رواية عذاب الارواح الفصل الثالث 3 بقلم هنا عادل
عذاب الارواح
الفصل الثالث
عبدالله.انتى قصدك مين
فريال اتعصبت جدا.لاء ده انتى اتهبلتى
ياولية ياناقصة عايزانى اتجوز عيل اصغر من ابنى
عبدالله.انا هقوم اطلع علشان الواحد صوته ميعلاش والناس تسمع بينا
اعقلى ياختى عيب اللى بتقوليه ده
لاحول ولاقوة الا بالله
خرج عبدالله وسابهم
رئيسة شايفة فريال وشها بقى احمر من الغيظ
ومتعصبة جدا
رئيسة.جرى ايه يافريال ياختى مالك
هى قرصتك حية ولا ايه
اد ابنك ولا اصغر ولا اكبر
مش اسمه راجل
ويقدر يتجوز
والواد لسه ولا لف ولا دار وانتى هتشكليه على كيفك
واهو يرجعك للذى مضى
فريال بتحاول تخلى صوتها ميعلاش علشان الناس متسمعش.هو انتى ياختى بتتكلمى جد
انتى باين عليكي بتهزرى
صح
ماهى مصيبة سودة لو كلامك ده جد
ياولية انتى
انتى عارفة ياسر ده مولود على ايدي
كان ابنى حلو كده وبيمشى وبيتكلم
وامك كانت حامل فيه
انتى ازاى تنطقي بكلام زى ده حتى لو هزار
رئيسة.بقولك ايه يا فريال ياختى
بصى
انتى العين بقيت عليكي
وفيه رجالة حطاكى فى دماغها
ولو يطولوا يحطوا بدل الجنية الف وعشرة علشان بس ترضى
مش هيتأخروا
بس اه انا مقدرش ازن عليكي تتجوزى راجل من اهل البلد هنا
علشان مفيش حد مضمون
معرفش بقى هيفضل علطول راضى تروحى وتيجى على عيالك ولا لاء
هيرضى انك تصرفى عليهم من ماله ولا لاء
طيب لو مرضاش
هيفضل يخليكي تشتغلى
ولا برضه هيمانع
ولو ممكن يقولك من الاول اه وماله ويفرشلك البحر طحينة
بعد ما يطولك
يمكن يغير كل كلامه
وساعتها لا هنعرف نحيل ولا ندير معاه
وبرضه اخاف ياختى حد يتربصلك
برضه احنا فى بلد بعيده عن اهلنا
وزى ما كل مكان فيه الكويس والوحش
برضه الرجالة اللى هنا فيهم الكويس والخسيس
يابت انا خايفة عليكي
فريال.خلاص ياختى انا مش هاجى عليكي هنا تانى لو انا عملالك مشاكل
رئيسة طبعا ده ميريحهاش
علشان فكرة وجودها فى البلد نفسها يقلقها ان طرابلسي يوصلها
رئيسة.هو انا بقولك كده علشان تقوليلى مش هاجى عليكي
ياختى لاء
ماهو انتى ممكن تأجرى حوش ليكي ولا تنزلى شرك مع حد فى حوش وهتضيعي مكسبك فى الايجار
غير ان برضه البلد صغيرة ياختى وكله عارف بعضه
وانتى دلالة يا فريال يعنى الناس هنا عارفاكى
ولو حد عايزك هيعرف يوصلك لما تكونى هنا
حرام ياختى حد يأذيكي واللى ميعرفش يطولك بالحلال
يلف وراكى ويطولك فى الحرام
ولو مش برضاكى هيكون غصب عنك
واحنا هنا فى بلدهم
يعنى مالكيش دية
طيب وليه ياختى
لما تبقى على ذمة راجل
يخلى اى حد حاطك فى دماغه يصرف نظر بقى
والواد ياسر حلو وصغير لسه بخيره
وبعدين ولا هيروح يقول لأسامة ولا هيمنعك من الشغل
ولا هيعملك مشاكل
بالعكس ده هيمنع عنك المشاكل
واهو تدلعي شوية ياختى
وحتى لو حصل ده لو حصل انه نزل معاكى اسكندرية ولا اسامة شافه
اول هام اسامة ميفتكرهوش لأن ياسر كان مش كتير بيروح البلد
ياسر عايش فى سيدى بشر وانتى علطول فى بحرى بعيالك
وبعدين اسامة علاقته مش جامدة اوى بأهلك يعنى
يمكن الوحيد اللى بيشوفه كتير عبدالله علشان هو علطول بينزل بحرى
تانى هام بقى ان ياسر اسمه مش على اسم ابوكى
لأن ياسر مش شقيقنا
اه من نفس الام
لكن ابوه مش عمك
