رواية عذاب الارواح الفصل الرابع 4 بقلم هنا عادل
عذاب الارواح
الجزء الرابع
خرجت رئيسة من عند نجاح ووقفت على باب بيتها فى الشارع
كانت مش عارفة تاخد نفسها
وقررت انها تقف لحد ما تهدا شوية
بس لاحظت انها واقفة حافية فى الشارع
فضلت بنفس الوضع خمس دقايق
بتفكر فى اللى شافته وفى نفس الوقت
هى محتاجة حاجة تساعدها فى اللى عايزة توصله
بقيت مش عارفة ترجع تدخل تانى
ولا ترجع على بيتها
وتحاول تفكر فى طريقة تانية
لكن قطع تفكيرها
باب بيت نجاح اللى اتفتح
بصيت رئيسة وراها فكرتها بنت نجاح بتفتح علشان تجيبلها الشبشب بتاعها
لكن مفيش حد كان واقف ولا ظهر حد
وهى عنيها مركزة جوة البيت
مستنية تشوف حد ارج من ورا الباب علشان تتأكد انه مستحيل يكون اتفتح لواحده
لكن فى اللحظة دى وعلى بعد كام متر من الباب
(البيوت بتاعتهم بتكون واسعة)
واقفة نجاح ثابتة فى مكانها
وبتشاور بايديها لرئيسة علشان تدخل
وبرغم ان رئيسة اعصابها بترتعش
لكن دخلت وعنيها مع نجاح
وكأنها مغيبة
مشيت من عند الباب اللى اتقفل بمجرد ما دخلت البيت
لحد ما وقفت بالظبط قصاد نجاح
دخلت نجاح المكان اللى كانت قاعدة فيه
ووراها بالظبط رئيسة
واتصدمت مرة تالتة لما شافت نجاح قاعدة فى مكانها
برغم ان المفروض انها واقفة قدامها
الكلام وقف على لسانها
ومبرقة وفاتحة عنيها على اخرها
نجاح بصوت مزعج.دخلتى وطلبتى المساعدة
وانا طلبتهولك وسمحلى اساعدك
اوعى اوعى ترفضى رضاه
رئيسة مبرقة وساكتة
نجاح بنفس الصوت بتتكلم وهى قاعدة وعنيها كلها بيضا
والكائن اللى كان سبب فى دخول رئيسة مرة تانية للبيت كان لسه واقف قصادها بس ضهره ليها
مختفاش
وفى نفس الوقت محصلش من وجوده اى حاجة غريبة
نجاح.شايفة الورقة دى
(اللى كتبت فيها الطلاسم)
هتحطيها فى عصير ولما تتأكدى ان كل اللون اللى فيها نزل فى العصير
تشربيه للى عليها العين والنية
واللى انتى عايزاه هيتم
رئيسة ساكتة
نجاح بتمد ايديها بالورقة الملعونة لرئيسة اللى واقفة بعيد عنها شوية وخايفة تقرب منها
نجاح بصوت عالى.قربى خدى من ايدي
اختفى الكيان من قدام رئيسة اللى ابتديت تمشى برعب ناحية نجاح
وقفت قصادها بالظبط
ومديت ايديها اللى بترتعش
واخدت الورقة
فى اللحظة دى نجاح عنيها رجعت لطبيعتها
واتكلمت بصوتها الطبيعى.شوفى يا رئيسة
حاجتك دى هتنقضى
بس مردودة منك
ولو انتى مش مطلوبة
مكانش وافق انه يساعدك
اعملى اللى قالهولك
ولما تيجى تطلب منك اللى قالتلك عليه لاء
اوعى تردى عليها غير لما تجيلى هنا تانى
رئيسة لسانها معقود هزيت راسها بالقبول
نجاح مديت ايديها لرئيسة علشان تبوسها
وطبعا بطاعة عمياء باست ايد نجاح
اللى شاورتلها بايديها انها تمشى
