رواية طفولتي المشتتة الفصل الواحد والاربعون 41 بقلم ضاقت انفاسي
بارت 41
بعدت عن بيت عمي وقفت بحيره وين اروح بعد ما طردني خالد ؟؟؟؟؟؟
صح غلطت بحقه بس المفروض ما يطردني
مو بالاسلوب هذا
وكاني شي مقزز
اسلوبه جرحني
كان بعيني قدوة افتخر فيه وبأخلاقه الجميله
ليه يعمل كذا ليه
غمضت عيوني بألم وكبريائي مجروح
ما في غيره جدي يوقف
معي
ويخلي خالد ييجي يرجعني بنفسه
ويرد لي كرامتي للي اهانها قدام الجميع
شديت على قبضه يدي بقهر بقله حيله ما ادري
كيف اوصف لكم مشاعري
توجهت لبيت جدي
دخلت البيت وكانت جدتي واقفه باستقبالي
اكيد صار واصلها الخبر
كانت تردح وتتكلم
بس ما فهمت شي من للي قالته ولا استوعبت
شي ما لي خلقها
طنشتها وتوجهت للغرفه وقفلت الباب بالمفتاح
رميت العباية والشيله على الارض بعنف
وتوجهت لباب البلكونة وقفلته حتى ما يدخل منه
صقر
ابغى اجلس مع نفسي
رميت نفسي على السرير استذكر الاحداث
ودموعي نازله على خدودي
*
*
*
*
*
*
فيصل : خالد انزل جيب ريم وبلا فضايح
خالد ببرود : رجاء يبه هذا القرار راجع لي
بعد ما تولد ارسل لها ورقه الطلاق
فيصل بقهر : انت انجنيت ؟؟؟
تطلق بنت عمك ؟!!
خالد ببرود : لا اول واحد ولا اخر واحد يطلق بنت
عمه
وبقهر
خلاص لكل شي حد وانا لهنا كافي ما اقدر اتحمل اكثر
رجاء يبه لا تفتح معي السيره
والا قسم اهج من المنطقه
ام خالد : خلاص لا تهج حنا طالعين ارتاح شوي
وفكر زين
لا تنسى اذا ظلمتها بالطلاق اخواتك باكر
يصيبهن نفس الشي ويرجعن مطلقات
قاطعها خالد وهو يكتم عصبيته : اذا عملوا مثل ريم
انا اول مشجع انهن يطلقن
قاطعه فيصل : خلاص سكروا الموضوع وان شاء الله
يصير خير
*
*
*
*
الجده : مو راضية تفتح ولا ترد علينا
ام خالد : الله يهديها ملسونه خربت بيتها
بسبب لسانها الطويل
هيفاء بشماته : خلها تستاهل بنت ساره
متى ييجي اليوم للي اكحل فيه عيوني وانا اناظر ورقه الطلاق
قاطعها دخول ريم بثقه : قريب ان شاء الله
تكحلي عيونك فيها
كملي خيرك واعطيه وحده من بناتك تعرفين
صعب يلاقي الحين
لانه ارمل ومطلق وعنده عيال
وبنبره استهزاء : تكسبين فيه اجر
هيفاء بعصبية: حطي لسانك بحلقك ما نلوم
خالد يوم قرر يطلق
ناظرتها ريم بلامبالاه : يوم المنى طلاقي
وحطي براسك اني انا اختلقت هذي المشكله
علشان اضغط عليه ويطلقني
ام خالد تضايقت من كلام ريم : الف وحده تتمنى
خالد اما انت يا حسره مين رح يقبل
فيك مطلقه مرتين وعندها
عيال الله لا يبلانا
الجده بعصبية وهي تطالع ريم : غيرك يتمنى خالد وانت اجت لعندك هذي النعمه ورفستيها
ريم بدون اهتمام : اقول يا ام سلوم ترى ما لي خلقك
يستر عليك غيري الموضوع
الجده تضرب كفوف يدها ببعضها : انت ما منك
فايده
وناظرتها بجديه : جدك اتصل عليك ؟؟
ريم طنشت وقعدت تطقطق بالجوال ولا هامها
شي
هيفاء وهي تفتح عيونها بعصبيه : امي تكلمك
يا قليله الحيا
ريم تطقطق ومطنشه
ام خالد وقفت : ارجع عالبيت احسن من مقابله
هالملسونه
طلعت ام خالد بهدوء
الجده بقهر : جدك راجع باكر علشان يحل المشكلة
ما ادري متى تعقلين ؟؟؟؟
ريم بلامبالاه : رح اعقل لما تبطلين تلونين وجهك
بألوان الطيف
الجده بعصبية : ريم
وقفت ريم بضجر : افففففف ما تخلون الواحد
يرتاح بالجلسه
وطلعت من المكان
الجده بقهر : شفتي شفتي بنت اخوك !!!
هيفاء وبدت تشتغل شغلها : ما ادري ليه تستقبلينها
كان طردتيها عند اهل امها هم ادبر بها
الجده طالعت هيفاء ولوت بوزها : ودك توقعيني بالمشاكل ؟؟!!
خلها منطقه فوق هي الخسرانه
هيفاء باستغراب : شفتي يمه ولا مهتمه
مين يصدق انها نفسها للي طردها زوجها قبل
ساعات
مو مهتمه ولا على بالها
لو انا احبس نفسي اسبوع ما اكلم احد
مثل ذي البنت ما شفت بقوه عين طالعه وترادد
زفرت بضيق الجده : الله يهديها
*
*
*
*
*
*
سلطان بهدوء : كلمتيها ؟؟؟
ام بدر : كلمتها وقالت لي السالفه
وقلت لها انها غلطانه المفروض ما قالت عن عياله كذا
قهرتني تقول عادي مو مهتمه بالموضوع ابد
طيب انت كلمت خالد
سلطان زفر بضيق : كلمت خالد المشكله انه رفض يفتح الموضوع
يقول اذا ودك تفتح الموضوع انا قايم
معند عالاخير ومصمم انه توصلها ورقه الطلاق
بعد الولاده
ام بدر بضيق : طيب ما قلت له عن ابنه يعيش
مشرد ؟؟؟
سلطان : مو مهتم لريم ابد يقول يعيش مثل اخوانه بدون ام ما رح ينقصه شي
تصدقين احس كره ريم باين من عيونه مو طايقها
ولا طايق سيرتها
ام بدر : لا حول ولا قوة إلا بالله
طيب ممكن حد عامل لهم سحر او عين او شي
يفرق بينهم
سلطان ناظرها بجديه : والله ما فرق بينهم غير
لسانها الطويل
الزوج له احترام ما ينفع معه طول اللسان والمرادده
يمكن يسكت مره ومرتين وثلاثة
بعدين يقرفها ويقرف سيرتها كل شي له حدود
ما انكر انه ريم اعتبرها مثل عيالي بس
بصراحه هي الغلطانه والغلط راكبها من راسها
لساسها
هزت ام بدر راسها بقله حيله
*
*
*
*
*
ثاني يوم رجع الجد واول ما وصل توجه
لغرفه ريم
دخل الغرفه بعد ما طرق الباب
وقفت ريم وطالعته بسعاده الحين رح تخبره
بكل شي
وتخليه يوقف معها وييجي خالد ويرجعها غصب عنه
ويرجع لها كرامتها
حتى ما حد يتشمت فيها
بس انصدمت بالكف للي حصلته
ناظرت جدها مو مستوعبه وهي حاطه يدها
على خدها بذهول
الجد بعصبيه : كذا تفضحينا عند ابن عمك
ريم بقهر بدون ما يسمع منها وقف بصف خالد : طيب بالاو
قاطعها الجد بحزم : ولا كلمه فاهمه
ريم بقهر : على الاقل اسمع مني على طول وقفت مع
خالد بدون ما تسمع مني !!
الجد بقهر : لاني اعرف خالد ما يغلط على احد
لو كان واحد ثاني من احفادي كان سمعت منك
اما خالد ما اسمح لك تتعدين حدودك معه
لاني عارفك ملسونه
وطالعها بجديه : وقسم بالله لولا انه رافض ارجعك
كان من شعرك سحبتك ورجعتك له
بس اكيد انه قرفانك رافض رفض قطعي انك ترجعين له
لولا انه فاض المر على المرار كان ما رفض
على كل حال انا رح احاول اقنعه يجلس معك
ويتفاهم
ويا ويلك اذا بتقلين ادبك
وبعدها طلع الجد وضرب الباب بقوه
جلست ريم مكانها على الارض بذهول
كلهم واقفين معه
شدت على شفتها بقهر
غريبه غريبه وطول عمري رح ابقى غريبه
عندهم
واخر اهتماماتهم
حتى ام بدر معهم
اكرهم كلهم اكرهم ما رح اسكت لهم
يحلمون انهم يكسروني او يذلوني
يسحبني من شعري ويرجعني له وكأني
خروف يجرونه
والله ما ارجع له ونشوف مين للي تمشي كلمته
وقسم بالله لاراقصهم مراقصه
واوقف لهم مثل الشوكه بحلقهم
والله لاخليهم يندمون وقولوا ريم ما قالت
وقفت ريم ومسحت دموعها وتوجهت للحمام
وهي ناويه ترجع ريم للي كانت بالابتدائي
لا تحترم لا كبير ولا صغير
*
*
*
*
*
الجد زفر بضيق وهو يفكر يمهد لموضوع ثاني : رافض يرجعها ومصمم على
الطلاق حاولت فيه وعجزت
الجده : انا اقول اتركوا الموضوع لفتره
وان شاء الله يطيح الحطب
الجد بهدوء : ان شاء الله
وناظر الجده بجديه : تراها هالريم تحمل من صفات
عماد كثير
الجده تذكرت عماد زفرت بضيق : آآآآآه يا عماد
نفسي اشوفه واحضنه
ونزلت دموعها
الجد بهدوء : ان شاء الله قريب تشوفينه
الجده ناظرته بعدم استيعاب : وش تقول ؟؟؟
والله حاسه ولدي عايش ما مات
بعد ما شفت اوراقه بالصدفه وانك ما قطعت له شهاده وفاه
الجد باستغراب عقد حواحبه : وش عرفك اني ما قطعت له شهاده
وفاه ؟؟؟!!
