رواية عذاب الارواح الفصل السابع عشر17 بقلم هنا عادل
عذاب الارواح
الجزء السابع عشر
فريال بخوف.تحذير يعنى ايه ياحنان
مش عايز حد يدخل البيت ويحاول انه يخرجه منه
او يتخلص من استحواذه على جسم امي
معتز.طيب يعنى المفروض نعمل ايه دلوقتى
وايه اللى ممكن يحصل لو معملناش حساب للتحذيرات دى
حنان.احنا لو قبلنا اننا مناخدش اى خطوة نخلص بيها من وجوده فى البيت
ساعتها هنبقى كلنا تحت سيطرة الشيطان
واللى حصل مع امى ممكن يحصل معانا كلنا
او اللى حصل مع الشيخ عبد الصمد يتكرر مع اى حد تانى يحاول انه يعمل نفس اللى كان بيعمله
وفى نفس الوقت لو اخدنا الخطوة وابتدينا نحاول نتخلص من وجوده
هيقاومنا بكل قوته
اكيد ربنا هيساعدنا
بس ده ميمنعش انه ممكن يكون فيه خسارة فى روح اى حد مننا
ياسر.وبعدين بقى
الواحد بقى مش عارف هو هيعمل ايه ولا ميعملش ايه
واللى مرمية جوة على السرير دى ايه مصيرها
والشيخ اللى مدفون تحت ده هنعمل فيه ايه
حنان.هنستنى نشوف خالى عبدالله ومفتاح هيعملوا ايه
واكيد الناس اللى ممكن تيجي تساعدنا فى حاجة زى دى
يكونوا فاهمين اكتر مننا
فريال.استرها معانا يارب
خبط الباب راح معتز يفتح
كان عبدالله ومفتاح راجعين ومعاهم امام الجامع شيخ ازهرى
وبيتعامل كتير فى جلسات طرد الارواح
وعنده خبرة كبيرة فى الموضوع ده
عبدالله.احم احم
بصوت عالى
فريال حطيت طرحة على شعره وحنان كمان
دخل الشيخ صادق.السلام عليكم ورحمة الله
كلهم ردوا عليه السلام
عبدالله.الشيخ صادق يا معتز حكيناله كل اللى حصل
وافق علطول انه ييجى معانا اول ما سمع اللى قولناه
الشيخ.ان شاء الله ربنا يقدرنا ونقدر نخلص من اى شر موجود فى البيت ده
ياسر.احنا حصل معانا حاجات تانية لما كنا بنتوضا علشان نصلى الفجر
الشيخ.الاصوات ولا الدم
معتز.عرفت منين يا شيخ
الشيخ.دى اساليبهم فى تخويف البنى ادم خاصة لما يحسوا انه بيهدد وجودهم فى المكان
وانتم طبعا بتسعوا انكم تخرجوه من البيت
اللى هو شايف انه من حقه وحق عشيرته
عبدالله.طيب وبعدين ياشيخ
ممكن حد يتأذى لو استمرينا فى محاولاتنا
الشيخ.اه طبعا
ممكن
بس هنحاول ان شاء الله وبأمره اننا نقدر نسيطر عليه
ومنوصلش للخساير
معتز.يارب يا شيخ يااارب
الشيخ.عايز اشوف الحالة
هو انتم متعرفوش هى راحت لمين ساعدها فى عملية الاستحضار والتسخير
فريال وعنيها فى الارض.لاء والله يا شيخ
لا كنا بنعرف هى بتروح فين ولا بترجع منين
الشيخ.طيب ربنا يقدرنا
لو ممكن تخلونى اشوفها بس الاول خلونى ارقى البيت
والمفروض ده يتكرر لمدة اسبوع يعنى مش النهاردة بس
حتى اللى هيحصل مع الست المأذية لازم يتكرر لمدة 3 ايام علشان نضمن انهم خرجوا من البيت بلا راجعة
عبدالله.طيب يا شيخ يتكرر لو تشرفنا هنا الاسبوع كله احنا معندناش اى مانع
بس نفوق من الكابوس اللى احنا فيه ده
الشيخ.طيب خلونا بس الاول نخلص من اول مرحلة وبعدين نشوف ايه اللى ربنا هيكتبهولنا
معتز.اتفضل ياشيخ صادق
