رواية طفولتي المشتتة الفصل الاربعون 40 بقلم ضاقت انفاسي
خالد
طول الاسبوع وريم تكلم امي وجدتي
عن الهدايا
وتجاكر سديم وروان وسميه
بديت اتقرب منها وكل الحواجز بينا تزول
وخاصة بعد ما تركت ريم اللعب وحركات البزران
كانت حركاتها تنرفزني وتحرجني
قدام اهلي وتبعدني عنها
يعني اول زواجنا زعل ابوي لاني ما اطلع معها
ونغير جو
بس لا تلوموني لاني كنت انحرج اجلس معها
او اطلع معها
وخاصه مع حركاتها المبزره
اول يوم بالزواج لما شفتها
كانت ملامحها بالمكياج كبيره وبنت ناضجه ولما سألت
بأي صف قالوا ثاني ثانوي
بس تفاجئت ثاني يوم الصبح
بدون مكياج كانت صغيرة وملامحها طفوليه
حسيت وبعد ما شفت تصرفاتها
حسيت بالندم اني تسرعت بالزواج
لازم تريثت قبل هذي الخطوه
لاني يوم بعد يوم اكتشف انها ابد مو قد
المسؤوليه
وخاصة بعد ما اكتشفت انها ما تصلي
بصراحه كانت صدمه لي كبيره
وزعلت منها وما صرت اكلمها
كنت ابغى احسسها بعظم ذنبها كيف تركت الصلاه
بس بعد ما عرفت بالحمل شديت شوي عليها
والحمد لله استجابت لي
حتى احسها كبرت وصارت اعقل
مع انه لسانها للحين طويل بس احاول اخليها
يكون عندها صبر اكثر
والحمد لله حتى علاقتها مع عيالي حلوه
كثير ودايما متفقين
وهذا اكثر شي مريحني
*
*
*
*
*
سليمان يحاول يكتم عصبيته : يا جدي افهمني
يعني لمتى انتظر
الجد ببرود : على الاقل تكمل سديم الترم الاول
سليمان بقهر : كله علشان الكلبه ريم
قاطعه الجد بحزم : كلمه زياده عن ريم صدقني
اخلي الزواج بعد سنتين
سليمان : يعني يا جدي خالد تزوج ونواف تزوج
طيب ليه انا لا
الجد ببرود : هذا حصاد اعمالكم
يالله لا تشغلني عندي اشغال كثيره
يالله سلام
قفل سليمان الجوال بقهر وهو شاد على اسنانه
وناظر صقر : كله بسبب بنت اخوك الكلبه
صقر ضحك : ههههههه تستاهل
قاطعهم دخول خالد على مكتب صقر : سلام شباب
ناظره سليمان بدون نفس
صقر بابتسامة : هلا والله تعال اجلس
جلس خالد وهو مبسوط : بدون ما تقول رح اجلس
غصب عنك
ناظر خالد سليمان : علامك ماد البوز
صقر ضحك : ههههه هذا حالته صعبه ههه
سليمان بعصبية : صقر
خالد ابتسم : قول لي يمكن اقدر اساعدك
سليمان بعصبية : اسمع ترى مو فايق لك
صقر بابتسامة : يمكن تقدر تساعده الاخ يبغى
يتزوج وجدك مو راضي الا لما سديم تكمل
الترم الاول بالجامعة
خالد ابتسم : طيب بعد الترم الاول وين المشكله
وقف سليمان بعصبية : كله بسببها هالكلبه
وطلع معصب
خالد عقد حواجبه : مين يقصد ؟؟؟
صقر يغير الموضوع : انسى سالفه قديمه
المهم وش صار على موضوع الماستر
عدل خالد جلسته وبدأ يكلم صقر بالموضوع
*
*
*
*
وقفت بالصاله وتشم الورده للي اعطاها اياها
خالد
ومبسوطه فيها
وتناظر فيها ورده جوري لونها خمري
توجهت للمطبخ ومسكت كاس مويه وحطت فيه
مويه وحطت الورده فيها
وحطتها على طاوله المطبخ
وتوجهت للغرفه واحضرت قلم
ورجعت للمطبخ مسكت ورقة الورده
ورسمت قلب وكتبت عليه بالانجليزي
حرف kو r وبينهم سهم
ناظرت الورده بسعاده
دخلت طيف وناظرت الورده : من وين جبتيها ؟؟
تجنن
ريم ابتسمت : هذي هديه لا تخربيها
خليها بالمويه علشان ما تموت اتفقنا
طيف برطمت : لا تقولين اتفقنا هذي الكلمه بس
بابا يقولها
ريم بابتسامة : فديت ابوك ومدت لسانها
طيف : صح تذكرت ماما تقول لك انزلي
ريم وهي تثاوب : ان شاء الله
طلعت وقبل ما تنزل كان صوتهم تحت عالي شوي
وقفت بأعلى الدرج تسمع وش فيه
الجده : يا سميه كبري عقلك بعدكم متزوجين
جديد وشهوله تروحون تتعالجوا
نواف بنرفزه : قولي لها فهميها
سميه : خالد وريم تزوجوا قبلنا بإسبوعين
وهذا هي ريم حامل
ام خالد : يا سميه لا تقيسين ريم في حريم بعد
سنه يحملون بدون علاج بعدكم بالبدايه
سميه : ودكم انتظر لسنه مستحيل
وش فيها لو رحنا باكر وتطمنا وش فيها
نواف بعصبية : انت الحكي معك ضايع وطلع معصب
الجده بلوم : كذا ضايقتي نواف
سميه وهي تمسح دموعها : مو بيدي يا جده
لما اشوف ريم احس بنار بقلبي
ليه هي حملت وانا لا
مع اني اكبر منها بكثير
ام خالد : امسحي دموعك وكلها ارزاق من عند
الله وان شاء ربنا يرزقك بعيال تقر عينك فيهم
حطت ريم يدها على بطنها بخوف : يمه الحسد
وانا اقول علامها تناظرني وكأني ماكل حلالها
قل اعوذ برب الفلق
نزلت ريم بهدوء وهي تتظاهر انها ما سمعت شي
لما دخلت الصاله طلعت سميه من المكان كله
طنشت ريم
وجلست بعد ما سلمت على جدتها
الجده : وينك ما تزوريني ؟؟؟
ريم بهدوء : تعرفي المدرسة والدراسه ومشاغل
الحياه
ام خالد وبطنها بارز : قال مشاغل لا تصدقيها
الجده ناظرت ام خالد : عارفها هالملسونه
ما تبغى تزورني وتتحجج
ريم ضحكت : ههههههه دايما واقفات ضدي اقول
يا ام سلوم اشوف الشايب طول بسفرته
يا خوف قلبي شهر عسل
وانت هنا على يا غافلين
الجده تحاول تقنع نفسها : لا لا اصلا جدك ما يستغني
عني ويبيع الكون علشاني
ريم : حلو باكر يذوب الثلج ويبان للي تحته
ام خالد تناظر الجده : لا تردين عليها
هذي الملسونه
وقولي لي وش صار لما زرتي ام فيصل
جلست الجده تسولف وريم وام خالد مستمعات
بالمدرسة
ريم سحبت الجوال : هاتي اشوف
فتحت عيونها على وسعهم وناظرت ميرا : يا عيني على الحب
وصارت تتصفح الرسائل
طالعت ميرا وباستغراب : كيف تعرفتي عليه
ميرا وهي تلعب بحواجبها : بطريقتي الخاصه
ريم وهي تناظر الرسائل : مالت عليك وعلى طرقك
الخاصه
رفعت ريم نظرها وبتساؤل : ما تستحين لما يرسلك
هذي الرسائل الماصخه ؟؟؟
ضربتها مريم على راسها بخفه : روحي شوفي الرسائل المرسله
بعدين تكلمي
ميرا بنغزه : ناسيه نفسك
مريم : صحيح اكلم وارسل بس ما ارسل
رسائل مثل كذا حرام عليك تظلميني
فتحت ريم الرسائل المرسله وهي تتصفح فتحت
عيونها على وسعهم وصار وجهها طماطم : ميرا
كيف ارسلتي له كذا
ما تستحين ؟؟؟؟!!!
