رواية عذاب الارواح الفصل الخامس عشر15 بقلم هنا عادل
عذاب الارواح
الجزء الخامس عشر
كل اللى واقفين مرعوبين
مش قوة واحدة ست ابدا
الشيخ بيقرا قرأن
وحنان بتعيط وبتحاول تبعدها عن اخوها بس الجن اللى معاها كان اضعف من انه يفرض سيطرته على شيطان رئيسة
اللى عنيها كانت ظهرت روح اللى جواها
وبان انها مش هى
الشيخ قرب من مكانها
وهو فاقد الامل انه هيلحق ينقذ مفتاح
وابتدا يقراء ايات قرأن بسرعة جدا ويكررها بأسرع ما يمكن
وكان خلاص مفتاح بيغمض عنيه وروحه بتروح
لكن رئيسة التفتت للشيخ وبمنتهى الرعب
طولت ضوافرها بشكل مرعب
وغرستها فى رقبة الشيخ
اللى الدم خرج من رقبته شبه النافورة
وقع على الارض فى نفس اللحظة
وهو بينطق الشهادة
وهى جريت خرجت من البيت
وكل اللى موجودين بيحاولوا يلحقوا الشيخ وبيحاولوا يطمنوا فى نفس الوقت على مفتاح اللى كان فاقد الوعى ومغم عليه لدرجة انهم فكروه مات
لكن للأسف اللى مات كان الشيخ عبد الصمد
كانوا واقفين يبصوا لبعض والخوف على وشهم والصدمة
والحزن
بيتهم فى يوم وليلة اتقلب حاله وحال كل اللى فيه
كانت فريال قاعدة على الارض هى ومعتز بيحاولوا يفوقوا مفتاح اللى فيه النفس لكن لسه مغم عليه
وعبدالله وياسر وحنان
قاعدين على الارض جنب الشيخ
مش عارفين هيتصرفوا ازاى ولا ايه اللى المفروض يعملوه
وكل ده بيحصل والتؤام
نايمين فى مكانهم زى ماهما
ومفتحين عنيهم وبيتفرجوا على كل اللى بيحصل
معتز.مفتاح الله يخليك فوق اوعى تسيبنى لواحدى
انا مش قادر اقف على رجلى
فريال بتطبطب على كتف معتز.قوم يا مفتاح اسند اخوك
يلا ياحبيبى قوم ساعده واستقوى بيه وخليه يستقوى بيك
معتز دموعه نازلة وهو بيبص لمفتاح ويرجع يبص على فريال
ويبص لخلانه اللى بيحاولوا يراضوه بنظراتهم هما حزنهم صعب اد حزنه
حنان.خلاص يا خالى الشيخ مات
لازم نلاقى صرفة بقى للى حصل ده
مستحيل حد هيصدق ان النزيف ده كله بسبب ضوافر امها
اللى حتى الطب الشرعى مستحيل يثبت ان دى ضوافرها هى لأنها فعلا مش ضوافرها
دى كانت حوافر
لكائن مرعب وخبيث
معتز مش هامه كل اللى بيسمعه بس مركز مع اخوه اللى ابتدى يهز راسه يمين وشمال
ويحاول يفتح عنيه ببطء
معتز اول ما شاف كده
ابتسم ودموعه نزلت اكتر ورفع مفتاح لصدره وحضنه
مفتاح بتعب وصوت واطى.قولى ياي معتز ان اللى حصل ده كدب
فريال.قوم ياحبيبى اقعد على الكنبة بس خد نفسك
هعملك حاجة تشربها تهديك
معتز.قوم يامفتاح
احنا المصايب نازلة على دماغنا اكتر من الرز
قوم ساعدنا نلاقى حلول
مفتاح بيحاول يمسك فى اخوه وفريال ورفع جسمه من على الارض وقام وقف قرب من ياسر وعبدالله وحنان
بص لعبد الصمد وفتح عنيه على اخرها
مفتاح بذهول.ايه ده
حصل ايه
عبدالله.الحمد لله انك بخير يابنى
شوفت يا مفتاح المصايب اللى امك اتسببت فيها
مفتاح.هى فين يا خالى
وايه اللى عمل كده فى الشيخ
ياسر.هربت
