا الى درجة تحطمت وصرت انسانه ثانيه واليوم مثل ماگلي ووعدني انتهينه نهايه جبرتني على الاقل احترمه
قبل ليموت اهتم بتفاصيل حياتنه اكثر مااهتم بمرضه ووضعه كل هل شي وفره ألي ولأبني حتى يعوضني عن سنين عمري ألي راحت ويا صح ماكو شي يرجع ألي راح بس بنفس الوقت مااكدر انكر انو دخول ثامر لحياتي صنع مني انسانه ثانيه وكشفلي معادن البشر ونواياهم
اليوم اني سيلين ابلغ من العمر ٢٧ عاما لكن نضوجي وفكري يبلغ سبعين عاما وهل شي جدا واضح واضح في شخصيتي وفكري لكن مااعرف شلون اهلي بعقولهم تصوروا راح يكدون يقشمروني بتمثيلهم للمحبه والحنان خصوصا من سمعوا بوصية ثامر
ألي صار كلهم اجوي وسكنو عندي امي وشاكر ومرته ضلو مقيمين وصاروا يتأمرون بالبيت ويتحكمون ويعيطون على العاملين ويتحمون بيهم خليتهم كم يوم يتونسون وبعدها وكفتهم عندحدهم
كل يوم اسمع اوامر امي وتحكمها بالبيت وبكيفها تتصرف كنت احاول اهدء واكول مهما كان هذي امي وعفا الله لكن ألي فجر البركان ألي بداخلي من سمعت زينة زوجة شاكر تغلط على سميه وتتأمر عليها وكأنما كاعده بيته لا لهنا وكافي ألا سميه وابني هذوله خط احمر
نزلت من فوك واني اسمع صوت زينه يلعلع كأنما كاعده بيت الخلفوها وسميه منزله راسها
سيلين،،، هاي شكو؟ شنو هل الصوت؟ وين كاعده انتي أبيت الخلفوج وتتأمرين وتتنترين اصحي على نفسج ماما
زينه،، ماسويت شي طلبت منها اكل مترضى تجيبلي متحترمني
سيلين،،، ليش بيت اهلج همه يخدموج كانو واني ماادري؟؟
تريدين انتي كومي خدمي نفسج ماعدنه مطعم هنا وديربالج اسمع صوتج يعلى بهل بيت وديربالج تتجاوزين حدودج ويا سميه بالذات لأن هي مو عامله وزايد منهه تشتغل وألا سميه حاله حالي بهل بيت
ام شاكر،،، شدعوه ليش تكبرين راس الخدم غصبن عنهم يخدمونه لعد شكو دننطيهم راتب
سيلين،،، ليش انتي ألي تنطيهم راتب؟
ام شاكر،،، لا،، يعني ماكو فرق
سيلين،،، البيت بيتي وكل شخص هنا جايبته اني ادفعله حتى يساعدوني وركزي على كلمه يساعدوني مويخدموني لأن همه بشر وأحنا بشر ومامسموح لأي شخص يقلل من احترامهم وبالتحديد سميه لأن سميه اخت بالنسبه ألي وهذا بيتها
زينه،انت ليس عندج عادي تقللين من احترامنا علمودهم؟
سيلين، مامجبوره تتحملين،،، بيتي واني حره بي وأصلا اني اشوف طولت فترة ضيافتكم،، الفاتحه وخلصت والعده وطلعت وخلفله عليكم ماقصرتوا وصار الوقت كلمن يكعد بيته وياخذ راحته
ام شاكر،،، لا منعوفج انتي صرتي ارمله وميصير تضلين وحدج شتكول الناس،، ومو بعيد يطلعون عليج سمعه لو يتهموج لأن يشوفوج وحيده هذاك البيت نأجره ونجي هنا البيت چبير ويكفينه كلنا
سيلين، هههههه،،،اشرتلها على معالم وجهي وجاوبته..