ميرا بدون اهتمام : عادي
ليان بابتسامة : هذي وجهها مغسول بمرقه
ميرا رفعت حاجب وقرصت عيونها : اقول يا مؤدبه
وناظرت ريم شوفي جوالها اغلب الرسائل
اخذتها من ليان
ليان باعتراض : بس انا اختلف عنك انا ارسل لخطيبي
اما انت لصديقك ومو محرم لك
ميرا بلامبالاه : كله واحد
وبعدها ناظرت البنات بجديه : وش رايكم تيجون عندي بعد اسبوعين بالبيت امي ودها تعمل حفله
لصديقاتها
وانتم معزومين
ليان بحماس : جاي بدون عزيمه
مريم : وخطيبك ما يعارض ؟؟
ليان بدلع : ولا مره قال لي لا يقول ما اقدر اقول
لك لا واكسر بخاطرك
روحي وين ما بغيتي
ميرا ناظرت مريم : وانت اكيد رح تيجين ؟؟؟
مريم بثقه : ما تحتاج سؤال اول الحضور
ميرا طالعت ريم : وانت لازم تيجين
ناظرتها ريم بتردد ما تدري وش تقول لها وبتفكير : امممم اشوف خالد اذا وافق
قاطعتها ميرا : غبيه انت وش دخله فيك
ليان رفعت حاجب : علامك يا ميرا هذا زوجها
واكيد رح تخبره وتعطيه خبر
ما يصلح تطلع بدون علمه واكيد رح يوافق
ليه يرفض
حفله بنات
هزت راسها ميرا ومو عاجبها
:
:
:
:
:
:
بعد الغداء توجهت للجناح وجلست وتفكر كيف
تقنع خالد علشان تروح على الحفله
قطع تفكيرها طق باب الجناح استغربت
لما سمعت صوت فيصل الحاد : افتحي الباب
فتحت الباب ورجعت للخلف خطوتين
وطالعت فيصل للي ملامحه ما تبشر بخير
اقترب منها ومسك شعرها وبعصبيه : مين الزفت للي كنت واقفه
معاه اليوم بعد الدوام وشد على شعرها
هاه تكلمي
ريم حاولت تبعده عنها ومن بين اسنانها : ما يخصك تفهم
شد على شعرها وبعصبيه : لا تعانديني
تراني ادفنك هنا تكلمي مع مين كنت واقفه
ريم بعناد : ما لك دخل اكلم وامشي واطلع
مع مين ما ابغى ما لك دخل
صرخ فيها بعصبية : ريم
مين الزفت للي وقفتي معه جاوبي
ريم وتحاول تبعده عنها : حبيب
ما كملت كلمتها الا كف على وجهها
حطت يدها على خدها وناظرته بحقد
فيصل بعصبية وعيونه تقدح شرار : يا قليله الحيا انا اليوم دافنك دافنك
ضحكت ريم وهي تناظر وجه القريب منها ومن داخلها قهر : هههههه لا تنسى
تقرأ الفاتحه على روحي وحركت حواجبها
فيصل والشياطين تنطنط فوق راسه هو
مولع وهي تضحك رفع يده يضربها
غمضت عيونها بتلقائية
وغطت وجهها بيدينها وهي عارفه اليوم
رح تطلع
جنازه
فيصل ما رح يتركها قبل ما يكسرها
بس استغربت ما وصلها طراق
فتحت عيونها وشافت خالد واقف بينها وبين فيصل
خالد بزعل : ممكن اعرف وش فيه ؟؟
فيصل بعصبية : ما رح اسكت الا لما تقول لي
مع مين كانت واقفه بعد الدوام
مين هذا الحقير ؟؟؟
خالد بهدوء : وش سالفه مع مين واقفه ؟؟
فيصل بعصبية : واقفه باب المدرسه مع واحد حقير واطي مثلها
خالد بقهر : انت شفتها واقفه معه ؟؟
فيصل زفر بضيق : لا ما شفتها
بس روان شافتها واقفه معه واعطاها ورقه
كمان
خالد ببرود : كذب ما اصدق
لو اشوفها بعيني الا اكذب عيني واصدق
ريم
فيصل بعصبية : اقول لك روان شافتها !!
لف خالد وناظر ريم بهدوء
ومسك يدها وباليد الثانيه رفع راسها : خلي دايما
راسك مرفوع
اسمعيني انا كل كلام روان مو مصدقه ولا مستعد
اسألك لاني اثق فيك
بس رح احقق بالموضوع حتى اثبت انك بريئه
لابوي
وناظر ابوه بحزم : لكن وقسم بالله لو تطلع روان
كذابه ما يحصل لها خير
هذي الامور مو سهله تلعب بأعراض الناس وتتهمهم
ونادى بصوت عالي : روان يا روان
روان للي كانت واقفه برا
دخلت بتردد وخوف من خالد
ناظرها بحزم : انت شفتيها بعينك ؟؟
روان بخوف من خالد : شفتها واقفه معه
وسلم عليها بيده وبعدها اعطاها ورقه
وحتى حطتها بكتاب رياضيات كانت حامليته بيدها
ناظر خالد روان بحده وهو شاد على اسنانه : يصير خير
توجه للغرفه واحضر كتابها الرياضيات
ورجع وقف بالصاله
ناظر ابوه وريم وروان
وبعدها ببرود فتح الكتاب وتصفحه
حتى استقرت عينه على البطاقه
كان فيصل عينه على الكتاب وخاصة الورقه
وكأنه وده يلتهمها بنظراته
ريم كانت تناظر بملامح جامده
وروان بابتسامة نصر
ناظر خالد الورقه بهدوء وتصفحها
وبعدها ناظر ريم
زفر بضيق وناظر روان : هذي الورقه ؟؟؟
روان هزت راسها بالموافقة : ايوه هذي
شفته لما اعطاها اياها
ناظرها بهدوء وهو يفكر
بعدها مد الورقه او بالاصح البطاقه لفيصل
مسكها وتصفحها
وبعدها ناظر خالد بحزم : حتى لو ما يحق لها
تكلمه وتقف معه
تقدم خالد ولاول مره واعطاها كف على وجهها
وبعصبيه : وما يحق لها تتطعن زوجتي وتفضحها
وبالاخير يطلع ما له اساس
وقسم بالله يا روان اذا هذي الحركه تكررت ما تلومين الا نفسك
لو تشوفينها مع الف واحد ما لك دخل فيها
وبحده تفهمين
روان كانت حاطه يدها على خدها ودموعها تنزل
هزت راسها وطلعت بسرعة من المكان
فيصل تضايق لانه خالد ضرب روان
بس ما يقدر يقول شي لخالد
زفر فيصل بضيق : بدل ما تشكر اختك انها تنبهك
على حركات زوجتك
وش عرف روان بزياد وش عرفها شافتها
واقفه معه
خبرتني بالموضوع الحين روان صار عليها الحق
خالد بهدوء : هي مو خبرتك هي فضحتها
كل البيت ما خلت حد الا قالت له حتى بنات عمي
