رواية اسيرة بين يدي قاتل ابي الفصل الحادي عشر11 بقلم نور آل زيادة
وقد تعيش محاطآ بالأوهام تدعي الثبات ولست بثابت...
لا الحلم كان حلمك ولا الطريق طريقك ꧁꧂
بارت طويل لعيونكم تعبت بي أرجو تقدير تعبي بالتصويت والتعليق
_________
سيلين،،،احجي وهو صافن بوجهي و يحك حاجبه بتوتر نزل راسه ورفعه وبلحضه ركض بأتجاهي وشالني وركض
أنرعبت من الموقف ضربت على ضهره حتى ينزلني وهو مامهتم صرت اصرخ وجسمي يرجف من هول الموقف
اضرب على ضهره وهو ولا يمه اخر شي نزلني عطت بوجهه وضربته على صدره ولاتأثر
ابتعد بسرعه وركض شال گرك وراح لنفس المكان الكنت واگفه بي صار يضرب بالأرض من انتبهت شفت َحيه سوده ضل يضرب بيها الى ان انقطع راسها ضلت تنفض حفر بالأرض ودفن راسها كل هذا واني واكفه وأرجف من الموقف اندارلي ومسح جبينه المتعرق
ابو طبره،،، لتخافين ماتت
سيلين،،، ماشفتها ولاحسيت على حركتها يمي
ابو طبره،،، لعد ليش يسموها حيه هي تتسحب بهدوء وتلدغ
سيلين،،، اسفه ضربتك ماتوقعت ولا چنت اعرف انت بتصرفك قصدك تحميني منها
ابو طبره،،، شمدريج قابل،،، ردت فعلج طبيعيه بس كلت اذا أنبهج راح تخافين ويمكن اصلا مالحك عليج وتلدغج لحد ماافهمج أكو حيه قريبه عنج تكون لدغتج ولهذا تصرفت بسرعه
سيلين،،، شكرا ألك
ابو طبره،،،ماكو داعي للشكر اعتبري اعتذار مني على كلامي بأول لقاء
سيلين،،، صح ضجت من اول موقف ألنا بس نسيته من شفتك ثاني مره
ابو طبره،،، هو حتى ثاني مره جفصت بكلامي
سيلين،،، تعلمت بحياتي ماأحكم على البشر عن طريق كلامهم وأنما بتصرفاتهم وافعالهم انت صح انسان لسانك متبري منك بس افعالك مختلفه والدليل صار مرتين تساعدني مع انو انت متعرفني انت مبين شخص داخلك جيد بس لسانك السليط عام عليك
حك طرف حاجبه ورد...
ابو طبره،،، زين هسه انتي مدحتيني لو ذميتيني؟
سيلين،، ههه،،،، ثنينهن عالعموم استاذ ابو طبره سعيده بلقائك وممنونه منك وفرصه سعيده رجعت ألتقيت بيك
أبتسم وحك طرف حاجبه للمره الألف ....
ابو طبره،،، تدرين انتي اول وحده اسمع منها هل كلام واول وحده متحكم عليه من ورا لساني
سيلين،،، قانوني بالحياة افعال الأنسان هي الحقيقه الوحيده،،،،من رخصتك،،، وشكرا مره ثانيه
رجعت يم جماعتنه لكيتهم يشربون قهوه وسراج ماموجود شويه وترخصوا الولد أحنا هم قررنا نطلع اجت اسماء تمشي من طريق البيت وصاحت علينه
اسماء،،، بنات تعالو يريدن يسلمن عليكم رجعت لبست مناضري اخفي عيوني وتقدمت من شفت بنات ديطلعن من باب جانبيه للبيت تقدمت اول وحده تسلم بأبتسامه بشوشه لمياء انهز شي بداخلي واني اشوف صديقتي ألي انتهت علاقتي بيها من سنين
اباوع عليها كبرانه وضعفانه ومتغيره لكن باقيه ابتسامتها ووجها البشوش سلمت علينا كلنا ورحبت بينا عرفتنا على كم بنيه واكفات يمها وأنصدمت صدمة حياتي من تقدمت وحده بأتجاهنا سمينه وقصيره لابسه قفطان برتقالي بس برتقالي من هذا الفسفوري وخاله طن مكياج ولابسه طن ذهب يخرخش من تمشي ولابسه براسها قراصه ورده عملاقه اكبر من حجم راسها وحاجبها من هذا السيف صارت تباوع علينا اني والبنات بأستصغار
لمياء،،، هاي اسراء مرت الشيخ
سحر،،، احم،،، هاي مرت الشيخ؟!!
اسراء،،، اي عيني اني مرته وام بناته والشيخه
اسماء،،، اهلا وسهلا
سيلين،،، مبين وواضح موبس اني المصدومه البنات هم انصدمن ضلت تباوعلنا من فوك لتحت ركزت ويايا بنضراتها ماأهتميتلها سلمت ومشيت والبنات اجوي ورايه اسمعهن يعبرن عن صدمتهن بمرت الشيخ بس صدمتهن متجي شي امام صدمتي
ضليت اتسائل... هي هاي البعتني علمودها ياسراج؟ هي هاي ألي اختاريتها تكون زوجتك وام اطفالك؟ زين بشنو احسن مني؟ لاوالله من دون مبالغه ولا غرور بس متوصل لأضفري صح شكلها زين ومابي شي بس وضعها وجسمها من السمن صاير طيات ماعدها حتى خصر صاير جسمها عدل مستطيل قدمها مفطره كل فطر شكبره ولبسها وطريقة كلامها يدل على انو وحده ڤولكير بأمتياز
وصلنه للباب وشفت سراج واكف وصراحه وجهه ماعجبني ولاوضعه عيونه حمر وشكله تعبان تقربت منه وهمست...
_بيك شي ليش احسك موتمام ؟ حتى عيونك حمر؟
باوعلي بنضرات غريبه وابتسم ابتسامه متعبه..
سراج،،، لامابيه شي بس شويه تعبت
سيلين،،، سلامتك،،، ديربالك على نفسك وارتاح وچيك ضغطك
باباااا،،،، بابااا
درت وجهي على الصوت ولمحت طفله تركض ناحيتنه وصلت يم سراج ومسكت ايده
-- بابا حمودي يريد يضربني
اقبال،،، ماشاء الله هاي بنتك شيخ؟
سراج،،، اي هاي بيلين
سيلين،،، كال هل كلام وباوع عليه امتعضت منه لأن مسمي بنته هل اسم كان المفروض يكون اسم بنتنا اني ويا شلون يسمي؟ كلش ضجت
سراج،،، سلمي بابا
سيلين،،، تقدمت الطفله واضح عمرها اصغر من سيف سلمت علينه وصاحت بصوت عالي
بيلين،،،،، تعالي سيليييييين
سيلين،،، ركزت اريد افهم واستوعب على منو دتصيح ومنو سيلين ؟ اباوع على سراج اريد افهم لكن ماشفت اي جواب للأسأله ألي تدور بدماغي الى ان طلعت من الباب الداخليه للبيت بنيه صغيره تمشي بصعوبه مااعرف شبيها رچلها و تمسح بعيونها تقدمت بأتجاهنا كانت نسخه من بيلين لكن هل اللبنيه شقراء وعيونها عسلي فاتح
بيلين،،، هاي اختي سيلين
سيلين،،،صردت اردد ويانفسي....
