رواية عذاب الارواح الفصل الثامن عشر18 بقلم هنا عادل
عذاب الارواح
الجزء الثامن عشر
فى وسط ذهولهم كلهم وعنيهم اللى راحت مع رئيسة
مش بس كده دى المرايا حتى محصلش فيها خدش
واقفين يبصوا لبعض
ويبصوا على المرايا
والسرير اللى فاضى
الشيخ بيضرب كف على كف.لاحول ولا قوة الا بالله
لو سمحتم ياجماعة اقفلوا الاوضة دى
وياريت نطلع نقعد نتكلم برة شوية
كان النهار بيطلع والليل اختفى
خرجوا كلهم من الاوضة
وكلهم مصدومين
وتعبانين كمان
يوم كامل عايشين فى احداث صادمة بالنسبالهم وبالنسبة لأى حد يسمع بس عنها
دخلوا المربوعة وقعدوا كلهم
الشيخ بحزن.الموضوع ده صعب اوى ياجماعة
احنا مش بنحارب شيطان واحد
احنا تقريبا بنواجه عشيرة كاملة بقائدهم
اللى هو بعلزبول
وارد ان كل حاجه تهدا
ويبان لينا اننا خلصنا منهم
لكن ممكن ده يكون خدعة منهم
انا عارف انى اللى بقوله ده
مش حاجة ممكن تطمن
وعارف ان الوقت كل ما بيطول كل ما بيكون مش فى صالحنا
وحتى لو خرجتوا من البيت من غير ما نساعد والدتكم ان جسمها يتخلص من الارواح اللى ساكناه
هيفضلوا ملاحقينكم
لأنها حتى متأخذونيش يعنى هتكون ارواحهم اللى متحكمة فيها
وعذاب روحها المحبوسة بسبب وجودهم
مش هتخليها تلجأ غير ليكم انتم
وهتعرف توصل لأماكنكم طول ما هى روحها لسه موجودة فى الدنيا
معتز.انت قصدك ان علشان اللعنة دى متلاحقناش لازم امي تموت
الشيخ بحزن.ده علشان بس تقدروا تخرجوا انتم من هنا
تقدروا تعيشوا فى مكان تانى غير البيت ده
لكن الشياطين دى خلاص وجودها فى البيت ده بقى حق مكتسب ليهم
لحد ما نقدر نسيطر عليهم ونقدر نوصل لمرحلة الطرد
انا حضرت جلسات كتير
لكن الحالة دى من اصعب الحالات اللى واجهتها
عبدالله.طيب نعمل ايه ياشيخ
احنا خلاص غلبنا
الشيخ.انا هخرج من هنا دلوقتى
هروح على كاتدرائية طرابلس
واتكلم معاهم هناك
واكيد هما كمان هيقدروا يتكاتفوا معانا
بس اللى هطلبه منكم دلوقتى
ان انتم تحاولوا تخرجوا الاطفال اللى فى البيت ده لمكان تانى
حنان.طيب والصغيرين
اللى لسه مولودين امبارح
دول كمان ارواحهم مش خالصة ياشيخ
الشيخ.لاء خليهم
بس لحد م ارجع
القرأن ميسكتش صوته من البيت
وكلكم تكونوا على طهارة
ومهما كان اللى ممكن يحصل جوة الاوضة دى
محدش يفتحها ابدا
هاتولى بس حلة كبيرة فيها مياه علشان اقرالكم عليها تانى
وترشوا حوالين المكان اللى هتكونوا قاعدين فيه
يمكن ده يحجم شوية الارواح دى انها تقرب من حد فيكم
لانهم كفار
والقرأن بيبعدهم حتى لو مش هيحرقهم بس على الاقل بيبعدهم عن الشخص اللى بيحصن نفسه
قام ياسر دخل المطبخ وجاب حلة كبيرة مليانه مياه وخرج بيها ليهم مرة تانيه
ابتدا الشيخ قراء على المياه اللى فى الحلة
وابتدا الصوت بتاع الخبط
يرجع مرة تانية جوة الحيط
وصوت جاى من عند باب الاوضة بتاعت رئيسة وكأن فيه حد واقف ورا الباب بيخبط
الشيخ مش موقف قرأة
حنان دخلت تصحي اخواتها بمنتهى الهدوء وطلبت منهم انها هتوديهم عند جارة ليهم علشان فيه ضيوف جايين يزوروهم وعلشان جايين من سفر اكيد هيحتاجوا يناموا يرتاحوا
علشان كده هتبعتهم عند جارة قريبة منهم وعلاقتهم بيها كويسة
فعلا قاموا الاطفال كلهم وعائشة كمان معاهم
وراحوا مع حنان للجارة
