رواية نعمه الفصل الحادي عشر11 بقلم حماده زهران
محمد بيه رئيس المباحث رن عليا،وقال: - انا جاي عندك يا ست الكل.
قولت:
-خير،فيه حاجه.
-لا ابدا..مجرد زيارة عادية.
قولت:
-اتفضل في اي وقت يا محمد بيه.
وجاني البيت وكان جايب معاه تورته شيكولاته، وقال:
-اخبارك ايه يا ست الكل.
قولت:
-الحمد لله بخير..اخبارك ايه انت وبنتك.
قال:
-انا الحمد لله بقيت كويس،وبنتي بقيت زي الفل والبركه فيكي.
قولت:
-سيب بنتك على راحتها،الشاب اللي هيا عايزاه مش وحش بالعكس ده كويس جدا.
قال:
-حاضر افكر بس يا ست الكل..بس فيه حد عايزك ضروري.
قولت:
-حد مين.
قال:
-هو عايز يكلمك.
فون محمد بيه رن،ومحمد بيه طلب مني انا أرد.
كان رقم مجهول،فتحت وقولت:
-الو..
قال:
-ايوه يا بنتي،بصي بأختصار،انا كنت متفق مع ناس اني هشتري منهم حاجه،ودفعت نص الفلوس والناس قالوا الحاجه اتسرقت،وبعد كده اختفوا.
قولت:
-طيب كمل.
قال:
-كده وبس،محمد عندك هيوصفلك المكان،وانتي في مكانك حاولي تعرفي.
قولت:
-ازاي يعني هو انا بنجم.
قال:
-معرفش اتصرفي..وقفل السكه.
محمد بيه وصفلي المكان ومشى،واداني ساعتين اجبله الرد،وطبعا انا بدأت اتوتر..دي حاجه غريبه، اول مره اتحط فيها،كان طبعا أتعرض عليا قبل كده ناس كانت عايزه تشوف بيتها لو فيه حاجه، ببقي عارفه أماكن كتير،وفيه حاجات بتبقي كذب،بس اول مره اتحط في موقف زي ده.
هدى كانت واقفه وساكته وعندها حيرة،كنت اول مره اشوف هدى كده،كان في عنيها قلق.
وجابر واقف برضو ساكت،ويبص لهدى ويبصلي..وانا مش عارفه اخد منهم كلمه،وحاسه بتوتر شديد..قولت:
-طيب اتكلموا طيب،أنا اعمل ايه.
هدى قالت:
-احنا ظهرين علشان نساعدك في حاجه تساعدي بيها الناس،لكن ده مش هنقدر نساعدك فيه،واحنا مش مجبرين نتحط في حاجه زي دي،كل اللي اقدر اعمله هجيبلك حد يساعدك،لكن ولا انا ولا جابر هنساعدك في حاجه زي كده.
كلمت الشيخ محمود وطلبت منه ياجي البيت، جاني وحكتله اللي حصل.
قولت:
-شيخ محمود،أنا لازم اخد رأيك في حاجه قلقاني.
الشيخ محمود قال:
-خير يابنتي،احكيلي انا سامعك.
قولت:
-محمد بيه كان هنا،وطلب مني اكلم حد من الفون بتاعه،واللي كلمته قالي انا كنت متفق علي حاجه ودافع نص فلوسها،والناس وقالولي ان الحاجه ضاعت،ولما روحت اشوفهم واتكلم معاهم لقيتهم اختفوا.
للأسف زاد الطينه بلة..الشيخ محمود اتوتر وقال:
-احنا كده في حته خطر يا بنتي،بنلعب مع حد غامض احنا منعرفهوش..ولا عارفين واصل لفين.
قولت:
-طيب اللي انا هعمله ده غلط وحرام..ولو معملتش ده هتأذي انا وجوزي..اعمل ايه دلوني.
الشيخ محمود قال:
-انتي لازم تنفذي،احنا مش عارفين بنتعامل مع مين،كل الموضوع انتي ولا هتروحي ولا تيجي، أسألي بس حبايبنا وهيدلوكي وانتي في مكانك.
وكانت نصيحه هدى وجابر اني اكمل،لكنهم مش هيساعدوني،بس هيجيبوا حد يساعدني.
وفجأه ظهرت قدامي بنت شقية جدا،اسمها "منه" كانت جميله وبتعرف تكشف الأرض كويس،وبصراحه جنه كانت تجيب قرار الحاجه،ودايما بتدلني صح.
كانت جميلة..بلون عيون رصاصي.
وحكيتلها علي اللي حصل.
بصت بأبتسامه وقالت:
-طيب خليه يقولك اي معلومة..المكان فين.. وصف للناس ايه..اي معلومه.
كلمت محمد بيه وقولتله:
-لازم الشخص ده يجيلي.
قالي:
-انتي عايزه ايه بس وانا اعرفك.
