رواية يتيمة المشاعر الفصل التاسع عشر 19 بقلم الكاتبة نور ال زيادة
نورزان: اجتي امتحاناتي وخلال هل فتره كل يوم رافي يتصل يسأل بس ميطول على كد السؤال عليه وشلون جاوبت بالامتحان وينهي المكالمه الى ان خلصت وعطلت
من عطلنا اقترح هو وسيف نسوي سفره، ونغير جو اجتي منال وسمر وعمه واقترحوا الأقتراح على امي، لكن امي رفضت والحجه.. تعبانه
ام رافي :اقلها خلي البنات يجن ويانا يغيرن جو
ام زيد :أسال ابو زيد وأرد خبر
سألت والدي زيد رد بالرفض قبل ليرد والدي
زيد: شعدكم رايحين وشدعوه هيج مكبرين راسهم ورابطين حياتنه بيهم متروحون خلي يولون
نورزان: تصرف متوقعي كلنا من زيد لأن يكره اي شي يخص بيت ابو رافي ريام ماأستسلمت انتضرت زيد يروح للحمام وصارت تدلع على بابا وتحاول تقنع بي وهو ميردلها طلب فوافق طفرنا نگمز من الفرح وبدينه نحضر، للسفره، الجو حلو بي بروده خفيفه لكن مشمس،
اخذوا سياره كوستر حتى تلم الكل وصراحه هيج احلى، من السياراة المنفرده لكل شخص حلو من ننجمع كلنه بسياره وحده
كعدنا من الصبح اني وريام فرحانين لبسنه جينز واحذيه رياضيه حتى تكون مريحه بالحركه اني لبست هاينك صوف ابيض وچينز اسود وشوز رياضي ابيض وكوت احمر لفيت وشاح على رقبتي مخطط اسود وابيض وبي حمار بسيط شلت شعري ذيل حصان مرتفع ونزلت خصل رفيعه من الأمام
اجوي علينه، من الصبح صعدنا بالسياره واتفاجأت،بوجود وسن وياهم من شفتها غابت ابتسامتي لأن اعرفها متفوت اي فرصه حتى تغثني بيها كعدت بجانب مروه، اباوع عليها بطنها كبيره، ابتسمتلي ورديتلها الأبتسامه طبعا مروه كلش حبابه وحلوه حقه احمد من حبها هي اكبر مني نفس العمرهي و احمد
براء وسيف اخذوا الطريق كله دك ورگص
وأحنا نضحك عليهم،ولاعبالك خال وابن اخته...
غيث اهدء منها عاقل بس هيه لا على سيف طالعه
توجهنا لسامراء، صح الطريق طويل بس ماحسينه بي تونسنه،،، عمه كل شويه مطلعه شي...
مره كليجه ومره فطائر، انتخمنه مقدما
وصلنا، واول مانزلنه وسن نزلت مسرعه راحت يم رافي تمشي يمه، هو ولاعبرها، بس هي لزكه
ضلينا اني وبراء وريام نمشي سوا
وصلنا لملوية سامراء، والكل صعدوا، على مدرجاتها اني صراحه، عندي فوبيا من الاماكن المرتفعه
ريام وبراء اصرن اصعد حتى اتغلب على خوفي
هنه صعدن الدرجات بسرعه، واني بس حسيت
ارتفعت بمسافه عن الأرض دخت، وحالي اتخربط،
كعدت على البايات مااكدر بعد حيلي راح، ياربي شورطني
انتبه عليه سيف، ونبه رافي، اجه ركض صعدلي
رافي: نورزان شبيج، شصاير وياج؟
نورزان: نزلني عفيه بعد ما اكدر حيلي يرجف
كومني بصعوبه وگفت حيلي ورجلي ترجف نزلني بايه بايه،،، كل شويه اكول راح اوكع وهو يتمسك بيه لحد مانزلت روحي طالعه وراها نفسي لعبت
اخذتلي جانب وقفت بي وصرت اتقيء
اسمع اصواتهم اجوي كلهم ورافي يمي، يغسل بوجهي وأيدي، اجني البنات وصارن يلومن بروحهن
لأن ضغطن عليه،،، كعدوني حتى ارتاح ،
رافي: هسه احسن مو؟
نورزان: اي بس شويه دايخه
رافي: اروح اجيب عصير الضاهر ضغطج هبط
نورزان: راح جابلي عصير طبيعي، فتح العلبه وقدمها ألي طعم حلكي مر من شربته لعبت نفسي
--هاي شنو طعمها مر
رافي: شو جيبي..... شرب منها شويه
