رواية ختم الملائكة كاملة وحصرية بقلم لينا بسيوني
للكاتبه لينا بسيوني
أتمشيت فى الخزينة الضخمة , رجلى كانت بتدوس فوق العملات الذهبية المتنطورة على ارضية الخزينة .
لفت نظرى صندوق صغير مقفول .
روحت ناحيته وفتحته وفتحت بوقى من اللى شوفته جواه !!!
خريطة قديمة من جلد الغزال ..
فتحت الخريطة واتصدمت من اللى شوفته ..
تفاصيل دقيقة جدا لوديان وجبال وسهول القارة المهجورة انتركاتيكا ( القارة الجنوبية ) واللى لحد دلوقتى محدش قدر يستكشفها كاملة لا انس ولا جن .
الانسان حاليا بيجتهد بالتكنولوجيا عشان يستكشف القارة دى ومقدرش برضه يعرف كل أسرارها !
كل اللى أكتشفوه حاجات أثارت فضولهم أكتر وانتشرت عنها اساطير كتيرة ..
فى ناس بتعتقد ان هناك فيه سور عظيم بيعيش وراه ياجوج وماجوج ومخلوقات محدش يسمع عنها !!
ناس تانيه بتقول أن فيها بوابة لعوالم تانيه !!
علماء البشر حاليا لقوا هناك حمض نووى لكائنات غريبة ( معلومة حقيقية ).
ده غير صورة ضبابية التقطوها من فوق انتاركتيكا ،ظاهر فيها حيوان غريب تحت بحيرة ,قالوا أنه شبه الكراكون ( حيوان اسطورى ) ( معلومة حقيقة ).
أما الجن فمحدش منهم حاول يكتشف القارة بسبب برودتها الشديدة واللى طبيعة أجسامنا النارية مبتقدرش تستحملها.
الخريطة مرسومة كأن حد كان طاير و رسمها من فوق الارض !!
طب ازاى ؟!!
دققت فى الخريطة أكتر ولاحظت رسمة غريبة مكتوب انها مدخل!!!
مدخل لايه ؟!!!
قولت للاميرة وأنا بطوى الخريطة وبحطها فى شنطتى :
- شكرا انا كدا خدت مكافأتى .
قالتلى بأستغراب :
يعنى سيبت كل الكنوز دى , وأخدت خريطة من جلد ماعز !!
قولتلها :
- أولا ده جلد غزال مش ماعز ..
ثانيا كل واحد بياخد اللى ناقصه وأنا مش ناقصنى المال ولا الكنوز اللى ناقصنى مغامرة و رحلة لمكان محدش راحه قبل كده ...
سكت شوية وقولتلها بجرأة زيادة عن اللزوم :
- تيجى معايا ؟!!
قالتلى :
أنا بعشق المغامرات وعن نفسى هموت وأسافر معاك , بس فى نفس الوقت مقدرش أخالف رغبة والدى خاصة انى وعدته
مردتش أضغط عليها أو احطها فى أختيار صعب .
أنسحبت فى هدوء, ودعتها واستعديت للرحلة .
ركبت سفينتى اللى صنعتها بأيدى ..
فضولى للرحلة الجديدة هون عليا خسارة قصة حبى اللى ملحقتش تبدأ .
أنطلقت بعيد عن أسطنبول فى أتجاهى لقارة انتاركتيكا فى رحلة اعتقد مفيش مخلوق عملها قبلى .
عديت بحور وقنوات ومحيطات لحد ما بدأ يظهر قدامى كتل الجليد على سطح الميه فعرفت انى وصلت لحدود القارة المهجورة .
عديت بحرص بالسفينة بين كتل الجليد الضخمة لحد ما بدأت تظهر ادامى اليابسة متغطية بالجليد وشوفت مجموعة من البطاريق واقفين بيبصوا ناحيتى ، شاورتلهم وقلتلهم وانا بتكتك :
-الجو .. عندكم.. ساقعة... اوى .. انتوا مستحملين .. ازاى ..
يحححح .
طلع منهم صوت طقطقه غريب كأنهم بيضحكوا واتزحلقوا ورا بعض على الجليد وطشوا فى الميه وهما بيلعبوا .
فضلت أتقدم لحد ما وصلت لحافة القارة رسيت بالسفينة على اليابسة الجليدية وربطها بوتد خشب ثبته فى الجليد .
بصيت حواليا على المكان اللى كان عبارة عن جليد و بحيرات متجمدة وجبال متغطيه بالجليد .
درجة الحرارة هنا ممكن توصل لسالب ٩٧ ..
مفيش انسان طبيعى هيقدر يتحمل درجة الحرارة دى ، بس لانى جن متشكل فقوتى تعادل الاف البشر و قدرت اقاوم البرودة بالعافية
القطب الجنوبى عكس كل الارض لما الارض كلها بتكون صيف بيكون هنا شتاء والعكس .