الجده ودموعها تنزل : بالصدفه من قبل اربع
سنين
بس ليه اخفيت علي ليه ليه
تنهد الجد : ما كنت ابغى اعطيك امل وبعدها
ينكسر قلبك
اكثر من 16 سنه وانا ادور عليه وما لقيت له
اثر
16 سنه وقلبي يحترق لشوفته
كنت اناظر ريم وكأني اشوف عماد
تعلقت فيها لاني كنت اشوفها بعيني عماد
مسح دمعه من عيونه
باكر ان شاء الله رح يوصل ومعه ابو سليمان
دخلت الجده بنوبه بكاء مو قادرة شوقها
ذبحها
لشوفه ابنها سنين انحرمت منه ما يلوموها
اذا كرهت عيله سالم لانه بسببها فقدت
ابنها
وقف الجد وصوته مهزوز : امسحي دمعك
وباكر ان شاء الله تكحلين عيونك بشوفته
الجده وصوتها مبحوح من البكاء : اعطيني اكلمه
ابرد شوي من شوقي له
الجد بهدوء : باكر ان شاء الله تشوفينه اطلعي لغرفتك ونامي وريحي نفسك
هزت راسها وطلعت ودموعها على خدودها
*
*
*
ثاني يوم
كان تجهيزات لوصول عماد والكل ملتهف
على رجعته
وريم ما نزلت من غرفتها مقهوره من جدها
وما معها خبر رجوع عماد
*
*
*
بعد المغرب
جالسه على السرير لابسه بيجاما بولو لونها
فوشي
وسرحانه بحياتها بعد ما زانت خربت
بلمح البصر
قطع افكارها دخول خالد الغرفه
رفعت ريم وناظرته واستغربت وجوده
بس طنشت ولا كأنه موجود
وقف قريب ناظر الغرفه وعفس ملامحه مو عاجبه الكركبه
بعدها ناظرها وبهدوء : عندي سؤال ابغى اسألك
إياه حتى ما اظلمك
طالعته ريم وكانت تشوف الكره بعيونه
وباين انه مو طايقها
كمل خالد : مين للي لعب بعقلك وطلب منك
تطلبين بيت مستقل ؟؟؟
قاطعته ريم بحده وبقهر كلهم ضدها : مو بزر حتى حد يلعب
بعقلي
اذا طالبت بحق من حقوقي معناه انه حد لعب بعقلي
خالد بحده : ودك تقنعيني انه هذا كلامك
ريم بقهر : ايوه هذا كلامي
خالد بهدوء : في سؤال حاب اسألك إياه
تقبلين انه عمي نايف ينبذك وما يهتم فيك
ويطلعك من بيته علشان زوجته تقبلين بهذا الوضع ؟؟؟!!
ناظرته ريم وابتسمت بألم
ونزلت راسها
كمل خالد : اكيد ما تقبلين على نفسك كذا
ليه تقبلينها لعيالي ليه ؟؟؟
دخل الجد وكان يتكلم هو وخالد
بس ريم كانت سرحانه وتفكر ولا سمعت كلامهم
هي كانت منبوذه مو بس عند ابوها
عند كل العيله
كلهم نبذوها وكأنها شي مقرف
ما عاشت جو اسري مع ابوها
بالعكس كان يصبحها ويمسيها بطراق
كانت تنزل على المدرسه وتشوفهم مجتمعين
على سفره الفطور
وهي غريبه ما لها حق تجلس معهم
انحرمت من كل شي
ومع ذلك كملت حياتها وهي تضحك
ابوها حرمها من كل شي
وقبلت بالوضع غصب عنها
رفعت راسها على كلام خالد وهو يقول : عيالي
قاطعته ريم بقهر : عيالك عيالك وش يفرقون
عن الناس
وش يفرقون عن باقي العيال
تعاملهم وكأنهم ملوك
ممنوع حد يكلمهم ممنوع حد يضربهم
ممنوع حد يجرحهم بكلمه
كل اوامرهم منفذه
ليه وش يفرقون عن باقي العيال
كل هذا لانه ما عندهم ام
قاطعها خالد بحده : عيالي ما لك شغل فيهم
ريم بعصبية تقدمت من خالد : عساك تفقد
كانت ريم ودها تقول عساك تفقدني بس
قاطعها خالد وفكرها ودها تدعي على عياله وقبل ما تكمل باقي الكلمه مسك فكها بعصبيه : لا تكملي لا تكملي
وقسم بالله لو يصيب شي لعيالي ما تلومين الا نفسك
تفهمين
واعطاها نظرات ناريه وتركها
طالعته ريم بعصبية : اكرهك انت وعيالك اكرهكم لو تموت ما ارجع لك يا زفته
قاطعها كف على وجهها من جدها
طالعت ريم جدها بحقد
بسرعه تقرب خالد من الجد وابعده عن ريم : جدي
رجاء لا تمد يدك عليها
ريم وهي تردح : لا يا حنون
تقتل القتيل وتمشي بجنازته
علشان تظهر نفسك مسكين وطيب
وانت اخبث خلق الله
الجد وهو يحاول يفلت خالد عنه ويضرب ريم
خالد وهو مثبت جده : وقسم بالله اذا سمعت انك ضاربها يا جدي اني ازعل عليك
اتركها هذي لسانها متبري منها
وبعدها ناظر ريم : لا تفكرين جيت هنا ارجعك
وقسم بالله علشان جدي جيت اتفاهم معك
قلت يمكن حد لعب براسها
بس دامه تفكيرك نفس ما هو
ما تغير خليك هنا وبعد الولادة ارسل لك ورقه الطلاق
دخلنا بالمعروف نطلع بالمعروف
وناظر جده بحزم : اذا لي خاطر عندك لا تفتح لها
السيره خلاص موضوع انتهى ما له داعي نعيد
ونزيد فيه
الحين انا طالع مع الشباب نستقبل عمي عماد
ناظرت ريم باستغرااب وهمست : عماد
طلع خالد بهدوء
الجد طالع ريم : جهزي نفسك بعد العشاء
تنزلين تسلمين على عمك عماد
وبعدها طلع
جلست ريم مكانها وهي تردد بهمس : عماد عماد عماد هو سبب عذابي وتشتتي
كلهم كرهوني ونبذوني علشان عماد
اكرههههههههههه
غمضت عيوني وانا اتذكر كلام ام بدر
كان عماد مره طالع للسوق وللصدفه شاف
غاده
وتعلق فيها او بالاصح انبهر بجمالها
تابعها حتى عرف بنت مين
وتوصل لرقمها وصار يتواصل معها
وكانت غاده تظهر له انها مغرمه فيه
وطالت فتره العلاقه بينهم
وعشقها عماد لحد الجنون وقرر يخطبها
للي ما حسب حسابه عماد انه في عداوه
بين عيلته وعيله سالم من ايام جدودهم
رفض الجد يروح يخطبها له
بس عماد ما تخيل فكره انه تطير منه
قرر يروح بنفسه يخطبها
بعد ما راح يخطبها وكانت غاده قايله له
انه كل اهلها موافقين وينتظرون
حضوره لكنه
انصعق لما راح يخطبها وما استقبلوه اهل سالم
وخلوه مسخره بمجلسهم
انقهر وتضايق وطلع اتصل بغاده
وانصعق لما سمع منها انها كانت تتسلى معه
وهي اصلا مخطوبه
وعملت كذا علشان تتنتقم لجدودها منهم
بعدها انهار عماد وقرر يترك البلد
ويطلع وما يخلي حد يدري عنه الا صديقه محمد
وبعد كم يوم نقل محمد خبر وفاه عماد بمنطقه
بعيده
حتى اهله ما شافوه ولا استلموا جنازته
ووقتها تحجج محمد انه جسمه مشوه واضطروا يدفنوه
بس بالحقيقة
الشي للي كان ما حد يعرفه الا الجد وابو سليمان
للي خبرهم فيه محمد صديق عماد
بعد ما قرر يترك المكان طلب من محمد يتصل بأهله ويخبرهم بوفاته وهدد محمد اذا ما عمل كذا
رح يقتل نفسه
اضطر محمد يقول كذا بس عماد غافله
وسافر وهرب باسم مزيف
خبر محمد الجد وابو سليمان بالحقيقه ومن ذاك الوقت والجد وابو سليمان وابو زياد يبحثون عنه
واخفى الخبر عن باقي عياله
حتى ما يعطيهم امل
لكن بعد زواج ابو زياد من جوليا ومع الايام
كلمته عن شخص كان يعيش معهم بالريف
اول ما جاء صار له حادث وفقد الذاكره وكان اسمه جون
وعاش هناك بالمنطقه وكان يساعد الناس
ربط ابو زياد الاحداث ببعض وصار عنده امل
واتصل بالجد واخبره
وبعدها سافروا للمنطقه
ولما سألوا عنه قالوا له انه من شهرين
وقع عن ظهر تله ودخل المستشفى
اخذوا عنوان المستشفى ولما راحوا
تعرف عليه الجد وكان نفسه عماد
بس المشكلة انه من شهرين بغيبوبه
واضطر الجد وابو سليمان يبقون عنده
وخالد جلس عنده شهرين حتى يريح جده
بعدها بفتره صحي من الغيبوبه
ورجعت له الذاكره من اثر الضربه
والحين راجع بعد ما تشافى وصار وضعه الصحي ممتاز
وهذي قصه عماد
نرجع للاحداث
*
*
*
كانت جالسه بالمجلس وتنتظر دخول عماد
نفسها تشوف الشخص للي دمر حياتها
كانت تحس بنظرات الحريم شماته فيها
وخاصه البنات بس طنشت وهي جالسة جنب
ام بدر للي ماسكه يدها تحسسها بالامان
بعد لحظات دخل الجد بابتسامة عريضة ومعه
فيصل المبسوط على الاخير
وخلفهم عماد وماسك بيده نايف
وخلفه حرمه ومعاها ولد تقريبا عمره 10سنوات
وخلفهم العيال
ناظرت ريم نايف والفرح باين بعيونه وهو يطالع عماد
تقدمت الجده بلهفه وسلمت على عماد وهي تحضنه ودموعها على خدودها
وتتحسس ملامح وجهه وكأنها تبغى تتأكد انه حقيقه
مو حلم للي قدامها وبعد فلم الاكشن للي عملته الجده سلم عماد على هيفاء للي
عملت فلم ثاني له
المهم سلم على حريم اخوانه من بعيد
واقتربوا البنات يسلمون عليه
ويعرفون بنفسهم
وعماد يناظرهم ومبسوط عليهم
كانت ريم جالسه وتناظر ولا كأنه شي يخصها
همست لها ام بدر : قومي سلمي على عمك
ريم بتأفف : ضروري !!
