رواية عذاب الارواح الفصل الخامس 5 بقلم هنا عادل
عذاب الارواح
الجزء الخامس
فريال بتبص جنبها على السرير وهى مش عارفة اللى شايفاه ده حقيقى ولا لاء
ولا اطلع من الاوضة
ولا اعمل ايه
بس قطع تفكيرها طرابلسى اللى فتح عنيه وهو بيبصلها ويبتسم
طرابلسى.صباحية مباركة
فريال سمعت الكلمة بقيت دموعها نازلة زى الشلال وبتلطم على خدها
طرابلسى قام قعد على السرير
وبيحاول يحضنها
بعدته عنها بسرعة وهى بتزقه
طرابلسى.انتى بتعيطى ليه هو مش انتى اللى طلبتى
فريال بقيت تلطم زيادة وخايفة حد يدخل خاصة بعد ما هو قالها انها هى اللى طلبته
فريال بصوت واطى وعياط.طلبتك ايه
ده انا هفضحك
انت عارف عيال عمي هيعملوا فيك ايه
عارف مراتك لو عرفت ايه اللى هيحصل
منك لله
طرابلسي.وهما هيعملولى انا ليه
انتى اللى غوتينى
وانتى اللى جيتى سحبتينى من جنب مراتى
انا جيت معاكى فكرت فيه حاجة
لقيتك انتى اللى عايزة ده يحصل
اقولك لاء يعنى
انتى مش خايفة على نفسك ولا اهلك
انا راجل
والشيطان شاطر
ويلا بينا دلوقتى اطلع انا وانتى ونقولهم اللى حصل
وشوفى مين اللى هيتغلط
ومين اللى هيتفضح
بنت عمك مش هتخرب بيتها
ولا هترمي عيالها وترجع تقعد جنبك فى بلدكم
وولاد عمك مش علشان واحدة رخيصة زيك
مش هيقبلوا ان بيت اختهم يتخرب هما مش عارفين يصرفوا على نفسهم علشان ياخدوها يصرفوا عليها
لا بعيالها ولا لواحدها
شوفى اللى يعجبك
عايزة نطلع سوا نواجههم يلا بينا
بس قوليلهم بقى ساعتها ان انتى رفضتى تتجوزى علشان حاطانى انا فى بالك
فريال حرفيا منهارة اللى هتحصل فضيحة
وبرغم ان اهلها عارفينها كويس
لكن كلام طرابلسى طبيعي
كده كده رئيسة عارفة ان جوزها خاين وعنيه زايغة
وساكتة وقابلة علشان متخربش على نفسها
يبقى اكيد حتى لو صدقت ان فريال معملتش كده
برضه مش هتلوم جوزها
وعبدالله وياسر عمرهم ما هيفكروا انه طرابلسى عمل كده غصب عنها من غير ما تصوت من غير ما تفضحه من غير ماتلم الدنيا كلها عليه
لكن هى مش مستوعبة امتى وازاى عملت اللى هو بيتكلم عليه ده
قام طرابلسي من جنبها على السرير
وهو بيضحك ضحكة رخيصة
لبس هدومه وخرج من الاوضة قدام عنيها
وهى عنيها عليه
وعلى هدوء اعصابه
وعلى اللى هى وصلتله
قامت فريال من على السرير
وهى بتحاول تدور على هدومها اللى واقعه على الارض وتدور على السرير
لبست الهدوم وهى بتعيط