_ سيلين؟!!! كالت سيلين لو اني متوهمه؟؟!! من صدمتي ضليت صافنه بوجه سراج وهو مركز يشاهد ردت فعلي،،،عيوني بدت تجمع بيها الدموع معقوله مسمي بنته على اسمي؟ زين شلون هيج؟ وشلون امها وافقت وتعرف سيلين خطيبته السابقه؟
فاطمه،،، هاي شنو طلعت كل سيلين حلوه؟
اسماء،،، هههه،، هسه دااكول ويا نفسي هل شي
سيلين،،، قطع أفكاري وتسائلاتي صوتها وهي تسلم عليه نزلت لمستواها وسلمت عليها باوعت بوجها وجها وعيونها حمر مبينه كانت تبجي شفت نفسي بيها رغم هي مو بنتي بس عبالك بيها شبه مني،، حسيت دموعي راح تنزل اتماسكت لكن ماكدرت امسك رغبه بداخلي انو احضنها شعور غريب أجتاحني اتجاهه مشاعري تخربطت وكل قوتي انهارت واني اشوف سيلين الصغيره بنته للشخص الكان بيوم من الأيام خطيبي وحبيبي
اقبال،،، ههههه لأن اسمها سيلين حبيتيها؟
اسماء،،، سبحان الله هي موبس الأسم حتى بيها شبه من سيلين
سيلين،،، رفعت راسي شفت سراج يباوع عليه بتركيز ويبتسم تقدم مسح على راس بنته
ماتحملت ابقى أكثر بستها للطفله وسلمت وطلعت ركبت سيارتي واني احاول اهدىء من مشاعري شفت البنات حايرات صحت عليهن اوصلهن ويايا صعدن كلهن ويايا انطلقنه متوجهين للمكتب
اقبال،،، ماشاء الله هاي سيارتج؟
سيلين،،، اي
اسماء،،، ولج سيلين طلعتي طاكه صدك
سحر،،، صدمتنه بيج لاشىء كدام صدمة ميساء رادت تنجلط ألا شويه طول الوقت شايفه نفسها وتستهزء بالبشر عبالك بنت الباشا واني متأكده تعيب بالناس وتقلل وهي ماعدها شي فارغه
فاطمه،،، عوفكم من صدمة سيلين وميساء الصدمه الحقيقيه اليوم هي مرت الشيخ
سحر،،، اسكتي لتذكريني ،،، لا وبنت اختها تنفخ تكول خالتي تجنن
اقبال،،، ترا زينه مابيها شي
فاطمه،،، حبيبتي انتي الحلوه ومابيج شي عوفي المجاملات،،، ولج كفر والله كفر هاي مرت الشيخ سراج هو وهيبته ووسامته وشخصيته وجسمه وطوله،،، بربج هاي مرته؟
هسه دعنا عن شكلها خلقة الله وتعتبر زينه مابيها شي بس شفتي جسمها شسمنها ولبسها الآوڤر وطريقة كلامها وأسلوبها فطور رجلها من كبرهن ينام بيهن جريدي والمشكله واضح وضوح الشمس اكبر منه بالعمر هو وين وهي وين هو بس كشخته كافيه
اسماء،،، اكو حلقه مفقوده بالموضوع موكالو علساس الشيخ يحبها لمرته اليوم اكتشفت هاي هم كذبه
سحر،،، شلون يعني؟
اسماء،، اني مو دخلت جوا بالبيت لكيت اخت الشيخ تتعارك ويا مرته وترزل بيها تكوللها لو يوصل للشيخ شلون تأذين سيلينه دقيقه ميبقيج على ذمته الكل يعرف انتي باقيه علمود البنات وأي تصرف غلط يسحب بناتج ويطلكج
سيلين،، ليش شنو تأذي بنتها؟
اسماء،،، اي من فتت لكيتها تبجي ومفرفحه مچويتها بزرها وحسب مافهمت هاي مواول مره
سحر،،، اوي سوده عليه هسه عرفت ليش طلعت تعرج برجلها ودموعها بعينها شلون گلبها ينطيها تأذي بتها
أسماء ،،، تدرون شكيت موبتها
سحر،،، ترا بناته توأم شلون موبتها
اسماء،،، اي صدك هاي فاتتني بس ماادري تصرفها واذيتها للطفله شككتني مو هنا مربط الفرس بس الفهمته علاقة الشيخ بمرته مو زينه ومبقيها علمود بناته
سحر،،، والله ماأستبعد بعد شي وصرت متأكده هسه يطلع كلام بنت اختها كله كذب اني من شفتها غسلت ايدي ولكم تكول خالتي تخبل وتجنن هاي اول كذبه والضاهر كله كذب بكذب كلامها
اسماء،،، اليوم هواي لاحضت علامات استفهام بحياة الشيخ ومن ضمنها كلام ميساء على اسم الحصان
اقبال،،، تصدكون صار سنين اشتغل ويا الشيخ ولامره صار عندي فضول اتجاه حياته الشخصيه بس اليوم ضل أبالي كلام ميساء منو هي زمرده وشنو معزتها الى درجه يسمي مهرته عليها وليش يكولون كل مايختفي يلكو يمها
فاطمه،،، وأنتبهتوا شلون مصطفى ضاج ونتر بميساء وكلها خصوصيات خالي خط احمر ومنحجي بيها حتى بينا مو عاد كدام الغربه
اسماء،،، نفس الأساله ألي بالي
فاطمه،،، مبين كلش واضح الشيخ عنده ماضي وجان يحب وحده ويجوز ماصارت أله او ماتت
سحر،،،، او زمرده هي نفسها خطيبته السابقه ألي سمعنا بيها ويجوز هم يطلع كذب كلام بنت اختها لمرت الشيخ ويطلع أنحرم من خطيبته وضلت حسره بگلبه
سيلين،،، ضلن طول الطريق يحجن بهل موضوع واني اسمعهن وساكته احس فوضى بدماغي صارت وأسأله هواي
موضوع المشمش وشلون صار يحبه وهو مياكله؟ وفوكاها تارس بستانه اشجار مشمش وموضوع المهره ألي مسميها زمرده واكيد مو صدفه هذا لقبي وصدمتي بمرته وهيئتها يعني لو متزوج ميساء هم اشوفها هواي افضل و كلها بكفه وأسماء بناته بكفه ثانيه خصوصا سيلين،، شلون كدر يسمي بنته بهل الاسم والكل يعرف سيلين خطيبته السابقه؟ وليش سماها على
اسمي؟ وهو ألي أختار يتزوج غيري قبل موعد عرسنا بأيام
كل الديصير ماأله غير تفسير واحد انو سراج فعلا حبني وماحب مرته ولايهتم حتى المشاعرها والدليل سمى بنته على اسمي
زين اذا يحبني لهل درجه شلون كدر يخوني ؟ حتى لو أفترصنا أنجبر تبقى خيانه وغدر ،،، شنو كان متوقع من تزوج غيري مثلا اوافق اكون زوجه ثانيه؟
هواي أسأله تدور براسي ماألها جواب وحتى لو لكيت جوابها ماراح تتغير الحقيقه اني انغدرت وتأذيت وتدمرت حياتي والسبب سراج
وصلنا للمكتب وطول الوقت اني بالي مويم العمل كل شويه اسرح،،، صدمات اليوم خربطت موازيني ماصدكت اخلص وارجع للبيت سويت روتيني ول الليل اني افكر ومتأثره وأسأله براسي ماكو شخص يكدر يجاوبني عليها غير سراج نفسه ماتحملت راسلته كتبت...
(ليش؟)
ثواني ورد ب...
(؟؟؟)
سيلين،،،(ليش سميت هل الأسم)
اتصل بيه جاوبت بسرعه
سراج،،، شنو تريدين تعرفين؟
سيلين،،، من حقي اعرف ليش سميت بناتك هل الأسماء وبالتحديد ليش سميت سيلين؟
تنهد وجاوبني...
سراج،،،، كان هذا الحل الوحيد حتى أهدء وأسكن ألم گلبي وروحي بعد ماخسرتج ردت اي شي يحسسني بوجودج بحياتي حتى لو اسمج من ينذكر بالبيت
سيلين،،، وتسكنت روحك وألم گلبك؟ أرتاحيت؟
سراج،،، مع الاسف،، لا،،، حتى وجود اسمج بحياتي ماصار بديل عنج ولاعوضني عن خسارتج،،، اول مانولدن بناتي مااهتميت وحتى كلتلهم انتو سموهن لكن من شفت سيلين شفتج بيها شي بداخلي تحرك وهزني مالكيت نفسي غير مسميها على اسمج
سيلين،،، نزلت دموعي على كلامه جاوبته...
_ لو ما مسميها هواي احسن،،، اني ماشفت راحه بحياتي وأنضلمت وهسه سيلين الصغيره دتعيش نفس قدري بس لأن سميتها على أسمي
سراج،،، الصار وياج وعشتي صار غصب عني،، أما بالنسبه لبنتي فماعاش ألي يأذيها ويضلمها
سيلين،،، لاعايش ومتجبر وديأذيها ومثل ماتأذيت بسببها لهل الأنسانه هسه سيلين الصغيره هم دتتأذى بس لأن اسمها على اسمي انت غلطت من سميت هل الأسم وتعرف ماكو امرآه تقبل بنتها تتسمى على اسم خطيبة زوجها السابقه
سراج،،، لتخافين متكدر تأذيها
سيلين،،، شوف موقصدي احرك عليها او غايتي المشاكل بينكم بس گلبي احترك من سمعت مرتك تأذي سيلين
سراج،،، مستحيل لو اكو هيج شي اهلي يوصلولي
سيلين،،، اهلك ميوصلولك يخافون من المشاكل خلي أبالك اليوم مرتك حارگه سيلين بفخذها سراج اذا ألي معزه عندك لو واحد بالميه احمي سيلين وحافظ عليها لتخسرها مثل ماخسرتني ولتخليها تتأذى مثل مااني تأذيت لتسمح لأي شخص يضلمها،،، غلطت من سميت هل اسم لكن فات الأوان للعتب اليوم من شفتها شفت نفسي بيها حسيتها كأنما بنتي وقطعه من روحي ارجوك سراج احميها
سراج بغضب،،، خلي اروح سيلين وبعدين اتصل بيج
سراج،،، الله يخليك لتنقهر ولتعصب حل الموضوع بهدوء ليصير بيك شي من غير شي اليوم وضعك ماعجبني لتخلي بالي يمك
سراج،،، اااااااااخ ولج شدسوين بيه بهذا كلامج ليش مصره تلوعين گلبي
سيلين،،، ليش شنو حجيت؟
سراج،،، ماكلتي شي يباا اخذي راحتج
سيلين،،، نهينا الاتصال لكن ماانتهت سلسلة افكاري فعلا كانت مشاعري صادقه أتجاه سيلين هل طفله حبيتها والغريب مشاعري تخربطت أتجاه سراج وصار عندي تردد انو اكمل بخطة انتقامي الصار وسمعته اليوم اكدلي سراج حبني صدك ماضحك عليه بمشاعره،،،،، غفيت واني افكر....
...........................