_مابيها شي الضاهر انتي طعم حلگج مر اروح اجيب نستله او شي اكثر حلا يغير طعم حلگج
نورزان: انتبهت لوسن تباوع عليه بحقد كلت ويا نفسي باع هاي البطرانه اني بيا حال وهي وين تفكر
ريام: شوفي،،، شوفي براء، شوفي وسن، راح تهجم على نورزان باعي شلون تباوعلها بحقد
براء: غير حقها،
ريام: ليش عيني شمسويتلها اختي قابل؟
براء: لاحبيبتي مو اختج ألي مسويه خالي ألي سوا العمايل
ريام: ليش شنو سوا؟
براء: ولج هو اني انصدمت، شفتي، من نورزان
تخربطت شسوا وشلون انخبص عليها وكملها من غسل ألها، وهو نفسه متتقبل هيج اشياء
واخر شي شرب ورا نورزان العصير وهل الشي مامسوي بحياته ويا اي شخص،،، هسه ها حقها وسن تتخبل لو لا؟
نورزان: اسمع كلام براء، واخر جمله صحتني
اي فعلا شرب بعدي عصير، !!ضليت اتسائل ليش هيج سوا !!؟ وليش ويايا اني،؟
قطع تفكيري من اجه جابلي نساتل وحلويات
رافي: ها هسه احسن؟
نورزان: اي الحمد الله احسن
رافي: هاج هاي حلويات اخاف ضغطج هبط
اكليهن، وبعد لتصعدين ابد يمعوده لو واگعه؟
نورزان: اكلت نستله و بديت اتحسن هو عارض مؤقت لأن صعدت،مكان مرتفع
ضل رافي يمي ماقبل حتى يصعد وياهم للملويه
وسن: رافي يله نصعد
رافي: اي منو مانعج روحي، اخذي راحتج
اني مااصعد،
نورزان: رافي روح اني زينه اذا علمودي البنات
يمي
وسن: مم،، شنو السالفه نورزان اشو شايله التكلفه وصايره تكليله بس رافي وين راح عمو ؟
رافي: هذا شي خاص بيها، وقبل لنروح لحگي
اصعدي وصوري، ولتنتضريني، لأن ماألي نيه اصعد
نورزان: ضاجت من كلامه، صح كلامه غلط بس هيه بلا كرامه، دتشوفي مامتقبلج شنو هل لزكه
راحت، وأحنا ضلينه كاعدين،
اباوع عليه و بداخلي فرحه، متنوصف معناها اني لهل درجه مميزه ومهمه عنده
براء: خالو انته شنو سويت، علگتها، اليوم وسن راح تتخبل علينه
رافي: ليش شنو سويت؟
براء: ها لاهيج، بس هيه تضوج من نورزان
وانت عفتها وحرت بنورزان
رافي: عوفينه منها لخاطر الله اني هيج بشر ماعنده كرامه ماشفت،لحد عازمها لاداز عليها اجتي ولطشت اروح وياكم
ريام: اكلج براء يعني هيه شمدريها اذا معازميها؟
براء: جدي غير من سمع اكو سفره، كال لخالو اعزم خطيبتك،، خالي ماوافق، تالي عزمها جدي من ورانا ومنشوف غير من الصبح اجتي
نورزان: هااا هسه افتهمت شلون اجت
اجوي كلهم اجتمعنا وكعدنا ناكل طلعو عصائر وحلويات
اما مراسل الجزيره في العراق، ألي هي براء
ماقصرت نقلت النشره بالتفصيل وبكل امانه، وخلت الكل يتفاجىء، من تصرف رافي
ألا عمه الوحيده ابتسمت، مااعرف ليش
كعدنا شويه واجوي الولد واحمد يمشي بمروه خطيه بصعوبه تمشي بعدها قررنا نروح لقصر العاشق كان مكان قديم اثري بس حلو
وبعدها رحنا زرنا الامام العسكري، وصلينا الضهر
ورحنا على الشط، كعده مال عوائل
فرشنه فراشنه وبدينه نحمي اكلنا
كانت لمه واجواء رغم بساطتها بس كلش حلوه
تغدينا وبعدها شربنا جاي
ناس راحت للشط تلعب على الجرف بالمي، والولد شمروا روحهم وصاروا يسبحون
وعمه تصيح عليهم، يمعودين الجو بعده بارد
وهمه ولاأهتموا، الشمس عاليه بس اكيد اكو شويه بروده
طلعوا وبدلوا وصارت الكعده والسوالف
الى ان صار العصربعدها لمينه غراضنه وصار وقت نرجع رجعنا والطريق كله وسن تسمعني كلام
اخر شي سمر ماتحملت ردتها....