الصيف هنا فريزر .. لا .. الفريزر ادفى شوية ... يححح ..
طلعت بوصلتى و الخريطة وانا بتكتك وبدأت رحلتى فى أعماق قارة انتاركتيكا و فى إتجاه المدخل المجهول .
كنت متأكد انى هلاقى حياة تانية خاصة أن الخالق أكد فى الكتب السماوية على وجود حياة تانية وخلق آخر على الأرض محدش يعلم بيه !!
فضلت أتعمق فى الجليد
لحد ماشوف قدامى جرف جليدى ضخم شبه السور ( جرف روس ) عديت الجرف وكملت لحد ما وصلت للمكان المحدد فى الخريطة ....
بصيت حواليا ملقتش حاجة ... أبيض فى أبيض .. جليد بس .. مفيش اى مداخل ولا مخارج ولا يحزنون ..
قلت لنفسى :
قطعت المشوار دا كله على الفاضى يا ابو الحنانيش !!
لا ... لا مش معقول هضرب المشوار دا كله على الفاضى!!!
قررت أكمل استكشاف القارة لعل وعسى أقابل أى حاجة ...
بصيت على الخريطة ولسه هتحرك ،اتفاجأت بالارض بتتهز بصيت ورايا لقيت الجليد بيتشقق وبدأ يظهر من تحت الارض فجوة كانت بتتسع ، كأنها بوابة وبتتفتح
قربت منها بحرص حسيت بدخان كثيف و سخن بيتصاعد منها كأنها بركان !!
أى حد مكانى كان هيتراجع ويبعد , انما أنا قاوحت ودخلت الفجوة وياريتنى مادخلتها .
أول مامديت رجلى فى الفجوة حسيت بحاجة بتشدنى زى المغناطيس .
الفجوة كانت عاملة زى الكهف و درجة الحرارة فيها مرتفعة لدرجة انى بدئدأت أعرق!!
أتمشيت فيها بحذر لحد ما شوفت خيال بيقرب عليا بسرعة رهيبة .
وقفت فى مكانى وماتقدمتش , الخيال كان بيقرب عليا أكتر .
شوية وظهر صاحب الخيال .
مخلوق شبه البنى آدم بيجرى و فى أيده صندوق خشب !!
عدى من قدامى وكمل جرى علشان يخرج من الفجوة .
قولتله وأنا واقف ومندهش:
يا ...
التفت وراه وبصلى وكمل جرى بالصندوق ناحية الفجوة
لاقيت نفسى بجرى وراه لحد ماحصلته وبقيت بجرى جنبه ،قولتله بأستغراب :
- هو فيه أيه ؟!!
قال كلمات بلغة غريبة مفهمتهاش !!
فقولتله وانا بجرى :
بتقول أيه ؟!! ايه اللغة دى !!....
مكملتش كلمتى وأتفاجئت بسهم بيرشق فى رأسه من ورا ,فوقع على الأرض ووقع من أيده الصندوق .
بصيت ورايا لاقيت خيالات كتيرة جايه بتجرى وبيضربوا أسهم فى أتجاهى !!
تفاديت الاسهم و لاقيتنى لاأردايا باخد الصندوق وبجرى.
فضلت أجرى بأقصى سرعة عنى لحد ما وصلت للفوهة وخرجت براها.
كملت جري بأقصى سرعة عندى بعيد عن الفوهة ، فضلت أجرى بالصندوق وموقفتش غير عند سفينتى , شديت الوتد وحررت السفينة و أبحرت بسرعة بعيد عن انتركتيكا ....
خدت نفسى بالعافية وانا بكح من كتر الجرى اللى جريته
قربت من الصندوق وفتحته ، أتصدمت من اللى شوفته فيه.
طفل رضيع ميعديش ال٥ شهور قاعد فى الصندوق بكل هدوء وجنبه كتابين شكلهم غريب ،اغلفة الكتب كان باين أنها من الخشب
ركزت فى الطفل اللى كان بيبصلى ومكنش بيعيط .
الطفل شبه البشر بس عينه واسعه جدا وفيها بريق يشد .
حسيت لوهلة أنه طفل زوهرى بس أتأكدت انه مش طفل زوهرى لما شوفت علامة غريبة فى دراعه اليمين!!!
علامة بيضا وكبيرة شبه الحسنة واللى كانت مطلعه ضوء أبيض و ساطع .
الطفل كان شعره كثيف جدا وناعم على غير عادة اى طفل فى سنه!!!
مديت أيدى عشان اشيله فلقيته بيمدلى أيده وهو مبتسم .
بصيتله باستغراب و شيلته فلقيت جسمه دافى جدا وبيخرج حرارة لدرجة انه دفى السفينة كلها فى عز السقيع .
