رواية نعمه الفصل الرابع 4 بقلم حماده زهران
فوقت لقيت نفسي على السرير بتاعي.
قولت لجوزي:
-انا عايزه الشيخ ده ياجي تاني.
-هو اصلا اتصل وقال انه جاي.
وفعلا جه واول ما دخل قولتله:
-انا حابه افهم ليه بيحصل معايا كل ده انا ما كنتش مغيبه،انا كنت سامعه كل حاجه، فهمني لو سمحت،ابوس ايدك يا شيخ،انا خلاص هتجنن،انا عايزه اهدى واكون كويسه.
انا كنت شايفاه كويس وهو جنبي، والشيخ كان باصص عليه مش باصص ليا،عرفت أن الشيخ شايفه كويس.
قولت:
- انت شايفه كويس،حاول تخلصني منه.
الشيخ قالي:
-ممكن نتكلم بصراحه.
انتي مين؟ وانتي بتشوفي ايه؟ ومن امتى كان ملازمك؟
وحكيتله كل حاجه حصلت من وأنا صغيره.
الشيخ قال:
-انتي مش حد طبيعي،انتي اللي زيك نادر في الدنيا دي.
جوزي قطعه في الكلام وقال للشيخ:
- انا مش فاهم حاجه،انت بتقول ايه،قصدك ايه ممكن افهم.
الشيخ مسعد قال:
-مراتك كنز من كنوز الدنيا.
جوزي بدأ يتوتر وقال:
-ممكن تتكلم دوغري وتفهمني في ايه.
مسعد قال:
-طيب فين البنت اللي بتظهر،وليه مكنتيش قادره تجيبي الكتاب؟؟
قولتله:مش عارفه بس ليه كل ده.
قالي:
-طيب ممكن طلب،هسألك على حاجه وتقولي شوفتي ايه.
وبدأ مسعد يتكلم عن حد في المكان،وقالي اسمه الحد ده، وقالي تقدري توصفي المكان،وبص في عينيا ووصفت المكان.
مكان تحت الارض،وانا واقفه في حيره ما بين اتجاهين،وبدا يسأل عن وصف الراجل ده،ووصفت الراجل ولبسه وكل حاجه تخصه.
وبدأ الشيخ يتواصل مع الراجل ده عن طريقي انا.
وسأله انت فين،اتكلم بطريقه غريبه زي ما يكون في بينهم رموز.
الشيخ فهم انه في المكان،وقال:
-هو انت محتار ليه.
قاله:
-مش عارف شرق ولا غرب.
وقطع التواصل معاه،عيون الشيخ لمعت وقال:
-اللهم صل على النبي،ما شاء الله يا ستي.
قولتله:
-ممكن افهم.
قال:
-ازاي كل ده ومش فاهمه ولا حاسه بالنعمه اللي في ايدك،انتي عارفه انتي ايه،ومعاكي مين.
قولت:
-مش عايزه اعرف حاجه،انا عايز اعيش حياتي اللي اتسرقت مني،انا زي الميتين يا شيخ،بقولك انا تعبانه.
قالي:
-ربنا ينعم علينا زيك،وينور بصيرتنا زيك.
قولت:
-بقولك انا تعبانه،لو مش هتفهمني بعد اذنك امشي.
قال:
-اصبري بس.
جوزي قال:
-اصبري يا نعمه،انا عايز افهم.
مسعد قال لجوزي:
-مراتك عندها قدره مش عند حد صدقني.
جوزي قال:
-قدره ايه اللي بتتكلم عنها.
قاله:
-مراتك معاها اثنين من ملوك الجن.
جوزي اتفزع وقال:
-ايه ده وانت فرحان كده ليه.
قاله:
-افهم بس..وقالي:
-هو انتي يا نعمه كان في حد في عيلتك كده زيك.
قولت:
-ما اعرفش،بس سمعت ان جد جدي كان راجل خير،ودايما كان بيعمل ذكر ويأكل الغلابه،بس ما اعرفش حاجه تاني.
قال:
-اللهم صل على محمد،البنت اللي بتظهر من نسل الجن المسلمين وملكه بنت ملك،وجوزها كان ملك وانتي مهمة البنت دي على الارض.