طلعت رئيسة من بيت نجاح
على بيتها علطول
كانت فريال صاحية هى والعيال وياسر
وعبدالله
عبدالله.كنتى فى ياختى على الصبح كده
رئيسة.كنت عند واحدة جنبنا هنا
قصداني فى حاجة
فريال.حاجة ايه ياختى دى اللى على وش الصبح
رئيسة وهى باين عليها الارهاق.جوزها راجع من السفر
وكانت عايزانى اصبغلها
وارسملها ايديها ورجليها
فريال.كنتى قولتيلى وروحتلها مكانك
بدل ما تتعبى نفسك وانتى بطنك على اخرها كده
رئيسة وهى رايحة على اوضتها.م انتى كنتى نايمة وهى استعجلتنى بقى
اتحرجت اقولها لاء
ياسر بيعتبر رئيسة امه
لأن امه ماتت وهو صغير اوى
ولأن رئيسة اخته الكبيرة وتعتبر هى اللى مربياه
كان بيقولها يا يمة
ياسر.تعالى افطري يمة
رئيسة.لاء اكلت عندها
هدخل بس افرد ضهرى شوية علشان تعبت
واطلعلكم تانى
عبدالله.طيب انا هتوكل على الله بقى
ياسر.وانا كمان عندى شغلانة كده هخلصها وارجع على العصرية
فريال.خلاص ياختى ادخلى انتى ارتاحى
انا هروق البيت
واشوف طلبات العيال
واطلع اشوف اكل عيشى
رئيسة.طيب
ربنا يرزقكم
دخلت اوضتها
وقفلت الباب
وقلعت الملحفة (ملاية لف)
وقعدت على سريرها
وهى ماسكة الورقة فى ايديها
وبصوت مسموع ابتديت تكلم نفسها
جرى ايه يا رئيسة
انتى جيتى تكحليها عمتيها ولا ايه
دى الولية اتحولت لعفريت قدام عيني
ااااخ ياركبى
ده انا ركبى بتخبط فى بعضها من الفجعة
بس اعمل ايه
دى قالتلى لازم انفذ
ينتقم منك يا طرابلسي ومن عينك الزايغة
خليت الشيطان لعب بدماغى
حطيت رئيسة الورقة تحت مخدتها وفردت ضهرها على السرير
ولأنها منامتش من امبارح
عنيها راحت فى النوم
وفى حلمها شافت نجاح
وهى بتقولها الليلة نفذى
الليلة يا رئيسة
وفجأة شافت قدامها عروسة صغيرة من عرايس الاطفال
وعنيها بتنزل دم وبتضحك بشكل مرعب
فتحت رئيسة عنيها وهى خايفة
بس الغريب ان برغم انها لسه معملتش اى حاجة غير انها راحت لنجاح
الا انها مش قادرة تذكر اسم الله
قامت على سريرها
وفضلت مفتحة عنيها فى السقف
قطع تركيزها فى السقف دخول جوزها
رئيسة بتبص لجوزها وهى لسه نايمة على السرير.جيت بدرى يعنى
طرابلسى.بدرى ايه
دى الساعه 6
المغرب فات
رئيسة بأستغراب.المغرب
ده انا كنت لسه داخلة اريح مفيش نص ساعة
والعيال كانت بتفطر
طرابلسي.فريال قالتلى كنتى تعبانة ودخلتى ترتاحى
اكلتنى انا والعيال
دخلت تصحيكي
بس انتى رايحة فى النوم
قولتلها تسيبك طالما تعبانة
وبعدين انتى ايه وداكى تصبغي وترسمي
انا مش قولتلك بعد ما تولدى
رئيسة مستغربة هى مش حاسة انها نامت كل ده.ياخويا قولت اهو اى قرش يدخل يساعد
احنا حملنا تقيل
وبعدين انا مطولتش يعنى
الست متعبتنيش
طرابلسى.ربنا يعينك على دماغك