وراحت ناحية باب الاوضة فتحته بالراحة علشان محدش يحس بيها ويشوفها وهى فى الحالة دى
كان كله نايم والبيت فى منتهى الهدوء
خرجت من البيت كله وطلعت تمشي فى الشارع
وطرابلسي ورئيسة فى اوضة البنات نايمين معاهم
وياسر وعبدالله فى اوضة الصبيان
فريال قعدت فى الشارع على جنب
بتعيط وبتلوم نفسها.رئيسة لو عرفت هتقول ايه
هتفكر انى عملت كده علشان اخرب بيتها بعد الكلمتين اللى قالتهم
خدني يارب
يارب بعد السنين دى اجيب الفضيحة لنفسى ولعيالى ولأهلى
اعمل الحرام وانا اللى كنت رافضة الحلال
ازاى بس ازاى انا عملت كده
يارب انا مش حاسة ولا عارفة امتى ده حصل
طيب اروح اخد حاجتى وامشى
دى الفلوس اللى معايا متكملش تمن رجوعى اسكندرية
وفلوس الشغل اللى جيت بيه لسه ملمتش منها حاجة
اتصرف ازاى بس
اعمل ايه فى المصيبة اللى انا فيها دى
كل ده بتكلم نفسها وهى قاعدة فى الشارع بليل
محدش حاسس بيها ولا حد عارف عنها حاجة
قامت فريال من على الرصيف اللى قاعدة عليه
ومسحت دموعها وكانت راجعة على البيت
شافها رمضان اللى بيتمنى يتجوزها
رمضان.ايه ده يا ست فريال خارجة ليه دلوقتى كده
فريال بتحاول ميبانش عليها حاجة.لا ياخويا مفيش حاجة
بس اتخنقت كده نفسي طبق عليا
قولت اطلع امشى شوية
رمضان.ليه بس كفى الله الشر
تروحى ع المستشفى
فريال.لالا ولا مستشفى ولا حاجة
انا بس عيالى وحشونى
وطولت فى القاعدة هنا
وده اللى حسسنى بالخنقة
رمضان.هى الست رئيسة قالتلك على طلبى يا ست فريال
فريال بكسرة نفس.معلش يا رمضان
انا ياخويا لازم اروح على البيت وقفتنا دى متصحش دلوقتى
لو حد شافنا هيقول ايه
بالاذن ياخويا
رمضان.اذنك معاكى
فكرى ياست فريال
وطلباتك كلها مجابة
تصبحى على خير
فريال سابته ومشيت
وهى بتعيط من تانى
ورجعت تكلم نفسها.طيب هو انا لو وافقت اتجوز رمضان
ياترى طرابلسي مش هيقوله اللى حصل
طيب ولو عمل كده
مش رمضان هيفضحنى ساعتها ولا على رأى رئيسة ساعتها بقى يفكر انى سهلة
ويتربصلى
يافضيحتك يافريال
جيبتى لأهلك العار
هتعيشي الباقى من عمرك مفضوحة ومكسور عينك
تستاهل الذل اللى هتعيشي فيه
رجعت على البيت ودخلت وهى بتتسحب علشان محدش يحس بيها
لقيت رئيسة طالعة من المطبخ
رئيسة اتخضت.يوه فريال
انتى كنتى فين دلوقتى
ايه اللى طلعك فى وقت زى ده
فى ايه
فريال لما سمعت كلام رئيسة اتأكدت ان جوزها مقالهاش حاجة.