عائشة لاحظت وهى خارجة انهم كلهم متجمعين ومعاهم الشيخ اللى كان لسه بيقرأ سورة البقرة على المياه
عائشة.هو فى ايه يا حنان
متجمعين كده وايه الراجل اللى قاعد قصاد حلة المياه ده
حنان.مفيش حاجة
ده ضيف من الضيوف اللى جايين
بس بيعمل كده علشان يرقى البيت ويباركه بمناسبة ولادة اخواتك
عائشة.طيب انا مش مصدقة بس ماشى
حنان.يعنى هكدب عليكي ليه
انا بس اجهز البيت والاكل مع خالتى واجى اقعد معاكم شوية
عائشة.طيب اجى اجهز معاكم
حنان.لاء علشان تبقى جنب اخواتك لو احتاجوا حاجة مش الناس اللى هتخدم عليهم يعنى
ولو قدرتى تنيميهم يبقى احسن
عائشة.خلاص حاضر
ولو تعبتى وعايزانى اجى مكانك وانتى تيجى تقعدى معاهم ماشى
حنان.خلاص اتفقنا
وصلوا عند جارة ساكنة جنبهم اللى فتحت الباب وابتسمت اول ما شافتهم
هى عارفة ان ابوهم اتوفى
غير انها بتحبهم لأنها معندهاش اطفال
حنان.خالتى صباح الخير
معلش لو هنضايقك
بس جايلنا ضيوف علشان اللى حصل انتى عارفة
وجايين من سفر
هيحتاجوا يرتاحوا شوية من الطريق
لو ينفع تخلي اخواتى عندك لحد بس م البيت يروق واجى اخدهم علشان مش هينفع يبقوا موجودين فى الزحمة اللى فى البيت
الجارة بأبتسامة.بس كده دول فى عنيا يا حنان ياحبيبتى
ولو محتاجين مساعدة مني فى حاجة قوليلي
حنان.كتر خيرك ياخالتى انك بس تستحملى وجود اخواتى دى اكبر مساعدة
الجارة بحزن.قلبى معاكم ياحبيبتى ربنا يصبركم ويهون عليكم
ويعين امك على اللى هى فيه وحرقة قلبها
حنان والحزن مرسوم على وشها.يارب ياخالتى
استـأذنك انا ومعلش خليهم محدش يطلع من البيت لحد ما ارجع اخدهم
الجارة ب حب.عنيا يا حبيبتى
رجعت حنان البيت
وكان الشيخ خلص قرأة وابتدا يرش البيت كله مرة تانيه وساب باقى المياه فى الحلة
وخرج من البيت وهو بيأكد عليهم محدش يفتح الباب مهما حصل
خرج من البيت وكلهم قعدوا سوا
محدش قادر يتحرك من مكانه
ولا حد منهم عايز يسيب التانى ويروح يقعد فى اى مكان تانى لواحده
ياسر.انا لحد دلوقتى حاسس اننا بنحلم
هو معقول اللى احنا فيه ده
معتز.حلم ايه يا ياسر
ده كابوس
وكابوس يرعب ويموت فعلا
انا مش متخيل ابدا اننا وصلنا للحالة دى
انتم شوفتوا اللى حصل جوة الاوضة
احنا لو قعدنا نحكي اللى حصل ده لحد عشرين سنة مش هيصدقنا
دى دخلت جوة المرايا طارت فى الهوا
هو ازاى كل ده بيحصل
الواحد كان بيسمع حكاوى قديمة عن العفاريت
بس يعنى ميتصدقش ابدا انها ممكن تحصل بجد
كنت بفكرها علشان يخوفونا بيها بس
مفتاح.امى لازم تموت علشان نقدر نخرج من البيت ده
كلهم بصوا لمفتاح اللى بيقول كده ودموعه على خده
عبدالله.موت ايه بس يا مفتاح يابنى
ازاى جالك قلب تقولها
مفتاح.ياخالى انت سمعت كلام الشيخ
امى هى اللى سمحت ان كل ده يحصل
هى اللى لعنتنا وهى اللى جابتلنا كل المصايب دى لحد ماهتخلص علينا كلنا واحد ورا التانى
انت اكيد مش ناسى ازاى كانت هتقتلنى
لولا انها انتبهت للشيخ عبد الصمد كان زمانى انا اللى مدفون مكانه تحت
عبدالله.بس مش هتهون علينا لدرجة اننا نخلص منها يابنى
احنا شوفنا بعنينا ان اللى بيحصل ده مش من فعل امك
ده من فعل الشياطين اللى عليها
ده مش شيطان واحد بس
دة عشيرة كاملة استحوذت عليها يابنى
الله ينجيها وينجينا من المصيبة دى
مفتاح.ومين اللى سمح بكل ده ياخالى
