رواية منصف لاند ( فيولا ) كامله بقلم لينا بسيوني
رواية "منصف لاند "
الحلقة الأولى بعنوان "موسم هجرة الديابة ”
أسمى منصف جاد عبد الحق مولى السيرياقوسى , من مركز أبو قرقاس المنيا.
مش أنا اللى بقول أكده , الخواجات اللى هما اللى قالوا عليا أكده بعد ماغلبت 100 نجار كانوا داخلين قصادى فى مسابقة نجارة .
و الحمد لله كسبت عقد عمل فى أستراليا .
ركبت طيارة استراليا وانا طاير من الفرحة علشان هشتغل فى شركة كبيرررة فى أوروبا .
بس حظى النحس و الحلو فى نفس الوقت خلى الطيارة اللى مسافر بيها تقع وكل اللى عليها يموتوا ماعدا أنا وبيانولا واللى عيشت معاها لوحدنا على جزيرة مقطوعة .
فى الأول كانت شايفز نفسها عليا و رافعة منخارها فى السما, بس بعد ما عيشنا مع بعض على الجزيرة مقدرتش تقاوم حمرة الجمال اللى فى وشى ، وطبت ساكتة فى غرامى.
وادينا اتجوزنا وعايشين على الجزيرة لوحدينا بعيد عن كل الخلق .
محدش ساكن الجزيرة غيرى انا وبيانولا وعنتر وعبلة السلعوه وقطتى اللى سمتها على أسمها ..
( بيانولتى )
الجزيرة فيها كل حاجة , فيها سجر فاكهة من كل الأنواع وشلال مايه صافى بيطلع مايه أحلى من المايه المعدنية .
ده غير الحيوانات اللى على الجزيرة واللى شبه الغزلان , بصيدها وأدخن لحمها علشان يبقى زى البسطرمة .
بيانولا مابتحبش اللحمه اللى بدخنها بس بتحب السمك اللى بنصطاده من المحيط الهندى اللى بتطل عليه الجزيرة .
عندينا حيوانات مفترسة على الجزيره بردك , عندينا تعابين وعقارب وديابة بتعوى فى عز الليل بس الحمد لله عنتر وعبلة حامينا من كل الحاجات الخطر دى , خاصة أن الديابة بتخاف منهم .
بيانولا ست جميلة وبنت ناس , حبيتها من أول ماعينى وقعت عليها فى الطيارة , وحبتها أكتر لما عرفتها على حقيقتها.
عاملة زى حبة جوز الهند , حساسه من جوة بس ناشفة من بره وهى دى المشكلة .
بيانولا فى الأصل أسمها فيولا وبتشتغل فى المزيكا , بس بت قردة صوح !! بتعرف تخلي أى حد يضحك زى المجذوب أو يعيط زى الملدوغ .
بتتحكم فى مشاعر البنى أدم اللى قدامها بالمزيكا .
عايشين مع بعض فى كوخ كبير بنيته من الخشب وفرشت أرضيته بالورد وورق السجر .
بعد ما أتجوزت بيانولا , المشاكل بدأت تطفح .
أنا هشهدك
يرضيك أبقى راجل زى الثور وعايش على جزيرة مع مرتى لوحدينا ومحدش معانا .. أخدلى بالك .. لمدة 3 سنين ومعندناش اعيال !!
ياراجل دى حتى مابتبلش ريقى بكلمة حلوز !!
أنا أقعد أدلع فيها واقولها يابيانولا .. نفسى أشرب من القله .. وهيا ولا هى أهنا .. كل اللى طالع عليها تقول :
- أصلى مابعرفش أعبر عن مشاعرى .. انا بحبك يامنصف , انا بحب أعبر عن مشاعرى بالمزيكا حتى اسمع كده !!
وتفضل تضرب على الكامنجة اللى عملتها بيدى .. اللاهى تتشل يدى !!
لحد مافي يوم كنا قاعدين على الشط ومولعين نار ..
وجنبنا عنتر وعبلة السلعوه , بيانولا وقتها كانت قاعدة بتضرب على العود اللى عملتهولها بيدى ... ألاهى تتشل يدى .
فقولتلها وانا زهقان :
- أيه ياعم بخ !!! ماكفاية عاد ..
قالتلى :
- مش عاجباك المقطوعة أغيرها !!