متأكد انهم معهم خبر
انا اول ما دخلت مثل الاهبل شفت اخواني وامي
يتهامسون واول ما دخلت سكتوا
ما اخذت فيها
وطلعت على جناحي ابدل ملابسي
شفت بناتك الجوز واقفين قريب من جناحي
حتى لو كانت تكلم رجال غريب واخطأت تيجي
تفضحها
وين الستر وين النصيحه
ليه ما جاءت وخبرتني انا
وقتها انا اتصرف
مو ما تخلي واحد الا تقول له
فيصل بقهر : وعاجبك انها تكلم زياد وهو كان
خطيبها
ريم بتحدي لفيصل : اتوقع اني ما وقفت معه لوحدي
اخته كانت معنا واقفه بس بنتك الكلبه هذي الجزئية ما قالتها
وبعدين هو طلب من اخته تناديني وطلعت
سلم علي واعطاني بطاقه الزواج
ولا تنسى انه خالي واعطت فيصل نظره كره
زفر خالد بضيق : خلاص يا ريم تقدرين تروحين عالغرفه
قاطعه فيصل بحده : خليها ست الحسن انا طالع
من هنا
مسك خالد يد ابوه : زعلت ؟؟
فيصل وهو يكتم غيضه ما يحب يشوف
ابنه زعلان وابتسم مجامله : ما زعلت
وبعدها استأذن وطلع
قفل خالد الباب وبهدوء : طيف ومصعب نايمين ؟؟
ريم هزت راسها بهدوء
مسك يدها وجلس على الكنبه وهي جنبه
ناظرها بهدوء : صدقيني عنادك يدخلك بمشاكل
ما لها اول ولا اخر
ليه ما قلتي له من البداية انه زياد واختصرتي
كل هالمشكله
ريم بقهر : ومين قال لك انه رح يسكت
ما رح يتركني بحالي
ارجع ظهره للكنبه وتنهد بتعب : خلاص انسي
السالفه ولا تكدري خاطرك
علشان شي ما يستاهل
ولا تهتمي لاحد دامك واثقه بنفسك
هزت راسها وهي تفكر تخبره او لا وبالاخير
قررت تخبره
طالعته بتردد : ءءءء ممكن اطلب طلب بس قول تم
ناظرها وابتسم : ما رح اقول تم حتى اعرفه
ريم لوت بوزها : خلاص ما رح اقول الا لما تقول تم
ابتسم : شوفي اذا موضوعك فيه مصلحه لك
وما في معصية اعتبريني موافق
يالله قولي
ناظرته ريم بتردد : صديقتي بالمدرسة يوم الجمعة
امها عامله حفله عيد ميلاد بالبيت وعزمتنا نحضرها
ناظرها بهدوء : كملتي ؟؟
هزت راسها بالموافقة بهدوء
رد بهدوء : شوفي يا ريم مو الحين تقولين قاعد
يتحكم بي ويضغط علي
لا ابد الموضوع مو كذا ابد
انت زوجتي ويهمني امرك موضوع حفلات
وعزايم من بنات المدرسه
اسمحي لي ما اقتنع فيها كم بنت ضحكوا
عليها بحجه حفله بالبيت وكلها بنات ولما تروح البنت تكون حفله مختلطه وامور تغضب ربنا
رجاء
موضوع مثل كذا لا تفتحيه مره ثانيه وارفضي
على طول بدون ما تقولي لي
وانا مستعد اطلعك بدل هذي الحفله للمكان
للي تبغيه
واذا حابه تجتمعين مع صديقاتك ما عندي مانع
اعملي حفله هنا واعزميهم
هزت راسها وهي شبه مقتنعه بكلامه
*
*
*
*
*
*
*
جالس على الكنبه ومغمض عيونه
ناظرته امه : ليه متضايق المفروض تفرح
زواجك بعد اسبوع
فتح عيونه وناظرها وبنغزه : يمكن اطلع عمها بالرضاعه هذي المره
ام زياد وقلبها حارقها على ابنها للي انكسرت فرحته : لا ان شاء الله تفرح وتنبسط
وبعدين ما تدري يمكن خير لك
زياد وقف : اليوم شفتها واعطيتها
بطاقة الدعوه
يالله شو احسها طفوليه وبريئه
قسم بالله حشيمه لابو سلمان للي طلب مني ما ازورها حتى ما تصير مشاكل بيني وبين
اعمامها للي رافضين الفكره تماما
الا كل يوم ازورها
وللي مو عاجبه يبلط البحر
بس وش يطلع بيدي
ناظر امه بجديه
نذر علي اذا تزوجت وربي رزقني بنت الا اسميها
ريم
ابتسمت ام زياد : الله يوفقك وييسر لك كل خير ويرزقك الذريه الصالحه
*
*
*
*
*
*
بدر بابتسامه : ريم حبيبتي تعالي هنا
الحين ازعل منك
عبود وهو يحمل ريم بحضنه : اصلا هي ما تحبك صح ريم
وباسها على خدها
صارت ريم تبكي
بدر سحبها من عبود : شوف صابها تسمم
منك
شوف كيف صارت تبكي منك
سامي ناظر بدر : وجعتها يا حمار
اصلا ريم ما تحبكم انتم الاثنين لما تشوفكم
تصير تبكي
بدر وهو حامل ريم ضرب سامي برجله : اقول تلايط من هنا
دخل ريان البيت بهدوء
بدر بنبره استهزاء : هلا والله بكابتن الطيران
عبود : من غيرتك تدرس طيران مثل ريان
وناظر ريان وغمز له : لا تنساني لما تتخرج وتتوظف
كل رحله خذني معك
سامي : ما لقيت غير ذا التخصص طيار
بدر باستهزاء : روح ادفن نفسك على هذا التخصص
قال حلم الطفوله
مالت عليك وعلى احلام الطفوله
ريان ناظر بدر بغرور : المفروض يدفن نفسه حضرتك
اصلا لو مكانك ادفن نفسي كل الشباب تخرجوا
الا انت
وباستهزاء
يمكن عامل تعاقد
قاطعه بدر بعصبيه : اخرس يا قليل الحيا
انا اخوك الكبير تقول لي هذا الكلام
ناظره ريان بغرور وتوجه لغرفته
ريم كانت تبكي من صراخ بدر
بدر بعصبية : خلاص اسكتي
فضحتينا بصوتك
طالعه لبنت عمك ملسونه
وزفر بقهر لما تذكر بنت عمه ريم
ناظر عبود : خذ اختك رفعت ضغطي
عبود بنغزه : رفعت ضغطك والا تذكرت للي تحمل اسمها
بدر بضيق : كله من جدي رفضني والا وش حلاتي
سامي : ما رح يلاقي مثلك كل سنه يحمل مواد
عبود وهو يضحك : هههههه لا رح يلاقي
مثله عمر نسخه طبق الاصل
هههههه
ريم تبكي بصوت عالي
دخلت ام بدر وقاطعت كلامهم : حسبي الله على
عدوكم
وش عملتوا بالبنت
بدر ناول امه ريم : ما عملنا لها شي
بس بنتك حساسه زياده
