رواية عذاب الارواح الفصل الثاني 2 بقلم هنا عادل
عذاب الارواح
الجزء الثانى
عبدالله.طيب انتى قصدك مين ب انك مش عايزة حد غريب
انسي
انا مراتى حامل
وعندى بنت وربنا يقدرنى عليهم
فريال.بقولك يا رئيسة ياختى الشاى جاهز
لو هتدخليه بقى للجماعة
وانا هجيب الشاى بتاعنا واجيلكم
رئيسة قامت مع فريال وهى بتطبطب على رجل عبدالله
وكأنها بتقول لأخوها انه وصل للحل
راحت رئيسة اخدت الشاى ودخلته عند جوزها
رمضان صاحب جوزها.جرى ايه يا ام عبد السلام
مش عارفة تخلصيلي الموضوع اللى طلبته منك
رئيسة.موضوع ايه ياخويا مش واخدة بالى
رمضان.موضوع العروسة
مش طلبت منك تشوفى بنت عمك لو توافق عليا
هعملها اللى هى عايزاه كله
لو عايزة بيت فى اسكندرية وبيت هنا
انا راضى وقابل
بس هى توافق
رئيسة عنيها على جوزها اللى باصص لصاصحبه ومتغاظ وعنيه بتطلع نار
رئيسة.شكلها كده غاوية واحد مصرى يا رمضان
فاتحتها ياخويا بس هى قالتلى لاء بالها مشغول
طرابلسى بص لمراته.ام اسامة غاوية حد
ايه ياولية الكلام ده
دى طول عمرها تقولك عيالى وبس
فجأة كده بالها انشغل براجل
رئيسة.يوه يا طرابلسى يعنى هى هتترهبن
ماهى ست ياخويا
ومشهتفضل لواحدها طول العمر
عيالها هيتجوزوا ويسيبوها لواحدها
اهى تلحق تتبسط شوية
قبل ما تعجز وتروح عليها
رمضان.لا انا برضه عندى عشم فى ربنا وفيكي
انتى تقدرى تخليها توافق
بصى حاولى معاها ولو وافقت
ليكي عندى ربع كيلو دهب هدية
بس هى توافق
رئيسة حسيت بالغل جواها
ان فريال بتطلب منها بألحاح
وطرابلسي واقف وسامع رغبة الراجل فيها
واصلة لدرجة ايه
وده بيحليها فى عنيه اكتر
وبيزود الغل فى قلب رئيسة اكتر
رئيسة.خلاص يا رمضان هكلمها والله تانى
وهحاول معاها
بس يمكن الراجل اللى فى بالها هى بتحبه ولا حاجة ورايداه
ساعتها مش هتشغل بالها هى بالفلوس ولا اللى انت بتقوله ده
رمضان.قوليلها بس انا هريحها من الشقا ده كله
وكل مصاريف عيالها عليا
لحد ما يفتحوا بيوتهم
انا مسؤول عنهم وعن مصاريفهم
ومش همنعها ابدا انها تروحلهم وقت ما تحب
رئيسة بتضحك وبتحاول تدارى الغيظ اللى جواها.يوه شاغلتك فريال باين عليها
عرفت توقعك
اه اومال وهو صاحبك جابته على وشه غير بنت اسكندرية
رمضان بيضحك.انتى الخير والبركة يا ام عبد السلام
بس ياريتها شاغلتنى ولا حتى بتدينى اى وش
دى ولا كأنها شايفانى
ولا بتتعامل مع حد فينا
يادوب سلام عليكم
وعليكم السلام
لو تخلينى بس اقعد واتفاهم معاها انا هقنعها
طرابلسي.بقولك ايه يارمضان
ولاد عمها فى البيت
عيب الكلام اللى بتقوله ده فى حقهم
وعيب تبص لحريم فى بيتى
انا بدخلك بيتى علشان شايفك اخويا
لكن لو هتدخل بيتى وعينك على اهل البيت
يبقى خلينا نبقى برة البيت وبس
علشان انا مش عايز مشاكل لا بينى وبينك
ولا بينى وبين اهل مراتى
رمضان.ياطرابلسى ربنا ما يجيب مشاكل
عيب عليك
انا يعنى هدخل ابص على مرات اخويا ولا اهله
انا عايز الست فريال على سنة الله
عجبانى وبحبها
يعنى لا عايز حاجة بطالة
ولا انا باصصلها باصة نقص
وعموما لو مش عايزنى ادخلك بيت تانى
عادى ولا يهمك
لكن انا برضه هبقى مستني انها توافق عليا
رئيسة بتبص لجوزها بغيظ.جرى ايه ياخويا
وانت عايز ليه تعقد الدنيا وتحرم حلال ربنا