لا ياختى انا بس كنت مخنوقة شوية
طلعت اشم شوية هوا
العيال وحشونى
رئيسة بخبث.لاء شكلك زعلانة مني
ياختى انتى عارفانى مدب فى الكلام ولسانى اعمى
انا بس شايلة الهم شويتين
الولادة قربت
والفلوس مقصرة على يدك
والشغل واقف على الكل
غير العيال وطلباتهم
غير الراجل ومصروفه اللى لواحده يفتح بيت بس هقوله ايه يعنى يا فريال
متقعدش مع اصحابك
ولا تصرف فلوس وانت معاهم
ولا هيسمعنى ولا هيرد عليا
مش بعيد يرجعنى معاكم على بلدى
واقعد امد ايدي هناك للى رايح واللى جاى
واسيب عيالى لمين
حقك عليا ياختى اوعى تزعلي مني
فريال بدموع قربت على رئيسة ومسكت راسها وبتبوسها.انتى اللي حقك عليا يا رئيسة
محقوقالك ياختى
رئيسة استغربت من تصرف فريال.بتعيطى ليه يابت
فى ايه مالك
وحق ايه
انا اللى زعلتك
فريال بتطبطب على كتف رئيسة.زعل ياريت كل الزعل زعلك انتى ياختى
ادخلى نامي على سريرك يارئيسة
رئيسة.لاء ادخلى انتى نامى علشان طرابلسي نايم جوة عند البنات مش هصحيه بقى
فريال سمعت اسم طرابلسى حسيت بنغزة فى قلبها.لالا انا خلاص مش عايزة انام صحيت
وخليه نايم
انا هدخل المطبخ اغسل مواعين الغدا
رئيسة.خلاص ياختى اللى يريحك
انا هدخل احاول اقلقه يدخل ينام فى الاوضة علشان تيجي تكملى نومك
الراجل حط دماغه راح فى سابع نومة
فريال.لالا خليه نايم
انا والله النوم راح خلاص من عيني
سابتها رئيسة ودخلت اوضة البنات
بس اتفاجئت ان طرابلسى صاحي
رئيسة.ايه ده صحيت يعني
طرابلسي.قلقت انتى عارفة انا مبحبش اغير مكان نومتي
مش برتاح
رئيسة.حقك عليا انا معرفش انك هتنام بدرى
هى كده كده صحيت روح نام فى الاوضة انت
علشان حتى هى تعرف تكمل نومها
قام طرابلسي من غير ما يرد ودخل اوضته كمل نومه ولا كأن فيه حاجة
فريال فى المطبخ.انا لازم اسمع كلام رئيسة
لازم اتجوز
ابقى فى ذمة راجل
علشان ميفكرش ان اللى حصل ده ممكن يحصل مرة تانية
بس ياسر يا فريال
ياسر ايه العيل الصغير ده اللى انا هتجوزه
يعنى بعد العمر ده كله اتجوز عيل صغير
الناس تقول ايه بس؟؟
بس يعنى الناس هتقول لو اتجوزتى عيل صغير
اومال لو عرفوا انك زانية مع جوز بنت عمك اللى هى اختك
اللى شايلينك فى بيتهم هيقولوا ايه
لاء انا اتجوز الولا ياسر
حتى لو لحد ما اسافر وارجع لعيالى
يبقى يطلقنى ويادار ما دخلك شر
واشوف اى شغلانة فى بلدى حتى لو همسح سلالم
بس لحد م امشى من هنا
لازم ابعد عن طرابلسي وابعد اللى حصل ده عن باله مرة تانية
دخلت رئيسة المطبخ مرة واحدة على فريال لقيتها واقفة بتكلم نفسها
رئيسة.انتى بتكلمى نفسك يافريال
مش بقولك انتى فيكي حاجة
مالك احكيلى
بتكلمى نفسك ليه
فريال.انا راضية اتجوز يا رئيسة
رئيسة فتحت عنيها وبوئها على اخرهم
وقلبها دق بسرعة
ده حتى النهار لسه مطلعش
معقول نجاح سرها باتع كده
فريال.مالك ساكتة ليه
رئيسة.هتتجوزى ياسر يافريال