لمياء،،، اليوم الشيخ قرر يسوي عزيمه بمناسبة تخرج مصطفى ألي بالأساس هو ساعده ووكف ويا وقدمله كل شي حتى ياخذ هل الشهاده فضل علي وقدمله مثل ما قدم وفضل علينا كلنا بهل بيت
اجوي گرايبنا كلهم اهل ابويه واهل امي ومعارفنه وحتى اليشتغلون وياالشيخ لكن كالعاده لازم بجمعاتنه تبدي المشاكل والقال والقلت اهل امي ماطايقين اهل ابويه والعكس ايضا
من الصبح نركض حتى نوجب ضيوفنه بشكل يليق ببيت الشيخ اني واختي ونسوان اخوتي بهاء وباهر وبنات خالاتي كلنا نتعاون بس بنات عماتي كاعدات عرايس وبالأخص بنت عمتي اسراء مرت سراج ألي المفروض هي توجب الضيوف لأن مرت الشيخ هي حايره بس بالأكل والقال والقلت والمشاكل نحجي ميفيد وامي تطمطملهه لأن تعرف سراج يريد عليها حجه حتى يطلكها
من توفى ابويه وجدي هو راد يطلكها لكن ألي موكفه وكاسر ضهره بناته ميريدهن يتشتتن بين ابوهن وأمهن ورغم اسراء تعرف وجودها مرتبط ببناته لكن متجوز من أذية سيلين واكيد الكل يعرف السبب وليش حاقده على هل طفله وتأذيها كان اكبر غلط سوا سراج من سماها هل اسم
بس سبحان الله سيلين الصغيره صارت بلسم ومهدء لجروحه هي الشي الوحيد الصبره كل هل سنين رغم ميفرق بينها وبين أختها لكن كلنا نعرف سيلين معزتها مختلفه
اليوم بعد الغدا أجتي سيلين لأمها وكالتها
جوعانه مااكلت،،، كالت هل الكلام وكأنما كفرت موطلبت اكل صارت تعيط عليها
اسراء،،، ماتزقنبتي حالج حالنا وحال الكل وين جنتي؟
ام بهاء،،، ماصار شي يمه الأكل خير من الله كومي صبيلها
اسراء،،، لاوالله مااصبلها طبها مرض خلي تتربى هاي هواي استرعنت الدلال طلع عينها
لمياء،،، كومي عمه اني اصبلج
اسراء،،، لا متصبيلها
لمياء،،، هاي شبيج البنيه جوعانه شنو هل التصرفات و منا البيت مليان خطار
اسراء،،، انتي لتدخلين بيتي وبنتي وكل شي هنا ملكي وملك جهالي ورچلي وبكيفي اتصرف
لمياء،،، اسراء اتچفي الشر وضبي لسانج لأن لو وصل هل الكلام للشيخ ماراح يصير خير
عفتها وأخذت سيلين صبيتلها اكل على الميز بالمطبخ كعدت تاكل واني بلشت ارتب باقي الأكل الضال بالجدوره الزين والنضيف حتى نوزعه للناس المحتاجه والممرود ننطي للحيوانات انداريت على صرخة سيلين لكيتها مفرفحه وتگمز بمكانها
_ولج عمه شبيج؟
اباوع على اسراء بيدها كاسة السوب مال اللحم الحار
سحبت سيلين من يمها ودموعها بعينها ومفرفحه شفت ملابسها بيها سوب عرفت اسراء دايره السوب عليها رفعت ثوبها لكيت زرها احمر دم مهموط همط لأن السوب حار،، تخبلت عليها شلتها غسلتلها وطلعت من الثلاجه عصارت الحروق خليتها والطفله تبجي و تلوب من حلاة روحها وألمها
اباوع اسراء واكفه بكل صلافه وتبتسم وماكفاها جرت ماعون الأكل مال بتها وكعدت تزقنب بي مثل الهايشه وين ماتلكي علف تعلف
خلصت وذبت الماعون ومشت تضحك
طلعت شراب مسكن شربتها شويه وهدئت من شفت سيلين هدئت صحت على بنتي اخذتها للغرفه وأني رحت للصاله انهديت بأسراء
_خلي أبالج لويدري الشيخ دقيقه متبقين بهل بيت ألف مره محذرج وميفيد بيج ولج انتي شنو من بشر؟ اكو وحده تحرك بتها؟ شحسيتي من هيح سويتي وخليتيها تفرفح؟
عمتي،،، قابل شصار ام وتربي بتها انتي لتدخلين
لمياء،،، لاادخل ونص تذكرو زين الشيخ مبقيها هنا علمود بناتها وهي شاده ويا سيلينه عبالك عدوتها
ام سراج،،، يمه اكصري الشر وسكتي عيب من خطارنا ولتوصلين للشيخ وتكبرين المشكله طفله غلطت وأمها عاقبتها
لمياء،،، وهي بشنو غلطت لأن جوعانه ورادت اكل؟ الله واكبر عليكم ضلو طمطموا عليها لما هل بيت ينهجم على راسنا وسراج يمسحنا كلنا وياها
اسراء،،، احجي عن نفسج اني ام بناته
لمياء،،، بناته وانتي عايفتهن،،، بناته وأنتي حايره بروحج وبالقال والقلت ومتدرين عنهن شي بس وقت الأذيه تعرفين انتي أم وتحاسبيهن ،،، شلون انطاج گلبج تأذين بنتج هيج؟ فرفحتي روحها وحرمتيها تاكل حسبي الله ونعم الوكيل بيج
اسراء،،، انتي بس لتدخلين وحيري بجهالج احسلج لأن اذا كلتي للشيخ اني هم اكول لأخويه ياخذ جهاله منج واريد اشوف شتسوين
لمياء،،، حسبي الله ونعم الوكيل
عمتي،،، كافي ولج اشو انتي لاتحترمين ولاتحشمين احد مواني وعمتج وجديتج كاعدين بوجهنا تتحسبين على بنتي ورانا ستسوين؟
لمياء،،، فريت ايدي ومشيت للغرفه اشوف الطفله شنو وضعها شفتها دموعها بعينها،،، سوده عليه لويدري ابوها غير يتخبل كل شي ولاسيلين هاي روحه من الدنيا الشي الوحيد الخلا يتمسك بالحياة ويرجع يعيش
شفتها هدئت وتسكن وجعها طلعت يم الضيوف وشكد عيب شفت وحده هسه يله انتبهتلها كاعده،،، كالو تشتغل وي الشيخ بالمكتب صارت الهوسه كدامها هسه شتكول علينه
ترخصت تطلع وطلعنا وياها نسلم على البنات الجايات وياها،،، ماشاء الله شلون بنات مرتبات وحده احلى من الثانيه بس اكثر وحده جذبتني ام المشمشي فاله شعرها شطوله بلون الذهب تلمع من البياض والجسم منحوت وياطولها عبالك عارضة ازياء تخبل
الشيخ من يشوف هيج بعد وين يگلب اسراء ولو هو فدوه لگلبه ثكيل ويستحرم ميباوع اعرفه بس والله ألي يشوفهن غصب عنه يضل يباوع هو اني مره وصفنت بيهن
ألي يجلط طلعت اسراء تتمختر متخيله روحهه فد شغله وتحجي بتكبر وياهن انتبهت ام المشمشي مااحترمت اسراء ولاعبرتها سلمت ومشت،،، حيلللل،،، حتى تعرف قدر نفسها مصدگه روحها فد شغله هل الهايشه
راح الكل وأكيد عماتي وبناتهن مقيمات أني ونسوان اخوتي خلصنا البيت ورحت للغرفه سألت على سيلين كالو طلعت وياأختها يم ابوهن
هاجر ،،،، ماما مرت خالو اجت على سيلين هددتها حتى متحجي لخالي وسيلين خافت وضلت تبجي
اسراء،،، الله واكبر هل مره شدتسوي ووين راح توصل وياها
صار المغرب وبلشنه بالعشا وتعشينا وكعدن عماتي وجديتي يقشبن بالأوادم واليكتل اسراء وياهن كاعده تقلد على البنات ألي يشتغلن بمكتب الشيخ والله ياالله هاي مصدكه روحها فد شي عبالها ملكة جمال وتقلد على البنات وهنه كلهن يسون راسها
عفتهن وكمت لغرفتي شويه وسمعت صوت سراج يحجي بصوت عالي طلعت اركض
شفته لازم اسراء من شعرها من يم قراصتها البقچه ويعت بيها
سراج،،، اخاف عبالج سكتتلج مره ومرتين عبالج تتفرعنين وحق من انزل القرٱن ادفنج هنا انتي واليطلعلج،،، كل شي ولا بناتي الف مره محذرج رصيدج بهل بيت بناتج بدونهن انتي متسوين عندي گاله
