رواية نعمه الفصل الخامس 5 بقلم حماده زهران
وصفت مكان الشقه اللي فيها البنت وقولت: -انا مش هقدر اعمل حاجه اكتر من كده،روحوا دلوقتي ألحقوا البنت ولما تطمنوا عليها نتكلم.
بعد ساعتين مسعد كلم جوزي وقالوا:
-البنت معانا وأهلها عايزين يقابلوا الست نعمه.
جوزي قال:
-ليه بس.
قولت:
-مش عايزه اشوف حد النهارده،كفايه كده.
الست لما عرفت اني مش عايزه اقابل حد، اخدت من مسعد رقم جوزي،وكلمته واتحايلت عليه.
جوزي خلاني اكلمها ،قالت:
-انا اسفه يا ست نعمه،انا بس لازم اشوفك،وعايزه اطمن منك على بنتي.
صعبت عليا وقولتلها:
-تعالي بس مش عايزه زحمه زي المره اللي فاتت.
الست جات،واول ما دخلت جريت عليا وباست على ايدي وقالت:
-مش عارفه اقولك ايه،بس بالله عليكي طمنيني على بنتي.
قولتلها:
-اطمني بنتك كويسه محدش لمسها.
طلعت فلوس كتير وقالت:
-دول حلاوتك.
بصراحه انا كنت مبسوط اوي،اني مختلفه عن الناس.
عدا شهر وأخو جوزي مش بيتحرك من سريره،ولا حتى بيدخل حمام،كان بياكل ويشرب ويعمل حمام على السرير.
انا كنت حاسه بالذنب،لأني انا كنت السبب لما دعيت عليه.
بعتلي ونزلتله،قالي:
-سامحيني يا نعمه،انتي لو مسامحتيش انا مش هرجع تاني زي الاول.
قولت:
-اسامحك علي ايه،ليه هو انت عملت حاجه عشان اسامحك عليها.
قال:
-انا اتكلمت عليكي في ظهرك.
قولت:
-انا فعلاً دعيت عليك،بس والله من زعلي علشان انت افتريت عليا،ومحدش حاسس باللي انا فيه،بس انا مسمحاك.
وفعلاً يومها بالليل قام من السرير ورجع كويس.
بعد يومين مسعد اتصل على جوزي وقاله: -فيه موضوع حلو قوي.
جوزي قال:
-خير موضوع ايه.
قاله:
-لا ما ينفعش في التليفون،لازم نقعد ونتكلم.
جوزي سألني قولتله:
-انا مش بحب مسعد ده ولا برتاحله.
جوزي قال:
-طيب نشوف عايز ايه.
قولت:
-ماشي اللي تشوفه.
وفعلاً مسعد جه وأتكلم وقال:
-في ناس بتقول ان بيتهم فيه حاجه،وشيوخ كتير شافوا البيت واتأكدوا ان البيت في مقبره،بس محدش قدر يفتحها.
جوزي قاطعه وقال:
-لا لا ده خطر،وانا مش مضحي بنعمه.
مسعد قال:
-مراتك معاها ملوك من الجن،ودول مش اي جن،وكلهم تحت امرها.
وقفت وقولت:
-لا انا مش عايزه،واطلع بره يا مسعد.
كنت متضايقه منه،وغضبانه عليه. وفجأة..ظهر الجن اللي معايا،وعلق مسعد على الحيطه.
جوزي قال:
-فيه ايه يا نعمه،ألحقي الراجل.
كنت اول مره اشوفه بوضوح..كان بيبصلي وانا بداري الضحك على مسعد اللي متعلق على الحيطه.
شاورت بأيدي علشان ينزلوا..ونزله وابتسملي بفرحه.
مسعد قال:
-سامحيني ياست نعمه،أنا آسف.
قولتله:
-امشي دلوقتي يا مسعد..ومشي مسعد.
جوزي قال:
-ايه اللي حصل ده،انتي كنتي بتضحكي، وشاورتي بأيدك ،انا شايفك.
قولت:
-عادي ما تشغلش بالك انا كويسه الحمد لله ما تقلقش.
وبطلت احلم حلم الكتاب الفتره دي،وكنت مبسوطه ونفسيتي مرتاحه جدا.
اللي كان معايا قال:
-في حد محتاجلك لو حابه تساعديها.