ام بدر بحنان : يا بنتي ما يصير الكل ينتظر لك الزله
قومي سلمي
كانت ريم ودها تسلم
بس لفت نظرها ابوها وجدها وفيصل يناظرونها
وعيونهم تبغى تاكلها لانها ما سلمت على عماد
ريم شافت البنات كملوا سلام وقفت ببطئ
وتوجهت لجهة عماد واستغربت
نظرات عماد لها يناظرها باشمئزاز
اقتربت منه وقبل ما تمد يدها سألها بقرف ؛ انت ريم ؟!!
انقهرت ريم منه وناظرته بتعالي ومدت يدها وسلمت برؤوس اصابعها
وبعدها سحبت يدها ومسحت يدها بمنديل
وكأنها قرفانه
ورجعت مكانها ولا كأنها عملت شي
انقهر عماد من تصرفها
ورجع وهو مقهور منها
ناظرها بحقد وللي قهره ماسكه الجوال وتطقطق فيه ولا كأنه حد موجود ما تحترم الموجودين
سكت وما قال شي
وصاروا يتكلمون والجده جالسه جنب عماد
وماسكه بيده خايفه يكون حلم وتسأل عماد عن حاله واحواله
والكل فرحانين بوجوده
الا ريم مو مهتمه ابد
بس كانت تسترق النظر لخالد وهو معطيها
طاف ولا كأنها موجوده
صقر ابتسم وناظر الشباب : اقول وش رايكم تطلعون خلي عمي يشوف البنات
سليمان : بعدين يشوفهم
فيصل : يالله يا شباب فارقوا المكان
نواف ابتسم : يالله يا شباب نطلع بكرامتنا احسن
ما يطردونا
ريم او ما سمعت كلمته رفعت راسها وناظرت نواف
وحست انه يقصدها انها مطروده
مع انه نواف قال الكلمه بدون
قصد
بس ريم صارت تحسس من هذي الكلمه
طلعوا الشباب وريم عيونها بالجوال
بعد ما طلعوا الشباب
فكوا البنات نقابهم واقتربوا من عمهم عماد
كانت ريم تناظرهم بملل
بس عقدت حواجبها لما سمعت عماد
يقول وهو يناظر نايف : ما لقيت تتزوج الا من ذي
العيله الفاسده
واشر على ريم
نايف طالع عماد : كل شي نصيب
انقهرت ريم من رده ليه ما يدافع عنها
ويقول هذي بنت البكر ما اسمح لك
ريم خط احمر ما اسمح لاحد يتجاوزه
ليه ما يعاملها مثل ما خالد يعامل عياله
اخذت نفس ما رح تنتظر حد يدافع عنها
هي رح تاخذ حقها بيدها وما رح تسمح لاحد
يكسرها طالعت عماد بحده : دامها هالعيله فاسده
ليه ذبحت نفسك علشان تتزوج بنتهم
بس تدري والله انك خش رجال
يهج ويقطع اهله علشان بنت
وبسخريه
ما توقعتك كذا يالعاشق الولهان
الجد بعصبية : ريم
ام بدر همست لها : خلاص يا ريم اسكتي
نايف بحده : حطي لسانك بحلقك احسن لك
اصلا حنا ما يشرفنا انه يتزوج من اهل امك
لانهم حثاله
ناظرته ريم وهي رافعه حاجب : دامهم حثاله
ليه تتزوج ساره ودك تقول انتقام
ليه جبتوني على هذي الدنيا والا ذا من باب الانتقام ؟؟
عماد بحده : تراك ملسونه ما ادري كيف زوجتوها
لخالد والا المفروض ترموها على اهل امها خلهم يبلشون فيها
الظاهر انها ماخذه اخلاق خالاتها الله لا يبلانا ويستر علينا
ريم ببرود ظاهري : قول كذا لانهم رفضوك
وحركت حواجبها
وقف نايف بحده : قومي انقلعي من هنا
والله ما تجلسين هنا انقلعي على غرفتك
وحسابك بعدين على طول لسانك وعلى سالفه خالد
يصير خير
الجد : خلاص يا نايف وانت يا ريم خلاص اسكتي
واحترمي للي اكبر منك
وقفت ريم بغرور ورفعت حاجب وهي تناظر عماد : تراها غاده تزوجت زمان وعندها عيال
اذا تبغى تخطب بنتها علشان تتذكر حبك الاولي
بس اكيد رح يرفضوك لانك مو من مقام
اهل امي وما ينزلون مستواهم لواحد مراهق
قاطعها صرخت صقر : ريم بعدين معك ؟؟؟
طالعت ريم صقر باستهزاء : انتبه لا يطق لك
عرق وانت شاد على نفسك
هدي اعصابك
وسحبت نفسها وطلعت بهدوء
*
*
*
*
*
*
عماد بقهر : عاجبك كلام بنتك يا نايف ؟؟
نايف باحراج من اخوه : امسحها بوجهي
الجده مسكت يد عماد بمحبه : لا تهتم لها
هذي من صغرها ملسونه وما تحترم الاكبر
منها
بس كيف عرفتها ؟؟
زفر بضيق عماد : ابوي اعطاني كل اخباركم
ولما شفتها توقعت انها ريم تشبه
خالاتها
الجد بابتسامة : بالعكس احس انها تشبهك انت
يمكن لون عيونها مثل اهل امها
نايف : صحيح احسها يا عماد احيانا تشبهك كثير
وخاصه لما تغمض عيونها
فيصل : علشان كذا طالعه مزيونة مثلك يا عماد
عفس عماد ملامحه باشمئزاز : انا هذي تشبهني
حرام عليكم
والله ابغى اروح اعمل عمليات تجميل اغير شكلي
الجده بابتسامة : لا تحكم على البنت من الظاهر
تراها حبوبه وانا احب اجلس معها والله
انها تونس الواحد بسوالفها
بس مشكلتها ظروفها خلتها كذا
وحنا السبب
قاطعها نايف : خلاص يمه حنا مبسوطين برجوع
عماد
مو وقت تحليل شخصيات
عماد بكره : يبه الله يخليك ما ابغى اشوفها
بالبيت هالريم
الجد بتردد ما يبغى يخسر ابنه : بس انت تعرف
انه خالد وده يطلقها
عماد : ليه ما تسكن عند ابوها ؟؟
رجاء يبه مكان فيه ريم انا ما ابغى اسكنه
اختار انا او هي
صقر باعتراض : بس يا عماد ريم ما عملت لك
شي حتى تقول كذا
تراني ما ارضى عليها
الجد بهدوء : خلاص يا صقر
وبعدها طالع الجد نايف : خذ بنتك عندك
من اليوم
صقر بقهر : بس يبه
قاطعه الجد : وحطبه
لا تتدخل فاهم
وناظر عماد : كذا ارتحت ؟؟
عماد ابتسم وهز راسه
كانت ريم واقفه خلف باب المجلس
كتمت عبرتها وطلعت من المكان
تحس الدنيا ضايقه فيها وين تروح
نفسها تختفي عن وجه الارض
وين تروح
مسحت دمعه نزلت غصب عنها
توجهت لغرفتها
وقررت تطلع بكرامتها
بس ما تدري وين تروح
تروح عند بيت ابوها
عضت على شفتها بعجز
يمكن بعد كم يوم يعترض عماد على وجودها
ويطردها ابوها
فكرت تطلع بكرامتها رح تترك المكان
وتروح لمكان ما حد يطردها منه
بس وين ؟؟؟؟؟
*
*
*
*
*
*
رجعوا الشباب وجلسوا بالمجلس
وكان يعم المكان الفرح والسرور
بعد مرور ساعات
وقف نايف : انا طالع انادي ريم علشان
تيجي معي
وتحاشى انه يناظر خالد
للي اغلب المجلس ناظر خالد
بس خالد طنش النظرات
طلع نايف من المجلس
سلطان بمحاوله اخيره : يا خالد انت الكبير وهي الصغيره
بعدها جاهله تحملها وعلمها الصح من الغلط
عماد بكره : والله حرام عليكم تظلمونه فيها
ليه خلصوا البنات حتى يتزوج ريم
طالع خالد نصيحه لا ترجعها هذي البنت نفس
اخوالها وانا اعرفهم اكثر شي
ناس خبيثين والحقد بقلبهم
طلقها وانت الربحان
صقر بقهر : عماد بدل ما تصلح بينهم !!
خالد ببرود : يا جماعه لا تتناقرون على موضوع بالنسبه لي منتهي
خلاص قفلوا السيره وبعد الولاده ارسل لها ورقه الطلاق
وانتهينا
سلطان بعصبية : يا برودك يا شيخ وانتهينا !!
بذي السهوله حرام عليك بنت بعدها صغيره
تصير مطلقه ومعها بزر
دمرتها ودمرت حياتها بعدها صغيره جاهل
وبهذا العمر
يطلق عليها مطلقه ومن وين من ابن عمها
حتى لو غلطت بحقك
ما توصل للطلاق عاقبها بس مو بالطريقه
ذي
زفر بضيق ومسح دمعه نزلت من عينه غصب
عنه وبصوت مخنوق : يالله يا ام بدر
عم الصمت المكان خلال دقايق
قطع الصمت دخول نايف للي ملامحه مخطوفه
الجد باستغراب طالع نايف: وش فيك ؟؟
نايف بشحوب : يبه ممكن شوي تيجي معي
الجد بخوف : وش فيه ؟؟ ريم صار لها شي ؟؟!!
نايف وملامحه باهته : تعال يبه انت وابو سليمان
وصقر وسلطان
قاطعه فيصل : وش فيه ؟؟؟
طلع نايف بدون ما يرد
طلع خلفه الجد وفيصل وابو سليمان وسلطان وصقر
دخلوا المكتب خلف نايف
الجد والخوف بقلبه : وش فيه تراك خرعتني ؟؟؟
نايف بهدوء : ريم مو موجوده
عم الصمت بالمكان لدقايق
ابو سليمان : تمزح معنا ؟؟ !!