اخذت ام بدر ريم وهي تحضن فيها وتحاول تهديها ودخلت داخل
&
&
&
نزلت بعد العشاء تحت تجلس معهم
اول ما جلست فتحت ام خالد تحقيق : سمعت
انك تلتقين مع زياد ؟؟
ريم ابتسمت وخاصه لما شافت نواف معصب
ناظر خالتها : ايه للمعلومه مو اول مره
التقي فيه
نواف احتدت ملامحه : بإذن مين سمحتي لنفسك
توقفين معه هذا الحقير
ريم ردت بإسلوب ينرفز : بإذني انااااااااا
انا سمحت لنفسي اكلمه ورح ابقى اكلمه
وما حد له عندي للي عنده اعتراض
يقدمه للمحكمه
نواف بعصبية وكره لزياد : اشوفك تدافعين
عنه للي حط اولاد عمك بالسجن
تدافعين عنه
ريم بلامبالاه رفعت ضغط سامر ونواف : انتم لبي غلطتوا
عليه واخذتم جزائكم
سديم بقهر : حقيره
ريم بحده : حط لسانك بحلقك فاهمه
زياد خالي غصب عن الراضي والزعلان
سامر بقهر : تدرين انه صقر معصب عليك على الاخير
لانك كلمتيه
ريم بدون اهتمام : اعلى ما بخيله يركب
نواف بشماته : اصلا عمي نايف معصب كمان
لما عرف انه حضرتك تكلمينه
ريم بنبره فيها سخريه : لا لا ما اصدق باباتي
معصب
وبجديه
قل له لا يعصب بلاه يصيبه ضغط وسكري
ام خالد ما عجبها كلام ريم ومراددتها : ريم
خلاص لهنا وبس
ريم بحده : قولي لعيالك ما يتدخلوع وهذا زياد
للي مو عاجبهم يسواهم كلهم
نواف بعصبيه : تخسين انت واشكالك
فعلا انك مو مربيه
دخل خالد على اخر الكلام وبعصبيه : نواف
نواف ناظر خالد
خالد تقدم منه : وش هذا الكلام ؟؟
وبحده وهو يناظره
ما اسمح لك ابد تتمادى بالكلام مع زوجتي
ولا كمان تتطعن بتربايتها
نواف بدفاع وقهر : ما سمعتها وش تقول ؟؟
خالد بحده : ما لك دخل فيها تقول للي ودها اياه
فاهم
ام خالد : ترضاها تهين اخوانك هالملسونه
ريم بدفاع : هم للي من اول ما جلست وفتحوا تحقيق ليه اسلم على زياد
هم وش دخلهم فيني ؟؟؟
زوجي راضي وما قال شي
ييجي نواف يحقق معي بإذن مين وقفت معه
خالد اشر لها : خلاص اجلسي
وناظر سامر ونواف : رجاء ما ابغى حد يتدخل او يكلم زوجتي
انتم بحالكم وهي بحالها
وبعدين انا راضي انها تكلمه دامه خالها
ما ادري ليه كل العيله معصبه !!
لا تنسون تراها زوجتي وكلمتي بس للي
تتنفذ عليها
لا عمي نايف ولا جدي ولا حتى ابوي
ما حد له دخل دامني انا وهي متفاهمين
ما حد له عندنا
ام خالد بقهر : قلبتك بنت الكلبه على اخوانك ؟؟!!
خالد بقهر : كلمه زياده اطلع من البيت واهج من
المكان
ام خالد : اجلس خلاص سكتنا
جلس خالد جنب ريم ومسك يدها وهمس
بإذنها بحنان : انا معك لا تهتمي لاحد
هزت راسها وابتسمت وهي تناظره
نواف كان جالس ويناظر ويهز رجله بقهر
بعدها ما قدر يتحمل الجلسه وهو يشوف
خالد وريم يتهامسون
وطلع من البيت وبعدها طلع وراه سامر
وقف خالد وهو ماسك يد ريم للي واقفه جنبه
ام خالد بدون نفس : وين ؟؟؟
تقدم خالد من امه وباس راسها : زعلانه مني ؟؟
ام خالد : يعني توقف ضد اخوانك
قاطعها خالد باسلوب هادئ: يعني يمه ترضي
انه الحين عمي نايف وعمي سلطان وعمي سلمان وعمي صقر يتدخلون بحياتك ويشيرون عليك ترضيها ويمنعوك من اشياء وابوي موافق عليها
ترضيها ؟؟!!
ام خالد ناظرته وكلامه مضبوط
خالد كمل قبل ما تجاوب : ما رح اسمع منك الجواب
وقيسي نفس الشي على ريم
انا موافق انها تكلم زياد ما له نواف وسامر يتدخلون فيها
ويكلمونها
عموما انا وريم طالعين نغير جو تبغين شي ؟؟
هزت ام خالد راسها بالنفي
خالد بابتسامة : ابغى اسمع رضاك ودعواتك قبل ما اطلع
ناظرته ام خالد بمحبه ودعت له من قلبها
بعدها سأل سديم اذا تبغى شي
وبعدها طلع وهو ماسك يد ريم
*
*
*
سديم بقهر وغيره : شفتي يمه حتى اخونا
سرقته منا
الله ياخذها اكرها
ام خالد : حسبي الله عليك يا ساره
انقلعت وخلت بنتها تسرح وتمرح هنا
سديم عضت على شفتها بقهر : حتى روان ما يكلمها
علشان ست الحسن والجمال
سميه : قليله ادب شفتي كيف ترادد نواف !!
سديم : قلت لك عنها من البدايه بس انت ما صدقتي
سميه بضيق : شوفي اتصل على نواف وما يرد
اكيد تضايق الحين
جلس عبود وهو يبتسم
فاتكم اخر خبر لو شفتم خالد وريم
طالعين الحين بالسياره
نواف بقهر :انت شفتهم متأكد ؟؟
عبود : والله العظيم حتى خالد كان ماسك يدها ويضحك
مبسوط عالاخير
ضرب نواف بكف يده عالارض بقهر : اخخخ لو شفتها يا سليمان
تدافع عن زياد تقول انتم للي غلطتوا عليه
سامر : من صغرها ملسونه وللحين ملسونه
ولا احترمتنا
تقول لها كلمه تردها عشرة
وكله دفاع عن زيادووووو
سليمان شاد على اسنانه : لو كنت موجود
كان كسرت راسها
عمر ضحك : هههههه سلامات وين تظن نفسك
البنت متزوجه الحين
قال يكسر راسها
بدر وهو يضحك : هههههه يمكن سليمان حاب
يدخل المستشفى مكسر
تراك ناسي اصحى يا ابوي
البنت كبرت مو ذيك البزر للي ضربتها يوم العيد
الحين عندها محامي واكبر محامي بعد
سليمان بقله حيله : نفسي اكسر خشومها للي رافعيتهم بالسماء
نواف : مقهور مقهور وبداخلي حره كلامها استفزني
بقوه
سامر : المشكله خالد ما سمع الا جمله نواف
لما قال لها مو مربيه
بدر فتح عيونه : وش قال خالد ؟؟؟!!
