رواية عذاب الارواح كامله وحصريه بقلم هنا عادل
عذاب الارواح
الجزء الاول
اسمى حنين
امي اسمها فريال
وبابا اسمه ياسر
عندى اخوات بس من امى
سها واسامة ومنال
واخوات من ابويا
سعد وحسن واحمد
قصتى هحكيهالكم بتفاصيلها
يمكن كتير مش هيصدقونى
او كتير هيفكروا انى بألف
لكن ربنا شاهد على كل حرف انا هحكيه
انا من اسكندرية
لسه متجوزة من 4 سنين
تقريبا
مش جميله
ويمكن اقل من ان جمالى يكون عادى
بس الحمد لله انا راضية بشكلى
بس انا مش دى الحاجة الوحيدة اللى مفتقداها
انا حتى ولادتى ووجودى فى الدنيا كان بطريقة مش صح
ابتديت الحكاية لما امي فريال
سافرت ليبيا
فى الوقت اللى كان كل المصريين تقريبا بيسافروا يشتغلوا هناك
كانت بتاخد شغل من هنا وتروح تبيعه هناك
كانت بنت عمها عايشة هناك متجوزة ومخلفة
امى كان جوزها الاول ميت من زمان
واسامة اخويا كان فى الوقت اللى امى ابتديت تسافر فيه عنده تقريبا 20 سنه او يمكن 23 سنة وهو اخويا الكبير
سها ومنال الفرق بينهم وبين اسامة 3 او 4 سنين بالكتير
وفى الوقت اللى امى كانت بتسافر فيه
كانوا عايشين مع خالتى
اسامة اخويا من صغره راجل يعتمد عليه
لكن المسؤلية كانت كبيرة عليه
امه وبنتين اخوات وهو
مكانش قادر يتحمل المسؤلية لواحده
ولان امى متعودة تشتغل من زمان من قبل حتى ما تتجوز
ف اسامة كان متعود على الوضع ده
امى ست محترمة جدا
كبيرة فى السن هى دلوقتى وصلت لقرب ال70 سنة
كانت امى علطول بتسافر وترجع خلال فترات قصيرة مش بتطول كتير تخلص الشغل اللى معاها
وكانت بتساعدها فيه بنت عمها
وتجيب حاجات تانية ترجع بيها تبيعها هنا
وهكذا
فى سفرية من السفريات دى
راحت امى بالشغل اللى معاها
وكالعادة قعدت عند بنت عمها
والفترة دى كانو ولاد عم امى كمان مسافرين بيشتغلوا هناك
وقاعدين عند اختهم
مش عارفة اقول منها لله ولا الله يسامحها
هتعرفوا ده مع الحكاية
كانت امى صغيرة مش عجوزة يعنى بس فى نفس الوقت هى ام لعروستين ولشاب يعنى لو اتجوزوا هتبقى جدة
ولأن امى كانت من الستات اللى بتهتم بنفسها كانت علطول العين عليها
وكل ما بتسافر كان بيجيلها عرسان كتير عن طريق بنت عمها
اللى هى اصلا جوزها كان ليبى
بس امى كانت علطول بترفض
لأن اسامة اخويا مستحيل يقبل حاجة زى دى ابدا
لأن امه بالنسباله قدوة
وبيحترمها ويقدرها ومكانتها عنده اعلى بكتير انه يقبل انها تتجوز بعد ما عاشت العمر ده كله من وهما اطفال رافضة الجواز
وكل مرة كانت بتحاول رئيسة بنت عم امى انها تقنعها تتجوز
كانت امى ترفض
لحد اخر سفرية
لما اضطرت تطول شوية
امى موجودة فى بيت فيه اولاد عمها الاتنين منهم واحد متجوز وعنده بنت ومراته حامل
واخوه اللى كان عنده 18 سنة
وجوز رئيسة واولادها الكتير
غير بقى اصحاب جوزها واولادها اللى كل يوم سهرانين عندهم
امى كانت ملفتة
ورئيسة ابتديت تلاحظ ان عين جوزها ابتديت تزوغ على امي
وهى محبيتش ده ابدا
وفى نفس الوقت مش هتقدر تطردها دى فى بلد غريبة
بس هى فكرت فى اللى اسواء من كده بكتير
ابتديت رئيسة تقنع امى انها لازم تتجوز
رئيسة.يافريال ياحبيبتى
اصحاب الراجل بقوا ييجوا هنا علشان يشوفوكى