سمر: ليش خاله دگرج من دگر نورزان؟
احسن مترجعين عليها روحي احجي ويا خطيبج
لو تعرفي ماراح يعبر كلامج،، هذا ألي يفرض نفسه يتحمل، والا يصير عنده كرامه ويبتعد
نورزان: كان كلام سمر بالعضم، بس مع الاسف
فعلا الكرامه ممسوحه من وصلنا ويا نزلتنه قربت راسها، وهمست...
وسن :لتصدكين فد يوم اخلي الج، رافي ملكي وحدي عافتني وفاتت جوا، كلت هاي شبيها هو منو رايد ياخذه منها مصدكه روحها ملكها عود
رجعنا للبيت امي استقبلتنه، وسولفنه ألها
وبعدها صعدنا لغرفنا تعبانين، سبحنا وصليت،
وقررت انام حتى عشى متعشينه من التعب
ماكعدت غير ثاني يوم، بس كعدت مرتاحه
وكان يوم بي طاقه ايجابيه، فعلا الانسان يحتاج تغير جو كل فتره، يحسن من نفسيته
بالليل اتصلت براء، ضلت تسولف وبعدها حجيت ويا رافي، كان صوته تعبان
نورزان: ها اليوم صوتك مو تمام؟
رافي: اي بلعومي ألتهب،
نورزان: اكيد، موكلتلكم عمه لتسبحون الجو بارد
انتو ماعبرتوا
رافي: ادري مو الولد هم سبحوا مصار بيهم شي
نورزان؛: هههه، مو انته نضام اوربي، مامتعلم على اجواء العراق
رافي: ها نورزان هيج صار الحجي صرت اوربي
نورزان: ليش تضوج قابل كذب،
رافي: زين لعد اذا اني اوربي شعندي باقي خلي ارجع لأوربا شتكولين مو احسن؟
نورزان: شنو السالفه اشو ماصدكت، يابا بطلنه مو اوربي، عراقي، ياكلمه رجعي لمكانج
رافي: هههه كله ولا اسافر مو؟
نورزان: اكيد
ضلينا نسولف وبعدها نهينا الاتصال لأن صوته ميساعد
ألي صار بالسفره فتح عيني على هواي شغلات
واهمها...
انو اهتمام رافي ماكان اهتمام طبيعي، وحتى اني
ماعدت طبيعيه، اكو شي تغير بداخلي
.
.
مر كم يوم وأحنا كاعدين بالبيت، سمعنه صوت الباب شويه ودخلت امي ووياها نسوان اثنين متوسطات بالعمر، مااعرف منو هنه
اجتي امي، للمطبخ وكالت
ام زيد :ريام حضري صينية ضيافه
وانتي نورزان رتبي نفسج وتعالي سلمي
بالبدايه ماوافقت بس هي اصرت
لان افتهمت شنو ألي ديصير، فتت سلمت وطلعت
مباشر لاكعدت ولاشي شويه وطلعن، اجت امي
ورا ما طلعن
ام زيد :هذني جايات عليج خطابه.