موتت الراجل وجريت
اتكتفنا مقدرناش نجرى وراها
معرفناش
يمكن من صدمتنا
مفتاح.امى
شوفت يا خالى كانت هتقتلنى ازاى
شوفت ازاى طاوعها قلبها تطلع روحي فى ايديها
انا مش قادر اقول عليها امي مرة تانية
اللى حصل منها ده مستحيل اعرف انساه
ده مفيش ام تعمله
حنان.مش امك يا مفتاح اللى كانت بتعمل ده
ده الشيطان اللى عليها
المهم دلوقتى
احنا هنعمل ايه فى الراجل ده
عبدالله.هنبلغ طبعا
هنعمل ايه يعنى
حنان.ياخالى احنا لو بلغنا
مفيش حاجة هتثبت كلامنا
ومحدش هيقتنع باللى حصل فينا ومعانا
وبالذات الحكومة
وفجأة هتلاقى كل حاجة بتظهر هتكون ضدنا
وده بسبب تأثير الشيطان ده على بيتنا
فريال.اومال هنعمل فيه ايه ده
حنان.هنجيب ملاية ونلفه بيها
وندفنه تحت فى الخندق
معتز.ندفن مين فين يا حنان
انتى مجنونة ولا ايه
ده كده احنا بنجيب لنفسنا مصيبة بجد
حنان.المصيبة اللى بجد يا معتز اننا نعمل اى حاجة غير كده بالذات وامك مش موجودة
خلينا نلاقيها الاول
ونعرف نحبسها هنا
ووقتها نبلغ
وهيثبت عليها حالتها اللى مش طبيعية دى
فريال.صحيح دى مصيبة ان احنا منعرفلهاش مكان
طيب هنعمل ايه هنجيبها منين
معقول تكون راحت عند حد من الجيران
حنان.متقلقيش يا خالتى انا هعرف مكانها
المهم دلوقتى نخلص بس من الجتة اللى مرمية على الارض دى
يعالم يمكن امى تروح بنفسها تبلغ عننا
ياسر والصدمة لسه على ملامحه.انا شايف ان حنان كلامها صح
احنا لو بلغنا ومتأكدوش ان رئيسة اللى عملت كده بسبب غيابها
كلنا هنترمي فى الحبس
لحد ما تظهر هى او اى حاجة تخليهم يصدقوا كلامنا
وده طبعا حلني بقى على ما يحصل
عبدالله.ازاى بس ياناس عايزيني اوافق على انى اخبي جتة قتيل
ده ذنب وجريمة كبيرة اوى
وانا مش بتاع مشاكل ولا ينفع نورط نفسها فى حكاية زى دى
معتز.خالى احنا لو بلغنا
يبقى فعلا اتورطنا
وبعدين الحكومة مش هتصدق ابدا الكلام بتاع الجن والعفاريت والحاجات دى
هيفكرونا بنعمل مجانين علشان نهرب من القضية
عبدالله حاسس بقلة حيلة
حنان واقفة تبص للراجل اللى دمه تقريبا اتصفى من جسمه
بسبب بس ضوفر
معتز وياسر ومفتاح تقريبا متفقين على نفس المبداء
وفريال محتارة ما بين توافق ولا لاء
بس برضه هى فى الاول والاخر
مش هتقدر تعترض علشان متوقعش اهلها فى مصيبة
معتز.خالى عبدالله
احنا فعلا هنعمل كده
ولازم نعرف امى هتكون فين
حنان بتبص للطفلين الصغيرين.طيب روحوا بس ادفنوا الشيخ
وانا لما ترجعوا هكون عرفت هى راحت فين
فريال.هتعرفى منين ياحنان
حنان بثبات.متقلقيش يا خالتى
هعرف بالطريقة اللى لازم نتعامل بيها مع الست دى
احنا لواحدنا مش هنقدر عليها
الموضوع اصعب بكتير من اللى ممكن نكون فاكرينه
عبدالله.الامر لله
بس لو امكم مظهرتش لحد بكرة زى دلوقتى
انا هروح ابلغ بنفسى
احنا لازم نخلى مسؤليتنا
مفتاح.ماشى ياخالى
اكيد محدش فين عايز يتورط فى الحكاية دى