عمتي،،، شنو هل حجي يا سراج هاي كدامي وهيج تعامل بنتي ورايه شتسوي؟
سراج،،، الشيخ سراج لتنسين حدودج واذا ماعاجبج كلامي اخذي بتج وطلعي
حجيه حكيمه،،،، شنو هل الكلام اشو ماتحشم احد مايوكف بعينك احد تطرد بنتي وحفيدتي من بيت جدها وجدامي؟
سراج،،، البيت بيتي وكلكم كاعدين وعايشين بخيري ماعاجبكم اخذي بنتج وبنتها و طلعوا مامجبور بأحد اني
ام سراج،،، يمه عيب شنو هل الكلام؟
سراج،،، يمه واليرحم والديج لتدخلين لهنا وكافي طلعنها من ماعونها اني بنتي هاي تحرگها لاعاش ولاكان ألي يمس شعره من بناتي احرگ الأخضر بسعر اليابس بناتي خط احمر
لمياء،،، طلع برا ورجع شايل بأيده دبه مال نفط من دون تفاهم دارها على اسراء الكل وكف مفزوع،،، طلع جداحته
سراج،،، مااريد احد يتدخل حتى مااحرك البيت وألي بي
عمتي،،، شدتسوي انت كل عقلك تحرك بتي علمود زعطوطه؟؟
سراج،،، وهل زعطوطه بنتي بنت الشيخ سراج ألي يرشها بمي ارشه بدم
لمياء،،،كال هل الكلام وضرب الباب مال الهول المرايه ألي بالباب تكسرت وجرحت ايده صارت تقطر دم،،، قبل لااستوعب اوحتى اتوجه أله صار العياط بفلس بعد مانفذ تهديده وشغل جداحته وج ثوب اسراء والكل يعيط ويريدون يطفوها دخل مصطفى يركض بيده سطل مي داره عليها وطفت
عماتي وجديتي يلطمن تقربنه عليها مابيها شي بس رجلها شويه حمره مبين محتركه بس حروق بسيطه مبين كل السوا حاسب حسابه و يريد بس يسويلتا فرگة أذن لاأكثر
باوع سراج عليه وعلى امي بنضره خلتني اكره حتى نفسي
عافنه وأخذ سيلين شالها وطلع عرفت اخويه نضراته بيها لوم لأن ماگلناله ولأن سمحنه لأسراء تأذي سيلين وماسوينه شي وهو موصينه عليها لأن يعرف اسراء متحبها
اسراء عاينها مصطفى وفحص حروقها البسيطه جدا وجابلها علاج وكعدت بغرفتها تنوح هي وعماتي وجديتي يمها بأختصار شلة الافاعي المجلحله
انتضرت بره ساعه ورجع سراج شايل سيلينه مبين نايمه وهو لاف ايده المجروحه
ردت اخذها منه ماقبل عافني واخذها صعد لغرفته وهي ويا ترددت اروح ورا لأن مبين للأن كلش عصبي
رحت يم جهالي وكلت بعدين احجي ويا ولو متأكده ماراح يسمعلي اخويه خسرته من زمان رغم جنت اقرب وحده أله وصديقته موبس اخته بس غلطي ميغتفر خسرت اخويه وسندي وحزام ضهري علمود شخص ميسوى ولايستاهل
ومع ذلك رغم علاقتنه تغيرت ماعافني بنص الطريق ومن رجعت لبيت اهلي وردت اتطلك وكف ويايا وطلكني واحتواني اني وابني وبنتي وقدملنه كل شي بس مارجعت علاقتي بي مثل قبل وهل شي ينطبق على الكل سراج هواي تغير وويا الكل صار رسمي وحدي ويانا
كلنا يساعدنا ويوكفلنا ويقدملنه كل شي بس بعيد عنه
صار فتره اشوف وضعه متغير وبس يسرح عبالك عاشگ بلكي الله ويكون نسى ألي بالي وحبله وحده ثانيه تنسي العاشه ولو استبعد هل شي لأن اعرف الى اي مرحله يحبها بس عسى وعلى الله يعوضه ويجبر بخاطره
قطع افكاري صوت الباب دخل مصطفى
مصطفى،،، هاي شنو امي نايمه؟
لمياء،،، اي خطيه تعبت وذبت روحها بسرعه نامت رايد شي؟
مصطفى،،، اي والله جوعان للان على الغده
لمياء،،، سوده عليه ليش مااكلت
مصطفى،،، ماشفتي الصار والهوسه مالحگت أكل اني زين على الأقل تغديت خالي سراج لاغدا ولاعشا
لمياء،،، اكيد من اخذ سيلينه وكلها وأكل
مصطفى،،، اي كال أسماعيل موكلها خطيه ميته جوع وموديها للمستشفى شايلين الجلد المحترگ ومعالجيها ومعالجين ايده مخيطيها أله
لمياء،،، لعد اكيد اكل وياها
مصطفى،،،،لا ما ماكل وغادي نار من العصبيه ميتحاجى وفوكاها من الصبح لسه على الچكاير بس اكل مشمشات هو والست سيلين
لمياء،،،من سمعت هل الأسم انتفضت سألته بلهفه....
_منو هي ياسيلين؟
مصطفى،،،شبيج فزيتي سيلين المحاميه التشتغل ويا بالمكتب
لمياء،،،معقوله ألي بالي لو غلطانه؟؟؟
_اكلك ياهي من البنات ألي اجن اليوم؟
مصطفى،،،ام الثوب البرتقالي
لمياء،،،هاا اي شفتها والله مبين حلوه تخبل ولو ماشفت وجها زين من المناضر وشعرها بس شكلها ولبسها ووضعها يدل على انو هي وحده راقيه
مصطفى،،،اي ماشاء الله حلوه وطاكه والحجي بينا مااعرف ليش احس الشيخ مهتم بيها زياده
لمياء،،، سوده عليه يمكن لأن اسمها سيلين
مصطفى،،، اي والله شلون فاتتني هل سالفه نسيت
لمياء،،، ياريت يهتملها وينسى الماضي بس اخاف مهتم بسبب اسمها او تدري شغله حسيت بيها شويه شبه من هذيج سيلين بس هاي اكبر واضعف واحلى وشعرها طويل واصفر وهذيج عيونها ملونه و محجبه
مصطفى،،، هاي هم عيونها ملونه ولونهن غريب يجنن
لمياء،،، شنو السالفه شنو هل الصدفه يعني لومااشوف وضعها ولبسها ومبين بنت عائله غنيه جان كلت سيلين رجعت بس هذيج بسيطه ولبسها وعائلتها وكل شي بيها بسيط وهي فقيره وخجوله اما هاي مبينه كلش شخصيه قويه وعدها غرور حتى اليوم لاحضتها استحقرت اسراء بيها شبه بس هاي صراحه بعد احلى وتجذب اكثر اول ماشفتها جذبتني مع انو تقريبا كل البنات الأجن حلوات
مصطفى،،، صراحه صدك حلوه وتطك بالكاع هههه والله لويسمعني خالي يشنقني اليوم ماشفتي شلون يقدملها المشمش وهي تاكل يخبلون سوا
لمياء،،، ياالله بلكي الله و يتوالمون ويكتبلهم نصيب وتعوضه
مصطفى،،، خاله يانصيب بربج وحده مثلها تجي هنا وتوافق على رجال متزوح لامن بيئتنا ولاوضعها مثل وضعنا ولامحتاجه ومجبوره تعيش عيشتنا حسب مافهمت حالتها الماديه زينه بستان وبيت يكلج قصر واليوم اجت بسياره تاهو وانتي تعرفين اسعار التاهو هي هديه جابتلياها بذاك السعر
لمياء،،، ليش خالك شنو ناقصه وميعجبها ألف وحده تتمنى
مصطفى،،، صح،،، بس مو ست سيلين لأن واضح كلش موبعينها احد ولايعجبها العجب انسي ألي ابالج على كولتج يمكن معجب بيها لأن ذكرته بالماضي
لمياء،،، الله كريم كوم خلي اسويلك عشا وصيح خالك ياكل وياك
مصطفى،،، تريدين انتي صيحي لتورطيني
لمياء،،، وشكو اورطك
مصطفى،،، خالي شفته دخل لهذيج الغرفه الغامضه وتعرفين ميحب احد يقطع خلوته بهل غرفه مااريده يتحول عليه زومبي بهل ليل ستري عليه
لمياء،،، لا وتكلي يمكن معجب لاواضح هل شي خالك لاناسي ولاراح ينسى الماضي
.............................