نايف : وقت المزح الحين دورتها بكل البيت هنا وسألت الخدامه قالت انها
شافت ريم وهي طالعه
سلطان زفر بضيق : كله منكم ظلمتم هالبنت وضيقتوا الدنيا عليها
صقر بقهر : كله علشان ترضون عمادوووووو
وين نلقاها الحين وين ؟؟؟
نايف بقهر : صقر لا تلقي فوق راسي محاضرات ترى راسي مصدع
فيصل بضيق: الحين خلينا ندورها يمكن في بيتك
يا نايف او في بيتي ما تضمن
صقر : يمكن راحت عند امها
الجد : كل شي جايز الحين ندورها
وبعدين نشوف وش للي رح يصير
&
&
&
الجده باستغراب : وش فيهم تأخروا وما رجعوا ؟؟
هيفاء وهي تعلك : الله اعلم هالريم وش عامله
مشكله وقاعدين يحلونها
الجده لوت بوزها : خفي عالبنت يا هيفاء
خلاص كنت حاقده عليها علشان اخوك
وهذا اخوك رجع
وش تبغين بالبنت اتركيها بحالها
هيفاء مو عاجبها كلام امها : ناسيه انها بنت ساره
للي راقصتكم مراقصه
الجده : قلتيها بعظمه لسانك ساره وريم ما لها دخل
عماد : لا والله يمه نسيتي كادت المراه ان تلد
اباها او اخاها
اكيد طالعه لاهل سالم
ريان بغرور : بالعكس احسها نفس اخلاقك يا عمه
وخاصه لسانها
بس الفرق بينكم الشكل
هيفاء بعصبية : انت ما تحترم الاكبر منك
ما ادري على وش شايف نفسك !!
دايما تدافع عن هالملسونه هذا هي رح تتطلق
بعد الطلاق روح اخطبها
ريان بغرور : لي الشرف اناسب حفيده سالم
الجده بعصبية : انتم ما تستحون البنت على ذمه هذا
الرجال وتقولون هذا الكلام
وناظرت الجده خالد بعصبية : عاجبك هذا الكلام ؟؟؟؟
كان خالد علامات الضيق واضحه على ملامحه
وقبل ما يرد
قاطعهم دخول الجد والاعمام
وملامحهم ما تبشر بخير
الجده وقلبها قارصها : وش فيه ؟؟
جلس الجد ومسح وجه بعب والقى القنبله : ريم الجده بخوف : وش فيها ؟؟
صقر بعصبية : علشان يرضى عمادووووو
تركت البيت وهجت من المكان كله
عماد باستغراب : هجت وين ؟؟؟
سلطان بقهر : ما ندري
نواف : طيب يمكن رجعت لبيت عمي نايف
فيصل بضيق : دورنا بكل مكان هنا ما لها اثر
حتى الشغاله شافتها طالعه
نايف بقهر : الله ياخذها ويريحني منها
من لما شفتها وما جاتني غير المشاكل
وش هالفضيحه هذي
وشد على قبضه يده بقهر
عماد : والحل الحين ؟؟
وقف ريان ببرود : ضيعتوها والحين جايين تدورون عليها
انا لو مكانها زمان هجيت من عندكم
وبعدها طلع
الجده : ابنك هذا يا سلطان لسانه طويل
سلطان بدون نفس : الحين خلينا بريم واتركي
ريان على جنب
هيفاء : شوفوها عند امها ؟؟
فيصل بقهر : ودك نتصل فيهم ونسألهم ريم عندكم
ناقصنا فضايح
بدر : طيب اتصلتم على جوالها ؟؟
صقر بضجر : مقفل
هيفاء : والحل ؟؟ الوقت الحين متأخر وين انقلعت
؟؟؟
سامر : يا جماعه الخير اكيد عند اهل امها راحت
سامي : بلغوا الشرطه
فيصل بعصبية : اسكت ناقصنا فضايح
الجد بحزم يناظر الشباب : اطلعوا دوروا عليها
يمكن تلاقوها
وبعصبيه يالله وش تتنتظرون
طلعوا الشباب بهدوء
صقر بعصبية يناظر خالد : تراها على ذمتك بعدها
قوم شوف وين انقلعت
خالد بحده : تعال اعطيني كم طراق
ناظره صقر بقهر وطلع
*
*
*
*
*
نواف بقهر : وين ندور عليها اففف هالريم
دايما عامله مشاكل
سليمان : تذكر يوم العيد لما هربت وخلونا
نطلع ندور عليها
نواف : انزل عند هذا الكوفي خلينا نروق
ونغير جو
سليمان : والله انك صادق انزل انزل
بعد ما رجعوا الحريم على البيت
كان الاعمام مجتمعين على اعصابهم بالمجلس
مو عارفين وين يدورون
سليمان بتفكير ناظر اعمامه : طيب ممكن راحت عند زياد
صقر كش ملامحه : كيف تروح وهي ما تعرف بيتهم ؟؟
نواف : يمكن اتصلت عليه وجاء اخذها
خالد بحده : ممكن تفكرون بعقل وبدون غباء ناسي انت وهو
انه مسافر شهر عسل
نواف ضرب جبهته : نسيت والله
فجأة رن جوال نايف
رفعه بدون نفس : نعم .......وش تقولين ؟؟؟ ......متأكده .......طيب انا الحين جاي .....سلام
الجد بترقب : وش فيه ؟؟؟
نايف براحه : ام سيف تقول لما رجعت
قالت لها الشغاله انه ريم بالبيت بغرفتها القديمه
صقر بقهر وقف : مو قلت انك دورت عليها بكل البيت وما لقيتها
نايف ناظر صقر لثواني وحك راسه وهو مغمض عين وابتسم شبح ابتسامه : بس هذي الغرفه ما دخلتها واستبعدت
الفكره لانها فاضيه وما فيها اثاث اصلا
سلطان بقهر : طيب ليه ما سألت الخدم ؟؟
نايف وحاس حاله بتحقيق: ما فكرت اسأل الخدم دامني بحثت بالبيت
كله حسيت ما له داعي اسأل واعمل فضايح
فيصل بقهر : كله بسببك حرقت اعصابنا
وبتفكير
بس غريب ليه راحت بيتك ؟؟
صقر بقهر : اكيد سمعت كلام ابوي وعماد
لما قرروا يطردوها من هالبيت
الجد بحزم : لا تحرف الكلام انا ما طردت احد
عماد باستغراب : طيب هي دام انه خالد طردها ليه
ما راحت على بيتك يا نايف ليه جاءت هنا !!
وقف نايف ينهي النقاش : يالله انا استأذن
بعدها طلع وتفرق الجميع
وبعض الاسئله تدور بعقول بعضهم ......
&
&
&
&
&
دخل الغرفه بهدوء وناظرها منزويه بالزاويه
ومتكوره على نفسها
منظرها يكسر الخاطر
اقترب منها وجلس ركبه ونص وهزها على الخفيف
: ريم ريم
رفعت راسها بشويش والنوم مسيطر عليها
رجعت وغمضت عيونها
هزها من جديد : ريم ريم
رفعت راسها وعفست ملامحها وبعدها ناظرت المكان
وناظرت نايف وعقدت حواجبها
نايف بألم لما شافها كذا بس غروره ما يسمح له : ليه نايمه هنا ؟؟
ريم بصوت ناعس : ابغى انام
وقفها نايف وسحبها معه للحمام
غسل وجهها حتى تصحصح
وبعدها طلع من الحمام : تعالي على غرفتك
ريم سحبت يدها منه بكره : ما رح اطلع من هذي الغرفه
نايف عقد حواجبها : الغرفه فاضيه وين تنامين ؟؟
ريم بعناد : مو طالعه من هذي الغرفه حط فيها سرير مثل زمان وانتهينا
طالعها وحس بنغزه بقلبه كيف طاوع قلبه
وحطها بهذي الغرفه ايام طفولتها : ريم
قاطعته ريم برجاء : اتركني براحتي
وناظرته برجاء
ناظرها نايف لثواني : براحتك انتظري شوي
اخليهم يجهزونها لك
وبعدها طلع
توجهت ريم للشباك وهي تتذكر طفولتها هنا
ارخت راسها على قزاز الشباك
وهي متأكده من قرارها
هذي الغرفه للي احتوتها لما تخلى عنها الجميع بطفولتها
ما لها الا هذي الغرفه تحس انها ملك لها وما حد
يقدر يطردها منها
زفرت بضيق وهي تحس بداخلها ضياع
لكن خلاص قررت تقضي باقي حياتها بذي الغرفه
وتربي ابنها بعيد عن هذا العالم الحقود
*
*
*
*
بالصاله واقفه وتناظره : ليه ترد عليها ؟؟؟
نايف رفع نظره للسقف وبعدها ناظرها وهو يزفر بضيق : تعرفين عنادها وانا ما حبيت اعاندها
لاني اخاف اتهور وافقد اعصابي واعطيها كم طراق ولا تنسين البنت حامل
وبعدين هي بكيفها خلها تنطق بالغرفه
وناظرها بحزم لا تنسين انا قلت لك من قبل ما لك
شغل فيها وناظرها بحزم
ساميا بضجر من كلامه : لا تخاف ما نسيت
وسحبت نفسها وتوجهت لجناحها
جلس نايف وزفر بضيق ويحس الالم ذبحه
وهو يشوف ريم
صغيره على هذا الحمل وفوق هذا رح تكون مطلقه وهي بعدها بعمر صغير
غمض عيونه وطلع يشوف تجهيزات غرفه ريم
*
*
*
*
*
صحيت الصبح وهي عافسه ملامحها وتناظر
المكان
بعدها استوعبت المكان
وتذكرت صلاه الفجر وبسرعه قامت توجهت
للحمام علشان تلحق الصلاه
بعد ما صلت وجلست تستغفر بعد الصلاه
وتناظر الغرفه عاشت فيها خمس سنين
تحسها من املاكها
خلاص تبغى تبعد عن الناس ما تبغى تختلط
باحد ولا تشوف احد
ترجع لايام الطفوله وتكمل حياتها وحيده
تكره اهل ابوها كلهم تكرهم
وقفوا ضدها ولا حد وقف معها
مستحيل تدخل بيت جدها بعد ما طردها منه
مستحيل
ما توقعت جدها خبيث لذي الدرجه
تركها بالوقت للي احتاجته
طلعت منها شهقه غصب عنها
ما لقت حد يوقف بصفها
الكل يناظرها بشماته
عضت على شفتها بألم
مجروحه من هذا العالم
كل ما تقول رح تنسى احزانها
يطلع لها جرح جديد
رفعت يدها وهي تدعي ربها انه يكون هذا
اخر احزانها
مر على جلوسها اكثر من ساعه والافكار متلاطمه
في عقلها