نورزان: ادري عرف ولف منين نعرفهن، حتى يجن يخطبن،
ام زيد :ذني چانن جيرانا بهذاك بيتنا ،
ابنها للمره الوسطانيه رتبتة......، بالجيش، وحالته ميسوره، هو ألي جايه تخطبله
نورزان :ماما سدي هل السالفه من يمج، لأن منعرفهم، وبعدين اني اريد اكمل دراسه
ام زيد: اني هم ماعجبني الوضع، صح چنت اعرفهم قبل بس صار سنين مامتشاوفين، والنفوس تغيرت فماارتاحيت، الباجر ارد خبر، ماموافقين،
نورزان: اي احسن
مر كم يوم وامي وام رافي، وبيت جدي، كلهم متفقين نروح زياره، صار سنين طويله مارايحين
اني صراحه تحمست لأن مااذكر اخر مره رحنه كنت صغيره، عجبني اروح ازور ال بيت رسول الله
اتفقنا كلنا، واخذنا سياره كبيره منشئه
خالاتي وولدهن وبناتهن وبيبي، وبيت عمو نبيل كلهم، ماعدا عمو نبيل،والحمد الله وسن وربعها مااجوي مو لأن صار عدهن كرامه، لا لأن عدهن
طائفيه، ويفرقن،
رحنا وكان الطريق طويل لكربلاء، بس هم حلو
اول ماوصلنا نزلنا، خلينا شالات على راسنا
واصلا لابسين لبس مستر، احتراما لقدسية المكان اول مانزلت صار رافي امامي مستغرب
لأن لابسه حجاب،ابتسم بوجهي وسوالي بأيده
حركة،، اوكي،
صايره اي تصرف او حركه تبدر منه تأثر بيه
دخلنا وطلبوا نلبس عبي لأن ممنوع
لبسنا وفتنا،، صليت ودعيت، وكعدت شويه
صارت هوسه، طلعت، برا، ولمحت رافي من بعيد
طلع اجه بأتجاهي ابتسملي
رافي: ادري وين الواحد يضمج وانتي حتى الحجاب والعبا، تزيدج جمال
نورزان: شكرا
رافي: نورزان ليش متتحجبين؟
نورزان: ان شاء الله اني هم داافكر بس اريد اخذ
هل القرار بقناعه تامه، حتى من ألبسه، مااتركه
بعد ولااطلع شعرايه من راسي
رافي: ولو هو واجب قبل ليكون قناعه، بس ان شاء
الله تلبسي وانت بكامل قناعتج
نورزان: زرت مو؟
رافي: اي الحمد لله زرت وصليت ودعيت، وان شاء الله الله يستجاب ألي
نورزان: ان شاء الله تنول ألي تريده...الواضح شي مهم، ؟
رافي: اكثر من ماتتصورين،ماعندج فضول تعرفين شنو طلبي؟
نورزان: لا اكيد شي خاص
رافي: صح خاص، بس اكيد مااضمه عليج
نورزان: باوع بوجهي وكلي...
رافي: تمنيت الله يجمعني بالأنسانه الوحيده
ألي خلتني اعرف شنو معنى الحب...واتمنى هيه هم تحبني.
نورزان: استغربت كلامه، معقوله هاي صدك يعني يحب، ياترى منو وسن لااكيد يجوز غيرها
رافي: ها وين رحتي
نورزان: لاهيج بس استغربت
رافي: ليش استغربتي؟ اي حبيت، لدرجه، مااتخيل
بعد حياتي من دونها، وان شاء الله يجمعني بيها
نورزان: من حجه كلامه الاخير باوعلي بنضره
اخترقت داخلي لامست گلبي وروحي خلتني احس، انو يقصدني بكلامه معقوله يقصدني لو اني متوهمه،؟
طلعوا البنات، واني امشي الافكار تودي وتجيب
براسي، زين ليش تأثرت بكلامه، ليش حسيته
كلامه لامس روحي، وگلبي
وكفنا نشتري اكسسوارات،اجه يمي أخذ قلاده بيها شذره زرگه، ودفع فلوسها، وخلاها بيدي
رافي :هاي بلون عيونج، وهم عن العين
فرحت بيها، رغم بساطتها، اشترى للبنات هم
كل وحده شكل حتى لريام اشترى
رحنا لمكان يكعدون بي العوائل، وبلشن يسخنن
الأكل واحنا نساعدهن، صارت لمه كبيره
مااعرف ليش احس رافي يتحسس من ولد
خالاتي،؟
تونسنا وارتاحينا نفسيا، ودعنا المكان على امل نعود بزياره جديده وعدنا الى بغداد
خلصت العطله وصار لازم نرجع نداوم سيف اصر ارجع ويا واعوف الخط بس ماوافقت
اتصل رافي وحجة ويايا بالموضوع، وهم ماوافقت
رافي: نورزان انتي ليش عنوديه ؟
نورزان: مو شغلت عناد بس مترهم يوميه اكول لبابا ابطل وارجع هي مو لعبه
رافي: نورزان اني اجي احجي ويا، ان لزم الامر
صدكيني طول هذيج الاشهر واني بالي عليج
وخايف، الوضع مو تمام
نورزان؛: ماكو شي حالي حال البنات ألي بالخط
ليضل بالك
ماوافقت رغم ألحاحه، اصلا اذا زيد درا يكلب الدنيا
داومت ثاني يوم كنت امشي وصار نفسه الولد العسكري هو واثنين جنود ويا، سلم عليه
رديت السلام ومن بعدها كلت( تفضل )
--اريد اخذ من وقتج دقائق اذا تسمحين عندي كلام وياج
_عفوا ماعندي وقت عندي محاضره
مشيت ورد وقفني
--بس دقائق ما راح تأثر عليج.... بعدني مارديت رجع كمل
--ليش رفضتيني؟
_تفاجات!! وصفنت بوجها،
وكتله، ...