سيلين
____
_بابا حبيبي واخيرا أجيت لوتدري شكد مشتاقتلك ليش عفتني؟
-- انتي العفتيني مواني عفتج
-- لا ماعفتك اصلا اتمنى اشوفك
-- انجبرت اعوفج اخذوني منج بس ماعفتج دائما وياج بس انتي شنو الجبرج تنسيني ليش رخصتي دمي ليش تنازلتي وماحاسبتي الشخص التسبب بفراگنا هاج هذا الصندوك
-- اباوع صندوق يشبه صندوق اسراري او يمكن هو شجابه عنده؟ اخذته منه ودموعي نزلت رفعت راسي ابويه اختفى وبس اسمع صوته يتردد بأذني
-- تذكريني لتنسيني،،، اتذكريني،،، اخذي حقي ولتنسيني،،، لتنسيني
صرخت بصوت
_بابا لتروح بابا لتعوفني وراك ضعت لتعوفني الله يخليك ضليت ابجي واصرخ
سيف،،، ماما،، ماما،، ماما
سيلين،،، فزيت مرعوبه صار سيف بوجهي
سيف،،، شبيج ماما ليش تعيطين وتبجين؟
سيلين،،، جريته حضنته آسفه حبيبي چنت احلم
سيف،،، گلبج يدك قوي ليش هيج عبالك جنتي تركضين
سيلين،،، مابيه شي شكعدك بهل ساعه؟
سيف،،، كعدت عطشان وطلعت اشرب مي وسمعت صوتج وأجيت
سيلين،،، مابيه شي حبيبي روح نام
سيف،،، مامي هو يصير اجي يمج احضنج وانام حتى بعد متحلمين
سيلين،،، ههه،،، اي يصير ياروح مامي تعال يمي
حضنته وهو دقائق ونام امااني ضل الحلم براسي ماحسيته حلم كأنما حقيقه للان صوت بابا براسي غطيت سيف ورحت لغرفة الملابس طلعت الصندوق فتحته شنو قصده بابا بكلامه ماكو بي شي يخصه بهل صندوق شنو قصده تذكريني ولتنسيني؟
فتحت المذكرات واسترجعت ذاكرتي بكل شي صار ويايا وهنا تأكدت من قصده
شكد انانيه اني قررت اسامح سراج لأن اكتشفت هو صدك حبني زين شلون نسيت او تناسيت هو سبب موت بابا وهو سبب دماري بغدره ألي وبسببه تشوهت سمعتي
واذا حبني شنو قدملي بحبه غير بس الأذيه ماكان لازم افكر اتراجع عن انتقامي كنت مخططه ادمره هو وعائلته وأنهي حتى اسمه واسم عائلته ماراح اترك الأنتقام لكن راح اكتفي بأنتقام بسيط راح اسعى فقط أدمره نفسيا مثل ماتدمرت بسببه لازم اتماسك وادوس على عواطفي وطيبتي
سراج بطلت احبه من زمان بس تأثرت من عرفت الى اي مدى حبني وراح ارجع احيي هل الحب واسبب دماره وارجعه لنقطه الصفر اخلي يعيش كل العشته
الصبح حضرت نفسي وطلعت مباشرتا للمقبره رحت لوالدي حسيت لازم ازوره واعدته ماراح انسى
بعدها توجهة للمحكمه خلصت كم شغله وهناك ألتقيت بزميله ويايا كانت بالكليه اول ماشافتني عرفتني اجت سلمت عليه كان وياها اخوها عرفتني على اخوها اسمه سردار وعرفت انو هو مدعي عام سلمت علي وانتبهتله اكلني اكل بنضراته مااهتميت ولاطولت ولاجاملت سلمت وشلوني وشلونج وأترخصت منهم
بعدها رحت للمكتب والغريب للان البنات يحجن بالعزيمه عفتهن وحرت بشغلي شفت سراج اجه ودخل لمكتبن انتبهت ايده ملفوفه شويه واخذت ملف ورحت لغرفته طرقت الباب من سمعت صوته يأذنلي دخلت رفع راسه
سيلين،،، اسفه اخاف ازعجتك؟
سراج،،، لاعادي ماعندي شي تعالي
سيلين،،، شبيها ايدك؟
سراج،،، مابيها،،، شي بسيط
سيلين،،، سلامتك،،،، سرراج
سراج،،، ممم
سيلين،،، ليش احس بيك شي من البارحه وضعك ماعجبني،، سراج انت زين؟
سراج،،، ليش هل سؤال؟
سيلين،،، اسفه على التطفل،،، ارتاح اني بعدين اجي
وكفت حتى اطلع كام من مكانه وصار امامي
سراج،،، سيلين ليش هيج جاي تسوين بيه؟
سيلين،، ليش شمسويه هو مجرد سؤال
سراج،،، بنضرج سؤال بس بنضري اهتمام واهتمامج يأذيني اكثر من أذيتي عليج
سيلين،،، ماكنت اعرف خوفي على صحتك يأذيك لهل درجه؟
مسح وجهه وجاوب....
سراح،،، هنا المشكله ليش تهتمين لصحتي؟
سيلين،،، اسفه ماراح اهتم ولاأسأل بعد
عفته ومشيت جرني من ساعد ايدي ودارني علي
سراج،،، ليش تعذبيني هيج؟ اني اتمنى نضره منج كل هل وقت وهسه فجئه صرتي تهتمين بيه احس مشاعري رجعت تخربطت واني احتاجيت سنين حتى ألم لم نفسي وراج
ليش ترجعيني للبدايه و تزيدين تعلقي بيج وين تريدين توصلين اذا ناويه على عذابي ارحمي بحالي ترا العشته ولوعة گلبي للان ماتخطيتها
سيلين،،، ماسويت شي يستوجب كل هل كلام اهتمامي نابع من داخلي وهل شي طبيعي يعني اني كذا مره تخربطت وانت اهتميت بيه شنو يعني اهتمامك ورا شي؟؟
سراج،،، هي هنا المشكله كل اهتمامي بيج وخوفي نابع من گلبي ومشاعري أتجاهج ومن اشوف اهتمامج عقلي يصير يرسم سيناريو يخليني افكر انتي هم تبادليني هل المشاعر وهل شي يعذبني
سيلين،،، وهي هاي الحقيقه
بهتت ملامحه وحسيت حتى تنفسه اضطرب
سراج،،، شنو يعني؟ فهميني؟ لأن والله العضيم اول مره احس دماغي صار ميجمع،،، السمعته صح لوغلطان يعني شنو انتي...
سيلين،،، اني هم ابادلك هل مشاعر هذا موسر سراج ثنينه نعرف هل شي هاي حقيقه نعرفها صار سنين
مسكني من اكتافي بثنين ايده وباوع عليه وعيونه تلمع وأحس برجفة ايده
سراج،،، مشاعري اتجاهج اني حبيتج ومانسيتج ابد ومن رجعت شفتج رجعت مشاعري رغم انتي مونفسها سيلين ألي عرفتها قبل وكأنما وحده ثانيه لكن مع ذلك هم رجعت تولدت عندي مشاعر للمره الثانيه
سيلين،،، خجلت ونزلت راسي اوبالأحرى مثلت الخجل رفع راسي بأيده
سراج،،، ريحي گلبي وجاوبيني لتخليني بحيرتي گلبي عليل بعد ميتحمل لوعه
سيلين،،،اني هم صار ويايا نفس الشي مع الاسف ماكدرت اتحكم بمشاعري وهنا المشكله سراج مشاعرنه غلط لازم نتحكم بيها ولهذا اني اجيت اكلك اقبل استقالتي خلي نبتعد قبل لامشاعرنا تكبر اكثر وثنينا نعرف طريقنا مسدود كافي العذاب العشنا قبل لنزيد عذابنا عذاب جديد
سراج،،، كل عقلج اعوفج؟؟ خسرتج مره غصبا عني وهسه بعد ماصارت معجزه ورجعتيلي وبعد هل الأعتراف اموت ومااعوفج
سيلين،،، لازم نتحكم بمشاعرنا اني ام وانت اب ومسؤول عن عائله وعندك بيت وزوجه حبنه مستحيل قبل بدون مسؤوليات ماانجمعنه هسه الوضع معقد اكثر بهواي والضروف اقوى
سراج،،، ضروف الدنيا كلها بعد مااخليها تحرمني منج لو اعرف ابيع الدنيا ومابيها وماارجع اخسرج خسرتح اول مره والحياة بالنسبه ألي أنتهت كلشي بعيني طفى وماضل أله اهميه هل مره اذا خسرتج معناها موتي
سيلين،،،تصرفت بجرئه من خليت راسي على صدره حسيته تشنج
_لتكول هيج الله يخليك لتخوفني عليك اذا صارلك شي مااعيش بعدك
حسيت برجفته ونبضات قلبه القويه
سراح،،، الزرع بداخلنا كل هل حب وما خلانا ننسا كل هل سنين ورجع جمعنا معناها أله بيها اراده معناتها انتي ألي واني ألج
سيلين،،، ابتعدت عن حضنه،،، اني اسفه نسيت نفسي من رخصتك
مشيت ورجع سحب ايدي
سراج،،، لترجعين تتهربين مني لتصعديني لسابع سما وتشمريني مناك
سيلين بدموع،،، لأن غلط افهم غلط اني غبيه شلون ضعفت واعترفتلك بمشاعري احنا منرهم حياتنه مختلفه وانت متزوج وماكو اي شخص راح يقبل انسى وسوي نفسك ماسمعت ولاكلمه مني واترجاك اقبل استقالتي خلي اطلع من حياتك
سراج بعصبيه،،، مااسمح لأي شخص بعد يتدخل بحياتنه مستعد اخسر الكل ومااخسرج افهمي هل شي
سيلين،،، واذا حاربونه ورادوا يفرقونه مره ثانيه اني خايفه سراج افهم
سراج،،، احميج واخليج بداخل روحي من الدنيا كلها انتي بس ألزمي ايدي ولتعوفيها كافي عذاب سيلين
سيلين،،، شنسوي؟
سراج،،، سيلين
سيلين،،، ها
سراج،،، تتزوجيني!!!!
سيلين،،، شنوووو؟!!!