ما توافقى ياختى على واحد منهم اهو يصرف على عيالك وترتاحي بقى من الشقا ده كله
فريال.انتى بتقولى ايه يارئيسة لاء طبعا
ده اسامة يقاطعنى ياختى
اروح اقوله اتجوزت بعد ما بقى راجل وعلى وش جواز
مقدرش اعمل كده ابدا
الا ما عملت كده فى عز شبابي لما ابوهم مات وكنت محتاجة اللى يشيل همهم معايا ويشيل همي
اروح دلوقتى افكر فى الجواز
ياشيخة ده انا قربت على الاربعين سنه
رئيسة.ياختى اتجوزى ومتقوليش
هو يعنى ابنك هيعرف منين ولا ايه اللى هيجيبه هنا
واهو انتى كده كده رايحة جاية على الطريق يعنى حتى لو طولتى هتعرفى تقوليله الشغل اتأخر معايا الدنيا مريحة
وكل مرة هتلاقى حجة جديدة
فريال.لاء وانا اضمن منين اللى اتجوزه يرضى يخلينى اروح واجى على الخط بشغل
ولا ميجيش عليه وقت يمنعنى انى اسافر لعيالي
مينفعش يا رئيسة اخاطر واخد خطوة زى دى
انا مش هخسر ابنى علشان راجل غريب ياختى
يتقال عليا ايه ست ناقصة راحت تدور على كيفها بعد ما عيالها كبروا وبقوا على وش جواز
رئيسة مش عارفة توصل للطريقة اللى تقنع بيها فريال
وده كان قالقها
برغم انها عارفة ان فريال مستحيل تخونها او حتى تفكر فى جوز بنت عمها
لكن هى كانت مش واثقة فى جوزها
خافت انه يضحي بيها علشان عنيه زاغت على فريال
وده كان سبب فى ان رئيسة متبطلش تفكير
فى انها توصل لحل من الاتنين
يا فريال ما ترجعش ليبيا مرة تانية
يا اما تتجوز علشان ميبقاش فيه اى قلق من ناحيتها على جوزها
وكأن اللى بص لفريال مش هيبص لغيرها
بس ده للأسف كان تفكير رئيسة فى الوقت ده
رئيسة بليل قاعدة مع اخوها عبد الله فى اوضة لواحدهم
عبدالله.ايه ياختى مالك فى ايه
رئيسة.بقولك ايه ياعبدالله
انا عايزة اكلمك فى موضوع ياخويا
مش عارفة اوصل لحل فيه
قلت اشورك
يمكن تعرف تشوفلى حل احسن بيت اختك ممكن يتخرب
عبدالله.ياساتر يارب
ربنا ما يجيب خراب ياختى
ليه بتقولى كده
رئيسة.فريال بنت عمك
عبدالله.مالها فريال
رئيسة.جوزى عينيه زاغت عليها
وهى لسه شغلها قاعد متحركش الدنيا مريحة السفرية دى
ومش هترجع ببضاعتها يعنى
عبدالله.ليه ياما بتقولى كده
فريال بنت عمك ست محترمة
وانسي انها تاكل فيكي يعنى
ليه توصليها لخراب البيت
رئيسة.لا ياخويا
والله ماخايفة منها
انا فريال اضمنها برقبتى
لكن انا مش هرتاح طول ما جوزى عنيه رايحة جاية معاها
ومش هستنى تحصل حاجة ياتخلينى اخسر بنت عمي
لو جوزى عمل معاها اي حركة نقص
ولا هينفع اخسر جوزى انت عارف انا مش عندى عيل ولا اتنين يا عبدالله
دول 8 عيال
غير اللى فى بطنى
عبدالله.بس يا رئيسة اكيد يعنى جوزك مش هتوصل بيه انه يعمل حاجة اى حاجة تخليه يخسرك ولا يبص لبنت عمنا واحنا قاعدين معاه فى نفس البيت
ايه مش شايفنا رجالة يعنى للدرجة دى
رئيسة.بص يا عبدالله جوزى ياخويا انا ادرى بيه
وعارفاه وحفظاه
وبعدين هو انا مش هستنى حاجة تحصل فى بيتي
ولا واحد منكم يشوف منه بصة كده ولا كده على فريال دمكم يفور تبقى مصيبة
وبرضه هو هنا فى وسط اهله وناسه
وانا ياخويا مش هضحى بحد منكم
بس انا بفكر فى حل للقصة دى
انا كده كده عارفة ان حتى لو انت اجرت لنفسك حوش