اتأكدت ان الطفل دا لا هو انس ولا هو جن ، دا مخلوق مختلف تماما !!
استنيت لحد ما بعدت عن المنطقة المتجمدة، حطيت الطفل فى الصندوق واتحولت لجن واتنقلت بيه وسيبت السفينة فى عرض المحيط .
اتنقلت لكهفى اللى فى مملكة الجنون بليبيا .
أول ما دخلت الكهف ،لقيت الطفل بيبصلى وبيشاورلى على بوقه ..
قلتله :
- انت جعان ؟! طب مبتعيطش ليه زى العيال لو انت جعان !!
وبعدين انت ازاى رضيع وبتتواصل معايا!!!
اروح اجيبلك لبن ولا انت بتاكل ايه؟!
مردش عليا وفضل يشاورلى على بوقه.
اختفيت ورحت جبت كل انواع اللبن اللى ممكن تتشرب
لبن جاموسه
لبن بقرة
لبن ماعز
لبن ناقة
لبن ام بشرية "ومتقوليش جيبته ازاى دى ضرورة جنية و انسانية.
جربت معاه لبن الماعز والابل تفه فى وشى.
جربت لبن الجاموسه تفه فى وشى برضه.
فاديته لبن الام ..
حرك شفيفه كدا كانه بيستطعم وتفه فى وشى برضه!!
مفيش اى لبن مشى معاه!!
بصيت على الصندوق وافتكرت الكتب اللى فيه، قربت على الصندوق وقلت للطفل :
- ثوانى كده !!! يمكن الكتب دى هى الكتالوج..
فتحت كتاب منهم و اندهشت لما لقيت صفحات الكتاب مش مصنوعه من ورق عادى.. مصنوعة من الريش , ريش أبيض غريب غير ريش أى طائر.
اول صفحة من الكتاب كانت عبارة عن خريطة لمكان غريب
الخريطة كانت عبارة عن اربع قطع من اليابسة بيفصل بينهم نهر ومكتوب كلام باللون الاحمر مفهمش منه حاجة.
فتحت كتاب تانى لقيته برضه مصنوع من الريش بس جواه حجر مستطيل وشكله غريب منقوش عليه زى ابجدية أو حروف للغة غريبة
مديت ايدى عشان امسك الحجر ويارتنى ما مسكته.
حسيت ايدى بتولع نار ، فرميت الحجر على الارض , لقيته بيغوص فى ارضيه الكهف الصخرية وهو بيدوبها ...
جريت بسرعة ومسكت الكتاب وفتحت صفحاته زى الكماشة وحاولت اشيل الحجر من على الارض ورجعته تانى بسرعة فى الكتاب
بصيت للطفل وقلتله وانا محتاس:
- وبعدين بقى فى السحوله دى !! طب يابنى انت بتأكل ايه ؟!!
مردش عليا وفضل برضه يشاورلى على بوقه وشوفت الحزن فى عينه.
قلتله :
- متزعلش والله انا عايز أاكلك بس مش عارف أاكلك ايه!!!
طب ثوانى هجيبلك كل انواع الاكل واختار انت.
رحت جيبت فاكهة وخضار بكل انواعهم و قمح ، رز، شعير فول، بطاطس، عدس ،جزر حتى الحلويات الشرقية.
حطيت الاكل قدامه وقلتله :
- نقى انت بقى ..
اتفاجأت واتصدمت لما لقيته قام وقف على رجله واتنقل ما بين الاكل.
المشهد بالنسبالى كان غريب جدا، تخيل طفل رضيع واقف على رجله كرجل بالغ وبيتنقل ما بين الاكل .
مد ايده خد خيارة وطمطمايه وقعد.
قلتله :
- ايه دا هو انت نباتى .. طب عندك سنان تقرقش بيها الخيار دا لا ايه!!
لقيته بيقطم الخيارة وسمعت خروشه الخيار فى بوقه.
بصيتله وسألته وسألت نفسى :
- ياترى انت ايه حكايتك بالضبط؟!!
انت استحالة تكون انسان او جن صح ولا ايه ؟!
بصلى وهو مبتسم..
اكل ونام على نفسه وهو فى بوقه الخيار..
شيلته ونيمته على سرير فى الكهف وغطيته..
رحت ناحيه الصندوق والكتب تانى.
فتحت الكتاب اللى فيه الحجر وبصيت عليه من غير ما المسه ، لقيت عليه نقوش غريبة وتحتها حروف بالاتينيه تقريبا ترجمة للنقوش دى.
عرفت المقصد فجبت ورقه وقلم وبدأت انقل الابجدية بتاعت اللغة الغريبة دى وترجمت حروفها باللاتينيه وبدأت اقرا الكتب.