قولت:
-يعني ايه؟
قال:
-هي دايما جنبك،بس انتي اللي مش حابه تسمعيها.
قولتله:
-طيب واللي بيعمل فيا كده ده مين؟وعايز مني ايه؟
قال:
-ده ملك من الجن المجوسي.
قولت:
-يعني ايه؟
قالي:
-لازم تفهمي اللي هقوله كويس علشان مش هقدر اعرف اي حاجه الا اذا ساعدتيني.
قولتله:
-اساعدك ازاي.
قال:
-هو كان جاي عايز نفس الكتاب،بس وقع في حبك،ودي حاجه كانت بالنسبه ليه ولعشيرته مرفوضه.
قولت:
-يعني ايه؟؟ هو انت بتقول ألغاز ليه،انت عايزني اساعدك ازاي،هو انت كمان عايز الكتاب.
قال:
-لا والله مش عايزك تفكري كده،انا عمري ما هأذيكي.
قولت:
-طيب فهمني.
قال:
-محدش يقدر يسمحلي أتكلم معاه غيرك،انا بس استاذنك اني احضره.
قولتله:
-هو موجود دلوقتي.
قالي:
-واقف فين؟
قولت:
-جنبي.
قال:
-ممكن تخليه يكلمني.
قولت:
-عايز ايه.
قال:
-هو سامحلي.
قولت:
-عايز ايه.
الشيخ مسعد وجهلوا الكلام وقال:
-انت ليه ما اخدتش غرضك ومشيت من نعمه.
رد عليه وقاله:
-انت مين عشان تسأل.
الشيخ قال:
-انا مش عايز حاجه،بس نعمه تعبت،وممكن نساعد بعض.
"ضحك" وقال:
-انت تساعدني انا.
مسعد وقال:
-جرب.
فضل يضحك وقال:
-بص نعمه بتاعتي ،وانت عارف كده كويس، وانت هنا عشان عايز تستغلها،وانا عارف.
مسعد قال:
-لا لا انا بس حابب ابعدكم عن نعمه.
جوزي قال:
-كفايه كده،انا عايز مراتي وامشوا من هنا،كفايه كده.
ضحك وقال:
-سمعت يا مسعد، جوز نعمه مش طايقك،امشي يلا.
في اللحظة بدأت اغيب عن الوعي،واللي كان واقف جنبي صرخ في وش مسعد وقال: -اخرج من هنا.
وفعلاً مسعد مشي،وجوزي كان قاعد جنبي وبيقول:
-متخافيش انا هنا جنبك.
والتاني قاعد جنبي وبيقول:
-متخافيش انا هنا جنبك..ونفخ في وشي ونمت.
قومت تاني يوم وانا كويسه جدا،وبقي عندي رغبه اني اتكلم معاه واعرف كل حاجه،وعايز مني ايه.
بس جوزي اخد اجازه من شغله وقعد معايا،من بعد ما شاف كل اللي حصل قدامه.
كنت خايفه يتكلم تاني قدام جوزي،علشان جوزي ما يخافش مني،بس جوزي كان مصمم يعرف الشيخ مسعد يقصد ايه.
وراح للشيخ مسعد وسأله.
الشيخ قاله:
-مراتك عندها قدره على حاجات تفوق الخيال.
جوزي قال:
-ازاي ممكن تفهمني.
قاله:
-هعرفك،بس لازم تعمل اللي هقولك عليه.
رد جوزي وقال:
-ماشي افهم بس الاول.
كل ده كان بيحصل وانا شايفه وسامعه كل حاجه بين جوزي ومسعد،وانا قاعده مكاني في البيت.
مسعد قال:
-في واحده ضايع منها فلوس،ومراتك هي وفي بيتها تقدر تجيبهم،ولو عرفنا الفلوس فين،هيكون لينا حلاوه كويسه في الموضوع ده.
وبعدها جوزي مشي وراجع البيت،وقبل ما يوصل شوفت قدامي اخت جوزي واخوه قاعدين بيتكلموا عليه.
أخو جوزي بيقول:
-كل ده كذب نعمه بتمثل،هي مش عيانه ولا ممسوسه.