_عفوا مافهمت،شنو قصدك ؟
--قبل اسبوع دزيت اهلي خطبوج، وانتي رفضتي
حتى بدون متشوفيني او تعرفين عني شي
_انت كلتها مااعرفك شلون اوافق عليك؟
--زين انطيني فرصه نتعرف، وبعدها احكمي
جاوبته ناهيه هل نقاش
_اسفه كلشي قسمه ونصيب، واني مااخذ غريب
طبعنا ناخذ بس اقرباء، واني محجوزه لأبن عمي
من رخصتك
عفته ومشيت بعد ماسديت الطريق بوجهه
عرف ولف تعالي وافقي عليه،اصلا حتى ماارتاحيتله، اني احس شايفته كذا مره بس ماأتذكرت وين
سديت موضوعه بس كلت لأمي وريام
مرت الايام عاديه بين بيت ودوام وبين رافي ألي صار ميمر يوم اذا ميسأل وكلامه كله تلميحات
واني هم صراحه موخاليه صح اكابر واكول لاهذا وهم بس كذب لا احس بداخلي شي متغير
واتلهف اله معقوله ياربي هيج الانسان
يتغير داخله، ؟معقوله بعد ماكنا نشوف واحد الثاني بنضرات مختلفه تتغير مشاعرنا؟
صرت كل عقلي اتخبل خبال من وسن لودخلت
بيتهم،اعرف ميعبرها ولايريدها بس هي بينهم خطوبه هل شي كافي حتى يخليني اغار منها
مره رافي انتبه لتصرفاتي ونضراتي الها
وسالني...
رافي :ليش تضوجين من وسن؟
ماعرفت شنو اجاوبه وخجلت
رافي :انتي الأصل نونايتي ، انتي الأصل
بوكتها متت بدمي حسيته فاهمني وكاشفني
لا وفرحان لوضعي
.
.
بعد شهر من الدوام، كان يوم جمعه، قبل بيوم اجه اتصال على والدي ماافتهمت شنو ولا منو
ثاني يوم من الصبح امي كعدتنا نضفنا البيت
بعد الغدا منشوف الاسيارات توكف يم بابنا
الضاهر امي وابويه عدهم علم مااستغربوا
حتى زيد شكله يعرف
اني وريام صرنا نباوع من الشباك دخلوا زلم هوايه
زلم هوايه ضلينه نتسائل شنو السالفه ومنو هذوله؟!،
صرنا نسمع صوت سوالف وضحك اصواتهم واصله لي يمنه، طلعوا وأحنا رحنا على والدي نستفسر منه
ريام: بابا منو هذوله؟
ابو زيد: هذوله مشيه جايين على اختج يخطبوهه
نورزان: اني هنا اتصنمت، هاي شديكول
_بابا انته شتكول همه منو هذوله؟
، وبعدين غير تجي نسوان بالأول شنو هل الزلم؟
ابو زيد: ليش قبل فتره مو جايات وانتي وامج
راداتهن بدون متكولن،والولد رد رجع و جاب زلم وجاي، يقنعنه، الضاهر مصر
زيد: اي بس هو خوش ولد مينرد
نورزان: منو حدد خوش ولد وانته شعرفك بي؟
زيد: چان جيرانا من چنا بذاك بيتنا
نورزان: لا والله عود صدك تحجي؟
احنا من شلنا كنا صغار شلحكت تعرف عنه
زيد: عوفج من هل العنطزه مالتج...