قولت:
- لا معلش انا أسفه،هو عايز الحاجه اللي ضايعة منه وانا لازم أتواصل معاه.
قال:
-ميقدرش يتكلم في التلفون كتير.
قولت:
-عايزه اعرف معلومات اكتر عن الموضوع ده.
محمد بيه كلم المجهول..والمجهول قال لمحمد بيه الناس دي في قرية خيزر،في بيت في وسط القرية،والمفروض الحاجه دي موجوده في البيت،ووصف شخص واحد من الناس هو يعرفه.
منه ظهرت وورتني راجل عنده عرجة بسيطه في رجله،بينزل في مقبرة تحت الارض في نفق،
وبدأت اشوف كمان الحاجات اللي كانت موجوده.
بس اللي كنت بشوفه ده،كان حصل من فترة، مش لسه بيحصل.
بدأت اسرح واشوف،ومنه كانت بتوريني وانا اقول اللي شيفاه ومحمد بيه كان بيكتب ورايا اللي بقوله.
منه بتوريني المكان وتوريني الناس والحاجة،قولت:
-فيه واحده ظهرت عودها من فوق فرنساوي ومن تحت وبتاخد حاجة من تحت الارض، علبة سمنة متغطيه بقماشه.
الست فضلت تاخد في الحاجات دي وتخرج وترجع تاخد تاني.
بدأ وقتها يحصل شوشرة عليا،فيه حد تاني بيشوشر علي دماغي، اول مره حد يعمل معايا كده.
هدى قالت:
-فيه حد تبع الناس دي زيك كده بس ماشي غلط،عرف ان فيه حد بيكشف عن المكان و بيراقبهم وبدأ يشوشر عليه.
بدأت اصدع.
شوفت الحاجه اتنقلت كلها من المكان.
وبدأت اوصف المكان بالظبط،وصفت البيت والشارع اللي هما فيه.
محمد بيه كتب كل اللي حكيته،وكلم الشخص المجهول علشان يبلغوا.
الشخص المجهول قال لمحمد بيه:
-كده احنا عرفنا المكان بالظبط،بس هي تكون معاكم واحنا هنأمنها،حتى لو حد عايز ياجي معاها خليه ياجي،وهي كده كده هتبقي متأمنه قولها متقلقش.
شوفت خيانه مابينهم وبدأو يضربوا في بعض. واحد منهم اضرب بطلقة في بطنه..المنظر فزعني،أنا شوفته هو وبيموت جاتني حالة خوف.
فضلت اقول:
-أنا مليش دعوه بالكلام ده،انا اللي بقدر عليه اعالج الناس..اساعدهم،بس انا أضعف من اني اعمل كل ده،انا مليش دعوه بالسكة دي،ابعدوني عن السكة دي.
و طبعا كان فيه ضغط من محمد بيه وضغط من الشخصية دي فكانت اعصابي كلها متوترة.
قولت:
-انا لو روحت المكان ده مش هشوف اي حاجه ومفيش حد هيساعدني هناك.
محمد بيه قال:
-طيب اوصفيلنا المكان بالظبط.
قولت:
-الست حولت الحاجه لمنطقة أبراج تحت الانشاء..وقولت علي اسم المدينه اللي فيها المنطقه.
قال:
-فعلا..فيه هناك مجمع سكني جديد.
قولت:
-الحاجه عمارة رقم 11 الدور التالت شقة رقم 5.
وكانوا متابعين معايا وبيتحركوا،وفيه شخصيه تاني بدأت تظهر وتكلمني مع الشخص المجهول، معرفش دول مين بالظبط،بس كان اسمه أشرف.
قال:
-احنا بس نوصل وليكي هديه كويسه مكافئة ليكي،ده غير نسبتك.
قولت:
- انا مش عايزه حاجه،انا بس عايزه محدش يكلمني تاني..انا أسفه..انا مش هتوتر تاني بسبب حد منكم.
شوفت كشاف منور،واللي كان ماسك الكشاف اسمه عماد،والتاني اسمه محمد،وكانت فيه عربيات وبوليس كتير،واتقبض عليهم.
ولقيوا الحاجة،وكانت دهب كتيير.
بعدها شوفت حاجات كتير ملهاش تفسير.
عندي حالة لخبطة غريبه على حالة خوف.
ضايقني نظرات هدى ليا،نظراتها كان فيها زعل، مش هقول عتاب لأنها عارفه اني مغلطش في حاجه،ومكانش قصدي ان كل ده يحصل،ولا اعرف الصدفة اللي جمعتني بمحمد بيه هيحصل بسببها كل ده.
أشرف كلمني وقال:
-هبعتلك فلوس كتير.
بس انا مش عايزه اعرفهم تاني،ولا يدخلو بيتي تاني،ولا حتى يرنوا عليا تاني.