انتى حرة بقى
انا قولتلك علشان اهلك ميفكروش انى بشغلك
عرفيهم ان انتى عملتى ده بكيفك
رئيسة.خلاص بقى ياخويا هما مالهم
واحنا حد بيطلع من جيبه ويأكلنا
ولا انا بقول لحد منهم ساعدونا بحاجة
وبعدين خلاص ساعة زمن وراحت لحالها
طرابلسى.طيب انا طالع للشباب بقى
رئيسة.طيب اما اقوم بقى اطلع اشوف العيال
انا طول اليوم كده سايباهم لواحدهم
طرابلسى.لاء لواحدهم ايه
دى فريال مخلياهم زى الفل
والبيت برة شمعة من النضافة
رئيسة اتغاظت من كلام جوزها عن فريال
مديت ايديها تحت المخدة
وقامت من على السرير
وهى بتضحك ضحكة خبيثة.اه يا خويا وانت بتحب الشمع اوى
طرابلسي بيضحك.هو فيه احلى من الشمع
احب انا علطول الحاجة اللى ملعلطة دى
البيت بقى
الحريم
اى حاجة تزغلل العين كده
رئيسة.ياخوفى انا من زغللة عنيك
مش عارفة هتودينا لفين
طرابلسى.هتوديكي فين يعنى
بعمل اللى بعمله
مش اخر الليل
بتلاقينى على سريرك انتى
بلاش بقى تعملى زى الحريم اللى مخها تعبان
وتحب النكد
وبعدين شدى حيلك بقى ولا انتى هتفضلى حامل العمر كله
رئيسة واقفة جنب جوزها.ياخويا واحنا يعنى الحمل ولا غيره بيقصر معانا فى ايه
يلا اطلع ابص على الشمعه
طلعت رئيسة من الاوضة
وجوزها بيغير هدومه
فريال كانت مش محجبة
سمرا بس جسمها حلو
وملامحها مقبولة
وعلطول مهتمة جدا بنفسها
ومبتحبش تحس انها تقيلة على حد وعلشان كانت مكسوفة انها طولت عند رئيسة
كانت طول ماهى مش بتطلع تشوف شغلها
تفضل تطلع اى حاجة فى البيت تعملها
تعمل اكل
تنضف البيت حتى لو نضيف
تغسل
وكان الغسيل على الايد
تحمى العيال الصغيرة وتغيرلهم
المهم تفضل طول اليوم زى النحلة فى البيت
رئيسة.تسلم ايديكى يافريال
ايه ياختى
مش بتتعبى
طول اليوم بتلفى كده حوالين نفسك زى النحلة
اقعدى ياختى ارتاحى شوية
الدنيا نضيفة اهى
فريال بتضحك.اهو بسلي نفسي
انتى عارفانى مبحبش اقعد فاضية
بتقل
رئيسة.طيب اقعدى بقى انا هقوم اعملينا حاجة نشربها تروق اعصابنا كده
فريال.طيب خليكي اقوم انا اعمل
رئيسة.بس بقى ارتاحى انتى بدل ما اعيال يحسوا بينا يطلعوا يوجعوا دماغنا خلينا نقعد شوية على رواقة
نكمل كلامنا
فريال.ياستار
مبقاش يقلقنى غير كلامنا ده
رئيسة.اقعدى بس اعمل العصير واجيلك
فريال دخلت فعلا الاوضة اللى بيقعدوا فيها
ولعت بخور
لأنهم علطول بيحبوا ريحة البيت بخور
وقعدت فردت رجليها
وهى حاسة بتعب اليوم كله
بتخدم بيت كبير بكل اللى فيه
يعتبر لواحدها
رئيسة فى المطبخ
حطيت الورقة اللى معاها فى كوباية فيها شوية مياه
والمياه اتحول لونها كله للون الكتابة اللى كانت فى الورقة
طلعت رئيسة الورقة من الكوباية واستغربت لما لقيت كل اللون اللى كان فيها اختفى