سراج،،، مثل ماسمعتي سيلين،،، تتزوجيني
سيلين،،، انت واعي على كلامك؟
سراج،،، بكامل وعيي وأرادتي اريدج زوجه ألي اكمل وياج باقي حياتي
سيلين،،، وعائلتك وزوجتك وبناتك؟
هاي تاليها سراج تريدني اصير خرابة بيوت وفوكاها اصير ضره لوحده ثانيه؟ اوعى على نفسك
سراج،،، زين والحل اني اريدج ومااريد اخسرج مره ثانيه؟
سيلين،،، هذا الخفت منه ليش كتلك اقبل استقالتي لأن اعرف طريقنا مسدود ونهايانه معروفه
سراج،،، وحق من انزل القرٱن لو اعرف ابيع الدنيا كلها وأشتريج هم اسويها انتي بس وافقي وأكيد راح اشوف حل يرضيج ويرضيني
سيلين،،، خايفه سراج كلش خايفه
سراج،،، ياعيون وروح سراج لتخافين وعيونج احلها
سيلين،،، اتمنى هل شي لأن اني هم تعبت
سراج،،، انتي بس خلي أيدج بأيدي
سيلين،،، مسكت ايده هو اتخربط حاله لأن مامتعود ولامتوقع مني هل تصرفات حسيت برجفة ايده باوعت بعيونه ونضراته الهايمه بيه،،، وهمست
_احبك سراجي،،، وراح اضل احبك وانتضرك لأخر يوم بعمري
شددت ايدي على ايده حسيته ضاع عنده الكلام ضل بس صافن بوجهي وميعرف شيسوي هنا عرفت الى اي مدى كلامي اثر بي سحبت ايدي وابتسمت مغادره المكان واني ابتسم ابتسامة النصر هاي ثاني جوله ربحتها
رجعت لعملي ورا وقت طلع من مكتبه واشوف عيونه تدورني وكل ماعيني تجي بعينه ابتسمله وهو يبادلني
انتهى الدوام ورجعت للبيت بالليل وصلني منه مسج
سراج،،،، كاعده
سيلين،،، اتصلت بي اجاني صوته بسرعه
سراج،،، زمردتي،،، اشتاقيتلج
سيلين،،، اني هم قبل ساعات من تشاوفنه وهسه اشتاقيتلك ياترى شنو ديصير ليش هيج؟
سراج،،، اتمنى طول الوقت مااشيل عيوني عنج لأن حتى وانتي كدامي هم اشتاق،،، اريد حل
سيلين،،، ماكو حل حبيبي
سراج،،، يبا على كيفج ويا گلبي راح يوكف
سيلين،،، سلامة گلبك
سراج،،، سيلين احس نفسي بحلم مامصدك الجاي اعيشه أحس كل شي صار بسرعه وللأن مامستوعب
سيلين،،،لتخاف واقع واحلى واقع هو حبنا
ضلينا نسولف لوقت طويل حسيته طاير بالكلام ويايه ودعته حتى انام واحس ميريد حتى ينام ويضل يسولف
ثاني يوم مارحت لمكتبه ضليت من بعيد وبيني وبينه بس النضرات وصل حده اخر شي ماتحمل دخل مكتبه وراسلني
سراج،،، وينج اليوم اريد اشوفج
سيلين،،، اسفه مااكدر عندي شغل
سراج،،، انع*ل ابو الشغل
سيلين،،،، ههههه ها سراجي تغار من الشغل
سراج،،، اغار من الهوى عليج ولج خليتيني اراهق تالي عمري
سيلين،،، ألي يسمعك يكول شايب،، بعدك بعز شبابك وقوتك واحلى شاب هم
سراج،،، اويلي يابا ناويه تجلطيني انتي بهذا كلامج احس جنت ميت ورجعت للحياة،،، متت بفراگج ورجعتلي حياتي برجوعج
سيلين،،، حبيبي اليوم مااكلت من الصبح هنا وماشفتك حتى تغديت
سراج،،، ماألي نفس
سيلين،،، وهل شي موصحيح اربع وعشرين ساعه گهوه وچاي وچكاير راح تتمرض
سراج،،، سيلينتي تخافين عليه؟
سيلين،،، اعز من روحي انت اذا مااخاف عليك عليمن اخاف انت وسيف اهم اهتماماتي
سراج،،، سيلين وروح ابويه ناويه تجلطيني انتي هذا كلامج ماسامعه كل حياتي واهتمامج ماشايفه حتى من أمي على كيفج عليه
سيلين،،، سراجي اني حبيبتك وصديقتك وكل شي بحياتك اني احبك بمشاعر عاشقه وأحن عليك بمشاعر ام واذا اكو شخص يستاهل الأهتمام والحب والاحترام فهو انت لتقلل من وجودك انت تستاهل افضل شي بالحياة
سراج،،، حبيتج قبل وعاشگج هسه والواضح راح اصير مجنون بحبج اني الشخص الحبيت نفس الأنسانه مرتين
سيلين،،، واني حبيتك مره
سراج،،، يعني حبج اقل؟
سيلين،،، حبي اكثر واكبر انت حبيتني اول مره ونسيتني ورجعت حبيتني مره ثانيه اني حبيتك مره ومانسيتك ابد ولا لحضه ولاقل حبك بداخلي وكل يوم يزيد
سراج،،سيلين تجين للمكتب لو اني اجي كدام الكل هسه
سيلين،،، هههه شبيك؟
سراج،،، وروح ابويه اذا مااجيتي هسه اجي
سيلين،،، الضاهر الأخ فقد خلي اروح قبل ليسوي سالفه رحتله للمكتب طرقت الباب ودخلت مالكيته بلمح البصر انغلق الباب وسحبني لحضنه نبضات قلبه قويه
سراج،،، شدسوين بيه انتي؟ راح اتخبل من وراج خلي نتزوج ترا من وراج صرت بنص الحرام
سيلين،،، ابتعدت عنه وجاوبته
_مامجبور ليش هيج دتسوي؟
سراج،،، ولج افهمي موبيدي
سيلين،،، ليش موبأيدك؟ اعرفك كلش زين تكدر تضبط نفسك والدلاله طول فترة خطوبتنه حتى ايدك مامسكت ايدي شنو هسه اتغير؟
سراج،،، انتي تغيرتي،، كلامج وتصرفاتج راح تخبلني والمشكله اني هم مشاعري تغيرت
سيلين،، شنو قصدك قبل ماحبيتني؟
سراح،،، قبل احبج وهسه صرت اعشقج ومهووس بيج احس اريد اضمج بين ضلوعي مااريد اعوفج ولاثانيه
سيلين،،، ماصار شي ارجع على سيلين القديمه ونگضيها خجل
سراج،،، احب خجلج القديم واعشق ومتيم بجرئتج الجديده احس صرت منفصم من وراج احب شخصيتين بأنسانه وحده لتتغيرين ابقي مثل ماانتي والله اليستر اخاف فديوم افقد وانسى الأول والتالي
سيلين،،، لاحبيبي مينخاف عليك انت متدين وتعرف حدودك
سراج،،، وعيونج من اشوفج انسى حتى الخطوط مو بس الحدود
سيلين،،، هههه خلى انهزم السالفه صارت تخوف
سراج،،، وين رايحه ماشبعت منج
سيلين،،، حبيبي عندي شغل يله،، باي
صار يتأفأف بضجر،،، ابتسمت على تصرفاته
طلعت وصيت على مندي لسراج وصل استلمه احد موضفين الأستقبال دفعت الفلوس وطلبت منه يوصله لمكتب سراج راسلته
_حبيبي عوف الچكاير وتغدا لتضل بدون اكل
جاوبني...
سراج،،، روحه لحبيبج،،، شكرا لأهتمامج
سيلين،،، ألف عافيه
خلص الدوام ورجعت للبيت خلصت روتيني اليومي ودرست سيف اتعشينا وبعد العشا شفت جهازي لكيت مسج من سراج
سراج،،، شكرا لأن انتي بحياتي يااحلى شي صار بحياتي تدرين ولايوم شخص اهتم لأكلي ولالصحتي مرات ابقى يوم كامل بدون اكل وعادي
سيلين،،، هاي قبل،،، قبل لتكون سيلين بحياتك كتلك انت وسيف اول واهم اهتماماتي صحتك هي صحتي ومرضك مرضي اذا ألي خاطر يمك عوف الچكاير وأهتم لأكلك وصحتك
قرا الرساله واتصل جاوبته...