فريال بكسرة نفس.اه هتجوز ياسر
اهو ضل راجل
انا عارفة هبقى بظلمه
بس هو هيبقى احسن من الغريب
مش هيروح يفضحنى عند عيالى
واهو يخلي اى حد حاططنى فى باله
يطلعنى بقى
ويعرفوا انى اتجوزت
رئيسة.عجيبة يعنى
غيرتى رأيك ليه
ده انتى كنتى حديد وبعيد ابدا م اتجوز
نمتى وصحيتى راضية يعنى
فريال خايفة رئيسة تحس بحاجة.والله ياختى ولا راضية حتى
بس وانا بتمشى شوية
لقيت رمضان فى وشى
وفاتحنى فى الموضوع اللى كلمك فيه
انا اتهربت من الرد على كلامه
بس شكله هيفضل حاططنى فى دماغه
قولت كلامك مظبوط
ابقى مسؤولة من راجل احسن علشان كل واحد يخلى لسانه فى بوئه
رئيسة.عين العقل ياختى
ده الكلام المظبوط
فريال.بس قوليلى بقى
ياسر هيرضى بحاجة زى دى
ده انا فى سن امه
يعنى عجوزة اوى عليه
وده لسه مدخلش دنيا يا رئيسة
رئيسة.مالكيش دعوة انتى بياسر
انا هعرف اخليه يرضى
وهو اللى يعوز كمان
اوعى بس انتى تلمحيله بأى حاجة
ولا تحسسى حد بحاجة
وانا هتصرف
فريال.ربنا يسترعرضك يا رئيسة وعرض بناتك
رئيسة مستغربة من فريال اللى اتحولت 360 درجة
لكن مش مهم
المهم بالنسبالها
انها هتتجوز
واكيد ساعتها جوزها هيشيلها من دماغه
علشان هتبقى فى عصمة راجل
رئيسة.طيب ياعروسة روحى بقى ياختى انتى ارتاحى وكملى نومك
الراجل دخل نام على سريره
دخلت لقيته صاحي
اصله مبيعرفش يغير فرشته
فريال.انا صحيت خلاص مش جايلى نوم
رئيسة.لالا انتى بس روحى ارتاحى فى الاوضة والصباح رباح
تنامى بقى تفضلى قاعدة
بس ادخلى ريحي جتتك
وانا الصبح هروح كده لحد السوق اجيب شوية حاجات ولما اجى نبقى نقعد على رواقة انا و الواد ياسر
واجس نبضه
فريال.ماشى ياختى
انا صاحية لو عوزتى حاجة نادي عليا
وبلاش انتى تطلعى السوق ابقى اروح انا
رئيسة.لالا انا مش هجيب حاجات كتير
بس اهو اطلع امشي رجلى خلى الولادة تبقى سهلة
فريال.خلاص على راحتك ياختى
سابتها فريال ومشيت وراحت على اوضة البنات
ودماغها رايحة جاية فى انها مش مقتنعة باللى هيحصل ده
بس شافت ان ده حل مؤقت لحد ما تمشى من البلد دى
وفى نفس الوقت
هى مش عارفة هتكفى عن الذنب اللى عملته ده ازاى
ولا فاكرة ايه اللى حصل بينها وبين طرابلسى اصلا
بس بالوضع اللى كانوا بيه سوا فى السرير
وكلامه بالثقة دى
يأكدلها ان اكيد حصل بينهم حاجة
فضلت فى الفرشة بتاعتها دماغها هتنفجر من كتر التفكير
فى نفس الوقت اللى دخلت رئيسة اوضتها وقعدت على السرير جنب جوزها اللى رايح فى سابع نومة
وهى عمالة تضحك
مستنية النهار يطلع علشان تروح تبوس ايد ورجل نجاح
اللى فى اقل من يوم كانت محققالها مرادها
حسيت رئيسة ان الوقت مش بيمشى
قررت تريح شوية
علشان الساعة تعدي بسرعة
لكن برضه هى مش عارفة تنام
فات وقت وهى نايمة على جنبها وباصة ناحية الباب سرحانة وبتضحك
لحد ما حسيت بجوزها قايم من على السرير