اه ابن عمك بحكم ان ابوكى اللى رباه
واتولد على ايدينا
وابوه مات وهى حامل فيه
يعنى مشافهوش
ف الولا مالهوش اب غير عمك
ولا اخوات غيرنا
لكن اسمه فى شهادة الميلاد اسم ابوه مش اسم عمك
فاهمة قصدى
تالت هام بقى الواد لسه لا جرب ولا لف وانتى اللى هتعلميه وتودكيه بقى
اد ابن اد ابوكى
راجل وهينفعك
وبعدين بيشتغل وكسيب
وعايق فى نفسه
اسمعى مني بس
ومش هتندمي
وياختى لو الموضوع معجبكيش
احنا فى قلب بعضينا وكلمة الطلاق مفيش اسهل منها
ولا حد شاف ولا حد دري
من اسكندرية
واحنا هنا الناس تبقى عرفت انك على ذمة راجل
فريال.شوفى يا رئيسة اللى قولتيه ده كله
ولا يدخل ذمتى بقرش ابيض
انا ياختى لا بتاعت جواز ولا بتاعت عيال
رئيسة.خلاص انا هسكت خالص
بس انتى بقى وراحتك
اللى قولتهولك ده نصيحة من اختك
حطيه حلقة فى ودنك
وعايزة تعملى بيه اعملى مش عايزة على راحتك
فريال.ايوة اللهى يسترك قفلى على الحوار ده خالص
واوعى يا رئيسة تجيبى سيرة قدام الواد ياسر بالكلام ده
الواد بيحترمني ياختى
متخليش بصته ليا تتغير
رئيسة عوجت شفايفها وبتتمصمص مش عاجبها رأى فريال
وطبعا مش مرتاحة
فريال قعدت ساكتة وسرحت
فى حالها بقى
فى كلام رئيسة
فى الفكرة نفسها بتاعت الجواز
الله اعلم بس هى سرحت مع نفسها ومنطقتش بحرف تانى الليلة دى لحد م نامت
خرج رمضان واصحاب طرابلسى من البيت
متأخر
طرابلسى بصوت عالى.رئيسة
يا رئيسة
الجماعة خرجوا
لو عايزين تطلعوا تقعدوا برة
فريال مسمعتش
لكن رئيسة خرجت علطول
سحبت جوزها من ايديه ودخلت على اوضتهم
وابتديت تدلع عليه
وبرغم انها حامل وعيالها مش صغيرين
لكن هى كانت عارفة ان جوزها علطول بيكون محتاج للست
وهى مش بتقصر ابدا فى الموضوع ده معاه
علشان مش عايزة تسيب اى فرصة انه يفكر فى غيرها
بس برضه للاسف هو عينه زاغت بقى
اللى ابتديت تركز فيه رئيسة
ان جوزها وهو معاها بقى يغمض عنيه طول الوقت
وكأنه مش عايز يشوفها
كان الموضوع ده مولعها نار
لكن مش عايزة تتكلم
مقتنعة انها لو اتكلمت هتكبر القصة فى دماغه
وبرغم ان النقص والعيب فى جوزها
الا انها عايزة تحمل نقصه لبنت عمها
فاتت الليلة
نامت فريال مع بنات رئيسة كالعادة
وعبدالله وياسر مع الصبيان اللى منهم اللى فى سن ياسر واكبر كمان
ورئيسة وجوزها فى اوضتهم
نام جوزها لكن هى صاحية
مش لاقية حل
مش عارفة تنام
لحد النهار ما طلع
اول ما رئيسة حسيت ان جوزها بيفوق
عملت نفسها نايمة
علشان تشوف هيتصرف ازاى
قام من سريره
دخل على اوضة البنات على اساس يأمن عليهم
وخرج دخل على الحمام
استحمى وغير هدومه وخرج
رئيسة قامت وراه علطول
ومن غير ما تدخل تاخد دش بعد الليلة بتاعت امبارح
طلعت على واحدة تعرفها كويس
جارة قديمة
وست كبيرة فى السن
بس مش من الستات اللى الناس تحب تعرفها
كانت معدية الخمسين سنة
بس صحتها عفية وشخصيتها قوية
وناس كتير بتخاف منها
ومحدش بيحب يزعلها
مش علشان هى لها حكم على حد
لاء خالص
بس للاسف كانت لها فى السحر
والاعمال
والدجل
ومن الناس اللى كانت بتعمل الاعمال من غير تفكير فى اى حاجة
ولا حلال ولا حرام
ولا نجاسة ولا طهارة
مش مهم عندها اى حاجة غير الفلوس
حتى رئيسة من الناس اللى بتخاف منها