حطت العود جنبها ومدت أيديها وسحبت ناى كنت عاملهولها بيدى برضه ... الاهى تتشل يدى
وغمضت عينيها وفضلت تزمر بيه ...
قولتلها :
- بيانولا !!!
مردتش عليا
قولتها وانا بدلعها :
- بيانولا ياجنزورتى !! ( عصفورتى )
مردتش عليا بردك
قولتلها بصوت عالى :
- يابنت القردة ردى عليا !!
بطلت عزف وقالتلى :
- نعم يامنصف !!
قولتلها :
- نعم الله عليكى , افرض مثلا .. مثلا يعنى أنى خاصمتك يوم , ماأنت تاعبنى ,واخده بالك تاعبنى ... ومغلبنى ومنسينى النوم .
قالتلى :
- مش فاهمه !!
قولتلها :
- ماتيجى نقعد مع بعضينا لوحدينا .. فى الكوخ .
قالتلى :
- لا خلينا هنا الجو لذيذ وفيه نسمة هوا .
قولتلها وانا بغمزلها :
- الجو حر أهنه , ماتيجى .
قالتلى :
- منصف .. انا فاهمة أنت عايز أيه !!
قولتلها :
طول عمرك حسيسه !
فكملت كلامها وقالت :
بس انا مش جاهزة يعنى , الموضوع محتاج وقت على ماناخد على بعض .
كنت هطلع من خلجاتى و انا بقولها :
- في أيه ... أحنا بقالنا 3 سنين فى وش بعض .. هناخد على بعض ميتا نفسى أعرف .. حرام عليكى يابنت القردة .
قالتلى وهي بتقلب الترابيزة عليا :
- منصف !!! قولتلك مابحبش كلمة بنت القردة دى ..
قولتلها وانا بزعق :
- نسيب العرقوف ونمسك فى التفتوف !! ياولية حرام عليكى .. انا زهقت ..
قالتى وهي بتدمع :
- زهقت منى يامنصف !!
قولتلها :
- أيوه زهقت بجى ... ولو ما أتعدلتيش يابنت القردة والله لاروح اجيبلك ضره .
وقفت على حيلها , وخدت حاجتها وقالتلى بتحدى :
- كده يامنصف ... براحتك .... و أبقى ورينى بقى هتجيبلى ضره أزاى واحنا فى جزيرة مقطوعة!!
قولتلها :
- بيانولا .. استنى يابه متزعليش !!
بس خدت نفسها ومشيت ...
وسابتنى قاعد لوحدى وجنبى عنتر وعبلة ...
بصيتلهم وقولتهم :
- مش مهم انا أكون مبسوط ... المهم تكونوا أنتوا مبسوطين ياكلابى .
أتفاجئت بعبلة بتهبش عنتر وخدت نفسها ومشيت ..
ناديت عليها وقولتلها :
- بت يا عبلة !!
مردتش عليا وهو هوت وهيا ماشيه ,
حضنت عنتر وطبطبت عليه وقولتله :
- ماتزعلش ياعنتر .. كلهم أكده صنف يعشق النكد وأحمد ربنا أنك كلب ..
عنتر هوهو ،فقولته :
- شاطر ياعنتر .. ماتيجى نركب المركب و نطلع نصطاد , أهو بالمره نهرب شوية من ضغوط الحياة اللى على الجزيرة .
فقالى :
- هو هو
قولتله :
- يالا بينا
خدت عنتر وركبنا مركب الصيد اللى عملته بيدى , وعومنا بالمركب جنب الجزيرة , الجو كان منعش وجميل , القمر كان بدر ومنور المحيط .
فردت ضهرى على المركب وبصيت فى السما ,وقلت :
- يارب أنا بحب بيانولا .. بس نفسى تحس بيا .. نفسى يار..
قطعت دعائى لما لقيت عنتر واقف أخر المركب وبيهوهو .
قومت من مكانى وقولتله :
- فيه أيه ياعنتر ؟!!
فقالى :
- هووو هو
قولتله :
- فين دى ؟!!
بص ناحية صخور قريبة من الجزيرة وقالى :
- هوهو
بصيت على الصخور فشوفت حاجة زى بارشوت عايم على وش المايه .
قربت بالمركب بسرعة ناحية البارشوت , ونطيت فى المايه ,.
عينى فطيت لقدام لما شوفت واحدز ست تحت المايه , وبتحاول تفك نفسها من البارشوت .