نواف بقهر : تخيل عصب علي وصار يعطي محاضرات طويله عريضه
والكل يقول له انها هي الغلطانه
وما اهتم وللي قهرني
جلس جنبها يتهامس وهي تبتسم
قهروني
وشد على قبضه يده
وصل صقر وخبروه بكل شي وش قالت عنه
صقر بقهر : اعلى ما بخيلي اركب
انا اراوريها و اخليها تندم
اتصل على ريم وبعد كم رنه اعطته مشغول
بدر بضحكه : نقول لك طلعت مع خالد يغير جو
ما رح ترد عليك
صقر شد على جواله بقهر
سليمان : وش صار على زياد ؟؟
صقر : اتصلت عليه ومسحت فيه الارض
نواف بفخر : كفو والله
ضحك صقر : هههههه صدقت
امزح معك ابوي اتصل وحلف علي يمين ما اتصل فيه
بدر : وش عرفه جدي انك ودك تتصل ؟؟
صقر بابتسامة : في غيرها اذاعه الاخبار
امي سمعتني وانا اتوعد فيه خافت تصير مشكله ونذابح اتصلت بابوي وخبرته
سليمان بقهر : اخخخ جدتي تيجي بأوقات
اففففففف
صقر : بس نايف اتصل معه وطلب منه يبعد عنها خير شر ما له عندها
وبعدها اخذ السماعه فيصل وقال له انه يعتبر نفسه ما يعرفها
عمر بلقافه : وكيف كلموه عسى مسحوا فيه الارض ؟؟
صقر : يا غبي زياد مو عيل صغير يمسحون فيه الارض
رجال كبير عمره 28 سنه وله احترامه
ما يصلح انهم يمسحوا فيه الارض اصلا
مو حلوه بحق نايف وفيصل
*
*
*
*
*
مرت الايام نفس الروتين
و كانت ريم بالمدرسه كل ما سألتها ميرا انها رح تيجي او لا تتهرب بالاجابه
ما تغير من هالروتين الا علاقه ريم وخالد
صارت اقوى
واغلب الايام يطلع معها يغيرون جو
صقر انقهر من ريم ومن اسلوبها معه وانقهر
لما شافها تدافع عن زياد
زعل وتركها ارسلت له ريم كم رساله
بس طنش وما رد عليها
::
::
::
::
قرر اليوم يطلع مع ريم بعد العشاء ويغيرون جو
ومن لما قال لها وهي
مبسوطه على الاخير
نزلوا عن الدرج وريم ماسكه بيده وراسمه الابتسامة
العريضه
وقفهم صوت ام خالد والغيره واضحه فيه : لا تتأخرون
علشان العيال
كانت ريم تبغى تردح لها
شد خالد على يدها بمعنى طنشي وابتسم
وهو يناظر امه : ان شاء الله
تامرين على شي
ام خالد توجهت للصاله وبدون نفس : سلامتك
طلعوا من البيت وركبوا السياره
وقبل ما يحرك طالعها : مو كل واحد قال كلمه
لازم تردي عليها عشره
خلاص تقول للي ودها اياه وحنا متى ما
بغينا نرجع بالوقت للي ودنا إياه
ما حد له عندنا وطيف ومصعب نايمين
والمربيه عندهم
خلي تفكيرك اعقل من كذا وسعي صدرك
مو اي كلمه تستفزك
هزت راسها وهي تبتسم
طلعوا من البيت وريم تحس بسعاده كبيره
ما خلى مكان الا واخذها عليه
وريم ماسكه بيده طول الوقت
كانت ريم خلال الايام مبسوطه تقريبا
يوميا تطلع بالليل وهي خالد يغيرون جو
وام خالد الغيره ذبحتها والقهر
بعد العصر جالسين بالصاله وريم جالسه جنب خالد
ومبسوطه
اقترب خالد من اذنها وهمس كم كلمه
ناظرته ريم وابتسمت بهدوء
قاطعتهم ام خالد : اتوقع حنا قاعدين مو حلوه
تتهامسون بوجودنا
خالد بابتسامة جميله : الله يسامحك يمه
تذكرت شي وسألتها عنه
ام خالد : خليك معها بنت ساره اذا حاربت اختك
علشان ست الحسن والجمال
خالد بهدوء : يمه اتوقع روان للي غلطت
وبعدين خلاص صالحتها علشانك انت وابوي
ام خالد : متأكد تبيعنا كلنا علشان هذي الملسونه
لحقت تلعب بعقلك وتغيرك علينا
ابتسم خالد على كلام امه : يمه حرام عليك
شوفي كل هالبراءه وقرص خشم ريم
ريم ناظرت ام خالد : والله ما حد لعب بعقلك غير هيفاء
من لما قعدتي معها
وانت عامله حرب علي
ام خالد بدون نفس : هيفاء ما قالت الا الصحيح خالد : يمه فكينا من عمتي هيفاء وانت عارفيتها
اكثر منا ما ادري كيف تسمعين كلامها
ام خالد : حسبي الله عليك يا بنت ساره
قلبتيه علينا
اكيد عامله لك سحر والا حجاب
هيفاء تقول خالاتك ما يتعاملن الا بالسحور والحجاب
ريم رفعت حاجب : لو يتعاملن بالسحر كان نايف ما طلق ساره
ام خالد باستهزاء : خش تربيه والله
اذا امك وابوك ما تحترمينهم
وناظرت خالد : ما لقيت غير ذي تربي عيالك
يا حسرتي على احفادي امهم هذي الملسونه
وجدتهم ساره الحق
قاطعها خالد بزعل: يمه وبعدين !!!
خلاص خلي القعده سوالف حريم انا طالع
ام خالد : خلاص اجلس وما رح افتح الموضوع
اجلس
وش رح تسمون البيبي ؟؟
خالد ابتسم : الاسم للي تختاره ريم انا موافق عليه وناظر ريم بابتسامة
ام خالد بزعل : وليه هي تسمي ؟؟ انتظرتك تقول
لي اسميه انا ولوت بوزها
خالد بهدوء : يمه ريم هي للي تعبت فيه
ام خالد بغيره واضحه : هذا هي مثل القرده تنط هنا وهنا
ما اشوفها تعبانه
حتى بطن ما لها ولا وحام انا متأكده
انها كذابه لا حامل ولا شي
خالد تنهد : الله يتمم عليها العافيه وبعدين انا شفت الجنين بعيني
مو كل الحمل واحد في حريم ما يتعبون
وفي حريم يتعبون الله يبارك لها بصحتها
ريم بضجر : خالتي وبعدين يعني من اول ما قعدت
وانت تقصفين بي
واذا رديت تقولين قليله ادب
الواحد يحتار
ام خالد ابتسمت بتناقض : والله يا ريم لا تلوميني عندي
الاسباب اقوى مني تخليني اكرهك
يعني هذا شي مو بيدي
هز راسه خالد بضيق : يمه ممكن تغيروا هالموضوع
وقفت ريم بهدوء : خلاص انا طالعه
مسك يدها خالد وابتسم : والله ما تطلعين من هنا
اجلسي
جلست ريم وام خالد لوت بوزها مو عاجبها
*
*
*
*
*
يوم زواج زياد
فيصل باعتراض : ما له داعي تروح انطقي بالجناح
ريم بعناد : لا والله هذا خالي ورح احضر عرسه
غصب عن الراضي والزعلان
فيصل بقهر : نشوف كلمه مين تمشي
وطلع من البيت
نواف بحده : ريم اتكلمي بأدب واحترمي نفسك
حدك ابوي
ناظرته ريم باستهزاء : تصدق خوفتني
اقول طير من هنا وبحده لا تتدخل فاهم
هذا للي ناقص شله المهابيل يتدخلون بحياتي
نواف بعصبية : ريم احترمي نفسك وللحين ساكت لك
ريم بعصبيه : هيه من تظن نفسك تكلمني كذا
وبوعيد
لما ييجي خالد رح تشوف الا اقول له عنك
خالد قال لكم ما تكلموني فاهم
سميه بحميه : حط لسانك بحلقك ولا تكلمي زوجي كذا فاهمه
ريم باشمئزاز : مالت عليك وعلى زوجك
وتوجهت لجناحها
جلست تجهز نفسها لبست فستان طويل وساتر
وما حطت مكياج علشان خالد ما يعترض
على روحتها