قولت:
-ماشي..انا اصلا بكون مبسوطه وانا بساعد حد،بس مش بحب مسعد ده.
قال:
-لا ده شيخ تاني غير مسعد،سمع عنك وعايز يقابلك.
في اللحظه دي مسعد اتصل على جوزي وقاله:
-فيه شيخ اسمه الشيخ محمود كويس جدا عايز مساعده من الست نعمه،خد رأيها ةهو هيجلكم في اي وقت.
في نفس اليوم الشيخ محمود جي البيت،راجل في الستينات.
طلب مني احكي قصتي،وبصراحه انا كنت مستريحه جدا وانا بتكلم معاه،وحكيتله كل حاجه حصلت معايا.
قال:
-طيب ممكن اقرأ عليكي.
قولت:
-أكيد طبعاً،اتفضل.
وبدأ يقرأ القرآن الكريم،وانا كنت بقرأ معاه بصوت عالي وحلو وواضح واسرع منه.
قال:
-ما شاء الله عليكي،انتي حافظه قرآن وتلاوتك حلوه.
جوزي كان واقف مستغرب،لانه عارف اني مش حافظه غير آيات قليلة في سور معينه.
أنا قولت:
-انا مش حافظه أصلا قرآن.
قال:
-سبحان الله،طيب مين كان معانا.
قولت:
-دي صحبتى معايا من زمان.
الشيخ محمود قال:
-اهلا وسهلا بيها،ممكن تكلمني،عايز اتعرف عليها.
ولأول مره نطقت على لساني،والغريب اني كنت سامعه كل حاجه وحاسه بيهم.
قالت:
-انا هدي،من الجن المسلم،ملكه بنت ملك زوجه ملك مسلمه.
كلهم واقفين مش مصدقين،وبدأت تقرأ القران الكريم من سوره الجن وسوره الحشر وسوره الحديد وسوره النمل وسوره البقره.
جوزي مذهول،والشيخ محمود فرحان جدا جدا جدا.
الشيخ رحب بيها وقال:
-مرحبا بكي اختي الكريمه،ممكن أسأل سؤال.
قالت:
-اتفضل.
قال:
-ايه سبب وجودك مع بنتنا نعمه.
قالت:
-ده حقها،هي الوحيده اللي وارثه من جدها،
وانا معاها علشان تكمل المشوار.
جوزي والشيخ محمود مش فاهمين حاجه.
الشيخ محمود قال:
-ممكن تفهميني.
قالت:
-جد جدها كان من الناس التقيه،وكان دايما فاتح بابه وبيساعد الناس والمحتاجين،وكان من الاثرياء،دايما بيطعم الفقراء،ودايما حلقات الذكر كل شهر.
الشيخ قال:
-ما شاء الله تبارك الله العلي العظيم،طيب بنتنا نعمه وارثه ايه مش فاهم.
قالت:
-مش مسموحلي اقول دلوقتي،علشان لسه مش وقته،ونعمه متعرفش لسه قدرتها.
قال:
-امرك،بس ممكن اعرف ايه الحاجه اللي كانت بتأذي نعمه،اكيد مش انتي.
قالت:
-انا مش لوحدي مع نعمه،فيه عشائر من الجن،بس لحد الان انا بس اللي بتواصل معاها،اللي بيأذيها موجود،ممكن اطلب منه الحضور.
الشيخ محمود قال:
-ممكن تثبت وجودك.
أنا شوفت هدى سابتني وراحت وقفت على جنب،وكانت لابسه زي الناس اللي شفتها في الحلم،بس كانت اكبر شويه،لبس ابيض طويل ومش باين غير وشها،وكانت ما شاء الله حلوه جدا،وكانت ريحتها جميله جدا،نفس الريحه اللي دايما بشمها.
بصتلي هدي بحزن وقالت:
-متخافيش.
ما حدش كان شايفها ولا سامعها غيري،وكل ده كان الشيخ محمود بيحاول يعرف مين موجود غير هدى..وفجأة،حسيت جسمي زي ما يكون اتكهرب،ومن الوقت ده ما شفتش حاجه ولا سمعت حاجه،مش شايفه غير هدى قدامي بتقرأ قرآن.
بعدين خلصت القرأه،وبدأت احس باللي حواليا واحده واحده،مكنش عدي وقت كتير،ولما فتحت عيني لقيت جوزي حاضني، وانا متكومة على الارض متغطيه،والشيخ محمود غرقان في العرق ومجهد.