ابتدا الشيخ يلف فى كل ركن من اركان البيت ويقراء ايات الرقية
وايات من سورة البقرة
ويرش مياه مرقية فى كل ركن
حتى اوضة الاطفال اللى نايمين دخل اوضتهم بالراحة وابتدا يرش فى الاركان ويقراء بصوت واطى على راس كل طفل من الاطفال اللى نايمة فى منتهى الهدوء
حتى الكبار كمان بداية من عبدالله لحد حنان
رقاهم ورش عليهم من المياه اللى معاه
وبعد ما خلص كل ده
طلب منهم يوصلوه لرئيسة
عبدالله.هى فى الاوضة اللى هناك دى ياشيخ
انت عايز حد يدخل معاك
الشيخ.اه يكون احسن علشان نبقى كلنا موجودين فى نفس المكان
والتحصين يكون على كل الموجودين
كلهم بصوا لبعض
واضطروا انهم يدخلوا معاه
كانت رئيسة لسة نايمة فى السرير
اول ما دخل الشيخ بالراحة
فتحت عنيها بتعب
وبصيت ناحيته وناحية اهلها
رئيسة بتعب.هو فى ايه
انا ايه اللى حصل فيا
وليه مربوطة كده
معتز ومفتاح.امى انتى فوقتى
الحمد لله
حنان.بصوت واطى جنب معتز.بلاش تأمن اوى
ده اكيد بيخدعنا
رئيسة بتبص للشيخ صادق.انت مين
عبدالله واخته صعبانة عليه.ده الشيخ صادق يا ام معتز
جاى يحاول يساعدك
رئيسة.يساعدنى فى ايه
هو ايه اللى حصل
انا مالى
عبدالله.انتى تعبتى لما سمعتى ان طرابلسى اتوفى
مستحملتيش الخبر
وجاتلك حالة عصبية
خليتك مش فى وعيك
وكنا مش قادرين عليكي ولا على تصرفاتك
علشان كده اضطرينا اننا نربطك فى السرير علشان تهدى
الشيخ بيرش حوالين السرير اللى هى نايمة عليه مياه كان قرأء عليها ايات الكرسى اكتر من عشرين مرة
وبيحاول يعمل ده من غير ما هى تاخد بالها
رئيسة.طرابلسى مات
بعد كل اللى حصل ده يموت
طيب واللى انا عملته ده كله
راح على الفاضى
ازاى بس
ليه هو اللى يموت
هو ميستاهلش يموت
طيب عياله مين هيربيهم
كانوا بيبصوا لحزنها اللى بتتصنعه ومتأكدين ان دى رئيسة مش الشيطان
وان التأثر اللى هى فيه والندم واللوم اللى بتلومه لنفسها ده بسبب رجوعها لعقلها
واحساسها بالذنب
مفتاح.شيخ صادق
هى امى رجعت لوعيها
انا شايف انها بتتكلم بطبيعتها
هو وجودك السبب ولا حصل ايه
الشيخ بص لمفتاح وشاورله يسكت هو وكل الموجودين
وبص لرئيسة وهى كمان بصيتله
وعنيها بتفتحها بتعب واجهاد
الشيخ وقف قصاد المرايا وشه لرئيسة وضهره للمرايا
وباقى الموجودين كانوا على جوانب السرير واقفين مستنيين يشوفوا ايه اللى هيحصل
لكن رئيسة نايمة على ضهرها ومتكتفة بمنتهى الاستسلام اللى يقلق
الشيخ وقف وبص فى عين رئيسة وابتدا يردد كلام بصوت مسموع للكل..
بسم الله ذي الشان، عظيم البرهان، شديد السلطان، ما شاء الله كان، أعوذ بالله من الشيطان
أنشدكم بالعهد الذي أخذه عليكم سليمان بن داوود أن لا تؤذونا ولا تظهروا لنا
أُحرِّج عليكم بالله واليوم الآخر أن لا تبدوا لنا ولا تؤذونا، وترحلوا عن هذا البيت
أقسمت عليكم بالله الواحد الأحد، الفرد الصمد، الذي خضع له من في السماوات ومن في الأرض وما بينهما، أن لا تعاندوا وتنصرفوا عن هذا البيت.