اني اكول وافقي وخلص، خلي الباجر نردلهم الموافقه ترا شاب ميتفوت
نورزان: ليش احس كاعده على گلبك وياهو اليجي
تريدني اوافق؟
زيد: دلصمي حلگج عود حجت، انتي ثوله وين
تعرفين مصلحتج، مو زين ندورلج الخير
نورزان: وهل خير مااريده وماموافقه عليه
وسدوا السالفه
زيد: شلون ماشوف تاليتج بايره وكاعده على گلبنا
نورزان: لتخاف عليه، وحتى لو صارت كاعده بجاه ابويه ونعيمه،ماراح اكل من چدك...
مو صح بابا لو انته هم متريدني؟؟
ابو زيد: يعني ماموافقه؟
نورزان: اي بابا مامقتنعه بي، من اول مره ماعجبني
ابو زيد: حتى ارد خبر ألهم ماكو نصيب
زيد: يابه تحجي صدك تمشي ورا كلام هاي الزعطوطه؟، هي وين تعرف مصلحتها؟
ريام: اي وانته ألي تعرفها مو،؟ترضى احد يزوجك على مزاجه،يعني احنا عدنا بنات خاله وبنات عمات وعمام،ترضى ابويه يكلك عدنا هوايه بنات ومتاخذ
غريبه شنو يكون ردت فعلك
زيد: بسيطه ريام اني اعلمج
ام زيد: سدوا السالفه ولتلحون اني اصلا مااحب
امه لهذا العريس من زمان مااطيقها، خلي تولي
ردولهم خبر ماموافقين وخلص
نورزان: قصه صارت ناس تجر طول وناس عرض
عفتهم وصعدت لغرفتي واني اغلي من الداخل
ابويه من كلت اعيش بجاهك، ماجاوبني ولا احترمني وزيد بس يريد يخلص مني كاعده على كلبه وامي عبالي رافضه على رفضي طلعت متحب ام الولد، شنو هل العائله العضيمه، الي مليانين حب وحنيه خلف الله على ريام بس هي اهتمت لأمري ومن احجي يكولولي عايشه دور المضلومه وأحنا موفريلج كل شي شنو الفائده وأني ماشايفه منهم لاحب ولاأهتمام ولاحتى أحترام
زيد طلع وامي وابويه عفتهم يتناقشون شفت براء متصله بيه،،، يوووه ؟!!!هاي شكم مكالمه حارگه الموبايل بأتصالاتها،،، شكو شنو صاير ضل بالي ،
اتصلت بيها من اول رنه جاوبت بسرعه
اجاني صوت رافي، عصبي..
رافي: نورزان هاي شنو السيارات ألي چانت واكفه يم بابكم صحيح هذوله خطابه عليج؟ وينج احجي يمعوده لتخبليني
نورزان: صاير نار من العصبيه،خفت حتى ارد اخر شي تجرأت وجاوبته......،اي صح
رافي: لتكولين وافقتي واليوم هذي مشية الزلم؟
نورزان: لا همه خطابه
رافي: ولج ياخطابه، ؟؟ غير تجي نسوان بالأول
اخاف هذوله قروا الفاتحه وانتي متدرين؟
نورزان: شنو السالفه رافي، يافاتحه،
وبعدين انته ليش هيج معصب، وتحجي ويايا بهل طريقه؟
رافي: غير لو ضل عقل براسي كوليلي، انتي وافقتي شنو الصار فهميني؟
نورزان: حجيتله كل ألي صار، وهو رجع خطبني مره ثانيه، وهنا جن جنونه
رافي: ادري رفضتي وكلتيله محجوزه بعد يجيب زلم ويجي على اي اساس، ليش ديلح؟
نورزان: هنا ردت اشوف واتأكد من مشاعره ألي شاكه بيها،كتله...