فتحت اول كتاب فى الاول ووجدت صعوبة فى فك الرموز بس لما عينى اخدت عليها الموضوع بقى زى السكينة فى الحلاوة لدرجة انى حفظت الرموز .
بدأت اقرا الكتاب واللى كان بيتكلم عن ٤ ممالك .
المملكة الاولى اسمها ارض الشمال او أرض العمالقة , مكتوب ان اول حد سكنها واحد أسمه " عظيم " وان الارض دى منت عليه لوحده بالابدية من خلال ترياق شربه خلاه عايش من الآف السنين لحد دلوقتى !!!وأن كل سكان أرض الشمال من نسل المخلوق ده ( عظيم )!!
نسل عظيم بيمتازوا بقوتهم وأجسامهم الضخمة , عمالقة , مشهورين بالعنف وشرب الخمر وحبهم لمبارزة الثيران .
المملكة التانيه إسمها أرض الجنوب او أرض الفردوس , مكتوب ان سكانها من مخلوقات شبه البشر بس عندهم اجنحة ضخمة و بيطلقوا عليهم اسم المجناحين او الملائكة هما اللى بيحكموا وبيحموا أرض الفردوس بقيادة قائد منهم.
وتعتبر أقوى مملكة ومشهورين بالعلم والقوة والعدل ونشر الخير .
الملاك منهم تعادل قوته فى الحروب قوة الف عملاق من سلسال عظيم
وقفت قرايه وقلت لنفسى :
- ايه دا !! هو فى ايه !! عظيم مين ومجناحين مين هو دا كتاب فنتازيا ولا ايه؟!!
روحت جبت حبة لب بطيخ كنت محمصهم فى الفرن , و حطيتهم قدامى على المكتب و كملت قراية فى الكتاب ، وأنا بأزأز
قريت عن المملكة التالته واللى بيسموها أرض الزراع مكتوب ان سكانها شعب حيادى ,هادى ومسالم, ومن البشر العاديين .
مكتوب ان ممكلة أرض الزراع مصدر الاكل والميه فى الممالك كلها ...
أرضهم بينبع منها شلالات مياه عذبه اسمها " الكامارا " واللى بيتدفق منها النهر الوحيد فى الممالك كلها ، نهر " الينبوع " .
النهر ليه مصبين واحد بيصب فى أرض الملايكة والتانى بيصب فى أرض العمالقة ومذكور ان أرض الزراع هى أم الممالك لأن أرضها الخصبة تعتبر مصدر الغذاء الوحيد فى الممالك و بيتزرع فيها الحبوب والخضروات والفاكهه والأعشاب العلاجية و الزيوت النادره .
المملكة الرابعة فى الغرب إسمها ارض البوار مبيسكونهاش حد الا الأشباح وأرواح الموتى اللى بيموتوا فى ال3 ممالك .
مكتوب ان محدش راح ارض البوار ورجع حى و ان فى اساطير وخرافات كتير عنها اشهرها أن الحشرات على الارض دى أحجامها أضعاف أحجام العمالقة
قلبت الصفحة وانا مش فاهم اى حاجة لقيت مكتوب ان فى معاهدة تمت بين الممالك التلاته اسمها " عهد السلام " عقدها الملائكة الاوائل مع قائد العمالقة (عظيم ) بالدم .
المعاهدة قايمة على بندين..
البند الاول بيشترط انه بالرغم من العداوة اللى بين مملكة العمالقة ومملكة المجناحين، ميقومش حروب بينهم وانهم يفضلوا على سلامهم .
البند التانى بيحرم اراقه الدماء على ارض الشرق " الزراع" حفاظا على قدسيتها .
وفى حاله الاخلال بالشروط تحل اللعنة على الممالك كلها.
- يفقد عظيم ابديته
- تموت ملائكة ارض الفردوس
- يجف نهر الينبوع وتصبح ارض الزراع ارض جرداء لا زرع فيها ولا ماء.
وفيه معاهدة تانية عقدوها وأسمها (عهد الخيانة )
وبتنص أن ممكن تقوم الحرب بين العمالقة والملائكة ومتسقطش اللعنة فى حالة واحدة بس وهى الخيانة يعنى
لو حد من الملايكة خان مملكته وراح لعظيم أو العكس !!
مكتوب أن ده يعتبر مستحيل لآن المجناحين أواللى بيسموهم الملايكة اخلاقهم السامية مستحيل تسمحلهم يخونوا مملكتهم ...
والعمالقة أستحالة يخونوا أبوهم عظيم بالاضافة لانه عنيف جدا وكلهم بيخافوا منه .
أتلفت ورايا وبصيت على الطفل اللى نايم وقولت فى سرى :
وياترى أنت ايه بقى عملاق ولا مجنح !!
قفلت الكتاب ده وفتحت الكتاب التانى ...
تصفحت الكتاب ووقفت عند صورة صدمتنى !!!