قاطعها دخول الشغالة بعد ما طرقت الباب : بابا يبغى انت انزل فطور
لفت ريم وجهها ورجعت تناظر من الشباك
وبصوت مخنوق : الحين انزل
ما رح تتهتم لوجودهم رح تتخيل نفسها بمطعم تنزل تاكل وترجع لغرفتها
وكأنها بفندق
هذي حياتها الجديده رح تكون
*
*
*
*
كانت تغصب نفسها على الاكل علشان للي في
بطنها
والا كان ما ذاقت الاكل بس مضطره
ما انتبهت لاهتمام نايف بعياله لانه ما عاد
يهمها خلاص كبرت عن هذي السخافات
هذي السخافات للي كانت امنيه من امنياتها
انه حد يهتم فيها
لكن الحين خلاص صارت بنظرها سخافات
تحس كل الدنيا سخيفه
ما تستحق تتضايق علشانها
كل الحين يهمها سلامه الجنين
كملت فطور وطلعت بهدوء لغرفتها مثل ما دخلت
*
*
*
*
نايف
استغربت لما شفتها نازله على على الفطور
توقعت انها تعاند
كانت لابسه بلوزه كحلي باكمام طويله
وبنطلون جزره
مو باين عليها الحمل ابد ابد
ومجمعه شعرها بالكماشه ونازله كم خصله من
شعرها
زايده جمالها
احسها كبرت عن قبل
جلست على السفره حتى السلام ما ردت علينا
ولا تكلمت
كملت فطور وطلعت بهدوء
سكتت وما حبيت اتكلم يمكن متضايقة
ما ابغى اضغط عليها
ناظرت ساميا بهدوء : ترى الغداء اليوم في بيت ابوي للجميع
ابتسمت سلمى ولينا لانهم رح يجتمعون مع بنات
عمهم
*
*
*
*
*
*
بعد الظهر
دخل نايف غرفتها بعد ما طرق الباب
وناظرها جالسه على الكرسي عند الشباك وتناظر
خارج الشباك
نايف بهدوء : يالله جهزي نفسك الغداء في بيت ابوي
ناظرته وبصوت هامس : ما ابغى اروح
نايف بحده : وليه ان شاء الله ؟؟
ريم بنفس الهمس : بيت انطردت منه مستحيل
ادخله
ولفت وجهها لجهة الشباك
طالعها نايف بقهر : بقلعتك
عمرك ما رحتي ان شاء يا ام الكرامه
وطلع وصفق الباب بقوه
زفرت ريم بقهر ورجعت تناظر خارج الشباك
بهدوء
*
*
*
بعد الغداء
الجده بتذكر : وين ريم ليه ما اجت معكم ؟؟
ساميا : ما رضيت تيجي
الجده عقدت حواجبها : ليه ان شاء الله؟؟
ساميا بهدوء : ما ادري
هيفاء : احسن ارتحنا من خشتها
ام سليمان : اقول يا ام خالد مو ناوي خالد يرجعها
سديم بفرح : والله يا خالتي فرصه جاءت لعنده
يتخلص منها
لو تشوفينه ما يطيق سيرتها
ام خالد بحده : سديم
بعدها طالعت ام سليمان : لا تردين على سديم
تراها تبالغ
تعرفين كل ازواج يصير بدايه زواجهم مشاكل
هيفاء ترفع حاجب : على حساب مو عاجبيتك ريم
وكنت تبغين تزوجين خالد
قاطعتها ام خالد بحزن : ما رح تفهمين قصدي
الجده : خلاص غيروا السيره ما نبغى مشاكل
وبلا فضايح قدام هذي الحرمه واشرت على زوجه
عماد
ام سليمان : هذي ما تفهم عربي ابد
ما ادري كيف تفهمون عليها
ام خالد بفخر : قولي وش ودك تقولين لها وانا
اكلمها ودقت بيدها على صدرها
خبره بلغه الاجانب
ام سليمان بلقافه : إسأليها كم كان عمرها لما تزوجت عماد ؟؟
الجده : وش تبغين بعمرها ؟؟
ام سليمان ضحكت : ههههه لقافه
ام خالد : الله يعيني على لقافتك
وناظرت زوجه عماد للي كانت تناظرهم باستغراب
مو فاهمه شي ابد
وقعدوا الحريم وفتحوا معها تحقيق والمشكله انه
ام خالد بعض المصطلحات العاميه ما لقت
كلمات بالاجنبي تسعفها
فستخدموا الاشارات
كانت اشكالهم مضحكه وهم فاتحين تحقيق معها
*
*
*
*
*
الجد يهمس لنايف بزعل : ليه ما جبت ريم معك ؟؟
نايف بنفس الهمس : رفضت تيجي
تقول بيت انطردت منه ما رح تدخله
الجد هز راسه بتفهم : اكيد سمعت كلامنا
مشكلتها عنيده هالبنت
هز نايف راسه مؤيد لكلام ابوه
مر الوقت وجميعهم مبسوطين وفرحانين
بعد ما التم شملهم تقريبا
ما ينقصهم الا الهنوف
*
*
*
بعد العشاء واقفين قريب من الباب
ناظر نايف : هذي غرفتها ليه منعزله عن باقي الغرف
نايف : اففف يا اخي انت ودك تفتح تحقيق ؟؟؟ عجزت
فيها هالبنت عنيده وما تبغى الا ذي الغرفه
وطالعه بنغزه
زي بعض ناس بالعناد
ضرب على كتفه : حسابك بعدين يالله فارق
نايف باستغراب : نفسي اعرف وش للي في راسك ؟؟؟
رد بابتسامة : روح من هنا ولا تضيع وقتي معك
ابتسم نايف وترك المكان
ناظر باب الغرفه واخذ نفس وطرق الباب
بهدوء
ما سمع جواب
طرق مره ثانيه وما سمع جواب
فكر انها نايمه
انتظر دقايق وبعدها طرق الباب وما في جواب
قرر يفتح الباب ويدخل
دخل الغرفه وطالع الغرفه وهو معقد حواجبه
غرفه صغيره كثير
فيها سرير خشبي وكبت
طالع عند الشباك شافها
جالسه عند الشباك وتناظر للخارج
استغرب تصرفها
يعني سمعت طرق الباب وما كلفت نفسها
ترد عليه
اقترب منها بهدوء
وجلس ركبه ونص ومسك يدها
ما كلفت نفسها تناظره
كان نظرها مثبت لجهة الشباك وتناظر للبعيد
رفع يده وحرك وجهها لجهته وبهدوء : طالعيني
رمقته بنظرة كره وحقد
ابتسم على نظراتها : لا لا ما توقعت تستقبليني كذا بذي النظرات
ناظرته باشمئزاز ورجعت تطالع من الشباك
ضحك : اموت على الثقيل يا ناس
وبايها على خدها
رفعت يدها ومسحت خدها بقرف
ابتسم على حركتها
شد على يدها وبهدوء : وش فيك زعلانه
حتى الغداء ما حضرتيه
ما ردت عليه
ابتسم : ما اصدق انت نفسك للي البارحه
كان لسانك وش طوله وتراددين
لا لا ما اصدق اكيد بدلوك
وبمرح وهو ماسك يدها : ليه يدك صغيره
كذا ؟؟؟
وطالع يدها وهو يحرك اصابعها
كان يتكلم وكأنه يكلم جدار
تنرفز من تطنيشها : ريم وبعدين ؟؟؟
ردي علي
وبمرح خذي هذا المنديل مسحي يدينك
لاني مسكت يدك
حرك وجهها لجهته وناظرها : زعلانه لاني قلت لابوي
يطلعك من البيت ؟؟؟
ما ردت عليه
رد بندم : لا تلوميني انا طبعي كذا انفعل ببدايه الامر اول ما شفتك تذكرت غاده الزفته
عشان كذا انفعلت
هذي مشكلتي اذا انفعلت
اتخذ قرارات واجراءات غلط ومتهوره
وبعد وقت قصير اندم وارجع لصوابي
ما دمر حياتي الا تهوري واندفاعي
ولما رجعت لصوابي فات الوقت وضيعت مستقبلي
وبرجاء
لا تزعلين علي
انت ما تعرفيني اسألي امي وابوي واخواني
معروف طبعي هذا
دايما متهور واعصب بدايه الامر وبعدها ارجع
واتندم
صدقيني ما كان قصدي تنطردين
لا تزعلين على ابوي لانه وافق انك تروحين عند
نايف لانه يعرف طبعي
بعد يوم رح اطلب منك ترجعين
هذا طبعي ما تاخذين بخاطرك علي
طالعته ريم ببرود ولا كأنه حد يكلمها
ورجعت تناظر من الشباك
شد على يدها رح ترضين غصب عنك
ما اطيق اشوف احد زعلان مني
وش رايك نطلع الحين نغير جو
وبعدها ضحك : هههههه قولي انك زعلانه لانه
حبيب القلب خالد زعلان عليك
طنشته ريم وما ردت عليه
عماد بنبره صادقه : اذا تبغين اخليه ييجي
ويتأسف لك قدام الكل
ما ردت عليه
تنهد وناظرها الحين انا طالع وما
رح اتركك حتى ينزل الحطب للي في راسك
باسها على راسها وطلع
*
*
يوم السبت
نزلت الصبح بهدوء وتوجهت لصاله الطعام
وجلست بهدوء
بدون سلام ولا كلام
ناظرها نايف مو عاجبه طريقتها بس سكت
تناولت فطورها بهدوء وكأنها بعالمها الخاص
كملت فطور وبهمس : مين يرسلني للمدرسه ؟؟؟
نايف ناظرها ورجع يفطر : انتظري ارسلك مع اخواتك
طلعت تنتظره بالصاله الخارجيه بهدوء
اكمل فطور وبعدها التفت لسلمى وابتسم : كملتي يا بابا ؟؟
وقفت سلمى بابتسامة ناعمه : كملت
وقفت لينا بمرح : وانا كمان
سيف مد بوزه : انتظروا شوي
ضحك نايف عليه وطالعه : انا بالصاله انتظرك يا بطل
طلع نايف للصاله وشافها جالسه على الكنبه
وحاطه يدها تحت خدها وسرحانه
ناداها بهدوء : ريم
رفعت له راسها بهدوء
نايف بهدوء : اخذتي مصروفك ؟؟
ناظرته نظرات ما فهمها وبصوت هامس يا
دوب قدر يسمعه : ما ابغى
اقترب نايف منها بهدوء : كم تبغين ؟؟
ناظرته بقهر مو محتاجه فلوسه ما تبغى فلوس
حرمها من كل شي والحين جاي
يتكرم عليها بالفلوس وبهمس : ما ابغى قلت لك
انقهر نايف منها وناظرها بعصبيه : شرفي قدامي على السياره
وقفت ريم بهدوء وطلعت وهي تحس
انها عايشه جسد بدون روح
تحس روحها ماتت
طرد جدها لها جرحها جرح كبيييييير
كانت تحسه سندها وفجأة يتحول ضدها