بس مسكت كوباية المياه حطيتها فى كوباية اكبر وحطيت عليها عصير فراولة
علشان اللون ميبانش
وعملت لنفسها كوباية اصغر شوية علشان متتلغبطش فى الكوبايات
خرجت رئيسة وهى ماسكة الكوبايتين فى ايديها
دخلت الاوضة لفريال
وعطيتلها الكوباية الكبيرة
فريال.ايه ده لاء ادينى انا الكوباية الصغيرة
رئيسة.ياختى الاتنين اد بعض
علشان بس كوبايتك طويلة فكرتيها هى الكبيرة
اشربى اشربى بلي ريقك
فريال.طيب اقوم اعملك حاجة تاكليها انتى مأكلتيش من الصبح
رئيسة.لا نشرب العصير ولما يرجع عبدالله ابقى اكل معاه بقى
اشربى بس
فعلا فريال بتشرب العصير بتاعها ورئيسة بتشرب ومتابعاها
فريال.طلعت ياختى النهاردة قوت اسعى
نزلت فى سعر البضاعة قولت اخلص منهم
مش عارفة ليه المرة دى الشغل تقيل
غيبت على العيال
وتقلت عليكم
رئيسة.عيب يابت ماتقوليش كده
ده بيت اختك
وبعدين البضاعة كده كده مش هتخسر
هتتباع متقلقيش
انتى بس اللى غاوية وجع قلب
ما قولتلك الحل فى ايديكي
اتجوزى الواد
واهو حتى يزق معاكي فى مصاريفك
فريال.هتدبر
اتجوز وبلاش جنان بقى
عايزانى اتجوز عيل اصغر من اصغر بنت فى عيالى
لا ياشيخة
طيب يعنى حتى لو فكرت اعمل كده
وده مش هيحصل
يبقى راجل من سني
ولا اكبر مني
لكن اخد عيل اعجزه معايا ليه
وبعد كده مقدرش الومه لو راح اتجوز بنت من سنه
لا ياختى
انا كده كويسة
رئيسة بتشرب العصير بتاعها وعنيها مع كوباية فريال اللى قربت تخلص
خلصت كوبايتها مرة واحدة وضحكت على كلام فريال.خليكي كده لواحدك
هتحسى بكلامى ده لما عيالك يتجوزوا
وتلاقى نفسك مبقتيش قادرة على الشغل
وقاعدة فى بيتك براسك مش لاقية اللى ييجى يقولك اكلتى ولا شربتى يمة
فريال خلصت العصير كله وبصيت لرئيسة.انتى يعنى فاكرة ان انا مبسوطة بحالى
بس يا رئيسة انا اتعودت على الوحدة خلاص
واخدت على الشقا من زمان
وحتى لو لسه معجزتش بس العيال عجزونى
اتكسف انا اروح اقولهم هتجوز ولا عايزة اتجوز
هبقى بقول لابنى اسرق علشان تأكلنى انا واخواتك لأنى تعبت من الشغل والشقا وبدور على راجل يصرف عليا
وهو مش هيرضى ابدا بأنى ادخل راجل عليا ولا على بيت اخواته البنات
مش هيقبلها
يبقى اللى هيعمله ساعتها ايه غير انه يا يسرق ولا يبيع مخدرات علشان يكفينا
خلينى كده ياختى راضية بحالى وساكتة
رئيسة اخدت الكوبايات وبتقوم وهى بتبص لفريال.ياختى محدش عارف بكرة مخبى ايه
سابتها وراحت على المطبخ وقفت على الحوض
وبتحط ايديها على قلبها.ياخوفى من اللى جاى
انا مش عايزة اذية بس عايزاها تتجوز
علشان بيتى ميتخربش
انا مطلبتش ليها حاجة غير الحلال
يعنى معملتش حاجة غلط
قطع النور وظهر قدامها خيال نجاح اللى كان واقف بيشاورلها علشان تدخل