وجعدت شعرها وعملت فيه حركات بسيطه
وجلست تنتظر خالد
بعد وقت دخل خالد ورد السلام بهدوء بعدها
سألها : جاهزه ؟؟
ابتسمت ريم وهزت راسها
خالد ناظرها : تراك وعدتيني ما ترقصين
لا تخلفين الوعد
هزت راسها ريم : والله ما ارقص يالله تأخرنا
اشر لها : يالله البسي عباتك
لبست ريم عباتها بسرعه وعدلت الشيله
وطلعت معاه من الجناح
وصلوا لعند الصاله وقفه صوت فيصل : اشوفك
صرت لعبه بيدها توديك يمين وتوديك شمال
خالد بهدوء،: انا وعدتها انها تحضر وبعدين حفل اسلامي ما فيه شي
والعريس خالها
بعدها استأذن وطلع وهو
ماسك يد ريم وطلع وهو يتذكر لما سافر
التقى بزياد وكان يناظره وكأنه ماكل حلاله
بس مع ذلك ريم بالدين بنت اخته
وما رح يمنعها تحضر
ما يبغى يخنقها بالبيت وما رح يسمح
لاهله يتحكموا بطلعاتها دامه هو معطيها اوكي
*
*
*
*
مرت الايام على ريم جميله
صارت علاقه ريم وخالد قويه عن قبل
ويهتم فيها وخاصه بعد ما تركت اللعب مع البزران
يحسها كبرت خلال هذي الايام اكثر وصارت اعقل
ونادرا ما تلعب مع البزران
الجد ما زال مسافر وكل فتره يكلم ريم
ويطمن عليها
والجده ما تشوفها ريم كثير لانها تيجي الصبح وهذي الفتره تكون ريم بالمدرسه
ام خالد افعال واقوال متناقضه مع ريم
وكله بفعل هيفاء للي تحاول تقلبها على ريم
سديم وروان ما تحتك ريم ابد فيهم ولا سميه
نواف يناظرها بقهر طول الوقت
اما فيصل ساكت طول الفتره وما يحتك بأحد منشغل بالشركه
&
&
&
&
&
&
بالمدرسه
قاطعتها ميرا : لا تكذبين زوجك رفض انك تيجين البارحه صح
ناظرتها ريم وما ردت
ميرا : انت غبيه وش دخله يتحكم فيك ؟؟!!
ليان : كيف ما له دخل اصحي يا حلوه هذا زوجها
وله حقوق السمع والطاعه عليها
ريم : صح انا مره سمعت شيخ يقول عن حقوق الزوج
وما يصير الحرمه تطلع بدون اذن زوجها
ميرا كشت عليها : هذا انت قلتيها شيخ اكيد
رح يقول كذا
يا غبيه انت حره بتصرفاتك ما حد له عليك بكلمه
مريم : انا اقول مثل ميرا يعني الظاهر انه زوجك
متشدد كثير
يعني حفله بنات وش فيها لو حضرتي
بس الظاهر انه من النوع للي يحب يتحكم بكل كبيره وصغيره
وهذا النوع من الرجال اكرهم
يخلون الحرمه بدون شخصيه يبغون يمحون
شخصيتها
ويتحكمون فيها
ميرا : ما توقعتك يا ريم شخصيتك ضعيفه
كذا
ريم وكلامهم لعب بعقلها شوي ناظرتهم : مو كذا الموضوع له حق علي الطاعه وما اطلع بدون
علمه
انت ما تعرفين اذا الحرمه طلعت بدون اذن زوجها وما كان معطيها صلاحيه تروح وين ما تبغى الملائكه تلعنها من لما تطلع حتى ترجع
وانا مو ناقصني ذنوب
ليان ضحكت : ههههههه صلاحيه ههههه
حسستيني مواد معلبه ههههه
طقتها ريم على راسها : سخيفه
ميرا ناظرت ريم :اي حقوق هذي تتكلمين عنها
طيب اسألك كيف يعاملك زوجك ؟؟
ريم ابتسمت لذكرى خالد : يعاملني بطيب واحترام و..
قاطعتها ميرا وما عجبها الرد : طيب يمنعك عن اهلك ؟؟
هزت ريم راسها بالنفي
ميرا وهي تبحث عن الزله حتى تدخل منها : طيب يصرف عليك ؟؟
ريم : كريم حيل ما يقصر علي بشي
لو اطلب
قاطعتها ميرا : خلاص عرفنا
طيب وين ساكنه في بيت مستقل ؟؟
ريم رفعت حاجب : لا ساكنه مع اهله
ميرا بمكر واخيرا لقت باب تدخل منه : غبيه
وين حقوقك من حقك تسكنين في بيت مستقل
واكيد الحين تاكلين مع اهله
وين حقوقك ؟؟؟من حقك يوفر لك سكن مستقل
اكيد ما تاخذين راحتك
شوفي خذي نصيحتي زوجك ما له حق عليك
الا لما يوفر لك حقوقك وقتها
غصب عنك تعطيه الحقوق للي تقولين عنها
حق الطاعه وهذي الامور
اطلبي منه بيت مستقل تاخذين راحتك وتحسين انك
صاحبه البيت مو عله قاعده عند اهله
مريم : صادقه ميرا انت غبيه كيف تقبلين تسكنين
عند اهله انا من شروطي اسكن في بيت مستقل
بعيد عن اهله علشان ما
يتدخلون بكل شي
وين رايحه وين جايه
شوفي ليان خطيبها اشترى لها بيت مستقل
عن اهله
ليان : ايه من هذي الناحيه معاهم حق اطلبي
بيت مستقل
غبيه وش جابرك تصبحين كل يوم بوجه عمك
وبنات عمك وامه وحتى عياله ليه ترضين يعيشون عندك
بنفس الجناح ياخذ لهم غرف خارج الجناح
ميرا : ما ادري وين عقلك لما وافقتي عليه
كيف قبلتي تتزوجين واحد ارمل وعنده عيال
انتي تتدللين صغيره وجمال ما ادري وين كان عقلك
ليان : يمكن جذبها الشكل زوجها جميل حتى بعيني احلى من ريم ودكتور
قاطعتها مريم : احلى من ريم وش يطلع هذا
ريم ناظرتهم بغرور : لا انا احلى
ليان : اسكتي اسكتي والله انه احلى منك
ميرا : ما علينا المهم انك لما ترجعين
اطلبي بيت مستقل
مريم : لا تسكتين عن حقك
متى ما فتح لك بيت مستقل وقتها تقولين حقوق
اما الحين ما له حقوق حتى يشتري لك بيت مستقل
رن الجرس وريم ساكته
كلامهم دخل مخها وعشش فيه
لازم تطالب في بيت مستقل وش يجبرها تصبح
كل يوم بوجه فيصل
تبغى بيت مستقل تحس بالاستقرار
*
*
*
*
*
*
جالسه بالغرفه
وتفكر كيف تبدأ
ما رح تسكت حتى لو رفض وش رح تعمل
عضت على شفتها بتفكير
بعدين افكر بالنتائج المهم اطرح عليه الموضوع
طلعت من الغرفه وتوجهت للصاله كان
جالس وبيده ورق للماجستر مشغول فيها
وقفت فوق راسه وبتردد وبعدها
شجعت نفسها : اممم
رفع راسه لما حس فيها
طالعها وبعدها رجع نظره على الورق وسألها
وهو يطالع الورق : تبغين شي ؟؟
ريم بهدوء : ابغى اتكلم معك بموضوع
رفع نظره وطالعها : موضوع ضروري ؟؟
هزت ريم راسها
خالد : تقدري تصبرين حتى اكمل الورق للي بيدي؟؟
ريم وهي تتذكر كلام البنات تشجعت وهي تتكتف : ما اقدر اصبر
حط الورق على الطاوله وابتسم بهدوء : تفضلي
اجلسي
جلست ريم وناظرته ودخلت بالموضوع على طول : انا ابغى بيت مستقل
طالعها وحس انه ما سمع كويس : وش تبغين ؟؟
ريم وهي تمد الكلام : ابغى بيت مستقل
هز راسه بتفهم : حلو
ناظرته بقهر : تتمسخر ؟؟
ابتسم بهدوء : لا والله ما اتمسخر
بالعكس حلو الواحد يعيش في بيت مستقل
بس حاليا صعب ظروفنا ما تسمح
ريم وبانفعال وصوت عالي وهي تردح : وليه ظروفنا ما تسمح ؟؟
ناظرها خالد بعتب : اعتقد حنا قاعدين نتناقش
ممكن افهم ليه صوتك يلعلع ؟!!