بصيت وراها لقيت طرابلسى قاعد وعاطيلها ضهره
رئيسة.ياصباح النور على البنور
طرابلسى وعنيه مقفلة من النوم.يسعد صباحك
ايه مصحيكي بدرى كده
رئيسة.لا انا من ساعة ما صحيت فى اوضة البنات منمتش تانى
قولت اخلينى صاحية لحد ما افطرك قبل ما تطلع
طرابلسى.لالا نامى انتى انا هفطر اما اروح على الشغل
رئيسة بتتمنى انه يخرج فى غمضة عين
هتتجنن وتروح لنجاح
رئيسة وهى بتضحك.طيب ولا حتى كوباية شاى
طرابلسى.ربنا يروق بالك
شكلك صاحية رايقة النهاردة
لالا انا مش عايز حاجة دلوقتى
لما اوصل الشغل
حتى اكون فوقت
انا منمتش كويس الليلة دة
رئيسة.على راحتك يا سيد الرجالة
راح طرابلسى على الحمام
وقامت هى من على السرير
حضرتله هدومه اللى هيخرج بيها
حتى الجزمة بتاعته جابتهاله
طلع من الحمام مستغرب اللى هى بتعمله
بس معلقش
غير هدومه
وبصلها بأستغراب.يلا انا طالع بقى عايزين حاجة اجيبها وانا راجع
رئيسة.عايزين سلامتك
انا هطلع على السوق اجيب شوية حاجات
هتاكل من ايدي النهاردة
طرابلسى بيضحك.انتى بتصالحى بنت عمك ولا ايه
ولا كلامى جالك على الجرح
رئيسة.كلام ايه ياخويا
طرابلسى.لما قولت ان انتى اللى ملزومة تخدمينى
رئيسة.لا يا سيد الرجالة
لا جرح ولا غيره
ولا حتى مصالحة
انا عايزة النهاردة اعمل الاكل
وحشتنى واقفة المطبخ
وانا بسبب عمايل فريال فى البيت
بقيت تقيلة ومش بتحرك
خلينى اخف نفسي
علشان الولاده متتعبنيش كمان
طرابلسي بيضحك.ااااه عارف انا كهن الحريم ده
ماشى انتى ولا هى المهم اجى اتغدى
يلا انا طالع
سلام عليكم
رئيسة.عليكم السلام ياتاج راسى
خرج طرابلسى من البيت
ومعداش خمس دقايق الا وكانت طالعه رئيسة وراه على بيت نجاح
خبطت الباب وهى بتبص حواليها علشان محدش ياخد باله منها
فتحت البنت بنت نجاح الباب
ودخلت رئيسة على المكان اللى قاعدة فيه نجاح
رئيسة دخلت جرى توطى على ايد نجاح تبوسها
ونجاح مبتسمة بخبث
رئيسة.ياست الناس يا ام سر باتع
ليلة يا واصلة ياصاحبة الكرامات
ليلة تخليها ترضى وتطلب بلسانها
عملتى ايه يا ستنا
نجاح.هى اللى طلبت منك
رئيسة.اه ياستنا
طلبت وعنيها فى الارض
وكأنها مكسور عنيها
مش عارفة ليه مذلولة كده
دى لسه امبارح عمالة تقاوحنى
وتقولى ابدا ابدا
لقيتها بعد نص الليل راجعة من برة
وحالتها حالة
وقالتلى انها راضية بالواد ياسر اخويا الصغير
بقيت مش عارفة ازرغط ولا اعمل ايه
كان هاين عليا لما سمعت منها كده
اجى ابوس ايديكى ورجليكي فى ساعتها
نجاح.ماهو سيدك مش بيلعب يا بت
ده واصل وقادر
احنا عملنا اللى انتى طلبتيه
لسه دورك
رئيسة.انتى تؤمرى ياست الكل
انا تحت رجليكي
بس اموت واعرف ايه اللى خلاها ترضى
نجاح.عايزة تعرفى
رئيسة.ده انا هموت واعرف
نجاح.نامت مع جوزك طرابلسي
وخافت من الفضيحة
رئيسة من الصدمة صوتت
نجاح بمنتهى الهدوء.دورك بقى فى التنفيذ يا رئيسة
المطلوب منك واجب التنفيذ