انا بكيت من الزعل،وكنت اول مره ادعي على حد وقولت:
-يا رب وريله اي حاجه من اللي انا بشوفها.
بعدها بفترة كان فيه مناسبه عند ناس قرايب أهل جوزي،روحنا كلنا نعمل الواجب،واخو جوزي رفض أنه يروح،وكان في البيت لوحده،وفجأه واحنا عند الناس رن تليفون جوزي،طلع اخوه اللي بيرن فتح جوزي، مسمعش غير كلمت ألحقني وبعدها مفيش رد.
جرينا كلنا على البيت،ولما وصلنا لقينا اخو جوزي مرمي على الارض مش بيتكلم،جوزي سنده ودخله على السرير،وهو مش بيعمل حاجه غير انه باصص عليا ودموعه نازله.
جوزي قاله:
-مالك حصل ايه.
قال:
-انا كنت في الشقه وسمعت رجلين بتجري على السلم،طلعت ملقيتش حد،دخلت تاني،
وبعد شويه سمعت صوت تاني،طلعت في ايدي شومه وطلعت لحد السطح،وبرضوا ملقيتش حد.
نزلت تحت دخلت البيت لقيت قدامي قط كبير القط واقف على رجله اللي ورا،وفضل يكبر يكبر لحد ما بيقي تقريباً في حجم البني آدم،معرفتش اسمي الله ولا اعمل اي حاجه، وفجأه القط اتكلم وقال:
-نزل البتاعه اللي في ايدك دي،وافتح الباب.
وفعلاً نزلتها ورحت فتحت الباب،القط نزل رجله وصغر تاني ورجع في لحجمه الطبيعي، وخرج من البيت.
وسيبناه وخرجنا علشان يرتاح،بقي ملازم السرير،مش بيتحرك.
جوزي كان بيفكر في كلام الشيخ مسعد، وبعد يومين الشيخ كلم جوزي وقاله:
-انا عايز اقابل نعمه.
جوزي قالي وانا رفضت.
الشيخ جي ومعاه واحده ست وقال:
-معلش اسمعيني الأول بس.
قولت:
-وانا قولتلك مش عايزه اسمع ولا افهم حاجه،بعد اذنك امشي.
الست اللي معاه قالت:
-بالله عليكي،ابوس ايدك بيتي هيتخرب.
الشيخ مسعد قال:
-الست دي أتسرق من شقتها فلوس كتير قوي.
رديت عليه وقولتله:
-عارفه،200ألف.
قالت:
-اللهم صلي على النبي،ايوه صح ياستنا، وجوزي شاكك فيا وفي اخويا،وانا وأخويا والله ما اخدناش حاجه.
قولتلها:
-عارفه ان مش انتي ومش واخوكي.
قالت:
-طيب مين.
رد الشيخ مسعد وقال:
-استني لو الست نعمه قالت مين،ايه حلاوتها.
قولت:
-حلاوه ايه.
جوزي قال:
-عادي حقك.
قولت:
-فين جوزك.
قالت:
-في البيت.
قولت:
-الفلوس انا هاجيبها،بس لازم اجي بيتكم.
وروحت انا وجوزي والشيخ مسعد معاها،ولما وصلنا جوزها موجود.
قولت:
-الفلوس موجوده هنا في الشقه.
جوزها قال:
-ازاي يعني،احنا قلبنا البيت.
قولت:
-وانا بقولك الفلوس موجوده هنا في الشقه.
وفعلاً الفلوس ظهرت.
اللي موجودين فضلوا يقولوا الله أكبر الله أكبر.
الراجل قال:
-ازاي؟ومين خباها؟
فكرت وقولت:
-الجن هو اللي عمل مشكله.
"بس دي ما كانتش الحقيقه"
الراجل كان مصمم يعرف مين اللي خبا الفلوس.
أنا قولت الجن رغم أني عارفه ومتأكده مين، وكان حد من الناس اللي قدامي.
أخدت المكافأة،وقسمتها مع مسعد ومشينا.
جوزي كان مبسوط جداً،ومش مصدق اللي حصل.
الشيخ مسعد قال:
-بعد اذنك يا نعمه،لو في اي حاجه ممكن تساعديني فيها.