_هههه شنو تكره المسجات مباشرتا تتصل؟
سراج،،، احب اسمع صوتج واحس بكلماتج من تنطقيها
سيلين،،، اني هم احب هل شي بس اخاف اتصالك يسببلك مشاكل اخاف احد يسمعنه
سراج،،، واذا سمعوا شنو خايف؟ اني الشيخ سراج الدين ليش اكو احد كائن من يكون يكدر يحاسبني لتهتمين
سيلين،،، ومنو كلك مهتمه لأي شخص مهتمه ألك اذا سمعوا راح يواجهوك وأحتمال انت تعصب اخاف عليك من العصبيه مااريدك تنغث
سراج،،، يروحلج فدوه سراج
سيلين،،، اسم الله عليك حبيبي عمرك طويل ان شاء الله
سراح،،،، عاشت ايدج على الأكل خوش مندي من يامطعم طلبتي؟
سيلين،،، الف عافيه طلبته من مطعم مندي،،،،،،
اكلهم طيب ونضيف
سراج،،، اي صدك طيب
سيلين،،، حبيبي تعشيت؟
سراح،،،للأن شبعان من الغدا
سيلين،،، سراجي لتضل بدون اكل انت تتعب مسؤولياتك هواي لخاطري اهتم لصحتك
سراج،،، لخاطرج كل شي اسوي
سيلين،،، لعد روح تعشا
سراج،،، وداعتج شبعان
سيلين،،، يعني شلون اطبخلك وادزلك حتى تاكل
سراج،،، يوم المنى وآكل من جوا ايدج بس مااريدج تتعبين ابد
سيلين،،، جنت تحب الگليجه مالتي تدري تعلمت اسويها علمودك
سراج،،، واني حرمتها عليه كل هل سنين اخر مره اكلتها من ايدج
سيلين،،، تحجي صدك؟
سراج،،، وداعة عيونج الأعشقها وداعت بناتي اخر مره اكلت كليجه قبل 10سنوات من ايدج
مثل ماانتي حرمتي المشمش عليج اني هم ماأتقبلت آكل گليجه من ايد اي شخص غيرج وكل مره اشوفها اتذكرج
سيلين،،، ليش هيج صار ويانا؟ ليش عشنه سنين نتحصر وضلينا أسيرين لذكرياتنا؟
سراج،،، اااااخ،،، لوتدرين النار البداخلي لوتدرين الصار بينا شكد دمرني،،، سيلينتي فراگج كان دمار ألي لليوم بداخلي مخلفات هل دمار
سيلين،،، خلي ننسى الماضي ونعيش حبنا من جديد ونعتبر كل شي ماصار
ودعته ونهيت الأتصال ورحت للمطبخ طلعت المواد شافتني سميه
سميه،،، ام سيف شنو دتسوين؟
سيلين،،، گليجه
سميه،،، بهل الليل؟؟
سيلين،،،، اي
سميه،،، اساعدج؟
سيلين،،، لاحبيبتي روحي ارتاحي اني اسوي ماعندي شي
عجنتها وبديت احشي وشويتها تذوقتها ابتسمت راضيه على طعمها بردت رتبتها ببوكس وغلقته بأحكام
ثاني يوم اخذته ورحت للمكتب مباشرتا لمكتب سراج طرقت الباب ودخلت لكيت ميساء السحاره يمه خزرتني وخزرتها سلمت وردولي سراج مباشرتا تحولت ملامحه من الجديه الى الحب وابتسم
سيلين،،، شيخ هذا بوكس وصلك
ميساء،،، شنو بي؟
سيلين،،، كلت وصل للشيخ يعني شي خاص بي وبعدين شمدريني شنو بي؟
ميساء،،، وليش انتي جايبته؟
سيلين،،، ليش اكو مانع
ميساء،،، اي....
سراج،،، ست ميساء خلص حديثنا تكدرين تتفضلين
سيلين،،،شاطت من الفشله والغضب جرت الأوراق بعصبيه وخزرتني وطلعت غلقت الباب وراها وانداريت لكيته مبتسم
اي مااحبها. ،،،، هاي الحقيقه ولتستغرب
تقدم اتجاهي وصار قريب وهمس...
سراج،،، متحبيها لو تغارين؟
سيلين،،، وبشنو احسن مني حتى اغار منها؟
سراج،،، ومنو كلج هذا السبب يجوز اكو سبب ثاني
سيلين،،، جاوبته بعصبيه،،، اي اغار ارتاحيت هسه اغار عليك منها لأن اعرف عينها عليك
سراج،،، واني عيوني متشوف غيرج بهل الدنيا
سيلين،،، شحدك حبيبي ابو سيلين
سراج،،،، هههههه
سيلين،،، اي اشوفك مكيف ومرتاح على الوضع
سراج،،، وداعت عيونج بحياتي ماشفت الراحه غير وياج كلامج بلسم لروحي
سيلين،،، اي ضل ترومس ونسيني ليش اجيت
سراج،،، ليش محتاحه سبب حتى تجيني اني ومكتبي تحت امرج
سيلين،،، فدوه لگلبك
قدمتله البوكس
سراج،،، شنو هذا؟
سيلين،،، افتحه
فتح البوكس وابتسم ابتسامه واسعه
سيلين،،، بالليل سهرت وسويتلك ،،،صار قريب مني
سراج،،، عاشت ايدج يااطيب وأحن انسانه
سيلين،،، بالعافيه بس لتتقرب وتستغل الفرص وبعدين تكول من وراج سويت الحرام
سراج،،،، هههههههههههه
سيلين،،، اول مره اشوفه يضحك وسعيد من كل گلبه
_ اكل واني راح اوصيلك على چاي مهيل وياها وممنوع تنطي لأي شخص هاي بس ألك تمام
سراج،،، تمام التمام
سيلين،،،، يووووه،، سراج لتقلد
سراج،،، ومنو كلج جاي اقلد حبيبتي وروحي سهرانه علمودي حتى تسويها واني انطي منها؟ هاي بس ألي
سيلين،،، ألف عافيه
ودعته بابتسامه وصيتله چاي ورجعت لعملي وكالعاده اي شخص يجي واحس قضيته سالفتها طويله اصرفه بأدب مااريد امسك قضايا تقيد وجودي بالمكتب
مرت الأيام واني وسراج عشاق حتى اكثر من قبل حسيته كلش تعلق بيه خصوصا واني اهتم بأدق تفاصيله وهو شخص فاقد الأهتمام اهتم بأكله وبصحته بتفاصيل يومه اشاركه حتى مشاكله المهنيه والشخصيه وحتى مشاكل العشيره ينام على صوتي ويصحى عليه اذا ساعه مااتصل هو يتصل حتى ملابسه صرت اشاركه رأيي بيها
وكذا مره اشتريتله هدايا وهو بالمقابل هم يشتريلي تجي اوقات انسى نفسي وانسى داامثل دور انسى كل شي واضل اعيش التفاصيل ويا بعفويه وبعدين اصحى على نفسي واذكر روحي بأنتقامي اما هو فعبر مرحلة التعلق وصار مهوووس بشي اسمه سيلين ،،،، وهو هذا المطلوب
بعد مرور شهر
،،،،،،،،،،،،،،،،،،،،،،،
سيلين،،،، يله ماما راح تتأخر حضر نفسك
سيف،،، خلصت بس ادور على المحفضه
سيلين،،، يوميه سالفة المحفضه الضايعه
سميه،،، روحي لشغلج اني اصعده بالخط اتأخرتي
سيلين،،، تمام يله،، باي
توجهت للمحكمه ويا نزولي من السياره صار بوجهي اخو زميلتي هو هم ركن سيارته اول ماشافني اتجه بأتجاهي حاولت اتلافاه لكن ماكدرت
سردار،،، شلونج ست سيلين؟
سيلين،،، اهلا استاذ الحمد الله انت شلونك وشلونها داليا؟
سردار،،، بخير الحمد الله
سيلين،،، اباوع علي اكلني بنضراته مثل اول مره اترخصت ودخلت للمحكمه امشي واحس بخطولته تتبعني مااهتميت ولاانداريت وقفني صوته
سردار،،، ست سيلين ممكن دقيقه من وقتج
سيلين،،، ألتفتت نصف ألتفاته وجاوبته
_اسفه كلش تأخّرت عندي شغل
سردار،،، ماراح اخذ من وقتج لو سمحتي
سيلين،،، توقفت لأن خجلت من اسلوبه هو صراحه شخص راقي ومرتب شكلا وكلاما اباوع علي ملابسه الرسميه وشكله مرتب تقريبا يشبه قصي خولي نبهني صوته وطلعني من شرودي اباوع علي مبتسم هنا ايقنت تصرفي الغلط واكيد راح يفهمني غلط
سردار،،،هواي سمعت كلام عنج من اختي وطول الوقت تمدح بيج وصراحه اول مره شفتج بيها عجبتيني اني منفصل عن زوجتي وعندي بنيه يم امها وحاليا ابحث عن زوجه تناسبني وصراحه من اول مره شفتج شفت بيج الانسانه التناسبني كلشي بيج يناسبني اني اعرف زوجج متوفي وعندج ولد ولهذا حاب اتواصل وياج واتعرف عليج اكثر وان شاء الله يكون بينا نصيب
سيلين،،، وشعجب اختك مااتصلت بيه وكالت هل كلام؟
سردار،،، موشسمه اني كلتلها بس هي يعني
سيلين،،، رفضت
سردار،،، لاموهيج
سيلين،،، رفضت تفتح هل موضوع ويايا لأن تعرفني شنو وتعرف شخصيتي بأختصار استاذ مااذكر اسمك،، سوري
سردار،،، سردار
سيلين،،، تمام استاذ سردار
اني انسانه مااحب سوالف العلاقات والطلعه والطبه وهل السوالف مااقنع بيها
سردار،،، اسف فهمتيني غلط غايتي شريفه رايدج على سنة الله ورسوله
سيلين،،، استاذ هذا مكان عمل مومكان أناقش بي هل مواضيع ومقدما اكلك اني اعتذر لأن حاليا لاغيه فكرت الأرتباط مكرسه حياتي للعمل ولأبني
فرصه سعيده،،، من رخصتك
عفته قبل ليتكلم اي كلمه اخرى هو شخص مناسب ألي ومن عائله راقيه ومرتبه وناس واصلين ماديا وثقافيا لكن مااحس نفسي مستعده لهل خطوه حاليا والأهم من وين يخطبوني واني اهلي علاقتي وياهم تقريبا منتهيه ليش احرج روحي،،، اخصمها من الاول افضل
كملت عملي ورحت للمكتب روتين كل يوم لكن انتبهت سراج اليوم ماكو وتسائلت وماكو شخص يعرف راسلته ماردلي استغربت اكثر هو بس يشوف مسج مني بثانيه يرد
اتصلت هم ماكو رد مرت ساعه ورجعت كررت الاتصال رجعت للبيت واتصلت كذا مره لليل ونفس الشي
كان الوضع غريب لأن مامسويها سابقا خلال كل هل فتره
ثاني يوم جمعه وطول اليوم اتصل وميرد هنا تأكدت صاير شي اضطريت اتصل على مصطفى جاوب ورا ثاني اتصال
مصطفى،،، اهلا شلونج ست سيلين اسف ماكدرت ارد من اول مره جان يمي ناس
سيلين،،، ماصار شي اسفه على الازعاج بس ردت اسأل على الشيخ عندي موضوع ويا يخص العمل اتصل بي وميرد البارحه واليوم خوما صاير شي انشغل بالي
مصطفى،،، هاااا لا ماكو هيج بس مشغول
سيلين،،، اسفه على التطفل بس احساسي يكول بي شي احجي الحقيقه شنو صاير ويا؟
مصطفى،،، شلون عرفتي ماكو احد يدري؟
سيلين،،، يعني صدك بي شي؟؟!! حسيت والله عرفت،،، شبي،،، شنو صاير ويا؟
مصطفى،،، والله مااعرف شنو اكلج
سيلين،،، احجي مصطفى الله عليك،، شبي؟
مصطفى،،، قبل يومين صارت مشكله بفصل والشيخ حلها اوتصورنا انحلت ثاني يوم رجعت كبرت وصارت مشاده بين الجهتين والموضوع كبر وصار رفع سلاح واكثر من شخص تصوب ومن ضمنهم الشيخ
سيلين،،،، شنوووو؟؟؟!