قربت عليها , وشقيت حبال البارشوت اللى مكتفاها بأيدى , فلاقيتها مسكت فيا ...
وقالتلى :
- واتص يور نيم.
قولتلها :
- منصف جاد عبد الحق مولى السيرياقوسى ,وانتى واتس يور تايم !!؟
قالتى :
- أنيتا !!
وبعدها أغمى عليها , خدتها على المركب ورجعت بيها الجزيرة.
بنت القردة أول ماشافتنى جات جرى، وقالت والغيرة والغيظ عيفطوا من عينيها:
- مين دى يامنصف؟!!! وأيه اللى جابها على الجزيرة؟!!!
رميت أنيتا على الرمل ، وقولتلها :
- دى أنيتا ، لاقيتها بتغرق جنب الجزيره و..
أنيتا بدأت تفوق وقالت:
- صفصف! مين دى؟!
قولتلها :
- صفصف مين يحرق ابو اللى جابوكى، هتودينى فى داهية دى مرتى بيانولا..
وبصيت على بيانولا اللى كانت بتشيط زى وابور الجاز , وقولتلها:
- وحياااة عنتر السلعوه ما أعرفها، انا لاقيتها وانا بصطاد بالمركب.
بيانولا قالتلى :
- أها ياخاين!!! ده انت كنت بتمهد بقى لما قولتلى هجيبلك ضره !!!
انيتا قالت بعربى مكسر :
- هو انتوا عرب !؟
قولتلها :
- الحمد لله بتتكلمى عربى .. قوليلها أنى معرفكيش !!
-
أنيتا مردتش عليا وقالت وهى بتبص على الجزيرة :
- انتوا عايشين لوحدكم هنا على الجزيرة ؟!
بيانولا قالتلها :
- اها .. ممكن اعرف أنتى مين !؟ وأيه اللى جابك هنا ؟!!
قالت :
- أنا مغامره وكنت بحاول أخد صور لجزيرة سينتينل اللى جنبكم و..
بيانولا قطعت كلامها وقالت :
- طيب فين الكاميرا !!؟
قالتلها :
- كاميرا أيه !!؟
بيانولا قالتلها :
اللى كنتى بتصورى بيها الجزيرة !!!
قالتلها :
- وقعت منى وانا بقع فى المايه قبل ماينقذنى البطل ده
وقربت عليا وباستنى من خدى !!
بيانولا شدتها وقالتلها :
- أيه يا بتاعة أنتى !!!على فكرة دا جوزى
قلت لانيتا وانا بمثل انى مدايق :
- أيوه صوح انا جوزها ... عيب ياوليه اللى عملتيه ده !!
قالت :
- سورى , أى فورجيت خالص .. والبوسة عاديه , اخويه يعنى وز أوت فيلنج .
قولتلها :
- لا ياستى انتى تاخد بالك المرة اللى جاية .. انا مبحبش غير بيانولا مرتى.
حسيت بيانولا فرحت بيا ،فبصت لانيتا وقالتلها :
- فين الطيارة اللى جابتك لحد هنا ؟!!
ردت عليها وقالت :
- الجى بى أس وقع منى مع الكاميرا وتقريبا كده توهت منهم .
بيانولا قالتلها :
- ولا يهمك خالص ياحبيبتى .. انا هديكى خريطة توصلك لحدود الهند , وفيه مركب هنا , خديها وأطلعلى على هناك .
قالتلها :
- انا مبعرفش أسوق مركب ومعرفش الاتجاهات فى البحر !!
بيانولا قالتلها :
- ولا يهمك هناخدك انا ومنصف بكره الصبح ونوصلك بالمركب لحد هناك .
قالتلها :
- بس أنتوا كده هتتعبوا أوى !!
قالتلها :
- تعبك راحه ياحبيتى..
ولفت ضهرها وسمعتها بتبرطم وبتقول :
- أهم حاجه ماتقعديش فى الجزيرة .
وشدتنى من ايدى وسحبتنى وراها زى البهيمة ,قولتلها :
- أيه رأيك .. ماضعفتش أهوه .. مش هتدينى بوسه حلال بقى .
قالتلى :
- بوسه !! رايح تجيبلى واحده الجزيرة وبتقولى بوسة !!
قولتلها :
- وغلاوتك عندى لاقيتها بتغرق , أسيبها تغرق يعنى ؟!!
قالتلى :
- أها ..