انا اتفزعت وقولت:
-فيه ايه،انا نايمه على الأرض كده ليه.
جوزي قال:
-اهدي بس ياحبيبتي..ودموعه نازله على خده وانا في حضنه.
كنت مفزوعه من المنظر اللي أنا فيه وقولت:
-انا ايه اللي منيمني كده على الارض.
الشيخ محمود قالي:
-اهدي يا نعمه متخافيش.
جوزي ساعدني اقوم من على الارض،وغسلت وشي،وقعدت انا وجوزي مع الشيخ محمود سألته وقولتله:
-ايه اللي حصل،انا عايز اعرف كل حاجه حصلت.
الشيخ محمود قال:
-اهدي يا بنتي واسمعيني كويس،انتي ربنا أنعم عليكي من وسع وعندك هبه من الله.
قولت:
-طيب الحمد لله بس ليه بتأذي.
قال:
-الحمد لله،وبأذن الله مفيش أذيه تاني،اختنا هدى هتساعدك تعرفي كل حاجه،بس على حسب كلامها كل حاجه ليها وقتها.
قولت:
-طيب والتاني ايه اللي حصل معاه.
قال:
-هو أصلا أسلم،دلوقتي انتي تقدري تتعاملي معاه، ومتخافيش هو هيكون في خدمتك.
وهدى كل ده واقفه قدامي بس كان باين على وشها انها مبسوطه،بصتلها وابتسمت وقولت: -لو سمحتي عايز اعرف ايه اللي حصل،اشوفه بالتفصيل.
هزت راسها بأنها موافقه.
وبدأت اشوف كل حاجه حصلت.
شوفت نفسي قاعده وهدى بتقرأ القران، والشيخ محمود بيقرأ وكل شويه يقول:
-أعلن عن وجودك.
في الوقت ده جسمي كله اترعش وشوفت نفسي بتكلم بصوت راجل،صوت قوي وكله جبروت.
شوفت جوزي خاف عليا وحاول يقرب مني الشيخ محمود زعق وقاله:
-اوعى تتحرك من مكانك.
وجوزي رجع مكانه تاني ودار الحوار بين الشيخ محمود واللي معايا.
قال:
-انا كنت عايز الكتاب،بس دلوقتي مش عايز غير نعمه..نعمه وبس..ومحدش يقدر يبعدني عنها.
الشيخ محمود قال:
-هو ايه الكتاب ده،وليه كلكم عايزينه.
قاله:
-لو عايزني اكمل معاك،ما تجيبش سيره الكتاب.
الشيخ محمود قال:
-طيب هو اللي يحب حد بياذيه.
فجأة بدأ يزعق،وانا بدات اتحرك واضرب، واكسر كل حاجه حواليا.
الشيخ محمود فضل يقرأ قرآن،وهدى كانت بتقرأ،وانا بصرخ على اخري،والشيخ وجوزي بيحاولوا يسيطروا عليا.
شكلي كان مفزع.
وبعد حوالي ساعتين قرأة قرآن من محمود وهدى،قدروا يكتفوني ونوموني على الارض. والشيخ محمود بدأ يسيطر على الموضوع، وبدأ يتكلم معايا.
واللي معايا مش عايز يعرف بنفسه اصلا،ولا عايز يقول حتي اسمه،لكنه بدأ يهدى.
الشيخ محمود بدأ يتكلم معاه في الدين والاسلام،وان كل اللي بيحصل ده حرام.
قال:
-انا هأسلم بس افضل جنب نعمه.
الشيخ محمود قال:
-انا عارف ان انتوا عندكم قدره عاليه جدا في الفهم والقرأه،كل المطلوب منك تسمع الكلام، واختنا هدى لازم تساعدنا.
وفي الوقت ده انا بدأت افوق.
وبعد ما شوفت كل ده بدأت ابكي بأنهيار وقول:
-ليه كل ده،انا عملت ايه في حياتي علشان يحصل فيا كل ده،يا رب هو انا عملت ايه،من وانا 7 سنين وانا مش زي الناس طبيعي ليه، انا تعبت..يا رب ارحمني،انا عايزه بيتي وجوزي وعيالي والله العظيم مش عايزه حاجه تاني.
جوزي خدني في حضنه وحاول يهديني.