مصطفى،،، هذا الشي ماكو احد يعرف بي حتى اهلنا رجائا مااريد يطلع
سيلين،،، اكيد،،،، بس كلي شلونه هسه؟
مصطفى،،، شويه احسن لكن الدكتور ماسمحله اليوم يطلع
سيلين،،، لازم اصابته خطره؟
مصطفى،،، الطلقه أجتي بصدره،،، الله ستر
سيلين،،، وهسه انتو بيا مستشفى؟
مصطفى،،، بمستشفى........
سيلين،،، نهيت الأتصال وغيرت ملابسي وتوجهت للمستشفى ملهوفه نص الطريق وقفت السياره
اتنفست اضبط تنفسي،، أنبت نفسي
_هاي شبيح سيلين ليش هيج تخربطت احوالح؟ ليش اهتميتي لغيابه؟ وليش خفتي علي؟ وليش ملهوفه تروحيله؟ اصحي شجاج؟
ضليت اجلد ذاتي واصحي نفسي من هل المشاعر ألي اجتاحتني هدئت نفسي وكملت طريقي للمستشفى ركنت السياره سألت بالريسبشن عرفت مكانه من وصلت شفت هواي رجال واكفين امام غرفته من ضمنهم اخوته اضطريت اطلع مناضري الشمسيه وألبسها حتى ليتعرفون عليه مشيت بأتجاهم انتبهلي مصطفى ارتبك أجاني بسرعه
مصطفى،،، ست سيلين شجابج هنا؟
سيلين،،، مديري بالعمل اكيد اجيت اطمئن على صحته
مصطفى،،، موكتلج ماكو اي شخص يعرف
سيلين،،، واني بالصدفه اجيت للمستشفى وشفتك واجيت اسلم وعرفت
مصطفى،،، ابتسم،،،، تمام خوش خطه بعد محاميه كلشي عندج أله حل
سيلين،،، اريد اشوفه
مصطفى،،، مااضن نكدر
سيلين،،، تكدر اكيد تعرف شلون تحلها انت ذكي
حك راسه وابتسم
مصطفى،،، احرجتيني وخجلتيني تمام اوكفي هنا خلي اصرفهم
سيلين،،، راح دخل لغرفه وطلع تكلم ويا الواكفين دقيقه والكل انصرف اشرلي من بعيد رحتله
مصطفى،،، راحوا تكدرين تشوفي
سيلين،،، هو يدري بوجودي؟
مصطفى،،، هو نايم ميدري اي شي هسه حجيت ويا كتله اكو ضيفه جايه تشوفك بس رجع غمض عينه ماجاوب
سيلين،،، اوكي خلي اشوفه
دخلت للغرفه لكيته نايم وصدره ملفوف ووجها اصفر مبين كلش تعبان انهز شي بداخلي من شفته بهل وضع شديت نفسي وتماسكت تقربت من السرير
همست،،، سراجي هاي شصاير بيك؟
بسرعه فتح عينه مصدوم
سراج،،، سيليني هاي انتي لو حلم؟
سيلين،،، بشحمها ولحمها
سراج،،، كل شويه احلم بيج واصحى ماألكيج
سيلين،،، خليت ايدي على شعره وعدلت خصلاته النازله على جبينه وجاوبته
_هاي اني سيلينتك حقيقه موحلم شصاير بيك ماصدكت شلون اوصل واشوفك من سمعت الخبر ماضل عقل براسي
سراج،،، حبيبتي،،، مابيه شي وعيونج
سيلين،،، شلون مابيك شي شوف حالك راح اموت من وراك سراج گلبي راد يوكف صار يومين بالي يمك وخايفه كنت حاسه بيك شي والله عرفت
سراج،،، يابعد سراج وكل عشيرته حسيتي بيه شي؟
سيلين،،، حسيت واحساسي صدك
سراج،،، امي ألي هي امي ماحست بيه شي شنو شايله من گلب انتي،،،، ويلوموني ليش اعشقج ومانسيتج كل هل سنين،،،، ليش وحده مثلج تنسي
سيلين،،، كافي تحجي وتعب نفسك
سراج،،، من تصاوبت ماأجه أبالي وبين عيوني غيرج انتي وبناتي،، اول مره اليوم ماتمنيت اموت ردت ارجع اشوفج مااريد افارقج ضليت متمسك بالحياه علمودج
سيلين،،، صدمني من مسك ايدي بترجي وردد....
سراج،،، سيلين موتيني ولتعوفيني أبد
سيلين،،، اكيد شلون اعوفك
سراج،،، من اكلج لتعوفيني اعني هل كلمه صار يومين احساسي مثل احساس طفل مريض ويدور امه حتى تخفف عنه بحنيتها وحبها بس الفرق هذا احساسي بيج،،، رايدج انتي،،،، اول مره يصير عندي هل شي اول مره احس نفسي محتاج شخص طول عمري شايل نفسي وهموني ووجعي وماشكيت ولاحجيت فديوم،،، سيلين اني مشاعري وياج عبرت كل حدود الحب وهل شي مخوفني
سيلين،،، انت الشيخ سراج تخوف وتهز اكبر واحد ومتخاف ولاتنهز
سراج،،، بس اني وياج غير واحد انتي قوتي وانتي ضعفي
سيلين،،، ابتسمت وبداخلي اريد اكمز من الفرح واني اشوف هل الأنجاز الوصلتله خليته مهووس بيه وبديت اصير محور لحياته
مسحت على راسه بهدوء ورفعت ايده قبلتهاحسيته رجف وعيونه لمعت بحب
_شلون اعوفك وانت روحي؟ اكو واحد يعوف روحه؟ تدري صار يومين حتى نوم مااكدر انام گلبي حسني بيك شي وضليت ألوب عليك اخر شي اتصلت على مصطفى ماعرفت شلون اجي حيلي كله يرجف شسويت بيه
سراج،،، وعيونج زين اني مابي شي لتخافين تعلمت على المصايب
سيلين،،، شلون مااخاف لاسامح الله لوصاير بيك شي غير اموت وراك،،، انتفض من كلامي وجاوبني
سراج،،، اسم الله من عمري على عمرج لتحجين هيج تدرين كل جسمي تبنج من سمعت صوتج وشفتج،، والله مومبالغه احس تسكن كل جسمي حتى روحي
سيلين،،، اويلي يابه شنو هل كلام طلع الشيخ سراج رومانسي اكثر من المحامي سراج القديم
سراح،،، ههه والمحاميه سيلين احلى وأجرء من سيلين الطالبه القديمه
سيلين،،، بأختصار ثنينا تغيرنا
سراج،،، بس حبنا ماتغير
سيلين،،، لاتغير
باوع عليه بتسائل حسيت اكو خوف بعيونه من كلماي جاوبته مبتسمه
_صار اقوى وزاد اضعاف
اتنهد وابتسم...
سراج،،، اكيييييد
سيلين،،، سر.......
قبل لااكمل كلامي صارت خبصه برا الغرفه فجئه انفتحت الباب بهجوميه طفرت من مكاني مرعوبه وعيوني تشخصت بأتجاه الشخص الفتح الباب