ياسر.طيب خلونا نشيله من هنا
وننزل بيه من المنور بقى
دخل معتز جاب ملاية
وال3 شباب ابتدوا يلفوا الشيخ بيها
وشالوه ودخلوا بيه المنور بتاع بيتهم الخاص بيهم
ونزلوا على الخندق اللى كانوا عاملينه للكراكيب والعدد بتاعت الشغل واى حاجة قديمة عندهم
ولأنه كان عبارة عن رمل
حفروا فى الخندق لحد ما قدروا يدفنوا الشيخ ويتأكدوا انه اختفى
حنان بصوت تخين قاعدة على الارض قصاد اخواتها التؤام
وبتتكلم معاهم وكانهم فاهمين ايه اللى بيتقال
بس لكنة غريبة
ولغة مش مفهومة
وفريال وعبدالله واقفين على مسافة منها زى ماهى طلبت
وفاتحين عنيهم على اخرها
ومش مصدقين اللى شايفينه
حنان وهى بتتكلم معاهم فجأة الكهربا راحت وجت كذة مرة ورا بعض
وسمعوا صوتين بيتكلموا مع بعض فى نفس اللحظة بأصوات مخيفة ولغة مش مفهومة
وبعد الصوت م اختفى
النور رجع تانى
قامت وقفت حنان
وبصيت لخالها ولخالتها
واخواتها اللى رجعوا بعد ما دفنوا الشيخ
كلهم واقفين ثابتين
محدش بيتكلم وعنيهم على حنان وبس
حنان بهدوء.دفنتوه
ياسر.اه ياحنان
عرفتى مكانها فين
حنان.فيه شرط علشان تعرفوا هى فين
فريال.شرط
شرط ايه ياحنان
انتى هتتشرطى علينا
عبدالله.شرط ايه ده يابنتى
هو ده وقت شروط
قولى لو عرفتى
خلينا نخلص من المصيبة دى
حنان.خالى مش انا صاحبة الشرط
معتز بأنفعال.اومال مين يا حنان يعنى
يابنتى انتى بتلعبى بينا ولا ايه
حنان بهدوء.لاء يا معتز صدقنى مش انا
بس احنا بيتنا مبقاش فاضى
بيتنا ده بقى زى المستعمرة
فيه غيرنا ساكنينه
وعندهم شروط علشان يساعدونا
ومن غير ما نقبل الشروط دى
ولا هنعرف مكانها فين
ولا هنخلص من المصايب اللى هتفضل تزيد وتزيد لحد ما تخلص علينا واحد ورا التانى
القرار بتاعكم انتم
انا مش هفرض حاجة على حد
لو عايزين تسمعوا الشرط
هقولها
وتقبلوا او ترفضوا براحتكم بقى
بس اتحملوا كلكم نتيجة قراركم ده
وعلى فكرة
كل اللى موجودين فى البيت ده وبالغين الشرط هيتنفذ عليهم
ولو رجعوا فى كلامهم هيتأذى اذى كبير مش هيعرف يخلص منه
مفتاح.ايه يا حنان الشرط ده
اكيد يعنى مش هيبقى العن من اللى حصل فينا
حنان.متحاولوش تعملوا اي حاجة تخرجوا الارواح المسلمة من البيت
ابدا
طول عمركم
وطول م انتم بتتعاملوا معاهم بمسالمة
هما مش هيأذوا اى حد
وتقدروا تقربوا من ربنا
وتصلوا وتعملوا كل حاجة
لكن متاخدوش اى خطوات لطردهم من البيت او من الاجسام اللى استحوذوا عليها
هما لأنهم مسلمين
القرأن مش بيأذيهم
ومدام محدش حاول يأذيهم او يتخطى الحدود بتاعتهم هما مش هيأذوه لأن البيت والاجسام بتاعتنا اللى هما بقوا فيها
هتساعدهم انهم يكونوا لهم ذرية من البشر
طبعا الكلام اللى بيتقال
صادم لهم كلهم
واقفين متنحين
حنان.تانى حاجة
هما هيساعدونا لو قبلتوا شرطهم ده
اننا نوصل لأمي وكمان هنعرف الطريقة اللى ممكن بيها نخلص من الشيطان اللى عليها
لأنه كافر