انا اتكلم بهدوء تكلمي بهدوء رجاء صوتك
ما يطلع على صوتي
ارجع اكمل كلامي ولا تقاطعيني
هزت راسها وهي مبوزه
ظروفنا ما تسمح لنا انت حاليا حامل وبالمدرسه
مين يهتم بالبيت ؟؟
لا تقولين خدم
الخدم يحتاجون حد يشرف عليهم ويتابعهم
وما ننتركهم لوحدهم
لاني صراحه ما اثق فيهم
وبعدين لما تولدين انت عندك دراسه
مين يهتم بالبيبي
مستحيل ارضى اخليه عند المربيه لوحدهم بالبيت
اما هنا البيبي يبقى هنا تحت نظر امي واهلي
لوقت ما ترجعين من المدرسه
وانا مخطط نستقل في بيت لوحدنا بعد ما تكملين
دراسه اما الحين صعب ما يناسبنا ابد
ريم مو عاجبها : انا ما يهمني يناسبك او لا
بالنسبة لي انا يناسبني
انا ابغى بيت مستقل
خالد ببرود : اتركي الدراسه ومن باكر مستعد ننقل لبيت جديد
ريم وقفت وهي تزاعق : بأحلامك اترك دراستي
خالد اعطاها نظره : صوتك ما يطلع
ناظرته ريم بقهر وتوجهت للغرفه
هز راسه ورجع يكمل وهو يطالع الورق للي بيده
*
*
*
*
*
*
ميرا : غبيه وسكتي له ؟؟
ريم : وش تبغين اعمل يقول مو الحين لما اكمل دراسه
مريم باستهزاء : وصدقتيه يا الخبله هذا يسلك
لك بعد ما تكملي دراسه
وبعد ما تكملين دراسه يقول لك بعد يكملوا العيال
دراسه
ميرا : لا تسكتين له وكل يوم افتحي الموضوع
وخليك قويه
ريم بدون نفس : خلاص شوفوا سالفه
ثانيه
مريم : حضرتي فلم البارحه ؟؟
ريم : اقول لك القناه مو موجوده
ليان : اعطيتك ترددها ليه ما نزلتيه ؟؟
ريم بقهر : ما عرفت عليه كلمه سر
ميرا : انا اجيب لك رمز يحذف كلمه السر ما عليك
هزت ريم راسها وهي خلقها ضايق
وصارت ميرا ومريم يتكلمون عن بطولاتهم
وليان عن خطيبها وريم مستمعه لهم
*
*
*
*
*
مر اكثر من اسبوع وريم تفتح الموضوع
مع خالد وترادد ومصممه على رايها
ناظرها خالد بملل : ما مليتي من هالسيره ؟؟؟
ريم بحده : ولا رح امل منها
خالد بهدوء : طيب وش رايك مثل ما قلت لك
نشتري قطعه ارض ونبني بيت ونصممه على كيفنا
وبراحتنا
ناظرته ريم والبنات اقنعوها ترفض لانها حيله
من عنده وبناء البيت ياخذ سنين ردت بحده
: لا مرفوض انت ما تفهم اقول لك ابغى بيت
لوحدي
والا
وقف خالد بحزم : ريم تراك تعديتي حدودك بالكلام
معي وانا ساكت لك واعطيك حلول وانت
ما تستقبلين ولا ترسلين
بس ما توصل انك تتعدين حدودك معي
انا زوجك واجبك انك تحترميني
قاطعته ريم بحده : لما اعيش في بيت مستقل وقتها طالبني اني احترمك
ناظرها وهو يكتم وقرر يطلع من الجناح قبل
ما يفقد اعصابه
جلست ريم وعضت على اصبعها بندم خايفه
ما تحصل بيت مستقل والنتيجه
تكون تفقد خالد بس لما تتذكر كلام البنات
تصمم على البيت
&
&
&
مرت ايام ريم نفس الروتين وكل يوم ترجع من المدرسه
وتفتح الموضوع مع خالد وتتمادى بالكلام
وترادد
وخالد بصبر يحاول يقنعها بكلام هادي
بس يتفاجئ لما يرجع من الدوام
تفتح معه الموضوع وبأسلوب بعيد عن الادب
والاحترام
وتكلمه من رؤوس خشومها
ومع ذلك يكلمها خالد بهدوء وهي معنده
الا بيت مستقل
&
&
جالسه وتفكر بكلام البنات كيف تضغط على
خالد علشان تسكن في بيت مستقل
طلعت من المطبخ وناظرته وهو مشغول بالورق للي معاه
وقفت قريب منه : وش قلت على البيت ؟؟
خالد بضجر : ريم اعتقيني لوجه الله من هالموضوع
اقول لك صعب حاليا استحملي شوي
ريم بعصبية : لمتى يعني اعيش عند اهلك
لمتى مو ماخذه راحتي
ابغى احس اني مستقره في بيتي
مستقله
اكل اشرب مو مع اهلك
ضايقه الكلام اهلك اهلك زفر بضيق : طيب خلاص
من اليوم نفطر ونتغدى ونتعشى بالجناح
ما له داعي ننزل تحت وتاخذين راحتك
الجناح وسيع مو مضطره تجلسين تحت
وما رح اطلب منك تنزلين تجلسين عند اهلي
بكيفك حبيتي تنزلي انزلي
ما حبيتي براحتك
ناظرته ريم بقهر حاصرها ما لها غير
السلاح للي قالوا لها البنات عنه : اوكي بس عندي شرط
خالد بطول بال : اتفضلي وش شرطك ؟؟
ريم وهي مو مقتنعه بالشرط بس من باب
تضغط عليه : اممم طيف ومصعب
ما ابغاهم عندي بالجناح
خالد للي انصعق واوهم نفسه انه ما سمع عدل
ناظرها : وش الشرط ؟؟
ريم : طيف ومصعب ما ابغاهم بالجناح
شوف لهم غرف برا الجناح
خالد مو مستوعب : من جدك تتكلمين ؟؟
ريم بعناد : ايه من جدي اتكلم
خالد بملامح جامده : اتوقع لما خطبتك كان عندي عيال
صح والا لا ؟؟
دامك ما تبغين عيالي ليه ما رفضتي ومثل ما سمعت
ما حد غصبك
بعدين طيف ومصعب ايتام
مجرد تمسحي على راسهم كم تاخذين حسنات
بعدهم اطفال ما عندهم ام
تهتم فيهم
ما عندهم ام ينامون بحضنها
انا طول وقتي احاول اعوضهم عن فقدانهم لحنان الام
تبغيني ارميهم برا الجناح !!!