_باعي عليه زين ألي دتشوفيها كدامج سيلين مال قبل؟؟ سيلين ألي جبرتوها تتزوج ولويتي ذراعها من شككتي بشرفها حتة يتم زواجها بالغصب ؟؟
لا ماما اصحي هذيج ماتت وانتو دفنتوها،، ألي واكفه كدامج سيلين ثانيه ميوكف بعيني شي ولايوكف بعيني بشر لموا غراضكم ورجعوا لبيتكم برضاكم احسن ما،،،، ولا اكلج ميحتاج انتو افهموها
ام شاكر،،، شلون هيج تحجين ويايا واني امج ألي ربتج وكبرتج وزوجتج كل هل النعيم ألي عايشه بي اني سببه اقل شي تسوي وتجازيني نعيش هنا وياج حتى ارضى عليج
سيلين،،، ههههههه كلام حلو بس تدرين ماقنعتيني
ولا راح تقنعيني
سميه بلا امر عليج ساعديهم يلمون ملابسهم
وحضريلنه الغدا بس لتكثرين لأن احنه بس نفرين
عفتهم ومشيت
ام شاكر،،، اذا درا اخوج يلعب بيج طوبه لتنسين انتي ترملتي وهسه هو ولي امرج
سيلين،،، ولي امري ابويه وزوجي وثنينهم ماتوا و اضن بلغت سن الرشد من زمان وحاليا اني مسؤوله عن نفسي واذا شاكر عاجبه ينطرد من شغله واذا ماعاجبكم البيت ألي انتو كاعدين بي وعاجبكم تطلعون منه واذا ما تخافين على بناتج يطلكن،،، خلي يجي اخويه العزيز ويلعب بيه طوبه ويشوفني مراجله ألي باعهن عليه من زوجتوني بالغصب حتى اشوفكم منو ام سيف
اكدر اسوي كل شي وادمر الكل سبحان الله الدنيا دارت والأيد ألي چنتو تلووني بيها صارت هسه ايدي أني ،،، والقوه بهل أيد
وصراحه ماانصحكم تجربوها تذكرين من جبرتيني على ثامر وبسبب تشكيكج بشرفي خيرتوني بين الموت وبين اثبت برائتي بيومها ماتت بنتج بيدكم گتلتوها،، تذكرين من ردت اتطلك من ثامر وكفتوا بالمحكمه شهدتوا ضدي وسويتوني مخبله ودخلتوني مصحه ،، تذكرون شكلتلكم كلتلكم راح تدور الدنيا ويجي اليوم ألي تتبدل بي الادوار واجه هل يوم
قبل عفتوني وحدي اواجه مصيري وانتو عشتو متنعمين بفلوس ثامر على حساب عذابي ماشاركتوني كل سنيني الصعبه واني هم ماراح اشاركم اي سعاده ممكن اعيشه ولا اي نعيم ممكن املكه هذا زرعكم واليوم راح تحصدوا ماألكم يمي غير بس ألي كان ثامر موفره ألكم وبس حتى لتكولون حقوده واخذت منه كل شي
بناتج العزيزات راح يبقون رياجيلهن يشتغلون عندي وابنج هم وبيتي ضلوا ساكنين بي وراتب انطيج و اني احدده ألج حتى ابرج مثل ماانتي تكولين
هذا الموجود عاجبكم عاجبكم ماعاجبكم كولولي حتى هذني هم اسحبهن منكم واي تصرف يبدر منكم ميعجبني اسحب كل شي
ام شاكر،،، انتي انانيه وحقوده اكو وحده هيج تسوي بأهلها؟
سيلين،،، ماسويت شي بس راح اسوي اذا متطلعون منا واسوي اكثر اذا فد يوم تدخلتوا بيه ماانصحكم تشوفون وجه سيلين الجديد خلونه حبايب مهما كان تبقون اهلي
عفتهه وصعدت لغرفتي اعرف نفسي قسيت عليهم بس اعرف شنو نفوسهم واعرف نواياهم واكبر غلط انو الانسان يتعامل بسذاجه ويا الناس وهو يعرف ديستغلو بحجة صلة الرحم ومع ذلك ما قصرت وياهم ووفرت ألهم ألي يحتاجوا ولو هل شي ادري ميعجبهم لأن طمعهم اكبر