وبعدها يطردها
كانت صعبه عليها كثير ما قدرت تتحمل الصدمه
*
*
*
* جالسه مع البنات وتسمع سوالفهم
ميرا بحماس : مو مصدقه متى ييجي المغرب واطلع معه
ناظرتها ليان باستغراب : ما تخافين اهلك يكشفونك ؟؟
ميرا : هذي امنيتي يكشوفوني حتى احط راسهم بالتراب
طول وقتهم منشغلين عني خلهم يعرفون انه لنا حق عليهم
ليان : حتى لو صدقيني للي تعمليه غلط
مير بدون اهتمام : خلي حفلاتهم وشركاتهم
تنفعهم
كانت ريم تفكر بكلامها هذا الطريق للي تنتقم
من نايف وجدها وفيصل وعماد وخالد وكلهم
تحط راسهم بالارض
تخلي عيونهم بالارض ما يقدرون يطالعون الناس
بعد الفضيحه
وما يهمها وش يعملون فيها
حتى لو قتلوها ترتاح من هالدنيا
بس لاخر لحظه طردت كل الافكار من راسها
وهي تتذكر عذاب الله
مو مستعده حتى تنتقم منهم تخسر دينها
بالرغم انها مو ملتزمه وعاشت في بيت اهل امها
وعندهم كل شي فري
بس ما فكرت تمشي بهذا الطريق تحس نفسها
غاليه مو رخيصه تبيعها لاي شخص من الشارع
هي ارفع من كذا بكثير
وقفت وتركت البنات وهي ناويه تنفذ للي في بالها تترك المدرسه
&
&
&
&
&
مر شهر على وجودها في بيت ابوها
خلال هذا الشهر قدمت للاداره انها تدرس منازل
ما تبغى تروح المدرسه ما تبغى تشوف
احد
صارت بارده بشكل كبير من اثر الصدمه ما تتكلم مع احد
وقت الغداء تنزل تتغدى وبعدها تطلع على غرفتها
وما تطلع منها
كل يوم عماد عندها ويسولف لها وهي ساكته
ما تتكلم
ويحاول يرجعها لطبيعتها مثل ما سمع عن مرحها
بس ما في فايده
رجعت لسجن الطفوله
السجن للي احتواها بكل احزانها وآلامها
زارتها ام بدر و جدتها وام خالد بس رفضت ريم
تطلع لهم
وصل لها خالد عن طريق امه علشان تروح لموعد الدكتوره
بس ريم خبرت ساميا برفضها
نايف مو عاجبه حياتها بس ساكت علشان الحمل
ساميا ما تتدخل فيها
ولا اخواتها يختلطون فيها ولا حتى سيف
كانت على جلستها عند الشباك كالعاده
دخل نايف وهز راسه مو عاجبه وضعها : ريم
ناظرته بهدوء
نايف زفر بضيق : اسمعي بعد ساعه كوني جاهزه
طالعين على المزرعة
وقبل ما ترفضين رح تروحين غصب عنك لانه ما في
احد بالبيت وما رح اتركك لوحدك
فرجاء تجنبي عصبيتي وكوني جاهزه
جهزي اغراض ليومين تقريبا
وبعدها طلع قبل ما يسمع ردها
رجعت تطالع من الشباك ببرود
*
*
*
*
*
بعد ساعه
ركبت بالسياره جنب اخواتها من جهة الشباك
خلف ابوها
وهي مغطيه وجهها ما تبغى تشوف احد
حرك نايف السياره
وكانت السياره تضج بضحكات سلمى وسيف
ولينا ونايف
وريم بعالمها الخاص حاطه راسها على قزاز الشباك
ومغمضه عيونها
وقف نايف عند البقاله ونزل
راسه مصدع من طلبات عياله
بعدها رجع وهو يمشي مع عماد و صقر وخالد
ويضحكون
فتح باب السياره وحط الاغراض : خذوا الاغراض
وقسموهم بينكم
وسكر الباب ورجع يكلم صقر وخالد وعماد
فتحوا الاكياس وقسموا الاغراض بينهم
ساميا ناظرت الاغراض وبعدها التفتت على عيالها: اعطوا ريم
سيف : ذول حقتي ما لي دخل
لينا : ولا انا ذول لي
سلمى بتردد : خذي يا ريم ومدت لريم تاخذ من الاشياء للي معها
بس ريم ما ردت عليها
ولا كأنها اختهم قسموا الاغراض على بعضهم
وهي غريبه عنهم
يتصدقون عليها
ناظرت عماد بكره هو سبب عذابها ومعاناتها
ساميا بهدوء : ريم خذي من سلمى
طنشتها ريم وما ردت
فتح صقر الباب وابتسم : اخباركم يا عيال اخوي ؟؟
لينا : بخير
صقر ناظر سلمى : اخبارك يا نعومه ؟؟؟
سلمى بصوت ناعم : الحمد لله بخير
اخبارك انت ؟؟
صقر ابتسم بخير
سيف مد بوزه : ليه ما سألتني ؟؟
ضحك صقر : اخبارك يا سيف ؟؟
ابتسم سيف : بخير
صقر ناظر ريم : اخبارك يا مطوعه اشوفك حاطه العمامه اليوم ومتغطيه !!
وش صاير بالدنيا ؟؟
طنشته ريم وهي نفس الوضعيه حاطه راسها على قزاز الشباك
صقر بابتسامة : يا حلو اعطينا وجه !!
وبعدها ناظر سلمى ولينا : وش فيها ريم ؟؟
لينا باندفاع : هذي من يوم ما جاءت عندنا
ما تتكلم وساكته
سيف ببراءه : يمكن تكون خرساء
صقر : اسكت بلا خرساء
وقف عماد وابتسم : وش فيه ؟؟؟
وبعدها طالع جهة ريم : اخبارك يا حلوه ؟؟؟
ما ردت عليه
عماد ناظر صقر وابتسم : يعني علشان
الاستاذ خالد ما تكلمينا
وناظر خالد للي واقف قريب مع نايف : تعال كلمها
خلها تنفك عقدتها
وناظر ريم وغمز لها : الحين اخليه ييجي
وتتكلمين غصب عنك
ونادى بصوت عالي : خالد خالد تعال
ناظره خالد وطنشه ورجع لسيارته
عماد فتح عيونه : وقسم بالله ما تستحون على
حالكم الاثنين
اما عمكم ومطنشيني
صقر دفعه : روح روح تأخرت على زوجتك للي
ما ادري وش اسمها
والا ابنك المتخلف روح الله لا يبلانا
ضربه عماد على راسه : من حرتك
وقف نايف عند صقر وش فيه ؟؟
صقر ابتسم : ولا شي
وبعدها توجه صقر وعماد لسياراتهم
ركب نايف السياره ناظر عياله : تبغون شي قبل ما احرك ؟؟
سيف بحماس : لا ما نبغى شي يالله بابا
اسبقهم
ضحك نايف على حماس سيف وبعدها
حرك بهدوء
*
*
*
*
*
*
وصل نايف للمزرعه وقف السياره
ونزل سيف بحماس
وبعده سلمى ولينا وساميا ومعها محمد
اخذت ريم نفس
ونزلت بهدوء ووقفت ما تدري وين تروح اول مره
تييجي هنا
مشت خلف ساميا وعيونها بالارض ما تبغى تشوف
احد مو طايقه احد
دخلوا تحت انظار صقر وخالد للي واقفين
جنب بعض
صقر ناظر ريم وبعدها ناظر خالد : خالد
لا تلومها على غلطها انت ما تعرف
قاطعه خالد باشمئزاز : ولا ابغى اعرف
وتركه وراح لسيارته
ياخذ اغراضه
دخلت ساميا وناظرت ريم وحست فيها
مسكت يدها تعالي ادلك على الغرفه
اخذتها على غرفه
دخلت ريم معها
ساميا بهدوء : هذا سرير سلمى وهذا للينا
وهذا لك
خذي راحتك ما حد يدخل من العيال بهذا المكان
وبعدها طلعت ساميا
جلست ريم على السرير بتعب
من المشوار وتحس مع الايام يزيد تعبها
بعد ما ارتاحت توجهت للحمام اخذت دش
ولبست تايد اسود وبلوزه طويله ماسكه من الصدر وبعدها وسيعه لنص الفخذ
لونها وردي ماسكه على جسمها باكمام طويله
وعملت شعرها جدوله
وصلت الظهر وبعدها
رمت نفسها على السرير ترتاح من المشوار
دخلت سلمى ولينا
لينا اول ما شافت ريم لوت بوزها
طنشتها ريم وغمضت عيونها تبغى تنام
ما لها خلق احد
*
*
*
*
صحيت ريم على صوت ام بدر
فتحت عيونها بهدوء
ام بدر بحنيه : قومي يا امي تغدي
ريم بصوت ناعس : كم الساعه ؟؟
ام بدر بابتسامة كلها حنان : قريب العصر
جلست ريم ببرود
ام بدر : لا تلبسين عبايه هنا القسم هذا للحريم
ما حد يدخله من العيال
هزت ريم راسها وطلعت مع ام بدر بهدوء
*
*
*
*
جلست ريم بهدوء وما ردت السلام
الجده رفعت حاجب : حسب علمي حنا مسلمات
ليه ما تردين السلام
رفعت ريم نظرها لجدتها وما ردت
وبدت تاكل بهدوء
ام خالد ناظرتها مو عاجبها تصرف ريم
كانوا البنات يتهامسون على الاكل
قدرت ريم تسمع ضحكاتهم الشامته
بس ريم ما اهتمت لهم لانه ما عادت تفرق
معها
لانها جسد بدون روح ما حد يهمها بالحياة
حتى الابتسامه ما عادت تعرف طريقها
ام خالد باهتمام : ليه يا ريم ما تروحين على موعد
الدكتوره ؟؟
ريم وقفت وبهمس : ما يخصك
وطلعت بهدوء
هيفاء فتحت عيونها باستنكار : شفتوا قليله الحيا ؟!!!!
ام خالد بقهر تحس بالفشيله : اذا ما علمت خالد
عنها هالملسونه
هيفاء مسكت الجوال انا اقول له
ام بدر باستنكار : بدل ما تصلحون بينهم
تخربون بينهم
ام خالد طالعت هيفاء : لا تتصلين ما تهون علي ريم
هيفاء طنشت كلامهم واتصلت بخالد وخبرته
وبهرت الموقف بزياده من عندها
سديم بشماته : تستاهل
الجده تضايقت من هيفاء : وش تبغين من البنت ؟؟
وطلعت زعلانه من هيفاء
وتوجهت لغرفه ريم
دخلت بهدوء
ناظرت ريم جالسه على السرير ومتكوره على نفسها
اقتربت الجده منها : وش فيك يا امي ؟؟
ناظرتها ريم بضياع وما ردت
الجده بحنيه : تعبانه ؟؟؟
ريم ما ردت ساكته
الجده : لمتى تبقين كذا ؟؟ ردي علي
انت بخير ؟؟!!