مش هى اللى سلمت دماغها للشيطان وللدجل
فكرت ازاى تخلى ابويا يبعد عن خالتى
مع انه ولا كان شايفها غير اخته ولا هى شايفاه غير اخوها
اهو ابويا مات
وخالتى اتجوزت ياسر اللى اصغر من بنتها الصغيرة
وحنان اللى اتأذيت ويعالم هنعرف نساعدها هى كمان ولا لاء
والعيلين الصغيرين اللى مالهمش اى ذنب غير ان هى البطن اللى شالتهم
كل ده وتقول مش هتهون علينا
احنا كلنا ياخالى هونا عليها
كلنا اتأذينا بسببها وبسبب سؤ نيتها
لو ارواحنا كلنا قصاد روحها هى بس يا خالى
يبقى تهون
سامحنى
ده مش سهل ابدا عليا انى اقوله
لكن بص لكل واحد مننا واليوم اللى عيشناه واللى شوفناه
وانت ساعتها بنفسك هتقول نفس كلامي
هى مفكرتش بقلبها ولا فكرت فينا
فكرت بس فى نفسها
ياسر.كلامك صح يامفتاح
مش هينفع الومك عليه
بس هى كانت تحت شر شيطانها
وعرف يأثر عليها
كل بنى ادم مننا ممكن كان يبقى مكانها
وكان هو اللى يتأثر عليه بالشكل ده
خلينا نفكر فى اننا نحاول نخلص من الشر ده وفى نفس الوقت نحاول نساعدها انها تعيش
فريال.مش قادرة اسامحها على اللى عملته فيا
ومش عارفة ادعيلها
ولا حتى هقدر ادعي عليها
ربنا يرحمنا برحمته
حنان.انا اللى زيي كتير اوي يا مفتاح
ان جنية تعشق راجل او جني يعشق ست
ده بيتكرر
انا اللى فيه اهون بكتير من اللى حصل مع امى
اه مش سهل
وهيأثر على كل حاجة جاية فى حياتى
لكن مش هيقتل حد او انا هحاول اعمل اللى يخلى ده ميحصلش
ده مجرد عشق او حب
واللى بيحب حد مش بيأذيه الا لو اتأذى الاول
وانا هحاول معملش ده
واكيد مسيرنا نلاقى حل
لكن لازم نخلص امى من اللى هى فيه
لان كلنا طول ما هى حالتها كده
محدش فينا هيقدر يتوقع ايه اللى ممكن تعمله
معتز.واضح من اللى احنا شوفناه ده ياحنان اننا مش هنعرف نساعد امك ترجع لطبيعتها
حتى لو خلصناها من اللى هى فيه ده
مستحيل بعد اللى جسمها وعقلها عاشوا فيه
ترجع تانى لطبيعتها
فجأة سمعوا صوت عواء جاى من الاوضة
سكتوا كلهم وبصوا لبعض
ورجعوا بصوا للاوضة
فريال.سامعين الصوت ده
عبدالله بخوف.هى رجعت تانى
ياسر.طيب خلونا نعلي صوت القرأن
راح ياسر ناحية الراديو وابتدا يعلي الصوت
ورجع تانى قعد جنبهم
بس اتفاجئوا كلهم ان صوت القرأن ابتدا يشوش
وكأنه شريط كان بيسف فى كاسيت
مع ان الراديو هو اللى شغال
وصوت العواء بيزيد
واشتغل صوت الخبط والرموز بتظهر مرة تانية
فى نفس الوقت ده خبط باب البيت
كلهم بقوا بيبصوا لبعض وخايفين يكون خدعة زى الشيخ ما قال
مش قادر حد منهم ياخد الخطوة ويجرب يقوم يفتح الباب
مع زيادة الخبط على الباب
كان اصوات الخبط فى الحيطان والرموز والعواء بيزيدوا
وكان اللى بيخبط هو الشيخ صادق
اللى حس ان فيه حاجة بتحصل جوة وعلشان كده خايفين يفتحوا
ابتدا ينادى عليهم بأسمائهم لكن هما خايفين
ولأنه عارف انه هو بنفسه قالهم ممكن الشيطان يخدعكم
ابتدا يقرا قرأن من على الباب
وابتدا كمان القسيس اللى معاه يقرأ ايات من الانجيل
عبدالله.ده الشيخ صادق وصل
فريال.لا يا عبدالله بلاش تفتح
احسن يكون خدعة
ياسر.لاء ده صوت الشيخ صادق
وبعدين هو قال ان الشيطان كافر يعنى اكيد مش هيقرأ قرأن
قام عبدالله بخوف وراح ناحية الباب وهو متوتر
فتح الباب بالراحة وقلقان فعلا انها تكون خدعة
لكن شاف قدامه الشيخ صادق ومعاه قسيس