ابغاهم يعيشون جو اسري ما ابغاهم يتشتتون
ريم بدون وعي وهي تحس بالقهر هي فقدت كل شي بالدنيا بس ما حد عوضها ليه هي تشتت ما احد سأل عنها وبدون وعي وكأنه حقدها مسيطر عليها :جعلهم متشردين بالشوارع مشكلتك هذا شرطي
عيالك تطلعهم من الجناح يتشردوا
يضيعوا يموتوا يمرضوا ما يهمني
هذي جدتهم موجوده خلهم عندها
ينطقون ان شاء الله يموتون وارتاح منهم
خالد بدأ يفقد اعصابه عنده عياله خط احمر : ريم قولي انك تمزحين
ريم بعصبية : ما امزح اقول لك طلع عيالك
من الجناح انت ما تفهم
خالد وقف والشرار يطلع من عيونه : ما افهم اذا خليتك بالجناح او على ذمتي دقيقة
توجه للغرفه وطلع حقيبه كبيره
وجمع اغراضها كلها
وطلع من الغرفه وبعصبيه : خذي اغراضك
واطلعي قبل ما افقد اعصابي
ريم بعناد : مو طالع
عيالك يطلعون مو انا
خالد بصرخه : ريم
دام النفس عليك طيبه اطلعي بسرعه
ريم بصوت عالي : لا تصرخ علي تفهم
مو بزر تصرخ علي
خالد باشمئزاز : البزر يفكر احسن منك
ما توقعتك كذا ابد ما توقعتك
وبحزم اطلعي ما لك مكان بحياتي
مستحيل ترجعين
ريم وهي تردح : لا انا اموت علشان اعيش معك
اصلا يوم المنى افارق وجهك
خالد مسك الحقيبه وفتح باب الجناح وطلعها شاف اهله واقفين يناظرون
وطلب من الخدم ينزلوها
ودخل ومسك يدها بهدوء وداخله بركان : دخلنا بالمعروف نطلع بالمعروف
ريم بصراخ : لا تلمس يدي فاهم
خالد بهدوء : طيب اطلعي بهدوء وصوتك هذا
اخفيه
فيصل وقف عند الباب : وش فيه صوتكم
هز البيت ؟؟؟
ريم بقهر : اسأل ابنك
ام خالد تقترب : فهمونا وش فيه ؟؟
خالد بهدوء : ما في شي
وناظر ريم يالله اطلعي بسرعه
فيصل يحاول يهدي الوضع : انتظري
فهموني السالفه !!
خالد بنرفزه : ما في شي ويالله اطلعي بسرعه
فيصل بعصبية : والله ما تطلع الا لما اعرف وش فيه ؟؟
خالد اشر لابوه وامه يدخلون
وناظر سديم وروان : ممكن تغادروا المكان
توجهت سديم وروان لغرفهم بقهر
دخل خالد الجناح وناظر ابوه للي يناظره
فيصل : وش فيه ؟؟
خالد بقهر : ما تبغى طيف ومصعب بالجناح معنا
ام خالد بهدوء تصلح الوضع : حقها خلاص خليهم عندي
خالد بعصبية : اي حق تقولين عنه تزوجتها
وهي عارفه انه عندي عيال والله لو تموت مصعب وطيف ما يطلعون من الجناح
هم الداخلين وهي الطالعه
وش تبغى فيهم يطلعون للمدرسة يتغدون
تحت وبعدها ينامون للعصر
يدرسون وبعدها يطلعون للعب
ويدخلون الجناح وقت النوم وش مثقلين عليها
لو اعترضت انها تهتم فيهم حقها
اما هي ما تهتم فيهم لهم مربيه وش عليها منهم
فيصل ما يدري وش يقول : خلاص يا خالد
انا متأكد انه مو قصدها
خالد باعتراض : لا قصدها انا سألتها اكثر من مرة عن قصدها
وهي تكرر نفس العباره
خلاص نفسي عافتها
ريم تناظر عمها : وش فيه لو انتقلنا لبيت مستقل
وش فيها
حرام احس مثل غيري انه عندي بيت حرام
ما كملت مو عارفه وش تقول
مو قادرة تجمع كلمه على بعضها سكتت
بعجز
خالد بحده : خلاص ولا كلمه صوتك ما ابغى اسمعه
اطلعي بسرعه
ناظرته ريم : يعني طرده
خالد بدون اهتمام : وستين طرده
اكثر من شهر وانا مستحمل كلامك ومراددتك
وغلطتي علي اكثر من مره وسكتت
لاني ما احب انتقم لنفسي
اما انك توصل فيك لعند عيالي
ما اسمح لك فاهمه
ريم بقهر بعد ما طردها ناظرته بحده : مو فاهمه
وما رح افهم وش رح تعمل يعني
وتوجهت للطاوله كان عليها كاسات
مسكتهم وكسرتهم
ورمت الطاوله على الارض : رتبهم ونظف المكان
يا ابو النظافه
فيصل مسك يد ريم وبهدوء : هدي يا ريم مو كذا
تنحل الامور
خالد بقهر لما شاف القزاز : يبه خلها تطلع من الجناح
فيصل بضيق صحيح هو وريم دايما مثل الشحم
والنار بس يحسها صعبها بنت اخوه
تنطرد من البيت
لو طلعت بنفسها زعلانه عادي
اما مطروده لا صعبه بالنسبه له ناظر خالد : ودكم تفضحونا تعالوا نتفاهم
خالد بعصبية : ما في بينا تفاهم وقرب من ريم
انت ما تفهمين ما عندك كرامه
اقول لك انقلعي
ودفها على الخفيف بقرف
فيصل عصب : خالد حدك هنا تفهم
ريم
حسيت انها انهانت كرامتي صحيح
اعترف اني غلطت بحقه
بس كرامتي فوق كل شي
توجهت لباب الجناح وطلعت بسرعه بدون ما التفت خلفي
وانا اعض على اصابعي ندم
ما ادري ليه رديت على البنات وقلت كذا
مع انه علاقتي بطيف ومصعب كويسه
كثير وما يضايقوني بالجناح
بالعكس استمتع بوجودهم وخاصه وقت
الدراسه
دمرت حياتي بسبب غبائي
استغفرت ربي ما ادري كيف دعيت على مصعب وطيف بالموت
يا رب تحفظهم اطفال ايتام ما لهم ذنب
انحرموا من امهم مثل ما انحرمت من امي
انا الغلطانه واستاهل كل شي حصل لي
اكثر من شهر وانا ازن فوق راسه
واتمادى بالكلام ومع ذلك استحملني
عاملني بلطف من لما رجع من السفر وانا
سعادتي ما توصف
بس انا خربت كل شي بيدي انا الغبيه
استاهل
عضيت على شفتي بندم
ودموعي ينزلوا ندم بسبب تهوري وغبائي
بعدت عن بيت عمي وقفت بحيره وين اروح بعد ما طردني خالد ؟؟؟؟؟؟