اتصدمت رئيسة وقلبها اتنفض
خاصة انها شافت الخيال فى عز الضلمة
خيال نجاح بصوت واطى مخيف.يارئيسة فريال تبات الليلة لواحدها مش مع العيال
ومحدش يدخل عليها
قبل طلوع النهار
رئيسة بصوت خايف وبنبرة بترتجف.انا مش عايزة اذى
انا مش عايزة اضرها
خيال نجاح ضحك ضحكة مخيفة.اتأخرتى
اسمعى الكلام ونفذيه
وبعد ما يتم المراد
هزورك تانى
اختفى الخيال
ورجع النور
وواقفة رئيسة مرعوبة
ومش عارفة لا تخرج من المطبخ ولا حتى عارفة هى ممكن تتصرف ازاى
لحد ما شيطانها ابتدا يقنعها بأن اللى بتعمله صح
وبتبرر لنفسها اللى هتعمله.هى عايزة تتجوز بس بتغالط نفسها
وانا هخليها تتجوز فى الحلال
يعنى مش همشيها فى الحرام
انا مش عارفة هو ايه الغلط اللى تاعبنى اوى كده
وانا كنت رايحة اطلب انها تموت يعنى
لاء ماهو انا احبك اه لكن اكتر من نفسي لاء
لو حبك يا فريال يابت عمي هييجى على خراب بيتى
يبقى لاء
مصلحتى ومصلحة عيالى الاهم
طلعت رئيسة من المطبخ
وكان شيطان اتمكن منها
حاسة بكره وغل ناحية فريال غريب
وكأن مش هى ابدا اللى كانت لسه بتأنب نفسها من شوية
طلعت لقيت عيالها متجمعين وعبدالله وصل
وياسر قاعد معاه وفريال
ياسر.ايه يمة اللى موقفك فى المطبخ
فريال.والله هى اللى عايزة انا اتحايلت عليها تقعد بس مرضيتش
رئيسة.انا معملتش حاجة
كنت هحضر الاكل بس حسيت نفسى دايخة
قومى يافريال معلش بقى حضرى انتى الاكل
فعلا قامت فريال علطول دخلت على المطبخ
عبدالله.مالك ياختى مكشرة كده ليه
وبعدين كسفتيها
رئيسة بتعوج شفايفها.وهو في ايه يخلينى اضحك يعنى
وبعدين كسفتها فى ايه
انا على اخرى
وبعدين يا تقوموا انتم تأكلوا نفسكم
يا هى تخدمكم بقى انا تعبت ومش حمل خدمة
استغرب عبدالله من طريقة اخته هو مش متعود عليها تتكلم كده
بس اتحرج انها كلمته بالطريقة دى قدام عيالها واخوه
حنان بنت رئيسة الكبيرة.والله يمة انا بقول لخالتى اساعدك هى مش بترضى
فريال كانت خارجة من المطبخ
وسمعت رئيسة اللى ردت رد صادم.يلا اهى بتعمل بنومتها
عيطت فريال اول ما سمعت الكلمتين دول
وكل اللى قاعدين اتحرجوا من الكلمة
فى نفس الوقت وصل طرابلسى ولسه داخل من الباب
شاف فريال اللى واقفة تعيط وهى ماسكة اطباق الاكل فى ايديها
وكلهم وشهم متغير
طرابلسى.ايه مالكم فى ايه
حطيت فريال الاطباق على الارض
ودخلت تجيب اللى فى المطبخ
حنان.امى قالت لخالتى هى هنا بتخدم بنومتها
رئيسة انفعلت على بنتها وحدفتها بالطبق اللى محطوط قدامها على الارض
طرابلسى بصوت عالى.انتى اتجنيتى يا ولية ولا ايه
انتى مبتحترميش حد ليه
مش عاملة اعتبار لكبيرك
اعملى اعتبار لصاحب البيت اللى انتى عايشة فيه