راجل عايز يتجوزها على سنة الله
ويريحها من الشقا والمرمطة اللى بتشوفها رايحية جاية على الطريق
ولا انت فاكرها سهلة عليها انها تسافر وترجع فى الشهر مرتين تلاتة
انت فاكر اسكندرية فى الشارع اللى ورانا ولا ايه
خليه يستتها
بس اشوف الاول الراجل اللى شاغلها ده نيته جواز
ولا بيقضى وقت وهيعشمها على الفاضى
وساعتها يحلها الحلال
طرابلسى بغيظ من كلام مراته واصرارها على انها تطلع فريال بصورة مش كويسة قدام رمضان واصحابهم اللى قاعدين
بس هما كانوا مش مركزين غير فى الشيشة اللى قاعدين يشربوها وكلامهم مع بعض
ومحدش منهم ركز مع الكلام اللى كان بيتقال ده خالص
خرجت رئيسة من الاوضة وخرج وراها جوزها
سحب ايديها ودخل بيها اوضتهم
رئيسة.ااى دراعى فى ايه ياخويا انت وجعتنى ايه الغل ده مالك
طرابلسي.انتى اتجننتى يا رئيسة
انتى بتورى اصحابى ان بنت عمك
بتصاحب الرجالة
عايزاهم يقولوا عنك ايه
ماهو انتى فتحالها بيتك
يفكروا انها ست مش مظبوطة
واحنا فاتحينلها بيتنا على كيفها
رئيسة.انا برضه قصدى كده ياخويا
اخص عليك
تعدمني ابدا
انا بس عارفة بنت عمي ودماغها
مش هروح اقوله هى بتكره الليبيين
وبتقول مالهمش امان وخاينين
ملقتش حاجة تانية اسددها فى وشه بيها غير انى اوصله انها مشغولة بحد تانى
طرابلسى.يعنى هى مش مشغولة بحد
رئيسة.لاء يا خويا
مش مشغولة بحد
بس انت ليه يعنى مضايق جدا
طرابلسي.هضايق ليه
انا مضايق بس من اللى انتى قولتيه
لما تبقى بنت عمك
قاعدة فى بيتى
وولاد عمها اللى هى على اسمهم وعرضهم عايشين معانا فى نفس البيت
والرجالة تسمع انها مشغولة براجل
هيقولوا ايه علينا
غير اننا بنرضى بالحال المايل
يرضيكى يتقال كده على جوزك واخواتك
وبعدين الست محترمة
مينفعش نطلع عليها سمعة
ربنا يحاسبنا
رئيسة بتضحك بتريقة.هههه لا وانت الشهادة لله بتخاف من حساب ربنا
ماشى ياخويا روح ارجع لأصحابك
هيقولوا روحت فين كل ده وسيبتهم
وسيبنى انا اروح اقنع الولية يمكن اعرف اطلع بالربع كيلو دهب
يلا اهى ابخات
عايز يدفع حلاوة موافقتها ربع كيلو دهب
والواحدة جت هنا يامولاى كما خلقتنى
يلا هنقول ايه بقى
طرابلسي.صحيح نكارة خير
اروح للجماعة
وخليكي انتى اندبى بقى مع نفسك
خرج جوزها من الاوضة
ورئيسة دمها بيغلي
هى مش بتكره بنت عمها
وفى نفس الوقت واثقة فيها
لكن برضه الغيرة وحشة
والاحساس بالنقص عما عنيها
وبعدين لما رمضان اتكلم على فريال بالطريقة دى قدام طرابلسى
شافت فى عنيه نظرة هى تفهمها
وهى نظرة رغبة بتزيد جواه
حافظة جوزها وفاهمة حركاته
وعارفة ان الست اللى بتبقى تقيلة وبعيد عن اللى هيموت عليها
بتلفت انتباهه وتعجبه
خرجت رئيسة من الاوضة وهى ناوية متنامش الليل غير وهى واصلة للحل اللى هيريحها
يا فريال تتجوز اخوها
يا فريال متعتبش ليبيا مرة تانية
لكن فكرة انها تتجوز وتعيش فى ليبيا وجوزها يكون ليبي
مش هتكون مرتاحة طول ما هى عارفة انها مش هتبعد من قدام عين طرابلسي
كان قاعد عبدالله وفريال بيتكلموا فى حال الشغل اللى واقف
دخلت رئيسة بتضحك
فريال.ايه ياختى انتى كنتى بتدخليلهم الشاى ولا قعدتى تشربيه معاهم
رئيسة.ياختى انتى عارفة الطرابلسى والله دخل معايا الاوضة وسيبنا الناس ولسه طالعين دلوقتى