عبدالله ارتاح.الحقنا ياشيخ صادق
دخل بسرعة الشيخ والقسيس
وسمعوا الاصوات
اول القسيس ما شاف اللى بيحصل وسمع الاصوات
ابتدا يرش من المياه المقدسة اللى بتكون معاه فى البيت
وكل ما بيعمل كده
الاصوات بتزيد
وفجأة راح الشيخ مع القسيس قصاد باب الاوضة والباقى كلهم واقفين جنبهم مستنيين يشوفوا ايه اللى هيحصل
وقفوا جنب بعض
وابتدا الشيخ يمسك مصحف جايبه معاه ويقرأ بصوت عالى
والقسيس كمان طلع الانجيل وماسك الصليب فى ايديه وبيصلب بيه فى اتجاه باب الاوضة وبيقرا من الانجيل
وكلهم ساكتين
لكن اصوات القرأة عالية جدا وبتزيد
والخبط كل ما بيزيد والعواء كان اصوات القرأة تعلى اكتر وتزيد
استمر الوضع ده اكتر من نص ساعة
حتى صادق وشنودة ابتدوا يحسوا بأرهاق لكن مستمرين
فجأة عبدالله شاور على الحيط.بصوا
الكتابة بتختفى
بتتمسح
كلهم بصوا على الحيطان
وشنودة وصادق وهما بيرددوا اللى بيقروه بصوا على الحيط وشافوا الكلام وهو بيتمسح
بقوا يعلوا صوتهم اكتر
اخيرا فيه نتيجة
صوت العواء والخبط ابتدا يقل بالتدريج
صوت الخبط اللى فى الحيط كمان ابتدا يختفى
وفجأة كله سكت
كل الرموز اختفت من على الحيطان
اللون الاحمر بتاع الدم مبقاش له اى اثر فى البيت
صوت العواء سكت خالص
وصوت الخبط اختفى تماما
بقوا يبصوا لبعض متوقعين ان هتحصل اى حاجة تانية تصدمهم زى اول محاولة مع صادق
لكن الصمت ده استمر عشر دقايق وهما واقفين مترقبين اللى ممكن يحصل
لكن كل حاجة هديت
بص شنودة وصادق لبعض
شنودة.معقول خرجوا
صادق ب أرهاق.ليه لاء
احنا اشتغلنا بكل اللى يساعدنا على طردهم
شنودة.هو فيه حد جوة الاوضة
صادق.كانت الست اللى استحوذوا عليها
بس اختفيت فى اول جلسة حاولت اعملها
شنودة.طيب نفتح الباب دلوقتى ولا نستنى شوية وقت كمان
يمكن تظهر اى حاجة جديدة
صادق.لاء خلينا نقعد نقرا شوية فى البيت كله
لحد م نتأكد ان الهدوء ده مستمر
ولو مظهرتش اى حاجة جديدة
نفتح الباب
شنودة.طيب
قعد القس شنودة فى زاوية فى المربوعة وجنبه كان نايم الطفلين التؤام
وابتدا يقرأ من كتابهم المقدس
والشيخ صادق قعد ناحية اوضة رئيسة واستمر فى قرأة القرأن
وكلهم متجمعين وقاعدين على الارض ما بين المربوعة والشيخ صادق
بيذكروا الله فى سرهم وعنيهم على باب الاوضة
متخيلين ان رئيسة او بعلزبول ممكن يخرج مرة تانية
لكن مريت ربع ساعة
وبعدها نص ساعة
لحد ما مريت ساعة كاملة
من القرأة
صدق الشيخ صادق وقفل المصحف
وخلص شنودة وقام قرب منهم وهما متجمعين
شنودة.انا شايف اننا نفتح الباب
لو خرجوا وافرجوا عن روحها مش بعيد نلاقيها جوة الاوضة
لو سابوا البيت وعاقبوها
اكيد مش هيرجعوها مرة تانيه للمكان اللى اخدوها فيه
المهم اننا لازم ندخل نحصن الاوضة دى
ونشيل منها المرايا لأنها هى البوابة بتاعت عالمهم
اللى هيكون سهل الخروج والدخول عن طريقها
صادق وهو بيقوم من على الارض.طيب نتوكل على الله
ابتدا صادق يحط ايديه على راس واحد واحد منهم ويقرأ ايات مرة تانيه لزيادة التحصين
وكان القس شنودة بيرش تانى من المياه المقدسة على ايديه ويمسح على راسهم
وبعد ما خلصوا
كانوا كلهم ساكتين ومتوترين
راح القس والشيخ مع بعض ناحية الباب
وقرروا يفتحوه
ومد صادق وشنودة ايديهم على اوكرة الباب مع بعض
وفتحوا الباب