وفعلا الشخص ده مكلمنيش تاني..بس اللي كان بيحاول يتواصل معايا،محمد بيه والشخص اللي كان بيقول اسمه أشرف.
اشرف كان بيحاول يتواصل معايا بأي طريقة، أصله عنده أماكن كتير في الصعيد وكان عايزني اسافر معاه،وعربية خاصه توديني وتجيبني،واني هبقى مليونيره.
رفضت وقولت:
-الحاجه دي أثرت عليا،ومبقيتش اشوف حاجه.
كنت بكذب عليه علشان مش عايزه اشترك في حاجه زي دي.
واللي عرفته من محمد بيه ان الشخص اللي انا معرفهوش ده بعت فلوس كتير اوي مكافئة ليا،
بس أشرف طمع فيهم واخدهم..حسبي الله ونعم الوكيل فيه.
انا كنت بحمد ربنا وبشكره اني طلعت من الموضوع ده علي خير،وان المكسب الوحيد اللي اخدته في الموضوع ده كانت "منه".
فضلت فتره متوترة،لحد ما في يوم الشيخ محمود اتصل عليا وقال:
-عايزك يا نعمه..فيه حاله غريبه.
قولت:
-تمام ماشي.
روحت مع الشيخ محمود عند ناس شكلهم محترم جدا وفى حالهم اوى،بنتين وشاب وامهم.
الام قالت:
-ابنى مش عارفه ماله،كل شويه يصرخ فجاه
من غير سبب،وعلطول بيكلم نفسه..والبنات مش بيتعاملوا مع حد نهائي،وكل ما حد يتقدملهم يرفضوه من قبل حتى ما يشوفوه.
هدى وجابر ومنه،كلامهم واحد..مش سحر ولا مس..قولت:
-هو جوزك ليه مش حابب يشوفنى.
قالت:
-معرفش،بس هو اول ما عرف انك جايه دخل قال انا مش عايز اشوف حد.
قولت:
-بس انا اسفه مفيش حاجه هنا محتاجه مساعده مني..بصى يا حجه ابنك وبناتك عندهم حاله نفسيه بسبب ابوهم،وبدأت اشوف واحكى.
الاب كان بيحبس ابنه فى الحمام هو وصغير.
كان هو ده عقاب الأب لأبنه..يقلعوا هدوم ويربطه ويرميه في الحمام علي الأرض ويسيبه بالساعات،ضرب في الحمام واهانه..وكان بيضرب البنات بطريقة وحشه.
اللي انا فهمته وعرفته ان عيال الست دي عندهم حاله نفسيه بسبب ابوهم.
اللي اصلا مريض نفسي بسبب ان هو اتربي مع مرات اب كانت بتعذبه وتضربه بنفس الطريقة.
بدأت احكي مع الشاب ده وكان كويس جدا، عنده ٢٥ سنه..كان مركز معايا انا وبتكلم،كان قاعد علي الكرسي ورافع رجليه وضامم ركبته علي صدره،نفس القعدة اللي كان بيقعدها في الحمام..وبدأ يبكي..امه قالت:
-بقالوا سنين مش بيبكي،من هو وصغير من بعد ما بطل يضرب بكام سنه بطل يبكي،وبقي يضرب ميبكيش،حتي لما بيصرخ وتاجيلوا الحالة دي، كان بيصرخ وميبكيش.
قولت للشاب:
-انت زي اخويا،انت محتاج تروح لدكتور يعالجك من اللي انت فيه،انت كويس،ولا عندك مس ولا سحر، وانت ادري الناس بنفسك،بس انت والبنات لازم تروحوا لدكتور.
بدأوا يسمعوني،واتكلم مع البنات،قولت:
-دي كانت فترة في حياتكم،انتوا دلوقتي كبرتوا وبقي ليكم شخصية،حاولوا تبنوا الحياة اللي انتوا عايزينها بطريقتكم انتوا،انتوا تعبانين شويه..بس كل ده يتعالج.
البنات اتكلموا وقالوا:
-احنا مش عايزين نتجوز..مش عايزين نجيب عيال للدنيا دي..احنا كمان ممكن نطلع مرضى نفسيين زي بابا ونعمل في عيالنا كده.
بصراحه كانت حالة صعبة جدا،مرض نفسي مسيطر على البيت كله.
دخلت انا والشيخ محمود نتكلم مع الراجل،جاتله حالة هياج، بيفتكر اللي عمله وضميره مأنبه من اللي كان بيعملوا في عياله..بس كان ده بيحصل غصب عنه دي حالة مرضيه.
الراجل عاش طفولة قاسيه جدا،سببتلوا مرض خلته مش عارف يتحكم في غريزة الانتقام اللي عنده،هو كل اللي في باله انه عايز ينتقم،ومش واخد باله انه بينتقم من عياله مش مرات ابوه.
اديتهم اسم دكتور كويس،وهيتعالجوا ان شاء الله...يتبع.