لما قولتله عيب الرجالة انت سايبهم لواحدهم
فريال.ياختى ان شالله ميغير عليكم ابدا
عبدالله قاعد بيولع سيجارة من سيجارة
وسايبهم يتكلموا براحتهم
رئيسة.بقولك ايه يا فريال
انتى لسه ياختى مش عايزة تتجوزى
فريال غمزت لرئيسة تسكت علشان محروجة من وجود عبدالله
رئيسة بتعمد.بقولك ايه ياعبدالله يا خويا
تعالى احضرنا
عبدالله متوتر من اللى اخته هتقوله.خير اللهم م اجعله خير
ياختى انتم حريم فى قلب بعض وانا ماليش تقل على كتر كلام الحريم
رئيسة.ياراجل اسمع بس
دلوقتى بنت عمك دى صعبانة عليا
شقاها وسفرها صيف شتا ومرمطتها دى
وجعالى قلبى
وانا عايزاها ترتاح
عبدالله.ترتاح ازاى يعنى
ربنا يكرم ياختى والله الواحد لو ربنا يكرمني افتحلها دكانة صغيرة تحت بيتها تسترزق منها واهو رب هنا رب هناك
بس نعمل ايه بقى
العين بصيرة والايد قصيرة
بس متقلقيش يافريال
ربك هيدبرها والله
فريال.ياخويا والله مستورة وانا راضية الحمد لله
اختك هى اللى بقالها يومين مسكانى كده ومش عايزة تسيبنى
جواز ايه يا عبدالله اللى افكر فيه دلوقتى
قولها علشان هى بقالها سنين مشافتش اسامة
قولها بقى شكله ايه
وطبعه عامل ازاى
عبدالله.اسامة
ده راجل ربنا يحميه
دمع حامى وبيغير على امه واخواته
وعلى عينه ان فريال لسه بتشتغل لحد دلوقتى
بس برضه هو لسه عضمه طرى مش هيصد على البيت ونفسه واخواته
فريال.اهى مش مصدقة بقى
بقولها لو افكر فى الجواز يقاطعني وهى ابدا
مش مصدقة
رئيسة.يوه
وهو يعنى لازم يعرف ياختى
ماهو انتى بتسافرى وتقعدى بالأسبوع والاسبوعين هنا
هو يعنى بيمشى وراكي ويشوفك رايحة فين وجاية منين
عادى اتجوزى واتستتى
وكانك بتسافرى برضه
فريال.اللى يسمعك كده يقول انك عارفة اللى هتجوزهولى ومتأكدة انه هيراعي ظروفى
ومش هيجيلى من وراه مشاكل
يا رئيسة ياختى
انا نسيت الرجالة والجواز
وكده انا مرتاحة
رئيسة.اه انا عارفة مين اللى انتى هتتجوزيه
وواثقة انه لا هيعملك مشاكل
ولا انتى كمان هتعمليله مشاكل
وابنك ولا هيعرف حاجة
اهو تعيشي شوية حلوين تعوضى فيهم اللى فاتك
وترجعى ياختى شبابك اللى ضاع فى الشقا
عبدالله بيبص لرئيسة بنظرة تحذير انها تدخله فى حاجة زى دى
فريال.وده مين اللى شغلته ملاك بجناحين ده
وهيقبل بكل حالى
ويريحنى كمان من الشقا
رئيسة.ابن عمك ياختى
فريال وعادل بصوا لبعض وبصوا لرئيسة
وفتحوا عنيهم على اخرها
رئيسة.ايه جحا اولى بلحم توره
وابن عمك اولى بلحمه ودمه
والجواز ياختى لا عيب ولا حرام
فريال.انتى اتجنيتى يا ولية انتى
انتى عايزة تخربى بيت الراجل وتقهرى مراته
رئيسة.ههههه بيت راجل مين ومرات مين ياختى
قصدك عبدالله يعنى
فريال بتبص لرئيسة وعنيها بتطلع نار
عبدالله.جرى ايه يا رئيسة انتي عقلك صواميله فكت ولا ايه
جواز ايه
واخوكي مين
رئيسة.يوه يا عبدالله جواز
شرع ربنا
واخويا حبيبى
خلاص بقى يتجوز وواحدة تدلعه وتعقله
فريال مصدومة من كلامها.ياولية انتى هتجنينى ليه
اخوكى ايه اللى اتجوزه احنا اخوات يا رئيسة ياختى
انتى تعرفي ان بنت عمك خرابة بيوت
رئيسة.تانى هتقولى خرابة بيوت
ياولية لاء
انا مش هخليكي تخربي بيت
ده انا هجوزك الواد اللى بخيره
هجوزك الصغير بتاعنا
عادل وفريال شهقوا من الصدمة
ورئيسة بترسم ضحكة خبيثة.