فريال مش هترضى تقعد معاك انت واخوك
هتتحرج
لكن هى بتقعد عندى لأنى انا واخدة بحسها وفى الاول والاخر انا بنت عمها
لكن مش عايشة مع رجالة بطولها يعنى
عبدالله.مش عارف اقولك ايه بصراحة
بس قوليلى بقى ايه اللى بتفكرى فيه
فى الوقت ده دخلت فريال الاوضة وهى عاملة اكلة عندهم اسمها عصيدة متعودين عليها هما
فريال.انتم ايه حابسين نفسكم هنا ليه
انا لقيت الجماعة برة هيخلصوا الاكل
قولت اجيبلكم علشان تلحقوا تاكلوا
عبدالله.تسلم ايدك ياختى
هو مين برة
فريال.طرابلسى واصحابه
والعيال واخوك
رئيسة.انتى اللى دخلتيلهم الاكل يافريال
فريال بتلقائية.لاء ياختى جوزك دخل المطبخ وانا بجهز الاكل
اخد هو الاكل بتاعه هو والجماعة بتوعه
وانا دخلت الاكل للعيال
وجيبتلكم قولت اكيد تكونوا جعانين
عبدالله.انتى اكلتى
فريال.مش جعانة والله ياعبدالله
انا هروح اعملكم شاى تحبسوا بيه وكملوا كلامكم انتم براحتكم
رئيسة.طيب ياختى لما تعملى الشاى نادى عليا انا هدخل بيه للجماعة
ولما تخلصى اللى وراكي ابقى تعالى عايزين نقعد نتكلم سوا شوية
انا وانتى وابن عمك
عبدالله بيبص لرئيسة وهو مش عارف هيتكلموا معاها فى ايه
فريال.خير ياختى فى حاجة ولا ايه
رئيسة.يوه ياولية وهيكون فى ايه يعنى يابنت عمي
اهو نقعد ندردش شوية
من غير الدوشة الليبى
نتكلم شوية اسكندرانى كده الكلام بتاع بلدنا بيوحشنى
فريال بتضحك.الله يحظك يارئيسة
طيب ياختى هخلص الشاى واشطب المطبخ واجى نقعد مع بعض شوية
رئيسة بتضحك.ماشى ياختى ومتنسيش تنادى عليا لما تخلصى الشاى
خرجت فريال من الاوضة وراحت على المطبخ (الكوجينة بيسموه)
عبدالله.انتى عايزاها تيجي نتكلم معاها فى ايه يا رئيسة
اوعى تكوني مستنية مني انى اقولها تمشى من هنا
انسي ياختي
اروح اقول لبنت عمي امشى من بيت اختى علشان جوزها عينه منك
رئيسة.جرى ايه ياعبدالله
وانا يعنى قولتلك هتقولها كده
ولا انا يعنى هلفت نظرها لجوزى ولا لعينه اللى عليها
وبعدين ازاى يعنى هقولك انت تمشيها من بيتى
هى ليها مين بعد ربنا هنا غيرى
مش هنرميها فى الشارع يعنى
انا بس عايزاك تساعدنى اقنعها تتجوز
عبدالله بصدمة.مين دى اللى تتجوز
فريال
انتى اتخبلتى ياست انتى
ده اسامة ابنها يعمل جريمة لو حصلت حاجة زى دى
رئيسة.يوه
ليه هو هيحرم حلال ربنا ولا ايه
وبعدين ياخويا مش لازم يعرف يعنى
هى هتحط ايديها فى ايد جوزها وتفضل ماشية رايحة جاية بيه على الطريق تتعايق بيه
بس اهى تبقى على ذمة راجل
يرضيك ياخويا بيت اختك يتخرب
عيالى دول هيتشردوا هجيب منين وهأكلهم ازاى
ساعدنى يا عبدالله وحياة بنتك ياخويا
عبدالله مش مقتنع ابدا بالكلام.بصى يارئيسة
بنت عمك لو عايزة تتجوز ياختى
اكيد مكانتش هتستنى السنين دى كلها شايله هم العيال لواحدها
وكانت صغيرة وحلوة ولسه فى عز شبابها
مش هاجى دلوقتى لما ابنها بقى طولى
اروح اقولها لاء انتى لازم تتجوزى
وتدخلى راجل غريب على عيالك العرايس
وابنك اللى قرب يكون اب
رئيسة.ومين قالك انها هتدخل بيه عليهم
وبعدين ليه هندور على الغريب يعنى
لو تشغل دماغك معايا
هنوصل لحل يريحها ويريحنى