البيت ده مفتوح اى وقت ولأى حد مش علشانك علشان الناس دى على دماغى
واللى عملتيه مع البت ده ميحصلش مرة تانية
طلعى جنانك على حد غيرنا
احنا مش ناقصينك
عبدالله.استهدا بالله انت بس وتعالى اقعد
هى تلاقيها تعبانة من الحمل
احنا نستحمل بعض
العملية فى بيتها يعنى محصلش حاجة
انا هنادى فريال دلوقتى وهطيب خاطرها
طرابلسي بزعيق.لا وانت تطيب خاطرها ليه
هو انت غلطت فيها ولا هينتها
اللى غلطت اختك
واللى تراضيها اختك
فريال طالعة من المطبخ ومعاها اطباق تانية على صنية مدورة كبيرة
طرابلسى.حقك على دماغى يا فريال
ده بيتك
اوعى تزعلى نفسك
عبدالله.لا ياعم تزعل ايه
فريال ورئيسة اخوات
وعمر الزعل ما دخل بينهم
فريال بتمسح دموعها.مفيش حاجة حصلت
احنا واحد
وبعدين م انا قاعدة فاضية على الاقل اهو بسلي نفسي
طرابلسى.تتسلى وبمزاجك
انتى مش مجبورة تخدمي حد
اللى تقوم تشوف شغل البيت هى اللى بتتكلم على انها صاحبته
لكن انتم هنا على راسنا
ضيوف فى بلدنا
احنا اللى نخدمكم
فريال.البنى ادم تقيل يا خويا
وانا طولت صحيح
بيتى وعيالى اولى بيا
طرابلسى.عليا الطلاق بالتلاتة م انتى ماشية غير لما شغلك يخلص
ويمين طلاق تانى ماتنامى فى بيت فى البلد دى غير البيت اللى انتى فيه دلوقتى ده
عدد الاوقات الباب مفتوحلك
رئيسة اتغاظت وحسيت انه كله غلطها قررت تنفذ اللى فى مطلوب منها
رئيسة قامت من على الارض قربت على فريال
وباست راسها.حقك عليا يا فريال
معلش ياختى
انا بس بالى مش رايق
مش عارفة بقول ايه وبعيد ايه
ماتزعليش مني
فريال.لا يارئيسة ازعل منك ايه انتى اختى
وعندك حق
انا عارفة ان الحمل تاعبك
عذرك معاكي
طرابلسى.طيب اقعدى كلى معانا بقى
فريال.لاء والله انا شبعانة
اكلت وشربت عصير
والف حمد
عبدالله.لا يبقى انتى لسه زعلانة
فريال.عيب يا عبدالله
حد يزعل من اخواته
وانا ليه غير ربنا وانتم
بس انا والله شبعانة لما اجوع هقوم اكل
رئيسة.طيب بقولك ايه
ادخلى نامى فى اوضتى ارتاحى شوية
فريال.لا ياختى اوضتك ايه
ربنا ما يغير عليكي ابدا
سريرك مينامش عليه غيرك
رئيسة.لو بصحيح مش زعلانة ادخلى ريحي شوية فى اوضتى
احنا كده كده سهرانين
ناميلك حبة
واصحى اسهرى معانا
طرابلسى.ادخلي يا فريال ما تتكسفيش
ارتاحيلك حبة
احنا قاعدين اهو محدش هيدخل ينام دلوقتى
فريال بكسوف راحت على اوضة رئيسة ودخلت قفلت عليها الباب
وفردت جسمها على السرير
وعيطت حسيت ان نفسها مكسورة بعد كلمة رئيسة
ومن العياط راحت فى النوم
هى مش عارفة نامت اد ايه
بس الصدمة اللى فتحت عنيها عليها كانت اكبر من انها تستوعبها
خاصة لما لقيت طرابلسى نايم جنبها على السرير وهما الاتنين تقريبا من غير هدوم