انت مو ريم للي اعرفها كنت اقوى من كذا !!
لا تضعفين يا بنتي بعدك بزهره شبابك
لا تطفي البسمه من ثغرك
دايما اشوفك تبتسمين وتضحكين ما يهمك شي
وين ابتسامتك الحلوه ؟؟
ريم بهمس :
طردتوني من بيتكم وش تبغون مني ؟؟؟!!
تقدرين تتركيني لوحدي
لاني ما احب النفاق
عمركم ما رح تحبوني ولا انا رح احبكم
اتركوني بحالي
ناظرتها الجده وقررت تتركها ترتاح وتهدي اعصابها
*
*
*
*
*
مرت ايام المزرعة ريم تنزل وقت الاكل وترجع للغرفه
ما تكلم احد
حاول فيها احمد ونوف تلعب معهم بس طنشتهم
حاولت فيها ام بدر دون فايده
ما تكلم احد ولا ترد على احد
وزارها الجد بغرفتها وحاول يكلمها
بس عناد ريم ما ردت عليه ولو بحرف واحد
ساكته وكأنها جدار ما يتكلم
وعصب الجد منها وطلع معصب
*
*
*
وقفت عند سياره نايف بهدوء
وهي مغطيه وجهها
ما يبان منها شي
وقفت ام خالد والجده يحاولوا يكلموها
بس ساكته وما تكلم احد
ولا كأنه احد يكلمها
فتح نايف السياره وتوجهت لها بهدوء
وجلست وهي تناظر من الشباك
بعدها دخل اخوانها
وعملوا ازعاج بالسياره
وقف الجد مع نايف شوي وبعدها توجه لجهة ريم وفتح الباب
وكلمها بهدوء :،ريم انزلي ابوي يبغى ترجعين معه بالسياره
ريم ما ردت ولا كأنه حد يكلمها
نايف عصب من اسلوبها صرخ : ريم ترى انا اكلمك
اقول لك انزلي
كان الكل موجود وناظر نايف لما صرخ
ريم ما ردت
اقترب الجد بهدوء : انزلي ابغى ترجعين معي
ما ردت ولا بحرف
الجد تنرفز من عنادها : ريم وبعدين حنا نكلمك وانت مطنشيتنا
فيصل اقترب بقهر : على وش شايفه نفسك ؟؟
وناظر ابوه : وش تبغى فيها بقلعتها خلها منطقه
هنا
نايف وهو يحاول يكتم غيضه : ريم ردي علي
ريم مطنشه على الاخير
نايف صرخ بعصبيه : ريم وقسم بالله ادفنك هنا
سلطان ابعد نايف عن السياره: اتركها انا اتفاهم معها
اقترب من ريم وبحنيه : وش فيك ما تردين ؟؟
قولي ابغى او ما ابغى جاوبي
كانت ريم تناظر لامام وما ردت عليه
وقف سلطان بهدوء : خلاص اتركوها براحتها
وغمز لابوه برجاء انه يمشيها
زفر الجد بضيق وتوجه لسيارته
بعدها ركب نايف بعصبية : دواك بالبيت يا زفته
علشان تحقريني مره ثانيه
يصير خير
ما ردت ريم وهي تناظر من الشباك
ونايف معصب من سكوتها وتطنيشها
وصلوا البيت وهو معصب
دخلوا البيت وهو يحاول يكتم عصبيته
ناظرها بنظرات ناريه : انقلعي على غرفتك ما ابغى اشوف
وجهك وحتى على الاكل يوصلك لغرفتك
ما تنزلين هنا ابد فاهمه
لاني اذا شفتك ادفنك انقلعي عن وجهي
الله ياخذك ويريحني منك
توجهت ريم ببرود للدرج وتوجهت لغرفتها
ونايف مقهور من اسلوبها البارد
*
*
*
روان بقهر : شفتي لو وحده منا عملت كذا
وعاندت كان جدي دفنها بمكانها
سديم : هذي لاعبه بعقل جدي ما ادري
وش عاجبه فيها
لسانها مترين وما تحترم لا كبير ولا صغير
روان : سلمى تقول تنزل تتغدى وترجع على غرفتها
وما تطلع منها ابد ولا تكلم احد الا بالقطاره
ومن رؤوس خشومها
كان يسمع كلام اخواته بالخلف وقف السياره
على جنب والتفت للخلف : ممكن اعرف وش تبغون
فيها نازلين حش ؟؟
سديم : وانت وش مضايقك اتوقع ما بقى شي وتطلقها !!
خالد رفع حاجب : اتوقع انها زوجتي للحين
وبعدين حتى بعد الطلاق بنت عمي وما اسمح لكم
تحشون فيها
واعطاهم نظره قويه
وبعدها حرك السياره بهدوء
طيف ومصعب جالسين قدام
طيف ببراءه،: بابا ليه ريم ما ركبت معنا ؟؟
طالع خالد طيف وبعدها ناظر للامام وهو يفكر
بعنادها
بحياته ما شاف بعنادها
كل الاحفاد يخافون من الجد وفيصل ونايف
ذول لهم هيبه
والكل يهابهم
وهي بعنادها طنشتهم ولا رف لها جفن
طول عمرها البنت ضعيفه وتخاف
بس ليه ما خافت من نايف ؟؟!!
مع انه كل الموجودين خافوا من عصبيته
وهي مطنشه على الاخير ولا كأنه يكلمه
تنهد وهو مستغرب من تصرفها
*
*
*
زفر الجد بضيق من تصرفها
الجده : هدي اعصابك انت تعرفها عنيده هالبنت
الجد بقهر : بس مو لذي الدرجه
تحقرنا كلنا ولا كأنه حد يكلمها
صقر : بس يبه
الجد بعصبية : وحطبه انت اسكت ما ابغى اسمع
صوتك
حاطك محامي دفاع
انا كسرت نفسي لها ورحت لها للغرفه وحقرتني
ورجعت كسرت نفسي علشان ارجعها معي
واراضيها وتحقرني للمره الثانيه
انا الكل يحسب الف حساب لكلمتي
وهي حاقريتني !!
انا عمري ما اعتذرت لاحد الا لها وفوق هذا
تحقرني !!!
شد على قبضه يده بقهر
*
*
*
مرت الايام بهدوء
وريم ما تطلع من غرفتها وما عادت تشوف نايف
وحتى امتحاناتها راحت مع الشغاله والسواق
وانتهى الفصل الدراسي الاول بسلام
وريم قريب تدخل الشهر السابع
وبطنها شبه بارز مو ظاهر كثير ما صارت احداث مهمه
خلال هذي الفتره
كانت روتينيه
كان الزوج الثلاثي وام بدر يزورون ريم ويحاولون يرجعونها
مثل ما كانت قبل
بس ما قدروا البرود مسيطر عليها
عماد كل يوم يزورها ومع ذلك اعطته طاف ولا كلمه تكلمت معه
زارها صقر وسلطان وام بدر خلال هذه المده
وكانوا يتطمنون عليها
بس كانت ريم تقابلهم ببرود
علاقتها بنايف كانت صفر طول المده ما شافته ولا شافها
والجد للحين زعلان عليها وما زارها
دخل عليها الغرفه بعد ما طرق الباب
ناظرها لثواني
زمان ما شافها يحسها صارت اكبر وبطنها بارز
بس بنظره رح تبقى بزر مهما كبرت
غمض عيونه بألم هي عايشه معه بنفس البيت بس
زمان ما شافها او جلس معها
يعترف انه مقصر معها
بس كذا بنظره افضل ريم عنيده وهو مثلها
وكل لقاء بينهم ما رح ينتهي الا بشجار
وما يضمن نفسه لما يعصب
تنهد و تكلم بهدوء : جهزي نفسك
خالتك ام خالد ولدت البارحه علشان تروحين معي للمستشفى
معك ربع ساعه تكونين جاهزه وطلع
ناظرته وحست بنغزه بصدرها هي بنته
استخسر يسألها عن حالها واحوالها
زفرت بضيق
وتذكرت ام خالد
وحست بخوف من الولاده ومع ذلك
تبغى تروح تشوف البيبي وتتخيل شكل
ابنها كيف رح
تنهدت بتعب
وقامت تجهز نفسها
*
*
*
*
دخلوا المستشفى وريم تمشي مع ساميا
بهدوء ونايف متقدم عليهم
وصلوا قسم الولاده
وكان بالممر صقر والجد وعماد وفيصل
وقف نايف معهم وتكلم معهم
تقدمت ساميا وسلمت على عمها
ناظر الجد ريم للي واقفه بعيد عنهم ولا كأنهم يقربوا لها : بعده ما طاح الحطب للي براسها
نايف : يبه يعني عجزت فيها البنت عنيده
واخاف اعطيها طراق واضر الجنين
بس اصبر حتى تولد يصير خير
اشرت لها ساميا علشان يدخلون
توجهت ريم للغرفه ببرود والكشره
مرسومه على وجهها
عماد ناظر نايف : عاجبك وضع بنتك كذا ؟؟؟
نايف بهدوء : عندك حل لوضعها اعطيني اياه
عماد : ضايقتها بشي او قلت لها شي زعلها
نايف بدون نفس : ما قلت شي
عماد : معقول علشان خالد ؟؟
صقر : ما اتوقع من بعد ابوي قال لنايف ياخذها
عنده يعني بين قوسين طردها
ناظره الجد بحده : انا ما طردتها انا قلت كذا
لاني كنت عارف انه عماد منفعل ورح
بنفسه يطلب منها ترجع
لانه طبعه كذا ينفعل
عماد ناظر فيصل : والاستاذ خالد مو ناوي يرجعها ؟؟
فيصل باحراج من نايف : ما يبغى عجزت فيه
صقر بقهر خلاص سكروا الموضوع مو مكان
فتح دفاتر الحسابات
*
*
*
*
*
دخلت والكشره على وجهها
كانت الجده موجوده وسديم وروان
الجده ناظرت ريم وابتسمت : هلا والله
ما ردت ريم ووقفت بعيد عنهم
سديم بقهر : ليه جايه وكلمه الحمد لله على السلامة
ما قلتيها
على وش شايفه نفسك ؟؟
روان : ناس ما عندها ذوق
ام خالد : خلاص يا بنات
تقدمت ساميا وسلمت على ام خالد