طلعوا من بيتي والكل سكت وماتدخلو بيه بعد او هذا ألي كنت متصورته
بديت اتابع كل اعمال ثامر بمساعدت فؤاد اكو اشياء نجحت بأدارتها واكو واجهة صعوبه بيها لكن ألي زاد الصعوبه عليه افعال شاكر
ثامر يملك مطعم من المطاهم الفخمه ببغداد وشاكر وازواج اخواتي ثنينهم يشتغلون بي براتب مرتفع الأجر لكن بعد وفات ثامر شاكر بدا يحاول يسيطر على المكان بحجة اخويه وحتى ازواج اخواتي سووا نفس الشي طمعوا وبدوا يتأمرون على الموضفين ويفرضون سلطتهم ويسوون مشاكل
بالبدايه سكتت بس من وصلي خبر شاكر متعارك ويا الشخص المكلف بأدارة المطعم وطارده من العمل وهو ماخذ مكانه وصاير الأمر الناهي وكل هل شي من غير علمي عرفت بدى اللعب عالمكشوف وصار الوقت اخلي حد
اجتمعت ويا فؤاد واتفقنه ونفذنه الاتفاق بأسرع وقت ومن غير معرفة اي شخص
بعد اسبوعين واني بالبيت بلغوني بحضور امي وشاكر هنا عرفت وصللهم الخبر استقبلتهم عادي لكن اول مادخلو البيت ومن غير سلام بدوا تهجمهم عليه وبلش شاكر يغلط ويتجاوز
شاكر،،، انتي شلون تطرديني اني وايمن وباسل من المطعم شلون انهان كدام الموضفين بسببج؟
ام شاكر،،،، هاي بمكان متخلين المطعم واملاكج بيد اخوج يديرهن ألج ويشوف مصالحج انتي تطردي هو ورياجيل خواتج؟ شنو من بنيه انتي خليتي العالم تاكل وجوهنه
سيلين،،،جاوبتهم بهدوء... يااا انطردتوا؟!! مع الأسف،،، ماتصورت هل شي راح يصير
شاكر،.، وصار،،، وألج مهله للباجر كل شي يرجع لمكانه واني ادير المطعم وألا....
سيلين،،، وألا شنو؟
شاكر،،، وألا ادمرج وأنهيج وافلسج وتعرفيني اكدر
سيلين،،، شلون بلله؟
شاكر،،، مركز التسوق والمطعم ومحل الحلويات وحتى الكوفي كلهم اعزلهن ألج واخليج تخسرين كل شي بلمح البصر بتهمة وجود الممنوعات بيهن اخليج ترجعين للصفر وتوقعي حتى ابنج اخذه واخذ كل املاكج واصير الوصي عليكم بعد مااقدم للمحكمه تقارير تثبت انتي مخبله ومومؤهله لأي شي اختاري لو اني اديرهن كلهن لو انفذ
سيلين،،، اباوع على امي تبتسم بشماته عرفت هي ورا كل هل كلام جاوبته...
_قصدك لو تتحكم بيهن كلهن وتبوكوني انته ونسابتك لو تنفذ؟ لا حبيبي فات الأوان تهديدك بله واشرب ميه
شاكر،،، قصدج؟
سيلين،،، قصدي اعذرني اخويه العزيز مااعز عليك اي شي بس بعد مترهم ومو اني ألي طردتكم من الشغل انت ونسابتك صاحب المطعم فصلكم
ام شاكر،،، انتي صاحبة المطعم هو بأسمج؟
سيلين،،، كان بأسمي وبعته حتى اسدد ديون ثامر
ام شاكر،،، ماصار شي يدير الباقيات
سيلين،، مع الأسف مركز التسوق والكوفي وحتى محل الحلويات كله بعته حتى اسدد الديون
ام شاكر وشاكر،، شلوووووون؟؟!!!