وبتقلق انها تيجي على سكتها
بس مكدبش اللى قال
الضرورات تبيح المحظورات
وعلشان كده رئيسة قومت خوفها
ونسيت ربنا
وقررت تلجأ للشيطان
ودى بداية تغيير كل حاجة
رئيسة خبطت على باب بيت نجاح
او الست نجاح زى ما بيقولولها
فتحت بنتها رويدا الباب
رئيسة.الست نجاح صاحية يا رويدا
رويدا.استنى يا خالتى اشوفهالك
دخلت رويدا لأمها وقالتلها ان جارتهم رئيسة على الباب
نجاح.روحى يابت دخليها
دخلت رئيسة البيت
ونجاح قاعدة على مرتبة على الارض
(قاعدة عربي فى كل البيوت هناك)
رئيسة وعنيها محلقة اسود من السهر قربت من نجاح ووطيت قدامها تبوس ايديها
يسعد صباحك ياستنا
نجاح بتتكلم ليبى طبعا بس برضه بتعرف تتكلم مصرى كويس اوى
هى مش دجالة فى بلدهم بس
ده فيه ناس بتطلبها وتخليها تسافرلهم مخصوص
نجاح.ايه يارئيسة اللى حدفك على باب بيتى
مش هقولك خير
ماهو اللى بيجيلى مبيبقاش جاى فى خير ابدا
رئيسة.انا فى مصيبة يا ست نجاح
وبيتى هيولع نار لو ملحقتهاش
عايزة اتصرف ومش لاقية حل
وقولت انتى اللى هتقدرى تساعدينى
نجاح.طيب ما ترمي بياضك الاول
داخلة عليا بأيديكى فاضية يعنى
رئيسة.حقك عليا
انتى تؤمرينى امر
اللى تطلبيه تحت رجلك اوجدهولك
نجاح.قولى اللى عندك الاول
وخلى الطلبات لبعدين
انتى اول مرة تقصدينى
فى خدمة
والجار اولى ياختى
قولي
جوزك ماله
رئيسة تنحت لنجاح
نجاح بتضحك بصوت عالى.ياختى انطقى
ماهو بتقولى بيتك هيولع
يبقى ايه اللى يولع بيتك غير لو جوزك شافله شوفة
م انتى مش هتجيلى علشان اعمل عمل لحد فى عيالك يعنى
يلا ادخلى فى المهم
رئيسة.بصى ياست نجاح
جوزى عينه زاغت على بت عمي
هى محترمة
وست مبترفعش عنيها فى راجل لا قريب ولا غريب
بس انا خايفة ان الموضوع يكبر فى دماغ جوزى ويكرهنى بسببها
وفى نفس الوقت مش هقدر اروح اقولها جوزى عينه منك
ولا متجيش بيتى
وهى عشمانة فى ربنا وفيا
عرضت عليها تتجوز الليبى رفضاه
واللى من بلدها برضه رفضاه
ده انا عرضت عليها اخويا الصغير اللى اصغر من عيالها
قولت ازغلل عنيها بيه
بس برضه ابدا
خوفتها
وغاويتها
وهى ابدا ما عايزة تدخل راجل عليها ابدا
وخايفة من جوزى
ياستنا ده بقى يقفل عنيه وهو معايا بقيت احس انه بيشوفها فى خياله بدل ما يشوفنى
انا عارفة جوزى كويس
وعارفة خصاله
لكن لما بتكون واحدة غريبة
بقول بياخد كيفه ويرجعلى
لكن دى بنت عمي
مش غريبة
وانا مش عارفة اتحمل
بصاته ليها
وهى كل شغلها على الخط دى دلالة
نجاح طلعت ورق اصفر قديم من تحت المرتبة اللى قاعده عليها
ومعاها قلم احمر الوان
ابتديت تكتب كلام من الشمال لليمين
من غير ما ترد على رئيسة بنص كلمة
كتبت كلام كتير وفى نص الورقة رسمت دايرة وقسمتها لأربعه
وابتديت فى كل ربع تكتب رموز مش مفهومة برضه
وبعد ما الدايرة اتملت رموز
نزلت على باقى الورقة وكملت كتابه
وطبقت الورقة على شكل مثلث
وبصيت لرئيسة بنظرة خليت رئيسة قامت تجرى من قدام نجاح من الرعب
لدرجة انها خرجت من بيت نجاح وهى حافية
وصوت ضحكة نجاح بصوتها الغليظ اللى مش على طبيعته بيرن فى ودن رئيسة
نجاح عنيها قلبت والنينى اختفى وظهرت عنيها بيضا بشكل يخوف
وبتضحك وكأن راجل صوته تخين جدا هو اللى بيضحك