وجلسوا يتكلمون بامور الولاده
وريم تسمع وقلبها مقبوض وخايف
بعد وقت طرق الباب بهدوء
الجده بهدوء : شوفي يا سديم مين على الباب
وقفت سديم وهي تناظر ريم بقهر
وتوجهت لعند الباب
وبعدها ناظرت ساميا : هذا خالد
ساميا غطت نفسها خله يدخل اصلا انا طالعه
عندي مراجعه هنا
وناظرت ريم : لما نكمل نرجع لك هنا ما رح نتأخر
وطلعت بهدوء
وريم وكأنها جماد ما ردت
الجده : بعدين يا ريم لمتى هذا الحال
ما ردت ريم
دخل خالد بهدوء
وقع نظره على ريم للي واقفه بعيد
عن امه وجدته واخواته
و بوزها مترين
ناظرها بهدوء : اخبارك ريم ؟؟
ناظرته باشمئزاز وما ردت
حس بالفشيله بس طنش وناظر امه : اخبارك يمه اليوم ؟؟
ام خالد بتعب واحراج : بخير يمه
جلس بالجهة الثانيه مقابل ريم جنب جدته : ها وش ناويه تسمي هالبنوته
ام خالد بتعب : للي ودكم اياه
ابتسم خالد : وش رايكم صيته ؟؟؟
الجده لوت شفايفها : ليه ما سميت بنتك
هذا الاسم
وبعدين هذي الفرصة قدامك يمكن ريم تجيب بنت
سميها صيته
رفع نظره لريم للي واقفه بعيد عنهم وبطنها شبه
بارز
ام خالد : يمكن يكون ولد
خالد ابتسم : يا رب ولد
كانت واقفه ومكشره مو طايقه احد منهم
وتنتظر متى ترجع عالبيت
بس تبغى تشوف البيبي
هي جاءت علشان تشوفه
مسكت الجوال وارسلت رساله لصقر
وبعد دقايق جاها رده تطلع قاعد ينتظرها
برا
عدلت الشيله توجهت للباب بدون اي كلمه
الجده : وين يا ريم ؟؟؟
طنشتها ريم وطلعت وصوت كعبها صداه بالغرفه
سديم بعد ما طلعت ريم : شفتم
وناظرت خالد : تصدق دخلت وماده البوز
حتى ما سلمت على امي ولا تحمدت لها بالسلامة
وقفت بعيد عنا خايفه نلوثها
ام خالد : اتركيها براحتها
الجده : عنيده هالبنت
الله يهديها ما تكلم احد ومقاطعه الجميع
*
*
*
طلعت وشافت صقر ينتظرها ومعه عماد
ابتسم صقر : يالله شرفي
ما ردت عليه وملامحها جامده خاليه من اي
تعبير
توجهوا للحضانه
ودخلوا
عماد اشر لها : هذا هي اخت زوجك
ناظرت ريم البيبي كانت صغيره وكل شي صغير
غمضت عيونها ترسم صوره للبيبي للي في بطنها
هزها صقر : هي فتحي عيونك جبتك تشوفيها
مو تغمضين
ابتسم عماد : اتركها متأكد قاعده ترسم صوره
للبيبي حقها
ناظرته ريم واستغربت كيف عرف بس طنشته وما ردت
عماد اقترب منها : تتوقعين لما كنت بعمرها كان حجمك اكبر او اصغر
صقر ابتسم : اتذكر وقتها كنت صغير بس اذكر
شكلها وهي باللفه
كانت مزيونه وحتى ساره ما خلت حد يشوفها
او يحملها حتى امي طردتها وما خلتها تشوفها
بس انا بدون ما تشوفني
تسللت ودخلت وشفتها هالقمر
وقرص خد ريم
كانت ريم فاتحه اذنها معقول امها عملت كذا
وما خلت حد يشوفها
نزلت دمعه من عينها لذكرى امها
للي ما تدري عن هوى دارها
عماد ضرب صقر على راسه : اقول انقلع من هنا انت وذكرياتك
وناظر ريم بحنيه : ليه الدموع يا قلبي ؟؟؟
مسحت ريم دمعتها وناظرته بحقد : اكرهك
ابتسم عماد : واخيرا تكلمتي
بس انا احبك
تركته ريم وطلعت من الحضانه واحزان الماضي مو راضية تفارقها
وقفها شخص مسك يدها بهدوء : كم مره قلت لك
لا تلبسين كعب ؟؟؟ انت ما تعرفين اضراره على الحمل ؟؟؟
امشي معي الحين للدكتوره ابغى اطمن على الجنين
بدون ما تطالعه ريم سحبت يدها منه ومشت
ومطنشيته ولا ردت عليه
عماد من خلفه : اشوفها ساحبه عليك !!
خالد بقهر : وقسم بالله لو يصيب الجنين شي
ما رح تحصل خير لابسه كعب
قاطعه عماد : كلك خوف على الجنين
ناظره خالد بغرور : ما همتني بقلعتها اهم شي
الجنين يكون بخير
صقر من خلفه : اسكت ترى كلامك ينرفزني يا ابو
العيال ومشى يلحق على ريم
*
*
*
*
مرت الايام بهدوء وريم نفس الحال
ما راحت تزور ام خالد بالبيت ولا طلعت من البيت
بس تحس البرود للي صابها اخف من اول
قررت تحضر عرس سديم وسليمان
وتغطي على سديم بالحفله وتقهرهم
ارسلت لصقر رساله
وبعد دقايق وصلها الجواب امرك بعد ربع ساعه
جهزت نفسها
ونزلت بهدوء كان المكان فاضي
طلعت بس استغربت عماد للي قاعد ينتظرها
ما يهمها مع مين تروح اهم شي
تشتري للي في بالها
ركبت من الامام بهدوء
عماد بابتسامة : هلا والله
نورت السياره
وبعدها حرك لانه عارف ما رح ترد عليه
وكل شوي يناظرها
بس صدمه كلامه : ترى ما اشبه غاده كل شوي ناط
بوجهي تناظرني
بهتت ملامحه وسكت لثواني ما توقع يروح تفكيرها
كذا
وخاصه انها ما تشبه غاده بس من اللمحه الاولى تحس بينهم قرابه
وقف السياره على جنب وطالعها : ومين قال لك كذا ؟؟؟
ريم بدون ما تطالع : واضح كل يوم تيجي
تجلس معي وتكلمني
يمكن تبغى تتذكر غادوووووو
عماد بهدوء : تراك ظلمتيني والله للي رفع سبع
سموات انها غاده ما تيجي في بالي
بالعكس عمري ما كرهت احد قدها
كل حبي لها تحول كره
وتعاملي معك لاني فعلا حبيتك ما ادري
دخلتي قلبي بدون استئذان
صحيح اول ما جيت كنت كرهانك قبل ما
اشوفك لانك حفيده سالم بس
قبل ما انام تذكرت موقفي معك وكيف
عاملتك
ندمت كثير ومحبتك دخلت قلبي كلما اتذكر شكلك
ناظرته ريم وحست بصدقه ردت بهدوء : ربنا نجاك منها تراها خبيثه
وناظرت للامام بهدوء
استغرب ما توقع تقول كذا عن خالتها
سكت وما رد وحرك السياره
دخلت ريم السوق تشتري فستان مناسب للحفله
عماد بابتسامة : اختاريه فستان حمل
ناظرته ريم وما ردت
قعدت تختار فساتين حتى اختارت فستان
لونه فضي نفس اللون للي خربه خالد
مسكه عماد : حلو
هزت راسها ريم واخذته ولفت بالسوق شوي
طلب منها عماد يتغدون برا
بس رفضت ريم واضطر يرجعها للبيت
*
*
*
*
يوم زواج سليمان وسديم
جهزت نفسها وناظرت نفسها برضى
كان فستانها بدون اكمام _باكلس _ وماسك من عند الصدر
وبعدها وسيع شوي مناسب للحمل فيه
حركات ناعمه
ولبست كعب عالي من لون الفستان
وخلت شعرها مفتوح وعملت فيه حركات بسيطه ومكياجها كان ناعم بشكل كبير
حصنت نفسها
ولبست عبايتها وغطت وجهها وطلعت لسياره عماد للي كان ينتظرها
ركبت جنبه بهدوء
عماد قبل ما يحرك : نزلي اشوفك
ونزل الغطاء قبل ما ينتظر ردها
ابتسم : ما شاء الله يحفظك من العين
حصني نفسك
رجع الغطاء على وجهها وحرك وهو يتكلم
وهي مستمعه له
نزلت من السياره بهدوء ودخلت القاعه
خلعت العبايه والشيله وعدلت شكلها
بالمرايه وبعدها دخلت عند الحريم
كانت ملفته للانظار
ام بدر اقتربت منها وبهمس : وش ذا اللبس
عاري كثير
ناظرتها ريم وما ردت
ام خالد وقفت بذهول : بسم الله ما شاء الله
الله يحفظك
بس ريم ليه تلبسي كذا لو عرف خالد بلبسك
اكيد رح يعصب
ريم ببرود : وش علاقته بالموضوع باقي كم شهر
وتوصلني ورقتي
وتركتهم وراحت
ام خالد : مجنونه تبغى تنصاب بالعين
شوفي شعرها يجنن ما شاء الله
ام بدر : لبسها عاري كثير
ام خالد : اخخخخخ عنيده هالبنت
*
*
*
*
*
الجده بحزم : ارجعي عالبيت وبدلي
انت مجنونه تلبسين كذا
ظهرك برا وفستانك فوق الركبه
وش هذا اللبس ؟؟؟
شوفي كل الحريم ودهم ياكلونك بعيونهم
ام خالد غمزت للجده وبهدوء : ريم تعالي
ابغاك بموضوع ضروري
ناظرتها ريم وبسرعه مسكت يدها ام خالد : دقيقة
ما رح تتأخرين
وسحبتها معها
كانت ريم ودها تعترض بس شافت الناس تناظرهم
اضطرت تسكت وتمشي معها
دخلت احدى الغرف
وقفلت الباب خلفها
ام خالد بهدوء : صدقيني هذا لمصلحتك
ناظرت ريم بالغرفه وانصعقت لما شافت خالد
للي العصبيه واضحه على ملامحه
خالد بحزم : يمه تقدرين تتركينا لوحدنا
ام خالد بتوتر : ان شاء الله