سيلين،،، اي مع الاسف شفتو شصار بيه؟ واذا اضطريت احتمال حتى ابيع البيت ألي انتو كاعدين بي
شاكر،، ولج انتي علمن تضحكين يادين هذا اذا غايتج تذلينه انعل والديج اكتلج خلاص واشرب من دمج
هجم عليه يريد يضربني خنكني راد يموتني وأمي تنحش بي وتزيد بغضبه
سمعت صوت سميه تصرخ اجوي سحبو الحمايه مني وطلعو برا هو وامي ماخلو غلط ماغلطو ولا دعوه مادعوها عليه
مع الأسف هذا واقع هواي نساء لهذا اضطرن النساء تتحمل اذية اللعيال واذية الزوج حتى لتطلك لأن احنا بزمن ماكو احد يتحمل احد كلها مصالح وصار من النادر نلگي اهل يتحملون بنتهم واطفاله بعد الطلاق او من تترمل
عرفت غاية اهلي وطمعم من البدايه وعرفت سكوت شاكر مو لله وغايته اكبر من مجرد وضيفه وراتب ومن بدا بحاول يفرض سيطرته وبدى يتصرف بالمال بكيفه وايرادات المطعم توصلي اقل من ربع المبلغ المطلوب لأن هو ياخذهن
بأختصار اخويه يبوگني وعلني ياخذ مالي ومال ابني اليتيم حته يصرف على مرته واهل مرته ويجيب الذهب والهدايه يتباهى بمالي ويرفع شأنه على حسابي،، لا لهنا وستوب
ألي صار قبل هذا كله اتفقنه اني وفؤاد وبعنه مركز التسوق والمطعم ومحل الحلويات والكوفي وحولتهن الى بنايات سكنيه واجرناهن توصلي ايجاراتهن كل شهر وأصلا اني كان عندي بيت مسجله بأسمي ثامر قبل هم اجرته من غير مشاكل ولا قال ولا قلت ولا شخص يطمع ويسرقني ولا يغلق المكان بأسلوب رخيص مثل ماكان ناوي شاكر يسوي بقت المزرعه نص بأسمي ونص بأسم سيوفي بقيته وهي اساسا بيهه عمال ومزارعين يشتغلون وبيت أهلي هم بأسمي وبقى البيت الساكنه بي وهل بيت مستحيل ابيعه او اتصرف بي لأن ثامر معتز بي وحقه لأن هو موبيت عادي وانما قصر فخم
وهمت الكل انو ماضل عندي املاك غير بيتي ألي ساكنه بي وبيت اهلي الي ساكنين بي وكل شي صار للديون طبعا مااقتنعوا لكن كان هذا افضل حل حتى الكل يعوفني بحالي
مر ست اشهر على وفاة ثامر خلال هل فتره ماكان بحياتي يساندوني غير ضحى وساره واختها وامها الكل ابتعد عني من سمعوا بخسارتي وهنا كل شخص طلع على حقيقته قررت اعيش حياتي واحقق احلامي وأولها امارس مهنتي
قررت افتح مكتب محاماة طلبت من فؤاد يساعدني لكن كان جوابه...
فؤاد،،، ام سيف انتي بعدج ببداية مشوارج المهني ماانصحج تفتحين مكتب وحدج مباشرتا انتي بعدج شابه وراح تواجهين صعوبه لأن احنه بمجتمع يسوده العرف العشائري اكثر من القانوني وراح تصيرلج مشاكل وانتي لتزعلين عليه بس هاي حقيقه انتي ماعندج ضهر يسندج ولا عشيره توكف وياج
سيلين،،،اذا على الحمايه عندي بوديكار يحميني وبعدين ليش تحسسني اني مگطمه؟ و اني اساسا راح ألزم قضايا احلها بالقانون شعندي ويا العشاير؟
فؤاد،،، اسف اذا ضايقج كلامي ومو قصدي انتي مگطمه بس ماعندج تواصل قوي بأهلج ولا بالعشيره ماعندج ضهر قوي يسندج اذا صارت مشكله والبوديكارد يحميج صح بس ميكدر يبعد عنج المشاكل وبعد انتي بكيفج
سيلين،،، اني اعرف فؤاد يريدمصلحتي واني اعزه ودائما اسمع كلامه بس هل مره سويت ألي براسي وأخذت مكتب وجهزته وباشرت بعملي ولزمت قضيتين ونجحت بيهن وكنت كلش فرحانه لكن ماتصورت ورا هل فرحه وهل قرار راح تتغير حياتي وأفتح على نفسي ابواب جهنم!!