قولتلها :
حرام عليكى يابيانولا .. البت حلوة و حرام فى الموت .
قولت الكلمة من هنا والدنيا قامت من هنا ..
لقيتها بتقولى وهى مش مديانى فرصه :
- يعنى عاجباك .. انا قولت كده برضه , مدخلش عليا الحركتين اللى عملتهم قدامى .. ده ممكن تكون متجوزها فعلا ومخبى عليا , اكيد .. ماهى بتقولك ياصفصف !! أكيد تعرفك , أتفضل أطلع بره الكوخ !!
قولتلها :
- هو فيه أيه !!؟ ماتتهدى شويه يابه .. مش عارف أرد عليكى يابنت القردة .
قالتلى بحزم :
- أطلع بره الكوخ يامنصف !!
طلعت بره الكوخ وانا شايط , فلاقيت عبلة قاعده قدام الكوخ , فسحبتها غصب عنها , ودخلتها الكوخ اللى بنيته بيدى ليها هى وعنتر .
وروحت جبت عنتر ودخلته الكوخ غصب عنه وقولتلهم :
- بقولكم أيه .. انا العمر بيفوت بيا , ولو ملحقتش أشوف عيالى ,يبقى لازمن أشوف عيالكم .. مش هتطلعوا من أهنا اللى ومعاكم سـلعو صغنون .
وقفلت عليهم الكوخ .
روحت جبت حيوان كنت صايده وطلعت على الشط علشان أسويه وادخنه !!
, وياريتنى ماطلعت على الشط ..
لاقيت انيتا ... لامواخذه لابسه مايوه . وبتعوم فى المايه !!
وديت وشى الناحية التانية .
فندت عليا وهى بتقول بدلع :
- صفصف !!
قولتلها من غير ما أبص عليها :
- عايزة ايه يابه !!
قالتلى :
- تعالا عوم معايا.
قولتلها :
- وااه ... عيب يابه.
قالتلى :
- بليز ... بليز
قولتلها :
- أنسى !! انا مش طايق بيانولا بس أستحاله أخونها .
قالتلى :
- براحتك !!
حطيت الحيوان وروحت جمعت الحطب علشان أعمل النار اللى هسويه فيها .
فجأه سمعت أنيتا بتصرخ ... أتلفت يمين وشمال وفضلت أدور عليها .
لاقيتها مغوطه فى المايه ودخلت جوه خالص وتقريبا بتغرق !!
قلعت الجلابية ونطيت فى المايه .. وفضلت أعوم لحد ماوصلتلها قبل ماتغرق ..
طلعتها على الشط ورميتها على الرملة .. كان قاطعه النفس وشاربه مايه مالحه لحد ماقالت بس ..
دوست على بطنها , علشان اخرج المايه بس برده فضلت قاطعة النفس .
ناديت على بيانولا بصوت عالى .. بس ماسمعتنيش
, قلت :
- أستغفر الله العظيم يارب , بس حرام يكون حد بيموت ومنقذوش !!
ونزلت علشان اعملها تنفس أصطناعى ..
بيانولا كانت واقفة بعيد وشافتنا وانا حطط خشمى على خشمها .
جريت ناحيتنا واول ماقربت , أنيتا فاقت وقفشت فى رقبتى !!
بيانولا أتجننت وقالتى وهى شايطة نار :
- أه ياخاين ياوقح !!
قولتلها :
- وحياة عنتر أنتى فاهمة غلط !!
سابتنى وجريت ناحية الغابة وهى بتعيط , سيبت أنيتا وجيت أجرى وراها ،أنيتا مسكت أيدى , وقالتلى :
- أنا جعانة !!
قولتلها :
-يحرق ابو اللى جابوا ابوكى سيبى يدى !! عندك الحيوان والنار سويه وكلى اللى انتى عايزاه..
جات تسيب أيدى سمعت صوت ديابه وهى بتعوى فقفشت فيها أكتر وقالتلى :
- أيه ده !!؟
قولتلها :
تقريبا موسم هجرة الديابة .. متخافيش عنتر وعبله ..
مكملتش كلامى لما أفتكرت ان عنتر وعبلة محبوسين فى الكوخ !!
يالهوى بالى ... بيانولا لوحدها فى الغابة !!!
جيت أجرى على بيانولا لاقيت قطيع الديابة جاى يجرى علينا من كل ناحية !!!