جوزي رد وقال:
-ماشي..وأنا ساكته،وكنت متضايقه جداً،علشان ما قولتش الحقيقه،كنت عارفه اني هشوف الست دي مره تاني.
جوزي قال:
-ايه رأيك الفلوس دي تشتري بيها دهب.
انا رفضت وقولت:
-لا مش عايزه حاجه،خليهم معاك.
بعد كام يوم الشيخ مسعد اتصل بجوزي وقاله:
-عايز أقابل الست نعمه ضروري.
جوزي قاله:
-خير فيه حاجه.
الشيخ مسعد قاله:
-انت في البيت.
جوزي قاله:
-لا انا في الشغل وهرجع على الساعة 5.
قاله:
- تمام بعد اذنك انا هاجي ومعايا ناس.
جوزي قاله اصبر شويه هكلم نعمه الاول.
رن عليا وقالي:
-الشيخ مسعد جاي ومعاه ناس ايه رأيك.
قولت:
-اللي تشوفه.
قال:
-تمام بس انا هقوله على الساعة 7 تمام.
وفعلاً جي الشيخ مسعد،وكان معاه ناس كتير اوي،انا خفت من منظر الناس.
قولت:
-لا لو سمحتوا كل الناس دي تمشي،انا مش عايزه غير صاحب المشكله بس هو اللي يكون موجود.
الناس اعترضوا،وانا قولت للشيخ مسعد انا مش حابه حد يعرف عني حاجه وكلكم اخرجوا بره.
أتكلم راجل ومعاه مراته وقالوا:
-بالله عليكي انجدينا.
قولتلهم:
-اهدوا بس وانا عارفه انتوا عايزين ايه، وهقدر اعمل ده باذن الله.
الراجل قال:
-انتي عارفه.
قولت:
-اه،واطمن بنتك هترجع،بس الناس دي كلهم لازم يمشوا، وانا هختار واحده منهم تستني معاكم.
الراجل قال:
-معلش انزلوا احنا عايزين الست تساعدنا مش نضايقها،والست عرفت احنا جايين ليه وقالت انها هتساعدنا بس انزلوا بهدوء.
كان في واحده ست واقفه معاهم قولت:
-دي تستنى معاكم،والباقي كله ينزل..وقعدت مع الناس.
الشيخ مسعد قال:
-الست نعمه ربنا فتحها عليها،وان شاء الله هتساعدكم.
قولت للست هي بنتك اختفت من يومين صح.
قالت:
-صح.
قولت:
-طيب هي موجوده في مكان قريب مش بعيد.
الست قالت:
-الحمد لله،بس ابوس ايدك طمنيني بنتي كويسه.
قولتلها:
-اه الحمد لله زي الفل كويسه.
الست اللى طلبت منها تستني معاهم قالت: -طيب ممكن نعرف هي مشيت مع مين، قصدي يعني هي مخطوفه ولا مشيت مع حد بمزاجها،انا بس بطمن.
رديت عليها وقولتلها:
-البنت مخطوفه.
ابو البنت قال:
-طيب قوليلي مكانها،واللي تؤمري بيه هيتنفذ.
قولت:
-البنت موجوده في مكان قريب من بيتكم.
ووصفت المكان والشقه اللي البنت فيها وقولت:
-انا مش هقدر اعمل حاجه اكتر من كده،انزلوا ولما تطمنوا عليها نتكلم.
كان الشيخ مسعد نازل معاهم قولتله استنى.
كان عايز يجري مع الناس علشان يشوف ايه اللي هيحصل،وطبعاً يضمن الفلوس اللي هياخدها،بس انا قولت لجوزي والشيخ مسعد انا مش عايز المهزله دي تاني ووجهت الكلام لمسعد وقولت:
-انت عايز تكسب من ورايا،ومش هامك البيت ولا عيالي ولا الجيران،انا مش عايز اشوفك تاني.
جوزي قال:
-اهدي بس بالراحه،الراجل مكنش قصده.
مسعد قال:
-انا اسف،حقك عليا يا ست الكل،مش هتتكرر تاني.
جوزي قاله:
-بصراحه هي عندها حق.
قال:
-معلش مش هتتكرر والله تاني....يتبع