لكن ده مش هيكون سهل
ويمكن يحصل لأى حد مننا اللى حصل للشيخ عبد الصمد
ايه رأيكم
مستعدين ولا لاء
كلهم بيبصوا لبعض ومش عارفين ايه الرد اللى لازم يتقال
حنان.هنعيش مع بعض فى سلام
هيبقوا موجودين معانا وحوالينا واحنا هنبقى حاسين بوجودهم
والبيت ملكهم فى الاوقات اللى يحددوها
هما كده كده موجودين علطول
لكن احنا لا بنشوفهم ولا بيظهرولنا
لكن بموافقتنا
هيبقى لهم الحق يظهروا فى البيت على هيئتهم الحقيقية فى اوقات مخصصة لهم هما هيعرفوهالى
عبدالله.لالالا انا مش هينفع اوافق على اللى بيتقال ده
ربنا يجعل كلامنا خفيف عليهم
يابنتى ازاى يعنى
ابقى عارف انى عايش فى بيت مع عفاريت
وممكن اشوفهم قدامى كمان
لاء انا هاخد بعضى وارجع لعيالى
وانتم كمان مبقاش ليكم قعاد هنا
حنان.وهنسيب اخواتى الصغيرين لمين يا خالى
عبدالله.وهما دول اخواتك يا حنان
هما دول بنى ادمين
حنان.اخواتى يا خالى
لكن ارواحهم بتتحبس فى الاوقات اللى هما بيقرروا يكونوا موجودين بينا فيها
لكن لو هما مش موجودين فى الوقت ده معانا
بتكون ارواح اخواتى هى اللى معانا
ياسر.هى امك فين دلوقتى يا حنان
حنان.لازم يسمعوا الرد الاول يا خالى
معتز.موافقين يا حنان
فين امك
حنان.كلكم توافقو يا معتز
معتز بص لهم كلهم وكل واحد منهم على ملامحه القلق
معتز.كلنا موافقين ياحنان
وكلنا هنتحمل نتيجة اى مخالفة للشروط بتاعتهم
حنان بثبات.امى فى اوضتها
كلهم برقوا عنيهم وبصوا لبعض
حنان.بس اللى هتشوفوه اتعاملوا معاه بهدوء علشان محدش يتأذى تانى
مفتاح.ليه هنشوف ايه
حنان.ايا كان يا مفتاح اللى هيتشاف
بس خليك فاكر ان اللى هتشوفها دى جسم امك
لكن روح شيطان
فريال.جوة ازاى ياحنان
امك خرجت من البيت قدام عنينا
حنان.كل اللى بيحصل حوالينا غريب يا خالتى
يعنى انك تشوفى نفسك فى حضن ابويا او خالى
ده كان حقيقي
ماهو برضه كان تهيؤات
خدع
هى كل ده كانت جوة اوضتها مخرجتش من باب البيت
ياسر.طيب تعالوا ندخل نشوفها
يمكن تهدا وترجع لطبيعتها
ونقدر نربطها
او نسيطر عليها
حتى علشان لو حضر عليها مرة تانية ميقدرش يهجم على اي حد فينا
معتز.طيب يلا بينا
بس بالراحة
بلاش حد فينا يتسرع فى اى تصرف
عبدالله اصلا بيخاف
مشوا كلهم بالراحة
ناحية باب اوضتها
فتح ياسر الباب بهدوء
وشاف النور الاحمر مالى الاوضة
دخلوا كلهم بيدوروا فى كل الاوضة
بس رئيسة مش باينه قدامهم
حنان وهى ساكتة وهادية
مديت ايديها وشاورت على فوق السرير
علشان كلهم عنيهم تروح على السقف مكان ما بتشاور حنان
علشان يشهقوا من الصدمة لما يشوفو رئيسة
متعلقة فى السقف فى الهوا
نايمة على ضهرها ورجليها متنية لتحت
ورقبتها على ورا وكانها مقطوعة لكن هى سليمة
مفيش فيها خدش حتى
وبصالها بعيون لونها اسود مرعب
وبتضحك بأسنان صفرا مخيفة
وايديها نازلة جنبها وبتتحرك كأن فيه تيار هوا هو اللى بيهزها
حنان.مشوارنا صعب