الشيخ محمود قال:
-حرام كده يا بنتي.
في الوقت ده ظهر اللي معايا قدامي،بشكل شخص عادي وقال:
- انا أسف،حقك عليا.
قولتله:
-منك لله زي ما دمرت حياتي،سيبني في حالي حرام عليك.
واول مره اشوفه كده،كان متضايق وزعلان عليا.
هدى همست في ودني وقالت:
-يا نعمه انا جنبك،هو هيبقى كويس متخافيش،اسمعي الشيخ محمود.
الشيخ محمود اتكلم وقال:
-بصي يا بنتي،انا عارف وحاسس بوضعك، بس انتي لازم تحافظي على النعمه اللي انتي فيها،ودلوقتي دور اختنا هدى لازم تعلمه كل حاجه عن الاسلام،بس قبل ده هو لازم يظهر.
هدى قالت:
-تمام ان شاء الله هنتجمع كل يوم جمعه.
كنا يوم الاثنين الشيخ محمود قالي:
-انتي بقيتي زي الفل،بس اهم حاجه تحافظي على صلاتك دايما.
قولت حاضر وفعلاً كل حاجه بقت تمام وكويسه جدا.
يوم الجمعه الشيخ محمود جي.
استقبلناه انا وجوزي وقعدنا،الشيخ قال: -عامله ايه دلوقتي.
قولت:
-تمام الحمد لله،بقيت زي الفل.
قال:
-الحمدلله،ممكن يا نعمه تنادي الأخت هدى.
قولت:
-اه طبعا وطلبت من هدي تحضر،وحضرت.
واتكلمت علي لساني وقالت:
-السلام عليكم ورحمه الله وبركاته.
رد الشيخ وقال:
-اهلا بيكي اختي الكريمه،ممكن نعرف حصل ايه مع اخونا الفاضل.
قالت:
-اخدته على الكعبه المشرفه بعد ما اتطهر، وكان فعلا مستعد يدخل الاسلام،انتوا لازم تسمعوه بنفسكم،هو اللي طلب بس نعمه تأذنله.
الشيخ محمود قال:
-ما شاء الله طيب ممكن يحضر يا نعمه، اطلبي منه يحضر.
وفعلا حضر..والمره دي اتكلم على لساني من غير ما احس انه لمس جسمي.
قال:
-السلام عليكم ورحمه الله وبركاته.
الشيخ محمود قال:
-اهلا وسهلا بيك،ممكن اقرأ عليك.
قاله:
-اتفضل.
وبدأ يقرأ الشيخ محمود كتير،وكنت شامه نفس الريحه الحلوه اللي بشمها كل مره، وهدي قدامي كانت مبتسمه ومبسوطه جدا.
خلص الشيخ محمود وقال:
-ما شاء الله تبارك الله،بس اقولك علي حاجه، لو انت حابب تدخل الاسلام لازم تدخله في حب الله ورسوله،مش حب في نعمه،لازم تفهمني،هيكون في حدود بينك وبين نعمه، يعني فيه حرمة بيت،مش مسموحلك الظهور ليها غير لما هي تقول،ولا مسموحلك تتجسس عليها،فيه حاجات كتير لازم تتعلمها،وده هيكون دور الاخت هدى..ممكن اعرف ايه قدرتك في مساعده نعمه،يعني تقدر تعمل ايه مفيد.
قال:
-انا اقدر اعالج السحر بجميع انواعه،واقدر على حاجات كتير قوي.
الشيخ قال:
-ما شاء الله طيب انا هسميك اسم حلو.
قال:
-لا نعمه هي اللي تسميني.
وقتها كنت مرعوبه وخايفه،وقولت:
انت جابر،انا حابه الاسم ده.
جوزي والشيخ محمود وهدى قالوا اسم جميل.
بعدها هدى قالت:
-تليفون الشيخ محمود هيرن،اعملي حسابك فيه حد محتاجلك.
فجأة تليفون الشيخ محمود رن،وطلع واحد بيستغيث بيه وبيقول:
-ألحقني يا شيخ،ابني هيموت نفسه.
في اللحظه دي انا قلبي اتقبض وخوفت، قولت:
-في ايه يا شيخ محمود.
الشيخ قال لجوزي:
-بعد اذنك تاجي معايا أنت ونعمه،وهفهمكم في الطريق...يتبع