_هو مبين خوش ولد ومناقصه شي، واهلي شبه مقتنعين بي، والضاهر ماراح يستسلم، راح هم يدز
بعد ناس
رافي: يعني راح توافقين،؟
نورزان: مااعرف
رافي: نورزان انتي تعرفي؟ عندج مشاعر اتجاهه؟
نورزان: لااعرفه ولاعندي شي، مجرد خوش نصيب
رافي: نورزان لتوافقين عليه
نورزان: ليش؟
رافي: صدگ للأن متعرفين ليش، ؟ صدك ماجاي تفهميني؟شسوي بعد حتى تفهمين، مو طكت روحي
نورزان: ابتسمت ابتسامة انتصار ماضل عندي اي شك نبرة كلامه وعصبيته اصلا كافيه،
بس ردت ينطق الدره لكن مع الاسف، امي قاطعتنا، من دگت الباب عليه خفت ونهيت الأتصال بسرعه كمت فتحت الباب
ام زيد: ليش قافله الباب؟
نورزان: ردت ابدل وكلت اخاف زيد يجي يحاول يقنعني
ام زيد: اي صح اشو هذا لح وافقي ماوافقي
مدري شعنده، يله على العموم، معليج بأحد
اني امه ماارتاح ألها ولااحبها اخاف بالليل يدز عليج ابوج حتى يتأكد ويردلهم خبر لتوافقين
نورزان: اي ماما هاهيه
راحت، واني كلت همزين خلصت،اجتي ريام، دخلت للغرفه، واني مامنتبه ألها كاعده سارحه بكلام رافي و اوزع ابتسامات،
ريام: ها نورزان خيرج اشو جوا قبل شويه تلطمين
هسه توزعين ابتسامات واكو ناس حسب ماافتهمت من براء، محترگه حرگ شنو سالفتكم انتي ورافي؟
نورزان: ولج اشش،،،اخاف احد يسمعج،تعالي اني اسولفلج، بس نصي صوتج،، سولفت لريام كل شي،
ريام: ههههه والله اني وبراء كنا حاسين وحتى متراهنين عليكم، بس انتي طلعتي مطفيه
نورزان: لاوالله شوف منو يحجي؟ علساس انتن امهات الفهم والعلم
ريام: تدرين من شوكت الاخ هايم ومتيم
نورزان: من شوكت؟
ريام: تذكرين بخطوبة احمد وألي سوا،هو ألي سوا كله لأن غار عليج بس انتي ماأفتهمتي وحتى بسالفة امير هم،ترا الولد صار فتره طويله هو عاشق
وحتى بالبيت حاسين عليه بس هو كان ميعترف
نورزان: وألي يسمعج يكول هسه اعترف؟
ريام: كل هذا ومامعترف ؟شتريدين يجيب فرقه موسيقيه ويوكف بشباك غرفتج، ويغني ويعترف
ونصير مسلسل مكسيكي مال ايام التسعينات من هذا الزين
نورزان: ههههه والله فكره
ريام: نورزان انتي هم تحبي مو؟
نورزان: مااعرف اذا هذا حب بس اعرف احساس محاسته بحياتي وحتى اغار عليه، من وسن
ومن طالبات الكليه،،، حتى لو بيدي اكله بعد لتجي
للجامعه
ريام: هههههه لايابه وين تحبي ...انتي طلعتي واكعه ومحد مسمي عليج
نورزان: ماكدرت اتقبل هل شي بالبدايه حسيته ماراهم واستغربت شلون مشاعرنه تغيرت
لكن من رحنه للزياره، الكلام ألي گاله اثر بيه
وحسسني شكد مهمه عنده وكاعد يدعي وينذر نذور حتى اصير أله،
بوقتها هم شككت قصده عليه بس كل يوم يمر وخصوصا اليوم تأكدت شكوكي وماعاد اكو شك
ريام: لا ترا فعلا قصده انتي حتى براء سامعته يحجي ويا سمر واليوم من شايف السيارات وسامع بالخطابه متخبل، ويكول لواني ابن عمها چان هسه فتت عليهم وطردتهم، وأخذتها
وصار يغلط ويسب على وسن ويتهدد وخلص قرر ينهي كل شي وشيصير خلي يصير
نورزان: ريام صح اتأكدنه من مشاعرنه بس منو يكول اهلنا يوافقون؟
ريام: الله كريم خليها على الله صرت متأكده رافي متعلق بيج وميت عليج الى درجه ميعوفج لغيره
لو يعرف يكابل ابويه ويكعد حتى يقنعه
اني خايفه بس ليعترض على فرق العمر
نورزان: يافرق هو ١٠مدري١١سنه ترا مو قرن بينا
وحتى هذا الولد ألي اليوم خطبني ترا مو صغير
هم يطلع اصغر من رافي بكم سنه
ريام: ممم،، شوف الحب عيني حتى الفرق بعد ميهمها، خلي اروح ادرس يله باي
نورزان:كعدت افكر بكل الصار و بالي على مشغول البال هسه بيه ومشتعل نار الى درجه كل شويه براء تتصل بريام تحلفها اذا رفضنه العريس لو لا،
الضاهر مجند براء تعرفله كل السالفه مامصدك، واني اضحك على سوالفهم وخططهم المفضوحه