أقسمت عليكم بوجه الله العظيم الذي لا شيء أعظم منه، وبكلماته التامات التي لا يُجاوِزُهُنَّ بَرٌّ ولا فاجر، وبأسماء الله الحسنى كلِّها، ما علمنا منها وما لم نعلم، أن تغادروا هذا البيت،ولا تعصوا أمري وترحلوا دون معاندة أو كبر
طبعا كلهم واقفين ساكتين
لكن رئيسة بمجرد ما سمعت الكلام اللى بيقوله الشيخ صادق
ابتديت تتنفض من على السرير
وجسمها اللى مربوط بيحاول يتخلص من الحبال اللى مربوطة بيها
وبيترفع لفوق وبيتهبد تانى على السرير
وكلهم واقفين ساكتين وخايفين
الشيخ صادق بقوة وثبات.اخرج من جسمها
واخرج من البيت
هحرقك ببركة كلام الله
رئيسة ابتديت عنيها تتحول كلها للسواد وتزوم وكأنها بتحاول تتكلم ومش قادرة
وابتديت الحيطان كلها يحصل فيها خبط بصوت عالى وواضح
ويتكتب على كل حاجة نفس الكتابة اللى شافها معتز فى الحمام
لكن بقيت اكتر وبتزيد
على كل الحوائط بتاعت الاوضة
والدم بيسيل مع كل حرف بيتكتب
معتز برعب.الحق يا شيخ ايه اللى بيتكتب ده
الشيخ صادق بيبص على الحيطان.دى طلاسم باللغة اللاتينية
وحروف تدل على اسم الشيطان اللى مسيطر على روح الست
عبدالله بيرتعش من الخوف.طيب يعنى ايه طلاسم ياشيخ
هنعمل ايه
انا خايف اختى تموت
فجأءة ابتدوا يسمعوا اصوات همهمات وتمتمة بأصوات كتير مخيفة
والحيطان كلها بقيت الحروف والطلاسم اللى بالدم
الشيخ بقلق.الجسم ده مستحوذ ليه عليه اكتر من شيطان
اللى بنحاول نخرجه مش روح شريرة واحدة لكن اكتر من روح وكلهم اشرار وخبثا
والاسم اللى مكتوب على الحيط اسم واحد من قادة الجن اللى لهم شأن كبير فى عشيرتهم
وهو المسؤول عن وجود كل الارواح دى فى جسم الست رئيسة
وفى الوقت ده اتهبدت رئيسة جامد على السرير ومالت راسها على جنب من جوانب السرير
وابتديت ترجع
لكن المرعب جدا
كان الترجيع اللى كله حشرات واوراق شجر
الشيخ صادق فاتح عنيه على اخرها.اعوذ بالله من الشيطان الرجيم
اعوذ بكلمات الله التامات من شر ماخلق
لاحول ولا قوة الا بالله
كانت رئيسة مستمرة فى الترجيع
ومستمر الخبط على الحيطان
والطلاسم اللى بتتكتب وصلت للسقف
لدرجة ان الدم بقى بيسيل من السقف على كل الموجودين فى الاوضة
لأول مرة فى حياتهم يشوفوا حاجة زى اللى هما عايشينها دى
كانوا حتى مش قادرين يستحملوا
حنان كانت واقفة ترتعش
وفريال دموعها نازلة وبترتعش وساكتة
عبدالله واقف بيتشاهد وبيذكر الله
ياسر والشباب واقفين متنحين لورق الشجر والحشرات اللى على الارض ونازلة من امهم
كلهم واقفين بيبصوا للمنظر برعب
وابتدوا يمسكوا فى بعض من خوفهم
واول ما خلصت رئيسة الترجيع
والمنظر المقزز اللى كانت فيه
فجأة خرج الصوت المرعب منها
وعنيها السودة وسعت اكتر
واتنفضت من على السرير لدرجة ان الحبال اتفكت
ووقفت على السرير بوضعية حيوان مخيف قصادهم وهى واقفة على ايديها ورجليها
وبتاخد وضع استعداد انها تتحرك
بعد من قصادها الشيخ وهو عمال يكرر فى ايات القرأن من سورة البقرة
وكلهم ماسكين فى بعض ودموعهم ابتديت تنزل
لكن عيون رئيسة المخيفة السودة عنيها متوجهة لمكان واحد
وهو المرايا
اللى اتجهت ناحيتها من غير ما تلمس الارض وكأنها طايرة فى الجو
وهى بتقول بصوت غليظ مخيف
بعلزبووووول
